Tag: featured

කොවිඩ් වසංගතය සමග ලෝකය පුරා අගළු දැමීම ක්‍රියාත්මක වෙනවා. ඒ නිසාම බොහෝ රටවල මේ කාලයේ ‘ගෙවතු වගාව‘ අතිෂය ජනප්‍රිය කටයුත්තක් වී තිබෙනවා. ලංකාවේ තත්ත්වයත් එසේමයි. පසුගිය කොවිඩ් අගුළු දැමූ සමයේ ලංකාවේ ගෙවතු වගාව අතිෂය ජනප්‍රිය වුණා. දැන් යළිත් පූර්ණ රාජ්‍ය අනුග්‍රහය මත එය යළිත් ක්‍රියාත්මක වෙනවා.

අපි මේ ලිපිය පළ කරන්නේ ලංකාවේ ගෙවතු වගාකරුවන් අතර උත්තේජනයක් ඇති කරන්න. මොකද ලෝකය පුරාම ලැබෙන පොදු අත්දැකීම වන්නේ ‘ගෙවතු වගාව විනෝදාත්මක අත්දැකීමක්‘ බවයි.

ලංකාවේ අපිත් ගෙවතු වගාව ‘හුදු ලාභය‘ ගැන නොසිතන දෙයක් ලෙස සැලකුවහොත් වත්මන් ආර්ථික හා සෞඛ්‍ය ගැටලු රැසක් විසදී යන බව මේ අනුව පැහැදිලියි.

Covid-19 වසංගතය හේතුවෙන් මහා බ්‍රිතාන්‍යෙය් වගාකරුවන්ට මේ වසරේදී ඔවුන්ගේ යෝධ එළවළු ප්‍රදර්ශනය කිරීමට ඇත්තේ ඉතා අල්ප අවස්ථාවකි

කොරෝනා වසංගතය නිසා මේ වසරේ මහා බ්‍රිතාන්‍යෙය් සාම්ප්‍රදායිකව පැවැත්වෙන බොහෝ උද්‍යාන විද්‍යාත්මක සංදර්ශන අවලංගු කර ඇති අතර, සුපිරි එළවළු වගා කරන්නන්ට ඔවුන්ගේ නිෂ්පාදන පෙන්වීමට ඇති අවස්ථාව ඉතා අල්පය.

කොරෝනා වසංගතය බොහෝ දෙනෙකුට ඒවා පෙන්වීම නැවැත්විය හැකි වුවද, ඒවා වර්ධනය වීම නතර කළේ නැත.

ශාක පෝෂක සමාගමක් වන කැනා, (Canna, a plant nutrient company) යෝධ එළවළු ශූරතාවලිය සංචාරය සඳහා රැගෙන ගියේ මැල්වර්න් සරත් ප්‍රදර්ශනය අවලංගු කිරීමෙන් පසුව වන අතර ජාතික එළවළු සංගමය (National Vegetable Society (NVS) සිය තරඟ කිහිපයක් අන්තර්ජාලය හරහා ගෙන ගියේය.

වගාකරුවන්ට ඔවුන්ගේ ප්‍රදර්ශනය ඡායාරූප ගත කිරීමෙන් සහ විද්‍යුත් තැපෑලෙන් ඉදිරිපත් කිරීමෙන් ඇතුළු විය හැකිය. ලෝක වාර්තා පහක් තබා ඇති නොටිංහැම්ෂයර් හි ජෝ ආතර්ටන් (Joe Atherton) වැනි එළවළු වගාකරුවන්ට තම 2020 අස්වැන්න විනිසුරුවන්ට ඉදිරිපත් කිරීමට මෙය ඉඩ දුන්නේය.

මෑන්ස්ෆීල්ඩ් වුඩ්හවුස් හි 65 හැවිරිදි ආතර්ටන් මහතා පසුගිය සති අන්තයේ ‘මෑන්ස්ෆීල්ඩ් හි ද ග්‍රෝ ෂෝ: ඔන් ටුවර් (The Grow Show: On Tour in Mansfield) වෙත සිය යෝධ එළවළු කිහිපයක් රැගෙන ගියේය.

ඔහු විශ්වාස කරන්නේ ඔහු සිය හයවන ලෝක වාර්තාව පිහිටුවා ඇති බවයි. මෙවර දිගම සල්සිෆයි  (the longest salsify) සඳහා එය හිමිවන බව ඔහු විශ්වාස කරයි.

Parsnip එකකට සමාන පෙනුමක් ඇති එය (The root vegetable) අගුලු දැමීමේදී මීටර් 5.5 (අඩි 18) දක්වා වර්ධනය විය. මීටර 8.5 (අඩි 27) ක වේගයෙන් වර්ධනය වෙමින් ඔහු තම දිගම බීට්රූට් වාර්තාව ද පරාජය කළේය.

වසංගතය හේතුවෙන් තමා මේ වසරේ සහභාගී වන එකම තරඟය මෙය බව ආතර්ටන් මහතා පැවසීය.

කැනාහි හොලි බෝලස් මෙසේ පැවසීය: “සුපුරුදු සංදර්ශන සියල්ල අවලංගු කර තිබියදීත් [වගාකරුවන්ට] ඔවුන්ගේ වෙහෙස මහන්සි වී වැඩ කිරීමට අවස්ථාව ලබා දීමට අපට අවශ්‍ය වුණා”

පළමු වරට යෝධ එළවළු වගා කරන්නන් කිහිප දෙනෙකුගේ උනන්දුවක් ද මෙවර ඇත.

එවැනි නවකයකු වන – ඩර්බිෂයර් හි වින්ගර්වර්ත්හි ඩොමිනික් ඩ්‍රිස්කොල් මහතා අගුලු දැමීමේදී වෙන් කළ කාලය තුළ කිලෝ ග්‍රෑම් 22ක් බර ගෝවා ගෙඩියක් වගා කළේය.

