අද (02) දින පස්වරු 23.12 වන විට ශ්රී ලංකාවෙන් කොවිඩ්-19 ආසාදිතයින් 878 දෙනකු වාර්තා වී ඇතැයි සෞඛ්ය ප්රවර්ධන කාර්යාංශයේ නිල වෙබ් අඩවිය සදහන් කරයි. ඒ අනුව මේ වන විට දිවයිනෙන් වාර්තා වී ඇති සමස්ත කොවිඩ්-19 ආසාදිතයින් සංඛ්යාව 25,410 දක්වා ඉහළ ගොස් ඇති අතර මේ වන විට රෝහල්වල ප්රතිකාර ලබන රෝගීන් ගණන 6982ක. රෝහල්වල විමර්ශන යටතේ සිටින පුද්ගලයින් ගණන 467 දෙනකු වන අතර සුවය ලැබූ රෝගීන් සංඛ්යාව 18,304කි.
අද දින වාර්තා වූ මරණ 02ත් සමග සමස්ත මරණ සංඛ්යාව 124 දක්වා ඉහළ ගොස් ඇත.
කෑගල්ල දිස්ත්රික්කයේ ආයුර්වේද වෛද්යවරයෙකු වන ධම්මික බණ්ඩාර වෙද මහතා විසින් දේශීය වෛද්ය ක්රමය තුලින් කොවිඩි වෛරසයට එරෙහිව සොයා ගනු ලැබූ ඖෂධය ආසාදිතයින්ට ලබා දීමේ ක්රමවේදය සැකසීම සම්බන්ධයෙන් විශේෂ සාකච්ඡාවක් අද (02) පස්වරුවේ සෞඛ්ය අමාත්ය පවිත්රා වන්නිආරච්චි මහත්මියගේ ප්රධානත්වයෙන් සහ ඖෂධ නිෂ්පාදන, සැපයුම් හා නියාමන රාජ්ය අමාත්ය මහාචාර්ය චන්න ජයසුමන, දේශීය වෙදකම ප්රවර්ධන, ග්රාමීය හා ආයුර්වේද රෝහල් සංවර්ධන හා ප්රජා සෞඛ්ය රාජ්ය අමාත්ය සිසිර ජයකොඩි යන මහත්වරුන්ගේ සහ ප්රාථමික සෞඛ්ය සේවා, වසංගත රෝග හා කොවිඩ් රෝග පාලන කටයුතු රාජ්ය අමාත්ය සුදර්ශණී ප්රනාන්දුපුල්ලේ, නිපුණතා සංවර්ධන, වෘත්තීය අධ්යාපන, පර්යේෂණ හා නව නිපැයුම් රාජ්ය අමාත්ය සීතා අරඹේපොල මැතිනියගේ සහභාගීත්වයෙන් සෞඛ්ය අමාත්යාංශයේ දී පැවැත්විනි.
මෙහිදී සෞඛ්ය අමාත්ය පවිත්රා වන්නිආරච්චි මහත්මිය විසින් කොවිඩ් වෛරසයට එරෙහිව දේශීයව නිෂ්පාදනය කළ මෙම ඖෂධය පිළිබද ජනාධිපති ගෝඨාභය රාජපක්ෂ මැතිතුමාගේ විශේෂ අවධානයට යොමුවී ඇති බැවින් ඖෂධයට අදාල ඉදිරි පර්යේෂණ කටයුතු රාජ්ය මට්ටමින් සිදු කරන ලෙසත්, ඒ සදහා සෞඛ්ය අමාත්යාංශය ඇතුලු අනෙකුත් රාජ්ය ආයතනවල සහාය ද ලබාදෙන ලෙසත් උපදෙස් ලබා දෙන ලදි.
මෙම ඖෂධය ශ්රී ලංකාවට මෙන්ම මුළු ලොවටම ලබා දීමට නම් විද්යානුකූල ක්රමවේදයන්ට අනුකූලව පර්යේෂන සිදු කල යුතු බව සෞඛ්ය අමාත්යතුමිය පෙන්වා දෙන ලදි. ඒ අනුව මෙම ක්රමවේදය පිළිබද යෝජනා මාලාවක් සකස් කළ යුතු බව පැවසීය.
එම යෝජනා මාලාව කඩිනමින් සකස් කිරීම සදහා විද්වත් කමිටුවක් පත් කරන ලද අතර, මහාචාර්ය සේනක පිලපිටිය මහතාගේ සභාපතීත්වයෙන් වන එම කමිටුවේ සාමාජිකයින් ලෙස විශේෂඥ වෛද්ය ආනන්ද විඡේවික්රම මහතා, මහාචාර්ය සිසිර සිරිවර්ධන මහතා, මහාචාර්ය සරෝජ ජයසිංහ මහතා, මහාචාර්ය ලේකම්වසම් මහතා, මහාචාර්ය ජනක ද සිල්වා මහතා, මහාචාර්ය සෑම් කුලරත්න මහතා, මහාචාර්ය කමනි වනිගසූරිය මහත්මිය පත් කරන ලදි.
මෙම අවස්ථාවට ඖෂධය සකස් කල වෛද්ය ධම්මික බණ්ඩාර වෙද මහතාද, සෞඛ්ය ලේකම් මේජර් ජනරාල් සංජීව මුණසිංහ මහතා, සෞඛ්ය සේවා අධ්යක්ෂ ජනරාල් වෛද්ය අසේල ගුණවර්ධන, සෞඛ්ය , දේශීය වෛද්ය අමාත්යාංශයේ නිලධාරීන්, රෝහල් අධ්යක්ෂවරුන් ඇතුලු පිරිසක් එක්ව සිටියහ.
අධිකරණ සේවා කොමිෂන් සභාවට අනුව, මෙරට දිසා අධිකරණවලට යොමුව ඇති පැමිණිලි අතරින් මෙතෙක් විභාග නොවූ සහ විභාග වෙමින් පවතින නඩු සංඛ්යාව 2,31,506 ක් බව අද පාර්ලිමේන්තුවේ දී අධිකරණ අමාත්ය අලි සබ්රි මහතා පැවසීය.
අධිකරණ අමාත්යවරයා මෙසේ පැවසුවේ හේෂා විතානගේ මන්ත්රීවරයා මේ සම්බන්ධයෙන් විමසූ ප්රශ්නයකට පිළිතුරු දෙමිනි. අධිකරණ සේවා කොමිෂන් සභාවේ දත්ත අනුව මෙම නඩු අතරින් , වසර 01-05 අතර කාලයක් විභාග වන නඩු 49,801ක් ද, වසර 05-10 ත් අතර නඩු 20,586 ක් ද, වසර 10-15ත් අතර කාලයක් තිස්සේ විභාග වන නඩු 8947 ද, වසර 15-20 ත් අතර කලක් විභාග වන නඩු 3418 ක් ද වසර 20-25 ක් පැරණි නඩු 4620ක් ද ඇති බව මෙහිදී අනාවරණය කෙරිණි.
තවදුරටත් මෙම කරුණු පැහැදිලි කරමින් අධිකරණ අමාත්යවරයා කියා සිටියේ, නඩු දැමීම සහ නඩු ඇසීම යනු එකිනෙකට වෙනස් ක්රියාවලි දෙකක් වන බවයි. කෙසේ වෙතත්, කොවිඩි 19 අභියෝගය නිසා මාස තුනක් තිස්සේ නඩු විභාග කිරීම නැවතී ඇති බව සදහන් කළ අමාත්යවරයා එබඳු තත්ත්වයක් යටතේ වුවද සිවිල් අභියාචනාධිකරණයේ 70 කට අධික නඩු තීන්දු ගණනක් ලබාදී ඇති බවයි. එසේම,අධිකරණයේ ස්වාධීනත්වය පිළිබඳව තමන් මෙම සභාවට සහතික වෙන බව ද අමාත්යවරයා පාර්ලිමේන්තුවේ දී සඳහන් කළේය.
ඒ අවස්ථාවේදී නැගී සිටි,විපක්ෂයේ ප්රධාන සංවිධායක ලක්ෂ්මන් කිරිඇල්ල මන්ත්රීවරයා විමසූ, හිටපු මහබැංකු අධිපති අර්ජුන මහේන්ද්රන් පිළිබඳව ප්රශ්නයට පිළිතුරු දෙමින්, ඒ සම්බන්ධව තමන් නීතිපතිවරයාගෙන් වාර්තාවක් කැඳවා ඇති බවත්, පිළිතුරු ලද විට පාර්ලිමේන්තුවට ඉදිරිපත් කිරීමටද පියවර ගන්නා බව මෙහිදී අධිකරණ අමාත්ය අලි සබ්රි මහතා කියා සිටියේය .
ශ්රී ලංකාවේ තරුණ පිරිස් අතර ශීඝ්රයෙන් වැඩි වෙමින් පවතින මානසික රෝගය ලෙස ‘Cannabis Induced Psychosis’ නමැති තත්ත්වය හඳුනාගෙන ඇති බව වවුනියාව රෝහලේ මානසික සෞඛ්ය ඒකකයේ වෛද්ය මයුර සන්නසූරිය පෙන්වා දෙයි.
එමෙන් ම, වත්මන් තරුණ පරපුර සීමාව ඉක්මවා ඉන්ටර්නෙට් වෙත නැඹුරු වීම ද මානසික ගැටලු වැඩි වීමට හේතුවක් වී ඇති බව වෛද්ය මයුර සන්නසූරිය පෙන්වා දෙයි.
වෛද්යවරයා වැඩිදුරටත් කියා සිටියේ, සංවර්ධනය වෙමින් පවතින රටක් වන ශ්රී ලංකාවේ තරුණයන් වර්තමානය වන විට ගංජා, මත්කුඩු, මත්පෙති හා හෙරොයින් භාවිතයට වැඩි වශයෙන් නැඹුරු වී ඇති බව ය.
එවැනි මත්ද්රව්ය භාවිතය හේතුවෙන් මොළයට ඇති කරන අහිතකර බලපෑම් මත තරුණයන් දිනපතා මානසික රෝග වෙත ගොදුරු වීමේ අවදානමක් පවතින බව ඔහු පෙන්වා දෙයි.
මත්ද්රව්ය භාවිතය හේතුවෙන් මානසික රෝගවලට ගොදුරු වන තරුණයන් සංඛ්යාව ශ්රී ලංකාව තුළ තුළ දිනෙන් දින ඉහළ යමින් පවතින බව ද වෛද්ය සන්නසූරිය සදහන් කළේ ය.
මත්ද්රව්ය භාවිතයට අමතරව ඉන්ටර්නෙට් හා සමාජ ජාල වැරදි ලෙස භාවිතය තුළින් ද තරුණ පිරිස් වැඩි වශයෙන් මානසික රෝග වෙත ගොදුරු වීමේ අවදානමක් මතුව ඇති බව කී වෛද්යවරයා ඒ හේතුවෙන් මානසික ආතතිය, විශාදය, කාංසාව, භින්නෝන්මාදය වැනි තත්ත්වයන් විශාල වශයෙන් වාර්තා වන බව වෛද්යවරයා සඳහන් කළේ ය
ඔහු පවසන පරිදි තරුණයන් අතර මානසික රෝග හට ගැනීමේ ප්රවණතාව වැඩි වීම හේතුවෙන් පවුල සහ සමස්ත සමාජය ම දැඩි අවුල්කාරී තත්ත්වයකට පත්ව ඇති අතර ඒ තුළින් සමාජීය හා ආර්ථික ගැටලු රැසක් පැන නැගී තිබේ.
දෙමව්පියන් සහ තරුණ දරුවන් අතර සබඳතා දුරස්වීම, සම වයස් කණ්ඩායම්වල පෙළඹවීම, තරුණ පිරිස් ඉලක්ක කර ගනිමින් සිදුවන විෂමාචාර ප්රචාරයන් සහ තරුණ කණ්ඩායම් තනි වීම වැනි කරුණු රෝගී තත්ත්වයන්ට ගොදුරු වීමට වැඩි වශයෙන් බලපා තිබේ.
ලෝක මානසික සෞඛ්ය සංවිධානයේ දත්ත අනුව මානසික ගැටලුවලින් 50% ක ප්රතිශතයක් ආරම්භ වන්නේ, වයස අවුරුදු 14 කාල සීමාවේදී ය.
