‘ශ්රී ලන්කන් එයාර්ලයින්ස්’ සමාගමේ අධ්යක්ෂ මණ්ඩලයේ සාමාජිකයන්ගේ ඉල්ලා අස්වීමේ ලිපි බාරගන්නැයි අග්රාමාත්ය රනිල් වික්රමසිංහ මහතා වාචිකව දැනුම් දුන් බවත් නව අධ්යක්ෂ මණ්ඩලයක් ඉදිරි දින කිහිපය ඇතුළත දී පත්වනු ඇති බවත් රාජ්ය ව්යවසාය සංවර්ධන අමාත්ය කබීර් හෂීම් මහතා අද(17) සිරිකොත එක්සත් ජාතික පක්ෂ මූලස්ථානයේ පැවති මාධ්ය හමුවේදී පැවසීය.
“ ‘ශ්රී ලන්කන් එයාර්ලයින්ස්’ සමාගමට නව අධ්යක්ෂ මණ්ඩලයක් ඉදිරි දින කිහිපයේදී පත්වේවි. ඒ සම්බන්ධ ක්රියාවලිය මේ වනවිට සිදුවෙමින් තිබෙනවා. ඒ වගේම කිව යුතු දෙයක් තිබෙනවා. අපි ශ්රී ලන්කන් විකුණනවා, රජයේ බැංකු විකුණනවා කියලා කතා යනවා. කිසිවක් විකුණන්නේ නැහැ. අපි කරන්නේ කළමනාකාරීත්වය බාර දීම පමණයි. අපි පසුගිය වසරේදී රාජ්ය බැංකු සංවර්ධනය කිරීම සඳහා එම බැංකුවවල ප්රාග්ධනයට පමණක් රුපියල් බිලියන 10ක් යෙදෙව්වා.ශ්රී ලන්කන් එයාර්ලයින්ස් සමාගමේ කළමනාකාරීත්වය සම්බන්ධයෙන් කටාර් ගුවන් සේවය, ෆ්ලයි එමිරේට්ස් යන සමාගම් මෙන්ම ජපාන, චීන සහ ඉන්දුනීසියානු ගුවන් සමාගම් අවධානය යොමු කර තිබෙනවා. අපි ඒ සම්බන්ධයෙන් සාකච්ඡා කර තිබෙනවා සහ ඉදිරියේදීත් සාකච්ඡා පවත්වන බවත් මෙහිදී අමාත්යවරයා වැඩිදුරටත් කියා සිටියේය.