“මම සාමාන්‍යයෙන් යෝධ එළවළු කරන්නේ නැහැ,” ඔහු පැවසීය. 

“මම එළවළු ප්‍රදර්ශනය කරන්නේ ඒවා විශාල ලෙස පෙනෙනවාට වඩා ලස්සන නිසයි. මම එහි බීජ ලබා ගත්තා”

“එය එක්තරා ආකාරයක උද්දීපනයක්, වර්ධනය වීමේ සතුට හරිම අපූරුයි. ඒ නිසා අස්වැන්න නෙළීම ඇත්තෙන්ම කනගාටුදායකයි,” ඔහු පැවසීය.

“මා සතුටට පත් වන කරුණ වන්නේ ඒවා වැඩීමට සැලැස්වීම සහ ඒවා වර්ධනය වීම දැකීමයි.”

39 හැවිරිදි ඩ්‍රිස්කොල් මහතා තම කෝර්නිෂ් උරුමක්කාර ගෝවා පෙන්වීමට අවස්ථාවක් නොමැති විට ඔහුට කළ හැකි එකම දේ කළේය. ඒවා ආහාරයට ගත්තේය.

බොහෝ යෝධ එළවළු මෙන් නොව එය රසවත් බව ඔහු පැවසීය.

“අපි ඊයේ රෑ එයින් ටිකක් ආහාරයට ගත්තා. ඒක හරිම අපූරුයි – ඇත්තටම නැවුම් හා හැපෙනසුළුයි,” ඔහු පැවසීය.

සවුත් වේල්ස්හි කෙවින් ෆෝර්ටි, ඔන්ලයින් හරහා යෝධ නිර්මාංශ ෆේස්බුක් කණ්ඩායමක්  (giant veg Facebook group) පවත්වාගෙන යන්නෙකි.

ලොව පුරා සිටින වගාකරුවන්ට සමාජ මාධ්‍ය හරහා සම්බන්ධ වීමට අවස්ථාවක් ලැබී ඇති බව පැවසීය.

“අපි අන්තර්ජාලය හරහා විනෝදජනක තරඟ කිහිපයක් පවත්වා තිබෙනවා. වත්මන් තරුණ පරම්පරාව අතර දැන් යෝධ එළවළු ආහාරයට ගැනීම කෙරෙහි විශාල උනන්දුවක් ඇති වී තිබෙනවා” යනුවෙන් ඔහු පැවසීය.

වගාකරුවන් වැඩිහිටි නිවාස හා ආහාර බැංකු (food banks) රැකබලා ගැනීම සඳහා එළවළු පරිත්‍යාග කර ඇති බව ඔහු පැවසීය.

“එය විනෝදජනක විනෝදාංශයක් වන අතර එය මිනිසුන්ට පිටතට යාමට සහ අගුලු දැමීමේදී ධනාත්මකව සිටීමට උපකාරී වේ.” ඔහු වැඩි දුරටත් පැවසුවා.

බී.බී.සී. වාර්තාවකි. – සැකසුම – තීක්ෂණ වෙළෙන්එගොඩ

කොරෝනා වෛරසයට ගොදුරු වූ පුද්ගලයන් මරණයට පත්වීමේ සම්භාවිතාව ඉතාම අඩු බව සෞඛ්‍ය ඇමැතිනී පවිත්‍රා වන්නිආරච්චි මහත්මිය සඳහන් කළාය.

නමුත් මෙම වෛරසයට වැඩිහිටියවන් ගොදුරු වුවහොත් ඔවුන් මරණයට පත්වීමේ ඉඩකඩ ඉහළ වැඩි බව ද ඇය සඳහන් කරන්නීය.

ඒ නිසා වැඩිහිටියන් මෙම රෝගයට නිරාවරණය වීම හැකිතාක් අවම කර ගැනීමට අවශ්‍ය ක්‍රියාමාර්ග ගන්නා ලෙස රටේ සියලු ජනතාවගෙන් ඉල්ලා සිටින බවද ඇය සඳහන් කළාය.

අද පෙරවරුවේ හිරු රූපවාහිනී නාලිකාව සමඟ සාකච්ඡාවකට එක් වෙමින් ඇය මේ බව කියා සිටියාය.

කොරෝනා රෝගීන් සඳහා දැනට රෝහල්වල ධාරිතාවන් ‍ප‍්‍රමාණවත් බවත් අවශ්‍ය වන්නේ නම් ඒ ඉඩකඩ පුළුල් කිරීමට කටයුතු කරන බවත් ඇය කියා සිටියාය.

උපුටා ගැනීම: ලංකා සී නිවුස්

රට තුළ දැනට පවත්නා කොවිඩ් තත්ත්වය හමුවේ දරුවන්ගේ ආරාක්ෂාව තහවුරු කරමින් ඔක්තෝම්බර් 12 වනදා ආරම්භ කළ අ.පො.ස (උසස් පෙළ) විභාගය මේ දක්වා සාර්ථකව පවත්වාගෙන යා හැකි වූ බවත්, මින් ඉදිරියටත් එනම් නොවැම්බර් 06 වනදා තෙක් අ.පො.ස (උසස් පෙළ) විභාගය ඒ අයුරින් ම පවත්වන බවත් අධ්‍යාපන ලේකම්, මහාචාර්ය කපිල පෙරේරා මහතා අද දින (16) පැවසීය.

එමෙන් ම කොවිඩ් තත්ත්වය හේතුවෙන් ඇඳිරිනීතිය පවත්නා පොලිස් බල ප්‍රදේශ තුළ විභාග මධ්‍යස්ථානවල රාජකාරී කටයුතුවල නිරතව සිටින ගුරුවරුන්ට මුහුණපෑමට සිදුව ඇති ප්‍රවාහන අපහසුතා සම්බන්ද ඉල්ලීම් සැලකිල්ලට ගනිමින්, රජය භාණ්ඩාගාරය සමඟ සාකච්ඡා කොට සහනයක් සැලසීමට බලාපොරොත්තු වන බව ද මෙහිදී අධ්‍යාපන ලේකම්වරයා වැඩිදුරටත් පැවසීය.

