සමයං ඇතුළු හත්දෙනකු ඝාතනය කිරීම සඳහා ඔත්තු බැලූ තරුණයා, ප්‍රහාරය එල්ල කළ පසු පලාගිය පාතාල කල්ලියට රැකවරණය දුන් කාන්තාව සහ එම පාතාල කල්ලිය සමග සමීප සබඳතා පැවැත්වූ හිටපු නාගරික මන්ත්‍රීවරයකු කොළඹ අපරාධ කොට්‌ඨාසය මගින් 17 දා අලුයම අත්අඩංගුවට ගෙන ඇත.
මෙහිදී අත්අඩංගුවට ගත් කඩුවෙල නගර සභාවේ හිටපු මන්ත්‍රීවරයා එම ප්‍රහාරය එල්ල කළ අංගොඩ ලොක්‌කා සමඟ සමීප සබඳතා පැවැත්වූ පුද්ගලයෙකි. එහෙත් මෙම ප්‍රහාරය සම්බන්ධයෙන් එම නාගරික මන්ත්‍රීවරයාගේ සම්බන්ධතාවක්‌ නොමැති බව පසුව කළ පරීක්‌ෂණවලින් හෙළිව ඇති අතර ඔහු පොලිස්‌ ඇපමත මුදාහැරීමට කොළඹ අපරාධ කොට්‌ඨාසය කටයුතු කර ඇත.
මෙම ප්‍රහාරය සඳහා ඔත්තු බැලූ බව කියන තරුණයා පානදුර, කෙසෙල්වත්ත ප්‍රදේශයේ පදිංචි ත්‍රිරෝද රථ රියෑදුරෙකි. ඝාතනයට ලක්‌වූ සමයං ඇතුළු පිරිස බන්ධනාගාර බස්‌ රථයෙන් රැගෙන යන වේලාවන් පිළිබඳ ඔත්තු බලා අංගොඩ ලොක්‌කාගේ කල්ලියට තොරතුරු ලබාදී ඇත්තේ මොහු බව පොලිසිය කළ විමර්ශනවලදී හෙළිවී ඇත.
මෙම ප්‍රහාරයෙන් පසු අංගොඩ ලොක්‌කා ඇතුළු පාතාල කල්ලිය ගාල්ල, වලහන්දුව ප්‍රදේශයේ තම ඥති නිවසක්‌ වෙත ආරක්‌ෂිතව රැගෙන ගොස්‌ ඇත්තේ ද සැකකාර තරුණයා විසින් බව අනාවරණය වී තිබේ.
එම නිවෙස්‌ හිමි කාන්තාව ප්‍රහාරය එල්ල කළ පාතාල කල්ලියේ සාමාජිකයන් පිරිසට දින කිහිපයක්‌ රැකවරණය ලබාදී ඇති බව හෙළිවී ඇත.
මේ වන විට එම කාන්තාව ද අත්අඩංගුවට ගෙන තිබේ. කොළඹ අපරාධ කොට්‌ඨාසය සහ පොලිස්‌ විශේෂ කාර්ය බළකාය දින කිහිපයක්‌ තිස්‌සේ කළ මෙහෙයුමකින් පසු මෙම සැකකරුවන් කොටුවී ඇත්තේ 17 දා අලුයම් කාලයේදීය.
අත්අඩංගුවට ගෙන සිටින සැකකරු සහ සැකකාරියගෙන් රැඳවුම් නියෝග මත ප්‍රශ්න කරගෙන යයි.
