Category: සුපිරි World

කෘෂි රසායන ඇතුළු රසායන නිෂ්පාදනය කරන ලෝ ප්‍රකට බහුජාතික සමාගමක් වන ‘බේයර් Bayer සමාගමට එරෙහිව පැවති නඩුවකින් එම සමාගම පරාජයට පත්ව ඇති අතර පැමිණිලි පාර්ශ්වයට වන්දි වශයෙන් ඇමෙරිකානු ඩොලර් බිලියන 10.9ක් ගෙවීමට බේයර් සමාගමට සිදුව ඇත.

ශ්‍රී ලංකාව තුළ පවා දැඩි සංවාදයට ලක් වූ ප්‍රකට වල්නාශකයක් වන ‘ග්ලයිෆොසේට්‘ (Glyphosate) මත පදනම් වූ නිෂ්පාදිතය වන Roundup මගින් සිදුවන පිළිකා කාරක බලපෑම් සම්බන්ධයෙන් බේයර් සමාගමට එරෙහිව පුද්ගලයින් 125,000 ක් විසින් ගොනුකර තිබූ නඩුවත් සමථයට පත්වීම සමග අද (25) දින මෙම තීන්දුව ප්‍රකාශයට පත්ව ඇත.

නිව් යෝර්ක්හි නීති ආයතනයක් වන වයිට්ස් සහ ලක්සෙන්බර්ග් (Weitz & Luxenberg) පවසන්නේ එය 100,000 කට ආසන්න පිරිසක් වෙනුවෙන් විසඳුමකට පැමිණ ඇති බවයි.

රවුන්අප් හි වත්මන් හිමිකරු වන බේයර් සමාගම අදාළ චෝදනා ප්‍රතික්ෂේප කරන නමුත් වන්දි ගෙවීම මගින් “අවිනිශ්චිතතාව” අවසන් කරන බව පැවසීය.

රවුන්ඩ්අප් (Roundup) මුලින් නිෂ්පාදනය කරමින් අලෙවි කළේ එක්සත් ජනපද සමාගමක් වන මොන්සැන්ටෝ සමාගම විසින් වන අතර මොන්සැන්ටෝ සමාගම 2018 දී බේයර් සමාගම විසින් මිලදී ගන්නා ලදී.

දශක හතරකට පෙර එය හඳුන්වා දුන් දා සිට රවුන්ඩ්අප් ලොව ජනප්‍රිය වල්පැලෑටි ලෙස ප්‍රසිද්ධ වී තිබේ.

බේරුම්කරණයේ කොටසක් ලෙස, බේයර් සමාගම විසින් ගෙවිය යුතු හිමිකම් පියවීම සඳහා ඩොලර් බිලියන 9.6ක් ගෙවන අතර අනාගත ඕනෑම ක්‍රියාමාර්ගයක් සම්බන්ධයෙන් කටයුතු කිරීම සඳහා තවත් ඩොලර් බිලියන 1.25 ක් වෙන් කරන බව සමාගම සිය වෙබ් අඩවියේ ප්‍රකාශයක් නිකුත් කරමින් කියා සිටී.

“එය දිගු ගමනක්. නමුත් මොන්සැන්ටෝ සහතික කළ නිෂ්පාදනයක් භාවිතා කිරීමෙන් පසු තමන්ගේම වරදකින් තොරව, හොඩ්ග්කින් නොවන ලිම්ෆෝමා (Non-Hodgkin Lymphoma) රෝගයෙන් පීඩා විඳින දස දහස් සංඛ්‍යාත ජනතාවට සාධාරණය ඉටු කිරීම ගැන අපි සතුටු වෙමු ‘යැයි වයිට්ස් සහ ලක්සෙන්බර්ග් හි පරිසර දූෂණය හා පාරිභෝගික ආරක්ෂාව පිළිබඳ පුහුණු කණ්ඩායම් සභාපති රොබින් ග්‍රීන්වෝල්ඩ් නිවේදනයක් නිකුත් කරමින් කියා සිටී.

එකඟ වූ ගෙවීම් වලින් ඩොලර් බිලියන 5 ක් දක්වා මේ වසරේදී මුදා හරිනු ඇති අතර තවත් ඩොලර් බිලියන 5 ක් 2021 දී ගෙවනු ලැබේ. බේයර් සමාගම කියා සිටියේ හිඟ හිමිකම් වලින් 25% ක් සඳහා තවමත් එකඟතාවකට පැමිණ නොමැති බවයි.

“පළමුවෙන්ම හා ප්‍රධාන වශයෙන්, Roundup නිරවුල් කිරීම යනු දිගු කාලීන අවිනිශ්චිතතාවයක් අවසානයකට ගෙන ඒම සඳහා නියම වේලාවට කළ යුතු නිවැරදි ක්‍රියාවයි” යනුවෙන් බේයර් හි ප්‍රධාන විධායක වර්නර් බවමන් පැවසීය.

විද්‍යාත්මක පර්යේෂණ මගින් ඇඟවෙන්නේ “ Roundup මගින් පිළිකා ඇති නොකරන අතර එම නිසා මෙම නඩු විභාගයේදී චෝදනා කෙරෙන රෝගාබාධවලට එය වගකිව යුතු නැත” යනුවෙනි.

ග්ලයිෆොසේට් තහනම් කිරීම

ජර්මානු රසායනික දැවැන්තයා වන බේයර් සමාගම විසින් මීට වසර දෙකකට පෙර මොන්සැන්ටෝ සමාගම ඩොලර් බිලියන 63 කට මිල දී ගත් අතර ඒ සමගම වල් නාශක සම්බන්ධයෙන් නීතිමය සටන්වලට මුහුණ දුන්නේය.

2018 අගෝස්තු මාසයේදී කැලිෆෝනියාවේ උසාවියක් විසින් රවුන්ඩ්අප් පිළිකා සමඟ සම්බන්ධ කරන පළමු තීන්දුව ප්‍රකාශයට පත් කරමින් හිමිකම් පෑමට සැලකිය යුතු වන්දි මුදලක් ප්‍රදානය කළේය.

ඔවුන්ගේ නඩු වලදී, පරිශීලකයින් ඔවුන්ගේ හොඩ්ග්කින් නොවන ලිම්ෆෝමා සහ වෙනත් පිළිකා සඳහා රවුන්ඩ්අප් සහ එහි ක්‍රියාකාරී අමුද්‍රව්‍ය ග්ලයිෆොසේට් වලට දොස් පවරති.

ග්ලයිෆොසේට් බොහෝ වල්පැලෑටි නාශකවල ක්‍රියාකාරී සංඝටකය වන නමුත් එහි ආරක්ෂාව පිළිබඳ තවමත් දැඩි මතභේද පවතී.

ශ්‍රී ලංකාව ද ඇතුළු සමහර රටවල් ග්ලයිෆොසේට් අඩංගු වල් නාශක තහනම් කර ඇති අතර තවත් රටවල් ඒවා දිගටම භාවිතා කරයි.

ග්ලයිෆොසේට් යනු පිළිකා කාරකයක් බවට වන චෝදනා බේයර් සමාගම තරයේ ප්‍රතික්ෂේප කරන අතර ඔවුන්ට එක්සත් ජනපද පරිසර ආරක්ෂණ ඒජන්සියේ (Environmental Protection Agency) සහාය ද හිමිව තිබේ.

රවුඩ්අප් සදහා වන්දි ගෙවීමට අමතරව, දැන් තහනම් කර ඇති විෂ රසායනික සංයෝගයක් වන පොලිකොරිනේටඩ් බයිපෙනයිල් (Polychlorinated biphenyl (PCB) භාවිතයෙන් ජල දූෂණය සම්බන්ධ නඩු විසඳීම සඳහා බේයර් ඩොලර් මිලියන 820ක් වන්දි ගෙවා ඇත.

2020 ජූනි 25 වැනි දින බී.බී.සී වාර්තාවක් ඇසුරිණි – සකස් කළේ – තීක්ෂණ වෙළෙන්එගොඩ

අද (22) දින වන විට ගෝලීය වශයෙන් කොවිඩ්-19 ආසාදිතයින් සංඛ්‍යාව 9,006,757ක් බවත් මරණ සංඛ්‍යාව 469,122 දක්වා ඉහළ ගිය බවත් ජෝන්ස් හොප්කින්ස් විශ්වවිද්‍යාලයේ කොරෝන වෛරස් සම්පත් මධ්‍යස්ථානයේ නිල වෙබ් අඩවියේ සදහන් වෙයි.

මේ වන විට ඇමෙරිකා එක්සත් ජනපදයෙන් කොවිඩ්-19 ආසාදිතයින් 2,289,168 ක් සහ මරණ 120,106ක් වාර්තා වන අතර බ්‍රසීලයෙන් ආසාදිතයින් 1,083,341ක් සහ මරණ 50,591ක් වාර්තා වෙයි.

රුසියාවෙන් ආසාදිතයින් 591,465 ක් සහ මරණ 8,196ක් වාර්තා වන අතර ඉන්දියාවෙන් ආසාදිතයින් 425,282ක් සහ මරණ ක් වාර්තා වෙයි.

මහා බ්‍රිතාන්‍යෙයන් ආසාදිතයින් 306,761ක් සහ මරණ 42,732ක් වාර්තා වේ.

අප අසල්වැසි පාකිස්ථානයේ සහ බංග්ලාදේශයේ ද ආසාදිතයින් සහ මරණ සංඛ්‍යාව වේගවත් වර්ධනයක් දැකිය හැකිය. ඒ අනුව පාකිස්ථානයෙන් ආසාදිතයින් 181,088 ක් සහ මරණ 3,590 ක් ද බංග්ලාදේශයෙන් ආසාදිතයින් 115,786  ක් සහ මරණ 1,502 ක් ද වාර්තා වේ.

මේ වන විට පාකිස්ථානය ද කොවිඩ්-19 ආසාදිතයින් වැඩිම සංඛ්‍යාවක් වාර්තා වන රාජ්‍ය 10 අතරට එක්වීම විශේෂත්වයකි.

ශී ලාංකික ගෘහ සේවකයින් සහ සේවිකාවන් ලක්ෂ සංඛ්‍යාත පිරිසක් සේවය කරන සෞදි අරාබියෙන් ආසාදිතයින් 161,005 ක් සහ මරණ 1307ක් ද කටාර් රාජ්‍යෙයන් ආසාදිතයින් 88,403ක් (මරණ 99) ද ක්වේටයෙන් ආසාදිතයින් 40,291 ක් (මරණ 330) ද එක්සත් අරාබි එමීර් රාජ්‍යෙයන් ආසාදිතයින් 44,925 ක් ද වාර්තා වේ.

බ්‍රසීලයේ මරණ සංඛ්‍යාව 50,000 පනිද්දී රටපුරා උද්ඝෝෂණ

බ්‍රසීලයේ කොරෝනා වෛරස් උවදුරෙන් තදින්ම බලපෑමට ලක් වූවන් අතර ආදිවාසී ප්‍රජාව ද වෙති

ඇමරිකා එක්සත් ජනපදයට පසු පනස් දහසකට අධික කොරෝනා වෛරස් මරණ සංඛ්‍යාවක් ලියාපදිංචි කළ දෙවන රට බවට බ්‍රසීලය පත්ව තිබේ.

බ්‍රසීලයෙන් එවැනි තත්වයක් වාර්තා වන්නේ එරට දේශපාලන උණුසුම ඉහළ යමින් පවතින පසුබිමකදී සහ මිලියනයකට අධික වෛරස් ආසාදිතයන් සංඛ්‍යාවක් තහවුරු වී තිබියදීය.

බ්‍රසීලයේ මරණ සහ ආසාදිතයන් තවදුරටත් ඉහළ යමින් පවතින බව සංඛ්‍යා ලේඛන පෙන්වා දෙයි.

ලොව පුරා දිනක් තුළ තහවුරු වූ වැඩිම ආසාදිතයන් සංඛ්‍යාව ලෝක සෞඛ්‍ය සංවිධානය වාර්තා කරයි. ඊට වැඩි වශයෙන්ම ඇතුළත් වන්නේ එක්සත් ජනපදයෙන් අලුතින් හඳුනා ගත් රෝගීන්ය.

බ්‍රසීලයේ අන්ත දක්ෂිණාංශික ජනාධිපති ජයීර් බොල්සොනාරෝ ලොක්ඩවුන් සීමා පැනවීමට විරෝධය දැක්වීම සහ ආර්ථිකය සම්බන්ධයෙන් අවධානය යොමු කිරීම විශාල වශයෙන් මතභේදයට තුඩු දී ඇත.

මරණ සහ ආසාදිතයන් සංඛ්‍යාව ඉතා දරුණු ලෙස ඉහළ යාමත් සමග සෞඛ්‍ය අමාත්‍යවරුන් දෙදෙනෙකු සිය ධූරයෙන් ඉවත්ව තිබේ. ඔවුන් දෙදෙනාම වෛද්‍යවරුන්ය.

පළමු වෙනියා ජනාධිපතිවරයා විසින් ඉවත් කරන ලද අතර ජනාධිපතිවරයා සමග එකඟ නොවීම නිසා දෙවැන්නා සිය ධුරයෙන් ඉල්ලා අස් විය.

බ්‍රසීලයේ සහ ලතින් ඇමරිකානු රටවල මරණ කොපමණ ද?

