Tag: featured

අද (25) දින ප.ව 19.05 වන විට කොවිඩ්-19 නව ආසාදිතයින් 41 දෙනකු වාර්තා වූ බවත් ඒ සමග ලංකාවේ සමස්ත කොවිඩ්-19 ආසාදිතයින් සංඛ්‍යාව 1182 දක්වා ඉහළ ගිය බවත් සෞඛ්‍ය ප්‍රවර්ධන කාර්යාංශයේ නිල වෙබ් අඩවියේ සදහන් වේ.

එහි දැක්වෙන්නේ මේ වන විට කොවිඩ්-19 ආසාදනය වූ රෝගීන් 477 දෙනකු රෝහල් තුළ ප්‍රතිකාර ලබන බවයි. දැනට රෝහල්වල විමර්ශනය යටතේ සිටි පුද්ගලයින් සංඛ්‍යාව 79 දෙනකු වන අතර 695 දෙනකු සුවය ලබා පිටව ගොස් ඇත.

අද දින වාර්තා වූ 52 හැවිරිදි කාන්තාවගේ මරණයත් සමග ලංකාවේ සමස්ත කොවිඩ්-19 මරණ සංඛ්‍යාව 10 දක්වා ඉහළ ගිය බව එම වාර්තාවල සදහන් වේ.

ඊයේ (24) දින රාත්‍රී 23.20 පැයට පමණ මංකි බ්‍රිජ් (ත්‍රිකුණාමලය) නිරෝධායන මධ්‍යස්ථානයේ නිරෝධායනය වෙමින් සිටි කුවේට් හී සිට පැමිණි වයස අවුරුදු 52 ක් පමණ වන කළුතර පයාගල ප්‍රදේශයේ පදිංචි කාන්තාවක් පපුවේ ඇති වූ ආසාදිත තත්වයක් මත මියගොස් ඇති බව නිරෝධායන මධ්‍යස්ථාන භාර වෛද්‍ය නිලධාරි විසින් සනාථ කර ඇති අතර ත්‍රිකුණාමලය මහ රෝහලේදී පශ්චාත් මරණ පරික්‍ෂණය සිදුකිරීමෙන් අනතුරුව කරන ලද PCR පරික්‍ෂණය තුලින් කොවිඩ් – 19 ආසාදනය වී ඇති බවට තහවුරු වී ඇත.

ලංවිම ඉංජිනේරුවන් ඇතුළු ඉහළ නිලධාරීන් විසින් ගෙවිය යුතු උපයන විට බදු ගෙවීම ඔවුන්ගේ වැටුපෙන් අයකර ගන්නවා වෙනුවට විදුලි පාරිභෝගිකයාගෙන් අයකර ගෙවීම  මෙම රජයත් තීරණය කර ඇතැයි මේ අනුව ලංවිම  ඉහළ නිලධාරීන්ගේ බදු වංචාව අලුත් මුහුණුවරකින් ක්‍රියාත්මක වීමට නියමිත බව ද  පාරිභෝගික අයිතීන් සුරකීමේ ජාතික ව්‍යාපාරයේ සභාපති රංජිත් විතානගේ මහතාගේ අත්සනින් අද  (24) දින මාධ්‍ය නිවේදනයක් නිකුත් කරමින් ජනපතිවරයාට පෙන්වා දෙයි.

එම නිවේදනය සම්පූර්ණයෙන්ම පහත පළ වේ.

ලංවිම ඉංජිනේරුවන් ඇතුළු ඉහළ නිලධාරීන් විසින් ගෙවිය යුතු උපයන විට බදු ගෙවීම ඔවුන්ගේ වැටුපෙන් අයකර ගන්නවා වෙනුවට විදුලි පාරිභෝගිකයාගෙන් අයකර ගෙවීම මෙතෙක් සිදු කර ගෙන ගියේ නීති විරෝධීවය.

වැටුප් පරිමාණ වලට අනුව සියළුම රජයේ හා පුද්ගලික අංශයේ සේවකයින්ගෙ වැටුපෙන් උපයන විට ගෙවන බද්ද අඩු කර දේශීය ආදායම්දෙපාර්තමේන්තුවට අදාල ආයතනය විසින් ගෙවිය යුතුවීම සාමාන්‍ය ක්‍රමවේදයයි. එහෙත් ලංකා විදුලි බලමණ්ඩලය විසින් මේ දක්වා කර ඇත්තේ සිය සේවකයින්ගේ ආදායම් බදු විදුලිපාරිභෝගිකයින්ගෙන් අයකර දේශීය දෙපාර්තමේන්තුවට ගෙවීමයි. මෙය අදාල බදු පනත උල්ලංඝණය කිරීමකි. මේ ආකාරයට බදු පනත උල්ලංඝනය කරමින් ලංවිම ඉංජිනේරුවන්ඇතුළු ඉහල නිලධාරීන් විසින් වංචා කර ඇති බදු ප්‍රමාණය රුපියල් කෝටි 500 ඉක්මවයි.

මෙම බදුවංචාවට ලංකා විදුලි බල මණ්ඩලයේ සභාපති ඇතුළු අධ්‍යක්ෂමණ්ඩලය හා සාමාන්‍යාධිකාරිවරයා ඝෘජුව සහාය දක්වා ඇත. විගණකාධිපතිතුමා විසින් 2015 වසරේ සිට මෙම බදු වංචාව හෙලි කර ඇතත් යහපාලන රජය මෙම බදු වංචාවට සහාය දක්වමින් විගණාකාධිපතිවරයාගේ නිර්දේෂ යට ගසා ඇත. මේ බදුවංචාව යටතේ වසරකට රුපියල් මිලියන 400කට අධික බදු මුදලක් විදුලිපාරිභෝගිකයින් මත පැටවී ඇත.

