LTTE ත්රස්තවාදීන් විසින් ශ්රී දළදා මාලිගාවට එල්ල කරන ලද ත්රස්ත ප්රහාරයේදී, කාන්තා පොලිස් සැරයන් (1176) ජයවර්ධන මහත්මිය විසින් සිදුකරන ලද විශිෂ්ට රාජකාරිය වෙනුවෙන් ජනපති මෛත්රීගේ විශේෂ නියෝගයකට අනුව පොලිස්පති පූජිත් ජයසුන්දර මහතා විසින් ඇයට සුවිශේෂී ත්යාග මුදලක් ලබාදෙන ලදී.
තම ජීවිතය ගැනද නොසලකා දන්ත ධාතූන් වහන්සේ අබියස සිදුවීමට ගිය මහා විනාශය වළක්වා ගැනීමට ඇය මුල් විය.
1998 වර්ෂයේ ජනවාරි 25 වැනි දින LTTE ත්රස්තවාදීන් විසින් ලෝකවාසී බෞද්ධ ජනතාවගේ මුදුන් මල්කඩ වූ ශ්රී දළදා මාළිගාවේ ප්රධාන වාහල්කඩ දොරටුව ඉදිරිපිට වාහන බෝම්බයක් පුපුරුවා හරින ලදී.
එම අවස්ථාවේ කාන්තා බැතිමතුන්ගේ ශරීර පරීක්ෂා කරමින් නිරායුධ රාජකාරියේ යෙදී සිටි එවකට ශ්රී දළදා මාළිගාව පොලිස් ස්ථානයට අනියුක්තව රාජකාරි කරමින් සිටි මෙම නිලධාරිනිය වේගයෙන් මාළිගාව දෙසට පැමිණෙන වාහනයක් සම්බන්ධයෙන් සැක පහළවීමත් සමග එම වාහනයේ පැමිණි පුද්ගලයන් ගිනි අවි රැගෙන මාළිගාව දෙසට දිව එනවා දැක වහාම ක්රියාත්මක වී තම ජිවිතය ගැනද නොතකා දළදා මාළිගාවේ ප්රධාන වාහල්කඩ දොරටුවේ ගේට්ටුව ඉබි යතුරු දමා වසා දැමීමට කටයුතු කර ඇත.
නිලධාරිනිය විසින් සිදුකරන ලද එම වික්රමාන්විත ක්රියාව හේතුවෙන් දන්ත ධාතූන් වහන්සේ අබියස සිදුවීමට ගිය මහා විනාශයක් වළක්වා ගැනීමට හැකිවිය.
මෙම නිර්භීත ක්රියාව සිදුවී වසර 20 කට පසු මේ සම්බන්ධව ජනපති මෛත්රීගේ සහ පොලිස්පති ජයසුන්දරගේ අවධානය යොමුවී එම වීර ක්රියාව සිදුකළ වර්තමානයේ කෑගල්ල මූලස්ථාන පොලිසියට අනියුක්ත රාජකාරි කරනු ලබන මෙම නිලධාරිනිය වෙත රුපියල් ලක්ෂ 5 ක ත්යාග මුදලක්, වැටුප් වර්ධකයක් සමග ජනපති පොලිස්පති ප්රශංසාවක්ද සමගින් පිරිනමන ලදි.
