Author: Editor[A]

ජනාධිපති මෛත්‍රීපාල සිරිසේන මහතා සහ මාධ්‍ය ආයතන ප්‍රධානීන් අතර හෙට (16) උදේ කොළඹ ජනාධිපති මන්දිරයේදී පැවැත්වීමට නියමිතව තිබූ හමුව හදිසියේ අවලංගු කර ඇතැයි වාර්තාවේ.
 
ජානාධිපතිවරයා සහ මාධ්‍ය ආයතන ප්‍රධානීන් අතර හමුවක් හෙට උදේ 8.00ට ජනාධිපති මන්දිරයේදී පැවැත්වෙන බැවින් ඊට සහභාගි වන්නයි ජනාධිපති කාර්යාලය මාධ්‍ය ආයතන ප්‍රධානීන් වෙත ලිඛිතව ආරාධනා කර තිබිණි.

ජනාධිපති මෛත‍්‍රීපාල සිරිසේන මහතා  අද (16) විශේෂ ප‍්‍රකාශයක් සිදු කිරීමට නියමිතයි.

ජනාධිපතිවරයාගේ විශේෂ ප‍්‍රකාශයේ දී අග‍්‍රාමාත්‍ය ධුරය, වත්මන් දේශපාලන තත්වය සහ ජාතික ආණ්ඩුවේ ඉදිරිය පිළිබඳ කරුණු පැහැදිලි කරනු ඇති බවයි පැවසෙන්නේ. ජනාධිපතිවරයා සහ මාධ්‍ය ප‍්‍රධානීන් අතර හමුවක් අද පෙරවරුවේ පැවැත්වීමට සැලසුම් කර තිබූණද පසුව එය අවලංගු කෙරුණා.

ශ‍්‍රී ලංකා නිදහස් පක්ෂ මැති ඇමතිවරුන් පවසන්නේ ශ‍්‍රී ලංකා නිදහස් පක්ෂ තනි ආණ්ඩුවක උත්සහ තවමත් අත්හැර නොමැති බවයි. විජිත් විජයමුණි, ලක්ෂ්මන් යාපා අබේවර්ධන, ඩිලාන් පෙරේරා සහ මහින්ද අමරවීර ඒ බව පැවසුවා.

නීතිය හා සාමය අමාත්‍යාංශය පවරා දිය හැකි විශිෂ්ටතම පුද්ගලයා ෆීල්ඩ් මාර්ෂල් සරත් ෆොන්සේකා මහතා වන බවට ජ්‍යෙෂ්ඨ කථිකාචාර්ය පූජ්‍ය දඹර අමිල හිමියෝ පෙන්වා දෙති.

මරදාන පිහිටි සී.එස්.ආර්. ශාලාවේදී පැවැති මාධ්‍ය හමුවකට අද (15දා) පස්වරුවේ එක්වෙමින් උන්වහන්සේ පෙන්වා දුන්නේ පෙර පරිදි සුදුවෑන් පිටත් නොකළද, වත්මන් ආණ්ඩුව යටතේ හොරු ඇල්ලීමේ කටයුතු මෙහෙයවන ප්‍රධානීන්ට එරෙහිව මහින්ද රාජපක්ෂ පාර්ශ්වය විසින් මුදල් යොදවා කුමන්ත්‍රණ දියත් කරමින් සිටින බවයි.

ඒ අනුව ප්‍රජාතන්ත්‍රවාදී ප්‍රවාහය තුළ කළ නොහැකි දේ පවා අනුගමනය කරමින් රට තුළ මහජන ශික්ෂණය ස්ථාපිත කිරීමට ශක්තිමත්, නිර්භය නායකත්වයක් අවශ්‍යව ඇති බවත්, එම තනතුර සඳහා වඩාත් යෝග්‍යතම පුද්ගලයා සරත් ෆොන්සේකා මහතා වන බවත් අමිල හිමියෝ එහිදී පෙන්වා දුන්හ

අග‍්‍රාමාත්‍ය ධුරය සම්බන්ධයෙන් අද (15) පැවති දේශපාලන සාකච්ඡා කිහිපයකදීම අවධානය යොමුව තිබෙනවා. එක්සත් ජාතික පක්ෂයේ පාර්ලිමේන්තු මන්ත‍්‍රී කණ්ඩායමේ රැස්වීමේ දී තීරණය කර ඇත්තේ රනිල් වික‍්‍රමසිංහ මහතා තවදුරටත් අග‍්‍රාමාත්‍ය ධුරයේ රැඳී සිටිය යුතු බවයි. ඊට සහභාගී වූ පාඨලී චම්පික රණවක අමාත්‍යවරයා ද අවධාරණය කර ඇත්තේ ජාතික ආණ්ඩුව තවදුරටත් පැවතිය යුතු බවත් අග‍්‍රාමාත්‍ය ධුරයේ රනිල් වික‍්‍රමසිංහ මහතා තවදුරටත් කටයුතු කළ යුතු බවත්ය.

