Supiri Gossip

Tag: featured

  • මාස 7ක් තිස්සේ චීනය පුරා ඉබාගාතේ ගිය’ ‘ආසියානු අලි රැලේ කතාව’

    මාස 7ක් තිස්සේ චීනය පුරා ඉබාගාතේ ගිය’ ‘ආසියානු අලි රැලේ කතාව’

    ලංකාවේ වනඅලි – මිනිස් ගැටුම නොවිසදෙන ගැටලුවක්. එයින් වනඅලි වගේම මිනිස් ජීවිත, විශේෂයෙන්ම ගොවීන්ගේ ජීවිත අනතුරට ලක්වෙනවා. ඒ වගේම බවභෝගත් විශාල වශයෙන් විනාශ වෙනවා.

    ඒත් අපි මේ කියන්න යන්නේ වනඅලි – මිනිස් ගැටුමේ අලුත්ම කතාවක්. මුළු ලෝකයේම, විශේෂඥයින්ගේ වගේම මාධ්‍යවල දැඩි අවධානය දිනාගත් කතාවක්. ඇතැම් විට මේ කතාව ඔබ මේ වන විටත් අසා ඇති. නමුත් එය සම්පූර්ණයෙන්ම කියවා නැති බව අපට විශ්වාසයි.

    මේ අලි කතාව ඇසෙන්නේ චීනයෙන්. චීනය ගැන කතා වෙන කොට අපිට මතක් වෙන්නේ යෝධ පැන්ඩා. අලි ගැන කතාවක් නැති තරම්. ඒ නිසාම වෙන්න ඇති මුළු ලෝකයේම අවධානය මේ ගැන යොමු වුණේ.

    පසුගිය මාස 17 ක කාලය තුළ චීනයේ ඉබාගාතේ ඇවිදිමින් සිටි අලි රංචුව යළිත් සිය උපන් ගම්බිම්වලට පැමිණෙමින් සිටින බව පසුගිය දා චීන ජනමාධ්‍ය වාර්තා කළා. සිය ස්වාභාවික රක්‍ෂිතයේ සිට කිලෝමීටර් සිය ගණනක් ඈතට ගිය පසු ඔවුන් යළි සිය උපන් බිමට යන ගමනේ අවසාන පියවරේ සිටින බවයි චීන නිලධාරීන් පසුගිය දා නිවේදනය කළේ.

    ගම්වාසීන්ගේ නිවෙස් වලට කඩා වැදීමේ සිට පාරේ යන විට දරු ප්‍රසූතිය සිදු කිරීම දක්වා මහත් වික්‍රමයන් රැසක් සිදු කළ මෙම අලි රංචුව නැවත තම උපන් බිමට යන කතාව දැන් කියවමු.

    උපන්බිම අතහැර දැමීම

    දකුණු යුනාන් ප්‍රාන්තයේ පහළ කෙලවරේ පිහිටා ඇති ෂිෂුවාංබාන්නා ජාතික ස්වභාව රක්ෂිතය (Xishuangbanna National Nature Reserve) මියන්මාරයේ සහ ලාඕසයේ මායිම අසලයි පිහිටා තිබෙන්නේ. එය හෙක්ටයාර 241,000 ක් පමණ විහිදෙන සශ්‍රීක නිවර්තන වනාන්තරයක්. එහි වඳවීමේ තර්ජනයට ලක්ව ඇති ආසියානු අලි ඇතුන්ගෙන් වැඩි ප්‍රමාණයක් වාසය කරනවා.

    2020 මාර්තු මාසයේ එක්තරා දිනක අලි 14 දෙනෙකුගෙන් යුත් රංචුවක් උතුර බලා යන ඒ විස්මිත ගමන ආරම්භ කළා. මුලදී කිසිවෙකු මේ ගැන අවධානය යොමු කළේ නැහැ. මොකද ඔවුන් මේ වන අලි කලාපයේ නිදහසේ සැරසරන බව කවුරුත් දැන සිටියා. එය කොතරම් සුලභ සහ ජනප්‍රිය කතාවක් ද කිවහොත් වන රක්ෂිතයට සමීප නගරයක් වන පුවේර් ඔවුන්ගේ විශාල අමුත්තන් පෝෂණය කිරීම වෙනුවෙන්ම ‘අලි ආපනශාලාවක්‘ ද පවත්වා ගෙන ගියා.

    මෙම සද්ධන්තයින්ගෙන් බොහෝ දෙනෙක් වැඩි ඈතක නොයන අතර සාමාන්‍යයෙන් ටික වේලාවකට පසු යළි වන රක්ෂිතයට යනවා. නමුත් රංචුව වන රක්ෂිතයෙන් එළියට ගොස් මාස කිහිපයකට පසු මෙය සාමාන්‍ය ගමනක් නොවන බව නිලධාරින්ට වැටහෙන්න පටන් ගත්තා.

    මෙම අවබෝධය මේ වසර මුලදී ඇත්ත වශයෙන්ම දැනුනේ අලි ඇතුන් මිනිසුන්ගේ නිවෙස්වලට කඩා වැදී ඔවුන්ගේ වගාවන් ආහාරයට ගනිමින් මහත් විනාශයක් කරමින් සිටින බවට වාර්තා වීමත් සමඟයි. මීට සමගාමීව අලි ඇතුන් විවිධ නගර වල වීදි වල සැරිසරන අයුරු දැක්වෙන සීසීටීවී දර්ශන ද සමාජ මාධ්‍යවල වෛරස් වුණා.

    මේ වන විටත් විශේෂඥයින් ඔවුන්ගේ හැසිරීම් රටාව ගැන නොසන්සුන් වී සිටියා. නමුත් (Conservation Letters journal හි ළඟදීම ප්‍රකාශයට පත් කිරීමට නියමිත පත්‍රිකාවක) හේතු කිහිපයක් නිසා වැඩිපුර ආහාර සෙවීම සඳහා අලි පිටත්ව ගිය බව මහාචාර්ය අහිම්සා කැම්පෝස්-අර්සෙයිස්ගේ නායකත්වයෙන් යුත් චීනය පදනම් කරගත් විශේෂඥ කණ්ඩායමක් ප්‍රකාශ කළා.

    එම හේතු අතර වඩාත් අවධානයට ලක් වූ එකක් නම් ෂිෂුවාංබාන්නා ජාතික ස්වභාව රක්ෂිතය තුළ අලි ගහනය වැඩිවීමයි. ඒ නිසා ආහාර සඳහා වැඩි තරඟයක් ඇති වී තිබෙනවා. චීන බලධාරීන්ගේ සංරක්‍ෂණ ප්‍රයත්නයට ස්තූතිවන්ත වන්නට, පසුගිය දශක තුනක කාලය තුළ පළාතේ අලි ගහනය 300 කට ආසන්න සංඛ්‍යාවක් දක්වා දෙගුණයකටත් වඩා වැඩි වී තිබෙනවා.

    “මෙම සාර්ථකත්වයේ ප්‍රතිවිපාක සමඟ අපි දැන් කටයුතු කළ යුතු අතර එය සැබෑ අභියෝගයක්. මෙම පළාතේ ඇති වූ සීඝ්‍ර සංවර්ධනය සමග අලි ඇතුන්ට සංචරණය කිරීමට අවශ්‍ය භෞතික අවකාශය සීමා වී තිබෙනවා‘” මහාචාර්ය කැම්පෝස්-අර්සෙයිස් පැවසුවා.

    ඒ සමග පසුගිය වසර තුළ දීර්ඝ කාලයක් පැවති නියඟය හේතුවෙන් ආහාර හිඟයක් ද ඇති වුණා. එය වන සංරක්ෂිතයේ අලි ඇතුන්ට වඩාත් අහිතකර ලෙස බලපෑවා.

    දශක ගණනාවක් තිස්සේ වනාන්තර විනාශ කිරීම සහ ගොවි බිම් පුළුල් කිරීම හේතුවෙන් ආරක්ෂිත ප්‍රදේශවලින් පිටත චීනයේ අලි වාසස්ථාන අඩුවී ඇති බවත් මේ සමග හෙළි වුණා.

    වන ආරක්‍ෂාව ඉහළ නැංවීමට බලධාරීන් උත්සාහ කළා.

    ‘‘වන ගහනය හීන වීම සමග අලි ඇතුන්ට ලබා ගත හැකි ආහාර ප්‍රමාණය විශාල වශයෙන් අඩු වුණා. ඒ සමග ඝන වනාන්තරවල යටි රෝපණය විනාශ වුණා. එය ඍජුව අලින්ගේ ආහාර හිගයට හේතුවක් වුණා‘‘ මහාචාර්ය කැම්පෝස්-අර්සෙයිස් පැවසුවා.

    දැවැන්ත කාර්යය

    මෙම රංචුව යුනාන්හි හරිත කඳු සහ වනාන්තර හරහා උතුර දෙසට ගමන් කරන විට චීන නිලධාරීන් වහාම ක්‍රියාත්මක වුණා. අලි ගම්මාන හා නගර වලින් ඈත් කිරීම සඳහා දහස් ගණන් කණ්ඩායමක් යොදවා හදිසි කාර්ය සාධක බලකායක් ස්ථාපිත කළා.

    ආසියානු අලියා
    • 150,000ක් මිනිසුන් නිවෙස් වලින් ඉවත් කර ඇත
    • ඇස්තමේන්තු ගත හානිය ඩොලර් මිලියනයක්
    • ඩ්‍රෝන් යානා 973ක් නිරීක්ෂණයට යොදවා තිබුණා.
    • 25,000ක කාර්ය මණ්ඩලයක් යොදවා ඇත

    මූලාශ්‍රය: යුනාන් නිලධාරීන්

    අලි ඇතුන් අධික ලෙස ගන්නවා. මේ වන විටත් ඔවුන් ඉරිඟු, කෙසෙල්, අන්නාසි සහ වෙනත් ආහාර ටොන් 180ක් පමණ විනාශ කර තිබෙනවා. ඒ අතර වාහන සහ නිවාස හානි කිහිපයක් ද වාර්තා වුණා.

    මඩ ස්නානය කරන වල් අලි
    අලි කිහිප දෙනකු මඩ නාන ආකාරය ඩ්‍රෝන යානා මගින් රූගත කළා
    වන අලි ගැටෙයි
    අලි පැටවුන් දෙදෙනකු අතර ගැටුමක්

    පසුගිය අප්‍රේල් මාසයේදී අලි දෙදෙනෙකු ආපසු ගෙදර යාමට තීරණය කළා. ජුනි මාසයේදී තවත් අයෙකු රංචුවෙන් ඉවත්ව ගිය අතර බලධාරීන් ඔහුව යළි රක්ෂිතයට යොමු කළා.

    මහාචාර්ය කැම්පෝස්-අර්සෙයිස්ට අනුව, මෙම වික්‍රමාන්තික සංචාරය අතර තුර නව සාමාජිකයින් දෙදෙනකු ද රංචුවට එක් වුණා.

    මේ කාලය පුරාවටම චීනයේ ජනතාව මේ විස්මිත සංචාරය දෙස ඇස් යොමා බලා සිටියා. යුනාන් හි ආසියාතික අලි ඇතුන්ගේ වික්‍රමාන්විතයන් ජාතික ප්‍රවෘත්ති බවට පත් වූ අතර ගම්වාසීන් තමන්ට සිදුවන අලාභය නොතකා ඔවුන්ව සාදරයෙන් පිළිගත්තා.

    සෑම චලනයක්ම ඩ්‍රෝන් යානා මගින් පමණක් නොව විශේෂඥයින් විසින් දැඩිව අධීක්ෂණය කළා.

    මේ සමග අලි ගැන කටකතා ද පැතිරුණා. ඉරිඟු වයින් ටොන් ගණනක් පානය කිරීමෙන් පසු ‘වෙරි වී‘ සිටි බවට කතා පැතිරුණා. පසුව ඒවා විශේෂඥයින් විසින් ප්‍රතික්ෂේප කළා.

