Tag: featured

කොවිඩ් -19 වෛරස ව්‍යාප්තිය හමුවේ ගර්භණී මව්වරුන් දැඩි බලපෑමකට ලක්ව ඇති බවත් එනිසා සුළු රෝගී තත්ත්වයක් ඇති වුවද ගර්භණී මව්වරුන් හැකි ඉක්මණින් ආසන්නයේම පිහිටි රෝහලට ඇතුළත් වන ලෙස ප්‍රසව හා නාරිවේද විශේෂඥ වෛද්‍යවරුන් දැනුම්දෙයි.

අද (14) පෙරවරුවේ කොළඹ කාසල් වීදියේ කාන්තා රෝහලේ පැවති මාධ්‍ය හමුවකට එක්වෙමින් ප්‍රසව හා නාරිවේද විශේෂඥ වෛද්‍ය සරත් ලැනරෝල් මහතා මේ බව සඳහන් කළේය.

මේ සම්බන්ධයෙන් තව දුරටත් කරුණු පැහැදිලි කළ විශේෂඥ වෛද්‍ය සරත් ලැනරොල් මහතා, ” වත්මන් කොවිඩ් වසංගත තත්ත්වය තුළ ගර්භණී කාන්තාවන් දැඩි අවදානමකට ලක්ව සිටිනවා. මේ වන විට ගර්භණී කාන්තාවන් කිහිප දෙනකු කොවිඩ් අසාදනය නිසා හටගත් රෝගී තත්ත්වයන් නිසා ජීවිතක්ෂයට පත්ව සිටිනවා. ඒ වගේම 200කට අධික පිරිසක් කොවිඩ් ආසාදනය නිසා රෝහල්ගතව ප්‍රතිකාර ලබනවා. මේ තත්ත්වය තුළ ඉතාමත්ම සුුළු රෝගී තත්ත්වයක් පැවතුනත් ගර්භණී ඔබ හැකි ඉක්මණින්ම රෝහලකට ඇතුළු වෙන්න. එසේ නොමැතිව රෝගී තත්ත්වය බරපතළ වී රෝහල්ගත වෙන්න වුණොත් ඇතිවෙන සංකූලතාවයන් වැඩි වෙන්න පුළුවන්.”

මෙම මාධ්‍ය හමුවේදී අදහස් දැක්වූ කාසල් වීදිය කාන්තා රෝහලේ ළමා රෝග විශේෂඥ වෛද්‍ය එල්.පී.සී. සමන් කුමාර මහතා සඳහන් කළේ සංචරණ සීමා පනවා තිබුණ ද කාසල් වීදියේ කාන්තා රෝහලේ සිදු කෙරෙන සියලුම සායනික කටයුතු එලෙසම ක්‍රියාත්මක වන බවත් සංචරණ සීමා පැවතියත් මව්වරුන්ට සහ දරුවන්ට ඒ සායනික දිනයේදී පැමිණීමේ හැකියාව තිබෙන බවයි.

කැස්බෑව ප්‍රදේශයේ සිදුකරන PCR පරික්ෂණ වලින් 30%ක ප්‍රමාණයක් කොවිඩ්-19 වෛරසය ආසාදිතයන් ලෙස හඳුනාගන්නා බවත් ලොක්ඩවුන් කළත් නැතත් නිවෙස් තුළටම වී සිටින ලෙස ජනතාවගෙන් ඉල්ලා සිටින බවත් කැස්බෑව සෞඛ්‍ය වෛද්‍ය නිලධාරිනි සමන්තිකා විජේසුන්දර මහත්මිය පවසයි.

පිළියන්දල ඇතුළු කැස්බෑව සෞඛ්‍ය නිලධාරී කොට්ඨාශයේ කොවිඩ් අවදානම ගැන අද (14) මාධ්‍ය දැනුවත් කරමින් විජේසුන්දර මහත්මිය මේ බව පැවසුවාය.

මේ සම්බන්ධයෙන් විජේසුන්දර මහත්මිය මෙසේද පැවසුවාය. ‘‘පීසීආර් පරීක්ෂණ වාර්තා විශ්ලේෂණය කරන කොට කැස්බෑව පත්ව ඇති අවදානම මනාව පැහැදිලි වෙනවා. අහඹු ලෙස කළ පී.සී.ආර් පරීක්ෂණවලින් 30%ක් පමණ ධනාත්මක වෙනවා කියන්නේ අසීරු තත්ත්වයක්. මොකද කොරෝනා වසංගතය ආරම්භයේ සිට පසුගිය අප්‍රේල් මාසය දක්වා කැස්බෑව ප්‍රදේශයෙන් වාර්තා වුණේ කොරෝනා මරණ හතරක් පමණයි. ඒත් මේ වන විට කැස්බෑව ප්‍රදේශයෙන් දිනකට සාමාන්‍යයෙන් කොරෝනා මරණ දෙකක් වත් වාර්තා වෙනවා. ඒ නිසා අපි ජනතාවට කියන්නේ ලොක්ඩවුන් කෙළත් නැතත් නිවෙස් තුළටම වී සිටින ලෙසයි‘‘

පිළියන්දල සහ කැස්බෑව ප්‍රදේශය මෙවැනි අවදානමක් තත්ත්වයකට පත් වූයේ ගාමිණි ලොකුගේ ඇමැතිවරයා ව්‍යාපාරික ප්‍රජාව සමග එක්ව පසුගිය දා ගත් අත්තනෝමතික ක්‍රියාමාර්ගය නිසා බවට පිළියන්දල සහ කැස්බෑව ජනතාව චෝදනා කරති.

‘මේ අත්තනෝමතික පියවර නිසා අද අපි ප්‍රජාවක් ලෙස දුක්විදිනවා. මේ මරණවලට ලොකුගේ ඇමතිවරයා සහ ඔහුට අනුබල දුන් ව්‍යාපාරික ප්‍රජාව වගකිව යුතුයි‘මේ සම්බන්ධයෙන් අප හා අදහස් දක්වමින් පිළියන්දල කාන්තාවක් පැවසුවා.

