වැලිකඩ සහ අනුරාධපුර බන්ධනාගාර පරිශ්රයන්හි දී තමා වෙතින් සිදු වූ සිද්ධීන්ට අදාළව වගකීම භාර ගනිමින් බන්ධනාගාර කළමනාකරණ හා සිරකරුවන් පුනරුත්ථාපන කටයුතු රාජ්ය අමාත්ය ලොහාන් රත්වත්තේ මහතා සිය ධූරයෙන් ඉල්ලා අස් වෙයි. ඒ මහතා අද (15) ජනාධිපති ගෝඨාභය රාජපක්ෂ මහතා වෙත ඒ බව දැනුම් දුන් අතර ජනාධිපතිවරයා විසින් එම ඉල්ලා අස්වීම පිළිගනු ලැබීය
මූල්ය අපරාධ පිළිබඳව එල්ල වී තිබෙන චෝදනාවලින් අධිකරණමය නිදොස්වීමක් නොලැබූ පුද්ගලයෙකු වන අජිත් නිවාඩ් කබ්රාල් මුදල් රාජ්ය ඇමතිවරයා දිනක් ඇතුලත මහ බැංකු අධිපති වශයෙන් පත්කිරීම සම්බන්ධයෙන් ජනතා විමුක්ති පෙරමුණ දැඩි විවේචන එල්ල කර තිබේ.
එම පක්ෂයේ දේශපාලන මණ්ඩල සභික සුනිල් හඳුන්නෙන්ති අද උදේ පැවැත්වූ මාධ්ය හමුවකදී මෙයට අදාළ කරුණු ගෙනහැර දැක්වීය. එම මාධ්ය හමුවේදී පළකළ සම්පූර්ණ අදහස් පහත පළ වේ.
“ශ්රී ලංකා මහබැංකුව අපේ රටේ තිබෙන ස්වාධීන ආයතනයක්. රටේ ආර්ථිකයට අදාළ මූල්ය ස්ථාවරත්වයක් පවත්වාගෙන යෑම සහ විනිමය අනුපාත, පොලී අනුපාත ගැන ස්වාධීනව තින්දු ගන්නවා. මහ බැංකුව භාරව ඇමතිවරයෙක් හිටියත් එහි කටයුතු සිද්ධ වෙන්නේ මහ බැංකුවේ පාලකවරයා හැටියට කටයුතු කරන මුදල් මණ්ඩලයෙන්. මුදල් මණ්ඩලය තුළ මහ බැංකු අධිපති, භාණ්ඩාගාර ලේකම්, වෘත්තීයමයභාවයකින් දායක වෙනවා. නමුත් දැන් සිදුවී තිබෙන්නේ එයට මුදල් රාජ්ය ඇමතිවරයා පත් කිරීමයි. උදේ මුදල් රාජ්ය ඇමති හවස මහ බැංකු අධිපති හැටියට පත්කරනවා. ලබැඳියාවන්ගේ ගැටුමක් බරපතළ විදිහට හැදෙනවා. මුදල් ඇමතිවරයා විදිහට තීන්දු ගන්න සම්බන්ධ වුණු අයම මහ බැංකු අධිපති ලෙස පත්වීම කොතරම් දුරට සදාචාරමය, ආර්ථිකමය සහ ජාත්යන්තරයේ කොතරම් හෑල්ලු වෙනවාද කියලා බරපත, විදිහට සලකා බලන්න වෙනවා. ශ්රී ලංකාවේ මහ බැංකුව ගැන වැඩිපුරම සාකච්ඡාවට ලක්වුණේ මහබැංකු බැඳුම්කර වංචාවක් සමග කළු චිත්රයක් ඇතිවීමෙනුයි. ගෝඨාභය රාජපක්ෂ බලයට එන්නේම මහබැංකු බැඳුම්කර හොරුන්ට දඬුවම් දෙනවාය කියන පදනමෙන්. රනිල් වික්රමසිංහ, මෛත්රීපාල සිරිසේන පාලනය තුළ මහ බැංකු වංචාව සිදුවුණේ ලබැඳියාවන්ගේ ගැටුමකින්.
අර්ජුන මහේන්ද්රන්. අර්ජුන් ඇලෝසියස් ඥාති සම්බන්ධතාවය නිසා මහ බැංකු බැඳුම්කර පිළිබඳව තොරතුරු වෙන්දේසියේදී සැපයූවාය කියන පදනම තියෙනවා. ආණ්ඩුවේ මුදල් රාජ්ය ඇමතිවරයා එකම දිනයකදී මහ බැංකු අධිපතිවරයා හැටියට පත්කිරීම මොනතරම් ලබැඳියාවන් අතර ගැටුමක් ඇති කරනවාද? මහ බැංකු අධිපතිවරයෙකු ලෙස පත් කිරීමට නුසුදුසු අය මුදල් පනතේ දක්වා තිබෙනවා. එහි 11වැනි වගන්තියට අනුව පාර්ලිමේන්තු මන්ත්රීවරයෙක්, පළාත් සභා මන්ත්රීවරයෙක්, ප්රාදේශීය සභා මන්ත්රීවරයෙක් වන පුද්ගලයෙක් එයට නුසුදුසු වෙනවා වගේම මහජන මුදලින් වැටුප් ලබන රාජ්ය නිලධාරියෙක් හා සමාන පුද්ගලයෙක් ලෙස කටයුතු කරන අයත් නුසුදුසුයි. බැංකු ආයතනයක අධ්යක්ෂවරුන් සහ අඩුම තරමේ සේවකයෙක් හෝ නුසුදුසු බව දක්වා තිබෙනවා. කෙනෙකුට තර්ක කරන්න පුළුවනි, පාර්ලිමේන්තු මන්ත්රී ධුරයෙන් උදේ ඉල්ලා අස්වී සවස අධිපති ධූරයට පත්වුණා කියලා. නමුත් මහ බැංකුවේම චර්යාධර්මවල අධිපති ධුරය දරපු කෙනෙක් ඉවත් වී අවුරුද්දක් යන තුරු ඒ හා සමාන මූල්ය ආයතනයක තනතුරක් දරන්න නුසුදුසු බව කියා තිබෙනවා.
මේකට හේතුව ලබැඳියාවන්ගේ ගැටුම නිසා මහ බැංකුවේ ස්වාධීනත්වයට බාධා වීමේ හැකියාවයි. ඉතා පැහැදිලිවම නීතිය ඉදිරියේ මොන ආකාරයකට තර්ක කළත් උදේ මුදල් රාජ්ය ඇමතිවරයා සවස මහ බැංකු අධිපති කිරීමෙන් ස්වාධීනත්වය බරපතළ ලෙස ප්රශ්න කෙරෙනවා. කබ්රාල් පත්කරන්නේ එයාගේ තිබෙන අත්දැකීම්, දැනුම හා පලපුරුද්ද උපයෝගී කරගෙන ආර්ථිකය කඩා වැටීම නවත්වන්න බව කියනවා. විදේශ විනිමය අර්බුදය විසඳන්න කියල තියෙනවා. රාජ්ය මුදල් ඇමති විදිහට දක්වපු කුශලතාවය, හැකියාව සහ පලපුරුද්ද මොකක්ද? (කඩා වැටෙන ආර්ථිකය ගොඩනගන්න.) මෙයට කලින් අජිත් නිවාඞ් කබ්රාල් 2006 ජූනි මාසයේ ඉඳලා 2015 ජනවාරි දක්වා මහ බැංකු අධිපති හැටියට කටයුතු කළා. මේ කාලය තුළ ඔහුගේ දක්ෂතාවය බැඳුම්කර ක්රියාවලිය සම්බන්ධ වෝහාරික වාර්තාවෙන් හෙළි වෙනවා. ජනාධිපති කොමිසමකින් නිර්දේශ කළ ජාත්යන්තර පිළිගැනීමක් සහිත විගණන සමාගමකින් සකස් කළ වාර්තාවක්. 2020 පෙබරවාරි 18-19 දවස් දෙකේදී මේ වාර්තාව සම්බන්ධයෙන් විවාදයක් කළා. එය කල්දාන්න හෝ විවාදයට නොගෙන ඉන්න මේ ආණ්ඩුවේ අද ඉන්න ඇමතිවරු විශාල උත්සාහයක් දැරුවා. අජිත් නිවාඞ් කබ්රාල් බැඳුම්කර වංචාවන්ට තිබුණු සම්බන්ධතාවය වහන්න ඒ උත්සාහය ආණ්ඩුවේ ඇමතිවරුන් සිදුකළා. අර්ජුන මහේන්ද්රන්, ඇලෝෂියස් කණ්ඩායමත් ආරක්ෂා කරගත්තේ බැඳුම්කර වංචාවට මේ දෙගොල්ලම සම්බන්ධ නිසා.
අධිපතිවරයා හැටියට පත්වීම් ලබන අජිත් නිවාඞ් කබ්රාල් වංචනික කුප්රකට ඉතිහාසයක් තිබෙන කෙනෙක් මිස ආර්ථිකය ගොඩදාන්න හැකි කෙනෙක් ලෙස අපි දකින්නේ නැහැ. වෝහාරික වාර්තාවෙන් හෙළිකර තිබෙනවා, අර්ථසාධක අරමුදලට පමණක් බැඳුම්කර වංචාව නිසා මිලියන 9074ක් පාඩුකර තිබෙන බව. මේ සම්බන්ධයෙන් පාර්ලිමේන්තුවේදී අපි පැහැදිලිව කරුණු ඉදිරිපත් කළා. 2013.06.05 ඔහු ආයෝජන කමිටුවට නියෝග කර තිබෙන්නේ අර්ථසාධක අරමුදලෙන් සෘජුව මහබැංකුවට මුදල් සපයනවා වෙනුවට ද්විතියික වෙළඳපොළෙන් තරගකරුවෙක් ලෙස බැඳුම්කර ගන්න කියලා. මේ නිසා සාමාන්ය ජනාවට හිමි අර්ථසාධක අරමුදලේ කෝටි ගාණක පාඩු සිද්ධ කිරීමට වගකිව යුත්තේ මේ අධිපතිවරයායි. නැවතත් මේ අධිපතිවරයාගේ පළමු කටයුත්ත හැටියට අර්ථසාධක අරමුදල් කොටස් වෙළඳපොළට දාලා මංකොල්ලකෑම ආරම්භ කරයි කියලා අපි අනුමාන කරනවා. මේ රටේ වැඩකරන ජනතාවගේ අරමුදලට සිදුකර තිබෙන පාඩුව මොන තරම්ද කියලා මේ වාර්තාවේ දැක්වෙනවා. අනෙක් පැත්තෙන් රජයට මේ වංචාවලින් බිලියන 10.74ක් පාඩු කර තිබෙනවා. අජිත් නිවාඞ් කබ්රාල් හිටපු මහ බැංකු අධිපතිවරයා හැටියට කෝටි 2,000ක පාඩු සිද්ධ කර තිබෙනවා. අර්ජුන් මහේන්ද්රන්, අජිත් නිවාඞ් කබ්රාල් වැනි සියලු දෙනා අධිකරණයට කැඳවන්න කියලා අපි විශාල උද්ඝෝෂණයක් ගෙනගියා.
නමුත් අර්ජුන් මහේන්ද්රන් ඇතුළු සියලු දෙනාට දඬුවම් දෙනවා වෙනුවට කබ්රාල් මහත්තයා නැවත මහ බැංකු අධිපති පුටුවේ වාඩි කරවා තිබෙනවා. ඔහුගේ ඥාති සහෝදරිය, ශිරෝමි වික්රමසිංහ, අර්ජුන් ඇලෝෂියස්ගේ සමාගමේ අධ්යක්ෂවරිය හැටියට කටුයුතු කළා. මේ ආදී වශයෙන් ලැයිස්තුවක්ම වෝහාරික විගණන වාර්තාවේ සඳහන් වෙනවා. ගෝඨාභය රාජපක්ෂ, මහින්ද රාජපක්ෂ ජනතාවට වුණූ පොරොන්දුව මේකද? ඥාති මිත්ර සංග්රහ නැතිව විද්යාත්මක පදනමක් මත තනතුරු ලබාදෙන බව කියූ අය ක්රියා කරන හොඳම උදාහරණය ලෙස අජිත් නිවාඞ් කබ්රාල්ගේ පත්වීම එකතු වී තිබෙනවා. නෙළුම් මාවතේ පොදුජන පෙරමුණේ කටයුතු කරලා මහ බැංකු අධිපති පුටුවේ වාඩිවීම මහ බැංකුව දේශපාලන අණ්ඩක් බවට පත්කර ගැනීමක්. මේක රනිල් වික්රමසිංහ ආණ්ඩුව අර්ජුන් මහේන්ද්රන්ව දාලා මහබැංකුව මංකොල්ලකෑවට වඩා අමුතු දෙයක් නෙවෙයි. 2006-2015 දක්වා සිදුවුනු ආකාරයට වඩා වැඩි ආකාරයකට 2015 ඉඳල අර්ජුන් මහේන්ද්රන්ලා සිදුකළා. එයම නැවත වටයකින් ආරම්භ කෙරෙනවා. මෙය සිදු කෙරෙන්නේ රටේ දැවැන්ත මූල්ය අර්බුදයක්, ඩොලර් හිඟයක් සහ බරපතල ආර්ථික කඩාවැටීමක් තිබෙන පසුබිමකයි.
රට බංකොලොත් වෙමින් යන වෙලාවක ආණ්ඩුව මූල්ය ක්ෂේත්රයත් සමග සෙල්ලම් කරන්න පටන් ගෙන තිබෙනවා. මෙය රටට සිදුකරන ඉතා බරපතළ අපරාධයක්. ග්රීක බැඳුම්කර ගනුදෙනුව, හෙජිං ගනුදෙනුව වගේ අදටත් රට වන්දි ගෙවන ඉතිහාසයකට වගකිව යුතු පුද්ගලයින් අධිකරණයට ගෙනයනවා වෙනුවට නැවත මහ බැංකුවට පත්කෙරෙනවා. වෝහාරික විගණනයේදී සාක්ෂි දුන් නිලධාරීන් අදත් මහ බැංකුවේ කටයුතු කරනවා. අධිපති ධුරයට මේ පුද්ගලයා පත්වුණාට පස්සේ ඒ නිලධාරීන්ට ඇතිවන තත්වය මොකක්ද? ඒ වගේම රටේ මූල්ය ක්ෂේත්රයට ඇතිවන ප්රශ්න මොනවාද? මේ නිසා මහ බැංකු අධිපති හැටියට අජිත් නිවාඞ් කබ්රාල් පත්කිරීම රටේ ආර්ථීකය තව දුරටත් බංකොලොත් කරන ක්රියාමාර්ගයක්. ඩබ්.ඩී ලක්ෂ්මන් මහාචාර්යවරයා අධිපති ධුරයෙන් ඉල්ලා අස්වීම සම්බන්ධයෙන් කළ ප්රකාශයයේදී තමාට සිත් රිදවීමක් ඇති බව කීවා. අජිත් නිවාඞ් කබ්රාල් කියන්නේ සිත් රිදවීම් සාමාන්ය දෙයක් බවයි. එහෙම නම් ඉදිරියේදී හිත් වේදනාවට පත්වුණු නිලධාරීන් ඉල්ලා අසවීම සාමාන්ය දෙයක් බව කියාවි. ආරථිකය කඩා වැටීමත් සාමාන්ය දෙයක් බව කියාවි. බැඳුම්කර වංචාව වුණත් සාමාන්ය දෙයක් බව කියයි. මේ වගේ හැම දෙයක්ම සාමාන්ය දේවල් හැටියට හඳුන්වා දේවි. අපේ රටේ ඇතිවී තිබෙන අර්බුද පැලැස්තර දාලා විසඳන්න පුළුවන් දේවල් නෙවෙයි. පෝට් සිටි පනත සම්මත කර ගැනීම කළු සල්ලි සුදුකර ගැනීම, වගේ දේවල් සාධාරණීකරණය කරන්න ආණ්ඩුව බොහෝ දේවල් කීවා. නමුත් ඒ කිසිම දෙයක් සිද්ධ වෙන්නේ නැහැ.
අපි ජනතාවට අවධාරණය කරන්නේ ආර්ථිකයේ වගේම දේශපාලනයෙත් ප්රතිපත්තිමය වෙනසක් සිදුකළ යුතු බවයි. එසේ නොකර ආර්ථිකය හදන්න බැහැ. පුටු මාරු කලා ඔළුගෙඩි මාරු කරලා පැලැස්තරවලින් අර්බුද විසඳන්න බැහැ. මේ වගේ අමනෝඥ තීන්දුවලින් රට හදන්න බැහැ. ඒ නිසා ආර්ථික සහ දේශපාලන වෙනසක් සිදුකිරීම වෙුනවෙන් ජනතාව සංවිධානය වෙලා එකතු වෙන්න ඕනෑ. මේ යන්නෙ අපේ රට විනාශ කිරීමේ ක්රියාවලියයි. ඒ සඳහා තමන්ගේ ගජ මිත්රයන් අදාළ තැන්වල වාඩි කරගැනීමයි. ඒ නිසා ආර්ථික වගේම දේශපාලන වෙනසක් සඳහා ජනතාව වෙනස් වෙමු කියලා අපි ආරාධනා කරනවා.”
දූෂණ චෝදනා එල්ලවී තිබෙන අජිත් නිවාඩ් කබ්රාල් මහ බැංකු අධිපති වශයෙන් පත් කිරීම වළක්වාලමින් මැන්ඩමූස් ආඥාවක් නිකුත් කරන ලෙස අභියාචනාධිකරණයට පෙත්සමක් ඉදිරිපත් කර ඇත.
හිටපු ආණ්ඩුකාරවරයෙකු වන රජිත් කීර්ති තෙන්නකෝන් මෙම පෙත්සම අද දහවල් අභියාචනාධිකරණය වෙත විද්යුත් තැපෑල මාර්ගයෙන් ඉදිරිපත් කර ඇත.
ඒ සමඟම මෝසමක් ඉදිරිපත් කරමින් මෙම අභියාචනය සැප්තැම්බර් 15වෙනි දින විභාගයට ගන්නා ලෙස ද ඉල්ලා ඇත.
බැඳුම්කර, සේවක අර්ථසාධක අරමුදල් වංචාකල ලබැඳියාවන් අතර ගැටුම් සහිත පුද්ගලයින් සම්බන්ධයෙන් නීතිය ක්රියාත්මක කිරීම සහ තනතුරුවලට පත් කිරීම සම්බන්ධයෙන් මැන්ඩමූස් ආඥාවක් (Writ of Mandamus) ලබා ගැනීම සඳහා අභියාචානාධිකරණයට ඉදිරිපත් කළ පෙත්සම
උක්ත කරුණ සම්බන්ධයෙන් වන මෝසම සහ පෙත්සම අද දහවල් අධියාචනාධිකරණයේ කාර්යාලය වෙත විද්යුත් තැපැල් මගින් යොමු කරනු ලැබීය. මෝසම මගින් හෙට (සැප්. 15) දින මෙම පෙත්සම විභාගයට ගන්නා ලෙස ඉල්ලා ඇත.
ජනාධිපති කොමිෂන් සභා නිර්දේශයක් මත සිදු කළ වෝහාරික විගණන වාර්තා ගණනාවකට සම්බන්ධ පාර්ශවයන් සම්බන්ධයෙන් අධිකරණ ක්රියාමාර්ග ගන්නා ලෙස ඉල්ලා අභියාචනාධිකරණයට පෙත්සමක් ඉතිරිපත් කර ඇත. මහ බැංකු අධිපති අජිත් නිවාඩ් කබ්රාල් මහ බැංකු අධිපති ධූරයට නැවත පත් කිරිම මගින්, අපරාධමය වරදකට සම්බන්ධ මහ බැංකුවේ සතු සාක්ෂි විනාශ කිරීමට, වෙනස් කිරීමට හා සාක්ෂිකරුවන්ට බලපෑම් කිරීමට අවස්ථාවක් හිමිවේ. මහ බැංකුවේ සිදුව ඇති මහ පරිමාන දුෂණ හා වංචා සම්බන්ධයෙන් පරීක්ෂණ සිදු කර එයට සම්බන්ධ පාර්ශවයන්ට නඩු පැවරීම සිදු කරන ලෙස ද පෙත්සම මගින් ඉල්ලයි.
දකුණ සහ මධ්යම පළාත් හිටපු ආණ්ඩුකාර රජිත් කීර්ති තෙන්නකෝන් කොළඹ අභියාචනාධිකරණයේ නඩු පැවරීම සිදු කටයුතු කර ඇත.
ජනාධිපති විමර්ශන කොමිෂන් සභා නිර්දේශයක් මත සිදු කළ වෝහාරික විගණන වාර්තාවේ නිර්දේශ අනුව හිටපු මහ බැංකු අධිපති අජිත් නිවාඩ් කබ්රාල් ට විරුද්ධව නීති මගින් කටයුතු කරන ලෙස නියෝග කරමින් නීතිපතිවරයා සහ පොලිස්පතිවරයාට මැන්ඩමූස් ආඥාවක් (Writ of Mandamus) නිකුත් කරන ලෙස ද, හිටපු ආණ්ඩුකාර රජිත් කීර්ති තෙන්නකෝන් ඉදිරිපත් කළ පෙත්සම මගින් ඉල්ලා ඇත.