ගතව ගිය පැය 24 තුළ තවත් මරණ 641 ක් අලුතින් ලියාපදිංචි කර ඇති බව බ්‍රසීල සෞඛ්‍ය අමාත්‍යංශය ඉරිදා (ජුනි 21) නිවේදනය කළේය. ඒ අනුව එරට මරණයට පත් මුළු සංඛ්‍යාව 50,617 කි.

එම කාලය තුළ රෝගීන් 17,000 කට අධික සංඛ්‍යාවක් ද අලුතින් ලියාපදිංචි වී ඇත.

ඊට වඩා දරුණු තත්ත්වයකට මුහුණ දී ඇත්තේ ඇමරිකා එක්සත් ජනපදය පමණි. එරට ආසාදිතයන් සංඛ්‍යාව මිලියන 2.2 ක් වන අතර 120,000 ක් පමණ මරණයට පත්ව තිබේ.

මෑත කාලයේ බ්‍රසීලයෙන් දිනකට මරණ දහසක් පමණ වාර්තා විය. කෙසේ නමුත් සති අන්තයන්හි මරණ සංඛාවේ අඩුවක් දක්නට ඇත. රට පුරා කොරෝනා වෛරස් පරීක්ෂණවල අඩුවක් පවතින බව විශේෂඥයන් බොහෝ දෙනෙකුගේ විශ්වාසය වී තිබේ. පරීක්ෂණ කෙරෙන ප්‍රමාණය, අවශ්‍ය ප්‍රමාණයට වඩා විසි ගුණයකින් පමණ අඩු බව ඉන් ඇතැමෙක් පවසති. එබැවින් මුළු මරණ සංඛ්‍යාව සැලකිය යුතු මට්ටමකින් ඉහළ අගයක් ගනු ඇති බව පෙනෙන්නට තිබේ.

ඇමේසන් කලාපයට අයත් පාරා සහ සිආරා උතුරු දිග ප්‍රාන්තවලින් මරණ 12,000 කට අධික සංඛ්‍යාවක් වාර්තා වී ඇත. නමුත් විශාල වැඩිවීමක් දක්නට ලැබෙන්නේ සාඕ පාවුලෝ සහ රෝයෝ ඩි ජැනෙයිරෝ වෙතිනි. එම නගරවලින් පිළිවෙලින් මරණ 12,500 ක් සහ 8,800 ක් වාර්තා වී තිබේ.

මේ අතර ලෝක සෞඛ්‍ය සංවිධානය පවසන්නේ පැය 24 ක් තුළ ලොව පුරා ආසාදිතයන් 183,000 ක් අලුතින් වාර්තා වී ඇති බවය. ඉන් 60% අධික ප්‍රමාණයක් උතුරු සහ දකුණු ඇමරිකානු කලාපයට අයත්ය.

ඇමරිකාව හැරුණු කොට මෙක්සිකෝව, පේරු සහ චිලී යන රටවල් ද දරුණු ලෙස බලපෑමට ලක්ව ඇත. ඉරිදා, ආජන්ටිනාව මරණ 1,000 පසු කළේය.

ලතින් ඇමරිකානු සහ කැරිබියන් කලාපයෙන් මේ වන විට වාර්තා වන ආසාදිතයන් සංඛ්‍යාව මිලියන දෙකකට අධිකය.

ගෝලීය වශයෙන් කොරෝනා වෛරස් වසංගතය වේගවත් වන අතර පසුගිය බ්‍රහස්පතින්දා (18) නව රෝගීන් 150,000 ක් එක් (දිනක් තුළ වැඩිම සංඛ්‍යාවක්) වාර්තා වී ඇති බව ලෝක සෞඛ්‍ය සංවිධානයේ (WHO) අධ්‍යක්ෂ ජනරාල් ටෙඩ්‍රොස් අද්නාම් ගෙබ්‍රෙයිසස් අද (19) මාධ්‍ය හමුවකදී පැවසීය.

“වාර්තා වූ සිද්ධීන්ගෙන් අඩක් පමණ ඇමරිකාවෙන් වාර්තා ඒවාටි” ඔහු පැවසීය. 

“ලෝකය නව හා භයානක අවධියක පවතී … වෛරසය තවමත් වේගයෙන් ව්‍යාප්ත වෙමින් පවතී. එය තවමත් මාරාන්තික ය. බොහෝ මිනිසුන් තවමත් එයට ගොදුරු වේ.” ඔහු අනතුරු අගවමින් පැවසීය.

ලාභදායී සහ බහුල වශයෙන් ලබා ගත හැකි ඖෂධයක් කොරෝනාවයිරසයෙන් බරපතළ ලෙස රෝගාතුර වූ රෝගීන්ගේ ජීවිත බේරා ගැනීමට උපකාරී වන බව තහවුරු වී තිබේ.

ඩෙක්සාමෙතසෝන් (dexamethasone) අඩු මාත්‍රාවක් ලබා දීමෙන් මෙම මාරාන්තික කොරෝනාවෛරසයට එරෙහිව සටන් කිරීමට හැකි වීම අතිශය වැදගත් සොයා ගැනීමක් බව එක්සත් රාජධානියේ වෛද්‍ය විශේෂඥයෝ පවසති.

මෙම ඖෂධය, දැනට පවතින ප්‍රතිකාර කොරෝනාවෛරස් සඳහා ද ලබා දිය හැකි දැයි පරීක්ෂා කරන ලොව විශාලතම අත්හදාබැලීම්වල කොටසකි.

මෙම ඖෂධය මගින් වෙන්ටිලේටර් යන්ත්‍රවල සහය ලබා ගන්නා රෝගීන් තුනෙන් එකකට ඇති මරණ අවදානම ඉවත් කරයි. ඊට අමතරව, ඔක්සිජන් ලබා දෙන රෝගීන්ගෙන් පහෙන් එකක ප්‍රමාණයක මරණ අවදානම ඉන් ඉවත් වේ.

කොරෝනාවෛරස් වසංගතය ආරම්භයේ සිට එක්සත් රාජධානියේ රෝගීන්ට මෙම ඖෂධය ලබා දුන්නේ නම්, ජීවිත 5000ක් පමණ රැක ගැනීමට හැකියාව පැවති බව පර්යේෂකයෝ පවසති.

එමෙන් ම, එය කොවිඩ් – 19 රෝගීන් විශාල වශයෙන් සිටින දිළිඳු රටවලට ද විශාල ප්‍රතිලාභයක් වන්නට ඉඩ තිබිණි.

සිය තොග ගබඩාවල ඩෙක්සාමෙතසෝන් ඖෂධය ඇසුරුම් 200000ක් පමණ පවතින අතර ඒවා ජාතික සෞඛ්‍ය සේවාව හරහා රෝගීන්ට ලබා දීමට කටයුතු කරන බව බ්‍රිතාන්‍ය ආණ්ඩුව පවසයි.

“මේක බ්‍රිතාන්‍යයේ වැදගත් විද්‍යාත්මක ජයග්‍රහණයක්,” බව හැඳින්වූ අග්‍රාමාත්‍ය බොරිස් ජොන්සන් පැවසුවේ, මෙය සැමරිය යුතු අවස්ථාවක් බවය. “අපි සතුව ප්‍රමාණවත් තොග පවතින බවට තහවුරු කර ගැනීම සඳහා අවශ්‍ය පියවර ගනිමින් සිටිනවා, දෙවන රැල්ලක් ආවත් ඒකටත් මුහුණ දෙන්න පුළුවන් ආකාරයට.”

එංගලන්තයේ ප්‍රධාන වෛද්‍ය නිලධාරී මහාචාර්ය ක්‍රිස් විටී පැවසුවේ, මෙම ඖෂධය මගින් ලෝකය පුරා ජීවිත ගණනාවක් බේරාගත හැකි වනු ඇති බවය.

කොරෝනාවෛරසය ආසාදිත සෑම රෝගීන් 20 දෙනෙකු අතරින් 19 දෙනෙකු රෝහලකට ඇතුළත් නොවී සුවය ලබා තිබේ.

රෝහල්වලට ඇතුළත් කර ඇති රෝගීන්ගෙන් බොහෝ දෙනෙකු සුවය ලබන නමුත් ඇතැමුන්ට ඔක්සිජන් හෝ වෙන්ටිලේටර්වල සහය අවශ්‍ය වේ.

ඉහළ අවදානමක් සහිත රෝගීන්ට ඩෙක්සාමෙතසෝන් උපකාරී වන බව පෙනෙන්නට තිබේ.

මේ වන විටත් මෙම ඖෂධය ආතරයිටිස්, ඇදුම සහ ඇතැම් සම ආශ්‍රිත රෝගීන්ට සහනයක් සැලසීම සඳහා භාවිත කෙරේ.

කොරෝනාවෛරසයට එරෙහිව සටන් කිරීමට උත්සහ කිරීමේදී ශරීරයේ ප්‍රතිශක්තිකරණ පද්ධතිය අධික වේගයෙන් ක්‍රියාත්මක වන විට සිදුවිය හැකි හානි වළක්වා ගැනීමට එය උපකාරී වන බව පෙනේ.

ප්‍රතිශක්තිකරණ පද්ධතිය අධික ලෙස ප්‍රතික්‍රියා දැක්වීම මාරාන්තික විය හැකිය.

ඔක්ස්ෆර්ඩ් විශ්වවිද්‍යාලයේ පර්යේෂකයින් කණ්ඩායමක් සිදු කළ අත්හදාබැලීමේදී රෝහල්ගත රෝගීන් 2000කට ඩෙක්සාමෙතසෝන් ඖෂධය ලබා දී, එම ඖෂධය ලබා නොදුන් තවත් රෝගීන් 4000ක් පමණ රෝගීන් සමග සන්සන්දනය කෙරිණි.

එහිදී වෙන්ටිලේටර් යන්ත්‍ර භාවිත කළ රෝගීන්ගෙන් 40% සිට 28%ක් දක්වා පිරිසකගේ මරණ අවදානම ඉවත් විය.

ඔක්සිජන් අවශ්‍ය රෝගීන්ගෙන් 25% සිට 20%ක් දක්වා පිරිසකගේ මරණ අවදානම ඉවත් විය.

ප්‍රධාන පර්යේෂක මහාචාර්ය පීටර් හෝර්බි පැවසුවේ, “මෙතෙක් හමුවූ මරණ අවදානම අඩු කළ හැකි එක ම ඖෂධයයි. ඒක වැදගත් සොයා ගැනීමක්,” බවය.

පර්යේෂක නියමු මහාචාර්ය මාර්ටින් ලැන්ඩ්‍රේ පැවසුවේ, පර්යේෂණය මගින් පහත කරුණු අනාවරණය වූ බවය.

• වෙන්ටිලේටර්වල සිටින සෑම රෝගීන් 8 දෙනෙකුගෙන් එක් අයෙකුගේ ජීවිතය බේරා ගත හැකි බව,
• ඔක්සිජන් ලබා දෙන සෑම රෝගීන් 20-25 දෙනෙකුගෙන් එක් අයෙකුගේ ජීවිතය බේරා ගත හැකි බව

“මේකෙන් පැහැදිලි ප්‍රතිලාභයක් ලැබෙනවා,” ඔහු පැවසීය.

“දින 10ක ඩෙක්සාමෙතසෝන් ප්‍රතිකාරය සඳහා වැය වෙන්නෙ පවුම් 5ක පමණ මුදලක්.”

“ඒ නිසා අනිවාර්යයෙන් ම ජීවිතයක් බේරා ගන්න වැය වෙන්නේ පවුම් 35ක් පමණයි.”

“මේක ලෝකයේ ඕන ම තැනක තියෙන ඖෂධයක්.”

අවශ්‍ය වේලාවට, ප්‍රමාදයකින් තොරව රෝහල්ගත රෝගීන්ට මේ ඖෂධය ලබා දිය යුතුයි, මහාචාර්ය ලැන්ඩ්‍රේ පවසයි.

කෙසේ වෙතත්, සාමාන්‍ය වැසියන් පිටතට ගොස් එම ඖෂධය මිල දී ගෙන නිවසේදී එය භාවිත කිරීම සුදුසු නොවේ.

කොරෝනාවෛරසයේ සුළු රෝග ලක්ෂණ ඇති ශ්වසන අපහසුතා නොමැති පුද්ගලයින්ට මෙම ඖෂධය මගින් සහනයක් සැලසෙන හැඩක් දක්නට නොලැබේ.

Text by bbc sandesaya

මතභේදයට තුඩු දී ඇති කාශ්මීර කලාපයේ ලදාක්හි චීන හමුදා සමග ඇති වූ ගැටුමකින් ඉන්දීය භටයන් තිදෙනෙකු මරණයට පත්ව ඇත. පසුගිය සති කීපය තිස්සේ එම කලාපයෙහි රඳවා සිටින දෙරටේ දේශසීමාරක්ෂක භටයන් අතර ගැටුම්කාරී තත්ත්වයක් මෝදුවෙමින් පැවතිණි.

“උද්ගතව පවතින ගැටුම්කාරී වාතාවරණය සමනය කර ගැනීම සඳහා චීන සහ ඉන්දියානු හමුදාවන්හි ජ්‍යෙෂ්ඨ නිලධාරීන් කණ්ඩායමක් සාකච්ඡා පවත්වමින් සිටින” බව ඉන්දීය හමුදාව ප්‍රකාශ කරන නමුත් ඒ සම්බන්ධයෙන් වැඩිදුර තොරතුරු ප්‍රකාශයට පත්කොට නැත.