එදිනෙදා ජීවනෝපාය කරගෙන මහත් අපහසුවෙන් ජීවත් වන ජනතාවගේ ප්‍රශ්නය ගැන හොඳ අවබෝධයක් රජයට ඇතත් වෛද්‍ය විශේෂඥයන්ගේ උපදෙස් අනුව සති අන්ත දින කිහිපයක් දැඩි සංචරණ සීමා ක්‍රියාත්මක කිරීමට සිදු වූ බව කොවිඩ් 19 පැතිරීම පාලනය කිරීමේ ජාතික ක්‍රියාන්විත මධ්‍යස්ථානයේ ප්‍රධානී, යුද හමුදාපති ජෙනරාල් ශවේන්ද්‍ර සිල්වා මහතා කියනවා.

නව සංචරණ සීමා පැනවීම සහ එහි ප්‍රවණතා ගැන මාධ්‍ය වෙත අදහස් දක්වමින් යුධ හමුදාපතිවරයා කියා සිටියේ එදිනෙදා ජීවනෝපාය කරගෙන මහත් අපහසුවෙන් ජීවත් වන විශාල පිරිසක් රට වසා දැමීමට පියවර ගැනීම ගැන දුරකථනයෙන් තමා අමතා දැඩි විරෝධය පළ කළ බවයි.

මෙහිදී වැඩි දුරටත් අදහස් පළ කළ යුධ හමුදාපතිවරයා ‘එදිනෙදා ජීවනෝපාය කරගෙන අසීරුවෙන් ජීවත් වන ජනතාව ඒ ආකාරයෙන් සිතීම ගැන අප පුදුම වන්නේ නැහැ. ඔවුන්ට මේ සීමා කිරීම් අසීරු බව ඇත්ත. ඒත් රජය විසින් පනවනු ලැබූ සංචරණ සීමා නීතිවලට ජනතාව ඉතා හොඳින් අවනතව කටයුතු කරන තත්වයක් පෙනෙන්නට තිබෙනවා. මම ඒ සම්බන්ධයෙන් පොදුවේ සියලු ජනතාවට ස්තුතිය පුද කරනවා. මෙහිදී මා කියන්නේ අප සියලු දෙනා එක්ව සෞඛ්‍ය උපදෙස් අනුව කටයුතු කළහොත් කොරෝනා වසංගතය පාලනය කිරීම කිසිසේත්ම අසීරු නැහැ‘‘

ලබන මස මුල් සතිය වන විට කොවිඩ්-19 ආසාදිතයන්ගේ තරමක අඩුවක් අපේක්ෂා කරන බවත් ඒ සඳහා මහජනතාව සෞඛ්‍ය මාර්ගෝපදේශ අනුගමනය කරමින් කටයුතු කිරීම ඉතා වැදගත් බවත් මහජන සෞඛ්‍ය පරීක්ෂකවරුන්ගේ සංගමයේ සභාපති උපුල් රෝහණ මහතා පවසනවා.

කොවිඩ්-19 අවදානමේ වත්මන් තත්ත්වය ගැන අප කළ විමසීමකට පිළිතුරු දෙමින් උපුල් රෝහණ මහතා මේ බව පැවසුවා. මෙහිදී ඔහු අවධාරණය කළේ කොවීඩ් වසංගතයෙන් ආරක්ෂාවීම සඳහා රජය පනවා ඇති සෞඛ්‍ය මාර්ගෝපදේශ අනුගමනය කරමින් කටයුතු කිරීම වැදගත්ම කරුණක් වන බවයි.

සංචරණ නීති පනවා තිබියදී අතුරු මාර්ග භාවිතා කරමින් ජනතාව එක්රැස් වන බවට තොරතුරු වාර්තා වන බව ද කී ඔහු එවැනි අත්තනෝමතික ක්‍රියා මගින් තමන් පමණක් නොව තම සමීපතමයින් පවා අනතුරට ලක්වන බව එවැනි පුද්ගලයින් වටහාගත යුතු බව ද පැවසුවා.

ආණ්ඩුව ගොවීන්ට එළවළු පලතුරු දඹුල්ලේ තොග පොළට අරගෙන එන්න යැයි කියා අමාරුවේ දැමූ බවත් මේ වන විට දඹුල්ලේ එළවළු කිලෝ ලක්ෂ 26ක් විකුණා ගත නොහැකිව ගොඩ ගැසී ඇතැයි මාතලේ දිස්ත්‍රික් පාර්ලිමේන්තු මන්ත්‍රීණි රෝහිණී කවිරත්න පවසයි.   

මේ සම්බන්ධයෙන් අදහස් දක්වන මන්ත්‍රීවරිය, ‘‘කොරෝනා පළමු රැල්ල අවස්ථාවේ දී වගේම මෙවරත් ආණ්ඩුව ගොවියෝ – ව්‍යාපාරිකයෝ – අතරමැදියෝ අමාරුවේ දමා තිබෙනවා.  ඊයේ දඹුල්ලේ ආර්ථික මධ්‍යස්ථානයට එළවළු තොග රැගෙන එන ලෙස ගොවීන්ට දැන්වුවා.  නමුත් අද කිසිදු ව්‍යාපාරිකයෙකුට දඹුල්ලට පැමිණ නෑ. එළවළු කිලෝ ලක්ෂ 26 ක් අද දිනයේ දඹුල්ලට රැගෙන විත් තිබෙනවා.

මේ ආණ්ඩුවට මාතලේ දිස්ත්‍රිකයේ එළවළු අස්වැන්න ජනතාවට බෙදා ගන්න කිසිම වැඩ පිළිවෙලක් නෑ.  ‘ඇඳිරි නීතිය‘ වචනය කියන්නේ නැතිව ගොවියෝ අන්දමන්ද කරලා අද මහා විනාශයක් කළා.  දඹුල්ලේ ආර්ථික මධ්‍යස්ථානයේ මිල වෙනස් කරන්නට අර්බුදයක් ඇති කරන්නට දේශපාලඥයෙක් හා ව්‍යාපාරිකයෝ කිහිපදෙනෙක් ලබාගෙන ඉන්නවා.  ගොවියෝ එළවළු රැගෙන ආ පසුව ඒවා ගොඩ ගහලා ප්‍රවාහන බාධක පැනවූවේ රටේ ආහාර හිඟයක් ඇති කරලා දැවැන්ත ලාබයක් ලබන්නයි. 

