2017 නොවැම්බර් 06 වන දින දිනමිණ පුවත්පතෙහි ජ්යෙෂ්ඨ පුරවැසියන් වෙනුවෙන් “වැඩිහිටි සමිති” සැඳෑ සමයට යෝධ ශක්තියක් ශිර්ෂය යටතේ පළවී තිබූ ලිපිය වයස්ගත සිරුකරුවකු වන මගේ විශේෂ අවධානයට ලක්විය.
වයස්ගත වූ අයකුට, තිබෙන පහසුකම් ඇතුලු වටිනා කරුණු ගණනාවක් එමගින් මගේ අවධානයට ලක් වූ අතර එම ලිපිය පළකිරීම පිළිබඳ වැඩිහිටි සිරකරුවකු ලෙස සියලු වැඩිහිටි සිරකරුවන්ගේ ස්තුතිය පුද කරමි.
වසර 2000 අංක 09 දරණ වැඩිහිටියන්ගේ අයිතිවාසිකම් ආරක්ෂා කිරීමේ පාර්ලිමේන්තු පනත අනුව මෙම ජාතික සභාවේ ප්රධාන කාර්යය වනුයේ ශ්රී ලංකාවේ සිටින වයස අවු.60ට වැඩි වැඩිහිටියන්ගේ අයිතිවාසිකම් ආරක්ෂා කිරීම සහ ප්රවර්ධනය කිරීමත්, වැඩිහිටි තැනැත්තන්ට ආත්මගෞරවයෙන් ස්වාධීනත්වයක් හා ගෞරවයක් ඇතිව ජීවත්වීමට අවස්ථාව සලසාදීමත්ය.
ශ්රී ලංකාව තුළ ජීවත්වන, ජ්යෙෂ්ඨ පුරවැසියන්ට ඒ ඒ සමිති සමාගම් රජයෙන් සහ කොතෙකුත් පෞද්ගලික ආයතනවලින් උපකාර ආධාර ලැබුණත් සිරගතව සිටින වයස්ගත ඉතා සුළු පිරිසට සහනයක් ගෞරවයක් ඇතිව ජීවත්වීමට අවස්ථාවක් තිබේද යන්න සිරගතව සිටින පවුල්වල අය මිස කිසිවකු නොදන්නා කරුණකි.
ඉහත පිරිස බොහෝ දුක් කරදර ලෙඩ රෝග මැද දූ දරුවන් බිරිඳ, පවුලේ අය නොමැතිව අන්ත අසරණව සිරගෙදර තුළ ජීවත් වෙති. ඔවුනට විශේෂ සහනයක් සිර ගෙදර තුළ නොමැත. අසනීපයෙන් පෙළෙන සිරකරුවන්ට වැඩක් පළක් නොකර තම නවාතැන් ස්ථානයේ සිටීමට බන්ධනාගාර පරිපාලනය ඉඩ සලසා ඇත. වයස්ගත අයවලුන් වෙනුවෙන් බන්ධනාගාර නිලධාරින්ට, වෙනත් කළ හැකි දෙයක්ද නොමැති බව අප ප්රකාශ කළ යුතුය. මනුෂ්යත්වය අඳුරන තරුණ සිරකරුවන්ද සමහර අවස්ථාවලදී වයස්ගත සිරකරුවන්ට උපකාර කරති.
සාමාන්ය සිර දඬුවම් විඳින වයස 60 ඉක්ම වූ සිරකරුවන් මෙන්ම අවුරුදු ගණනාවක් (අවු. 12, 15, 18, 20) වැනි කාලයක් සිර දඬුවම් විඳින වයස 60 ඉක්ම වූ ජීවිතාන්ත සිරකරුවෝද සිටිති. වසර ගණනාවක් සිර දඬුවම් විඳින ජීවිතාන්ත දඬුවම් නියම වූ වයස අඩු පිරිසක්ද සිටිති. මෙම පිරිසට නිවෙස්වලට යාමට නියමිත නිශ්චිත දිනයක් නොමැත.
2015 වසරේ ජනවාරි 8 වන දින යහපාලන රජය බලයට පත්වූ පසු අතිගරු ජනාධිපතිතුමන් අවස්ථා 9 කදී ජනාධිපති පොදු සමාව ප්රදානය කර තිබේ. 2017 මේ දක්වා මෙම සමා තුළින් ජ්යෙෂ්ඨ පුරවැසි ගණයට අයත් කිසිම සිරකරුවකුට නිකුත් කරන ලද චක්රලේඛයේ කොන්දේසි මත නිදහස ලබාගැනීමට අවස්ථාවක් උදානොවූ බව සිරකරුවකු ලෙස මා වගකීමෙන් ප්රකාශ කරමි.