වොහාරික විගණන වාර්තාවේ අති විශාල චෝදනා සංඛ්යාවක් එල්ල වී ඇති අජිත් නිවාඩ් කබ්රාල් අත්අඩංගුවට ගෙන රඳවා ප්රකාශයක් ලබා ගන්නා ලෙස ද,
මුදල් පනතේ 12 වගන්තිය අනුව, ජනාධිපති ලේකම් හා මුදල් අමාත්යවරුන්ට අජිත් නිවාඩ් කබ්රාල් මහ බැංකුවේ කිසිදු තනතුරක් සඳහා පත් කිරීම වලක්වන ලෙස ද,
අපරාධමය වරදක් පිළිබඳ සාක්ෂි වෙනස් කිරීම, විනාශ කිරීම හෝ වෙනස් කිරීම සිදු කළ හැකි බැවින් අජිත් නිවාඩ් කබ්රාල් නැවත මහ බැංකු අධිපති ධූරය සඳහා පත් කිරීම වලක්වන ලෙස ද, පෙත්සම මගින් ඉල්ලා ඇත.
දකුණ, මධ්ය හා ඌව පළාත් හි හිටපු ආණ්ඩුකාර රජිත් කීර්ති තෙන්නකෝන් විසින් ඉදිරිපත් කර ඇති පෙත්සමින් දැක්වෙන්නේ 2006 ජූලි සිට 2015 ජනවාරි දක්වා කාල සීමාව තුල මහ බැංකු අධිපති ධූරය දැරූ අජිත් නිවාඩ් කබ්රාල් පොදුජන පෙරමුණ නියෝජනය කරමින් මුදල් රාජ්ය අමාත්යවරයා ලෙස 2021 සැප්තෑම්බර් 13 දින දක්වා කටයුතු කර ඇති බවයි.
හිටපු ජනාධිපති මෛත්රීපාල සිරිසේන විසින් බැඳුම්කර වංචා සම්බන්ධයෙන් විමර්ශනය කිරීම සඳහා පත් කළ ජනාධිපති කොමිෂමක් පත් කල බව ද, එහි නිර්දේශයක් ලෙස සිදු කළ වෝහාරික විගණන වාර්තාව මගින් කබ්රාල් සම්බන්ධයෙන් කරුණු ගණනාවක් හෙළි කර ඇත.
වෝහාරික විගණන වාර්තාව මගින් හෙළි කර ඇති කරුණු සම්බන්ධයෙන් අපරාධමය චෝදනා එල්ල වී ඇති අජිත් නිවාඩ් කබ්රාල් සම්බන්ධයෙන් නීතිය ක්රියත්මක විය යුතු බවත්, ඔහු නැවත මහ බැංකු අධිපති ධූරයට පත් වන්නේ නම් මෙම සාක්ෂි විනාශ කිරීමට ඇති ඉඩ වලක්වාල ලෙස ද, පෙත්සමින් ඉල්ලා ඇත.
නීතිඥ සමාගමේ උපදෙස් පරිදි ජනාධිපති නීතිඥ මෛත්රී ගුණරත්න, ජ්යෙෂ්ඨ නීතිඥ ශිරාල් ලක්තිලක ඇතුළු පිරිසක් පෙත්සම වෙනුවෙන් අධිකරණයට කරුණු ඉදිරිපත් කරනු ඇත.
ශ්රී ලංකා මැතිවරණ ඉතිහාසයට ඓතිහාසික පරිච්ඡේදයක් එක් කරමින් මොණරාගල මහාධිකරණ විනිසුරු රංග දිසානායක මහතා ඊයේ (13) දිනයේදී සුවිශේෂී නඩු තීන්දුවක් ලබාදුන්නේය.
ඒ පසුගිය පළාත් පාලන මැතිවරණයේදී මොණරාගල දිස්ත්රික්කයේ එක් පළාත් පාලන ආයතනයක අපේක්ෂකයෙකු මැතිවරණ කාලසීමාව තුළ ඡන්දදායකයන්ට විවිධ අල්ලස් ලබාදීම සම්බන්ධයෙන් පැෆ්රල් සංවිධානය මැතිවරණ ප්රචණ්ඩ ක්රියා නිරීක්ෂණ මධ්යස්ථානයේද සහාය ඇතිව ගොනු කරනු ලැබූ නඩුකරයට අදාල තීන්දුව ප්රකාශයට පත්කරමිනි.
ඒ අනුව අල්ලස් ලබාදී ජයග්රහණය කල අපේක්ෂකයා පළාත් පාලන මන්ත්රී ධුරයෙන් ඉවත් කළ අතර ඊළඟ වැඩිම ඡන්ද ලබාගත් අපේක්ෂකයා පත්කරන්නට නියෝග කරන ලදී.
මෙම ඓතිහාසික නඩු තීන්දුව මගින් අනාගතයේ අපේක්ෂකයන් ඡන්දදායකයන්ට අල්ලස් ලබාදීමට නොපෙළඹෙනු ඇත. යම් හෙයකින් එසේ කෙරුවද ඕනෑම මොහොතක ඔවුන්ගේ මන්ත්රී ධුරය අභියෝගයට ලක්කිරීමට ඉඩකඩ සැලසෙනු ඇත. එපමණක් නොව අපේක්ෂක වියදම් සීමාකිරීමේ නීති සම්පාදනයේ අවශ්යතාවය හා මැතිවරණයකදී සමබිමක අවශ්යතාවය නැවත වරක් අවධාරණය වී ඇත.
එමෙන්ම මෙම ජයග්රහණය සඳහා අවශ්ය තොරතුරු ලබාගැනීමට හැකිවූයේ තොරතුරු දැනගැනීමේ පනත ක්රියාත්මක වීම හේතුවෙනි.
හාම්පුතුන් විසින් ඉතා අමානුෂික ලෙස නිදහස් වෙළඳ කලාප කම්කරුවන් සූරාකනු ලබන බවට වූ කතා ලොකු ප්රසිද්ධියක් සමගින් මෙරට ප්රචාරය වූවා වාගේම අපේ වෙරළෙන් ඔබ්බටද ඒවා ගමන් කර තිබේ. මෙම කතා බොහෝ විට කටුනායක නිදහස් වෙළඳ කලාපය පිළිබඳව හා ඇඟළුම් අංශ සේවකයින් පිළිබඳව වූ කතා ය.
නිදහස් වෙළඳ කලාප කම්කරුවන්ගේ සෝචනීය තත්ත්වය පිළිබඳව හඬ නැගීමට අනේකවිධ හවුල් කටුනායකත්, කොළඹත් බිහි වී ඇති අතර ඉන් සමහරකට කම්හල්වල සාමාජිකත්වයක් හෝ ඇත්තේ නැත. වසංගතය හමුවේ බොහෝ කලාපීය සේවක සේවිකාවන්ද මෙවැනි අසීරුකම් වලට හා ජීවිත තර්ජන වලට මුහුණ දෙන හෙයින් මේ කතා කලාපීය විරෝධතා වලටද ඇතුළුව ඇත.
තමන් වෙත ආකර්ශනයක් ලබා ගැනුමට ශ්රී ලංකාවේ වෘත්තීය සංගම්වලට පරිබාහිර වූ මේ මෑත කාලීන ‘‘අයිතිවාසිකම් සඳහාවූ ක්රියාකාරිකයින්’’ ගැටළු විශාල කර පුම්බා දැක්වීමට පෙළඹී තිබේ. වරක් කටුනායක නිදහස් වෙළඳ කලාපයේ පමණක් කොවිඞ්-19 ආසාදනය වූ පිරිස 5,000 ක් යැයි දක්වන ලදී. මේ අතර හාම්පුතුන් පවසන්නේ පළමු එන්නත් මාත්රාව සේවකයින්ගෙන් සියයට 90 ට හා මාත්රා දෙකම සේවකයින්ගෙන් සියයට 74 ට ලබා දී ඇති බවය. නිදහස් වෙළඳ කලාප හා ඇඟළුම් ක්ෂේත්රය පිළිබඳව උපුටා දක්වන දත්ත හා සංඛ්යා සැම විටම නිශ්චිත නොවන දත්ත හා සංඛ්යා ය. ඒවා තීන්දු වන්නේ කියන තැනැත්තා කවරෙක්ද හා කවර අරමුණක් සඳහා පවසන්නේද යන්න අනුවය.
ඇඟළුම් අංශයේ රැුකියා නියුක්තිය ශ්රී ලංකාවේ ශ්රම බලකායෙන් සියයට 15 ක් බව ශ්රී ලංකා ආයෝජන මණ්ඩලය පවසන අතර කිසිදු නිශ්චිත සංඛ්යාවක් නොදක්වයි. ‘‘ශ්රම බලකාය’’ ලෙස ඇති සඳහනට කිසිදු පැහැදිලි කිරීමක් නැත. 2019 වර්ෂයේදී ජන සංගණන හා සංඛ්යා ලේඛන දෙපාර්තමේන්තු සමීක්ෂණයෙහි දක්වා ඇති නාගරික මෙන්ම ග්රාමීය ක්ෂේත්ර තුළ වයස අවුරුදු 15 ට වැඩි රැකියා නියුක්ත සංඛ්යාව ශ්රම බලකාය ලෙස ගතහොත්, ඇඟලූම් ක්ෂේත්රයේ රැකියා නියුක්තිය මිලියන 1.23 ක් වනු ඇත. එහෙත් ඒකාබද්ධ ඇඟළුම් සංගම් සංසදය (JAAF පවසන්නේ ඇගළුම් ක්ෂේත්රයෙහි ඍජු රැකියා 300,000 ක් හා වක්ර රැුකියා 600,000 ක් ඇති බවය. එලෙස මෙම සංඛ්යා සැමවිටම පරස්පර වන අතර කිසිදු විටක පරිපූර්ණ හා නිරවද්ය නොවේ.
කෝවිඞ්-19 වසංගතයේ තර්ජනය සංඛ්යා හා දත්තවලට එපිටින් කටුනායක හා ඇඟලූම්වලින් ඔබ්බටද ගිය කතාවකි. කෝවිඞ්-19 වසංගතය සෑම දිස්ත්රික්කයක්ම වෙලාගෙන සිටින තත්ත්වයක් තුළ, ශ්රී ලංකා ආයෝජන මණ්ඩලය යටතේ මෙන්ම ඉන් පරිබාහිරව ඇති කම්හල්වල සියලූ සේවක සේවිකාවන්ගේ ආරක්ෂාවටද තර්ජනයක්ව පවතී. මෙම තුන්වන රැුල්ල තුළ 2021 සැප්තැම්බර් 05 වන දින වන විට මන්නාරම (1,357, කිලිනොච්චිය (4,636, මුලතිවු (1,284, කල්මුනේ(2,782 හා මඩකලපුව (6,155* වැනි දුරබැහැර දිස්ත්රික්ක වලින් පවා සැලකිය යුතු ආසාදනයන් වාර්තා වී ඇත.
කෝවිඞ්-19 වයිරසයේ පළමු බරපතල ව්යාප්තිය ආරම්භ වූයේ කටුනායක කම්හල් සේවකයින් අතරින් නොවේ. එය 2020 ඔක්තෝම්බර මුල මිනුවන්ගොඩ බ්රැන්ඩික්ස් කම්හලෙන් වාර්තා වූ අතර, එතැන් සිට කටුනායකින් ඔබ්බෙහි බොහෝ දුර පළාත් වෙත ගමන් කර තිබේ. පානදුර, සීතාවක, බිංගිරිය, කොග්ගල, තුල්හිරිය හා හසලක කම්හල් ගණනාවක තුන්වන රැුල්ලෙහි ආසාදන වාර්තා වී තිබේ.
මෙම වර්ෂයේ මැයි මාසයේදී, හොංකොං හි සුප්රකට ඇඟලූම් හා රෙදිපිළි සමාගමකට අයත් කම්හලක් වන, 1,500 ක් සේවයේ යොදවා ඇති එස්කුවෙල් කොග්ගල කම්හලේ කම්හල් කළමනාකාරවරයා නිරෝධායන නීති උල්ලංඝණය කිරීම සම්බන්ධයෙන් 2021 මැයි 31 වන දින දක්වා දින 10 කට රිමාන්ඞ් බන්ධනාගාරගත කිරීමට ගාල්ල අතිරේක මහේස්ත්රාත් විසින් නියෝග කරන ලදී. එම කළමනාකාරවරයා ආසාදිත සේවකයින්ගේ සමීපතම ආශ්රිතයින් පිළිබඳ තොරතුරු ලබා නොදුන් බවත්, ලබා දී ඇති උපදෙස්වලට පටහැනිව සේවාමුර මත කම්හල පවත්වා ගෙන ගිය බවත් මහජන සෞඛ්ය පරීක්ෂකවරු (PHIs අධිකරණයට පැවසූහ.
මේ දක්වා සෞඛ්ය මාර්ගෝපදේශ උල්ලංඝණය කිරීම සම්බන්ධයෙන් මහජන සෞඛ්ය පරීක්ෂකවරු කම්හල් කළමනාකාරවරයකුට අධිචෝදනා පැවරූ ප්රථම හා එකම අවස්ථාව මෙය වුවද, එබඳු උල්ලංඝණ දුර්ලභ නොවේ. සිවිල් සමාජ ක්රියාකාරිකයින්ගේ අවධානයට හසු නොවන නමුත් ජන ජීවිතයට බලපෑම් කෙරෙන ආසාදිතයින් ඉන්නා තවත් කම්හල් තිබිය යුතුය.
කෝවිඞ්-19 වසංගතය පිළිබඳව දකුණේ සිංහල ප්රදේශ තුළ පවා ජනමාධ්යයන්ට විමර්ශනාත්මක ආවරණයක් නොමැති අතර, කොළඹ සමාජ ක්රියාධරයින් වන්නිය හා නැගෙනහිර කම්හල්වල කොවිඞ්-19 ආශ්රිත ගැටළු සොයා බලන්නට වෙහෙසෙන බවක් නොපෙනේ. එනමුත් විශේෂයෙන්ම වන්නියේ හා නැගෙනහිර කම්හල්වල ශ්රම බලකාය තම කම්හලේ පවා කිසිදු ‘‘අන්තර්-සේවක සබඳතාවක්’’ ගොඩනගා ගැනීමට නොහැකිව, පරමාණුගතව ඉන්නා බව සටහන් කරනු කැමැත්තෙමි. අවුරුදු 25 ක දිග් ගැසුණු යුද්ධයෙන් බිඳ වැටුණු සංවිධිත සමාජයක ආරක්ෂක හමුදා සමග දෛනිකව පැවතීමට සිදුව ඇති රාජ්ය යාන්ත්රයට කම්කරු ගැටළු ගැන උනන්දුවක් ඇත්තේ නැත.
ආයෝජකයින් යුද්ධයෙන් බිඳ වැටුණු සහ විනාශ වූ උතුරු නැගෙනහිර හුදකලා ප්රදේශයන්හි කර්මාන්ත ශාලා විවෘත කිරීමට උනන්දු වූ ප්රධාන හේතුවක් වන්නේ ඒ සමාජයෙන් අසංවිධානාත්මක ශ්රමිකයන් එකතුකර ගැනීමට ඇති හැකියාව විය. සිවිල් පරිපාලනය අඩාලව අකර්මන්යව ඇති සන්දර්භයක් තුළ යුද්ධයෙන් අසරණ වූවන්ට රැුකියා ලබා දීමට යැයි ආධාර ලබා දෙන ආයතන, මේ ප්රදේශවල ජනතාවගේ මූලික අයිතිවාසිකම් මුළුමනින්ම යටපත් කෙරෙන බව නොසළකා රැුකියා ගැන අවධාරණය කරති. මෙම මූලික අයිතිවාසිකම් ආණ්ඩුක්රම ව්යවස්ථාවෙන් හා ජාත්යන්තර කම්කරු සංවිධානයෙන් සහතික කෙරෙන බව හෝ ඔවුන් සළකන්නේ නැත.
සේවා ස්ථානයන්හි සමස්ත වසංගත චිත්රය පැහැදිලිකර ගැනීමට හා පහසුවෙන් තේරුම් ගැනීමට මෙහිදී කාරණා කිහිපයක් අවධාරණය කළ යුතුය. අවුරුද්දකුත් මාස 06 ක් මුළුල්ලේ හාම්පුතුන් සහ කම්කරු දෙපාර්තමේන්තුව කෝවිඞ්-19 පැතිරීම පාලනය කිරීම සම්බන්ධයෙන් වැදගත් අවධානයක් යොමුකර නැත. ඔවුන්ගේ ප්රධාන අවශ්යතාව වූයේ කම්හල් ක්රියාත්මකව තබා ගැනීම පමණි. ඔවුහු කම්කරු අමාත්යාංශය විසින් පිහිටුවන ලද ‘‘කෝවිඞ්-19 ආශ්රිත කම්කරු ගැටළු පිළිබඳ ත්රෛපාර්ශවීය කාර්ය-සාධක බලකාය’’ විසින් 2020 මැයි හා දෙසැම්බර් මාසවලදී ගනු ලැබූ තීරණ දෙකක් නොසලකා හැරියහ. රැකියාවට කැඳවනු නොලබන සේවකයින් සඳහා සේවය නොකරන කාලයට අවම රුපියල් 14,500 ක මාසික වැටුපක් ලබා දීම ඉන් එකක් වූ අතර දෙවැන්න වූයේ සියලූ කම්හල්වල සේවක නියෝජනයක් සහිත ද්වීපාර්ශ්වික ‘‘කම්හල් සෞඛ්ය කමිටු’’ ( FHC සංවිධානය කිරීම හා ක්රියාත්මක කිරීමය.
තමන්ට නව ඇණවුම් ලැබී නොමැති බවත්, මාස ගණනකට නව ඇණවුම් නොලැබීමට ඉඩ ඇති බවත්, එම නිසා සියලූම සේවකයින් සේවයේ යෙදවීමට තමන්ට නොහැකි බවත් 2020 මැයි මාසයේදී කම්හල් හිමියෝ පැවසූහ. ඒ සමග කෝවිඞ්-19 වසංගතය ආශ්රිත ගැටළු මත කිසිදු සේවකයකු ඉවත් නොකළ යුතුය යන මූලික ප්රතිපත්තිමය තීරණය ත්රෛපාර්ශවිය කාර්ය-සාධක බලකාය විසින් ගනු ලැබූ අතර, එය ආණ්ඩුව විසින් අනුමත කරන ලදී. ඒ අනුව, රැුකියාවට කැඳවනු නොලබන සේවකයින් සඳහා රුපියල් 14,500 ක අවම වැටුපක් ගෙවීමේ පොදු එකඟත්වයට සියල්ලන් එක`ගවූ අතර මාරුවෙන් මාරුවට සේවක කණ්ඩායම් යෙදවිය යුතුයැයි තීන්දු විය. මෙම තීන්දුවට අනුව සේවයේ යෙදවීම හා වැටුප් ගෙවීම පැහැර හැරි අවස්ථා තිබූ අතර, හාම්පුතාගේ වාසිය පිණිස හිතාමතා වැරදි අර්ථ-නිරූපන දීමද සිදුවිය.
කම්හල් සෞඛ්ය කමිටු සම්බන්ධයෙන් ගත් කළ, කම්හල් හිමියෝ සේවක නියෝජනය සහිත කම්හල් සෞඛ්ය කමිටු පිහිටුවීමේ තීරණය සම්පූර්ණයෙන්ම නොසලකා හැරියහ. කම්කරු බලධාරීන්ද එම තීරණය නොපිළිපැදීම වසන් කිරීමට උත්සාහ කළහ. සියලූම කම්හල්වල ‘‘සේවා සෞඛ්ය හා ආරක්ෂක කමිටු’’ ඇති බවට ඔවුහු තර්ක කළහ. එම කමිටු බොහෝ සෙයින් අකර්මන්යව ඇති අතර, ඒවාට පැවරී තිබුණේ සේවා ස්ථානයන්හි හදිසි අනතුරු වැනි අවස්ථා වලට මැදිහත්වීම පමණි. කෝවිඞ්-19 වසංගතය සේවා සෞඛ්ය අන්තරායක් නොවන අතර, එය හදිසි ආපදාවක්ද නොවේ. කෝවිඞ්-19 වසංගතය සමග කම්හල් සෞඛ්ය කමිටු තිබීමේ අවශ්යතාව ඇති වන්නේ එනිසාය.
අදාල අනෙක් කාරණා නම්, කිසිදු කම්හලක ‘‘සාමාජීය දුරස්ථකරනය’’ ප්රායෝගිකව පවත්වා ගත නොහැකි වීමය. කිසිදු කම්හලක් එවැනි වසංගත බලාපොරොත්තුවකින් සැලසුම් කරන ලද හා ඉදිකරන ලද කම්හල් ගොඩනැගිලි නොවේ. සෞඛ්ය මාර්ගෝපදේශ වලට අනුව වායුසමනය ක්රියාවිරහිත කිරීමට නියමිත වූවත් රෙදි පිළි ගබඩාකර තිබියදී වායුසමනය කිරීම ක්රියාවිරහිත කිරීමට කිසිදු කම්හලකට නොහැකිය. අනෙකුත් බාධකය නම්, ඉතාමත් ප්රායෝගික වූ හේතුන් මත කිසිදු කම්හල් හිමියෙකුට සිය සමස්ත ශ්රම බලකායෙහි සේවකයනට වෙන වෙනම නවාතැන් පහසුකම් ලබා දීමේ හැකියාවක් නොමැත.