නිසි වෛද්ය උපදෙස් ලබා නොගැනීම, මානසික සෞඛ්ය සායන වෙත යොමු වීමට ඇති අකැමැත්ත, මානසික සෞඛ්ය කෙරෙහි නිසි අවධානයක් යොමු නොකිරීම සහ නොදැනුවත්කම යන කරුණු හේතුවෙන් අදාළ රෝගී තත්ත්වයන් උත්සන්න වන බව වෛද්ය මයුර සන්නසූරිය වැඩිදුරටත් ප්රකාශ කළේ
“රටේ පවතින ආර්ථික ගැටලු, තරුණ විරැකියාව හා තරුණ කණ්ඩායම් අතර පවතින නොයෙකුත් අපචාර ක්රියා හේතුවෙන් ද මානසික ගැටලු උද්ගත වී තරුණ කණ්ඩායම් ජීවිත අහිමි කර ගැනීමේ තත්ත්වයන්ට පවා පත්ව තිබෙනවා. තරුණ පිරිස් හෝ වෙනත් පිරිස් වෙත කිසියම් මානසික ගැටලුවක් පවතින්නේ නම් වෛද්ය උපදෙස් වෙත යොමු කිරීම තුළින් මානසික රෝගී තත්ත්වයන්ගෙන් මිදීමට හැකියාව ලැබෙනවා” ඔහු අවසන් වශයෙන් දුන් උපදේශය යි.
Text copied by bbc sandesaya
ශ්රී ලංකාවේ කිරි කර්මාන්තය ගොඩනැඟී ඇත්තේ ස්ථම්භ තුනකිනි. කුඩා කිරි ව්යවසායකයා, මධ්ය පරිමාණ කිරි ව්යවසායකයා සහ මහා පරිමාණ කිරි ව්යවසායකයා යන ත්රිත්වයේ එකතුවෙනි. මෙම සමස්ත නියෝජනයෙන් වසරකට නිපද වනුයේ කිරි ලීටර් මිලියන 420 ත් 450 ත් අතර ප්රමාණයකි.
දෙකෝටියකට වැඩි ජනතාවගෙන් නැවුම් කිරි පරිභෝජනය කරන කණ්ඩායම් සඳහා දිනකට අවම වශයෙන් මිලි ලීටර් 100කට වැඩි කිරි ප්රමාණයක් පරිභෝජනයට ලබා දෙනවා නම් දළ වශයෙන් වෛද්ය පර්යේෂණ ආයතනයේ නිර්ණායක අනුව වසරකට කිරි ලීටර් මිලියන 780ක ප්රමාණයක් අවශ්ය වේ.
බටර්, චීස්, යෝගට් ආදී සියල්ල එක් වූ විට, මෙරට පරිභෝජනය සඳහා වසරකට කිරි ලීටර් මිලියන 1300ක් පමණ අවශ්ය වේ. මෙම අවශ්යතාවයන්ගෙන් දැනට ලංකාවේ නිෂ්පාදනය වන්නේ 35%කි. ඉතිරි 65% පිටරටින් ගෙන්වනු ලබන අතර ඒ සඳහා වසරකට රුපියල් බිලියන 54-58 අතර මුදලක් වැය වේ. මේ අනුව ලංකාවේ කිරි කර්මාන්තය ගත හොත් එහි වටිනාකම දළ වශයෙන් බිලියන 35ක් පමණ වේ. මින් 90%ක් කිරි සපයනුයේ කුඩා පරිමාණයේ කිරි ව්යවසායකයන්ය. සතුන් 02 සිට සතුන් 20 දක්වා වන ව්යවසායකයන් මෙම මුළු නිෂ්පාදනයෙන් (ලීටර් මිලියන 420 න්) 90 % ක් සපයනු ලබයි. මහා පරිමාණ කිරි ගොවිපළවල් 3ක් පවතින අතර ජාතික පශු සම්පත් සංවර්ධන මණ්ඩල ගොවිපළ, අඹේවෙළ, නවසීලන්ත ගොවිපළ හා වටවල ගොවිපළ ඊට අයත් වේ.
සතුන් 1000 කට වැඩි ගොවිපොළ පවතින්නේ ඉහත කී ගොවිපළ තුන පමණක් වන අතර මුළු නිෂ්පාදනයට දායක වන්නේ 3.5% ක් පමණි. ඉතිරි 6.5% දායක කරනුයේ කිරි ගවයින් 25ත් 300ත් අතර ඇති මධ්ය පරිමාණයේ ව්යවසායකයන් විසිනි. මේ අනුව නිෂ්පාදනයෙන් 90% කට දායක වන කුඩා පරිමාණ කිරි ව්යවසායකයා ආරක්ෂා කිරීම ජාතික පශු සම්පත් සංවර්ධන මණ්ඩලයේ වගකීම බවට පත් වේ.
කුඩා පරිමාණ කිරි ව්යවසායකයාට අභිජනන සතුන් ලබා දීම පශු සම්පත් මණ්ඩලයේ මුලික වගකීමයි. සමහර අවස්ථාවලදී කිරි ගොවියාගේ කිරිදෙනුනට එක පිට පිරිමි සතුන් ජනනය වන බැවින් ඒ ගැහැනු සතුන්ගේ අඩුව සඳහා මණ්ඩලය එම අවශ්යතාවට උසස් ආරයේ ගැහැනු පැටවුන් දිය යුතුය.
පශු සම්පත් මණ්ඩලයට මහා භාණ්ඩාගාරයෙන් වැටුප් සහ නඩත්තුව සඳහා වාර්ෂික මුදල් වෙන් කිරීමක් සිදු නොවේ. මසකට ආයතනයේ වැටුප් සඳහා පමණක් ලක්ෂ 800ක් පමණ වැය වේ. වසරකට වැටුප් ගෙවීමට පමණක් බිලියනයක් වැයවන අතර සත්ව ආහාර සැපයීමට තවත් බිලියනයක් වැය වේ. ස්වයංව තිරසාර වීමට මණ්ඩලයට ඉලක්කයක් පවතින අතර එය කිරි, පොල් හා වෙනත් කෘෂි භෝග නිපදවීම තුළින් සපුරාගෙන ආයතනය පවත්වා ගත යුතුව තිබේ.
වාර්ෂික නිෂ්පාදන සියල්ලේ වටිනාකම බිලියන 2.1ක් පමණ වේ. ආයතනය උපයන වටිනාකම වැටුප් ගෙවීමටත් සත්ව ආහාර සඳහාත් වතු නඩත්තුවටත් වැය කළ යුතු වෙයි. මේ අනුව පශු සම්පත් මණ්ඩලය පවත්වා ගැනීම මිස අමතර ආයෝජන හා දියුණු කිරීම් කළ නොහැකි තත්ත්වයක් මෙවන් වාතාවරණයක පවතී. එම නිසා ආයතනය පසුගිය කාලය තුළ අර්බුදකාරී තත්ත්වයකට පත්ව ඇති බව නොරහසකි.
ලංකාවේ ගව ගහනය මිලියන 1.2ක් වන අතර ඉන් ලක්ෂ 6ක් පමණ ගැහැනු සතුන්ය. ඉතිරි ලක්ෂ 6 පිරිමි සතුන්යැයි උපකල්පනය කළ හැකිය. ලංකාවේ කිරි ගොවීන් තුන්ලක්ෂ විසි දහසක් සිටින අතර මෙම කිරි ගවයින් ලක්ෂ 6 අතරින් කිරි නිෂ්පාදනයට සෘජුව දායක වන ප්රමාණය ලක්ෂ 4 ක් පමණ වන බවට උපකල්පනය කළ හැකිය.
මෙහිදී හඳුනාගත හැකි ගැටලු කීපයක් වේ. වාර්ෂිකව එක දෙනකුට එක පැටවකු ලැබිය යුතු වුව ද එසේ නොලැබීමේ ප්රවණතාවක් පවතී. සත්ව ආහාර හිඟය සමඟ ඇති මන්දපෝෂණ තත්ත්වය මෙහි ප්රබල ගැටලුවකි. ගවයාගේ ආහාර ජීර්ණයට ක්ෂුද්ර ජීවීන් වැදගත් වන අතර එම ක්ෂුද්ර ජීවින්ට ජීර්ණයට පහසු උපස්ථර තිබෙන කුඩා කැබලි ආහාර දිය යුතුය. මෙම ක්ෂුද්රජීවීන්ට පහසු උපස්ථරමය ආහාර අප ලබා නොදීම තුළ සහ ආහාරවල පවතින ගුණාත්මකභාවය අඩු වීමත් මත සතුන් මන්දපෝෂණ තත්ත්වයෙන් පෙළීම හැකි ඉක්මනින්ම විසඳා ගත යුතු තත්ත්වයකි.
ලංකාවේ සිටින ගවයින්ගෙන් 60 %-75 % මන්දපෝෂිත තත්වයෙන් පෙළෙයි. මිනිසුන්ගේ මන්දපෝෂණය ගැන කතා කළ ද සතුන්ගේ මන්දපෝෂණය ගැන මෙතෙක් කිසිවකු කතා කර නොමැත. ඉහළ ගුණාත්මකභාවයක් තිබෙන ආහාර මෙම සතුන්ට දීමේ වැඩපිළිවෙළක් හඳුන්වා දීම රජයට යෝජනාකර ඇත.
ක්ෂේත්රයන්හි දියුණුව ගැන සැළකීමේදී විවිධ අවස්ථාවන්හි සහනාධාර දීම ක්රියාත්මක වෙයි. උදාහරණ ලෙස වී ගොවියා සැලකීමේ දී පොහොර සහනාධාරය, වී සහතික මිල, වැනි සහනාධාර ක්රම අනුගමනය කිරීම දැකිය හැකිය. කිරි ව්යාපාරයේ එවැනි තත්ත්වයක් නොමැති හෙයින් කිරි ව්යාපාරයට සම්බන්ධ පුද්ගලයන්ට සතුන් සඳහා දෙන ආහාර සලාකය යම් කාලයකට සහනයක් (අඩු මිලට) දීම, පෞද්ගලික හා රාජ්ය අංශයේ සහභාගිත්වයෙන් ඉහළ ගණයේ තෘණ සෛලේජ් වැනි ආහාර සහ පැය 24 පුරා සතුන්ට පිරිසිදු ජලය ලැබෙන ක්රමයක් සකසා දීම සහ කිරි එකතු කිරීම විධිමත් කිරීම තුළ වසරක කාලයකදී අද නිපදවන කිරි ප්රමාණයට අමතරව කිරි ලීටර් ලක්ෂයක් වැඩිකර ගැනීමට හැකියාව පවතී.
බොහෝ අය සිතනුයේ සතුන් පිටරටින් ගෙන්විය යුතු බව, දෙමුහුන් ඉහළ ගණයේ සතුන් අවශ්යයි යන්න මිස දැනට සිටින සතුන්ගෙන් උපරිම ඵලදායීතාවය ලබා ගැනීම කෙරෙහි අවධානය යොමු කර නොමැත. විය යුත්තේ සිටින සතුන්ගෙන් උපරිම ධාරිතාවක් ගන්නා අතර ඉහළ ආරේ වඩා කාර්යක්ෂම හා ප්රතිඵලදායී අභිජනන ප්රතිපත්තියක් තුළින් දේශීය කිරි ගවයකු නිර්මාණය කිරීමයි.
ලංකාවේ සත්ව නිරෝධායන නීතිරීති අනුව ඉන්දියාවෙන් හා පකිස්ථානයෙන් සත්තු ගෙන ඒම එතරම් පහසු නොවේ. බොහෝ විට අවසරය ලැබෙන්නේ නවසීලන්තයෙන්, ඕස්ට්රේලියාවෙන් මෙන්ම ඩෙන්මාර්කය වැනි රටවලින් පමණක් වන අතර එම සතුන් ඇතැම් දේශගුණික කලාපයන්ට පමණක් යෝග්ය වේ. අප රටට යෝග්ය පරිදි අභිජනනය ක්රියාවලිය තුළින් දේශීය කිරි ගවයකු නිර්මාණය කිරීම මෙහි දී වැදගත් වන්නේ ඒ නිසාය.
