Supiri Gossip

Author: Editor

  • ශ්‍රී ලංකාව සුපිරිම සුපිරි ‘එක්දින තරඟ’ වාර්තාවක් තබයි

    ශ්‍රී ලංකාව සුපිරිම සුපිරි ‘එක්දින තරඟ’ වාර්තාවක් තබයි

    එංගලන්තයට එරෙහි දෙවන එක්දින තරගය පරාජයට පත්වීමෙන් පසුව, ශ්‍රී ලංකාව එක්දින තරග ඉතිහාසයේ වැඩිම එක්දින ජාත්‍යන්තර තරඟ ගණනින් පරාජයට පත්වී නව වාර්තාවක් තැබීය. ශ්‍රී ලංකාව මේ දක්වා එක්දින තරග 428ක් පරාජය වී ඇති අතර ඉන්දියාව 427ක් සහ පාකිස්තානය 414ක් පරාජය වී තිබේ.

    1975 වසරේ සිට මේ දක්වා ශ්‍රී ලංකාව එක්දින තරග 860 කට ක්‍රීඩා කර ඇති අතර 390ක් ජයග්‍රහණය කර 428ක් පරාජයට පත්ව ඇත.

    2015 සිට මේ දක්වා එක්දින තරගවලින් 62% ක් ශ්‍රී ලංකාවට පරාජය විය.

    ශ්‍රී ලංකාවේ ජයග්‍රාහී / පරාජිත අනුපාතය 0.911 ක් වන අතර එය ඉහළම ක්‍රිකට් රටවල් අතර බංග්ලාදේශයට හා සිම්බාබ්වේට වඩා ඉහළ අගයක් ගනී. 1.770 අනුපාතයකින් දකුණු අප්‍රිකාව පහළින්ම සිටී.

  • හෙද ඉල්ලීම් 7/5 කට එසැණ විසඳුම්

    හෙද ඉල්ලීම් 7/5 කට එසැණ විසඳුම්

    රාජ්‍ය සේවා එක්සත් හෙද සංගමය ඉදිරිපත් කළ ඉල්ලීම් හතෙන් පහකට එසැණ විසඳුම් ලබාදීමට ජනාධිපති ගෝඨාභය රාජපක්ෂ මහතා පියවර ගනී. ඉතිරි ඉල්ලීම් දෙකට අදාළ විසඳුම් මීළඟ අය වැයෙන් ලබාදීමට ද ජනාධිපතිවරයා එකඟතාව පළ කළේය.

    රාජ්‍ය සේවා එක්සත් හෙද සංගමය සමඟ අද (02) පස්වරුවේ ජනාධිපති කාර්යාලයේ පැවති විශේෂ සාකච්ඡාවේදී ජනාධිපතිවරයා මෙම තීරණවලට එළැඹිණ.

    01. හෙද සරසවිය ආරම්භ කිරීම.

    02. යහපාලන රජය සමයේ 2017.12.07 හා 32/2017 මගින් අත්හිටුවා ඇති මාණ්ඩලික තත්ත්වය නැවත ලබාදීම.

    03. අත්හිටුවා ඇති iii ශ්‍රේණියෙන් ii ශ්‍රේණියට උසස් වීම වසර පහක් ලෙස හා ii ශ්‍රේණියෙන් i ශ්‍රේණියට වසර හතෙන් උසස් කිරීම.

    04. රුපියල් විසිදහසක වාර්ෂික නිල ඇඳුම් දීමනාව ලබාදීම.

    05. දැනට පැය 36ක්ව පවතින රාජකාරී කාලය සතියකට දින පහක (පැය 30ක) කාලයක් ලෙස සැලකීම විශේෂ කමිටුවක අධ්‍යයනයට යොමු කිරීම.

    යන කරුණු 5 වහාම ක්‍රියාත්මක කිරීමට ජනාධිපතිවරයා තීරණය කළේය.

    රුපියල් දස දහසේ දීමනාව සහ 2014.12.24 දින මුදල් අමාත්‍යාංශය චක්‍රලේඛයක් මඟින් සඳහන් කර ඇති මූලික වැටුපෙන් 1/100 අමතර සේවා දීමනාව ලබන අය වැයෙන් ලබාදීමටත් ජනාධිපති විසින් එකඟතාව පළ කෙරිණ.

    ඒ අනුව රාජ්‍ය සේවා එක්සත් හෙද සංගමය ඉදිරිපත් කළ යෝජනා සියල්ලට ජනාධිපතිගේ විසඳුම් ලැබිණ.

    රජය සෞඛ්‍ය අංශය කෙරෙහි දැඩි විශ්වාසයෙන් පසුවන අතර හෙද සේවාවට ඉහළ පිළිගැනීමක් ලබාදෙන බවත් හෙද වෘත්තිකයන්ට නිසි තැන ලබා දෙන බව ද ජනාධිපතිවරයා අවධාරණය කළේය.

    රාජ්‍ය සේවා එක්සත් හෙද සංගමයේ සභාපති පූජ්‍ය මුරුත්තෙට්ටුවේ ආනන්ද හිමි, සෞඛ්‍ය අමාත්‍ය පවිත්‍රා වන්නිආරච්චි, ජනාධිපති ප්‍රධාන උපදේශක ලලිත් වීරතුංග, සෞඛ්‍ය ලේකම් (විශ්‍රාමික) මේජර් ජෙනරාල් විශේෂඥ වෛද්‍ය සංජීව මුණසිංහ, සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන යන මහත්ම මහත්මීහු සහ රාජ්‍ය සේවා එක්සත් හෙද සංගමයේ නියෝජිතයෝ මේ අවස්ථාවට එක්ව සිටියහ.

  • දශක දෙකක් පැරණි ‘ඇෆ්ගන් සිවිල් යුද්ධය’ තීරණාත්මක කඩඉමක

    දශක දෙකක් පැරණි ‘ඇෆ්ගන් සිවිල් යුද්ධය’ තීරණාත්මක කඩඉමක

    දශක දෙකක් පැරණි ඇෆ්ගන් සිවිල් යුද්ධයේ තීරණාත්මක කඩඉමක් සනිටුහන් කරමින් එක්සත් ජනපදය හා නේටෝ හමුදා තලේබාන් සටන්කාමීන්ට එරෙහි යුද්ධයේ කේන්ද්‍රස්ථානය ලෙස භාවිත කළ ඇෆ්ගනිස්ථානයේ බග්‍රාම් (Bagram) ගුවන් හමුදා කඳවුරෙන් ඉවත්ව ගියේය.

    ඇෆ්ගනිස්ථානයෙන් විදේශ හමුදා සම්පූර්ණයෙන් ඉවත් වීම අත ළඟ බවට මෙය පැහැදිලි සංඥාවක් වශයෙන් සැලකිය හැකිය. නමුත් විදේශ හමුදා ඉවත් වීම සමග තලේබාන් සටන්කාමීන් තව දුරටත් ශක්තිමත් විය හැකි බව නිරීක්ෂකයින්ගේ අදහසයි.

    මේ අතර එක්සත් ජනපද ජනාධිපති ජෝ බිඩෙන් පවසා ඇත්තේ ලබන සැප්තැම්බර් 11 වන විට එක්සත් ජනපද හමුදා සම්පූර්ණයෙන් ඉවත්කර ගන්නා බවයි. සැප්තැම්බර් 11 අවසාන දිනය යනු 2001/09/11 වන දින ඇමරිකාවට එල්ල වූ මරාගෙන මැරෙන ප‍්‍රහාරයේ 20 වැනි සංවත්සරය වන අතර 9/11 ප්‍රහාරයෙන් 3,000 කට ආසන්න පිරිසක් මිය ගියහ.

    1990 දශකයේ සිට රට පාලනය කළ තලේබාන් සංවිධානයේ සහය ඇතිව එවකට ඇෆ්ගනිස්ථානය පදනම් කරගත් ජාත්‍යන්තර ජිහාඩ් කණ්ඩායමක් වන අල්කයිඩා විසින් මෙම ප්‍රහාර සිදු කරන ලදී. කණ්ඩායම් දෙකම පරාජය කිරීම සඳහා එක්සත් ජනපදය ප්‍රමුඛ සන්ධානයක් එම වසර අගදී ඇෆ්ගනිස්ථානය ආක්‍රමණය කළේය.

    එක්සත් ජනපද ගුවන් හමුදා ප්‍රවාහන ගුවන් යානයක් 2021 ජූලි 1 වන දින බග්‍රම් හි බග්‍රාම් ගුවන් තොටුපළට ගොඩ බැස්සේය
    එක්සත් ජනපද ගුවන් හමුදාව මේ සතිය මුලදී බග්‍රෑම් භාවිතා කරමින් සිටියේය

    ඇමරිකාවට දැන් අවශ්‍ය වී ඇත්තේ මිනිස් ජීවිතවල විශාල පිරිවැය සහ විශාල වියදම සමඟ සිය දීර්ඝම යුද්ධය අවසන් කිරීමට ය.

    මෑතක් වන තුරුම එක්සත් ජනපද භටයන් 2,500-3,500 ක් පමණ ඇෆ්ගනිස්ථානයේ රැඳී සිටිනු ඇතැයි සිතූ අතර ඔවුන් පිටත්ව යන විට ඇමරිකානු සොල්දාදුවන් 1,000 කටත් වඩා අඩු සංඛ්‍යාවක් රැඳී සිටිනු ඇත. මැයි මාසය වන විට ඇෆ්ගනිස්ථානයේ තවත් සභාග හමුදා 7,000ක් පමණ සිටි නමුත් බොහෝ දෙනා දැන් පිටව ගොස් ඇති බව විශ්වාස කෙරේ. ජර්මනිය සහ ඉතාලිය බදාදා සිය මෙහෙයුම් ප්‍රකාශයට පත් කළහ.

    මේ අතර, විදේශීය බලවේගයන්ගෙන් ඉවත්වීමෙන් පසු නව සිවිල් යුද්ධයක් පුපුරා යා හැකිය යන බිය වර්ධනය වී තිබේ.

    තලේබාන් සංවිධානයේ ඉහළ ඉලක්කයක

    බග්රාම් යනු ඉදිරියේදී සිදුවිය යුතු දේ පිළිබඳ සීනුවකි. ඇමරිකානු මිලිටරි ශක්තියේ මෙම සංකේතය කලක් සෝවියට් හමුදාවන්ගේ බලකොටුවක් විය. දැන් ඇෆ්ගනිස්ථාන ආරක්ෂක අංශ ඉතා ඉක්මනින් මෙම නගරය නගරය තුළ සුරක්ෂිත වීමේ අභියෝගයට මුහුණ දෙනු ඇත.

    බග්රාම් ඉතා වැදගත් – සංකේතාත්මක හා උපායමාර්ගික කලාපයකි. රට පුරා බලය තහවුරු කර ගනිමින් සිටින තලේබාන් සටන්කරුවන්ට මෙම ත්‍යාගය හිමි වේ. පසුගිය ඔක්තෝම්බර් මාසයේදී පවා බග්රාම් පදිංචිකරුවන් කියා සිටියේ තලේබාන් සංවිධානය දැනටමත් ඔවුන් අතර සිටින බවයි.

    බග්රාම් එතරම් වැදගත් වන්නේ ඇයි?

    ගුවන් තොටුපළ කාබුල් නගරයට කිලෝමීටර 40 ක් උතුරින් පිහිටා ඇති අතර එය නම් කර ඇත්තේ අසල ගමක නමකිනි. 1980 ගණන්වල සෝවියට් සංගමය ඇෆ්ගනිස්ථානය අත්පත් කරගත් විට මෙම ගුවන්තොටුපොළ ගොඩනංවන ලදී. එක්සත් ජනපදය ප්‍රමුඛ සන්ධාන හමුදා 2001 දෙසැම්බරයේ දී ඉදිරියට ගිය අතර එය හමුදා 10,000 ක් පමණ රඳවා තබා ගත හැකි විශාල කඳවුරක් දක්වා වර්ධනය විය.

    10 වන කඳුකර සේනාංකයේ සෙබළුන් 2001 දෙසැම්බර් 21 වන දින කාබුල් නගරයට උතුරින් පිහිටි බග්‍රාම් එයාර් ෆීල්ඩ් හි පිහිටි ලෝක වෙළඳ මධ්‍යස්ථානයෙන් සුන්බුන් කැබැල්ලක් භූමදාන කිරීමට සූදානම් වෙති.
    ලෝක වෙළඳ මධ්‍යස්ථානයේ සුන්බුන් කැබැල්ලක් 2001 දෙසැම්බරයේ කඳවුරේ භූමියේ තැන්පත් කරන ලදී

    එය ධාවන පථ දෙකකින් යුක්ත වන අතර එක් ධාවන පථයක් කිලෝමීටර් 3.6 ක් දිගය. විශාල භාණ්ඩ හා බෝම්බ ගුවන් යානා එහි ගොඩ බැස්සවිය හැකිය.

    ගුවන් යානා 110ක් එකවර නැවැත්විය හැකි ස්ථාන එහි ඇති අතර ඒවා පිපිරුම්වලට ඔරෙත්තු දෙන බිත්ති වලින් ආරක්ෂා කර ඇත. ඇඳන් 50 කින් යුත් රෝහලක්, මෙහෙයුම් ශාලා තුනක් සහ නවීන දන්ත සායනයක් ඇති බව ඇසෝසියේටඩ් ප්‍රෙස් වාර්තා කරයි.

    කියුබාවේ කුප්‍රකට එක්සත් ජනපද හමුදා බන්ධනාගාරයෙන් පසුව ‘ඇෆ්ගනිස්ථානයේ ග්වාන්ටනාමෝ‘ ලෙස හැදින්වූ ප්‍රධාන බන්ධනාගාරය ද මෙම ගොඩනැගිලි අතර විය.

