ඉන්දියාවේ බෙංගාලුරූස්හි ජීවත්වන රාජාලක්ෂ්මීට උපතින් ම සුන්දර රූ සපුවක් සහ තියුණු බුද්ධියක් හිමි විය. ඇගේ අනාගත බලාපොරොත්තුව වූයේ දන්ත වෛද්‍ය විශේෂඥවරියක් වීමය. ඇය පාසැල් කාලයේ සිටම උනන්දුවෙන් එම විෂය ක්ෂේත්‍රය පිළිබඳව අධ්‍යනය කළා ය. එහෙත් අවාසනාවකට අවුරුදු 21 වන විට ඇය දරුණු රිය අනතුරකට ගොදුරු වුවා ය. අනතුරින් පසුව ශල්‍ය කර්ම කිහිපයක්ම කළ ද ඇගේ සුසුම්නාවේ ආබාධිත තත්ත්වය සුව කළ කොහැකි විය. ඒ හේතුවෙන් ඇය ජීවිත කාලය රෝද පුටුවේ ගත කිරීමට සිදු විය. ඒ වුවත් රාජාලක්ෂ්මී දන්ත වෛද්‍ය විශේෂඥවරියක වීමේ සිහිනය අමතක නොකළා ය. ආබාධිත ජීවිතය පිළිබඳ පසුතැවිලි නොවී ධනාත්මකව සිතා කටයුතු කළ ඇය මේ වන විට දී තමන්ගේම දන්ත වෛද්‍ය මධ්‍යස්ථානයේ දන්ත වෛද්‍ය විශේෂඥවරිය ලෙස කටයුතු කරන්නී ය. ඊට අමතරව ඇය සතුව විවිධ දක්ෂතා රැසකි.
වෘත්තීමය උපදේශිකාවක් මෙන් ම පරිසර ගවේෂිකාවක්, අසරණයින්ට පිහිටවන දානපතිනියක් මෙන් ම මෝස්තර නිරූපිකාවක් ලෙස ඇය වර්තමානයේ දී රෝද පුටුවකට වී ජීවිතය දිනු ඉන්දියාවේ ප්‍රසිද්ධතම කාන්තාව වශයෙන් හඳුන්වති. ඇය ආබාධිත කාන්තාවන්ගේ අයිතිවාසිකම් සුරැකීමේ පදනමේ සභාපති වශයෙන් ද කටයුතු කරන්නී ය. තමන්ගේ ජීවිත කථාව ආදර්ශයක් ලෙස ගෙන ඇය අනිකුත් කාන්තාවන්ට ද තමන්ට හිමිව ඇති දෑ තුළින් ජීවිතය ජයගන්නා ආකාරය කියා දෙන්නීය.
රාජාලක්ෂ්මීට 2014 වර්ෂයේ දී Miss Wheelchair India තරගාවලියෙන් ජයග්‍රහණය හිමි කර ගත්තා ය. එමෙන් ම 2015 වර්ෂයේ දී Orion මෝස්තර නිර්මාණ සතියට සහභාගී වූවාය. ඇය 2014 වර්ෂයේදී රූ රැජීණික් වී ලබා ගත් අත්දැකීම් 2015 වසරේ තරඟාවලියට සහභාගී වු යුවතියන්ට ද කියා දුන්නේ සමාජ මෙහෙවරක් ලෙසිනි. අබාධිත තත්ත්වය කොතරම් දරුණු වුවද ඇය හා සමාන සුන්දර එහෙත් ආබාධිත නොවූ යුවතියන්ට ද ඇය කිසිඳු උපදෙස් දෙන්නීය.
ගෟහ නිර්මාණකරණය,ගායනය,චිත්‍ර ඇදීම,පිහිනීම වැනි විවිධ අංශයන්හි තරග සඳහා සඳහා රටවල් 11 කට පමණ ගොස් ඇතැම් තරගවලින් ජයග්‍රහණය හිමි කර ගෙන ඇත. ඉන්දියාවේ යටිතල පහසුකම් පිළිබඳව සොයා ලබා ඒ පිළිබඳව මිනිස් ප්‍රජාව දැනුවත් කිරීමේ වැඩසටහන් ඇය විසින් මෙහෙය වන්නේ සාමාන්‍ය කාන්තාවක පරිද්දෙනි. බාහිරින් ඇය රෝද පුටුවකට වී සිටිය ද ඇගේ සිත ශක්තිමත්ය.
“මම කැමතියි මගේ මෝටර් රථය පඳවා ගෙන ගොස් මගේ එදිනෙදා රාජකාරී කරන්න. ඒක මට ලොකු සතුටක්. මම මගේ දන්ත වෛද්‍ය මධ්‍යස්ථානයේ රෝගීන් පැමිණෙන තෙක් සිටින විට බො‍හෝ රෝගීන් මා දෙස පුදුමයෙන් බලනවා. ඔවුන් හිතන්නේ මමත් රෝගීයෙක් කියලා.” යනුවෙන් ඇය ප්‍රකාශ කළා ය.
අහිමි වු දෑ පසුපස ගොස් නිකරුණේ ජීවිතය විනාශ කර ගන්නා තරුණ පරම්පරාවට රාජාලක්ෂ්මී ආදර්ශයකි. මිනිසුන්ගේ දත් හා සම්බන්ධ ගැටලු විසඳාලීමට ඇය විවිධ ප්‍රදේශවලට ගොස් වැඩමුළු පවත්වයි.
පොතපතින් ලබා ගන්නා දැනුමටත් වඩා රාජාලක්ෂ්මීගේ ජීවිතයෙන් සෑම කාන්තාවකටම ගත යුතු යමක් අන්තර්ගතව ඇත. ඇගේ ජීවිතයෙන් එක් පුද්ගලයෙකුට වුව ද තම ජීවිතය ධනාත්මකව ජය ගැනීමට අස්වැසිල්ලක් වන බව මාධ්‍ය වර්තා කරයි.
[rns_reactions]