    ජුනි මස මුල වන විට, රංචුව ප්‍රාන්ත අගනුවර වන කුන්මින් වෙත ළඟා වුණා. එය වන රක්ෂිතයේ සිට කිලෝ මීටර 500ක දුරක්. යුන්නාන් වන අලියෙකු මෙතෙක් දුර ගමන්කර නැති බව විශේෂඥයින් පැවසුවා.

    සමහරු ඔවුන් සිසිල් දේශගුණයක් කරා යන විටත්, මානව ශිෂ්ඨාචාරය සමඟ ඔවුන්ගේ අන්තර් ක්‍රියාකාරිත්වය දිග්ගැස්සෙන විටත් සිය පැවැත්ම ගැන කරදර වීමට පටන් ගත්තා.

    මේ සමග සංචාරක අලි ඇතුන් දැඩි මානසික ආතතියකින් පෙළෙන බව විශේෂඥයින්ට නිරීක්ෂණය වුණා.

    ‘ඔවුන් දැඩි මානසික හා කායික ආතතියකට පත්ව සිටිනවා‘ ඔවුන් පැවසුවා.

    මාස කිහිපයකට පසු නිලධාරින්ට සහනයක් ලබා දෙමින් සති කිහිපයකට පසු අලි දකුණ දෙසට හැරෙන්නට පටන් ගත් අතර වැඩි කල් නොගොස් යුවාන්ජියැං ගඟ අසලට පැමිණියා. බලධාරීන් පැවසුවේ රංචුවට ගග තරණය කිරීමට හැකි එක් පාළමක් ඇති බවයි.

    අලි ඇතුන්ව ආකර්ෂණය කර ගැනීම සඳහා ආහාර තැබීම, විදුලි වැටවල් සකස් කිරීම, කෘතිම මංතීරු සෑදීම සහ පාරට ජලය ඉසීම සඳහා දහස් ගණන් සෙබළුන් හා සේවකයින් කාර්ය සාධක බළකායෙන් මෙම ප්‍රදේශයට පැමිණියා. නමුත් සතුන් මිනිසුන්ගේ මග අනුගමනය කිරීමට අකමැති වුණා. ඔවුන් යළි දීර්ඝ දුරක් ගෙවා ගග තරණය කළා.

    අන්තිමේදී අගෝස්තු 8 වෙනිදා රංචුව යුවාංජියෑං ගඟ හරහා ඉදිකර ඇති පාලම හරහා ගමන් කළා. ෂිෂුවාංබන්න ස්වාභාවික රක්ෂිතයට ඔවුන් තවමත් කි.මී 200ක් ඈතින් සිටියද, ප්‍රාදේශීය මාධ්‍ එයය ඔවුන්ගේ ගමනේ අවසාන පියවර ලෙස විස්තර කළා.

    ඔවුන් ආපසු නිස උපන් බිමට යන බව තහවුරු වී නැතත්. ස්වාභාවික රක්‍ෂිතයේ ජ්‍යෙෂ්ඨ ඉංජිනේරුවෙකු වන ෂෙන් කිංෂොං වාර්තාකරුවන්ට පැවසුවේ “අලි නැවත උතුරට යාමට පටන් ගන්නා බව බොහෝ දුරට විශ්වාස‘ බවයි.

    අලි ඇතුන් යළි ස්වභාවික රක්ෂිතයට යොමු කිරීම සඳහා යුවාන් මිලියන ගණනක් වැය කිරීමෙන් පසු බලධාරීන් පොරොන්දු වූයේ “එක්සත් ආරක්‍ෂක කළමනාකරණ පද්ධතියක්” ස්ථාපිත කරන බවත් වාසස්ථාන ආරක්‍ෂාව හා ප්‍රතිසංස්කරණය වැඩි කරන බවයි. ආසියානු අලි ඇතුන් සඳහා ජාතික වනෝද්‍යානයක් නිර්මාණය කිරීමේ සැලසුම් ද වේගවත් කර තිබෙනවා.

    නමුත් නැවත පැමිණීම ප්‍රමාද වුවද, ඔවුන් වඳවීමේ තර්ජනයට ලක් වී ඇති සත්ත්ව විශේෂයන් පිළිබඳ ගෝලීය දැනුවත්භාවය ඇති කරවමින් මහා ගමනක් ආරම්භ කරමින් කළ නොහැකි දේ අත්කර ගත්තා. දේශගුණික විපර්යාස, මානව සංවර්ධනය මේ ස්වභාවික පරිසරය සහ එහි හිමිකරුවන්ට උරුමකර දී ඇති ඛේදවාචකය ගැන ඔවුන් ගෝලීය අවධානය යොමු කළා.

    අලි ඇතුන්ගේ වික්‍රමාන්විත සංචාරයේ ගමන්මග

    2021 අගෝස්තු 8 වන විට, අලි ඇතුන් ගමන් කරන චීනයේ සිතියම

    බී.බී.සී වාර්තාවකි – සැකසුම – තීක්ෂණ වෙළෙන්එගොඩ

  • මහ බැංකුව විසින් නිකුත් කරන ලද චක්‍රලේඛණ ක්‍රියාත්මක නොකිරීමෙන් ලීසිං පාරිභෝගිකයා අමාරුවේ

    මහ බැංකුව විසින් නිකුත් කරන ලද චක්‍රලේඛණ ක්‍රියාත්මක නොකිරීමෙන් ලීසිං පාරිභෝගිකයා අමාරුවේ

    මහ බැංකුව විසින් නිකුත් කරන ලද චක්‍රලේඛණ ක්‍රියාත්මක නොකිරීමෙන් ලීසිං පාරිභෝගිකයා අසීරුවට පත්ව ඇතැයි පාරිභෝගික අයිතිවාසිකම් සුරැකීමේ ජාතික ව්‍යාපාරය මාධ්‍ය නිවේදනයක් නිකුත් කරමින් දැනුම් දෙයි.

    එහි සභාපති රංජිත් විතානගේ මහතා විසින් අද (17) දින නිකුත් කළ නිවේදනයේ මෙසේ ද සදහන් වේ.

    කොවිඩ් වසංගතයෙන් ජනතාවට පීඩාවට පත්ව ඇති නිසා මහ බැංකුවේ මූල්‍ය පාලන අංශය විසින් ලීසිං පාරිභෝගිකයාට සහනයක් ලබා දීම සදහා  මැයි මාසයේදී චක්‍රලේඛණ කිහිපයක් නිකුත් කරන ලදී. 

    එම චක්‍රලේඛණ මගින් 2021 අගෝස්තු 31 දින දක්වා ලීසිං පාරිභෝගිකයින්ගෙන් පමා පොලී අය කිරීම  හා වාහන අත්පත්කර ගැනීම නවත ලෙස හා වෙනත් සහන ලබා දීමට කටයතු කරන ලෙස දැනුම්දෙන ලදී. එහෙත් එම චක්‍රලේඛණ උල්ලංඝනය කරමින් බැංකු හා ලීසිං සමාගම් විසින් සිය පාරිභෝගිකියින්ට පමා පොලී ගෙවන ලෙස දන්වා ලිපි නිකුත් කොට ඇත. එසේ ලිපි නිකුත්කලා පමණක් නොව  සමහර ලීසිං පාරිභෝගිකයින්ගේ වාහන අත්පත් කරගැනීමටද කටයුතු කර ඇත.

    එහෙත් අදාල චක්‍රලේඛණ නිකුත් කරන ලද මහ බැංකුව සිය  චක්‍රලේඛණ උල්ලංඝණය කල සමාගම් සදහා කිසිදු  නීතිමය පියවරක් ගැනීමට කටයුතු කර නැත. එම නිසා ලීසිං පාරිභෝගිකයා අන්ත අසරණ තත්වයකට පත්ව ඇත. පාරිභෝගිකයින්  අසරණව සිටිද්දී හා මහබැංකුවේ චක්‍රලේඛණ සමාගම් විසින් උල්ලංඝනය කරද්දී මහ බැංකුව නිහඩ ප්‍රතිපත්තියක් අනුගමනය කිරීම අපි දැඩි ලෙස හෙළාදකින අතර අදාල සමාගම් සදහා වහාම නීතිය ක්‍රියාත්මක කරන ලෙස අපි මහ බැංකුවෙන් ඉල්ලා සිටිමු.

    මහ බැංකුවේ  නිළධාරීන් නඩත්තු වන්නේ  මෙරට ජනතාවගේ බදු මුදලින් වන බවද ඔවුනට උසස් අධ්‍යාපනය ලබාදීම සදහා වැය කර ඇත්තේ මෙරට ජනතාවගේ බදු මුදල් බවද මෙම අවස්ථාවේ මතක් කර සිටින අතර ඒ නිසාම මහ බැංකුවේ නිළධාරීන්ගේ ක්‍රියාකලාපය විවේචනය කිරීමට ජනතාවට අයිතියක් ඇති බවද මහ බැංකුවේ නිළධාරීන්ට ජනතාවට සහන ලබා දීම සදහා  කටයුතු කිරීමට සාදාචාරාත්මක අයිතියක් ඇති බවද වැඩි දුරටත් මතක් කර සිටිමු.

  • කොවිඩ් මරණ වාර්තාව යළි අලුත් වෙයි

    කොවිඩ් මරණ වාර්තාව යළි අලුත් වෙයි

    ඊයේ (15) කොවිඩ්-19 ආසාදිතයින් 167 දෙනකු මියගිය බව සෞඛ්‍ය සේවා අධ්‍යක්ෂ ජනරාල්වරයා විසින් අද (16) දින තහවුරු කළ බව රජයේ ප්‍රවෘත්ති දෙපාර්තමේන්තුව විසින් නිකුත් කළ මාධ්‍ය නිවේදනයක සදහන් වේ.

    මියගිය පුද්ගලයින්ගෙන් 130 දෙනකු වයස අවුරුදු 60 සහ ඊට වැඩි පුද්ගලයින් වන අතර 36 දෙනකු වයස අවුරුදු 30-59 අතර පුද්ගලයින්ය. වයස අවුරුදු 30ට අඩු අයෙක් ද මියගිය අය අතර වේ.

    මියගිය පුද්ගලයින්ගෙන් 103 දෙනකු පිරිමින් වන අතර කාන්තාවන් ගණන 64 දෙනෙකි.

  • කොවිඩ් මරණ අනුපාතය අඩු කරන්න අලුත් ක්‍රමයක් සොයයි

    කොවිඩ් මරණ අනුපාතය අඩු කරන්න අලුත් ක්‍රමයක් සොයයි

    කොවිඩ් -19 ආසාදිතයන් පිළිබඳ දත්ත වාර්තා කිරීමේදී සංඛ්‍යාවල වෙනසක් සිදුවීම ගැන සෞඛ්‍ය අමාත්‍යාංශය සොයාබලමින් සිටින බවත්, එය ඉක්මනින් නිවැරදි කිරීමට පියවර ගනු ඇති බවත් සෞඛ්‍ය ප්‍රවර්ධන කාර්යාංශයේ අධ්‍යක්‍ෂ, විශේෂඥ වෛද්‍ය රංජිත් බටුවන්තුඩාව මහතා පැවසීය.

    අධ්‍යක්‍ෂවරයා මේ බව පැවසුවේ සෞඛ්‍ය ප්‍රවර්ධන කාර්යාංශයේ දී අද (16) පැවති මාධ්‍ය හමුවේදීය.

    කොවිඩ් මරණ අනුපාතය ගණනය කරන්නේ රෝගී සංඛ්‍යාවට සාපේක්‍ෂව බව සෞඛ්‍ය ප්‍රවර්ධන කාර්යාංශ අධ්‍යක්ෂවරයා මෙරටින් වාර්තා වූ රෝගීන් සංඛ්‍යාවේ සැබෑ දත්ත ලැබුණු පසු මරණ අනුපාතය ද අඩුවනු ඇතැයි ද මෙය දත්ත වාර්තා කිරීමේ ගැටලුවක් මිස දත්ත සැඟවීමක් නොවන බව ද කීවේය.

