මුහුණු පොතේ රුව ගිය; ව්‍යාජ මුදු දමා රන්මුදු සොරකම් කරන හෙර මාට්‌ටු

මුහුණු පොතේ රුව ගිය; ව්‍යාජ මුදු දමා රන්මුදු සොරකම් කරන හෙර මාට්‌ටු

විවිධ නගරවල ස්‌වර්ණභරණ වෙළෙඳසල්වලට ගොස්‌ රන්භාණ්‌ඩ මිලදී ගන්නා මුවාවෙන් රන්භාණ්‌ඩ සොරා ගන්නා කාන්තාවකගේ ඡායාරූපයක්‌ මුහුණු පොතට එක්‌කර තිබියදී ගම්පොළ පුස්‌සැල්ලාව නගරයේ රණ්‌භාණ්‌ඩ වෙළෙඳසල්වල ගැවසුණු එම කාන්තාව හඳුනාගෙන පුස්‌සැල්ලාව පොලිසිය මගින් අත්අඩංගුවට ගෙන තිබේ.

Loading...

22 හැවිරිදි එක්‌ දරු මවක්‌ වන ඇය මාවනැල්ල උස්‌සාපිටිය ප්‍රදේශයේ පදිංචිකාරියක්‌ වන අතර ඇගේ සැමියා හා ඇය තදින්ම හෙරොයින් පානයට ඇබ්බැහි වී ඒ සඳහා මුදල් සොයා ගැනීමට මේ ආකාරයට සොරකම් කිරීමට පුරුදු වී ඇති බව පොලිස්‌ පරීක්‍ෂණවලින් අනාවරණය වී ඇත.

රන්භාණ්‌ඩ වෙළෙඳසැල් වලින් මුදු පමණක්‌ සොරා ගැනීමට පුරුදු වී ඇති මෙම කාන්තාව පළමුව තනියම එම වෙළෙඳසල්වලට ගොස්‌ ඒවාට ඇති නිර්මාණ බලා (ඩිසයින්) පසුව ඒ ලෙස ඇති ඉමිටේෂන් මුදු (ව්‍යාජ) රැගෙන තම අත දරුවාද වඩාගෙන ගොස්‌ අත දරුවාගේ මුවාවෙන් රන්මුදු පැළඳ ව්‍යාජ මුදු එහි දමා මෙම සොරකම ඉතා සූක්‍ෂම අයුරින් සිදු කරන බව අනාවරණය වී ඇත.

මේ ලෙස ගම්පොළ වෙළෙඳසලකින් සොරා ගන්නා රන් මුදු දෙකක්‌ මෙම කාන්තාව අත පළදා ව්‍යාජ මුදු තබා යන අයුරු වෙළෙඳසලේ රහස්‌ කැමරාවල සටහන්ව තිබී එම වෙළෙඳසල් හිමියන් මෙම කාන්තාවගේ ඡායාරූප මුහුණ පොතට එක්‌කර තිබේ.

මෙම සොරකම් පිළිබඳව ගම්පොළ පොලිසිය වෙත පැමිණිලි ලැබී තිබිණි.

අත්අඩංගුවට ගත් කාන්තාව ගම්පොළ අධිකරණය වෙත ඉදිරිපත් කෙරුණු අතර ඇය හඳුනාගැනීමේ පෙරට්‌ටුවක ඉදිරිපත් කරන තුරු රක්‍ෂිත බන්ධනාගාර ගත කරන ලෙස මහෙස්‌ත්‍රාත් චාන්දනී මීගොඩ මහත්මිය නියෝග කළාය.

මෙම කාන්තාව විසින් සොරකම් කරන ලද රන් මුදු වැලිමඩ නගරයට උකස්‌කර ඇති බවට ලද තොරතුරකට අනුව පරීක්‍ෂණ පැවැත්වීමටද නියමිතය.

ගම්පොළ කොට්‌ඨාස භාර පොලිස්‌ අධිකාරී නුවන් මෙන්ඩිස්‌, සහකාර පොලිස්‌ අධිකාරී චන්ද්‍රසේන බණ්‌ඩාර, පුස්‌සැල්ලාව පොලිස්‌ ස්‌ථානාධිපති ප්‍රධාන පොලිස්‌ පරීක්‍ෂක සරත් බණ්‌ඩාර පලිපාන, ගම්පොල මූලස්‌ථාන පොලිස්‌ ස්‌ථානාධිපති ප්‍රධාන පොලිස්‌ පරීක්‍ෂක උපාලි සෙනරත් යාපා යන මහත්වරුන්ගේ උපදෙස්‌ මත පො. ප. කපිල බණ්‌ඩාර මහතා ප්‍රමුඛ පොලිස්‌ කණ්‌ඩායමක්‌ වැඩිදුර පරීක්‍ෂණ පවත්වති.

Loading...

Post Comment