මෙරට ජනගහනයෙන් සියයට 20 කට කොවිඩ් සදහා වන එන්නත ලබාදීමට ලෝක සෞඛ්ය සංවිධානය එකඟතාව ලබාදෙයි. මෙම එන්නත ලබාදීම සදහා වන කරුණූ සෙවීමට සෞඛ්ය අමාත්ය පවිත්රා වන්නිආරච්චි මහත්මිය කමිටුවක් පත් කරයි.
කොවිඩ්-19 රෝගය වැළැක්වීම සදහා ශ්රී ලංකාව තුල ඊට අදාල එන්නත භාවිතා කිරීම සම්බන්ධයෙන් විශේෂ සාකච්ඡාවක් සෞඛ්ය අමාත්ය පවිත්රා වන්නිආරච්චි මහත්මියගේ ප්රධානත්වයෙන් සහ ඖෂධ නිෂ්පාදන, සැපයීම සහ නියාමන රාජ්ය අමාත්ය චන්න ජයසුමන මහතාගේ සහ ලෝක සෞඛ්ය සංවිධානයේ මෙරට නේවාසික නියෝජිත වෛද්ය රාසියා පෙන්ඩ්සේ මහත්මියගේ සහභාගීත්වයෙන් සෞඛ්ය අමාත්යාංශයේ දී පැවැත්විති.
මෙහිදී ශ්රී ලංකාවේ ජන ගහනයෙන් සියයට 20 කට මෙම එන්නත ලබාදීම සදහා ලෝක සෞඛ්ය සංවිධානය එකඟ වී ඇති බව ලෝක සෞඛ්ය සංවිධානයේ මෙරට නේවාසික නියෝජිත වෛද්ය රාසියා පෙන්ඩ්සේ මහත්මිය මෙහිදී අවධාරණය කරන ලදි.
ඒ අනුව ඒ සදහා අවශ්ය අරමුදල් සම්පාදනය කිරිම, එන්නත ලබාදෙන පිරිස් තීරණය කිරිම, ඊට අදාල භෞතික සම්පත් කළමණාකරණය, තොරතුරු ලබාගැනීම, කරුණු ගොනු කිරිම වැනි කාරණා සම්බන්ධයෙන් සොයාබැලීම සදහා විශේෂ කමිටුවක් පත් කිරීමට මෙහිදී සෞඛ්ය අමාත්ය පවිත්රා වන්නිආරච්චි මහත්මිය පියවර ගන්නා ලදි.
මෙම අවස්ථාවට සෞඛ්ය ලේකම් මේජර් ජනරාල් වෛද්ය සංජීව මුණසිංහ මහතා, සෞඛ්ය සේවා අධ්යක්ෂ ජනරාල් වෛද්ය අසේල ගුණවර්ධන මහතා, සෞඛ්ය අමාත්යාංශයේ අතිරේක ලේකම්වරුන් ඇතුලු නිලධාරීන් පිරිසක් එක්ව සිටියහ.