Tag: featured

සෑම වසරකම නිෂ්පාදනය වන සහ නිකුත් වන චිත්‍රපට සංඛ්‍යාව අනුව බොලිවුඩය ලොව විශාලතම සිනමා කර්මාන්තය වන අතර ලොව වැඩිම ප්‍රේක්ෂකයින් පිරිසක් සතු වීම ද එහි ස්ථාවරත්වයට හේතු වී ඇත.

මේ තත්ත්වය තුළ බොලිවුඩ් තරු විලාසිතා ලෝකයේ, දේශපාලනයේ පමණක් නොව තවත් බොහෝ ක්ෂේත්‍ර රැසක බලවත් පුද්ගලයින් බවට පත්ව ඇති අතර ඔවුන් කියන – කරන දෙ, සිතන – පතන දේ දෙස බිලියන ගණනක් ජනතාව මහත් උනන්දුවෙන් සහ ආසාවෙන් බලාසිටින තත්ත්වයක් ද නිර්මාණය වී ඇත.

මේ අතර බොලිවුඩ් තරු ද තම ජනප්‍රියත්වය සහ ප්‍රතිරූපය සදහා දෛනිකව පුවත් නිර්මාණය කරන අතර ඒවා උණුසුම් පුවත් බවට පත් වෙමින් මිලියන සංඛ්‍යාත පිරිසක් අතර මොහොතකින් හුවමරු වීමක් ද දැකිය හැකිය.

ඉතිං බොලිවුඩ් තරු වල ආදරයට සහ සුරලතයට ලක්වන සුරතල් සතුන් ගැන ද කිවහැකි වන්නේ අපූරු කතාවකි. සතුන් කෙරෙහි තම ආදරය පෙන්වීමට සහ දැනුවත් කිරීම සඳහා සහයෝගය ප්‍රකාශ කිරීමට පසුබට නොවන බොලිවුඩ් සුපිරි තරු මෙන්න.

ජැකලින් ෆර්නැන්ඩස් Jacqueline Fernandez

ජැකලින් ෆර්නැන්ඩස් බොහෝ කලක සිට ‘සත්ව අයිතිවාසිකම් පිළිබඳ“ ප්‍රබල ආධාරකරුවෙකු වන අතර ඒ පිළිබඳව තරමක් හඩ නගා ඇත. මිනිසුන්ට ප්‍රීති ප්‍රමෝදයක් ලබා දීම සඳහා අශ්වයන් බර කරත්ත රැගෙන යන මුම්බායි හි ‘වික්ටෝරියාස්’ ලෙස ජනප්‍රිය වූ අශ්ව කරත්ත තහනම් කිරීමට පවා ඇය උදව් කළාය. සත්ව හිංසාව මැඩපැවැත්වීම සඳහා වීගන් ජීවන රටාවක් (සත්ව නිෂ්පාදනවලින් තොර ආහාර – එළවළු) ස්වේච්ඡාවෙන් අනුගමනය කළ බොහෝ නිළියන්ගෙන් එක් අයෙකි ෆර්නැන්ඩස්.

ජෙනෙලියා දේශ්මුක් Genelia Deshmukh

ජෙනෙලියා, රිටීෂ් සහ ඔවුන්ගේ පුතුන් හැරුණු විට, ඉන්ස්ටග්‍රෑම් හි තරමක් ජනප්‍රිය වූ තවත් දේශ්මුක් කෙනෙක් ද සිටී. ඒ ඇයගේ සුරතල් සුනඛයාය. ස්පැනියල් වර්ගයට අයත් රන්වන් පැහැ මෙම සුරලතලාට ජෙනෙලියා දරුවෙකුට මෙන් ආදරය කරන බව බොලිවුඩයේ කටකතාවකි. ඔහු දරුවන් සමඟ සෙල්ලම් කරන පින්තූරවලින් ජෙනෙලියාගේ සමාජමාධ්‍ය ගිනුම් පිරී ඉතිරී ඇත. ඇත්ත වශයෙන්ම, දේශ්මුක්වරු සත්ත්ව ආහාර වලින් තොර වී ඇති අතර මෑතකදී ඉන්දියාවේ මුල්ම සමාගමක් වන ශාක පදනම් කරගත් මස් සමාගමක් ඔවුන් විසින් ආරම්භ කර තිබේ.

දීෂා පටානි Disha Patani

ගොකු, බෙලා, ජැස්මින් සහ කීටි ලෙස නම් තබා ඇති දීෂා පටානිගේ සුනඛයන් හා බළලුන් දෙදෙනාට තමන්ගේම ඉන්ස්ටග්‍රෑම් පිටුවක් තිබේ. දීෂා බළලුන් හා බල්ලන් දරුකමට හදා ගැනීම සඳහා තනතුරු දමන ආකාරය ඔබට දැක ගත හැකිය. ඇත්ත වශයෙන්ම, කුරිරු සිදුවීම් වලට නැවත නැවතත් මුහුණ දෙන සතුන්ට ඉදිරියට පැමිණ උදව් කිරීමට ඇය මිනිසුන්ව දිරිමත් කරයි.

Alia Bhatt

ආලියා ද සතුන්ට බොහෝ සේ ආදරය කරන, සත්ව අයිතිවාසිකම් වෙනුවෙන් පෙනී සිටින සුපිරි බොලිවුඩ් තරුවකි. සුදු පර්සියානු බළලෙකු පසුගිය කාලයේ ඇයගේ සමීපම මිතුරා වූ අතර මෑතකදී, ෂහීන් සහ ආලියා තවත් පූස් පැටියෙකු රැගෙන ගියහ. කොළ පැහැති ඇස් ඇති කළු පැහැති ජුනිපර් නම් බළල් සුරතලා අද ඔවුන්ගේ සමීපතමයා බවට පත්ව ඇත. සත්ව අයිතිවාසිකම්, සහයෝගය සහ සංරක්ෂණය සඳහා භට් ක්‍රියාකාරීව සම්බන්ධ වන අතර සත්ව හා පාරිසරික සුභසාධනය පිළිබඳ ගැටළු ඉස්මතු කර දැක්වීමට සහ වැඩ කිරීමට අවධානය යොමු කරන අලියා භට් විසින් ලාභ නොලබන සංවිධානයක් පවත්වාගෙන යයි .

ඩයනා පෙන්ටි Diana Penty

ඩයනා පෙන්ටි සහ ඇගේ සුරතල් සුනඛයා වන ‘විකී‘ අතර අපූරු මිත්‍රත්වයක් ඇත. ඩයනා සහ විකී යන දෙදෙනාගේම නිදාගැනීම, විවේක ගැනීම හෝ පොතක් කියවීම යන දෙකම එකට බෙදා ගනී. 

ෆෙමිනා ඇසුරිණි – සකස් කළේ – තුෂාධවි

2013 වසරේ සිට 2017 වසර දක්වා ඩොලර් මිලියන 225ක වටිනාකමින් යුතු පළිබෝධනාශක මෙට්‍රික් ටොන් 28,640ක් ආනයනය කර ඇතැයි ද පළිබෝධනාශක රෙජිස්ට්‍රාර් කාර්යාලයේ ලියාපදිංචිවී ලබාගත් විධිමත් සහතිකයක් යටතේ 2018 වනවිට අලෙවි කටයුතු කර ඇත්තේ අලෙවි සැල් 2294ක් අතුරින් 1079ක් පමණක් බව ද පළිබෝධනාශක ආනයනය, භාවිතය හා එහි පාරිසරික බලපෑම සම්බන්ධයෙන්වූ විගණකාධිපතිවරයාගේ පරිසර විගණන වාර්තාව සදහන් කරයි.

එම වාර්තාවේ මෙසේද සදහන් වේ.

පළිබෝධනාශක ආනයනය, ඇසිරීම, ලේබල් කිරීම, ගබඩා කිරීම, සංයෝග සකස් කිරීම, ප්‍රවාහනය කිරීම, විකිණීම, විකිණීම සඳහා බෙදා හැරීම සහ භාවිතය පාලනය කිරීම සඳහා අවශ්‍ය වන විධිවිධාන 1980 අංක 33 දරන පළිබෝධනාශක පාලන පනත මගින් ඇතිකර ඇති අතර එම කටයුතු නියාමනය පළිබෝධනාශක රෙජිස්ට්‍රාර් කාර්යාලය මගින් සිදු කෙරෙයි.

2013 සිට 2017 දක්වා ආනයනය කර ඇති මුළු පළිබෝධනාශක ප්‍රමාණය මෙට්‍රික් ටොන් 28,640කි. ඒ සඳහා ඩොලර් මිලියන 225ක් වැයකර ඇත. එම මුළු ප්‍රමාණයෙන් 63%ක් වල්නාශකද, 20%ක් කෘමිනාශකද, 17%ක් දිලීර නාශකද තිබී ඇත.

2019 ජුනි 30 වනවිට ආනයනික පළිබෝධනාශකවල අඩංගු සක්‍රිය සංඝටක ප්‍රමාණය 200ක් වී ඇති අතර ඒ සඳහා පළිබෝධනාශක රෙජිස්ට්‍රාර් කාර්යාලයේ ආනයනකරුවන් 80ක් ලියාපදිංචි වී ඇත.

ආනයන පලිබෝධනාශකවල යෝග්‍යතාව පරික්ෂා කිරීම සඳහා එම පළිබෝධනාශක නිෂ්පාදිත රටවලින් නිකුත් කරන තත්ව සහතිකය පාදක කරගෙන ඇති අතර සියයට සියයක්ම දේශීය රසායනාගාර පරීක්ෂාවන් තුළින් පළිබෝධනාශක පරීක්ෂාවන් සිදුනොවන බව නිරීක්ෂණය වී ඇත. පවතින භෞතික සම්පත් හා මානව සම්පත් උපයෝගි කරගනිමින් පළිබෝධනාශක සංඝටක 200කින් 18කට අදාළව රසායනාගාර පරීක්ෂණ කර ඇති අතර එම ප්‍රමාණය හා ක්‍රියාවලිය ප්‍රමාණවත් නොවන බව නිරීක්ෂණය වී ඇත.

