බ්‍රිතාන්‍යයේ වැඩි කාලයක් රැඳී සිටීමට සහ සරණාගතභාවය ඉල්ලා සිටීමට ඉඩ ඇති බවට සැලකෙන රටවල පුරවැසියන්ගෙන් ලැබෙන වීසා අයදුම්පත් නව රජයේ යටතේ සීමා කළ හැකිය.
ටයිම්ස් පුවත්පතේ පළමුව වාර්තා කළ පරිදි, ස්වදේශ කටයුතු කාර්යාල සැලසුම් යටතේ පකිස්ථානය, නයිජීරියාව සහ ශ්‍රී ලංකාව වැනි රටවල පුද්ගලයින්ට බ්‍රිතාන්‍යයේ රැකියා කිරීමට සහ අධ්‍යාපනය ලැබීමට පැමිණීම වඩාත් අපහසු විය හැකිය.
ඇතැම් පුද්ගලයින් රැකියා හෝ අධ්‍යයන වීසා මත එක්සත් රාජධානියට පැමිණ, පසුව ස්ථිරවම රැඳී සිටීමට සරණාගතභාවය සඳහා අයදුම් කිරීම විශේෂ ගැටලුවක් බව අමාත්‍යවරු පවසති. එය ලබා දෙන්නේ නම්, ඔවුන්ට ස්ථිරවම රට තුළ රැඳී සිටීමට ඉඩ සැලසෙනු ඇත.
“අපගේ බිඳ වැටුණු ආගමන පද්ධතිය නැවත යථා තත්ත්වයට පත් කිරීම සඳහා ඉදිරි ආගමන ධවල පත්‍රිකාව ඔස්සේ පුළුල් සැලැස්මක් සකස් කරනවා ඇති” යනුවෙන් ස්වදේශ කටයුතු කාර්යාලයේ ප්‍රකාශකයෙක් පැවසීය.
2020 සිට එහි නිරවද්‍යතාවය පිළිබඳ සමාලෝචනයක් හේතුවෙන්, ස්වදේශ කටයුතු කාර්යාලය පිටවීමේ ක්‍රියා පටිපාටියේ දත්ත නිකුත් කර නොමැති බැවින්, වීසා කාලය ඉක්මවා රැඳී සිටින්නේ කුමන ජාතිකයන්ද යන්න පැහැදිලි නොවේ.
බ්‍රිතාන්‍යයෙන් පිටව යන බොහෝ පුද්ගලයින් ගැන නිල වශයෙන් වාර්තා නොමැති නමුත් පිටවීමේ වාර්තාවක් නොමැති අය තවමත් රට තුළ සිටින බව එයින් නොකියවේ.
වෙනස්වන යුරෝපය පිලිබඳ බ්‍රිතාන්‍යය බුද්ධි මණ්ඩලයේ ජ්‍යෙෂ්ඨ සාමාජිකයෙකු වන මහාචාර්ය ජොනතන් පෝර්ටෙස් පැවසුවේ වීසා සීමා කිරීමෙන් සරණාගත අයදුම්පත් සංඛ්‍යාවට ඇති විය හැකි බලපෑම “ඉතා කුඩා වීමට ඉඩ ඇති” බවයි.
“ප්‍රධාන ඉලක්කය වන්නේ සමස්ත සංඛ්‍යාව අඩු කිරීම නොව, අපයෝජන ලෙස පෙනෙන සරණාගත හිමිකම් අඩු කිරීමයි” ඔහු බීබීසී රේඩියෝ 4 හි Today වැඩසටහනට පැවසීය.
“ශිෂ්‍යයෙකු ලෙස පෙනී සිටිමින් මෙහි පැමිණෙන කෙනෙකු ඉක්මනින් සරණාගත ක්‍රමයට මාරු වන විට… එය පද්ධතිය අනිසි ලෙස භාවිතා කිරීමක්. රජය එය අඩු කිරීමට උත්සාහ කරයි.”