රට පුරාම මිනිස්සුන්ට අවශ්‍ය ආහාර වර්ග හිඟයක් තියෙනවා. මිනිස්සුන්ට කන්න තියෙන එළවළු අස්වැන්න මෙලෙස විනාශ කිරීම අපරාධයක්.  රජය වහාම මේ එළවළු අස්වැන්න මිලදී ගෙන පිටපලාත්වලට බෙදා හැරීම ඇරඹිය යුතුයි.   මිනිස්සුන්ට කන්නට තියෙන එළවළු ටික විනාශවී යාම වලක්වා ගත යුතුයි‘‘

ශ්‍රී ලංකාවේ තීරණාත්මක යටිතල පහසුකම් ඉලක්ක කරගනිමින් සයිබර් ප්‍රහාර එල්ලවීමේ අවධානමක් ඇතැයි ශ්‍රී ලංකා තොරතුරු තාක්ෂණ සංගමය අද (14) දින මාධ්‍ය නිවේදනයක් නිකුත් කරමින් අනතුරු ඇගයීමක් කරයි. එම සංගමයෙ සභාපති රජීව් යසිරු කුරුවිටගේ මැතිව්  විසින් නිකුත් කළ මාධ්‍ය නිවේදනය සම්පූර්ණයෙන්ම පහත පළ වේ.

ගෝලීයව සිදුවන සයිබර් ප්‍රහාර වල ඉහල යාමක් නිරීක්ෂණය කිරීමට අප ශ්‍රී ලංකා තොරතුරු තාක්ෂණ සංගමයට හැකිවී ඇති අතර වසර කිහිපයක් මුළුල්ලේ ශ්‍රී ලංකාවේ රාජ්‍ය හා රාජ්‍ය නොවන වෙබ් අඩවි වලට සයිබර් ප්‍රහාර එල්ල කිරීම සම්බන්ධයෙන් ප්‍රචලිත Tamil Eelam Cyber Force – TECF නම් කණ්ඩායමකගේ නවතම සයිබර් ක්‍රියාකාරීත්වයක් 2021/04/30 දින අප ශ්‍රී ලංකා තොරතුරු තාක්ෂණ සංගමයට නිරීක්ෂණය කිරීමට හැකිවී ඇත.

ගෝලීයව සිදුවන සයිබර් ප්‍රහාර වල ඉහල යාමක් ලෙස මීට දින කිහිපයකට පෙර ඇමරිකා එක්සත් ජනපදයෙහි විශාලතම ඉන්ධන නල මාර්ගය වෙත එල්ලවූ Ransomware සයිබර් ප්‍රහාරය දැක්විය හැකි අතර මේ හේතුවෙන් මේ වනවිට ඇමරිකාව පුරා ඉන්ධන බෙදාහැරිම දැඩි අර්බුධයකට ලක්ව තිබේ. 

මෙවැනි සයිබර් ප්‍රහාර ඉදිරි කාල පරාසය තුල ශ්‍රී ලංකාවටද එල්ලවිය හැකි බව අප ශ්‍රී ලංකා තොරතුරු තාක්ෂණ සංගමය පෙන්වාදෙන අතර විශේෂයෙන්ම මෙම සයිබර් ප්‍රහාර මේ දිනවල ශ්‍රී ලාංකික මහජනතාවට බහුලවම අත්‍යවශ්‍ය වන තොරතුරු තාක්ෂණ යටිතල පහසුකම්, රාජ්‍ය හා රාජ්‍ය නොවන වෙබ් අඩවි, ජනමාධ්‍ය වෙබ් අඩවි වැනි තීරණාත්මක යටිතල පහසුකම් (Critical Infrastructure) වෙත එල්ලවිය හැකි බව අප ශ්‍රී ලංකා තොරතුරු තාක්ෂණ සංගමය අනතුරු අගවමු.

කොළඹ මැනිං වෙළෙදපොල වෙත උඩරට එළවළු තොග වශයෙන් ලැබී ඇති නමුත් සුළු වෙළෙදුන්හට බලපත් නිකුත් කිරීමේ ගැටළු හේතුවෙන් එළවළු තොග අලෙවි කර ගත නොහැකි තත්වයක් මතුව ඇතැයි හිටපු ආණ්ඩුකාර රජිත් කීර්ති තෙන්නකෝන් නිවේදනයක් නිකුත් කරමින් පවසයි.

වැලිමඩ, බණ්ඩාරවෙල, ඌවපරණගම, නුවරඑළිය, හාළිඇළ ප්‍රදේශවලින් අද මැනිං වෙළෙදපොලට ලොරි රථ 46 ක් පැමිණ ඇත.  එසේ නමුත්, සුළු වෙළෙදුන්ට අලෙවි කටයුතු සඳහා බලපත්‍ර නිකුත් කිරීමේ ක්‍රමවේදයක් නොමැතිකමින් තොග වෙළෙදාම පහත වැටී ඇත.

කෙරෝනා පළමු රැල්ල අවස්ථාවේ දී ආහාර සැපයුම් ජාල බිඳ වැටුණු අතර, අද දින ද මැනිං වෙළෙදපොළේ සුළු වෙළෙදුන් නොමැතිවීම නිසා එළවළු මිල පහත වැටි තිබෙනවා.  උඩරට ගොවීන්ට සිය නිෂ්පාදන සඳහා ලැබිය යුතු අවම මිල හෝ නොලැබීම එහි ප්‍රතිඑලය වනු ඇත.

රජය ආහාර සැපයුම් ජාල බිඳ නොවැටී පවත්වාගැනීම සඳහා විධිමත් පියවර ගත යුතු බවත් එසේ නොවන්නේ නම් නාගරික ජනතාවට ආහාර සැපයීමේ ගැටළුවක් ද, ගොවීන් සිය නිෂ්පාදන අලෙවි කර ගත නොහැකි තත්වයක් ද මතුවනු ඇත.   