පළිබෝධනාශක අලෙවි සහතික ලබාදීම විධිමත් ආකාරයෙන් ක්‍රියාත්මක නොවන බව නිරීක්ෂණය වී ඇති අතර පළිබෝධනාශක අලෙවිසැල් නියාමනයද ප්‍රමාණාත්මකව හා අඛණ්ඩව සිදුනොවන බව නිරීක්ෂණය වී ඇත.

කෘෂිකර්ම කටයුතු සඳහා භාවිත කරන පළිබෝධනාශකවල අඩංගු සක්‍රිය සංඝටක 110ක් අතුරින් 60ක් සඳහා පමණක් පෙර අස්වනු කාලය හා උපරිම අවශිෂ්ට සීමා (පළිබෝධනාශක යම් ප්‍රමාණයක් ආහාර තූළ හෝ ආහාර මත පැවතීම පළිබෝධනාශක අවශිෂ්ට ලෙස හැඳින්වේ.) 219ක් තීරණය කර තිබෙන අතර සංඝටක 50ක් සඳහා උපරිම අවශිෂ්ට සීමා ස්ථාපිත කර නැත.

කල් ඉකුත්වූ පලිබෝධනාශක පරිසර හිතකාමී ලෙස අපහරණය කිරීමේ ක්‍රියාවලිය සාර්ථකව සිදුනොවන බව නිරීක්ෂණය වී ඇති අතර 2019 සැප්තැම්බර් 30 වන විට අපහරණය නොකරන ලද කල් ඉකුත්වූ පළිබෝධනාශක ද්‍රව ආකාරයේ ලීටර් 2057ක් හා ඝන ආකාරයේ කිලෝ ග්‍රෑම් 24,153ක් රාජ්‍ය අංශයට අයත් ස්ථාන කිහිපයක ගබඩා කර තිබී ඇත.

ආනයන කරනු ලබන පළිබෝධනාශක නියැදි රසායනාගාර පරීක්ෂණයකට භාජනය කිරීමට අවශ්‍ය භෞතික හා මානව සම්පත් රේගුවේ ස්ථාපිත කර නොමැති අතර ආනයනකරු විසින් ඉදිරිපත් කරනු ලබන තත්ව සහතිකයට නිශ්කාෂණය සිදුකර ඇත.

අම්පාර, කළුතර, මාතර, ගම්පහ, කුරුණෑගල, පුත්තලම හා නුවරඑළිය දිස්ත්‍රික්කවල වී, කොළ එළවළු, අන්නාසි, අඹ, ගස්ලබු, මිරිස් හා එළවළු සම්බන්ධව සිදුකරන ලද නියැදි පරීක්ෂණයේදී ගොවීන් පරිසරයට හා මානව සෞඛ්‍යයට හිතකර ආකාරයට පළිබෝධනාශක භාවිතය සිදුනොකරන බව නිරීක්ෂණය වී ඇත.

පළිබෝධනාශක භාවිකය හා පසු භාවිතය නියාමනය හා පාලනය කිරීමට අවශ්‍ය නිලධාරීන්, පුහුණුව හා අඛණ්ඩ දැනුම යාවත්කාලීන කිරීමට අවශ්‍ය ක්‍රියාමාර්ග වගකිව යුතු ආයතන විසින් තවදුරටත් සිදුකළ යුතු බව නිරීක්ෂණය වී ඇත.

පරිසර හිතකාමී හා මානව සෞඛ්‍යයට ගැළපෙන යහපත් කෘෂිකාර්මික පිළිවෙත් ක්‍රියාත්මක කිරීම සඳහා ගුඩ් ඇගිරිකල්චරල් ප්‍රැක්ටිස් වැඩසටහන හඳුන්වාදී තිබුණද ගෝවීන් අතර එය ක්‍රියාත්මක කිරීම පහළ මට්ටමක පැවතී ඇත.

පළිබෝධනාශක අලෙවිය මූලික වශයෙන් පුද්ගලික අලෙවිකරුවන් මගින් සිදුකෙරෙන අතර අලෙවිකරුවන් බහුතරයකට පලිබෝධනාශක පිළිබඳ විධිිමත් පුහුණුවක් ලබාදී නැත. එසේ වුවද පළිබෝධ ගැටලු හා පළිබෝධනාශක පිළිබඳ ගොවීන් උපදෙස් ලබාගෙන ඇත්තේ ඔවුන්ගෙනි.
පළිබෝධනාශක රෙජිස්ට්‍රාර් කාර්යාලයේ ලියාපදිංචිවී ලබාගත් විධිමත් සහතිකයක් යටතේ 2018 වනවිට අලෙවි කටයුතු කර ඇත්තේ අලෙවි සැල් 2294ක් අතුරින් 1079ක් පමණි.

නුවරඑළිය එළවළු වගාව සම්බන්ධයෙන් පාංශු සාම්පල 162ක පවතික රසායනාගාර වාර්තා පරික්ෂාවේදී තිබිය යුතු අවම පොස්පරස් ප්‍රමාණය ඉක්මවූ නියැදි 159ක් හඳුනාගෙන ඇත. එම නියැදි 159හි පොටෑසියම් ප්‍රමාණය ඉක්මවූ නියැදි 73ක්ද හඳුනාගෙන ඇත.

අපනයනය කරන එළවළු වර්ගවලද, තේ තුළද අනුමත සීමාව ඉක්මවූ පළිබෝධනාශක තිබී ඇත.
ප්‍රොෆෙනොපොස් පළිබෝධනාශකය යෙදිය හැකි සියලු ආහාර බෝගවල පළිබෝධනාශක යෙදීම හා අස්වනු නෙලීම අතර අවම කාල සීමාව දින 14ක් වූවත් එම අවම සීමාවන් ගොවීන් අනුගමනය නොකරන බව කරන ලද සාකච්ඡාවලදී අනාවරණය වී ඇත.

පළිබෝධනාශක ආනයනය, භාවිතය හා එහි පාරිසරික බලපෑම සම්බන්ධයෙන්වූ විගණකාධිපතිවරයාගේ පරිසර විගණන වාර්තාව ඇසුරිනි.

ගෝලීය මහ බලවතුන්ගේ අනුග්‍රහය ඇතිව නොබෙල් සාම ත්‍යාගය ලැබූ පාකිස්තානි යුවතිය මලාලා යූසෆ්සායි කලක් තොරම්බල් වූ අයුරු, අවසානයේ වෙළඳපල තරගයෙහි අලෙවිවන “ෂුක්රලා” ගැන ඉතිරි වන්නේ අනුකම්පාවක්ම පමණි.  

සිරස “ලක්ෂපති” වැඩසටහනට පසුගිය සතියේ පැමිණි ගාල්ලේ මුස්ලිම් පාසල් දැරිවිය ලක්ෂ 20 ක දිනුම රැගෙන යාම විශේෂයෙන් ෆේස් බුක් ලෝලීන් අතර ඉමහත් කතා බහට ලක් විය. 

පාසල් දැරිවියක් හෙයින් තම සමාජ ආර්ථික වටපිටාව පිළිබඳව තවම පූර්ණ අවබෝධයක් නැතත් ඇය සැබවින්ම ඉතා දක්ෂ දැරිවියකි. ඒ ගැන වාදයක් නැත.  එනිසා ඇයගේ ජයග්‍රහණය වෙනුවෙන් ඇයට හිමි ගෞරවය හා ඇගයුම කිසිදු අඩුවකින් තොරව ඇයට පිරිනමමින්, සිරස “ලක්ෂපති” වැඩසටහන ගැන ඉතා කෙටි සටහනක් මෙසේ තබමි.  

අපේ රටේ ප්‍රධාන රූපවාහිනි නාලිකා හත අටක වැඩසටහන් රොත්ත අතරින් උනන්දුවක් ඇතිව යම් දැනුමක් අතගා ගත හැකි වැඩසටහන සිරස “ලක්ෂපති” වැඩසටහන විය යුතුය.  එයට එක් ප්‍රධාන සාධකයක් ලෙස මා සළකන්නේ රූපවාහිනි වැඩසටහන් සම්පාදනය කිරීමේ හා ඉදිරිපත් කිරීමේ අවුරුදු 30 ට වැඩි අත්දැකීම් ඇති සහ වැඩසටහන සඳහා අවශ්‍ය පූර්ව සූදානම සමගින් වැඩසටහන මෙහෙයවන්නා ලෙස අසුන් ගන්නා චන්දන සූරියබණ්ඩාරගේ ප්‍රසන්න දායකත්වයද වන්නේය. 

එය එසේවන අතර, අපගේ වෙළඳපලෙහි ඉතා සීමිත වෙළඳ ප්‍රචාරක ආදායම බෙදා ගැනීමේ තරගය වෙනුවෙන් හැම රූපවාහිනි ආයතනයක්ම තම ආයතනික ප්‍රතිරූපය (Station Image) බහුතරයකට ගැලපෙන අයුරු ස්ථානගත කරන්නට උත්සාහ දරති.    

බොහෝ සිංහල නාලිකා ඒ සඳහා උත්සාහ ගන්නේ සිංහල-බෞද්ධ බහුතරයේ නාලිකාව ලෙස පිළිගැනුමක් හදා ගන්නටය. ඇතැම් නාලිකා එය විවෘතව, ප්‍රචාරාත්මකව කරන්නේ එවැනි ප්‍රසිද්ධියක් සමග දේශපාලන බලය හා කේවල් කිරීමටත් ජාවාරම්කාර ගනුදෙනු සඳහා පහසු ඉඩක් හදා ගැනීමටත්ය. 