    දත්ත පද්ධතියේ සිදුවූ එම වරද නිවැරදි කරගැනීම සඳහා සෞඛ්‍ය සේවා අධ්‍යක්‍ෂ ජනරාල්වරයා දිස්ත්‍රික්ක හා පළාත් මට්ටමේ නිලධාරීන් ගෙන්වා අවශ්‍ය අධ්‍යයනය කටයුතු සිදුකරමින් සිටින බව කී බටුවන්තුඩාව මහතා සිදුවූ වරද වහා නිවැරදි කිරීමට අමාත්‍යාංශය කටයුතු කරමින් සිටින බව ද ප්‍රකාශ කළේය.

  • කැබිනට් කුට්ටම යළි අනා නාමල්ගේ ගොඩ වැඩිකරයි

    කැබිනට් කුට්ටම යළි අනා නාමල්ගේ ගොඩ වැඩිකරයි

    ජනාධිපති ගෝඨාභය රාජපක්ෂ මහතා විසින් අද (16) දින අමාත්‍ය මණ්ඩලය පහත සඳහන් පරිදි සංශෝධනය කර තිබේ.

    1. ජී.එල්. පීරිස් මහතා                              –           විදේශ අමාත්‍ය
    2. දිනේෂ් ගුණවර්ධන මහතා                    –           අධ්‍යාපන අමාත්‍ය
    3. පවිත්‍රා වන්නිආරච්චි මහත්මිය              –           ප්‍රවාහන අමාත්‍ය
    4. කෙහෙළිය රඹුක්වැල්ල මහතා –           සෞඛ්‍ය අමාත්‍ය
    5. ගාමිණි ලොකුගේ මහතා                      –           විදුලිබල අමාත්‍ය
    6. ඩලස් අලහප්පෙරුම මහතා                  –           ජනමාධ්‍ය අමාත්‍ය
    7. නාමල් රාජපක්ෂ මහතා                       –           තරුණ කටයුතු හා ක්‍රීඩා අමාත්‍ය ධූරයට අමතරව

    සංවර්ධන සම්බන්ධීකරණ අධීක්ෂණ අමාත්‍ය

  • එන්නත්කරණය අයාලේ – රටට ඇත්ත කියන්න – GMOA රජයට කියයි

    එන්නත්කරණය අයාලේ – රටට ඇත්ත කියන්න – GMOA රජයට කියයි

    කොවිඩ්-19 අවදානම් මට්ටම්වල 4 වැනි මට්ටමට රට පත්ව ඇති බව ප්‍රකාශ කර එම මට්ටමට අනුව ගත යුතු ක්‍රියාමාර්ග වහාම ක්‍රියාත්මක කරන ලෙස රජයේ වෛද්‍ය නිලධාරීන්ගේ සංගමය අද (16) නිකුත් කළ නිවේදනයක් මගින් රජයෙන් ඉල්ලා සිටී.

    කොවිඩ් ව්‍යාප්තිය පාලනය සඳහා සමාජය තුළ පුද්ගල සංසරණය 80%ත් 90%ත් අතර ප්‍රමාණයකින් අඩුකරන ලෙස රජයෙන් ඉල්ලා සිටින එම සංගමය පවසන්නේ ඊට අදාළ පියවර කොවිඩ් කාර්ය සාධක බළකාය සහ සෞඛ්‍ය අමාත්‍යංශය හැකි ඉක්මනින් ක්‍රියාත්මක කළ යුතු බවයි.

    එන්නත්කරණ ක්‍රියාවලිය ද විද්‍යාත්මක ක්‍රමවේදයකින් බැහැරව සිදුවන බව ද එම නිවේදනයේ වැඩි දුරටත් සදහන් වේ.

    රජයේ වෛද්‍ය නිලධාරීන්ගේ සංගමය නිකුත්කළ නිවේදනය මෙසේය.

  • පවිත්‍රා සිය සමුගැනීමේ කතාවේදී ‘රජු – පුරෝහිත‘ උපමාවට ගෙන කළ සංවේදී කතාව

    පවිත්‍රා සිය සමුගැනීමේ කතාවේදී ‘රජු – පුරෝහිත‘ උපමාවට ගෙන කළ සංවේදී කතාව

    පුරෝහිතයා කිව්වා ලු ‘‘රජතුමනි මාව වළට දාපු එකත් ඔබතුමාට මම ස්තූතිවන්ත වෙනවා. මොකද ඔබතුමාත් එක්ක මම ගියානම් එහෙම සම්පූර්ණ මනුස්සයෙක් හොයන කොට මමයි බිලි පූජාවට පත්වෙන්නේ ‘‘ කියලා.   

    සෞඛ්‍ය අමාත්‍යාංශයෙන් තමන්ව ඉවත් කෙරුණේ තමා බලාපොරොත්තු නොවුණු මොහොතක බව හිටපු සෞඛ්‍ය අමාත්‍ය, වත්මන් ප්‍රවාහන අමාත්‍ය පවිත්‍රා වන්නිආරච්චි මහත්මිය පැවසුවාය. ඇය ඒ බව සඳහන් කළේ සෞඛ්‍ය අමාත්‍යාංශයේ දී සිය සමුගැනීම වෙනුවෙන් අද (16) සංවිධානය කර තිබූ කෙටි උත්සවයකදීය.

    එහිදී අමාත්‍යවරිය වැඩිදුරටත් සඳහන් කළේ සෑම දේයක්ම සිදුවන්නේ හොඳට යැයි සිතා තමා හිත හදා ගැනීමට කටයුතු කරන බවයි.

    හිටපු සෞඛ්‍ය අමාත්‍යවරිය විසින් කළ ඒ සංවේදී කතාව පහත පළ වේ.

    මම හිතුවේ නෑ එකපාරට මේ වෙනස වෙයි කියලා.  මම ඒත් යන්න ඉස්සෙල්ලා ඩොක්ට ට කිව්වා මිනිස්ට්‍රි ෂෆල් එකකට ද දන්නෑ කියලා.
    ඒ දෙන්නම කිව්වා එහෙම වෙන්නේ නෑ කියලා.  මම එනකොට අමාත්‍යාංශයට ඔබතුමන්ලා ‘අනේ මේ ගෑණි චුතවෙලා ගියානම් කියලා‘
    කවුරුවත් හිතුව කියලා මම විශ්වාස කරන්නේ නෑ. ඒත් අන්එක්ස්පැක්ටඩ් මොහොතක. සෞඛ්‍ය අමාත්‍යාංශය වෙනුවට ප්‍රවාහන     අමාත්‍යාංශය මට භාරදීලා තිබුණා. මං එතන්ට යනකම්ම මම ඇත්තටම දැනන් හිටියෙත් නෑ. මේ මාරුවීම සිද්ධවෙනවා කියලා.

    කොහොම වුණත් ජීවිතේ හැමදේම සතුටින් භාරගන්න ඕනේ. අටුවා කතාවක තියෙනවා. රජ්ජුරුවොයි පුරෝහිතයයි ගමනක් යනකොට..
    රජ්ජුරුවො දුන්නෙන් විද්දලු මුවෙකුට. කවදාවත් එහෙම ඉලක්කෙ වරදින් නෑ..වැරදුණාම පුරෝහිතයගෙන් ඇහුව ලු ‘ඇයි මට මෙහෙම වුණේ ?‘‘ කියලා. 

    ‘‘ස්වාමීනි, වෙන්නේ හොඳට‘‘ කියලා පුරෝහිත කිව්වලු.

    තව ටිකක් කල් යනකොට. රජ්ජුරුවන්ගේම කඩුවෙන් එයාගේ ඇඟිල්ල කැපිලා පුරුකක් වෙන් වුණා ලු. ‘‘ඇයි මෙහෙම වෙන්නේ පුරෝහිත ?‘ කියලා ඇහුවාම, ‘‘ස්වාමීනි, ඕක කැපුනෙත් හොඳට‘‘ කියලා කිව්වා ලු.

    ඉතින් ඒ ගමන රජ්ජුරුවන්ට කේන්ති ගිය පාර අර පුරෝහිතයව වළට දාලා රජ්ජුරුවෝ යන්න තියෙන පාරේ යන්නේ නැතුව අනික් පැත්තට ගියාලු. ගියාම අහුවුණා ලු ගෝත්‍රික කණ්ඩායමකට.

    ඒ කට්ටිය බිලි පූජාවක් හොයාගෙන හිටිය ලු මනුස්සයෙක් ව. අරගෙන ගිහිල්ලා රජ්ජුරුවොව හොඳට නාවලා
    බිලි පූජාවට ගෙනිච්චා ලු.

    බිලි පූජාව දෙන්න හදනකොට සම්පූර්ණ මනුස්සයෙකුයි බිලි පූජාවට ඕනේ. මෙයාගෙ ඇඟිල්ලේ කෑල්ලක් නෑ, මෙයාව අතහැරිය ලු.
    ඒ ගමන රජ්ජුරුවෝ කල්පනා කළා ලු, ‘මට පුරෝහිතයා කියපු එක ලොකු දෙයක් නේ. මේ වෙන්නේ හොඳට කියලා කිව්වා නේ. මම පුරෝහිතයා වළට දාපු එක අපරාදේ. මගේ ජීවිතේ බේරුනේ ඇත්තටම ඇඟිල්ලේ කෑල්ලක් කැපිච්ච හින්දා නේ‘ කියලා.

    රජ්ජුරුවෝ ආපහු බොහොම වෙහෙස අමාරුවෙන් අර වළ හොයාගෙන ගිහිල්ලා පුරෝහිතයව ගොඩ අරගෙන කිව්වාලු ‘‘සමාවෙන්න මට‘ 

    පුරෝහිතයා කිව්වා ලු ‘‘රජතුමනි මාව වළට දාපු එකත් ඔබතුමාට මම ස්තූතිවන්ත වෙනවා. මොකද ඔබතුමාත් එක්ක මම ගියානම් එහෙම සම්පූර්ණ මනුස්සයෙක් හොයන කොට මමයි බිලි පූජාවට පත්වෙන්නේ ‘‘ කියලා.   

    ඉතින් ඒක නිසා මේ හැමදේම වෙන්නේ හොඳට කියලා අපි හිත හදාගමු. වෙන කරන්න දෙයක් නෑ. දුකක් තියෙනවා ඇමතිතුමා. අලුත් ඇමතිතුමාටත් සහයෝගය ලබාදෙන්න. මම තවමත් කියන්නේ තව සති 4ක වගේ කාලයක් අපිට තියෙන්නේ. දැනට 54%කට අපි වැක්සිනේෂන් එක දීලා තියෙන්නේ. තව සති 4කින් අපිට මේ රට බේරගන්න පුළුවන්‘‘

  • කිසිදු පුරවැසියෙක් ජනාධිපතිගේ තකතීරු තීරණ නිසා මිය යා යුතු නැහැ

    කිසිදු පුරවැසියෙක් ජනාධිපතිගේ තකතීරු තීරණ නිසා මිය යා යුතු නැහැ

    කොවිඩ් වසංගතය පාලනය කිරීමට ජනාධිපතිවරයා ප්‍රමුඛ ආණ්ඩුව ගෙන යන වැඩ පිළිවෙල දැඩි ලෙස විවේචනය කළ ජනතා විමුක්ති පෙරමුණ “කිසිදු පුරවැසියෙක් ජනාධිපතිගේ තකතීරු තීරණ නිසා මිය යා යුතු නැහැ” යනුවෙන් අවධාරණය කළේය.

    අද අන්තර්ජාලයේ සජීවී විකාශයක් ඔස්සේ මාධ්‍ය හමුවක් පවත්වමින් එම පක්ෂයේ නායක අනුර දිසානායක මේ බව අවධාරණය කර තිබිණි. එහිදී ඔහු දැක්වූ අදහස් පහත පළ වේ.