නව රජය බලයට පත්වීමෙන් පසුව උපයන විට බද්ද වෙනුවට ඝෘජුවම අදාල නිලධාරියා විසින් සිය අදායම් බද්ද ගෙවිය යුතු ක්‍රමයක් හදුන්වා දී ඇත. කෙසේ වෙතත් එම බද්ද ද ලංවිම නිලධාරීන් වෙනුවෙන් ලංවිම විසින් ගෙවීමට යෝජනා කර තීරණය කර ඇති බව වාර්තා වේ. ඒ අනුව පසුගිය කාලයේ උපයන ලංවිම විසින් ගෙවන ලද බද්ද නව රජය යටතේ ද ලංවිම විසින්ම ගෙවීම සදහා පිඹුරුපත් සකසා අවසන් කර ඇත. ලංවිම සභාපතිවරයාගේ දේශපාලන වුවමනා ඉටුකරගැනීම සදහා ලංවිම ඉහල නිලධාරීන්ට ලබාදෙන මේ බදු සහන වරදානය අවසානයේ ගෙවීමට සිදුවන්නේ මෙරට දුප්පත් විදුලි පාරිභෝගිකයාට වේ. රජයට අය විය යුතු බදු මුදල් රජයේ මුදලින් ම ගෙවීමේ තීරණය ගත් ලංකා විදුලි බල මණ්ඩල අධ්‍යක්ෂ මණ්ඩලය තුල මහා භාණ්ඩාගාරයේ නියෝජිතයෙක් ද වේ. බදු පනතට හා නීතියට එරෙහිව නිලධාරීන්ගේ ආදායම් බදුරජයේ මුදලින් ගෙවීමට ගත් තීරණයට මහා භාණ්ඩාගාරයේ නියෝජිතයා කල යුතුව ඇත්තේ විරෝධය පල කිරීමය. එහෙත් මෙම බදු වංචාව පිළිබද තීරණය භාණ්ඩාගාර නියෝජිතයාද එකගතාවය පල කර ඇති බව වාර්තා වේ. රාජ්‍ය මුදල් අවභාවිතා කරන ලංවිම පාලන අධිකාරියා හා එහි ඉහල නිලධාරීන්ට එරෙහිව වහා නීතියක්‍රියාත්මක කල යුතු ය.

මෙම බදු වංචාව නැවත්වීම සදහා රජය තීරණය නොකලහොත් විදුලි බිල්පත් නොගෙවීමේ ව්‍යාපාරයක් දියත් කිරීමට මෙරට ලක්ෂ 65ක් වු විදුලි පාරිභෝගිකයින් පියවර ගත යුතුව ඇත.

ජනාධිපති ලේකම්වරයා රජයේ සේවකයින්ගෙන් ඉල්ලා සිටියේ මාසයක වැටුප කොරෝනා අරමුදල සදහා පරිත්‍යාග කරන ලෙසයි. මෙරට බහුතරයක් රජයේ සේවකයින්ගේ වැටුප රැපියල් 35000.00 පමණය. එහෙත් විදුලිබල මණ්ඩලයේ ඉහළ නිළධාරියෙකුගේ වැටුප රැපියල් ලක්ෂ දෙකකට හෝ තුනකට වඩා  වැඩි ගණනකි. නමුත් විදුලිබල මණ්ඩලයේ ඉහළ නිළධාරීන්ගේ ආදායම් බදු මුදල් ගෙවන්නේ විදුලි පාරිභෝගිකයාගෙන් මුදල් ලබා ගෙන රජයයි. රොබුන් හුඩ් පොහොසතුන්ගෙන් මුදල් ගෙන දුප්පතුන්ට බෙදා දුන් අතර පී.බී ජයසුන්දර කරන්නේ දුප්පතුන්ගෙන අරගෙන පොහොසතුන්ට ලබා දීමය. ජනාධිපතිතුමණි වහා මැදිහත් වන්න.

අද (24) දින ප.ව 18.05 වන විට ශ්‍රී ලංකාවෙන් කොවිඩ්-19 ආසාදිතයින් 29 දෙනකු වාර්තා වූ බවත් ඒ අනුව ලංකාවේ සමස්ත කොවිඩ්-19 ආසාදිතයින් සංඛ්‍යාව 1118 දක්වා ඉහළ ගිය බවත් සෞඛ්‍ය ප්‍රවර්ධන කාර්යාංශයේ නවතම යාවත්කාලීන කිරීම්වල සදහන් වේ.

එහි දැක්වෙන්නේ මේ වන විට රෝගීන් 435 දෙනකු රෝහල්වල ප්‍රතිකාර ලබන අතර 97 දෙනකු අධීක්ෂණය යටතේ සිටින බවයි.

මේ වන විට සුවය ලබා රෝහල්වලින් පිටව ගිය කොවිඩ්-19 ආසාදිතයින් ගණන 674ක් බව ද එම වාර්තාවේ වැඩි දුරටත් සදහන් වේ.

මේ අතර අද ප.ව 17.30 ට මාධ්‍ය නිවේදනයක් නිකුත් කරමින් රජයේ ප්‍රවෘත්ති අධ්‍යක්ෂ ජනරාල්වරයා සදහව් කළේ අද දිනය තුළ වාර්තා වූ කොවිඩ්-19 ආසාදිතයින්ගෙන් 28 දෙනාම (ඒ වන විට වාර්තා වී සිටි සංඛ්‍යාව) ක්වේට් හි සිට පැමිණි පුද්ගලයින් බවයි. ඔවුන් මින්නේරිය සහ ත්‍රිකුණාමලය නිරෝධායන මධ්‍යස්ථාවනවල නිරෝධානයට ලක් වෙමින් සිටි පිරිසක් බව ද එම වාර්තාවේ සදහන් වේ.