රාජ්‍ය නාලිකා සහ තවත් කිහිපයක් පාසල් අධ්‍යාපනය සමගින් කාලාන්තරයක සිට රාජ්‍ය මතවාදය ලෙස තහවුරුව ඇති සිංහල-බෞද්ධ අධිපතිවාදයෙහි සීමා සමගින් ඉන්නාහ. එනිසා ඒවා සිංහල-බෞද්ධ මතවාදයට දායක වන බවක් බොහෝවිට එකවර පෙනෙන්නේ නැත. සූරියබණ්ඩාර මෙහෙයවන “ලක්ෂපති” දැනුම මිණුම වැඩසටහනද එවැන්නකි. එය එසේ යැයි පසුගියදා තරග වැදුණු ජයග්‍රාහි මුස්ලිම් දැරිවිය ෂුක්රා මුනව්වර් දැන් ඇගයෙන අයුරින් යළි තහවුරු වන්නේය.    

ඇය ගැන කතා කෙරෙන්නේ ඇයගේ ඇත්ත ශක්තිය මත නොව, “ගුත්තිලය” හා “සිංහබාහු” පිළිබඳව ඇය දැක්වූ අදහස් අනුවය.   එයට හේතුව වැඩසටහන මෙහෙයවන සූරියබණ්ඩාර ඇයව ඔසවා තැබුවේ ඒ වෙනුවෙන් නිසා ය.

“ඇය සිංහසීවලී වූවානම්” යැයි සූරියබණ්ඩාර ඇසුවේද “කවදාවත් තාත්තා දාලා යන්නේ නැහැ” යැයි ඇයගෙන් ලැබෙන පිළිතුර කලින් දැන සිටි හෙයින් යැයි මම සිතමි.  

ඇයගේ ඒ පිළිතුර සිංහල-බෞද්ධයින් කර ගසා ගත්හ.    එක් සිංහල-බෞද්ධයෙකුගේ සටහන වූයේ ඇය ආදර්ශමත් “සිංහ දෝනියකි” යන්න ය. එනිසා ඇයව ඇගයෙන්නේ ඇයගේ මුස්ලිම් අනන්‍යතාවද ඇයට අහිමි කිරීමෙනි.  

ලක්ෂපති වැඩසටහනෙහි දැනුම මැනෙන්නේ එවැනි ඉතා පටු සිංහල-බෞද්ධ දැනුම් තීරුවක තරගකරුවන් තරගකාරියන් අසුන් ගැන්වීමෙනි.  එනිසා පෘතුගීසින් ලක් බිමට ගොඩ බසින විට කෝට්ටේ රජු කවුරුන්දැයි ඇසුවාට එවක යාපනයේ රජු කවරෙක්දැයි අසන්නේ නැත.  

නැගෙනහිර පළාතේ මුස්ලිම් ප්‍රජාව අතර “කාරියප්පාර්” යැයි අරාබි මූලයකින් තොර නමක් ඇත්තේ කෙසේදැයි අසන්නේ නැත.  කන්ද උඩරට වැවිලිකරයේ ජනතාවගේ “පුරවැසි සහ ඡන්ද අයිතිය” අහෝසි කෙරුණේ කවර අවුරුද්දේ දැයි අසන්නේ නැත.  “ඉන්දු ලංකා ගිවිසුම” අත්සන් තැබුණේ කවදා කවුරුන් විසින් දැයි අසන්නේ නැත. සාලිය කුමරුගේ මව කවුරුන්දැයි අසන්නේද නැත.  

“ලක්ෂපති” වැඩසටහන මූලික වශයෙන් මේ ලංකාව බහු වාර්ගික, බහු ආගමික, බහු සංස්කෘතික හා ද්වි භාෂාමය රටක් යන්න අමතක කරමින් දැනුම උරගා බලන වැඩසටහනකි.   එනිසා යාපනයේ දෙමළ රාජධානිය ගැන, දෙමළ සාහිත්‍ය ගැන, අතීතයේ වූ දෙමළ හා මුස්ලිම් ප්‍රජා නායකයින් ගැන, ආනන්ද කුමාරස්වාමි, එම්. සී. සිද්දි ලෙබ්බේ වැන්නවුන් ගැන “ලක්ෂපති” වැඩසටහනෙහි ප්‍රශ්න ඇසෙන්නේ නැත. ප්‍රශ්නාවලින්හි දෙතුන් පලක සාමාන්‍ය බුද්ධියට අදාල ප්‍රශ්නයක් දෙකක් ඇතුළත් වුවද ඒවාද බොහෝවිට ඉතා පටු විෂය දැනුමකට සීමා කෙරෙන්නේය.  

පසුගියවර ෂුක්රා දැරිවියගෙන් ක්ෂුද්‍ර ජීවින් හා ආතර් සී ක්ලාක් සම්බන්ධයෙන් ඇසූ ප්‍රශ්න එවැනි ය.  එහෙත් නූතන ලෝකය විවෘත කෙරෙන ආකාරයේ ප්‍රශ්න ඉඳහිටවත් ඇසෙන්නේ දැයි නොදනිමි.  ලතින් ඇමෙරිකාවේ ස්පාඤ්ඤ භාෂාව කතා නොකරන රටවල් මොනවාද, එක්සත් ජාතීන්ගේ සංවිධානය පිහිටුවීමට අත්සන් තැබූ ආරම්භක රටවල් කොපමණද,  ලංකාව එහි සාමාජිකත්වය ගත්තේ කුමන වසරේද හෝ න්‍යෂ්ටික අවි ගබඩා නිල වශයෙන් තබාගෙන ඉන්නා රටවල් කොපමණක් තිබේද වැනි ප්‍රශ්න තරගකරුවන්ට ඉදිරිපත් කරනවා අසා නැත.  

“ජීවිත කාලය පුරා සංගීතයට කෙරුණු දායකත්වය” වෙනුවෙන් පිදෙන “ග්‍රැමි සම්මානය” ලැබූ ආසියානු සංගීතඥයා කවුරුන්දැයි යන්න හෝ කොපමණ කලු ජාතිකයින් ඔලිම්පික් රන් පදක්කම දිනා ඇතිදැයි වැනි ප්‍රශ්න තරගකරුවන්ට ඉදිරිපත් කෙරෙනවාද අසා නැත. 

 “ලක්ෂපති” වැඩසටහන සඳහා ප්‍රශ්න සකසන මඬුල්ලෙහි කොපමණ දෙමළ හා මුස්ලිම් විද්වතුන් ඉන්නේදැයි කවුරුන් හෝ කියන්නේ නම් වැදගත් ය.  කොපමණ කාන්තාවන් ඉන්නේදැයි කියන්නේ නම්, එයද ඉතා වැදගත්ය.  

එවගේම කවර විෂය ක්ෂේත්‍ර ආවරණය වන්නේදැයි කියන්නේ නම් එයත් වැදගත් ය. ඉදිරිපත් කෙරෙන ප්‍රශ්න අනුව නම්, ප්‍රශ්න හැදෙන්නේ “ලක්ෂපති” වැඩසටහන සමාජගත කිරීමේ සිංහල-බෞද්ධ මතවාදය හා එක මග යෑමටය. එබැවින් “ෂුක්රලා” සමාජගත කරනු ඇත්තේ ප්‍රචාරක වෙළඳපල තරගයට මිස “බහු සංස්කෘතික” සමාජයක් වෙනුවෙන් නොවන බව ඉදිරියටත් දැකිය හැකි වනු ඇත.  

ගෝලීය මහ බලවතුන්ගේ අනුග්‍රහය ඇතිව නොබෙල් සාම ත්‍යාගය ලැබූ පාකිස්තානි යුවතිය මලාලා යූසෆ්සායි කලක් තොරම්බල් වූ අයුරු, අවසානයේ වෙළඳපල තරගයෙහි අලෙවිවන “ෂුක්රලා” ගැන ඉතිරි වන්නේ අනුකම්පාවක්ම පමණි.  

කුසල් පෙරේරා –  සමාජ හා දේශපාලන විශේලේෂක හා ප්‍රවීන මාධ්‍යවේදී 

විද්‍යාව හා තාක්ෂණයේ දියුණුවත් සමඟ වෛද්‍ය විද්‍යාව නව දිශානතියකට ගමන් කර ඇත. අද්‍යතන සමාජය තුළ අති නවීන වෛද්‍ය උපකරණ මෙන්ම නවීන වෛද්‍ය සේවාවන් සමඟ කැටි වූ සමස්ත වෛද්‍ය පද්ධතිය පිළිගැනීමට ලක්ව ඇත.

ගැහැණියකු පිරිමියෙකු බවටත්, පිරිමියෙකු ගැහැණුයෙකු බවට පත් කිරීමට පමණක් නොව විවාහක යුවලගේ අභිමතය පරිදි දුවෙක් හෝ පුතෙක් ලබා ගැනීමට තරම් වෛද්‍ය විද්‍යාව දියුණු වී ඇත.

මෙවැනි පසුබිමක් මත විවාහක බොහෝ දෙනෙකුට පවතින ගැටලූවක් ලෙසට දරුඵල නොමැති වීම පෙන්වා දිය හැකිය. මෙම ගැටලූවට විසඳුමක් ලෙසින් නළ දරු තාක්ෂණය සමකාලීන සමාජය තුළ ජනප‍්‍රිය වී ඇත. එබැවින් නළ දරු තාක්ෂණය පිළිබඳ වැඩිදුර කරුණු පිළිබඳ අවධානය යොමු කිරීම වැදගත් වේ.

වෛද්‍යතුමනි, නළ දරු තාක්ෂණය යනුවෙන් අදහස් වන්නේ කුමක්ද?

