අපරාධ පරීක්‍ෂණ දෙපාර්තමේන්තුවේ අධ්‍යක්‍ෂ, ජ්‍යෙෂ්ඨ පොලිස්‌ අධිකාරි ශානි අබේසේකර මහතාට බැණ වැදී මරණීය තර්ජනය කිරීමේ අධි චෝදනාවට වරදකරු කරනු ලැබූ හිටපු නියෝජ්‍ය පොලිස්පති වාස් ගුණවර්ධන මහතාට කොළඹ මහාධිකරණ විනිසුරු ගිහාන් කුලතුංග මහතා ඊයේ (12 දා) බරපතළ වැඩ සහිත වසර පහක සිරදඬුවම් නියම කළේය.
එයට අමතරව රුපියල් 25,000 ක දඩයක්‌ද නියම කළ මහාධිකරණ විනිසුරුවරයා එම දඩය නොගෙවන්නේ නම් අමතර එක්‌ වසරක සිරදඬුවම් ලබාදීමටද නියම කළේය.
පොලිස්‌ දෙපාර්තමේන්තුවේ ජ්‍යෙෂ්ඨ නිලධාරියකු ලෙස රාජකාරි කරමින් සිටියදී තම තනතුරට පහළ නිලධාරියකුට තර්ජනය කිරීම සුළුකොට තැකිය නොහැකි බව පෙන්වා දුන් විනිසුරුවරයා එම දඬුවම් නියම කළේය.
කෙසේ නමුත් විත්තිකරුට එරෙහිව ඇති සෙසු අධිචෝදනා පහ පැමිණිල්ල විසින් සාධාරණ සැකයෙන් ඔබ්බට ඔප්පුකොට නොමැති බවට නිගමනය කළ විනිසුරුවරයා එම චෝදනාවලින් විත්තිකාර වාස් ගුණවර්ධන මහතා නිදොස්‌කොට නිදහස්‌ කිරීමටද නියෝග කළේය.
කෝටිපති ව්‍යාපාරික මොහොමඩ් ෂියාම් ඝාතන සිද්ධිය සම්බන්ධයෙන් ප්‍රකාශයක්‌ ලබා ගැනීමට කැඳවා දීර්ඝ ලෙස ප්‍රශ්න කර අත්අඩංගුවට ගත් අවස්‌ථාවේදී එනම් 2013.06.10 වැනිදා අපරාධ පරීක්‍ෂණ දෙපාර්තමේන්තුව තුළදී එවකට සහකාර පොලිස්‌ අධිකාරිවරයකු ලෙස කටයුතු කළ ශානි අබේසේකර, එවකට පොලිස්‌ පරීක්‍ෂකවරුන් ලෙස කටයුතු කළ රංජිත් මුණසිංහ, පොලිස්‌ පරීක්‍ෂක දිසානායක යන නිලධාරීන්ට විත්තිකාර වාස් ගුණවර්ධන මහතා විසින් මරණීය තර්ජනය කළ බව එම පැමිණිල්ලේ සඳහන් විය.
“ශානි මට තේරුණා උඹලා මට මේ දේ කරනවා කියලා. හැබැයි උඹලාට මාව හැමදාම ඇතුළේ තියාගන්න බෑ. මම මිනීමරුවෙක්‌. එළියට ගියදාට බලාපල්ලා උඹලාට කරන දේ” යෑයි තර්ජනය කිරීම, රජයේ නිලධාරීන්ගේ රාජකාරියට බාධා කිරීම ඇතුළු අධි චෝදනා හයක්‌ යටතේ නීතිපතිවරයා විසින් එම නඩුව පවරා තිබිණි.
විත්තිකරුට එරෙහිව එල්ල වී ඇත්තේ මහෙස්‌ත්‍රාත් අධිකරණයක්‌ හමුවේ නඩු විභාගයක්‌ පැවැත්වීමකින් තොරව සමථ මණ්‌ඩලයකට යොමුකර සමථයට පත්කළ හැකි චෝදනා බැවින් ඔහු සියලු අධි චෝදනාවලින් නිදොස්‌කොට නිදහස්‌ කරන ලෙස විත්තිය වෙනුවෙන් පෙනී සිටින නීතිඥ අනුර සෙනවිරත්න මහතා අධිකරණයෙන් ඉල්ලා සිටියේය.
රජයේ නිලධාරියකුට තර්ජනය කිරීම සුළුකොට තැකිය හැකි වරදක්‌ නොවන බැවින් ලබාදිය හැකි උපරිම දඬුවම් නියම කරන ලෙස රජයේ ජ්‍යෙෂ්ඨ අධිනීතිsඥ වසන්ත පෙරේරා මහතා අධිකරණයෙන් ඉල්ලා සිටියේය.
කෝටිපති ව්‍යාපාරික මොහොමඩ් ෂියාම් ඝාතනය කිරීම ඇතුළු අධි චෝදනා කිහිපයකට වරදකරු කර 2016 වසරේ දී මහාධිකරණය විසින් මරණීය දණ්‌ඩනය නියම කර සිටින වාස් ගුණවර්ධන මහතා ඊයේ දඬුවම් නියම කිරීමට පෙර අධිකරණය අමතා ප්‍රකාශයක්‌ කිරීමට සිය නීතිඥවරයා මාර්ගයෙන් අධිකරණයෙන් අවසර ඉල්ලා සිටි අතර අධිකරණය එම අවසරය ලබාදීම ප්‍රතික්‌ෂේප කළේය.
-ඒ. ඡේ. ඒ. අබේනායක