මිනුවන්ගොඩ බ්‍රැන්ඩික්ස් ආයතනයෙන් ආරම්භ වූ කොවිඩ් -19 දෙවන රැල්ල පිළිබදව සමාජයේ සංවාදයට ලක්ව තිබෙන කරුණු 08ක් පිළිබද ජනපතිවරයාගේ අවධානය යොමු කරමින් ජාතික සංවිධාන එකමුතුවේ කැදවුම්කරු වෛද්‍ය ගුණදාස අමරසේකර මහතා විසින් ලිපියක් යවා ඇත.

අමරසේකර මහතා විසින් ජනපතිවරයාට යොමුකරන ලද ලිපියේ සදහන් වන්නේ සමාජයේ සංවාදයට ලක්වෙමින් ඇති පහත සඳහන් කරුණු ආශ‍්‍රිතව විධිමත් ඉහළ මට්ටමේ පරීක්ෂණයක් සිදුකොට යම් පාර් ශව සිතාමතා කඩාකප්පල්කාරී ක‍්‍රියාවක හෝ රජයට එරෙහිව කුමන්ත‍්‍රණකාරී ක‍්‍රියාවක නිරත වී ඇත්නම් ඔවුන් හෙළිදරව් කොට ඔවුන්ට එරෙහිව නීතිමය ක‍්‍රියාමාර්ග ගන්නා ලෙස ජාතික සංවිධාන ජනපතිවරයාගෙන් ඉල්ලා සිටින බවයි.

එම සම්පුර්ණ ලිපිය මෙසේය.

අතිගරු ජනාධිපති ගෝඨාභය රාජපක්ෂ මැතිතුමා,
ජනාධිපති කාර් යාලය,
කොළඹ 01.

අතිගරු ජනාධිපතිතුමනි,

කොවිඞ් දෙවැනි රැල්ල පාලනය කිරීමට අදාළව දක්නට ලැබෙන බරපතළ තත්ත්වයන් පිළිබඳව

කොවිඞ් වසංගත තත්වයේ දෙවැනි රැල්ල ආරම්භ වීම සමගම සමාජයේ විවිධ පාර් ශව වලින් වෙනත් විවිධ පාර්ශ්වවලට චෝදනා එල්ල කෙරෙමින් තිබෙන බව රහසක් නොවේ. ජාතික සංවිධාන ලෙස එදිනෙදා මහජන සබඳතාවලදී ඊට අදාළව විවිධ ප‍්‍රශ්නවලට පිළිතුරු දීමට අපට සිදු වී ඇත. එම තත්වය වසංගත පාලනයට අදාළව මහජන සහාය ලබා ගැනීම සහ මහජන විශ්වාසය තහවුරු කිරීම යන සාධකවලට එරෙහිව අගතිගාමී ලෙස බලපාන බව අපට පෙනී යයි. ඊට අමතරව එම තත්ත්වය කොවිඞ් පළමු රැල්ල අතිසාර්ථකව මැඩලීම මගින් ඔබතුමා ප‍්‍රමුඛ රජය විසින් දිනාගත් මහජන ප‍්‍රසාදය සහ ගෞරවයට අදාළව ද නිෂේධාත්මක බලපෑම් ඇති කරන බව පැහැදිලි කරුණකි.

එම නිසා සමාජයේ සංවාදයට ලක්වෙමින් ඇති පහත සඳහන් කරුණු ආශ‍්‍රිතව විධිමත් ඉහළ මට්ටමේ පරීක්ෂණයක් සිදුකොට යම් පාර් ශව සිතාමතා කඩාකප්පල්කාරී ක‍්‍රියාවක හෝ රජයට එරෙහිව කුමන්ත‍්‍රණකාරී ක‍්‍රියාවක නිරත වී ඇත්නම් ඔවුන් හෙළිදරව් කොට ඔවුන්ට එරෙහිව නීතිමය ක‍්‍රියාමාර්ග ගන්නා ලෙස අප ජාතික සංවිධාන වශයෙන් ඔබතුමාගෙන් ඉතා ගෞරවයෙන් සහ ඉතා ඕනෑකමින් ඉල්ලා සිටිමු.

1. මිනුවන්ගොඩ පිහිටි බ‍්‍රැන්ඩික්ස් ආයතනයට අයත් කර්මාන්ත ශාලාවට එම සමාගමට අයත් ඉන්දියාවේ විශාකාපට්නම්හි පිහිටි කර් මාන්ත ශාලාවේ සිට සේවකයන් අවස්ථා කිහිපයක දී ගුවන් මගින් රැගෙන විත් නිරෝධායන උපදෙස්වලට පටහැනිව වැඩමුළු සහ අභ්‍යන්තර විගණනයක් සිදු කිරීම. එසේ අවස්ථා කිහිපයක දී ඉන්දියාවේ සිට ශ‍්‍රී ලංකාවට සේවකයන් පැමිණි බව හමුදාපතිවරයා විසින් පුවත්පත්වලට ප‍්‍රකාශකොට ඇති අතර හිටපු අමාත්‍ය පාඨලී චම්පික රණවක මහතා ද ඊට අදාළව ප‍්‍රකාශයක් සමාජ මාධ්‍යවලට නිකුත්කොට ඇත.