නළ දරු තාක්ෂණය යනුවෙන් අදහස් වන්නේ, කාන්තාවකගේ ඩිම්බයක් සහ පිරිමියෙකුගේ ශ‍්‍රකාණුවක් පිටතට ගෙන එය පරේෂණාගාරයක් තුළ දී කළලයක් නිපදවා එය කාන්තාවකගේ ගර්භාෂයේ තැම්පත් කිරීමේ කාර්යයි. එය අපි IVF (In Vitro Fertilization) තාක්ෂණය ලෙස හඳුන්වනවා.

විවාහක යුවලකට දරු සම්පත් අහිමිවීමට බලපාන සාධක මොනවාද?

විවාහක යුවලකට දරු සම්පත් අහිමිවීම කෙරෙහි බලපාන සාධක කිහිපයකි. ඒ අතරින් මද සරුභාවය (Infertility ප‍්‍රමුඛ කාරණය වේ. එමෙන්ම පහත සඳහන් සාධක ද මේ සඳහා බලපායි.

1. ඩිම්බකෝෂවල නිසි පරිදි ඩිම්ඩ මේරීම සිදු නොවීම.
2. පුරුෂයාගේ ශ‍්‍රකාණුවල ප‍්‍රමාණය සහ ගුණාත්මකභාවය අඩුවීම.
3. පැලෝපීය නාළවල අවහිරතා.
4. ගර්භාෂය ඇතුළු ස්ත‍්‍රි ප‍්‍රජනන පද්ධතියේ අසාමාන්‍යතා.
5. මානසික පීඩනය නිසා ඇතිවන හෝර්මෝන අසමතුලිතතා.
   උක්ත හේතු සාධක වලට අමතරව කිසිදු හේතු සාධකයක් නොමැතිව විවාහක පිරිසගෙන් 30%ක් පමණ පිරිසක් දරුවන් පිළිසිඳ ගැනීමට පවතින හැකියාව නොමැති වීම යනාදි කරුණු පෙන්වාදිය හැකිය.

නළ දරු තාක්ෂණය භාවිත කළ හැක්කේ කුමන පුද්ගලයින්ටද?

පුරුෂයාගේ ශ‍්‍රකාණු ප‍්‍රමාණය මිලියන 05කට වඩා අඩු නම් සහ ශ‍්‍රකාණුවල සක‍්‍රීයභාවය අඩු නම් ස්භාවික ක‍්‍රමවේදයට දරුවෙකු සාදා ගැනීමට නොහැකි ය. නමුත් නළ දරු තාක්ෂණයෙන් ශ‍්‍රකාණු මිලියනයටත් අඩු අයටත් දරුවකු සාදා ගැනීමට පුළුවනි. ශ‍්‍රකාණු නිපද වූ නමුත් ශ‍්‍රක නාළවල අවහිරතා ඇති විටදීත් නළදරු ක‍්‍රමය භාවිත කළ හැකිය. ඇතැම් පුරුෂයින් තුළ උපතින් ම ශ‍්‍රකාණුවල දුර්වලතා පවතියි. ඔවුන්ටත් මෙම තාක්ෂණය යොදා ගත හැකියි.

කාන්තාවක් විවාහ වී අවුරුද්දක් ගත වූවත් දරුවෙකු නැති නම්, වෛද්‍ය ප‍්‍රතිකාර සඳහා යොමුවිය යුතුය. දරුවෙකු නැති වීමට හේතුව කාන්තාවගේ ඩිම්බකෝෂවල ඩිම්බ නොසෑදීම හෝ ඩිම්බකෝෂවල අක‍්‍රියතාව නිසා නම්, නළ දරු ක‍්‍රමය මඟින් දරුවෙකු සාදාගත හැකිය. ඒ වගේම දරුඵල අහිමි වයස්ගත කාන්තාවන්ට ද මෙම ක‍්‍රමවේදය යොදා ගත හැකිය.

තවද එන්ඩොමෙස්ටි‍්‍රයෝසිස් (Infertility නම් රෝගය ඇතිවිට, ඔවුන්ගේ ඩිම්බකෝෂවල සහ පැලෝපීය නාළවලට හානි සිදුවීම නිසා ස්භාවික අයුරින් දරුවෙකු සාදා ගැනීමට නොහැකිය. ඒ අයට ද මෙම ක‍්‍රමය භාවිත කළ හැකිය.

නළ දරු තාක්ෂණය හැරුණු විට දරුඵල ලබා ගැනීමට වෙනත් ක‍්‍රමවේද පවතිනවා ද?

ඉහත සඳහන් ගැටලූ ඇති පුද්ගලයින් ප‍්‍රථමයෙන් ම IUI (Intra Uterine Insemination) තාක්ෂණය මඟින් ප‍්‍රතිකාර ලබාගත යුතුය. එහිදී ඩිම්බ මේරිමේ ගැටලූ ඇති කාන්තාවන්ට ඖෂධ මඟින් ඩිම්බ මේරීම සිදුකරන අතර ශ‍්‍රකාණුවල සක‍්‍රීය භාවය අඩු පිරිමින්, ඔවුන්ගේ ශ‍්‍රකාණු ඩිම්බයක් ආසන්නයේ තැම්පත් කිරීම සිදුකළ හැකිය. මෙම ක‍්‍රියා මගින් සාර්ථක ප‍්‍රථිඵල නොලැබුණේ නම් පමණක් නළ දරු ක‍්‍රමයට යා යුතුය. එනම් නළ දරු තාක්ෂණයට යා යුත්තේ IUI තාක්ෂණයේ ප‍්‍රථිඵල අසාර්ථක නම් පමණයි. හෝර්මෝන ආබාධ නිසා, අක‍්‍රමවත් ඔසප් චක‍්‍රයක් සහිත දරුවන් නොමැති කාන්තාවන් සඳහා ද උපතින් ම ශ‍්‍රකාණුවල දුර්වලතා පවතින අයට ද මෙම ක‍්‍රමය භාවිත කළ හැකිය.

තවද පුරුෂයාගේ ශ‍්‍රකාණුවල සක‍්‍රීයතාව ඉතා දුර්වල නම්, එවැනි අවස්ථාවක දී ශ‍්‍රකාණුවක් ඩිම්බයකට එන්නත් කර සංසේචනය Intra Cytoplasmic Sperm Injection කිරීම නැමති තාක්ෂණය යොදා ගැනේ.

මුලින් ම විස්තර කළ IUI තාක්ෂණය සිදු කර එය අසාර්ථක වූයේ නම් පමණක් පරීක්ෂණාගාරයක් තුළදී කළලයක් නිපදවා එය කාන්තාවකගේ ගර්භාෂයේ තැම්පත් කළ හැකිය. IUI තාක්ෂණය පස් වතාවකට වඩා සිදු නොකරයි. එම අවස්ථාවන් පහේම කළලයක් බිහි නොවන්නේ නම්, කළලයක් තැම්පත් කිරීමේ ක‍්‍රමවේදයට යොමුවිය යුතුය.

(අපේක්ෂා රෝහලේ වෛද්‍යවරයෙකු සමඟ සිදුකළ සංවාදයක් ඇසුරිනි – සංවාදය සහ සටහන – ප‍්‍රසාදිනි ජයලාල්

බස්නාහිර පළාතේ පාසල් විවෘත කිරීමේ සැලැස්ම ඉදිරි දෙසතිය ඇතුළත සකස් කරන බව අධ්‍යාපන අමාත්‍ය මහාචාර්ය, ජී.එල් පීරිස් මහතා අද (18) බත්තරමුල්ල වෝටර්ස් ඒජ් හිදී පැවති මාධ්‍ය හමුවකදී පැවසුවේය.

බස්නාහිර පළාතේ හුදෙකලා කර ඇති ප්‍රදේශ හැර සෙසු ප්‍රදේශවල පාසල් විවෘත කිරීමේ හැකියාවක් මේ වන විට පවතින බව කී අමාත්‍යවරයා පාසල් ආරම්භ කළ හැකි දිනයන්, ආරම්භ කරන ආකාරය, අනුගමනය කළ යුතු කරුණු ආදිය ඇතුළත්ව මෙම සැලසුම සකස් කිරීම සම්බන්ධයෙන් වන සාකච්ඡාවක් අනිද්දා (20) පැවැත්වෙන බව ද සදහන් කළේය.

ජනාධිපතිවරයා, සෞඛ්‍ය අංශ බලධාරීන්, අමාත්‍යාංශ ලේකම්, කොවිඩ් මර්දන කාර්ය සාධක බළකා සාමාජිකයින්, බස්නාහිර පළාත් ආණ්ඩුකාරවරයා ඇතුළු පිරිසක් අනිද්දා පැවැත්වෙන සාකච්ඡාවට සහභාගී වන බව ද අධ්‍යාපන ඇමැතිවරයා පැවසීය.

පෙබරවාරි මාසයේ දෙවන සතියේ සිට මෙරට ජනතාවට කොවිඩ් එන්නත් ලබාදීම ද ඇරඹෙන බැවින් සියලු බලධාරීන්ගේ නිර්දේශ අනුව බස්නාහිර පළාතේ පාසල් ආරම්භ කළ හැකි බව ද අධ්‍යාපන අමාත්‍යවරයා සඳහන් කළේය.

මෙවර සාමාන්‍ය පෙළ විභාගයට පෙනී සිටින බස්නාහිර පළාත් සිසුන් වෙනුවෙන් පමණක් ලබන 25 වැනිදා පාසල් ඇරඹෙන බව ද ඇමැතිවරයා සදහන් කළේය

සුපිරි නිළියන් නැතහොත් රූමතියන් ගැන කතා කරන කොට අපි වැඩියෙන් අවධානය යොමු කරන්නේ හොලිඩුඩය හෝ බොලිවුඩය වෙත. ඒත් හොලිඩුව් හා බොලිවුඞ් සුරූපියන් පහසුවෙන් පරාජය කළ හැකි සුන්දර නිළියන් තවත් ඉන්නවා. ඒ අතර රුසියානු රූමතියන්ට හිමිවන්නේ ප‍්‍රමුඛ තැනක්.

