– වින්ස්ටන් චර්චිල්
රාජ්ය පාලකයෝ ප්රජාතන්ත්රවාදයේ ආනුභාවයෙන් ජනතාවගේ කැමැත්ත දිනා බලයට පත්වෙති. එහෙත් කල්ගත වෙත්ම පාලකයෝ තම පැවැත්ම දේශපාලන අන්තේවාසිකයන්ට හා හෙන්චයියන්ට පවරති. හෙංචයියන්ගේ පොදු චර්යාව නම් නායකයා සෙසු ලෝකයෙන් ඈත් කරමින් ජනතාව හා නායකයා අතර යෝධ පවුරක් හෝ ගේට්ටුවක් ලෙස ක්රියා කිරීමයි – බොහෝ විට සිදුවන්නේ දැන හෝ නොදැන අන්තේවාසිකයන් විසින් නායකයා දේශපාලනික සුසාන භූම්ය වෙත දක්කාගෙන යෑමයි. නායකයා හොඳ වුවත් වටේ සිටින උන් නිසා තවදුරටත් ඔහුට සහාය දැක්විය නොහැකි යැයි ජනතාව තීන්දු කරන්නේ එවිටය. ඊට ප්රධාන හේතුව නම් ජනතා නායකයන් තමාට ලැබුණු ජනතා වරම තමන් විසින් හා තම ආධාරකරුවන් අතළොස්සක් විසින් අමු අමුවේ අවභාවිතයට ලක් කිරිමයි” ජනතා සේවය අමතක කර වංචාව හා දුෂණය වෙත යොමු වීමත් ජනතාවට සහන සැලසීම පසෙක ලා ඥාති සංග්රහයටත් හෙංචයියන් සුඛිත මුදිත කිරීමටත් නායකයා යොමුවන්නේ නම් ප්රජාතන්ත්රවාදි පාලන රටාවක් පවතින් රාජ්යයක ඔහුට ඇත්තේ ඉතා අල්ප දේශපාලනික බලාත්මක කාල රාමුවකි”
පසුගිය සිකුරාදා එනම් මාර්තු 31 වෙනිදාට පහන් වුයේ ලෝකය කැලඹිමට පත්කරන පුවතක්ද සමඟිනි. ඒ දුකුණු කොරියාවේ හිටපු ජනාධිපතිනි පාක් ගෙයුන් හේ අත් අඩංගුවට ගෙන රක්ෂිත බන්ධනාගාරගත කිරීමේ පුවතයි. තම බලය අවභාවිතයේ යොදවමින් රාජ්ය කටයුතුවලට අයථා ලෙස මැදිහත් වීමට චෝයි සුන් සිල් නැමති අන්තේවාසිකාවට ඉඩ සලසා දීමත් තම බලතලවලින් කොටසක් ක්රියාත්මක කිරීම රහසේ ඇයට පවරා තිබීමත් යන චෝදනා යටතේ ජනාධිපතිනිය දෝෂාභියෝගයකින් ඉවත් කෙරුණේ පසුගිය වසරේ දෙසැම්බර් 19 වෙනිදායි. එම තින්දුව එරට ව්යවස්ථාදායක අධිකරණය මගින් අනුමත කෙරුණේ මේ මස 10 වෙනිදායි.
ඒ අනුව ජනාධිපතිනිය නිල වශයෙන් පදවියෙන් ඉවත්කරනු ලැබුවාය. ඇයට එරෙහි නිතීමය ක්රියාමාර්ග ඉන් පසු කඩිනම් කෙරුණු අතර 30 වැනි බ්රහස්පතින්දා හිටපු ජනාධිපතිනිය අධිකරණය හමුවේ පෙනී සිටියේ ඇයට එරෙහි අත්අඩංගුවට ගැනීමේ නියෝගය පිළිබඳව දැනුවත් වීමටයි. නඩු විභාගය පැය 9ක් පුරා පැවැත්විණ. අවසානයේ විනිසුරු මඩුල්ල දැනුම් දුන්නේ පාක් ගෙයුන් හේ අත් අඩංගුවට ගැනීම යුක්ති සහගත හා අවශ්ය කරුණක් බවයි. ඇය තමාට එරෙහිව ඇති සාක්ෂි විනාශ කිරීමේ සම්භාවිතාවක් ඇති බැවින් අත් අඩංගුවට ගැනීමේ නියෝගය නිකුත් කළ යුත්තක් බව විනිසුරු මඩුල්ලේ තීරණය විය.