කෙසේ වෙතත් එක්සත් ජාතික පක්ෂයේ තවත් අමාත්‍යවරුන් කණ්ඩායමක් අද දිනයේ රහස් සාකච්ඡා වට කිහිපයක් පවත්වා ඇති බවයි දේශපාලන ආරංචි මාර්ග සඳහන් කළේ. එහිදී සාකච්ඡාවට බඳුන් වී ඇත්තේ කථානායක කරූ ජයසූරිය මහතා හෝ රංජිත් මද්දුම බණ්ඩාර අමාත්‍යවරයා අග‍්‍රාමාත්‍ය ධුරයට පත්කළ හැකිද යන්න පිළිබඳවයි. 

එහෙත් ශ‍්‍රී ලංකා නිදහස් පක්ෂයේ හා ඒකාබද්ධ විපක්ෂයේ බහුතරයකගේ කැමැත්ත වී ඇත්තේ අමාත්‍ය නිමල් සිරිපාල ද සිල්වා මහතා අග‍්‍රාමාත්‍ය ධුරයට පත් කිරීමටයි. 

කෙසේ වෙතත් අග‍්‍රාමාත්‍ය ධුරය සහ වත්මත් ආණ්ඩුව තවදුරටත් පවත්වාගෙන යන්නේ ද යන්න පිළිබඳ අවසන් තීන්දුව ජනාධිපති මෛත‍්‍රීපාල සිරිසේන මහතා විසින් හෙට (16) පෙරවරුවේ මාධ්‍ය ආයතන ප‍්‍රධානීන් සමග පැවැත්වෙන හමුවේ දී ප‍්‍රකාශ කරනු ඇති බවයි වාර්තා වන්නේ.  

පැවති පළාත් පාලන මැතිවරණයේදී පොහොට්ටුව ජයග්‍රහණය කිරීම පිලිබදව බොදු බල සේනා සංවිධානයේ මහ ලේකම් රාජකීය පණ්ඩිත ගලගොඩඅත්තේ ඥානසාර හිමි ඒ අද (15) රාජගිරිය බොදු බල සේනා ලේකම් කාර්යාලයේ පැවති මාධ්‍ය හමුවකදී අදහස් දැක්වුයේ මෙසේය..

මහින්ද රාජපක්ෂ මහතා ගොඩනගා ඇති සමාජ ප්‍රාග්ධනය මත මෙම ජයග්‍රහණය ලැබූ බවත් ඒ පිලිබදව කිසිවකුත් උඩපනින්න දගලන්න අවශ්‍ය නොවන බවත් ජී.එල් පීරිස් මහතා පැකේජය පෙඩරල් විවස්ථාව ගෙන එන අවදියේදී සිටියේ කොතනද යන්න දන්නා බවත්, ඒ ගැන දුක් වීමක් නැති බවත් අද හරි තැන හිටගෙන සිටීම පිලිබදව සතුටු වෙන බවත් ඥානසාර හිමි පැවසුවා.

නමුත් එතුමාගේ ලිපි ශිර්ෂ යටතේ ව්‍යාජ පුවතක් පදනම් කරගෙන නිකුත් කර ඇති නිවේදනය වැරදි මෙන්ම බොදු බල සේනා සංවිධානය කිසිදු දේශපාලන පක්ෂයකට සහයෝගය නොදැක්වූ බවත් “මුස්ලිම් ජනතාව මුලා කිරීමට තවත් උත්සහයක්” ලෙස ඉදිරිපත් කර ඇති මාධ්‍ය නිවේදනය පදනම් විරහිත බවත් උන් වහන්සේ පැවසීය.

මේ වෙලාවේදී කා සමගවත් ගැටුමකට නොයන බව පැවසු උන්වහන්සේ රට ඉතා භයානක තත්වයක මේ වන විට පවතින බව පැවසුවා. මන්ත්‍රීවරු කුණු මාළු මෙන් ලංසුවලට විකිණෙමින් පවතින බවත් බොරු පුවත් අන්තර්ජාල මාධ්‍ය තුල පලකරන්නන්ට විරුද්දව පොලිස්පතිවරයාට පැමිණිලි කර ඇති බවත් උන්වහන්සේ සඳහන් කර සිටියා.

