බින්දුවෙන් පටන් ගන්න‘ කියලා කතාවක් තියෙන බව ඔබ අහලා ඇති. ඒ කියන්නේ බින්දුවෙන් බින්දුව එකතු වෙලා තමයි කුඩා දිය පාරක් හැදෙන්නේ. ඊට පස්සේ ඇළක්… ඇළවල් රැසක් එක්වෙලා ගගක්. එහෙම තමයි කතාව.
මේ කතාව අපි හැමෝටම අදාළයි. ඒත් අපි බොහෝ දෙනකුට ගගක් තියා ඇළක්වත් වෙන්න ලැබෙන්නේ නැහැ. ඒත් ඒක එහෙමයි කියලා අපි කවුරුත් ජීවිතය අතහරින්න සූදානම් නැහැ.
මේ කතාව ඒ වගේ බින්දුවෙන් පටන්ගෙන අද ලෝක පූජිත පුද්ගලයින් බවට පත්ව සිටින කිහිප දෙනකුගේ. ඔවුන් සිනමා තරු. එහෙම නැතිනම් නළු නිළියන්. හැබැයි ලංකාවේ නම් නෙමෙයි. ඉන්දියාවේ. ලෝකයේ දැවැන්තම සිනමා කර්මාන්තයට හිමිකම් කියන ‘බොලිඩුයේ සුපිරි තරු.
අපි කතා කරන්න යන්නේ මේ බොලිවුඩ් සුපිරි තරු මුලින්ම ලබාගත් වැටුප ගැන. ඔබටත් මුළුන්ම හිමි වූ වැටුප ගැන මතක තිබේ නම් එදා සහ අද ගැන කල්පනා කරමින් මේ කතාව කියවන්න.
ඉතිං… ඇත්තම කතාව නම් ලෝකේ තියෙන හොදම රැකියාව සිනමා තරුවක් වීම බවයි. ඊට හේතු ඔබටත් මටත් පැහැදිලියි. වැටුපට අමතරව තවත් කොපමණ දේවල් ලැබෙනවාද ? දැවැන්ත ජනප්‍රියත්වයට සමගාමීව, සුඛෝපභෝගී ජීවිතයක්ද භුක්ති විඳින්න ලැබෙනවා. බලය හිමි වෙනවා.
ඒ කොහොම වුණත් ඔවුන් මහෝෂධ වාගේ රිදී හැන්ද අතින් අරන් ඉපදුණේ නැහැ. දැවැන්ත මාධ්‍ය අවරණය ලබමින් පැමිණියේ නැහැ. ඔවුන් සියලුම දෙනා මුලින්ම සදහන් කළ ආකාරයට ‘බින්දුවේ‘ සිට ආරම්භ කළ අයයි. ඔවුන් බොහෝ දෙනෙක් දුෂ්කර මාවතකට ගොස් ඉණිමඟට නැඟී අද සිටින තැනට පැමිණි අයයි.
ඉතින්, අපි තීරණය කළා ඔබේ ප්‍රියතම තරු කිහිපයක් සහ ඒවා චිත්‍රපටවල නිෂ්පාදනය කිරීමට පෙර ඔවුන් උපයා ගත් මුදල ගැන කතා කරන්න.
සුපිරි තරුව අමිතාබ් බච්චන්
අමිතාබ් බච්චන් බොහෝ විට ඉන්දියානු සිනමා ඉතිහාසයේ විශාලතම සුපිරි තරුව විය හැකියි. කෙසේ වෙතත්, මුම්බා බොලිවුඩ් පුරය වෙත පැමිණීමට පෙර ඔහු කොල්කටා හි නැව් සමාගමක සේවය කළ අතර එහිදී තම ආරම්භක වැටුප රුපියල් 500ක් බවයි අමිතාබ් කියන්නේ.
බොලිවුඩයේ රජු හෙවත් ෂාරුක් ඛාන්
බොලිවුඩයේ රජු – ෂාරුක් ඛාන්ට සෑම බොලිවුඩ් රසිකයෙකුගේම හදවතේ විශේෂ ස්ථානයක් හිමි වෙනවා. නමුත්, ඔබ දැන සිටියාද අපේ ආදරණීය රජුගේ පළමු වැටුප රු. 500ක්ලු. ෂාරුක්ට තමා බොහෝ ප්‍රිය කළ ටජ්මහල නැරඹීමට අවශ්‍ය බැවින් එම වැටුප අග්‍රා සංචාරයක් සඳහා යොදා ගත්තාලු
අමීර් ඛාන්
අමීර් ඛාන් බොලිවුඩයේ තවත් සුපිරි තරුවක්. අති සාර්ථක චිත්‍රපට රැසක ඔහු රගපා තිබෙනවා. අමීර්ගේ බොලිවුඩ් ආගමනය සිදුවන්නේ සහකාර අධ්‍යක්ෂවරයෙකු ලෙසයි. ඔහුට මුලින්ම වැටුප ලෙස ගෙවා තිබෙන්නේ රුපියල් 1000ක්.
ලෝක රූ රැජිණ – ප්‍රියංකා චොප්රා
ප්‍රියංකාගේ මව සහ පියා දෙදෙනාම වෛද්‍යවරුන්. දෙමව්පියන්ට දාව උපත ලැබුවද ප්‍රියංකා චොප්රා කිසි විටෙකත් වෛද්‍ය විද්‍යාව කෙරෙහි උනන්දුවක් දැක්වූයේ නැහැ. ලෝක රූ රැජින කිරුළ දිනා ගැනීමෙන් පසු ප්‍රියංකාට හිමිවුණ මුල්ම පැවරුමෙන් ඇයට රුපියල් 5000ක් හිමිවී තිබෙනවා. ඒ මුදලට ඇය කළේ කුමක්ද දන්නවාද ? සාමාන්‍ය ඉන්දියානු දරුවෙකු මෙන් ඇය සියළුම මුදල් තම මවට ලබා දුන්නේ එය ආරක්ෂිතව තබා ගැනීම සඳහා යි. කෙතරම් මිහිරිද!
අක්ෂේ කුමාර්
වර්තමානයේ අක්ෂේ කුමාර් බොලිවුඩයේ වාණිජමය වශයෙන් වඩාත්ම සාර්ථක තාරකාවක් බවට තර්කයක් නැහැ. ඔහු සාමාන්‍යයෙන් සෑම වසරකම චිත්‍රපට තුනක හෝ හතරක රගපාන අතර ඒවා සියල්ලම ප්‍රේක්ෂකයින් සිනමාහල් වෙත ඇද ගැනීමට සමත් වෙනවා. කෙසේ වෙතත් බොලිවුඩයට පැමිණීමට පෙර අක්ෂේ බැංකොක්හි ආපන ශාලාවක වේටර්වරයකු හා සූපවේදියෙකු ලෙස සේවය කළ අතර මුල්ම වැටුප ලෙස උපයා ගත්තේ රුපියල් 1500 ක් පමණක් බවයි කියන්නේ.
Filmfare.com ඇසුරිණි – සකස් කළේ – තුෂාධවි