සංක්ෂිප්තව ගත් කල, ලෝක සෞඛ්ය සංවිධානයේ (WHO සියලූ මාර්ගෝපදේශ නාගරික මධ්යම පංතික නිවැසියන් සඳහා තීන්දු කරන ලද පියවර විනා, කම්හල් සේවකයින් සඳහා තීන්දු කළ පියවර නොවේ. කම්හල් සඳහා වන මාර්ගෝපදේශ සේවක සහභාගිත්වය ඇතිව යළි ප්රදේශගතව අදාලවන ලෙස ප්රජාතන්ත්රවාදීව සංශෝධනය කර ප්රකාශයට පත් කළ යුතු පියවර වන අතර, එය ද්වීපාර්ශවික කම්හල් සෞඛ්ය කමිටු සමගින් කළ හැකිව තිබුණි. එහෙත් හාම්පුතුන් බිය වන හා කම්කරු බලධාරීන් උකටලී වන ප්රධාන කාරණයක් ඇත. පළමු වරට කටුනායක නිදහස් වෙළඳ කලාපය පිහිටවූ දා සිට ගෙවුනු අවුරුදු 43 මුළුල්ලේ රට පුරා සේවක සේවිකාවනට වෘත්තීය සමිති ලෙස සංවිධානය වන්නට ඇති මූලික අයිතිය මර්දනය කරනු ලැබිණ. එය ‘කම්හල් සෞඛ්ය කමිටු’ මගින් අභියෝගයට ලක් විය හැකිය යන කාරණාවට හාම්පුතුන් බිය වන්නේය. ඔවුන් නොකියන කතාව වන්නේ ලාභ වැඩි කර ගැනීමට සංවිධානය නොවූනු ශ්රමිකයින් සූරාකන අයුරු සංවිධානයවූ ශ්රමිකයින් සූරා කෑමට නොහැකි බවය.
සිංහල දකුණේ සහ යුද්ධයෙන් පීඩාවට පත් උතුරු-නැගෙනහිර දමිළ-මුස්ලිම් සේවක සේවිකාවන් සම්බන්ධ පොදු ගුණාකාරය වන්නේ වෘත්තීය සමිති ලෙස සංවිධානය වීමේ හා සාමූහිකව කේවෙල් කිරීමේ මූලික අයිතීන් සම්පූර්ණයෙන්ම යටපත් කර අහෝසිකර තිබීමය. එහි එකම වෙනස ඇත්තේ උතුරු-නැගෙනහිරට සාපේක්ෂව සිංහල දකුණ දැනට හමුදාකරණයට පිටතින් තිබීමය.
ආණ්ඩුක්රම ව්යවස්ථාවේ ,,, වන පරිච්ෙඡ්දයෙහි 14(1(ඈ ව්යවස්ථාව මගින් මෙම අයිතිවාසිකම් සහතික කර ජාත්යන්තර කම්කරු සංවිධානයේ අංක 87 හා 98 සම්මුති ශ්රී ලංකාණ්ඩුව විසින් 1972 හා 1995 වර්ෂයන්හිදී අත්සන් තබා අපරානුමත කර තිබියදී ඒවා සාම්ප්රදායික වතුකරයේ හැර, පෞද්ගලික අංශයේ සමස්ථ ශ්රම බලකායට නිර්දය ලෙස අහිමි කර ඇත. මෙම අයිතිවාසිකම් වෙනුවෙන් කිසිදු වෘත්තීය සමිතියක් හෝ සිවිල් සමාජ කි්රයාකාරීන් පෙනී සිට ඒවා මර්දනය කිරීමට විරෝධය දක්වා නැත. නාගරික සිවිල් සමාජ කි්රයාකාරීහුද ‘‘කම්කරු අයිතිවාසිකම්’’තමන් පෙනී සිටිය යුතු මූලික අයිතිවාසිකම් යැයි නොපිළිගත්හ.
සංවිධානය වීමට හා සාමූහිකව කේවෙල් කිරීමට ඇති අයිතිය කිසි විට හෑල්ලූ කළ නොහැකි මූලික අයිතිවාසිකමක් ලෙස නොපිළිගන්නේ නම් උතුරු-නැගෙනහිර, බටහිර හා දකුණ සියලූ සේවකයින්ගේ සේවා ස්ථානයේ ආරක්ෂාව, පරිසරය හා සෞඛ්ය හාම්පුතුන් විසින් කිසිදු හේතුවක් නිසා සුරක්ෂිත නොකරන බව යථාර්ථයකි. එවැනි විට කිසිදු කම්හල් සෞඛ්ය කමිටුවකට අවසර නොලැබෙනු ඇති අතර, කෝවිඞ්-19 ගැටළු පැවතීම හෝ වඩාත් අයහපත් වීම බලාපොරොත්තු විය යුත්තකි. එනිසා සේවා ස්ථානයන්හි සෞඛ්ය, ආරක්ෂාව සහ කොවිඞ්- 19 නිවාරණය සඳහා වූ ඉල්ලීම් වෘත්තීය සමිති හා සාමූහික කේවෙල් කිරීම් සඳහා වූ ඉල්ලීම සමග එකට මතු කළ යුතුව ඇත. එය සේවා ජීවිතය ප්රජාතන්ත්රීකරණය කිරීම පිළිබඳ මෙතෙක් ආමන්ත්රණය නොකළ කතාවය.
රටක් වශයෙන් කොවිඩ් එන්නතේ දෙවන මාත්රාව ජනගහණයෙන් 50%කට ලබාදීම ජයග්රහණයක් බවද, මේ නිසා අද ඓතිහාසික දවසක් වනු ඇති බවද කැබිනට් ප්රකාශක, ජනමාධ්ය අමාත්ය ඩලස් අලහප්පෙරුම මහතා පවසයි.
අමාත්යවරයා මේ බව පැවසුවේ, අද (14) රජයේ ප්රවෘත්ති දෙපාර්තමේන්තුවේ පැවති කැබිනට් තීරණ දැනුම්දීමේ මාධ්ය හමුවේදී අදහස් දක්වමිනි.
මෙම මාධ්ය හමුවට සම කැබිනට් ප්රකාශක, වෛද්ය රමේෂ් පතිරණ අමාත්යවරයා ද සහභාගී විය.
ජනගහණයෙන් 50%කට අධික සංඛ්යාවක් දෙවනි මාත්රාව එන්නත්කරණය කළ රාජ්යයක් ලෙස ලෝක සිතියමෙහි රාජ්යයන් ඉතාම අතලොස්ස අතරට එක්වීමට අප රටට හැකිවීම භාග්යයක් බවද, මෙම රාජ්ය පද්ධතිය තුළ කුඩා දූපත් රාජ්ය හැරුණු කොට ඉහළින් සිටිනුයේ කැනඩාව, එක්සත් රාජධානිය, ජර්මනිය, ඉතාලිය, ස්පාඤ්ඤය, ජපානය, මැලේසියාව වැනි රටවල් බවත් මින් බහුතරය ජී7 (G7) කලාපයට අයත් රටවල් වන අතර එයින් රටවල් 4ක්ම එන්නත් නිපදවන රටවල් බවද ජනමාධ්ය අමාත්යවරයා පෙන්වා දුන්නේ ය.
මේ අතර කිසිදු ආකාරයක අනවශ්ය මැදිහත්වීමක් සන්නද්ධ හමුදා මේ මොහොතේ සිදු කර නැතැයි ද ඩලස් අලහප්පෙරුම මහතා අවධාරණයෙන් පැවසුවේය.
අමාත්යවරයා මේ බව පැවසුවේ මාධ්යවේදියෙකු යොමුකළ පැනයකට ප්රතිචාර දක්වමිනි.
රටේ මේ වනවිට පවතින තත්ත්වයක් යටතේ හදිසි නීතියෙහි වගන්ති දෙකක් පමණක් සංශෝධනය කරමින් ආහාර බෙදාදීමට අදාළව හමුදා පාර්ශ්වය සම්බන්ධ කරගෙන ඇති බවද, පුරවැසියන් විසින් මෙය තේරුම්ගත යුතු අතරම එන්නත්කරණ ක්රියාවලියේදී හමුදාවේ මැදිහත්වීම ධනාත්මකද, සෘණාත්මකද, ඔවුන්ගේ සේවය බැහැර කළ හැකිද යන්න සිතා බැලිය යුතු බවද, ආහාර බෙදාහැරීම සම්බන්ධයෙන්ද තත්ත්වය එලෙසම බවද අමාත්යවරයා කීවේය.
හාල් සහ වී සම්බන්ධයෙන් ගැටලු මතුවූ අවස්ථාවේද හමුදාව සක්රීයව සම්බන්ධ වුණු බවද අප රට එක්සත් ජාතීන්ගේ සංගමයේ සාමාජික රාජ්යයක් වශයෙන් එම සාමාජිකත්වය ලැබීම ගෞරවයක් ලෙස සළකන රාජ්යයක් බවද, එමෙන්ම එහි සමාරම්භක සාමාජිකයන් වන අප රට එයට ගෞරව කරන අතරම ඔවුන්ගේ නිරීක්ෂණ ප්රතික්ෂේප නොකර පිළිගන්නා බවද අමාත්යවරයා පැවසීය.
වසර 2030 වන විට ශ්රී ලංකාවේ විදුලිබල අවශ්යතාවයෙන් 70%ක් පුනර්ජනනීය බලශක්ති ප්රභවයන්ගෙන් ලබාගැනීමට යෝජනා කරමින් විදුලිබල ඇමතිවරයා විසින් ඊයේ (13) කැබිනට් මණ්ඩලයට ඉදිරිපත් කළ කැබිනට් ප්රතිකාවට අමාත්ය මණ්ඩල අනුමැතිය හිමි වූ බව කැබිනට් ප්රකාශක ජනමාධ්ය අමාත්ය ඩලස් අලහප්පෙරුම මහතා පැවසීය.
කැබිනට් මණ්ඩලය ඉතාම ගෞරවයෙන් මෙම යෝජනාවන් අනුමත කළ බවද, ඒ අනූව වසර 2050 වන විට මෙරට විදුලි ජනනය පූර්ණ කාබන්හරණ තත්ත්වයට පත්කිරීම මෙරට සිදුවෙන ඉතාම වැදගත් සංසිද්ධියක් බවද අමාත්යවරයා පැවසීය.
එක්සත් ජාතීන්ගේ සමුළුව අමතා විදේශ කටයුතු ඇමති මහාචාර්ය ජී.එල්.පීරිස් මහතා අද විශේෂ ප්රකාශයක් සිදුකිරීමට නියමිත බව මෙම අවස්ථාවට එක්ව සිටි සම කැබිනට් ප්රකාශක අමාත්ය වෛද්ය රමේෂ් පතිරණ මහතා පැවසුවේය.
ඊයේ එක්සත් ජාතීන්ගේ මානව හිමිකම් මහකොමසාරිස්වරිය විසින් රටේ අත්යවශ්ය භාණ්ඩ සැපයීම සහ හදිසි නීතිය ක්රියාත්මක කිරීම ඇතුළු කරුණු කිහිපයක් පිළිබදව සිය වාචික ප්රකාශනයේදී චෝදනාත්මකව අදහස් පළකළ බවට මාධ්යවේදියෙකු විසින් කළ විමසීමේ දී ඊට ප්රතිචාර දක්වමින් අමාත්යවරායා මේ බව පැවසුවේය.
ගෘහස්ත ගෑස් සිලින්ඩරයක මිල වැඩි කරන ලෙස ගෑස් සමාගම් රජයෙන් නව ඉල්ලීම් කර ඇති බව සමූපකාර සේවා, අලෙවි සංවර්ධන හා පාරිභෝගික ආරක්ෂණ රාජ්ය අමාත්ය ලසන්ත අලගියවන්න මහතා පැවසීය.
ලෝක වෙළඳපොලේ ගෑස් මිල ඉහළ යාම ගැන කරුණු දක්වමින් ගෑස් සමාගම් විසින් ඉල්ලීම ඉදිරිපත් කළ බවයි අමාත්යවරයා පැවසුවේ.
“දේශීය වෙළෙඳපොළේ ගෑස් හිඟයක් පවතින බව අමාත්යාංශය පිළිගන්නා නමුත් එය පෙර තරම් ප්රබල එකක් නොවෙයි. කෙසේ වෙතත්, අමාත්යාංශය මේ වන විට ගෑස් සමාගම් සමඟ මිල ගණන් පිළිබඳව සාකච්ඡා කරමින් සිටිනවා‘ යැයි ද අමාත්යවරයා පැවසීය.
ආණ්ඩුව සහ ඇමතිවරුන් ‘ගෑස් සමාගම්‘ යැයි කියමින් මෙරට ප්රමුඛතම හා ගෑස් වෙළෙදපොළේ ඉහළම කොටසකට හිමිකම් කියන ලිට්රෝ සමාගම ගැන සදහන් කළ ද එය රජය සතු සමාගමක් වන අතර ලාෆ් ගෑස් සමාගම මෙරට ගෑස් වෙළෙදපොළ තුළ සිටින අනෙක් ‘එකම‘ ගෑස් සමාගම වේ.
පසුගිය සඳුදා සූම් තාක්ෂණය ඔස්සේ රැස්වූ කැබිනට් මණ්ඩලයට අවසන් මොහොතේ හෝ කැබිනට් පත්රිකාවක් ඉදිරිපත් නොකර කෙරවලපිටිය යුගදනවි එල්එන්ජී බලාගාරය ඇමරිකානු සමාගමකට විකිණීම සඳහා මුදල් ඇමති බැසිල් රාජපක්ෂ ප්රමුඛ ආණ්ඩුවේ කිහිප දෙනෙකු ගෙන යන ක්රියාමාර්ගය වහා නැවැත්විය යුතු බව ජනතා විමුක්ති පෙරමුණ අවධාරණය කරයි.
එම පක්ෂයේ නායක අනුර දිසානායක අද පැවැත්වූ මාධ්ය හමුවකදී ආණ්ඩුවට මේ බව අවධාරණය කළේය. එම මාධ්ය හමුවේදී ඔහු දැක්වූ සම්පූර්ණ අදහස් පහත පළවේ.
“රටේ ජනතාව කොරෝනා වසංගතයෙන් බැටකන අතර වර්තමාන පාලකයන් ජාතික සම්පත් විශාල ප්රමාණයක් විදේශිකයන්ට පැවරීමේ ක්රියාමාර්ගවල යෙදී සිටිනවා. මේ පාලනය ගොඩනැගීමේ ප්රධානම සාධකයක් කරගත්තේ ජාතික සම්පත් ආරක්ෂා කරනවා කියන මතය. පැවති රනිල්-මෛත්රී ආණ්ඩුව ජාතික දේපළ විකිණීමට විරුද්ධව විශාල මතයක් ගොඩනැගී තිබුණා. ඒ මතය කොල්ලකමින් වර්තමාන පාලනය පිහිටවූවා. හම්බන්තොට වරාය විකිණීමේදී අදාළ ගිවිසුම සම්බන්ධ පාර්ලිමේන්තු විවාදයේදී ඊට විරුද්ධව මේ කිසි කෙනෙක් ඡන්දය දුන්නේ නැහැ. මහින්ද රාජපක්ෂ මහත්මයාගේ සිට රාජපක්ෂවරු ගණනාවක් පාර්ලිමේන්තුවේ හිටියත් වරාය චීනයට ලබාදීම හෝ බදු සහන ලබාදීමේ ගැසට් නිවේදනයට විරුද්ධත්වය ප්රකාශ කළේ නැහැ. එදත් එම විකිණීමට එරෙහිව පාර්ලිමේන්තුවේදී ඡන්දය පාවිච්චි කළේ අපේ මන්ත්රී කණ්ඩායම විතරයි. එදත් අපි පෙන්වා දුන්නේ මොවුන් ව්යාජ දේශප්රේමය තවරා ගත් අය බවයි. ඔවුන් ගෙන ගියේ බොක්කේ දඩමස් තියාගෙන හක්කේ බුදුරැස් තියෙන ක්රියාකලාපයක්. වර්තමාන බලය පිහිටුවාගෙන අපේ රටේ විශාල ජාතික සම්පත් ප්රමාණයක් විකිණීමට සූදානම් වෙනවා. ඒ වගේම විකුණා තිබෙනවා.
කොවිඞ් වසංගතය හමුවේ ආණ්ඩුවේ මේ ක්රියාකලාපයන් ගැන සංවාදයක් කිරීමේ හැකියාව රට තුළ නැති තත්වයක් තුළ පවා ආණ්ඩුව කරන්නේ ජාතික සම්පත් විකුණා දැමීමයි. පසුගියදා කැබිනට් මණ්ඩලය සූම් තාක්ෂණය ඔස්සේ කැඳවූ අවස්ථාවේ ඊට පෙර ලබා නොදුන් කැබිනට් පත්රිකාවක්, එම අවස්ථාවේදී පවා පත්රිකාවක් ලෙස ලබා නොදී මුදල් ඇමති බැසිල් රාජපක්ෂ වාචිකව ඉදිරිපත් කළ කරුණු අනුව කෙරවලපිටිය බලාගාරයෙන් 40%ක් සහ ගෑස් ගෙන එන නළ පද්ධතියත් ගෑස් ගබඩා කරන ටර්මිනල් බලාගාරයත් ඇමරිකානු සමාගමකට විකුණන්න තීරණය කරලා. විකිණීමේ කොන්දේසි, මිල ගණන්, අත්සන් කරන ගිවිසුම ආදී සියලු දේ පිළිබඳ අධිකාරී බලයක් මුදල් අමාත්යාංශ ලේකම්වරයාට ලබාදී තිබෙනවා. ආර්ථික ගැටලු, කොවිඞ් ව්යසනය, සම්බන්ධයෙන් උත්තර ජනතාව අපේක්ෂා කරද්දී ඇමරිකානු සමාගමකට කෙරවලපිටිය බලාගාරය පවරා දීමේ අවසන් තීන්දුව ගෙන තිබෙනවා. ඇමතිවරුන්ට කිසිදු අදහසක් ඉදිරිපත් කරන්න ඉඩ නොදී එම පත්රිකාව සම්මත කළ බව කාර්ය සටහන්වල සඳහන් කර තිබෙනවා.
මීට පෙර 2021.07.31 දින වරාය ඇමතිවරයා කොළඹ වරාය ආසන්නයේ ඉතාමත් වටිනා අක්කර 13ක් චීනයේ සී.අයි.සී.ටී. සමාගමට පවරා දෙන්නකැබිනට් පත්රිකාවක් ඉදිරිපත් කර සම්මත කරගත්තා. අපේ වරාය අධිකාරියට විශාල පර්යන්ත ප්රමාණයක් අද අයිති නැහැ. නමුත් විශාල ආදායමක් උපයන්නේ නාවික සේවා සැපයුම් ලබාදීම මගිනුයි. එමගින් 2018දී බිලියන 5.6ක ආදායමක් උපයා තිබෙනවා. පසුගිය වසර දෙකේ යම් ප්රමාණයක ආදායම් අඩුවෙන්න ඇති. නමුත් දැන් ඒ සේවා සැපයීමේ අයිතිය අවුරුදු 35කට චීන සමාගමට ලබාදී තිබෙනවා. ඒවෙනුවෙන් අක්කරයක් බදුදී තිබෙන්නේ මාසයකට රු. ලක්ෂ 8.5ක් වැනි මුදලකට. අක්කර එක හමාරක් සිමෙන්ති සමාගමකට ලබාදී තිබෙන්නේ මාසික කුලිය ලක්ෂ 22කට. නමුත් චීනයට ලබාදී තිබෙන්නේ ලක්ෂ අට හමාරක කුලියකට. තවත් ඉඩමක් අක්කර 1.25ක් පමණ දී තිබෙන්නේ ලක්ෂ 135ක් වූ මාසික කුලියකට. ජාතික දේපළ නිසි තක්සේරුවකට යටත් නොකර විශාල ධනයක් මේ අය උපයා ගන්නවා. ඒ ධනය සුදු කර ගැනීම සඳහා කළු සල්ලි සුදු කර ගැනීමේ පනත පාර්ලිමේන්තුවෙන් සම්මත කරගත්තා. මීට පෙර පර්ක් ආයතනය වශයෙන් ජාතික සම්පත් විකිණීමේ මෙහෙයුම් සිදුකළ ආයතනය අහෝසි වූවාට පසුව සෙලෙන්දිවා ආයතනය පිහිටුවා එම කාර්යය කරගෙන යන්න පටන් ගෙන තිබෙනවා.