COVID-19 වසංගත තත්වයට එරෙහිව ප්‍රතිකාර සේවාවන් ශක්තිමත් කිරීමට “CuRec” නමින් පරිගණක මෘදුකාංගයක්, ජෙනරාල් ශ්‍රීමත් ජෝන් කොතලාවල ආරක්ෂක විශ්ව විද්‍යාලයේ උපකුලපති මේජර් ජෙනරාල් මිලින්ද පිරිස් මහතාගේ  මඟපෙන්වීමෙන් පරිගණක පිඨයේ පර්යේෂක කණ්ඩායමක් මගින් නිර්මාණය කර ඇත. 

“CuRec” මෘදුකාංගය මගින් රෝගියා සහ වෛද්‍යවරයා අතර ඵලදායි වීඩියෝ සන්නිවේදනක් ඇති කර එමගින් සෞඛ්‍ය කාර්ය මණ්ඩලයට රෝගය වැළඳීමේ අවදානම අඩු කරයි. රෝගියාගේ සෞඛ්‍ය තත්ත්වය අනුව ගිලන් රථයක් රෝගියාගේ නිවසට යැවීමට හෝ මහජන සෞඛ්‍ය පරීක්ෂකගේ නිරීක්ෂණය යටතේ නිරෝධායනයට ලක් කිරීමට ද අවශ්‍ය තීරණ ගැනීමේ පහසුකම ද මෙම මෘදුකාංගය මගින් වෛද්‍යවරයාට සලසා තිබීම විශේෂත්වයකි.

මෙම මෘදුකාංගය පිලිබඳව සෞඛ්‍ය, හා දේශීය වෛද්‍ය අමාත්‍ය අමාත්‍ය පවිත්‍රා වන්නිආරච්චි මහත්මිය සහ අමාත්‍යාංශයේ ලේකම් මේජර් ජෙනරාල් සංජීව මුනසිංහ මහතා දැනුවත් කිරීමේ අරමුණින් අද දින (24) සෞඛ්‍ය අමාත්‍යාංශයේ දී විශේෂ හමුවක් පවත්වන ලදි. පරිගණක විද්‍යා උපාධි අපේක්ෂක සිසුන් වන එන්. සමාරා ප්‍රේමරත්න සිසුවිය සහ එච්. කසුන් කල්හාර පෙරේරා සිසුවා විසින් සෞඛ්‍ය අමාත්‍යතුමියට මෙම මෘදුකාංගය පිළිබද මුලික හැදින්වීම සිදු කරන ලදි.

“CuRec”මෘදුකාංග පර්යේෂණ කණ්ඩායම ලෙස ආචාර්ය ප්‍රදීප් කලන්සූරිය (ජ්‍යෙෂ්ඨ කථිකාචාර්ය සහ පරිගණක විද්‍යා අංශයේ අංශ ප්‍රධානී) සහ පරිගණක විද්‍යා උපාධි අපේක්ෂක සිසුන් වන කසුන් කල්හාර, නිමේෂ් ඒකනායක, චානක්‍ය බණ්ඩාර, සවිඳු බණ්ඩාර, මලිත් ඉලේපෙරුම, සනාරා ප්‍රේමරත්න සහ කෙත්මි පෙරේරා කටයුතු කර ඇති අතර – පරිගණක පිඨයේ  පීඨාධිපති කොමදෝරු ජනක ගුණසිල, විශේෂඥ වෛද්‍ය නාමල් විජේසිංහ (හෘද රෝග විශේෂඥ සහ වෛද්‍ය  පිඨයේ  පීඨාධිපති), වෛද්‍ය සමන් යාපා බන්ඩාර (නියෝජ්‍ය අධ්‍යක්ෂ-රිජ්වේ ආර්යා ළමා රෝහල),  වෛද්‍ය විරාජ් ජයසිංහ (ළමා රෝග විශේෂඥ වෛද්‍ය), වෛද්‍ය වාසන් රත්නසිංහම් (රිජ්වේ ආර්යා ළමා රෝහල) සහ වෛද්‍ය මංගල රාජමන්ත්‍රි (කායික රෝග  විශේෂඥ වෛද්‍ය – මූලික රෝහල කරවනැල්ල)  යන මහත්වරුන් මෙම ව්‍යාපෘතියේ උපදේශකයින් ලෙස කටයුතු කර ඇත.

“CuRec” මෘදුකාංගය හදුන්වාදීමේ අවස්ථාවට ජෙනරාල් ශ්‍රීමත් ජෝන් කොතලාවල ආරක්ෂක විශ්ව විද්‍යාලයේ විශේෂඥ වෛද්‍ය ජයන්ත බලවර්ධන මහතා, පරිගණක පිඨයේ පීඨාධිපති කොමදෝරු ජනක ගුණසිල මහතා, විශේෂඥ වෛද්‍ය නාමල් විජේසිංහ (හෘද රෝග විශේෂඥ සහ වෛද්‍ය  පිඨයේ  පීඨාධිපති), ආචාර්ය ප්‍රදීප් කලන්සූරිය (ජ්‍යෙෂ්ඨ කථිකාචාර්ය සහ පරිගණක විද්‍යා අංශයේ අංශ ප්‍රධානී)  යන මහත්වරුන් ඇතුලු පිරිසක් සහභාගී විය.

