2020 අධ්යයන පොදු සහතික පත්ර උසස් පෙළ විභාගයේ ප්රතිඵල මීට සුළු මොහොතකට පෙර විභාග දෙපාර්තමේන්තුව විසින් නිකුත් කළා. 2020 උසස් පෙළ විභාගයට පෙනී සිට ප්රතිඵල අපේක්ෂාවෙන් පසුවන සිසුන්ට www.doenets.lk වෙබ් අඩවියට පිවිසීමෙන් ප්රතිඵල බලා ගත හැකි බවයි විභාග දෙපාර්තමේන්තුව පවසන්නේ.
Tag: featured
-
2021දී ලංකාවේ කාන්තාවොත් ෆේල් – ජාත්යන්තර ශ්රේණිගත කිරීම් අතර ස්ථාන 113කින් ලංකාව පසුපසට
කාන්තාවන්ට සහ පුරුෂයින්ට හිමි වන සමාන අවස්ථා අතර පරතරය පිළිබඳ වාර්ෂික වාර්තාවකට අනුව 2006 වසරේ සිට 2021 වන විට ශ්රී ලංකාව ස්ථාන 113ක් පහත වැටී තිබේ.
2021 ලෝක ආර්ථික සංසදය (WEF) නිකුත් කළ වාර්තාවට අනුව, 2006 වර්ෂය වන විට ශ්රී ලංකාවේ ස්ත්රී – පුරුෂ පරතරය අවම මට්ටමක තිබුණු අතර ලෝකයේ රටවල් 156ක් අතරින් 13 වෙනි ස්ථානයේ පසු විය.
නමුත් 2021 වාර්තාවේ ශ්රී ලංකාවට හිමිව ඇත්තේ 116 වෙනි ස්ථානයයි. වසර පහළොවක් ඇතුළත ස්ථාන 113ක් ශ්රී ලංකාව පහත බැස තිබේ. එමෙන්ම, වසරක් තුළ ස්ථාන 14ක් පහත වැටීම ද අවධානයට ලක් විය යුතු කරුණකි.
වාර්තාවේ සඳහන් වන පරිදි මෙයට ප්රධානතම හේතුව වන්නේ ශ්රී ලංකාවේ දේශපාලනය සහ ආර්ථිකයට කාන්තාවන්ගේ ඇති අවම සහභාගිත්වයයි.
කෙසේනමුත්, පසුගිය අවුරුදුවල පහළ ස්ථානවල සිටි රුවන්ඩාව, බංග්ලාදේශය සහ පිලිපීනය වැනි රටවල් මෙම වසරේ දී ශ්රී ලංකාව පසු කර ස්ත්රී පුරුෂ සමානාත්මතාව අතින් ඉහළට ගොස් තිබේ.
ශ්රම බලකාය
පුරුෂයන් 72.4% ට සාපේක්ෂව ශ්රී ලංකාවේ ශ්රම බලකායට කාන්තාවන්ගේ දායකත්වය 32.5% ක් පමණි. එසේම, කාන්තාවන්ගේ විරැකියා අනුපාතය 36.3% ක් වන අතර, පුරුෂයන් අතර එය 21.1% ක් පමණි.
එක්සත් ජාතීන්ගේ කාන්තා සංවිධානය 2020 දී නිකුත් කළ වාර්තාවකට අනුව, දැරිය හැකි මුදලකට ගුණාත්මක දිවාසුරැකුම් මධ්යස්ථාන සහ ළමාරක්ෂක සේවා නොමැතිකම, නිවසේ රාජකාරි බෙදා ගැනීමට සහාය නොලැබීම සහ සේවිකාවන්ට අවශ්ය සහාය නොදක්වන සමහර සේවා ස්ථාන සංස්කෘතීන් වැනි බොහෝ සාධක නිසා රට තුළ ශ්රම බලකායට කාන්තා සහභාගීත්වය අවම වී තිබේ.
“නිවසේ රාජකාරි බෙදාගෙන සිදු කිරීමක් නැහැ” බොහෝ කාන්තාවන් ස්ථීර ආදායමක් නොලැබෙන රැකියාවල නිරත වන බැවින්, කොවිඩ්-19 වැනි අර්බුද ශ්රී ලංකාවේ පවුල් 1/4 වැඩි ප්රමාණයකට අයත් කාන්තාවන්ට දැඩි ලෙස බලපා ඇතැයි වාර්තාවේ දැක්වේ.
ගෘහ මූලිකයා කාන්තාව වූ විට ඔවුන්ගේ පවුලට සහයෝගය දැක්වීමේදී තුන් ගුණයක බරක් දැරීමට මෙම කාලය තුළ සිදුව ඇතැයි එම වාර්තාවේ තවදුරටත් දැක්වේ.
“මම දරුවන් දෙදෙනෙක්ගේ තනි මවක්. දික්කසාද වුණාට පස්සේ, දරුවන් බලාගන්න, ගෙදර කටයුතු වගේම රස්සාවත් මට තනියම කරන්න සිද්ධ වෙලා තියෙන්නේ. මම දිනකට කරන වැඩකොටස පිරිමි කෙනෙකුට හිතා ගන්නවත් බැහැ. දරුවෝ බලන්න නැනී කෙනෙක්ගේ සහය ලබාගන්නවා, නමුත් ඒ මොනවා තිබුණත් දවසට පැය විස්සක්වත් මම වැඩ. ඒ කියන්නේ වැඩි වැඩ ප්රමාණයක් කරන්නේ පඩි නැතිව,” මිනූ යැයි තමන් හඳුන්වන ලෙස ඉල්ලීමක් කළ කාන්තාවක බීබීසී සිංහල සේවයට පැවසීය.
කාන්තාවන්ගේ අධ්යාපන මට්ටම ක්රමයෙන් ඉහළ යමින් තිබියදීත්, තවමත් ඔවුන්ගේ ශ්රමය බොහෝවිට වැයවන්නේ නිවසේ එදිනෙදා වැඩකටයුතුවලටය.
කාන්තාවන්ගේ සමාජ භූමිකාව පිළිබඳ පූර්ව නිගමනවලට එළැඹීම හේතුවෙන් අදටත් ඔවුන්ට බොහෝ අවස්ථා මග හැරෙන අතර, විවිධ තහංචි මධ්යයේ දිවි ගෙවීමට සිදුව තිබේ.
“ඇත්තටම බැලුවොත් රටෙන් 52%කින් හරිහැටි වැඩක් ගන්නේ නැහැ” “ලංකාවේ ගැහැණු කෙනෙක් රස්සාවකට යන්න නම් බඳින්න කලින් යන්න ඕනේ. නැත්නම් ඉන්ටර්වීව් එකකින්වත් පාස් වෙන්න බැහැ. බැඳලා ළමයි ලැබෙනකොට රැකියාව මඟ හැරෙනවා කියලා කොම්පැණිවලින් බඳවා ගන්නේ නැහැ. මම පෞද්ගලිකව මෙය අත්වින්ඳා. ඉහළට ඉගෙනගෙන ඒ හැමදේම නිවසේ වැඩකටයුතුවලට විතරක් දිය කරලා දානවා වගේ හැගීමක් මට තියෙන්නේ,” උපාධිධාරිණියක වන බුද්ධිකා පෙරේරා පැවසීය.
“ඉගෙනගත්ත දේ තමයි වටින්නේ වගේ දේවල් අපේ සමාජයේ නිතර ඇහුණත්, විශේෂයෙන්ම කාන්තාවන්ගේ ඉගෙනීමට නිසි වටිනාකමක්, ගෞරවයක් ලබා දීලා එයින් ප්රයෝජන අරගෙන නිසි රැකියාවක නිදහසේ නිරත වෙන්න බැහැ තවමත්. ඇත්තටම බැලුවොත් රටෙන් 52%කින් හරිහැටි වැඩක් ගන්නේ නැහැ. ඉතින් 2021 දීත් හැමෝම ඉදිරියට යද්දී අපි රටක් හැටියට පස්සට යන එක අරුමයක් නොවෙයි,” ඇය තවදුරටත් පැවසුවාය.
ඈන් ටී කුරියාකෝස්, ජෝර්ජ් ජෝසෆ් සහ ජෙනිෆර් එල් සොලොටරොෆ් රචිත ‘Getting to Work: Unlocking Women’s Potential in Sri Lanka’s Labor Force’ නම් කෘතියෙහි ශ්රී ලංකාවේ කාන්තාවන් ආර්ථිකයට සම්බන්ධ නොවන හේතු මෙන්ම ඔවුන් සම්බන්ධ කරගත හැකි ක්රම ද දක්වා තිබේ.
කාන්තාවන්ගේ අධ්යාපනයේ ප්රගතිය හා යහපත් සෞඛ්ය ප්රතිලාභයන්ගේ ප්රගතිය ශ්රී ලාංකික කාන්තාවන්ට, වඩා ඉහළ රැකියා අවස්ථා නිර්මාණය කිරීම සඳහා පරිවර්තනය වී නොමැති බව මෙම කෘතියේ සඳහන් වේ.
ජනගහනයෙන් 52%ක් වූ කාන්තාවන්ගේ කුසලතාවන් ප්රයෝජනයට නොගැනීම හේතුවෙන් ශ්රී ලංකාවේ ආර්ථිකයට සිය පූර්ණ සාර්ථකත්වය කරා ළඟා වීමට නොහැකි වන බව ද එහි වැඩි දුරටත් සඳහන් වේ.
“කාන්තාවන්ට රැකියා ලබා දීම යනු මානව අයිතීන්ට ගරු කිරීමක් පමණක් නොව ආර්ථික දියුණුවේ පෙරදැක්මක්. ශ්රම බලකාය තුළ කාන්තාවන්ගේ සහභාගිත්වය සඳහා ඇති බාධක ඉවත් කිරීම මගින් ශ්රී ලංකාවේ ආර්ථිකය ඉහළ නංවා, ඉහළ මැදි ආදායම් ලබන රටක් බවට පත්වීමට ඉඩ සැලසෙනවා.”
මෙම තත්වය මඟ හරවා ගැනීමට නම් අදාළ රාජ්ය අමාත්යාංශ, අධ්යාපනය සඳහා වන සැපයුම්කරුවන්, රාජ්ය අංශයේ සහ පෞද්ගලික අංශයේ සේවා යෝජකයන් ඇතුළු පාර්ශ්වකරුවන් ඵලදායී, ආරක්ෂිත හා සාධාරණ වැටුපක් සහිතව කාන්තාවන් සේවයේ යෙදවිය හැකි අවස්ථා පුළුල් කිරීම සිදු කළ යුතු බව ලෝක බැංකුවේ ජ්යෙෂ්ඨ සමාජ සංවර්ධන විශේෂඥවරියක සහ කතුවරියක වන ජෙනිෆර් එල් සොලොටරොෆ් මෙම කෘතියේ සඳහන් කර ඇත.
කෘෂිකර්මයට කාන්තා දායකත්වය
ශ්රී ලංකාවේ මිලියන 2.1ක් වන කෘෂිකාර්මික යැපුම් මාර්ගයක් ඇති නිවෙස් අතරින් 19%ක්ම කාන්තා ගෘහ මූලිකත්වයකින් යුතු පවුල් වීම විශේෂත්වයකි. ශ්රී ලංකාවේ කාන්තාවන් හා සම්බන්ධ සමීක්ෂණ පවත්වන මධ්යස්ථානය (Centre for Women’s Research/ CENWOR) මඟින් සිදුකළ ‘ස්ත්රීපුරුෂ සමානාත්මතාවයෙන් යුත් කෘෂිකර්ම ප්රතිපත්ති’ (Gender Equitable Agricultural Policies) සහ යුරෝපා සංගමය මගින් සිදුකළ 2018 කෘෂිකාර්මික ප්රතිපාදනවල ස්ත්රීපුරුෂ සමාජභාවීය සාධකය (Gender Responsiveness of 2018 Agriculture Sector Budget) යන අධ්යයන දෙකෙන් හෙළි වී ඇති කරුණු අනුව කෘෂිකර්මාන්තයට අදාළ සෑම අංශයකම සේවයේ නියුතු කාන්තාවෝ, පුරුෂ පාර්ශ්වය හා සමානව කැපවී කටයුතු කරන බව හෙළි වී තිබේ.
එම අධ්යයනවලට අනුව ශ්රී ලංකාවේ දළ ජාතික නිෂ්පාදිතයෙන් 7.7%ක කොටසක් හිමි කෘෂි ක්ෂේත්රය තුළ සමස්ත ජනගහනයෙන් 27%ක් සේවයේ නියුතුව සිටිති. ඉන් 38%ක්ම කාන්තාවෝ වෙති.
තව ද ශ්රී ලංකාවේ මිලියන 2.1ක් වන කෘෂිකාර්මික යැපුම් මාර්ගයක් ඇති නිවෙස් අතරින් 19%ක්ම කාන්තා ගෘහ මූලිකත්වයකින් යුතු පවුල් වීම විශේෂත්වයකි. මූලිකව කෘෂිකර්මාන්තයේ යෙදෙන්නන් අතුරින් 75%ක් පුරුෂයින් ද 25% ස්ත්රීන් ද වන නමුත් ගෘහ මූලිකයාට අමතරව පවුලේ ආර්ථිකයට දායක වන සේවා නියුක්තිකයින් අතුරින් 78.9%ක්ම කාන්තාවන් වීම (පිරිමි 21.1%) තවත් කැපී පෙනෙන කරුණකි.
කෙසේනමුත්, කෘෂිකාර්මික කටයුතුවල නියුතු කාන්තාවන්ගෙන් බහුතරයක් යැපුම් කෘෂි කටයුතුවල නිරත වේ. එය කුඩා ආර්ථික ලාභයක් සහිත සේවා නියුක්තියක් ලෙස සැලකෙන අතර ඇස්තමේන්තුගත කාන්තා පිරිමි ආදායම් ඉපැයීමේ අනුපාතය 0.31%කි.
එමෙන්ම ඉඩම් ලබාගැනීම හා වගා ව්යාපෘති සම්බන්ධයෙන් කාන්තාවන් අභියෝග රැසකට මුහුණ දෙන අතර, කෘෂි බෝග අලෙවිකරණයේදී මතුවන ගැටලු සහ වාණිජ කෘෂි වගාව, ඔවුන් අතර ප්රවර්ධනය නොකිරීම ද ඔවුන් මුහුණපාන ප්රධාන ගැටලුවකි.
මේ අතර කාන්තාවන් බොහෝවිට කෘෂිකර්මාන්ත අංශය තුළ නුපුහුණු ශ්රමිකයින් වීම ද ගැටලුවක්ව පවතී. එහෙයින් කාන්තා සහ පිරිමි දෙපාර්ශ්වයම එක සමාන අයුරින් සුහුරු වගා භාවිතා සහ ඩිජිටල්කරණය වූ කෘෂිකාර්මික භාවිතාවක් සඳහා පුහුණු කිරීමේ කාලීන අවශ්යතාවක් පවතින බව ද මෙම අධ්යනයවලින් හෙළි වී තිබේ.
“මෙය විසඳන්න දුර දකින නායකත්වයක් අවශ්යයි”
සමාජ ක්රියාකාරිනියක සහ ළමා හිංසනයට තිත සංවිධානයේ සභාපතිනි වෛද්ය තුෂ් වික්රමනායක බීබීසී සිංහල සේවයට අදහස් දක්වමින් පැවසුවේ අනාගතය ගැන පැහැදිලි දර්ශනයක් ඇති නායකත්වයක් තුළින් මෙම ගැටලු බොහොමයකට පිළිතුරු සෙවිය හැකි බවය.
“කාන්තාවට අඩු සැලකීමක් දක්වන්නේ පිරිමි. ඔවුන් දැනුවත් කර බලාත්මක කිරීමයි ඇත්තටම සිදු වෙන්න ඕනේ.” “බලය විතරක් තියෙන නායකත්වයක් නෙමෙයි, හදවතින් සෘජුව තීන්දු ගන්නා නායකත්වයක් අවශ්යයි. නායකත්වය බිඳ වැටුණු තැන සමාජයේ මුලින්ම අවදානමට ලක්වන්නේ කාන්තාවන් සහ දරුවන්. පීතෘ මූලික අපේ වගේ සමාජයක කොහොමත් කාන්තාවන්ට අයත් වන්නේ දෙවෙනි පෙළ. ඉතින් රට අර්බුදයකට මුහුණ දෙන විට ශක්තිවන්තයා කොහොමත් ජයගන්නවා. මෙතනදී ශක්තිවන්තයා පිරිමියා.”