ඩොලර් මිලියන 400ක් උපයා ගන්න විදේශ කටයුතු අමාත්යාංශය පිහිටි ගොඩනැගිල්ල, ගෆුර් ගොඩනැගිල්ල, හිල්ටන් හෝටලය සහ අනුබද්ධ ක්රීඩා සංකීර්ණය විකුණා දැමීම සඳහා රාජපක්ෂ ආණ්ඩුව අප්රේල් 31වැනිදා පත්රිකාවක් සම්මත කරගත්තා. කොම්පඤ්ඤ වීදියේගුවන් හමුදාවට අයත් ඉඩමක්, අක්කර 42ක් වූ වැලිකඩ බන්ධනාගාර ඉඩම විකුණා දැමීමට සැලසුම්කර තිබෙනවා. දේපළ විකුණා ජීවත්වන නාස්තිකාර පියෙකුගේ භූමිකාව අද මේ පාලකයන් ප්රවේශ වී තිබෙනවා. හැබැයි ආණ්ඩුව බලයට ආවේ විකිණූ සම්පත් ආපහු ගන්නවා කියලා. බහුතර ජනතාවක් ජාතික සම්පත් ආරක්ෂා කරගන්න පරමාර්ථයෙන් ඉන්නවා. මේ පාලකයෝ බලයට ආවේඅන්න ඒ ජනතාවගේ ලෙංගතුභාවය අඩු මිලට කොල්ලකමිනුයි. කොවිඞ් වසංගත තත්වය හමුවේ කවුරුත් තිගැස්මට පත්වෙලා ඉන්න වෙලාවක යටිකූට්ටු ලෙස කොමිස්වලට රටේ දේපළවිකුණමින් තිබෙනවා. රාජපක්ෂ පවුලට අයිති දේපළ විකුණනවා නම් අපි කවුරුත් බාධා කරන්නේ නැහැ. ගෝඨාභය රාජපක්ෂ මහත්මයාට හෝ ඔහුගේ පාලනයට රටේ සම්පත් පවරා දී නැති බව ඔවුන් තේරුම් ගත යුතුයි. මේ පාලකයන්ගෙන් වැඩි පිරිසකගේ දේපළ තියෙන්නේ, දරු මුණුබුරන් ඉන්නේ එක්සත් ජනපදයේ ලොස් ඇන්ජලීස්වල. එවැනි පාලකයෝ මේ රටේ පුරවැසියන්ට අයිති සම්පත් විදේශ සමාගම්වලට පවරා දෙමින් තිබෙනවා. මේ අයට අපේ රට හෝ රටේ පුරවැසියන් පිළිබඳව ආදරයක් තිබෙනවා නම් වෙන රටක පදිංචි වෙන්නේ නැහැ. මේ අය ඇවිත් ඉන්නේ බිස්නස් එකකට බවපසුගිය ජනාධිපතිවරණයේදී අපි ජනතාවට අවධාරණය කළා. මොවුන් විවිධ විදේශ සමාගම්වලට අපේ රටේ දේපළ පවරා දෙන්න බලයට පත්වුණු කොන්ත්රාත්කරුවන්. රටේ පාලකයන් නෙවෙයි.
අපේ රටේ මුල් පුටුවෙත් මුදල් අමාත්යාංශ පුටුවෙත් වාඩිවෙලා ඉන්නේ ජාතික සම්පත් විකිණීමේ ක්රියාවලියක ඉන්න අය. මේ තත්වය පරාජය කළ යුතු බව ජනතාවට අවධාරණය කරනවා. කොවිඞ් තත්වය හමුවේ මේ සම්බන්ධයෙන් ජනතාව සමග කරුණු පැහැදිලි කරන්න බාධා වී තිබෙනවා. නමුත් ආණ්ඩුව ඒ තත්වය තුළ රටට විනාශකාරී ක්රියාමාර්ග ගනිමින් ඉන්නවා. මේ ක්රියාදාමයට එරෙහිව පොදු ජනතාව කරළියට පැමිණිය යුතුයි. පසුගිය 06වැනිදා බැසිල් රාජපක්ෂ අමාත්යවරයා කැබිනට් පත්රිකාවක් සම්බන්ධ අඩංගුව සූම් තාක්ෂණය මගින් වාචිකව ඉදිරිපත් කර කෙරවලපිටිය බලාගාරයේ අයිතිය ඇමරිකානු සමාගමකට ලබාදීමට ගත් තීන්දුව වහාම හකුළා ගත යුතුයි. මෙවැනි කැබිනට් පත්රිකාවක්වත් නැතිව ලංකාවේ පළවැනි වතාවට තීන්දු අරන් තිබෙනවා. රටට, ජනතාවට විතරක් නෙවෙයි කැබිනට් මණ්ඩලයටත් හංගනවා. රටට ඉදිරිපත් කරන්න බැරිනම්, ජනතාවට ඉදිරිපත් කරන්න බැරිනම්, විවෘතව කැබිනට් මණ්ඩලයේ සාකච්ඡාවට ඉදිරිපත් කරන්න බැරිනම් ඒ හැම දේකින්ම කියවෙන්නේ මේ ක්රියාවලිය ඇතුළේ තිබෙන හොරකමයි. කෙරවලපිටිය බලාගාරය, වරාය ඉඩම්, අපේ රටේ පෞරාණික දේපළ විකිණීම සඳහා රාජපක්ෂ කොන්ත්රාත්කරුවන් දරන ප්රයත්නය පරාජය කළ යුතුයි. සියලු දෙනාට එය වෙනුවෙන් පෙළගැසෙන ලෙස අපි ආරාධනා කරනවා.”
“රාජ්ය නිලධාරීන් ගණනාවක් මෑත කාලයේ ඉවත් වුණා. වෘක්ෂලතා හා සත්වෝද්යාන දෙපාර්තමේන්තුවේ අධ්යක්ෂ ජනරාල් ඉෂිනි වික්රමසිංහ ඉවත් වුණා. යම් පුද්ගලයින් අලි ලබාගැනීමට දරන ප්රයත්නය දරා ගැනීමට නොහැකි නිසා ඉවත් වන බවට ඇය සටහනක් තබා තිබෙනවා. අගෝස්තු 19වැනිදා නිකුත් කළ ගැසට් නිවේදනයක් අනුව අලි හිමියන් අලුතින් ලියාපදිංචි කරන්න කටයුතු කර තිබෙනවා. ඒ අතර අධිකරණයේ විභාග වෙමින් තිබුණු නඩුවක අලින් නැවත චූදිතයන්ට භාර දෙන්න තීරණය කරනවා. ඒ අතර මිරිහානේ පදිංචි එන්.ජී. රාජපක්ෂ ඒ කියන්නේ ගෝඨාභය රාජපක්ෂගේ අලියත් ඉන්නවා. සන්නසකින් ඔහුට ලබාදී තිබුණු මේ අලියා නඩත්තු කරගන්න බැහැ කියලා 2015දී සත්වෝද්යානයට බාර දුන්නා. දැන් මේ කරන්නේ තමන්ගෙ අලියා ලබාගැනීමට නීති හැදීමයි. ඔය පවුලම එහෙමයි. එක රටක්-එක නීතියක් හදන්න ආවේ. කොවිඞ් මර්දන කමිටුවල හිටි හසල අත්දැකීමක් තිබුණු විශේෂඥ වෛද්යවරුන් දෙදෙනෙක් ගිය සතියේ ඉවත් වුණා. මහ බැංකුවේ අධිපතිවරයා ඉවත් වීමේදී කරුණු ගණනාවක් කියනවා. ඔහු කියූ කරුණුවලට වඩා නොකියූ කරුණු වැඩි බව අපි හිතනවා. අද තනතුරු දැරිය හැකි වෙන්නේ, ආණ්ඩුවේ පාලකයන් ගන්නා වැරදි තීන්දුවලට පවන් සලන පුද්ගයන්ට විතරයි. මහබැංකුව ස්වාධීනව කටයුතු කළ යුතු ආයතනයක්. නමුත් තමුන්ගේ තක්කඩි වුවමනාවන් ඉටුකරගන්න බැරි වෙනකොට එහි ප්රධානීන්ට රැඳී ඉන්න නොහැකි තත්වයක් ඇති කරන බවයි මෙයින් පෙනෙන්නේ.
අපේ රටේ ජනාධිපති, අගමැති, කැබිනට් ඇමතිවරු, නියෝජ්ය ඇමතිවරු, මන්ත්රීවරු වශයෙන් ධූරාවලියක් තිබෙනවා. එයින් පිට කැබිනට් බලතල දෙන්න කිසි සේත්ම බැහැ. මිලින්ද මොරගොඩ ඉන්දියාවේ මහ කොමසාරිස් ලෙස පත් කර යවන විටත් කැබිනට් බලතල සහිතව කියලා ප්රචාරයක් යැවුවා. මහබැංකු අධිපති වශයෙන් අජිත් නිවාඞ් කබ්රාල් පත්වන විටත් එවැනිම ප්රචාරයක් යවනවා. ඔවුන්ට තිබෙන මානසික ආබාධයක් පිළිබඳවයි මේ මගින් පෙන්වන්නේ. මහබැංකු අධිපති හැටියට ව්යවස්ථාපිතව පැවරුණු කාර්යභාරයක් තිබෙනවා. එයින් පිට දේවල් කතා කරන්නේ මානසික දුප්පපත්භාවය නිසා. 2008-2012 කාලයේදී කබ්රාල් මහ බැංකු අධිපතිවරයා යටතේ බිලියන 15කට වඩා බැඳුම්කර වංචාවන් සිදුවී ඇති බව වෝහාරික විගණන වාර්තාවේ දැක්වෙනවා. හෙජින් ගිවිසුම, ග්රීක බැඳුම්කර මිලදී ගැනීම, අද අපේ රටේ ආර්ථීකය හිරවීමට ලක්කළ විශාලම උත්තේජනය ඇතිකළේ මේ කණ්ඩායමයි. මෙතෙක් නාමිකව හෝ මහබැංකුව ස්වාධීන ආයතනයක් හැටියට පැවතුණා. නමුත් පළවැනි වතාවට දේශපාලකයෙක් මහ බැංකුවේ මුල් පුටුවට පත්වෙනවා. ලෝකය අපේ රට ගැන කොහොම හිතයිද? විදේශ වාණිජ වෙළඳපොළවලින් 2007 සිට ලබාගත් ණයවල අද අපේ රට හිරවී තිබෙනවා.
ජනතා විමුක්ති පෙරමුණ කරුණු සහිතව පෙන්වා දුන් අනාගත පුරෝකතන ගැන ඇහුම් කන් දුන්නා නම් අපේ රට මේ තත්වයට අද පත්වෙන්නේ නැහැ. රට විශාල ණය කන්දක ගොඩගැහෙනකොට පාලකයන්ගේ ගිණුම් ඒ වගේම තර වුණා. රටේ කොන්ක්රිට් වනාන්තර ගොඩනැගෙනකොට රටේ පාලකයන්ගේ දේපළත් ගොඩනැගුණා. අද අපේ රට රු. ටි්රලියන 16.3ක ණය කන්දක ඉන්නේ. නමුත් ඊට අදාල වත්කම් රට තුළ නිර්මාණය වුණේ නැහැ. රටේ පාලකයන් සහ ඔවුන් වටේ ඉන්න නිලධාරී කණ්ඩයමක් අත වත්කම් සහ දේපළ තිබෙනවා. මේවා කළු දේපළ. බැසිල් රාජපක්ෂ මුදල් ඇමති වෙලා සම්මත කළ පළමු පනත කළු දේපළ සුදු කරන්නයි. ආර්ථිකය විනාශකිරීමේ දොරටු විවෘත කරනකොට එදා ජවිපෙ අපි කී දේ ඇහුවා නම්, ජනතාව එයට සවස් දුන්නා නම් අපේ රටත් අනාගත පරම්පරාවත් මෙවැනි ව්යසනයකට ගොදුරු වෙන්නේ නැහැ. මේ වගේ වෙලාවක මැතිවරණයක් ඉල්ලන කෙනාගේ මොළය පරීක්ෂා කරගන්න ඕනෑ. ඔය කණ්ඩායම් දෙකම හැමවෙලාවෙම කළේ පවතින පාලනය යම් අසාර්ථකත්වයකට පත්වීමේදී මෝහනයට පත්වීමයි. උද්දාමයට පත්වීමයි. රට හෝ ආර්ථිකය හෝ ජනතාව ගැන හැඟීමකින් කරන ප්රකාශ නෙවෙයි ඔය. පසුගිය මහා මැතිවරණය පැවත්වීම කල් දැම්මේ දවසකට සීයක් විතර ආසාදිතයින් වාර්තා වෙද්දීයි. දවසකට දෙතුන් දෙනෙක් මිය යාම් වාර්තා වෙද්දී. අද දහස් ගණනක් ආසාදිතයින් වාර්තා වෙන, සිය ගණනක් මිය යන තත්වයක් යටතේ ඡන්දයක් ඉල්ලන අයගේ මොළය පරීක්ෂා කරන්න ඕනෑ නැද්ද? මේ වෙලාවේ අපි ආණ්ඩුවට බලපෑම් කරන්න ඕනෑ විනාශය අවම කර ගන්න. ඒ වෙනුවෙන් බලපෑම් වැඩි කරන්න ඕනෑ. එහෙම නොකර ලාභ ලෙස බලය ලබාගන්න හිතන අයගේ අදහස් ගැන අපිට වෙන කියන්න දෙයක් නැහැ.”
ඉන්දියාවේ නිෂ්පාදිත ගුවන් යානයක සේවය ලබා ගැනීමට ඉදිරි මාස 4 තුළදී හැකිවන බව වන බව India News Network වාර්තා කරයි.
බැංගලෝරයේ පිහිටි ජාතික අභ්යවකාශ විද්යාගාරය (National Aerospace Laboratories) යටතේ ඇති විද්යාත්මක හා කාර්මික පර්යේෂණ කවුන්සිලය (Council of Scientific and Industrial Researches) මගින් “හන්සා” නමින් නම් නව පරපුරේ ගුවන් යානයක් නිශ්පාදනය කොට එහි සිය මංගල ගුවන් ගමන සාර්ථකව සිදු කර ඇත. එම ගුවන් යානය බැංගලෝරයේ පිහිටි හල් (HAL) ගුවන් තොටුපලේ සිට සැප්තැම්බර් මස 03 වන දින (සිකුරාදා) පස්වරු 2.09 ට ගුවන් ගත වී අඩි 4,000 ක උන්නතාංශයක පියාසර කළ අතර විනාඩි 20 කට පමණ පසු ගොඩබෑමට පෙර නොට් Knot 80 ක වේගයක් ලබා ගත් බව එහි සඳහන් වේ.
එම ගුවන් යානයේ විශේෂාංග ලෙස ඉන්දියාවේ විද්යා හා තාක්ෂණ අමාත්යාංශය සඳහන් කළේ එහි ඉතා කාර්යක්ෂම ඩිජිටල් පාලිත එන්ජිමක්, කැබින් පහසුකම සහිත වීදුරු නියමු කුටියක්, විදුලි බලයෙන් ක්රියාත්මක වන ෆ්ලැප් (Flap), දිගු විඳදරාගැනීම (Long Endurance), අඩු අත්පත් කර ගැනීම (Low acquisition) සහ අඩු මෙහෙයුම් පිරිවැය (Low operating cost) යන පහසුකම් ඇති බවයි.
තවද, එම ගුවන් යානයේ ඉහත සදහන් සුවිශේෂී ලක්ෂණ හේතුවෙන් කවුන්සිලය් වෙත විවිධ පියාඹන සමාජ (Flying Clubs) වලින් අරාධනා ලිපි 72 ක් ලැබී ඇති බවද, එම ගුවන් යානය සේවයට ඇතුළත් කිරීම සදහා ඉදිරි මාස 4 තුළ අදාල සහතිකය ලබා ගැනීමට අවශ්ය පියවර ගන්නා බව කරන බව අමාත්යාංශය පවසයි.
මෙම ගුවන් යානයේ පර්යේෂණ ගමන සිවිල් ගුවන් සේවා අධ්යක්ෂ ජනරාල් (DG-CA), මිලිටරි ගුවන් යෝග්යතාවය සහ සහතික කිරීමේ මධ්යස්ථානය (CEMILAC), කවුන්සිලයේ හි ජ්යෙෂ්ඨ නිලධාරීන්, විද්යාඥයින් සහ ඉංජිනේරුවන් විසින් දුරස්ථ පාලනයෙන් අධීක්ෂණය කරන ලදී.එහිදී ගුවන් යානය පියාසර කළ කපිතාන් අමිත් දහියා (Capt. Amith Dahiya) සිය සතුට පළ කර ඇති අතර ගුවන් ගමනේ ප්රමිතීන් සියල්ල සාමාන්ය පරිදි පැවති සදහන් කර ඇත.
මෙම ගුවන් යානයේ සාර්තක පියාසැරිය වෙනුවෙන් විද්යාත්මක හා කාර්මික පර්යේෂණ දෙපාර්තමේන්තුව (Department of Scientific and Industrial Research) හි ලේකම් සහ විද්යාත්මක හා කාර්මික පර්යේෂණ සභාවේ(Council of Scientific and Industrial Research) හි අධ්යක්ෂ ජනරාල් ආචාර්ය ෂෙඛර් සී මැන්ඩේ (Dr. Shekhar C Mande) ජාතික අභ්යවකාශ විද්යාගාරයෙ හි කණ්ඩායමට සුබ පැතුම් එක් කරමින් කියා සිටියේ එම සාර්ථකත්වයට හේතු වී ඇත්තේ විද්යාත්මක හා කාර්මික පර්යේෂණ කවුන්සිලයත්, ගුවන් පරීක්ෂණ කාර්ය මණ්ඩලයත්, සිවිල් ගුවන් සේවා අධ්යක්ෂක ජනරාල්(Directorate General of Civil Aviation) සහ ගුවන් යානා සහ පද්ධති පරීක්ෂා කිරීමේ ස්ථාපිත කිරීම අංශයේත්(Aircraft and Systems Testing Establishment) උත්සාහය නිසා බවයි.
ඔහු වැඩිදුරටත් සඳහන් කළේ මෙම ගුවන් යානයේ සේවා සැපයීම වෙනුවෙන් විද්යාත්මක හා කාර්මික පර්යේෂණ කවුන්සිලය දැනටමත් පෞද්ගලික හවුල්කරුවෙකු හඳුනාගෙන ඇති අතර නිෂ්පාදන වැඩසටහන් මාලාවක් ඉදිරියේදී ආරම්භ කරන බවයි.
India News Network ඇසුරිනි.
අතල් නවෝත්පාදන මෙහෙවර (The Atal Innovation Mission- AIM ) (ඒඅයිඑම්) (AIM), නීතී ආයෝගය(NITI Aayog) යනු ඉන්දියාවේ නවෝත්පාදන හා ව්යවසායකත්ව සංස්කෘතියක් ප්රවර්ධනය කිරීම සඳහා වූ ඉන්දීය රජයේ ප්රමුඛතම මුලපිරීම වන අතර එය 2016 දී පිහිටුවන ලදී. මේ අරමුණින් AIM මගින් පාසල් තුළ ගැටලු විසඳන නව්ය මානසිකත්වයක් ඇති කිරීම සහ විශ්ව විද්යාල, පර්යේෂණ ආයතන, පෞද්ගලික හා සුළු හා මධ්ය පරිමාණ ව්යාපාර යන අංශයන්හි ව්යවසායකත්ව පරිසර පද්ධතියක් ඇති කිරීම සහතික කිරීම සඳහා පරිපූර්ණ ප්රවේශයක් ගෙන ඇත. AIM හි සියලුම මුලපිරීම් දැනට තත්ය කාලීන(Real time) කළමනාකරණ තොරතුරු පද්ධති(MIS) සහ ගතික උපකරණ පුවරු භාවිතයෙන් ක්රමානුකූලව අධීක්ෂණය කෙරේ.
ඉන්දීය පාසල් සිසුන් අතර අභ්යවකාශ අංශය සඳහා නවෝත්පාදන අදහස් ප්රවර්ධනය කිරීමේ අරමුණින් “ඒටීඑල්(ATL) අභ්යවකාශ අභියෝගය 2021” දියත් කළේය. මෙය සංවිධානය කරනුයේ අතල් නවෝත්පාදන මෙහෙවර (The Atal Innovation Mission) මගිනි.
එහි අරමුණ වන්නේ 6 සිට 12 වසර දක්වා පන්ති වල සිසුන්ට නවෝත්පාදනයන් සඳහා විවෘත වේදිකාවක් ලබා දීම සහතික කිරීමයි.එමගින් ඩිජිටල් යුගයේ අභ්යවකාශ තාක්ෂණ ගැටලු විසඳීමට ඔවුන්ට හැකි වේ. මෙම අභියෝගය සැලසුම් කර ඇත්තේ ඉන්දියාව පුරා සිටින සියලුම පාසල් සිසුන්, උපදේශකයින් සහ ගුරුවරුන් වෙනුවෙනි.
මෙම වැඩසටහන දියත් කරන ලද්දේ අතල් නවෝත්පාදන මෙහෙවර(AIM) සමඟ ඉන්දියානු අභ්යවකාශ පර්යේෂණ සංවිධානය-Indian Space Research Organisation (ISRO) සහ මධ්යම ද්විතීයික අධ්යාපන මණ්ඩලය-Central Board of Secondary Education (CBSE) සහයෝගීතාවයෙනි
ඒටීඑල්(ATL) අභ්යවකාශ අභියෝගය-2021 අභ්යාවකාශ විද්යාවේ හා තාක්ෂණයේ දායකත්වය සැමරීම සඳහා සෑම වසරකම ඔක්තෝබර් 4 සිට 10 දක්වා ගෝලීය මට්ටමින් පැවැත්වෙන ලෝක අභ්යවකාශ සතිය හා සමගාමීව පැවැත්විණ.