    ඊළඟට කුමක් සිදුවේද?

    ඇෆ්ගනිස්ථානයේ ඉහළම එක්සත් ජනපද අණදෙන නිලධාරී ජෙනරාල් ස්කොට් මිලර් ඇෆ්ගන් ජනාධිපතිවරයා හමුවී “අඛණ්ඩව එක්සත් ජනපද ආධාර සහ සහයෝගීතාව” පිළිබඳව සාකච්ඡා කළ බව එක්සත් ජනපද ජනාධිපති කාර්යාලය සිකුරාදා ට්වීට් පණිවුඩයක් නිකුත් කරමින් කියා සිටියේය.

    එක්සත් ජනපද භටයින් 650 ක් පමණ තව දුරටත් ඇෆ්ගනිස්ථානය තුළ රැඳී සිටීමට අපේක්ෂා කරන බව ඇසෝසියේටඩ් ප්‍රෙස් වාර්තා කරයි. රාජ්‍ය තාන්ත්‍රිකයින්ට ආරක්ෂාව සැපයීම සහ කාබුල්හි ජාත්‍යන්තර ගුවන්තොටුපළ ආරක්ෂා කිරීම සඳහා ඔවුන් සහාය වනු ඇත. ඔවුන් තුර්කියේ භටයන් සමඟ ගුවන්තොටුපල මුර කරන අතර එහි ආරක්ෂාව සඳහා නව ගිවිසුමක් ගැන ඇෆ්ගනිස්ථාන රජය සමඟ සාකච්ඡා කරමින් සිටී.

    බීබීසී සිතියම

    අනෙකුත් ඇමරිකානු හමුදා කාබුල්හි එක්සත් ජනපද තානාපති කාර්යාලය ආරක්ෂා කරනු ඇති බව වාර්තා වේ.

    හමුදා විශ්ලේෂකයින් පවසන්නේ කාබුල් ආරක්ෂා කිරීමට සහ තලේබාන් සංවිධානය පසුපසට තල්ලු කිරීමට ඇෆ්ගනිස්ථාන රජයට බග්‍රාම් පාලනය පවත්වා ගැනීමට ඇති හැකියාව ඉතා වැදගත් වනු ඇති බවයි.

    “මෙතැන් සිට ඇෆ්ගනිස්ථාන හමුදා එය ආරක්ෂා කර ත්‍රස්තවාදයට එරෙහිව සටන් කිරීමට යොදා ගනු ඇත” යැයි ඇෆ්ගනිස්ථාන ආරක්ෂක අමාත්‍යාංශ ප්‍රකාශක ෆවාඩ් අමන් සිකුරාදා ට්වීට් කළේය.

    පසුගිය වසරේ පෙබරවාරියේ දී එක්සත් ජනපදය සමඟ ගිවිසුමක් අත්සන් කිරීමෙන් පසු තලේබාන් සන්ධාන හමුදාවන්ට එරෙහි ප්‍රහාර නතර කළ අතර ජාත්‍යන්තර ජිහාඩ් කණ්ඩායම් සමඟ සහයෝගීතාව අවසන් කරන බවට ද පොරොන්දු විය.

    එහෙත් සටන්කාමීන් දිගින් දිගටම රජයේ හමුදාවන්ට එරෙහිව සටන් කරති. සෑම උදෑසනකම රාත්‍රි සටන් පිළිබඳ නැවුම් වාර්තා ගෙන එන බව බීබීසීයේ දකුණු ආසියාවේ කර්තෘ ජිල් මැක්ගීවරිං පවසයි. 

    සමහර වාර්තා වලට අනුව, සමගි සන්ධානයකට පැමිණීමෙන් පසු දරුණුතම ප්‍රචණ්ඩ ක්‍රියා ජූනි මාසයේ සිදු වූ අතර සිය ගණනක් ජීවිත අහිමි විය. බොහෝ පාසල්, රජයේ ගොඩනැගිලි සහ විදුලි කුළුණු දැන් අලාභහානි හෝ විනාශ වී ඇති හෙයින් ද අසීරු සංවර්ධනය තර්ජනයට ලක්ව ඇත.

    තුවාල ලැබූ ඇෆ්ගනිස්ථාන සොල්දාදුවන් මැයි 6 වන දින ඇෆ්ගනිස්ථානයේ කන්දහාර් නගරයට උතුරින් හෙලිකොප්ටරයක නැගී සිටියහ

    තලේබාන් ප්‍රකාශකයෙකු වන සබිහුල්ලා මුජාහිඩ්, එක්සත් ජනපදය බග්‍රාම් වෙතින් ඉවත්වීම සාදරයෙන් පිලිගනිමින් ඒඑෆ්පී ප්‍රවෘත්ති ඒජන්සියට පවසා ඇත්තේ ඇෆ්ගනිස්ථානුවන් අතර ඔවුන්ගේ අනාගතය පිළිබඳව තීරණය කිරීමට එය මග පෑදෙන බවයි.

    මෙම යුද්ධය ඇෆ්ගනිස්ථාන සිවිල් වැසියන් 47,000 කට වැඩි පිරිසකගේ සහ ඇෆ්ගනිස්ථාන හමුදා 70,000 කට ආසන්න සංඛ්‍යාවකගේ ජීවිත මෙන්ම එක්සත් ජනපද සොල්දාදුවන් 2442 දෙදෙනකුගේ සහ එක්සත් ජනපද පුද්ගලික ආරක්ෂක කොන්ත්‍රාත්කරුවන් 3800කට වැඩි පිරිසකගේ සහ අනෙකුත් රටවල සොල්දාදුවන් 1,144 දෙනකුගේ ජීවිත බිළිගත් බව විශ්වාස කෙරේ.

    ඇෆ්ගන් යුද්ධය වෙනුවෙන් එක්සත් ජනපදය ඩොලර් ට්‍රිලියන 2.62ක් වැය කර ඇති බව ඇස්තමේන්තු කර ඇත.

    බී.බී.සී වාර්තාවකි – සැකසුම – තීක්ෂණ වෙළෙන්එගොඩ

  • රසායනික පොහොර තහනමෙන් ‘ලංකාවේ තේ කර්මාන්තයේ‘ මළගම අතළග !

    රසායනික පොහොර තහනමෙන් ‘ලංකාවේ තේ කර්මාන්තයේ‘ මළගම අතළග !

    තේ කර්මාන්තය තුළ වූ මගේ 45 වසරක අත්දැකීම් සමඟින් ශ්‍රී ලංකාවේ තේ කර්මාන්තය මේ වන විට මුහුණ දෙමින් සිටින බරපතල අනතුරු ඇඟවීමක් පිළිබඳව පැවසීමට මා කැමැත්තෙමි. එනම් රසායනික පොහොර භාවිතය නතර කළහොත් ශ්‍රී ලංකාවේ තේ වතුවල ඵලදායීතාවය නිසැකවම පහත වැටී එමගින් මෙරට ආර්ථිකය දරුණු පසුබෑමකට ලක් වනු ඇති බවයි.

    මෙමගින් විදේශ විනිමය ඉපැයීම බෙහෙවින් අඩු වනු ඇති අතර ඒ හේතුවෙන් රටේ නිෂ්පාදනය කරන සමස්ත තේ ප‍්‍රමාණය හා රැකියාවලින් වැඩි ප‍්‍රමාණයක් සඳහා දායකත්වය ලබා දෙන කුඩා තේ වතුහිමියන් ඇතුළුව සියලූම තේ වතු හිමියන්ගේ ඉපැයීම් ධාරිතාව ද විශාල ලෙස පහත වැටෙනු ඇත. තවද සතිපතා සිදු කරනු ලබන තේ වෙන්දේසිවලදී අඩු තේ ප‍්‍රමාණයක් පැවතීම නිසා ශ්‍රී ලංකාව සතුව මෙතෙක් පැවති සාම්ප‍්‍රදායික තේ වෙළෙඳපොළවල ආධිපත්‍ය තමන් සතු කර ගැනීමට අනෙකුත් තරගකාරීන්ට මෙමගින් ප‍්‍රමාණවත් අවස්ථාවක් ලැබෙනු ඇත.

    තේ වගාව සඳහා පොහොර භාවිතය පිළිබඳ ඉතිහාසය

    1867 දී තේ කර්මාන්තය ආරම්භ වූ දා සිට සම්පූර්ණයෙන්ම චීන හා කාම්බෝජියානු ප‍්‍රභේදවල බීජ තේ පැළ වගා කිරීමට යොමු වීමක් දක්නට ලැබේ. කෙසේවෙතත් බීජ තේ පැළවල ජානමය ලක්ෂණ එක් තේ පඳුරක සිට තවත් තේ පඳුරකට වෙනස් වන බැවින් බීජ පැළ සමඟින් ඵලදායිතාවය වර්ධනය වීම සීමිත වේ.

    1958 දී vegetatively propagated (VP) තේ හඳුන්වා දීමත් සමඟ තේ පර්යේෂණ ආයතනය (TRI) නව සන්ධිස්ථානයක් සනිටුහන් කළේය. ඒ අනුව පළමු (TRI 2000 series) හෙක්ටයාර් එකකින් තේ කිලෝග‍්‍රෑම් 3000කට වැඩි අස්වැන්නක් ලබා ගැනීමට හැකි වීම කැපී පෙනේ.
    තේ පෝෂණය පිළිබඳව තේ පර්යේෂණ ආයතනය මගින් සිදු කරන ලද පුළුල් පර්යේෂණයකට අනුව සකසන ලද සෑම තේ කිලෝග‍්‍රෑම් 100ක් සඳහාම හෙක්ටයාර් එකකට නයිට‍්‍රජන් කිලෝග‍්‍රෑම් 10ක් සමඟ පස පුරවා ගත යුතු බවට විද්‍යාඥයින් ‘ආදේශන අනුපාතය’ (replacement ratio) පිළිබඳව මතවාදයකට එළැඹිණි.

    තේ වතුවල ඵලදායීතාවය පවත්වා ගැනීම සඳහා අවශ්‍ය අවම නයිට‍්‍රජන් ප‍්‍රමාණය මෙය වේ. කිසියම් අවස්ථාවකදී නෙලාගන්නා ලද තේ අස්වැන්නේ නයිට‍්‍රජන් අනුපාතය අඩු වුවහොත් තේ පඳුරු තුළින් නයිට‍්‍රජන් ඌණතාවය පිළිබඳව පෙන්නුම් කෙරෙන අතර එහිදී නෙලා ගනු ලබන තේ දළුවල මතුපිට කහ පැහැයක් ගනී. (TRI 2025 ක්ලෝනය).

    නයිට‍්‍රජන් සමඟින් පොස්පේට් හා පොටෑෂ් (P&K) යන අනෙකුත් පෝෂ්‍ය කොටස් ද පසට යොදනු ලැබේ. පසුකාලයකදී තේ පර්යේෂණ ආයතනය සමඟ සිදු කළ සාකච්ඡාවකදී vegetatively propagated (VP) තේ ක්ෂේත‍්‍රයක අස්වැන්න ලබා ගැනීමේ හැකියාව සොයා බැලීම සඳහා හුදෙක් පෝෂ්‍ය කොටස් අදේශ කිරීමෙන් සෑහිමකට පත් විය නොහැකි බව සොයා ගන්නා ලදී. නෙලා ගන්නා ලද තේ කිලෝග‍්‍රෑම් 100කට නයිට‍්‍රජන් කිලෝග‍්‍රෑම් 12ක අනුපාතයක් දක්වා වැඩි කිරීම සඳහා අධ්‍යයනයන් සිදු කරන ලදී. තේ සඳහා හෙක්ටයාර් එකකට නයිට‍්‍රජන් 360ක් දක්වා NPK පොහොර මිශ‍්‍රන යොදා ගැනීමේදී එයට හොඳ ප‍්‍රතිචාරයක් තිබුණු අතර ක්ලෝන තේ අස්වැන්න හෙක්ටයාරයකට තේ කිලෝග‍්‍රෑම් 3000කට වඩා වැඩි විය.

    රසායනික පොහොර භාවිතා කිරීමෙන් වසර කිහිපයක් තුළ හෙක්ටයාර එකකින් තේ කිලෝග‍්‍රෑම් 2,200 ක ජාතික ඵලදායිතා මට්ටමක් ළඟා කර ගැනීමට ශ‍්‍රී ලංකාවට හැකියාව තිබෙන බව සඳහන් කිරීමට මා පසුබට වන්නේ නැත.

    තේ පර්යේෂණ ආයතනය මේ වන විට TRI 5000 නමින් නවතම තේ ශ්‍රේණියක් හඳුන්වා දී අතර එයද රසායනික පොහොර මත රඳා පවතින බව සඳහන් කළ යුතුය. එමෙන්ම සියලූම වගාවන් රසායනික පොහොරවලට පමණක් ප‍්‍රතිචාර දක්වන බවද කවුරුත් දන්නා කරුණකි. අනෙක් අතට නයිට‍්‍රජන් 2%ක් පමණක් අන්තර්ගත කාබනික පොහොරවලින් පොහොර අවශ්‍යතාවය සපුරාලීම කිසිසේත් කළ නොහැක්කකි.