නවතම ස්වදේශ කටයුතු කාර්යාල සංඛ්‍යාලේඛන පෙන්වා දෙන්නේ පසුගිය වසරේ බ්‍රිතාන්‍යයේ සරණාගතභාවය ඉල්ලා සිටි පුද්ගලයින් ගණන 108,000 කට වැඩි බවත් එය 1979 දී වාර්තා ආරම්භ වූ දා සිට ඉල්ලුම් කළ ඉහළම මට්ටම බව ය.
මෙම කාලය තුළ පාකිස්තාන ජාතිකයින් 9,560 ක් සරණාගතභාවය ඉල්ලා සිටි අතර එය වැඩි ම පිරිසක් වාර්තා වූ රට වන අතර එය පෙර වසරේ සංඛ්‍යාව මෙන් දෙගුණයකට ආසන්නය.
2023/24 සඳහා වූ නවතම සංඛ්‍යාලේඛනවලට අනුව බ්‍රිතාන්‍යයේ ජාත්‍යන්තර සිසුන් 732,285 ක් සිටි අතර, වැඩි දෙනෙක් ඉන්දියාවෙන් (107,480) සහ චීනයෙන් (98,400) පැමිණි පිරිසකි.
2024 දී බ්‍රිතාන්‍යයේ රැකියා සහ අධ්‍යයන වීසා සංඛ්‍යාව පෙර වසරට සාපේක්ෂව පහත වැටී ඇත.
පසුගිය වසරේ අගමැති ධුරයට පත්වීමෙන් පසු, ශ්‍රීමත් කියර් ස්ටාමර් නීති විරෝධී සහ නීත්‍යානුකූල සංක්‍රමණ දෙක ම අඩු කරන බවට පොරොන්දු වී ඇති නමුත් මීට පෙර ශුද්ධ සංක්‍රමණ ඉලක්කයක් ලබා දීම ප්‍රතික්ෂේප කර ඇත. ඒ, “අත්තනෝමතික සීමාවක්” අතීතයේ දී කිසිදු බලපෑමක් ඇති කර නොමැති බව පවසමින් ය.
කම්කරු පක්ෂයේ සංක්‍රමණ සැලසුම් අතරට මුහුදේදී ජීවිත අනතුරේ හෙළීම අපරාධයක් බවට පත් කිරීම, කුඩා බෝට්ටු යොදා ගනිමින් පැමිණෙන සංක්‍රමණිකයින් ඉලක්ක කිරීම සහ දැනට සංක්‍රමණික සේවකයින් මත යැපෙන අංශ සඳහා පුහුණු සැලසුම් සංවර්ධනය කිරීමෙන් විදේශීය සේවකයින් සඳහා ඇති ඉල්ලුම අඩු කිරීම ඇතුළත් වේ.
“අහම්බෙන් නොව, සැලසුම් කිරීමෙන්” අඩු කිරීමට හිතාමතාම අසමත් වූ බව පවසමින්, ශ්‍රීමත් කියර් ස්ටාමර් මීට පෙර පැවැති කොන්සර්වේටිව් රජය විවේචනය කර තිබේ.
2023 ජුනි මාසය වන විට එක්සත් රාජධානියේ ශුද්ධ සංක්‍රමණ වාර්තාගත ලෙස 906,000 ක් වූ අතර පසුව 2024 ජුනි මාසය වන විට 728,000 දක්වා පහත වැටිණි.
සංක්‍රමණ මට්ටම් අඩු කිරීමේ උත්සාහයක් ලෙස හිටපු අගමැති රිෂි සුනක් විසින් හඳුන්වා දුන් නව නීති මෙම පහත වැටීමට දායක වී ඇති බව පෙනෙන්නට තිබේ.
පෙර පැවති කොන්සර්වේටිව් රජය බ්‍රිතාන්‍යයට පැමිණීමට කැමති දක්ෂ විදේශීය සේවකයින් සඳහා අවම වැටුප පවුම් 26,200 සිට 38,700 දක්වා වැඩි කළ අතර රැකවරණ සේවකයින්ට පවුලේ යැපෙන්නන් බ්‍රිතාන්‍යයට රැගෙන ඒම තහනම් කර තිබිණි.
