කැබිනට් මණ්ඩලය ජනපති ගෝඨාභය රාජපක්ෂ මහතාගේ ප්රධානත්වයෙන් ඊයේ (18) රැස් වුණා. කොවිඩ් අවදානම නිසා මෙවර ද කැබිනට් මණ්ඩලය රැස් වුණේ ඔන්ලයින් තාක්ෂණය මගිනුයි.
මෙවර කැබිනට් මණ්ඩලයට ඉදිරිපත් කළ යෝජනා 12කට කැබිනට් මණ්ඩලයේ අනුමැතිය හිමිවූ බවයි රජයේ ප්රවෘත්ති දෙපාර්තමේන්තුව විසින් අද (19) දින නිකුත් කළ නිවේදනයේ සදහන් වුණේ. ඒ අනුව කැබිනට් අනුමැතිය හිමි වූ යෝජනා කිහිපයක් පහත දැක්වෙනවා.
කොවිඩ්-19 බලපෑමට ලක්වූවන්ට විදුලි හා ජල බිල්පත් ගෙවීමේදී සහන
කොවිඩ් – 19 වසංගත තත්ත්වය හේතුවෙන් බලපෑමට ලක්වූ හුදෙකලා කළ ප්රදේශවල විදුලි පාරිභෝගිකයින්ට, සිනමා ශාලාවලට සහ සංචාරක නවාතැන්පොළවලට විදුලි බිල්පත් ගෙවීමේදී සහනයක් ලබාදීමට ඊයේ (18) ජනපතිවරයාගේ ප්රධානත්වයෙන් රැස් වූ කැබිනට් මණ්ඩලයේ අනුමැතිය හිමිවී තිබෙනවා.
සංචාරක කර්මාන්තයේ නියුතු ආයතන වෙත විදුලි බිල්පතට අමතරව ජල බිල්පත් ගෙවීම සඳහා ද සහන සලසා දීමට අනුමැතිය හිමිවීම විශේෂත්වයක්.
විදුලිබල අමාත්යවරයා සහ සංචාරක අමාත්යවරයා විසින් ඉදිරිපත් කළ යෝජනා සැලකිල්ලට ගෙනයි මෙම කැබිනට් මණ්ඩලය මෙම තීරණය ගෙන තිබෙන්නේ.
අඛණ්ඩව දින 14කට වැඩි කාලයක් හුදකලා කර ඇති ප්රදේශවල ගෘහස්ථ, වාණිජ සහ කාර්මික විදුලි පාරිභෝගිකයින්ට එම කාල සීමාවට අදාළ විදුලි බිල්පත් ගෙවීම සඳහා බිල්පත් දිනයේ සිට මාස 06ක සහන කාලයක් ලබාදීමට සහ ජාතික චිත්රපටි සංස්ථාවේ ලියාපදිංචි සිනමා ශාලාවල 2020 මාර්තු මස සිට දෙසැම්බර් මස දක්වා වන විදුලි බිල්පත්, බිල්පත් දිනයේ සිට සමාන වාරික 12කින් ගෙවීම සඳහා අවස්ථාව සලසා දීමටත් සහ එතෙක් විදුලි සැපයුම විසන්ධි නොකිරීමටත් මෙහිදී තීරණය
ශ්රී ලංකා සංචාරක සංවර්ධන අධිකාරියේ ලියාපදිංචි නවාතැන් පොළවල්වලට 2020 මාර්තු මස 01 දින සිට 2021 පෙබරවාරි මස 28 දින දක්වා එකතු වී ඇති විදුලි බිල්පත් සහ ජල බිල්පත් සමාන මාසික වාරික 12කින් නිරවුල් කිරීම සඳහා ද අවස්ථාව දී තිබෙනවා.
පනත් කිහිපයක් සංශෝධනයට කිරීමට කැබිනට් අනුමැතිය
මේ අතර වර්තමාන අවශ්යතාවන්ට අනුව ගැලපෙන අයුරින් පනත් සංශෝධනය කිරීමට කැබිනට් මණ්ඩලයේ අනුමැතිය හිමිව තිබෙනවා. ඒ අනුව,
- ආගාමික හා විගාමික පනත. ( දැනට ක්රියාත්මකව පවතින1948 අංක 20 දරණ පනත සහ ඊට අදාළ සංශෝධන පරිච්ඡින්න කර අලුතින් පනතක් හඳුන්වා දීම),
- 2006 අංක 12 දරණ මුද්දර ගාස්තු ( විශේෂ විධිවිදාන) පවක 2011 අංක 13 දරණ පළාත් සභා ( මුද්දර ගාස්තු මාරු කිරීමේ ) පනත.
- 2016 අංක 3 දරණ සේවකයින්ගේ අවම වේතනය පනත.
- 1999 අංක 46 දරණ ප්රජාපාදක විශෝධන පනත.
- දණ්ඩනිතී සංග්රහයේ 53 වැනි වගන්තිය. (බාල වයස්කරුවන්ට මරණ දණ්ඩනය ලබාදීමට අදාළ විධිවිධාන )
මෙම පනත් සංශෝධනය කිරීමට අදාළව අමාත්යමණ්ඩලයට ඉදිරිපත් කරනු ලැබු යෝජනා , නිර්දේශ ලබා ගැනීම සඳහා ව්යවස්ථා කටයුතු පිළිබඳ අමාත්ය මණ්ඩල අනුකාරක සභාවට යොමු කිරීමෙන් අනතුරුව එය සැළකිල්ලට ගිනිමින් එම පනත් සංශෝධනය කිරීම සඳහා නීති කෙටුම්පත් සම්පාදකට උපදෙස් ලබා දීමට අමාත්යමණ්ඩලය මෙසේ අවසර ලබා දුන්නා.
දේශපාලන පළිගැනීම් පිළිබඳ කොමිසමේ නිර්දේශ ක්රියාත්මක කිරීමට කැබිනට් අනුමැතිය
දේශපාලන පළිගැනීම් පිළිබඳ විමර්ශනය කර තොරතුරු ලබාගැනීමේ ජනාධිපති කොමිෂන් සභාව විසින් ගනු ලැබූ තීරණ හා නිර්දේශ ක්රියාත්මක කිරීමට අමාත්ය මණ්ඩල අනුමැතිය හිමි වුණා.
ජනපතිවරයා විසිනුයි කැබිනට් මණ්ඩලයට මෙම යෝජනාව ඉදිරිපත් කර තිබුණේ.
නිලතල දැරූ රජයේ නිලධරයන්, රාජ්ය සංස්ථාවල සේවකයන්, සන්නද්ධ හමුදා සහ පොලිස් සේවයේ සාමාජිකයන් ආදීන්ට 2015 ජනවාරි මස 8 වැනි දින සිට 2019 නොවැම්බර් 16 වැනි දින දක්වා කාලසීමාවේදී සිදුවී ඇතැයි කියන දේශපාලන පළිගැනීම් පිළිබඳ පරීක්ෂා කර තොරතුරු ලබාගැනීම සඳහා ජනාධිපතිවරයා විසින් මෙම කොමිසම පත්කරනු ලැබිණි.