අවසානයේ හිටපු ජනාධිපතිනිය සෝල් අගනුවරට දකුණෙන් පිහිටි රැඳවුම් මධ්යස්ථානයක් වෙත ගෙනයනු ලැබුවේ අධිකරණ කටයුතු ඉදිරියට ගෙනයාම සදහා ඇය රක්ෂිත බන්ධනාගාරගත කිරීමටයි. ඇය දුෂණ අපවාදයක් වෙත යොමුකළ අන්තේවාසිකා චෝයි සුන් සිල් හා අයථා ගනුදෙනු සඳහා ආධාර කළ සැම්සුන් සමාගමේ වැඩ බලන ප්රධානි ලී ජේ යංග් ද රඳවා ඇත්තේද එම රැඳවුම් මධ්යස්ථානයේ වීම විශේෂත්වයකි.
දකුණු කොරියාව යනු ආසියානු කලාපයේ ආර්ථික හා කාර්මික බලවතෙකි. පසුගිය වසර 30ක කාලය සැලකීමේදී එරට ආර්ථිකය සියයට 10ක් තරම් ඉහළ වර්ධන වේගයක් පවත්වාගෙන යාමට සමත් විය. ලොව හතරවැනි ප්රධාන ආර්ථිකයට දැන් හිමිකම් කියන්නේ දකුණු කොරියාවයි.
ආසියාවේ විද්යුත් හා තාක්ෂණික ක්ෂේත්රය තුළ ජපානය හිමිකරගෙන සිටි ස්ථානයට අභියෝග කරන තැනට දැන් දකුණු කොරියාව පත්ව සිටී. ලොව පස්වැනි ප්රධාන අපනයනකරුවා වෙමින් ප්රබල ආර්ථියකයන් 20 ට හිමිකම් කියන ජී 20 කණ්ඩායමේ රටවල් අතර චීනය අමෙරිකාව හා යුරෝපා සංගමය සමඟ නිදහස් වෙළෙඳ ගිවිසුම් පවත්වාගෙන යන එකම රාජ්යය බවට පත්වෙමින් හා වැඩිම නිදහස් වෙළෙඳ ගිවිසුම් පවත්වාගෙන යන ආසියානු රාජ්යය බවට පත්වෙමින්ද දකූණු කොරියාව ආසියානු ආර්ථික ව්යාඝ්රයෙකු බවට පත්ව ඇත්තේ වෙන්ව ගිය උතුරු කොරියාවේ නිරන්තර තර්ජන ගර්ජන කෙනෙහිළිකම් හා යුද අවදානමද මධ්යයේය.
මෙවැනි විස්මිත ආර්ථික ශක්තියක් දකුණු කොරියාව විසින් අත්කරගනු ලැබුවේ දේශපාලනික වශයෙන් දිගුකාලින ස්ථාවරභාවයකින් ද තොරවයි. කුමන්ත්රණ හමුදා පාලන දුෂණ අපවාද නිසා ආණ්ඩු බිඳ වැටිම් හා අකාලයේ ජනාධිපතිවරුන් බලයෙන් පහවිම් ආදී විවිධ දේශපාලනික වියවුල් දකූණු කොරියාවට විරල නොවේ. උදාහරණයක් ලෙස පාක් ගෙයුන් හේ ද ඇතුළු ජනාධිපතිවරුන් තිදෙනෙකු දෝෂාභියෝගවලට ලක්ව ඇත්තේ ලොව වැඩිම දෝෂාභියෝග ඉතිහාසයකටද හිමිකම් කියමිනි.
පාක් ගෙයුන් හේ දකුණු කොරියාවේ ජනාධිපති පදවියට පත් ප්රථම කාන්තාවයි. ඇය පැවත එන්නේ එරට මුල් පෙළේ දේශපාලනික පවුලකිනි.
හිටපු ජනාධිපති පාක් චුන් හී ඇගේ පියායි. 1952 වසරේ උපත ලැබු පාක් ගෙයුන් හේ ජීවිතයේ ප්රථම ඛේදවාචකයට මුහුණ දෙන්නේ 1974 වසරේ උතුරු කොරියානු ඔත්තුකරුවෙකු ඇගේ පියා ඝාතනය කිරීමට තැබු වෙඩි පහරකට ලක්ව මව මියයාමත් සමඟයි. අනතුරුව ඇගේ පියා 1979 වසරේදි ඔහුගේ ඔත්තු සේවා ප්රධානියා අතින් ඝාතනයට ලක්වන්නේය. 1998 වසරේ දේශපාලනයට පිවිස පාර්ලිමේන්තුවට තේරී පත්වීමට පාක් ගෙයුන් හේ සමත් වන්නේ ජනතා අපේක්ෂාවක් ඉටුකරමිනි. ආසියාවේ බොහෝ රාජ්ය නායිකාවන්ට මෙන් ඇයටද දේශපාලනයට අවතීර්ණ වෙද්දි පුළුල් ජනතා අපේකෂා හා සහයෝගය ඇය සමඟ විය.