කොවිඩ් 19 හෙවත් කොරෝනා වසංගතය හේතුවෙන් අපනයනකරුවන් මුහුණදෙන ගැටළු වලට කඩිනමින් විසදුම් ලබා දෙන බව කාර්මික අපනයන, ආයෝජන ප්‍රවර්ධන, සංචාරක හා ගුවන් සේවා ඇමති ප්‍රසන්න රණතුංග මහතා පවසයි. ඔහු අවධාරණය කරන්නේ ඊට අදාළ යෝජනා කඩිනමින් කැබිනට් මණ්ඩලයට ඉදිරිපත් කරන බවයි.

ඇමති ප්‍රසන්න රණතුංග මහතා සහ කාර්මික අපනයන, ආයෝජන ප්‍රවර්ධන අමාත්‍යාංශයේ ඉහළ පෙළේ නිළධාරීන් අතර පසුගිය දා පැවති සාකච්ඡාවක දී ඇමතිවරයා මේ බව සදහන් කළේය.

කොවිඩ් 19 වසංගතය ලොව පුරා පැතිර යාමත් සමග ලෝකය පුරාම අපනයන අඩාල වූ අතර ඒ නිසා මෙරට අපනයන කර්මාන්තයේ නියුතු කර්මාන්තකරුවන්  විවිධ දුෂ්කරතාවන්ට පත්ව තිබේ. අමුද්‍රව්‍ය ගෙන්වා ගැනීම, බැංකු මගින් එම භාණ්ඩ වලට මුදල් ගෙවීම් කිරීමේ දී මතු ව ඇති ගැටළු, අපනයන ඇණවුම් සැකසීම වැනි කටයුතු වලදී ඔවුන් දුෂ්කරතාවන්ට පත්ව සිටින බව අපනයනකරුවන් තමන්ට දැනුම් දි ඇතැයි ඇමතිවරයා සදහන් කරයි. මේ සම්බන්ධයෙන් කාර්මික අපනයන, ආයෝජන ප්‍රවර්ධන අමාත්‍යාංශය වෙනම අධ්‍යනයක් සිදු කර ඇති අතර අපනයනකරුවන්ට සහන සැලසීම සදහා වන යේජනා 08 ක් හදුනාගෙන තිබේ. අපනයන ඇණවුම් සදහා අමද්‍රව්‍ය හිගය මගහරවාලීම, අපනයනකරුවන් සදහා රේගුව අනුගමනය කරන විශේෂිත බහු ක්‍රමය සදහා පැහැදිලි මාර්ගෝපදේශ ලබා දීම, ආහාර පාන අපනයනය සදහා බලපා ඇති ගැටළු හදුනාගෙන ඊට විසදුම් ලබා දීම වැනි යෝජනා ඊට ඇතුළත් වේ.

අපනයනකරුවන් මුහුණ පා තිබෙන ගැටළු සම්බන්ධයෙන් ජනාධිපති කාර්යය සාධන බලකාය ද දැනුවත් කිරීමට තමන් පියවර ගත් බව පවසන ඇමති ප්‍රසන්න රණතුංග මහතා අපනයනකරුවන්ගේ ගැටළු වලට කඩිනම් විසදුම් ලබාදෙන බව එම බලකාය ද සදහන් කළ බව කියා සිටියේය.

ඇමති ප්‍රසන්න රණතුංග මහතා පවසන්නේ කොවිඩ් 19 හෙවත් කොරෝනා වසංගතය හේතුවෙන් රටපුරා ඇදිරි නීතිය ක්‍රියාත්මක කාලය තුළ අපනයන කර්මාන්තකරුවන්ගේ ගැටළු විසදීමට අපනයන සංවර්ධන මණ්ඩලය සක්‍රීයව දායක වු බවයි. පාරිභෝගික සහාය සදහා වෙන් වු වෙන ම උපකාරක සේවාවන් ආරම්භ කෙරුණ අතර සමාගම්වල ක්‍රියාකාරීත්වය පිළිබද ව අධික්ෂණය කිරීම ද ඒ අනුව සිදු කෙරිණ.

ගුරුවෘත්තියේ යෙදී සිටි කාලයේ සිටම ප්‍රබල එක්සත් ජාතික පාක්ෂිකයකු වූ ඔහු ජේ.ආර්. ජයවර්ධන ආණ්ඩුව විසින් 1987දී ඉන්දු- ලංකා ගිවිසුම අත්සන් කිරීමට විරෝධය පා එ.ජා.ප දේශපාලයෙන් ඉවත් විය. එහෙත් ඔහු සිංහලයන්ගේ අයිතිවාසිකම් වෙනුවෙන් පෙනී සිටියේ දෙමළ ඊළාම්වාදීන්ගේ දැඩි විරෝධයන් මධ්‍යයේ ය.

දශක තුනකට වැඩි කාලයක් ශ්‍රී ලංකාවේ පුවත්පත් මාධ්‍යවේදියෙකු වශයෙන් කටයුතු කොට පසුව එක්සත් ජනපදයට  සංක්‍රමණය වූ මාධ්‍යවේදීවෝල්ටර් ජයවර්ධන මහතා (78) ඉකුත් දා ලොස් ඇන්ජලීස් නගරයේදී අභාවප්‍රාප්ත විය.

