අසුභ පුවතක්! ලොව විශාලතම තෙල් කාන්දුවට ශ්‍රී ලංකා මුහුදු තීරණය නතුවීමේ දැඩි අවදානමක්! (වීඩියෝ)

අසුභ පුවතක්! ලොව විශාලතම තෙල් කාන්දුවට ශ්‍රී ලංකා මුහුදු තීරණය නතුවීමේ දැඩි අවදානමක්! (වීඩියෝ)
Spread the love

ශ්‍රී ලංකාවට නැගෙනහිර මුහුදේ සංගමන්කන්ද තුඩුවේ සිට නාවික සැතපුම් 38 ක් පමණ දුරින් මුහුදේ දී ගිනිගත් නෞකාව අද (04) අලුයම 5 වන විට නාවික සැතපුම් 25 ක් ගොඩබිමට ආසන්න වී තිබේ.

“BIG Focus“වැඩසටහන සමග එක්වෙමින් සමූද්‍රීය පරිසර ආරක්ෂණ අධිකාරියේ සභාපතිනි, නීතිඥ දර්ශනී ලහඳපුර මහත්මිය පවසා සිටියේ, “අපි උපකල්පනය කරන්න ඕනේ මේක කලාපය තුළ නෙමෙයි මේ ලෝකයේ සිදුවීමට යන විශාලම පාරිසරික විනාශය ලෙසයි. ඒ තරමට විනාශ බලගතු විය හැකියි.“ යනුවෙනි.

Loading...

“කිරින්දේ සිට නැගෙනහිර පැත්තට ඇති ඉතා සංවේදී පරිසර පද්ධතියට වෙන්න පුළුවන් හානිය ඉතාමත් දැවැන්තයි. කාන්දුවීමක් සිදුවුවහොත් එය සිදුවුනාට පසුව සුදානම් වීමට අපිට කාලය මදි.“ යනුවෙන් ද ඇය වැඩිදුරටත් පැවසුවාය.

යම් හෙයකින් තෙල් කාන්දුවීමක් සිදුවුවහොත් ගත හැකි ක්‍රියාමාර්ග සම්බන්ධයෙන් සමුද්‍රිය පරිසර ආරක්ෂණ අධිකාරියේ සාමාන්‍යාධිකාරී ආචාර්ය ටර්නි ප්‍රදීප් කුමාර අදහස් දක්වමින් පවසා සිටියේ, “තෙල් කාන්දුවු විගස ඝණ බවට පත්වෙනවා. ග්‍රීස් බවට පත්වෙලා වතුරේ පාවෙනවා. මේ ග්‍රීස් ප්‍රමාණය වෙරළ කලාප වෙන ආරුගම්බේ නිලාවේලී, වාකරේ සහ ත්‍රිකුණාමලය දක්වා ආවොත් ඒ තෙල් අයින් කරන්නම කාලයක් ගතවෙයි.“යනුවෙනි.

“එහෙම අයින් කරත් අපිට අයින් කරන්න පුළුවන් වෙන්නේ සියයට 60ක් වැනි ප්‍රමාණයක්. සියයට 40ක් අයින් කරන්න බැහැ. හැම වැලිකැටයක් ගානේ සුද්ද කරන්න බැහැ. ඒ පරිසරයේ තෙල් තට්ටුව ඉවත් කරලා තිබුණ තත්ත්වයට එන්න වසර 25 ක් හෝ 30ක් යයි. එසේ නැත්නම් නොඑන්නත් පුළුවන්. මේ තත්ත්වයේ තෙල් විෂවීමක් ලෝකයේ වෙනවාමයි. මේකෙන් කෙටි කාලීන නෙමෙයි දීර්ඝ කාලයක් හානි වෙනවා. “ යනුවෙන් ද ඔහු වැඩිදුරටත් පැවසීය.

තල්මසුන් හා කැස්බෑවන් වැනි සත්වයින්ට තෙල් තට්ටුව හේතුවෙන් ජලයෙන් උඩට ඒමට අවස්ථාව ඇහිරී යන බව ද ඒ මහතා වැඩිදුරටත් සඳහන් කරයි.

නෞකාවේ බඳ කොටසේ ජල මට්ටමින් යට මීටර 20ක් දක්වා වු ප්‍රමාණයක් පුරා තෙල් ගබඩා කර ඇතැයි පැවසු ටර්නි ප්‍රදීප් කුමාර මහතා, පිපිරීම සිදුවු අවස්ථාවේ නෞකාවේ බොයිලේරුව තුළ පමණක් ගින්න ව්‍යාප්තව තිබී ඇතැයි ද පැවසීය.

නමුත් එම අවස්ථාවේ දී නෞකාවේ කපිතාන්වරයා ගින්න මැඩ පැවැත්වීමට උත්සහ නොකර එම ප්‍රදේශය වසා දමා ඉවත්ව ඇතැයි ද පැවසු ඔහු ගින්න එම අවස්ථාවේ දී පාලනය කර ගැනීමට අවස්ථාව තිබී ඇතැයි ද කියා සිටියේය.

පැනමා ධජය සහිත ‘නිව් ඩයමන්ඩ් ‘ ඉන්ධන නෞකාව කුවේට් හී මිනා අල් අහමදී වරායෙන් පිටත්වී නැගෙනහිර ඉන්දියාවේ ඔඩිෂා ප්‍රාන්තයේ පැරඩිප් වරාය වෙත ගමන් කරමින් තිබිය දී ශ්‍රී ලංකාවට නැගෙනහිර මුහුදේ දී ගිනි ගැනීමකට ලක්විය.

නෞකාවේ සිදුවු පිපිරීමෙන් එහි සිටි පිලිපීන ජාතික නාවිකයෙකු මිය ගොස් ඇති බව නාවික හමුදාව අද තහවුරු කළේය.

කෙසේ වෙතත් නෞකාවේ ගබඩා කර ඇති මෙට්‍රික්ටොන් 270,000ක් වු බොරතෙල් සංචිතයට මෙතෙක් ගින්නෙන් කිසිඳු බලපෑමක් සිදුවී නොමැති බව නාවික හමුදාව තහවුරු කරයි.

-අද දෙරණ-

Loading...