    “කොවිඞ් වසංගතය ඇතිවූ පසුව එහි දරුණුතම ව්‍යසන අවදියට අපේ රට මුහුණ දී තිබෙනවා. මේ තත්වය පිළිබඳව පාලකයන් විසින් නිසි තක්සේරුවකින් යුතුව තීන්දු-තීරණ සහ ක්‍රියාමාර්ග නොගන්නා බව තහවුරු වී තිබෙනවා. මේ නිසා පවතින තත්වය සමාජයට හෙළිදරව් කරමින් ජනතාව මේ හමුවේ ගතයුතු ක්‍රියාමාර්ග පිළිබඳව දැනුම්දීමට මෙම මාධ්‍ය හමුව පවත්වනවා.

    මේ ව්‍යසනය දරුණු වී තිබෙන තරම සිකුරාදා (13) දිනයේ දත්තවලට අනුව සෑම මිනිත්තු 09කටම වරක් අපේ ආදරණීයයන් මියයමින් තිබෙනවා. දෛනික මරණ සංඛ්‍යාව 150 ඉක්මවමින් වාර්තා වෙනවා. මෙය දෛනිකව වාර්තා වන ආසාදිතයින්ගෙන් 05% ඉක්මවන තත්වයක්. භයානක ලෙස මෙම වෛසරය පැතිරුණු රටවල් හා සංසන්දනය කරන විට ඉතාමත්ම භයානක තත්වයක්. ආසාදිතයින් දෛනිකව 3,000 ඉක්මවූ ප්‍රමාණක් වාර්තා වෙනවා. අපේ රෝහල් පද්ධතියෙන් හරි අඩක් කොවිඞ් මර්දනය සඳහා යොදා ගන්න කියලා ආණ්ඩුව උපදෙස් දී තිබෙනවා. සාමාන්‍යයෙන් ගත්තත් රෝගීන්ට ප්‍රමාණවත් නොවන රෝහල් පද්ධතියක් තියෙන්නේ. 50%ක් කොවිඞ් සඳහා පමණක්ම යෙදවීමෙන් නොනැවතී මුළු රෝහල් පද්ධතියම කොවිඞ් සඳහා යොදා ගැනීමට සිදුවීමේ අනතුරක් තියෙනවා. විශේෂයෙන්ම නිව්මෝනියා තත්වයේදී පාවිච්චි කරන ‘ටොෆිලිසුමැබ්’ කියන ඖෂධය කොළඹ ජාතික රෝහල තුළ හිඟ වී තිබෙනවා. සමස්තයක් හැටියට ඖෂධ හිඟයක් පවතිනවා.

    ඊට අමතරව සෞඛ්‍ය කාර්ය මණ්ඩල විශාල ප්‍රමාණයක් ආසාදනයට ගොදුරු වී තිබෙනවා. එක පැත්තකින් රෝහල් ධාරිතාව 50%ක් කොවිඞ්වලට වෙන් කිරීම, ඖෂධ හිඟය සහ කාර්ය මණ්ඩල ආසාදනය වීමෙන් මුළු සෞඛ්‍ය පද්ධතියම කඩා වැටීමේ අනතුරකට අපේ රට මුහුණ දී තිබෙනවා. මහජන සෞඛ්‍ය පරීක්‍ෂකවරුන්, විශාල ප්‍රමාණයක් රෝගයට ගොදුරු වී තිබෙනවා. මේ නිසා සෑම පැත්තකින්ම වාර්තා වී තිබෙන්නේ අපේ රටේ ජනතාව අනතුරට පත්වී තිබෙන බවයි. ලෝක සෞඛ්‍ය සංවිධානයේ ඉදිරි පුරෝකථන අනුව සැප්තැම්බර් මාසයේ සිට දෛනික මරණ සංඛ්‍යාව 220 ඉක්මවන බවත් දෙසැම්බර් මස අවසන් වන විට අවම වශයෙන් 15,000 සිට උපරිම වශයෙන් 30,000 දක්වා මරණ සිදුවිය හැකි බව වාර්තා කර තිබෙනවා. ලෝක සෞඛ්‍ය සංවිධානය මෙම පුරෝකථනයන් සකස් කළේ අපේ රටේ පබා පලිහවඩන ඇතුළු ජ්‍යෙෂ්ඨතම වෛද්‍ය විශේෂඥ කණ්ඩායම් සහ ලෝක සෞඛ්‍ය සංවිධානයේ විශේෂඥ කණ්ඩායම් එකතුවකින්. මෙයින් පෙන්වන දිශාවන් වඩාත් බිහිසුණු බවට අනතුරු අඟවා තිබෙනවා. වගකීම් දරන සියලු ආයතන ගතයුතු ක්‍රියාමාර්ග පිළිබඳව ආණ්ඩුවට දැනුම් දී තිබෙනවා. විශේෂඥ වෛද්‍යවරුන්ගේ සංගමයේ පද්මා ගුණරත්න මැතිතුමිය මෙහි තිබෙන මාරාන්තික ස්වභාවය අනුව අවම වශයෙන් ඇඳිරි නීති ක්‍රියාමාර්ගයකට යා යුතු බව දැක්වූවා. විශේෂඥ වෛද්‍යවරුන්ගේ සංගමයේ සභාපති ලකරුවන් ප්‍රනාන්දු රට වැසිය යුතුයි කියන යෝජනාව ඉදිරිපත් කළා. රජයේ වෛද්‍ය නිලධාරීන්ගේ සංගමය තමන් ලබාදුන් යෝජනා ක්‍රියාත්මක කළා නම් විශාල මරණ සංඛ්‍යාවක් වළක්වා ගත හැකිව තිබූ බව ප්‍රකාශ කළා. 

    මහජන සෞඛ්‍ය පරීක්‍ෂකවරුන්ගේ සංගමයේ සභාපති උපුල් රෝහණ මහත්මයා ප්‍රකාශ කර තිබුණේ දැන් රට වැහුවත් තව දින 10-12ක් යන තෙක් මේ සිදුවන මරණ වළක්වා ගත නොහැකි බවයි. නමුත් ඊට පසුව සිදුවන මරණ වළක්වා ගැනීම සඳහා රට වැසීමට සූදානම් නැත්නම් සති දෙකකට ආහාර සූදානම් කරගෙන තමන් විසින්ම නිරෝධායනයට ලක්වන ලෙස ඔහු ඉල්ලා සිටියා. නියෝජ්‍ය සෞඛ්‍ය අධ්‍යක්‍ෂ ජනරාල් හේමන්ත හේරත් මහත්මයා ගතයුතු ක්‍රියාමාර්ගය පිළිබඳව රජය දැනුවත් කර ඇති බව සහ ගත යුතු ක්‍රියාමාර්ග පිළිබඳව උපදෙස් දී ඇති බව ප්‍රකාශ කර තිබුණා. කොවිඞ් මර්දන රාජ්‍ය ඇමති සුදර්ශනී ප්‍රනාන්දුපුල්ලේ මාධ්‍යයට හෙළි කළේ රජය අදාළ තීන්දු-තීරණ ගත යුතු බවයි. වෙනත් අය තීන්දු ගන්නා බැවින් ජනතාවගේ ආරක්‍ෂාවට වගකියන්න කිසිවෙක් නැති බව ඇය ඇඟවීම් කර තිබෙනවා. පවිත්‍රා වන්නිආරච්චි සෞඛ්‍ය අමාත්‍යවරිය කැබිනට් මණ්ඩලයට කරුණු ඉදිරිපත් කරන්න සූදානම් වූ අවස්ථාවේ ජනාධිපතිවරයා එය වැළැක්වූ බව සඳහන් වෙනවා. අවශ්‍ය නම් වෛද්‍යවරුන්ට ජනාධිපතිවරයාව මුණ ගැසෙන ලෙසටත් දන්වා තිබෙනවා.

    අග්‍රාමාත්‍යවරයා හාමුදුරුවන් වහන්සේ නමක් හමුවූ අවස්ථාවේ සංචරණ සීමාවලින් ඔබ්බට ගිය ක්‍රියාමාර්ගයක් ගැනීමට අවශ්‍ය වී තිබෙන බව ප්‍රකාශ කර තිබුණා. කොවිඞ් මර්දනය පිළිබඳ අමාත්‍යතුමිය, සෞඛ්‍ය අමාත්‍යතුමිය, වෛද්‍යවරුන්ගේ සංගමය ඇතුළු සෞඛ්‍ය ක්‍ෂේත්‍රයට අදාළ සියලු සංවිධාන, ලෝක සෞඛ්‍ය සංවිධානය යන සියලු දෙනා අනතුරුදායක තත්වයේ බරපතළකම දක්වමින් රට වසා දැමිය යුතු බවට ප්‍රකාශ කර තිබුණා. මේ ක්‍ෂේත්‍රය පිළිබඳ අවබෝධය තිබෙන අයගේ මතය වෙනුවට ජනාධිපතිවරයා විශ්වාසය තබන්නේ රාජ්‍ය බුද්ධි සේවාව ලබාදෙන තොරතුරු මත පමණයි. පසුගියදා කොවිඞ් මර්දන කාර්යසාධක බලකාය රැස්වුණු අවස්ථාවේ දැඩි සංචරණ සීමා පනවන්න තීරණ ගනියි කියලා මාධ්‍ය ඇතුළු සියලු දෙනා බලාපොරොත්තු වුණා. නමුත් ඔහු ගත්තේ පවතින තත්වය මර්දනය කිරීමට කිසි සේත් ප්‍රමාණවත් තීරණ නෙවෙයි. ජනාධිපතිවරයාගේ කාර්යසාධක බලකාය එක් අවස්ථාවක මංගල උත්සව සඳහා 150ක උපරිම සීමාවක් පනවනවා. ඊළඟ තීරණයක් බවට 50 දක්වා අඩු කරනවා. අනෙක් පැත්තෙන් පළාත් අතර සීමා පනවනවා. රට පුරා ව්‍යාප්ත වෙමින් තියෙන වසංගතයට පළාත් අතර සංචරණ සීමා පනවනවා. ඊළඟට එන්නත්කරණය නොකරන අය සැප්තැම්බර් 15න් පසුව ප්‍රසිද්ධ ස්ථානවලට නොයා යුතු බවට සීමා පනවනවා.

    ඒ සම්බන්ධයෙන් පැහැදිලි කළ යුතුයි. ජනතාව එන්නත්කරණය ප්‍රතික්‍ෂේප කරන්නේ නැහැ. ආණ්ඩු විසින් නිර්දේශ කරන ඖෂධ පොරකමින් ලබාගන්න සූදනාමින් සිටිනවා. දේශීය වෛද්‍ය ඇමති සිසිර ජයකොඩි ධම්මික පැණිය හඳුන්වා දෙන විට ජනතාව රැස් කකා ඒ පසුපස ගියා. රාජ්‍ය අනුග්‍රහය සහිතව ප්‍රචාරය කළ නිසා ජනතාව මෙලෙස හැසිරුණා. අයි.ටී.එන් නාලිකාවේ සභාපතිවරයා ඇතුළු පිරිසක් රාවණා පැණිය හඳුන්වා දුන් විට ඒ පිටුපස ගියා. චන්න ජයසුමන ඇමතිවරයා සුදර්ශන පැණිය නිර්දේශ කළාම ජනතාව ඒ පිටුපස ගියා. ඉතාමත්ම ප්‍රමාද වෙලා එන්නත් ගෙනාවාම ජනතාව ඒ පිටුපස රැස්කමින් ගියා. හැබැයි ආණ්ඩුව නිසි වේලාවට එන්නත් ලබාදුන්නේ නැහැ. මේ වනවිට එන්නත් ලබාදෙන තැන්වල ජනතාව පැය 6-7 පෝලිමේ ඉන්නවා. ඒ නිසා ජනතාව එන්නත් ලබාගැනීම ප්‍රතික්‍ෂේප නොකරන බව ජනාධිපතිවරයාත් හමුදාපතිවරයාත් දැනගත යුතුයි. මේ වනවිට ලැබෙන වාර්තා අනුව මියයන 75%කට වඩා වයස අවුරුදු 60කට වැඩි අය. මේ තත්වය සලකා බලා ලෝක සෞඛ්‍ය සංවිධානය එක් එක් රටවල එන්නත්කරණ ජාතික වැඩපිළිවෙළක් සකස් කර ලබාදෙන ලෙස ඉල්ලා සිටියා. ලෝක සෞඛ්‍ය සංවිධානය මෙයට මාර්ගෝපදේශනයන් ලබාදුන්නා. ඒ අනුව අපේ රටේ විශේෂඥවරුන් එකතුවී අපේ රටේ ජාතික වැඩපිළිවෙළ සකස් කර ලෝක සෞඛ්‍ය සංවිධානයට බාරදුන්නා.

