දේදුණු ආකාසේ වාර්තාගත අදායමක් ලබයි.

ආදරණීය කතාවක්‌’ නිසා පසුගිය වතාවේදී අපේ සිනමාව වෙත, සිනමා ශාලා වෙත ප්‍රේක්‌ෂකයා රොද බැඳගෙන ඇදී ආ අයුරු අමතක නැත. හරියටම ඉන් වසරකට පසුව මේ දවස්‌වල අපේ සිනමාවට ‘දේදුණු අකාසේ’ පායා ඇත. ‘ආදරණීය කතාවක්‌’ හා සමානවම ‘දේදුණු ආකාසේද’ අපේ සිනමාවට ප්‍රේක්‌ෂකයා කැන්දාගෙන එන චිත්‍රපටයක්‌ බවට මේ වන විට පත්ව ඇත.

මේ චිත්‍රපට දෙකේම අධ්‍යක්‌ෂවරයා ප්‍රියන්ත කොළඹගේය. ප්‍රියන්ත 1998 වසරේ සිට ‘දේදුණු ආකාසේ’ දක්‌වා චිත්‍රපට පහක්‌ අධ්‍යක්‌ෂණය කර ඇත. දැහැන (98), විමුක්‌ති (98) සහ අරුමෝසම් වැහි (2003) ප්‍රියන්තගේ අධ්‍යක්‌ෂණයන්ය. මේ චිත්‍රපට වගේම තිරරචනාද ප්‍රියන්තගේය. ‘ආදරණීය කතාවක්‌’ සහ ‘දේදුණු ආකාසේ’ නිෂ්පාදනයටද ප්‍රියන්ත දායක වී ඇත.

දේදුණු ආකාසේ’ මේ වන විට ඉතා සාර්ථක ලෙස ඊ. ඒ. පී. මණ්‌ඩලයේ සිනමා ශාලාවල තිරගත කෙරේ. චිත්‍රපටය ස්‌වර්ණවාහිනී නිෂ්පාදනයකි. අපි ‘දේදුණු ආකාසේ’ චිත්‍රපටය ගැන අධ්‍යක්‌ෂ ප්‍රියන්ත කොළඹගේ සමඟ සාකච්ඡා කළෙමු.

‘දේදුණු ආකාසේ’ ප්‍රදර්ශනය සාර්ථකද?

අති සාර්ථකයි. දින විසිතුනකදී ලක්‌ෂ 500 ක ආදායමක්‌ ලැබුවා. එය මෑත කාලයේ තැබූ වාර්තාවක්‌. ඇත්තටම චිත්‍රපටය ගැන සතුටක්‌ දැනෙනවා. ඉන්දියානු අධ්‍යක්‌ෂවරුන් කරන චිත්‍රපට සමඟයි අපට තරග කරන්න ලැබුණේ. ‘දේදුණු ආකාසේ’ සම්පූර්ණයෙන්ම සිංහල චිත්‍රපටයක්‌. එවන් චිත්‍රපටයකට ප්‍රේක්‌ෂකයන් සිටීම හොඳ දෙයක්‌.

චිත්‍රපටයට ප්‍රධාන කාන්තා චරිත ලෙස එක්‌වන්නේ නවක නිළියන් දෙපළක්‌. ඔවුන්ගේ රංගනය ගැන?

මම තෘප්තිමත්. මගේ උත්සාහය සාර්ථකයි. සිංහල සිනමා කර්මාන්තය රැඳී තිබෙන්නේ ප්‍රේක්‌ෂකයා මතයි. ප්‍රේක්‌ෂකයා චිත්‍රපට නොබලනවා නම් කර්මාන්තයකුත් නෑ. කලාවකුත් නෑ. මම සතුටු වෙනවා සිනමා කර්මාන්තයට යමක්‌ කළා කියලා. ප්‍රේක්‌ෂකයා අලුත් මුහුණු, නැවුම් රංගනයන් අපේක්‌ෂා කරනවා. ඔවුන් දෙදෙනාට දැන් අභියෝගයක්‌ තියෙනවා. ඒ අයගේ ඉදිරි ගමන දැන් ඔවුන් තීරණය කළ යුතුයි. මා කළේ හඳුන්වාදීම් පමණයි. ඒ ගැන සතුටුයි.

හේමාල් රණසිංහ ප්‍රමුඛ අනෙක්‌ ශිල්පීන්

මම ‘ආදරණිය කතාවක්‌’ කළේ ‘අරුමෝසම් වැහි’ කරලා අවුරුදු දහතුනකට පසුවයි. ‘ ආදරණීය කතාවක්‌’ චිත්‍රපටයට සම්බන්ධ කරගත් ශිල්පීන්ම තමයි ‘දේදුණු ආකාසේ’ චිත්‍රපටයටත් සම්බන්ධ කර ගත්තේ. මේක ප්‍රියත්ත කොළඹගේ ගෙ තනි නිර්මාණයක්‌ නොවේ. සියලු දෙනාගේම සාමූහික ප්‍රයත්නයක්‌. මේ අය මට යෝධ ශක්‌තියක්‌ වුණා. ඊළඟ චිත්‍රපටයටත් මේ පිරිසම තමයි.

ඔබ ඊළඟ නිර්මාණයට සූදානම්

ඔව්. මේ වසර අවසානයේ හෝ ඊළඟ වසර මුලදී මීළඟ චිත්‍රපටයේ වැඩ අරඹන්න සූදානම් බොහෝ විට ‘ආදරණීය කතාවක්‌’ නිෂ්පාදක චමින්ද ගමගේ අලුත් චිත්‍රපටයේත් නිෂ්පාදන කටයුත්ත භාර ගනීවි.

[rns_reactions]