සාරධර්ම පිරිහෙමින් පවතින වර්තමාන සමාජයේ බොහෝ මිනිසුන් හැසිරෙන්නේ තිරිසනුන් ලෙසින්ය. ඈත අතීතයේ සිටම සමාජයට ආදර්ශයක් වෙමින් ජීවත්වූ කාන්තාවන් පවා දැන් සම්පූර්ණයෙන්ම වෙනස් වී තිබේ. වර්තමානය වන විට සමහර ස්ත්රීහු කිසිදු හිරිකිතයකින් තොරව සමාජ විරෝධී ක්රියාවල නියෑළෙති. මෙම කතාව එයට කදිම තවත් එක් උදාහරණයකි.
පාරිභෝගිකයන්ගේ විශ්වාසය දිනාගෙන පවත්වාගෙන යන මෙම මූල්ය සමාගම ආරම්භ කළේ දැනට දශක තුනකට පමණ ඉහතදීය. මහනුවර සහ තදාසන්න නගර කිහිපයක මෙම මූල්ය සමාගමට අයත් ශාඛා අටක් පිහිටා තිබෙන අතර සේවක සේවිකාවෝ පනහක් පමණ එහි සේවය කරති.
මෙම කතාවට අදාළ සිදුවීම සිදුවන්නේ ඉහත සඳහන් කළ මූල්ය ආයතනයේ මහනුවර රජ වීදිය සහ මහනුවර කොටුගොඩැල්ල ශාඛා දෙක අතරයි. මෙම ශාඛා දෙක අතර පරතරය මීටර් තුන්සියයක් පමණි. තරුණියෝ හය දෙනකු සමඟ පිරිමි කිහිප දෙනකු ඒවායේ සේවය කරති.
රජ වීදියේ පිහිටා ඇති ශාඛාවේ කළමනාකාරිය වශයෙන් කටයුතු කරන්නේ තමරා කුමාරි හේරත්ය. ඇය වැලිගල්ල, උඩ අලදෙණිය ප්රදේශයේ පදිංචිකාරියකි. මෙයට අමතරව නිලුකා ප්රියදර්ශනී, ශානිකා මධුෂානි, අචිනි ඉරේෂා සහ ලක්මිණි උමේෂා යන තරුණියෝ එම ශාඛාවල සේවය කරති.
මහනුවර කෙන්ගල්ල, ඇස්වලපිටිය ප්රදේශයේ පදිංචි සෙල්වරාස් රමේෂ් දෙමළ ජාතිකයෙකි. සුළුවෙන් රන් ආභරණ විකිණීමේ ව්යාපාරයක නිරත වී සිටින ඔහු වසර ගණනක සිට ඉහත සඳහන් කළ මූල්ය ආයතනයේ ගනුදෙනුකරුවෙකි. මුදල් අවශ්යතාවක් පැන නැගුණු සෑම මොහොතකම ඔහු රජ වීදිය සහ කොටුගොඩැල්ල ශාඛා දෙකෙන් එකකට ගොස් රන් ආභරණ උකස් තියා මුදල් ලබා ගත්තේය.
එලෙස කලක සිට රමේෂ් එම මූල්ය ආයතනයේ ගනුදෙනු කරන හෙයින් තමරා ඇතුළු අනික් තරුණියන් ඔහු සමඟ ඉතා සමීප මිත්රත්වයක් ඇති කරගත්හ. රමේෂ් කලක් යද්දි ඔහුගේ පෞද්ගලික ප්රශ්න පවා එම තරුණියන්ට පැවසුවේය. ඒ ආකාරයෙන් එන්න එන්නම ඔවුනොවුන් අතර ලොකු මිත්රත්වයක් ඇති වූහ.
දිසානායක නමැති කාන්තාව මහනුවර ප්රදේශයේ පදිංචිකාරියකි. කතාවෙන් අනෙක් මිනිසුන් රැවටීමට ඇය තරම් දක්ෂ කෙනෙක් මහනුවර පළාතේ නොසිටියේය. කා සමඟත් සුහදව කතා බස් කරන ඇය ලොවට පෙන්වූයේ ඉතාමත් අවිහිංසක චරිතයකි. එහෙත් ඇයගේ ඇතුළාන්තය ඊට හාත්පසින්ම වෙනස් වූවකි. ඇය අනුගමනය කළේ උඩින් මිතුරු යටින් හතුරු තියරියයි.
මැදි වයස ඉක්මවූ එම කාන්තාව වසර ගණනක සිට ඉහත සඳහන් කළ මූල්ය ආයතනයේ ගනුදෙනුකාරියකි. කලක් ගතවෙද්දී ඇය රමේෂ් මෙන්ම එම ආයතනයේ තරුණියන් සමඟ දැඩි කුළුපග බවක් ඇති කර ගත්තාය. එය කොතරම් දුරදිග ගියාද කියතහොත් අවසානයේ එම තරුණියන් ඇයට ආමන්ත්රණය කළේ අම්මා යන නමිනි.