    දැනට පවතින තේ වගාවන් සඳහා අවම පෝෂණයක් සහිත කාබනික පොහොර යෙදීමෙන් ඇතිවන බලපෑම

    තේ පඳුරක ඇති ශක්තියෙන් 90%ක්ම යොදා ගනු ලබන්නේ එහි පැවැත්ම හා වර්ධනය වෙනුවෙනි. බෝග නිෂ්පාදනය සඳහා යොදා ගනු ලබන්නේ ඉතිරි 10%ක ප‍්‍රමාණයයි. ඒ නිසාම තේ වගාවන් නියමාකාරයේ කෘෂිකර්ම භාවිතයන් තුළින් පෝෂණය කිරීම අත්‍යාවශ්‍ය කරුණකි. වගාවේ ඵලදාවේ ප‍්‍රමාණයට අනුව එහි වැඞීම හා ගසෙහි වර්ධනය වෙනුවෙන් ප‍්‍රමාණවත් පරිදි NPK පොහොර යෙදීම අනිවාර්ය වේ.

    මෙම අවස්ථාවේදී කාබනික පොහොර යෙදීම තුළින් තේ වගාවට අවශ්‍ය NPK පොහොරවලින් ලැබෙන පෝෂණය නොලැබෙන අතර ඒ හේතුවෙන් අධි තනි පත‍්‍රයක් හෝ බන්ජි පත‍්‍ර පමණක් නිපදවීමට තේ ගසට සිදු වේ. මෙහි ප‍්‍රතිඵලය වන්නේ අංකුර හෝ කොළ 2,3ක් සහිත රිකිලි අවම වීමයි. තමන්ගේ ආදායම ඉහළ නැංවීම වෙනුවෙන් හැකි තරම් දළු රැස් කිරීමට උනන්දු වන තේ දළු නෙලන්නන් බර අඩුවීම මත බන්ජි පත‍්‍ර හෝ තනි පත‍්‍ර අස්වැන්නද නෙලා ගැනීමට උත්සුක වෙති. එහි ප‍්‍රතිඵලය වන්නේ මෙම තනි හා බන්ජි පත‍්‍ර මෝරා පසුව අස්වනු නෙලීමේදී කර්මාන්තශාලාවට පැමිණීමයි. මේවා තේ නිෂ්පාදනය සඳහා කිසිසේත් සුදුසු නොවන අතර ඒ නිසාම අවසන් නිෂ්පාදනය දුඹුරු පැහැයකින් තොරව අළු හෝ සුදු මැලි ලෙස දක්නට ලැබේ. තේ නිෂ්පාදනයේදී අවසානයේ ප‍්‍රතික්ෂේපිත තේ බවට පත් වන්නේ මෙම නිෂ්පාදනයන්ය.

    මීට වසර 30 කට පමණ පෙර තේ නිෂ්පාදනයේදී ප‍්‍රතික්ෂේපිත තේ වල ප‍්‍රමාණය 6%ක් පමණ වුවද ශ‍්‍රම හිඟය හේතුවෙන් එහි අඛණ්ඩතාවයට බෙහෙවින් බලපෑම් ඇති වූ අතර නෙලන දළු ප‍්‍රමාණයෙන් 10%ක් හෝ ඊට වැඩි ප‍්‍රමාණයක් ප‍්‍රතික්ෂේපිත තේ බවට පත් විය. එවන් තත්වයක් තුළ අවම NPK අන්තර්ගතයක් සහිත කාබනික පොහොර හිටි හැටියේ භාවිතා කිරීම තුළින් නිෂ්පාදනයේ ප‍්‍රමිතිය අඩු වීම පමණක් නොව කසළ තේ ප‍්‍රමාණයද ඉහළ යනු නිසැකය.

    නිෂ්පාදනය කරනු ලබන තේ වල ඇති කළු වර්ණයේ ප‍්‍රමාණය ඊට වෙළෙඳපොලෙහි ඇති ඉල්ලූමද ඉහළ නංවන අතර එය නිෂ්පාදනයටද ඉහළ වටිනාකමක් එක් කරනු ලබයි. එහෙත් යෝජනා කර ඇති කාබනික පොහොර යෙදීම මගින් NPK විශාල ලෙස අඩුවීම හේතුවෙන් තේ වල ගුණාත්මකභාවය පිරිහීමට ලක්වන අතර එය ලොව පිළිගත් සිලෝන් ටී නාමයට ආපසු හැරවිය නොහැකි ලෙස දැවැන්ත පරිහානියකට ලක් වනු ඇත.

    NPK අවම කාබනික පොහොර තුළින් තේ පඳුරේ සැකැස්මට සිදු කරන බලපෑම

    තේ ඵලදාව තීරණය කරනු ලබන ප‍්‍රධාන සාධකය වන්නේ තේ පඳුරේ සැකැස්මයි. තේ පඳුරක ඇති ඵලදායිතාව බොහෝ සෙයින් තීරණය වන්නේ එහි අතු සංඛ්‍යාව මත වීම සාමාන්‍ය තත්වයකි. අතු ගණන වැඩි වීම, අස්වැන්න විශාල වීමට හේතුවක් වන අතර කප්පාදු කිරීමෙන් පසු තේ පඳුර අඟල් 6 ක් උසට ඇලවීමටද එය හේතු වේ. VP ක්ෂේත‍්‍රයක් සම්බන්ධයෙන් ගත් කල අවුරුදු 4ක කප්පාදු කිරීමේ චක‍්‍රීය කාල වකවානුවේදී පඳුරුවල උස ක‍්‍රමයෙන් ඉහළ යාමට සැලැස්විය යුත්තේ ඉන් නිපදවන අලූත් දළු නිෂ්පාදනය වෙනුවෙන් නෙලා ගැනීම තුළිනි.

    එසේම තේ පඳුර කප්පාදු කිරීමෙන් පසු 1 වන සහ 2 වන වර්ෂයන්හිදී පඳුරුවල උස අඟල් 8 -10 ත් දක්වා ප‍්‍රමාණයකට ඉහළ යා යුතු අතර 3 වන සහ 4 වන වර්ෂයන්හිදී අඟල් 6 සිට 8 දක්වා උස යා යුතුය. මේ තුළින් ඉදිරි කාලයේදී බෝග නිෂ්පාදනය සඳහා මූලික පදනම සැකසෙන අතර ඒ සඳහා වන සාරවත් අතු ඇති කිරීම සඳහා තේ පඳුරේ සැකැස්ම වර්ධනය කිරීම මේ තුළින් සාක්ෂාත් කරනු ඇත.

    දශක 4ක් තිස්සේ තේ වගාව තුළ ඇති අත්දැකීම් හා පළපුරුද්ද මත පදනම්ව අඩු NPK මට්ටමක් සහිත කාබනික පොහොර යෙදීමට කටයුතු කළහොත් දැනට ඇති තේ පඳුරුවල ප‍්‍රමාණය අඩු වී ගොස් විශාල භෝග ප‍්‍රමාණයක් අහිමි වනු ඇති බවට පැවසිය හැකිය. පසු කාලයකදී මෙම පොහොර භාවිතය NPK ඉහළ පොහොර භාවිතය දක්වා වෙනස් කළද දුර්වලව ගිය තේ පඳුරු යළි යථා තත්වයට පත් කිරීමට කිසිසේත් නොහැකි වනු ඇත.

    එහෙයින් මෙම කාබනික පොහොර භාවිතය ආරම්භ කිරීමට පෙර තේ පර්යේෂණ ආයතනයේ කළමනාකාරීත්වය යටතේ එම යෝජනාවන් වසර 2ක පමණ කාලයක් පරීක්ෂා කිරීමට කටයුතු කිරීම වැදගත්ය. ඒ සඳහා සාරවත් තේ වතු දෙකක්වත් අවම වශයෙන් තොරා ගනිමින් වසර දෙකකට පසු එහි කාර්යසාධනය තක්සේරු කිරීමට මේ මොහොතේ රජයේ අවධානය යොමු වනු ඇතැයි මගේ විශ්වාසයයි.

    අද වන විට තේ කර්මාන්තය තුළින් ඍජු හා වක‍්‍ර රැකියා මිලියන 2ක් පමණ ලබා දී ඇති අතර පොහොරවල කාර්යක්ෂමතාව පිළිබඳ ප‍්‍රමාණවත් පර්යේෂණයන් තුළින් ඇගයීමක් නොකොට නුසුදුසු පොහොර ප‍්‍රතිපත්තියක් හඳුන්වා දෙනු ලැබුවහොත් අනතුරේ වැටෙන්නේ මිලියන 2ක් පමණ වන ජනතාවගේ ජීවිත බවද මේ මොහොතේ මතක් කළ යුතුය.

    කාබනික පොහොර භාවිතය හඳුන්වා දීම හේතුවෙන් නිෂ්පාදන පිරිවැයද ඉහළ යන අතර ඒ නිසාම දුප්පතාගේ පානය වන තේ සමාජයේ සීමිත පොහොසත් කොටසකට පමණක් වන පානයක් බවටද පරිවර්තනය වනු ඇත. එහෙයින් රට සහ ජනතාව පිළිබඳව නැවත නැවතත් සිතා මෙම යෝජනාව සම්බන්ධයෙන් අවසන් තීරණය ගත යුතුව ඇත.

    තේ යනු සොබා දහම විසින් මිනිසාට ලබා දෙන ත්‍යාගයකි. කිරීටක හෘදයාබාධ, සම, ආමාශ, පෙනහළු, බඩවැල්, පියයුරු සහ පුරස්ථි ආශ‍්‍රිත පිළිකා සහ දත් දිරායාම වැළැක්වීමට හැකි සෞඛ්‍ය ගුණයෙන් පිරිපුන් ලොව මිල අඩුම පානය ලෙසද තේ හඳුන්වා දිය හැකිය.

    දුලිප් ගුණරත්න
    ජනතා වතු සංවර්ධන මණ්ඩලයේ හිටපු අධ්‍යක්ෂ ජනරාල් සහ තේ පර්යේෂණ ආයතනයේ හිටපු උපදේශක

  • කොවිඩ් එන්නත් ‘කොක්ටේල්‘ කළොත් ‘සුපිරි ආරක්ෂාවක්‘ නවතම පර්යේෂණයක් හෙළිකරයි

    කොවිඩ් එන්නත් ‘කොක්ටේල්‘ කළොත් ‘සුපිරි ආරක්ෂාවක්‘ නවතම පර්යේෂණයක් හෙළිකරයි

    කොවිඩ් 19ට එරෙහිව එන්නත ලබා ගැනීමේදී පළමු මාත්‍රාව එක් වර්ගයකිනුත් සහ දෙවන මාත්‍රාව තවත් වර්ගයකිනුත් ලබා ගැනීම සුදුසුද? ශ්‍රී ලංකාවේ පමණක් නොව, එන්නත් හිඟ වී ඇති බොහෝ රටවල ජනතාව මේ දිනවල ඉහත කී ප්‍රශ්නයට අවධානය යොමු කර ඇත.

    මේ පිළිබඳව එක්සත් රාජධානියේ සිදු කරන ලද අලුත්ම පර්යේෂණයක ප්‍රතිඵල දැන් නිකුත් වී තිබේ. මෙම පර්යේෂණය සඳහා යොදාගෙන ඇත්තේ AstraZeneca එන්නත සහ Pfizer එන්නතයි. එන්නත් මාත්‍රා දෙක එකිනෙකට වෙනස් වර්ග දෙකින් ලබා දීමෙන් කොවිඩ් 19ට එරෙහිව වඩා හොඳ ආරක්ෂාවක් සපයන බව එම පර්යේෂණයෙන් ඔප්පු වී තිබේ. Com-Cov නමැති මෙම පර්යේෂණය සිදු කර ඇත්තේ මෙසේය.

    Getty Images
    එන්නත් ලබා ගැනීමට අපහසු වී තිබෙන රටවල්වලට මෙය සුභ ආරංචියක්

    පර්යේෂණය සඳහා කාණ්ඩ තුනකට අයත් පිරිස සහභාගී කරගෙන ඇත. එක් කණ්ඩායමකට මාත්‍රා දෙකම ලබා දුන්නේ Pfizer එන්නතය. දෙවන කණ්ඩායමට මාත්‍රා දෙකම ලබා දී ඇත්තේ AstraZeneca එන්නතයි. තුන්වැනි කණ්ඩායමට අයත් පිරිසට පළමු මාත්‍රාව මින් එක් වර්ගයකින් සහ දෙවන මාත්‍රාව අනෙක් වර්ගයෙන් ලබා දී තිබේ. මේ සියලු දෙනාගේම කොවිඩ් ප්‍රතිශක්තිය හොඳින් වර්ධනය වී තිබේ.

    මෙම පර්යේෂණ ප්‍රතිඵල මගින් ඇඟවෙන තවත් කරුණක් වන්නේ මාත්‍රා දෙකම එකම වර්ගයකින් ලබාගත් උදවියට පවා පසුකාලීනව කොවිඩ් ප්‍රතිශක්තිය තවදුරටත් වර්ධනය කර ගැනීමට අවශ්‍ය නම් (booster) මෙම වර්ග දෙකෙන් කුමන වර්ගයක් හෝ භාවිත කළ හැකි වීමය.

    මෙම පර්යේෂණයේ ප්‍රතිඵලය පිළිබඳව අදහස් දක්වමින් එක්සත් රාජධානියේ ප්‍රධාන වෛද්‍ය නිලධාරී, මහාචාර්ය ජොනතන් වැන්-ටැම් කියා සිටියේ එන්නත් ලබා ගැනීමට අපහසු වී තිබෙන රටවල්වලට මෙය සුභ ආරංචියක් වනු ඇති බවය.

