මාලිගාවත්ත නිවාස සංකීරණයේ සඟවා තිබූ මත්ද්‍රව්‍ය කිලෝ 22ක් සොයා කළ සෝදිසි මෙහෙයුමක් අතර සිදුවූ වෙඩි හුවමාරුවකදී මත්ද්‍රව්‍ය ජාවරම්කරුවෙකු වන මාකඳුරේ මධුෂ් වෙඩිවැදි මරණයට පත්ව තිබේ.
ඔහු එම ස්ථානයට රැගෙන ගොස් ඇත්තේ, කොළඹ අපරාධ කොට්ඨාසයේ නිලධාරීන් විසිනි.
අද (20) අළුයම එම වැටලීම සිදුකර තිබේ.
එහිදී මත්ද්‍රව්‍ය ජාවාරම්කරුවන් විසින් පොලිස් නිලධාරීන්ට වෙඩි තබා ඇත.
ඉන් අනතුරුව ඇති වූ වෙඩි හුවමාරුවෙන් මාකඳුරේ මධූෂ්ට සහ CCD නිලධාරියෙකුට වෙඩිවැදී තිබේ. ඉන් මාකඳුරේ මධූෂ් මරණයට පත්වී තිබේ.
වසර 1 1/2කට ආසන්න කාලයක් අපරාධ පරීක්ෂණ දෙපාර්තමේන්තු භාරයේ සිටි මාකඳුරේ මධුෂ් පසුගිය සිකුරාදා (ඔක්තෝබර් 16) වැඩිදුර පරික්ෂණ සඳහා කොළඹ අපරාධ කොට්ඨාසයට භාර දුනි.
ඉන් අනතුරුව කොළඹ අපරාධ කොට්ඨාසයේ නිලධාරීන් විසින් මාකඳුරේ මධුෂ් ලබාදුන් තොරතුරකට අනුව කොටිකාවත්ත ප්‍රදේශයෙන් සඟවා තිබූ හෙරොයින් කිලෝ 10ක් සොයා ගැණුනි.
වසර ගණනාවක් ඩුබායිහි රැඳී සිටි මාකඳුරේ මධුෂ් අපරාධ පරීක්ෂණ දෙපාර්තමේන්තුවේ බුද්ධි මෙහෙයුමකින් අනතුරුව 2019 මැයි මාසයේ දී මෙරටට රැගෙන එන ලදි.
උපුටා ගැනීම: අද දෙරණ
සංස්කාරක සටහන:
අද (20) පාර්ලිමේන්තුවට 20 වන ආණ්ඩුක්‍රම ව්‍යවස්ථා සංශෝධනය ඉදිරිපත් කිරීමට නියමිත අතර හෙට(21) සහ අනිද්දා (22) එය විවාදයට ගැනීමට සැලසුම් කොට තිබේ.
මීට පෙර (2015 යහපාලන ආණ්ඩුව පැමිණීමට පෙර ) බොහෝ අවස්ථාවලදී මෙවැනි දරුණු අපරාධ කරුවන් සැඟවුණු ආයුධ පෙන්වීම ගෙන ගිය අවස්ථාවලදී පොලිසිය සහ ඔවුන් අතර ද්වන්ධ සටන් ඇතිවී එම අපරාධ කරුවන්ගේ ජීවිත අහිමි වූ අවස්ථා බොහෝමයක් වාර්තාවිය. කෙසේ වෙතත් මෙවර වාර්තාවන්නේ සැඟවුණු ආයුධ වෙනුවට සැඟවුණු කුඩු පෙන්වීමට ගිය බවයි. පාතාලයට සම්බන්ධ බොහෝ අපරාධකරුවන්ධ මේ වන විට අත් අඩංගුවට පත් වෙමින් සිටින්නේ කුඩු ජාවාරමේ නිරත ජාවාරම්කරුවන් ලෙසය.
අපරාධකරුවන්, ජාවාරම්කරුවන් පිටුපස බොහෝ විට දේශපාලන හස්තයන් ක්‍රියාත්මක වන බව ප්‍රසිද්ධ රහසකි. එසේම ඇතැම් විට රටේ තීරණාත්මක දේශපාලන, ආර්ථික තීන්දු තීරණ ගන්නා සහ ක්‍රියාත්මක වන අවස්ථාවලදී එවැනි දේ පරයා වෙනත් මාතෘකා ඉස්මතු වීම සහ මාධ්‍ය ගණිකා වෘත්තියේ යොදවා ගනිමින් එවැනි දෑ ඉස්මතු කිරීම මෑත කාලයේ සුලභව සිදුවන බව වහලුන් නොවන බුද්ධිමත් ජනතාවට පසක් වෙමින් තිබේ.