විවේක ලද සෑම අවස්ථාවකම දිසානායක නමැති කාන්තාවත්, රමේෂ් නමැති දෙමළ තරුණයාත් එම මූල්ය ආයතන දෙක වෙත පැමිණ තමරා ඇතුළු පිරිස සමඟ අල්ලාප සල්ලාපයේ නිරත වූහ.
තමරා, නිලුකා, ශානිකා, අචිනි සහ ලක්මිණී අන් අයට වඩා ඉහත සඳහන් කළ මූල්ය ආයතන දෙකේ හොඳම යහළුවෝ වූහ. තමන්ට ඇති ආර්ථික අපහසුකම් ආදී සියලු තොරතුරු ඔවුනොවුන් අතර නිතර කතා බස් කෙරුණි.
“හැමදාම මෙහෙම ඉඳලා බැහැ. අපිත් ඉක්මනට ගොඩයන්න කීයක් හරි හොයා ගන්න ඕනා” තමරා දිනක් ශානිකා ඇතුළු පිරිසට පැවසුවේය.
“ඒකනම් ඇත්ත. අපේ වෙඩින්වලටත් ලොකු ගාණක් යනවනේ. ගෙවල්වලට බරක් වෙන්නත් බැහැ.” ලක්මිණී පැවසුවාය.
මෙම තරුණියෝ ඒ වන විට විවාහ වී නොසිටියහ. එමනිසා දිනපතාම ඔවුහු තම විවාහ උත්සවය ගන්නා අයුරු ඒ සඳහා යන වියදම් ආදිය ගැන කතා බස් කළහ. සල්ලි නැතිනම් ජීවිතය වැඩක් නැහැ. කොහොම හරි ඉක්මණට සල්ලි ටිකක් හොයා ගන්න ඕනා. ඔවුහු එලෙස සිතුවෝය.
අවස්ථා කිහිපයකදීම එම තරුණියෝ රහසිගතව හමුවී ඉක්මනින් සල්ලි ඉපැයීමේ මාර්ගයක් කල්පනා කළහ. එහෙත් එය හොඳින් කළ නොහැකි බව ඔවුන්ට වැටහුණි. එමනිසා තමන් සේවය කරන මූල්ය ආයතනයෙන් මුදල් වංචා කිරීමට ඔවුහු තීරණය කළහ.
තරුණියෝ පස්දෙනා එම අදහස රමේෂ්ට සහ දිසානායක නමැති කාන්තාවට පැවසූහ. ඔවුන් දෙදෙනාද එය හොඳ අදහසක් බවත්, පුළුවන් අයුරින් එයට උදව් කරන බවටත් පොරොන්දු වූහ. ඒ අනුව ඔවුන් සියලු දෙනා එකතු වී එම මූල්ය ආයතනයේ මහනුවර ශාඛා දෙකෙන් මුදල් වංචා කිරීමට සැලසුම් කළහ.
තරුණියන්ගේ සැලසුම වී තිබුණේ ගනුදෙනු කරුවන්ගෙන් රන් භාණ්ඩ උකස් ගත් බවට බොරු ලියකියවිලි මූල්ය ආයතනයට ඉදිරිපත් කර මුදල් ලබා ගැනීමයි. ඒ අනුව මහනුවර රජ වීදියේ සහ මහනුවර කොටුගොඩැල්ල වීදියේ ශාඛා දෙකෙන් බොරු ලියකියවිලි ඉදිරිපත් කර එම තරුණියෝ මුදල් වංචා කිරීම ආරම්භ කළහ. ඒ සඳහා රමේෂ්ගේ සහ දිසානායක නමැති කාන්තාවගේ පූර්ණ සහයෝගය ලැබුණි.
මාස හයක් පමණ ඇතුළත එම තරුණියෝ කෝටියකට අධික මුදලක් එලෙස වංචා කළහ. ඒ අතර කාලය තුළ එම තරුණියෝ තමන්ගේ පෞද්ගලික ජිවිතයේ සිහින රැසක් ඉටුකර ගත්හ. ඒ සඳහා මූල්ය ආයතනයෙන් වංචා කළ මුදල්ද යොදා ගත්තේය.
රමේෂ්ගේ ඥති හිතවතුන්ගේ නම්වලට පවා එම තරුණියෝ බොරු ලියකියවිලි ඉදිරිපත් කර රන් ආභරණ උකස් කළ ලෙස පෙන්වා මුදල් ලබාගත්හ. දිසානායක නමැති කාන්තාවද එයට නොමඳ සහායක් ලබා දුන්නාය.
දිනක් එම මූල්ය ආයතනයේ ප්රධාන කාර්යාලය, මහනුවර රජ වීදියේ සහ කොටුගොඩැල්ල ශාඛා දෙකේ ගිණුම් සහ උකස්පත්, රන් ආභරණ ආදිය පරීක්ෂා කරන බව දැන්නුවේය. රජ වීදියේ කළමනාකාරිය ලෙස සේවය කළ තමරා කුමාරි එක්වරම එයට අකමැති වූවාය. ඇය පැවසුවේ තම ශාඛාවේ සේවය කරන අය අසනීප වී ඇති බැවින් පසු දිනක පැමිණෙන ලෙසයි.