2006 වසරේ ප්රහාරකයෙකු මැතිවරණ වේදිකාවකදී පාක්ගේ කම්මුල පිහියකින් කපා දමන්නේ ඇය දේශපාලනික දිවියෙන් ඉවත් කිරීමේ අපේක්ෂාවෙනි” පාක් ගෙයුන් හේ දකුණු කොරියාවේ ජනතා බලාපොරොත්තුවක් විය. 2012 වසරේ දෙසැම්බර් මස පැවති ජනාධිපතිවරණයෙන් පාක් බලයට පත්වන්නේ එම ජනතා අපේක්ෂාවන් මුදුන් පමුණුවාලීමක් ලෙසිනි” අස්ථාවර දේශපාලනික රටාව තුළ දකුණු කොරියාවේ ඉදිරි ගමනට අවශ්ය සුපිරිසිදු තිරසාර නායකත්වයක් ජනතාව පාක්ගෙන් බලාපොරොත්තු වුහ. එහෙත් ආසියාවේ ඇතැම් නායිකාවන් මෙන් බලයට පත්වීමෙන් පසු අපවාද හා බලය අවභාවිත ක්රියාකාරකම් මත සිය ප්රතිරූපය දියාරුවි ජනතාව අතර අවලංගු ප්රතික්ෂේපිත චරිතයක් බවට පත්වීමට ඇයටද එතරම් කලක් ගත නොවිය. එහි අවසන් ප්රතිඵලය වුයේ පාක් ගෙයුන් හේ ගේ අපේක්ෂිත දිගුකාලින දේශපාලිනක ගමන බලයට පත්වී වසර 5ක් වැනි කෙටි කාලයකින් අවසන් වීමයි.
තමිල්නාඩුවේ හිටපු මහ ඇමතිනි ජයලලිතා ජයරාම්ට ප්රබල අන්තේවාසිකාවක් ලෙස සසිකලා සිටියාක් මෙන් පාක් ගෙයුන් හේටද ප්රබල ව්යාපාරික හිතවන්තියක් තම අන්තේවාසිකාව බවට පත්ව සිටියාය. ඇය නමින් චෝයි සුන් සිල් නම් වුවාය.
සසිකලා මෙන්ම චෝයිද තම නායිකාවගේ මෙහෙයුම්කාරිය බවට පත්ව සිටියේ ඇයගේ පුර්ණ විශ්වාසයද දිනාගනිමිනි. ජනාධිපතිනිය විසින් සිදුකළ යුතු ඇතැම් කටයුතු රහසිගතව චෝයි විසින් ඉටුකෙරුණු අතර රජයේ ක්රියාකාරකම් සම්බන්ධයෙන් ඇතැම් තීන්දු තීරණ ගැනීමද ඇය විසින් සිදුකර තිබේ. මෙය කැබිනටි මණ්ඩලයද ඉක්මවා ගිය බලයක් ජනාධිපතිනිය විසින් චෝයිට පවරා දීමක් ලෙස දේශපාලන හා මාධ්ය ලෝකය විසින් පෙන්වා දෙනු ලැබීය.
පාක් ගෙයුන් හේ ගේ කථා හා දේශන සැකසීම හා ඒවා පරික්ෂා කිරීමද පසුකාලීනව චෝයි සුන් සිල්ට පැවරුණේ එය දකුණු කොරියානු නීතිය අනුව වැරැද්දක් බවද නොසලකමිනි. ඒ සඳහා චෝයිට රජය විසින් පිළිගත හැකි කිසිදු සුදුසුකමක්ද නොවීය. එහෙත් එය රජයේ සෙසු සාමාජිකයන්ට රහසිගතව සිදුවිය.
ජනාධිපතිනියගේ බලය යොදාගනිමින් රටේ මුල් පෙළේ ව්යාපාරික තීන්දු තීරණ ගැනීමද චෝයි සුන් සිල්ට රහසිගතව පැවරී තිබිණ. ඒ හරහා ඇය සිදුකළ ප්රධානතම අයථා ක්රියාව වන්නේ මුල් පෙළේ සමාගම් 9ක් යොදාගනිමින් ජනාධිපතිනිය වෙනුවෙන් රහසිගත අරමුදලක් පිහිටුවා තීබිමයි. එය ක්රියාත්මක කිරීම සඳහා සුප්රකට සැම්සුන් සමාගම් ජාලයේ වැඩබලන ප්රධානි ලී ජේ යංග් ද යොදාගත් බවට සාක්ෂි තිබේ.
