කොවිඞ්-19 වසංගත අවදානම නිසා වසාදමා ඇති බස්නාහිර පළාතේ පාසල් පෙබරවාරි 15 වනදා වනවිට ආරම්භ කිරීමට අපේක්ෂා කරන බව අධ්‍යාපන අමාත්‍යාංශ ලේකම් මහාචාර්ය කපිල පෙරේරා මහතා පවසයි.
ඊයේ (20) අධ්‍යාපන අමාත්‍යාංශයේ පැවැති විශේෂ සාකච්ඡුාවකදී මෙම තීරණය ගත් බවයි අධ්‍යාපන අමාත්‍යාංශ ලේකම්වරයා කියා සිටියේ.
ලබන 25 වැනිදා බස්නාහිර පළාතේ හුදකලා කර ඇති ප්රදේශවල හැර සෙසු ප්රදේශවල පාසල් 907ක සාමාන්‍ය පෙළ පන්ති ආරම්භ කිරීමට තීරණය කර ඇති බවත් සෙසු පන්ති ආරම්භ කිරීම පිළිබඳව තීරණය කිරීම සඳහා එක් එක් දිස්ත්‍රික්කවල දිසාපතිවරුන්, ප්‍රාදේශීය ලේකම්වරුන්, පළාත් පාලන ආයතන ප‍්‍රධානීන් ඇතුළු සියලු පාර්ශවවල අදහස් විමසා බැලීමෙන් අනතුරුව සෞඛ්‍ය බලධාරීන් සමග ද සාකච්ඡා කර ඔවුන්ගේ නිර්දේශ පෙබරවාරි 10 වනදා වනවිට ලබාගැනීමට ඊයේ (20) අධ්‍යාපන අමාත්‍යාංශයේදී පැවති සාකච්ඡාවකදී තීරණය වූ බවයි අධ්‍යාපන අමාත්‍යාංශ ලේකම්වරයා කියා සිටියේ.
නව පාසල් වාරය වෙනුවෙන් බස්නාහිර සහ හුදකලා කළ ප්‍රදේශ හැර අනෙකුත් සියලු ප්රදේශවල පාසල් අධ්‍යාපන කටයුතු සාමාන්‍ය තත්ත්වයෙන් පවත්වාගෙන යන බව අධ්‍යාපන ලේකම්වරයා වැඩිදුරටත් සඳහන් කළා.