පවතින ව්‍යාකූල තත්ත්වය තවත් දරුණු අතට හැරෙන මට්ටමින් හෝ ඒකපාර්ශ්වීය මට්ටමින් පියවර නොගන්නා ලෙස චීනය ඉන්දියාවෙන් ඉල්ලීමක් කර ඇතැයි රොයිටර් පුවත් සේවය වාර්තා කරයි.

මේ අතර AFP මාධ්‍ය ජාලය වාර්තා කරන්නේ දේශසීමාව ඔස්සේ පැමිණ සිය භටයන්ට පහර දීම සම්බධයෙන් චීනය ඉන්දියාවට චෝදනා කරන බවය.

ආසියාවේ බලවතුන් දෙදෙනා අතර ඇති වූ ගැටුමක දී පළමුවරට මෙවැනි මරණ වාර්තා වූයේ දශක කීපයකට පසුවයි.

ඉන්දියාව සහ චීනය අතර පළමු සංග්‍රාමය 1962 වසරේ වාර්තා විය. එම යුද්ද්ධයේ දී ඉන්දියාවට බරපතල හානි සිදු වූ අතර එය නිම වුණේ ඔවුන්ගේ පරාජයෙනි.

තම භූමියෙන් කිලෝමීටර් 38,000ක් අල්ලාගෙන සිටින බවට ඉන්දියාව චීනයට චෝදනා කරයි. එම දේශසීමා අර්බුදය නිරාකරණය කර ගැනීමට පැවති සාකච්ඡා වට කීපයක්ම අවසන් වුණේ අසාර්ථක මට්ටමිනි.

දේශසීමාවේ ‘සීකිම්’ කලාපයේ දී චීන සහ ඉන්දියානු දේශසීමාරක්ෂක භටයන් ගුටිබැට හුවමාරු කර ගැනීමක් ද පසුගිය දා වාර්තා විය.

මතභේදයට තුඩු දී ඇති නිම්නයක් ඔස්සේ චීනය දේශසීමා මාර්ගයක් ව්‍යාප්ත කිරීමට කටයුතු කිරීම 2017 වසරේ දී දෙපාර්ශ්වය අතර ගැටුම් ඇතිවීමට තවත් හේතුවක් විය.

කිම් ජොන්ග් අන් කොරියානු පණිවුඩ හුවමාරු කාර්යාලය පුපුරවයි

කෙසොන්ග් කර්මික සංකීර්ණය දෙසින් දුම්වලා නිකුත් වෙන ආකාරය දකුණු කොරියාව දෙසින් පෙනෙන අයුරු

කොරියානු රාජ්‍යයන් දෙක අතර පිහිටුවා තිබුණ දෙරටේ සම්බන්ධතා කාර්යාලය උතුරු කොරියානු පාලනය විසින් පුපුරුවා හරිනු ලැබිණි.

එම කාර්යාලය පිහිටුවා තිබුණේ දෙරට අතර පිහිටි ‘කෙසොන්ග්’ ( Kaesong) දේශසීමා නගරය අසලය.

කොරියානු දේශසීමාවේ යුද ක්‍රියාකාරකම් පිළිබඳව යළිත් අනතුරු ඇඟවීමක් කරනු ලැබීමෙන් පසුව එම පුපුරුවා හැරීම සිදුකොට ඇත.

2018 වසරේ ආරම්භ කරන ලද එම සම්බන්ධතා කාර්යාලය පිහිටුවා තිබුණු භූමිභාගය උතුරු කොරියාවට අයත් වන අතර, එය දෙරට අතර පණිවුඩ හුවමාරුව සඳහා උපයෝගී කර ගනු ලැබිණි.

කොරෝනා වෛරස් වසංගතය පැතිර යාමත් සමග වසා දමන ලද එම සම්බන්ධතා කාර්යාලය පසුගිය ජනවාරි මාසයේ පටන් හිස්ව පැවතිණි.

කොරියානු රාජ්‍යයන් දෙක අතර පසුගිය සති කීපය තිස්සේ පැවතුණේ ගැටුම්කාරී පරිසරයකි.

උතුරු කොරියාවේ සිට දකුණු කොරියාවට පලා විත් සිටින කණ්ඩායම් විසින් දේශසීමාව ඔස්සේ යවනු ලබන ප්‍රචාරක පණිවුඩ එම ගැටුම්කාරී තත්ත්වය ප්‍රකෝප කිරීමට හේතුවිය.

උතුරු කොරියානු නායකයාගේ සහෝදරිය වන කිම් යෝ-ජොන්ග් (Kim Yo-jong) පසුගිය සති අන්තයේ ප්‍රකාශයක් කරමින්, ඉහත කී කාර්යාලය විනාශ කරන බවට අනතුරු ඇඟවීමක් කර තිබිණි.

කොරියානු වේලාවෙන් අපරභාග 2.49 ට පිපිරීමක් සිදු වූ බව ‘එකමුතුවීම’ භාර දකුණු කොරියානු ඇමතිවරයා විසින් තහවුරු කරනු ලැබ ඇත.

සිය භූමියට ප්‍රචාරක පණිවුඩ එවීමට ඉඩ සලසන බවට චෝදනා කරමින් පසුගිය සති කීපය තුළ උතුරු කොරියාව විසින් ‘සෝල්’ පාලනය හෙළා දකිනු ලැබිණි.

උතුරු කොරියාවෙන් පලා විත් සිටින කණ්ඩායම් සිය පැරණි වාසභූමිය කරා ප්‍රචාරක පණිවුඩ නිරන්තරයෙන් යවනු ලබන්නේ බැලූන් පමණක් නොව, ඩ්‍රෝන යානා (drones) ආදිය පවා උපයෝගී කර ගනිමිනි.

පසුගිය සතියේ අඟහරුවාදා (ජූනි 09) ප්‍රකාශයක් කළ උතුරු කොරියානු පාලනය ‘සෝල්’ පාලනයත් සමග සියලු නිල සබඳතා කපා හරින බව නිවේදනය කළේය.

මේ අතර අනතුරු ඇඟවීමක් කළ කිම් යෝ-ජොන්ග් කොරියානු රාජ්‍යයන් දෙක අතර පිහිටි යුද විරහිත කලාපයට (DMZ) හමුදා ඇතුළු කරන බව කියා සිටියාය.

අඟහරුවාදා (ජූනි 16), ඉහත කී සම්බන්ධතා කාර්යාලය පුපුරුවා හරිනු ලැබීමට පෙර උතුරු කොරියානු යුද හමුදා නායකත්වය ප්‍රකාශයක් කරමින්, “ඉදිරි යුද පෙරමුණ යුද බලකොටුවක් බවට පරිවර්තනය කරන” බව සපථ කර තිබිණි.

Text by – BBC Sandesaya

චීනයේ අගනුවර පුරා කොරෝනාවෛරස් වසංගතයේ දෙවන රැල්ලක් පිළිබඳව බිය පහළවෙමින් පවතින අතරතුර කොරෝනාවෛරස ආසාදිතයන් 36 දෙනෙකු බීජිං නුවරින් වාර්තා විය.

පසුගිය සෙනසුරාදා ද තවත් ආසාදිතයන් 36 දෙනෙකු සොයා ගනු ලැබුණේ විශාල තොග වෙළෙඳපොළක් තුළ සිදු කෙරුණු පරීක්ෂණවලිනි.

ඊට පෙර, දින 50ක් ඇතුලත බීජිං අගනුවරින් කිසිදු කොරෝනාවෛරස ආසාදිතයකු වාර්තා වී නොතිබුණි.

මෙම වසංගතය නැවත වතාවක් පැතිර යෑමේ අවදානම ඉතා ඉහළින් පවතින බැවින් දැඩි පියවර ගන්නා ලෙස චීනයේ උප අගමැතිවරයා බලධාරීන්ගෙන් ඉල්ලීමක් කළේය.

නව ආසාදිතයන් වාර්තා වූ බීජිං නුවර විශාලතම තොග වෙළෙඳපොලේ සාමාන්‍යාධිකාරීවරයා සහ නාගරික නිලධාරීන් කීප දෙනෙකු සේවයෙන් පහ කොට තිබේ.

මීට අමතරව අසල්වාසී පළාත් තුනකින් තවත් ආසාදිතයන් කීපදෙනකුම හමුවී ඇති අතර ඒ සියලු දෙනා බීජිං නුවර සමඟ සබඳතා පැවැත්වූ අය බව තහවුරු කරගෙන ඇත.

චීන මාධ්‍ය වාර්තා කර තිබුණේ ඉහත කී වෙළෙඳපොලේ මත්ස්‍ය වෙළෙඳ සැල් තුළ මසුන් කපන ලෑලි මත ද තිබී කොරෝනා වෛරසය සොයා ගෙන ඇති බව ය.

එම තොග වෙළඳ සැල් මගින් බෙදා හරිනු ලැබූ මසුන් තම රාක්ක වලින් ඉවත් කිරීමට බෙයිජිං නුවර ප්‍රධාන පෙළේ සුපිරි වෙළෙඳසැල් තීරණය කර තිබේ.

නව ආසාදිතයන් වාර්තා වූ තොග වෙළෙඳපොළ ආසියාවේ විශාලතම තොග වෙළඳපොළ ලෙස සැලකෙන අතර මේ වන විට එය වසා දමා ඇත. මීට අමතරව අසල්වාසී ප්‍රදේශ එකොළහකට ද දැඩි නීති රීති පණවා තිබේ.

ප්‍රදේශවාසීන්ට එහා මෙහා යාම සඳහා අවසර ලැබී ඇතත් භාණ්ඩ ප්‍රවාහනයට සහ සංචාරකයන්ට එම කලාපය තහනම් කර ඇත.

නව ආසාදිතයන් වාර්තා වූ තොග වෙළෙඳපොළ අවට පවතින පාසැල් වසා දැමීමට තීරණය කර තිබේ. ප්‍රාථමික පන්ති නැවත විවෘත කිරීම අදට නියමිතව තිබූ නමුත් එය ද කල් දමා ඇති බව ග්ලෝබල් ටයිම්ස් වාර්තා කරයි.

බීජිං නුවරට සැපයන එළවළු සහ මාංශ වර්ග වලින් සියයට අසූවක් පමණ බෙදා හැරෙන්නේ මෙම තොග වෙළෙඳපොලෙනි. දිනකට මෙම වෙළෙඳපොළ තුළට දස දහස් ගණනක පිරිසක් පැමිණෙන අතර එය ඉතා ජනාකීර්ණ ස්ථානයකි.

චීනයේ රෝග පාලන සහ වැළැක්වීමේ මධ්‍යස්ථානයේ වසංගත රෝග පිළිබඳ ප්‍රධාන විශේෂඥ වෛද්‍යවරයා කියා සිටියේ මෙම තොග වෙළෙඳපොළ තුළින් සොයාගන්නා ලද කොරෝනාවෛරසය මෙතෙක් රට පුරා වාර්තා වූ කොරෝනාවෛරසය ට සමාන නොවන බව ය.

එම නිසා මෙය වෙනත් ප්‍රදේශයකින් එම ස්ථානය කරා පැමිණ ඇතැයි ඔවුහු අනුමාන කරති.

මෙම තොග වෙළෙඳපොළ තුළ සිටින සේවකයින් දස දහසකට අධික ප්‍රමාණයක් වෛද්‍ය පරීක්ෂණයකට භාජනය කිරීමට නියමිතය.

වසංගතයේ දෙවැනි රැල්ලක් ඇති වේ යන බිය පහළ වෙමින් පවතින්නේ බීජිං නුවර මෙන්ම රටේ බොහෝ ප්‍රදේශවල ජන ජීවිතය සාමාන්‍ය අතට පත් වෙමින් පවතිද්දී ය.

වසංගතය පාලනය කිරීම සඳහා නීති රීති හා සීමා පනවා තිබුණද චීන ජනතාව ප්‍රවේශම් සහගතව සිය රැකියා ස්ථාන කරා යාමට පටන් ගත් අතර පාසැල් යළි විවෘත විය.

Text by bbc

කොරෝනා වෛරසය පැතිරීම පිළිබඳව ප්‍රථමයෙන් අනතුරු ඇඟවූ චීන වෛද්‍යවරයකු වන ලී වෙන්ලියැන්ග්ගේ ( Li Wenliang) වැන්දඹු බිරිය අද (12) දින දරුවෙකු බිහි කළ බව චීන මාධ්‍ය වාර්තා කරනවා.

WeChat නම් පණිවුඩකරණ යෙදුමේ බිළිදාගේ පින්තූරයක් Fu Xuejie විසින් බෙදාහදා ගත් අතර, ඔහු ආචාර්ය ලී වෙතින් “අවසාන තෑග්ගක්” ලෙස නම් කළේය.

“කටකතා පතුරුවා හැරීම” සම්බන්ධයෙන් වෛද්‍ය ලී චීන බලධාරීන් විසින් අත්අඩංගුවට ගත් අතර පසුව වෛරසය හදුනා ගැනීමෙන් පසුව ඔහු මිය ගියේය.

ඔහුගේ මරණය සම්බන්ධයෙන් මහජන විරෝධය දැක්වීමෙන් පසු, ඔහු නිදොස් නිදහස් කිරීමට චීන කොමියුනිස්ට් පාලකයින් පියවර ගත් අතර පසුව ඔහු ජනතාවගේ වීරයෙකු බවට පත් විය.