කිරි කර්මාන්තය හා බැඳුණ අනෙක් කර්මාන්තය නම් ගව මස් කර්මාන්තයයි. ගව මස් පරිභෝජනය කරන විශාල පිරිසක් රට තුළ සිටින අතර වාර්ෂික දේශීය ගව මස් අවශ්යතාවය මෙට්රික් ටොන් 30,000 කි. එම අවශ්යතාවයන් 98% ක් දේශීය කර්මාන්තයක් ලෙස පවතින අතර එහි විශාල අභියෝග සහ ගැටලු රාශියක් තිබේ. ඒවා නිරාකරණය කිරීම ඉදිරියේදී සිදු කළ යුතුය. සමස්තයක් ලෙස ඉහළ ගණයේ ආහාර නොමැතිවීම, නිසි ලෙස ක්රියාත්මක වන සත්ව රෝග සඳහා සහනදායි ලෙස දේශීය වශයෙන් නිෂ්පාදිත ඖෂධ දීම, නිසි කලට රෝග වැළැක්වීමේ එන්නත් දීමේ නිසි ක්රියාවලියක් නොමැතිවීම යන කරුණු ගැන වඩා වැඩි අවධානයක් යොමු කළ යුතුය.
මුඛ හා කුර රෝග තත්වය නිසා වාර්ෂිකව කිරි සහ අනෙකුත් නිෂ්පාදන මඟින් රුපියල් මිලියන ගණනක් මෙම ව්යාපාරයට අහිමිවේ. සත්ව රෝග වැළැක්වීමට විදේශ රටවල් මූලික කර ගත් එන්නත් ගෙන්වීමේ ව්යපෘතිවලට මුල්තැන දීමත් දේශීය වශයෙන් නිපදවීමට උනන්දුවක් සහ අනුබලදීමක් හෝ දිරිගැන්වීමක් නොමැතිවීමද මීට බලපෑ හේතූන් අතර වේ. මේ සඳහා පශු පර්යේෂණ ආයතනයක් ගන්නොරුව පිහිටා ඇති අතර මෙරටට අවශ්ය ප්රතිකාර එන්නත් නිපදවීම හා බුරුළු ප්රදාහය සහ කිරිවැරීම සඳහා වන ඖෂධ නිපදවීමේ හැකියාව පවතින අතර දක්ෂ සැලකිය යුතු පර්යේෂකයන් පිරිසක් ද ඒ සතුව ඇති බව නොරහසකි.
2015 වසර වන විට මෙම ඖෂධ හා එන්නත් නිපදවීම සිදු කර ඇතත් මේ වන විට එය ඉතා පසුගාමී තත්ත්වයක පවතී. පිටරටින් එන්නත් ගෙන්වීම සිදු වන අතර එම එන්නත්වල සාර්ථකත්වය අවම මට්ටමක පවතින අතර මිල ද ඉතා අධිකය. මේ සා මෙම කර්මාන්තයේ නිරත පිරිසට වන වැය ඉතා අධිකය.
මේ අධික පිරි වැය නිසා සතුනට අවශ්ය බෙහෙත් සහ එන්නත් දීමට යම් ආකාරයක මැලිකමක් දැක්වීමේ ප්රවණතාවයක් ගොවි මහත්වරුන් අතර පවතී. මෙම ඖෂධ දේශීය වශයෙන් නිපදවා යම් සහනදායි පිළිවෙතකට සපයා දීමේ වැඩපිළිවෙළක් දියත් කළ හැකි නම් කිරි ව්යවසායකයාට සහනයක් සහ පිටිවහලක් වේ. වාර්ෂිකව 250,000ක් (දෙලක්ෂ පනස් දහසක්) සතුන්ගෙන් කිරි ගන්නවා යනු පැටවුන් ද එම ප්රමාණයක් බිහි වීමයි. ඉන් 50% ක් පිරිමි සතුන් වේ. මෙම උපදින පිරිමි සත්තු ඉවත් කළ යුතු අතර මීට අමතරව සෑම ගොවිපොළකම සිටින වැඩිහිටි සතුන්ගෙන් 20%ක් පරිභව ඝාතනය සඳහා (මස් පිණිස) ඉවත් කරනු ලබයි.
ලංකාවේ පවතින එක් ස්වයංපෝෂිත කර්මාන්තයක් ලෙස ගව මස් කර්මාන්තය සැලකේ. ලංකාවේ වාර්ෂික ගව මස් ඉල්ලුම මෙට්රික් ටොන් 30,000කි. 2019 වසරේ පිටරටින් ගෙන්වා ඇති ප්රමාණය මෙට්රික් ටොන් 119 කි.ඊට වැය වී ඇති මුදල රු.මිලියන 116 කි. දේශීයව මස් අනුභව කරන්නන්ට පිටරටින් මෙම මස් ආනයනයට වාර්ෂිකව රුපියල් බිලියන 30 ක් වැය වේ.
මෙම පිරිමි සතුන් සහ වාර්ෂිකව ඉවත් කරන සතුන්ගෙන් (සත්ව අපහරණ ආදායම නොලැබී යාමෙන්) කිරි ව්යවසායකයාට ආදායමක් නොලැබුණ හොත් එම ගොවිපොළ පාඩු ලබන තත්ත්වයට පත්වේ. නැතහොත් දේශීය සත්ව අපහරණ කර්මාන්තය බිඳ වැටීමත් සමඟ බිලියන 35 ක් වන දේශීය කිරි කර්මාන්තය කඩා වැටීමත් සිදු වේ. බිලියන 54 ක් කිරිපිටි ආනයනය සඳහා වැය කරන අතර දේශීය කිරි හා ගව අපහරණ කර්මාන්තය ලෙස ගත් කල මූළු වටිනාකම රුපියල් බිලියන 120 කි.
මෙම කර්මාන්තය සඳහා ප්රතිපත්ති සැකසීමේදී මෙම ආර්ථික දත්ත විශ්ලේෂණය නොකිරීම කනගාටුවට කරුණකි. ගව අපහරණය නතර කිරීම තුළ ආර්ථික හානිය එසේ වන විට වසරකට සතුන් ලක්ෂයක් අත්හැරීමෙන් සමාජ ගැටලුවක් ඇතිවේ. වසරකට සතුන් ලක්ෂයකට අභය දානය දීම සහ ඔවුන්ට ආහාර සපයන්නේ කෙසේ ද? කිරි සපයා දෙන සතුන් 250,000කට (දෙලක්ෂ පනස් දහසකට) ආහාර සලාකය දිය නොහැකි පසුබිමක පවතින රට වාර්ෂිකව තවත් අමතර අපහරණ සතුන් ලක්ෂයක් රැක බලා ගන්නට මහා භාණ්ඩාගාර ආර්ථිකය ශක්තිමත් ද යන්න ප්රශ්නයකි. දළ වශයෙන් මේ සඳහා රුපියල් බිලියන 6ක් වැය වේ.
මෙම සතුන් කැලෑ වැදීම නිසා විශේෂයෙන් අලින් වැනි සතුන්ට අවශ්ය තෘණ හිඟ වීමෙන් අලි ඇතුන් ගම් වැදීමට හේතුවක් වේ. ගව අපහරණ කර්මාන්තය අඩපණ කිරීමට දීර්ඝකාලීන සැලසුම් සැකසිය යුතුය. උපදින පිරිමි සතුන් ප්රමාණය අඩු කිරීම (ලිංග නිර්මිත ශුක්රාණු කෘත්රිම සිංචනය සඳහා යොදා ගැනීම) එහෙත් මෙම ක්රමය යටතේ පිරිමි සතුන් ගහණය මෙරට පාලනය කර ගැනීමට වසර 05 ක කාලයක් අවම වශයෙන් ගත වනු ඇත.
පිරිමි සතුන් පාලනය කර ගත්ත ද ගොවිපළවලින් නිෂ්පාදනයට දායක නොවන සතුන් ගොම හා කාබනික පොහොර නිෂ්පාදනයට යොදා ගැනීමට යෝජනා වී ඇති අතර මහා පරිමාණ ලෙස වසරකට සතුන් ලක්ෂය බැගින් වසර 10 ක පමණ කාලයක් සතුන් මිලියනයකට අවශ්ය තෘණභූමි ප්රමාණය කොතරම් ද යන්න සිතා බැලිය යුතුය. කිරි කර්මාන්තයේ නිර්ණායක අනුව අක්කරයකට පෝෂණය සඳහා උපරිම ලෙස සතුන් 5 ත් 8 ත් අතර ප්රමාණයක් යොමු කළ හැකිය.
වාර්ෂිකව ඉවතලෑමට සිදුවන පිරිමි සතුන් ලක්ෂයක් නිෂ්පාදනයෙන් ඉවත් වන 35,000 ත් 135,000 ත් අතර සතුන් ප්රමාණයක් පෝෂණය කිරීමට තෘණ භූමි අක්කර 27000 ක් අවශ්ය වන අතර වසර 10 ක් තුළ මෙවැනි ව්යාපෘතියක් ක්රියාත්මක කිරීම තුළින් රට කෙතරම් ආර්ථිකමය වශයෙන් ගැටලුවකට මුහුණ පානු ඇතැයිද සිතිය හැකිය.
තවත් විකල්පයක් ලෙස යෝජනාවි ඇති අපහරණ ගවයින් පිටරටට යැවීමේ ව්යාපෘතිය ඵලදායි ලෙස සිදු කිරීමට අවශ්ය තාක්ෂණය සහ මිනිස් බලය සත්ව නිෂ්පාදන හා සෞඛ්ය දෙපාර්තමේන්තුව සතුව ඇත් දැයි නොදනිමි. අන්තර්ජාතික නියමයන්ට අනුකූලව සතුන් අපහරණ නීතිය ක්රියාත්මක කිරීම ශ්රී ලංකාව වැනි රටකට කෙතරම් ආර්ථික වාසියක් අත්වනු ඇත් දැයි ප්රතිපත්ති සම්පාදකයින් කල්පනා කර බැලිය යුතුය. කිරි කර්මාන්තය නංවාලීමට නම් කාරණා 3 ක් සම්පූර්ණ කළ යුතුය. සතුන්ට අවශ්ය පෝෂණය, ජලය සහ සැප පහසුව සපයා දීම, සත්ව රෝග නිවාරණය සහ ඖෂධ එන්නත් නිසි කලට සහනදායී ලෙස සපයා දීමට අවශ්ය උපරිම පහසුකම් සැලසීම, කෘත්රිම සිංචන ක්රියාවලිය යාවත්කාලීන කොට ලිංග නිර්මිත ශුක්රාණු භාවිතය, කලල බද්ධය වැනි ව්යාපෘති මගින් උසස් ආරයේ දේශීය කිරිගවයකු දේශීයව නිර්මාණය කිරීම සහ වසර අසූවකට අධික කාලයක් තුළ විවිධ අභිජනන මට්ටම්වලින් අභිජනනය සිදු කොට ඇති සතුන් සඳහා පුළුල් වශයෙන් ජානමය විශ්ලේෂණයක් (Gene Sequencing) කොට සියලු සත්ව නිෂ්පාදන දත්ත ඩිජිටල්කරණය කිරීම වැනි ක්රියාවලියක් හරහා මෙම සර්වකාලීන දැක්ම යථාර්ථයක් කිරීමෙන් පමණක් දේශීය කිරි නිෂ්පාදනය සෞභාග්යයේ දැක්මට අනුව කිරෙන් සපිරි රටක් යන්න සඵල කර ගැනීමට හැකි වනු ඇත.
නිරිත දිග බෙංගාල බොක්ක මුහුදු ප්රදේශයේ පවතින “බුරවි” සුළි කුණාටුව දෙසැම්බර් 02 වන දින පෙ.ව. 08.30 වනවිට ත්රිකුණාමලයට කි.මි. 200ක් නැඟෙනහිරට බරව ස්ථානගතව පැවතුනි.
මෙම සුළි කුණාටුව බටහිරට නැඹුරුව වයඹ දෙසට ගමන් කර ත්රිකුණාමලය සහ පේදුරුතුඩුව අතරින් මුලතිව්වලට ආසන්නව ශ්රී ලංකාවේ ඊශානදිග වෙරළෙන් දිවයිනට අද (02) රාත්රී කාලයේ (ප.ව. 07.00 -10.00 අතර) ඇතුළු වේ යැයි බලාපොරොත්තු වන බව කාලගුණ විද්යා දෙපාර්තමේන්තුවේ ස්වාභාවික විපත් පිළිබඳ පූර්ව අනතුරු ඇඟවීමේ මධ්යස්ථානය දැනුම් දෙනු ලබයි.