තරග කොන්දේසි වුයේ සිසුන්ට ක්රියාත්මක කළ හැකි විසඳුමක් සාදා ඒ හා සමාන තාක්ෂණයක් ද අනුගමනය කළ හැකිය යන්නයි. සාමාජිකයින් තිදෙනෙකු දක්වා කණ්ඩායමක් තුළ විසඳුමක් හෝ නවෝත්පාදනයක් සිසුන්ට තම නවෝත්පාදනයන ලෙස ඉදිරිපත් කිරීමට අවස්ථාව සලසා තිබිණි. තරග අංශය වූයේ අභ්යවකාශ ගවේශන විසදුම්ය මෙය අංශ හතරකට එනම්, අභ්යවකාශය ගවේෂණය, අභ්යවකාශයට ප්රවේශවීම, අවකාශයේ රඳවා තැබීම, අභ්යවකාශය ප්රයෝජනයට ගැනීම වශයෙන් වෙන් කොට තිබිණ
අතල් නවෝත්පාදන මෙහෙවර (The Atal Innovation Mission)හි අධ්යක්ෂක චින්තාන් වෛශ්ණව් (Chintan Vaishnav)ගේ මාධ්ය නිවේදනය උපුටා දක්වමින් India News Network වාර්තාකොට තිබුනේ, අභ්යවකාශ ගවේෂණයට උපකරණ නිර්මාණය කිරීමට තරුණ පාසල් සිසුන් පෙළඹවීමෙන් සිසුන් අතර නවෝත්පාදන කුසලතා වර්ධනය කිරීම මෙම අභියෝගයේ අරමුණ බවයි. අභ්යාවකාශ ගවේෂණයට උපකරණ නිර්මාණය කිරීම හා අභ්යවකාශ විෂය පිළිබද උනන්දුවක් දක්වන පාර්ශවයන් ගේ දැනුම වර්ධනයට මෙම වැඩසටහන මහත් පිටිවහලක් වන බව එම මාධ්ය නිවේදනයේ වැඩිදුරටත් සඳහන් වේ.
India News Network ඇසුරිනි.
මාතලේ දිස්ත්රික් පාර්ලිමේන්තු මන්ත්රීණි රෝහිණී කවිරත්න මහ කන්නය සඳහා අවශ්ය කෘෂි රසායන (කෘමි, දිලීර හා වල් නාශක) ලබාදීම සම්බන්ධයෙන් විමසමින් කෘෂිකර්ම අමාත්යාංශයේ ලේකම් උදිත කේ ජයසිංහ වෙත දැඩි විවේචනාත්මක ලිපියක් යොමු කර ඇත.
මහ කන්නය ආරම්භවීමට තවත් ඇත්තේ සති 3 ක් තිබිය දී, වගාව සඳහා අත්යවශ්ය කෘෂි රසායන ගොවියාට ලබාදීමට කිසිදු වැඩපිළිවෙලක් මේ දක්වා ප්රකාශයට පත් කර නැතැයි ලිපිය මගින් පවසන කවිරත්න මන්ත්රීවරිය රජයේ කෘෂි රසායන ප්රතිපත්තිය ගොවියාට පැහැදිලි කළ යුතුව ඇතැයි පවසයි.
එම ලිපියේ තවදුරටත් දැක්වෙන්නේ,
‘මහ කන්නයේ කුඹුරු සහ හේන් ගොවිතැන සඳහා බිම සකස් කිරීමට වල් නාශක අත්යවශ්ය වේ. වල් නාශක යොදා පඳුරු විනාශ කර හේන් ගිණි තැබීම වගා බිම් සැකසීමේ මුල්ම පියවරයි. ලංකාවේ සෑම ප්රදේශයකම ඇති වල් නාශක නැගෙනහිරට ප්රවාහනය කරති. බහුදින ධීවර යාත්රා මගින් ඉන්දියාවේ සිට රැගෙන එන නීති විරෝධී වල් නාශක මන්නාර, දකුණ හා නැගෙනහිර මුහුදු කලාපයෙන් රටට ඇතුළුවන බවයි.
තවද, බීජ සඳහා යොදන රසායනික ද්රව්ය නොමැතිකම නිසා බීජ වර්ග (ඉරිගු, මුං, තල, උඳු, කොල්ලු, මෙනේරි) ගොවි නිවෙස්වල විනාශවෙමින් ඇත. අනුරාධපුර සහ කුරුණෑගල දිස්ත්රික්කවල වී වගාව පිදුරු බවට පත්ව ගොවීන් කුඹුරු ගිණි තබන්නේ කෘමි හානි නිසා බව පවසන ලිපිය, දිලීර නාශක නොමැතිවීම නිසා නිරිතදිග මෝසම් සමයේ නුවරඑළිය හා මාතලේ දිස්ත්රික්කවල තේ දළු අස්වැන්න පහත වැටී ඇත. වැසි සමයේ දින 4-5 ක අඛණ්ඩ වැස්සකට, මීදුම හා තෙතමනය අධික කාලගුණයක දිලීර මර්ධනයට ‘දිලීර නාශක‘ අතශ්යවශ්ය වන බව අවධාරණය කරන කවිරත්න මහත්මිය, කෙටි කාලීන වී වර්ග සිටවීම හෝ වැපිරීමෙන් පළමු දින 3 සිට සති 4 දක්වා වල් මර්ධනය අනිවාර්ය වේ. රජරට ගොයම් ගස් බොල් වී – පිදුරු බවට පත්වන බව පවසයි.
කෘෂි රසායන නොමැතිව වානිජ්ය කෘෂිකර්මාන්තය සිදු කළ නොහැකි බව කෘෂි විද්යා පිඨයක මහාචාර්යවරයෙකුවන ද ආමාත්යාංශ ලේකම්වරයා, කෘෂි රසායන නොමැතිවීම දින දෙක තුනකින් සම්පූර්ණ වගාබිමක් විනාශ කිරීමට හේතුවන බව නොතකා කටයුතු කරමින් සිටින බවට චෝදනා කරයි.
කෘෂි රසායන අලෙවිය තනි සමාගම් ඒකාධිකාරය
පසුගිය දා කැබිනට් මණ්ඩලයට ඉදිරිපත් වූ පත්රිකාව අනුව කෘෂිකර්ම අමාත්යාංශය කෘෂි රසායන ආනයනයේ ඒකාධිකාරය තනි සමාගමකට පැවරීමට උත්සහ දරන බව පැහැදිලිය. සීනී ආනයනයේ යෙදුණු සමාගම් 67 ක් වෙනුවට සමාගම් 12 කට ආනයනය සීමා කිරීම මගින් ඇති වී ඇති තත්වය රටම දනී. කෘෂිකර්ම අමාත්යාංශය මගින් සකස් කළ කැබිනට් පත්රිකාව මගින් කෘෂිරසායන ආනයනයේ 87% ක ඒකාධිකාරයක් සති සමාගමක් වෙත ලබාදීමට යෝජනා කර තිබු බව ලිපිය මගින් විවේචනය කර ඇත.
1977 විවෘත ආර්ථිකය හඳුන්වාදීමෙන් පසුව, ලංකාවේ පළමු වරට කෘෂි රසායන ආනයන ඒකාධිකාරය තනි සමාගමකට ලබාදීමටත්, ‘බෝට්ටු කෘෂි රසායන‘ සහ ‘කළු කඩ වස වෙළෙඳාම‘ ප්රවර්ධනයට කෘෂිකර්ම අමාත්යාංංශය කටයුතු කරන බව ලිපිය දක්වයි.
අධික විෂ සහිත කෘෂි රසායන හොර පාරේ ආනයනයට ඩොලර් වෙනුවට මේ රටේ රත්තරං ටික හොර පාරේ ඉන්දියාවට පටවනු ලබයි. කෘෂිකර්ම අමාත්යාංශය කාබනික කෘෂිකර්මය කියා ලේබල් ගසමින් අධි විෂ කෘෂි රසායන රටට ගෙන්වීමට අවශ්ය පදනම සකස් කර ඇත.
කවිරත්න මහත්මිය ලේකම්වරයා වෙත අවධාරණය කර ඇත්තේ,
කෘෂි රසායන කිසිවක් ආයනයන නොකරන්නේය යන ස්ථාවර තීරණයේ රජය සිටින්නේ නම්, ඒ බව රටට ප්රකාශ කිරීම අමාත්යාංශයේ වගකීමකි. එවිට ලංකාවේ ජනගහනයෙන් 30% ක් වන කෘෂිකර්මාන්තයෙන් යැපෙන්නන්ට වෙනත් විකල්පයක් සොයා ගැනීමේ අවස්ථාව උදාවනු ඇත.
මහ කන්නයට තවත් සති තුනකට වඩා කාලයක් නොමැති බැවින්,
බැඳුම්කර වංචාව විමර්ශන කිරීම සඳහා පත් කරනු ලැබූ ජනාධිපති කොමිෂන් සභාව (Presidential Commission of Inquiry to Investigate, Inquire and Report the Issuance of Treasury Bonds) හි නම සඳහන් වු පුද්ගලයෙකු නැවත එම තනතුරට පත්වීම රටක අසමත්බව පෙන්වන්නකි.
අර්ජුන මහේන්ද්රන් මහ බැංකු අධිපති ධූරයට පත් කිරීමට යෝජනා වූ විට, ජනතාවට එයට විරුද්ධ වූවේ ඔහුගේ 2001 – 2004 සමයේ පැටිකිරිය නිසාය. අවසානයේ යහපාලන ආණ්ඩුව කුඩේ කුඩු කර මහේන්ද්රන් රටෙන් පැන නම ද ස්ත්රී-පුරුෂ භාවය හැර අන් සියල්ල වෙනස් කර ගත්තේය. වෝහාරික වාර්තාවේ අජිත් නිවාඩ් කබ්රාල්ට ද එක හා සමාන චෝදනා ඇත. ඒ වෝහාරික වාර්තාව දැන් නීතිපති ලඟ ගල් කර ඇත.
මුදල් පනතේ පාර්ලිමේන්තු මන්ත්රීවරයෙකුට මහ බැංකු අධිපති විය නොහැකි බව පැහැදිලිවම දක්වා ඇත. මන්ත්රීවරයෙකු පමණක් නොව, මුදල් රාජ්ය අමාත්යවරයා ද වු පුද්ගලයෙකුට මන්ත්රී ධූරයෙන් ඉවත්වී දින දෙක තුනකින් මහ බැංකුවේ අධිපති ධූරය ලබා ගැනීමට කිසිදු සදාචාරාත්මක අයිතියක් නැත. එවැන්නක් සිදුවිය හැක්කේ බංකොලොත් ‘බනානා රිපබ්ලික්’ එකක පමණී.
එස්ටර් වාර්තාවේ කියූ ‘සුපිළිපන් සහ වගකීම් සහිත’ භාවය කොතැනකද?
පළමුව, ශ්රී ලංකා මහ බැංකුව පිහිටුවීමට පාදක වූ 1949 නොවැම්බර් ප්රකාශයට පත් ‘Report on the Establishment of a Central Bank for Ceylon’ වාර්තා ප්රතිඑලයක් ලෙසිනි. එම වාර්තාවේ 16 වන පිටුවේ මහ බැංකුවේ අධිපතිවරයා බවට පත් වන පුද්ගලයා ‘The Governor should be a man of recognized and outstanding competence in and integrity and responsibility’ විය යුතු යැයී සඳහන් ය.
බැඳුම්කර කොමිසන් වාර්තා වේ ප්රසන්න ජයවර්ධන විනිසුරුතුමන් එස්ටර් වාර්තාව උපුටා දක්වා ඇත්තේ ‘ලබැඳියාවන් අතර ගැටුම’ හෙළි කරමිනි. එවැන්නකු නැවත මහ බැංකු අධිපති ලෙස පත් කර ගත යුතුද?
දෙවනුව, 2014 ජූනි 30 දින සංශෝධිත 422 වගන්තිය මුදල් පනතේ (422 වගන්තිය) 11 වගන්තිය මගින් පාර්ලිමේන්තු මන්ත්රීවරයෙකුට මහ බැංකුවේ අධිපතිවිය නොහැකිය. දේශපාලන පක්ෂයක් නියෝජනය කරමින් මුදල් රාජ්ය ඇමතිවරයා ලෙස කටයුතු කළ පුද්ගලයා එම තනතුරින් ඉල්ලා අස්වී දින දෙක – තුනකින් ස්වාධීන තනතුරක් වන ‘මහ බැංකු අධිපති ධූරයට’ පත්වීම කිසි ලෙසකින් හෝ සදාචාර සම්පන්න වන්නේ නැත. දේශපාලන පක්ෂය නියෝජිතයෙකු අගවිනිසුරු ධූරයට පත් වූවා හා සමාන තත්වයක් – මහ බැංකුව තුල නිර්මාණය නොවිය යුතුය.
රජයේ ඒකාබද්ධ අරමුදලින් වැටුප් ලබන පුද්ගලයෙකු, ප්රාදේශීය සභාවක, පළාත් සභාවක මහජන නියෝජිතයෙකුට මෙම තනතුරට පත් විය නොහැකි නම්, දවස් දෙකකට කලින් පාර්ලිමේන්තුවෙන් ඉල්ලා අස්වී එම තනතුරට පත්වීමේ සදාචාරය කුමක් ද?
තෙවනුව, 2019 ජනවාරි මස ශ්රී ලංකා මහ බැංකුව ‘අචාර ධර්ම පද්ධතියක්’ පැනවීය. බැඳුම්කර වංචාව, බැඳුම්කර කොමිසම හා සිවිල් සමාජයෙන් හිටපු මහ බැංකු අධිපතිවරුන් වූ අජිත් නිවාඩ් කබ්රාල් හා අර්ජුන මහේන්ද්රන්ට එල්ල වු විවේචන එයට හේතු විය. එහි 3.6 හි දැක්වෙන්නේ දැනට මහ බැංකුවේ සමාජිකයෙකු (බැංකුවේ) තනතුරින් ඉවත්වීමෙන් වසරක් යන තුරු බැංකු හෝ වෙනත් මුල්ය ආයතනයක තනතුරක් දැරීය නොහැකි බව ය. ලබැඳියාවන් අතර ගැටුමක් ඇති නොවන සේ මහ බැංකුවේ නිලධාරීන් තනතුරින් පසුව ද, කටයුතු කළ යුතු යැයි එයින් හඟවයි. දේශපාලන පක්ෂයක් නියෝජනය කරමින් මන්ත්රී ධූරයක් දරා, පසු දින මහ බැංකුවේ අධිපතිවන්නට හැකි නම් මේ ආචාර ධර්ම පද්ධතිය හෝ යහපාලන ආණ්ඩුව සමයේ මහ බැංකු මංකොල්ලයෙන් පසුව ඇති වූ සංවාදයේ කිසිදු තාර්කික ඵලයක් නැත.
පුදුමය නම්, මේ ආචාර ධර්ම පද්ධතිය සකස් කිරීමට හේතු වූ පුද්ගයින් දෙදෙනාගෙන් අයෙකුම නැවත මහ බැංකුවේ අධිපති ලෙස පත් කිරීමට රජය උත්සහ දැරීමය. මහ බැංකුවේ පහළ තනතුරක් දරන අයෙකුට පැවරෙන ආචාර ධර්මීය සාධකය මහ බැංකු අධිපති ධූරයට අදාල නොවන්නේ ඇයි දැයි අර්ජුන මහේන්ද්රන් හෝ අජිත් නිවාඩ් කබ්රාල් හෝ මහ බැංකු අධිපති පුටුවට පත් කරන පත්වීම් බලධාරී ජනාධිපතිවරයා රටට හෙළි කළ යුතුය.
මහ බැංකු ඉතිහාසයේ සිදු වූ විශාලතම වංචාවන්ට ලැබැඳියාවන් අතර ගැටුම් චෝදනා එල්ලවන පුද්ගලයින් දෙදෙනාගෙන් අයෙකුට ආපසු මහ බැංකුව බාරදීම රටක ගමන් කරන මාවත පෙන්වයි.
එදා අර්ජුන මහේන්ද්රන් නැවත පත් කිරීමට විරුද්ධ මම ද ඇතුළු පිරිසක් අධිකරණයට ගියේය. පෙලපාලි ගියේය. පිකටිං කළේය. මෛත්රීපාල සිරිසේන ජනාධිපතිවරයා එම විරෝධය සලකා මහේන්ද්රන් නැවත පත් කළේ නැත. අද, වසර 15 කට පසුවත්, 2006 මහ බැංකු අධිපති වූ කබ්රාල්ට වඩා එම තනතුරට අලුත් මුහුණක් රජයට හමුවී නැත.
යහපාලන ආණ්ඩුව හා එහි පාර්ශවරුවන් වූ පිරිස් මහ බැංකු දුෂිතයන්ට එරෙහිව කටයුතු කළේ නැත. ජනතා විමුක්ති පෙරමුණ හැර, මේ පාර්ලිමේන්තුවේ විපක්ෂයේ කිසිවෙකුත් මුදල් රාජ්ය ඇමති සහ ඔහුගේ අතීත ක්රියාකාරකම් ගැන පාර්ලිමේන්තුවේ දී හෝ ඉන් පිටත දී කටක් ඇරියේ නැත. තමන්ට දේශපාලන වාසියක් ලැබෙන බැවින් හෝ අද හෝ ප්රමාද වී හෝ විපක්ෂය අවදිවීම මේ දුෂිත දේශපාලනයේ ලැජ්ජා නැති රංගනයේම කොටසකි.
මහ බැංකු බැඳුම්කර කොමිසම සහ වෝහාරික විගණනයේ චෝදනා එල්ල වී ඇති අර්ජුන මහේන්ද්රන් හා අජිත් නිවාඩ් කබ්රාල් දෙදෙනා කිසි ලෙසකින් හෝ නැවත මහ බැංකු අධිපති ධූරයට පත් නොකළ යුතුය. එය වැලැක්වීම සඳහා සියළු පාර්ශවයන් එක් විය යුතුය.
මහ බැංකු අධිපති දේශමාන්ය මහාචාර්ය ඩබ්.ඩී. ලක්ෂ්මන් එළැඹෙන 14 වෙනිදා සිය ධුරයෙන් ඉවත්වීමට තීරණය කර ඇති බව සිකුරාදා (සැප්තැම්බර් 10) පැවසීය.
විශේෂ ප්රකාශයක් කරමින් ඔහු සඳහන් කළේ, ලබන මාසයට යෙදෙන සිය 80 වෙනි උපන් දිනයේදී විශ්රාම යෑමට තීරණය කර තිබුණ ද පසුගිය දින 10 තුළ ඇතිවූ සිත්රිදවීම් නිසා තමා දැඩි මානසික ආතතියකට ලක්ව සිටි බවය. ඒ අනුව, කලින් සැලසුම් කළ විශ්රාම යාමේ දිනට සති හයකට පෙර එනම් ලබන අඟහරුවාදා සිය ධුරයේ අවසන් දිනය බව මහාචාර්ය ඩබ්ලිව්ඩී ලක්ෂ්මන් පැවසීය.
තමා ජනාධිපති ගෝඨාභය රාජපක්ෂගේ ආර්ථික ප්රතිපත්තිය සකස් කළ නමුත් මතවාදී හා පෞද්ගලික ගැටුම් හේතුවෙන් එය මුළුමණින් ක්රියාත්මක කිරීමට නොහැකි වූ බව මහ බැංකු අධිපතිවරයා කීය.
“පසුගිය සතිය හෝ දින 10 ක කාලය තුළ මාධ්ය තුළ අප්රසන්න වාර්තා තිබුණා.” ඔහු මාධ්ය වෙත පැවසීය.
“සමහර දේශපාලන ගැටලුත් තිබෙනවා, පෞද්ගලික ගැටලුත් කිහිපයක් තිබෙනවා. සාමාන්යයෙන් මගේ සැලැස්මට අනුව දේවල් ලබා ගැනීම පහසු වුණේ නැහැ.”
මෙලෙස මහ බැංකු අධිපති තනතුර අත්හැරීමට සිදුවීම සැඟවී පැමිණි ආශිර්වාදයක් ලෙස තමාගේ මිතුරන් සහ හිතවතුන් සිතන බවද ඔහු පැවසීය.
ඔහු තවදුරටත් කියා සිටියේ, “මහ බැංකු අධිපති පදවිය දරමින් කිහිප අවස්ථාවකම මා ප්රකාශ කළ කරුණක් මෙහි ලා සඳහන් කිරීමට සිතේ. එනම්, අප ඉගෙනගත් කාලයේත්, අදත්, අපි අපේ රට ඌණ සංවර්ධිත හෝ දියුණු වෙමින් පවතින රටක් සේ හඳුන්වමින් කටයුතු කරමු. එය ජාත්යන්තර වශයෙන් පිළිගත් සම්ප්රදාය බව මම දනිමි. එහෙත් තවමත් මෙසේ දියුණු වෙමින් පවතින රටක් ලෙස ලංකාව හඳුන්වා ගැනීමට සිදුවීම ගැන සැබවින්ම අප කණගාටු විය යුතුයි. මෙම තත්ත්වයෙන් මිදීමට ගන්නා ප්රයත්නයේ හවුල්කරුවකු වීමටයි මට අවශය වූයේ. එහෙත් ඒ සඳහා අප සමාජයේ හෝ අප පක්ෂ දේශපාලනයේ කැපවීමක් නැති බව, එසේම ඒ සඳහා පැහැදිලි ප්රතිපත්ති රාමුවක් එකහෙළා දීර්ඝ කාලීනව අනුගමනය නොකිරීමේ ප්රශ්නය, දෙවසරකට ආසන්න පසුගිය කාලය තුළ වඩාත් මැනවින් ප්රත්යක්ෂ කර ගැනීමට මට හැකි විය. මේ නිසා අපට පසුපසින් සිටි බොහෝ රටවල් එකක් පසුපස එකක් වශයෙන් “සංවර්ධන” ගමනේදී අප පසු කර යන්නේ. මෙම අවස්ථාවේ මා කෙටියෙන් සඳහන් කළ කරුණු ගැන කිව යුතු තවත් බොහෝ දේ ඇතත් මම මෙපමණකින් නවතිමි.”