ඔහුගේ වැන්දඹුව වන ෆු (Mrs Fu) මහත්මියට දැන් පුතුන් දෙදෙනෙක් සිටී. ඇයගේ පණිවුඩයේ ඇය මෙසේ ලිවීය: “ස්වාමිපුරුෂයා, ඔබට මෙය ස්වර්ගයෙන් දැකිය හැකිද? ඔබ අද ඔබේ අවසාන ත්‍යාගය මට ලබා දී ඇත. ඇත්තෙන්ම මම ඔවුන් ආදරය කර ආරක්ෂා කරමි.”

සිය සැමියාගේ මරණයෙන් පසු ශෝකය නිසා ඇති වූ සෞඛ්‍ය ගැටලුවලින් පීඩා විඳි බවත් නූපන් දරුවා ආරක්ෂාකාරීව තබා ගැනීම සඳහා තාවකාලිකව රෝහල් ගත කළ යුතු බවත් ෆු මහත්මිය ප්‍රාදේශීය පුවත් සේවාවක් වන Litchi News වෙත පැවසුවාය.

ඇය වෛද්‍ය ලී වගකිවයුතු වෛද්‍යවරයකු හා ආදරණීය ස්වාමිපුරුෂයෙකු ලෙස විස්තර කළ අතර, ඇගේ පවුලේ අය ඔහුගේ මරණය මුලින් අනෙක් දරුවාගෙන් සඟවා ගත් අතර, “තාත්තා විදේශගත වූවාය” යනුවෙන් පැවසුවාය.

ඇගේ ළදරු ඡායාරූපය චීන සමාජ ජාලයක් වන Weibo හි දහස් ගණනක් පරිශීලකයින් විසින් අදහස් දක්වා ඇති අතර බොහෝ දෙනෙක් සුබ පැතුම් පිරිනමති. තවත් සමහරු පවුලට කරදර නොකරන ලෙස මාධ්‍යයෙන් ඉල්ලා සිටියහ.

පොලිස් නිලධාරියෙකු විසින් ඝාතනය කළ අප්‍රිකානු ඇමරිකානු ජාතික ජෝර්ජ් ෆ්ලොයිඩ්ගේ අවමංගල්‍ය කටයුතු සිදු වෙමින් පවතින බව බී.බී.සී ලෝක සේවය අද (9) වාර්තා කළා. එම වාර්තාවල සදහන් වන්නේ ඔහුගේ මෘත දේහය සඳුදා (අද දින) ඔහුගේ මව මිහිදන් කළ ස්ථානය අසල තැන්පත් කරන බවයි.

ෆ්ලොයිඩ් පසුගිය මාසයේදී මිනියාපොලිස්හිදී මිය ගියේය. සුදු පොලිස් නිලධාරියෙක් සිය දණහිස ජෝර්ජ්ගේ බෙල්ලේ මිනිත්තු නවයකට ආසන්න කාලයක් රඳවාගෙන සිටි අතර, ඔහුගේ අවසන් මොහොත දුරකථනයෙන් රූගත කරන ලදී.

ඔහුගේ මරණය සම්බන්ධයෙන් සැකපිට පොලිස් නිලධාරීන් සිවු දෙනකු සේවයෙන් පහ කර තිබේ.

ඩිමොක්‍රටික් ජනාධිපති අපේක්ෂක ජෝ බිඩෙන් ෆ්ාලායිඩ්ගේ බිරිය සහ ඥාතීන් හමු වී සිය කනගාටුව ප්‍රකාශ කර තිබෙනවා.

ෆ්ලොයිඩ්ගේ මරණය “ඇමරිකානු ඉතිහාසයේ විශිෂ්ඨතම ඇඟවුම් ලක්ෂ්‍යයක්” යැයි බිඩෙන් පසුව සීබීඑස් ප්‍රවෘත්ති සේවයට පැවසුවා.

ජනාධිපති ඩොනල්ඩ් ට්‍රම්ප් පසුගිය සති අන්තයේදී ප්‍රකාශයක් කරමින් ‘ෆ්ලොයිඩ්ගේ මරණය ගැන නින්දිත ප්‍රකාශයක් කරමින් මැතිවරණ වාසි ලබා ගැනීමට ක්‍රියා කළ බවට‘ බිඩේන්ව තියුණු ලෙස විවේචනය කළා.

අවමංගල්‍ය සැලසුම් මොනවාද?

සීබීඑස් ප්‍රවෘත්ති සේවය වාර්තා කරන්නේ, ෆ්ලොයිඩ්ගේ අවමංගල්‍ය උත්සවය සදහා ෆවුන්ටන් ඔෆ් ප්‍රයිස් පල්ලියේ දේවගැතිවරුන් 500ක් පමණ සහභාගී වන බවයි.  

මිනසෝටා ආණ්ඩුකාර ටිම් වෝල්ස් මිනිත්තු අටක් තත්පර 46 ක් නිහඩව සිටීමෙන් ෆ්ලොයිඩ්ගේ අවසන් කටයුතුවලට ගෞරව කරන ලෙස ජනතාවගෙන් ඉල්ලා සිටියේය. එය පොලිස් නිලධාරියා විසින් ෆ්ලොයිඩ්ගේ ගෙළ සිරකර ගෙන සිටි කාලයයි.

පසුව මිනී පෙට්ටිය හූස්ටන් නගරයට දකුණින් පිහිටි පර්ලන්ඩ් හි සුසාන භූමියකට ගෙන යනු ලැබේ. පෙරහැරේ අවසාන සැතපුම සඳහා එය අශ්ව කරත්තයකින් ගෙන යනු ලැබේ.

පෙරහැර පසු වන විට මහජනතාවට ආරක්ෂිතව ගෞරව දැක්වීමට ඉඩ සැලසෙන පරිදි මාර්ග බාධක ඉදිකර ඇත.

ඔහුගේ දේහය සඳුදා පැය හයක් පල්ලියේ ප්‍රදර්ශනය කර තිබුණි.

ෆ්ලොයිඩ් උපත ලැබූ මිනියාපොලිස් සහ උතුරු කැරොලිනාවේ ද අනුස්මරණ සේවා පැවැත්විණි.

ෆ්ලොයිඩ්ගේ පවුල ගැන බිඩෙන් පැවසුවේ කුමක්ද?

“ඔවුන් ඇදහිය නොහැකි පවුලක්. ඔහුගේ කුඩා දියණිය එහි සිටියා, ‘තාත්තා ලෝකය වෙනස් කිරීමට යනවා’ යැයි ඇය පැවසුවා. මම හිතන්නේ ඇගේ තාත්තා ලෝකය වෙනස් කරයි කියා,” බිඩෙන් සීබීඑස් හි නෝරා ඔ’ඩොනෙල්ට පැවසීය.

“මම හිතන්නේ මෙහි සිදුවී ඇත්තේ ඇමරිකානු ඉතිහාසයේ විශිෂ්ටතම ඇඟවුම් ලක්ෂ්‍යයකි. ඇත්ත වශයෙන්ම, සිවිල් නිදහස, සිවිල් අයිතිවාසිකම් සහ මිනිසුන්ට ගෞරවයෙන් සැලකීම.”

අවමංගල්‍ය උත්සවයේ ඡායාරූපයක් ටීටීට් කළ ෆ්ලොයිඩ් පවුලේ ප්‍රකාශක බෙන්ජමින් ක්‍රම්ප් කියා සිටියේ ෆ්ලොයිඩ්ගේ ඥාතීන් බිඩෙන් මහතාගේ අදහස් පිළිගන්නා බවයි.

හිටපු උප ජනාධිපතිගේ සහායකයින් පැවසුවේ අඟහරුවාදා උත්සවය සඳහා වීඩියෝ පණිවිඩයක් ද පටිගත කරන බවයි.

සෑම ජනාධිපතිවරණ අපේක්ෂකයෙක්ම ඔවුන්ගේ ඉදිරි මැතිවරණය ඉතිහාසයේ තීරණාත්මක අවස්ථාවක් ලෙස මෙම ඝාතනය දක්වයි.  ජෝ බිඩෙන් මුල සිටම කියා සිටියේ ඇමරිකානුවන්ට ඔවුන් කුමන ආකාරයේ ජාතියක් විය යුතුද යන්න නිර්වචනය කිරීමට නොවැම්බර් මාසය අවස්ථාවක් වනු ඇති බවයි.

ප්‍රවීණ දේශපාලනඥයෙකුගේ සම්මත වාචාල කතා ලෙස බොහෝ දෙනා එය ප්‍රතික්ෂේප කර තිබේ. කෙසේවෙතත්, දැන් බිඩන්ගේ ප්‍රතිරූපය ගොඩනැඟෙමින් තිබේ.

පූර්ව ජනමත සමීක්ෂණවලින් පෙනී යන්නේ ජාතිය සහ නීතිය ක්‍රියාත්මක කිරීම පිළිබඳ ඇමරිකානු අදහස් සති කිහිපයකින් නාටකාකාර ලෙස වෙනස් වී ඇති බවත් සාමාන්‍යයෙන් අඩු ප්‍රමුඛතාවයක් ඇති මෙම ප්‍රශ්නය දැන් ඡන්දදායකයින්ගේ මනසෙහි ඉහළින්ම ඇති බවත්ය.

මීට වසර හයකට පෙර ඇමරිකානුවන්ගෙන් 33% ක් පමණක් කියා සිටියේ පොලිසිය කළු ජාතිකයින්ට එරෙහිව අධික ලෙස බලය යෙදවීමට වැඩි ඉඩක් ඇති බවයි. දැන් එම සංඛ්‍යාව 57% කි. (සුදු ප්‍රතිචාර දැක්වූවන්ගෙන් 49% ක් ද ඇතුළුව)

කළු ජාතික ඡන්දදායකයින් තම ඩිමොක්‍රටික් ප්‍රාථමික සහයෝගයේ කොඳු නාරටිය බව සලකන බිඩෙන්, මැතිවරණ ආයෝජනය සඳහා හොඳින් ස්ථානගත විය හැකිය.

මැතිවරණයට අනපේක්ෂිත සිදුවීම් හා චලනයන් මත රැඳී සිටිය හැකි අතර, සාර්ථක අපේක්ෂකයින් රැල්ල හඳුනාගෙන එය ජයග්‍රහණය කරා ගෙන යයි. මාස පහක් ඇමරිකානු දේශපාලනයේ සදාකාලික වන අතර, බිඩෙන් ඔහුගේ මොහොත සොයාගෙන ඇත.

බී.බී.සී ලෝක සේවය 2020 ජූනි 09 වැනිදා පළ කළ වාර්තාවක් ඇසුරිණි

අද (8) ප.ව 09.04 වන විට ගෝලීය වශයෙන් කොවිඩ්-19 ආසාදිතයින් සංඛ්‍යාව 70,49,649 දක්වා ඉහළ ගොස් ඇති බවත් මරණ සංඛ්‍යාව 409,886ක් බවත් ජොන්ස් හොප්කින්ස් විශ්වවිද්‍යාලයේ කොරෝනා වෛරස් සම්පත් මධ්‍යස්ථානයේ නිල වෙබ් අඩවියේ සදහන් වෙනවා.

ඉන්දියාවේ අවදානම වේගයෙන් ඉහළට

ඇමෙරිකාව, බ්‍රසීලය සහ රුසියාවේ කොවිඩ්-19 ආසාදිතයින් සංඛ්‍යාව සුපුරුදු පරිදි වර්ධනය වෙද්දී ඉන්දියාවේ ආසාදිතයින්ගේ සීග්‍ර වර්ධනයක් පෙන්නුම් කරන බව ඉන්දිය මාධ්‍ය වාර්තාවල සදහන් වෙනවා.

ජෝන්ස් හොප්කින්ස් විශ්වවිද්‍යාලයේ නවතම වාර්තාවලට අනුව ඉන්දියාවේ සමස්ත ආසාදිතයින් සංඛ්‍යාව 260,093ක් වන අතර මරණ සංඛ්‍යාව 7263ක්. සමස්ත කොවිඩ් ආසාදිත රාජ්‍ය අතර ඉන්දියාව 05 වන ස්ථානයේ (එක්සත් ජනපදය, බ්‍රසීලය, රුසියාව සහ මහා බ්‍රිතාන්‍යය) පසු වුවත් මරණ සංඛ්‍යාව අනුව ඉන්දියාව පසුවන්නේ 12 වැනි ස්ථානයේ වීම විශේෂත්වයක්.

‘ද හින්දු‘ වාර්තාවල දැක්වෙන ආකාරයට අද දිනය වන විට ඉන්දියාවේ ප්‍රධාන ප්‍රාන්තයක් වන මහාරාෂ්ට්‍ර ප්‍රාන්තයේ කොවිඩ්-19 ආසාදිතයින් සංඛ්‍යාව චීනයෙන් වාර්තා වූ ආසාදිතයින් සංඛ්‍යාව ද ඉක්මවා ගොස් තිබෙනවා.

ඉන්දියාවේ වාණිජ කේන්ද්‍රස්ථානය වන මුම්බායි නුවරද පිහිටා ඇති මහාරාෂ්ට්‍ර ප්‍රාන්තයෙන් අද (8) පස්වරු 1.20 වනවිට වාර්තා වූ සමස්ත ආසාදිතයන්ගේ ගණන 85,975ක් වූ අතර ‘කොවිඩ්-19’ ගෝලීය වසංගතය ව්‍යාප්ත වීම ආරම්භ වූ චීනයෙන් අද දහවල් වනවිට වාර්තා වූ සමස්ත ආසාදිතයන්ගේ ගණන 84,191ක්.