සුළි කුණාටුව සමග සුළිගේ වේගය පැ.කි.මි. 80-90 පමණ වියහැකි අතර, විටින්විට එය පැ.කි.මි. 100 දක්වා වැඩිවිය හැකිය. මෙය ක්රමයෙන් බටහිර දෙසට ගමන් කර මන්නාරම් බොක්ක වෙත හෙට (03) උදෑසන වනවිට පැමිණෙනු ඇතැයි බලාපොරොත්තු වේ. මෙම තත්ත්වය හේතුවෙන් ත්රිකුණාමලය සිට කන්කසන්තුරය දක්වා සහ පුනරින් සිට පුත්තලම දක්වා වන වෙරළබඩ ප්රදේශවල මුහුදු රළ උදම් රළ මට්ටමමට වඩා මීටර 1 ක් පමණ ඉහළ යා හැකි අතර වෙරළාසන්න පහත් බිම් මුහුදු ජලයෙන් යටවිය හැකිය. දිවයින වටා මුහුදු ප්රදේශවල සුළඟේ වේගය ක්ෂණිකව පැ.කි.මි.100 පමණ ඉහළ යාමට ඉඩ ඇති බැවින් එම මුහුදු ප්රදේශය විටින් විට ඉතා රළු හෝ දළ රළු විය හැකිය.
මෙම තත්ත්වය යටතේ, තාවකාලික නිවාස සහ ඉදිකිරීම්වලට හානිවීම, වහලවල ඇති තහඩු උළු ආදිය ගැලවියාම,විදුලි සහ දුරකථන රැහැන්වලට හානි සිදුවීම, ගස්වල අතු කැඩීම් හා මාර්ග අසළ ඇති විශාල ගස් ගැලවියාම, වී වගා බිම්වලට, කෙසෙල්, පැපොල් වැනි පලතුරු වගාවන්වලට හානිසිදුවීම, වරාය ආශ්රීතව නවතා/රඳවා ඇති යාත්රා අංගනවලට හානි සිදුවීම, ක්ෂණික ගංවතුර තත්ත්වයන් ඇතිවීම, වෙරළාසන්න පහත් ගොඩබිම් ප්රදේශ මුහුදු ජලයෙන් යටවීම වැනි ආපදා තත්ත්වයන් ඇතිවිය හැකි බව කාලගුණ විද්යා දෙපාර්තමේන්තුවේ ස්වාභාවික විපත් පිළිබඳ පූර්ව අනතුරු ඇඟවීමේ මධ්යස්ථානය වැඩිදුරටත් දැනුම් දෙනු ලබයි.
බුරවි සුළි කුණාටුව සම්බන්ධයෙන් අනතුරු ඇගවීමේ ‘රතු ‘ නිවේදනයක් අද (02) කාලගුණ විද්යා දෙපාර්තමේන්තුව විසින් නිකුත් කර තිබෙනවා. එය සම්පූර්ණයෙන් පහත පළ වෙනවා.
රාජ්ය අමාත්ය ලොහාන් රත්වත්තේ මහතා බන්ධනාගාර කළමනාකරණ හා සිරකරුවන් පුනරුත්ථාපන කටයුතු රාජ්ය අමාත්යවරයා ලෙස ද පත් කරනු ලැබ සිටී.
රත්වත්තේ මහතා අද (02) පෙරවරුවේ ජනාධිපති කාර්යාලයේ දී ජනාධිපති ගෝඨාභය රාජපක්ෂ මහතා ඉදිරියේ නව අමාත්ය ධූරයේ දිවුරුම් දුන්නේය.
ලොහාන් රත්වත්තේ මහතා මැණික් හා ස්වර්ණාභරණ ආශ්රිත කර්මාන්ත රාජ්ය අමාත්ය ධූරයේ ද කටයුතු කරයි.
නිසි කලට පෙර සංවාසයේ යෙදීම, ලිංගික පිවිතුරු බව සිඳ ගත් තරුණ තරුණියන්ගේ විශාලතම පසුතැවිල්ල බව ලිංගික හැසිරීම් පිළිබඳ බ්රිතාන්යයේ සිදුකරන ලද සමීක්ෂණයකින් හෙළිවේ.
තමන් පළමු වරට සංවාසයේ යෙදුණේ, “නිසි කාලයේ නොවන” බව බ්රිතාන්යයේ වෙසෙන 20 වන වියේ පසුවන තරුණියන්ගෙන් තුනෙන් එකකට වැඩි පිරිසක් සහ තරුණයන්ගෙන් හතරෙන් එකක් පිළිගනිති.
බ්රිතාන්යයේ ලිංගික එක්වීමකට නිත්යනුකූල අනුමැතිය ලැබෙන්නේ, වයස 16 ක් සම්පුර්ණ වූ පුද්ගලයන්ටය.
ලිංගික ආකල්ප සහ ජීවන රටා පිළිබඳ මෑතකදී කරන ලද මත විමසුමට අනුව, එම වයසේදී තරුණ තරුණියන් ඊට සුදුසු මට්ටමක නොසිටිය හැකිය.
සමීක්ෂණය සඳහා සහභාගී වූ තරුණියන්ගෙන් 40% ක් සහ තරුණයන්ගෙන් 26% ක් තමන්ගේ මුල් ලිංගික අත්දැකීම සිදුවූයේ “සුදුසු කාලයේදී” නොවන බව ප්රකාශ කළහ.
තවදුරටත් කරුණු විමසීමේදී බොහෝ දෙනා ප්රකාශ කළේ, තව සුළු කාලයක් තමන්ගේ ලිංගික පිවිතුරුභාවය ආරක්ෂා කරගෙන සිටියා නම් මැනවි යැයි සිතෙන බවය.
අතලොස්සක් ප්රකාශ කළේ, ඊටත් පෙර සංවාසයේ යෙදිය යුතු බවය.
සමීක්ෂණයට භාජනය වූ බ්රිතාන්ය වාසී තරුණ තරුණියන්ගෙන් බහුතරය සංවාසයේ යෙදී ඇත්තේ, 17 – 18 වයස් සිමාවේ පසුවෙද්දීය.
තුනෙන් එකකට ආසන්න පිරිසක් වයස අවුරුදු 16 සම්පුර්ණ වීමට ප්රථම සංවාසයේ යෙදී තිබේ.
සංවාසයේ යෙදිය යුතු යැයි ඔබට සිතෙන්නේ නම්, පළමුව ඔබ ඔබෙන් ම ඒ පිළිබඳව විමසන්න:
ඉහත ප්රශ්නවලට පිළිතුර “ඔව්” නම් සංවාසයේ යෙදීමට සුදුසු තත්ත්වයක ඔබ සිටිනවා විය හැකියි.
නමුත්, පහත දැක්වෙන කවර හෝ ප්රශ්නයකට ‘ඔව්’ යනුවෙන් පිළිතුරු දෙන්නේ නම්, ඔබ සංසර්ගය සඳහා සුදුසු අවස්ථාවක පසු නොවනවා විය හැකිය.
දත්ත: බ්රිතාන්යයේ ජාතික සෞඛ්ය සේවයෙනි – උපුටා ගැනීම බී.බී.සී
කාලගුණ විද්යා දෙපාර්තමේන්තුව විසින් 2020 දෙසැම්බර් මස01 දින මධ්යහන 12.00 ට නිකුත් කරන ලද හෙට (02) දිනය සඳහා කාලගුණ අනාවැකිය.
ගැඹුරු පීඩන අවපාතය සුළි කුණාටුවක් දක්වා වර්ධනය වී ශ්රී ලංකාව හරහා ගමන් කිරීමට ඉහල හැකියාවක් පවතින බැවින් දිවයින පුරා වැසි සහ සුළං තත්ත්වයේ සැලකිය යුතු වැඩි වීමක් අපේක්ෂා කෙරේ.
ගිනිකොණ දිග බෙංගාල බොක්ක මුහුදු ප්රදේශය ආශ්රිතව පැවති අඩු පීඩන තත්ත්වය අද උදේ 11.30 වන විට ගැඹුරු පීඩන අවපාතයක් බවට වර්ධනය වී ත්රිකුණාමලයට ගිනිකොණ දෙසින් කි.මී. 500 ක් දුරින් ස්ථානගතව ඇත. මෙම පද්ධතිය ඉදිරි පැය 24 තුලදී සුළි කුණාටුවක් දක්වා වර්ධනයව වනු ඇත.
මෙම පද්ධතිය බටහිරට නැඹුරුව වයඹ දෙසට ගමන් කර මඩකලපුව සහ පේදුරු තුඩුව අතරින් ශ්රී ලංකාවේ නැගෙනහිර වෙරළට බදාදා (දෙසැම්බර් 02) සවස් කාලයේදී හෝ රාත්රී කාලයේදී වීමට වැඩි හැකියාවක් ඇත.
නැගෙනහිර,උතුරු, උතුරු මැද,වයඹ, මධ්යම සහ සබරගමුව පළාත්වල නිරන්තර වැසි හෝ ගිගුරුම් සහිත වැසිඇතිවේ. ඇතැම් ස්ථානවල මි.මී. 200 ට වැඩි ඉතා තද වැසිද ඇතිවිය හැක.
සෙසු ප්රදේශ වල විටින් විට වැසි හෝ ගිගුරුම් සහිත වැසිඇතිවේ. ඇතැම් ස්ථානවල මි.මී. 100 ට වැඩි තද වැසිද ඇතිවිය හැක.
උතුරු, උතුරු මැද, නැගෙනහිර ,වයඹ සහ බස්නාහිර, මධ්යම සහ සබරගමුවපළාත්වල විටින් විට පැ.කි.මි.(80 –90) පමණ දක්වා වන ඉතා තද ප්රහාරාත්මක සුළං ඇතිවේ.
සෙසු ප්රදේශ වල විටින් විට පැ.කි.මි.(60 –70) පමණ දක්වා වන තද ප්රහාරාත්මක සුළං ඇති විය හැක.
ඇතිවිය හැකි අයහපත් කාලගුණික තත්වය පිළිබද විමසිලිමත්වන ලෙස ජනතාවගෙන් ඉල්ලා සිටිනු ලැබේ.