2. දැනට ඉතා බරපතළ ලෙස කතාබහට ලක්වෙමින් ඇති සැප්තැම්බර් 22 දින මත්තල ගුවන්තොටුපළින් ශ‍්‍රී ලංකාවට පැමිණි ඉන්දියානුවන් හෝ ඉන්දියාවේ පිහිටි බ‍්‍රැන්ඩික්ස් සමාගමට අයත් කර්මාන්ත ශාලාවේ සේවය කළ ශ‍්‍රී ලාංකිකයන් නිසි ලෙස නිරෝධායනය නොවූ බවට ප‍්‍රබල සාක්ෂි ඉදිරිපත් වී ඇත. ඊට අදාළව මහජන සෞඛ්‍ය පරීක්ෂකවරුන්ගේ සංගමය විසින් නිල වශයෙන් පුවත්පත්වලට ප‍්‍රකාශයක් සිදුකොට තිබිණි. එම ගුවන් මගීන් පිළිබඳව විනිවිදභාවයෙන් යුතුව තොරතුරු ලබාදීම අදාළ ගුවන් සමාගම සහ ගුවන්තොටුපළ බලධාරීන් විසින් ප‍්‍රතික්ෂේප කිරීම නිසා මහජන සැකය තවදුරටත් වර්ධනය වේ.

3. එසේ විදේශ වලින් ශ‍්‍රී ලංකාවට පැමිණෙන පිරිස් ආරක්ෂක හමුදා විසින් නිරෝධායනයට ලක් කරන බව සඳහන් වුව ද ප‍්‍රායෝගිකව එම කටයුත්ත සිදු කරනු ලබන්නේ පෞද්ගලික ආරක්ෂක සමාගමක් විසින් බවට සහ ඔවුන් විසින් එසේ පිරිස් හෝටල් වෙත රැගෙන යාමේ දී හමුදාව ඔවුන් කැටුව නොගිය බවට ද වාර් තා පළ වේ. එසේ නිරෝධායනයට ලක් වූ බව කියන පිරිස් සහ හෝටල් හෝ නිවාස පිළිබඳ කිසිදු තොරතුරක් තමන්ට ලබා දී නැති බව මහජන සෞඛ්‍ය පරීක්ෂකවරු පවසති. එවැනි තත්ත්වයක් තුළ ඊට පෙර රට තුළට පැමිණි පිරිස් සම්බන්ධයෙන් ද ඒ ආකාරයට ක‍්‍රියාකොට ඇති බවට සාධාරණ සැකයක් මතු වේ.

4. ඒ ආකාරයට දක්නට ලැබෙන යම් වගකිවයුතු පිරිස්වල වගකීම් විරහිතභාවය හෝ නොසැලකිලිමත්භාවය පිළිබඳ මහජන සැකය දුරු කිරීම ඉතා වැදගත් වන්නේ, අදාළ සමාගමට ඉන්දියානු සහ ඇමරිකානු ආයතන සමඟ තිබෙන බැඳීම් නිසා සමස්ත සිදුවීම් මාලාව ශ‍්‍රී ලංකාවට එරෙහි බාහිර කුමන්ත‍්‍රණයක් ලෙස අර් ථ දැක්වීමේ තත්වයක් තිබෙන බැවිනි.

5. මිනුවන්ගොඩ බ‍්‍රැන්ඩික්ස් කර් මාන්ත ශාලාව තුළ ශ්වසන රෝග තත්වයක් ලෙස දක්නට ලැබෙන කොවිඞ් වසංගතයේ දෙවන රැල්ල මතුවන්නේ සැප්තැම්බර් මස 24 වැනි දිනය ආශ‍්‍රිත දිනයක බව අනාවරණය වී ඇත. එම තත්වය ඇති වූ පසුව අදාළ සමාගමේ කළමනාකාරීත්වය සහ එහි සෞඛ්‍ය නිලධාරීන් ඊට ප‍්‍රතිචාර දක්වා ඇති ආකාරය කිසිසේත්ම පිළිගත නොහැකි බව පුවත්පත් වාර් තා අධ්‍යයනය කිරීමේ දී පැහැදිලි වේ. යම් පිරිස් සඳහන් කරන ආකාරයට එම තත්වය ව්‍යාපාරික ඇණවුම් නිසි වේලාවට නිම කිරීම සඳහා වූ පෙළඹවීම නිසා හෝ තවත් පිරිස් සඳහන් කරන ආකාරයට ධන තන්හාව හෝ මිනිස් ජීවිත පිළිබ`ද නොසැලකිල්ල නිසා ඇති වූවක් ලෙස විග‍්‍රහ කිරීම අර්ධ සත්‍යයක් විය හැක. ඒ මගින් කළමනාකාරීත්වයේ වගකීම් විරහිතභාවය සහ නොසැලකිලිමත්භාවය ප‍්‍රදර්ශනය කෙරෙනවාට අමතරව ඉහත සඳහන් කළ කුමන්ත‍්‍රණ න්‍යාය ද තහවුරු වේ. එහි දී සැකයට ප‍්‍රධාන වශයෙන්ම හේතුවන්නේ රෝග ලක්ෂණ පෙන්වූ 30කට අධික පිරිසක් ඔවුන්ගේ ගම්බිම්වලට යැවීම ය. එහි දී PCR පරීක්ෂණ සිදු කිරීමෙන් තොරව පොදු ප‍්‍රවාහන සේවා මගින් ඔවුන් දුර බැහැර ප‍්‍රදේශවලට යැවීම මඟින් වසංගත පාලනයට අදාළ මූලික මූලධර් ම පවා උල්ලංඝනය වේ. මෙම තත්වය නිසා අද වන විට ආශ්‍රිතයන් හඹා යාම සඳහා ආරක්ෂක හමදා වලට ඉතා දුෂ්කර ව්‍යායාමයක යෙදීමට සිදු වී ඇත.

