ශ්‍රී ලංකාවේ දැනට ක්‍රියාත්මක විවිධ විවාහ නීති යටතේ විවාහ සඳහා ඒකාකාරී වයස් සීමාවක් ඇති කිරීම සඳහා නීති සංශෝධන සකස් කිරීමේ අවශ්‍යතාවක් මතුව ඇතැයි පාර්ලිමේන්තු මන්ත්‍රීවරියන්ගේ සංසදයේ සභාපති, කාන්තා හා ළමා කටයුතු අමාත්‍ය සරෝජා සාවිත්‍රී මහත්මිය පැවසුවාය.
පාර්ලිමේන්තුවේ පැවති රැස්වීමකදී ඇය මේ බව ප්‍රකාශ කළා ය.
මෙම හමුව සඳහා පාර්ලිමේන්තු මන්ත්‍රීවරියන්ගේ සංසදයේ නියෝජ්‍ය සම සභාපතිවරියන් වන පාර්ලිමේන්තු මන්ත්‍රීනී නීතීඥ චමින්ද්‍රානි කිරිඇල්ල මහත්මිය සහ පාර්ලිමේන්තු මන්ත්‍රී සමන්මලී ගුණසිංහ මහත්මිය ඇතුළු පිරිසක් එක්ව සිටියහ.
පවතින විවාහ වයස් සීමාවන් සමපාත කිරීම සඳහා අවශ්‍ය සංශෝධන කෙටුම්පත් කිරීම කෙරෙහි අවධානය යොමු කිරීමට පාර්ලිමේන්තු මන්ත්‍රීවරියන්ගේ සංසදය මෙම සාකච්ඡාවේදී එකඟ විය. සංසදය හරහා අවසන් නිර්දේශ සකස් කිරීම සඳහා සිවිල් සමාජ සංවිධාන සහ අනෙකුත් අදාළ පාර්ශ්වකරුවන්ගෙන් අදහස් ලබා ගැනීමට ද මෙහිදී යෝජනා කරන ලදී.
මීට අමතරව, “ළමා” යන යෙදුමට පැහැදිලි සහ නිවැරදි අර්ථ දැක්වීමක් සැපයීම සඳහා නීති සංශෝධන සිදු කිරීම පිළිබඳව ද සංසදය සාකච්ඡා කළේය.