| ගිනිකොණ දිග බෙංගාල බොක්ක මුහුදු ප්රදේශය ආශ්රිතව පැවති අඩු පීඩන තත්ත්වය අද උදේ 11.30 වන විට ගැඹුරු පීඩන අවපාතයක් බවට වර්ධනය වී ත්රිකුණාමලයට ගිනිකොණ දෙසින් කි.මී. 500 ක් දුරින් ස්ථානගතව ඇත. මෙම පද්ධතිය ඉදිරි පැය 24 තුලදී සුළි කුණාටුවක් දක්වා වර්ධනයව වනු ඇත.මෙම පද්ධතිය බටහිරට නැඹුරුව වයඹ දෙසට ගමන් කර මඩකලපුව සහ පේදුරු තුඩුව අතරින් ශ්රී ලංකාවේ නැගෙනහිර වෙරළට බදාදා (දෙසැම්බර් 02) සවස් කාලයේදී හෝ රාත්රී කාලයේදී වීමට වැඩි හැකියාවක් ඇත. එබැවින් 05N-12N සහ 82E-90E අතර මුහුදු ප්රදේශවල නිරන්තර වැසි, තද හෝ ඉතා තද ප්රහාරාත්මක සුළං සහ රළු හෝ ඉතා රළු මුහුදු ප්රදේශ ඇතිවිය හැක.දිවයින වටා වන ගැඹුරු සහ නොගැඹුරු මුහුදු ප්රදේශවල නැවත දැනුම් දෙන තුරු ධිවර සහ නාවුක කටයුතුවල නොයෙදෙන ලෙස අවවාද කරනු ලැබේ.ධීවර හා නාවික ප්රජාව මේ පිළිබඳව කාලගුණ විද්යා දෙපාර්තමේන්තුව මගින් මේ සම්බන්ධව නිකුත් කරන ඉදිරි නිවේදන පිලිබඳ අවධානය යොමුකරන ලෙස ඉල්ලා සිටිනු ලැබේ. |
| වැසි තත්ත්වය: |
| කන්කසන්තුරය සිට ත්රිකුණාමලය සහ මඩකලපුව හරහා පොතුවිල් දක්වා වන ගැඹුරු මුහුදු ප්රදේශවල නිරන්තර වැසි හෝ ගිගුරුම් සහිත වැසි ඇතිවේ. මෙම මුහුදු ප්රදේශවල ඇතැම් ස්ථාන වලට ඉතා තද වැසිද ඇතිවිය හැක. සෙසු මුහුදු ප්රදේශවල විටින් විට වැසි ඇති වේ. |
| සුළඟ: |
| දිවයින වටා වන මුහුදු ප්රදේශවල සුළං ඊසාන දෙසින් හමයි. සුළගේ වේගය පැ.කි.මී. (40-50) පමණ වේ.පුත්තලම සිට මන්නාරම, කන්කසන්තුරය, ත්රිකුණාමලය සහ පොතුවිල්හරහා හම්බන්තොට දක්වා වන ගැඹුරු මුහුදු ප්රදේශවල සුළඟේ වේගය විටින් විට පැ.කි.මී. (80-90) දක්වා වැඩිවිය හැක. සෙසු මුහුදු ප්රදේශවල සුළඟේ වේගය විටින් විට පැ.කි.මී. (60-70) දක්වා වැඩිවිය හැක |
| මුහුදේ ස්වභාවය: |
| දිවයින වටා වන මුහුදු ප්රදේශ තරමක් රළු වන අතර කන්කසන්තුරය සිට ත්රිකුණාමලය හරහා පොතුවිල් දක්වා වන ගැඹුරු මුහුදු ප්රදේශ විටින් විට ඉතා රළු හෝ දළ රළු විය හැක. ගාල්ල සිට කොළඹ හරහා පුත්තලම දක්වා වන ගැඹුරු මුහුදු ප්රදේශ විටින් විට ඉතා රළු විය හැක. කන්කසන්තුරය, ත්රිකුණාමලය සහ මඩකලපුව හරහා පොතුවිල් දක්වා වන වෙරළ ආසන්න මුහුදු ප්රදේශ වල මුහුදු රළ මීටර්(2.0-3.0) ක් පමණ ඉහළ යාමේ හැකියාවක් පවතින අතර මේ හේතුවෙන් මුහුදු රළ ගොඩබිමට පැමිණීමේ හැකියාවක් ද පවතී. |
විදුලිබල මණ්ඩලයේ විදුලි පද්ධතියේ ඇති වන දෝශයන් සහ දුර්වලතාවයන් හේතුවෙන් සිදුවන පුද්ගල මරණයක දී රුපියල් ලක්ෂ 10ක වන්දි මුදලක් පිරිනැමීමට හැකිවන පරිදි රක්ෂණ ක්රමයක් ඇති කිරීමට විදුලිබල අමාත්ය ඩලස් අලහප්පෙරුම මහතා රක්ෂණ සංස්ථාව සමඟ සිදුකළ සාකච්ඡාවකදී තීරණය වී තිබේ.
එමෙන්ම ක්ෂණික විදුලි බිඳවැටීම් වැනි හේතූන් නිසා ගෘහ විදුලි උපකරණ වලට සිදුවන අලාභයන් පූරණය කිරීම සඳහා ද මෙම රක්ෂණ ක්රමය හඳුන්වා දීමට ශ්රී ලංකා රක්ෂණ සංස්ථාව සමඟ සාකච්ඡා කළ බව විදුලිබල අමාත්ය ඩලස් අලහප්පෙරුම මහතා සඳහන් කළේය.
ඒ මහතා මේ බව සඳහන් කළේ ඊයේ (30) පාර්ලිමේන්තුවේ දී පැවති විදුලිබල අමාත්යාංශයේ සහ පුනර්ජණනීය බලශක්ති රාජ්ය අමාත්යාංශයේ අමාත්යාංශයීය උපදේශක කාරක සභාවේදීය.
නඩත්තු කටයුත සඳහා විදුලිය විසන්ධි කිරීමේ දී එය සතියකට පෙර අදාළ පාරිභෝගිකයන් වෙත දැනුම්දීම සඳහා ක්රමවේදයක් ආරම්භ කරන ලෙසද අමාත්යවරයා නිලධාරීන් වෙත උපදේශක කාරක සභාවේදී දැනුම් දුන්නේය.
පළාත් පාලන ආයතන වලට අයත් ප්රදේශ වලට වීදි පහන් සැපයීමේ ක්රියාවලිය විධිමත් කිරීමටත් එසේ සැපයෙන වීදි පහන් වලට අදාළ ප්රමිතියක් ඇති කිරීමටත් කාරක සභාවේදී තිරණය විය. විදුලිබල මණ්ඩලය විසින් වීදි පහන් වෙනුවෙන් වසරකට රුපියල් බිලියන දෙකක මුදලක් වැය කරනු ලබයි. විදුලි බලයෙන් ක්රියාකරන වීදි පහන් සවි කිරීමට නොහැකි ප්රදේශ වලට සූර්ය බලයෙන් ක්රියාකරන වීදි පහන් සවි කිරීමේ අවශ්යතාවය පිළිබඳව ද මෙහිදී කාරක සභාවේ අවධානය යොමු විය.
අකුණු සක්රීය ප්රදේශවල අකුණු හේතුවෙන් විශාල වශයෙන් දේපළ විනාශයට පත්වීම සම්බන්ධයෙන් කාරක සභාවේ අවධානය යොමුවූ අතර ආපදා කළමනාකරණ දෙපාර්තමේන්තුව සමගද සාකච්ඡා කොට මේ සම්බන්ධව විසඳුමක් ලබා ගැනීමට මෙහිදී තීරණය විය.
රට තුළ සූර්ය ජනන බල කට්ටල (Solar Panel) සවි කිරීමේ දී විධිමත් ක්රමවේදයක් සහ පාරිභෝගිකයන් අපහසුතාවයට පත් නොවන ක්රියාවලියක් ඇති කළ යුතු බවටද මෙහි දී අවධානය යොමු විය. මේ සඳහා සුනිත්ය බල ශක්ති අධිකාරිය මඟින් නියාමන ක්රියාවලියක් ආරම්භ කරන බව පුනර්ජණනීය බලශක්ති රාජ්ය අමාත්ය දුමින්ද දිසානායක මහතා සඳහන් කළේය.
මෙයට අමතරව රාජ්ය ආයතන සඳහා සූර්ය ජනන බල කට්ටල ලබාදීම සඳහා ඉන්දීයානු ණය යොජනා ක්රමය යටතේ රුපියල් මිලියන 100ක් ලැබීමට නියමිත බවත් ඒ මහතා අවධාරණය කළේය. එමගින් රාජ්ය ආයතන වල විදුලිබිල් සඳහා වැයවන විශාල මුදල ක්රමයෙන් අඩු කර ගැනීම මෙහි අරමුණයි. මේ සමගම ආණ්ඩුවේ ආයතන වල වහලවල් සූර්ය ජනන බල කට්ටල සවි කිරීම සඳහා කුළියට ලබාදීම මගින් ආදායම් ඉපයීමේ වැඩපිළිවෙලක්ද යොජනා කොට තිබේ.
මෙම අවස්ථාවට අමාත්ය මහින්ද අමරවීර පාර්ලිමේන්තු මන්ත්රීවරු වන සාරතී දුෂමන්ත, බී.වයි.ජී.රත්නසේකර, සමන්ප්රිය හේරත් චාර්ල්ස් නිර්මලනාදන් සහ විදුලිබල අමාත්යාංශයේ ලේකම් වසන්තා පෙරේරා, පුනර්ජණනීය බලශක්ති රාජ්ය අමාත්යාංශයේ ලේකම් හේමන්ත සමරකෝන් ඇතුළු නිලධාරීහු පිරිසක්ද සහභාගී වූහ.
දේශීය අධිකරණයේ නව කඩඉමක් සනිටුවන් කරමින් උපරිමාධිකරණයට නව විනිසුරුවරු 21 දෙනෙක් ජනපති ඉදිරියේ අද (01) දින දිවුරුම් දුන්හ. ශ්රේෂ්ඨාධිකරණයට නව විනිසුරුවරු 06 දෙනෙක්, අභියාචනාධිකරණ නව සභාපති සහ අභියාචනාධිකරණ නව විනිසුරුවරු 14 දෙනෙක් මේ අනුව අද පස්වරුවේ ජනාධිපති කාර්යාලයේදී දිවුරුම් දුන්හ.
මේ අවස්ථාවේදී ජනපතිවරයා කියා සිටියේෙ අධිකරණයේ ස්වාධීනත්වය ආරක්ෂා කර එහි ක්රියාකාරිත්වය දේශපාලන සහ වෙනත් මැදිහත්වීම්වලින් ඉවත් කරන බවට තමා සහතික වන බවයි.
( ඡායාරූප : ජිවන් චන්දිමාල් , උපුල් නිලංග , සුමින්ද කීර්ති – ජනාධිපති මාධ්ය අංශය )
රැඳවියකුගේ ඥාතියෙක් පොලිස් නිලධාරියෙක් ඉදිරියේ ආයාචනය කරන ආකාරය සමාජ මාධ්යවල සටහන්ව තිබූ අයුරු ඉහත ඡායාරූපයේ දැක්වේ.
මහර බන්ධනාගාරය තුළ හටගත් නොසන්සුන් වාතාවරණය තවදුරටත් පහව ගොස් නොමැති බව සිරකරු අයිතිවාසිකම් ආරක්ෂා කිරීමේ කමිටුව පවසන අතර පොලිසිය පවසන්නේ, රැඳවියන් පිරිසක් බන්ධනාගාර පිවිසුමට පැමිණි නිසා ඔවුන් විසුරුවා හැරීම පිණිස අහසට වෙඩි තැබූ බවය.
“ආයිත් වෙඩි තැබීම් වෙනවා කියල අපිට ආරංචි වෙනවා. මේ වෙනකොට කිසිම නිලධාරියෙක් ඇතුළේ නෑ කියල තමයි අපිට ආරංචි. එළියේ ඉඳල ඇතුළට වෙඩි තියනවා ඇතුළේ ඉන්න රැඳවියන් අපිව මරන්න එපා කියල කෑගහනවා,” යනුවෙන් සිරකරු අයිතිවාසිකම් ආරක්ෂා කිරීමේ කමිටුවේ සභාපති නිතීඥ සේනක පෙරේරා බීබීසී සිංහල සේවය සමඟ පැවසීය.
නියෝජ්ය පොලිස්පති අජිත් රෝහණ පවසන්නේ, මේ වන විට බන්ධනාගාරය තුළ තත්ත්වය පාලනය කර ඇති බවය.
“රැඳවියන් පිරිසක් ගේට්ටුව ලඟට ආපු නිසා ඔවුන්ව විසුරුවා හරින්න අහසට වෙඩි තියල තියෙනවා. ඒත් දැනට තත්වය පාලනය කරලා තියෙන්නේ,” නියෝජ්ය පොලිස්පතිවරයා පැවසීය.
ඉරිදා ඇති වූ ගැටුම හේතුවෙන් මියගිය පුද්ගලයින් අට දෙනෙකුගේ මළසිරුරු මේ වන විට රාගම රෝහලට රැගෙනවිත් ඇති අතර, තුවාල ලැබූ 63 දෙනෙකු ප්රතිකාර සඳහා රෝහල් ගතකර ඇති බවත් රාගම රෝහලේ අධ්යක්ෂ වෛද්ය ෂෙල්ටන් පෙරේරා මාධ්ය වෙත පැවසීය. ඔහු පවසන පරිදි ඉන් 10 දෙනෙකුගේ තත්ත්වය බරපතළය.
රාගම රෝහලට ඇතුළත් කරන ලද රැඳවියන් 71 දෙනෙකුගෙන් 48 දෙනෙකු මේ වන විට පී සී ආර් පරීක්ෂාව සඳහා යොමු කර ඇති අතර, ඔවුන් අතරින් රැඳවියන් 26 දෙනෙකු ම කොරෝනා ආසාදිතයන් බව තහවුරු වී ඇතැයි රාගම රෝහලේ ප්රකාශකයෙක් පැවසීය.
ඉරිදා ගැටුම හටගැනීමත් සමඟම රැඳවියන්ගේ ඥාතීන් මහර බන්ධනාගාරය ඉදිරිපිටට රැස්වී තම ඥාතීන් පිළිබඳව විස්තර විමසූහ. එහෙත් ඔවුනට තම ඥාතීන් පිළිබඳව කිසිදු තොරතුරක් ලබාගැනීමට නොහැකි වූ බව සමහර දෙමාපියෝ පැවසූහ.
සුජීවා ප්රනාන්දු බීබීසී සිංහල සේවය සමඟ පවසුවේ තම පුතා පිළිබඳව කිසිදු තොරතුරක් සොයාගැනීමට නොහැකි වූ බවයි.