    Getty Images
    වෛරසය මරා දැමීම සඳහා ශරීරය පුහුණු කිරීමටත්…

    ඇතැම් රටවල් දැනටමත් එන්නත් වර්ග දෙකක් භාවිත කරමින් පළමු සහ දෙවන මාත්‍රාව ලබා දීම සිදු කරමින් පවතී. ස්පාඤ්ඤයේ සහ ජර්මනියේ, පළමු මාත්‍රාව ලෙස ඇස්ට්‍රාසෙනෙකා එන්නත ලබාගත් තරුණ ප්‍රජාවට දෙවන මාත්‍රාව වශයෙන් Pfizer හෝ Moderna එන්නත ලබා දෙනු ලැබේ.

    එම රටවල් දෙක මෙම පියවර ගත්තේ මෙම පර්යේෂණ වාර්තාව නිකුත් වීමට පෙරය. ඊට හේතු වූයේ AstraZeneca එන්නත මගින් සිරුරේ ලේ කැටි ගැසීමේ තත්ත්වයක් ඇති වීමට අවදානමක් පවතින බව වාර්තා වීමය. නමුත් එය ඉතා කලාතුරකින් ඇතිවිය හැක්කක් බව විශේෂඥයෝ පෙන්වා දුන්හ.

    වැඩි ප්‍රතිදේහ ප්‍රමාණයක්

    කොවිඩ් 19ට එරෙහිව සටන් කර එම වෛරසය මරා දැමීම සඳහා ශරීරය පුහුණු කිරීමටත් සිරුරට පූර්ණ කොවිඩ් ආරක්ෂාවක් ලබා දීමටත් එන්නත් මාත්‍රා දෙකක් ලබා දීම ඉතා වැදගත්ය. ඉහත කී Com-Cov අධ්‍යයනය සඳහා වයස අවුරුදු 50 සහ ඊට වැඩි 850 දෙනෙකු සහභාගී විය. ඔවුන් මේ සඳහා ස්වේච්ඡාවෙන් ඉදිරිපත් වී තිබේ. මොවුනට දෙවන මාත්‍රාව ලබා දී ඇත්තේ පළමු මාත්‍රාව ලබා දී සති හතරකට පසුවය.

    එන්නත් මාත්‍රා දෙකම AstraZeneca ලබා දුන් පිරිසට වඩා දෙවන මාත්‍රාව සඳහා Pfizer ලබා දුන් පිරිසගේ සිරුරු තුළ වැඩි ප්‍රතිදේහ ප්‍රමාණයක් ප්‍රේරණය කර ඇති බව මෙම අධ්‍යයනයෙන් සනාථ වී තිබේ.

    Getty Images
    ,තුන්වැනි මාත්‍රාවක් අවශ්‍ය වේද?

    කෙසේ වෙතත් මාත්‍රා දෙකම සඳහා AstraZeneca භාවිත කිරීම මෙම අධ්‍යයනය නිසා පීඩාවට පත් නොවන බව එම අධ්‍යයනයේ ප්‍රධාන පර්යේෂක, ඔක්ස්ෆර්ඩ් විශ්වවිද්‍යාලයේ මහාචාර්ය මැතිව් ස්නේප් පැවසීය.

    “සති 08ත් 12ත් අතර කාල පරතරයක් සහිතව මාත්‍රා දෙකම එකම වර්ගයෙන් ලබා දුන්නත්, ආසාදිතයන් රෝහල්ගත වීම සහ කොවිඩ් රෝගයෙන් අසාධ්‍යවීම මෙම එන්නත් දෙවර්ගයම නිසා අඩුවෙලා තියෙනවා. එමෙන්ම ඩෙල්ටා ප්‍රභේදයට එරෙහිවත් මෙම එන්නත් දෙකම වැඩ කරනවා.” ඔහු ප්‍රකාශ කළේය.

    තුන්වැනි මාත්‍රාවක්?

    එන්නත් මාත්‍රා දෙක වර්ග දෙකකින් ලබා දෙන්නේනම් සති හතරක කාල පරතරයක් සහිතව ලබා දුන්න ද එය ඵලදායී වන බව ඉහත කී නව අධ්‍යයනයෙන් සනාථ වී ඇතැයි මහාචාර්යවරයා පැවසීය.

    “නමුත් වැඩි කාල පරතරයක් සහිතව එන්නත් මාත්‍රා දෙක ලබා දුන් විට වඩා හොඳ ප්‍රතිශක්තියක් ලැබෙන බව පෙනී ගොස් තිබෙනවා.” ඔහු තවදුරටත් පැවසීය.

    මේ අතරතුර තවත් අධ්‍යයනයක ප්‍රතිඵල සඳුදා (ජුනි 28) නිකුත් විය. ඉන් පෙනී යන්නේ දෙවන මාත්‍රාව ලබා දී මාස හයකට වඩා වැඩි කාලයකට පසුව තුන්වැනි AstraZeneca මාත්‍රාවක් ලබා දීමෙන් ප්‍රතිශක්තිය තව දුරටත් වර්ධනය වන බවය.

    නමුත් තුන්වැනි මාත්‍රාවක් අවශ්‍ය වේදැයි තීරණය කිරීම සඳහා තවම ඉක්මන් වැඩි බව විශේෂඥයෝ පවසති. කොවිඩ් 19ට එරෙහි ප්‍රතිශක්තිය කාලයත් සමඟ කෙතරම් ප්‍රමාණයකින් හීන වන්නේදැයි තවමත් පැහැදිලි නැත.

    බී.බී.සී වාර්තාවක සම්පූර්ණ උපුටා ගැනීමකි – ප්‍රධාන සංස්කාරක

  • ආණ්ඩුව ජාමේ බේර ගන්න කරන වැඩ නිසා ‘පරිප්පු කන්නේ‘ ජනතාව – බිමල් රත්නායක

    ආණ්ඩුව ජාමේ බේර ගන්න කරන වැඩ නිසා ‘පරිප්පු කන්නේ‘ ජනතාව – බිමල් රත්නායක

    “තමන්ගේ දේශපාලන බංකොළොත්කම වහගන්න විවිධ පුද්ගලයන් දඩයම් කිරීමෙන් සිද්ධ වෙන්නේ ජී.එස්.පී.ප්ලස් නැතිවෙලා ලංකාව මේ තියෙන තැනෙනුත් පහළ වැටෙන්න පුළුවන්. ඒ නිසා අපි ජනතාවට අනතුරු අඟවන්නේ මේ තියෙන තත්වය අවබෝධ කරගන්න කියලා. ආණ්ඩුව තමන්ගේ දේශපාලන ජාමය බේරාගන්න මේ රටේ නීති කඩමින් ප්‍රජාතන්ත්‍රවාදය උල්ලංඝනය කරමින් ජාතිවාදය ඇතිකරමින් කරන කටයුතු නිසා පරිප්පු කන්න වෙන්නේ පොදු ජනතාවට. අන්න ඒ දේශපාලන සූදුවට ඉඩ දෙන්න එපා කියලා අපි ජනතාවගෙන් ඉල්ලා සිටිනවා.” යැයි ජනතා විමුක්ති පෙරමුණේ ජාතික සංවිධායක බිමල් රත්නායක අවධාරණය කරයි.

    ඔහු මේ බව පැවසූවේ බත්තරමුල්ල පැලවත්ත හි පිහිටි ජනතා වමුක්ති පෙරමුණේ ප්‍රධාන කාර්යාලයේ අද (01) පෙරවරුවේ පැවති මාධය හමුවක් අමතමිණි.

    එහිදී ඔහු වැඩිදුරටත් දැක්වූ අදහස්…

    “ජනාධිපති සහ ආරක්‍ෂක ඇමති හැටියට ගෝඨාභය රාජපක්‍ෂ මහතාත්, විදේශ ඇමති දිනේෂ් ගුණවර්ධන මහතාත් අධිකරණ ඇමති අලි සබ්රි මහතාත් 2021 ජූනි 18වැනිදා කැබිනට් පත්‍රිකාවක් ඉදිරිපත් කර තිබෙනවා. කැබිනට් පත්‍රිකාවේ තේමාව “1979 අංක 48 දරන ත්‍රස්තවාදය වැළැක්වීමේ තාවකාලික විධිවිධාන පනත නැවත සලකා බැලීම සඳහා අමාත්‍ය මණ්ඩල අනු කමිටුවක් පත්කිරීම” වශයෙනි. මේ කැබිනට් පත්‍රිකාවට අනුව අප විසින් බරපතළ ලෙස සැලකිල්ලට ගත යුතු කරුණු ගණනාවක් තිබෙනවා. මේ පත්‍රිකාව ඉදිරිපත් කරන දේශපාලන වටපිටාව පැහැදිලි කරගෙන කැබිනට් පත්‍රිකාවේ කරුණු සම්බන්ධයෙන් අවබෝධයක් ලබාගැනීම වැදගත්.

    පසුගිය ජුනි 10වැනිදා යුරෝපා පාර්ලිමේන්තුව ශ්‍රී ලංකාව සම්බන්ධව සිවිල් අයිතිවාසිකම් උල්ලංඝනය කිරීම ඇතුළු කරුණු රාශියක් සම්බන්ධයෙන් යෝජනාවක් සම්මත කරගත්තා. මේ පාර්ලිමේන්තුව ප්‍රජාතන්ත්‍රවාදී අරමුණු වෙනුවෙන් වගේම ඉතාම දුර්දාන්ත අධිරාජ්‍යවාදීන් වෙනුවෙන් පෙනී සිටින ආයතනයක් බවත් අපි දන්නවා. මෙවර යුරෝපා පාර්ලිමේන්තුව ඉදිරිපත් කර තිබෙන යෝජනාව තුළ මේ රටේ යථාර්තයක් වන කරුණු රාශියක් තිබෙනවා. ගෝඨාභය රාජපක්‍ෂ පාලනය විසින් රටේ පවත්වාගෙන යන අර්ධ මිලිටරි පාලනය, මේ රටේ ධනවතුන්ගේ සහ බලවතුන්ගේ වුවමනාව අනුව මෙහෙයවන නීතිය, විරුද්ධ අදහස් දරන අයට විරුද්ධව කැලෑ නීතිය ක්‍රියාත්මක කිරීම ආදිය පැහැදිලිව දකින්න ලැබෙනවා. 20වැනි සංශෝධනය හරහා සහමුලින්ම අධිකරණ විනිශ්චයකාරවරුන් පත්කිරීම ඇතුළු බලතල ගණනාවක් ජනාධිපතිවරයා නතුකර ගැනීමෙන් නීතිය සහ යුක්තිය ඉටුකර ගැනීම අහුරා දමා තිබෙනවා.

    යුරෝපා පාර්ලිමේන්තුව ත්‍රස්තවායද වැළැක්වීමේ පනත කෙරෙහි විශේෂ අවධානයක් යොමුකර තිබෙනවා. මේ පනත අහෝසි කරලා වෙනත් පනතක් ගෙන්න කියලා ඔවුන් යෝජනා කරනවා. රනිල්-මෛත්‍රී පාලනය මෙවැනි පනතක් ගේන්න උත්සාහ කළා. යුද්ධයෙන් පස්සේ විශේෂයෙන් ත්‍රස්තවාදය වැළැක්වීමේ පනත දේශපාලන විරුද්ධවාදීන්ට විරුද්ධවත්, ආණ්ඩුවට සම්බන්ධ පුද්ගලයන්ගේ දූෂණ සහ වංචාවන් විමර්ශනය කරන නිළධාරීන් කොටු කිරීම සඳහාත් යොදාගෙන තිබෙනවා. ඒ ගැන ඔවුන් පැහැදිලිව අවධානය යොමුකර හිජාස් හිස්බුල්ලා නීතිඥවරයා, අවුරුදු 26ක් වයස අහ්නා ජසීම් කියන තරුණ ලේඛකයා වගේම අපරාධ පරීක්‍ෂණ දෙපාර්තමේන්තුවේ හිටපු අධ්‍යක්‍ෂවරයා ඇප නොදී රඳවාගෙන සිටීම ගැනත් විශේෂයෙන් අවධානය යොමුකර තිබෙනවා.

    සිවිල් ක්‍රියාකාරීන්, සමාජ මාධ්‍ය තහනම් කිරීමේ ගැසට් එක, වගේ කරුණුත් යුරෝපා පාර්ලිමේන්තුව සැලකිල්ලට ගෙන තිබෙනවා. යුද්ධ කාලයෙත් නොතිබුණු දරුණු නීති එකතු කර සහ අනික් පැත්තෙන් නීති නොසලකා කටයුතු කිරීම සම්බන්ධයෙනුත් කරුණු දක්වා තිබෙනවා. දැන් වෙන දේවල් අනුව සුවිශාල යුද්ධයකදී පාවිච්චි කරන ආයනත සහ නීති මොවුන් පාවිච්චි කරමින් ඉන්නවා. මේ තත්වය යටතේ යුරෝපා පාර්ලිමේන්තුව ජී.එස්.පී. ප්ලස් සහනය තාවකාලිකව හෝ ඉවත් කරන්න යෝජනා කරනවා. මේ සහනය නිසා යුරෝ මිලියන 2.3ක පමණ ලංකාවේ අපනයන වෙළඳපොළ අහිමි වෙනවා. ලංකාවේ දෙවන වැඩිම අපනයන වෙළඳපොළෙ යුරෝපා සංගමය. මහර හිරගෙදර 11දෙනෙකු ඝාතනය කිරීම සහ 150කට වැඩි පිරිසකට පහර දීම, අඟුණකොලපැලැස්ස හිර ගෙදර පහර දීම ඇතුළු තිරස්චීන ක්‍රියා සම්බන්ධයෙන් දීපිකා උඩුගම මැතිණියගේ කාලයේ මේ රටේම මානව හිමිකම් කොමිෂන් සභාවෙන් වාර්තා ඉදිරිපත් කර තිබෙනවා. ඒ සම්බන්ධයෙන් කිසිම නීතියක් ක්‍රියාත්මක වුණේ නැහැ. යුරෝපා සංගමයේ යෝජනාව සම්මත කරන්නේ මෙවැනි වටපිටාවක.