    ඒ අනුව සෞඛ්‍ය කාර්යමණ්ඩල ප්‍රමුඛ කරගත යුතුයි. ඊළඟට විවිධ සංකූලතාවලින් පෙළෙන අය සහ අවුරුදු 60ට වැඩි පුරවැසියන්. නමුත් මේ වැඩපිළිවෙළ සහ විශේෂඥයන්ගේ නිර්දේශ ප්‍රතික්‍ෂේප කර ආණ්ඩුව අවුරුදු 30-60 අතර අයට මුලින් එන්නත් ලබාදෙන්න ක්‍රියා කළා. මේ සඳහා නිර්දේශ ලබාදුන්නේ කවුද කියලා අපි දැනගන්න කැමතියි. මේ වෙනස් කිරීම සුදර්ශනී ප්‍රනාන්දුපුල්ලේ ඇමතිවරියවත් දැනගෙන හිටියේ නැහැ. අද එන්නත්කරණයේ පවා විකෘතිභාවයන් ඇතිකරන ක්‍රියාමාර්ග ගෙන තිබෙනවා. ඒ අතර ජනාධිපතිවරයා තමන්ගේ ලේකම් කාර්යාලයේ සේවකයන් කැඳවීම සීමා කර තිබෙනවා. ලෝක සෞඛ්‍ය සංවිධානය හෝ වෙනත් විශේෂඥයන්ගේ නිර්දේශ පැත්තකට දමා ජනාධිපතිවරයා ප්‍රමුඛ ආණ්ඩුව ඉතාමත්ම මාරාන්තික ක්‍රීඩාවක යෙදී සිටිනවා. අනාගතය පුරෝකථනය කළ හැකි නිවැරදි දත්ත සහ තොරතුරු විකෘති කරමින් සිටිනවා. මරණ පිළිබඳව, ආසාදිතයන් පිළිබඳව ඉදිරිපත් කරන දත්ත මේ රටේ කිසිදු පුරවැසියෙක් විශ්වාස කරන්නේ නැහැ. බරපතළම දේ මේ දත්ත මත ඉදිරිපත් කරන පුරෝකථන වැරදි වීමයි. අද දිනකට 150කට වැඩිය මියයන්නේ මේ නිසයි.

    කොවිඞ් මර්දන ජනාධිපති කාර්යසාධක බලකායේ සාමාජිකයෙක් වන රජයේ වෛද්‍ය නිලධාරීන්ගේ සංගමය පවා දෛනික මරණ සංඛ්‍යාව 250 ඉක්මවා ඇති බවට වාර්තා කොට තිබෙනවා. ගම්පහ දිස්ත්‍රික් සංවර්ධන කමිටු රැස්වීමේදී ඉතාමත් භයානක තොරතුරක් හෙළිවුණා. අගෝසතු 01 සිට 09වැනිදා දක්වා ආසාධිතයන් 12,555 වාර්තා වූ බව සෞඛ්‍ය අංශ දන්වා තිබුණා. නමුත් රජයේ නිල ලේඛනවල හෙළිකර තිබෙන්නේ ආසාධිතයින් 3529ක් පමණයි. රෝගීන් 8,326ක් අවසන් වාර්තාවලට අරගෙන නැහැ. මෙය නිල වාර්තාව මෙන් තුන් ගුණයක පිරිසක්. මේ තත්වය බදුල්ල දිස්ත්‍රික්කයෙන් සහ නැගෙනහිර ප්‍රදේශවලින්ද වාර්තා වුණා. දත්ත තොරතුරු සඟවලා ව්‍යසනයෙන් ගැලවෙන්න ජනාධිතිවරයා හිතනවාද කියලා අපි දැනගන්න කැමතියි. ආණ්ඩු පක්‍ෂයේ මන්ත්‍රීවරයෙක්ම ප්‍රකාශ කර තිබුණා, මාරාන්තික දත්ත විකෘති කිරීමක් තිබෙන බව. මේ නිසා අවදානම පිළිබඳව ජනතාවගේ අවධානය ගිලිහෙනවා. මේ රටේ පුරවැසියන්, සෞඛ්‍ය සංවිධාන, විශේෂඥ සංවිධාන යන කිසිවෙක් ජනාධිපතිවරයාගේ ක්‍රියාමාර්ගවලට එකඟ නොවන බව පැහැදිලියි. සමහර විට අගමැතිවරයා සහ කැබිනට් මණ්ඩලය පවා එකඟ නොවන බව පැහැදිලියි. හමුදාපතිවරයා සමඟ තනි පුද්ගලයෙක් අපේ රටේ මුළු පුරවැසියන්ගේ ජීවිත අවදානමකට හෙළමින් මාරාන්තික ක්‍රීඩාවක යෙදී සිටිනවා. මේ රටේ පුරවැසියන් ඡන්දය දී පාලකයා බවට ජනාධිපතිවරයා පත්කගෙන තිබෙනවා. ඒකෙන් ජනතාවගේ ජීවිතය කඩදාසියක අත්සන් කොට තමන්ට ලබාදී ඇති බවක් ජනාධිපතිවරයා නොසිතිය යුතුයි.

    වසංගතයෙන් එක මරණයක් හෝ සිදුවීමෙන් ඔවුන්ගේ පවුල්වලට, ඥාතීන්ට, සමීපතමයන්ට කෙතරම් බලපෑමක් ඇති කරනවාද? සාමාන්‍ය මරණයකදී පවා දැඩි කම්පාවකට පත්වෙනවා. එයින් මිදීම සඳහා ක්‍රමානුකූලව ආගමික වතාවත් ඇතුළු ක්‍රියාමාර්ගවලින් ආධාරයක් ලබාගන්නවා. නමුත් අවුරුදු 30-40ක් තමන්ව බලාගත් මව මිය ගියත් ආදාහනය කළ තැනවත් දකින්න ලැබෙන්නේ නැහැ. තමන්ගේ දරුවන්, බිරිඳ ඇතුළු අනෙක් පිරිස ගැනත් ඒ ආකාරයෙන්මයි. රජයේ වෛද්‍ය නිලධාරීන්ගේ සංගමය ඉදිරිපත් කළ යෝජනා ක්‍රියාත්මක කළා නම් මේ අයගෙන් 80%ක් බේරා ගත හැකිව තිබූ බව ඔවුන් කියනවා. එහෙම නම් මේ 80%ක් මරණ සිදුවන්නේ ඝාතනවලින්. ඒ ඝාතනවලට ජනාධිපතිවරයා වගකිව යුතුයි. මේ ව්‍යසනය හමුවේ ජනාධිපතිවරයා ක්‍රියාකළ ආකාර කිහිපයක් තිබෙනවා. නිවැරදි තීන්දුව නිසි වෙලාවේදී ගත්තේ නැහැ. 20වැනි සංශෝධනය සම්මත කර ගැනීම වෙනුවෙන් රට විවෘතව තැබීම, පෝට් සිටි පනත සම්මත කර ගැනීම දක්වා රට විවෘතව තැබීම, මාරාන්තික ඩෙල්ටා ප්‍රභේදය අප්‍රේල් මාසය වනවිට රටට ඇතුළත් වීමේ අනතුර පෙන්වා දී තිබියෙදී නිසි තීන්දු නොගැනීම වගේ ක්‍රියාමාර්ග රැසක් තිබෙනවා. මේ නිශ්චිත මොහොතේ විශේෂඥ කණ්ඩායම් ලබාදෙන නිර්දේශ අනුව ක්‍රියාමාර්ග අද ගත්තත් එයින් ප්‍රතිඵල ලැබෙන්නේ තව දින 10කට පමණ පසුව මරණ අඩුවීමෙනුයි. මෙතෙක් නිසි තීන්දු ගැනීම අත්හැරීමෙන් සිය ගණනක් මිය යමින් තිබෙනවා. මෙම මරණ ඝාතනයන් නොවන්නේද? ඒ පිළිබඳ වගකීම ජනාධිපතිවරයාට නොපැවරෙන්නේද? මේ සමූහ මිනිස් ඝාතනයන් පිළිබඳ වගකීම ජනාධිපතිවරයාට මිදෙන්න බැහැ.

    මෙය ආණ්ඩුවේ සාමූහික තීන්දු ගැනීමක් නෙවෙයි. ජනාධිපතිවරයාගේ උද්දච්ච තීන්දුවල ප්‍රතිඵලයක්. ඔබ නිහතමානී නැහැ. අනෙකාට ඇහුම්කන් දෙන්න සූදානම් නැහැ. හිට්ලර්ගේ අවසාන පරාජයේදී සේනාංක භාරව සිටි නිලධාරීන් සේනාංක බිඳ වැටෙන බව වාර්තා කරනකොට ඒ කිසිවකට ඇහුම්කන් දෙන්න හිට්ලර්ගේ මනස සූදානම් වුණේ නැහැ. හිට්ලර් කැමති වුණේ ඔහුට කැමති ප්‍රකාශවලට සවන් දෙන්න විතරයි. අකමැති ප්‍රකාශ කරන අය එළවා දමනවා. කැබිනට් මණ්ඩලයේදී පවිත්‍රාව නිහඬ කළෙත් ඒ විදිහට. අද ජනාධිපතිවරයා ඉදිරියේ කිසිම නිලධාරියෙක් තොරතුරු ඉදිරිපත් කරන්නේ නැහැ. ඒ තමයි නොදන්නා බවේ නොදන්නාකම. ජනාධිපතිවරයාට මේ ව්‍යසනයේ වගකීමෙන් නිදහස් වෙන්න බැහැ. මේ නිශ්චිත මොහොතේ රටේ පාලකයා ගෝඨාභය රාජපක්‍ෂ ජනාධිපතිවරයා. 20වැනි සංශෝධනය සම්මත කරගැනීම මගින් ඒකාධිකාරී බල ව්‍යුහයක් අත්පත් කරගත්තා. අද ඒවා උපයෝගී කරගෙන තිබෙන්නේ ජනතාව මරණයෙන් බේරා ගන්න නෙවෙයි. ජනතාව මරණයේ දිශාවට තල්ලු කිරීමට ඒ බලතල සියල්ල උපයෝගී කරගෙන තිබෙනවා. මේ රටේ පුරවැසින්ගේ ජීවිත පිළිබඳව ජනාධිපතිවරයා තවදුරටත් වගකීමක් දරන කෙනෙක් නෙවෙයි. ඔහු ඔහුටම ආවේණික කෙනෙක් වී සිහින ලෝකයක ජීවත් වෙනවා. රටේ සිදුවන මහා ව්‍යසනය ඔහුට ඇහෙන්නේ නැහැ.