“අපි අද උදේ ඉඳල බන්ධනාගාරය ඉස්සරහ හිටියට අපේ පුතා ගැන කිසිම තොරතුරක් ලැබුනේ නෑ. අනේ සර් අපේ පුතාට මොකද උනේ කියල හොයල දෙන්න,” යනුවෙන් ඇය හඬමින් බීබීසී සිංහල සේවයෙන් ඉල්ලා සිටියාය.
මවුවරුන් පොලිස් නිලධාරීන්ගේ දෙපා නමැද සිය දරුවන් බේරාදෙන ලෙසත් ඔවුන්ගේ ගැන තොරතුරු දන්වන ලෙසත් ආයාචනා කරන ඡායාරූප සමාජ මාධ්ය ඔස්සේ සංසරණය විය.
මහර බන්ධනාගාරයේ නොසන්සුන්තාව පිළිබඳ විශේෂ පරීක්ෂණයක් කරන්නැයි, ආරක්ෂක ලේකම්වරයා පොලිස්පතිවරයාට උපදෙස් දුන් බව ආරක්ෂක අමාත්යාංශය නිවේදනයක් නිකුත්කරමින් පැවසීය. පොලිස් මාධ්ය ප්රකාශක අජිත් රෝහණ කියා සිටියේ, ඒ අනුව ඒ සම්බන්ධයෙන් වහාම විමර්ශනයක් ආරම්භ කිරීමට පොලිස්පතිවරයා අපරාධ පරීක්ෂණ දෙපාර්තමේන්තුවට උපදෙස් දුන් බවය.
මේ අතර සිදුවීම විමර්ශනය කර නිර්දේශ ඇතුළත් පූර්ණ වාර්තාවක් ඉදිරිපත් කිරීම සඳහා අධිකරණ අමාත්ය, ජනාධිපති නීතිඥ අලි සබ්රි විසින් විශ්රාමික මහාධිකරණ විනිසුරු කුසලා සරෝජනී වීරවර්ධනගේ ප්රධානත්වයෙන් යුත් පංච පුද්ගල කමිටුවක් පත්කරනු ලැබ ඇති බව රජයේ ප්රවෘත්ති දෙපාර්තමේන්තුව නිවේදනය කළේය.
එම කමිටුවේ අනෙකුත් සාමාජිකයින් ලෙස අධිකරණ අමාත්යාංශයේ ප්රධාන නීති උපදේශක ජනාධිපති නීතිඥ යූ ආර් ද සිල්වා, අධිකරණයේ අමාත්යාංශයේ අතිරේක ලේකම් (පාලන) රෝහණ හපුගස්වත්ත, නියෝජ්ය පොලිස්පති නීතිඥ අජිත් රෝහණ, හිටපු බන්ධනාගාර කොමසාරිස් ගාමිණී ජයසිංහ පත්කොට තිබෙන අතර, බන්ධනාගාර ප්රතිසංස්කරණ හා සිරකරුවන් පුනරුත්ථාපන රාජ්ය අමාත්යාංශයේ අතිරේක ලේකම් නිශාන් ධනසිංහ කමිටුවේ ලේකම්වරයා ලෙස කටයුතු කරයි.
අදාළ සිද්ධියට පාදක වූ කරුණු, ඒ සඳහා වගකිව යුතු පාර්ශවයන් හා ඒ සඳහා ගතයුතු ක්රියාමාර්ග හා මෙවැනි සිද්ධීන් වළක්වා ගැනීමට ගතයුතු නිර්දේශ ඇතුළත් වාර්තාවක් අධිකරණ අමාත්යවරයා වෙත ඉදිරිපත් කළ යුතු අතර, අදාළ කමිටුව විසින් සතියක් ඇතුළත අතුරු වාර්තාවක් ද, මාසයක් ඇතුළත කෙටි කාලීන හා දීර්ඝ කාලීනව ගතයුතු ක්රියාමාර්ග පිළිබඳ නිර්දේශ ඇතුළත් සම්පුර්ණ වාර්තාවක් ද ඉදිරිපත් කළ යුතු යයි අධිකරණ අමාත්යාංශයේ ලේකම්වරයා විසින් දන්වා තිබෙන බවත් රජයේ ප්රවෘත්ති දෙපාර්තමේන්තුව පැවසීය.
මේ අතර පවතින තත්ත්වය පිලිබඳව තම ට්විටර් ගිණුමේ සටහනක් තබමින් ඉසංක ජයසිංහ පැවසුවේ “සිරකරුවෝද මනුෂ්යයෝය යන්න මනුෂ්යයෝද සිරකරුවන් ය ලෙසින් වෙනස් වෙමින් පවතී. සූදානමින් සිටින්න,” යනුවෙනි.
බී.බී.සී. සන්දේශය වෙතින් කළ ඍජු උපුටා ගැනීමකි
2018 ඒ අවාසනාවන්ත පාස්කු ප්රහාරයෙන් පසුව අපේ ආණ්ඩුව නැවත පාසල් විවෘත කරන්න යන විට, ළමුන්ව දෙමව්පියන්ව බය කළා. රජය පාසල් විවෘත කළත් ළමයි පාසල් ඇවිත් නෑ කියලා හිස් පන්ති කාමර පෙන්නුවා. political – media agenda අනුව එදා ආණ්ඩුව අපකීර්තියට පත්කරන්න උත්සාහ කළා. ගුරුවරුන් දෙන සහතිකය අවිශ්වාස කරන තැනට වැඩ හැදුවා. ඒ නරක වැඩේ අද ආණ්ඩුවට “පාරාවළල්ලක්” වෙලා.
| ශ්රී ලංකාවේ අධ්යාපනයේ තිත්ත ඇත්ත මෙන්න පාස්කු ප්රහාරයේදී පාසල් ගැන ඇති කළ භීතිය ගැන ආණ්ඩුවට පරාවළලක් වෙලා ජාතික සමගි ජනබලවේගයේ ජාතික ලැයිස්තු මන්ත්රී එරාන් වික්රමරත්න මහතා අද (01) අධ්යාපන අමාත්යාංශයේ වැය ශීර්ෂයට අදාළ පාර්ලිමේන්තු විවාදයේ දී කළ සම්පූර්ණ කතාව. රටක අධ්යාපනය සකස් විය යුත්තේ කොහොමද ? අද වගේ කාලයක, අද වගේ දවසක මේක අහන්නම ඕන ප්රශ්නයක් ? ඇත්ත වශයෙන්ම අපි අද දවසේ අධ්යාපනය සකස් කරන්න අවශ්ය අපේ දරුවන්ට හෙට ලෝකය දිනන්න අවශ්ය වන ලෙසයි. ඔවුන් අධ්යාපන සහතික දෙස බලමින් හූල්ලන, අධ්යාපන ක්රමයක් තිබිය යුතු නෑ. තරුණ අසහනය වර්ධනය වීම නිසා, අපේ පරම්පරා දෙකක් වන්දි ගෙවා තිබෙනවා. ඒ නිසා දැන් ඇති. එහෙම නම් අද දවසේ අපි අපේ අධ්යාපන ප්රතිපත්තිය සකසන්න අවශ්ය “හෙට” ලෝකය දිනන්නයි. අද, අපි වාද විවාද කල යුතුව තිබෙන්නේ ඒ ගැනයි! ලංකාවේ, 10-13 ශ්රේණි ආශ්රිත ද්විතියික අධ්යාපනය ගැන කතා කරනකොට, තවමත් (net enrollment rate ) ශුද්ධ බඳවා ගැනීමේ අනුපාතය 65% යි. ඉතුරු 35% ට මොකද වෙන්නේ ? ඒ වගේම තමයි සෑම වසරකම පළමු ශ්රේණියට ඇතුළත් වන ළමුන්ගෙන් 6%ක් පමණයි, විශ්ව විද්යාලයට යාමට අවස්ථා හිමිකර ගන්නේ. ඒ වගේම තමයි, නිසි අධ්යාපන හෝ නිපුණතාව, පුහුණුවකින් තොරව 33% ක් රටේ ශ්රම වෙළඳපොළට එකතු වෙනවා. ඒ නිසාම, අවුරුදු 15-24ත් අතර තරුණ විරැකියා අනුපාතය ඉහළ අගයක සඳහන් වෙනවා. ඒ වගේම තමයි කොවිඩ් ගෝලීය වසංගතය අවස්ථාවේ “දුරස්ථ අධ්යාපනයට” ළමුන් යොමුකරනවා කිව්වා. අපි ඒ සඳහා රටක් ලෙස සූදානම්ව සිටියද? අපි අධ්යාපන කටයුතු සිදුකල ආකාරය සම්බන්ධව තෘප්තිමත් වෙන්න පුළුවන්ද ? පාසල් ළමුන් කීයෙන් කී දෙනාටද, laptop, ipads. computer, smartphone තිබුණේ ? තමන්ගේ පවුලේ ජීවන බර දරාගන්න බැරුව හිටපු මිනිස්සු කොවිඩ් හමුවේ තවත් දුෂ්කරතාවට පත්වුණා. ඒ මිනිස්සු කොහොමද දරුවන්ට මේ තාක්ෂණික මෙවළම් අරගෙන දෙන්නේ ? ආණ්ඩුව ඒ ගැන හොයලා බැලුවද ? අනුන්ගේ එකක් හරි ඉල්ලගත්තත් හැමෝටම 4G පහසුකම් තිබුණද ? internent speed සහ signal ප්රශ්න කොච්චර තිබුණද ? මේ වගේ ප්රශ්න රැසක් සමඟ තමයි අද මේ අධ්යාපන අමාත්යංශ වැය ශීර්ෂය ගැන විවාදය සිදුකරන්න සිදුව තිබෙන්නේ. ගරු කතානායකතුමනි, අපි දන්නවා රටේ ආදායම් බෙදීයාමේ පරතරයක් තියෙනවා. අපේ වගේ රටවල එය බරපතල ලෙස තිබෙනවා. මේ ඇති නැති පරතරය නැති කරන මෙවලම තමයි අධ්යාපනය. සමාජ ඉණිමගේ ඉදිරියට යන්න ඕනෑම අයෙකුට හැකියාව තිබෙනවා. නමුත් ඒ සඳහා ඔහුට අධ්යාපනය ලැබීමේ අවස්ථාව හිමිවෙන්න ඕන. අපේ රටේ ද්විතියික අධ්යාපනය ලබමින් සිටි පිරිසගෙන් බහුතරයකට කොවිඩ් නිසා අධ්යාපන අවස්ථාව නිසි ලෙස හිමි වුණේ නෑ. තියෙන කෙනා ඉගෙන ගනී, නැති කෙනා “අතහැරපු” අධ්යාපන ක්රමයක් තමයි, පසුගිය කාලයේම ලැබුණේ. විධිමත් ලෙස ළමුන් Online අධ්යාපනයට යොමුකරන්න ආණ්ඩුව මොනවද කලේ ? මැදිරියක සිට සජීවීව ඉගැන්වූ පාඩමක් ඉගෙන ගන්න, ළමයි කීදෙනෙක් සම්බන්ධ වුණාද ? මොනවද ඒ සම්බන්ධව තියන දත්ත ? මොකුත් නෑ. අවාසනාවන්ත තරුණ කැරළි තුනකට මුහුණදීපු රටක් එහෙමද රටේ අනාගතය සමඟ කටයුතු කරන්නේ ? කොවිඩ් කවදා හෝ අවසන් වෙනතුරු අහිංසක නැතිබැරි කෙනාගේ දරුවට අධ්යාපන අවස්ථාව අහිමි කරනවද ? පුතාට tab එකක් අරගෙන දෙන්න තාත්තට සල්ලි නැති නිසා ඒ දරුවගේ අධ්යාපනය කඩාකප්පල් වෙන්න ඉඩ හරිනවද ? ඔය ටික වෙන්න දෙන්න ආණ්ඩුවක් මොකටද ? අධ්යාපන අමාත්යාංශයක් මොකටද ? ගරු කතානායකතුමනි, අපි අපේ ආණ්ඩුව සමයේ පාසල් සිසුන්ට tab පරිගණක දෙන්න යනකොට හැසිරුණු විදිය මතකද ? ළමයින්ට tab දෙන්න එපා පිළිකා හැදෙයි කියලා මිනිසුන්ව බය කළා. පටු බල තණ්හාව මත අනාගත පරම්පරාව උකස් තිබ්බා. නමුත් අපේ ප්රතිපත්තිය වුණේ ළමුන්ට අධ්යාපන අවස්ථා උපරිම සමීප කිරීම. මේ කරදිය වළල්ලෙන් එහා ලෝකයේ දැනුම