ටයිම්ස් ඔෆ් සිලෝන් සමාගම මඟින් පළකළ ‘ලංකාදීප‘  පත්‍රයට සොරණාතොට ප්‍රදේශීය  වාර්තාකරු  වශයෙන් එක්වූ ඒ මහතා පසුව එහි මාණ්ඩලික වාර්තාකරුවකු සහ ප්‍රවෘත්ති  කතෘ  තනතුර ද දැරීය.  එයට අමතර ව වෝල්ටර් ජයවර්ධන මහතා ඒෂියා වීක් සඟරාවේ කොළඹ වාර්තාකරු වශයෙන් ද කටයුතු කළේය.

1942 මැයි මස 22වන දින බදුල්ලේ සොරණාතොටදී උපත ලැබූ ඔහු වෘත්තීය ජීවිතය ආරම්භ කළේ ඉංග්‍රීසි  පුහුණු ගුරුවරයතු වශයෙනි. එම කාලය තුළ ලංකාදීප සොරණාතොට වාර්තාකරු ලෙස ද කටයුතු කළ ඔහුට දේශපාලන පළිගැනීම් හේතුවෙන් වරින් වර පාසල් 13කට මාරුවීම් ලැබුණි.  ඉන් කලකිරීමට පත් ඒ මහතා ගුරුවෘත්තියෙන් ඉල්ලා අස්වී “ ලංකාදීප පුවත්පතේ මාණ්ඩලික වාර්තාකරුවකු ලෙස මාධ්‍ය ජීවිතය ඇරඹීය. ඒ අතර ඔහුට ඇමෙරිකානු රජයේ ජෙෆසන් ශිෂ්‍යත්වය හිමිවී EAST WEST SENTER හි වසරක කාලයක් මාධ්‍ය පුහුණුව ලබාගැනීමට අවස්ථාව උදා විය.

ලංකාදීප පුවත්පත මූල්‍ය අර්බුදයක් හේතුවෙන් වසාදැමීමට යන අවස්ථාවේදී වෝල්ටර් සිය බිරිඳ වන හෙඳ නිළධාරියක වූ ලක්ෂ්මි සමඟ 1982දී  එක්සත් ජනපදයට ගොස් ලොස් ඇන්ජලීස් නුවර පදිංචි විය.

මේවන විට දෙමළ ඊළම්වාදීන් ඇමෙරිකාවේ සිට ශ්‍රී ලංකාවට එරෙහිව දැවැන්ත ප්‍රහාර අරඹා තිබුණි. ඒවාට පිළිතුරුදීමට ශ්‍රී ලංකා තනාපති කාර්යාලය හෝ කොන්සල් ජනරාල් කාර්යාලය පියවර ගෙන තිබුණේ නැත. වෝල්ටර් 1983දී “සිංහල ආරක්ෂක සංවිධානය‘ නමින් සංවිධානයක් පිහිටුවා ඊළාම් ප්‍රචාරවලට පිළිතුරුදීම ඇරඹීය. ලොස් ඇන්ජලීස් නුවර විසූ  ශ්‍රී ලාංකිකයන් විශාල පිරිසක් ඔහු හා එක්විය. ඔවුන් විසින් ඊළාම් ප්‍රචාරයට එරෙහිව පිකටින්, පෙලපාලි හා රැස්වීම් පැවැත්වූ අතර ඒවායේ පෙරමුණ ගත්තේ වෝල්ටර් ය.

ගුරුවෘත්තියේ යෙදී සිටි කාලයේ සිටම ප්‍රබල එක්සත් ජාතික පාක්ෂිකයකු වූ ඔහු ජේ.ආර්. ජයවර්ධන ආණ්ඩුව විසින් 1987දී ඉන්දු- ලංකා ගිවිසුම අත්සන් කිරීමට විරෝධය පා එ.ජා.ප දේශපාලයෙන් ඉවත් විය. එහෙත් ඔහු සිංහලයන්ගේ අයිතිවාසිකම් වෙනුවෙන් පෙනී සිටියේ දෙමළ ඊළාම්වාදීන්ගේ දැඩි විරෝධයන් මධ්‍යයේ ය.

මහින්ද රාජපක්ෂ මහතා 2005දී ශ්‍රී ලංකාවේ ජනාධිපති ධූරයට පත්වීමෙන් පසු වෝල්ටර් ජයවර්ධන මහතා බ්‍රිතාන්‍යයේ ශ්‍රී ලංකා මහකොමසාරිස් කාර්යාලයේ දෙවන ලේකම් (මධ්‍ය) වශයෙන් පත්කළ අතර ඔහු එම තනතුර දරමින් එංගලන්තයේ දෙමළ ඊළාම් ප්‍රචාරවලට පිළිතුරු දුන්නේ ය. පසුව 2010දී යළි ලොස් ඇන්ජලීස් නුවරට ගිය හෙතෙම සිංහල ආරක්ෂක සංගමය ඇතුළු සංවිධාන ගණනාවක ක්‍රියාකාරීව කටයුතු කළේය.

2020 මැයි 3වැනි දින අභාවප්‍රාප්ත වූ ඒ මහතාගේ අවසන් කටයුතු  මැයි 9දා ලොස් ඇන්ජලීස්හිදී සරත්චන්ද්‍ර බෞද්ධ මධ්‍යස්ථානයේ මෙහෙයැවීමෙන් සිදුකෙරුණි.

කොරෝනා වසංගතය හේතුවෙන් ඔහුගේ අවමංගල උත්සවය ෆේස්බුක් මඟින් විකාශනය කළ අතර බොහෝ දෙනා නිවෙස්වල සිට ඔහුගේ දේහයට අවසන් බුහුමන් දැක්වූ බව ලොස් ඇන්ජලීස්හි වෙසෙන මාධ්‍යවේදිනියක වන හසීනා ලීලාරත්ත මහත්මිය ඇයගේ ශ්‍රී ලංකා එක්ස්ෆස් වෙබ් අඩවියේ පළ කර තිබුණි.