ගිය වසරේ අප්‍රේල් මාසයේ ද මෙලෙසම රට වසා දැමීමත් සමඟම ගොවියාට එළවළු විකුණා ගත නොහැකි වූ අතර, පාරිභෝගිකයාට එළවළු හා පළතුරු නොලැබීම නිසා දැඩි නොසන්සුන් තත්වයක් ඇති විය.  එළවළු තොග වගාබිම්වල, දඹුල්ල ඇතුළු තොග මධ්‍යස්ථානවල විනාශවන තත්වයක් මතුවිය. 

කොළඹ මැනිං වෙ‍ෙළඳපොලට ලැබී ඇති එළවළු හා පළතුරු තොග අලෙවි කිරීම සඳහා යාන්ත්‍රණයක් නිර්මාණය කිරීම රජයේ වගකීමක් බව අවධාරණය කරණ බව හිටපු ආණ්ඩුකාර කීර්ති තෙන්නකෝන් නිකුත් කළ නිවේදනයේ දැක්වේ.

තමන්ට අසාත්මික (ඇලර්ජි ) තත්වයක් ඇත්නම් කොරෝන එන්නත ලබා ගත හැකිද යන්න අද බොහෝ දෙනා හට ප්‍රශ්නයක්ව පවතී. මෙම ප්‍රශ්නය නිසා කොරෝනා එන්නත ලබා නොගැනීමට ඇතැමුන් පෙළඹී තිබේ. ඔබට ඇති යැයි ඔබ සිතන අසාත්මික(ඇලර්ජි ) තත්වය නිසා කොරෝනා එන්නත ලබා ගත නොහැකිද යන්න පැහැදිළි මෙම කෙටි ලිපියේ අරමුණයි.

මෙයට පෙර ඔබට තිබුණු අසාත්මික(ඇලර්ජි) තත්වය යම් ආහාරයක්, එන්නතක් ,ඖෂධයක්, කෘමියෙක්, සතෙකු හෝ පරිසරයේ දුහුවිලි නිසා ඇතිවුවක් විය හැක. එය සුළු අසාත්මික(ඇලර්ජි) තත්වයක් නම් ඔබට කොරෝනා එන්නත ලබා ගත හැක. මෙහිදී සුළු අසාත්මික තත්වයන් ගණයට අයිති වන්නේ පහත සඳහන් රෝග ලක්ෂණයි.

• කිසිදු ඖෂධයකින් තොරව නැතිවී ගිය සමෙහි සුළු පලු නැගීමක් හෝ කැසීමක්
• ඇස් කැසීමක් හෝ රතුවීමක්
• කට කැසීමක්, බඩ රිදුමක් හෝ පාචනයක්
• නාසයෙන් දියර ගැලීමක් හෝ කිවිසුම් යාමක්
• සුළු වියලි කැස්සක්
• උණක් හෝ ඇඟ රිදුමක්

මෙයට පෙර ඔබට තිබුණු අසාත්මික(ඇලර්ජි) රෝග ලක්ෂණය මෙවැන්නක් නම් ඔබට කිසිදු සැකයකින් තොරව එන්නත ලබාගත හැක. ඔබේ පවුලේ අයෙකුට යම් අසාත්මිකතාවයක් ඇතිවීම එන්නත ලබාගැනීමට කිසිදු බාධාවක් නොවේ.

එනමුත් ඔබට මෙයට පෙර යම් ආහාරයක්, එන්නතක් ,ඖෂධයක්, කෘමියෙක්, සතෙකු හෝ පරිසරයේ දුහුවිලි නිසා ඇතිවූ අසාත්මික(ඇලර්ජි) රෝග ලක්ෂණය බරපතල නම්, ඔබ ඒ බව එන්නත්කරණ මධ්‍යස්ථානයට දැනුම් දිය යුතුය. මෙහිදී බරපතල අසාත්මික තත්වයන් ගණයට අයිති වන්නේ පහත සඳහන් රෝග ලක්ෂණයි.

1. රුධිර පීඩනය අඩුවී අනෆිලකසිස් නම් රෝග තත්වය ඇතිවීම
2. හුස්ම ගැනීමේ අපහසුතාවය
3. මුළු ශරීරයම ඉදිමීම
4. උගුර, මුඛය ඉදිමී ආහාර සහ හුස්ම ගැනීමේ අපහසුතාවය ඇතිවීම
5. සිහි මුර්චා වීමක්

මෙවන් රෝග ලක්ෂණයක් මින් පෙර ඔබට ඇතිවී නම් ඔබට එන්නත ලබා දියයුතුද , නැද්ද යන්න ඔබ ඒ බව එන්නත්කරණ මධ්‍යස්ථානයට දැනුම් දුන් පසු, එන්නත්කරන මධ්‍යස්ථානය භාර වෛද්‍යවරයා විසින් තීරණය කරනු ඇත. ඇතැම් විට ඔහු ඔබ වැඩිදුර විමසීම සඳහා විශේෂඥ වෛද්‍යවරයෙකුට යොමු කරනු ඇත.

අසාත්මිකතාවයන් පිලිබඳ විශේෂඥ වෛද්‍ය අජිත් අමරසිංහ
MBBS, DCH, MD (Sri Lanka),
MRCP, MRCPCH(U.K),
P.G Dip in Asthma & Allergy (CMC-Vellore),
MBA-Health Care (Manipal)

අද (13) දින කොවිඩ්-19 ආසාදිතයින් 2249 මරණ 24ක් වාර්තා වූ බව රජයේ ප්‍රවෘත්ති දෙපාර්තමේන්තුව විසින් නිකුත් කළ නිල නිවේදනක සදහන් වේ. මරණකරුවන් පිළිබද සම්පූර්ණ නිවේදනය පහත දක්වේ.

COVID-DEATH-MAY-13

වයස අවුරුදු 60 වැඩි පුද්ගලයින් සඳහා චීන සයිනොෆාම් කොවිඩ් මර්දන එන්නත ලබාදීම සඳහා කොවිඩ් මර්දන කාර්යය සාධක බලකාය තීරණය කළ බව රාජ්‍ය අමාත්‍ය සුදර්ශනී ප්‍රනාන්දුපුල්ලේ මහත්මිය පවසන අතර  එන්නත නොලැබේවි යැයි බියක් ඇතිකර නොගත යුතු බව යුද්ධ හමුදාපතිවරයා කියනවා.