6. එසේ වුවත් බ‍්‍රැන්ඩික්ස් පොකුරේ පළමු රෝගියා හඳුනාගත් පසුව සෞඛ්‍ය අංශ ක‍්‍රියාකොට ඇති ආකාරය කිසිසේත්ම පිළිගත නොහැකි අතර එම තත්වය සාමාන්‍ය මහජනයා පවා පුදුමයට පත් කළ බව රහසක් නොවේ. දෙවනි රැල්ලේ පළමු රෝගියාට වෛරසය ආසාදනය වූයේ කෙසේ දැයි සොයා බැලීමේ වසංගත රෝග විද්‍යා ක‍්‍රමවේද පිළිබඳ මහජනයාට අවබෝධයක් නැතත් පළමු රෝගියා හමු වූ පසුව ඔහුගේ හෝ ඇයගේ ආශ‍්‍රිතයන් පිළිබඳව ගතයුතු පියවර පිළිබඳව මහජනයාට යම් අවබෝධයක් ඇත. එසේම පළමු රැල්ල මැඩ පැවැත්වීමෙන් පසුව දෙවැනි රැල්ලක් වළක්වා ගැනීම සඳහා විශේෂයෙන්ම වඩා අනතුරුදායක ආයතන සහ තත්වයන්ට අදාළව පැහැදිලි නිර් දේශ සෞඛ්‍ය අංශ විසින් ලබා දී ඇතැයි මහජනයා විශ්වාස කරති. එහෙත් එසේ සිදුවූවා ද යන්න සහ සිදුවූවා නම් එම නිර් දේශ අදාළ ආයතනය විසින් නොසලකා හරිනු ලැබුවේ කුමක් නිසා ද යන්න දැන ගැනීමේ අයිතියක් මහජනයාට ඇත.

7. ඒ සියල්ලටම වඩා බ‍්‍රැන්ඩික්ස් පොකුරේ පළමු රෝගියා හඳුනාගත් වහාම ඊට පෙර ආයතනයේ දක්නට ලැබුණු ශ්වසන රෝග තත්වයන් සැලකිල්ලට ගෙන කර් මාන්ත ශාලවේ සමස්ත සේවක පිරිස් නිරෝධායනයට ලක් කිරීම වෙනුවට PCR පරීක්ෂණවලට ලක් කළ සේවකයන් නිරෝධායනය සඳහා නිවෙස්වලට යැවීම බරපතළ වරදක් බව සාමාන්‍ය මහජනයාට පවා තේරුම්ගත හැක. එම සැකකටයුතු රෝගීන් නිවෙස්වලට ගමන් කරනු ලැබුවේ ත‍්‍රීරෝද රථවල සමූහ වශයෙන් සහ පොදු ප‍්‍රවාහන සේවාවලින් බවට සාක්ෂි ඇත. එසේ පළමු වටයේ දී නිවෙස්වලට යැවූ PCR පරීක්ෂණවලට ලක් කෙරුණු 100ක පමණ සේවකයන්ගෙන් 69 දෙනෙකු රෝගීන් බව තහවුරු විය. ඔවුන් බොහෝ දෙනෙකුට රෝග ලක්ෂණ නොතිබූ බැවින් ඔවුන් නිවෙස් ආශ‍්‍රිත සෙසු මහජනයා සමඟ ගැවසීම නිසා බොහෝ පිරිසකට රෝගය බෝ කිරීමේ අවදානමක් ඇති අතර එම පළමු පෙළ ආශ‍්‍රිතයන් සහ ඔවුන්ගේ දෙවන පෙළ ආශ‍්‍රිතයන් සියලූදෙනා කඩිනමින් හඳුනාගැනීම පහසු නැත. ඒ නිසා සමාජය තුළ සැඟවුණු රෝගීන් සිටින බව සහ රෝගය සමාජයට සම්ප්‍රේෂණය වී ඇති බවට මහජනයා විසින් දක්වන අදහස් තාක්ෂණික තර් ක මගින් බැහැර කළ හැකිද යන ප්‍රශ්නය මතුවේ.

8. එම තත්වය එසේ තිබිය දී දෙවන වතාවට PCR පරීක්ෂණවලට ලක්කරනු ලැබූ 1280ක් ද නිවෙස්වලට යැවීමට තීන්දු ගනු ලැබුවේ කවුරුන් විසින් ද යන ප‍්‍රශ්නය මතු වේ. ඒ අයගෙන් 50%කට වැඩි පිරිසක් රෝගීන් බව තහවුරු වූ නමුත් ඔවුන් සොයා ගැනීම සඳහා ආරක්ෂක අංශවලට බලවත් පරිශ‍්‍රමයක් දැරීමට සිදු වූ අතර යම් පිරිසක් සොයාගත නොහැකිව සමාජයේ සිටින බව වාර් තා වේ. ඒ සියලූදෙනාගේ ආශ‍්‍රිතයන් සහ ඔවුන්ගේ දෙවන පෙළ ආශ‍්‍රිතයන් සියල්ල පිළිබඳ සැලකීමේ දී මේ වන විට සමාජයේ ද්විතීක පොකුරු රාශියක් ඇති වී තිබෙන බව පිළිගැනීමට සිදු වේ. ඒ අනුව ඉහත සඳහන් කළ ආකාරයට රෝගය, සමාජයට සම්ප්‍රේෂණය වී ඇති බව හෙවත් වසංගතයේ 4 වැනි අවධියට ලඟා වෙමින් තිබේද යන සැකයද මතුවේ.

මෙම සියලූ කරුණු සැලකිල්ලට ගැනීමේ දී වසංගත තත්වය සමාජයට පැතිරෙමින් තිබෙන බව පිළිගෙන ඊට අනුව කටයුතු කළ යුතු බව සහ සමස්ත සිදුවීම් මාලාව පිළිබඳව විධිමත් පරීක්ෂණයක් සිදු කිරීම මගින් මහජන විශ්වාසය තහවුරු කළ යුතු බව අපගේ විශ්වාසයයි. අප ජාතික සංවිධාන ලෙස මෙම කරුණු ඔබතුමා වෙත ඉදිරිපත් කරන්නේ අපගේ සමාජ වගකීමක් ලෙස මෙන්ම ඔබතුමා එම කරුණු පිළිබඳව අවධානය යොමු කොට නිසි පියවර ගනු ඇතැයි යන විශ්වාසයෙනි.

මෙයට,
විශ්වාසී,

ගුණදාස අමරසේකර,
කැදවුම්කරු,
ජාතික සංවිධාන එකමුතුව වෙනුවෙන්.