ද හින්දු වාර්තාවේ සදහන් වන්නේ මහාරාෂ්ට්‍ර ප්‍රාන්තයෙන් අද පස්වරුවෙන් අවසන් වූ පැය 24ක කාලයේදී ආසාදිතයන් 3,007 දෙනකු වාර්තා වූ බවත් අද දින වාර්තා වූ කොරෝනා ආසාදිත මරණ ගණන 91ක් බවයි. එම ප්‍රාන්තයෙන් වාර්තා වන සමස්ත කොරෝනා ආසාදිත මරණ ගණන 3,060ක් වීම ද විශේෂත්වයක්.

පසුගිය දශකය තුළ ආර්ථිකයේ වර්ධන ප්‍රමාණය දෙගුණ කිරීම සටහන් කරමින් 2020 වර්ෂය ආර්ථික වර්ධනයේ සැමරුම් උත්සවයක් පැවත්වීමට හැකිවනු ඇතැයි චීනයේ නායකත්වය අපේක්ෂා කළේය. එහෙත් නව කිරීටක වෛරසය එම අපේක්ෂාව බොඳ කර දමා ඇත.

අපේක්ෂා කළ කාලයට වඩා කඩිනමින් චීනය තුළ වෛරස් වසංගතය පාලනය කර ඇතත්, සත්‍ය වශයෙන්ම සිදු වී ඇත්තේ වෛරසය පැතිරීමේ ප්‍රමාණය හා වේගය චීන සමාජය අංශභාග තත්ත්වයට පත් කර තිබීමය.

චීනයේ වසංගතය මන්දගාමී වූයේ පෙබරවාරි මැද භාගයේ දී රට පුරා සිදු කළ වසා දැමීම් නිසාය. මාර්තු 10 වන දින ජනාධිපති ෂී ජින්පින් , හුවෙයි පළාතේ අගනුවර වන වුහාන්  හී සංචාරය කළේය. මාර්තු 19 වන විට චීනය තුළ සොයා ගන්නා ලද කොරෝනා ආසාදිතයන්ගේ සංඛ්‍යාව සීග්‍ර ලෙස පහල ගියේය.

වසංගතයේ නව කේන්ද්‍රස්ථානය හා වෛරසය පැතිරීමේ වේගවත්ම ස්ථානය ලෙස ඇමරිකා එක්සත් ජනපදය පත් වූ විට , ඇමරිකාවේ ජීවත්වීමට වඩා චීනයේ ජීවත්වීම  ආරක්ෂිත බවට මතයක් ඇති වන්නට විය.

එය එසේ වුවද, මෙම වෛරසයෙන් ආර්ථික වශයෙන් දරුණුම හානියට පත් වී ඇත්තේ චීනය ය. මූල්‍ය ආධාරයකින් වුවද  චීනයට යථා තත්ත්වයට පත්වීමට හැකි වෙතැයි යන අපෙක්ෂාව තබා ගැනීමට පවා මේ වන විට අවිනිශ්චිතය.

චීනයේ ඵලදායිතාවය තිරසාරව යථා තත්ත්වයට පත් කිරීමට නම්, ඇමරිකා එක්සත් ජනපද ඉල්ලුම, යළිත් යථා තත්ත්වයට පත් කිරීම අත්‍යාවශ්‍ය ය.

චීනය විසින් මෑතක දී ප්‍රකාශයට පත් කරන ලද ආර්ථික දර්ශක, වෙළඳපොල නිරීක්ෂකයන් විසින් මීට පෙර පුරෝකථනය කරන ලද ප්‍රමාණයට වඩා බෙහෙවින් දුර්වලය. සිල්ලර විකුණුම් 20.5% න් ද, කාර්මික නිෂ්පාදන 13.5% න් ද පහත වැටී ඇත.

ආර්ථික විශ්ලේෂකයින් විසින් චීන ආර්ථිකය පිළිබඳ ඔවුන්ගේ දෘෂ්ටිවාදය මේ වන විට දක්වා තිබේ. ඊට අනුව, ප්‍රධාන මූල්‍ය උත්තේජනයක් සහ පොලී අනුපාතය කප්පාදු කිරීමක් කර තිබියදීත්, 2020 වර්ධනය සඳහා ඇස්තමේන්තු මුල් ඉලක්කය වූ 6% ආර්ථික වර්ධනය 4% සිට 1% දක්වා පහත වැටීමක් සිදුවනු ඇතැයි ඔව්හූ පුරෝකථනය කර ඇත.

සාර්ස් ( SARS ) වෛරසය හේතුවෙන් 2002- 2003 වසර වල චීන ආර්ථික ප්‍රකෘතිය, වී (V) හැඩයක් ගත් අතර, චීනය ඒ අවධියේ සිය කෙටි කාලීන අලාභයන් සියල්ලම පියවා ගත්තේ බටහිර රටවල ශක්තිමත් පාරිභෝගික ඉල්ලුමට කඩිනමින් ප්‍රවේශ වීමෙන්ය.

2008 දී පැවැති ලෝක ආර්ථික අර්බුදයේදී ද , අනෙකුත් රට වලට සාපෙක්ෂව චීනය බලපෑමකට ලක් නොවූ අතර, ගෝලීය නිෂ්පාදන සහ සැපයුම් ජාල අඛණ්ඩව ක්‍රියාත්මක වූ නිසා වේගවත් ආර්ථික වර්ධනයක් පවත්වාගෙන යෑමට චීනයට හැකි විය.

නව කොරෝනා වෛරසයේ බලපෑම හේතුවෙන් ප්‍රධාන යුරෝපීය ආර්ථිකයන් සියල්ලම පාහේ අවුල් ජාලයකට පත්වී ඇති අතර, චීනයේ ආර්ථිකය ද නැවත ආරම්භ වෙමින් පවතින්නේ මන්දගාමීවය.

බටහිර රටවල් හරහා ප්‍රමාණවත් ගණු දෙනු කරුවන් සොයා ගැනීමට චීනයට අරගලයක් කිරීමට සිදුවී ඇත. වෙනත් රටවල නැගී එන වෙළඳ පොලවල් යුරෝපයේ මෙන් චීනයේ හානිය අවම කර ගැනීමට ප්‍රමාණවත් නැත.

කොරෝනා වෛරස් වසංගතයත් සමඟ ප්‍රධාන බටහිර සමාගම් සිය නිෂ්පාදන වසා දැමූ බැවින් , සැපයුම් දාම කඩාකප්පල් වී තිබේ. වසංගතය නිසා දැඩි ලෙස බලපෑමට ලක් වූ අංශ යටතට , මෝටර් රථ නිෂ්පාදන සහ සංනිවේදන උපකරණ නිෂ්පාදන ද ඇතුළත් ය.

කොරෝනා වසංගතය ව්‍යාපතවීම පාලනය නොකිරීම සම්බන්ධයෙන් , ඇමරිකා එක්සත් ජනපදය ප්‍රමුඛ බටහිර රටවල් විසින්  චීනයට කරන චෝදනා බරපතලය. එය උපයෝගී කර ගනිමින් වෙළඳ හා ආයෝජන ප්‍රථිසංස්කරණ සඳහා චීනයට බලපෑම් කිරීමට ඇමරිකා එක්සත් ජනපදය විසින් තීරු බදු පුළුල් ලෙස භාවිතා කිරීම පදනම් කරගත් තර්කණය නැවත විමර්ශනය කිරීමට බල කර ඇත.

පසුගිය ජනවාරි මාසයේ දී ඇමරිකාව් චීනය සමඟ ඇති කර ගත් වෙළඳ ගිවිසුම මේ වන විට අක්‍රීය වී තිබේ. තීරු බදු වෙළඳ සීමාවන් සමඟ සම්බන්ධ කිරීමේ එක්සත් ජනපද උපාය මාර්ගය වැනි ප්‍රවේශ , චීන ඇමරිකා වෙළඳ ගිවිසුමේ ප්‍රමුඛතා සමඟ නොගැලපෙන තැනට පත් වී ඇත.

වඩා හොඳ වුවත්, වඩා නරක වුවත් , ගෝලීය ආර්ථිකය පදනම් වී ඇත්තේ සම්බන්ධතා මතය. චීනයේ හා බටහිර රටවල  අාර්ථික වර්ධනය නැවත පණ ගැන්වීමට නම්, ලෝක වෙළඳාම සහ හොඳින් ක්‍රියාත්මක වන සැපයුම් ජාලයන් හී පුණර්ජීවනය අත්‍යාවශ්‍ය කරුණක් බවට පත් වී ඇත.

කොමියුනිස්ට් පක්ෂ පාලනයේ රාමුවක් සහිත ” රාජ්‍ය ධනවාදය ” මඟින් , චීනය වෙළඳපොල ආර්ථිකයක් බවට පත් කළ ඩෙන්ග් ෂියාඕපින්ග් ගෙන් ආරම්භ වූ චීන ආර්ථික වර්ධනය, පදනම් වූයේ ලාභ ශ්‍රමය සහ අති විශාල වූ බටහිර වෙළඳපොල මතය.

”බළලුන් මීයන් අල්ලා ගන්නේ නම්, බළලාගේ වර්ණය සොයන්නේ කුමකට ද? ” යැයි ඩෙන්ග් ෂියාඕපින් ඇසුවේ , ඔහු ඇමරිකාව සමඟ ගිවිසුම් ගැසූ මුල් අවධියේ දීය.

මානව හිමිකම් සහිත බටහිර පන්නයේ ප්‍රජාතන්ත්‍රවාදය කෙරෙහි එතරම් උනන්දුවක් නොදැක්වූ ඩෙන්ග් ෂියාඕපින් , එම ප්‍රජාතන්ත්‍රවාදය සැලකුවේ කොමියුනිස්ට් පක්ෂ පාලනයට එල්ලවිය හැකි තර්ජනයක් ලෙසය.

වත්මන් චීන නායක ෂී ජින්පින් , ඩෙන්ග් ෂියාඕපින්ටත් වඩා එම ප්‍රතිපත්තියේ පිහිටා ඊටත්  වඩා ඒකාධිපති ස්වරූපයකින් පාලනය ගෙන යන්නෙකි. 

චීනය තුළ ශ්‍රමය සූරාකෑමෙන් ගොඩ නඟා ගත් අතිරික්ත මූල්‍ය ප්‍රාග්ධනය, ලොව පුරා වපුරමින්, එසේම බටහිරයන්ට අභියෝග කරමින් , සංවර්ධනය වෙමින් පවතින රටවල් වල ,සමාජ ,ආර්ථික, දේශපාලන සහ භූමිය පවා හැසිරවීමට පටන් ගෙන ඇති චීනයට ,එම මාර්ගය ඔස්සේ බාධාවකින් තොරව ඉදිරියට ගමන් කළ නො හැකි වටපිටාවක් මේ වන විට මතුවෙමින් තිබේ.

කොරෝනා වෛරස් වසංගත අර්බුදය තුළ ඇමරිකාව ප්‍රමුඛ බටහිර රටවල්, චීන භාණ්ඩ මිලදී ගැනීම අවම කිරීමටත්, චීනය තුළ පවත්වාගෙන යන මහා පරිමාන බටහිර ව්‍යවසායන් චීනයෙන් ඉවත් කර ගැනීමටත්, සැලසුම් කර තිබීම හේතුවෙන් චීනය බලවත් ආර්ථික අර්බුදයකට පත්වීම නො වැලැක්විය හැකිය.

චීන කොමියුනිස්ට් පක්ෂයේ ඉහළ පෙළ නිලධාරීන් අතලොස්සකගේ අභිමතය පරිදි රාජ්‍ය පාලනයක් ගෙනයමින්, රටේ ධනයෙන් අති විශාල ප්‍රමාණයක් 1% ක් තරම් වූ පිරිසක් විසින් අත්පත් කරගනිමින් ,පොදු ජනතාව අතර නිසි පරිදි ආදායම් බෙදීමක් සිදු නොකොට ශ්‍රමය කුණු කොල්ලයට ලබා ගන්නා රටකට මෙම අර්බුදය අභ්‍යන්තර ගැටලු තිව්‍ර කිරීමට හේතු විය හැකිය.
එසේම ලාභ ශ්‍රමය මත නිෂ්පාදනය කරන භාණ්ඩ,  අඩු මිලකට බටහිර වෙළඳ පොල තුළට පිවිසීම අවම වීමේන්, බටහිර පාරිභෝගිකයන්ට භාණ්ඩ සඳහා පෙර කලට සාපේක්ෂව  අධික මිලක් ගෙවන්නට සිදුවිය හැක.

එහෙත් චීනය තුළ පවතින  බටහිර ව්‍යවසායන් ඉන්දියාව වැනි වෙනත් ආසියාතික රටවලට ගමන් කිරීමෙන් පසුව එකී රටවල ලාභ ශ්‍රමය මත පදනම්ව නිපදවන භාණ්ඩ නැවතත් බටහිර වෙළඳ පොල තුළට පිවිසීමෙන් එම ගැටලුව විසඳා ගැනීමට බටහිර රාජ්‍යයන් සමත්වනු ඇත.

මාඕ සේතූං ගේ ” ප්‍රජාතන්ත්‍රවාදී ආඥාදායකත්ව” පාලන විධි ක්‍රමය ප්‍රතිසංස්කරණයකට ලක් කළ ඩෙන්ග් ෂියාඕපින් චීනයට හඳුන්වා දුන් ” එක් රටක් පද්ධති දෙකක්” යන මූලධර්මය, එනම් එකම දේශපාලන අධිකාරියක් යටතේ කොමියුනිස්ට්වාදය සහ ධනවාදය සහජීවනයෙන් පවත්වාගෙන යෑම යන මූලධර්මය ඉදිරියේ දී අර්බුදයට ගමන් කරනු ඇත.