“ජන සංහාරයක් වුණ රුවන්ඩාව වගේ රටක පාර්ලිමේන්තුවේ 60%කට වැඩි ප්රමාණයක් කාන්තාවන් ඉන්නේ ඒ රටවල පසු කාලීනව බිහි වුණ දැක්මක් තියෙන නායකයන් නිසයි. ඒ වගේම අපි හැම වෙලාවේම කාන්තාවන් බලාත්මක කළ යුතුයි කිව්වට, මෙතන දී ඇත්තටම බලාත්මක කරන්න ඕනේ පිරිමින්ව. කාන්තාවට අඩු සැලකීමක් දක්වන්නේ පිරිමි. ඔවුන් දැනුවත් කර බලාත්මක කිරීමයි ඇත්තටම සිදු වෙන්න ඕනේ.”
හැබැයි දරදඬු පාලනයක් තුළ අපි කෙතරම් බලාත්මක වෙන්න හැදුවත් එය සිද්ධ වෙන්නේ නැහැ. අපේ ගැටලුවලට ඇහුම්කම් දෙන්න කෙනෙක් නැත්නම් මේ ස්ත්රී පුරුෂ අසමානතා විසඳන්නේ කොහොම ද?,” වෛද්යවරිය තවදුරටත් පැවසුවාය.
කාන්තා දේශපාලනය
2021 ලෝක ආර්ථික සංසද වාර්තාවට අනුව දකුණු ආසියානු රටවල දේශපාලනය තුළ අවම කාන්තා නියෝජනයක් දක්නට ලැබෙන්නේ ශ්රී ලංකාව සහ මාලදිවයිනේය.
“ශ්රී ලංකාවේ දේශපාලනයේ කාන්තා නියෝජනය අවම වෙන්න බොහෝ හේතු තිබෙනවා. හැබැයි අපි ප්රායෝගික පැත්ත කල්පනා කරලා බැලුවොත් ලංකාවේ දේශපාලනයට කාන්තාවකට නිදහසේ ඇතුළු වෙන්න පුළුවන් ද? මේ රටේ දේශපාලනය තනිකර මඩ ගොහොරුවක්. චරිත ඝාතනය, හොරකම්, මැරකම් වගේම අනිසි බලපෑම්වලින් පිරුණු දේශපාලනයකට සාමාන්යය ගැහැනියකට පය තබන්න පුළුවන් ද කියන එක ප්රශ්නයක්,” නීතීඥ ලක්ෂිකා ඩයස් පැවසීය.
ලෝකයේ පාර්ලිමේන්තු අතරින් වැඩිම කාන්තා නියෝජනයක් දක්නට ලැබෙන රට රුවන්ඩාව වන අතර, එය 61.3%ක් වේ. “දේශපාලනය හා සම්බන්ධ වංචාවලින් ලෝකයේ ඉහළින්ම තියෙන රටක් මේක. ඉතින් පවුල් උරුමයෙන් දේශපාලනයට එනවා මිස සාමාන්යය කාන්තාවකට මේ දූෂිත දේශපාලනය ඇතුළේ පවතින්න බැරි වෙලා තියෙනවා. ඒ වගේම කාන්තාවන්ට උරුම නිවසේ වැඩ කියන දේ තවමත් පිළිගන්නා රටක දේශපාලනයේ දී ඔවුන්ට පවුලේ අයගේ සහය පවා ලැබෙන්නේ නැහැ. මේ ගෝත්රිකත්වයෙන් මිදෙන්න අපිට තව ශතවර්ෂ ගණනාවක් ගතවෙයි.”
“අඩුම තරමේ කාන්තා කටයුතු ඇමතිවත් මේ රටේ කාන්තාවක් ද? අඩු තරමේ එය කැබිනට් අමාත්යංශයක්වත් නෙමෙයි,” ඇය තවදුරටත් පැවසීය.
2020 වසර අග භාගයේ දී කාන්තා හා ළමා කටයුතු අමාත්යාංශය, අධ්යාපන අමාත්යාංශය යටතේ රාජ්ය අමාත්යාංශයක් බවට පත්කිරීමට රජය පියවර ගත්තේය. කාන්තා හා ළමා සංවර්ධන ,පෙර පාසැල් හා ප්රාථමික අධ්යාපන, පාසැල් යටිතල පහසුකම් හා අධ්යාපන සේවා රාජ්ය අමාත්ය පියල් නිශාන්ත ද සිල්වාය.
1931 දී 4%ක් වූ කාන්තා නියෝජනය තවමත් පාර්ලිමේන්තුව තුල 6%කට වඩා වැඩිකර ගැනීමට නොහැකි වී තිබේ.
2010 වසරේදී ශ්රී ලංකාවේ පාර්ලිමේන්තුවේ කාන්තා නියෝජනය 5.8% දක්වා වැඩි වුව ද වර්තමානයේ දී එය 5% දක්වා පහත වැටී තිබේ.
ලොව පළමු අගමැතිනිය ලෙස සිරිමාවෝ බණ්ඩාරනායක තේරී පත්වූයේ මීට අවුරුදු 61කට පෙර එනම්, 1960දීය.
එතැන් සිට අවුරුදු 34 ක් ගෙවී ගිය තැන ඇයගේ දියණිය වන චන්ද්රිකා බණ්ඩාරනායක කුමාරතුංග 1994 දී අගමැතිනිය ලෙස පත්වීමෙන් නොනැවතී රටේ ප්රථම විධායක ජනාධිපතිනිය ලෙස තේරී පත් වූවාය. එතැන් සිට ඇය 2005 නොවැම්බර් මස දක්වා රට පාලනය කළාය. රටේ මුල්ම රාජ්ය මන්ත්රණ සභාවේ සිට හැම වරකම පාර්ලිමේන්තුවේ කාන්තාවන් කීපදෙනෙක් හෝ සිටියහ.
බලයට පත් සෑම රජයක්ම දේශපාලනයේ කාන්තා නියෝජනය වැඩි කිරීමට විවිධ පොරොන්දු මෙන්ම උත්සාහයන් දැරුවද අද වන තෙක් ඒ කිසිවක් නිසි ලෙස ක්රියාත්මක වී නොමැත.
යුරෝපීය රටවල් බොහොමයක පාර්ලිමේන්තුවේ කාන්තා නියෝජනය 30% වඩා වැඩි බව සංඛ්යාලේඛන අනුව පෙනී යයි.
තවමත් බොහෝ රටවල නායකත්වයට පුරුෂයන් පත්වී සිටිය ද 2021 වර්ෂය වන විට රටවල් 22ක කාන්තා නායකත්වයක් දැකිය හැකි විය.
ප්රතිසංවිධානය කරන ලද අමාත්යාංශයේ ප්රධානත්වය දරණු ලබන්නේ නව රජයේ අධ්යාපන අමාත්ය මහාචාර්ය ජීඑල් පීරිස් විසිනි. කාන්තා හා ළමා සංවර්ධනය සම්බන්ධ කර්තවයන් රාජ්ය අමාත්යවරයා වන පියල් නිශාන්ත ද සිල්වා යටතේ සිදු කෙරේ. කාන්තාවන්ගේ අයිතිවාසිකම් වෙනුවෙන් පෙනී සිටීම වැදගත් වන්නේ ඇයි?
‘කාන්තා අයිතිවාසිකම් යනු මානව හිමිකම්මය‘
ඔවුන් අන් පුද්ගලයන්ගෙන් වෙනස් නොවන නමුත්, සමාජ, ආර්ථික, අධ්යාපන සහ දේශපාලනික වශයෙන් ඔවුන්ට තවමත් බොහෝ විට ලැබෙන්නේ පසු පෙළ අසුනකි. මේ හේතුවෙන්, කාන්තාවන් වෙනුවෙන් වෙනම හඬක් නැගීමේ අවශ්යතාව පැන නැගී තිබේ.
සෑම කෙනෙකුම නිදහස් හා සමාන වන තුරු අපට නිදහස් හා සමාන සමාජයක් තිබිය නොහැක. පුරුෂයන්ට සමාන අයිතිවාසිකම් කාන්තාවන් භුක්ති විඳින තුරු, මෙම අසමානතාව සෑම පුද්ගලයෙකුගේම ගැටලුවක් බවට පත් වේ.
‘කාන්තාවන්ගේ අයිතිවාසිකම් ආරක්ෂා කිරීම ලෝකය වඩා හොඳ තැනක් බවට පත් කරයි‘
එක්සත් ජාතීන්ගේ සංවිධානයට අනුව, “ස්ත්රී පුරුෂ සමානාත්මතාව සහ කාන්තාවන් සහ ගැහැණු දරුවන් සවිබල ගැන්වීම හුදෙක් ඉලක්කයක් නොව, එය තිරසර සංවර්ධනය, ආර්ථික වර්ධනය, සාමය සහ ආරක්ෂාව සඳහා යතුරක් වේ”.
කාන්තාවන්ගේ අයිතිවාසිකම් තහවුරු කර, එයට වටිනාකමක් දෙමින් සලකන විට සමාජයේ සෑම කෙනෙකුටම යහපත් සිදු වන බව ඇම්නෙස්ටි ජාත්යන්තරය කාන්තා අයිතීන් ගැන නිකුත් කළ වාර්තාවක සඳහන් වේ.
‘එකට වැඩ කරන විට අපි ශක්තිමත් වෙනවා’
“වෙනසක් ඇති කිරීම සඳහා මේ වන විට බිම් මට්ටමේ ව්යාපෘති බොහෝමයක් ක්රියාත්මක කර ඇතත්, සෑම කෙනෙකුම කාන්තාවන්ගේ අයිතිවාසිකම්වලට සහයෝගය දක්වන්නේ නම් අපට සමාජයක් ලෙස වඩාත් ශක්තිමත් විය හැකිය.” ඉහත කී වාර්තාවේ වැඩි දුරටත් දැක්වේ.
Text by bbc sandesaya
-
කොවිඩ් සුනාමිය අස්සේ ‘අගමැති මෝදිට’ ප්රාන්ත මැතිවරණවලිනුත් රතුඑළි !
ඉන්දියාවේ ප්රාන්ත මැතිවරණයේදී අගමැති නරේන්ද්ර මෝදිගේ භාරතීය ජනතා පක්ෂයට තීරණාත්මක බටහිර බෙංගාල ප්රාන්තය අහිමි විය. මැතිවරණ ව්යාපාරයේදී භාරතීය ජනතා පක්ෂය බටහිර බෙංගාලය ඉලක්ක කර දැඩි බරක් යොදවා තිබිණි.
එහෙත් මෝදිගේ දැඩි විවේචකයෙකු ලෙස සැලකෙන දැනට එම ප්රාන්තයේ බලය හිමි මමතා බෙනර්ජි විසින් පහසුවෙන්ම යළි එම ප්රාන්තයේ බලය තහවුරු කරගනු ලැබීය.
භාරතීය ජනතා පක්ෂය (බීජේපී) අසාමයේ බලය රැක ගත්ත ද සෙසු ප්රාන්ත තුළ කැපී පෙනෙන ජයක් ලබා ගැනීමට අපොහොසත් විය.
ඉන්දියාවේ පවතින කොරෝනා අර්බුදය මැද අගමැති මෝදිගේ පසුබෑමක් ප්රදර්ශනය කෙරෙන සංඥා ලබා දෙන්නේදැයි සොයා මෙම ප්රාන්ත මැතිවරණය සමීපව නිරීක්ෂයට ලක්ව තිබිණි.
නොවනවත්වා 10 වෙනි දිනටත් ඉන්දියාවේ දෛනික රෝගීන් සංඛ්යාව 300,000 ඉක්මවනු ලැබීය. ඉන්දියාවෙන්, ඉරිදා (මැයි 02) වාර්තා වූ මරණ සංඛ්යාව 3,689 කි. එය මෙතෙක් දිනකදී වාර්තා වූ වැඩිම මරණ සංඛ්යාවයි. රෝහල් දරුණු ලෙස ඇඳන් සහ ඔක්සිජන් හිඟයකට මුහුණ දී සිටින අතර ඉන්දියානුවෝ බොහෝ දෙනෙකු සමාජ ජාල ඔස්සේ උපකාර අයදින අයුරු දැකිය හැක.
මැතිවරණ රැළි සහ ඡන්දය, කොරෝනා වෛරස් රෝගීන්ගේ ඉහළ යාමට බලපා ඇති බව විශ්ලේෂකයෝ පවසති.
බෙංගාලයේ සිදු වූයේ කුමක්ද?
බොහෝ දුරට ඡන්ද ගණන් කිරීම අවසන් වී තිබියදී, ප්රාන්ත සභාවේ ආසන 294 න් 200 කට අධික සංඛ්යාවක් තහවුරු කර ගැනීමට මමතා බෙනර්ජිගේ ට්රිනමූල් කොන්ග්රස් (ටීඑම්සී) පක්ෂයට හැකිව ඇත.
ප්රතිඵල අනුව බෙනර්ජි තෙවන වරටත් බටහිර බෙංගාලයේ නායිකාව වීමට නියමිතය. ඇය ඉන්දියාවේ ප්රාන්ත ප්රධාන අමාත්ය ධුරයක් දරන එකම කාන්තාව ද වෙයි.
ලක්ෂ නවසීයක් වෙසෙන බටහිර බෙංගාලය වෙත මැතිවරණ නිරීක්ෂකයන්ගේ විශේෂ අවධානයක් යොමුව තිබිණි. එම ප්රාන්තය, අගමැති මෝදි බහුතර පාර්ලිමේන්තු ආසන සංඛ්යාවකට හිමිකම් නොකියන ප්රාන්ත කීපයෙන් එකකි. එමෙන්ම බටහිර බෙංගාලය, මෝදිගේ හින්දු ජාතිකවාදී භාරතීය ජනතා පක්ෂය විසින් කිසිදා පාලනය කරනු ලැබ නොමැත.
පරාජයට පත් වුව ද මැතිවරණයෙන් ආසන 80 ක් පමණ දිනා ගනිමින් බරහිර බෙංගාලයේ ප්රධාන විපක්ෂය බවට පත්වීමට බීජේපිය සමත්ව තිබේ. 2016 වසරේ මැතිවරණයෙන් එම පක්ෂයට දිනා ගත හැකි වුණේ ආසන 03 ක් පමණි.
Text by – bbc
-
කොවිඩ්-19 ආරක්ෂා වීමට ‘ගර්භණී මවුවරුන්ට‘ විශේෂ උපදෙස් මාලාවක්
මේ වන විට රෝහල් කිහිපයකින්ම කොවිඩ් ආසාදිත ගැබිනි මව්වරුන් 70 දෙනෙකු හඳුනාගෙන ඇති බවත් ඒ හේතුවෙන් ගැබිනි මව්වරුන් පිළිබඳ දැඩි අවධානයෙන් පසුවිය යුතු බවත් ප්රජා විශේෂඥ වෛද්ය චිත්රමාලි ද සිල්වා මහත්මිය පැවසුවාය.