මෙහිදි මුල් සමා දෙකෙන් වයස 75 ඉක්ම වූ සිරකරුවන් වෙනුවෙන් සමාව ලබා දුන් එම අවස්ථාව කිසිවකුට හිමිවූයේ නැත.
ඉන්පසු අවස්ථා 7ක් වයස 70 ක් වූ සිරකරුවන් වෙනුවෙන් සමාව ප්රදානය කරන ලද මුත්, එම සිරකරුවන් වසර 10 ක් සිර දඬුවම් සම්පූර්ණ කිරීම අනිවාර්ය කරන ලදී. ඒ අතරම එක් දඬුවමකට පමණක් එම සමාව හිමිවූ අතර නඩු කිහිපයක් ඇති කෙනෙකුට එම සමාව අයත් වූයේ නැත.
2002 සහ 2008 වසර තුළදී ජීවිතාන්ත සිරකරුවන්ට ජීවිත සමාව (20 අවුරුදු කාලය) ලබාදී පිරිසක් නිදහස් කරනු ලැබිණි. 2008 වසරේ සිට මේ දක්වා ජීවිත සමාව ලබානොදුන් හෙයින් වසර ගණනාවක් සිර දඬුවම් විඳින ජීවිතාන්ත සිරකරුවනට සහනයක් නොලැබුණි. වයස්ගත ජීවිතාන්ත සිරකරුවන් පිරිසක් හිරගෙදර තුළදී මිය ගියහ. මේ ආකාරයටම වයස්ගත වූ සාමාන්ය සිරකරුවන් ගණනාවක්ද මිය ගිය බව දන්වා සිටිමි.
වයස්ගත කාලයේදී බෙහෙත්හේත්වලට වඩා දරු පවුල්වල සෙනෙහස මධ්යයේ මේ පිරිස් ජීවත්වන්නේ නම් මොවුන්ට වැඩි කාලයක් ජීවත්වීමට අවස්ථාව සැලසෙනු ඇත. ඒ නිසා මොවුන් ජීවත්ව සිටියදී යම් කොන්දේසි මාලාවකට යටත් කර හෝ විශේෂ ජනාධිපති සමාවක් මත නිදහස් කර දරු පවුල් වෙත යැවීමට කටයුතු කරන්නේ නම් එය ඉතා අගනා වැඩිහිටි සැලකිල්ලක් වනු ඇත. මේ පිරිස අතර ඈත දුර පළාත්වල සිරකරුවන්ද සිටිති. ඔවුන් මියයාමෙන් පසු පවුල්වල අයට ආර්ථික හේතු නිසා මළමිනිය හෝ නිවෙස්වලට ගෙන යාමට නොහැකි වූ අවස්ථා තිබේ. මෙම නඩයට පිහිටක් පතා අතිගරු ජනාධිපතිතුමාණන් ගරු අග්රාමාත්යතුමාත් ජ්යෙෂ්ඨ පුරවැසි සිරකරුවන්ට විශේෂ වැඩපිළිවෙළක් සකස් කිරීමට කටයුතු කර දෙන ලෙස සියලු සිරකරුවන් වෙනුවෙන් ගෞරවයෙන් ඉල්ලා සිටිමි. මෙහිදී මතක් කළ යුතු විශේෂ කරුණක් ඇත. අධිකරණයකින් දඬුවම් කරන ලද කෙනෙකුට රඳවා තබා ගැනීම, බන්ධනාගාර දෙපාර්තමේන්තුවට අයත් කාර්යයක් වන අතරම යම් කාල පරාසයක් තුළ ඔවුන් පුනරුත්ථාපනය කර සමාජගත කිරීම ඔවුන්ගේ වගකීම වේ.
සිරකරුවකු ලෙස මා විශේෂ කරුණක් මෙහිදී මතක් කළ යුතුය. සිරකරුවකුගේ පුනරුත්ථාපන කාල පරාසය කුමක්දැයි කිසිම සිරකරුවකු නොදනිති. වයස 60 වැඩි සිරකරුවන් වසර 10, 15, 20 කාලසීමාවක් තුළ පුනරුත්ථාපනය කරන්නේ නම් ඔවුන්ගේ මළසිරුරු ඔවුන්ගේ භාරකරුවන්ට දීමට හැකියාව ලැබෙනු ඇත.
වසර 27 ක් සිරදඬුවම් විඳි ‘නෙල්සන් මැන්ඩෙලා’ මැතිතුමන් සිර දඬුවමින් නිදහස් වූ පසු පොදු රාජ්ය මණ්ඩල රටවලින් කරන ලද ඉල්ලීමක් සම්මත කර ඇති අතර සිර දඬුවම් විඳින සිරකරුවන්ට ඒ මත සහන සැලසේ. මෙය “මැන්ඩෙලා නීතිය” (MANDELA RULES) නමින් පිළිගනු ලැබේ. (UNITED NATIONS MINIMUM INTERNATIONAL STANDARDS FOR TREINMENI OF PRISONER’S) මත සිරකරුවන්ට කටයුතු කළ යුතුය.