කොවිඩ්-19 වසංගතය හමුවේ, පොදු රාජ්‍ය මණ්ඩලයීය රටවල ඊ-වාණිජ්‍යය හා ඊ-පාලනය වැඩි දියුණු කරන මෙන් ශ්‍රී ලංකා විදේශ අමාත්‍යවරයා ඉල්ලා සිටියි.

75 වැනි එක්සත් ජාතීන්ගේ මහා මණ්ඩලයට සමගාමීව ඊයේ සවස් යාමයේ (2020 ඔක්තෝබර් 14) පැවති පොදු රාජ්‍ය මණ්ඩලයීය විදේශ කටයුතු අමාත්‍යවරුන්ගේ 20 වැනි අතථ්‍ය රැස්වීමට (CFAMN) සහභාගී වූ ශ්‍රී ලංකා නියෝජිත කණ්ඩායමේ නායකත්වය දරමින් විදේශ අමාත්‍ය දිනේෂ ගුණවර්ධන මැතිතුමා කොවිඩ්-19 වසංගතය ඇතිවීමත් සමඟම සෑම ක්ෂේත්‍රයකම පාහේ පැන නැගී ඇති බහු විධ වු අභියෝග ජයගැනීම සඳහා නවෝත්පාදන චින්තනයත්, සාමූහික සහ සමෝධානික උපාය මාර්ගත් අවශ්‍යවන බව ප්‍රකාශ කළේය.  

ඊ-වාණිජ්‍යය හා ඊ-පාලනය මගින් පශ්චාත් කොවිඩ්-19 වසංගතය ලෝකයේ තරඟකාරී මායිම් අර්ථ දක්වන බව හුවා දක්වමින්, පොදු රාජ්‍ය මණ්ඩල සාමාජික රටවල, ආර්ථිකයන් සහ සේවාවන් ඩිජිටලීකරණය කිරීම වැඩි දියුණු කිරීම සඳහා සහය ඉල්ලා සිටියේය.  ඩිජිටල් ගණුදෙනු සඳහා ජාත්‍යන්තර ප්‍රමීතීන් සකස් කිරීම සඳහා දකුණු ආසියාවේ පළමු රට වශයෙන් කටයුතු කරන අතරවාරයේ ඩිජිටල් වේදිකාවක් හරහා ප්‍රථම වතාවට තේ හා රබර් වෙන්දේසියක් පවත්වමින් ශ්‍රී ලංකාව ලබාගත් අත්දැකීම පිළිබඳව එතුමා මෙහිදී සඳහන් කළේය. කොවිඩ්-19ට අදාළව දැනට සිදු කරගෙන යනු ලබන පර්යේෂණ සඳහා පොදු රාජ්‍ය මණ්ඩලයීය රටවල පවත්නා විද්‍යාත්මක සහ තාක්ෂණික විශේෂඥභාවය සහ දැනුම ඒකරාශී කිරීමටද එතුමා යෝජනා කළේය.  මේ සම්බන්ධයෙන්, කොවිඩ්-19 ආසාධන සම්බන්ධයෙන් ප්‍රතිශක්තිකරණය ඇතිවන ආකාරය අවබෝධ කරගැනීම සඳහා ඩෙංගු ආසාධනය සඳහා පුද්ගලයන් තුළ ප්‍රතිශක්තිය ඇතිවන ආකාරය සම්බන්ධයෙන් ලබාගත් විශේෂ‍ඥභාවය බෙදා හදා ගැනීමෙහිලා ශ්‍රී ලංකාවේ ශ්‍රී ජයවර්ධනපුර විශ්වවිද්‍යාලය සහ ඔක්ස්ෆර්ඩ් විශ්වවිද්‍යාලය අතර පවත්නා හවුල්කාරිත්වය පිළිබඳව විදේශ අමාත්‍යවරයා මෙහි දී අවධානය යොමු කළේය. 

මෙම අර්බුදය මඟින් ඇතිවන පෙර නොවූ විරූ අයහපත් ආර්ථික සහ සමාජ බලපෑම පිළිබඳව සඳහන් කළ අමාත්‍ය ගුණවර්ධන මැතිතුමා, දැනට පවතින දුෂ්කරතාවලින් මිදීම සඳහා ණය සහණ, ණය ආපසු ගෙවීම සඳහා කල් ලබාදීම සහ මූල්‍ය උත්තේජක කඩිනමින් අවශ්‍යවන බව හුවා දැක්වීය. 

දේශගුණික විපර්යාස පිළිබඳ පැරිස් ගිවිසුමේ කාර්යය සැලැස්ම යටතේ ශ්‍රී ලංකාව ඇප කැප වී සිදු කරන කටයුතු කෙරෙහි අවධානය යොමු කරමින්, වර්ෂ 2030 වන විට හරිතාගාර වායු විමෝචන 30% කින් අඩු කිරීම සඳහා සහ ජලය, සූර්ය බලය හා සුළං ආශ්‍රිත විදුලිබලය වෙත යොමුවෙමින් අඩු කාබන් මට්ටමකින් යුත් සහ ආර්ථික වර්ධනයක් සහිත පහසුවෙන් ප්‍රකෘති තත්ත්වයට පත්වන සහ පිරිසිදු අනාගතයක් කරා යාමට ශ්‍රී ලංකාව සැලසුම් කර ඇති බව අමාත්‍ය ගුණවර්ධන මහතා දන්වා සිටියේය. ශ්‍රී ලංකාව ඇතුළුව කුඩා රටවල් සඳහා දේශගුණික මූල්‍ය වර්ධනය කිරීම සඳහා පවතින බාධක, අවධානම සහ අනාගත ඉඩ ප්‍රස්තා හඳුනාගැනීමේ අවශ්‍යතාව ද එතුමා අවධාරණය කළේ ය. 