දයා ලංකාපුර

සංචාරක මාර්ගෝපදේශකයන් සදහා රක්ෂණ ක්‍රමයක් හදුන්වා දීමට රජය සුදානම් වෙයි. ඒ සම්බන්ධයෙන් අවශ්‍ය පියවර ගන්නා ලෙස කාර්මික අපනයන, ආයෝජන ප්‍රවර්ධන, සංචාරක හා ගුවන් සේවා ඇමති ප්‍රසන්න රණතුංග මහතා සංචාරක සංවර්ධන අධිකාරියේ සභාපති කිමාලි ප්‍රනාන්දු මහත්මියට උපදෙස් දුන්නේය.

සංචාරක මාර්ගෝපදේශකයන්ගේ සමාගම් සමග පසුගිය දා (22) පැවති සාකච්ඡාවක දී එම සංගම් නියෝජිතයන් ඇමතිවරයාගෙන් ඉල්ලා සිටියේ  සංචාරක මාර්ගෝපදේශකයන් සදහා නීතිමය ආවරණයක් ලබා දෙන ලෙසයි. කොවිඩ් 19 හෙවත් කොරෝනා වසංගතය මෙරට සංචාරක මාර්ගෝපදේශකයන් තුන්දෙනෙකුට වැළදුණු බවත් ඉන් එක් අයෙකු මිය ගිය බවත් සාකච්ඡාවේ දී අනාවරණය විය.

මේ වන විට දිවයිනපුරා සංචාරක මග පෙන්වන්නන් 5000කට ආසන්න පිරිසක් සංචාරක සංවර්ධන අධිකාරියේ ලියාපදිංචි වී තිබේ. මෙම සංචාරක මගපෙන්වන්නන් සදහා සහන පොළී ණය යෝජනා ක්‍රමයක් ක්‍රියාත්මක කරන ලෙස ද ඔවුහු ඇමති ප්‍රසන්න රණතුංග මහතාගෙන් ඉල්ලා සිටියහ. ඇමතිවරයා මෙහි දී කියා සිටියේ අදාළ ඉල්ලීම සම්බන්ධයෙන් සංචාරක සංවර්ධන අධිකාරිය දැනටමත් අවධානය යොමු කර ඇති බවයි. ඊට අමතරව සංචාරක මාර්ගෝපදේශකයන් සදහා ගෙවනු ලබන දීමනාව දිනකට ඇමෙරිකානු ඩොලර් 35 දක්වා වැඩි කරන ලෙස ද එම නියෝජිතයෝ ඇමතිවරයාගෙන් ඉල්ලා සිටියහ. ඒ සම්බන්ධයෙන් අදාළ අංශ සමග සාකච්ඡා කරන බව ඇමති ප්‍රසන්න රණතුංග මහතා කීවේය.

සංචාරක සංවර්ධන අධිකාරියේ ලියාපදිංචි නොවු සංචාරක මග පෙන්වන්නන් රැසක් සිටින බවත් ඔවුන් සංචාරකයන් සුරා කෑමකට ලක් කරන බවත් එම නියෝජිතයන් ඇමති ප්‍රසන්න රණතුංග මහතාට පෙන්වා දුන්හ. ඇමතිවරයා ඊට ප්‍රතිචාර දක්වමින් කීවේ මෙවැනි සිදුවීම් වැළැක්වීමට ඉදිරි පියවර ගන්නා බවයි. සංචාරක ක්ෂේත්‍රෙය් නියුතු මග පෙන්වන්නන්, රියදුරන් නියාමනය කිරීම සදහා වැඩපිළිවෙලක් ක්‍රියාත්මක කිරීමට ආණ්ඩුව සැලසුම් කළ බවත් කොරෝනා වසංගතය හේතුවෙන් එය ක්‍රියාත්මක කිරීම ප්‍රමාද වු බවත් පැවසු ඇමතිවරයා සංචාරක ක්ෂේත්‍රයේ යථා තත්ත්වයට පත් වූ වහාම එම වැඩසටහන නැවත ආරම්භ කිරීමට අපේක්ෂා කරන බව ද කීවේය.

සංචාරක අමාත්‍යාංශයේ අතිරේක ලේකම් වරුණ සමරසේකර, සංචාරක සංවර්ධන අධිකාරියේ සභාපති කිමාලි ප්‍රනාන්දු, අධ්‍යක්ෂක ජෙනරාල් ධම්මික විජයරත්න යන මහත්ම මහත්මීහු ද මේ අවස්ථාවට එක් වූහ.

හිටපු ජනාධිපති මෛත්‍රීපාල සිරිසේන මහතාගේ සොහොයුරා වන ඩඩ්ලි සිරිසේන මහතාට අයත් ‘අරලිය‘ සහ හිටපු  හිටපු පාර්ලිමේන්තු මන්ත‍්‍රි සිරිපාල ගම්ලත් මහතාට අයත් ‘නිපුන‘ නිව්රත්න සහ ලක් සහල් ඇතුළු පොළොන්නරුව දිස්ත්‍රික්කය තුළ පවත්වා ගෙන යන ප‍්‍රධාන සහ මධ්‍ය පරිමාණ වී මොල් අටක් පාරිභෝගික කටයුතු පිළිබද අධිකාරියේ සභාපති විශ්‍රාමික මේජර් ජෙනරාල් ශාන්ත දිසානායක මහතා ඇතුළු නිලධාරින්  50 දෙනෙකුගෙන් යුත් කණ්ඩායමක් විසින් අද (23) සවස හදිසි වැටලීමකට ලක් කර ඇත.