අද (13) එන්නත්කරණය ගැන මාධ්‍ය හමුවේ අදහස් දක්වමින් ඔවුන් මේ බව පවසා සිටියා.

රාජ්‍ය අමාත්‍යවරි කියා සිටියේ ඇස්ට්‍රා සෙනෙකා එන්නතේ දෙවැනි මාත්‍රාව ලබාදීම සඳහා මාත්‍රා 600,000ක පමණ හිඟයක් ඇති නමුත්  එම අවශ්‍ය එන්නත් ප්‍රමාණය ලබාදීමට රටවල් කිහිපයක් එකඟතාව පළකර ඇති බවයි.

නව තීරණය සම්බන්ධයෙන් මාධ්‍ය හමුවේ අදහස් දක්වමින් රාජ්‍ය ඇමතිවරිය මෙසේ ද කීවාය. “හැමෝම තමන්ගේ ජීවිතේට අදරෙයිනේ. ඉතින් කොහොමහරි බලන්නේ පොරකාලා හරි එන්නත ලබාගන්න. නමුත් දැනට අපි සතුව ඇති එන්නත් ප්‍රමාණය සීමිතයි. දැනට සයිනොෆාම් එන්නත දෙන්නේ අවුරුදු 30-60 අතර අය‍ට. අපි අද තීරණය කළා 60ට වැඩි කිසිදු සංකූලතාවයක් නැති වැඩිහිටියන්ටත් සයිනොෆාම් එන්නත ලබාදෙන්න. එහි දෙවැනි මාත්‍රාව සති හතරෙන් ලබාදිය යුතුයි. ඒ සදහා අවශ්‍ය සයිනොෆාම් එන්නත් තොග ඉදිරියේදී මෙරටට ලැබීමට නියමිතයි‘‘

මේ අතර එන්නත්කරණය ගැන විශේෂ ප්‍රකාශයක් කරමින් යුද්ධ හමුදාපතිවරයා කියා සිටියේ එන්නත නොලැබේවි යැයි බිය නොවිය යුතු බවයි.

මේ සම්බන්ධයෙන් වැඩි දුරටත් කරුණු පැහැදිලි කළ යුද්ධ හමුදාපතිවරයා, ‘‘කොවිඩ් එන්නත නොලැබේවි යැයි කිසිවකු බිය විය නැහැ. එන්නත්කරණය සදහා අවශ්‍ය කෙරෙන එන්නත් තොග විදේශයෙන් මිලදී ගැනීමට කටයුතු කරගෙන යනවා. ඇස්ට්‍රාසෙනිකා දෙවෙනි මාත්‍රාව ලබා දීම සඳහා එන්නත්  සොයා ගැනීමට ලලිත් වීරතුංග මහතාගේ ප්‍රධානත්වයෙන් යුතු කමිටුව  රටවල් කිහිපයක් සමග  සාකච්ඡා කරගෙන යනවා. එම එන්නත බොහෝ දුරට වෙනත් රටකින් ගෙන්වා ගැනීමට හැකියාව තිබෙනවා.

මේ අතර රුසියාවේ නිෂ්පාදිත ස්පුට්නික් එන්නත් මාත්‍රා එක් කෝටි තිස් ලක්ෂයක් රුසියාවෙන් ලබාගැනීමට  රජය කටයුතු කරගෙන යනවා. ඉන් මාත්‍රා ලක්ෂ නමයක් ඉදිරි දින කිහිපයේදී මෙරටට ලැබීමට නියමිතව තිබෙනවා. මේ එන්නත ගබඩා කළ යුත්තේ සෙල්සියස් අංශක රින 20ක් වැනි ඉතාම පහළ උෂ්ණත්වයක. එය පැය දෙකකට වඩා එළිමහනේ තබා ගන්න නොහැකියි. මෙම එන්නතෙන් 15,000ක් මේ වන විට අපට ලැබී තිබෙනවා. ඒවා එන්නත් කර අවශ්‍ය වාර්තා අපි රුසියාවට ලබා දුන්නා.

එමෙන්ම ෆයිසර් එන්නත් මාත්‍රා ලක්ෂ නමයක් ලබන ජුනි මස අග  හෝ ජුලි මස මුල මෙරටට ලැබෙනු ඇතැයි අපි විශ්වාසය කරනවා. ෆයිසර් එන්නතේ ඇති විශේෂත්වය තමයි එය ලබා දිය යුත්තේ එක මාත්‍රාවයි. ඒ අනුව එන්නත්කරණ ප්‍රමාණ සැලකිල්ලට ගෙන එය ගෙන්වා ගැනීමට පියවර ගන්නවා‘‘

කොවිඩ්-19 වසංගත රැල්ල සහ සංචරණ සීමා පිළිබද ජනතාව දැඩි අවධානයක් යොමු කර සිටියදී සිදු වූ ‘කොස්ගොඩ තාරක‘ සහ ‘ඌරුජුවා‘ නම් පාතල කල්ලි සාමාජිකයින් දෙදෙනාගේ ඝාතන දෙක ශ්‍රී ලංකා නීතිඥ සංගමයේ විධායක කමිටුව දැඩිව හෙළාදැක තිබෙනවා.

‘ශ්‍රී ලංකා නීතිඥ සංගමයේ විධායක කමිටුව විසින් පොලිසියේ අත්අඩංගුවේදී සැකකරුවන් ඝාතනය කිරීම පිළිබදව නිකුත් කරන නිවේදනය‘ යනුවෙන් ශ්‍රී ලංකා නීතිඥ සංගමය විසින් අද (13) දින මෙම නිවේදනය නිකුත් කර තිබෙනවා.

මෙම නිවේදනය මගින් ශ්‍රී ලංකා නීතිඥ සංගමය කියන්නේ, ‘මෑතදී පොලිස් අත්අඩංගුවේ සිටි සැකකරුවන් දෙදෙනකු වන මෙලාන් මබුලා නොහොත් ‘ඌරු ජුවා‘‘ සහ තාරක පෙරේරා විජේසේකර නොහොත් ‘කොස්ගොඩ තාරක‘ ආසන්න දින දෙකක් තුළදී ඝාතන කිරීම ශ්‍රී ලංකා නීතිඥ සංගමයේ විධායක කමිටුව දැඩි ලෙස හෙළාදකී. මෙම මරණවලට අධිකරණමය නොවන ඝාතනවල සියලු ලක්ෂණ ඇති අතර සිය භාරයේ සිටින පුද්ගලයින්ගේ ආරක්ෂාව තහවුරු කරන ලෙස අපි රජයෙන් ඉල්ලා සිටිමු‘‘ යනුවෙනි.

