ඇතැමුන් චෝදනා කළත් මෙරටට පැමිණෙන චීන ජාතිකයින් ශ්‍රී ලංකා රජය මැදිහත් වී නිරෝධායනය නොකරන්නේ චීන රජයේ මැදිහත්වීමෙන් ඔවුන් මෙරටදී දින 14 ක් නිරෝධායනය කෙරෙන නිසා යැයි සෞඛ්‍ය සේවා අධ්‍යක්‍ෂ ජනරාල් විශේෂඥ වෛද්‍ය අනිල් ජාසිංහ මහතා පැවසීය.
අධ්‍යක්‍ෂ ජනරාල්වරයා මේ බව පැවසුවේ රජයේ ප්‍රවෘත්ති දෙපාර්තමේන්තුවේ දී අද (13) පැවති මාධ්‍ය හමුවක් අමතමිනි.
මෙහිදී වැඩි දුරටත් අදහස් දක්වමින් ජාසිංහ මහතා කියා සිටියේ මේ වන විට චීනයෙන් මෙරටට පැමිණෙන්නේ රැකියා කරන පිරිස්ම පමණක් බවත් ඔවුන්ව එලෙස චීන රජයේ මැදිහත්වීමෙන් මෙරටදී දින 14ක් නිරෝධායනය කෙරෙන අතර මෙරට සෞඛ්‍ය වෛද්‍ය නිලධාරීන් මගින්ද ඔවුන් සම්බන්ධයෙන් පසුවිපරම් කෙරෙන බවයි.
චීනයේ සිට පැමිණෙන්නන් නිරෝධායනය නොකරන්නේ ඇයිද යන්න ගැන සමාජයේ කතිකාවතක් මතුවී ඇතැයි කී සෞඛ්‍ය සේවා අධ්‍යක්‍ෂ ජනරාල්වරයා මේ වන විට චීනයේ කොරෝනා පැතිර යන ප්‍රාන්තයන්හි සිට කිසිම පුද්ගලයෙක් විදේශයන්ට නොයන බව ද සඳහන් කළේය.
මේ වන විට චීනය රෝගය පාලනය කරගනිමින් තිබෙන අතර එහි රෝගය පවතින හුබෙයි ප්‍රාන්තය ඇතුළු ප්‍රදේශයන්හි ජනතාවට තවමත් ඉන් පිටවීම තහනම් කර තිබෙන බවද අනිල් ජාසිංහ මහතා කීවේය.
විදෙස් රටවල සිට පැමිණි 4,794 දෙනෙක් සම්බන්ධයෙන් මේ වන විට සෞඛ්‍ය අංශ පසුවිපරම් කරන බව කී අනිල් ජාසිංහ මහතා ඉන් 3,035 දෙනෙක් ශ්‍රී ලාංකිකයින් වන අතර 1,153 දෙනෙක් චීන ජාතිකයින් බව ද වැඩි දුරටත් සදහන් කළේය.