ලබන්න, “දරුවව” ඊට සමීප කරවීම. අපේ අධ්යාපන ප්රතිපත්තිය වුණේ 13 වසර දක්වාම “අධ්යාපනය”. අපේ අධ්යාපන ප්රතිපත්තිය වුණේ “හැම පාසලක්ම හොඳම පාසලක්” කිරීම. ඒ වගේම වැදගත් කරුණක් කිවයුතුව තිබෙනවා. ඒ තමයි කොවිඩ් නිසා වහපු පාසල් විවෘත කළත් ළමයි පාසල් නොපැමිණීම. විදුහල්පතිවරු ගුරුවරු දෙයක් කිව්වාම එදා දරුවෝ ඔවුන්ව විශ්වාස කළා. දෙමාපියන් ගුරුතුමාගේ බසට ඇහුම්කන් දුන්නා. මොනවා නැතත් ගුරුවරයා සම්බන්ධ, පාසල සම්බන්ධ විශ්වාසය තිබුණා. නමුත් මෙවර ළමයින් පාසල් එන්න මැළි වුණා. ගුරුවරුන්ගේ වචනය දෙමාපියන් විශ්වාස කලේ නෑ. මේ දේ වෙනකොට විපක්ෂයේ අපි කිව්වේ නෑ “ළමයි පාසල් යවන්න එපා – කොවිඩ් හැදෙයි ” කියලා. නමුත් 2018 ඒ අවාසනාවන්ත පාස්කු ප්රහාරයෙන් පසුව අපේ ආණ්ඩුව නැවත පාසල් විවෘත කරන්න යන විට, ළමුන්ව දෙමව්පියන්ව බය කළා. රජය පාසල් විවෘත කළත් ළමයි පාසල් ඇවිත් නෑ කියලා හිස් පන්ති කාමර පෙන්නුවා. political – media agenda අනුව එදා ආණ්ඩුව අපකීර්තියට පත්කරන්න උත්සාහ කළා. ගුරුවරුන් දෙන සහතිකය අවිශ්වාස කරන තැනට වැඩ හැදුවා. ඒ නරක වැඩේ අද ආණ්ඩුවට “පාරාවළල්ලක්” වෙලා. ගරු කතානායකතුමනි, අපි බලය ගනියි, පරදියි, නැවත බලයට එයි. ඒත් ගුරු – සිසු විශ්වාසය බිඳීම ජාතික අපරාධයක්. රට බාරගන්න ඉන්න අනාගත පරම්පරාවේ අධ්යාපන කටයුතු ඇණහිටීම කියන්නේ ජාතික අවාසනාවක්. අපි නම් කොහොම වුනත් ඒ වගේ පහත් දේශපාලනයක් කරන්නේ නෑ. ඒ නිසා අපි කියනවා, අපේ රටටත් වඩා වසංගතයෙන් හානි වූ රටවල පවා පාසල් අධ්යාපන කටයුතු අඛණ්ඩව සිදුවෙනවා. බය නැතුව අවශ්ය තාක්ෂණික මෙවලම් භාවිත කරන්න. අධ්යාපන කටයුතු කඩාකප්පල් කරගන්න එපා. ගුරුවරුන්, විදුහල්පතිවරුන් දෙන උපදෙස්, සෞඛ්ය අංශ දෙන උපදෙස් අනුව කටයුතු කරමින් අධ්යාපන කටයුතු අඛණ්ඩව සිදුකරන්න. ඒ සඳහා දරුවන්ව යොමුකරන්න කියලා. ගරු කතානායකතුමනි, මම අවධානය යොමු කරන්නේ උසස් අධ්යාපනය සම්බන්ධවයි. 2018 වසරේ උසස් පෙළ විභාගය සඳහා අපේක්ෂකයන් 267,111ක් පෙනී සිටියා. එයින් විශ්ව විද්යාල ප්රවේශය සඳහා 167,907ක් සුදුසුකම් ලැබුවා. ප්රතිශතයක් ලෙස එය 62.86% ක්. නමුත් විශ්ව විද්යාල සඳහා ඇතුළත්වීමට අවස්ථාව හිමිවුණේ 31,451 ක් සඳහා පමණයි. ලක්ෂ ගණනක් සිසුන්ට අවස්ථාව අහිමි වෙනවා. ශ්රී ලංකාවේ තෘතික අධ්යාපනයට අදාළව gross enrollment ratio, බැලුවම 1970 දී 1.01%යි. 2014 දී 21%යි. නමුත් අපි බැලුවොත් ජපානය,1971 දී 17%යි. 2013දී 62%යි. දකුණු කොරියාව ගතහොත් 1971 දී 7%යි. 2013 දී 95% යි. දැන් පේනවා නේද රටක් ලෙස අපි කොතනද ඉන්නේ කියලා. ඊළඟට අපි බලමු ( gross expenditure on teritary education as % of GDP ) තෘතික අධ්යාපනය සදහා දරන දල වියදම, දළ දේශීය නිෂ්පාදිතයේ ප්රතිශතයක් ලෙසද කොපමණද කියලා. ලංකාවේ 2001 දී එය 0.37%යි. එය 2013 දී 0.34%යි. නමුත් අපි ජපානය සැලකිල්ලට ගමු. ඔවුන් 1998 දී 0.41%යි. 2014දී 0.78%යි. දකුණු කොරියාව බැලුවොත් 1998 දී 0.37යි. 2013 දී 0.86 යි. සිංගප්පුරුව 2008 දී 0.91%යි. 2013 දී 1.03% යි. මේ රටවල් එන්න එන්නම තෘතික අධ්යාපනය සඳහා වැඩි පංගුවක් වෙන්කරලා තිබෙනවා. නමුත් අපි එන්න එන්නම අඩු කරලා තියනවා. මම මේ දත්ත ඇතුලත් ලේඛනය සභාගත කරනවා. ඒ වගේම තමයි 2016 ආදායම්-වියදම් සමීක්ෂණයට අනුව ශ්රී ලංකාවේ higher education gross enrollment ratio සැලකීමේදී, බස්නාහිර සහ මධ්යම පළාතේ තමයි ඉහළම අගයක් පෙන්නුම් කරන්නේ. එය 18%ක්. උතුරු මැද පළාත ගත්තාම 8%ක් , ඌව 11%ක්. පොඩි රටක් වුණත් පළාත් අනුව සැලකිය යුතු විෂමතාවයක් පෙන්වනවා. මේ තවත් වැදගත් කරුණක්. 2016-2017 වර්ෂයට අදාළව බස්නාහිර පළාතේ විශ්ව විද්යාල වලින් undergraduate ලා , පළමු උපාධිය ලැබුවන් 60,878ක් වාර්තා වෙනවා. ඒ වසරේ සමස්ථ රටේම පළමු උපාධිය ලැබූවන් 106,404යි. ඒ කියන්නේ 57%ක ප්රතිශතයක් බස්නාහිර විශ්ව විද්යාල වලින් උපාධිය ලබලා. ඒ වගේම තමයි 2016-2017 පශ්චාත් උපාධිධාරීන් සමස්ථ රටේම 23,447ක් වන විට එයින් 20,010 ක් බස්නාහිර පළාත් විශ්ව විද්යාල වලින්. ඒ කියන්නේ 85%ක් බස්නාහිරින්. මේ වගේ දැඩි විෂමතාවක් උසස් අධ්යාපනයේ තිබෙනවා. ගරු කතානායකතුමනි, විශ්ව විද්යාල, නැත්නම් උසස් අධ්යාපනය සම්බන්ධව කාලයක් තිස්සේ තිබෙන බරපතල ප්රශ්නයක් තියනවා. ඒ quality සහ relevance සම්බන්ධව. අපේ උසස් අධ්යාපනයේ ගුණාත්මකභාවය සහ රැකියා අවස්ථා වෙනුවෙන් වන අදාලත්වය කොතරම්ද කියන ප්රශ්නය තියනවා. අපි දන්න දෙයක් තමයි විද්යා ක්ෂේත්රයේ උසස් අධ්යාපනය ලැබුවන්ට දෙස් විදෙස් රැකියා අවස්ථා තිබෙනවා. නමුත් බහුතරය කලා විෂය ධාරාවේ සමාජීය විද්යා හැදෑරු උපාධිධාරීන්. මේ අයගේ රැකියා ප්රශ්නයක් තිබෙනවා. රැකියාවක් සඳහා අයදුම් කිරීමේදී නිපුණතාව සම්බන්ධව ප්රශ්න තියෙනවා. සාමාන්ය සම්ප්රදාය තමයි ඔවුන්ව තොග වශයෙන් රජයේ රැකියා සඳහා එක්කර ගැනීම. නමුත් ඔවුන්ගේ වාර්ෂික රැකියා සැපයීමේ පමණක් නොවෙයි උසස්වීම් පටිපාටියේ සිට ප්රශ්න රැසක් තිබෙනවා. එය නොවිසඳුණු ප්රශ්නයක්. ඇත්තටම මොරටුව විශ්ව විද්යාලය ගත්තොත් ලෝකයෙත් ඉහල පිළිගැනීමක් තියනවා. ඒ එහි ගුණාත්මක භාවය නිසා. ගුණාත්මකභාවය රැකගැනීම අත්යාවශ්ය කරුණක්. මගේ අදහස නම් විශ්ව විද්යාල වලට නිදහස තිබෙන්න ඕන ඔවුන්ගේ ගුණාත්මකභාවය රැකගැනීමට කටයුතු කරන්න. නමුත් අපේ රටේ එහෙම ක්රමයක් නෑ. තීන්දු තීරණ හැමදෙයක්ම ගන්නේ ආණ්ඩුව සහ විශ්ව විද්යාල ප්රතිපාදන කොමිසම. අදාළ විශ්ව විද්යාලයේ ශිෂ්යයාගේ අංකය පවා නිකුත් කරන්නේ UGC එක. හරි නම් විශ්ව විද්යාලයක් සම්බන්ධව තීන්දුවක් ගන්නා විට එහි සෙනට් සභාවේ මතය විමසන්න ඕන. නමුත් එවැන්නක් සිදුවෙන්නේ නෑ. නිවැරදි ප්රතිපත්තිය විය යුත්තේ විශ්ව විද්යාල සෙනට් සභාවට අවස්ථාව තිබෙන්න ඕන තමන්ගේ ගුණාත්මක භාවය වැඩි කරගන්න. අපි උසස් අධ්යාපනය සඳහා සිසුන්ට මූල්ය පහසුකම් සපයන විට එය නිකුත් කලේ ආදාළ විශ්ව විද්යාලයට හෝ උපාධි ආයතනයට නෙවෙයි. අපි දුන්නේ සිසුවාට. ඔහු තමයි විශ්ව විද්යාලය තීරණය කරන්නේ. නමුත් අද සිදුවන්නේ අදාළ විශ්ව විද්යාලයට හෝ උපාධි ආයතනයට තමයි මුදල් නිකුත් කරන්නේ. විශ්ව විද්යාල අතර තරගයක් ඇති වෙන්න ඕන ගුණාත්මක බැවින් ඉහලට ගොස් සිසුන් ආකර්ෂණය කර ගන්න. ඒ ගැන ආණ්ඩුවේ අවධානය යොමුකිරීම වැදගත්. ගරු කතානායකතුමනි, විශ්ව විද්යාලයක තීන්දු තීරණ සම්බන්ධව වැදගත් කාර්යයක් හිමිවෙන ආයතන 2ක් තිබෙනවා. එකක් සෙනට් සභාව. එහි තමයි අධ්යාපන කටයුතු විභාග සහ කාලසටහන් සම්බන්ධව තීන්දු තීරණ ගන්නේ. අනෙක් ආයතනය කවුන්සිලය. එහි නියෝජනය සකස් වෙන්නේ, නිදර්ශනයක් ලෙස faculty හතරේ පීඨාධිපතිවරුන් 4 , කුලපති සහ උප කුලපති, සමඟ තවත් අධ්යයන කාර්ය මණ්ඩල සාමාජිකයන් 2ක් ලෙසින්. ඒ ප්රමාණයට එකක් වැඩිපුර, එනම් තවත් නව