ඒ නිසාම අපි තීරණය කළ රුසියානු සිනමා තාරකාවන් අතර සුපිරිම තරු ඔබට හඳුන්වා දෙන්න. මෙය සැබැවින්ම අභියෝගාත්මක කාර්යයක් බව ඔබට අමුතුවෙන් කිවයුතු නැහැ. ඒත් විවිධාකාර නිර්ණායක සහ අදහස් පදනම් කර ගනිමින් ඒ අසීරු උත්සාහය යම් පමණකට හෝ ජය ගන්න අපිට හැකියාව ලැබුණා.

1. ඔල්ගා කුරලෙන්කෝ / Olga Kurylenko

ඔල්ගා Olga Kurylenko යුක්රේන තාරකාවක් බව කවුරුත් දන්නා නමුත් සාධාරණ ලෙස කිවහොත් ඇය උපත ලැබුවේ සෝවියට් දේශයේ වන අතර ඇගේ මව රුසියාවෙන් පැමිණි කාන්තාවක්. එබැවින් ඇගේ මුල් වලින් එකක් රුසියානු භූමියේ බව අපි කියමු. 

ඔල්ගා නිරූපිකාවක් ලෙස වෘත්තීය ජීවිතය ආරම්භ කළ අතර විලාසිතා ප්‍රදර්ශන සහ සඟරා ආවරණ සඳහා පෙනී සිටියාය. 

ඔල්ගාගේ රංගන ජීවිතය ආරම්භ වූයේ 2006 දී ය. ඇය “Paris, I love you” චිත්‍රපටයේ පෙනී සිටියාය. සිය වෘත්තීය දිවියේ ආරම්භයේ දී කුරිලෙන්කෝ දෙවරක් ගණිකාවක් ලෙස රඟපෑ නමුත් පසුව ඇයට පෙම්වතියගේ/ වීරවරියගේ චරිතය ලැබුණි. එය ඇගේ පෙර චරිත වලට බෙහෙවින් සමාන වුවත්, එය ඇගේ අනාගත ව්‍යාපෘති සඳහා විශාල අනුබලයක් විය.

2. ඇග්නියා ඩිට්කොව්ස්කිට්/Agnia Ditkovskyte

ඇග්නියාට සරාගී පෙනුමක් හා ආකර්ශනීය සිනහවක් ඇත. ඇයට සිනමා අධ්‍යාපනයක් නොතිබුණද, ඇග්නියා Heat චිත්‍රපටයේ සාර්ථක භූමිකාවක් රඟ දැක්වූවාය. චිත්‍රපටයේ මංගල දර්ශනයෙන් පසුව ඇය ප්‍රසිද්ධ අධ්‍යක්ෂවරුන්ගේ අවධානයට ලක් වී ඉතා කාර්යබහුල වූ අතර තවත් චිත්‍රපට 12 ක රඟපෑවාය.

3. එක්තරීනා ක්ලිමෝවා –  Ekaterina Klimova

මුදු මොළොක් සුන්දරත්වය, චමත්කාරය සහ කතාකරන සරාගී දෑසින් මෙම අපූරු නිළිය එක් රුසියානු හදවත ජයගෙන ඇත. ඒ අතරම, ඇය සැමවිටම සංවේදී හා බිඳෙන සුළුය. ඇගේ චිත්‍රපට ගණන මේ වන විට 50 ගණන්වල පසුවන නමුත් ඒ කිසිවක් ඔස්කාර් සම්මානයට පාත්‍ර නොවීය. සිනමාවට අමතරව, ක්ලිමෝවා බොහෝ විට නාට්‍ය වේදිකාවේ දැකිය හැකිය.

4. මරීනා වොල්කෝවා / Marina Volkova

1992 දී උපත ලැබූ මෙම තරුණ තාරකාව ඇගේ පළමු භූමිකාව 17 වැනි වියේදී girl #1 සිනමාපටයෙන් ආරම්භ කළ නමුත් ඇයට සැබෑ කීර්තිය ලැබුණේ ජනප්‍රිය රුසියානු Interns හි පෙනී සිටීමෙන් පසුවය.

5. මරීනා ඇලෙක්සැන්ඩ්‍රෝවා /Marina Alexandrova

මරියා අසාමාන්‍ය ලෙස සුන්දරය. ඇගේ දෝෂ රහිත ශරීරය, පරිපූර්ණ හිසකෙස් සහ සමමිතික මුහුණේ ලක්ෂණ වලට අමතරව මරීනා කැපී පෙනෙන නිළියකි. චිත්‍රපටවල රඟපෑම හැරුණු විට ඇය සෝවර්මෙනික් රඟහල වේදිකාවට නිතර යන අතර රියැලිටි වැඩසටහනකට සහභාගී වේ.

6. නටාලියා රුඩෝවා /  Natalia Rudova

මෙම සුරූපී නිළිය මීට ටික වේලාවකට පෙර රූපවාහිනී තිරවල පෙනී සිටියද අනාගත රසිකයින්ට ඇගේ සතුටු සිතින් සිනහව හා ආකර්ශනීය මුහුණ වැලඳ ගැනීමට එය ප්‍රමාණවත් නොවීය. Univer නම් රූපවාහිනී කතා මාලාවේ අපූරු භූමිකාවෙන් පසුව ඇය යෞවනයින් අතර උමතුවක් බවට පත්විය. වර්තමානයේ ඇයගේ සිනමා කෘතියේ චරිත 20 කට වඩා තිබේ.

7. නස්ටස්යා සම්බර්ස්කයා Nastasya Samburskaya

මෙම හුරුබුහුටි නිළිය මේ වන විටත් චිත්‍රපට, සංගීත වීඩියෝ සහ නාට්‍ය කිහිපයකම පෙනී සිටිමින් රුසියානු රසිකයන් මිලියන ගණනකගේ හදවත් දිනා ගෙන තිබේ. “යුනිවර්” නම් රූපවාහිනී කතා මාලාවේ ඇයගේ ඉහළ චමත්කාරය, විචක්ෂණශීලී පෞරුෂය සහ දෝෂ රහිත රංගනය ඇයට ලැබිය යුතු කීර්තිය ගෙන ආවේය.

8. ක්‍රිස්ටිනා අස්මස් /  Kristina Asmus

මෙම ආදරණීය නිළිය “ඉන්ටර්න්ස් / Interns” නම් රූපවාහිනී කතා මාලාවේ සහ පසුව “සොලුෂ්කා Zolushka” චිත්‍රපටයේ පළමු භූමිකාවෙන් පසුව පුපුරා ගියේය. 2010 දී විලාසිතා සඟරාව වන “ග්ලමූර් Glamur. ” විසින් ඇය “වසරේ හොඳම රූපවාහිනී නිළිය” ලෙස නම් කරන ලදී.

9. යුලියා ස්නිගීර් /  Yulia Snigir

ඇය කුඩා කල සිටම යුලියාට භාෂා පිළිබඳ මනා දැනුමක් තිබුණත් ගුරුවරියක් වීම ඇගේ සිහිනය නොවීය. ඇයට නිළියක් වීමට අවශ්‍ය විය. ඔබට සිතාගත හැකි පරිදි, සමහර විට සිහින සැබෑ වේ! යුලියාගේ පළමු රංගනය Zveri සංගීත කණ්ඩායමේ මියුසික් වීඩියෝව තුළ වූ නමුත් ඇය එතැන් සිට බොහෝ දුර පැමිණ ඇත. යුලියා අවස්ථා කිහිපයක් අසමත් වන්නට ඇති නමුත් අවසානයේ ඇය බෘෘස්  Bruce සමග “Die Hard” හි තිරය මත පෙනී සිටියාය. රුසියානු තරුවකට එය සුළුපුටු කාරණයක් නොවේ.

සැකසුම – තුෂාධවි

රේසර් පවසන්නේ මෙම මුහුණු ආවරණයෙන් තොල්වල චලනයන් කියවීමට ඉඩ සලසන බවය

වීඩියෝ ගේම් නිෂ්පාදන සමාගමක් වන රේසර් විසින් ස්මාර්ට් මුහුණු ආවරණයක් සාදා ඇත. මයික්‍රෝෆෝනයකින් සමන්විත වන එය ලොව ඇති විශිෂ්ඨතම මුහුණු ආවරණය ලෙස ඔවුහු හඳුන්වති.

CES (Consumer Electronics Show) තාක්ෂණික සමුළුවේදී එළිදක්වන ලද මූලාකෘතිය නිමවා ඇත්තේ පරිශීලකයින්ගේ හඬ වැඩි කර පිටතට ඇසෙන ලෙසය. මෙයින් මුහුණු ආවරණ පැළඳ කතා කිරීමේ අපැහැදිලි බව මඟ හැර ගත හැකිය.

මෙය සැලසුම් කර ඇත්තේ වාතාශ්‍රය හොඳින් ලැබෙන පරිදිය. පිටතින් සිසිල් වාතය ඇද ගන්නා අතරම උණුසුම් හුස්ම පිට කරනු ඇත.

සමාගම පවසන්නේ මෙය N95 ශල්‍ය මුහුණු ආවරණයක් ලෙස වර්ගීකරණය කර ඇති බවය. කෙසේනමුත් බීබීසී සේවය මෙම නිෂ්පාදනය සමාලෝචනය කර නොමැත.

මුහුණු ආවරණය විනිවිද පෙනෙන ප්ලාස්ටික් වලින් නිමවා ඇති අතර, මෙමඟින් මිනිසුන්ගේ තොල්වල රටා කියවීම සහ මුහුණේ ඉඟි ලබා ගැනීම පහසු කරයි.