මේ සම්බන්ධයෙන් මාධ්ය වෙත විශේෂ ප්රකාශයක් කළ සිල්වා මහත්මිය මෙසේ ද පැවසුවාය. ‘‘විශේෂයෙන් ම මේ වන විට පවතින කොවිඩ් වෛරසය දරුවන් ට හා ගැබිනි මව්වරුන්ට වැළඳීමේ වැඩි ප්රවණතාවයක් තිබෙනවා. ඒ අනුව කොවිඩ් -19 වෛරසයෙන් ආරක්ෂා වීමට ගැබිනි මව්වරු විශේෂ අවධානයක් යොමු කළ යුතුයි. ඒ වගේම ඔවුන් මුව ආවරණයක් භාවිතා කිරීම අනිවාර්යයෙන්ම කළ යුතුයි. නිතරම සබන් යොදා දෑත් පිරිසිදු කරගත යුතුයි. ඒ වගේම ගමන් බිමන් සීමාකර කණ්ඩායම් එක්රැස් වන ස්ථානවලට යාමෙන් වැළකී සිටිය යුතුයි‘
මෙහිදී ප්රජා විශේෂඥ වෛද්ය චිත්රමාලි ද සිල්වා මහත්මිය කියා සිටියේ ගැබනි මවුවරු කෘත්රීම ආහාර ගැනීමෙන් වැළකී නිවසේදී පිළියෙළ කරන ආහාර ගැනීම වඩාත් වැදගත් බවයි.
-
වැඩිම කොවිඩ්-19 ආසාදිතයින් සංඛ්යාව වාර්තා වෙයි
මෙතෙක් ශ්රී ලංකාවෙන් වාර්තා වූ වැඩිම කොවිඩ්-19 ආසාදිතයින් සංඛ්යාව අද (03) වාර්තා වී තිබෙනවා. අද සවස රජයේ ප්රවෘත්ති දෙපාර්තමේන්තුව නිකුත් කළ මාධ්ය නිවේදනයක සදහන් වුණේ අද දින නව කොවිඩ් ආසාදිතයින් 1913 දෙනකු වාර්තා වූ බවයි.
-
ඇතෙක් විදුලි රැහැනකට බිලි වෙයි !
තලාව ප්රාදේශිය ලේකම් කොට්ඨාශයට අයත් කරගහවැව, වැව්ඉස්මත්ත ආසන්න ඉඩමකට පැමිණි ඇතෙකු විදුලි සැරවැදිමෙන් මියගොස් තිබෙනවා. මෙම ඇතාගේ වයස අවුරුදු 25ක් පමණ වන බවත් පසුගිය 02 වැනිදා අලුයම මෙම ඇතා ඝාතනය වී ඇති බවත් වනජීවී නිලධාරීන් පවසනවා. ලංකාව ලෝකයේ වැඩියෙන්ම අලි ඝාතන කරන රටවල් අතර දෙවැනි ස්ථානයට පත්ව තිබුණත් දෛනිකව සිදුවන මෙවැනි අලි ඝාතනවලට එරෙහිව තිරසර පියවරක් ගන්නා බවට පෙනී නොයන බවයි පරිසරවේදීන් කියන්නේ.
-
පූජිත්ට සහ හේමසිරිට ‘චෝදනා 1728ක් යටතේ නඩු – මිනී මැරීම හා මිනී මැරීමට තැත් කළ බවටත් චෝදනා !
ඉතා පැහැදිලි බුද්ධි අංශ වාර්තා ලැබී තිබියදීත් පාස්කු ඉරිදා ප්රහාර වළක්වා ගැනිමට අවශ්ය කටයුතු නොකිරීම සම්බන්ධයෙන් හිටපු පොලිස්පති පූජිත් ජයසුන්දර සහ හිටපු රාජක්ෂක ලේකම් හේමසිරි ප්රනාන්දු යන මහත්වරුන්ට එරෙහිව මිනී මැරීම හා මනී මැරීමට තැත් කළ බව ඇතුළු චෝදනා 1728 ක් යටතේ නඩු පැවරීමට නීතිපති දප්පුල ද ලිවේරා මහතා තීරණය කර ඇති බව වාර්තා වෙනවා.
හිටපු පොලිස්පති පූජිත් ජයසුන්දර මහතාගේ හා හිටපු ආරක්ෂක ලේකම් හේමසිරි ප්රනාන්දු මහතාගේ නීතිවිරෝධී නොසලකාහැරීම හේතුවෙන් පුද්ගලයන් 275කට ජීවිතවලින් වන්දි ගෙවීමට ද තවත් 500 කට බරපතල තුවාලවලට ලක්වීමට ද සිදුව ඇති බව නීතිපතිවරයා විසින් අගවිනිසුරුවරයාට පෙන්වාදී ඇති බවයි වාර්තා වන්නේ. ඒ අනුව දණ්ඩ නීති සංග්රහයේ 296 සහ 300 වගන්ති යටතේ විත්තිකරුවන්ට එරෙහිව පවරණ මෙම නඩු විභාග කිරීම සඳහා විශේෂ ත්රිපුද්ගල මහාධිකරණ විනිසුරු මඩුල්ලක් පත්කරන ලෙස ද නීතිපතිවරයා අගවිනිසුරු ජයන්ත ජයසූරිය මහතාගෙන් ඉල්ලීමක් කර තිබෙනවා.
-
උද්දච්ඡකම්වලින් වසංගතයට මුහුණ දිය නොහැකි බව ආණ්ඩුව තේරුම් ගත යුතුයි
”අන්ත අරාජික නූගත් උද්දච්ඡ දේශපාලන තීන්දු ගන්නා ජනාධිපතිවරයා ඇතුලු කැබිනට් මණ්ඩලය තම නොහැකියාව හා උද්ධච්ච හැසිරීම වසා ගැනීමට පී.සී.ආර්. පරීක්ෂණ සූදුව ඉතා හොඳින් ගෙන යනවා‘‘ යැයි ජනතා විමුක්ති පෙරමුණේ ජාතික සංවිධායක බිමල් රත්නායක කියයි. ඔහු මේ බව ප්රකාශ කළේ අද (03) ජනතා විමුක්ති පෙරමුණේ ප්රධාන කාර්යාලයේ පැවැත් වූ මාධ්ය හමුවේදීය. මෙම මාධ්ය හමුව සදහා වෛද්ය නලින්ද ජයතිස්ස මහතා ද සහභාගී විය.
එහිදී බිමල් රත්නායක සහ නලින්ද ජයතිස්ස කළ සම්පූර්ණ කතාව පහත දැක්වේ.
‘‘රට පුරා භයානක අන්දමින් වර්ධනය වෙමින් තිබෙන, ඒ වගේම අයාලේ යාමට ඉඩ හැර තිබෙන කොවිඩ් වසංගතය සම්බන්ධයෙන් ජනතාව සහ අදාල බලධාරීන් දැනුවත් කිරීම වෙනුවෙන් මේ මාධ්ය හමුව පවත්වනවා. පසුගිය සති තුනකට ආසන්න කාලයක් තුළ සතියක් තුළදී කොරෝනා ආසාධිතයින් 10,000කට වැඩි ප්රමාණයක් බැගින් වර්ධනය වෙමින් තිබෙනවා. මහජන සෞඛ්ය පරීක්ෂකවරුන්ගේ සංගමය මෙම ආසාධිතයින් සංඛ්යාව පී.සී.ආර්. පරීක්ෂණ 15,000 වගේ මට්ටමක් තුළ වාර්තා වන බව ප්රකාශ කර තිබෙනවා. ලෝකයේම ගත්තත් ආසාධිත ප්රතිශතය ඉහළ අගයකට ගොස් තිබෙනවා. මහජන සෞඛ්ය පරීක්ෂකවරුන්ගේ සංගමය කරුණු දෙකක් අවධාරණය කරනවා.
එකක් තමයි පී.සී.ආර්. පරීක්ෂණවලින් වාර්තා වන ප්රමාණය “ඊයේ” කියලා සඳහන් නිවේදනවල වාර්තා වෙන්නේ දින තුනකට පෙර ආසාධිතයින් බව. මේක බරපතළ තත්වයක්. අපේ රටේ වෛරසය ව්යාප්ත වෙන්න පටන් ගෙන මාස 15කට පස්සෙත් ඊයේ තිබිච්ච තත්වය හරියට කියන්න බැරිනම් ආණ්ඩුවේ කලමණාකරණය පිළිබඳ බරපතළ ගැටලුවක් පැන නගිනවා. වේගයෙන් පැතිරෙන වසංගත තත්වයක් හමුවේ මෙය ඉතා භයානක තත්වයක්. ඊයේ(02) මහජන සෞඛ්ය පරීක්ෂකවරුන්ගේ සංගමේ ප්රකාශයක් උපුටාගෙන මාධ්ය වාර්තා කර තිබෙන්නේ බිම් මට්ටමේ රාජකාරී කරන දත්ත අනුව කොරෝනා මරණ ප්රමාණය පිළිබඳව සැකයක් තිබෙන බවයි. අපිටත් මේ බරපතළ සැකය තිබෙනවා. මහජන සෞඛ්ය පරීක්ෂකවරුන් අහඹු පරීක්ෂණ සිදුකිරීම සම්බන්ධයෙන් රිමෝට් කන්ට්රෝල් එක වගේ දත්ත වැඩි කරන, අඩු කරන තත්වය ගැන අනතුරු අඟවා තිබෙනවා. ආසාධිතයන් අඩුවෙන් කියන්න ඕනෑ නම් ඒ වෙනුවෙන් මොන ප්රදේශවල පී.සී.ආර්. කළ යුතුද කියලා දැන් දන්නවා. ආසාධිතයින් වැඩියෙන් දක්වන්න ඕනෑ නම් ඒ පී.සී. ආර්. සංඛ්යාවම කළ යුත්තේ මොන ප්රදේශවලද කියලත් දන්නවා.
පී.සී.ආර්. ප්රමාණය උඩ පහළ යවමින් සහ තම තමන්ට ඕනෑ ප්රදේශවල පී.සී.ආර්. කරමින් දේශපාලන සූදුවක් ආණ්ඩුව කරන බව පැහැදිලි වෙනවා. තමන්ගේ අන්ත අරාජික නූගත් උද්දච්ඡ දේශපාලන තීන්දු ගන්නා ජනාධිපතිවරයා ඇතුලු කැබිනට් මණ්ඩලයේ මේ හැසිරීම වහගන්න පී.සී.ආර්. පරීක්ෂණ සූදුව ඉතා හොඳින් ගෙන යනවා. මේ තත්වය තුළ මරණ ප්රමාණය ඉතා බරපතළ තත්වයක්. මේ නිසා සෞඛ්ය ක්ෂේත්රයේ සියලුම වෘත්තිකයන්ට අවබෝධයක් ලැබී තිබෙනවා. වෘත්තීය සමිති නැති ක්ෂේත්රවලට තමන් දකින බරපතළ තත්වය කියා ගන්න බැරිව ඉන්නවා. කාර්ය සාධක බලකායක් තියෙනවා. හමුදාපතිවරයා විවිධ දේවල් කියනවා. දෙහිඅත්තකණ්ඩියේ රෝගීන් හැටකට ආසන්න ප්රමාණයක් ප්රවාහනය කරන්න පහසුකම් නැතිව පැය හයක් තිස්සේ මුළු රැයක් පුරා කැබ් රථයක ගෙනගිය ආකාරය ඡායාරූපත් සමග වාර්තා කර තිබුණා. මේ වගේ වාහනයකින් රෝගීන් ප්රවාහනය කරනවා නම් තිබෙන තත්වය මොකක්ද? බස් එකක්, ඇම්බියුලන්ස් එකක්, වෑන් එකක් දෙන්න බැරිනම් මේ කාර්ය සාධනය මොකක්ද? මෙහෙමද ලෙඩ්ඩු ප්රවාහනය කරන්නේ?
තමන්ගේ නොහැකියාව ජනාධිපතිවරයා ප්රමුඛ ආණ්ඩුව ඉතාමත් සරල තැන්වලින් පවා එළියට ඇවිල්ලා තියෙනවා. අපි මෙතන ප්රශ්න කරන්නේ එන්නත ගැන නෙවෙයි. නමුත් කාර්ය සාධනය කරන්නේ මෙහෙමද? කොරෝනා පිළිබඳව අඩුම ගානේ 06දෙනෙක් ප්රකාශ නිකුත් කරනවා. හමුදාපතිවරයා, ජනාධිපති මාධ්ය අංශය, සෞඛ්ය ඇමතිවරිය, සෞඛ්ය අධ්යක්ෂ ජනරාල්වරයා, චන්ද ජයසුමන අමාත්යවරයා සහ කොරෝනා සම්බන්ධම රාජ්ය ඇමති වෛද්ය සුදර්ශනී ප්රනාන්දුපුල්ලේ මහත්මිය ප්රකාශ නිකුත් කරනවා. එකම ප්රශ්නය ගැන මේ හය දෙනා විවිධ දේවල් කියනවා. මේ ඔක්කොටම අමතරව මැදිහත් වෙමින් ජනාධිපතිවරයාට හිතෙන දේවල් කියනවා. මේක ජංජාලයක් වෙලා තියෙන්නේ. එක මොහොතකදී සම්පූර්ණ උත්සව නතර කරන බව කිවුවා. ඊට පස්සේ විවාහ මංගල උත්සවවලට බලපාන්නේ නැහැ කියලා හමුදාපතිවරයා කිවුවා. මේ නිසා බිම් මට්ටමේ පී.එච්.අයි මහත්වරු, එම්.ඕ.එච්. කාර්යාලවල ඉන්න වෛද්යවරු බැනුම් අහනවා. අඩු ගානේ මේ තුන්වැනි රැල්ලටවත් එක ප්රකාශකවරයෙක් පත්කර නැහැ.
අපිට එන්නත් ලැබුණේ ලක්ෂ දොළහයි. ලෝක සෞඛ්ය සංවිධානය යෝජනා කර තිබුණේ මරණ අඩු කරගන්න මුලින්ම සෞඛ්ය ක්ෂේත්රයට සම්බන්ධ අය සහ වැඩිහිටියන්ගෙන් පටන් ගන්න කියලා. නමුත් ලක්ෂ 12ක් එන්නත් ආවාට පස්සේ මුල් අදියරේදී ලක්ෂ 06කට ලබාදී ඉතිරි ලක්ෂ 06 දෙවැනි අදියරේදී දෙන්න සැලසුම් කර තිබුණා. නමුත් ජනාධිපතිවරයා ඒක ඇනුවා. එන්නත් ඕනෑ තරම් ලැබෙනවා කියලා. වයස අවුරුදු 30ට වැඩි අයටත් දුන්නා. කොළඹ නගරයේ එක පෝලිමක වයස අවු. 60ට වැඩි අයට දෙන අතර තවත් ග්රාම සේවක වසමක වයස අවු. 30ට වැඩි අයටත් දුන්නා. මේ රාජ්ය පාලනයද? ඊයේ පෙරේදා දෙවැනි මාත්රාව දෙන්න පටන්ගෙන තිබෙනවා. ඊට අවශ්ය ප්රමාණය තියෙනවාද කියලා අපි දන්නේ නැහැ. මුල් වටයේ දුන් වැඩිහිටයන්ගේ දෙවැනි මාත්රාව ලබාදිය යුතු කාලය ඉක්ම ගොස් තිබෙනවා. මගේ මවටත් එහෙමයි. නොමිලේ ලබාදුන් එන්නත් ටික හරියාකාරව කරන්න නොදී ආණ්ඩුවෙන් ඇනුවා.
අනික් පැත්තෙන් ආණ්ඩුව වානිජ අරමුණු වෙනුවෙන් රට ඉබාගාතේ ඇරියා. පළවැනි රැල්ල, දෙවැනි රැල්ල ඇතිවූ අවස්ථාවල හැඳින්වූයේ කොරෝනා පොකුරු කියලා. මාස 10ක් විතර තිස්සේ පෑලියගොඩ පොකුර කියලා ආණ්ඩුව හඳුන්වමින් තිබුණා. රටේ කොහෙන් හමුවුණත් ඒ හැඳින්වීම වැරැද්දක්. අඩු ගානේ මේ සම්බන්ධයෙන් හඳුන්වන්න තැනක් තිබුණා. ලෝකය පුරා කොරොනා පොකුරු කියන්නේ ඇයි? මේ සාහිත්යාර්ථයකින් නම් දැම්මා නෙවෙයි. නිශ්චිත ප්රදේශයක පවතින තත්වය ගැන නිවැරදි අදහසක් දෙන්න. නමුත් ගෝඨාභය රාජපක්ෂ මහත්තයාගේ වියත් මග ආණ්ඩුව දැන් “අවුරුදු පොකුර” කියලා දැම්මා. අවුරුදු පොකුර කොහෙද තියෙන්නේ? සෞඛ්ය නිලධාරීන්ට මෙහෙම පොකුරක් හොයන්න තියෙන්නේ කොහෙන්ද? මේ නාමකරණයේ තිබෙන මගපෙන්වීම මොකක්ද? දැන් ඊළඟට එන්නේ වෙසක් පොකුරද? ඉන්දියාවේ ඉන්නෙත් මේ ජාතියේම උද්දච්ඡ තකතීරු තීන්දු ගන්න පාලකයෝ. අති දැවැන්ත සම්පත් තියෙද්දී, අබ්දුල් කලාම්ලා වගේ ඉහළම විද්යාඥයෝ නායකත්වය දැරූ රටක අද ඔක්සිජන් නැතිව මිනිස්සු මැරෙනවා. එවැනි වූ ඉන්දියාව කුම්භ මේලා පොකුර කියලා නාමකරණයක් කළේ නැහැ. ධම්මික පැනිය වගේම තමයි ජනාධිපතිවරයා ඇතුළු මුළු ආණ්ඩුවේම කොවිඩ් පරිපාලනය. මුලු ආණ්ඩුවම ධම්මික පැණයක්.