ශ්රී ලංකාව “භයානක විදේශ විනිමය අර්බුදයකට” මුහුණ පා සිටින බව මුදල් ඇමති බැසිල් රාජපක්ෂ ප්රකාශ කිරීමෙන් දින තුනකට පසු සිය ඉල්ලා අස්වීම සිකුරාදා ප්රකාශයට පත්කරමින් මහ බැංකු අධිපතිවරයාගේ මෙම විශේෂ නිවේදනය නිකුත් විය.
ශ්රී ලංකාව මේ දිනවල විදේශ විනිමය අර්බුදයකට මුහුණ දී ඇති පසුබිමක එම අර්බුදයෙන් ගොඩ ඒම සඳහා රජය විවිධ උපක්රම අත්හදා බලමින් සිටින බව නොරහසකි.
ආනයන තහනම් කිරීම හරහා රටෙන් බැහැරට විදේශ විනිමය ගලායාම නැවැත්වීම හා විවිධ මාර්ගවලින් ණය ලබාගැනීම ද ඊට අයත් වේ. එහෙත් පවතින ගෝලීය අර්බුදය හමුවේ විදේශ ණය වෙළෙඳපොළෙන් ණය ලබාගැනීම අවාසි සහගත බැවින් චීනය හා බංගලාදේශය වැනි විවිධ රටවල් සමග විදේශ මුදල් හුවමාරු සදහා එළැඹීමට පියවර ගෙන තිබේ.
මුදල් හා ප්රාග්ධන වෙළෙඳපොළ සහ රාජ්ය ව්යවසාය ප්රතිසංස්කරණ රාජ්ය අමාත්ය අජිත් නිවාඩ් කබ්රාල් තම රාජ්ය අමාත්ය ධුරයෙන් ඉවත්වී නව මහ බැංකු අධිපතිවරයා ලෙස පත්වීමට නියමිත බව ඔහු මාධ්යවෙත පසුගිය දා ප්රකාශ කර තිබුණි.
අත්යවශ්ය ආනයන සඳහා මුදල් යෙදවීම සඳහා බොහෝ පෞද්ගලික බැංකුවල විදේශ මුදල් නොමැති වීම හේතුවෙන් රුපියල ඉතාමත් සීග්රයෙන් අවප්රමාණය වී ඇති අතර පසුගිය සතියේ එය ඇමරිකා එක්සත් ජනපද ඩොලරයකට රුපියල් 230ක් දක්වා පහත වැටිණි.
සීනි සහ සහල් සඳහා බොහෝ දිනවල සතොස ඇතුළු බොහෝ වෙළෙදසල්ඉදිරිපිට දිගු පෝලිම් දැකගත හැකි අතර බොහෝ පාරිභෝගිකයින් පැවසුවේ වෙළෙඳපොළේ මේ වන විට ආනයනික ආහාර ද්රව්ය මෙන්ම කිරි පිටි හිඟයක් ඇති බවකි.
මේවන විට උද්ගතව ඇති ආර්ථික අර්බුදය හා විදේශ මුදල් හිඟකමට පිළියම් යෙදීමට ජනාධිපතිවරයා පසුගිය සතියේ හදිසි නීතිය ප්රකාශ කළේය.
විදේශ මුදල් රට තුළ ඉතිරි කිරීම සඳහා රජය මේ වන විටත් වාහන හා වෙනත් භාණ්ඩ සහ ආහාර පිසින තෙල් සහ කුළුබඩු ආනයනය කිරීම තහනම් කර තිබුණි.
එහෙත් පවතින විදේශ විනිමය අර්බුදය හමුවේ මහ බැංකුව පසුගිය බදාදා (සැප්තැම්බර 8) ජංගම දුරකථන, පාරිභෝගික භාණ්ඩ, ටයර් සහ ඇඳුම් ඇතුළු භාණ්ඩ 623ක් ආනයනය සඳහා ණය ලබා නොදී සියයට සියයක ආන්තික මුදල් තැන්පතු අවශ්යතාවක් (100 per cent cash margin deposit requirement) වහාම ක්රියාත්මක වන පරිදි පැනවීම තුළින් මහ බැංකුව බ්රහස්පතින්දා (සැප්තැම්බර් 9) සීමා තවදුරටත් දැඩි කළේය.
මහා බැංකුව ප්රකාශ කළේ ඒ තුළින් අධික ආනයන අධෛර්යමත් කිරීම ඔස්සේ විනිමය අනුපාතිකයේ ස්ථාවරභාවය සහ විදේශ මුදල් වෙළෙඳපොළ ද්රවශීලතාව රැකගැනීම සඳහා දැනටමත් සිදු කෙරෙන උත්සාහයන්ට මෙම පියවර සහය වනු ඇතැයි ඔවුන් අපේක්ෂා කරන බවය.
පවතින කොරෝනා වයිරසයට ගොදුරු වීමත් සමග පසුගිය වසරේ සිට රට විටින් විට අගුලු දැමීමත් සමග රටේ ප්රධාන විදේශ විනිමය උපයන ආදායම් මාර්ගයක් වන සංචාරක අංශය වසා දැමීමෙන් පසු ශ්රී ලංකාවේ ආර්ථිකය සියයට 3.6 කින් වාර්තාගත ලෙස හැකිලී ගියේය.
නිල සංඛ්යා ලේඛනවලින් පෙනී යන්නේ ජූලි මස අවසානයේදී ශ්රී ලංකාවේ විදේශ සංචිතය ඩොලර් බිලියන 2.8 දක්වා පහත වැටී ඇති බවය. වසරේ ඉතිරි කාලය තුළ විදේශ ණය ගෙවීම සඳහා ඩොලර් බිලියන 2.0 ක් පමණ ගෙවීමට සිදු වේ.
ජාත්යන්තර ශ්රේණිගත කිරීමේ ආයතන විසින් ශ්රී ලංකාවේ ණය තත්ත්වය පහත හෙලනු ලැබ ඇති අතර ණය ගෙවීම ඉක්මණින් පැහැර හැරිය හැකි බවට බිය පළ කර තිබේ.
බී.බී.සී සන්දේශ ඇසුරිනි
සැප්තැම්බර් 03-09 සතියේ පිටකොටුව, නාරාහේන්පිට, දඹුල්ල, තඹුත්තේගම සහ නුවරඑළිය ඇතුළු දිවයින පුරා ප්රධාන තොග වෙළෙදපොළ රැසක සහල්, එළවළු සහ මාළු වර්ග රැසක තොග මිල ගණන්වල පහළ යාමක් වාර්තා වූ අතර දේශීය කරවල සැපයුම පහළයාම හේතුවෙන් බොහොමයක් කරවල වර්ගයන්හි තොග මිල ගණන් සහ අස්වනු ප්රදේශවලින් සීමිත සැපයුමක් පැවතීම සහ ඉහළ ගුණත්වයෙන් යුත් තොග වෙළඳපොළේ පැවතීම හේතුවෙන් බොහොමයක් පලතුරු වර්ගවල මිල ගණන් ඉහළයාමක් හෙක්ටර් කොබ්බෑකඩුව ගොවිකටයුතු පර්යේෂණ හා පුහුණු කිරීමේ ආයතනය නිරීක්ෂණය කළ හැකි විය.
වෙළෙදපොළ මිල ගණන් ස්ථාවර පවත්වා ගැනීමේ අරමුණින් රජය විසින් ප්රධාන වී නිෂ්පාදන ප්රදේශයන්හි සහ කොළඹ සහ ඒ අවට ප්රදේශවල පවතින වී, සහල් සහ සීනි තොග සොයා විමර්ශන ආරම්භ කිරීමත් සමග සහ රජය විසින් සහල් සදහා උපරිම සිල්ලර මිලක් නියම කිරීම හේතුවෙන් සියලුම දේශීය සහල් වර්ගවල මිල ගණන් පහළ යාමක් වාර්තා විය.
එමෙන්ම වැලිමඩ ප්රදේශයෙන් දේශීය සැපයුම ඉහළ යාම හේතුවෙන් දේශීය හා ආනයනික අර්තාපල් මිල ගණන් පහළ යාමක් වාර්තා වූ අතර යල කන්නයේ අස්වනු නෙළීම වඩාත් තීව්රර වීම නිසා සහ නිරෝධාන ඇදිරි නීතිය ක්රියාත්මක වන දිනවලදී ආර්ථික මධ්යස්ථාන වෙත තොග සැපයුම ඉහළ යාම හේතුවෙන් එළවළු මිල ගණන් ද සැලකිය යුතු ලෙස පහළ ගොස් තිබුණි.
තොග සැපයුම ඉහළයාම හේතුවෙන් බොහොමයක් මාළු වර්ගයන්හි තොග මිල ගණන් පහළ ගොස් ඇති අතර දේශීය කරවල සැපයුම පහළයාම හේතුවෙන් බොහොමයක් කරවල වර්ගයන්හි තොග මිල ගණන් ඉහළ ගොස් ඇත.
අස්වනු ප්රදේශවලින් සීමිත සැපයුමක් පැවතීම සහ ඉහළ ගුණත්වයෙන් යුත් තොග වෙළඳපොළේ පැවතීම හේතුවෙන් බොහොමයක් පලතුරු වර්ගවල මිල ගණන් ඉහළගොස් තිබුණි. කෙසේ වෙතත් උපරිම මිල පහළයාම 10%ක් ලෙස දිවුල් සඳහා වාර්තා වූ අතර විරකැටිය සහ බෙලිඅත්ත යන ප්රදේශවලින් ඉහළ සැපයුමක් පැවතීම එයට හේතු විය.
සහල්, එළවළු, පලතුරු, මාළු සහ කරවල ඇතුළු අත්යවශ්ය භාණ්ඩ වර්ග රැසක තොග වෙළෙදපොළ මිල විශ්ලේෂණය සම්පූර්ණයෙන්ම පහත දැක්වේ.
සහල්
ශ්රී ලංකා රජය විසින් සහල් සඳහා අළුතින් පනවන ලද උපරිම සිල්ලර මිල සීමාවන් හේතුවෙන් සියලුම දේශීය සහල් වර්ගවල තොග මිල ගණන් සැලකිය යුතු ලෙස පහළ ගොස් තිබුණි. දෙවන ශ්රේණියේ නාඩු සහ දෙවන ශ්රේණියේ සම්බා මිල ගණන් පිළිවෙළින් 10%කින් සහ 8%කින් පහළ ගොස් තිබුණු අතර ඒවායේ මිල පරාසයන් පිළිවෙළින් කිලෝවකට රු.95.00-105.00ක් සහ රු.102.00-120.00ක් විය. සුදු කැකුළු සහ රතු කැකුළු මිල ගණන් ද පිළිවෙළින් 7%කින් සහ 1%කින් පහළ ගොස් තිබුණු අතර එම දෙවර්ගයේම මිල පරාසය කිලෝවකට රු.90.00-95.00ක් ලෙස සටහන් විය.
පසුගිය වසරේ සමාන කාලපරිච්ඡේදය හා සැසඳීමේදී සියලුම දේශීය සහල් වර්ගවල වර්තමාන තොග මිල ගණන් 3%-7% දක්වා පරාසයක ඉහළ ගොස් තිබුණු අතර උපරිම මිල ඉහළයාම දෙවන ශ්රේණියේ නාඩු සඳහා වාර්තා විය.
එළවළු
යල කන්නයේ එළවළු අස්වනු නෙළන සමයේ පවතින ඉහළ සැපයුම හේතුවෙන් එළවළු වර්ග බොහොමයක මිල ගණන් පහළ ගොස් ඇත.
උඩරට එළවළු වර්ග පිළිබඳව සලකා බැලීමේදී, වැලිමඩ නිෂ්පාදන ප්රදේශවලින් ලැබෙන ඉහළ සැපයුම හේතුවෙන් එළවළු වර්ග සියල්ලේම මිල ගණන් පහළ ගොස් පැවතුණි. බෝංචි සහ ලීක්ස් දෙවර්ගයේම මිල ගණන් 23%කින් පහළ ගොස් තිබුණු අතර නෝකෝල් හැර අනෙකුත් සියලුම උඩරට එළවළු වර්ගවල මිල ගණන් 8%-11% අතර පරාසයකින් පහළ ගොස් තිබුණි. තවදුරටත් නෝකෝල් මිල 1%කින් පහළ ගොස් ඇත.
කෙසේ නමුත් තත්ත්වයෙන් ඉහළ තොග සූරියවැව ප්රදේශයෙන් ලැබීම හේතුවෙන් තක්කාලි මිල 11%කින් ඉහළ ගොස් තිබුණි. තවදුරටත් නුවරඑළිය සහ තලවාකැලේ ප්රදේශවලින් තත්ත්වයෙන් ඉහළ තොග ලැබීම හේතුවෙන් මාළු මිරිස් මිරිස් මිල 8%කින් ඉහළ ගොස් ඇත.
පහතරට එළවළු පිළිබඳව සලකා බලනවිට දී ඇඹිලිපිටිය තඹුත්තේගම, නොච්චියාගම, දඹුල්ල සහ සුරියවැව ප්රදේශවලින් ලැබුණු ඉහළ සැපයුම හේතුවෙන් වැටකොළු සහ මෑකරල් හැර අනෙකුත් සියලුම එළවළු වර්ගවල මිල ගණන් පහළ ගොස් තිබුණි. ඇඹිලිපිටිය සහ තඹුත්තේගම ප්රදේශවලින් ලැබුණු සැපයුම ඉහළයාම හේතුවෙන් පතෝල ද මොණරාගල සහ දඹුල්ල ප්රදේශවලින් ලැබුණු සැපයුම ඉහළයාම නිසා වට්ටක්කා ද යන දෙවර්ගයේම මිල ගණන් 30%කින් පහළ ගොස් තිබුණි. මීට අමතරව ඇඹිලිපිටිය, තඹුත්තේගම සහ බොහොමයක් ප්රධාන නිෂ්පාදන ප්රදේශවලින් ලැබුණු සැපයුම ඉහළයාම හේතුවෙන් පිපිඤ්ඤා මිල 27%කින් පහළ ගොස් ඇත. බණ්ඩක්කා, අළු කෙසෙල් සහ කරවිල මිල ගණන් පිළිවෙළින් 17%, 8% සහ 5%කින් පහළ ගොස් තිබුණු අතර ඇඹිලිපිටිය සහ තඹුත්තේගම ප්රදේශවලින් ලැබුණු සැපයුම ඉහළයාම ඊට හේතු විය. තවදුරටත් මන්නාරම, ත්රිකුණාමලය සහ දඹුල්ල ප්රදේශවලින් ලැබුණු සැපයුම ඉහළයාම හේතුවෙන් මුරුංගා මිල 6%කින් පහළ ගොස් ඇති අතරම වම්බටු මිල 2%කින් පහළ ගොස් තිබුණි. කෙසේ නමුත් පුත්තලම් ප්රදේශවලින් ලැබුණු සැපයුම පහළයාම නිසා මෑකරල් මිල ද තත්ත්වයෙන් ඉහළ තොග බේරුවල, හොරණ සහ හංවැල්ල ප්රදේශවලින් ලැබීම හේතුවෙන් වැටකොළු මිල ද පිළිවෙළින් 4% සහ 3%කින් ඉහළ ගොස් තිබුණි.
මේ අතර නොච්චියාගම ප්රදේශයෙන් තත්තවයෙන් ඉහළ තොග ලැබීම හේතුවෙන් අමු මිරිස් මිල 22%කින් ඉහළ ගොස් තිබුණි. කෙසේ නමුත් අම්පාර සහ මොණරාගල ප්රදේශවලින් ලැබුණු සැපයුම ඉහළයාම හේතුවෙන් දෙහි මිල 24%කින් පහළ ගොස් ඇත.
පසුගිය වසරේ සමාන කාලපරිච්ඡේදය හා සැසඳීමේදී එළවළු වර්ග බොහොමයක තොග මිල ගණන් පහළ ගොස් ඇති අතර උපරිම මිල පහළයාම අළු කෙසෙල් සඳහා 63%ක් ලෙස සටහන් විය.
පොල්
ලොකු සහ කුඩා පොල් දෙවර්ගයේම මිල ගණන් පිළිවෙළින් 1%කින් සහ 6%කින් පහළ ගොස් ඇති අතර ඒවායේ මිල පරාසයන් ලොකු පොල් ගෙඩියක් සඳහා ගෙඩියකට රු.70.00-71.00ලෙස ද, කුඩා පොල් ගෙඩියක් රු.60.00-62.00ක් ලෙස වාර්තා විය. පසුගිය වසරේ සමාන කාලපරිච්ඡේදය හා සැසඳීමේදී ලොකු පොල් ගෙඩියක මිල 1%කින් ඉහළ ගොස් ඇති අතර කුඩා පොල් ගෙඩියක මිල 4%කින් පහළ ගොස් ඇත.
පලතුරු
අස්වනු ප්රදේශවලින් සීමිත සැපයුමක් පැවතීම සහ ඉහළ ගුණත්වයෙන් යුත් තොග වෙළඳපොළේ පැවතීම හේතුවෙන් බොහොමයක් පලතුරු වර්ගවල මිල ගණන් ඉහළගොස් තිබුණි. උපරිම මිල ඉහළයාම 9%ක් ලෙස විශාල ප්රමාණයේ අන්නාසි සඳහා වාර්තා වූ අතර කුඩා සහ මධ්යම ප්රමාණයේ අන්නාසි මිල ගණන් 5%කින් ඉහළ ගොස් තිබූ අතර ගුණත්වයෙන් ඉහළ තොග වෙළඳපොළෙහි පැවතීම එයට හේතු විය. අස්වනු නෙලන ප්රදේශවලින් සීමිත සැපයුමක් පැවතීම හේතුවෙන් පැණි දොඩම් මිල ගණන් 8%කින් ඉහළ ගොස් තිබුණි. ඇඹිලිපිටිය සහ දෙනියාය යන ප්රදේශවලින් සීමිත සැපයුමක් පැවතීම හේතුවෙන් ඇඹුල්, සීනි සහ කෝලිකුට්ටු යන සියලුම වර්ගයන්ගේ කෙසෙල් මිල ගණන් 3%-4% දක්වා පරාසයක ඉහළ ගොස් ඇති අතර ආනමාලු සහ ඇම්බුන් මිලෙහි සැලකිය යුතු වෙනසක් වාර්තා නොවීය. අලිගැටපේර මිල 2%කින් ඉහළ ගොස් ඇති අතර ගුණත්වයෙන් ඉහළ තොග වෙළඳපොළෙහි පැවතීම එයට හේතු විය.
මෙයට අමතරව අස්වනු නෙලන ප්රදේශවලින් සීමිත සැපයුමක් පැවතීම හේතුවෙන් පැපොල් සහ තැඹිලි මිල ගණන් පිළිවෙළින් 2%කින් සහ 1%කින් ඉහළ ගොස් තිබුණි.
කෙසේ වෙතත් උපරිම මිල පහළයාම 10%ක් ලෙස දිවුල් සඳහා වාර්තා වූ අතර විරකැටිය සහ බෙලිඅත්ත යන ප්රදේශවලින් ඉහළ සැපයුමක් පැවතීම එයට හේතු විය. වැල්දොඩම් මිල 6%කින් පහළ ගොස් ඇති අතර අස්වනු නෙලන ප්රදේශවලින් පැවති ඉහළ සැපයුම එයට හේතු විය. ගුණත්වයෙන් පහළ තොග වෙළඳපොළෙහි පැවතිම හේතුවෙන් ආනයනික මිදි මිල 1%ක් ලෙස පහළ ගොස් පැවතුණි.
පසුගිය වසරේ සමාන කාලපරිච්ඡේදය හා සැසඳීමේදී බොහොමයක් පලතුරු වර්ගවල මිල ගණන් ඉහළ ගොස් තිබූ අතර උපරිම මිල ඉහළයාම 85%ක් ලෙස දිවුල් සඳහා වාර්තා විය.
මාළු
තොග සැපයුම ඉහළයාම හේතුවෙන් බොහොමයක් මාළු වර්ගයන්හි තොග මිල ගණන් පහළ ගොස් ඇත. උතුරු ප්රදේශයෙන් තොග සැපයුම ඉහළයාමත් සමඟ උපරිම මිල පහළයාම 17%ක් ලෙස තෝරා සඳහා වාර්තා විය. එහි මිල පරාසය කිලෝවක් සඳහා රු.1280.00-1600.00ක් අතර පැවතුණි. බේරුවල සහ මාතර යන ප්රදේශවලින් තොග සැපයුම ඉහළයාමත් සමඟ බලයා මිල 15%කින් පහළ ගොස් ඇති අතර එහි මිල පරාසය කිලෝවක් සඳහා රු.300.00-400.00 අතර පැවතුණි.