    මේ නිසා එහි ප්‍රතිවිපාක මේ රටේ පුරවැසියන් අත්විඳිමින් තිබෙනවා. මේ රටේ පුරවැසියන්ගෙන් අප පක්‍ෂයක් විදිහට ඉල්ලන්නේ, ඔබගේ ආරක්‍ෂාව මේ පාලකයාගෙන් හෝ මේ පාලනයෙන් බලාපොරොත්තු වෙන්න එපා කියලා. දෛනිකව සිය ගණනක් මිය යමින් තිබියදී පාලකයෙකුට මේ ලෙස ඉන්න පුළුවන් නම් ඔහු කොතරම් මුග්ධ, තෙතමනයක් නැති පාලකයෙක්ද? දැන් පුරවැසියන් තමන්ගේ ආරක්‍ෂාව පිළිබඳව ගත යුතු සියලු ක්‍රියාමාර්ගවලට යොමු වෙන්න කියලා අපි ඉල්ලා සිටිනවා. පසුගිය දවස්වල අම්බලන්තොට ඇතුළු නගර ගණනාවක් ස්වේච්ඡාවෙන් වසා දැමුවා. මහජන සෞඛ්‍යවරුන්ගේ සංගමය මේ ලෙසම ජනතාවගේ ආරක්‍ෂාව ඔවුන්ම සලසා ගන්නා ලෙස ඉල්ලා සිටියා. සුදර්ශනී ප්‍රනාන්දුපුල්ලේ අමාත්‍යතුමියත් මේ ඉල්ලීම කළා. තමන් වෙනුවෙන්, තමන්ගේ පවුලේ සාමාජිකයන්, අසල්වැසියන්, ඥාතීන් සහ රටේ පුරවැසියන් වෙනුවෙන් ආරක්‍ෂා වීම සඳහා ක්‍රියාමාර්ගවලට අවතීර්ණ වන ලෙස ඉල්ලා සිටිනවා. රජයේ සේවකයන් සේවයට කැඳවූවත් නොයන ලෙස ඉල්ලා සිටිනවා. ඔබේ ජීවිකාවට රස්සාව කළ යුතු බව ඇත්ත. නමුත් ඔබේ ජීවිතය කියන්නෙ රස්සාව නෙවෙයි. සෑම පුරවැසියෙක්ම ස්වේච්චාවෙන් අගුළු දමා ගැනීමට කටයුතු කරන්න කියලා ඉල්ලා සිටිනවා. මේ ව්‍යසනයේ ගොදුරු බවට කිසිවෙකුත් පත් වෙන්න ඉඩ දෙන්න එපා කියලා ඉල්ලා සිටිනවා. සුනාමි ව්‍යසනයේදී 45,000ක් පමණ අහිමි වුණු ජාතියක් අපි. මේ රටේ පාලකයාගේ අමනෝඥ ක්‍රියාමාර්ග නිසා පුරවැසියන් මිය යා යුතුද කියන ප්‍රශ්නය අහනවා.

    We further emphasize that you work for your own safety. You put your safety first. If there is any inconvenience, we as a political party are ready to contribute to any relief. People in this country have shed enough tears. The earth is soaked with blood. The people of our generation should not fall prey to the foolish decisions of this President. So follow the maximum measures you can take for your safety. Tell this message to others. As a people, let us make a collective decision to overcome this catastrophe. Let’s make the most of the individual protection provisions. “

  • ඇෆ්ගනිස්ථානයේ සම්පූර්ණ බලය තලේබාන් අන්තවාදීන් අතට

    ඇෆ්ගනිස්ථානයේ සම්පූර්ණ බලය තලේබාන් අන්තවාදීන් අතට

    ඇෆ්ගනිස්ථානයේ ආරක්ෂක අංශ තවමත් මධ්‍යම කාබුල් පාලනය කරමින් සිටින නමුත් කොපමණ කාලයකටද යන්න පැහැදිලි නැත

    ඇෆ්ගනිස්ථානය මුළුමනින්ම තලේබාන් බලය අත්පත් කර ගැනීමේ අද්දර සිටින අතර කැරලිකරුවන් රටේ බොහෝ ප්‍රදේශ අල්ලා ගැනීමෙන් පසු අගනුවරට ළඟා වී තිබෙනවා.

    තලේබාන් සටන්කාමීන් සමග සාමකාමී ලෙස බල හුවමාරුවක් සහතික කිරීම සඳහා සාකච්ඡා පැවති බව අභ්‍යන්තර කටයුතු අමාත්‍යවරයා පවසයි. පසුගිය සති කිහිපය තුළ කාබුල්හි දහස් ගණන් ඇෆ්ගනිස්ථානුවන් රටේ වෙනත් ප්‍රදේශවල පැවති ප්‍රචණ්ඩ ක්‍රියා වලින් පලා ගොස් රැකවරණ පතා තිබේ.

    කාබුල් නගරයෙන් ඉවතට යාම සඳහා මුදල් ආපසු ගැනීමට සහ සංචාරක ලියකියවිලි සකස් කිරීමට මිනිසුන් ඉක්මන් වීම නිසා භීතියට පත් වන අවස්ථා අද දින දක්නට ලැබුණි.

    බටහිර රටවල් ද සිය පුරවැසියන් ඉවත් කිරීමට දැඩි උත්සාහයක යෙදී සිටිති. කාබුල්හි පිහිටි සිය තානාපති කාර්යාල පරිශ්‍රයේ සිට ගුවන් තොටුපල වෙත කාර්ය මණ්ඩලය ප්‍රවාහනය කිරීම සඳහා එක්සත් ජනපදය මිලිටරි හෙලිකොප්ටර් යවා ඇත.

    ඇෆ්ගනිස්ථාන රජයෙන් පළිගැනීමක් සිදු නොවන බව තලේබාන් ප්‍රකාශකයෙක් බීබීසීය වෙත පැවසීය.

    එක්සත් ජනපදය ප්‍රමුඛ මිලිටරි සන්ධානය විසින් තලේබාන් සටන්කාමී කණ්ඩායම බලයෙන් පහ කර වසර 20 කට ආසන්නය. විදේශ හමුදාව ඉවත් කර ගැනීම සමග ඔවුන් යළි වේගයෙන් රට පුරා භූමි අත්පත් කර ගෙන ඇත.

    “වෙනත් රටක සිවිල් ගැටුමක් මධ්‍යයේ නිමක් නැති ඇමරිකානු මැදිහත්වීමක් තවදුරටත් අවශ්‍ය නැහැ” තම හමුදා ඉවත්කර ගැනීම සාධාරණීකරණය කරමින් එක්සත් ජනපද ජනාධිපති ජෝ බිඩෙන් පැවසීය.

    කාබුල් වැසියන් ප්‍රතික්‍රියා කරන්නේ කෙසේද?

    කාබුල්හි භීතියක් පවතින අතර සමහර පදිංචිකරුවන් රට හැර යාම සඳහා ගුවන් තොටුපල වෙත යාමට උත්සාහ කරති. වාහන තදබදය හේතුවෙන් වාහන අතහැර දමා ඇති අතර මිනිසුන් පා ගමනින් ගුවන් තොටුපොළ වෙත ගමන් කරමින් සිටී.

    ස්වයංක්‍රීය ටෙලර් යන්ත්‍ර වලින් මුදල් ලබා ගැනීමට සහ විදේශ ගමන් බලපත්‍ර කාර්යාලයෙන් සහ විදේශීය වීසා බලපත්‍ර මධ්‍යස්ථාන වලින් සංචාරක ලියකියවිලි ලබා ගැනීමට ද කාබුල් වැසියන් යුහුසුලුව කටයුතු කරනු පෙනේ.

    තලේබාන් සටන්කාමීන් නගරය වසා දැමීම නිසා කුමක් කළ යුතු දැයි ජනතාව නොදන්නා බව කාබුල්හි පාර්ලිමේන්තු මන්ත්‍රීවරියක වන ෆර්සානා කොචා බීබීසීයට පැවසීය.

    “ඔවුන්ගෙන් සමහරෙක් දුවනවා, සමහර අය නිවෙස්වල සැඟවී සිටිනවා” ඇය පැවසුවාය.

    තලේබාන් සංවිධානය පැවසුවේ තම සටන්කරුවන්ට මේ වන විට අගනුවර මායිමේ රැඳී සිටින ලෙස නියෝග කර ඇති බවයි.

    නගර මධ්‍යයට කි.මී 40 ක් උතුරින් පිහිටි බග්රාම් ගුවන් තොටුපළ සහ බන්ධනාගාරය තමන් පාලනය කර ගත් බව අද (15) පෙරවරුවේ ඔවුහු පැවසූහ.

    වරක් ඇෆ්ගනිස්ථානයේ තිබූ විශාලතම ඇමරිකානු හමුදා කදවුර වූ මෙම සංකීර්ණය ජුලි 2 වන දින එක්සත් ජනපද හමුදාව විසින් ඉවත් කරන ලදී.

    තලේබාන් ප්‍රකාශක සුහයිල් ෂහීන් බීබීසියට පැවසුවේ කාබුල්හි ජනතාවට කරදර විය යුතු නැති බවත් ඔවුන්ගේ දේපළ හා ජීවිත ආරක්ෂිත බවත් ය.

    “අපි ජනතාවගේ සහ මේ රටේ සේවකයන්” යැයි ඔහු පැවසීය.

    ඇෆ්ගනිස්ථානුවන් පලායනු දැකීමට තමන්ට අවශ්‍ය නැති බවත්, ඒ වෙනුවට පශ්චාත් ගැටුම් ප්‍රතිසංස්කරණ කටයුතු සඳහා උදව් කරන බවත් ඔහු පැවසීය.

    ඇෆ්ගනිස්ථානයේ පාලන සිතියම - 2021 අගෝස්තු 15 - දෙවන අනුවාදය

    අනෙක් රටවල් ප්‍රතික්‍රියා කරන්නේ කෙසේද?

    එක්සත් ජනපදය සිය කාර්ය මණ්ඩලය සහ එහි මෙහෙවරට සහාය වූ ඇෆ්ගන් ජාතිකයින් ඉවත් කිරීම සඳහා භටයින් 5000 ක් යොදවා තිබේ. නගරය වටා තානාපති කාර්ය මණ්ඩලය ප්‍රවාහනය කරන හෙලිකොප්ටර් යානා දැකගත හැකි අතර වැදගත් ලිපි ලේඛන විනාශ කිරීම නිසා තානාපති කාර්යාල සංකීර්ණය අසල දුමාරයක් ඉහළ යන බවට වාර්තා විය.

    බ්‍රිතාන්‍ය භටයින් 600 ක් පමණ තමන්ගේම ඉවත් වීමේ මෙහෙයුමට සහාය වීම සඳහා යොදවා ඇත.

    කාබුල් සිතියම

    අනෙකුත් රටවල් ද ඇෆ්ගනිස්ථානයේ පිහිටි සිය තානාපති කාර්යාවල ආරක්ෂාව තහවුරු කරමින් සිටින අතර බටහිර රටවල් සිය තානාපති කාර්යාල මුළුමනින්ම වසා දමා සිය ජාතිකයින් ඉවත් කර ගනිමින් සිටිති.

    ඇෆ්ගනිස්ථානයේ පවතින වාතාවරණය පිළිබඳව සාකච්ඡා කිරීම සඳහා එක්සත් ජාතීන්ගේ ආරක්ෂක මණ්ඩලයේ හදිසි රැස්වීමක් කැඳවීමට රුසියාව සැලසුම් කරයි.

    තලේබාන් සංවිධානය විසින් රුසියානු තානාපති කාර්යාලයට ආරක්ෂක සහතික ලබා දී ඇති හෙයින් සිය තානාපති කාර්යාලය වසා නොගන්නා බව රුසියාව පවසයි.

    (මේ අතර තහවුරු නොකළ විදෙස් මාධ්‍ය වාර්තා ( අල්ජසීරා) පවසන්නේ ඇෆ්ගන් ජනපතිවරයා රටින් පලා ගොස් ඇති බවයි)

    බී.බී.සී වාර්තාවකි

  • අවුරුදු 12ට වැඩි ළමයින්ටත් කොවිඩ් එන්නත්

    අවුරුදු 12ට වැඩි ළමයින්ටත් කොවිඩ් එන්නත්

    වයස අවුරුදු 12ට වැඩි ළමයින්ටත් පියවරෙන් පියවර කොවිඩ් ප්‍රතිශක්තීකරණ එන්නත් ලබා දීමේ වැඩපිළිවෙලක් රජය විසින් සැළසුම් කර ඇති බව අග්‍රාමාත්‍ය මහින්ද රාජපක්ෂ මහතා අද (15) දින පැවසීය.