“මුස්ලිම් ජනතාව මුලා කිරීමට තවත් උත්සහයක්” යන ශීර්ෂය යටතේ නිකුත් කර ඇති නිවේදනය අසත්‍ය කරුණු මත පදනම් වුවක් බවත් හිතාගතවත් නොහැකි බොරු එම ප්‍රකාශයේ ඇති බවත්  පැවසූ ඥානසාර හිමි පසුගිය කාලයේ ඇතිවූ ගැටුම් පිලිබදව පොදුවේ සෙවීමට කොමිසමක් පත් කළයුතු බව දිගින් දිගටම බොදු බල සේනා සංවිධානය ඉල්ලීම් කළ බවත් පැවසීය.

ජි එල් ඇතුළු ඒකාබද්ධ විපක්ෂයේ හතර පස් දෙනෙක් බොදු බල සේනා සංවිධානය විනාශ කරන්න ඕනෑ යැයි සිතන බව පැවසු උන්වහන්සේ නින්දෙන් ඇහැරුණු බබ්බු මෙන් ලැබුණු මැතිවරණ ප්‍රතිපලයෙන් ඔලුව උදුම්මවා මළ සමයං නැටීමට එන්න එපායැයි උන්වහන්සේ එහිදී පැවසුවා. මුස්ලිම් ප්‍රශ්නය පිලිබදව අපට චෝදනා කිරීමට පෙර කන්නාඩියක් ඉදිරයට ගොස් ඇඳුම් උනා දමා සියල්ල තිබෙනවාදැයි බලන්න කියලා අපි ජී ඇල්ට  කියනවා යැයි පැවසීය.

ඉන්න කාලෙත් විසඳුමක් නොදී සිට තමන්ගේ දේශපාලන බලය හසුරුවා ගැනීමට ජාතික වැඩපිළිවෙලක නියැලෙන බොදු බල සේනාව පාපන්දුවක් කර නොගෙන මුස්ලිම් ඡන්ද ලබාගැනීමට අවශ්‍යනම් කළයුත්තේ  මුස්ලිම් ගැටලුව පිලිබදව ඒකාබද්ධ විපක්ෂයේ මතය කුමක්දැයි පැහැදිලි කිරීම බව උන්වහන්සේ පැවසීය.

දිනක් තුළ ඇප තුනක් ලබා ගත්තේ තමන් වහන්සේ වැරද්දක් නොකළ නිසා බව පැවසූ උන්වහන්සේ බුද්ධි අංශ පවා එය  සනාථ කළ බවත් තමන් වහන්සේ අත්අඩංගුවට ගැනීමට විරුද්ධව ලංකාවේ ඉහලම නිතිඥ මහතුන් විසින් ශ්‍රේෂ්ඨාධිකරණයේ  මුලීක අයිතිවාසිකම් පෙත්සමක් ගොනු කළ බවත් එය විභාගයට ගැනීමට දිනක් තිබියදී තමන් වහන්සේට ඇප ලැබුණු බවත් ජී එල්ට ඒ පිලිබදව ඇති අමාරුව කුමක්දැයි ප්‍රශ්න කර සිටි ඥානසාර හිමි “මොකද්ද මේ මිනිසුන්ගේ කුපාඩි දේශපාලනය” යැයි විමසුවා.

වත්මන් අගමැතිවරයා ලෙස කටයුතු කරන රනිල් වික්‍රමසිංහ මහතා සහ හිටපු ජනාධිපති මහින්ද රාජපක්ෂ මහතා අතර තිබෙන ගජමිතුරු දේශපාලනය සහ ඩීල් ගැසීම දෙස්-විදෙස් සියලු දේශපාලඥයින් සහ ජනතාව අතර ප්‍රසිද්ධ රහසකි.

අද එය සාක්ෂි සහිතව දොස්තර රාජිත සේනාරත්නගේ කටින්ම සියලු මාධ්‍ය වෙත අනාවරණය විය.