පොදු රාජ්‍ය මණ්ඩලයේ වර්තමාන සභාපතීත්වය දරන එක්සත් රාජධනියේ විදේශ හා පොදුරාජ්‍ය මණ්ඩලයීය කටයුතු පිළිබඳ රාජ්‍ය ලේකම් සහ එක්සත් රාජධානියේ පළමු රාජ්‍ය ලේකම්, පාර්ලිමේන්තු මන්ත්‍රී අති ගරු ඩොමිනික් රාබ් මහතා විසින් මෙම රැස්වීමේ මුලසුන හොබවන ලදී. සම්ප්‍රදායානුකූලව නිව්යෝර්ක් හි එක්සත් ජාතීන්ගේ මහා සම්මේලනයට සමගාමීව පවත්වනු ලබන මෙම පොදු රාජ්‍ය මණ්ඩලයීය විදේශ කටයුතු අමාත්‍යවරුන්ගේ රැස්වීම මෙම වසරේ පවතින කොවිඩ්-19 වසංගතය හමුවේ අතථ්‍ය රැස්වීමක් ලෙස පවත්වන ලදී. 

විදේශ ලේකම් අද්මිරාල් මහාචාර්ය ජයනාත් කොළඹගේ, එක්සත් රාජධානිය සඳහා ශ්‍රී ලංකා මහකොමසාරිස් සරෝජා සිරිසේන හා  විදේශ අමාත්‍යාංශයේ යුරෝපා සංගම් හා පොදු රාජ්‍ය මණ්ඩලයීය අංශයේ අධ්‍යක්ෂ ජනරාල් ධම්මිකා සේමසිංහ යන මහත්ම මහත්මීහු මෙම රැස්වීමට සහභාගී වූ ශ්‍රී ලංකා නියෝජිත පිරිසට අයත් වෙති.

හෙට (17) දිනට යෙදෙන ‘දරිද්‍රතාව තුරන් කිරීම පිළිබද ජාත්‍යන්තර දිනය වෙනුවෙන් අගමැති මහින්ද රාජපක්ෂ මහතා පණිවිඩයත් නිකුත් කර තිබෙනවා. එම නිවේදනය මගින් අගමැතිවරයා අවධාරණය කරන්නේ අනාගත සෞභාග්‍යය  උදාකර ගැනීමට නම් ආදායම් හිඟයට විසදුම් ලබා දිය හැකි වඩාත් තරගකාරී හා සියලු දෙනා ඇතුළත් ආර්ථිකයක් සකස්කර ගැනීම අත්‍යවශ්‍ය බවත් ඒ සඳහා රජයක් ලෙස ගත යුතු ක්‍රියාමාර්ගයන් වත්මන් රජය යටතේ ගන්නා බවයි.

එම නිවේදනය සම්පූර්ණයෙන් මෙසේයි,

සංවර්ධනයට අනුව දරිද්‍රතා රේඛාවට පහළින් ජීවත් වන ජනතාවගේ ගැටලු කෙරෙහි අවධානය යොමු කිරීමේ අරමුණින් දරිද්‍රතාව තුරන් කිරීම සඳහා වූ ජාත්‍යන්තර දිනය ඔක්තෝබර් 17 වන දින ලෝකය පුරා සමරනු ලබයි.

1987 ඔක්තෝබර් 17 දා දරිද්‍රතාවයට එරෙහි ලෝක කම්කරු දිනයක් පැරීසියේ සමරනු ලැබීය. එහිදී ලෝක ජනගහනයෙන් දිළිඳුබවක් දක්වන, දිළිඳුබවට ගොඳුරු වී ඇති හා අනෙකුත් දරිද්‍රතා ගැටළු පිළිබඳව අවධානය යොමු වූ අතර දරිද්‍රතාවයේ ගැටලු පිළිබඳව සිහිපත් කරමින්  සෑම වසරකම එම රැස්වීම පැවැත්විණි.

දරිද්‍රතාවය යනු මානව අයිතිවාසිකම් උල්ලංඝනය කිරීමක් බව එහිදී ප්‍රකාශයට පත් කළ අතර එතැන් පටන් දරිද්‍රතාවයේ රැළිය සිහිවීම පිණිස ස්මාරකයක් ද ගොඩනැගුණි. පසුකාලීකව විවිධ රටවල ඊට සමාන ස්මාරක ගොඩනැගුණු අතර ඒවා කේන්ද්‍ර කර ගනිමින් සෑම වසරකම දරිද්‍රතාවය තුරන් කිරීමේ අරගලය සඳහා දිනයක් වෙන්විය. පසුව එක්සත් ජාතීන්ගේ මහා මණ්ඩලය විසින් දරිද්‍රතාවය තුරන් කිරීම සඳහා ජාත්‍යන්තර දිනය 1992 ඔක්තෝබර් මස 22 වන දින නිල වශයෙන් ප්‍රකාශයට පත් කරන ලදී.

ආර්ථික විද්‍යාත්මක විග්‍රහයට අනුව, බොහෝවිට දිළිඳුකම වටහාගන්නේ ආදායම් අඩුකම නිසා ජිවන මාර්ගයක් නොමැති වීමෙන් ඇති වූ ප්‍රතිඵලයක් වශයෙනි. එනම් ජනතාවගේ ද්‍රව්‍යාත්මක යහපැවැත්ම සහතික වන අයුරින් ඔවුන්ගේ මූලික අවශ්‍යතා වන ආහාරපාන, ඇදුම්පැළඳුම්, බේත්හේත්, අධ්‍යාපනය වැනි දෑ මිලදී ගත හැකි ආකාරයට ආදායමක් උපයා ගැනීමට හැකියාවක් නොමැතිවීමයි.