කැබිනෙට්ටුව මගින් පත්කරන ලද විශේෂ කොමිටිය මගින් වසරේ ඉදිරිපත් කරන ලද වාර්තාවට අනුව ප්රකාශ කර සිටියේ මැන්ඩෙලා නීතිය (MANDELA RULES) ක්රියාත්මක විය යුතු බවයි. මෙම වාර්තාව අමාත්ය ගයන්ත කරුණාතිලක මැතිතුමන්ට, 2016 වසරේ කොමිටිය විසින් ඉදිරිපත් කරන ලද නමුත්, එම වාර්තාවට සිදුවූයේ කුමක්ද යන්න මේ දක්වා කිසිදු සිරකරුවකු නොදනිති. බන්ධනාගාර තදබදය වෙනුවෙන් පත් කළ මෙම කොමිටියේ සිරකරුවන්ට සහන සැලසීමට යෝජනා ගණනාවක් ඉදිරිපත් කර තිබුණි. නමුත් මේ දක්වා එම යෝජනා ක්රියාත්මක නොවීය.
කිසිදු රටක සිරකරුවන් මරණය දක්වා පුනරුත්ථාපනය නොකරන ලද අතර, සාධාරණ සිර දඬුවමක් ගත කළ පසු ඔවුන්ට නිදහස්වීමට අවස්ථාව උදාවෙනු ඇත. පොදු රාජ්ය මණ්ඩල රටවල් මෙම නීතියට එකඟවන අතර පොදු රාජ්ය මණ්ඩලයට අයිති ශ්රී ලංකාව තුළද මෙම නීති ක්රියාත්මක විය යුතුය. මෙහිදී පොදු නීති තලයට වයස්ගත පිරිස පත්නොකර ඔවුන්ට වෙනස් වූ ලිහිල් සහනදායි නිදහස් ක්රමයක් සකස් කිරීමට නිසි බලධාරින්ගේ අවධානය යොමුවේවායි ප්රාර්ථනා කරමි.
වයස්ගත සිරකරුවන්ට අනෙක් සාමාන්ය සිරකරුවන්ගේ ක්රමවේදය අනුගමනය නොකර සහනදායි ක්රමයක් මත නිවාස නිවාඩු යාම හෝ බලපත්ර මණ්ඩලයකින් නිදහස් කිරීම හෝ කරන්නේ නම් එය වැඩිහිටි ජ්යෙෂ්ඨ පුරවැසියනට සිරකරුවන්ට කරන උපරිම වූ උපකාරයක් වනු ඇත.
ජාත්යන්තර වැඩිහිටි දිනය සමරන ඔක්තෝබර් 01 වෙනිදා හෝ ශ්රී ලංකාවේ නොයෙකුත් වැඩසටහන් ක්රියාත්මක වන නමුත්, සිර ගෙදරද මෙවැනි සුළු පිරිසක් සිටින බව ශ්රී ලංකාවාසී කිසිවෙකුටත් මතක් නොවේ. සමාජ සවිබල ගැන්වීමේ අමාත්යාංශයට හෝ මේ පිරිස ගැන කිසිදු අවබෝධයක් නැති බව මගේ විශ්වාසයයි. බුදුදහමින් සහ බෞද්ධ සාරධර්ම තුළින් සමාජයේ ප්රමුඛස්ථානයක් වැඩිහිටියාට ලැබී ඇත. වැඩිහිටියන්ට ගරු කිරීම, වැඩිහිටියන්ට සැලකීම මෙන්ම වැඩිහිටි අණ පිළිපැදීම යනාදී වශයෙන් වැඩිහිටියන් පිළිබඳ යහපත් සමාජ සංකල්පයන්වලින් හෙබි සාරධර්ම පද්ධතියක් බිහිව ඇත්තේද එහි අනිවාර්ය ප්රතිඵලයක් ලෙසිනි.
උපරිම මානසික වේදනා දුක් මත ජීවත්වන සිරගෙදර සිටින සුළු ජ්යෙෂ්ඨ පුරවැසියන්ට සියලුදෙනාගේ අනුකම්පාව මත උපරිම සහනයක් ලබාදේවි යයි සිතමි.මේ පිරිසට සහයෝගය සහ නිදහස ලබාදිය හැක්කේ අතිගරු ජනාධිපතිතුමන්ට පමණක් බවද මා දන්නා කරුණකි.
[rns_reactions]