අගමැතිධුරයෙන් ඉවත් නොවන්නැයි මහින්ද රාජපක්ෂ මහතා රනිල් වික්‍රමසිංහ මහතාට දුරකතනයෙන් පවසා ඇතැයි කැබිනට් ප්‍රකාශක රාජිත සේනාරත්න මහතා පවසා ඇති අතර පළාත් පාලන මැතිවරණයේ ප්‍රතිඵලය අනුව එජාපය යම් ඡන්ද ප්‍රතිශතයක් ලබා තිබෙන බවද අගමැතිධුරයෙහි වෙනසක් අවශ්‍ය නොවන බවද රාජපක්ෂ මහතා අගමැතිවරයාට පවසා ඇතැයි ද සදහන්. 

කැබිනට් ප්‍රකාශක අමාත්‍ය රාජිත සේනාරත්න මේ බව ප්‍රකාශ කළේ අද (15) පැවති කැබිනට් තීරණ දැනුම්දීමේ ප්‍රවෘත්ති සාකච්ඡාවට එක්වෙමිනි.

පවතින දේශපාලන තත්වය හමුවේ පුජ්‍ය මාඳුළුවාවේ සෝභිත හිමියන්ගේ නාමයෙන් අගමැති කම භාරගන්නා ලෙසට එක්සත් ජාතික පක්ෂයේ ජ්‍යේෂ්ඨ නායකයෙකු සහ කෘතහස්ත දේශපාලනඥයෙකු වන කරු ජයසුරිය මහතාට මේ වන විට දසතින් බලපෑම් එල්ල වෙමින් පවතින බවට වාර්තාවේ.

රනිල් වික්‍රමසිංහ මහතා අගමැතිවරයා ලෙස තබාගනිමින් මෙම යහපාලන ආණ්ඩුව තවදුරටත් ඉදිරියට ගෙන යා නොහැකි බව ආණ්ඩුවේ පාර්ශවකරුවකු වන ශ්‍රී ලංකා නිදහස් පක්ෂය ජනාධිපතිවරයාට නිලවශයෙන් දැනුම් දීමෙන් අනතුරුව වික්‍රමසිංහ මහතාට එම තනතුරෙන් ඉවත්වන ලෙස ජනාධිපතිවරයා විසින් පසුගියදා දැනුම් දෙන ලදී.

එහෙත් දිගින් දිගටම රනිල් වික්‍රමසිංහ මහතා අගමැතිධුරයෙන් ඉල්ලා අස්නොවී බලහත්කාරයෙන් අගමැතිධුරයේ රැඳී සිටීම හේතුවෙන් මේ වන විට රටේ අස්ථාවර තත්වයක් මෙන්ම එජාපයෙන් ආණ්ඩු බලය ගිලිහී යෑමටද ආසන්න තත්වයක පවතී. මේ හේතුවෙන් මෙම දේශපාලන අර්බුදය සමනය කොට යහපාලන ආණ්ඩුව දිගටම පත්වාගෙන යෑම සඳහා කරු ජයසුරිය මහතාට වහාම අගමැතිධුරය ලබාදිය යුතු බවට එජාපයට සහ රනිල් වික්‍රමසිංහ මහතාට දසතින් බලපෑම් එල්ලවෙමින් තිබෙන බවට වාර්තාවේ.

මෙම දේශපාලන අර්බුදය නිමාකිරීමටත්, වත්මන් යහපාලන ආණ්ඩුව පවත්ගෙන යෑමටත්, එක්සත් ජාතික පක්ෂයට ආණ්ඩු බලය තබාගැනීමටත් ඇති එකම විසඳුම මෙය බව දේශපාලන විචාරකයෝ මේ වන විට අදහස් පළකරමින් කියති.

ජවිපෙට ඡන්දේ දුන් ජනතාවගේ අභිලාෂයන්ට පිටුපා වෙනත් පක්ෂ සමග එක්ව පළාත් පාලන ආයතනවල බලය පිහිටුවිමට හෝ ආණ්ඩු පිහිටුවිමට හෝ කිසිවිට කටයුතු කරන්නේ නැතැයි ජනතා විමුක්ති පෙරමුණේ නායක පාර්ලිමේන්තු මන්ත‍්‍රී අනුර කුමාර දිසානායක මහතා පවසයි.

දිසානායක මහතා මේ බව පැවසුවේ ජනතා විමුක්ති පෙරමුණේ ප‍්‍රධාන කාර්යාලයේදි  අද (15) පැවති මාධ්‍ය සාකච්ඡාවකදී අදහස් දක්වමිනි.