අති විශිෂ්ඨ කාර්ය මණ්ඩලයක් ඉන්න, නොමිලයේ සෞඛ්ය පහසුකම් ලබාදෙන සැකිල්ල හරි තියෙන රටක, සාක්ෂරතාවය 95% පැනලා තියෙන රටක මොනවද මේ කරන්නේ? රට විද්යානුකූලව පරිපාලනය කරලා ගෙනියන්න තිබුණු තත්වය අවුල් කළේ මේ ආණ්ඩුව. මේ සෞඛ්ය ඇමතිතුමිය ධම්මික පැණිය බීලා, ආණ්ඩුවේ සහ පෞද්ගලික නාලිකා යොදාගෙන ජනතාව අතරට ප්රචාරයන් යැව්වා. බොරු දේශප්රේමී කතන්දර වපුරලා මුළු රටක් රාජ්ය අනුග්රහයෙන් මේ පිස්සුව පස්සේ එළෙව්වා. අද මොකද වෙලා තියෙන්නේ? මේවට ආණ්ඩුව සහ නාලිකා වගකියන්න ඕනෑ නැද්ද? ආණ්ඩුවම ධම්මික පැණිය වගේ තමයි. මේව සරල නැහැ. ව්යසනය පාලනය කරන්න ක්රම ලෝකය පුරා තියෙද්දී ඒවා නොකර ආණ්ඩුව සහමුලින්ම මේක අවුල් කළා.
ඒ වගේම කොරෝනා තත්වය හමුවේ ජනතාවට ලබාදිය යුතු අත්යාවශ්ය සහන තවම ලබාදෙන්නේ නැහැ. උදාහරණයක් හැටියට පාසැල් අධ්යාපනය වෙනුවෙන් සියලුම දරුවන්ගේ ඉගැන්වීම් රූපවාහිනියෙන් කරන්න කියලා අපි ඇතුලු බොහෝ දෙනක් පෙන්වා දුන්නා. දරුවන්ට නොමිලේ අන්තර්ජාල පහසුකම් ලබාදෙන්න කීවා. අවුරුද්දක් තිස්සේ පොඩි දරුවන්ගේ අධ්යාපනය සහමුලින් බිඳවැටිලා ඉවරයි. ඒ වගේම විදේශගත ශ්රී ලාංකිකයන් සම්බන්ධයෙන් අනුගමනය කරන ක්රියාමාර්ග, එයින් කරන ගසාකෑම් වගේ මාස 14කට පසු ආණ්ඩුව අනාගෙන තිබෙන කරුණු රැසක් තිබෙනවා. අඩියක් අඩියක් ගානේ, වචනයක් වචනයක් ගානේ අපි යමින් සිටින්නේ ඉන්දියාව ගිහින් තියෙන මාර්ගයේම තමයි. ඒ නිසා අපි බරපතල අනතුරු ඇඟවීම් සිදුකරනවා.
උද්දච්ඡකම්වලින් වසංගතයට මුහුණ දිය නොහැකි බව ආණ්ඩුව තේරුම් ගත යුතුයි – වෛද්ය නලින්ද ජයතිස්ස
අපට බලපා තිබෙන වසංගතයේ ගැඹුර පිළිබඳව සමාජයට අවබෝධයක් ඇතැයි අපි සිතනවා. කොරෝනා වසංගය මර්දනය කරගැනීමේ වාසිදායක සාධක තුනක් අපේ රටට තිබෙනවා. පළමුවැන්න ලංකාව දූපතක් වීම, දෙවැන්න බිම් මට්ටම දක්වා ක්රියාත්මක සෞඛ්ය යාන්ත්රණයක් තිබීම සහ තෙවැන්න උපදෙස්වලට අනුගත කරගැනීමේ හැකියාව ඇති ජනතාවක් සිටීමයි. නමුත් මේ වාසිදායක සාධක කිසිවක් අද කොවිඩ් පාලනයේදී යොදාගන්නා බව පේන්නේ නැහැ.
මෙය වෛරස්වලින් ව්යාප්ත වන රෝගී තත්වයක්. වෛරසයක් නිරතුරුව වෙනස් වෙනවා. එම නිසා වෛරස් නිට්ටාවටම සුව කළ හැකි ඖෂධ තවම ලෝකයේ සොයාගෙන නැහැ. මේවා අලුත් කරුණු නෙමෙයි, ලෝකයම දන්න විද්යාත්මක කරුණුයි. අපි වසංගතයට මුහුණ දිය යුතු වන්නේ මේ කරුණු දැනගෙනයි. සෞඛ්ය අමාත්යාංශයේ වසංගත රෝග ඒකකයක් තිබෙනවා. රටේ ඒ පිළිබඳ වෛද්යවරුන් සිටිනවා. ඒ වගේම ජයවර්ධනපුර වැනි විශ්වවිද්යාලවල වෛරස් හා වසංගත පර්යේෂණ ඒකක තිබෙනවා. අපේ රටේ වසංගත මර්දනය කිරීම වෙනුවෙන් කටයුතු කළ යුතු වන්නේ මේ සියලු දෙනා සම්බන්ධ කර ගනිමිනුයි. නමුක් දැන් සිදු නොවන දෙය වන්නේත් එයයි. මේ බ්රිතාන්ය වෛරස් ප්රභේදය මාස 04කට පමණ පෙර ලංකාවට ඇතුල් වී තිබෙනවා. පසුගිය අප්රේල් 08වැනිදා ජයවර්ධනපුර විශ්වවිද්යාලයේ පර්යේෂණ කණ්ඩායම මේ ප්රභේදය ව්යාප්ත වෙමින් ඇති බව රටට කියා තිබුණා. පීසීආර් මගින් මේ වෛරසය සොයා ගැනීමෙන් පසුව ඔවුන් එය ආණ්ඩුව ප්රමුඛ කාර්ය සාධක බලකායට, සෞඛ්ය අමාත්යාංශයට දැනුම් දුන්නා.
ඒත් මේ සම්බන්ධයෙන් ආණ්ඩුව ගත් තීන්දුව කුමක්ද? මේ නව ප්රභේදය වැඩිපුර පැතිරෙන බවත් වඩා මාරාන්තික බවත් තරුණ අයට පවා වැළඳෙන බවත් ලෝකය ඒ වන විටත් සොයා ගෙන තිබුණා. ඒ නිසා අපි ඉන්නේ මුල් යුගයේ මෙන් මේ පිළිබඳ තොරතුරු නොදන්නා කාලයක නෙමෙයි. ඒ තොරතුරු තිබියෙදී තීන්දු ගැනීමේ ගැටලුවක් ඇති බව පේනවා. කොවිඩ් වෛරසය ලංකාවට ඇතුල්වී මාස 14කට පස්සෙත් අපි ආණ්ඩුවෙන් ඉල්ලන්නේ වසංගත රෝග විශේෂඥයින් ප්රමුඛ සෞඛ්ය බලධාරීන් කණ්ඩායමකට මේ පිළිබඳ තීන්දු තීරණ ගැනීමේ වගකීම පවරා දෙන ලෙසයි.
වසංගත රෝග ඒකකය පවත්වා ගෙන යන්නේ ආණ්ඩුවට අවශ්ය දේවල් කියාගන්න සහ සාධාරණීකරණය කරගන්න නෙමෙයි. දෙවැනි රැල්ල ආ පසු ආණ්ඩුව එයට කිරිබත්ගොඩ/පෑලියගොඩ පොකුර ලෙස හැඳින්වූවා. රට පුරා කොහෙන් අහුවුණත් එම පොකුරට දැම්මා. ඒ වෙලාවෙ ආණ්ඩුවට වුවමනා වුණේ රෝගය සමාජ ගත වී නොමැති බව කීමටයි. තව පොකුරු රට පුරා හමුවන බව කිවුවානම් රෝගය සමාජගත වී ඇති බව පේනවා. ඒ අවස්ථාවට අනුව ගත හැකි පියවර තිබුණා. නමුත් ආණ්ඩුවට රෝගය සමාජගත වී නැතැයි රටට කියන්න අවශ්ය වුණා. සෞඛ්ය ඇමතිනිය ඇතුළු හමුවූ සියලු ආසාධිතයින් ආණ්ඩුව ඒ පොකුරට ඇතුළත් කළා. ආණ්ඩුවේ මතය තහවුරු කරගන්න සෞඛ්ය අංශ පාවිච්චි කරගත්තා.
අද වන විට සෞඛ්ය අමාත්යාංශයේ ඇමතිවරුන් හතරදෙනෙක් සිටිනවා. ඒ අය අතර වසංගත රෝග පිළිබඳව, ප්රජා සෞඛ්යය පිළිබඳව විශේෂඥ වෛද්යවරියක් ඉන්නවා. කොවිඩ් පිළිබඳ රාජ්ය ආමාත්යාංශය භාරව සිටින්නේ ඇයයි. කොවිඩ් වසංගතය පිළිබඳව තීන්දු ගන්නා අය අඩුම කරමින් සුදර්ශනී ප්රනාන්දුපුල්ලේ රාජ්ය ඇමතිතුමිය කියන දේවල්වලටවත් ඇහුම්කන් දෙන්නේ නැහැ. සෞඛ්ය අංශ විසින් සංචරණ සීමා පැනවිය යුතු බවට යෝජනා කළ විට ඒ යෝජනාව පරාජයට වී තිබෙනවා. සෞඛ්ය අංශවලින් කරන ලද යෝජනාව පරාජය වූ නිසා මම මහත් කණස්සල්ලෙන් සිටින බව ඇය එළියට පැමිණ මාධ්යයට කියනවා. එවැනි විශේෂඥයින්ගේ යෝජනාවක් විසි කර දමන්න තරම් හැකියාවක් ඇත්තේ කාටද? අපි හිතන්නේ ඒ හමුදාපතිවරයා නෙවෙයි; ඒ ඔහුටත් උඩින් ඉන්න ජනාධිපතිවරයා විය යුතුයි. ඔහුගේ සිතැඟියාවන් තමයි ක්රියාත්මක වන්නේ. ඔහු දන්නා හා නොදන්නා දේ තිබිය හැකියි. හැම දෙයක්ම තමන් දන්නවා යැයි සිතා කටයුතු කිරීමට ගියහොත් ඒ වරදින්නේ රටටයි. මේ ගන්නා තීන්දු වැරදීමෙන් ජනතාවගේ ජීවිත අහිමි වූ විට තවත් අවුරුදු තුනකින් හතරකින් ජනාධිපතිවරුන්ට. මැති ඇමතිවරුන්ට පාඩම් ඉගැන්වීමෙන් පලක් නැහැ. ඒ අහිමි වන ජීවිත අපිට ගන්න බැහැ. ඒ ජීවිත රැකගත හැක්කේ විද්යාත්මක පදනමක් මත ඒ මොහොතේ තීන්දු තීරණ ගැනීමෙන් පමණයි.
අපි මාස 14කට කලිනුත් ආණ්ඩුවට යෝජනා කළා, මේ වසංගතයට මුහුණ දීම සඳහා මේ වෙනුවෙන් කැපවිය හැකි, දැනුම තිබෙන, විශේෂඥභාවය ඇති සියලු දෙනා සම්බන්ධ කරගත් යාන්ත්රණයක් පිහිටුවන්න කියලා. නමුත් තවමත් ආණ්ඩුව එවැන්නකට සූදානම් නැහැ. අපි නැවතත් ආණ්ඩුවට යෝජනා කරන්නේ මේ වසංගතයට මුහුණ දීමේදී වසංගත රෝග විශේෂඥයින් ප්රමුඛ කර ගත් යාන්ත්රණයක් සකස් කරන්න කියලයි. ප්රකාශ නිකුක් විය යුත්තේ එතැනිනුයි.
බොහෝ විට තවමත් කෙරෙන්නේ අශ්වයා පලා ගිය විට ඉස්තාලය වසා දමනවා වැනි තීන්දු ගැනීම්. සංචරණ සීමා පැනවෙන්නේ රෝගීන් ගණනාවක් එම ප්රදේශයෙන් වාර්තා වූවාට පසුවයි. තත්වය මෙසේ වන්නේනම් අපට තවත් සෑහෙන කාලයක් පාසල්, විශ්වවිද්යාල විවෘත කිරීමට ලැබෙන එකක් නැහැ. මේ සමාජය සාමාන්යකරණය කරන්න හිතනවානම් ආණ්ඩුව විසින් කළ යුතු වන්නේ රෝගීන් විශාල ලෙස වාර්තා වීමට පෙර පියවර ගැනීමයි. රෝගය පැතිරීම පිළිබඳව සංඥා ලැබුණු විගසම සමහර ප්රදේශ වසා දැමීමට, සංචරණ සීමා පැනවීමට සිදු විය හැකියි. පසු ක්රියාමාර්ග ගැනීමෙන් එතරම් ප්රතිඵලයක් අත්වන්නේ නැහැ.
පීසීආර් පරීක්ෂණවලින් අපි යම් තොරතුරක් ලබාගන්නවානම් අවම තරමින් ඒවායේ ප්රතිඵල පැය 24ක් තුළ ලබා ගත යුතුයි. ඒ නිසා තමයි මේ රටේ ජනතාව පීසීආර් යන්ත්ර ප්රමාණය වැඩිකරන ලෙස ආණ්ඩුවෙන් ඉල්ලා සිටියේ. ඇතැම් තැනක පරිත්යාගශීලීන් එකතු වී රෝහල්වලට යන්ත්ර අරන් දුන්නා. ගම සමග පිළිසඳරේදී මීමුරේ ගම්වැසියෙක් ජනාධිපතිවරයාගෙන් තමන්ගේ රෝහලට යන්ත්රයක් ලබා දෙන ලෙස ඉල්ලුවා. ජනාධිපතිවරයා එතරම් කල්පනා නොකළ නිසා පීසීආර් යන්ත්ර අනවශ්ය බව කිවුවා. අද ඒවා නොමැතිකමේ ප්රතිඵල පේනවා. අදටත් පීසීආර් සිදුකෙරෙන්නේ 15,000-20,000 අතර ප්රමාණයක්. පැය 24ක් ඇතුළත මේවායේ ප්රතිඵල ගැනීමට හැකිනම් සෞඛ්ය බලධාරීන්ට රෝගයේ ව්යාප්තිය හා ප්රමාණය පිළිබඳව අදහසක් ජනතාවට කිව හැකියි. තවමත් ප්රමාණවත් තරම් පීසීආර් පරීක්ෂණ ප්රමාණය වැඩි වී නැහැ. එය වහාම කළ යුතුයි.
