ඔස්ට්‍රේලියාවේ සෙනට් සභික ලැරිසා වෝටර්ස් පාර්ලිමේන්තුවේදී මව්කිරි දුන් පළමුවැන්නා පත්වීමට සමත්වූවාය. ලැරිසා වෝටර්ස් අඟහරුවාදා (9) පාර්ලිමේන්තුවේදී තම දෙමස් වියැති ආලියා ජෝයි දියණියට මව්කිරි දුන්නාය.
ලැරි වෝටර්ස් ඔස්ට්‍රේලියාවේ වාමාංශික ‘ග්‍රීන්ස’ පක්ෂය නියෝජනය කරන අතර මීට පෙර ඔස්ට්‍රේලියා පාර්ලිමේන්තුවේදී එවැනි සිදුවීමක් වාර්තා වී නැත. ඔස්ට්‍රේලියා පාර්ලිමේන්තුවේ පහළ මන්ත්‍රී මණ්ඩලය පසුගිය වසරේදී සභාව තුළ මව්කිරි දීම අනුමත කළේය.
එම තත්ත්වය උද්ගත වූයේ 2015 වසරේ ඇතිවූ විවාදයක ප්‍රතිඵලයක් හේතුවෙනි. ඔස්ට්‍රේලියා ආණ්ඩුවේ අමාත්‍යවරියක වූ කෙලි ඕ ඞ්වයර් 2015 වසරේදී මවක් වූ අතර තම බිළිඳාට මවුකිරී දීමට සිදුවීම හේතුවෙන් ඇයට පාර්ලිමේන්තු සැසිවාරවලට සහභාගී වීමට නොහැකි විය. ඒ අනුව ඔස්ට්‍රේලියා පාර්ලිමේන්තුවේ සිටින මවුවරුන් වන මන්ත්‍රීවරියන්ට තම බිළිඳන්ට මවුකිරි හෝ ආහාර දීම අනුමත කරමින් ඔස්ට්‍රේලියා පාර්ලිමේන්තුව පසුගිය වසරේදී නව පනතක් සම්මත කරගත්තේය.
ඒ අනුව ඔස්ට්‍රේලියාපාර්ලිමේන්තුව තුළ දී තම දරුවාට මවුකිරි දුන් පළමු වැන්නා බවට පත්වීමට සෙනට් සභික ලැරිසා වෝටර්ස් සමත්වූවාය.
“තව තවත් කාන්තාවන් සහ මාපියන් පාර්ලිමේන්තුවට පැමිණිය” යුතු යැයි තම ෆේස්බුක් පිටුවේ සටහනක් තබමින් ලැරිසා වෝටර්ස් කීවාය.
“අපට පවුලේ සාමාජිකයන්ට හිතවත් පරිසරයක් තිබෙන සේවා ස්ථාන අවශ්‍යයි. නම්‍යශීලි සේවා ස්ථාන අවශ්‍යයි. තමන්ගේ දරුවන් රැගෙන හා හැකි සේවා ස්ථාන අවශ්‍යයි” ලැරිසා තවදුරටත් සඳහන් කර තිබිණි.
මෙම සිදුවීම අගය කළ යුතු බව කම්කරු පක්ෂය නියෝජනය කරන සෙනට් සභික කැති ගැලැගර් ප්‍රකාශ කළාය.
“ලෝකයා පුරා කාන්තාවන් පාර්ලිමේන්තුවේදී මවුකිරි දී තිබෙනවා. කාන්තාවන් වෘත්තිය ක්ෂේත්‍රයට පිවිසිය යුතුයි. ඔවුන් විවාහ වෙනවා. ඔවුන් මාතෘත්වයට පත්වෙනවා. ඒ නිසා ඔවුන්ගේ වෘත්තියේ නියැලීමටත් තමන්ගේ දරුවන් බලාගැනීමටත් අවස්ථාවක් හිමිවිය යුතුයි. ඒ සඳහා සුදුසු වෘත්තීය පරිසරයක් නිර්මාණය විය යුතුයි. ඒ සඳහා පහසුකම් සැලැසිය යුතු” යැයි කැති ගැලැගර් ප්‍රකාශ පැවැසුවාය.
[rns_reactions]