තවදුරටත් අදහස් දැක්වු දිසානායක මහතා මෙසේද පැවසීය.
“අපේ ඡන්ද ප‍්‍රමාණය මහමැතිවරණයට සාපේක්ෂව ලක්ෂ දෙකකට ආසන්න ප‍්‍රමාණයකින් වැඩිවි තිබෙනවා. අපට ඡන්දය දුන් සියලූ දෙනාගේ අරමුණ පවතින සමාජ ආර්ථික ප‍්‍රතිපත්තියට එරෙහි ප‍්‍රතිපත්තියක් ක‍්‍රියාවට නැංවීමයි. ඒ වගේම මේ ප‍්‍රධාන දේශපාලන ධාරාවන් දෙකම ප‍්‍රතික්ෂේප කරන පිරිසක් තමයි අපිට ඡන්දය ලබාදුන්නේ. එසේ තිබියදී අපිට වෙනත් පක්ෂයක් සමග එක්ව පළාත් පාලන ආයතනවල බලය පිහිටුවන්න අයිතියක් නැහැ. අපි පළාත් පාලන ආයතන තුලදීත් ඉන් පිටතදිත් අපිට ඡුන්දය දුන් ජනතාවට කිසිදා කණගාටුවන්නට කාරණා ඉතිරි නොවන පරිදි සැබෑ මහරජන සේවකයන්ගේ කාර්යභාරය ඉටු කරනවා.

ඒ වගේම දැන් ඇතැමුන් මේ වෙලාවේ ආණ්ඩුබලය හුවමාරු කරන්න කතා කරනවා. දැන් වෙන්න පුළුවන් කාරණා තුනයි තියෙන්නේ. එක්කෝ මහින්ද රාජපක්ෂ කණ්ඩායම සමග එක්ව මෛත‍්‍රීපාල කණ්ඩායම ආණ්ඩුවක් හදන්න  ඕන. නැත්නම් එක්සත් ජාතික පක්ෂ කණ්ඩායම වෙනම ආණ්ඩුවක් හදන්න  ඕන. එහෙමත් නැත්නම් තිබුණ ආණ්ඩුවම කැබිනට් සංශෝධනයක් කරලා පවත්වාගෙන යන්න  ඕන. වඩාත් වැඩි ඉඩකඩක් තිබෙන්නේ තුන්වෙනි ආකාරයයි. මේ කොයි ආකාරයේ ආණ්ඩුවක් හැදුවත් රටේ ජනතාවට සිදුවන සුගතියක් නැහැ. මොකද දැන් මේ කවුරු බලය පවත්වාගෙන ගියත් 2015 වෙනස කළ ජනතාවගේ අභිලාෂයන් ඉටුකරන්න ඔවුන්ට පුලූවන්කමක් නැහැ. ඒ අභිලාෂයන් ඉටුකළ හැක්කේ ජනතා විමුක්ති පෙරමුණට පමණයි. ඒ වෙනුවෙන් වූ ජනතා ව්‍යාපාරයක් අපි ඉදිරියේදී ගොඩනගනවා. “

එක්සත් ජාතික පක්ෂයේ මන්ත්‍රීවරුන් 15 දෙනකු එක්සත් ජනතා නිදහස් සන්ධාන ආණ්ඩුවක් සැදීම සඳහා තමන්ට එකතු වන බවත් ඉදිරි පැය 24 තුළ සාර්ථක මෙහෙයුමක් කිරීමට බලාපොරොත්තු වන බවත් වරාය සහ නාවික කටයුතු නියෝජ්ය ඇමති නිශාන්ත මුතුහෙට්ටිගම මහතා පවසයි.

ගාල්ලේදී අද (15) පැවති මාධ්‍ය හමුවක් අමතමින් ඒ මහතා මේ බව කීය.

“ඉදිරි පැය විසි හතර තුළ සාර්ථක මෙහෙයුමක් කරන්න අපි බලාපොරොත්තු වෙනවා. එක්සත් ජාතික පක්ෂයට තනි ආණ්ඩුවක් හදන්න බැහැ. එක්සත් ජාතික පක්ෂයේ මන්ත්‍රීවරුන් පහළොස් දෙනෙක් අපට එකතු වෙනවා. අපට මුක්කුවක් ගහන්න කට්ටිය ඉන්නවා. ඒ නිසා අපි එක්සත් ජනතා නිදහස් සන්ධාන ආණ්ඩුවක් හදනවා.මහින්ද රාජපක්ෂ හිටපු ජනාධිපතිතුමා අපට කිව්වේ යූඑන්පියෙන් ඉවත් වෙලා එන්න අපි එකතු වෙන්න සුදානම් කියලා.