පුද්ගලයන්ගේ ස්වභාවය සහ ඒ ඒ පුද්ගලයින්ට එරෙහි චෝදනාවල ස්වභාවය නොසලකා තමන් භාරයේ සිටින පුද්ගලයින්ගේ ආරක්ෂාව සහතික කිරීමට පොලීසියට මෙන්ම රජයට ද අත්හළ නොහැකි වගකීමක් පැවරී ඇති බවද නීතීඥ සංගමය සිය නිවේදනය මගින් පෙන්වා දෙයි.

අත්අඩංගුවේ සිටින නිරායුධ සැකකරුවන් ආරක්ෂා කිරීමට ශ්‍රී ලංකා පොලීසිය අවස්ථා ගණනාවකදී අපොහොසත් වී ඇති බවත් එම සිදුවීම පිළිබඳව බැරූරුම් ලෙස අවධානය යොමු කර එවැනි සිදුවීම් වළක්වාගැනීමට පියවර ගන්නා ලෙස ජනාධිපතිවරයාගෙන් සහ රජයෙන් ඉල්ලා සිටින බවත්  ශ්‍රී ලංකා නීතීඥ සංගමය සිය මාධ්‍ය නිවේදනයේ වැඩිදුරටත් සඳහන් කරයි.

මෙම තත්වය පිළිබඳව පොලිස්පතිවරයා, අපරාධ පරීක්ෂණ දෙපාර්තමේන්තුවේ අධ්‍යක්ෂකවරයා සහ ශ්‍රී ලංකා මානව හිමිකම් කොමිෂන් සභාව යන ආයතනද එම ඝාතනයට පෙර දැනුවත් කර තිබූ බව ද නීතිඥ සංගමයේ නිවේදනයෙන් වැඩි දුරටත් සදහන් කර තිබේ.

‘

එන්නත් මිශ්‍රකර භාවිතා කිරීම ගැටලුවක් නොවන බව“ ට ‘පසුගිය 11 වැනි දා පැවති කැබිනට් මාධ්‍ය හමුවේ දී සම කැබිනට් මාධ්‍ය ප්‍රකාශක උදය ගම්මන්පිල මහතා කළ ප්‍රකාශ සාවද්‍ය මෙන්ම සැලකිය යුතු ලෙස අනතුරුදායක බව මේ වන විට ලෝක සෞඛ්‍ය සංවිධානය, මෙන්ම ඔක්ස්ෆර්ඩ් එන්නත සමූහයේ (Oxford Vaccine Group) මහාචාර්ය මැතිව් ස්නේප් විසින් ද සනාථ කර තිබෙනවා.

අද (13) පළ වූ බී.බී.සී වාර්තාවක සදහන් වුණේ ඇස්ට්‍රාසෙනෙකා සහ ෆයිසර් කොවිඩ් එන්නත් මාත්‍රාව මිශ්‍ර කිරීමෙන් පසු වැඩිහිටියන්ට මෘදු හා මධ්‍යස්ථ අතුරු ආබාධ (mild and moderate side-effects) වාර්තා කිරීමට වැඩි ඉඩක් ඇති බව අධ්‍යයනයකින් හෙළි වී තිබෙන බවයි.

මේ අතර රාජ්‍ය ඇමතිනි, විශේෂඥ වෛද්‍ය සුදර්ශනී ප්‍රනාන්දුපුල්ලේ මහත්මිය විසින් ද ගම්මන්පිල මහතාගේ ප්‍රකාශය ප්‍රතික්ෂේප කරන ප්‍රකාශයක් කර තිබෙනවා. ඇය අවධාරණාත්මකව කියා සිටියේ ‘‘කොවිඩ් එන්නත් මාත්‍රා විවිධ වර්ගයේ එන්නත්වලින් ලබාදීම සඳහා ලෝක සෞඛ්‍ය සංවිධානය අනුමත කර නැති බවත්, එන්නත් සම්බන්ධ ශ්‍රී ලංකාවේ තාක්ෂණික කමිටුව විසින් ද ප්‍රකාශ කර ඇත්තේ මුල් මාත්‍රාව ලබාගත් එන්නත් වර්ගයෙන්ම දෙවන මාත්‍රාව ද ලබා ගන්නා ලෙස බවත් රාජ්‍ය ඇමතිවරිය සදහන් කළා.

සීෂෙල් පුවත වාර්තා කළ ආකාරයත් සාවද්‍යයි

මේ අතර සීෂෙල් රාජ්‍ය සේ කොවිඩ් එන්නත ලබාගත් පුද්ගලයින් 3/1ක කොවිඩ් ආසාදනය වීම පිළිබද පුවතට ලංකාවේ ජනමාධ්‍ය ලබා දෙන ‘විකෘති / සාවද්‍ය ප්‍රචාරය ගැන ද සෞඛ්‍ය අංශවල අවධානය යොමුව තිබෙනවා. ඔවුන් කියන්නේ එන්නත්කරණය දීපව්‍යාප්තව සිදුවන මේ අවස්ථාවේ මෙවැනි නොමග යවනසුළු ප්‍රවෘත්ති, විශේෂයෙන්ම ශීර්ෂපාඨ පළ කිරීම වගකිව යුතු මාධ්‍යවලට තරම් නොවන බවයි.