ෂී ජින්පින් ගේ නායකත්වය යටතේ වත්මන් චීනය වඩාත් ඒකාධිපති ස්වරූපයක පාලනයකට නතුවී ඇති අතර,  ලෝක බලවතුන්ට අභියෝග කරමින් , පරිධියේ රටවල් තම අණසකට නතු කර ගැනීමට යන ගමන කෙලවරවනු ඇත්තේ ” එක් රටක් පද්ධති දෙකක්” යන මූලධර්මය සුණුවිසුනු වීමෙන් විය හැක.

සුනිල් ගාමිණී

ජෝර්ජ් ෆ්ලොයිඩ් ඝාතනය එක්සත් ජනපද පොලිසිය සිදු  කල අපරාධ රැල්ලක නවතම අවස්ථාවයි. Killbypolice.net වෙබ් අඩවියට අනුව මේ වසරේ මේ දක්වා පොලිස් ඝාතන 400ක් සිදුව තිබේ. සෑම වසරකම ඝතනයට ලක්වන සංඛ්‍යාව 1,000 කට වඩා වැඩිය.

මිනසෝටා ප්‍රාන්තයේ මිනියාපොලිස් හි දී ජෝර්ජ් ෆ්ලොයිඩ් ඝාතනය කිරීම ඇමෙරිකාව තුළ දෛනිකව සිදුවන බිහිසුණු අපරාධ අතර අති බිහිසුණු අපරාධයක් ලෙස මුළු ලෝකයම හෙළා දුටු අතර මේ මොහොත වන විට අදාළ සිදුවීම හේතු කොට ගෙන මුළු ඇමෙරිකානම අවුල් ජාලයක් බවට පත්ව ඇත.

අප්‍රිකානු ඇමරිකානුවෙකු වූ ජෝර්ජ් ෆ්ලොයිඩ් සඳුදා පොලිස් නිලධාරීන් සිව්දෙනෙකු විසින් බිම හෙළා පොළවට තදකරගෙන ගෙල සිරකිරීමෙන් අනතුරුව මිය ගියේය. ඔහුට යන්ට හරින ලෙස ඉල්ලා කෑගැසූ සෙනඟ ඉදිරියේ මෙය සිදුවිය. අපරාධයේ වැඩි හරියක් අසල සිටි අයෙකුගේ වීඩියෝ කැමරාවට සහ නිරීක්ෂණ කැමරාවල සටහන් විය.

ඩෙරෙක් ෂෝවින් නමැති සුදු පොලිස් නිලධාරියා, ඔහුගේ දණහිසෙන් මිනිත්තු ගනනාවක් ෆ්ලොයිඩ්ගේ ගෙල තදකරගෙන සිටිනු එක් වීඩියෝ දසුනක දැක්වෙයි. 46 හැවිරිදි ෆ්ලොයිඩ් මෙසේ කියනු ඇසිණ. “මට හුස්ම ගන්ට බෑ, ඔබ මාව මරන්න යනවා!

ඩොලර් දහයක හොර නෝට්ටුවක් භාවිතා කිරීමට උත්සාහ කල බවට වෙළෙඳසැලකින් ලැබුණු දුරකථන ඇමතුමකින් පසුව ෆ්ලොයිඩ් අල්ලා ගනු ලැබීය. වෙළෙඳසැලේ හිමිකරු පසුව මාධ්‍යයට කියා සිටියේ එය හොර නෝට්ටුවක් බව ෆ්ලොයිඩ් දැන සිටියේ දැයි තමා නොදන්නා බවයි. පොලිසිය වහාම එම ස්ථානයට පැමණෙ ෆ්ලොයිඩ් ඔහුගේ වාහනයෙන් එළියට ගෙන මාංචු දමා ඔහුගේ සිරුර අඩපණ වන තුරුම හුස්ම හිරකරගෙන සිටියේය.

ෆ්ලොයිඩ් අත්අඬංඟුවට ගැනීමට උදව් කළ අනෙක් නිලධාරීන් තිදෙනා තෝමස් ලේන්, ටූ තාඕ සහ ජේ. ඇලෙක්සැන්ඩර් කුවෙන්ග් ය.

නිල පොලිස් වාර්තාවේ ෆ්ලොයිඩ් අත්අඩංගුවට ගැනීමේදී ඔහු ප්‍රතිරෝධය දැක්වූ බව සඳහන් වුවද, ප්‍රාදේශීය අවන්හල් හිමිකරුවෙකු විසින් බදාදා නිකුත් කරන ලද නිරීක්ෂණ වීඩියෝවෙන් පැහැදිලි වන්නේ, පොලිසිය ෆ්ලොයිඩ් මෝටර් රථයෙන් එළියට ගෙන මාංචු දමන අවස්ථාවේ ඔහු කිසිම ප්‍රතිරෝධයක් නොදැක්වූ බවය. 

මහ දවල් සිදුකළ ඔහුගේ ඝාතනය කිසිදු ලෙසකින් හෝ සාධාරනීකරණය කළ නොහැකි වුව ද බදාදා සවස වන විටත් චාවින්, ලේන්, තාඕ සහ කුවෙන්ග් නිදහසේ පසුවූහ. පොලිස් දෙපාර්තමේන්තුව විසින් වැටුප් රහිතව ඔවුන්ගේ සේවය අත්හිටුවනු ලැබුවේත් පසුව ඩිමොක්‍රටික් නගරාධිපති ජේකබ් ෆ්‍රේ විසින් සේවයෙන් පහ කරන ලද්දේත් අඟහරුවාදා වන විට ඇවිල ගිය මහජන කෝපය හමුවේ පමණි.

ෆ්ලොයිඩ්ගේ ඝාතකයින් අත්අඩංගුවට ගැනීම ප්‍රතික්ෂේප කිරීම දින දෙකක් තිස්සේ පෙලපාලිවලට සහභාගී වූ සියලු ජනවර්ගවලට අයත් කම්කරුවන් අතර කෝපය ඇවිලවීය.

දහස් ගණන් සුදු හා කලු කම්කරුවන් හා තරුණයෝ පසුගිය අඟහරුවාදා ෆ්ලොයිඩ් ඝාතනය  කල මංසන්ධියේ සහ අසල පිහිටි පොලිස් ස්ථානය ඉදිරිපිට විරෝධතා දැක්වූහ. පෙලපාලිය විසුරුවා හැරීම සඳහා පොලිසිය දිගින් දිගටම කඳුළු ගෑස් සහ මාරාන්තික නොවන  උණ්ඩ වලින් වෙඩි තබනු ලැබීය. ඊයේ රාත්‍රියේ මිනියාපොලිස් සහ එක්සත් ජනපදය පුරා වෙනත් නගරවල තවත් උද්ඝෝෂණ සංවිධානය කරන ලදී.

ජෝර්ජ් ෆ්ලොයිඩ් ඝාතනය එක්සත් ජනපද පොලිසිය සිදු  කල අපරාධ රැල්ලක නවතම අවස්ථාවයි. Killbypolice.net වෙබ් අඩවියට අනුව මේ වසරේ මේ දක්වා පොලිස් ඝාතන 400ක් සිදුව තිබේ. සෑම වසරකම ඝතනයට ලක්වන සංඛ්‍යාව 1,000 කට වඩා වැඩිය.

මිසූරි ප්‍රදේශයේ ෆර්ගියුසන්හිදී මයිකල් බ්‍රවුන්ට වෙඩි තබා ඝාතනය කර වසර හයකට ආසන්න කාලයක් ගත වී ඇත. ඒ 2014 අගෝස්තු 9 දිනය. 2014 ජූලි 17 දින එරික් ගාර්නර් නිව්යෝක් නගරයේදී ගෙල සිරකර මරා දැමීමෙන් පසු පොලිස් ප්‍රචන්ඩත්වයට එරෙහිව මහජන විරෝධතා ඇති විය. විවිධ පුද්ගලයින් 6,000 ක් පමන මේ කාලය තුල පොලීසිය විසින් ඝාතනය කර තිබේ.

පොලිස් ප්‍රචණ්ඩත්වය ජාතිවාදය දායක වන බවට සැකයක් නැත. පොලිසිය විසින් ඝාතනය කර ඇති වැඩිම පිරිස සුදු ජාතිකයින්ය.  අප්‍රිකානු ඇමරිකානුවන් සහ හිස්පැනික්වරු හිරිහැර, අපයෝජන, අත්අඩංගුවට ගැනීම් සහ සිරගත කිරීම් සඳහා අසමාන ලෙස ඉලක්ක කරගෙන ඇත. ට්‍රම්ප් පරිපාලනය හිතා මතාම, පොලිස් නිලධාරීන් ද ඇතුළු වඩාත් පසුගාමී හා ප්‍රතිගාමී බලවේග ගොඩනගා ඇත. “ මැරයා” ට එරෙහිව “රළු” ප්‍රතිචාර දැක්වෙන වීඩියෝ පට නැරඹීමට තමා කැමති බව ට්‍රම්ප් ප්‍රකාශ කර ඇත. “එතරම් කරුණාවන්ත වෙන්න එපා ” යයි ඔහු පොලිස් නිලධාරීන්ගෙන් ඉල්ලා ඇත. 

කෙසේ වෙතත්, පොලිස් ප්‍රචණ්ඩත්වයට වාර්ගික සතුරුකම පමණක් නොව පන්ති පරපීඩනය ද බලපා ඇත. ඇමරිකානු පොලිස් ප්‍රචණ්ඩත්වය ගොදුරු වූ කලු, සුදු, හිස්පැනික් හෝ ස්වදේශික ඇමරිකානුන් අතර පවතින පොදු ලක්ෂණය නම් ඔවුන් දුප්පත් සහ ජනගහනයේ වඩාත්ම අවදානමට ලක්විය හැකි කොටස් වීමයි

බ්ලැක් ලයිව්ස් මැටර් (කලු ජාතිකයින්ගේ ජීවිත වටනේය) සහ වාර්ගික දේශපාලනයේ අනෙකුත් යෝජකයින්ගේ කාර්යභාරය වන්නේ, පොලිස් ප්‍රචණ්ඩත්යට හේතුව ජාතිවාදය යැයි පවසා  කලු පොලිස් නිලධාරීන් වැඩියෙන් බඳවා ගැනීම හෝ කලු ජාතික දේශපාලඥයන් පත් කර ගැනීමෙන් පමණක් ගැටලුව විසඳනු ඇතැයි යන අදහස ප්‍රවර්ධනය කිරීමයි. නිසැකයෙන්ම මෙයින් අදහස් කරන්නේ, පොලිස් ප්‍රචණ්ඩත්වයට එරෙහිව නැගෙන මහජන විරෝධය, වෝල් වීදියට සහ මිලිටරිවාදයට ගැති  පක්ෂවලින් එකක් වන ඩිමොක්‍රටික් පක්ෂය පිටුපස ගැටගැසීමයි. නමුත් පවතින ධනපති ක්‍රමය යටතේ පොලිස් ප්‍රචන්ඩත්වය නැමති ගෝලීය වසංගතය අඛණ්ඩව නොනැසී පවතී.

මෙම භීෂණකාරී ප්‍රචණ්ඩත්වය, ඩිමොක්‍රටික් ජනාධිපති බැරැක් ඔබාමාගේ රැකවල යටතේද පැවති අතර ෆැසිස්ට්වාදී රිපබ්ලිකන් පක්ෂයේ ඩොනල්ඩ් ට්‍රම්ප් යටතේ ද පවතී. පවතින ආණ්ඩුව ඩිමොක්‍රටික් හෝ රිපබ්ලිකන් වේවා, නගරාධිපති හෝ පොලිස් ප්‍රධානියා කලු ද සුදු ද ගැහැනු ද පිරිමි ද හෝ වේවා, සමලිංගික හෝ එසේ නොවන අයෙකු වේවා, පවතින ධනපති ක්‍රමය යටතේ පොලිස් ඝාතන අඛණ්ඩව සිදු වේ.

වසර තුනකට පෙර සෝමාලියානු-ඇමරිකානු මිනියාපොලිස් පොලිස් නිලධාරියෙක්, ජස්ටින් ඩමොන්ඩ් නම් සුදු ජාතික කාන්තාවක ඇගේ පිටුපස පෙදෙසට වෙඩි තබා ඝාතනය කළේය. ඒ අසලම පිහිටි කුඩා නගරයක පැවති රථවාහන තදබදයකදී හිස්පැනික් පොලිස් නිලධාරියෙකු විසින් අප්‍රිකානු සම්භවයක් ඇති ඇමරිකානු ජාතික ෆිලැන්ඩෝ කැස්ටිල් ඝාතනය කිරීම සමාජ ජාල වෙබ්අඩවි වල සජීවීව විකාශනය වී වසර හතරක් ගත වී ඇත.

විශේෂයෙන් පොලීසියේ ම්ලේච්ඡ ක්‍රියාවන් හා හිංසනයන් ප්‍රසිද්ධියේ හෙළිදරව් වීමෙන් පසු, ඒවා අනිවාර්යයෙන්ම චිත්‍රපට මාතෘකා වීමට ඉඩ ඇති හෙයින්, ඩිමොක්‍රටික් සහ රිපබ්ලිකන් දේශපාලඥයෝ එම අපරාධ පිළිබද විමර්ශනය කරන බවට ව්‍යාජ පොරොන්දු දෙති. සෑම විටම පාහේ මෙම විමර්ශන, නඩු පැවරීම් සහ දඬුවම් නියම කිරීම් දක්වා හෝ ඉදිරියට යාමට අසමත් වෙයි.