ජනබලය තියෙන්නෙ ඒකාබද්ධ විපක්ෂය ළග. අපි දෙගොල්ල එකතුවන එක අමුතු දෙයක් නෙවි. අපි එකම කණ්ඩායමක්. වසර දෙකහමාරක් වෙන් වෙලා සිටියා. ඊළග වසර දෙකහමාර සදහා මුදල් වරදාන ගනුදෙනු වරප්‍රසාද නැතිව අපි දෙගොල්ල එකට එකතු වෙලා කටයුතු කරන්න එකගතාවය පලවී තියෙනවා.ඒ නිසා අපි එක්සත් නිදහස් සන්ධාන ආණ්ඩුවක් හදනවා. එක්සත් ජාතික පක්ෂයෙන් මන්ත්‍රීවරුන් පහළොස් දෙනෙක් අපට එනවා. මම ඒ අයගේ නම් කියන්නේ නැහැ“යැයි  මුතුහෙට්ටිගම මහතා කිය.

ඒකාබද්ධ විපක්ෂයේ පාර්ලිමේන්තු කණ්ඩායමේ තවත් රැස්වීමක් මේ වනවිට පැවැත්වෙනවා.

හිටපු ජනාධිපති මහින්ද රාජපක්ෂ මහතාගේ කොළඹ පිහිටි නිවසේදී මෙම සාකච්ඡාව පැවැත්වෙන බවයි දේශපාලන ආරංචි පවසන්නේ.

අග‍්‍රාමාත්‍ය රනිල් වික‍්‍රමසිංහ මහතාගේ ප‍්‍රධානත්වයෙන් එක්සත් ජාතික පක්ෂයේ අභ්‍යන්තර සාකච්ඡාවක්ද මේ වනවිට පැවැත්වෙනවා. 

මේ අතර ශී‍්‍ර ලංකා නිදහස් පක්ෂයේ සහ එක්සත් ජනතා නිදහස් සන්ධානයේ ආසන සංවිධායකවරුන් ද අද කොළඹට කැඳවා තිබෙනවා. එ් ජනාධිපති මෛතී‍්‍රපාල සිරිසේන මහතාගේ ප‍්‍රධානත්වයෙන් කොළඹ ජනාධිපති නිල නිවසේ පැවැත්වෙන සාකච්ඡාවක් සඳහායි.

මෙරට දේශපාලනය තුල තවත් දශක දෙක-තුනක පමණ කාලයකට එජාපයෙන් ආණ්ඩු බලය ගිලි හී යාමට ඇත්තේ තවත් හෝරා කිහිපයක් බව දේශපාලන ආරංචි මාර්ග ඔස්සේ තොරතුරු වාර්තාවේ.

මේ වන විට ශ්‍රී ලංකා නිදහස් පක්ෂය සහ එක්සත් ජනතා නිදහස් සන්ධානය ප්‍රමුඛ ආණ්ඩුවක් වෙනුවෙන් සූදානමක් පවතින අතර එය යම් හෙයකින් සිදුවුවහොත් එක්සත් ජාතික පක්ෂයට ආණ්ඩු බලය අහිමි වී යන අතර එසේ වුවහොත් යළි එජාප ආණ්ඩුවක් සිහිනයක්ම පමණක් වන්නේ, බලය තබාගෙන වත් මැතිවරණයක් ජයග්‍රහණය කළ නොහැකි එජාපය බලය නැති තත්වයක් තුල කිසිදා ජය නොගන්නා බව දශක දෙකකට අධික ඉතිහාසයක් තුල ඔප්පු කර ඇති හෙයිනි.

පවතින දේශපාලන තත්වය තුල එක්සත් ජාතික පක්ෂයේ බහුතරයක් ඉල්ලීම් කොට රනිල් වික්‍රමසිංහ මහතා වෙනුවට එජාප ජ්‍යෙෂ්ඨ නායකයෙකු වන කරු ජයසුරිය මහතාට ඉඩ ලබාදුනහොත් එය එජාපයේ ආණ්ඩු බලයත්, පක්ෂයේ ඉදිරි ගමනත් සුරැකෙනු ඇත.

මේ මොහොතේ එක්සත් ජාතික පක්ෂයෙන් ආණ්ඩු බලය ගිලි හී ගියහොත් යළි වසර 20 කින් 30 කින් එජාප ආණ්ඩුවක් ගත නොහැකි බව දේශපාලන විචාරයකින්ගේ මතයි.