    හම්බන්තොට රෝහලේ ස්ථාපිත දකුණු පළාත් කොවිඩ්-19 ළමා ප්‍රතිකාර ඒකකය විවෘත කිරීමේ අවස්ථාවට තංගල්ල කාල්ටන් නිවසේ සිට වීඩියෝ තාක්ෂණය ඔස්සේ එක්වෙමින් අග්‍රාමාත්‍ය මහින්ද රාජපක්ෂ මහතා මේ බව අවධාරණය කළේය.

    ළමයින්ට එන්නත් ලබා දීමේ දී විවිධ සංකූලතා තිබෙන දරුවන්ට එහි දී ප්‍රමුඛත්වය ලබා දෙන බව ද අග්‍රාමාත්‍යතුමා කියා සිටියේය.

    අග්‍රාමාත්‍ය ආර්යා ශිරන්ති රාජපක්ෂ මහත්මිය චාරිත්‍රානුකූලව පොල්තෙල් පහන දල්වමින් හම්බන්තොට රෝහලේ ස්ථාපිත දකුණු පළාත් කොවිඩ්-19 ළමා ප්‍රතිකාර ඒකකය විවෘත කළාය. අනතුරුව ඇය එහි වෛද්‍යවරුන් ඇතුළු හෙද කාර්ය මණ්ඩලය සමඟ නිරීක්ෂණ චාරිකාවක ද නිරත වූවාය.

    හම්බන්තොට රෝහලේ කොවිඩ් ප්‍රතිකාර කටයුතු පළමුව ආරම්භ වූයේ 2020 වසරේ මාර්තු මාසයේ දී ය. එතැන් පටන් මේ දක්වා රෝගීන් 6000කට පමණ එමගින් ප්‍රතිකාර කර තිබේ.

    කොවිඩ් වැළඳෙන ළමයින් සඳහා මෙතෙක් ප්‍රතිකාර ක්‍රියාත්මක වී ඇත්තේ කාන්තා වාට්ටු සංකීර්ණයේය.

    නව ඒකකය ස්ථාපිත වීමත් සමඟ ළමයින් වෙනුවෙන් විශේෂ අවධානයක් යොමු කිරීමට හැකිවනු ඇති බව වෛද්‍යවරු පවසති.

    කොවිඩ්-19 ළමා ප්‍රතිකාර ඒකක සෑම පළාතකම ස්ථාපිත කිරීම ළමා රෝග විශේෂඥ වෛද්‍ය සංගමයේ සංකල්පය වී තිබේ.

  • මුඛ ආවරණ පැළදීම ගැන නව නීති

    මුඛ ආවරණ පැළදීම ගැන නව නීති

    මුඛ ආවරණ නිසියාකාරව නොපැලඳ සිටින පුද්ගලයින්ව හෙට (16) දින සිට අත්අඩංගුවට ගන්නා බව පොලිස් මාධ්‍ය ප්‍රකාශක, ජ්‍යෙෂ්ඨ නියෝජ්‍ය පොලිස්පති අජිත් රෝහණ මහතා සඳහන් කළා. පොලිස් මාධ්‍ය ප්‍රකාශකවරයා වැඩි දුරටත් ප්‍රකාශ කළේ එලෙස අත්අඩංගුවට ගන්නා පුද්ගලයින්ව අධිකරණයට ඉදිරිපත් කරන බවයි.

    මේ අතර සෞඛ්‍ය අමාත්‍යාංශයේ තාක්ෂණික සේවා අධ්‍යක්ෂ වෛද්‍ය අන්වර් හම්දානි මහතා අද (15) මාධ්‍ය හමුවේ ප්‍රකාශ කළේ කට වැසුවොත් රට වැසීමට සිදු නොවන බවයි.

    පවතින තත්වය යටතේ රට වහනවාද කට වහනවාද යන්න ජනතාව තීරණය කළ යුතු බවද ඔහු සඳහන් කළේය.

    මේ සම්බන්ධයෙන් වැඩි දුරටත් කරුණු පැහැදිලි කළ හම්දානි මහතා ‘‘සමාජයේ බොහෝ පිරිසක් මුව ආවරණ නිසි ආකාරයට පළඳින බවක් පෙනෙන්නට නෑ. වයිරසය වේගයෙන් පැතිරීමට එයද ප්‍රධාන හේතුවක් වී තිබෙනවා. මුව ආවරණ දාන්නම් වාලේ දමා වැඩක් නැහැ. එයින් සිදුවන්නේ කොවිඩ් ව්‍යාප්තිය වේගවත් වීම පමණයි. ඒ නිසා මුව ආවරණ පැළඳීම සම්බන්ධයෙන් නීතී තවත් දැඩි කළ යුතුයි‘‘

    සුපිරි වෙළෙඳ සල් සහ සාප්පු සංකීර්ණ සම්බන්ධයෙන්ද අලුත් නීති ළඟදීම හඳුන්වාදීමට නියමිත බවකී වෛද්‍ය අන්වර් හම්දානි මහතා හැකිතාක් සංචරණ නවත්වා නිවෙස්වලටවී කාලය ගත කරන්නැයි ජනතාවගෙන් ඉල්ලා සිටින ලෙස ජනතාවගෙන් ඉල්ලීමක් ද කළේය.

  • විවාහා උත්සව වලට නැවත දැනුම් දෙනතුරු අවසර නෑ

    විවාහා උත්සව වලට නැවත දැනුම් දෙනතුරු අවසර නෑ

    2021 අගෝස්තු 17 වනදා මධ්‍යම රාත්‍රියේ සිට නැවත දැනුම්දෙන තුරු නිවෙස්වල හෝ උත්සව ශාලාවල විවාහ මංගල්‍යය උත්සව සඳහා අවසර හිමි නොවන බව කොවිඩ් -19 පැතිරීම වැළැක්වීමේ ජාතික ක්‍රියාන්විත මධ්‍යස්ථානයේ ප්‍රධානී, යුද හමුදාපති ජෙනරාල් ශවේන්ද්‍ර සිල්වා මහතා පැවසීය. 

    රජයේ ප්‍රවෘත්ති දෙපාර්තමේන්තුව විසින් අද (15) දින නිවේදනයක් නිකුත් කරමින් සඳහන් කරන්නේ කොවිඩ්-19 වසංගත ව්‍යාප්තිය පාලනය කිරීමේ තවත් පියවරක් ලෙස මෙම තීරණය ගෙන ඇති බවයි.

    එමෙන්ම අද (15) මධ්‍යම රාත්‍රියේ සිට ජනයා ඒකරාශී වන කිසිදු අවස්ථාවකට ද අවසර නොමැති බවත් අවන්හල්වල වරකට රැස්වී සිටිය හැක්කේ ඒ්වායේ ධාරිතාවයෙන් 50%කට නොවැඩි පිරිසකට පමණක් බවත් එම නිවේදනයේ වැඩි දුරටත් සදහන් වේ.

    එසේම ප්‍රසිද්ධ ස්ථානවල ගැවසීමෙන් හැකිතාක් දුරට වළකින්නැයි ද රජය ඉල්ලා සිටින බව ද එහි දැක්වේ.

  • ‘රට ලොක්ඩවුන් කරන ලෙස මෙතෙක් විශේෂඥ නිර්දේශ ලැබී නෑ – රාජ්‍ය ඇමැති චන්න ජයසුමන

    ‘රට ලොක්ඩවුන් කරන ලෙස මෙතෙක් විශේෂඥ නිර්දේශ ලැබී නෑ – රාජ්‍ය ඇමැති චන්න ජයසුමන

    කොවිඩ් -19 වසංගත තත්ත්වය පාලනය කිරීම සඳහා රට ලොක්ඩවුන් කිරීමට වෛද්‍යවරුන් මෙතෙක් නිර්දේශ කර නොමැති බව ඖෂධ නිෂ්පාදනය, සැපයීම හා නියාමන රාජ්‍ය අමාත්‍ය, මහාචාර්ය චන්න ජයසුමන මහතා පැවසීය.

    අද (15) අනුරාධපුරයේදී මාධ්‍ය හමුවේ වත්මන් තත්ත්වය පිළිබද කරුණු පැහැදිලි කරමින් රාජ්‍ය අමාත්‍යවරයා කියා සිටියේෙ රට ලොක්ඩවුන් කිරීම සඳහා වෛද්‍යවරුන් නිර්දේශ ලබාදෙන්නේ නම් එය සිදුකිරීමට රජය සූදානම් බවයි.

    රාජ්‍ය අමාත්‍යවරයා කියා සිටියේ රජය විසින් සියලු තීන්දු තීරණ ගනු ලබන්නේ වෛද්‍ය විශේෂඥයින්ගේ උපදෙස් අනුව බවයි.

    “වසංගත රෝග විද්‍යා ඒකකය තියෙනවා. කොවිඩ් සම්බන්ධයෙන් ජනාධිපති කාර්ය සාධන බළකායක් තියෙනවා. ඒ වගේම ඊට පරිබාහිරව කටයුතු කරන විවිධ අධ්‍යයන ආයතන, වෘත්තීය සමිති ගණනාවක් තියෙනවා. ඔවුන් අපිට නිල වශයෙන් දෙන උපදෙස් හා නිර්දේශ ක්‍රියාත්මක කරන්න අපි බැඳී සිටිනවා. හැබැයි දේශපාලන බලවේගවල බළල් අත් හැටියට වැඩකරන ඇතැම් පුද්ගලයෝ ඉන්නවා. ඔවුන්ට අවශ්‍ය වෙලා තියෙන්නේ ආණ්ඩුව පෙරළන්න. ඒ පහත් උත්සාහය සඳහා කිසිවිටෙකත් ඉඩ දෙන්නේ නැහැ.

    රට වහන්න සෞඛ්‍ය අංශවලින් නිල වශයෙන් අපිට උපදෙස්, නිර්දේශ ලැබෙනවා නම් එය ක්‍රියාවට නංවන්න අපි කිසිසේත් පැකිලෙන්නේ නෑ. ඒ වගේම එදිනෙදා ආදායමක් හොයාගෙන ජීවන්වෙන මිනිස්සුන්ටත් ක්‍රමවේදයක් තියෙන්න ඕනේ.”

    මේ අතර කොවිඩ් වසංගතය හමුවේ ස්වයං සංචරණ සීමා පනවා ගන්නා ලෙස ජනතාවගෙන් ඉල්ලීමක් කරන බවද චන්න ජයසුමන මහතා වැඩිදුරටත් පැවසීය.

  • ලෝකයේ ඉහළම කොවිඩ් මරණ අනුපාතය ලංකාවෙන් ! අද මරණ 160ක් තහවුරු කරයි

    ලෝකයේ ඉහළම කොවිඩ් මරණ අනුපාතය ලංකාවෙන් ! අද මරණ 160ක් තහවුරු කරයි

    ඊයේ (13) වැනි දින සිදුවූ කොවිඩ් -19 ආසාදිත මරණ 160ක් සෞඛ්‍ය සේවා අධ්‍යක්ෂ ජනරාල්වරයා විසින් අද (14) දින තහවුරු කළ බව රජයේ ප්‍රවෘත්ති දෙපාර්තමේන්තුව විසින් නිකුත් කළ මාධ්‍ය නිවේදනයක සදහන් වේ.

    මෙය ශ්‍රී ලංකාවෙන් දිනක් තුළ වාර්තා වු වැඩිම කොවිඩ් මරණ ගණන බවයි සෞඛ්‍ය අංශ පැවසුවේ.