ජනාධිපතිනි පාක් ගේ රජය මුල් වරට ජනතා අප්රසාදයට ලක්වන්නේ 2014 අප්රේල් මාසයේ සෙවෝල් නැමති මුහුදු යාත්රාවක් ජීවිත 304ක් විනාශ කරමින් මුහුදේ ගිලී යෑමේ සිද්ධියේදී ආණ්ඩුව ක්රියාකළ මන්දගාමි ස්වභාවය හේතුවෙනි. ජනාධිපතිනිය හෝ රජය මෙම සිද්ධියේදි නිසි අයුරින් ක්රියා නොකළ බවට දිගින් දිගටම චෝදනා එල්ල වුයේ ජනාධිපතිනියගේ මෙන්ම රජයේද ප්රතිරූපයට දැඩි බලපෑමක් සිදුකරමිනි. එය අවසානයක ආරම්භය ලෙසද සැලකීමට ඇතැම් දේශපාලන විචාරකයෝ උත්සුක වෙති.
චෝයි සුන් සිල් කොතරම් දක්ෂ මෙහෙයුම්කාරියක වුවද ඇයට වැරදුණු මුලික තැනක් තිබිණ. රාජ්ය පාලකයන් හා ඊට සම්බන්ධ පිරිස් බොහෝ විට දුෂ්කරතාවලට පත්වන්නේ රාජ්ය පාලන හා පරිපාලන කටයුතු සහ ආදර සබඳතා වැනි පෞද්ගලික හැඟීම් උද්දිපනය වන සංකල්ප එකිනෙක පටලවා ගැනීම තුළිනි. අතිශය ජනප්රිය අමෙරිකානු ජනාධිපති බිල් ක්ලින්ටන් තම ප්රතිරූපය දැඩි ලෙස හානියට පත්කරගත්තේ මොනිකා ලෙවින්ස්කි නම් වු සහායිකාව සමඟ ඇතිකරගත් අයථා සම්බන්ධය හේතුවෙනි.
40 හැවිරිදි කෝ යං තේ දකුණු කොරියාවේ පදක්කම් ලාභි ජාතික කඩු සටන් ශූරයෙකි. පසුව ඔහු විලෝම්ලෝ යන නාමයෙන් කාන්තා අත්බෑග් හා ඇඟලුම් ව්යාපාරයක් අරඹා සාර්ථකත්වයක් හිමිකරගත්තේය. 2013 වසරේ ජනාධිපතිනි පාක් බලයට පත්වි ඉතා කෙටි කලකින් කෝ යං ගේ සමාගමට ඉතා වටිනා අත්බෑග් තොගයක් රහසිගත ගැනුම්කාරියකට සැපයීමේ කොන්ත්රාත්තුවක් හිමිවිය. පැස්බර සමින් හා කිඹුල් සමින් නිමැවු ඉහළ වටිනාකමකින් යුත් එම තොගය භාර දීමට පමණක් නොව පෞද්ගලිකව එම අවස්ථාවට එක්ව තම සමාඟම ගැන කරුණු පහදා දීමටත් කෝ යං ට අවශ්ය වු අතර ඒ සඳහා ගැනුම්කාරියගේ අවසරය ලැබිණ.