කෙසේනමුත් විනිවිද පෙනෙන මුහුණු ආවරණ යනු නවෝත්පාදනයක් නොවන අතර, මේ වන විට ද එවැනි නිෂ්පාදන වෙළෙඳපොලේ ඕනෑ තරම් තිබේ. කෙසේවෙතත් සමාගම පවසන්නේ මෙම මුහුණු ආවරණයේ “අඩු ආලෝකය යටතේ ක්‍රියාකරන ක්‍රමයක්” ඇති බවය.

එයින් අදහස් කරන්නේ අඳුරු ස්ථානයක මුහුණු ආවරණයේ අභ්‍යන්තරය ස්වයංක්‍රීයව ආලෝකමත් වන බවය. එයින් ඔබේ මුව ද ආලෝකමත් වේ.

රේසර් සමාගම කියා සිටින්නේ මෙයින් ඔබට “ආලෝකකරණ තත්වයන් නොසලකා හැර පැහැදිලිව ප්‍රකාශ කිරීමට ඉඩ සලසන” බවය.

ඇතුළත ඇති සියලු තාක්‍ෂණය සමඟ මෙය පැළඳ සිටීම පහසු ද?

බීබීසී සේවයේ තාක්ෂණික කණ්ඩායම මෙය අත්හදා බලා නොමැත.

නමුත් රේසර් සමාගම පවසන්නේ සිලිකන් රවුමක් සවි කර ඇති නිසා එය පැළඳ සිටීම පහසු වන අතර, මුහුණ ආවරණය ඔබේ මුඛයේ වැදීමෙන් වළක්වන බවය.

කන් පෙති වටා යොදන පුඩුව පළල්ව නිමවා ඇති නිසා ඔබේ කනට දැනෙන පීඩනය ද අවම බව සමාගම පවසයි.

පේටන්ට් බලපත්‍රයක් සහිත මුහුණු ආවරණයේ “වොයිස්ඈම්ප්” අංගය මෙහි වඩාත්ම තාක්ෂණික වශයෙන් දියුණු අංගයකි.

සමාගම පවසන්නේ අභ්‍යන්තර මයික්‍රෆෝනය සහ විකාශන යන්ත්‍රය ඔබේ කටහඬ වඩාත් පැහැදිලි කරන බවය.

සම්ප්‍රදායික මුහුණු ආවරණයකින් නාසය සහ මුඛය වැසීමත් සමඟ අපැහැදිලි කටහඬ විශේෂ ගැටළුවක් විය හැකිය.

මෙය සංකල්පීය නිෂ්පාදනයක් වන අතර එය දැනට වෙළෙඳපොලේ නොමැත. බීබීසී සේවය රේසර් සමාගමෙන් මේ පිළිබඳ විමසීමක් කර ඇති නමුත් තවමත් ප්‍රතිචාරයක් ලැබී නොමැත.

කෙසේවෙතත්, The Verge (ද වර්ජ්) තාක්‍ෂණ වෙබ් අඩවියෙන් කරුණු විමසීමේ දී කියා සිටියේ මුහුණු ආවරණයේ පෙරහන් වෙනස් කළ යුතු කාලය සහ වාතාශ්‍රය සපයන කොටසේ කල්පැවැත්ම ගැන තවමත් පරීක්‍ෂා කරමින් සිටින්නේ යයි රේසර් සමාගම පැවසූ බවය.

මෙම වසරේ CES ප්‍රදර්ශනයේදී අනෙකුත් සමාගම්වලින් ද ඉතා ආකර්ෂණීය සංකල්ප නිෂ්පාදන එළිදැක්වීය.

• ජෙනරල් මෝටර්ස් වෙතින් කැඩිලැක් සන්නාමය යටතේ සිරස් අතට ඉහළට නැංවිය හැකි සහ ගොඩබෑමේ විද්‍යුත් වාහනය
• ආහාර නිර්දේශ ලබා ගැනීම සඳහා ටෝටෝ සමාගම වෙතින් ඔබේ මලපහ විශ්ලේෂණය කරන වැසිකිළියක්
• ටීසීඑල් වෙතින් අනුචලනය වන ටැබ්ලට් තිරයක්

එම නව නිර්මාණ අතරින් කීපයකි.

Text by bbc sinhala

ඕනෑම දෙමාපියෙකුගේ ලොකුම ආසාව තමන්ගේ දරුවා ඉහළට ඉගෙන ගෙන වෛද්‍යවරයෙක් ඉන්ජිනේරුවෙක් වෙනවා දකින්න. ඉහළ ආදායම, ඉහළ සමාජ පිළිගැනීම වාගේ කාරණා ඒ සඳහා බලපානවා වෙන්න ඇති.

ඒත් වර්තමාන ලෝකයේ ‘රැකියාව’ කියන සාම්ප‍්‍රදායික සංකල්පය විශ්වාස කළ නොහැකි තරමට අභියෝගයට ලක්වෙලා. අද වැඩියෙන්ම උපයන්නේ, වැඩිම පිළිගැනීමක් ඇත්තේ වගේම වැඩියෙන්ම සතුටින් සිටින්නේ සාම්ප‍්‍රදායික රැකියා ක්ෂේත‍්‍රය අතික‍්‍රමණය කළ පුද්ගලයින්.

මේ අතර පැන්සල, පින්සල අතට ගත් අයත් ප‍්‍රධානයි. ජාත්‍යන්තර අවශ්‍ය නැහැ, ලංකාව ගත්තත් සිබිල් වෙත්තසිංහ වැඩිහිටි පරම්පරාව වගේම නව පරම්පරාවේ ජානකී සූරියාරච්චි වැනි චරිතත් සාම්ප‍්‍රදායික රැකියා සිහිනවලට අභියෝග කළ අය වශයෙන් සැලකිය හැකියි. මේ තත්ත්වය ඔඩෙල් අධිපතිනී ( හිටපු) ඔටාරා ඩෙල් ගේ සිට තවත් ඉදිරියට යනවා.

අපි මෙතැන් සිට ගිරාගම සෞන්දර්ය ගුරු අධ්‍යාපන පීඨයේ හිටපු ජ්‍යෙෂ්ඨ කථිකාචාර්ය ‘චාල්ස් දයානන්ද ’ මහතාට සවන් දෙමින් දරුවන් අතට පැන්සලයි පින්සලයි දුන් විට සිදුවන ඓශ්චර්යය ගැන කියවමු.

හැම ළමයෙක් ම චිත‍්‍රවලට උනන්දු නොවන්නේ ඇයි ?

හැම දරුවෙක් ම චිත‍්‍ර අඳිනවා. චිත‍්‍ර නොඅඳින ළමයෙක් නම් ඒ දරුවාටට යම්කිසි මානසික අඩුපාඩුවක් වගේ දෙයක් තිබිය හැකියි. මල් කැකුළු වාගේ දරු දැරියන් චිත‍්‍ර කලාව සමග එක් වූ විට ලෝකය තව තවත් ලස්සන වෙනවා. දරුවෙකු තනිවම කරන එකම ක‍්‍රියාව කුරුටු ගෑම වශයෙන් හඳුනා ගෙන තිබෙනවා. එහෙම කුරුටු ගාන දරුවා මේ මගේ අම්මා, මේ මගේ තාත්තා කියලා නම් කරනවා. සමහර විට එක ඉරිකෑල්ලක් ඇතුළේ දරුවා දකින අම්මා, තාත්තා ඉන්නවා. මෙන්න මේ සුන්දරත්වය අවුරුදු පහක් දක්වා මහ ඉහළින් පෙන්නුම් කරනවා. ජීවිතයට එකතු කර ගන්නවා. ඒ වනවිට දරුවාට තමන් හිතන වාහනයක්, ගහකොළ, ගොඩනැගිලි අඳින්න පුළුවන්. ඉන්පසු පාසල් යනවා. පහේ පන්තිය දක්වාම එම අවස්ථා ඔහුට හිමිවෙනවා. වෙනත් රටවල් හා බැලීමේදී අපේ රටේ ප‍්‍රථමික අධ්‍යාපනය ඉහළයි. එය යහපත් තත්ත්වයක්. පහේ ශිෂ්‍යත්ව විභාගය නැතිනම් තවත් ඉහළයි.

නිර්මාණකරණය තියෙන්නේ සිරුරේමයි

උපත සමග නිර්මාණකරණය මානවයාගේ සිරුරේම තිබෙනවා. අපේ වගකීම මේ තත්ත්වය වගකීමෙන් යුතුව ඉදිරියට ගෙනයාමට දැරුවා දිරිගැන්වීමයි. තරඟකාරී අධ්‍යාපනය තුළ සිදුනොවන්නෙත් ඒ දේමයි. ඒ සඳහා විධිමත් අධ්‍යාපන වැඩපිළිවෙළක් තිබිය යුතුයි. අපූරුවට කුරුගෑ දරුවා ශිෂ්‍යත්වය සමග මර උගුලක පටළනවා. එතැන් පටන් දරුවාගේ නිර්මාණ ශක්තිය මරාදමන්න උත්සාහ ගන්නවා. ඒක දෙමාපියන්ගේ වරද නොවෙයි. අධ්‍යාපන ක‍්‍රමයේ වරදයි. අධ්‍යාපන ක‍්‍රමය මගින් පියවරෙන් පියවර දරුවා මරාගෙන යනවා කියලයි මම දකින්නේ.