ලෙනින් සිය රජය හා විප්ලවය පොතෙහි සඳහන් කර ඇත්තේ, රාජ්‍ය  බලය“තමන්ගේ අණට යටත් බන්ධනාගාර ආදිය සහිත ආයුධ සන්නද්ධ මිනිසුන්ගේ විශේෂ ආයතන” වශයෙනි. ෆ්‍රෙඩ්රික් එංගල්ස් උපුටා දක්වමින් ලෙනින් සඳහන් කළේ, රාජ්‍යය මූලික වශයෙන් “ප්‍රතිවිරුද්ධ පන්ති අතර පවතින සතුරුකම්වල නිෂ්පාදනයක් හා ප්‍රකාශනයක්” බවත්, රාජ්‍යයේ බලය හා ප්‍රචන්ඩත්වය ශක්තිමත් වීම, “රාජ්‍ය තුෙළ පන්ති සතුරුකම් වඩාත් උග්‍ර වීමට සමානුපාතිකව සිදු වන බවත් ය. ”

ගෝලීය කොරෝනා වෛරස්  වසංගතය සමඟ මෙම පන්ති ප්‍රතිවිරෝධතා නව අවධියකට පිවිසෙමින් තිබේ. ව්‍යාපාරික හා මූල්‍ය කතිපයාධිකාරය, කම්කරුවන් ආරක්ෂා කිරීම සඳහා කිසිවක් නොකර, ඩොලර් ට්‍රිලියන ගනන් තමාගේ පෙට්ටගම් වෙත මාරු කිරීමට වසංගතය භාවිතා කර ඇති අතර, ධනපති ඩිමොක්‍රටික් හා රිපබ්ලිකන් දේශපාලඥයින් ඒකමතිකව එම පියවරයන් අනුමත කර ඇත.

මෙම පියවරයන්, “ආර්ථිකය යළි විවෘත කිරීම” සහ වෝල් වීදියට බැල මෙහෙවර කිරීම සඳහා තම ජීවිත අනතුරේ හෙළීමට කම්කරුවන්ට බල කිරීම තුලින් බලාත්මක කර ඇත. ඒ අතරම පාලක ප්‍රභූව, කම්කරුවන්ගේ ශ්‍රම සූරාකෑම වැඩි කිරීමටත්, සමාජ සේවා වැඩසටහන් කප්පාදු කිරීමට සහ ජනතාව දුගීභාවයට පත් කිරීම සදහාත්, මහජන විරැකියාව සහ රාජ්‍යය බංකොලොත් කිරීම ගසා කෑමට සැලසුම් කරයි.

රාජ්‍යය ම්ලේච්ඡත්වයේ සහ ප්‍රචණ්ඩත්වයේ මූලික ප්‍රභවය මූල්‍ය කතිපයාධිකාරය සහ කම්කරු පන්තිය අතර ගැටුම යි. මෙම ම්ලේච්ඡත්වය අවසන් කල හැකි දේශපාලන ව්‍යාපාරයක්, එනම් දේශපාලන බලය තමන් අතට ගෙන ධනේශ්වර ලාභ ක්‍රමය අවසන් කිරීමට සමස්ත කම්කරු පන්තියේම ස්වාධීන හා එක්සත් ව්‍යාපාරයක් සඳහා වෛෂයික කොන්දේසි ද එම ගැටුම විසින්ම නිර්මාණයය කෙරෙයි.

ලෝක සමාජවාදී වෙබ් අඩවිය ඇසුරිණි

අද (28) දින ප.ව 10.02 වන විට ගෝලීය වශයෙන් කොවිඩ්-19 ආසාදිතයින් 57,46,086 දෙනකු සහ මරණ 357,377ක් වාර්තා වූ බව ජෝන්ස් හොප්කින්ස් විශ්වවිද්‍යාලයේ කොරෝන වෛරස් සම්පත් මධ්‍යස්ථානයේ නිල වෙබ් අඩවියේ සදහන් වේ.

එහි දැක්වෙන්නේ එක්සත් ජනපදයේ ආසාදිතයින් සංඛ්‍යාව 17,06,500ක් හා මරණ 100,769ක් බවයි.

වාර්තාගත වර්ධනයක් පෙන්නුම් කරමින් බ්‍රසීලය ආසාදිතයින් 411,821ක් හා මරණ 25,598ක් වාර්තා කර ඇති අතර රුසියාවේ ආසාදිතයින් සංඛ්‍යාව 379,091ක් දක්වාත් මරණ සංඛ්‍යාව 4142 දක්වාත් ඉහළ ගොස් තිබෙනවා.

ආසාදිතයින් සටහනේ 09 වැනි ස්ථානයේ පසුවන (එක්සත් රාජධානිය, ස්පාඤ්ඤය, ඉතාලිය, ප්‍රංශය හා ජර්මනිය) ඉන්දියාව ආසාදිතයින් 165,069ක් වාර්තා කර ඇති අතර මරණ සංඛ්‍යාව 4695 දක්වා වර්ධනය වී තිබෙනවා.

මැදපෙර දිග තත්ත්වය

ශ්‍රී ලංකිකයින් ලක්ෂ සංඛ්‍යාත පිරිසක් සේවය කරන මැදපෙරදිග තත්ත්වය විමසීමේදී වැඩිම ආසාදිතයින් සංඛ්‍යාවක් සෞදි අරාබියෙන් වාර්තා වෙනවා. එය 80,185 ක් හා මරණ 441 ක්. එක්සත් අරාබි එමීර් හි ආසාදිතයින් 32,532ක් සහ මරණ 258ක්, කුවේටයෙන් ආසාදිතයින් 24,112ක් වාර්තා වෙනවා.

අද (25) දින වන විට ගෝලීය වශයෙන් වාර්තා වූ කොවිඩ්-19 ආසාදිතයින් සංඛ්‍යාව 54,53,784ක් බවත් මරණ සංඛ්‍යාව 345,721ක් බවත් ජෝන්ස් හොප්කින්ස් විශ්වවිද්‍යාලයේ කොරෝනා වෛරස් සම්පත් මධ්‍යස්ථානය ඔවුන්ගේ නිල වෙබ් අඩවියේ සිදුකළ නවතම යාවත්කාලීන කිරීම්වල සදහන් වෙයි.

එහි සදහන් වන ආකාරයට වැඩිම ආසාදිතයින් සංඛ්‍යාව සහ මරණ සංඛ්‍යාව එක්සත් ජනපදය විසින් වාර්තා කරන අතර එය පිළිවෙළින් 16,47,741ක් සහ 97,811කි.

ආසාදිතයින් සංඛ්‍යාව අනුව බ්‍රසීලය ආසාදිතයින් 363,211ක් වාර්තා කරමින් දෙවැනි තැනට පත්ව ඇති අතර එහි මරණ සංඛ්‍යාව 22,666කි.

රුසියාව ආසාදිතයින් 353,427ක් වාර්තා කරමින් තෙවැනි තැනට පත්ව ඇති නමුත් එහි මරණ සංඛ්‍යාෙව් සාපේක්ෂ අඩුවක් පෙන්වයි. ඒ අනුව රුසියාවේ මරණ සංඛ්‍යාව 3633ක් ලෙස වාර්තා වේ.

මේ අතර අප අසල්වැසි ඉන්දියාවේ ආසාදිතයින් සංඛ්‍යාව තව දුරටත් ඉහළ ගොස් ඇති අතර අද දින වන විට එහි ආසාදිතයින් සංඛ්‍යාව ( ඊයේ 133,725 ) 144,069ක් ලෙස වාර්තා වේ. ඉන්දියාවේ මරණ සංඛ්‍යාව ඊයේ වාර්තා වූ 3909ක අගය අද දින 206කින් ඉහළ 4,117ක් දක්වා වර්ධනය වී ඇත.

අද (24) දින ප.ව 09.02 වන විට ගෝලීය වශයෙන් කොවිඩ්-19 ආසාදිතයින් සංඛ්‍යාව 53,44,539ක් හා මරණ සංඛ්‍යාව 342,695ක් වූ බව ජොන්ස් හොප්කින්ස් විශ්වවිද්‍යාලයේ කොරෝනා වෛරස් සම්පත් මධ්‍යස්ථානයේ නිල වෙබ් අඩවියේ සදහන් වෙනවා.

එම වාර්තා අනුව වැඩිම ආසාදිතයින් සංඛ්‍යාව වන 16,24,276ක් සහ මරණ 97,150ක් ඇමෙරිකාවෙන් වාර්තා වන අතර දෙවැනියට වැඩිම ආසාදිතයින් සංඛ්‍යාව වන 347,398ක් බ්‍රසීලයෙන් වාර්තා වෙනවා. එරටින් වාර්තා වන මරණ සංඛ්‍යාව 22,013ක්.

දෙවැනියට වැඩිම මරණ සංඛ්‍යාවක් වාර්තා වන්නේ මහා බ්‍රිතාන්‍යෙයන් වන අතර රය 36,757ක්. රුසියාවෙන් ආසාදිතයින් 344,487ක් වාර්තා වන අතර එක්සත් රාජධානියෙන් ආසාදිතයින් 258,317ක් වාර්තා වෙනවා.

ඉන්දියාවේ ආසාදිතයින් සංඛ්‍යාව 133,725 දක්වා ඉහළ ගොස් ඇති අතර මරණ සංඛ්‍යාව 3909ක්. අසල්වැසි පාකිස්ථානයෙන් ආසාදිතයින් 54,601ක් සහ මරණ 1133ක් ද, බංග්ලාදේශයෙන් ආසාදිතයින් 33,610ක් සහ මරණ 480ක් වාර්තා වෙනවා.

මේ අතර ශ්‍රී ලාංකික ශිෂ්‍යයින් විශාල පිරිසක් අධ්‍යාපනය ලබන බව කියන බෙලරුසියාවෙන් ආසාදිතයින් 36,198 ක් සහ මරණ 199ක් වාර්තා වෙනවා.

මැදපෙරදිග තත්ත්වය

ශ්‍රී ලාංකික ගෘහ සේවිකාවන් ලක්ෂ ගණනක් රැකියාව කරන මැදපෙරදිග තත්ත්වය සලකා බලන විට සෞදි අරාබියෙන් ආසාදිතයින් 72,508ක් සහ මරණ 390ක් වාර්තා වෙනවා. ක්ටාරයෙන් වාර්තා වන ආසාදිතයින් සංඛ්‍යාව 43,714 ක් වන අතර මරණ සංඛ්‍යාව 23ක්. ක්වේට් රාජ්‍යෙයන් ආසාදිතයින් 21,302 ක් සහ මරණ 156ක්. එක්සත් අරාබි එමීර් රාජ්‍යෙයන් වාර්තාවන ආසාදිතයින් සංඛ්‍යාව 29,485ක් වන අතර මරණ සංඛ්‍යාව 245ක්.

ඇමෙරිකාවේ විරෝධතා

මේ අතර ඇමෙරිකා එක්සත් ජනපදයේ කොරෝනා වයිරස ආසාදිත මරණ සංඛ්‍යාව 100,000 ළඟා වීමත් සමඟ සිය මැයි 24 වැනිදා පුවත්පතේ මුල් පිටුව අවමංගල්‍ය දැන්වීමක් බවට පත් කිරීමට එරට ‘ද නිව්යෝක් ටයිම්ස්’ පුවත් පත පියවර ගෙන තිබුණා.
 
එක් තීරුවකින් මරණ 1,000ක් නිරූපණය වන පරිදි මියගිය සියලු දෙනා සිහිපත් කරමින් මෙම පිටුව සකස් කළේ යැයි එම පුවත් සඳහන් කර තිබුණා
 
‘‘මෙතැන නම් සඳහන් පුද්ගලයන් 1,000කගෙන් සම්පූර්ණ මරණ සංඛ්‍යාවෙන් සියයට 1ක් නිරූපණය වෙනවා. මේව නිකම්ම නිකම් සංඛ්‍යා නෙමෙයි’’ කෙටි හඳුන්වාදීමක් කරමින් එම පුවත්පත වාර්තා කර තිබුණා.
 

පුද්ගලික  දේපළ ක්‍රමය තුරන් කිරීම මගින් සමානාත්මතා සමාජයක් ගොඩ නැගිය හැක යන දෘෂ්ටිවාදය , ‘කොමියුනිස්ට්වාදය’ යැයි සරළව හැඳින් විය හැක. කොමියුනිස්ට්වාදයේ විශ්වාසයන් වඩාත් ප්‍රසිද්ධියේ ප්‍රකාශ වන්නේ කාල් මාක්ස් ගෙනි.

කොමියුනිස්ට්වාදය් මත ක්‍රියා කරමින් සාර්ථක කොමියුනිස්ට් විප්ලවයක් සිදු කර රාජ්‍ය බලයක් පිහිට වූ ලොව පළමු පුද්ගලයා වූයේ රුසියාවේ වැලැඩ්මීර් ලෙනින් ය.