එම රහසිගත ගැනුම්කාරිය අන් කිසිවෙකු නොව චෝයි සුන් සිල්ය. අත්බෑග් ජනාධිතිනි පාක්ගේ පරිහරණය සඳහායි. එහිදි චෝයි සුන් සිල් හා කඩවසම් කෝ යං අතර ඇතිවු ව්යාපාරික සබඳතාව පෞද්ගලික මට්ටම දක්වා ඉහළට ගියේ කෝ යං ගේ සමාගමට ඉමහත් ව්යාපාරික වාසි අත්කර දෙමිනි. තමා චෝයි සුන් සිල්ගේ පෙම්වතා ව සිටි බව කෝ යං පිළි නොගත්තද ඔවුන් අතර සමීප සබඳතාවක් පැවති බව ඔහු පිළිගනී . ඔවුන් එකම නිවහනේ ජීවත් වු බව දෙපාර්ශවයම පිළිගනිති”
මේ පැණි වරකා ගසට හෙණ ගසන්නේ 2014 වසරේ එක් අඳුරු දිනයකදීය. චෝයි සුන් සිල් කුඩා බලු පැටියෙකුද රැගෙන කෝ යං ගේ සුඛෝපභෝගි නිවසට පැමිණෙන්නේ තම දියණියගේ බලු සුරතලා ටික වේලාවකට බලාගන්නා ලෙස ඉල්ලිමක්ද කරමිනි. එය පිළිගන්නා කෝ යං තම වියපත් ආදරවන්තිය නික්ම ගිය පසු මඳ වේලාවකින් බලු සුරතලා නිවසේ තනිකර දමා ගොල්ෆ් ක්රීඩාව සඳහා පිටත්ව ගියේය. මේ අතර කෝ යංට පෙර නිවසට පැමිණි චෝයි බලු පැටවා හුදෙකලාව නිවසේ සිටින බව දැක දැඩි ලෙස කෝප වී කෝ යං පැමිණෙන තෙක් සිට ඔහු පැමිණි පසු බරපතළ ලෙස දෝෂාරෝපණයකට හා වාග් ප්රහාරවලට ලක් කරන්නේ දෙදෙනා අතර ප්රචණ්ඩ ගැටුමක් නිර්මාණය කර සබඳතාව අවසන් කරමිනි. මේ නිසා තමා රාජ උදහසට ලක්වන බව ඉවෙන් මෙන් තේරුම් ගත් කෝ යං තම පැරණි කඩුසටන් ශිල්පයේ උපක්රම සිහියට නංවමින් ප්රතිවාදියා ක්රියාත්මක වීමට පෙර ඇය බිම හෙළීමේ මෙහෙයුම ඇරඹිය.
චෝයි සුන් සිල් ජනාධිපතිනි පාක්ගේ රාජ්ය පාලන කටයුතුවලට මැදිහත් වෙන ආකාරයත් ඇයගේ කතා සකසන ආකාරයත් රහසිගත අරමුදල් පවත්වාගෙන යන ආකාරයත් පිළිබඳ වැදගත් බිඳ හෙළිය නොහැකි සාක්ෂි රැසක් ඒකරාශිකරගෙන දකුණු කොරියාවේ මුල් පෙළේ මාධ්ය ආයතනයක් වෙත ඒවා ලබා දුන්නේ ජනාධිපතිනිය හා චෝයි සුන් සිල් බෙල්ල මුලටම හිරවන ආකාරයෙනි. රටේ අනෙකුත් මාධ්ය ද මේ ගැන කථා කිරීම ඇරඹු අතර රාජ්ය මට්ටමින් ජනාධිපතිනියට එරෙහිව පරීක්ෂණයක් ආරම්භ විය. ජනාධිපතිනිය චෝයි සුන් සිල්ට රාජ්ය කටයුතු සඳහා මැදිහත් වීමට අවසර දුන් බව පිළිගත් අතර ඒ සඳහා ප්රසිද්ධියේ ජාතියෙන් සමාව අයැදිමින් තෙවරක් රූපවාහිනියෙන් ජාතිය ඇමතුවාය. තොරතුරු මාධ්යට දීමෙන් නොනැවතුණු කෝ යං එම තොරතුරු සියල්ල සෙනෙට් පරික්ෂණ මණ්ඩලයට ද ලබා දුන්නේ ජනාධිපතිනි පාක්ගේ දේශපාලන මිනී පෙට්ටියේ අවසන් ඇණ කිහිපයද තද කරමිනි.
ජනතා අපේක්ෂා මැද බලයට පැමිණි ජනතා දියණිය අද සියල්ලන්ගේම දෝෂාරෝපණ හා අපවාද මැද අඳුරු සිර මැදිරියක කල්ගත කරන්නීය. ඇයට එරෙහි චෝදනා ඔප්පු වුවහොත් වසර 10කට වැඩි සිර දඬුවමක් ඇයට නියම වනු ඇත. පාක් ගෙයුන් හේ කළ එකම වරද තම අන්තේවාසිකාව අධික ලෙස විශ්වාස කර ඇයට අසීමිත බලයක් පැවරීමයි. එහි අවසන් ප්රතිඵලය කුඩා බලු පැටවෙකු විසින් ජනප්රිය ජනතා නායිකාවක බලයෙන් පහකර සිපිරිගෙට යැවීමයි.
‘නිදහස මෙන්ම බලයද අයුතු ලෙස යොදවන්නේ නම් ඉන් අනතුරට පත්වන්නේ නිදහසම යැයි ඇෙමරිකා එක්සත් ජනපදය නිර්මාණය කළ පීතෘවරයෙකු ලෙස සැලකෙන ජේම්ස් මැඩිසන් වරක් පවසා තිබේ.