එහෙම ගෙනියන දරුවා විභාග රේස් එකෙන් පස්සේ විශ්වවිද්‍යාලයට එනවා. එතැන නවක වධය, ප‍්‍රචණ්ඩත්වය වගේ දේවල්, මිනීමරුවන් දක්වාත් ඇතැම් අය පත්වෙනවා. අහිංසක සුන්දර මල් වැනි දරුවන් මේ වින්නැහියට පත් කළේ කවුද ? අධ්‍යාපනය හා නොගැළපෙන සමාජ ක‍්‍රමය කියලයි මම කියන්නේ.

මවු කුසින් අපරාධකරුවෝ බිහිවෙන්නේ නැහැ

කිසිම දිනක මවු කුසින් අපරාධකරුවෝ බිහිවෙන්නේ නැහැ. බිහිවන සුන්දර මල් කැකුළ අපරාධකරුවකු බවට පත් කළේ කවුද කියන එක ගැන සමාජය හොයන්නේ නැහැනේ. පස්වැනි ශේ්‍්‍රණියට එනතුරු සුන්දර ළමයා චිත‍්‍ර කලාව හැදෑරුවත්, එතැනින් ඔබ්බට එය ළමයාට නොගැළපෙන සහ අධ්‍යාපනයට වටිනාකමක් නැති දෙයක් බවට පත්කර තිබෙනවා. ඒකත් කරන්නේ අධ්‍යාපනයෙන්මයි.

යල්පැනගිය මූලධර්ම

අදටත් අපේ රටේ සාමාන්‍ය පෙළ පන්තිය දක්වාම චිත‍්‍ර කලාව හැදෑරීමට අවස්ථාව තිබෙනවා. ඒත් තවමත් අපේ රටේ තියෙන්නේ 15-16 වැනි සියවස්වල තිබුණු යුරෝපා ඇකඩමිවල මූලධර්ම පදනම් කරගත් චිත‍්‍ර කලාවක්. අපි ඉන්නේ එතැනයි. මම කලින් සඳහන් කළ ආකාරයට නිදහස් අදහස් ගලාගෙන ඇවිත් කුරුටු ගෑ දරුවාට, චිත‍්‍ර ඇන්ද දරුවාට පාසල් අධ්‍යාපනයේ ඉහළට එනවිට ලැබෙන්නේ ඒ යල්පැනපු මූලධර්ම උපුටා හැඳු විෂය නිර්දේශයක්. එතනිදී ඒ විෂයේ ප‍්‍රධාන අංශ තුනයි. ඒ ප‍්‍රකාශනය, මොස්තර හා ද්‍රව්‍ය කියලා. එතකොට ලබාගත් නිදහස් අත්දැකීම් හා සිතුවිලි යටපත් වෙලා කෘති‍්‍රම පැරණි විෂය නිර්දේශයක සීමාට ළමයා යටත් වෙනවා. ළමයා හිතන්නේ මේක තමයි චිත‍්‍ර කලාව කියලා. මම කියන්නේ මේ කලාව වහාම වෙනස් විය යුතුයි කියන එකයි. අධ්‍යාපනය වෙනස් නොවන්නේ නම් අපි වෙනස් කළ යුතුයි.

අපි චිත‍්‍ර රස නොවිඳින්නේ ඇයි ?

චිත‍්‍රයක් රස විඳීමට නම් දැනුමක් තිබිය යුතුයි. ඒ කියන්නේ අපේ සමාජයට චිත‍්‍රයක් කියවා හෝ නරඹා තේරුම් ගැනීමට දැනුමක් නැහැ. මොඩර්න් ආර්ට් කියන එක තේරෙන්නෙම නැති තරම්. මොඩර්න් ආර්ට් කියන්නේ චිත‍්‍ර කලාවේ ප‍්‍රගමනය තුළ ඇති වූ දැවැන්ත යහපත්, කාලීන විපර්යාසයක ප‍්‍රතිඵලයක්. කොයි තරම් හොඳ නවකතාවක්, කෙටිකතාවක් වුණත් භාෂාව නොදැන තේරුම් ගන්න බැහැ වගේ තමයි චිත‍්‍රයක් වුණත් දැනුම නැතිව තේරුම් ගන්න බැහැ කියන එක.

චිත‍්‍ර කලාවේ දේශීය පැත්ත

දේශීයත්වයෙන් මිදී විශ්ව කලාවක් බවට පත්ව ඇත්තේ චිත‍්‍ර කලාව පමණයි. සින්දුවක්, නැටුමක්, පොතක් ඒ අනුව කිනම් රටක, ජාතියකට අයත්දැයි හඳුනාගන්න පුළුවන්. ඒත් චිත‍්‍රයක නිර්මාණකරුවාගේ නම, ගමක් නැතිව තිබුණොත් මේ අහවල් රටේ චිත‍්‍රයක් කියලා කියන්න බැහැ. ඒ නිසයි මම කිවුවේ දේශීය අනන්‍යතාවයෙන් මිදී අපි විශ්ව කලාවක් දක්වා අපේ චිත‍්‍ර කලාව සමග ඉදිරියට යා යුතුයි කියලා. ආධ්‍යාත්මක මානසිකත්වය කරා ළමයාගේ මනස පන්ති කාමරයේ පටන් ගොඩනැංවිය හැකියි. ඒත් අපේ රටේ පවතින අධ්‍යාපන ක‍්‍රමය තුළ ඒ ගැන හිතන්න අමාරුයි.

නොහැකියාවට හේතුව කුමක්ද ?

අධ්‍යාපනයේදී චිත‍්‍ර කලාව විෂය නිර්දේශය සකස් කරන්නේ ඒ පිළිබඳ නූතන දැනුමක් හෝ ප‍්‍රයෝගික අත්දැකීම් ඇති මිනිස්සු නොවෙයි. ජීවිතේට චිත‍්‍රයක් ඇඳලා හෝ ප‍්‍රදර්ශනයක් නොකළත්, නරඹපු මිනිස්සුද කියන එකත් සැකයි. යම් භූතයින් පිරිසක් මේ මහ පුටුවල කලක සිට වාඩි කරවීමේ විපාකය මෙරට චිත‍්‍ර කලාවට සිදුවූ විශාලම හානියයි. රස වින්දනයක් නැති, සුන්දරත්වය නොහඳුනන මිනිසුන් සමාජයට බිහි වුණේ එතැනින්.

දැඩි දඬුවම්, එල්ලූම්ගස් නීතිය ගැන සංවාද කරනවා. මට කියන්න නූතන චිත‍්‍ර කලාව සහ දේශීය චිත‍්‍ර කලාව ජාත්‍යන්තර දක්වා ගෙන යාම සම්බන්ධයෙන් සංවාද කීයක් සතියකට තියෙනවාද ? විශ්වවිද්‍යාල කීයක එහෙම සංවාද තියෙනවාද කියලා. චිත‍්‍රපට, නාට්‍ය ගැන නම් එහෙම කතා කරනවා. ඒ යහපත් සංවාදය නිසා මිනිසුන් ඒවාට යොමු වෙනවා. ඒත් චිත‍්‍ර ගැන කතා කරන්නේ නැහැ. එහෙම වෙනකොට මිනිසුන් එයින් ඈත් වෙනවා. එනිසා ළමයි පාසලෙන් බාහිරව ඒ සඳහා උනන්දු කරවීමේ ක‍්‍රියාදාමයක් ඇති කළ යුතුයි.

නාගරික උනන්දුව හා අලෙවිය

කොළඹ කේන්ද්‍රියව චිත‍්‍ර කලාවක් තිබෙනවා. එය හොඳ උත්සාහයක්. නමුත් එතැන ඇතමුන් කරන්නේ අනුන්ගේ සල්ල බලාගෙන විකිණීමක්. මිනිස්සු ඉල්ලන දේ ඇඳලා දෙන චිත‍්‍ර ශිල්පීන් විනා, කලාව මේකයි කියලා හඳුනාගත් මිනිසුන් වෙනුවෙන් නිර්මාණ කරදෙන කලාකරුවන් අඩුයි.

ආසාව තිබුණට හැමෝටම චිත‍්‍ර අඳින්න බැරිද ?

ආසාව තිබුණට හැමෝටම චිත‍්‍ර අඳින්න බැහැ කියන එක බොරුවක්. හිතන්න පුළුවන් ඕනෑම කෙනෙකුට චිත‍්‍ර ඇඳීම හා නිර්මාණය කළ හැකියි. අපි හැම වැඩිහිටියෙකුගෙන්ම ඉල්ලනවා දරුවා සුන්දරත්වයට යොමු කරන්න කියලා. ඔවුන්ට පැන්සල හා පින්සල අතට දී ආතතිය වෙනුවට සුන්දර මානසිකත්වයකට අනුබල දෙන්න කියලා මම ඉල්ලනවා. එතකොට දරුවා තමන්ටත්, රටටත් සුන්දර සංවේදී මනුස්සයෙක්වෙයි. එහෙම වෙනකොට පොලීසි, උසාවි, එල්ලූම්ගස් ඒ තරම් අවශ්‍ය වෙන එකක් නැහැ.

නොමිලේ පුහුණුව සඳහා ඉඩක්

මෙම ක්ෂේත‍්‍රයේ විද්වතුන්ගේ දායකත්වයෙන්, මගේ සභාපතීත්වයෙන් චිත‍්‍ර කලා අධ්‍යාපන වෘත්තිකයින්ගේ සංගමය සහ සෝලියස් මැන්දිස් චිත‍්‍රකලා පදනම නමින් සංවිධාන දෙකක් ආරම්භ කළා. ඕනෑම අයෙකුට එහි නොමිලේ පුහුණුව ලබාගත හැකියි.

හැමෝට එකතු විය හැකියි

දරුවන්ට පමණක් නොවෙයි. වැඩිහිටියන්ට වුණත් අප සමග එක්විය හැකියි. සුන්දරත්වයට වයස් සීමාවක් නැහැ. මම කියනවා ඔබේ දරුවාත් සුන්දරත්වයක් නැති නීීරස මිනිසුන් ගොඩට නොවැටෙන්න නම් නිසි මග පෙන්වන එක ඔබේ වගකීමක් කියලා.