දෙනෙකු කවුන්සිලයට පත්කිරීමේ අවස්ථාව උසස් අධ්යාපන ඇමතිට තිබෙනවා. ඒ ඇමති විසින් පත්කරන පිරිසට අදාළ අවම අධ්යාපන සුදුසුකමක් හෝ නිර්දේශ කර නෑ. ඔන්න අපේ විශ්ව විද්යාල තුළ තත්වය. ඒ වගේම තමයි උපකුලපති පත්කිරීම. මීට පෙර තිබුණේ උප කුලපති ලෙස ඕනෑම අයෙකුට අයදුම් කරන්න පුළුවන්. තනතුර සඳහා අයදුම් කරන අය කවුන්සිලයට presentation එකක් කල යුතුයි. පසුව කවුන්සිලයේ ජන්ද විමසීමක් කරනවා. එයින් පළමු තිදෙනා ගේ නම් විෂය භාර අමාත්යවරයාගේ අනුදැනුම මත ජනාධිපතිට යවනවා. ජනාධිපති තමයි පත්වීම සිදුකරන්නේ. ගරු කතානායකතුමනි, වෙනසක් කරන්න කියලා 2020 මැයි නිකුත් කල චක්ර ලේකයක් නිකුත් කළා. ඒ මොකක්ද ? කළින් විදියම තමයි, නමුත් මෙතැන ලකුනුදීමේ පටිපාටියක් සිදුවෙනවා. වැඩිම ලකුණු ගත්ත තිදෙනාගේ නම් ඇමති දැනුවත්ව ජනාධිපතිට යවනවා. ජනාධිපති කෙනෙක්ව නම් කරනවා. මෙතන වෙනස අර ලකුණු දීමේ පටිපාටිය. ආණ්ඩුව දැන් වෙනසක් කළා කියන නිසා මම අහනවා, වැඩිම ලකුණු ගත්ත අයද දැන් විශ්ව විද්යාල වල උප කුලපති කර තිබෙන්නේ ? ජනාධිපතිට නම් තුන යවනකොට ලකුණුත් යැව්වද ? ඉල්ලුම් කල පාර්ශව අතරින් ඉහලම ලකුණු ගත්ත කෙනා නම් උප කුලපති කරන්නේ, නම් 3ක් යවන්නේ මොකටද ? කියලා. වෙනසක් කිව්වට කිසිම වෙනසක් නෑ. මේ නිසා තමයි විශ්ව විද්යාල ස්වාධීන ආයතන ලෙස වර්ධනය නොවන්නේ. එකතැන පල්වෙන ස්වභාවයක් තියෙන්නේ. ගුණාත්මකභාවය අඩුවෙලා පිළිගැනීම නැතිවෙලා තියෙන්නේ. දැන් 2021 අයවැය යෝජනා අතර තිබෙනවා නගර විශ්වවිද්යාල city university 4 ක් ඇතිකරන්න. ඒ හරහා කළුතර, අම්පාර, පුත්තලම, නුවරඑළිය දිස්ත්රික්ක වෙත විශ්ව විද්යාල 4ක් හදන්න රුපියල් මිලියන 1000ක් වෙන්කර තිබෙනවා. එක විශ්ව විද්යාලයක් ආණ්ඩුව හදන්න යන්නේ රුපියල් මිලියන 250 කින්ද ? නවීන තත්වයන්ට ගැලපෙන විශ්ව විද්යාලයක් හදන්න පුළුවන්ද රුපියල් මිලියන 250 කින් ? විශ්ව විද්යාලයක් කියන්නේ ගොඩනැගිලි නෙවෙයි. භෞතික වගේම දියුණු මානව සම්පතක් ඊට දායක කළ යුතුයි. අපි පිලිගන්නවා අධ්යාපනය සැපයීමේ අවස්ථා පුළුල් කරන්න ඕන. ඒ සඳහා විශ්ව විද්යාල වැඩිපුර අවශ්යයි. ඒක පැහැදිළි අභියෝගයක්. තනියම රජයකට කරන්න බෑ. දැන් ලෝකයේ ඉහල පිළිගැනීමක් ඇති විශ්ව විද්යාල අරගෙන බලන්න. ඒවා ඒ ඒ රටවල රජයේ විශ්ව විද්යාල පමණක් නෙවෙයි. පෞද්ගලික සමාගම් සතු ඒවත් නෙවෙයි, රජයෙන් ස්වාධීන ලාභ කොටස් කරුවන්ට නොබෙදෙන, non profit විශ්ව විද්යාලයක්. trust එකක් හරහා තමයි ඒවා පාලනය වෙන්නේ. අපි ඒ ගැනත් සලකා බලන්න ඕන. රාජ්ය – පෞද්ගලික කියලා බෙදීම නෙවෙයි වැදගත්. අධ්යාපනයේ ගුණාත්මක භාවය රැකගෙන අධ්යාපන අවස්ථා පුළුල් කිරීමයි විය යුත්තේ. කෝ ——–ඇමතිතුමා ඉන්නවද ? ප්රශ්නයක් තියනවා අහන්න. දැන් ඔබතුමා ගියේ පෞද්ගලික පාසලකට. මම ගියේ රජයේ පාසලකට. ඔබ පෞද්ගලික පාසලකට ගියා කියා මොකුත් අඩුවක් වුණාද ? නිදහසේ පියා රටේ පළමු අග්රාමාත්යවරයා DS සේනානායක, අග්රාමාත්ය SWRD බණ්ඩාරනායක, අධ්යාපනය ලැබුවේ පෞද්ගලික පාසලක. මොකුත් අඩුවක් වුණාද ? නෑ නේද ? දැන් ප්රශ්නයක් තියනවා අහන්න. මොකක්ද ආණ්ඩුවේ ප්රතිපත්තිය. සයිටම් ගෙනාවේ අපි නෙවෙයි, මහින්ද රාජපක්ෂ රජය. සයිටම් වහන්න කියලා පාරට බැස්සෙත් ඒ පාර්ශවයම. එස්.බී ඇමතිතුමා සාක්ෂිදරයි. අපිට දැන් ආණ්ඩුවෙන් අහන්න වෙනවා ඔබලා තවදුරටත් දරුවන් පාවාදෙනවද කියලා. ලංකාවේ අනාගතය තිබෙන්නේ දැනුම් ආර්ථිකයක් තුළ. අපි දැක්කේ නෑ අයවැය තුල දැනුම් ආර්ථිකයක්, අධ්යාපන කේන්ද්රස්ථානයක් ගොඩනැගීම සම්බන්ධව කිසිවක් නෑ. මට පෙන්නේ මෙහි වටිනාකම ආණ්ඩුව තේරුම් අරගෙන නෑ. ඒ නිසා අධ්යාපනය සම්බන්ධ විෂයේදී සරල, ලාභ පහසු දේ කරන්නන් වාලේ කිරීම නෙවෙයි වැදගත්. හොඳම දේ, හොඳම ප්රතිපත්තිය, ක්රියාවට නැංවීමයි වැදගත්. ජනාධිපතිතුමා, අගමැතිතුමා, වගේම අපි ඕන කෙනෙක් තමන්ගේ දරුවට දෙන්න කැමති, හොඳම දේ නේද ? අන්න ඒ නිසා අධ්යාපනය විෂයේ හොදම දේ, රටේම දරුවන්ට දීමයි සිදුකල යුත්තේ. රටේ දරුවන්ට අධ්යාපන සහතික දෙස බලා හඬාවැටෙන්න සිදුවන අනාගතයක් නම් එපා. |
2021 ජනවාරි මස 18 වන දින ඇරඹීමට තිබු අපොස සාමාන්ය පෙළ විභාගය එදිනට ආරම්භ කිරීමට නොහැකි බව අධ්යාපන අමාත්ය ජී.එල් පීරීස් මහතා අද (01) පාර්ලිමේන්තුවේ දී සඳහන් කළේය.
සාමාන්ය පෙළ විභාගය කල්දැමීමට හේතු වශයෙන් අධ්යාපන අමාත්යවරයා පෙන්වාදෙන්නේ පවතින තත්ත්වය යටතේ 11 ශ්රේණියේ ඉගෙනුම ලබන සිසුන්ගෙන් 50%ක් පමණ පිරිසකට මේ වන විට අධ්යාපන කටයුතු සිදුකිරීමට නොහැකි තත්ත්වයක් පවතින බවයි.
අපොස සාමාන්ය පෙළ විභාගය සඳහා පෙනී සිටින දරුවන්ට එයට සුදානම් වීමට අවශ්ය කාලය ලබා දෙමින් සති 6කට පෙර විභාග දිනය ප්රකාශයට පත්කරන බව කී අධ්යාපන අමාත්යවරයා රට තුළ පවතින කොවිඩ් තත්ත්වය සති දෙකෙන් දෙකට විශ්ලේෂණය කර බලමින්, විභාගය පැවැත්වීමට ඇති ඉඩකඩ සොයා බලන බව ද සදහන් කළේය.
කොළඹ පාරිභෝගික මිල දර්ශකයෙහි (කො.පා.මි.ද., 2013=100) වාර්ෂික ලක්ෂ්යමය වෙනස මගින් මනිනු ලබන මතුපිට උද්ධමනය, 2020 ඔක්තෝබර් මාසයේ පැවති සියයට 4.0හි සිට 2020 නොවැම්බර් මාසයේ දී සියයට 4.1 දක්වා සුළු වශයෙන් ඉහළ ගියේය.
ආහාර සහ ආහාර නොවන යන කාණ්ඩ දෙකෙහිම අයිතමවල මිල ගණන්හි සිදු වූ ඉහළ යෑම් මේ සඳහා හේතු විය. මේ අතර, ආහාර කාණ්ඩයෙහි වාර්ෂික ලක්ෂ්යමය උද්ධමනය 2020 ඔක්තෝබර් මාසයේ පැවති සියයට 10.0හි සිට 2020 නොවැම්බර් මාසයේ දී සියයට 10.3 දක්වා සුළු වශයෙන් ඉහළ ගිය ගියේය. ආහාර නොවන කාණ්ඩයෙහි වාර්ෂික ලක්ෂ්යමය උද්ධමනය ද 2020 ඔක්තෝබර් මාසයේ පැවති සියයට 1.3හි සිට 2020 නොවැම්බර් මාසයේ දී සියයට 1.6 දක්වා සුළු වශයෙන් ඉහළ ගියේය.
වාර්ෂික සාමාන්ය පදනම මත මනිනු ලබන කො.පා.මි දර්ශකයෙහි වෙනස 2020 නොවැම්බර් මාසයේ දී සියයට 4.6හි නොවෙනස්ව පැවතුණි.
2020 නොවැම්බර් මාසයේ දී කො.පා.මි. දර්ශකයෙහි මාසික වෙනස සියයට 0.4ක් ලෙස වාර්තා විය. ආහාර සහ ආහාර නොවන යන කාණ්ඩ දෙකෙහිම අයිතමවල මිල ගණන්හි සිදු වූ ඉහළ යෑම් මේ සඳහා හේතු විය. ඒ අනුව, 2020 නොවැම්බර් මාසයේ දී ආහාර කාණ්ඩයෙහි ලොකු ළූණු, රතු ළූණු සහ අර්තාපල් මිල ගණන් ඉහළ ගියේය. එසේ වුවද, මාසය තුළ දී පළතුරු, සහ නැවුම් මත්ස්ය මිල ගණන්හි පහළ යෑමක් වාර්තා විය. මේ අතර, ප්රධාන වශයෙන්, ප්රවාහන (බස් ගාස්තු) උපකාණ්ඩයෙහි දක්නට ලැබුණු මිල ඉහළ යෑම් හේතුවෙන්, ආහාර නොවන කාණ්ඩයෙහි අයිතමවල මිල ගණන්හි ඉහළ යෑමක් 2020 නොවැම්බර් මාසයේ දී වාර්තා විය.
ආර්ථිකයෙහි යටිදැරි උද්ධමනය නිරූපණය කරන වාර්ෂික ලක්ෂ්යමය මූලික උද්ධමනය, 2020 නොවැම්බර් මාසයේ දී සියයට 3.0හි නොවෙනස්ව පැවතුණි. එසේ වුවද, වාර්ෂික සාමාන්ය මූලික උද්ධමනය 2020 ඔක්තෝබර් මාසයේ දී පැවති සියයට 3.4හි සිට 2020 නොවැම්බර් මාසයේ දී සියයට 3.2 දක්වා පහළ ගියේය.