    මියගොස් ඇති පිරිස අතර වයස අවුරුදු 60 හෝ ඊට වැඩි 124 දෙනෙකු සිටින අතර වයස අවුරුදු 30ට අඩු එක් පිරිමි පුද්ගලයෙකු ද සිටින බව එම නිවේදනයේ දැක්වෙනවා..

    මෙම මරණ 160ත් සමග මෙරට සිදුවී ඇති සමස්ත කොවිඩ් මරණ සංඛ්‍යාව 5,935ක් දක්වා ඉහළ ගොස් තිබෙනවා.

    දෛනික ගෝලීය කොවිඩ් ආසාදිතයින් සංඛ්‍යාවට සාපේක්ෂව දෛනික ගෝලීය කොවිඩ් මරණ සංඛ්‍යාව පවතින්නේ සියයට 1.4 ක් වැනි අඩු අගයක නමුත් ශ්‍රී ලංකාවේ එම අගය මෙලෙස සියයට 5ක් වැනි ඉහළ අගයක බවයි විශේෂඥයින් පවසන්නේ.

    අද දින වාර්තා වූ කොවිඩ් ආසාදිත මරණ 160ත් සමග ලංකාවේ තත්ත්වය ගැන අප කළ විමසීමකදී සෞඛ්‍ය අංශ ප්‍රධානියෙකු පැවසුවේ ‘‘මෙමගින් තහවුරු වන්නේ ලංකාවේ වසංගතය කොතරම් බිහිසුණු තත්ත්වයට පත්ව තිබේද යන්නයි. ලංකාව මිලියන 20ක් වැනි සාපේක්ෂව කුඩා ජනගහනයක් සිටින රටක් නිසා දෛනිකව සිදුවන මරණ 160ක් විශාල අගයක් ලෙස පෙනී නොයා හැකියි. ඒත් මේ සංඛ්‍යාව ඉන්දියාව සමග සසදා බලන විට මරණ 9600ක් වැනි අති විශාල අගයක්. මෙවැනි දෛනික මරණ අනුපාතකයක් මේ දක්වා ලෝකයේ කිසිම රටකින් වාර්තා වී නැහැ. මෙවැනි බිහිසුණු තත්ත්වයක් පෙනි පෙනී රට වසා දැමීම වැනි දැඩි පියවරක රජය නොයන්නේ කුමක් නිසාද යන්න අපට බරපතළ ගැටලුවක්. ජනපතිවරයා සහ යුධ හමුදාපතිවරයා මේ යන්නේ බ්‍රසීල ජනපතිවරයා ගිය පාරේ නම් ලංකාව විශාල ඛේදවාචකයකට මුහුණ දෙන බව ඉතාම පැහැදිලියි‘

  • කොවිඩ් ආසාදිතයින් නිවෙස් තුළ රැකබලා ගැනීමේ වැඩපිළිවෙළ මුළු රටටම පුළුල් වෙයි

    කොවිඩ් ආසාදිතයින් නිවෙස් තුළ රැකබලා ගැනීමේ වැඩපිළිවෙළ මුළු රටටම පුළුල් වෙයි

    දෛනිකව වාර්තාවන කොවිඩ් රෝගීන්ගේ ප්‍රමාණය ඉහළයාම හේතුවෙන් රෝහල් ධාරිතාවය ඉක්මවා යාම පාලනය සදහා සෞඛ්‍ය අමාත්‍ය පවිත්‍රා වන්නිආරච්චි මහත්මියගේ උපදෙස් පරිදි රෝගීන් රෝහල් ගත කිරීම ප්‍රමුඛතාවයන් අනුව සිදු කරමින්, වෛරසය ආසාදිතයින් වෛද්‍ය අධීක්ෂණය මත නිවෙස් තුල රැක බලා ගැනීමේ වැඩසටහනක් පසුගියදා බස්නාහිර පළාත තුල ක්‍රියාත්මක කරන ලදි.

    සෞඛ්‍ය අමාත්‍ය පවිත්‍රා වන්නිආරච්චි මහත්මියගේ උපදෙස් පරිදි එම වැඩසටහන මුළු දිවයිනම ආවරණ වන පරිදි වෛද්‍යවරු 1000 කගේ පමණ අධීක්ෂණය යටතේ ක්‍රියාත්මක කිරීමට සෞඛ්‍ය අමාත්‍යාංශය පියවර ගෙන ඇත. එම වැඩසටහන අද (14) රත්නපුර දිස්ත්‍රික්කය තුල ආරම්භ කරන ලද අතර, ක්‍රමාණුකූලව මුළු දිවයිනම ආවරණය පරිදි ඉදිරියේ දී ක්‍රියාත්මක කෙරෙනු ඇත.

    මෙම වැඩසටහන පිළිබදව මෙරට සියළුම සෞඛ්‍ය කාර්ය මණ්ඩලය පුහුණු කටයුතු අවසන් කොට ඇති අතර, පූර්ව සීමාවාසික පත්වීම් අපෙක්ෂාවෙන් සිටින වෛද්‍යවරුන් 426 කට ද පුහුණූව ලබාදී ඇත. තවත් එවැනිම  වෛද්‍යවරු පිරිසක් පුහුණු කිරීමට ද කටයුතු යොදා ඇත.

    සංකූලතා නොමැති, වයස අවුරුදු 02 ට වැඩි 65 ට අඩු,  අඩු අවධානම්, රෝග ලක්ෂණ පෙන්නුම් නොකරන හෝ සුළු රෝග ලක්ෂණ පෙන්වන කාණ්ඩයන්ට අයත් කොවිඩ් ආසාදිතයින් නිවෙස් තුල වෛද්‍ය අධීක්ෂණය මත රැකබලා ගැනීම මෙන්ම අවධානම් තත්ත්වයේ පසුවන පිරිස් රෝහල්ගත කිරිමට මෙහිදී පියවර ගනු ලැබේ. ප්‍රදේශයේ සෞඛ්‍ය වෛද්‍ය නිලධාරී විසින් ඔවුනට ලබාදී ඇති මාර්ගෝපදේශ හා නිර්ණායකයන්ට අනුකූලව වෛරසය ආසාදිතව නිවෙස් තුල ප්‍රතිකාර සදහා ලියාපදිංචි කර යොමු කරන රෝගීන්ට පමණක් පැය 24 පුරා ක්‍රියාත්මක ප්‍රධාන දුරකථන මධ්‍යස්ථානය (Call Center – 1390) සමග සම්බන්ධ විය හැක. දින 14 ක වෛද්‍ය අධීක්ෂණයෙන් පසු ද දින 07 ක්  යන තෙක්  රෝගීයාට මෙම සේවාව ලබාගත හැකිවීම ද විශේෂත්වයකි.

    ප්‍රාදේශයේ සෞඛ්‍ය වෛද්‍ය නිලධාරී විසින් රෝගීයා පරික්ෂා කර නිවසේ රඳවා ප්‍රතිකාර කිරීම හෝ රෝහල් ගත කිරීමට පියවර ගැනිම සිදු කරනු ලබයි. මෙහිදී රෝගියා නිවෙස් තුල ප්‍රතිකාර ලබාගන්නේ නම් ඒ සදහා තම කැමැත්ත ද පළ කළ යුතුය.

    පරිගණක තාක්ෂණය ක්‍රමවේදය ඔස්සේ රෝගීන් ලියාපදිංචිය සිදු කෙරේ. එම තොරතුරු ප්‍රධාන දුරකථන මධ්‍යස්ථානය හා සම්බන්ධ වේ. දුරකථන මධ්‍යස්ථානය ඔස්සේ රෝගීයාගේ තොරතුරු ලබාගෙන තහවුරු කර ගැනීමෙන් පසු ප්‍රධාන දුරකථන මධ්‍යස්ථානයේ සිට විශේෂඥ වෛද්‍යවරුන් ප්‍රමුඛ වෛද්‍යවරුන්ගේ අධීක්ෂණයට රෝගියා ලක්වේ. රෝගීයාට අවශ්‍ය වෛද්‍ය උපදෙස් ද මෙහිදී ලබාදෙන අතර, රෝගියාගෙන් ලබාගන්නා තොරතුරු ද පරිගණක ගත කරනු ලැබේ. එම අධීක්ෂණ කටයුතු වල දී රෝගීන් වැඩිදුර ප්‍රතිකාර සදහා යොමු කිරීමට අවශ්‍ය වන්නේ නම් රෝගී තත්ත්වය අනුව රෝගියා යොමු කළ යුතු රෝහල හෝ ප්‍රතිකාර මධ්‍යස්ථානය වෙත ක්ෂණිකව යොමු කිරීමට පියවර ගනු ලබයි, ඒ සදහා ප්‍රාදේශීය සෞඛ්‍ය සේවා අධ්‍යක්ෂවරුන් හරහා වැඩපිළිවෙළක් ද සකස් කොට ඇත.

  • ‘දැන් සම්පූර්ණ වගකීම ජනතාව අතේ‘: PHI සංගමය

    ‘දැන් සම්පූර්ණ වගකීම ජනතාව අතේ‘: PHI සංගමය

    ‘ඇත්තටම ඊයේ දිනයේ නව සංචරණ සීමා පැනවීමක් නෑ. ඒ නිසා අපි මින් ඉදිරියට රට තුළ සංචරණ සීමා පැනවීම හෝ එවැනි තීරණ ගන්න රජයට බලකරන්නේ නෑ. අපි රටවැසියන්ගෙන් ආයාචනා කරන්නේ නිවෙස්වලට අවශ්‍ය බඩු බාහිරාදිය රැස්කරගෙන නිවෙස්වලට වී සිටින්න කියලයි‘‘

    මේ කාරුණික ආයාචනය කරන්නේ මහජන සෞඛ්‍ය පරීක්ෂකවරුන්ගේ සංගමයේ සභාපති උපුල් රෝහණ මහතායි.

    වත්මන් කොවිඩ් වසංගතයේ සැබෑ තත්ත්වය මනාව දන්නා එම සංගමය අද (14) විශේෂ මාධ්‍ය ප්‍රකාශයක් කරමින් ජනතාවගෙන් ඉල්ලා සිටියේ ලබන සඳුදා සිට අපි මේ රට ස්වයං විනයක් ඇතුව ස්වයං සංචරණ සීමා පනවාගෙන මේ රටෙන් මේ රෝගය තුරන් කිරීම සඳහා වගකීමෙන් කටයුතු කිරීමට එක්වන ලෙසයි.

    උපුල් රෝහණ මහතා මෙසේ ද ප්‍රකාශ කළා.

    ‘‘දින කිහිපයක් දෛනිකව රෝගීන් 3,000 ඉක්මවලා වාර්තා වෙනවා. මරණ 150 ඉක්මවලා වාර්තා වෙනවා. ඉදිරි දින කිහිපයේදී මේ තත්ත්වය ඉතාම ඉහළ යයි. ඇත්තටම ඊයේ දිනයේ නව සංචරණ සීමා පැනවීමක් නෑ. ඒ නිසා අපි මින් ඉදිරියට රට තුළ සංචරණ සීමා පැනවීම හෝ එවැනි තීරණ ගන්න රජයට බලකරන්නේ නෑ. අපි රටවැසියන්ගෙන් ආයාචනා කරන්නේ නිවෙස්වලට අවශ්‍ය බඩු බාහිරාදිය රැස්කරගෙන නිවෙස්වලට වී සිටින්න කියලයි. ලබන සඳුදා දිනයේ සිට අපි මේ රට ස්වයං විනයක් ඇතුව ස්වයං සංචරණ සීමා පනවාගෙන මේ රටෙන් මේ රෝගය තුරන් කිරීම සඳහා වගකීමෙන් කටයුතු කරමු. බලධරීන්ට කියන්නේ සීත කාමරවලින් එළියට ඇවිත් මියයන මිනිස්සු සහ රෝගීවන අය නිසා දුක්වෙන මිනිස්සු ගැන අවබෝධයෙන් ඉදිරියට තීරණ ගන්නවා නම් රට ලස්සන වෙයි කියලා.”