මෙම වැටලීම සදහා කොළඹ, පොළොන්නරුව, ගම්පහ, කුරුණැගල , නුවර අනුරාධපුර යන දිස්ත‍්‍රික්කවල පාරිභෝගික සේවා අධිකාරියේ  නිලධාරින්ද සහභාගී වූ බව වාර්තා වේ.

මෙම පරීක්ෂාවෙන් පසු මාධ්‍ය හමුවේ අදහස් දැක්වූ පාරිභෝගික කටයුතු පිළිබද අධිකාරියේ සභාපති විශ්‍රාමික මේජර් ජෙනරාල් ශාන්ත දිසානායක මහතා සදහන් කළේ රජය පනවා තිබෙන පාලන මිලට ඉදිරියේදි සම්බා සහ නාඩු සහල් කොන්දේසි විරහිතව වෙළද පොළටට ලබා දිමට වී මෝල් හිමිකරුවන් සිය එකගත්වය පළ කළ බවයි.

වැඩි දුරටත් අදහස් දැක්වූ ශාන්ත දිසානායක මහතා,

 මේක සැලසුම් සහගතව කළ හදිසි වැටලීමක්. මේක ජනතාව බොහොම අසීරුතාවට පත්ව සිටින අවස්ථාවක්. ඒ නිසා වෙළෙදපොළ තුළ කෘත්‍රීම සහල් හිගයක් නිර්මාණය කර අධික ලාබයක් ඉපයීමට මහා පරිමාණ මෝල් හිමියන්ට කිසිසේත් ඉඩ දිය නොහැකියි. ඒ නිසා මෙම පරික්ෂාවේදි අපි වී සහ සහල් තොග පිලිබදවත් එවායේ නිෂ්පාදන ධාරිතාවයන් මෙන්ම දැනට ඒ ඒ වී මෝල් වල රැස් කර තිබේන වී සහ සහල්  කොතරම් තිබේද යන්න විශේෂ පරීක්ෂාවට ලක් කළා‘

 මෙහිදී පාරිභෝගික සේවා අධිකාරියේ සභාපතිවරයා සදහන් කළේ ඉදිරියේදි දිවයින පුරා ඇති සහල් මෝල් වැටලීමට ලක්කර වෙළද පොළට නිකුත් නොකර අනවශ්‍ය ලෙස වී රැස්කර ගෙන සිටින මෝල් හිමියන් අත්අඩංගුවට ගෙන නඩු පැවරීමට කටයුතු කරන බවයි.
 
‘ජනතාව ආර්ථික අතින් අපහසුවට පත්ව සිටින මොහොතක වී හෝ සහල් සගවා තබා ගෙන වෙළෙදපොළේ සහල් හිගයක් මවාපැමට අපි කිසිසේත් ඉඩ දෙන්නේ නැහැ. පොළොන්නරුව දිස්ත‍්‍රික්කයේ ප‍්‍රධාන වී මොල්වල රැස්කර තිබෙන වී ඉතා කඩිනමින් සහල් බවට පත්කර වෙළෙද පොළට නිකුත් කරන ලෙස මම මෝල් හිමියන්ට උපදෙස් දුන්නා. ඔවුන් එයට එකගත්වය පළ කළා. ඒ වගේම තමයි ඉදිරියේදී කිසිදු හිගයකින් තොරව ජනතාවට අවශ්‍ය සහල් රජයේ පාලන මිලට ලබා දිමට අපිට කළ හැකි උපරිම කාර්ය අපි ඉටුකරනවා‘

ඩඩ්ලි සිරිසේන ඇතුළු දේශපාලන හා ව්‍යාපාරික බලවතුන්ගේ සහල් මෝල් වැටලීමට පියවර ගැනීම පිළිබදව අප සමග අදහස් දැක්වූ බොහෝ දෙනෙක් සිය සතුට පළ කළ අතර ඔවුන් සදහන් කළේ සහල් මාෆියාවට එරෙහිව ක්‍රියාත්මක වීමට තිබුණේ නොවැම්බර් 18 වැනිදා සිට බවයි.

අද (23) දින කොවිඩ්-19 ආසාදිතයින් 17 දෙනකු වාර්තා වූ බව සෞඛ්‍ය ප්‍රවර්ධන කාර්යාංශයේ නිල වෙබ් අඩවිය ප.ව 17.05ට සිදුකළ යාවත්කාලීන කිරීම්වල සදහන් වේ. එහි දැක්වෙන්නේ අද දිනය වන විට ශ්‍රී ලංකාවේ කොවිඩ්-19 ආසාදිතයින් මුළු සංඛ්‍යාව 1085ක් බවයි.

ඒ අනුව ප්‍රතිකාර ලබන රෝගීන් සංඛ්‍යාව 416ක් වන අතර දැනට රෝහල්වල අධීක්ෂණය යටතේ සිටින පුද්ගලයින් සංඛ්‍යාව 101ක්. සුවය ලබා පිටව ගිය පුද්ගලයින් සංඛ්‍යාව 660ක් බවයි එහි වැඩි දුරටත් සදහන් වන්නේ.

අද (23) පෙරවරුවේ සුහද දුරකථන සංවාදයක නිරත වූ ජනාධිපති ගෝඨාභය රාජපක්ෂ මහතා සහ ඉන්දීය අග්‍රාමාත්‍ය නරේන්ද්‍ර මෝදි මහතා දෙරට අතර සෑම ආකාරයකම සබඳතා කොවිඩ් අර්බුදය හමුවේ තවත් වර්ධනය කර ගැනීමට එකඟත්වය පළ කළහ.