    ලංකාව දැන් විශාල විදේශ විනිමය හිඟයක ඉන්න බව අගමැතිවරයාම කියනවා. සුළු හා මධ්‍ය පරිමාණ කර්මාන්තකරුවෝ වගේම මේ රටේ වැඩකරන පංතියේ ආර්ථිකය විශාල වශයෙන් බිඳ වැටිලා තියෙන්නේ. ඒ තත්වය යටතේ ශ්‍රී ලංකා ආණ්ඩුවේ පැවැත්ම වෙනුවෙන් කරන්නාවූ දේවල් නිසා යුරෝපා සංගමයේ වෙළඳපොළත් අහිමිකර ගන්නත් යනවා. ගෝඨාභය රාජපක්‍ෂ ආණ්ඩුව මාතෘභූමියේ ස්වෛරීත්වය වෙනුවෙන් ගත් ක්‍රියාමාර්ග නිසා ජී.එස්.පී. ප්ලස් සහනය අහිමි කරන්න යනවා නෙවෙයි. මේ දුර්දාන්ත පාලනයේ අවශ්‍යතා වෙනුවෙන් කර තිබෙන දේවල් නිසා රටක් වශයෙන් වන්දි ගෙවන්න සිදුවී තිබෙනවා. කොවිඩ් මරණ භූමදානය කරන්න ඉඩ නොදී මුළු ලෝකයම රටවල් ඉස්සරහ විහිළුවට පත්වී අපට හිතවත්ව සිටි මුස්ලිම් රටවල්වල ඡන්ද ටිකත් ජිනීවාවලදී නැතිකර ගත්තා. අවසානයේ ජිනීවාවලදී පොල්ලෙන් ගහද්දී ගෝඨාභය රාජපක්‍ෂ ආණ්ඩුව දණ ගහලා සයින්දමරුදුවල කොවිඩ් සිරුරු වළදාන්න ඉඩ දුන්නා. මිත්‍ර රටවල් රාශියක් නැතිකරගෙන මානව හිමිකම් කොමිසමෙන් පොල්ලෙන් ගැහුවාම භූමදානය කරන්න ඉඩ දුන්නා. ලංකාවේ ජනතාව අඬලා, දොඩලා, වැඳලා, පුදලා කීවාට නොකරන දේවල් ජිනීවාවලින් පොල්ලෙන් ගැහුවාම ඉටුකරනවා. ශානි අබේසේකර මහත්තයාට ඇප දීමත් එහෙමයි. අවුරුද්දක් තිස්සේ රිමාන්ඩ් භාරයේ තබාගෙන ඉඳලා අභියාචනාධිකරණයෙන් තීන්දු කළේ ඔහුව රඳවා තබාගන්නවත් පසුබිමක් නැහැ කියලා. මේ අනුව අපට පේනවා වර්තමාන පාලකයන් යටතේ දෙපාර්තමේන්තු ක්‍රියා කරවමින් ඉන්නේ විදේශ බලකිරීම් කැඳවා ගැනීමේ වටපිටාවක බව.

    රිෂාඩ් බදුයුදීන් මන්ත්‍රීවරයා මාස ගණනාවක් තිස්සේ රැඳවුම් භාරයේ තබාගෙන සිටිනවා. පාස්කු ඉරිදා එල්ල කළ තිරස්චීන ප්‍රහාරය එල්ල කර අවුරුදු දෙකකට වැඩියි. ඒකට සම්බන්ධ සියලු දෙනාටම රටේ පවතින නීතිය අනුව දඬුවම් දිය යුතුමයි. ගෝඨාභය රාජපක්‍ෂ මහතා ජනාධිපති ධුරයට අමතරව රටේ සිටි ඉහළ හමුදා නිලධාරියෙක්. ඒ නිසා ත්‍රස්තවාදී කටයුතු සම්බන්ධයෙන් යම්කිසි අවබෝධයක තිබෙන බව හිතනවා. හැබැයි පාස්කු ප්‍රහාරය සම්බන්ධව ඔහු බලයට පත්වූ පසු අලුතින් කළේ මොනවාද? සාමාන්‍ය දැනීමට තිබෙන කරුණු මත මම මේ ප්‍රශ්න කරන්නේ. මෛත්‍රීපාල සිරිසේන ජනාධිපතිවරයා පත්කළ පාස්කු කොමිසමම තමයි වර්තමාන පාලනය යටතෙත් දිගටම පවත්වාගෙන ගියේ. එයින් අදහස් කරන්නේ ඒ කොමිසම හරි කියලා ආණ්ඩුව පිළිගන්න බවයි. ත්‍රස්තවාදය සම්බන්ධයෙන් විශේෂ දැනුමක් තිබෙන කොමසාරිස්වරු පත්කිරීමේ හැකියාවක් ජනාධිපතිවරයාට තිබුණා. අවශ්‍ය නම් පස්දෙනාම අයින් කරලා වෙන අය දාන්නත් තිබුණා. ඒ කිසිවක් කළේ නැහැ. අඩුම තරමේ මේ කොමිසමට අමතරව විශේෂ පරීක්‍ෂණ ඒකකයක් පිහිටුවන්නවත් උනන්දු වුණේ නැහැ. නමුත් ඡන්දයේදී පෝස්ටර් ගැහුවේ “හතරයි විසි එක මතකද?” කියලා. අප්‍රේල් 21 ප්‍රහාරය එල්ල වුණාම 23 වැනිදා එතුමා කීවේ ඡන්දය ඉල්ලනවා කියලා. හැබැයි පාස්කු ප්‍රහාරයේ වින්දිතයන් සම්බන්ධයෙන් විශේෂ මැදිහත්වීමක් ආරක්‍ෂක හමුදාවේ හිටපු නිලධාරියෙක් හැටියට මැදිහත් වෙනවා අපි දැක්කේ නැහැ.

    කාදිනල්තුමා විවිධාකාරයේ චෝදනා ආණ්ඩුවට ඉදිරිපත් කළා. පාස්කු ප්‍රහාරයට අවුරුදු දෙකක් පිරීමත් සමග ආණ්ඩුව සම්බන්ධයෙන් ජනතාවගේ විරෝධය එල්ල වෙන අවස්ථාවේ රිෂාඩ් බදුර්දීන් මන්ත්‍රීවරයා අත්අඩංගුවට ගත්තා. හැබැයි ඔහුට පාස්කු කොමිසමෙන් චෝදනා ගොණුවුණේ නැහැ. පොදුවේ ජනතාවගේ විරෝධය එල්ල වෙමින් “අවුරුදු දෙකක් මොනවද කළේ?” කියලා අහනකොට ඒක වෙනස් කරන්න රිෂාඩ් බදුර්දින් මන්ත්‍රීවරයා අත්අඩංගුවේ තබාගෙන ඉන්නවා. ඔහු මෙයට සම්බන්ධද නැද්ද කියන එක විමර්ශනය කිරීම ඒ අංශවල කටයුත්තක්. නමුත් පාස්කු ප්‍රහාරය කියන්නේ මේ ආණ්ඩුවට සොහොන ළඟින් යනකොට හැංගිලා යනවා වගේ තත්වයක්. පාස්කු ප්‍රහාරයෙන් පස්සෙත් ඡන්දය වෙනුවෙන් දොස්තර සාෆිලා වගේ මාතෘකා ගෙනාවා. ඒ ඔක්කොම කරලත් සොහොන්පොළ ළඟින් යනකොට වගේ ආණ්ඩුව හැසිරෙන්නේ. ඊළඟ ජිනීවා යෝජනාවත් ගෙනාවාට පස්සේද රිෂාඩ් බදුර්දීන් සම්බන්ධයෙන් කටයුතු කරන්නේ?

    තමන්ගේ දේශපාලන බංකොළොත්කම වහගන්න විවිධ පුද්ගලයන් දඩයම් කිරීමෙන් සිද්ධ වෙන්නේ ජී.එස්.පී.ප්ලස් නැතිවෙලා ලංකාව මේ තියෙන තැනෙනුත් පහළ වැටෙන්න පුළුවන්. ඒ නිසා අපි ජනතාවට අනතුරු අඟවන්නේ මේ තියෙන තත්වය අවබෝධ කරගන්න කියලා. ආණ්ඩුව තමන්ගේ දේශපාලන ජාමය බේරාගන්න මේ රටේ නීති කඩමින් ප්‍රජාතන්ත්‍රවාදය උල්ලංඝනය කරමින් ජාතිවාදය ඇතිකරමින් කරන කටයුතු නිසා පරිප්පු කන්න වෙන්නේ පොදු ජනතාවට. අන්න ඒ දේශපාලන සූදුවට ඉඩ දෙන්න එපා කියලා අපි ජනතාවගෙන් ඉල්ලා සිටිනවා. මේ වගේ වටපිටාවක ඉදිරිපත් කර තිබෙන මේ කැබිනට් පත්‍රිකාවේ හැම තැනම සඳහන් කර තිබෙන්නේ “ත්‍රස්තවාදය වැළැක්වීමේ ජාත්‍යන්තර සම්මුති, රෙගුලාසි මෙන්ම නඩු තීන්දු අනුව යමින් ශ්‍රී ලංකාවේ නීතිය සංශෝධනයට ලක්කිරීම තුළින් ත්‍රස්තවාදය වැළැක්වීමේ පනත හා ත්‍රස්තවාදය වැළැක්වීමේ දේශීය නීති පද්ධතිය සංවර්ධනය වී ඇත.” කියලයි. එහෙම කියන ගමන්ම කැබිනට් පත්‍රිකාවෙන් ඉලක්ක කරන්නේ සමාජ මාධ්‍ය පාලනය කරන්න. ත්‍රස්දවාදය එන්නේ සමාජ මාධ්‍යවලින් බව තහවුරු කරන්න උත්සාහ කරනවා. ත්‍රස්තවාදය සම්බන්ධයෙන් අදහස් හා ආකල්ප සමාජ මාධ්‍ය හරහා පුළුල් කර ගැනීමක් ගැන සඳහන් කරනවා. ත්‍රස්තවාදය වැළැක්වීමේ පනත නමින් මේ කැබිනට් පත්‍රිකාවේ මුළු අවධානයම යොමු කර තිබෙන්නේ සමාජ මාධ්‍ය හා සයිබර් අවකාශය සම්බන්ධයෙන්.

    ජනතා විමුක්ති පෙරමුණේ ස්ථාවරය දිගටම තිබෙන්නේ විශේෂ මර්දන නීති මේ රටට අවශ්‍ය නැහැ කියන එක. මේ මර්දන නීතිවලින් මුළු රටම කැරකොප්පුවක් බවට පත්කළා. ජනතාව, මාධ්‍යවේදීන්, ස්වාමින් වහන්සේලා සහ සිවිල් ජනතාව මුළුමනින්ම කැරකොප්පුවකට දැක්කෙව්වා. රටතුළ ත්‍රස්තවාදයක් තියෙනවා නම් මැඩ පවත්වන්න සාමාන්‍ය නීති සංවර්ධනය වෙලා තිබෙන බව ආණ්ඩුවම කියනවා. ඒ නිසා නව මර්දන අනපනත් අවශ්‍ය නැහැ. දැනට තිබෙන ත්‍රස්තවාදය වැළැක්වීමේ පනතත් පාවිච්චි වෙන්නේ කොහොමද කියලා ඔබ දන්නවා. රාජ්‍ය දේපොළ වංචා කර බැරල් දාලා පාරක් කාපට් කළ සිද්ධියකට රිදීමාලියද්දේ ජනතාව විරෝධය පෑවා. ලංකාවේ දුප්පත්ම දෙවැනි තැන ගන්නා ජනතාවක් ඉන්න ප්‍රදේශයක වංචාවන්ට විරුද්ධව ජනතාව හඬ නගනකොට තක්කඩි දේශපානඥයන් මැර ප්‍රහාර එල්ල කරනවා. ඔවුන් සම්බන්ධයෙන් නීතිය ක්‍රියාත්මක කරන්නේ කොහොමද කියලා අපි දැක්කා. ඔහුව අත්අඩංගුවට නොගැනීම ගැන ජන මතයක් ගොඩනැගුණහම අත්අඩංගුවට ගෙන ඇප දෙනවා. ඒ සභාපතිවරයාම ගිහින් තමන්ට ප්‍රහාරයක් එල්ල කළා කියලා පොලීසියේ පැමිණිලි දානවා. අර පාරේ වංචාව සම්බන්ධයෙන් නීතිය ක්‍රියාත්මක කරන්නේ කොහොමද? සාමාන්‍ය තරුණයෙන් මුහුණු පොතේ පෝස්ට් එකක් දැම්මාම සී.අයි.ඩී. එකෙන් යන්නේ රංචු පිටින්. නමුත් වංචාවක් ගැන ප්‍රධාන මාධ්‍යවල පෙන්නූ කරුණු සම්බන්ධයෙන් ක්‍රියා කරන්නේ කොහොමද? දැනට තිබෙන නීතිය මේ මට්ටමින් අවභාවිතා කරන පාලකයන් ත්‍රස්තවාදය වළක්වන්න කියලා යුරෝපා සංගමය දෙන ලණු කාල ක්‍රියාත්මක වුණොත් හිට්ලර්ගේ, මුසලෝනිගේ දෙදෙනාම එකතු වූ පාලනයක් බවට පත්වෙනවා. ඒ තරම් තක්කඩි ආකාරයට දැන් පවා නීති ක්‍රියාත්මක වෙන්නේ.