එම මූල්ය ආයතනයේ කළමනාකාර අධ්යක්ෂිකාව වන ප්රියදර්ශනී දැඩිගමට තමරාගේ එම කියමන පිළිබඳ විශාල ගැටලුවක් ඇතිවිය. එම ශාඛාවේ කුමන හෝ ගැටලුවක් ඇති බව ඇයට ඉවෙන් මෙන් අවබෝධ වූවාය. ඒ අනුව ඇය ප්රධාන කාර්යාලයේ කළමනාකාරියක වන ප්රතිශාට එම ශාඛාවේ සීසීටීවී කැමරා පරීක්ෂා කරන ලෙස පැවසුවාය. කළමනාකාර අධ්යක්ෂිකාවගේ නියෝගයට අනුව ප්රතිශා එම ශාඛාවේ පසුගිය සති කිහිපයක සීසීටීවී රූප රාමු පරීක්ෂා කළාය. එහිදී දැකගන්නට ලැබුණේ අවස්ථා කිහිපයකදී එම තරුණියන් පපුව තුළ සඟවාගෙන එන යම් දෙයක් හොර රහසේ ආරක්ෂක සේප්පුව තුළ දමන බවයි. ප්රතිශා ඒ බව එම මූල්ය ආයතනයේ කළමනාකාරිත්වයට දැන්නුවාය.
ඒ අනුව ක්රියාත්මක වූ එම මූල්ය සමාගමේ කළමනාකාර අධ්යක්ෂතුමිය අතුළු ඉහළ නිලධාරීහු පිරිසක් රජ වීදියේ එම ශාඛාව පරීක්ෂාවට ලක් කළහ. එහිදී රන් ආභරණ නොමැතිව උකස් පත්රිකාව පමණක් තිබෙන ලියකියවිලි රැසක් ඔවුනට හමුවූහ. ඒ පිළිබඳව තමරා නමැති තරුණියගෙන් විමසීමේදී ඇය නොයෙක් බොරු පැවසීමට තැත් කළාය.
එම ශාඛාවේ සියලු දෙනා රැගෙන විත් ප්රශ්න කිරීමේදී මෙතෙක් කල් සිදුකළ නීති විරෝධී ක්රියාව පිළිබඳ අකුරක් නෑර ඔවුහු පැවසූහ.
ඒ අනුව එම තරුණියෝ පස්දෙනා රමේෂ් සහ දිසානායක නමැති කාන්තාවගේ සහයෝගයෙන් එම මූල්ය වංචාවන් සිදුකර තිබුණේ මෙලෙසින්ය.
එම මූල්ය සමාගමේ මහනුවර රජ වීදියේ සහ කොටුගොඩැල්ල ශාඛා එක ළඟ පිහිටා තිබුණි. මෙම සැකකාර තරුණියෝ එම ශාඛා දෙකේම සේවය කළ අතර ප්රධාන ශාඛාවෙන් විගණනය සඳහා පැමිණෙන විට එක් ශාඛාවකින් අනෙක් ශාඛාවට හොර ලියකියවිලිවල සඳහන් ආකාරයට රන් ආභරණ ගෙනත් පෙන්වති. අනෙක් ශාඛාව විගණනය කරන විටදී එලෙසම සිදු කරති.
එලෙස එම තරුණියෝ මාස ගණනක් ඇතුළත රුපියල් කෝටියකට ආසන්න මුදලක් වංචා කළේ කිසිදු බියක් සැකක් නොමැතිවයි. මූල්ය සමාගමේ ප්රධාන කාර්යාලයෙන් එම ශාඛා දෙකම එකම දිනයක විගණනය කිරීමට සූදානම් වූ නිසා කලක සිට ඉතා සූක්ෂම අයුරින් සිදු කරගෙන ගිය මෙම මූල්ය වංචාව හසුකර ගැනීමට හැකිවිය.
පසුව එම මූල්ය සමාගමේ කළමනාකාරිත්වය විසින් අපරාධ පරීක්ෂණ දෙපාර්තමේන්තුවට මේ පිළිබඳව පැමිණිලි කළහ. ඒ අනුව සැකකාර තරුණියන් පස්දෙනා අත්අඩංගුවට ගෙන අධිකරණයට ඉදිරිපත් කළේය. ඒ අනුව මහෙස්ත්රාත්වරයා ඔවුන්ව රක්ෂිත බන්ධනාගාරගත කරන ලෙස නියෝග කළේය.
මුදල්වලට කෑදරකමින්, දුරදිග කල්පනා නොකර නීති විරෝධී අයුරින් සල්ලි ඉපැයීමට ගිය එම තරුණියෝ පස්දෙනාට අවසානයේ සිදු වූයේ එලෙස රක්ෂිත බන්ධනාගාරගත වන්නටය.
[rns_reactions]
.jpg)