දුම්රිය ගාස්තුව සියයට 15 කට වඩා වැඩි ප්‍රතිශතයකින් ඉහළ දමා ඇති බවට දුම්රිය මගීහු ඊයේ (1) චෝදනා කළහ.
සමස්ත දුම්රිය ගාස්තුව සියයට 15 කින් ඊයේ (1) සිට ඉහළ දැමීමට දුම්රිය දෙපාර්තමේන්තුව කටයුතු කර තිබුණු අතර ඒ අනුව නව දුම්රිය ගාස්තුව දුම්රිය ස්ථාන වෙතින් ඊයේ (1) අය කරන්නට වූහ.
මෙහිදී තමන්ගෙන් අයකරන ලද පැරණි දුම්රිය ගාස්තුවට සියයට 15 ක් ගණනය කර දුම්රිය මගීහු නව දුම්රිය ගාස්තුව අනුමාන කරගෙන සිටි නමුත් එම මුදලට වඩා වැඩි මුදලක් තම ටිකට් පත් සඳහා දුම්රිය ස්ථාන වෙතින් අයකර ඇති බව ඇතැම් දුම්රිය මගීහු පැවැසූහ. උදාහරණයක් ලෙස ගාල්ල සිට කොළඹ කොටුවට මීට පෙර තිබූ රුපියල් 100 ක දුම්රිය ගාස්තුව නව දුම්රිය ගාස්තු වැඩිවීමත් සමග රුපියල් 135 ක් වී තිබේ. නමුත් සියයට 15 න් දුම්රිය ගාස්තුව වැඩි කරන්නේ නම් එම දුම්රිය ගාස්තුව රුපියල් 115 ක් විය යුතු බව ඇතැම් දුම්රිය මගීහු පැවැසූහ. මගීහු මේ පිළිබඳව දුම්රිය ස්ථානාධිපතිවරුන් සමගද තර්ක කර තිබේ.
කෙසේ වෙතත් මෙම දුම්රිය ගාස්තු වැඩිවීමේදී කිසිදු දෝෂයක් සිදුවී නොමැති බව දුම්රිය දෙපාර්තමේන්තුව පවසයි. ඔවුන් පෙන්වා දෙන පරිදි දුම්රිය ගාස්තුව අය කරන්නේ දුම්රිය කලාප වශයෙන් බවත් ඒ අනුව බලන විට ඇතැම් දුම්රිය ගාස්තු සියයට 15 කට වඩා වැඩිවෙන බවත් එම දෙපාර්තමේන්තු ප්‍රධානියකු පැවැසීය.
එලෙසම දුම්රිය ගාස්තුවේ සියයට 15 ක වැඩිවීම ගණනය කරන්නේ දුම්රිය කලාපවල සමස්ත ගාස්තුවේ මධ්‍ය අගයට සියයට 15 ක් ලෙස බවත් ඔහු කීවේය. එමෙන්ම දුම්රිය ගාස්තුව ගණනය කිරීමේදී ආසන්න ඉහළ රුපියල් 5 ට වටයන නිසාද ඇතැම් ගාස්තුවල වැඩිවීමක් පෙන්නුම් කෙරේ. එමෙන්ම දුම්රිය ස්ථාන අතර පවතින දුරද ඇතැම් ගාස්තුවල බැලූ බැල්මට වෙනසක් පෙන්වීමට හේතුවන බවද ඔහු කීවේය.
දුම්රිය ගාස්තුව සියයට 15 න් ඉහළ දමන බවට දුම්රිය දෙපාර්තමේන්තුව ජනතාව වෙත පැවැසීම නිසා මෙම ගැටලුව ඇතිවී ඇති බව පැවැසූ ඒ මහතා දුම්රිය ගාස්තුව කලාප වශයෙන් සහ ගාස්තුවේ සමස්ත මධ්‍ය අගයෙන් සියයට 15 ක් වැඩිකරන බව පැවැසුවා නම් මගී ජනතාවට මෙවැනි මැසිවිලි නැගීමට හේතුවක් ඇති නොවන බවද ඔහු කීවේය.
වසර 10 කට පසුව ඉහළ ගිය මෙම දුම්රිය ගාස්තුව තවමත් පවතින්නේ සියලු බස් ගාස්තුවලට වඩා පහළ අගයක බව පැවැසූ ඒ මහතා ඒ නිසා නව ගාස්තු වැඩිවීමෙන් මගී ජනතාවට අසාධාරණයක් සිදුවී නොමැති බවද පැවැසීය.