    සමාජ මාධ්‍ය සම්බන්ධව ආණ්ඩුවේ ලොකු කතාවක් තියෙනවා. සමාජ මාධ්‍ය සර්ව සාධාරණ එකක් නෙවෙයි. ඒවා මෙහෙයවන්නේ අති විශාල සමාගම් සහ අතිවිශාල දේශපාලන පක්‍ෂ. ප්‍රධාන ධාරාවේ ජනමාධ්‍ය බහුතරයක් දේශපාලන පක්‍ෂවලට ගැතිකම් කරනවා වගේම සමාජ මාධ්‍යයත් එහෙමයි. නමුත් ජනතාවට තමන්ගේ අදහස් කියා ගන්න යම් කිසි ඉඩක් ගොඩනැගිලා තියෙනවා. ත්‍රස්තවාදය අල්ලගෙන දඩයම් කරන්න හදන්නේ මේ පොඩි ඉඩකඩයි. ජනතා විමුක්ති පෙරමුණේ නායකයින්ට විරුද්ධව ගෙනගිය මඩ ප්‍රචාර සම්බන්ධයෙන් අපරාධ පරීක්‍ෂණ දෙපාර්තමේන්තුවට පැමිණිලි රාශියක් කළා. මේ මඩ ප්‍රහාර ගෙනගිය පොහොට්ටු මඩ බළකායට සම්බන්ධ එකසිය තිස් ගණනකගේ සම්පූර්ණ විස්තර ලබාදුන්නා. මේවා සම්බන්ධයෙන් සිදුකළ පරීක්‍ෂණ කෝ? නීතිය සම්පූර්ණයෙන්ම පක්‍ෂග්‍රාහීව යොදා ගන්නා පාලක කල්ලියක් දැන් ඉන්නේ. මේ දේශපාලන ප්‍රභූන්ගේ වාහනවලට හැප්පිලා පහුගිය කාලේ පොලීසියේ ගණනාවක්ම මැරුණා. බොරැල්ල පොලීසියේ ට්‍රැෆික් ඕ.අයි.සී. මහත්තයා මැරුණා. ඒ වගේම කොල්ලුපිටිය ප්‍රදේශයේ පොලිස් කොස්තාපල් මහත්තයෙක් මැරුණා. මේ වගේ කල්ලි ආරක්‍ෂා කරන්න පොලීසියේ සමහර නිලධාරීන් ක්‍රියා කරන ගමන් මඩ බළකායට විරුද්ධව පැමිණිලි කරන ඒවා පරීක්‍ෂා කරන්නේ නැහැ. වංචා-දූෂණ සම්බන්ධයෙන් කරුණු පරීක්‍ෂා කරන්නේ නැහැ.

    රටේ නීතිය ක්‍රියාත්මක වෙන්නේ ධනවතුන්ට, බලවතුන්ට වගේම ආණ්ඩු පක්‍ෂයට සම්බන්ධ අයට පක්‍ෂග්‍රාහීව. මෑතකදී සිරකරුවන් නිදහස් කිරීමත් මේ වගේමයි. පෙබරවාරි 04වැනිදා මේ රට ඉතිහාසයේ පළමු වරට මරණීය දණ්ඩනය නියමවී සිටින සිකරුවන් නිදහස් කළා. ඊට පස්සේ ජූනි මාසේ මුල් සති දෙක තුළ නාමල් රාජපක්‍ෂ ඇමතිවරයා එල්.ටී.ටී.ඊ. සැකකරුවන්ටත් ජනාධිපති සමාව දෙන බව කීවා. ඊට පස්සේ පොසොන් පොහොයදා මාධ්‍ය ආයතනයක හිමිකරුවෙකුගේ සහෝදරයෙක් නිදහස් කළා. පෙබරවාරි මාසේ ඉඳලා ආවේ මේකට. මේ පිරිස අතර එල්.ටී.ටී.ඊ. සැකකරුවන් 16ක් හිටියා. එක් කෙනෙක් අත්අඩංගුවට ගන්නේ 2011දී. අධිකරණයෙන් සිර දඬුවම් නියම කළේ අවුරුදු 7ක්. 2012දී අත්අඩංගුවට ගත් කෙනෙකුගේ දඬුවම අවුරුදු 7යි. 2009 ජූලි මාසේ අත්අඩංගුවට ගත් කෙනෙකුගේ දඬුවම් කාලය අවුරුදු 2යි මාස 6යි. ඒ වගේම හැබැයි නිදහස් කරනකොට අවුරුදු 12කට ආසන්න කාලයක් සිර දඬුවම් විඳ තිබෙනවා. මම පැහැදිලි කරන්නේ අධිකරණයේ නීතිමය ක්‍රියාමාර්ගවලට ගතවන කාලයත් එක්ක ඒ ලැබෙන දඬුවම් කාලය එකතු වුණාම විශාල දඬුවම් කාලයක් සිරගත කර සිට තිබෙනවා. නිදහස් කළ 16 දෙනාගේම නීත්‍යානුකූල සිර දඬුවමට වඩා විශාල කාලයක් බන්ධනාගාරවල රඳවලා සිටියා. ආණ්ඩුව මේ සියල්ල කිරීමේ අරමුණ ඕනෑම නීතියක් තමන්ගේ දේශපාලන වූවමනා නිසා කඩන්න සූදානම් බවයි.

    කොවිඩ් තත්වය ඇතුළේ රැඳවුම් බාරයේ ඉන්න සිරකරුවන් සති දෙකෙන් දෙකට උසාවියට ගෙන එන්නෙත් නැහැ. ඔවුන්ගේ ඡායාරූපයක් හෝ වීඩියෝ පටයක් උසාවියට ඉදිරිපත් කරනවා. මේ නිසා තමන්ගේ පවුලේ අයට රැඳවුම් භාරයේ ඉන්න කෙනාව අවුරුදු එක හමාරකින් පෙන්වා නැහැ. රැඳවුම් භාරයේ තවමත් එල්.ටී.ටී.ඊ. සැකකරුවන් දෙසිය ගණනක් ඉන්නවා. මේ අය මෙහෙම තියාගෙන හිටියාම ඒ දරුවෝ ත්‍රස්තවාදයට පෙළඹෙන්නේ නැද්ද? මේ දරුවන්ට ලැබෙන පෙළඹවීම කුමක්ද? අන්තවාදය මැඩ පැවැත්වීම අවශ්‍ය නම් ඒ සැකකරුවන්ට දෙන දඬුවම විසින් තව අන්තවාදීන් බිහි කෙරෙන ආකාරයෙන් නම් සිද්ධ වෙන්නේ මොකක්ද? අන්තවාදය පරාජයට පත්කළ යුතුමයි. හැබැයි එය කළ යුතු වන්නේ අන්තවාදය බෝ නොවන ක්‍රමවලින්. සදාම් හුසේන්ගේ ඒකාධිපති පාලනය වෙනස් කරන්න ඇමරිකාව ඊට වඩා ත්‍රස්තවාදයක් යොදවා සුන්නධුලි කළා. එහි ප්‍රතිඵලයක් තමයි විවිධ ත්‍රස්තවාදී කල්ලි බිහිවීම.

    ඒ නිසා මේ රට රකිනවා කියලා වචනවලට මුවාවෙලා වර්තමාන ආණ්ඩුව ගෙනයන ප්‍රජාතන්ත්‍රවිරෝධී ක්‍රියාමාර්ග තේරුම් ගන්න කියලා ජනතාවට කියනවා. පටු දේශපාලන වුවමනා වෙනුවෙන් ආණ්ඩුව කරන මේ කටයුතු නිසා අර්බුදයට ලක්වෙමින් තිබෙන්නේ රට. ජී.එස්.පී. ප්ලස් ලංකාවට නැති වුණොත් රට තවදුරටත් අගාධයට වැටෙනවා. එයින් තව දුරටත් රට විදේශීය බලවතුන්ගේ ග්‍රහණයට ලක්වෙනවා. එසේ නොවී සිටීමට නම් අපේ රටේ ප්‍රජාතන්ත්‍රවාදය, මානව හිමිකම් ආරක්‍ෂා කිරීම අවම මට්ටමින් හරි තිබෙන නීතියේ විධානය ආරක්‍ෂා කිරීම හරි දෙයක්. ඒකට ජාත්‍යන්තරයෙන් බලපෑම් එන්න ඕනෑ නැහැ. රට තුළ නීතිය කඩලා ඒ ගැන කතා කරනවා කියලා ලෝකයට බැනලා වැඩක් නැහැ. ඒනිසා අපි ත්‍රස්තවාදය වැළැක්වීමේ පනත අහෝසි කරන්න කියලා ආණ්ඩුවට බල කරනවා. මේ පනත් යොදාගෙන සමාජ මාධ්‍ය සහ වෙනස් අදහස් තිබෙන පුද්ගලයන් දඩයම් කිරීම නවත්වන්න කියලා බල කරනවා. ආණ්ඩුව ඉදිරිපත්කරන බොරු තර්කවලට හසු නොවෙන්න කියලා ජනතාවගෙන් ඉල්ලා සිටිනවා. ඒ වගේම ජනතා විමුක්ති පෙරමුණට විරුද්ධව මඩ ගැහීම සම්බන්ධයෙන් ඉදිරිපත් කර තිබෙන පැමිණිලි රාශියට ගන්නා ක්‍රියාමාර්ග මොනවාද කියලා හෙළිකරන ලෙස පොලිස් මාධ්‍ය ප්‍රකාශකවරයාගෙන් ඉල්ලා සිටිනවා.”

  • ‘හොඳම ප්‍රතිපත්ති පිළිබඳ ඔස්කාර් සම්මානය ’ශ්‍රී ලංකාවට

    ‘හොඳම ප්‍රතිපත්ති පිළිබඳ ඔස්කාර් සම්මානය ’ශ්‍රී ලංකාවට

    ‘හොඳම ප්‍රතිපත්ති පිළිබඳ ඔස්කාර් සම්මානය’ලෙස හැඳින්වෙන 2021 අනාගත ප්‍රතිපත්ති සදහා වූ සම්මානය (Policies from Sri Lanka receive Future Policy Award 2021 on protection from hazardous chemicals) මෙවර ශ්‍රී ලංකාවට හිමිව තිබේ. ශ්‍රී ලංකාවේ 1980 අංක 33 දරන පළිබෝධනාශක පාලනය කිරීමේ පනත සහ 1997 සියදිවි නසාගැනීම් වැළැක්වීමේ ජාතික ප්‍රතිපත්ති හා ක්‍රියාකාරී සැලැස්ම, මෙම සම්මානය දිනා ගැනීමට හේතු වී තිබේ.

    මිනිස් සෞඛ්‍යයට හා පරිසරයට රසායනික ද්‍රව්‍යවලට නිරාවරණය වීමෙන් ඇතිවන අහිතකර බලපෑම් අවම කරන වඩාත් ඵලදායී ප්‍රතිපත්ති මෙම සම්මාන ප්‍රදානයේදී සැලකිල්ලට ගෙන තිබේ. ලොව මෙතෙක් අත්කර ගෙන ඇති සියදිවි නසාගැනීම් අනුපාතයෙහි විශාලතම අඩුවීමට ශ්‍රී ලංකාවේ ඉහත සඳහන් ප්‍රතිපත්ති දෙක හේතු වී තිබේ.එමඟින් වසර 20 ක් තුළ එක් ජීවිතයක් සඳහා සෘජු රජයේ වියදම ඇමරිකානු ඩොලර් 50 ටත් අඩු මුදලකට ජීවිත 93,000 ක් පමණ බේරාගෙන ඇත.

    ලෝක අනාගත කවුන්සිලය විසින් ප්‍රදානය කරනු ලබන මෙම ත්‍යාගය, මෙම වසරේ දී එක්සත් ජාතීන්ගේ පරිසර වැඩසටහන (UNEP), ජාත්‍යන්තර රසායනික කළමනාකරණය සඳහා උපායමාර්ගික ප්‍රවේශය (SAICM), ජාත්‍යන්තර කම්කරු සංවිධානය (ILO), ආර්ථික සහයෝගීතාව සහ සංවර්ධනය සඳහා වූ සංවිධානය (OECD), එක්සත් ජාතීන්ගේ පුහුණු හා පර්යේෂණ ආයතනය (UNITAR) සහ එක්සත් ජාතීන්ගේ සංවර්ධන වැඩසටහන (UNDP) සමඟ හවුල්කාරිත්වයෙන් යුතුව, මයිකල් ඔටෝ පදනමේ සහ ජුවා පදනමේ ද සහාය ඇතිව සංවිධානය කරනු ලැබේ.

    “වර්තමාන හා අනාගත පරම්පරාවන් වෙනුවෙන්, පාර්ශවකරුවන් විසින් අන්තරායකර රසායනික ද්‍රව්‍යවලින් ආරක්ෂා වීම ප්‍රමුඛතාවයක් බවට පත් කිරීම අතිශයින්ම වැදගත්ය. ශ්‍රී ලංකාව සහ අනෙකුත් ජයග්‍රාහී ප්‍රතිපත්ති ඉදිරි මාවත පෙන්වන අතර, එය ලොව පුරා ප්‍රතිපත්ති සම්පාදකයින් ප්‍රබෝධමත් කරවයි.” යැයි ලෝක අනාගත කවුන්සිලයේ (WFC) අධ්‍යක්ෂ ඇලෙක්සැන්ඩ්‍රා වැන්ඩෙල් මහත්මිය පවසයි.