ජනාධිපති කාර්යාලයේ සිට ඉන්දීය නායකයා සමග කතා කළ ජනාධිපති රාජපක්ෂ මහතා අන්‍යෝන්‍ය වැදගත්කමක් සහිත විෂයයන් ගැන අදහස් හුවමාරුවට අවස්ථාව ලැබීම පිළිබඳව සතුට පළ කරමින් වත්මන් දුෂ්කර අවධියේ ශ්‍රී ලංකාවට කළ උපකාර සම්බන්ධයෙන් මෝදී මහතාට සහ ඉන්දීය ජනතාවට කෘතඥතාව පුද කළේය.

ඉන්දියාව ප්‍රදානය කළ ටොන් 10ක වෛද්‍යාධාර බෙහෙවින් ප්‍රයෝජනවත් වූ බව ජනපතිවරයා පැවසීය.

“ඉන්දියාව කොවිඩ් 19 වසංගතය මනාව පාලනය කර ඇති බව මට විශ්වාසයි. ඒ සඳහා ඔබතුමා ගත් උත්සාහයට විශේෂයෙන් අඩු වරප්‍රසාද සහිත කණ්ඩායම් සඳහා හඳුන්වාදුන් ආර්ථික සහන සමූහයට මගේ ප්‍රසාදය. ශ්‍රී ලංකාවේ අපත් රෝග ව්‍යාප්තිය සතුටුදායක ලෙස පාලනය කිරීමට සමත් වී සිටිනවා” ජනාධිපතිවරයා කීය.

ඉන්දීය අගමැතිතුමා ඊට ප්‍රතිචාර වශයෙන් සඳහන් කළේ කෝටි 130ක ජනගහණයක් හසුරුවා ගැනීම දුෂ්කර වුවත් වසංගත ව්‍යාප්තිය 75%  කින් පමණ මර්දනයට හැකි වූ බවයි.

තමා ජනාධිපති රාජපක්ෂ මහතාව හඳුනාගෙන ඇත්තේ “නිරවුල් චින්තනයක් සහිත ඉක්මණින් දුෂ්කර තීරණ ගැනීමේ හැකියාව ඇති නායකයකු” ලෙස බව මෝදී  සඳහන් කළේය.

“මට තිබෙන තොරතුරු අනුව ශ්‍රි ලංකාව වසංගතය හොදින් පාලනය කර ගැනීමට සමත්ව තිබෙනවා. එහි ගෞරවය හිමි වන්නේ ඔබතුමාට” ඉන්දීය නායකයා පැවසීය.

දැන් තම ප්‍රමුඛතාව ආර්ථික පුනරුදය බව කී රාජපක්ෂ මහතා ප්‍රධාන පෙළේ ව්‍යාපෘති කිහිපයක් නැවත පණ ගැන්වීමට ඉන්දියාවේ සහයෝගය අපේක්ෂා කරන බව ප්‍රකාශ කළේය. කොළඹ වරායේ නැගෙනහිර පර්යන්තය කඩිනමින් ඉදිකිරීම ඉන් එකකි. අගය එකතු කළ කාර්මික සහ කෘෂිකාර්මික නිෂ්පාදන ප්‍රවර්ධනය තවත් අරමුණකි. මේ ක්ෂේත්‍රවල ආයෝජනය කරන මෙන් ඉන්දීය ව්‍යාපාරිකයන් සහ දැනටමත් ශ්‍රි ලංකාවේ සිටින ඉන්දීය සමාගම් දිරි ගැන්විය හැකිනම්  පශ්චාත් කොරෝනා අවධියේ අර්ථික පුනරුදයට පිටිවහලක් බව ජනපතිවරයා පැවසීය.

දෙරට අතර ක්‍රියාත්මක මූල්‍ය පහසුකම් හුවමාරු වැඩසටහන තවත් පුළුල් කිරීමට ජනාධිපතිවරයා යෝජනා කළේය. සාක් හුවමාරු පහසුව යටතේ ප්‍රදානය කර ඇති ඩොලර් මිලියන 400ට ඩොලර් බිලියන 1.1ක මුදලක් එකතු කිරීමට ඉන්දීය ආණ්ඩුව එකඟනම් එය විදේශ විනිමය ගැටලු කළමනාකරණයට විශාල ආධාරයක් බව එතුමා පෙන්වා දුන්නේය.

“ ශ්‍රී ලංකාවට උදව් කිරීමට මම පෞද්ගලිකවම කැපවී සිටිනවා. ශ්‍රී ලංකාවට වාසිදායක කොන්දේසි යටතේ සහය වෙන්න අප සූදානම්. ඒ සඳහා කොළඹ ඉන්දීය මහ කොමසාරිස් සමග වැඩ කිරීමට, සුදුසු නියෝජිතයෙක් පත් කරන්න” මෝදි  පිළිතුරු වශයෙන් කීය.

දැනටමත් ගොඩනැගී ඇති ද්විපාර්ශ්වික හවුල්කාරිත්වය ජනතාවට ඝෘජු ප්‍රතිලාභ අත්වන සහ ආහාර හා සෞඛ්‍ය සුරක්ෂිතතාව ප්‍රමුඛතාව කොටගත් ව්‍යාපෘති ලෙස ඉදිරියට ගෙන යාමට නායකයෝ දෙදෙනා එකඟත්වය පළ කළහ.