මේ වන විට සමහර රෝගවලට අවශ්ය ඖෂධ හිඟයක් ඇතිවී තිබෙනවා. කොවිඩ් රෝගය සමග එන සමහර ස්වශනාබාධ හා සංකූලතා සඳහා අවශ්ය ඖෂධ හිඟ වී තිබෙනවා. ඒවා සොගැනීමට ජනතාවට විශාල වෙහෙසක් දැරීමට සිදුව තිබෙනවා. කොවිඩ්වලට සම්බන්ධ නැති වෙනත් රෝගවලට අදාළ ඖෂධ හිඟයක්ද තිබෙනවා. සංචරණය සීමා කරන්නැයි සෞඛ්ය අමාත්යාංශය කිවුවත් රෝගීන්ට ඖෂධ සොයමින් සංචාරය කිරීමට සිදුව තිබෙනවා. මෙය ඔවුන් කොවිඩ් අවදානමට ලක්වීමට හා එම රෝගවලින් සංකූලතා ඇතිවීමට අවසානයේ මරණය පත්වීමට හේතුවනවා. මේ පිළිබඳව ආණ්ඩුවේ අවධානය වහාම යොමු විය යුතුයි.එන්නත් සම්බන්ධ ප්රශ්නය බරපතළ වී තිබෙනවා. එන්නත් නිෂ්පාදනයේ ගැටලුව, එන්නත් නිෂ්පාදනයේදී මේ අමනෝඥ ආණ්ඩු විසින් කළ හැකි ව්යාකූලත්වය හඳුනාගත් නිසාම ලෝක සෞඛ්ය සංවිධානය ඒවා බෙදාහැරීම සඳහා නිශ්චිත ක්රමවේදයක් යෝජනා කළා. පළමුවෙන්ම ඒවා සෞඛ්ය සේවකයන්ට ලබා දෙන ලෙස ඉල්ලුවා. ඊළඟ කොටස 60ට වැඩි අයටත් ඊළඟ කොටස නිදන්ගත රෝග තිබෙන අයටත් දෙන ලෙස ඉල්ලුවා. මේක එන්නත පිළිබඳ පර්යේෂණ කරන කාලෙදිම කියපු දෙයක්. නමුත් ආණ්ඩුව එන්නත් ලක්ෂ 12ක් හමුවූ විට හැමෝටම එය විදින්න උත්සාහ කළා. අද දෙවැනි මාත්රාව දිය යුතු කාලය තීරණය කරන්නේ ආණ්ඩුවට ඒ එන්නත් ලබා ගැනීමට හැකියාව තිබෙන්නේ කවදාද කියන එක අනුවයි. විශේෂඥයින්ගේ තීරණය අනුව නොවෙයි. මුලින් කිවුවේ සති 03කින් දිය යුතු බවයි. අද සති 12ක් වී තිබියෙදීත් පළමු මාත්රාව ගත් අයට දෙවැනි මාත්රාව ලැබී නැහැ. අද ආණ්ඩුව පළමු මාත්රාව ඇස්ට්රාසෙනිකා ගහලා දෙවැනි එක වෙනත් එකක් ගැහුවාට කමක් නැහැ කියන තැනට ඇවිත් ඉන්නවා. ආණ්ඩුව ජනතාවට ප්රමාණවත් තරම් එන්නත් ලබා දීමට කඩිනමින් මැදිහත් විය යුතුව තිබෙනවා.
ඔක්සිජන් සැපයීම පිළිබඳව බරපතළ ප්රශ්නයක් ඇතිවී තිබෙනවා. ඔක්සිජන් පිළිබඳ ගැටලුව වන්නේ ඒවා ප්රවාහනය හා ගබඩා කිරීම පිළිබඳ ගැටලුවයි. නව බි්රතාන්ය ප්රභේදය වැනි නිව්මෝනියා තත්වයට වේගයෙන් පරිවර්තනය වන රෝගී තත්වයකදී අපට අවශ්ය ඔක්සිජන් ප්රමාණය හා ලබා දිය හැකි ආකාරය පිළිබඳව ආණ්ඩුවට තක්සේරුවක් තිබිය යුතුයි. සමහරු මේ සිලින්ඩර් ගබඩා කර තබාගැනීමටත් උත්සාහ කරන බවට වාර්තා වනවා. මේ නිසා මේ ගැටලුව බරපතළ ලෙස සලකන මෙන් අපි ආණ්ඩුවට කියනවා.
ලංකාවේ අයිසීයූ ඇඳාන් නිෂ්පාදනය කරන බවට ආණ්ඩුව දේශපාලන සංදර්ශන කළා. කර්මාන්ත ඇමතිවරයා ඇඳන් නිරීක්ෂණය කරන ආකාරය අපිට පෙන්නුවා. ඒ ඇඳන් කොහෙද? එහෙමනම් රෝගීන් ඇඳන් නැතුව මිය යන්නේ ඇයි? කොවිඩ් ආසාධියන් රෝහල් ගත කිරීමේ හා මධ්යස්ථානයන්ට යොමු කිරීම ව්යාකූල වී තිබෙනවා. කොළඹින් පොසිටිව් වන රෝගීන් මඩකලපුවට, පොළොන්නරුවට යවනවා. රෝගීන් රට පුරා නොයවා ඔවුන්ට ළඟ තැනක පහසුකම් ලබා දිය යුතුව තිබෙනවා. සංකූලතා සහිත රෝගීන් රෝහල්වලට ඇතුළත් කිරීමේ ක්රමවේදයක් සකස් කළ යුතුයි.වසංගත රෝග විශේෂඥයින් ඇතුළු සෞඛ්ය ක්ෂේත්රයේ මීට සම්බන්ධ සියලු දෙනා විසින් සකස් කරන සැලැස්මකට අනුව තීන්දු තීරණ ගැනීමට රෝගීන් පිළිබඳ දත්ත සහිත පිරිස, විශේෂඥ දැනුම සහිත පිරිස, ක්රියාත්මක වීමේ හැකියාව සහිත පිරිස සම්බන්ධ කර ගත් පුළුල් වැඩපිළිවෙළක් දැන්වත් සකස් කිරීමට පියවර ගන්නා ලෙස අපි ආණ්ඩුවෙන් දැඩිව ඉල්ලා සිටිනවා. උද්දච්ඡකම්වලට, අපරිණතකම්වලට ප්රශ්න විසඳිය නොහැකි බව ආණ්ඩුව තේරුම් ගත යුතුයි.
මාධ්යවේදීන් නැගූ ප්රශ්නවලට පිළිතුරු ලබා දෙමින්…
ඊයේ(02) හවස ඉඳලම හොයල බලපු තොරතුරු අනුව ප්රදේශ වහන එක සහ අරින එක කිසිම විද්යාත්මක පදනමකට සිදු නොකරන බව පැහැදිලි වෙනවා. ග්රාම සේවා වසම් විවෘත කළත් ආසන්න නිවාස ගණනාවක් නිරෝධායනයකට ලක්කර තිබෙන බව හෙළිවී තිබෙනවා. මම එක දෙයක් පැහැදිලි කරන්න ඕනෑ. ලංකාවේ විශේෂඥ වෛද්යවරුන්ගේ සංවිධානය දීර්ඝ නිවේදනයක් නිකුත්කර තිබෙනවා. එය ඔක්සිජන් සම්බන්ධ ප්රශ්නය මුල් කරගෙන නිකුත් කරලා තිබෙන්නේ. ඒ අතරේ පැහැදිලිවම කියන්නේ මෙයට මුහුණ දීමට නිසි සැලැස්මක් නැහැ කියන එක. අනික් පැත්තෙන් ලංකාව හමුවේ තිබෙන ප්රධානම ප්රශ්නය ඔක්සිජන් නොවන බවත් කියනවා. සෞඛ්ය අංශවලට විතරක් දවසකට ටොන් 25ක් අවශ්යයයි. නමුත් ලංකාවේ තිබෙන ඔක්සිජන් නිෂ්පාදන සමාගම් දෙකෙන් දවසකට ටොන් 100ක් නිෂ්පාදනය කරනවා. කොම්පැනියේ ඔක්සිජන් හැදුවාට ලෙඩාට යන්නැත්නම් වැඩක් නැහැ. මේ වෙනුවෙන් නිලධාරීන් අවශ්යයි. ඉන්දියාවේ විශාලා මහනුවර පෙනි පෙනීත් අපේ රටේ තාමත් සැලැස්මක් නැහැ කියලා විශේෂඥ වෛද්යවරුන්ගේ සංවිධානය පෙන්වා දෙනවා. දේශපාලන මැදිහත්වීම් තුළ ඇතිවී තිබෙන්නේ මේ වගේ තත්වයක්.
ආණ්ඩුව සහමුලින්ම ජනතාව බිලිදී තිබෙනවා කියන එක කියන්න වෙන්නේ. සමහර රෝගීන් ගෙනියන්න එන්නේ නැහැ. ආශ්රිතයන් පී.සී.ආර්. කිරීමේ ක්රමවේදයක් නැහැ. කරන පී.සී.ආර්.වල ප්රතිඵල එන්න සමහර තැන්වල සතියකට වඩා යනවා. ලංකාවේ ඉතාම ධන කුවේරයින් පිරිසක් මොන තත්වයක් යටතේවත් ඔවුන්ගේ ව්යාපාරවලට බලපෑම් නොවෙන්න දැඩි බලපෑම් කර තිබෙනවා. ඉන්දියාවේ ඒ වැනි අයගේ ව්යාපාර පවත්වාගෙන යන අතරේත් ඒ ව්යාපාරිකයෝ පැනලා යනවා. ඒක විශේෂයක්. එංගලන්තයට, මැඩගස්කරයට, සමහර විට ලංකාවට පවා ආව ධන කුවේරයන් ගැන විස්තර තියෙනවා. ඩොලර් 20,000 ගෙවලා රටෙන් පැනලා ගිහිල්ලා ඉන්දියාවේ තියෙන පැක්ටරි වහලා නැහැ. ලංකාවේ පැක්ටරිවල එක ලයින් එකක එක් අයෙකුට කොවිඩ් වැළඳුනොත් එයාව අයින් කරලා ලයින් එක වැඩ කරනවා. බෝඩිංවල සීයක් වගේ ඉන්න තැන්වල වැළඳුනොත් ඒ අය අයින් කරලා අනික් අයව තියාගෙන වැඩ කරනවා. මෙයින් පැහැදිලි වෙන්නේ ආණ්ඩුව, ජනතාව බිලි දීලා තියෙන බව. මේ මාධ්ය හමුව පවත්වා ආණ්ඩුව මේ කරන අනතුරුදායක සෙල්ලම පිළිබඳව නැවතත් කරුණු ඉදිරිපත් කර ජනතාවට පැහිදිලි කරන්න අපි තීරණය කළා. ජනාධිපතිවරයා මීමුරයට ගිහිල්ලා කිව්වේ පී.සී.ආර්. වැඩක් නැහැ කියලා. අද අපිට එන්නත් ලක්ෂ 50ක් හම්බ වුණත් මේව දෙන්නම කොච්චර කාලයක් යනවාද? තව අවුරුද්දක් යනකං පී.සී.ආර්. පරීක්ෂණවල වැදගත්කම කවුරුත් කියනවා. ජනාධිපතිවරයා ඔලුව ඉදිමුවාගෙන පී.සී.ආර්. පරීක්ෂණ වැඩක් නැහැ කියනවා. එවැනි උද්දච්ඡ පුද්ගලයෝ තමයි තීන්දු-තීරණ ගන්නේ.
-
ප්රවීන්ගේ වාර්තාගත පන්දු යැවීම ශ්රී ලංකාව ගොඩදමයි: ශ්රී ලංකාවට ලකුණු 209ක ජයක්
මංගල ටෙස්ට් තරගයේදීම කඩුලු 10 ක් දවා ගත් පළමු ශ්රී ලාංකික පන්දු යවන්නා බවට වුණු ප්රවීන් ජයවික්රම සහ රමේෂ් මෙන්ඩිස්ගේ දක්ෂ පන්දු යැවීම හමුවේ බංග්ලාදේශ පිලට එරෙහිව පල්ලකැලේ ජාත්යන්තර පිටියේ පැවැති දෙවැනි ටෙස්ට් තරගයෙන් ලකුණු 209 ක විශිෂ්ඨ ජයක් අත්කර ගැනීමට ශ්රී ලංකා කණ්ඩායම සමත්විය. එම ජයග්රහණයත් සමග තරග 2 කින් සමන්විත දෙරට අතර ටෙස්ට් තරගාවලිය 1-0 ක් ලෙස ශ්රී ලංකාව ජයගත්තේය.
සිව්වැනි දිනය අවසානයේදී කඩුලු 2 ක් දවාගෙන සිටි ජයවික්රම අද දිනයේදී තවත් පිතිකරුවන් තිදෙනෙකු දවා ගනිමින් සමස්ථ තරගයේදී ලකුණු 178 කට කඩුලු 11 ක් දවා ගත්තේය. එම දක්ෂතාවය 2008 වසරෙන් පසු ටෙස්ට් භෞතීස්මයකදී ලොව පන්දු යවන්නකු කඩුලු 10 ක් දවා ගන්නා ලද පළමු අවස්ථාව ලෙසින්ද සටහන් විය. අවසන් වරට එම දක්ෂතාවය දක්වා ඇත්තේ ඔෂ්ට්රේලියානු ක්රීඩක ජේසන් ක්රෙජ්සා විසිනි.
පස්වැනි දින ශ්රී ලංකා ජයග්රහණය හෝරාවක් පමණ ප්රමාද කරනු ලැබුවේ මෙහෙදි හසන්ගේ පිතිහරඹයයි. කෙසේ වෙතත් ලකුණු 177 ක් තුළ කඩුලු 5 ක් දැවී තිබියදී පස්වැනි දිනය ඇරැඹූ බංග්ලාදේශ කණ්ඩායමට තරගය ක්රියාත්මක හෝරාවක පමණ කාලයේදී රැස් කර ගැනීමට හැකියාව ලැබුණේ ලකුණු 50 ක් පමණි.
දිනයේ දැවී ගිය පළමු පිතිකරුවා වූයේ ලිටන් දාස් වන අතර හේ ප්රවීන්ගේ පන්දුවක් හමුවේ කඩුල්ල මුවා කිරීමේ වරදකට හසුව දැවී ගියේය. එම දැවී යෑමත් සමඟ පිටියට පිවිසි තයිජුල් ඉස්ලාම්, මෙහෙදි හසන් සමග එක්ව ප්රවීන් සහ රමේෂ්ගේ පන්දු හමුවේ ප්රවේසම්ව පන්දුවට පහර දුන්හ. ඒ අනුව පන්දු යැවීමේ වෙනසක් කිරීමට කාලය පැමිණ තිබෙන බව වටහා ගත් නායක කරුණාරත්න තමන් සතු අනෙක් දඟ පන්දු යවන්නා වුණු ධනංජය ද සිල්වා පිළිබඳව විශ්වාසය තැබීය. තම නායකයා බලාපොරොත්තු වූ අයුරින්ම වගකීම ඉෂ්ඨ කල ධනංජය තයිජුල් ඉස්ලාම්ගේ කඩුල්ල දවා ගත්තේය.
ලකුණු 39 ක් ලබා සිටි අවස්ථාවේදී ජයවික්රම විසින් එවන ලද පන්දුවකට එල්ල කරන ලද ස්වීප් පහර ෂෝට් ලෙග් ස්ථානයේ පන්දු රැකි පැතුම් නිස්සංක විසින් දක්ෂ ලෙස රැකගැනීම නිසා මෙහෙදි හසන් තම කඩුල්ල අහිමි කර ගත්තේය. පන්දුව තමන් වෙතට පැමිණීමට පෙර පන්දුව වෙත යනු දුටු පැතුම් වහා දකුණත් පෙදෙසට දිව ගියේ විදුලි වේගයෙන් පැමිණෙන පන්දුව නවතාළීමටය. මෙහෙදිගේ අවසනාවට එය උඩ පන්දුවක් ලෙස පැතුම්ගේ දෑත් අතර සිර විය.