    මෙම සම්මානය සඳහා ශ්‍රී ලාංකික ප්‍රතිපත්ති නම් කිරීම සහ ශ්‍රී ලංකාවට ජාත්‍යන්තර පිළිගැනීමක් ලබා ගැනීමට ඔහු දැරූ සියලු ප්‍රයත්න පිළිබඳව මහ කොමසාරිස් කාර්යාලය ස්කොට්ලන්තයේ ශ්‍රී ලංකා නිර්වේතනික කොන්සල් මහාචාර්ය මයිකල් එඩ්ල්ස්ටන් මහතාට ප්‍රශංසා කරයි.

    2021 අනාගත ප්‍රතිපත්ති සම්මාන උළෙලේ ජයග්‍රාහී ප්‍රතිපත්ති 2021 ජූලි 6 වැනි දින පැවැත්වෙන ඉහළ මට්ටමේ අතථ්‍ය සම්මාන ප්‍රදාන උළෙලක දී සමරනු ලැබේ. මෙම සම්මාන ප්‍රදාන උළෙලට සහභාගී වීමට සහ 2021 අනාගත ප්‍රතිපත්ති සම්මානය සඳහා වන ජයග්‍රාහී ප්‍රතිපත්ති පිළිබඳ වැඩිදුර තොරතුරු දැන ගැනීම පිණිස, www.worldfuturecouncil.org/chemicals වෙත පිවිසෙන්න.

  • පොහොර ආනයනයට යන මිලියන 80,000 ‘ගොවියාට දෙනවා‘ – ජනපතිගෙන් ගොවීන්ට සහතිකයක්

    පොහොර ආනයනයට යන මිලියන 80,000 ‘ගොවියාට දෙනවා‘ – ජනපතිගෙන් ගොවීන්ට සහතිකයක්

    කාබනික පොහොර භාවිතයට ගත් පියවර කිසිවිටෙකත් පසුපසට නොගන්නා ලෙස දිවයින පුරා ලක්ෂ 11ක්වූ ගොවීන් වෙනුවෙන් දිස්ත්‍රික් ගොවි නියෝජිතයෝ, ජනාධිපති ගෝඨාභය රාජපක්ෂ මහතාගෙන් ඉල්ලා සිටිති.

    පැරණි වගා ක්‍රමවලට නැවත යොමුවී වස විසෙන් තොර ආහාර වේලක් ජනතාවට ලබාදීම තමන්ගේ ද පරම යුතුකම සහ වගකීම බව ගොවි නියෝජිතයන් විසින් පෙන්වා දෙනු ලැබිණ. එම නිසා නිරෝගිමත් අනාගත පරපුරක් වෙනුවෙන් ජනාධිපතිතුමා තැබූ පියවරට ගොවි ජනතාවගේ ප්‍රණාමය හිමි වන බව ඔවුහු කියා සිටිති. යුද්ධය අවසන් කළාක් මෙන් සමස්ත රටවැසියා වෙනුවෙන් සියලු ගොවීන් එක් කණ්ඩායමක් යටතේ කාබනික පොහොර අභියෝගය ජය ගැනීම සඳහා ජනාධිපතිවරයාට සහාය වන බව ගොවි නියෝජිතයෝ සහතික වූහ.

    අද (01) පෙරවරුවේ ජනාධිපති කාර්යාලයේ පැවති ශ්‍රී ලංකා ජාතික ගොවි සංවිධාන බල මණ්ඩල දිස්ත්‍රික් ගොවි නියෝජිත හමුවේදී ඔවුන් මේ බව පැවසූහ. ගොවීන් ලක්ෂ 11ක්, ගොවි සංවිධාන 17000ක් සහ ගොවිජන සේවා මධ්‍යස්ථාන 563කින් මෙම බල මණ්ඩලය සකස් වී තිබේ.කාබනික පොහොර භාවිතයට යොමු වීමෙන් පසු රජය ක්‍රියාත්මක කිරීමට අපේක්ෂිත වැඩපිළිවෙළ පිළිබඳ ජනාධිපතිවරයා විසින් ගොවි නියෝජිතයන් දැනුවත් කරනු ලැබිණ. 

    මෙය හදිසියේ ගත් තීරණයක් නොව; තමා ජනාධිපති අපේක්ෂකයා ලෙස “සෞභාග්‍යයේ දැක්ම” ප්‍රතිපත්ති ප්‍රකාශයෙන් දුන් පොරොන්දුවක් ක්‍රියාත්මක කිරීම බව රාජපක්ෂ මහතා පෙන්වා දුන්නේය. මීට පෙර අවස්ථා ගණනාවකදී පැවති ආණ්ඩු, කාබනික පොහොර වගාවට යොමුවීමට උත්සාහ කර තිබේ. එහෙත් ඒවා අසාර්ථක වීමට වූ හේතු මැනවින් අධ්‍යයනය කර නව වැඩපිළිවෙළ ක්‍රියාත්මක කරන බව ජනාධිපතිවරයා පැවසීය.

    ඇතැම් පිරිස් මෙය ආපස්සට යන ගමනක් ලෙස පෙන්වා දීමට උත්සාහ දරති. එහෙත් සමස්ත ලෝකයේම නව ප්‍රවණතාවයක් ලෙස ගැනෙන, කාබනික පොහොර භාවිතයට යොමුව, කෘෂි ආර්ථිකයේ  නව මාවතකට රට ගෙනයන බව ජනාධිපතිවරයා අවධාරණය කළේය. වැඩපිළි‍වෙළට එරෙහිව කතා කරන බොහෝ දෙනෙක් වැඩි මිලක් ගෙවා කාබනික පොහොර යෙදු එළවළු, පළතුරු භාවිතා කරති. එහෙත් රසායනික පොහොර භාවිතයෙන් පීඩා විඳින ගොවීන් පිළිබඳව ඔවුන්ගේ අවධානය යොමු නොවේ.

    පසුගිය වසර පහ තුළ වගා කටයුතු බොහෝ දුරට අඩපණ කෙරිණ. වත්මන් ආණ්ඩුවේ ප්‍රතිපත්තිය කෘෂිකර්මාන්තය නඟාසිටුවීමයි. වී කිලෝවකට රුපියල් 30ක්ව පැවති මිල රුපියල් 50ක් දක්වා වැඩි කිරීම ගොවි ජනතාව දිරිමත් කිරීමට ගත් පියවරකි. පසුව ගොවීන්ට තම වී අස්වනු කිලෝව රුපියල් 65 සහ 68 අතර මුදලකට විකිණීමට හැකි විය. එහිදී පාරිභෝගිකයා ආරක්ෂා කර ගැනීමට රජය මැදිහත් වී සහල් මිල පාලනය කරනු ලැබිණ.

    බෝ නොවන රෝගවලින් අනාගත පරපුර බේරා ගනිමින් වාර්ෂිකව රසායනික පොහොර ආනයනයට වැය කෙරෙන රුපියල් මිලියන අසූදහසක (80,000)මුදල මෙරට අහිංසක ගොවි ජනතාවගේ අතට ලැබීමට සලස්වන බව ජනාධිපතිවරයා සඳහන් කළේය.

    වැඩපිළිවෙළ අඛණ්ඩව සහ සාර්ථකව ක්‍රියාත්මක කිරීමට වල්නාශක, කෘමිනාශක ඇතුළු කාබනික පොහොර අවශ්‍ය ප්‍රමාණය, රසායනික පොහොර ලබාදුන් ආකාරයටම ගොවීන්ට ලැබීමට සලස්වන බව ජනාධිපතිවරයා පැවසීය. එමෙන්ම පොහොර අවශ්‍යතාව මෙරටදීම නිෂ්පාදනයට දේශීය ව්‍යවසායකයන්ට හා ව්‍යාපාරිකයන්ට අවස්ථාව හිමි වේ. ගොවින්ටද තමන්ට අවශ්‍ය කාබනික පොහොර නිෂ්පාදනය කර ගත හැකිය. ඒ සඳහා වැයවන මුදල ලබාදීමට රජය සැලසුම් කර ඇත.

    ගොවීන් මෙතෙක් ලබාගත් ආදායම අඩුවීමට ඉඩ නොතබන අතර ආදායම අඩුවුවහොත් එම ප්‍රමාණය රජය මඟින් ලබාදී, ගොවියාට අපහසුතාවට පත්වීමට ඉඩ නොතබන බව ජනාධිපතිවරයා සහතික විය.

    පසුගිය ආණ්ඩුව සමයේ ඇණහිටි “ගොවි රක්ෂණය” අද සිට යළි ක්‍රියාත්මක කරමින් “ගොවි රක්ෂණ සැකැස්ම” අමාත්‍ය මහින්දානන්ද අළුත්ගමගේ මහතා විසින් ජනාධිපතිවරයා වෙත භාරදෙනු ලැබිණ.

    “ගොවි විශ්‍රාම වැටුප” ඉහළ නැංවීමට රජයේ අවධානය යොමු කර ඇති බවද මහින්දානන්ද අළුත්ගමගේ මහතා අනාවරණය කළේය. වී ගබඩා 105ක් අලුතින් ඉදිකිරීමට, ගොවි බැංකුවලට මූල්‍ය ප්‍රතිපාදන සැපයීමට සහ කෘෂිකර්ම දත්ත පද්ධතිය කඩිනමින් යාවත්කාලීන කිරීමට කඩිනම් පියවර ගන්නා බවද අලුත්ගමගේ මහතා පැවසීය.

    වැව්, අමුණු, ඇළවේලි ප්‍රතිසංස්කරණය කිරීමේ ගිවිසුම්වලට එළඹීමේදී, මෙතෙක් ගොවි සංවිධානවලට ලක්ෂ 20කට සීමාවී තිබූ කොන්ත්‍රාත් මුදල ලක්ෂ 100ක් දක්වා ඉහළ නැංවීමටත් ජනාධිපතිතුමාගේ අනුමැතිය හිමි විය. ආර්ථික මධ්‍යස්ථානවල අලෙවි කටයුතු සඳහා සෘජුව ගොවීන්ට මැදිහත්වීමේ අවකාශය පුළුල් කිරීමටත් තීරණය කෙරිණ.            

    රාජ්‍ය අමාත්‍ය ශෂීන්ද්‍ර රාජපක්ෂ, මොහාන් ද සිල්වා, සීතා අරඹේපොළ, ජනාධිපති ලේකම් පී.බී. ජයසුන්දර යන මහත්ම මහත්මීහු සහ අමාත්‍යාංශ ලේකම්වරු ඇතුළු රාජ්‍ය නිලධාරීහු මේ අවස්ථාවට එක්ව සිටියහ.

  • අවුරුදු 27ක් ගත වුණත් ‘සමෘද්ධියෙන්‘ රටට ලැබුණ සමෘද්ධියක් නෑ – අගමැති මහින්ද

    අවුරුදු 27ක් ගත වුණත් ‘සමෘද්ධියෙන්‘ රටට ලැබුණ සමෘද්ධියක් නෑ – අගමැති මහින්ද

    දුෂ්කරතා මැද වැඩ කළොත් එහි ප්‍රතිඵලය කවදාහරි මේ රටට ඉතිරි වෙනවා කියන විශ්වාසයෙන් අපි වැඩ කරමු යැයි අග්‍රාමාත්‍ය මහින්ද රාජපක්ෂ මහතා අද (01) දින පෙරවරුවේ අරලියගහ මන්දිරයේ දී පැවසීය.

    ‍‍දිවයින පුරා ගම්මාන 500ක් “සෞභාග්‍යා නිෂ්පාදන ගම්මාන” ලෙස සංවර්ධනය කිරීමේ සමාරම්භක අවස්ථාවට එක්වෙමින් අග්‍රාමාත්‍යවරයා මේ බව අවධාරණය කළේය.

    ඒ අනුව නුවරඑළිය මන්දාරම්නුවර බෝංචි බීජ හා කෝපි නිෂ්පාදන ගම්මානය, පේරාදෙණිය උඩුඊරියගොල්ල මල් නිෂ්පාදන ගම්මානය සහ යාපනය සංදිලිපායි පිරාන්පට්රු තල තෙල් නිෂ්පාදන ගම්මානය “සෞභාග්‍යා නිෂ්පාදන ගම්මාන” ලෙස නම් කරමින් ඊට අදාළ සමරු ඩිජිටල් පුවරු අග්‍රාමාත්‍යතුමාගේ ප්‍රධානත්වයෙන් මෙහි දී නිරාවරණය විය.

    කුරුණෑගල ගනේවත්ත කුඹුක්ගැටේ ගම්මානයේ සහ ගම්පහ මීරිගම කීනදෙණිය ගම්මානයේ ඉදිවූ  “සෞභාග්‍යා සෙනෙහසේ නවාතැන” නිවාස මෙම උත්සවයට සමඟාමීව එම නිවෙස් හිමියන්ට ප්‍රදානය කෙරිණි.

    ජනතාවට කාර්යක්ෂම හා කඩිනම් සේවාවක් ලබාදීම සඳහා සමෘද්ධි, ගෘහ ආර්ථික, ක්ෂුද්‍ර මූල්‍ය, ස්වයං රැකියා හා ව්‍යාපාර සංවර්ධන රාජ්‍ය අමාත්‍යංශය  අද (01) සිට ලබන 07 වැනිදා දක්වා සෞභාග්‍යා – සමෘද්ධි සතිය ප්‍රකාශයට පත් කර තිබේ.

    “සෞභාග්‍යා නිෂ්පාදන ගම්මාන” සමාරම්භක අවස්ථාවට එක්වෙමින් අග්‍රාමාත්‍යවරයා කළ සම්පූර්ණ කතාව මෙසේය.