චීනය තුළ කොමියුනිස්ට්වාදී විප්ලවයේ නායකයා වූයේ මාඕ සේතූං ය. මාඕ ගේ විප්ලවයේ ජයග්‍රහණය ප්‍රකාශයට පත් වූයේ 1949 ඔක්තෝම්බර් 01 වැනිදා ය. ලෙනින් රුසියාව තුළ සෝවියට් සංගමය පිහිටෙව්වා සේම , මාඕ සේතූං චීනය තුළ පිහිටවූයේ චීන සමූහ ආණ්ඩුවය.

සෝවියට් සංගමය තුළ ලෙනින් විසින් පිහිටුවන ලද පාලන තන්ත්‍රයට සමාන පාලනයක් මාඕ සේතූං ද ගොඩ නැඟීය. සියලු දේශපාලන බලය සංකේන්ද්‍රණය කළේ චීන කොමියුනිස්ට් පක්ෂය ඇතුළත ය.

චීනයේ ව්‍යවස්ථාදායකය වන ජාතික මහජන සම්මේලනයේ ආසන සඳහා අපේක්ෂකයන් ලෙස නම් කරනු ලබන පුද්ගලයන් කවුරුන්ද යන්න තීරණය කරනු ලැබුවේ පක්ෂය විසින් ය. අපේක්ෂකයන් ලෙස නිළධාරීන් ද තෝරා ගනු ලැබිණ. කම්කරුවන්, ගොවීන් සහ කුඩා ව්‍යාපාරිකයන් ගේ නාමයෙන් ” ප්‍රජාතන්ත්‍රවාදී ආඥාදායකත්වයක් ”  ලෙස මාඕ තම පාලනය ගෙන ගියේය.

බොහෝ චීන ජාතිකයන් ගොවීන් වූවා සේම , ඔවුන් ධනවත් ඉඩම් හිමියන් ලඟ වැඩ කළ දුප්පතුන් විය. මාඕ ඉඩම් ජනසතු කළ අතර, ඊට එරෙහි වූ ඉඩම් හිමියන් දහස් ගණනක් ඝාතනය කළේය.

1950 දශකයේ ඇති කළ සාමුහික ගොවිපළවල් තුළ වැඩ කළ ගොවීන්ට සිදුවූයේ තමන් වෙනුවෙන් වැඩ කිරීමට වඩා සාමූහිකය වෙනුවෙන් වෙහෙසීමටය. මේ නිසා ගොවීන් තුළ එතරම් උනන්දුවක් නොවීය. මේ ක්‍රමය යටතේ ගොවිපල නිෂ්පාදන පහත වැටිණ.

නගර වල පිහිටි කර්මාන්තශාලා සහ වෙනත් ව්‍යාපාර  ද රාජ්‍ය අයිතියට පත්විය. නිෂ්පාදන ඉලක්ක , වැටුප් සහ නිෂ්පාදන භාණ්ඩ වල මිළ නියම කරනු ලැබුවේ රජය විසින් ය.රජය කම්කරුවාට රැකියාවක් ලබා දෙන අතර, සෞඛ්‍ය සේවා ප්‍රතිලාභ ද ලබා දුන්නේ ය. චීන කම්කරුවන් මෙම ක්‍රමය හැඳින්වූයේ ” යකඩ සහල් බඳුන ” ලෙසය.

කම්කරුවෝ ද ගොවියන් මෙන්ම රැකියා ක්‍රමය සම්බන්ධයෙන් එතරම් උනන්දුවක් නොදැක්වීය. එහි ප්‍රතිඵලය වූයේ ද කාර්මික නිෂ්පාදනය පහත වැටීමය.

1950 අග භාගය වන විට චීනයේ ග්‍රාමීය ප්‍රදේශවල  පැවැති නිදහස් වෙළඳ පොලවල් ද තහනම් කරන ලද අතර, පුද්ගලික ව්‍යවසායන් ඉතිරිව පැවතියේ ස්වල්පයක් පමණය.

පූර්ණ මාක්ස්වාදී ක්‍රමයක් කරා ආර්ථිකයේ ප්‍රගතිය පිළිබඳව සෑහීමකට පත් නොවූ මාඕ , ” මහා ඉදිරි පිම්ම ” නමින් වූ ප්‍රවේශයකට ප්‍රවිෂ්ට විය. මේ යටතේ ” කොමියුනිස්ට් ” නමින් හැඳින් වූ විශාල සාමූහික ගොවිපොලවල් ඇති කළේය. නගරවල සිටි තරුණයන්ව රජය විසින් මෙම ගොවිපලවල් වෙත යැවීය. 

කොමියුනිස්ට්වාදීන් ගොවිපලවල් පමණක් නොව කර්මාන්තශාලා, වෙළඳ ජාල, බැංකු, පාසල් සහ සිවිල් ජනයාගෙන් සමන්විත හමුදාවන් පවා ක්‍රියාත්මක කළහ. කෙසේ නමුත් බෝග හා කාර්මික නිෂ්පාදන පහත වැටුණු අතර, සාගතයක් හේතුවෙන් මිලියන ගණනක් මිය ගියේ ය.

වසර දෙකකට පසුව මාඕ සේතූං කියා සිටියේ , බොහෝ දෙනෙකු කොමියුනිස්ට් විප්ලවය පාවා දෙමින් චීනය ධනවාදයේ මාවතට ඇද දමමින් සිටින බවය.

මේ අනුව මාඕ චීනයේ සංස්කෘතික විප්ලවයක් දියත් කරනු ලැබුවේය. පරමාදර්ශී කොමියුනිස්ට් සමාජය නිර්මාණය කිරීමට සහාය නොදෙන ඕනෑම කෙනෙකුට ප්‍රහාර එල්ල කිරීම මෙහි අරමුණ විය. කොමියුනිස්ට් විප්ලවයේ පාරිශුද්ධ භාවය බලත්මක කිරීම සඳහා මාඕ විසින් ‘රතු ආරක්ෂකයින්’ ලෙස හැඳින් වෙන මිලියන සංඛ්‍යාත තරුණ තරුණියන් සමාජයට මුදා හැරියේ ය. 
මෙම තරුණ තරුණියන් මාඕ ගේ කියමන් ඇතුලත් කුඩා රතු පොත් පිංචක් ද අතැතිව ” ධනවාදී නැඹුරුවක් ” ඇති බවට සැක සිතූ සියලු දෙනාවම ප්‍රසිද්ධියේ හෙළා දුටහ.

මාඕ 1976 දී මිය ගිය අතර, සංස්කෘතික විප්ලවය අවසන් විය. චීනය යළිත් ආර්ථික අර්බුදයකට ඇද වැටිණ. බොහෝ චීන ජාතිකයන්ට කොමියුනිස්ට් පක්ෂය කෙරෙහි තිබූ විශ්වාසය නැති විය.

මාඕ ගේ මරණයත් සමඟ චීන කොමියුනිස්ට් පක්ෂය තුළ බල අරගලයක් පැන නැගිණ. ප්‍රතිසංස්කරණවාදීන්ට අවශ්‍ය වූයේ පක්ෂය වෙනස් කිරීමටය. දැඩි මත ධාරීන් උත්සාහ කළේ මඕ ගේ මාවත වූ කොමියුනිස්ට්වාදය දිගේ ඉදිරියට යෑමටය.

මාඕ මිය යෑමට පෙර පවා ඇතැම් ප්‍රදේශවල ගොවීන් සමුහික ගොවිතැන අත්හැර, ග්‍රාමීය නිදහස් වෙළඳ පොලවල අලෙවිය සඳහා තනිව ආහාර නිෂ්පාදනය කරමින් සිටියහ.  චීනය පුරා බොහෝ දෙනෙක් , බයිසිකල් අලුත්වැඩියා කරන්නන්, සපත්තු සාදන්නන් සහ වෙනත් පුද්ගලික ව්‍යවසායකයින් බවට පත්වී සිටියහ. මුදල් හිමි පුද්ගලයන්, ව්‍යාපාරයක් ලෙස තම මුදල් යොදවමින් මෙම අංකුර ධනපතියන්ට ණය ලබා දුන්හ. 

මේ කිසිදු ක්‍රියාකාරකමක් නීත්‍යානූකූල නොවීය. නමුත් රජයේ ප්‍රාදේශීය නිළධාරීන් විසින් නීති කඩකරන්නන්ව නොසලකා හැරියේ ය. අල්ලස් ලබා ගැනීමටත්, ප්‍රාදේශීය හා රජයේ රෙගුලාසි මෙන්ම නීති නැමීමට හා කැඩීමටත් රජයේ නිළධාරීන් පෙළඹුණු අතර, පුද්ගලික ව්‍යාපාර ,රජයේ ව්‍යාපාර ලෙසට පෙනෙන පරිදි ලියාපදිංචි කිරීමට ද ඔවුන් ක්‍රියා කළහ. මේ අනුව ” රතු තොප්පියක් ” පැළඳ ගත් ධනපතියන් බිහිවන්නට විය.

බිම් මට්ටමේ පැවති මෙම ධනවාදයේ සාර්ථකත්වය, කොමියුනිස්ට් පක්ෂය කෙරෙහි විශ්වාසය යථා තත්ත්වයට පත් කිරීමට සමත් විය. ආර්ථික වර්ධනය උත්තේජනය කිරීම සඳහා ධනවාදී ක්‍රමවේදයක් අනුගමනය කිරීමට උනන්දුවක් දක්වන ප්‍රතිසංස්කරණ මනසක් ඇති නායකයන් පොළඹවා ගැනීමටත් ” රතු තොප්පි ” ධනපතියන්ට අවශ්‍ය විය.

මෙවැනි වූ ආර්ථික ප්‍රතිසංස්කරණයකට නායකත්වය දීමට ඉදිරිපත් වූයේ චීන කොමියුනිස්ට් පක්ෂයේ නායකයෙකු වූ ඩෙන් ෂියාඔපිං ය. 1978 දී ඩෙන් ෂියාඕපිං කොමියුනිස්ට්වාදීන් බිඳ දැමූ අතර, ගොවි බිම් බදු දීමට පවුල් වලට අවසර ලබා දුන්නේ ය.

නිශ්චිත ප්‍රමාණයක් ස්ථාවර මිළකට රජයට විකිණීමෙන් පසුව, ඉතිරි සියල්ල ඕනෑම මිළකට නිදහස් වෙළඳ පොලේ විකුණා ගැනීමට ඩෙන් ෂියාඕපිං, ගොවි පවුල් වලට අවසර දුන්නේය.
මෙම ප්‍රතිසංස්කරණ යටතේ පුද්ගලයන්, හවුල්කරුවන් සහ කොටස් හිමියන් සතු පුද්ගලික ව්‍යවසායන් නීතිගත කෙරුණු අතර, කොටස් වෙළඳපලවල් විවෘත විය. 

රජය විසින් මිළ සහ වැටුප් නියම කිරීමේ ක්‍රමවේදය වෙනස් වූ අතර, එය නිදහස් වෙළඳපලේ පවතින ඉල්ලුම හා සැපයුම අනුව සිදුවන්නට ඉඩ හැරියේය. මේ සියළු ප්‍රතිසංස්කරණ හේතුවෙන් 1980 දශකයේ මැද භාගය වන විට චීනයේ පෞද්ගලික ව්‍යාපාර පවත්වාගෙන යන කොමියුනිස්ට් පක්ෂ නිළධාරීන්ද ද බිහි විය. 

ඒ අවදිය වන විට ” රතු තොප්පි ” ධනපතියන් මිලියන ගණනක් බිහි වී සිටියහ. චීන කොමියුනිස්ට්වාදය බිඳ දමා චීනය තුළ ” රතු තොප්පි ධනපතියන් ”  බිහි කිරීමට පුරෝගාමී වූ ඩෙන් ෂියාඕපිං 1920 දී ප්‍රංශය තුළ රැඩිකල් මාක්ස්වාදියෙකු ලෙස ගත කළ ජීවිතයේ තොරතුරුත්, ඔහු හඳුන්වා දුන් චීන ආර්ථික ප්‍රතිසංස්කරණය අද ස්ථානගතවී ඇති ආස්ථානයත් කුමක් ද යන්න මතුවට විමසමු.

සුනිල් ගාමිණී

අද (21) දින පස්වරු 10.38 (ඇමෙරිකා එක්සත් ජනපදයේ වේලාවෙන්) සිදුකළ නවතම යාවත්කාලීන කිරීම් අනුව ගෝලීය වශයෙන් කොවිඩ්-19 ආසාදිතයින් 5,047,377ක් සහ මරණ 329,816ක් වර්තා වී ඇතැයි ජොන්ස් හොප්කින්ස් විශ්වවිද්‍යාලයේ කොරෝනා සම්පත් මධ්‍යස්ථානයේ නිල වෙබ් අඩවියේ සදහන් වෙයි.

එහි දැක්වෙන ආකාරයට වැඩිම ආසාදිතයින් සංඛ්‍යාව හා මරණ සංඛ්‍යාව ඇමෙරිකා එක්සත් ජනපදයෙන් වාර්තා වන අතර එය පිළිවෙළින් 1,562,714  ක් හා 93,863ක් වේ.

වැඩිම ආසාදිතයින් සංඛ්‍යාවක් වාර්තා වන රටවල් අතර 317,554 Russia, 291,579 Brazil, 252,234 United Kingdom, 233,037 Spain, 228,006 Italy, 181,700 France, 178,748 Germany, 153,548 Turkey, 129,341 Iran, 115,572 India, 104,020 Peru

වැඩිම මරණ සංඛ්‍යාවක් වාර්තා වන රටවල් අතර 36,124 United Kingdom, 32,486  Italy, 28,135 France, 27,940 Spain, 18,859 Brazil