‘මේ පුවත විශාල වශයෙන් කියවන හා හුවමාරු වන බවක් අපට පෙනී ගියා. ප්‍රකට ජාතික වෙබ්අඩවියක මේ ප්‍රවෘත්තියට ලබා දී තිබූ ශීර්ෂපාඨය වුණේ ‘එන්නත් දෙකම ගත්තු වැඩි දෙනකුට කොරෝනා“ යන්නයි. එය අති විශාල පිරිසක් කියවා තිබුණා. ඒත් මෙහි අන්තර්ගතයේ සදහන් වන්නේ, ‘සීෂෙල්ස් දූපත් රාජ්‍යයේ, කොරෝනා ප්‍රතිශක්තිකරණ එන්නතේ මාත්‍රා දෙකම ලබාගත් අයගෙන් තුනෙන් එකකට, ‘කොවිඩ් 19’ හෙවත් නව කොරෝනා වයිරසය ආසාදනය වී ඇති බවත්, ලෝක සෞඛ්‍ය සංවිධානය ද ඒ ගැන කනස්සල්ලෙන් පසුවන බවත් විදෙස් මාධ්‍ය වාර්තා සඳහන් කරයි‘ කියලයි

ඒ කියන්නේ 3/1ක් කිසිසේත්ම ‘වැඩි දෙනෙක් “ වෙන්න බැහැනේ. මෙයින් අදහස් වෙන්නේ ‘බහුතරයක් / විශාල පිරිසක්‘ කියන සාමාන්‍ය අදහසයි. මිනිස්සු ප්‍රවෘත්තියක් කියවන්නේ ශීර්ෂපාඨය දිහා බලලා. ඉතිං ආකර්ෂණීය ශීර්ෂපාඨයක් ඇති ප්‍රවෘත්තියක් කවුරුත් කියවනවා. මේ වාගේ ප්‍රවෘත්ති හරහා පැහැදිලිව එන්නත්කරණ වැඩසටහනට බාධා හා අවහිරතා ඇති වෙනවා. ඒ ගැන දෙගිඩියාවක් ඇති අයට මේ ප්‍රවෘත්ති අනුබලයක් වෙනවා. අපි කියන්නේ කොවිඩ් වාර්තාකරණයේදී සංවේදී වීමට වඩා වගකීම, වගවීම කියන පැත්ත ගැන බලන්න කියලයි“ මේ ගැන අප සමග අදහස් දැක්වූ විශේෂඥ වෛද්‍යවරයෙක් අවධාරණය කළා.

ඇස්ට්‍රාසෙනෙකා සහ ෆයිසර් කොවිඩ් එන්නත් මාත්‍රාව මිශ්‍ර කිරීමෙන් පසු වැඩිහිටියන්ට මෘදු හා මධ්‍යස්ථ අතුරු ආබාධ (mild and moderate side-effects) වාර්තා කිරීමට වැඩි ඉඩක් ඇති බව අධ්‍යයනයකින් හෙළි වී තිබේ.

විවිධ එන්නත් මාත්‍රාවන් සංයෝජනය කළ විට සෙම්ප්‍රතිශ්‍යාව, හිසරදය සහ මාංශ පේශි වේදනාව නිතර වාර්තා විය. වෙනත් අහිතකර ප්‍රතික්‍රියා කෙටි කාලීනව පැවතුණි.

ඔක්ස්ෆර්ඩ් එන්නත සමූහයේ (Oxford Vaccine Group) මහාචාර්ය මැතිව් ස්නේප් (Prof Matthew Snape) පැවසුවේ “එය ඇත්තෙන්ම කුතුහලය දනවන සොයා ගැනීමක් මිස අප බලාපොරොත්තු වූ දෙයක් නොවේ.

දෙවන මාත්‍රාව සඳහා වෙනස් එන්නතක් ලබාදීමෙන් දිගු කල් පවතින ප්‍රතිශක්තියක් ලබා දෙයිද, නව ප්‍රභේදයන්ට වඩා හොඳ ආරක්ෂාවක් ලබා දිය හැකිද යන්න හෝ සැපයුම් වලට බාධා ඇති වුවහොත් සායනවලට එන්නත් ලබා ගැනීමට ඉඩ දිය හැකිද යන්න සොයා බැලීමට කොම්-කෝව් අධ්‍යයනය පෙබරවාරි මාසයේදී දියත් කරන ලදී.

කැනේඩියානු ඔන්ටාරියෝ සහ ක්විබෙක් පළාත් දෙකම නුදුරු අනාගතයේ දී එන්නත් මිශ්‍ර කිරීමට සැලසුම් කර ඇති බව පවසා තිබේ.

ඔක්ස්ෆර්ඩ් විශ්ව විද්‍යාලය විසින් මෙහෙයවනු ලබන මෙම අධ්‍යයනයෙන් වයස අවුරුදු 50 ට වැඩි ස්වේච්ඡා සේවකයන් 830 ක් බඳවාගෙන තිබේ. එහි පළමු සම්පූර්ණ ප්‍රතිඵල ජුනි මාසයේදී ප්‍රකාශයට පත් කිරීමට අපේක්ෂා කෙරේ. නමුත් මූලික දත්ත දැන් වෛද්‍ය සඟරාව වන ලැන්සෙට් හි පර්යේෂණ ලිපියකින් ප්‍රකාශයට පත් කර ඇත.

ස්වේච්ඡා සේවකයන් 10 දෙනෙකුගෙන් එක් අයෙකු සති හතරක කාලයක් තුළ ඇස්ට්‍රාසෙනෙකා එන්නත් දෙකක් ලබා දුන් බව වාර්තා විය – නමුත් ඔවුන්ට එක් ඇස්ට්‍රාසෙනෙකා එන්නත් එකක් සහ ෆයිසර් එකක් ලැබුනේ නම්, ඕනෑම අනුපිළිවෙලකට එම අනුපාතය 34% ක් දක්වා ඉහළ ගියේය.

“සෙම්ප්‍රතිශ්‍යාව, තෙහෙට්ටුව, හිසරදය, සහ මාංශ පේශි කැක්කුම වැනි වෙනත් රෝග ලක්ෂණ සඳහා ද එම සැබෑ වෙනස්කම්ම අදාළ වේ” යැයි විමර්ශක මහාචාර්ය ස්නේප් පැවසීය.

