මෑත කාලයේ සිට මෙරට පාතාලයේ විවිධ නම් අපිට ඇසෙන්නට වුනේ සතියකට වතාවක් නොඇසෙනා තරම් පුවතක් ලෙසයි. මාකඳුරේ මධූෂ්, ලොකු අයියා, රිස්කාන්, රණාලේ සමයං, ගොත අසංඛ, ඌරුජුවා, කොස් මල්ලි, පස් පොඩ්ඩා, චූලා, ඩී මංජු යන අය මේ අයවලුන්ගෙන් අතලොස්සක් පමණයි.
මේ සියල්ලන් පිළිබඳව අප සැවොම දන්නා එහෙත් නොදන්නා ලෙස සිටිනා ප්රධාන කාරණයක් නම් මේ පාතාල සාමාජිකයන් කුමණ හෝ පැතිකඩකින් දේශපාලන හුළු අත්තක් වන බවයි. මේ හේතුව නිසාවෙන්ම නීතියේ රැහැනෙන් මීදී රිසි සේ තමන්ගේ ආධිපත්ය පතුරවමින් බලය පවත්වා ගැනීමට ඔහුන් සමත් වී තිබෙනවා.
තවද මෙම බොහෝ පාතාල නායකයන් ත්රිවිධ හමුදාවෙන් පැන ගිය සෙබළුන් බවට පසුගිය දිනවල පල වූ බොහෝ පුවත්පත් තුළ වාර්ථා කළා.
මෑත දින කිහිපය තුළ සිදු වූ සිදු වූ සිදුවීම් අතරින් ඩුබායි හී සිටිනවායී කියන මාකඳුරේ මධූෂ් හා රණාලේ සමයංගේ පාතාල සගයන් අතර ඇති වූ ගැටුම් බොහෝ දෙනාගේ කථාබහට ලක් වුණා.
රණාලේ සමයං ඇතුළු හත්දෙනෙක් කළුතර බන්ධනාගාර බස් රථය තුළදී අවසන් ගමන් ගියේ පසුගිය වසරේ වඩාත්ම අවධානය යොමු වූ පුවතක් බවට එය පත් කරමින්. අනතුරුව එහි පළිය ගැනීමට කඩුවෙල පාතාලයට නායකත්වය දෙන්නට ඉදිරිපත් වුණේ ‘ගොත අසංඛ’ සහ ‘ඌරුජුවා’ යන අයයි.
බන්ධනාගාරගතව සිටින මෙම ‘ගොත අසංඛ’ සහ ‘ඌරුජුවා’ මෙහෙය වීම යටතේ මධූෂ්ට සොයුරෙකු ලෙස සමීප රිස්කාන් පෙබරවාරි 16 වැනිදා අලුත්කඩේ අධිකරණය සමීපයේදී ඝාතනය කෙරිණි.
රිස්කාන් ඝාතනයට නියෝග දුන් ගොත අසංඛ සහ ඌරුජුවා ඒ වන විට බන්ධනාගාරගතව සිටි නිසා ඔවුන්ගෙන් පළි ගැනීමට මධුෂ් කටයුතු කළේ රිස්කාන්ව මරන්න යන්න බයික් එක දුන් කොස් මල්ලී නැමති අයෙක්ගෙනි.
රටම සළිත කරමින් අඟුණකොලපැලැස්සේ දී ඝාතනය කළ කොස් මල්ලීගේ හිස, අලුත්කඩේ අධිකරණය සමීපයේදීම හමු වූයේ මධූෂ්ගේ එම විධානය අනුව ය.
ඝාතනයට ලක් වූ රිස්කාන් යනු මෙරට සුප්රසිද්ධ වාහන කුලී පදනම මත ලබා දෙන ආයතනයක් වූ “ඩ්රොප් මී” හි හිමිකරු බව සති අන්ත පුවත් පතක් වාර්තා කර තිබුණා.
මෙම ව්යාපාරය සඳහා පාතාල නායක මධුෂ් මේ ආයතනය වෙත රුපියල් කෝටි දොළහක පමණ මුදලක් ද ආයෝජනය කර තිබුණු බව ද එම පුවතේ වැඩිදුරටත් සඳහන්ව තිබුණා.
කෙසේ වෙතත් “ඩ්රොප් මී” ආයතනයේ මීට මාස කීපයකට උඩදී වැලිසර ප්රදේශයේ වූ නව ශාඛාව විවෘත කිරීමේ ප්රධාන අමුත්තා වූයේ එක්සත් ජාතික පක්ෂ නායක අග්රාමාත්ය රනිල් වික්රමසිංහයි. එමෙන්ම එම අවස්ථාවට ආරාධිතයින් ලෙස ෆවුසි සහ මුජිබර් රහුමාන් යන අමාත්යවරු ද සහභාගී වී තිබෙනවා.
මෙයින් ගම්ය වෙන්නේ අදාල පාතාල සාමාජිකයන් වර්තමාන රජයේ ප්රබලම දේශපාලනඥයන් කීපදෙනෙකු සමඟ ද සමීප සබඳතා පවත්වා ගෙන ඇති බවයි.
අළුයට ගිනිමෙන් කාලයකදී නිවී යන මෙම පාතාල ගැටුම් තවත් කාලයකදී කරළියට පැමිනෙන්නේ අමානුශික මරණ බොහෝ ගණනක්ම සිදු කරමින්.
කෙසේ වෙතත් පවතින අපරාධ රැල්ල මර්ධනය කිරීම සඳහා පොලිස් විශේෂ කාර්යය බලකාය විසින් මෙහෙයුම් ක්රියාත්මක කරන බව ජ්යේෂ්ඨ නියෝජ්ය පොලිස්පති (අපරාධ) එම්.ආර්. ලතීෆ් මහතා ප්රකාශ කළා.
ඒ අනුව කොළඹ හා තදාසන්න ප්රදේශ ආවරණය වන ආකාරයෙන් සිවිල් ඇඳුමින් හා නිල ඇඳුමින් යුතු විශේෂ කාර්යය බලකා නිලධාරීන් රාජකාරි කටයුතු සඳහා යොදවා ඇතැයි ද මාර්ග බාධක යොදා ගනිමින් සැකකරුවන් අත්අඩංගුවට ගැනීමේ කටයුතු සිදු කරමින් පවතින බවත් ඒ මහතා පෙන්වා දුන්නා.
එමෙන් ම පොලිසිය හා එක්ව මෙම වැඩපිළිවෙළ ක්රියාත්මක කරන බවද ඒ මහතා වැඩිදුරටත් කියා සිටියා.