කල්පිටිය හා මුලතිව් ප්රදේශවලින් තොග සැපයුම ඉහළයාමත් සමඟ හුරුල්ලා මිල 13%කින් පහළ ගොස් ඇති අතර එහි මිල පරාසය කිලෝවක් රු.350.00-420.00 අතර පැවතුණි. උතුරු ප්රදේශයෙන් තොග සැපයුම ඉහළයාමත් සමඟ පරව් මිල 10%කින් පහළ ගොස් ඇති අතර එහි මිල පරාසය කිලෝවක් සඳහා රු.650.00-850.00 අතර පැවතුණි. එසේම යාපනය ප්රදේශයෙන් තොග සැපයුම ඉහළයාමත් සමඟ මෝරා මිල 7%කින් පහළ ගොස් ඇති අතර එහි මිල පරාසය කිලෝවක් සඳහා රු.600.00-720.00 අතර පැවතුණි. මීට අමතරව පිළිවෙළින් සාලයා මිල 6%කින් ද, ඉස්සා මිල 5%කින් ද කෙලවල්ලා මිල 3%කින් ද පහළ ගොස් ඇත.
කෙසේ නමුත් මීගමුව හා වාලච්වේන යන ප්රදේශවලින් තොග සැපයුම පහළයාම හේතුවෙන් තලපත් මිල 8%කින් ඉහළ ගොස් ඇති අතර එහි මිල පරාසය කිලෝවක් සඳහා රු.1,100.00-1,300.00 අතර පැවතුණි.
පසුගිය වසරේ සමාන කාලපරිච්ඡේදය හා සැසඳීමේදී බොහොමයක් මාළු වර්ගයන්හි තොග මිල ගණන් 1%-33% අතර ඉහළ ගොස් ඇති අතර උපරිම මිල ඉහළයාම තලපත් සඳහා වාර්තා විය.
කරවල
දේශීය කරවල සැපයුම පහළයාම හේතුවෙන් බොහොමයක් කරවල වර්ගයන්හි තොග මිල ගණන් ඉහළ ගොස් ඇත. මීගමුව ප්රදේශයෙන් තොග සැපයුම පහළයාමත් සමග දේශීය මෝරා මිල 6%කින් ඉහළ ගොස් ඇති අතර එහි මිල පරාසය කිලෝවක් සඳහා රු.1,100.00-1,300.00 අතර පැවතුණි. යාපනය ප්රදේශයෙන් තොග සැපයුම පහළයාමත් සමග දේශීය අඟුළුවා මිල 5%කින් ඉහළ ගොස් ඇති අතර එහි මිල පරාසය කිලෝවක් සඳහා රු.1,200.00-1,300.00 අතර පැවතුණි. එසේම මීගමුව ප්රදේශයෙන් තොග සැපයුම පහළයාමත් සමග දේශීය මඩුවා මිල 3%කින් ඉහළ ගොස් ඇති අතර එහි මිල පරාසය කිලෝවක් සඳහා රු.790.00-850.00 අතර පැවතුණි. මිට අමතරව දේශීය සාලයා සහ දේශීය කට්ටාවාහි මිල 2%කින් ඉහළ ගොස් ඇත.
කෙසේ නමුත් බේරුවල හා මාතර ප්රදේශවලින් තොග සැපයුම ඉහළයාම හේතුවෙන් දේශීය බලයා මිල 4%කින් පහළ ගොස් ඇති අතර එහි මිල පරාසය කිලෝවක් සඳහා රු.680.00-820.00 අතර පැවතුණි.
පසුගිය වසරේ සමාන කාලපරිච්ඡේදය හා සැසඳීමේදී බොහොමයක් කරවල වර්ගයන්හි තොග මිල ගණන් 17%-61% අතර ඉහළ ගොස් තිබෙන අතර උපරිම මිල ඉහළයාම දේශීය බලයා සඳහා වාර්තා විය.
බිත්තර
දුඹුරු බිත්තරයක මිල 3%කින් ද සුදු බිත්තරයක මිල 2%කින් ද පහළ ගොස් ඇති අතර ඒවායෙහි මිල පරාසයන් පිළිවෙළින් රු.18.00-18.50 අතර සහ රු.16.00-17.00 අතර වාර්තා විය.
පසුගිය වසරේ සමාන කාලපරිච්ඡේදය හා සැසඳීමේදී සුදු බිත්තර සහ දුඹුරු බිත්තර මිල පිළිවෙළින් 19%කින් සහ 13%කින් පහළ ගොස් ඇත.
වියළි මිරිස්
තොග සැපයුම ඉහළයාම හේතුවෙන් ආනයනික වියළි මිරිස් තොග මිල 1%කින් පහළ ගොස් තිබුණු අතර එහි මිල පරාසය කිලෝවකට රු.510.00-525.00ක් විය. පසුගිය වසරේ සමාන කාලපරිච්ඡේදය හා සැසඳීමේදී ආනයනික වියළි මිරිස් තොග මිල 28%කින් ඉහළ ගොස් තිබුණි.
ළූණු
තත්වයෙන් ඉහළ තොග වෙළඳපොළ තුළ පැවතීම හේතුවෙන් සහ ඉල්ලුම ඉහළයාම හේතුවෙන් සිනන් සහ වේදාලන් තොග මිල ගණන් පිළිවෙළින් 29%කින් සහ 16%කින් ඉහළ ගොස් තිබුණු අතර ඒවායේ මිල පරාසයන් පිළිවෙළින් කිලෝවකට රු.180.00-230.00ක් සහ කිලෝවකට රු.240.00-260.00ක් ලෙස සටහන් විය. ආනයනික ලොකුළූණු සඳහා පනවා ඇති විශේෂ ආනයනික බද්ද ඉහළ දැමීම හේතුවෙන් දේශීය ලොකුළූණු සහ ආනයනික ලොකුළූණු මිල ගණන් පිළිවෙළින් 18%කින් සහ 14%කින් ඉහළ ගොස් තිබුණු අතර ඒවායේ මිල පරාසයන් පිළිවෙළින් කිලෝවකට රු.105.00-135.00ක් සහ රු.70.00-140.00ක් ලෙස සටහන් විය.
දේශීය ලොකුළූණු තොග මිල කිලෝවකට රු.90.00-110.00ක් ලෙස තඹුත්තේගම වෙළඳපොළෙන් වාර්තා විය. පළමු ශ්රේණිය සහ දෙවන ශ්රේණිය දේශීය ලොකුළූණු මිල පිළිවෙළින් කිලෝවකට රු.80.00-110.00 සහ රු.65.00-75.00 දක්වා දඹුල්ල වෙළඳපොළින් වාර්තා විය. දඹුල්ල වෙළඳපොළේ දේශීය ලොකුළූණු සැපයුමන් වැඩි ප්රමාණයක් පළමු ශ්රේණියෙ ලොකුළූණු විය. මාතලේ ප්රදේශයේ ඉහළ ලොකුළූණු අස්වැන්නක් මෙම මාසය අගදී අපේක්ෂා කළ හැක.
පසුගිය වසරේ සමාන කාලපරිච්ඡේදය හා සැසඳීමේදී වේදාලන් සහ සිනන් තොග මිල ගණන් පිළිවෙළින් 68%කින් සහ 56%කින් ඉහළ ගොස් තිබුණු අතර ආනයනික ලොකුළූණු සහ දේශීය ලොකුළූණු මිල ගණන් පිළිවෙළින් 20%කින් සහ 6%කින් පහළ ගොස් තිබුණි.
අර්තාපල්
දේශීය තොග සැපයුම ඉහළයාම හේතුවෙන් සියලුම අර්තාපල් වර්ගවල තොග මිල ගණන් සැලකිය යුතු ලෙස පහළ ගොස් තිබුණි. ආනයනික අර්තාපල් මිල 22%කින් පහළ ගොස් තිබුණු අතර එහි මිල පරාසය කිලෝවකට රු.110.00-160.00ක් විය. (පාකිස්ථාන් අර්තාපල් සඳහා මිල පරාසය කිලෝවකට රු.110.00-130.00ක් ද ඉන්දියානු අර්තාපල් සඳහා මිල පරාසය කිලෝවකට රු.155.00-160.00ක් ද ලෙස විය). වැලිමඩ අර්තාපල් සහ නුවරඑළිය අර්තාපල් මිල ගණන් පිළිවෙළින් 15%කින් සහ 12%කින් පහළ ගොස් තිබුණු අතර ඒවායේ මිල පරාසයන් පිළිවෙන් කිලෝවකට රු.160.00-175.00ක් සහ කිලෝවකට රු.180.00-195.00ක් ලෙස සටහන් විය.
පසුගිය වසරේ සමාන කාලපරිච්ඡේදය හා සැසදීමේදී සියලුම අර්තාපල් වර්ගවල තොග මිල ගණන් 8%-44% දක්වා පරාසයක ඉහළ ගොස් තිබුණි.
මාෂ භෝග
ආනයනික වියදම් ඉහළයාම හේතුවෙන් රතු පරිප්පු මිල 1%කින් ඉහළ ගොස් තිබුණු අතර එහි මිල පරාසය කිලෝවකට රු.245.00-252.00 දක්වා විය. තොග සැපයුම පහළයාම හේතුවෙන් මුං ඇට මිල 1%කින් ඉහළ ගොස් තිබුණු අතර එහි මිල පරාසය කිලෝවකට රු.750.00-800.00 ක් විය. මේ අතර තොග සැපයුම ඉහළයාම හේතුවෙන් රතු කව්පි මිල 2%කින් පහළ ගොස් තිබුණු අතර එහි මිල පරාසය කිලෝවකට රු.350.00-400.00 ක් විය. සුදු කව්පි මිල සැලකිය යුතු ලෙස වෙනස් වී නොතිබුණු අතර එහි කිලෝවක සාමාන්ය මිල රු.539.00ක් ලෙස සටහන් විය.
පසුගිය වසරේ සමාන කාලපරිච්ඡේදය හා සැසඳීමේදී මුං ඇට තොග මිල 180%කින් ඉහළ ගොස් තිබුණු අතර රතු පරිප්පු සහ රතු කව්පි මිල ගණන් ද පිළිවෙළින් 81%කින් සහ 31%කින් ඉහළ ගොස් තිබුණි.
වී – ගොවියාට ලැබුණු මිල
කෙටි වී සාමාන්ය මිල කිලෝවකට රු.4.00ක පහළයාමක් පොළොන්නරුව සහ කලාවැව ප්රදේශවලින් වාර්තා වූ අතර මෙම ප්රදේශයන්හි දිග සුදු වී මිල ද කිලෝවකට රු.2.00-4.00 දක්වා පරාසයක පහළයාමක් වාර්තා විය. මේ අතරතුර, දිග සුදු වී මිල කිලෝවකට රු.4.00ක ඉහළයාමක් අනුරාධපුර ප්රදේශයෙන් ද කෙටි වී මිල කිලෝවකට රු.2.00ක පහළයාමක් අම්පාර ප්රදේශයෙන් ද වාර්තා විය. කෙටි වී සහ සුදු දිග වී දෙවර්ගයෙහි සාමාන්ය මිල පරාසය පිළිවෙළින් කිලෝවකට රු.52.00-59.00 සහ රු.50.00-56.00 දක්වා විය. හම්බන්තොට හැර සෙසු දකුණු පළාත් ප්රධාන වී නිෂ්පාදන ප්රදේශයන්හි රතු දිග වී මිලෙහි සැලකිය යුතු වෙනසක් වාර්තා නොවූ අතර සාමාන්ය මිල පරාසය කිලෝවකට රු.51.00-55.00 දක්වා විය.
වී මෝල් හිමියන්, සහල් ව්යාපාරිකයන් සහ සහල් හිඟය පිළිබඳ පැතිරෙන දුර්මත පිළිබඳ ජනාධිපති මාධ්ය ප්රකාශක කිංස්ලි රත්නායක මහතා විසින් මාධ්ය නිවේදනයක් නිකුත් කර තිබෙනවා. එම මාධ්ය නිවේදනය සංස්කරණයකින් තොරව සම්පූර්ණයෙන්ම පහත පළ වෙනවා
රටේ පවතින වර්තමාන තත්ත්වය හමුවේ, ජනාධිපතිතුමා විසින් ගත් තීරණය ප්රකාරව වී මෝල් හිමියන්, සහල් ව්යාපාරිකයන්, සහල් හිඟය පිළිබඳව පැතිරෙන දුර්මත දුරුකරමින් අතිගරු ජනාධිපති ගෝඨාභය රාජපක්ෂ මැතිතුමාගේත්, ආණ්ඩුවෙත් අදහස පිළිබඳව රට දැනුම්වත් කිරීමට මම මෙය අවස්ථාවක් කරගන්නවා.
හාල්, පිටි, සීනි ඇතුළු අත්යාවශ්ය භාණ්ඩ සම්බන්ධයෙන් අතිගරු ජනාධිපති ගෝඨාභය රාජපක්ෂ මැතිතුමා සිය බලතල ප්රකාරව “මහජන ආරක්ෂණ පනත” යටතේ හදිසි නීති රෙගුලාසි ඇතුළත් ගැසට් නිවේදනය පසුගිය අගෝස්තු 30 නිකුත් කළ බව ඔබ දන්නවා. ජනතාවාදී ආණ්ඩුවක වගකීම දරමින් ජනාධිපතිවරයා විසින් පාරිභෝගික ජනතාව ආරක්ෂා කිරීමේ මූලික පරමාර්ථය ඇතුවයි මෙම තීරණයට එළැඹියේ. ජන ජීවිතය යථාවත් කිරීමට අවශ්ය වී, සහල් සහ සීනි ඇතුළු පාරිභෝගික භාණ්ඩ බෙදාහැරීම, ඒ පිළිබඳව සම්බන්ධීකරණය සේම පුළුල් අධීක්ෂණය වෙනුවෙන් ඊට සමගාමීව අත්යාවශ්ය සේවා කොමසාරිස් ජනරාල්වරයෙක් පත් කෙරුණා.
ජනාධිපතිවරයා විසින් හදිසි නීති රෙගුලාසි බලාත්මක කිරීම පිළිබඳව ඉදිරිපත් කළ යෝජනාව පසුගියදා පාර්ලිමේන්තුවටත් ඉදිරිපත් කළා. එහිදී එය වැඩි ඡන්ද 81කින් මහජන නියෝජිතයන් අතින් සම්මත වූ බවත් රටටම දකින්න ලැබුණා. පවතින කොවිඩ් වතාවරණය පාලනය කිරීම වෙනුවෙන් රජය දැඩි අභියෝගයක් භාරගෙන සිටිනවා. ඒ වෙනුවෙන් රුපියල් බිලියන 500කට වැඩි වැය බරක් අද වන විටත් දරා තිබෙනවා.
මේ සියල්ලෙන් පෙන්නුම් කෙරෙන්නේ සාමාන්ය ජන ජීවිතය අඩාල නොවන ආකාරයට පවතින තත්ත්වයට මුහුණ දෙමින් අතිගරු ජනාධිපතිතුමා ප්රමුඛ රජය ජනතාව වෙනුවෙන් කැප වී සිටින බවයි. ඒ සඳහා අවශ්ය තීන්දු තීරණවලදී කිසිඳු පාර්ශ්වයක් අගතියට පත් කරමින් කටයුතු කරන්න ජනාධිපතිතුමා කිසි විටෙකත් සූදානම් නැහැ.
සහල් පිළිබඳ ගැටලුව සියලු පාර්ශ්ව සමග සම්මුතියකට එළැඹ, විසඳීමටයි රජය මුල සිටම කටයුතු කළේ. ගොවියා, ව්යාපාරිකයා වගේම පාරිභෝගිකයාත් ආරක්ෂා කෙරෙන සාධාරණ ක්රමවේදයක් රජය අපේක්ෂා කළා. ජනාධිපති ගෝඨාභය රාජපක්ෂ මැතිතුමා ප්රධාන පෙළේ වී මෝල් හිමියන් සමගත් මේ පිළිබඳව දීර්ඝ වශයෙන් සාකච්ඡා කළා. එකඟතාවන්ට එළැඹුණා. අග්රාමාත්ය මහින්ද රාජපක්ෂ මැතිතුමා සේම විෂයභාර අමාත්යවරු ව්යාපාරික ප්රජාව සමග සාකච්ඡා කළා.
රජය ගොවියා ශක්තිමත් කිරීම සඳහා රුපියල් 30ට, 32ට තිබුණ වී කිලෝව වෙනුවෙන් සහතික මිලක් නියම කළා. ඒ අනුව නාඩු සහ කැකුළු වී කිලෝවක් සඳහා රුපියල් 50ක්, සම්බා වී කිලෝවක් සඳහා රුපියල් 52ක්, කීරි සම්බා කිලෝවක් සඳහා රුපියල් 55ක් වශයෙන් මිල ගණන් නියම කෙරුණා.
නමුත් එම සහතික කළ වී මිලට සාපේක්ෂව නොගැළපෙන පරිදි නාඩු සහල් කිලෝව රුපියල් 125ක්, සම්බා සහල් කිලෝව රුපියල් 150ක්, කීරි සම්බා සහල් කිලෝව රුපියල් 225ක් දක්වා වෙළෙඳපොළේ සහල් මිල ඉහළ ගිය අතර එමගින් පාරිභෝගිකයන් දැඩි අසරණභාවයට පත් වුණා.
පීඩාවට පත් ජනතාවට උපරිම සාධාරණයක් ඉටු කිරීම උදෙසා “මහජන ආරක්ෂණ පනත” යටතේ පූර්ණ බලතල සහිතව පත් කෙරුණු අත්යාවශ්ය සේවා කොමසාරිස් ජනරාල්වරයා ක්රියාත්මක වුණේ ඉන් අනතුරුවයි. ඒ අනුව, සම්බා සහල් කිලෝවක උපරිම මිල ලෙස රුපියල් 103ක්, නාඩු කිලෝවක් සඳහා රුපියල් 98ක්, කීරි සම්බා කිලෝවක් රුපියල් 125ක්, කැකුළු සහල් කිලෝවක් සඳහා රුපියල් 95ක් වශයෙන් එම පාලන මිල ගණන් ගැසට් කරනු ලැබුවා.
ඉන් අනතුරුව රට මේ අවස්ථාවේ මුහුණ දී ඇති අර්බුදකාරී තත්ත්වය පිළිගත් ව්යාපාරික ප්රජාව, රජය අපහසුතාවයට පත් කරන්නේ නැති බවටත් එකඟව කටයුතු කරන බවටත් ප්රසිද්ධියේ ප්රකාශ නිකුත් කළ බව ඔබට මතක ඇති. නමුත් අවාසනාවකට රජය සමග වූ එකඟතා ඔවුන් වෙතින් පැහැර හැරුණා. ඒ අතරම පසුගිය දින කිහිපය වන විට මහාපරිමාණ වී මෝල් හිමියන් විසින් ඔවුන්ගේ දෛනික සහල් නිෂ්පාදන සහ බෙදාහැරීම් 50% කට වැඩි ප්රතිශතයකින් පහත හෙලනු ලැබුවා.
කොවිඩ් වසංගතයට මුහුණ දෙමින් පීඩාවට පත් පාරිභෝගිකයාට මෙම තත්ත්වය දැරිය නොහැකි තරමේ අසාධාරණයක් බව සියලු දෙනා පිළිගන්නා කාරණයක්. අත්යාවශ්ය සේවා කොමසාරිස් ජනරාල්වරයා කළ වැටලීම්වලින් 2021 සැප්තැම්බර් 08 දින පමණක් ප්රධාන වී මෝල් හිමියන් සතු සහල් ගබඩාවලින් රජයේ පාලන මිලට සහල් කිලෝ ග්රෑම් 807,375ක් ලබාගෙන සතොසට භාරදී තිබෙනවා.
මහා පරිමාණ වී මෝල් හිමියන් එකතුව සහල් මාෆියාවක් ඇතිකරන බවට චෝදනා කළ පිරිස්, වර්තමානයේ ඔවුන් රැකීමට ඉදිරිපත් වීම තුළින්ම, මේ සියලු ක්රියා පසුපස ඇති දේශපාලනය ඔබට පහසුවෙන් වටහා ගත හැකිවනු ඇති.
කෙසේ නමුත් සුරක්ෂිත රටක් වෙනුවෙන් ජනතාව විසින් ලබාදුන් ජනවරම සහ විශ්වාසය තහවුරු කරමින් ජනතා සුභසිද්ධිය වෙනුවෙන් ජනාධිපතිවරයාට ඇති බලතල ප්රකාරව තීන්දු තීරණ ගනිමින් ජනතා කේන්ද්රීය ආර්ථිකයක්, සෞභාග්යමත් රටක් ගොඩනගන බව ජනාධිපතිවරයාගේ ස්ථාවරයයි.
සැප්තැම්බර් 2 වන දා සිට, ශ්රී ලංකාවේ වයස අවු. 20 – 30 කාණ්ඩයේ පුද්ගලයින්ට ද දිස්ත්රික් මට්ටමෙන් කොවිඩ් එන්නත ලබාදීම ඇරඹුණි. මෙහිදී යුද හමුදාවේ මූලිකත්වයෙන්, හම්බන්තොට දිස්ත්රික්කයේ තරුණ පිරිසට පළමු මාත්රාව ලෙස ෆයිසර් එන්නත ලබාදීම සිදුවිය.