අනතුරුව පිටියට පිවිස් අබූ ජායෙඩ්ට කඩුල්ල ආරක්ෂා කර ගැනීමට හැකි වූයේ පන්දු 2 ක් පමණි. ජයවික්රමගේ පස්වැනි කඩුල්ල ලෙසින් අබූ ජායෙඩ් කඩුල්ල මුවා කිරීමේ වරදට හසුව දැවී යෑමත් සමඟ ශ්රී ලංකා කණ්ඩායම ඉදිරියෙන් ලකුණු 209 ක ජයග්රහණයක් සටහන් විය. පළමු ඉනිමේදී ලකුණු 92 කට කඩුලු 6 ක් දවා ගත් ප්රවීන් දෙවැනි ඉනිමේදී ලකුණු 86 කට කඩුලු 5 ක් දවා ගනිමින් මංගල ටෙස්ට් තරගයේදීම තරගයේ වීරයා සම්මානයෙන් පිදුම් ලබමින් ටෙස්ට් ආගමනයට අමරණීය මතකයක් එක් කරගත්තේය. ඔහුට අනගි සහයෝගයක් ලබා දුන් රමේෂ් මෙන්ඩිස් ලකුණු 103 කට කඩුලු 4 ක් දවා ගත්තේය.
තරගාවලියේ වීරයා ලෙසින් පළමු ටෙස්ට් තරගයේදී ද්විත්ව ශතකයක්ද (244) දෙවැනි ටෙස්ට් තරගයේදී ශතකයක් (118) සහ අර්ධ ශතකයක් (66) රැස් කරමින් සමස්ථ තරගාවලියේදී ලකුණු 428 ක් ලබා ගත් දිමුත් කරුණාරත්න සම්මාන දිනා ගත්තේය.
බංග්ලාදේශයට එරෙහිව පැවැති ටෙස්ට් තරග 2 දී ඉනිම 3 කදී ලකුණු 428 ක් රැස් කරමින් තරගාවලියේ වීරයා සම්මානයෙන් පිදුම් ලද දිමුත් කරුණාරත්න 
Text by – sl cricet -
පිටසක්වලට පාර කියන ‘රහස් දොරටුව’ අනුරාධපුර රන්මසු උයනේ !
ලෝ ප්රකට බී.බී.සී වෙඩ් අඩවියේ වඩාත් ජනප්රිය අංශයක් වන ‘සාංචාරක“ විශේෂාංගය යටතේ අද (03) ලංකාවට අතිෂය වැදගත් විශේෂාංගයක් පළ කර තිබෙනවා. The Unsolved mystery of Sri Lankan’s Stargate’ එම ලිපියෙන් ජාත්යන්තර සංචාරකයින්ගේ අවධානය යොමු කරන්නේ අනුරාධපුරයේ රන්මසු උයනේ පිහිටි අපූරු සිතියම වෙතයි. මේ කතාව ඔබ හොදින් දන්නා කතාවක් වුණත් ඒ ගැන ඔබ තවත් නොදැන සිටි කතා කිහිපයක් දැන් දැන ගන්න පුළුවන්.
ශ්රී ලංකාවේ පූජනීය නගරය වන අනුරාධපුර යනු යුනෙස්කෝ ලෝක උරුම අඩවියකි. දිවයිනේ ප්රථම වරට පිහිටුවන ලද රාජධානිය (ක්රි.පූ. 377 දී) වන අතර එය ශ්රී ලංකාවේ බෞද්ධ සංස්කෘතියේ හදවතෙහි පිහිටා ඇත. අද වන විට එය දේශීය සංචාරකයින් සහ ශ්රී ලංකාවට පැමිණෙන විදේශ සංචාරකයින් වැඩිපුරම සංචාරය කරන ස්ථානයක් වන අතර එහි පුරාණ බෞද්ධ විහාරස්ථාන සහ යෝධ ගෝලාකාර හැඩැති ස්තූප වෙත ඔවුන් දැඩිව ආකර්ෂණය වේ.
නමුත් මෙම ශුද්ධ නගරය ඊටත් වඩා කුතුහලයෙන් පිරි දෙයක් ඇත. අක්කර 40 ක පුරාණ නාගරික උද්යානයක් වන රන්මසු උයන (Golden Fish Park) බෞද්ධ විහාරස්ථාන තුනකින් වටවී ඇති අතර එහි විශ්වයේ රහස් හෙළි කිරීමට සිතියමක් නැතහොත් ප්රස්ථාරයක් ඇතැයි කියනු ලැබේ.
විෂ්කම්භය මීටර් 1.8 ක් පමණ වන ‘සක්වල චක්රය‘ (සිංහල භාෂාවෙන් “විශ්ව චක්රය” ලෙස පරිවර්තනය වේ) ආරක්ෂිත උද්යාන නටබුන් අතර නොගැඹුරු ගල් මුහුණක් මත නොගැඹුරු ලෙස කැටයම් කර ඇත. එහි ඉදිරිපස මුහුණත දැකිය හැක්කේ බිම් මට්ටමේ සිට පමණි. ඇත්ත වශයෙන්ම, ආසන හතරක් සමතලා පාෂාණ මතුපිටට කැටයම් කර ඇති අතර එමඟින් පරිපූර්ණ නැරඹුම් ස්ථානයක් ලබා දේ. අද්භූත සම්භවයක් ඇති සිතියම සහ ආසන දෙකම ඉතිහාසඥයින්, පුරාවිද්යාඥයින් සහ ශාස්ත්රඥයින් සියවසකට වැඩි කාලයක් තිස්සේ ව්යාකූල කර තිබේ.
එහි පැවැත්ම, ක්රියාකාරිත්වය හෝ ඊට සම්බන්ධ කිසිවක් කිසිදු ඓතිහාසික වාර්තාවක සඳහන් නොවේ
“රන්මසු උයනෙ ඉතිහාසයේ දීර්ඝ කාලයක් තිස්සේ භාවිතා කරන ලදී” යැයි ශ්රී ලංකාවේ කැළණිය විශ්ව විද්යාලයේ පුරාවිද්යාව පිළිබඳ ජ්යෙෂ්ඨ මහාචාර්ය රාජ් සෝමදේව මහතා පැවසීය. “දෙවන ප්රධාන සංවර්ධන අවධිය ක්රි.ව. 7 වන සියවසේදී ආරම්භ වී ඇති බව පෙනෙනවා. එම කාලය තුළ කලින් උද්යාන පිරිසැලසුමට නව ගොඩනැගිලි කිහිපයක් එකතු කර තිබෙනවා. එහි තිබෙන සිතියම නැතිනම් ප්රස්ථාරය මෙම කාල පරිච්ඡේදයේ කාර්යයක් විය හැකි නමුත් එහි පැවැත්ම නිසා එය දැනගත නොහැකියි. මහා වංශය ඇතුළු ඓතිහාසික වාර්තාවල කිසිදු කාර්යයක් හෝ ඊට සම්බන්ධ කිසිවක් සඳහන් වන්නේ නැහැ‘
ප්රස්ථාරය සහ එහි අරමුණ ගැන එතරම් දැනුමක් නොතිබුණද, නිරූපණ ශිල්පය අනුරාධපුර යුගයේ (ක්රි.ව. 3 සිට 10 වන සියවස) අනෙකුත් කැටයම් සමඟ නොගැලපේ. ප්රස්ථාරයේ කේන්ද්රය සමාන්තර සිරස් සහ තිරස් රේඛා වලින් බෙදී ඇති කේන්ද්රීය කව හතකින් සෑදී ඇත. සෘජුකෝණාස්රාකාර මැදිරි කුඩා, හරස් කවයන් අඩංගු වේ. නුපුහුණු ඇසට කුඩ හෝ දුන්න සහ ඊතල, සරුංගලයක්, රැලි සහිත රේඛා සහ සිලින්ඩරාකාර හැඩයන් සමාන රූප ඇත. පිටත වළල්ලකින් මාළු, කැස්බෑවන්, මුහුදු අශ්වයන් වැනි සාගර සතුන් නිරූපණය කෙරේ.
බෞද්ධ ප්රතිමූර්තියට සමාන ලියවැල්, හංසයන් සහ නෙළුම් මලක් නිරූපණය කරන සඳකඩ පහණ වැනි වෙනත් කැටයම් සමඟ සසඳන විට, ප්රස්ථාරය ආගමික සන්දර්භයකින් තොර වන අතර එය මෙහි ඇත්තේ මන්ද යන්න පිළිබඳ පැහැදිලි කිරීමකින් තොරව තබයි.
මෙම ප්රස්ථාරය ශ්රී ලංකාවේ එතරම් අවධානයක් දිනා ගත්තේ නැත. රජවරුන් විසින් භාවිතා කරන ලදැයි විශ්වාස කෙරෙන ද්විත්ව පොකුණු හා නාන මණ්ඩප වලින් පිරී ඇති එහි සුන්දර සහ අභිමානවත් වටපිටාවට සාපේක්ෂව කැපී පෙනේ. ඇත්ත වශයෙන්ම, පිටසක්වල ජීවීන් පෘථිවියට පැමිණියේ නම්, ඔවුන්ට එය හැර වඩාත් හොඳ ස්ථානයක් තෝරා ගැනීමට නොහැකි වනු ඇත. ඝන, නිවර්තන වනාන්තරවලින් වැසී ඇති මෙම පූජනීය භූමිය බොහෝ දුරට බලධාරීන් විසින් ආරක්ෂා කර ඇත.
ප්රස්ථාරයේ පුරාවිද්යාත්මක වැදගත්කම සටහන් කළ පළමු ශාස්ත්රඥා වූයේ එච්.සී.පී බෙල්ය. ලංකාවේ පළමු පුරාවිද්යා කොමසාරිස් ලෙස පත් කරන ලද බ්රිතාන්ය සිවිල් සේවකයෙකු වන එච්.සී.පී. බෙල් විසින් 1911 දී ලංකාවේ ආණ්ඩුකාරවරයා සඳහා කරන ලද වාර්තාවේ මෙම ප්රස්තාරය පිළිබද සටහනක් ඇතුළත් කර ඇති අතර, එහිදී ඔහු නිගමනය කළේ, “මෙය ඇතැම් විට පැඑණිතම, පුරාණ ලෝක සිතියම විය හැකියි. එය දුටු විට ඉතා අසාමාන්ය උනන්දුවක් ඇති වේ‘‘
ප්රස්ථාරය නූතන අර්ථයෙන් සිතියමකට සමාන නොවන අතර, එය “විශ්වය පිළිබද බෞද්ධ සංකල්පය විදහා දක්වන පැරණි-කාලීන විශ්වීය සටහනක්” නිරූපණය කරන බව බෙල් ලිවීය. ඔහු දිවයිනේ බුද්ධාගම පිළිබඳ දැනුම මත පදනම්ව, පෘථිවිය, මුහුද, අභ්යවකාශය සහ විශ්වය යන අර්ථය ඇතිව, ප්රස්ථාරයේ ඇති කව, සංකේත සහ සාගර ජීවීන් අර්ථ නිරූපණය කළේය.
ප්රස්ථාරය වටා වසර ගණනාවක් තිස්සේ පැවති සාකච්ඡා ප්රධාන වශයෙන් අධ්යයන කවයන් තුළ පමණක් සීමා වී ඇති අතර එහි ඓතිහාසික වැදගත්කම නිසා, පසුගිය වසර කිහිපය තුළ සමාජ මාධ්යවල ඡායාරූප හුවමාරුව පුපුරා යාම අභිරහස පිළිබඳ ගෝලීය අවධානයක් යොමු කර තිබේ. සංචාරකයින් අනුරාධපුරයේ ප්රස්ථාරය සහ වෙනත් රටවල සමාන ස්ථාන අතර සමාන්තරයන් ගැන සඳහන් කර ඇති අතර සමහරුන් විශ්වාස කරන්නේ ඒවා තරු ලකුණු ලෙසයි. (පුරාණ දොරටු හරහා මිනිසුන්ට විශ්වයට ඇතුළු විය හැකි බවයි) ඔවුන්ගේ න්යායට අනුව, ද්වාරය අගුළු ඇරීම සඳහා රහස් කේතය ප්රස්ථාරයේ ඇත.
මෙම විවාදයේදී ඇතැමුන් සදහන් කළේ අනුරාධපුරයේ තරු දොරටුවට ඊජිප්තුවේ අබු ගුරාබ් සහ පේරු හි ලා පුවර්ටා ඩි හයු මාකා යන ස්ථානවල සමාන හැඩයන් සහ සංකේත ඇති බවයි. වඩාත්ම කැපී පෙනෙන සමානකම නම්, ශ්රී ලංකාවේ තරු දොරටුව වටා සමපේක්ෂෙණය උපරිම මට්ටමට ළඟා වීම නිසා එය ජලයට ආසන්න වීමයි. ක්රි.පූ 300 දී ඉදිකරන ලද අසල පිහිටි තිසා වැව ජලාශය තීරණාත්මක සාක්ෂි ලෙස එක් කර ඇත. අබු ගුරාබ් සහ ලා පුවර්ටා ඩි හයු මාකා යන දෙකම ජලයට ආසන්නව ඉදිකර ඇති බැවින්, ස්ටාර්ගේට් න්යායට අනුව, භූමිෂ්ඨ ජීවීන්ට සැකසීමට ඉඩ දී ඇත.
මෙම වෙනත් ලෝක න්යායට තව දුරටත් ඉන්ධන සපයනු ලැබුවේ ප්රස්ථාරයේ අසල පිහිටි පූජනීය නගරයක් වන පොලොන්නරුවේ පිහිටි ‘පිටසක්වල කන්ද‘ ලෙස හැඳින්වෙන දානිගල කන්දට ආසන්න වීමෙනි . වනාන්තරයේ ගැඹුරින් පිහිටා ඇති සහ කඳු නගින්නන් අතර ජනප්රිය වන දානිගලට අද්විතීය රවුම් හැඩයක් සහ සම්පූර්ණයෙන්ම පැතලි මුදුනක් ඇත. මෙමඟින් අන්තර්ජාල විවාදකරුවන් නිගමනය කළේ එය වරෙක ‘පිටසක්වල යානා – UFO ගොඩබෑම සඳහා භාවිතා කළ යුතු බවයි. පුදුමයට කරුණක් නම්, දේශීය සංචාරක මාර්ගෝපදේශකයෙකු වන ශ්රී අබේවික්රම පවසන පරිදි, “පිටසක්වල කන්ද වෙනත් ඕනෑම තැනකට වඩා ගිගුරුම් සහ අකුණු සැර ආකර්ෂණය කර ගන්නා බව ප්රදේශයේ ගම්වාසීන් විශ්වාස කරති.”
කෙසේ වෙතත්, මහාචාර්ය රාජ් සේමාදේව පවසන පරිදි, “එය තරු දොරටුවක් යැයි යෝජනා කිරීමට පුරාවිද්යාත්මක සාක්ෂි අල්පයි.” ඒ වෙනුවට, සෝමදේව විශ්වාස කරන්නේ එය ලෝකයේ මුල් සිතියමක් බවයි.
මහාචාර්ය රාජ් සෝමදේව පවසන පරිදි, “අවම වශයෙන් ක්රි.පූ. 250 සිට ශ්රී ලාංකිකයන්ට අහසේ හා අභ්යවකාශයේ ඇති වස්තූන් පිළිබඳ පැහැදිලි අදහසක් තිබුණා. ශ්රී ලංකාවේ දකුණු වෙරළ තීරයේ ආගමික හා ඓතිහාසික භූමියක් වන කිරින්දේ එක් සෙල්ලිපියක ‘අසීමිත විශ්වය’ යන අර්ථය ඇති ‘ අපරිමිටා ලොකා දතුයා ‘ යන වාක්ය ඛණ්ඩය අඩංගු වෙනවා. එය ඇඟවුම් කරන්නේ එය කැටයම් කළ පුද්ගලයාට ඉතා හොඳ බවයි. ඔවුන් ජීවත් වූ විශ්වයේ ස්වභාවය පිළිබඳ අවබෝධයක් ඇතිවයි‘
කෙසේ වෙතත්, ශ්රී ලංකාවේ මොරටුව විශ්ව විද්යාලයේ භූ දර්ශන නිර්මාණ පිළිබඳ ජ්යෙෂ්ඨ කථිකාචාර්ය ෂෙරීන් අල්මේන්ද්ර වඩා ඉදිරි දර්ශනයක් ඉදිරිපත් කරයි. “මම හිතන්නේ සක්වල චක්රය ප්රස්ථාරය එකල ඉදිකරන ලද දැවැන්ත ස්ථූපවලට සමාන සංකීර්ණ ව්යාපෘතියක් සඳහා වූ සැලැස්මක් බවයි” යැයි ඇය පැවසුවාය. “මම ඒ දෙසට නැඹුරු වන්නේ සිගිරියේ සැලසුමක් වශයෙනුයි”
සිගිරිය යනු ශ්රී ලංකාවේ වඩාත් පිළිගත් පුරාණ සලකුණු වලින් එකක් වන අතර ක්රි.පූ 5 වන සියවසේ පාෂාණ බලකොටුවක් වන අතර එය ගලා බසින ජලය, භූ දර්ශන උද්යාන සහ විවිධ වාසස්ථාන වලින් සමන්විතය.
