ඕස්ට්‍රියාව සියදිවි නසා ගැනීමට සහාය ගැනීමට ඉඩ දීමේ නීතිය බලාත්මක කර තිබේ. මාරාන්තික ලෙස රෝගාතුර වූ හෝ සදාකාලික බෙලහීන තත්ත්වයට පත්වූ වැඩිහිටියන්ට සසහාය දිවි නසා ගැනීම (assisted suicide) තෝරාගැනීමට ජනවාරි පළමු දා සිට විධිවිධාන සැලසිනි.
දෙසැම්බර් මාසයේ දී, ආණ්ඩුක්‍රම ව්‍යවස්ථාපිත අධිකරණ තීන්දුවක් නිකුත් වීමෙන් පසුව, පාර්ලිමේන්තුව මෙම නව නීතිය අනුමත කළේ ය.
මෙම ක්‍රියාවලිය දැඩි ලෙස නියාමනය කෙරෙන අතර, එක් එක් සිද්ධිය වෛද්‍යවරුන් දෙදෙනෙකු විසින් තුලනය කෙරෙනු ඇති. මේ වෛද්‍යවරුන් දෙදෙනාගෙන් එක් අයෙකු සමනකර වෛද්‍ය විශේෂඥයෙකු විය යුතු ය.
එමෙන් ම, වෙනත් විකල්ප ඉතිරිව ඇති කිසිම අවස්ථාවක කිසිවෙකු මරණය තෝරා නොගන්නා බව සහතික කිරීම සඳහා, සමනකර සත්කාර ඒකක (palliative care) සංවර්ධනය කිරීමට ද රජය මුදල් වෙන්කර ඇති බව බලධාරීහු පවසති.
සසහාය දිවි නසා ගැනීම, එනම් යමෙකුට තම ජීවිතය අවසන්කර ගැනීමට පහසුකම් ලබා දීම, ඕස්ට්‍රියාවට අසල්වැසි ස්විට්සර්ලන්තයේ ද නීත්‍යානුකූල ය.
එසේම එය ස්පාඤ්ඤය, බෙල්ජියම, සහ නෙදර්ලන්තය ඇතුළු යුරෝපීය රටවල් කිහිපයක ද සාපරාධී ලෙස නොසැලකේ.
සියදිවි නසාගැනීම සඳහා ක්‍රියාකාරීව සහාය වීම තවදුරටත් ඕස්ට්‍රියාව තුළ නීති විරෝධී වන අතර, නව නීති විශේෂයෙන්ම බාලවයස්කරුවන් හෝ මානසික සෞඛ්‍ය ගැටලු ඇත්තවුන්ට බල නොපායි.
තම ජීවිතය අවසන් කිරීමට කැමති වැඩිහිටියන් රෝග විනිශ්චයක් ඉදිරිපත් කළ යුතු අතර, ස්වාධීනව තීරණ ගැනීමට හැකියාව ඇති බව තහවුරු කළ යුතු ය.
වෛද්‍යවරුන් දෙදෙනෙකුගේ අනුමැතිය ලබාගැනීමෙන් පසු, රෝගීන් තම තීරණය ගැන යළි සිතා බලමින් සති දොළහක කාලයක් ගතකළ යුතු ය – ඔවුන්ට ඇත්තේ ආන්තික රෝගයක් නම් මෙම කාලය සති දෙකකි.
මෙම පොරොත්තු කාලයෙන් පසුව ද තීරණය වෙනස් නොකළහොත්, නීතීඥයෙකුට හෝ නොතාරිස්වරයෙකුට දැනුම් දීමෙන් පසුව ඖෂධාලයකින් මරණය සිදුකරන බෙහෙත ලබාගැනීමට ඔවුනට හැකි ය.
අවභාවිතය වැලැක්වීම සඳහා මෙවැනි ඖෂධ අලෙවි කරන ඖෂධාල ප්‍රචාරය නොකෙරෙන අතර, ඒවායේ නම් හෙළි කරන්නේ මෙම දැනුම්දීම් ලබන නීතිඥයින්ට සහ නොතාරිස්වරුන්ට පමණි.
මෙතෙක් ඕස්ට්‍රියානු නීතියට අනුව, සියදිවි නසා ගැනීමට යමෙකු පොළඹවන හෝ ඒ සඳහා සහාය වන ඕනෑම අයෙකුට වසර පහක සිර දඬුවමකට යටත්වීමට සිදුවිය.
සසහාය දිවි නසා ගැනීම සඳහා වූ පූර්ණ තහනම පසුගිය වසරේ ෆෙඩරල් අධිකරණයක් විසින් ඉවත් කරන ලද අතර, එය “ස්වයං-නිර්ණයට ඇති අයිතිය උල්ලංඝණය කිරීමක්” බවට තීන්දු කර තිබුණි.
නමුත් කිසිවෙකුගේ “ප්‍රබල සහ බරපතල ඉල්ලීමකට” අනුව එම තැනැත්තා ඝාතනය කිරීමට එම දඬුවම එලෙසම ලබාදෙනු ඇත.
නව නීතිය පාර්ලිමේන්තුව විසින් අනුමත කිරීමට පෙර ඇතැම් දේශපාලන විරුද්ධවාදීන් තර්ක කළේ, සසහාය දිවි නසා ගැනීම අපේක්ෂා කරන්නන්ට ඒ සඳහා බාධක බොහොමයක් පසුකිරීමට සිදුවන බව යි.
එහි සීමාවන් අවශ්‍ය තරමට නැතැ යි තවත් පිරිසක් තර්ක කළේ, රෝගීන්ගේ තීරණ ගැනීමේ හැකියාව තක්සේරු කිරීමට මනෝවෛද්‍ය ඇගයීමක් ප්‍රමාණවත් නොවන බව පවසමිනි.
bbc sandesaya