කෙසේ නමුත් ඒ පිළිබඳ විරෝධයක් සමාජ මාධ්ය ජාලාවන් තුළින් සේම වෛද්ය වෘත්තිකයින් අතරින් ද මතුවනු දක්නට ලැබුණි.
මෙම තීරණයට විරෝධය දක්වමින් මාධ්ය ප්රකාශයක් නිකුත්කළ වෛද්ය විශේෂඥන්ගේ සංගමය, සයිනොෆාම් එන්නත හරහා හොඳ ප්රතිශක්තියක් ජනනය වන වයස අවු. 20 – 30 ජනගහණයට ෆයිසර් එන්නත ලබාදීම විද්යාත්මක දත්ත අභිබවා යෑමක් බව සඳහන් කළේ ය.
රජයේ වෛද්ය නිලධාරීන්ගේ සංගමය ද ප්රකාශකර සිටියේ, වයස අවු. 20 – 30 පුද්ගලයින් එන්නත්කරණය ආරම්භකර ඇත්තේ ප්රමුඛතා දිස්ත්රික්කයකින් නොවන අතර, එම තීරණ කාගේ උපදෙස් මත ගන්නා ඒවාදැ යි තමන් නොදන්නා බව යි.
මේ සම්බන්ධයෙන් සෞඛ්ය සේවා අධ්යක්ෂ ජෙනරාල්වරයා ගෙන් තොරතුරු විමසීම සඳහා දුරකථනය ඔස්සේ ඔහු සම්බන්ධ කර ගැනීමට අප දැරූ උත්සහ සාර්ථක නොවිය.
අප කළ විමසීමක දී සෞඛ්ය සේවා නියෝජ්ය අධ්යක්ෂ ජෙනරාල්වරයා කියා සිටියේ, හම්බන්තොට පුද්ගලයින්ට ෆයිසර් එන්නත ලබාදෙන්නේ “සම්පූර්ණයෙන්ම කාර්ය සම්පාදන ගැටලුවක් නිසා” බව යි.
හම්බන්තොටට ෆයිසර් එන්නත ලබාදීම ගැන සමාජ මාධ්ය ජාලාවන්හි උපහාසාත්මක පෝස්ටු සහ කමෙන්ටු පළවී තිබුණි
අද මුහුණදෙන ව්යසනයට ලක් වී සිටින්නේ ඇයි?
හම්බන්තොට ප්රදේශයේ වෙසෙන වයස අවුරුදු විස්සත් තිහත් අතර පිරිසට ෆයිසර් එන්නත ලබාදීමට විරෝධය පළකරමින් වෛද්ය විශේෂඥන්ගේ සංගමය පසුගිය දා මාධ්ය ප්රකාශයක් නිකුත් කළේ ය. ඔවුන් පවසන්නේ වයස අවු. 60ට වැඩි පිරිසට සහ බෝ නොවන රෝගාබාධවලින් පෙළෙන පුද්ගලයින්ට එන්නත්කරණයේ දී ප්රමුඛත්වය ලබාදෙන්නැ යි තම සංගමය විසින් සිදුකෙරුණු යෝජනාව නිසි ලෙස ක්රියාත්මක නොවීම නිසා ලංකාව දැනට මුහුණ පා ඇති ව්යසන තත්ත්වයට ලක් වී සිටින බව යි.
“එන්නත්කරණ ක්රියාවලිය සඳහා අවශ්ය උපදෙස් ඒ සඳහා දැනුම් සම්භාරයක් ඇති සෞඛ්ය අමාත්යාංශයේ බෝවන රෝග පිළිබඳ විශේෂඥ උපදේශක කමිටුව මඟින් ලබා දිය යුතු අතර, එම ලබා දුන් උපදෙස් නිසි පරිදි ක්රියාත්මක නොකිරීම නිසා වයස 60ට වැඩි පුද්ගලයින්ගේ මරණ සංඛ්යාව දැනට වැඩි වී ඇති අතර, මෙයට හේතු පාදක වූයේ වයස අවුරුදු 60ට වැඩි අයට එන්නත ලබා දීමට ප්රමුඛතාව නොදී එය වයස අවුරුදු 30ත් 60ත් අතර කණ්ඩායමට ලබාදීම මඟින් අවදානම් වැඩි අයට එන්නත ලැබීම ප්රමාද වීම යි,” එම සංගමය විසින් නිකුත් කෙරුණු ප්රකාශයේ දැක්වේ.
එන්නත්කරණය විද්යාත්මකව සිදු කිරීම ඉතා වැදගත් බව එම සංගමය අවධාරනය කරයි. එහිදී අනුගමනය කළ යුතු නිසි ක්රියාමාර්ගය නම්, එන්නත් නොලැබූ නමුත් රෝගයට ගොදුරුවීමේ වැඩි අවදානමක පසුවන අය සඳහා ප්රමුඛත්වය ලබාදීමත්, ඉන්පසුව දැනට එන්නත්කර ඇති නමුත් වෙනත් රෝගාබාධ හේතුවෙන් කොවිඩ් රෝගයට ගොදුරුවීමේ වැඩි අවදානමක් ඇති අය සඳහා තෙවන මාත්රාවක් ලබාදීම බවත් ඔවුන් ප්රකාශ කරයි.
එසේම, වකුගඩු බද්ධ කිරීම සහ පිළිකා වැනි වෙනත් ආබාධවලින් පෙලෙන රෝගීන්ට ද, ප්රතිශක්තිකරණ ක්රියාවලියේ දුර්වලකම් ඇති අයට ද අවශ්ය නිසි ප්රතිශක්තිය සයිනොෆාම් එන්නතේ මාත්රා දෙක මඟින් සම්පූර්ණයෙන් නොලැබෙන බව පෙනී යන බැවින් එම කණ්ඩායම් සඳහා ෆයිසර්, ඇස්ට්රාසෙනෙකා, හෝ මොඩර්නා එන්නත් වලින් තුන්වන මාත්රාව ලෙස ලබාදීම අත්යවශ්ය බව එම සංගමය යෝජනාකර සිටියි.
“අපට ලැබී ඇති AstraZeneca සහ mRNA එන්නත් ප්රමාණය ඉතා සීමාසහිත යි. මෙම තත්ත්වය යටතේ සාමාන්ය සෞඛ්යයෙන් හෙබි, Sinopharm එන්නත මඟින් ඉතා හොඳ ප්රතිශක්තියක් ජනනය වන, වයස අවුරුදු විස්සත් තිහත් අතර කණ්ඩායමට Pfizer එන්නත ලබාදීම ඉතා අවිධිමත් මෙන්ම විද්යාත්මක දත්ත අභිබවා යාමක් ලෙස සැලකිය හැක,” යනුවෙන් එම සංගමය ප්රකාශ කරයි.
මේ අතර රජයේ වෛද්ය නිලධාරීන්ගේ සංගමය (GMOA) ප්රකාශ කරන්නේ ෆයිසර් එන්නත පාසැල් යන වයසේ දරුවන්ට ලබාදිය යුතු බව යි.
“දරුවන්ව පාසැල්වලට ගේන්නත්, රට සාමාන්ය තත්ත්වයට ගේනකොටත්, අපි වැක්සීන් කරද්දී එන්නත් ප්රමාණය නිවැරදි වයස් කැටගරිවලට ලබාදෙන්න ඕනේ. හිටපු ගමන්ම, ඒ තීරණය ගත්ත තැනක් දන්නෙත් නෑ, ඒ තාක්ෂණික තීරණය කාගෙ ද දන්නෙත් නෑ, විවිධ වයස් කාණ්ඩ අඳුරගෙන ෆයිසර් එන්නත විදිනවා. එතකොට සයිනොෆාම් විදින්න පුළුවන් පිරිසකට ෆයිසර් එක විදින්න තියෙන හේතුව තාක්ෂණිකව පැහැදිලි විය යුතු යි,” එම සංගමයේ සහකාර ලේකම්, වෛද්ය නවීන් සොයිසා ප්රකාශ කළේ ය.
දරුවන්ට ලබා දීමට නිර්දේශ වී ඇති එකම එන්නත හම්බන්තොටට ලබාදුන්නේයැ යි විරෝධයක් නැගී ඇත
ලෝක සෞඛ්ය සංවිධානය අවුරුදු 12ත් 18ත් අතර දරුවන්ට ලබාදීමට නිර්දේශකර ඇත්තේ ෆයිසර් එන්නත පමණක් බව එම සංගමය කියයි.
“ලංකාව පුරා දරුවන් 180ක් පමණ ප්රමාණයක් මෙම රෝගයට ගොදුරු වෙලා තියෙනවා. ඒ අතරින් 25ක් පමණ මරණයට පත්වෙලා තියෙනවා. මේ වන විටත් අසාධ්ය තත්ත්වයේ රෝගීන් හතරදෙනෙක් පමණ සිටිනවා. දැන් දැන්, දරුවන්ට මේ රෝගය වැළඳීමේ ප්රවණතාවයක් ඇතිවෙලා තියෙනවා,” සංගමයේ සහකාර ලේකම් වෛද්ය සමන්ත ආනන්ද මාධ්ය සාකච්ඡාවක දී ප්රකාශ කළේ ය.
ඔක්තෝබර් මාසයේ දී ෆයිසර් එන්නත් මිලියන 4ක් මෙරටට ලැබෙන බව පැවසූ ඔහු, වයස අවු. 12 – 18 අතර පාසැල් දරුවන් එන්නත්කරණයට අවශ්ය එන්නත් ප්රමාණය එමඟින් පහසුවෙන් ලබාගත හැකි බව ද කියා සිටියේ ය.
“ඉතාමත් සංවේදී කාරණයක් වන දරුවන්ගේ මරණ වලක්වා ගැනීමට මේ මොහොතේ ඇති හොඳම විසඳුම වනුයේ Pfizer එන්නත, වයස අවුරුදු 20-30 කාණ්ඩයට නාස්ති නොකර, වයස අවුරුදු 12 ත් 18 ත් අතර වයස් කාණ්ඩයට ලබාදීමට කටයුතු කිරීමයැ”යි එම සංගමය ප්රකාශ කරයි.
“අපි ගත් තීරණයක් නෙවෙයි” – කොවිඩ් රෝග පාලන කටයුතු රාජ්ය ඇමැතිණී
හම්බන්තොටට ෆයිසර් එන්නත ලබාදීම පිළිබඳව අප ප්රාථමික සෞඛ්ය සේවා, වසංගත රෝග හා කොවිඩ් රෝග පාලන කටයුතු රාජ්ය ඇමැතිණී වෛද්ය සුදර්ශිනී ප්රනාන්දුපුල්ලේගෙන් විමසූකල ඇය පවසා සිටියේ එය තමාගේ අමාත්යංශයෙන් ගත් තීරණයක් නොවන බව යි. ඒ සම්බන්ධයෙන් ලිඛිත උපදෙසක් දී ඇත්තේ සෞඛ්ය සේවා අධ්යක්ෂ ජෙනරාල්වරයා බැවින්, ඒ පිළිබඳව ඔහුගෙන් විමසන ලෙස අමාත්යවරිය අප වෙත දැනුම් දුන්නා ය.
අප එම ප්රශ්නයම සෞඛ්ය සේවා නියෝජ්ය අධ්යක්ෂ ජෙනරාල් විශේෂඥ වෛද්ය හේමන්ත හේරත් වෙත යොමු කළ විට ඔහු ප්රකාශ කළේ “ඒක සම්පූර්ණයෙන් ලොජිස්ටික් ඉෂූ එකක්” නිසා සිදුකෙරුණු බව යි.
“දැන් මේ වෙනකොට මිලියන 18ක් විතර හම්බවෙලා තියෙනවා සයිනොෆාම් එන්නත. එතකොට තව මිලියන දෙකකට හෝ ඊට කිට්ටු ප්රමාණයකට ලැබිලා තියෙනවා ඇස්ට්රාසෙනෙකා. නමුත් ෆයිසර් වැක්සීන් එක තාම අපට ලැබිලා තියෙන්නේ, යන්තම් අපි ගහලා තියෙන්නේ ලක්ෂ තුනකට පොඩ්ඩක් වැඩියෙන්. එතකොට ඒවා පොඩි ප්රමාණවලින් හම්බවෙන්නේ. එතකොට ඒ ඒ තැන්වල ඉලක්කගත ජනගහණය අඩු ප්රදේශවලින් තමයි මේක පටන්ගන්න වෙලා තියෙන්නේ. ඒක යි අපි පළවෙනිම තොගය ආපු වෙලාවේ මන්නාරමට දුන්නේ,” ඔහු පැහැදිලි කළේ ය.
සැප්තැම්බර් 9 වන දා තෙක් ලබා දී ඇති එන්නත් සංඛ්යාව
ඡායාරූප මූලාශ්රය,HEALTH MINISTRY, SRI LANKA
එපමණක් ද නොව, ෆයිසර් පුත්තලමට ද ලබා දී ඇතැ යි ඔහු සඳහන් කළේ ය.
“අපි කරන්නේ, අපට එන්නත් හම්බවෙන්නේ 200 නම් ටාගට් පොපියුලේෂන් එකක් හඳුනාගෙන සියදෙනෙක් විතර ඉන්න, අපි ඒක ඒ ප්රදේශයට දෙනවා. මොකද අපට එන්නත් දෙක දෙක දීලා ඒක කවර් කරන්න පුළුවන්. දැන් අපට මේ ෆයිසර් එන්නත් ලක්ෂයක් ආපුවාම කොළඹ දිස්ත්රික්කය වාගෙ එකකට දුන්නොත් මොකද වෙන්නේ? රණ්ඩුකරගන්නවනේ මිනිස්සු ඊළඟට. අපට එන්නත් ලැබෙන්නේ සම්පූර්ණයෙන්ම අපේ පාලනයෙන් තොර ක්රියාවලියන් හරහා. ඉතින් ඒ නිසා යම් යම් ප්රදේශවලට එන්නත් වෙන් කරනකොට අපට ප්රයෝගිකව, ගැටලුවලින් තොරව මේ එන්නත් ලබාගැනීමට සහ දීමට අවශ්ය කරන ගොඩක් සාධක සලකලා බලලා තමයි මේවා මේ විදියට වෙන් කරන්නේ,” ඔහු තව දුරටත් විස්තර කළේ ය.
ෆයිසර් දෙන්න ඕනේ කාට ද?
ෆයිසර් එන්නත හම්බන්තොටට ලබාදීමට එරෙහිව විශාල විරෝධයක් මතුවීමට හේතු කාරණා වූයේ, ෆයිසර් එන්නත සයිනොෆාම් එන්නත මෙන් නොව යම් යම් විශේෂ අවස්ථාවන්හි දී ලබාදීමට නිර්දේශ කරන එන්නතක් වීම සහ එයින් මෙරටට ලැබෙන තොග ද සීමිත වීම යි.
මෑතක දී ශ්රී ලංකා වෛද්ය සංගමයෙන් ඉදිරිපත් කෙරුණු විශේෂඥ වර්තාවක සඳහන් වන පරිදී,
1. සයිනොෆාම් එන්නත් මාත්රා දෙකක් ලබාගත් වයස අවු. 60ට වැඩි පුද්ගලයින්ට
2. වයස අවුරුදු 12ට වැඩි, ප්රතිශක්ති දුර්වලතාවයෙන් පෙලෙන සහ ඕනෑම එන්නතක මාත්රා දෙකක් ලබා ඇති පිරිස්වලට
ෆයිසර්, ඇස්ට්රාසෙනෙකා, හෝ මොඩර්නා යන එන්නත් වර්ගවලින් තෙවැනි මාත්රාවක් ලබාදිය යුතුයැ යි නිර්දේශ වී තිබේ.
එසේම, අවුරුදු 12ත් 18ත් අතර වයසේ සහ ප්රතිශක්ති ඌණතා සහිත රෝගී තත්ත්වයන්ගෙන් (නිධන්ගත වකුගඩු රෝග, පිළිකා, දියවැඩියාව, නිධන්ගත පෙනහැලි රෝග, මස්තිෂ්ක අංශභාගය,නිධන්ගත අක්මා රෝග, නිවැරදි නොකළ හෘද රෝග, තැලසීමියා) පෙලෙන, එන්නත් නොකළ ළමුන් සඳහා ෆයිසර් මාත්රා දෙකක් ලබාදිය යුතු බවත් එම කමිටුවේ නිර්දේශය වේ.
මෙවැනි රෝගීන් සඳහා ෆයිසර් එන්නත් ඉතිරිකර ගැනීම සිදුකළ යුතු නොවේදැ යි අප විමසූ අවස්ථාවේ දී සෞඛ්ය සේවා නියෝජ්ය අධ්යක්ෂ ජෙනරාල්වරයා ප්රකාශ කළේ මෙවැන්නකි: “මේකේ දී ප්රශ්නේ තියෙන්නේ, එකක් තමයි, ඕක ගබඩා කරලා තියාගන්න ලොකූ වියදමක් යනවා, -70°Cවල යනකොට. අපට මිනිස්සුන්ට මේක දීලා ඉවර කරන්න ඕනේ. මොකද අපේ එන්නත්කරණය ඉවර කරන්නත් ඕනෙනෙ.”
ශ්රී ලංකාවට ලැබුණු පළමු ෆයිසර් එන්නත් තොගය ගබඩා කිරීමට යොදා ගන්නා අධිශීතකරණ
විදේශගත වීමේ දී යම් යම් රටවල් යම් යම් එන්නත් ප්රතික්ෂේප කිරීම අසාධාරණ බැව් ද, ලංකාවේ දී ලබාදෙන්නේ ලෝක සෞඛ්ය සංවිධානය විසින් අනුමත කෙරුණු එන්නත් ද නිසා මෙම අසාධාරණය පිළිබඳව එම සංවිධානය සමග ද සාකච්ඡාකර තිබේයැ යි ඔහු පවසයි. “ඒ අතරතුර යම් පුද්ගලයෙකුට අවශ්යතාවයක් තියෙනවා නම් ඒක (ෆයිසර් එන්නත) දෙන එක කරගෙන යනවා කොහොමත්,” ඔහු සඳහන් කරයි.
“සෞඛ්ය සේවා අධ්යක්ෂ ජෙනරාල්තුමා පැහැදිලි ලිපියක් ලියලා තිබ්බා කොවිඩ් ටාස්ක් ෆෝස් එකේ දී ගත්ත තීරණයක් අනුව තමා හම්බන්තොටට මේක දෙන්න තීරණය කළේ කියලා… එතකොට ඒක (කෝවිඩ් මර්දන කාර්ය සාධන බලකාය) මේ හැමෝම සහභාගී වෙන එකක් මිස දේශපාලන අය සහභාගී වෙන එකක් නෙවෙයිනේ. මේක හොඳට පැහැදිලි කරලා දෙන්න ඕනේ, මොකද සෞඛ්ය අමාත්යංශයට චෝදනා එල්ල වෙනවා දේශපාලන බලයකට යටත්වෙලා මේක ක්රියාත්මක වෙනවා කියලා,” ඔහු ප්රකාශ කළේ ය.
සෞඛ්ය සේවා නියෝජ්ය අධ්යක්ෂ ජෙනරාල්වරයා එසේ පැවසුවා ද, ඊයේ (සැප්තැම්බර් 9) මාධ්ය හමුවකට එක්වූ සෞඛ්ය සේවා අධ්යක්ෂ ජෙනරාල් වෛද්ය අසේල ගුණවර්ධන ප්රකාශ කළේ හම්බන්තොටට ෆයිසර් එන්නත දීමට තීරණය කළේ “රජය විසින්” බව යි.
“කොයි එන්නත ද කොයි ප්රදේශයට ද යවන්නේ කියන එක අපේ අතිගරු ජනාධිපතිතුමා ප්රමුඛව තියෙන එම බලකායෙන් තමයි තීරණය කරනු ලබන්නේ. නැතුව ලෝක සෞඛ්ය සංවිධානය හෝ, එම ෆයිසර් එන්නත නිෂ්පාදන සමාගමට අනුව නෙවෙයි අපි ඒ තීරණය ගන්නේ,” ඔහු පැවසුවේ ය.
ශ්රී ලංකාවේ කෝවිඩ් එන්නත්කරණ ක්රියාවලිය මේ වන විට ඉතාමත් සීඝ්රයෙන් සිදුකෙරෙමින් පවතින්නේ ය. සැප්තැම්බර් 9 වන දා වන විට ශ්රී ලංකාවේ දිස්ත්රික්ක 25ක වයස අවු. 30ට වැඩි ජනගහණයෙන් 100%කට එන්නතේ පළමු මාත්රාව ලබා දී ඇතැ යි ජනාධිපති කාර්යාලයය ප්රකාශ කරයි. නමුත් රජයේ වෛද්ය නිලධාරීන්ගේ සංගමය පවසන්නේ අවුරුදු 60ට වැඩි ජනගහණයෙන් ලක්ෂ 3කට කෝවිඩ් එන්නතේ එක් මාත්රාවක් හෝ තවමත් ලැබී නැති බව යි.
බී.බී.සී සන්දේශය වාර්තාවකි