බී.බී.සී වාර්තාවකි

අද (12) රාත්‍රී 11 සිට මැයි 31 වනදා දක්වා සෑම දිනකම රාත්‍රී 11 සිට පසුදා අලුයම 4 දක්වා රට පුරා සංචරණ සීමා පැනවීමට කටයුතු කර ඇති බවත්එ සේම හෙට (13) රාත්‍රී 11 සිට සඳුදා (17) අලුයම 4 දක්වා අඛණ්ඩව (මැයි 14, 15, 16)  රට පුරා ක්‍රියාත්මක වන පරිදි සංචරණය අත්හිටුවීමට ද කටයුතු කරන බවත් පොලිස් මාධ්‍ය ප්‍රකාශක අජිත් රෝහණ මහතා අද (12) මාධ්‍ය සාකච්ඡාවකදී අනාවරණය කළා.

සංචරණ සීමා පනවා ඇති දිනවල අත්‍යාවශ්‍ය නොවන කටයුතු සදහා කිසියම් අයකු නිවසින් පිටතට යන්නේ නම්, එසේ යා හැක්කේ තම ජාතික හැදුනුම්පතේ අංකයට අනුව යෙදෙන දිනයක දී (ඔත්තේ හෝ ඉරටේටේ) පමණක් බව පොලිස් මාධ්‍ය ප්‍රකාශක නියෝජ්‍ය පොලිස්පති අජිත් රෝහණ මහතා පවසනවා.

පසුගිය කොවිඩ් පළමු රැල්ල පැවැති සමයේ දී ද මෙම ක්‍රමවේදය ක්‍රියාත්මක වූ බවයි පොලිස් මාධ්‍ය ප්‍රකාශකවරයා වැඩි දුරටත් සදහන් කළේ.

මේ සම්බන්ධයෙන් වැඩි දුරටත් කරුණු පැහැදිලි කළ පොලිස් මාධ්‍ය ප්‍රකාශකවරයා,

‘‘රජය විසින් මේ තීරණය ගත්තේ හැකිතාක් දුරට සංචරණය සීමා කරමින් කොවිඩ් වසංගතය පාලනය කිරීම සදහායි. ඒ අනුව කිසියම් අයකුට නිවසින් පිටතට යා යුතු දිනය ඉරට්ටේ අංක සහිත දිනයක් නම්, එදිනට යා හැක්කේ තම ජාතික හැදුනුම්පතේ අවසන් අංකය ඉරට්ටේ (2-4-6-8 වශයෙන්) අංකයක් වන අයට පමණයි. එසේම යමෙකුට නිවසින් පිටතට යා යුත්තේ ඔත්තේ දිනදී නම් ඔහුගේ හෝ ඇයගේ ජාතික හැදුනුම්පතේ අවසන් අංකය අනිවාර්යයෙන්ම ඔත්තේ දිනයක් (1-3-5-7-9) විය යුතුයි. මෙහිදී ජාතික හැදුනුම්පතේ අවසාන අංකය බින්දුව වන අවස්ථාවක් ඉරට්ටේ අංකයක් ලෙස සලකනවා. මේ අනුව අදාළ දිනයේදී අත්‍යවශ්‍ය කාර්යයන් සඳහා එක් අයෙකුට පමණක් නිවසින් බැහැරට යා හැකියි. හැඳුනුම්පත නොමැති අවස්ථාවක දී පමණක් විදෙස්ගමන් බලපත්‍රය හෝ රියදුරු බලපත්‍රය භාවිත කළ හැකියි. එනිසා රාජකාරී සඳහා හෝ වෙනත් අත්‍යාවශ්‍ය කටයුත්තක් සඳහා නිවසින් බැහැරව යෑමේදී සියලුම පුරවැසියන් හැඳුනුම්පත රැගෙන යෑම අනිවාර්ය වෙනවා. අපි මේ නීතිය තදින් ක්‍රියාත්මක කිරීමට බලාපොරොත්තු වෙනවා‘‘

මෙහිදී අත්‍යවශ්‍ය සේවා සදහා පළාත් අතර සංචරණය ගැන කරුණු පැහැදිලි කළ පොලිස් මාධ්‍ය ප්‍රකාශකවරයා, සෞඛ්‍ය මාර්ගෝපදේශ දැඩි ලෙස අනුගමනය කරමින් අත්‍යවශ්‍ය සේවාවන් සඳහා පමණක් පළාත් සීමා අතර ගමන් කිරීමට අවසර හිමි වන බව පැවසුවා.

ඒ අනුව අවසර හිමිවන අත්‍යවශ්‍ය සේවාවන්,

*සෞඛ්‍ය සේවා
*පොලීසිය හා ත්‍රිවිධ හමුදාව
*අත්‍යවශ්‍ය නිල සංචාර සඳහා රාජ්‍ය අංශයේ නිලධාරීන්
*අත්‍යවශ්‍ය සැපයුම් බෙදාහරින්නන්
*අත්‍යවශ්‍ය සේවා සපයන්න් (උපයෝගිතා සේවා)
*පවුලේ ආසන්නතම සාමාජිකයෙකුගේ අවමංගල්‍යයක් සඳහා (තහවුරු කිරීම අනිවාර්ය වේ)
*විදේශගත වීම / විදේශයක සිට පැමිණීම් හෝ ආනයන / අපනයන කටයුතු සඳහා අවශ්‍ය සේවාවන් (තහවුරු කිරීම අනිවාර්ය වේ)

Covid-19 වෛරසය පැතිරීම පාලනය කිරීමේ පියවරක් ලෙස හෙට (13) රාත්‍රී 11 සිට මැයි 17 වැනිදා අලුයම 4 දක්වා මුළු දිවයිනටම බලපැවැත්වෙන පරිදි සංචරණ සීමා කරන බව කොවිඩ් පැතිරීම පාලනය කිරීමේ ජාතික ක්‍රියාන්විත මධ්‍යස්ථානයේ ප්‍රධානී, යුද හමුදාපති ජෙනරාල් ශවේන්ද්‍ර සිල්වා මහතා පවසනවා. මේ කාලසීමාවේදී අත්‍යවශ්‍ය සේවා සහ එළවලු, පලතුරු ඇතුළු අත්‍යවශ්‍ය භාණ්ඩ ප්‍රවාහනය සඳහාත්, බස්නාහිර පළාත තුළ එන්නත්කරණ වැඩසටහන සඳහාත් අවසර හිමි වන බව යුද හමුදාපතිවරයා වැඩිදුරටත් පැවසුවා.