ආගමන නීති වෙනස් කිරීම සඳහා කම්කරු පක්ෂයට දැනටමත් පීඩනයක් එල්ල වී තිබෙන නමුත් පසුගිය සතියේ ප්‍රාදේශීය මැතිවරණවලදී ප්‍රතිසංස්කරණ ගැන බ්‍රිතාන්‍යය ලද සාර්ථකත්වයෙන් පසුව එම පීඩනය වර්ධනය වන්නට ඇත.
බ්‍රහස්පතින්දා පැවති ප්‍රාදේශීය මැතිවරණයේදී ආසන 1,600 න් 677 ක් කම්කරු පක්ෂය දිනා ගත් අතර, බොහෝ දුරට ඒ 2021 දී අවසන් වරට පැවැති ඡන්දයේදී කන්සර්වේටිව් පාලනය යටතේ පැවති ප්‍රදේශ ද සමඟ ය.
අත්‍යවශ්‍ය නොවන සංක්‍රමණ අත්හිටුවීමක් ක්‍රියාත්මක කරන බව කම්කරු පක්ෂය සිය මහ මැතිවරණ ප්‍රතිපත්ති ප්‍රකාශනයේ සඳහන් කර තිබිණි. ඇතැම් කුසලතා ඇති අයට; සෞඛ්‍ය සේවා වැනි ඒවාට තවමත් බ්‍රිතාන්‍යයට පැමිණීමට අවසර දෙනු ලැබේ.
ප්‍රතිඵලවලට ප්‍රතිචාර දක්වමින්, අගමැති ශ්‍රීමත් කියර් පැවසුවේ ඡන්දදායකයින්ගේ කලකිරීම තමා තේරුම් ගෙන ඇති බවත්, ආගමන සහ පොදු සේවාවන් පිළිබඳ කම්කරු පක්ෂයේ සැලසුම් වේගවත් කරන බවට පොරොන්දු වන බවයි.
“රැකියා හෝ අධ්‍යයන වීසා මත සිටින සමහරුන්ට තම මව් රටේ පවතින දේශපාලන තත්ත්වය වෙනස් වුවහොත් අවදානමට ලක් විය හැකි බවත්, ඔවුන්ට ආරක්ෂාව සහ සාධාරණ සරණාගත ක්‍රියාවලියක් ලැබිය යුතු බවත්” සරණාගත කවුන්සිලයේ එන්වර් සොලමන් පැවසීය.
ප්‍රාදේශීය මැතිවරණයට පෙර සිට ම, සීමාව ඉක්මවා රැඳී සිටීම වැළැක්වීම සඳහා සැලසුම් සකස් කරමින් පැවතුණි.
රජයේ සැලසුම් පිළිබඳ සම්පූර්ණ තොරතුරු මැයි මාසයේ අග භාගයේදී නව ආගමන ධවල පත්‍රිකාවක ප්‍රකාශයට පත් කිරීමට නියමිත ය.
“රැකියා සහ අධ්‍යයන වීසා මත පැමිණෙන සහ සරණාගතභාවය ඉල්ලා සිටින විදේශීය ජාතිකයන් විසින් සිදු කරනු ලබන අපයෝජන මැඩපැවැත්වීම සඳහා, එම පුද්ගලයින් ඉක්මනින් හඳුනා ගැනීම සඳහා අපි ඔවුන් පිළිබඳ බුද්ධි තොරතුරු එක්රැස් කිරීම කඩිනම් කරනවා” යනුවෙන් ස්වදේශ කටයුතු කාර්යාලයේ ප්‍රකාශකයෙක් පැවසීය.
” අපි වීසා පද්ධතිය නිරන්තර සමාලෝචනයට ලක් කරමින් සිටින අතර අපගේ ආගමන නීතිරීතිවලට හානි කළ හැකි ප්‍රවණතා හඳුනාගත් විට, ඊට අදාළ පියවර ගැනීමට ඉක්මනින් කටයුතු කරනවා.”
“වෙනසක් සඳහා වූ සැලැස්ම යටතේ, අපගේ ඉදිරි ආගමන ධවල පත්‍රිකාව හරහා අඩාල වී ඇති ආගමන පද්ධතිය යළි යථා තත්ත්වයට පත් කිරීම සඳහා පුළුල් සැලැස්මක් සකස් කෙරෙනවා.”
source: bbc.com/sinahala