උපුටා ගැනීමකි

‘වැළඳගැනීම – Hug‘ අතිෂය ආදරණීය සහ උණුසුම් අත්දැකීමක් බව අපි කවුරුත් දන්නවා. මේ වසංගත සමයේ සෞඛ්‍යාරක්ෂාව වඩාත්ම වැදගත් හා ප්‍රමුඛතම කරුණ වන නිසා ඊටත් අගුළු වැටී තිබෙනවා. ඒ ගැන අපි කිසිවෙකුට ගැටලුවක් නැහැ. මොකද වඩාත් ම වැදගත් කොවිඩ්-19 වසංගය පිටුදැකීමයි.

‘වැළඳගැනීම‘ සහ එයින් ඇතිවන සෞඛ්‍ය හා සමාජයීය ප්‍රතිලාභ ගැන ලෝකය පුරා නිරන්තරයෙන් අධ්‍යයන සිදුවෙනවා. මේ පිළිබද අධ්‍යයනය කළ විශේෂඥයින්ට අනුව එමගින් ඔබට හොඳ හැඟීමක් ඇති කරනවා. එය සෙනෙහස පෙන්වීමට හොඳ ක්‍රමයක් වන අතර කුඩා දරුවන් අතර පවා මෙය සහජ චර්යාවක් බවට පත්ව තිබෙනවා.

එහෙත් මේ ගැන අධ්‍යයනය කළ අය සොයා ගත් ටිකක් අමුතුම දෙය නම්, අප වැඩෙන විට වැළඳගැනීම් අඩු වීමයි. සමාජ සම්මතයන්, සේවා පරිසරයන් සහ වරදවා වටහා ගනු ඇතැයි යන බිය නිසා අපට අවශ්‍ය විටෙක මිනිසුන් වැළඳ ගැනීමේ හැකියාව අපට අහිමි වන බවයි ඔවුන් කියන්නේ. 

කෙසේ වෙතත්, ශාරීරික ස්පර්ශය ළමයින්ට මෙන්ම වැඩිහිටියන්ට ද වැදගත් බව ඔවුන් පෙන්වා දෙනවා. ඇත්ත වශයෙන්ම, විශේෂඥයින් පවසන්නේ ඔබ තව දුරටත් වැළඳ ගත යුතු බවයි.

1. වැළඳ ගැනීම රුධිර පීඩනය අඩුකරයි–Hugs Lower Blood Pressure

මානසික ආතතිය හා ආතති සහගත තත්වයන් (stress and stressful situations) නිසා ඔබේ රුධිර පීඩනය ඉහළ යන්නේ නම්, වැළඳගැනීම් ඔබට එය සමඟ කටයුතු කිරීමට උපකාරී වේ. අධ්‍යයනවලින් පෙනී යන්නේ පීඩාකාරී කාර්යයක් කිරීමට පෙර හෝ පසුව මිනිසුන් තම ආදරණීයයන්ගෙන් වැළඳගත් විට ඔවුන්ගේ රුධිර පීඩනය අඩු වනු ඇති බවයි. ඉතින්, ඔබ අධික ආතතියෙන් පෙළෙන දවසක් තිබේ නම්, හෝ ඔබේ ආදරණීයයා වැලඳ ගැනීම ප්‍රයෝජනවත් විය හැකියි.

2. ඔබේ මොළයේ ප්‍රීතිමත් හෝමෝන (Happy Hormones) උත්තේජනය කිරීම

වැළඳගැනීම් ඔබේ මොළයේ ඇති ඔක්සිටොසින්, ඩොපමයින් සහ සෙරොටොනින් (oxytocin, dopamine and serotonin) මට්ටම ඉහළ නංවන අතර ඒ සියල්ල සතුට හෝමෝන / Happy Hormones ලෙස සැලකේ. ඔක්සිටොසින් මගින් ඔබට සැහැල්ලුව ලැබෙන අතර ඩොපමයින් මගින් විනෝදයත්, සෙරොටොනින් ඔබේ මනෝභාවය පාලනය කරන අතර ඔබට සතුටක් දැනේ. 

3. වැළඳගැනීම් ඔබේ හෘද ස්පන්දන වේගය අඩු කරයි

වැළඳගැනීම් මගින් පුද්ගලයෙකුගේ හෘද ස්පන්දන වේගය සැලකිය යුතු ලෙස අඩු කර ගත හැකි බව වෛද්‍ය අධ්‍යයනවලින් පෙනී යයි. එබැවින් ඔබ කලබල වී ඔබේ හදවත වේගයෙන් ගැහෙන බවක් ඔබට දැනේ නම්, වැළඳ ගැනීම එම ගැටලුවට ප්‍රයෝජනවත් විසඳුමක් විය හැකිය. වැළඳගැනීමේදී සාමාන්‍යයෙන් මිනිසුන් වඩාත් සන්සුන්ව සිටියි.

4. වැළඳගැනීම් මගින් ආතතිය අඩු කළ හැකිය

ආතතිය Stress අවම කිරීම සඳහා වැළඳගැනීම් ඉතා වැදගත් වේ. එක් අතකින්, වැළඳ ගැනීම යනු පුද්ගලයෙකු සනසාලීමට, ආදරය හා සහයෝගය පෙන්වීමට හොඳ ක්‍රමයක් වන අතර එමඟින් මිනිසුන්ට සතුටක් දැනේ. අනෙක් අතට, ශරීරයේ අඩු ආතති හෝමෝන (lower stress hormones) වැළඳ ගන්නා අතර ප්‍රීතිමත් හෝමෝන වැඩි කරයි. එය ජයග්‍රාහී තත්වයකි.

5. වැළඳගැනීම් නිසා රෝගයෙන් ආරක්ෂා විය හැකිය

කොවිඩ්-19 වසංගතය මධ්‍යයේ සිටින සෑම කෙනෙකුම බදා ගන්න යන්න එපා ! එය මේ වසරේ සැබවින්ම ව්‍යතිරේකයකි. කෙසේ වෙතත්, ඔබ කුඩා කල සිටම වැළඳගැනීම් රාශියක් ලබා ගන්නේ නම්, එය ඔබේ ප්‍රතිශක්තිකරණ පද්ධතිය ශක්තිමත් කරයි. මන්ද ඔබ වැඩි වැඩියෙන් බැක්ටීරියා වලට නිරාවරණය වී ඇති බැවිනි. නමුත් වැඩිහිටියෙකු ලෙස වුවද, වැඩිපුර වැළඳගැනීම් ලබා ගන්නා පුද්ගලයෙකු සාමාන්‍යයෙන් අඩු රෝගාතුර වීමක් හෝ රෝගයක් සමඟ වඩා හොඳින් කටයුතු කරනු ඇත. 

6. ආත්ම අභිමානය ඉහළ නැංවිය හැකිය

අධ්‍යයනවලින් පෙනී යන්නේ අඩු ආත්ම අභිමානය, ශරීර ප්‍රතිරූප ගැටළු සහ නිරන්තර සැකයන් සමඟ පොරබදින පුද්ගලයින්ට වැළඳගැනීම් ලැබෙන විට වඩා හොඳ හැඟීමක් ඇති බවයි. කාලයත් සමඟ එය ඔවුන්ගේ ආත්ම අභිමානය ඉහළ නැංවිය හැකි අතර ඔවුන්ට වැඩි විශ්වාසයක් ඇති කරයි. 

7. වැළඳගැනීම් මගින් වේදනාව අඩු කළ හැකිය

එය සිත් සසල කරවන නමුත් සරල ශාරීරික ස්පර්ශයකින් මිනිසුන්ට වේදනාව සමඟ හොඳින් කටයුතු කිරීමට උපකාරී වේ. වෛද්‍ය අධ්‍යයනවලින් පෙනී යන්නේ වේදනාකාරී ක්‍රියා පටිපාටියක් අතරතුරදී ආදරය කරන කෙනෙකු ස්පර්ශ කරන විට මිනිසුන්ට අඩු වේදනාවක් දැනෙන බවයි. එය භෞතික ස්පර්ශය තුළින් ඔවුන්ට ලැබෙන සදාචාරාත්මක හා ශාරීරික සහයෝගයේ ඒකාබද්ධ බලපෑමකි. වැළඳගැනීම් යනු ශාරීරික ස්පර්ශයකි, එබැවින් ඔබ වේදනාවෙන් සිටින විට අනිවාර්යයෙන්ම එම වැළඳ ගැනීම ඉල්ලා සිටිය යුතුය. 

8. වැළඳගැනීම් ඔබේ සෞඛ්‍යයට සමස්තයක් වශයෙන් ධනාත්මක බලපෑමක් ඇති කරයි

චිකිත්සකයින් පවසන්නේ ඔබේ මානසික සෞඛ්‍යය සරලව පවත්වා ගැනීම සඳහා දිනකට වැළඳගැනීම් 8ක් අවම විය යුතු බවයි. එය වැඩිදියුණු කිරීම සඳහා ඔබට දිනකට වැළඳගැනීම් දොළහක් අවශ්‍ය වේ.  අඩු රුධිර පීඩනය, ආතතිය අඩු කිරීම, ආත්ම අභිමානය වැඩි දියුණු කිරීම සහ වේදනා කළමනාකරණය වැනි අප ඉහත සඳහන් කළ සෑම දෙයක්ම සමඟ මෙම දැනුම ඒකාබද්ධ කරන්න. ඔබේ සමස්ත සෞඛ්‍යයට වැළඳගැනීම් විශිෂ්ට බව වටහා ගැනීමට ඔබ බුද්ධිමත් විය යුතු නැත.

https://zestradar.com ඇසුරිණි – සැකසුම – තුෂාධවි