“ප්රස්ථාරය ඉදිරිපිට කැටයම් කර ඇති ආසන තුන එකිනෙකට මඳක් මුහුණට පෙනෙන බැවින්, එය සාකච්ඡාවට සුදුසු ස්ථානයක් යැයි මට සිතෙනවා. ඔබ කැමති නම් පුරාණ ගෘහ නිර්මාණ ශිල්පී කාර්යාලයක් යැයි කිව හැකියි,” ඇය පැවසුවාය. “ආසන ඉදිකර ඇත්තේ භාවනා කිරීම වැනි ආගමික කටයුත්තක් සඳහා නම්, ඒවා සරල රේඛාවක පිහිටිය යුතුයි.”
රාජ් සෝමදේව පවසන පරිදි, ප්රස්ථාරයේ ක්රියාකාරිත්වය හඳුනා ගැනීමේ ලොකුම අභියෝගය වී ඇත්තේ එය නිවැරදිව සොයා ගැනීමට සාක්ෂි නොමැතිකමයි. රන්මසු උයන සහ අනුරාධපුරයේ වෙනත් උද්යාන හා ස්ථූපයන් ක්රි.පූ. 250 තරම් ඈත අතීතයේ සිට පැවත එන වංශකථා හා සෙල්ලිපිවල සඳහන් වුවද, සක්වල චක්රය කිසිදු ඓතිහාසික වාර්තාවක විස්තර කර නැත. “මෙම රූප සටහන සඳහා අනිවාර්යයෙන්ම ප්රායෝගික භාවිතයක් තිබෙන්නට ඇති. නමුත් අපට එය නිවැරදිව සොයා ගැනීමට නොහැකි වූ විට එය කුමක් විය හැකිදැයි සොයා බැලීම විශාල අභියෝගයක්” ඔහු පැවසීය.
එබැවින් ශ්රී ලංකාවේ ප්රකට යැයි කියනු ලබන තරු දොරටුව අභිරහසක්ව පවතින බව පෙනේ, එහි අරමුණ හා අර්ථය තවමත් කාලයත් සමඟ නැති වී තිබේ. කෙසේ වෙතත්, ප්රස්ථාරයේ විද්යා-ලෝලීන් අතර අලුතින් අත්පත් කරගත් සංස්කෘතික තත්ත්වය කෙසේ වෙතත් අවසානයේ එය මහජන අවධානයට ලක්විය. ඔවුන්ගේ උද්යෝගයට සහ සමාජ මාධ්යවල බලයට ස්තූතිවන්ත වන අතර, එය අවසානයේදී ජීවිතයට වඩා විශාල අනුරාධපුරගේ සෙවණැල්ලෙන් ඉවත්ව තනිවම නැගී සිටියි.
ඩෙමි පෙරේරා විසින් සම්පාදිත බී.බී.සී වාර්තාවකි -සැකසුම – තීක්ෂණ වෙළෙන්එගොඩ
-
කොවිඩ්-19 ආසාදිතයින් 1843ක්
අද (02) දිනය තුළ කොවිඩ්-19 ආසාදිතයින් 1843 දෙනකු වාර්තා වූ බවත් ඒ අනුව ශ්රී ලංකාවෙන් වාර්තා වන සමස්ත ආසාදිතයින් සංඛ්යාව 111,705ක් දක්වා ඉහළ ගිය බවත් රජයේ ප්රවෘත්ති දෙපාර්තමේන්තුව විසින් නිකුත් කළ මාධ්ය නිවේදනයක සදහන් වෙනවා.
-
ලංකාව ඉන්දියාවක් වෙනවාද – නැද්ද ? ශ්රී ලංකා වෛද්ය සංගමයෙන් හෙළිදරව්වක් !
ජනතාව සෞඛ්ය නීතිවලට නිවැරදිව අනුගත නොවුණහොත් ශ්රී ලංකාව ඉදිරි දෙසතියේ දී ඉන්දියාවේ තත්වයට පත්විය හැකි යැයි ශ්රී ලංකා වෛද්ය සංගමයේ සභාපතිනි විශේෂඥ වෛද්ය පද්මා ගුණරත්න මහත්මිය අනතුරු අගවයි.
මේ තත්ත්වය නිසා රටේ සියලු දෙනා සෞඛ්ය නීතිවලට අනුගතව කටයුතු කරන්නැයි ද එසේ කටයුතු නොකළහොත් අනිවාර්යෙන්ම ඉන්දියාවේ තත්වයට පත්වන බවද ඇය කීවාය.
“මේ අපිට අඩුම ගානේ තව සුමාන දෙකක් ඊටත් වැඩිවෙන්නත් පුළුවන්. අපි මේ ජීවන රටාවට අනුගත නොවුනහොත් රටක් විදියට අපිට ඉන්දියාවට වගේ ඉතාමත් ම අභාග්ය සම්පන්න තත්ත්වයකට පත්වෙන්න පුළුවන්. ගෙදර ඇතුළේම රෝගියෙක් ඉන්නවා නම් ගෙදර අනිත් අයත් රෝගියාත් මුව ආවරණයක් පැළඳ සිටීම ඉතාමත් වැදගත්. සම්පූර්ණයෙන්ම ඉදිරි සුමාන දෙක තුන ඇතුළත ඉන්දියාවේ තත්වයට අනිවාර්යයෙන් ම යන්න වෙනවා. අපි මේ සම්බන්ධව සමාජයක් විදියට එක පිළිවෙතකට අනුගත වෙලා රෝගය පාලනය කිරීමට තීරණය කළේ නැත්නම්.“
-
අප්රේල් මාසයේදී උද්ධමනය 0.2කින් පහළට
කොළඹ පාරිභෝගික මිල දර්ශකයෙහි (කො.පා.මි.ද., 2013=100) වාර්ෂික ලක්ෂ්යමය වෙනස මගින් මනිනු ලබන මතුපිට උද්ධමනය, 2021 මාර්තු මාසයේ පැවති සියයට 4.1හි සිට 2021 අප්රේල් මාසයේ දී සියයට 3.9 දක්වා පහළ ගියේය. ආහාර කාණ්ඩයේ අයිතමවල මිල ගණන්හි සිදු වූ පහළ යෑම් මේ සඳහා හේතු විය.
මේ අතර, ආහාර කාණ්ඩයෙහි වාර්ෂික ලක්ෂ්යමය උද්ධමනය 2021 මාර්තු මාසයේ පැවති සියයට 9.6හි සිට 2021 අප්රේල් මාසයේ දී සියයට 9.0 දක්වා පහළ ගිය අතර, ආහාර නොවන කාණ්ඩයෙහි වාර්ෂික ලක්ෂ්යමය උද්ධමනය 2021 අප්රේල් මාසයේ දී සියයට 1.8ක අගයක නොවෙනස්ව පැවතුණි.
වාර්ෂික සාමාන්ය පදනම මත මනිනු ලබන කො.පා.මි. දර්ශකයෙහි වෙනස 2021 මාර්තු මාසයේ පැවති සියයට 4.0හි සිට 2021 අප්රේල් මාසයේ දී සියයට 3.9 දක්වා සුළු වශයෙන් පහළ ගියේය.
2021 අප්රේල් මාසයේ දී කො.පා.මි. දර්ශකයෙහි මාසික වෙනස සුළු වශයෙන් පහත වැටීමක් වාර්තා කළේය. ආහාර කාණ්ඩයේ අයිතමවල මිල අඩුවීම මේ සඳහා හේතු විය. ආහාර කාණ්ඩය තුළ, 2021 අප්රේල් මාසයේ දී පොල්, එළවළු, රතු ළූණු සහ ලොකු ළූණු මිල අඩු විය. මේ අතර, ප්රවාහන (ලිහිසි තෙල්) උප කාණ්ඩයේ මිල ගණන් ඉහළ යෑම් හේතුවෙන්, ආහාර නොවන කාණ්ඩයෙහි අයිතමවල මිල ගණන්හි ඉහළ යෑමක් 2021 අප්රේල් මාසයේ දී වාර්තා විය.
-
Covid-19 Hot: ආසාදිතයින් සීග්රයෙන් ඉහළ යාමත් සමඟ නව සෞඛ්ය මාර්ගෝපදේශ මාලාවක්
ශ්රී ලංකාව තුළ දිනකදී හඳුනා ගත් වැඩිම කොරෝනා ආසාදිතයින් සංඛ්යාව වාර්තා වීමත් සමඟ සෞඛ්ය අමාත්යංශය විසින් අලුතින් මාර්ගෝපදේශ නිකුත් කරනු ලැබීය.
සෙනසුරාදා (මැයි 01) අලුතින් රෝගීන් 1,716 ක් වාර්තා වූ අතර නොනවත්වා රෝගීන් 1,000 ඉක්මවා වාර්තා වූ පස් වෙනි දිනය මෙයයි.
ඒ අනුව නව කොවිඩ් මර්දන මාර්ගෝපදේශ මාලාව මැයි 01 වෙනිදා සිට ක්රියාත්මක වේ.
සෞඛ්ය සේවා අධ්යක්ෂ ජනරාල් විසින් ප්රකාශිත සෝදිසි අවධි – 3 (Alert Level 3) මාර්ගෝපදේශ අනුව පහත සඳහන් නියමයන් බලපැවැත්වෙන බව කොවිඩ්-19 පැතිරීම වැළැක්වීමේ ජාතික ක්රියාන්විත මධ්යස්ථානය නිවේදනය කළේය.
- සමුළු (conference), සම්මන්ත්රණ (Seminars), රැස්වීම් (Meetings), සන්නාම දිවා හෝජන (Brand Lunches) 2021.05.21 දක්වා තහනම්ය. ඉන් පසුව පවතින කොවිඩ් තත්ත්වයට අනුරූපව නැවත සමාලෝචනය කරනු ලැබේ.
- සුපිරි වෙළඳසැල් (Super Market), මහාපරිමාණ අලෙවිහල් (Shoppers Malls), මූල්ය ආයතන, රෙදිපිළි වෙළඳසැල්, සිල්ලර වෙළඳසැල් ක්රියාත්මක විය යුත්තේ මුළු පාරිභෝගික ධාරිතාවෙන් 25% ක සීමාවකට යටත්වය.
- සංවෘත ස්ථාන සහ විවෘත ස්ථානවල පවත්වන සාද අංග (Events) සහ මහජන එක්රැස් වීම් සඳහා අවසර නැත.
- ආගමික ස්ථානවල ජනතාව එක්රැස් වීම නොකළ යුතුය.
- සිනමා ශාලා සහ රංග ශාලා, ළමා උද්යාන, පිහිනුම් තටාක, ‘Pub’, ‘Bars’, Casino (පබ්, බාර්, කැසිනෝ), රාත්රී සමාජ ශාලා, ඔට්ටු ස්ථාන (Betting Centers) සහ සම්භාහන සේවා ස්ථාන වසා තැබේ.
- හෝටල්, තානායම් සහ ආගන්තුක නිවාස (Guest Houses) ආදියෙහි රඳවා තබා ගත හැකි සංඛ්යාව මුළු ධාරිතාවයෙන් 50% ක් වන අතර රාත්රී 10.00 පසුව ක්රියාත්මක නොවිය යුතුය.
- කානිවල්, සංගීත සංදර්ශන, වෙරළතීර සාද/ උත්සව සඳහා අවසර නැත.
- විවෘත වෙළඳසැල්, පොළ සහ බේකරි වෙළඳසැල් ක්රියාත්මක විය යුත්තේ මුළු පාරිභෝගික ධාරිතාවයෙන් 25% යටත්වය.
- උසාවි – මුළු ධාරිතාවයෙන් 25% දක්වා ජනතාවට පැමිණීමට අවසර ඇත.
- බන්ධනාගාර රැඳවියන් බැලීමට අවසර නැත.
- පාසල්, පෙර පාසල්, විශ්වවිද්යාල සහ උසස් අධ්යාපන ආයතන, ආධාරක (Tuition) පංති නැවත දැනුම්දෙන තුරු වසා තැබේ.
- 2021 මැයි 04 දින සිට මැයි 20 දක්වා මංගල උත්සව සඳහා අවසර නොලැබේ.
මැයි මස 20 දිනට පසු පවතින කොවිඩ් තත්ත්වයට අනුරූපව මාර්ගෝපදේශ නැවත සමාලෝචනය කෙරෙනු ඇති බව බලධාරීහු පවසති.
ශ්රී ලංකාව තුළ කොවිඩ් ආසාදිතයින් සීග්රයෙන් ඉහළ යාමත් සමඟ නව සෞඛ්ය මාර්ගෝපදේශ මාලාව යටතේ තුන්වන මට්ටමේ කොවිඩ් අවදානමට සරිලන පරිදි මහජන ක්රියාකාරකම් සංශෝධනය විය යුතු බව සෞඛ්ය අමාත්යංශය පවසයි.
සෞඛ්ය අමාත්යංශය විසින් නිකුත් කෙරුණු නව රෙගුලාසි අනුව පහත සඳහන් සීමාවන්ද පනවා ඇත.
- පොදු ප්රවාහන සේවා භාවිතයේදී දුම්රිය සහ බස් රථවල මගීන් ගමන් කළ හැක්කේ එහි ආසන ගණනට පමණි.
- එමෙන්ම කුලී රථ භාවිතයේදී ත්රීරෝද රථ සහ මෝටර් රථවල එකවර ගමන් කළ හැක්කේ මගීන් දෙදෙනෙකුට පමණි.
- වෙනත් මාදිලියේ කුලී රථවල එහි ආසන සංඛ්යාවට පමණක් මගීන් රැගෙන යා හැකි වේ.
- අපනයනය මූලික කරගත් ඇඟලුම් කර්මාන්ත ශාලා ඇතුළු වෙනත් කර්මාන්ත ශාලා පවත්වාගෙන යාමේදී ජෛව විද්යාත්මක ආරක්ෂිත බුබුලක් තුළ එහි කටයුතු පවත්වාගෙන යා යුතුය.
- එමෙන්ම ප්රදේශයේ සෞඛ්ය වෛද්ය නිලධාරිවරයාගේ අධීක්ෂණය යටතේ ඒවා පවත්වාගෙන යා යුතුය.
- දිවා සුරැකුම් මධ්යස්ථාන ද විවෘත වන්නේ නැත.
- කොවිඩ්-19 ආසාදිත මරණ හැර සෙසු අවමංගල උත්සව පැවැත්වීමේදී ඒ සඳහා එක් අවස්ථාවකදී සහභාගි විය හැකි පිරිස 25 දෙනෙකුට සීමා වේ. දේහ පිළිබඳ අවසන් කටයුතු පැය 24ක් තුළ සිදුකළ යුතුය.
- මහජන ඒකරාශිවීම් සඳහා අවසර හිමි නොවන අතර එළිමහන් හෝ ගෘහස්ථ උත්සව ද පැවැත්වීමට අවසර හිමි වන්නේ නැත.
- එමෙන්ම ආගමික ස්ථානවලද පුද්ගල ඒකරාශි වීම් හෝ එක්රැස් වී සිදුකරන ක්රියාකාරකම් තහනම් කර තිබේ.
- සිනමා ශාලා, ළමා උද්යාන, පිහිනුම් තටාක සහ සැණකෙළි තිබෙන ස්ථාන වසා තැබේ.