රටේ දරිද්‍රතාවය අඩුවන පරිදි  අප රජය සියලුම අංශයන්හි සංවර්ධන පැතිකඩයන් නව මාවතක් ඔස්සේ රැගෙන එමින් රට තුළ බිහි කළ අධිවේගී මාර්ගයන්, මං මාවත්, දේශීයකර්මාන්තකරුවා  හා දේශීය ගොවියා පණගැන්වීම තුළ ගම සහ නගරය අතර තුලනය සමනය විය. සෞභාග්‍යයේ දැක්ම ප්‍රතිපත්ති ප්‍රකාශය ඔස්සේද අප පණ ගන්වනු ලබන්නේ දේශීයත්වයයි. දේශීය නිෂ්පාදන නඟා සිටුවීම, රැකියා ලක්ෂයේ වැඩපිළිවෙළ හා  කර්මාන්ත හා සේවා අංශයේ නඟාසිටුවීම තුළින් රටේ ඵලදායිතාව ඉහළ යනු ඇත.

කොවිඩ්-19 වසංගත තත්ත්වය හේතුවෙන් ඇති වූ අහිතකර ආර්ථික ප්‍රතිඵල හේතුවෙන් ගෝලීය දරිද්‍රතාව ඉහළ යෑම 2030 වන විට දරිද්‍රතාවය තුරන් කිරීමේ එක්සත් ජාතීන්ගේ තිරසර සංවර්ධන ඉලක්කයට සැබෑ අභියෝගයකි. ලොවපුරා ව්‍යාප්ත කොරෝනා වසංගතය හමුවේ ශ්‍රී ලංකාවේ උද්ගත ආර්ථික හා සමාජයීය අභියෝග සහ ඉඩප්‍රස්ථා කෙරෙහි සුවිශේෂ අවධානය යොමු කරමින් ආර්ථික පුනර්ජීවනය සැලසීමෙන්ද දරිද්‍රතාවය තුරන් කිරීමේ වගකීම අපසතුය.

අනාගත සෞභාග්‍යය  උදාකර ගැනීමට නම් ආදායම් හිඟයට විසදුම් ලබා දිය හැකි වඩාත් තරගකාරී හා සියලු දෙනා ඇතුළත් ආර්ථිකයක් සකස්කර ගැනීම අතවශ්‍යය. ඒ සඳහා රජයක් ලෙස ගත යුතු ක්‍රියාමාර්ගයන් අප රජය යටතේ ගන්නා බව දරිද්‍රතාව තුරන් කිරීම පිළිබඳ ජාත්‍යන්තර දිනය සමරනු ලබන අද දිනයේ අවධාරණය කරමි.

ශ්‍රී ලංකාව කොරෝනා රෝගී ආසාදිත බල ප්‍රදේශයක් ලෙස නම් කරන ලද බව පොලිස් මාධ්‍ය ප්‍රකාශක නියෝජ්‍ය පොලිස්පති අජිත් රෝහණ මහතා සඳහන් කරයි.

නමුත් රට පුරාම පුද්ගලික හා රාජ්‍ය ආයතන ප්‍රදේශයේ සෞඛ්‍ය බලධාරීන්ගේ උපදෙස් මත පවත්වාගෙන යා හැකි යැයි ද ඔහු පවසයි.

පවත්වාගෙන යන ඕනෑම ආයතනයක සිටින සේවකයන් සංඛ්‍යාව ප‍්‍රදේශයේ සෞඛ්‍ය බලධාරින් විසින් නිර්දේශ කරනු ඇති බවත් ඒ අනුව සේවක සංඛ්‍යාව පවත්වාගෙන යා යුතු බවත් ඔහු පැවසීය.

සියලුම සේවකයන්ගේ වරින්වර උෂ්ණත්වය පරික්ෂා කළ යුතු බවත්, දුරස්ථභාවය පවත්වාගෙන යා යුතු බවත්, සියලු දෙනාම මුහුණු ආවරණ පැළඳිය යුතු බවත්, දෑත් සේදීමේ ස්ථාන ස්ථාපිත කළ යුතු බවත් ඔහු තව දුරටත් කියා සිටියේය.

-ලංකා සී නිව්ස්-

කොරෝනා වෛරසය පැතිර යාම මේ වන විටත් සම්පූර්ණයෙන්ම පාලනය කර ඇති බව හමුදාපති ශවේන්ද්‍ර සිල්වා මහතා අද මව්බිම පුවත්පත වෙත සදහන් කර තිබේ.

එසේ නමුත් ඉදිරි දින කිහිපය ඉතා තීරණාත්මක බැවින් කොරෝනා ආසාදිතයෙකු බවට පත් නොවී සිටීමටත් සියලු දෙනා වගබලා යුතු බවද ඒ මහතා සඳහන් කළේය.

කොරෝනා ආසාදිතයන් පිළිබද සහ රෝග ලක්ෂණ ඇත්නම් වහාම ඒ පිළිබඳව සෞඛ්‍ය අංශ වෙත වාර්තා කර උපදෙස් ලබා ගන්නා ලෙස ඔහු ඉල්ලා සිටියේය.

කොරෝනා ආසාදිතයන් සහ ආශ්‍රිතයන් සදහා අවශ්‍ය රෝහල් පහසුකම් නිරෝධායන මධ්‍යස්ථාන අවශ්‍ය තරම් ඉඩකඩ පුළුල් කර ඇති බවද පැවසූ ඔහු තවදුරටත් ඉඩකඩ අවශ්‍ය වුවහොත් ඒවා ලබාදීමට ද කටයුතු යොදා තිබෙන බවද ඔහු පැවසීය.

කෙසේ නමුත් දැනට පවතින තත්වය ඉදිරි සති දෙක තුළ සාමාන්‍ය අතර පත්වේදැයි කල විමසුමකදී ඔහු පවසා ඇත්තේ ඒ ගැන දැන්ම අනාවැකි පළ කළ නොහැකි බවයි.

මේ මොහොතේ කළ යුතු වැදගත්ම දේ වන්නේ කොරෝනා වෛරසයට ගොදුරු නොවී ආරක්ෂා වීමට වගබලා ගැනීම යයිද තව දුරටත් පවසා ඇත.