පාස්කු ප්රහාරයට වසර දෙකකට ආසන්න කාලයක් ගත වී තිබුණ ද වරද කරුවන්ට දඬුවම් නොදීම පුදුම සහගත බව අගරදගුරු පදවි ප්රකාශක කමිටුව අද (29) දින මාධ්ය නිවේදනයක් නිකුත් කරමින් සදහන් කරයි.
මැල්කම් කාදිනල් රංජිත් කොළඹ අගරදගුරුතුමන්, මැක්ස්වෙල් සිල්වා, ජේ.ඩී ඇන්තනී ප්රනාන්දු, ඇන්ටන් රංජිත් කොළඹ සහායක රදගුරුතුමන්ලා සහ ෆ්රීලි මුතුකුඩආරච්චි, ෆ්රැන්සිස් සේනානායක, ඩිලාන් ප්රනාන්දු, සිරිල් ගාමිණී ප්රනාන්දු, සිසිල් ජෝයි පෙරේරා, කැමිලස් ප්රනාන්දු, ශාන්ත සාගර හෙට්ටිආරච්චි, ලෝරන්ස් රාමනායක, ඩෙනින්ටන් සුබසිංහ යන පියතුමන්ලාගේ අත්සනින් නිකුත් කර ඇති එම නිවේදනයේ වැඩි දුරටත් මෙසේද සදහන් වේ.
රටේ සිදුවන සෙසු අපරාධ සම්බන්ධයෙන් අපරාධ විමර්ශන දෙපාර්තමේන්තුව සහ අදාළ අනෙකුත් බුද්ධි තෙරතුරු සෙවීමට සම්බන්ධ රජයේ ආයතන කඩිනමින් එම අපරාධවල කතුවරුන් සොයා යන තත්ත්වයක් තිබියදී, 269 දෙනෙකු අමු අමුවේ ඝාතනය කර හා 300කට වැඩි පිරිසක් ආබාධිතයින් සහ සදහටම ආරෝග්ය ශාලාවලට යන්නන් බවට පත් කළ ඒ මහා විනාශය සිදු කළ අය සොයන්නට සහ දඬුවම් දීමට වසර 2ක් ගත වී ඇතත් එය නොහැකි වීම ඇත්තෙන්ම පුදුමය දනවන ප්රහේලිකාවකි.
මෙම පරීක්ෂණ සිදුකරන ආයතනවල කාර්යක්ෂමතාවයට යම් බලපෑම් කිරීමක් ඇත්දැයි සාධාරණ සැකයක් මතුවන බවත් මෙවැනි මිලේච්ඡ ත්රස්ත ක්රියාවන් සැලසුම් කරන, සිදුකරන සහ අනුබල දෙන කිසිවකුට නීතියේ රැහැනින් මිදීයාමට කිසිඳු ඉඩක් නොමැති බව ප්රායෝගිකව ඔප්පු කර පෙන්වීම සාමය ආරක්ෂා කිරීමේ සහ නීතිය ක්රියාත්මක කිරීමේ වගකීමෙන් බැඳී සිටින සියලු නිලධාරීන්ගේ සහ බලධාරීන්ගේ වගකීමක් මෙන්ම යුතුකමක් බව‘‘ ද නිවේදනයේ සඳහන් වේ.