- ආපනශාලාවල සේවා සැපයීම් පවත්වාගෙන යා හැකි අතර එකවර ආහාර ගත හැක්කේ එහි ආසන පහසුකම්වලින් 25% පමණි.
- මත්පැන් අලෙවිසැල් නියමිත කාල සීමාවන් අතර පමණක් විවෘතව පවතින අතර තැබෑරුම්, රාත්රී සමාජ ශාලා, කැසිනෝ, ඔට්ටු ඇල්ලීමේ මධ්යස්ථාන සහ සම්භාහන මධ්යස්ථාන වසා තැබිය යුතුය.
මේ අතර බ්රිතාන්යයේ පැතිරෙන B117 කොරෝනා වෛරස් ප්රභේදය මේ වනවිට ශ්රී ලංකාවේ ප්රදේශ කිහිපයකින් හමුවී ඇති බවත් එම ප්රභේදය ඉතා සීග්රයෙන් පැතිරෙන බවත් ශ්රී ජයවර්ධනපුර විශ්වවිද්යාලයේ වෛද්ය පීඨයේ ජ්යෙෂ්ඨ කථිකාචාර්ය ආචාර්ය චන්දිම ජීවන්දර පසුගියදා පැවති මාධ්ය හමුවකදී පැවසීය.
එම ප්රභේදය ආසාදනය වූවන් වෙතින් රෝග ලක්ෂණ පෙන්නුම් නොකරන බව ද එය ඉතාමත් භයානක තත්වයක් බවද ඔහු සඳහන් කළේය.
ආචාර්ය චන්දිම ජීවන්දර වැඩිදුරටත් කියා සිටියේ ඉන්දියාවේ පැතිර යමින් පවතින වෛරස් ප්රභේදය මේ වන තෙක් ශ්රී ලංකාවෙන් හමු වී නොමැති බවය.
Text by bbc sandesaya
-
‘ශ්රී ලංකා ග්රේට්ස් XI’ සහ ‘ටීම් ශ්රී ලංකා’ අතර තරගය කල් යයි
පල්ලකැලේ ජාත්යන්තර ක්රීඩාංගණයේ මැයි මස 04 වැනි දින පැවැත්වීමට නියමිතව තිබූ ‘ශ්රී ලංකා ග්රේට්ස් XI’ සහ ටීම් ශ්රී ලංකා අතර පන්දුවාර විස්සයි-20 තරගය පැවැත්වීමට සැලසුම් කර පරිදි ඉදිරියට නොයන බව ශ්රී ලංකා ක්රිකට් ආයතනය දැනුම් දී සිටියි. රටේ පවිත්න සෞඛ්ය තත්ත්වය පිළිබඳව අවධානය යොමු කරමින් ශ්රී ලංකා ක්රිකට් ඉහත තීරණයට එළැඹ තිබේ.
කොවිඩ් – 19 අරමුදලට ආධාර උපයා ගැනීමේ අරමුණ පෙරදැරිව මෙම තරගය පැවැත්වීමට කටයුතු යෙදුණද, රටේ පවතින පවතින අවධානම් සහගත තත්ත්වය සැලකිල්ලට ගැනීමේදී එය පැවැත්වීම කල් දැමීම ඉතාම කාලෝචිත ක්රියාවක් බව ශ්රී ලංකා ක්රිකට් හි අදහස වී තිබේ.
මෙහිදී ශ්රී ලංකා ජාතික කණ්ඩායමේ ඉදිරි තරගාවලිවලට ක්රීඩා කිරීමට නියමිතව සිටින ක්රීඩකයින්ගේ ආරක්ෂාව පිළිබඳව ද මෙම තරගය කල් දැමීමේදී ශ්රී ලංකා ක්රිකට් ආයතනය සැලකිල්ලට ගනු ලැබීය.
කෙසේ වෙතත් මෙම උදාරතර අරමුණ මුදුන් පමුණුවා ගැනීම වෙනුවෙන් ඉදිරිපත් වුණු හිටපු ක්රීඩකයින්ට, වර්තමාන ක්රීඩකයින්ට, නිලධාරීන්ට සහ තරගය සාර්ථක කර ගැනීම වෙනුවෙන් වාණිජ හවුල්කරුවන් වශයෙන් ඉදිරිපත්වුණු සියළු දෙනාටම ශ්රී ලංකා ක්රිකට් සිය ස්තූතිය පළ කර සිටියි. -
බංග්ලාදේශ දෙවැනි ඉනිම කඩුලු 5කට ලකුණු 177ක් – ශ්රී ලංකාවට කලකට පසු ටෙස්ට් ජයක් ?
ජයග්රහණය වෙනුවෙන් ලකුණු 437 ක අභියෝගාත්මක ඉලක්කයක් හඹා යමින් සිටින බංග්ලාදේශ දෙවැනි ඉනිමේ ඉදිරි පෙළ කඩුලු 5 ම සිව්වැනි දිනය අවසන් වීමට මත්තෙන් දවාගැනීමට රමේෂ් මෙන්ඩිස් සහ ප්රවීන් ජයවික්රම සමත්වූහ. අයහපත් ආලෝක තත්ත්වය තරගයට බාධා පැමිණෙන විටත් බංග්ලාදේශ දෙවැනි ඉනිම කඩුලු 5 කට ලකුණු 177 ක් ලෙසින් සටහන් විය.
තවත් පන්දුවාර 12 ක් ඉතිරිව තිබියදී සිව්වැනි දිනට තරගය අහවර කරද්දී බංග්ලාදේශ කණ්ඩායම තවත් ලකුණු 260 ක් පිටුපසින් සිටින්නේ තරගයේ තවත් දිනයක් සම්පූර්ණයෙන්ම ඉතිරිව තිබියදීය. තියුණු ලෙසින් දඟ කැවීමට පටන් ගෙන ඇති පල්ලකැලේ තණතීරුවේදී කඩුලු 5 ක් ඇතැතිව සම්පූර්ණ දිනයක් ක්රීඩා කිරීමේ දැඩි අභියෝගයට හෙට දිනයේදී බංග්ලාදේශ පිලට මුහුණ දීමට සිදුවනු ඇත.
තේ පානය වන විටත් කඩුලු 3 ක් අහිමිකරගෙන සිටි බංග්ලාදේශ පිල ආරක්ෂා කාරී පිළිවෙතක් අනුගමනය කිරීම පසෙකින් තබා ආක්රමණශීලී ලෙස පන්දුවට පහර දීම තරමක් විමතිය දනවන්නක් විය. ඒ අවසරයෙන් තවත් කඩුලු 2 ක් දවා ගනිමින් බංග්ලාදේශ තවත් ආගාධයට ඇද දැමීමට රමේෂ් මෙන්ඩිස් සමත්විය.
දැවී ගිය කඩුලු 5 න් රමේෂ් අතරේ කඩුලු 3 ක්ද ප්රවීන් හමුවේ කඩුලු 2 ක් ද බෙදී ගියහ. බංග්ලාදේශ ඉනිමේ ප්රථමයෙන් දැවී ගිය කඩුලු 3 න් 2 කම හිමිකරුවා වූයේ ප්රවීන්ය. මංගල ටෙස්ට් තරගයට සහභාගිවෙමින් පළමු ඉනිමේදී කඩුලු 6 ක් දවා ගත් ජයවික්රම මෙතෙක් තරගයේදී කඩුලු 8 ක් දවා ගැනීමට සමත්ව සිටියි. ටෙස්ට් භෞතීස්මයේදී කඩුලු 8 ක් දවාගැනීමට සමත්ව සිටින තෙවැනි ශ්රී ලාංකික පන්දු යවන්නා ලෙසින්ද වාර්තා පොත් අතරට නම එකතු කරගත්තේ අජන්ත මෙන්ඩිස් සහ අකිල ධනංජය සමඟ සම තැන් ගනිමිනි.
හෙට දිනයේදී ශ්රී ලංකාව හමුවේ ඇති එකම අඩු පාඩුව වන්නේ විනිසුරු තීරණය විමසීම (විතීවී) සඳහා හිමි අවස්ථා 3ම අහිමිවී තිබීමයි. නජ්මුල් හොසේන් දවා ගැනීම වෙනුවෙන් අවස්ථා 2 කදී ලිටන් දාස් දවා ගැනීම වෙනුවෙන් කරන ලද ඉල්ලීම් වලදී ශ්රී ලංකාවට හිමි එම වටිනා අවස්ථා 3 අහිමිව ගියේය.
තේ පානයෙන් පසු ඇරැඹි තරගයේ දැවී ගිය නායක මොමිනුල් හක් සහ මුෂ්ෆිකර් රහීම්ගේ කඩුලු 2 ම රමේෂ් මෙන්ඩිස් විසින් දවා ගත්තේය. පිත්තේ ඇතුල් පැත්තේ වැදී කඩුල්ල බිඳී යෑමෙන් බංග්ලාදේශ නායකයාගේ ඉනිම ලකුණු 32 කදී ද ලෙග් ස්ලිප් ස්ථානයේ සිට ධනංජය ද සිල්වා උඩ පන්දුවක් රැක ගැනීම මත මුෂ්ෆිකර් රහීම්ගේ ඉනිම නිමාවට පත්විය. ලකුණු 40 ක් ලබා ගත් රහීම් ඉනිමේ මුල් මිනිත්තු කීපයේදී දවා ගැනීම වෙනුවෙන් අවස්ථා දෙකක් ලබා දුන්නද ළහිරු තිරිමාන්න සහ නිරෝෂන් දික්වැල්ල අතින් එය ගිලිහී ගියහ. ස්ලිප් ස්ථානයේ පන්දු රැකි තිරිමාන්න අතට රහීම්ගේ උඩ පන්දුව ඇදී ගියේ ලකුණු 6 ක් ලබා සිටියදී.
බංග්ලාදේශ කඩා වැටීම ආරම්භ වූයේ රමේෂ් මෙන්ඩිස් විසින් ටමීම් ඉක්බාල් දවා ගැනීමට සමත්වීමත් සමඟය. මැද ඉන්නේ පතිත වුණු පන්දුවට පිත්ත හුවා දැක්වුවද අදහාගත නොහැකි ලෙසින් තියුණුව දඟ කැවුණු පන්දුව ටමීම් ඉක්බාල්ගේ පිත්තේ පිටත දාරයේ වැදී කඩුලු රකින දික්වැල්ලගේ දෑත් අතර සිර විණ. දැවී යනවිටත් හයේ පහරක් සහ හතරේ පහර 3 ක් එල්ල කිරී ටමීම් ප්රහාරාත්මක වේගය රඳවා ගනිමින් පන්දු 26 කදී ලකුණු 24 ක් රැස් කරගෙන සිටියේය.
තමාට වඩා එක් ටෙස්ට් තරගයකින් ජ්යෙෂ්ඨත්වයට පත්ව සිටින රමේෂ් මෙන්ඩිස්ගේ තල්ලුවත් සමග සයිෆ් හසන්ගේ කඩුල්ල දවා ගත් ප්රවීන් දෙවැනි ඉනිමේ සිය කඩුලු දඩයම ඇරැඹීය. ශ්රී ලංකාවට එරෙහි ටෙස්ට් තරගාවලියේ ලකුණු අතරට පැමිණීමට දැඩි අරගලයක නිරතව සිටින සයිෆ් හසන්, දුර්වල පන්දු දුටු විට හිදැස් අතරින් හතරේ පන්දුව ගලා යෑමට සලස්වමින් ලකුණු 34 ක් ලබා ගත්තේය. මෙතෙක් තරගාවලියේ ඔහු ලද ඉහළම ලකුණු සංඛ්යාව වශයෙන් එම ලකුණු 34 සටහන් විය. පිතිකරුවාගෙන් පිටතට දඟ කැවුණු පන්දුවකට එක්ස්ට්රා කවර් කළාපයට ඉහළින් පහරක් එල්ල කිරීමට කරන ලද උත්සාහය වැරදී යෑමෙන් හසන් සිය කඩුල්ල අහිමි කර ගත්තේය.
තේ පානයට පන්දුවාර 3 කුත් පන්දුවක් තිබියදී නජ්මුල් හසන් දැවී ගියේ ජයවික්රමගේ පන්දුවක් කෙළින්ම කඩුල්ල සොයා යෑමෙනි. ආරක්ෂිත පහරක් එල්ල කළද පන්දුවේ තිබූ අදහාගත නොහැකි දඟ කැවීම නිසා පිත්තත් ශරීරයත් අතිරින් ගොස් කඩුල්ලේ වැදුණේ නජ්මුල්වද මවිත කරමිනි.
දැවී ගිය කඩුලු 3 න් 2 ක්ම තමන් සතු කරගත් තයිජුල් ඉස්ලාම් දෙවැනි වතාවටත් සිය මව්බිමෙන් පිටතදී කඩුලු 5 ක් දවා ගත්තේය. ටස්කින් අහමඩ්ගේ පන්දුවකට එල්ල කරන ලද පුල් පහර තයිජුල් ඉස්ලාම් රැක ගැනීම නිසි නිරෝෂන් දික්වැල්ල ලකුණු 24 කට දැවී ගියේය.
ශ්රී ලංකා දෙවැනි ඉනිම වෙනුවෙන් යළිත් ක්රියාත්මක වුණු දිමුත් කරුණාරත්න අද උදෑසන සිය 26 වැනි අර්ධ ශතකය රැස් කර ගත්තේය. ටෙස්ට් තරග වලදී එතරම් වේගයෙන් පන්දුවට පහර දෙන පිතිකරුවකු නොවූවත් ඉක්මනින් ලකුණු රැස් කිරීමේ අවශ්යතාවය මත සිය පිත්ත වේගවත් කළ ශ්රී ලංකා නායකා හයේ පහරක් සහ හතරේ පහර 7 ක් සමඟින් පන්දු 78 කදී ලකුණු 66 ක් ලබා ගත්තේය. ආබාධයෙක් හේතුවෙන් පිටියෙන් ඉවත් වුණු ශොරිෆුල් ඉස්ලාම් වෙනුවෙන් පන්දු රැකීමට පැමිණි යසීර් අලීගේ අදහාගත නොහැකි උඩ පන්දු රැකීම නොවන්නට මීට වඩා ලකුණු සංඛ්යාවක් කරා යෑමේ අවස්ථාව ශ්රී ලංකා නායකයාට හිමිවනු ඇත.
මෙහෙදි හසන්ගේ පන්දුවකට පා ඉන්න දෙසට වේගවත් පහරක් එල්ල කළද එය හිස්වැස්මක් පළඳමින් ෂෝට් ලෙග් ස්ථානයේ පන්දු රැකි යසීර් අලීගේ කකුලත් අතත් අතර හිර නොවන්නට පිට පිටම ඉනිම 3 කදී ශතක 3 ක් ලබා ගැනීමේ අවස්ථාව දිමුත්ට උදාවන්නට තිබිණ. දැවී යන විටත් දැනට ක්රිකට් ක්රීඩාවේ නියැළෙන්නන් අතරින් ප්රතිවාදී පිලකට එරෙහිව වැඩිම ලකුණු ලද පිතිකරුවා බවට පත්වීමට දිමුත් සමත්වූවේය. වර්තමාන ක්රීඩකයින් අතරින් ඇන්ජලෝ මැතිව්ස් පමණක් පාකිස්තානයට එරෙහිව 2013-14 වසරේදී ලකුණු 412ක් ලබා ලකුණු 400 සීමාව රැස් කර සිටියි. දිමුත් මෙම තරගාවලියේදී ඉනිම 3 කදී ලකුණු 428 ක් රැස් කිරීමට සමත්ව සිටියි. බංග්ලාදේශ ටෙස්ට් ඉතිහාසයේදී කිසි දිනෙක ශ්රී ලංකාවට එරෙහිව පැවැති තරගයකද සිව්වැනි ඉනිමේදී පන්දුවාර 60 ක් ඉක්මවා පන්දුවට පහර දීමට අසමත්ව සිටීමද කැපී පෙනෙයි. ඔවුහු මේ ඉනිමේදීද කඩුලු 5 ක් අහිමිකරගෙන සිටින්නේ පන්දුවාර 48 ක් අවසානයේදීය.
