වසර තුනක සිර දඬුවම් හා දඩ නියම වී ඇප මත මුදාහැර සිටි හිටපු ජනාධිපති ලේකම් ලලිත් වීරතුංග සහ විදුලි සංදේශ නියාමන කොමිසමේ හිටපු අධ්යක්ෂ ජනරාල් අනූෂ පැල්පිට යන මහත්වරු එම චෝදනා වලින් නිදොස් කොට නිදහස් කිරීමට අභියාචනාධිකරණය අද (19) තීන්දු කළේය.
මෙම අභියාචන පෙත්සම් පිළිබද අභියාචනාධිකරණ තීන්දුව පසුගිය නොවැම්බර් 13 වැනිදා ප්රකාශයට පත් කිරීමට නියමිතව තිබූ නමුත් කොළඹ අලුත්කෙඞ් බල ප්රදේශයට නිරෝධායන ඇදිරි නීතිය පනවා තිබීම හේතුවෙන් එදින එය ප්රකාශයට පත් නොකෙරුණු අතර ප්රකාශයට පත් කිරීම අද දිනට කල් තැබිණි.
2015 ජනාධිපතිවරණය සමයේ දිවයින පුරා විහාරස්ථානවලට සිල් රෙදි බෙදා හැරීම මගින් රජයට අයත් රුපියල් මිලියන 600ක මුදල් අවභාවිත කිරීම හා පාඩුවක් සිදු කිරීමේ චෝදනාවට හිටපු ජනාධිපති ලේකම් ලලිත් වීරතුංග සහ විදුලි සංදේශ නියාමන කොමිසමේ හිටපු අධ්යක්ෂ ජනරාල් අනූෂ පැල්පිට යන අය කොළඹ මහාධිකරණය විසින් වරදකරුවන් කර තිබිණී.
තමන්ට දඬුවම් නියම කර ඇති ආකාරයන් නීතියට පටහැනි බවත් තමාව සියලු චෝදනාවලින් නිදොස් කොට නිදහස්කරන ලෙසත් ඉල්ලමින් හිටපු ජනාධිපති ලේකම් ලලිත් වීරතුංග සහ විදුලි සංදේශ නියාමන කොමිසමේ හිටපු අධ්යක්ෂ ජනරාල් අනූෂ පැල්පිට යන මහත්වරුන් විසින් ගොනු කර ඇති අභියාචනා පෙත්සම් පිළිබද තීන්දුව ලබා දෙමින් කුමුදුනි වික්රමසිංහ සහ දේවිකා අබේරත්න යන මහත්මීන් ගෙන් සමන්විත අභියාචනාධිකරණ විනිසුරු මඩුල්ල විසින් මෙම තීන්දුව ලබා දුන්නේය.
යහපාලන රජය බලයට පත් වූ මුල් යුගයේ කොළඹ මහාධිකරණය විසින් ලබා දුන් මෙම නඩු තීන්දුව දේශපාලන හා සමාජයීය වශයෙන් ආන්දෝලනයට ලක් වූ අතර ඇතැම් භික්ෂූන් අදාළ දඩ මුදල් ගෙවීමට පිඩුසිගා වඩින බව ද ප්රකාශ කළහ.