    මිත්‍රවරුනි, අපේ රටේ සමෘද්ධි හා අඩු ආදායම්ලාභී ජනතාව නගා සිටුවීම ගැන අපි නිරන්තරයෙන් අවධානය යොමු කරනවා.  මේ වගේ ගෝලීය වසංගතයක් හමුවේදීත් මේ ජනතාව වෙනුවෙන් රජයක් ලෙස යුතුකම් ඉටුකරන්නෙ කොහොමද කියලා අපි කල්පනා කළා.

    දීමනා දීලා මේ ජනතාව ඉන්න තැනම හැමදාම තියන එක වෙනස් කරන්නයි. අපට උවමනා වුණේ.

    ඒ වෙනුවෙන් තවත් ඉදිරි  පියවරක් තබන්න “සෞභාග්‍යා සමෘද්ධි සතිය”ට හැකිවනු ඇතැයි අපි අපේක්ෂා කරනවා.

    මිත්‍රවරුනි, 1994 දි ආරම්භ වුණ සමෘද්ධි ව්‍යාපාරයට දැන් අවුරුදු 27ක්. එදා සමෘද්ධිය ඇරඹුනේ අපේ රටේ දිළිදු ජනතාව ආර්ථික වශයෙන් සවිබල ගන්වන්න. හැබැයි එදා අපේක්ෂා කළ ප්‍රතිඵල තවමත් අපට ලැබුණද කියලා අපි ගැඹුරින් සොයලා බලන්න ඕනි.

    එදා සමෘද්ධි ව්‍යාපාරය ආරම්භ කරන විට ඒ තුළින් ආධාර ලබපු  අය අදටත් ඒ විධියටම අධාර ලබනවා නම් අපේ ඒ අපේක්ෂා ඉටුවෙලා නැහැ කියන එකයි  ඒ තුළින් කියැවෙන්නේ කියලයි මම විශ්වාස කරන්නේ.

    මිත්‍රවරුනි, සමෘද්ධිය ලබාදුන් පමණින් කවුරුත් පොහොසත් වන්නේ නැහැ. ඒ අයට ආදායම් මාර්ගයක් සකසලා දීලා ඔවුන්ට නිසි මග පෙන්වලා දෙන්න උවමනායි.එදා මහින්ද චින්තනයෙන් සහ මහින්ද චින්තන ඉදිරි දැක්මෙන් අපි ඒ බව වඩා හොඳින් තේරුම් අරගෙන සමෘද්ධි ව්‍යාපාරයම ශක්තිමත් කරන්න පියවර ගත්තා.

    සමෘද්ධිලාභී  පවුල්වල තරුණ තරුණියන්  වෘත්තීය පුහුණු වැඩ සටහන් සඳහා යොමු කරලා ඒ අයව  නිපුණතා සපිරි ශ්‍රම බලකායක් බවට පත්කළා. ඒ තුළින් බොහෝ ව්‍යවසායකයන් බිහිකරන්න අපට හැකිවුණා කියලා අපි විශ්වාස කරනවා.

    ඒ විතරක් නෙමෙයි ඒ අයව  රජයේ සහ පෞද්ගලික අංශයේ පමණක් නෙවෙයි  විදේශ රටවල රැකියා සඳහාත් යොමු කරන්න අපට පුළුවන් කම ලැබුණා. ඒ නිසා බොහෝ පිරිසක් තව දුරටත් ආධාර හෝ දීමනා මත යැපෙන තත්ත්වයෙන් මුදා ගන්න අපට හැකිවුණා. 

    මිත්‍රවරුනි, අපි සමෘද්ධිය මත නැවතිලා හිටියෙ නැහැ. අදත් අප විශ්වාස කරන්නෙ එතැනින් ඉදිරියට යන්න ඕනි කියලා. සෞභාග්‍යයේ දැක්මෙ ඵලදායී පුරවැසියෙකු වගේම සතුටින් ජීවත්වන පවුලක් කියන සංකල්පය අපි ඉදිරියට ගෙනවිත් තිබෙනවා. මේ ඔස්සේ අංග සම්පූර්ණ ගෘහ නේවාසික ආර්ථිකයක් ඇතිකරලා ගම්මාන වශයෙනුත් එම ජනතාව සමෘද්ධිමත් කිරීමයි අපේ අරමුණ වන්නේ.

    හැබැයි ඔබ තමුන්නාන්සෙලා දන්නවා, ආපස්සට හැරිලා බැලුවම පහුගිය ආණ්ඩු කාලයේ මේ අඩු ආදායම්ලාභි ජනතාව නගා සිටුවීම ගැන හැරිලාවත් බැලුවෙ නැහැ. සමෘද්ධිය දුන්නත්, ඒ සමෘද්ධියත් එයාලගෙ පක්ෂෙ අයට විතරයි කියලා මේ දැවැන්ත ව්‍යාපාරය ඉතාමත් ලඝු තැනකට ගෙනා බව ඔබට මතක ඇති.

    මිත්‍රවරුනි, ඒ අයගෙ දේශපාලන උපක්‍රමවල ලියැවිලා තිබුණෙ ජනතාව නගා සිටුවීම නෙමෙයි ඒ අය ඒ තැන්වලම තියලා දේශපාලන වාසියක් ගන්න. අපි කවදාවත් ඒ තැනට වැටුණෙ නැති බව අද සතුටින් කියන්න කැමතියි.

    මට මතකයි ඡන්ද පැරදුණාම සමහරු මට ඇවිත් කියනවා. කටුමැටි බිත්ති ගෙවල් ගඩොලින් බැඳුනම, බයිසිකලයක්වත් නැතිව තිබුණ ගෙදරට ත්‍රී රෝද රථයක්, හරි වාහනයක් ගත්තම සර් අපි ඡන්ද පරදිනවා කියලා. මම එදත් කිව්වෙ කමක් නෑ ජනතාව හිටපු තැනින් පියවරක් ඉස්සරහට තියලා නම්, ඒකෙන් කියන්නෙ මේ රට තවත් පියවර ගණනාවක් ඉදිරියට ඇවිත් කියලා.

    මිත්‍රවරුනි, සමෘද්ධිය වෙනුවෙන් අපි වසරකට රුපියල් මිලියන 50000 ක් වැය කරනවා. අපේ රජය දැනටමත් සමෘද්ධි පවුල් ආර්ථිකමය වශයෙන් සවිබල ගැන්වීම සඳහා අලුතින් වැඩ සටහන් රැසක් ක්‍රියාත්මක කරලා තියෙනවා.

    ඒ අනුව ගෘහ ආශ්‍රිත නිෂ්පාදන ප්‍රවර්ධනය කිරීමටත්, ඔවුන්ගේ ආදායම් ඉහළ නංවන්නත් අද ආරම්භ කරන මෙම සෞභාග්‍යා නිෂ්පාදන ගම්මාන වැඩසටහනට හැකිවෙනු ඇතැයි අපි අපේක්ෂා කරනවා.

    ශෙහාන් සේමසිංහ අපේ රාජ්‍ය ඇමතිතුමා කිව්ව විධියට දිවයින පුරා ගම්මාන 500ක් නිෂ්පාදන ගම්මාන ලෙස හඳුනගෙන අපි සංවර්ධනය කරනවා. ඒ සඳහා සමෘද්ධිලාභීන් විතරක් නෙමෙයි අඩු ආදායම්ලාභීන් සහ නිෂ්පාදන කාර්යයට දායකවන හැමෝමත් එක්කරගන්නවා කියලයි ඇමතිතුමා කිව්වේ.

    ඔබ දන්නවා වසංගත තත්ත්වය හමුවේ මුළු ලෝකයම විවිධ දුෂ්කරතාවලට මුහුණපානවා. රටක් විධියට අපටත් ඒ දුෂ්කරතා අඩු වැඩි වශයෙන් තිබෙනවා. නමුත් සියලු දෙනාගේම සහයෝගයෙන් එන්නත්කරණ වැඩපිළිවෙල ක්‍රමවත්ව ඉදිරියට ගෙනියන්න අපට අද හැකිවෙලා තියෙනවා. ජනතාව ඒ ගැන විශ්වාසය තබා කටයුතු කිරීම රජයට ලබා දෙන ශක්තියක් බව මා මෙහි දී මතක් කරන්න ඕනි.

    දේශීය ආර්ථිකය නගා සිටුවමින් රට සංවර්ධනය කරා ගෙනයාමේ අපේ අරමුණ වෙනුවෙන් අපි  වැඩකරන බව ජනතාවට සිහිපත් කරන්න කැමතියි.

    අද ඇරඹෙන මේ වැඩසටහන තුළත් ග්‍රාමීය ප්‍රජාව සෘජුවම රටේ  නිෂ්පාදන කාර්යයට දායක කර ගැනීමට හැකියාව ලැබෙනවා. ඔවුන්ට විකල්ප ආදායම් මාර්ග නිර්මාණය වනවිට ඒ හා සමානව ඔවුන්ගෙ ජීවන තත්ත්වය ඉහළ යනවා.

    අද මේ නිවාස ලැබු ජනතාව ගත්තත් ඔවුන්ට හෙට ඉඳන් පටන් ගන්න තියෙන්නෙ අලුත් ජීවිතයක්. අලුත් බලාපොරොත්තුවකින් වැඩ කරන්න ඔවුන්ට පුළුවන්. ඒ සඳහා මේ අමාත්‍යාංශය කරන මග පෙන්වීම  අපි ඉතාමත් අගය කළ යුතුයි.

    අපේ විරුද්ධ පක්ෂය නම් කැමතියි අපි කොවිඩ් කියලා මොකුත්ම නොකර ඉන්නවා නම්. මොකද කොවිඩ් නැතිවත් මොකුත් නොකර හිටපු අය, මේ කාලේ හිටියනම් කොහොමද කියලා බලාගන්න තිබුණා. ජනතාවට මේවා හංගන්න පුළුවන් කාරණා නෙමෙයි. එයාලත් මේවා අහනවා.

    ඒ නිසා දුෂ්කරතා මැද අපි වැඩකළොත් එහි ප්‍රතිඵලය කවදාහරි මේ රටට ඉතිරි වෙනවා කියන විශ්වාසයෙන් අපි වැඩ කරමු.

    අද මේ සංවර්ධන ව්‍යාපෘති ඔස්සේ ග්‍රාමීය ආර්ථිකය ශක්තිමත් කරමින් රටේ ආර්ථිකය ශක්තිමත් කරන්න කැපවන රාජ්‍ය අමාත්‍යතුමා, ලේකම්තුමා ඇතුළු නිලධාරින් ඒ වගේම සමෘද්ධි සංවර්ධන දෙපාර්තමේන්තුව, සෞභාග්‍යා සංවර්ධන කාර්යංශය ඇතුළු ආයතනවල නිලධාරින් හා සේවක මහත්ම මහත්මීනුත්  මා මේ මොහොතේ ඉතා ගෞරවයෙන් යුතුව සිහිපත් කරනවා.

    ඔබ සැමට සුබ අනාගතයක්!යැයි අග්‍රාමාත්‍යතුමා පැවසීය.

    සමෘද්ධි, ගෘහ ආර්ථික, ක්ෂුද්‍ර මූල්‍ය, ස්වයං රැකියා හා ව්‍යාපාර සංවර්ධන රාජ්‍ය අමාත්‍ය ශෙහාන් සේමසිංහ මහතා.

    සෞග්‍යා දැක්ම තුළ ජනතා කේන්ද්‍රීය ආර්ථිකයක් ගොඩ නැගීම සඳහා අපිට ලබා දීපු  වගකීම ගරු අග්‍රාමාත්‍යතුමාගේ මෙහෙයවීම යටතේ අපි මේ නිෂ්පාදන ගම්මාන  සංකල්පය සංවිධාන කළා.

    මේකේ මුලික අරමුණ වන්නේ ගරු අග්‍රාමාත්‍යතුමනි අපේ රටේ යම් හැකියාවන් තියන ඒ වගේම උනන්දුව කැපවීම තියන ඒ වගේම දක්ෂතා තියන කුඩා ව්‍යාපාර කරන්න පුළුවන් වෙනත් ආදායම් මාර්ග සකස් කරගන්න පුළුවන් කණ්ඩායම් හදුනාගෙන මේ ගම්මාන සංකල්පය තුළට ඇතුළත් කරලා ඔවුන්ව  ආදායම් උත්පාදනය කරන කණ්ඩායමක් බවට පරිවර්තනය කිරීමයි.

    අපි මේ වැඩසටහන ක්‍රියාත්මක කරලා අතිගරු ජනාධිපතිතුමත් අගමැතිතුමත් ලබාදුන් උපදෙස් ක්‍රියාත්මක කරලා මේ රට සමෘද්ධිමත් රටක් බවට පරිවර්තනය කරන්න අවශ්‍ය වැඩකටයුතු කරනවා කියන ප්‍රතිඥාව මේ මොහොතේ  දී ලබාදෙනවා. 

    අපි සමෘද්ධි සංවර්ධන දෙපාර්තමේන්තුවටත් අලුත් මුහුණුවරක් ලබාදුන්නා මේ වැඩසටහන ක්‍රියාත්මක කරද්දි.ඒකේ අලුතින් පටන්ගත්තු ව්‍යාපෘතියක් තමයි සමෘද්ධි නිවාස ලොතරැයිය හරහා ක්‍රියාත්මක වන නිවාස  වැඩසටහන.

    ඒ අනුව අපි බලාපොරොත්තු වෙනවා  2020 අවුරුද්ද සඳහා ඔබතුමාගේ වැඩසටහන අනුවත්   2021 අවුරුද්ද සඳහා සමෘද්ධි දෙපාර්තමේන්තුවේ වැඩසටහන සමගත් ක්‍රියාත්මක වෙලා අඩු ආදායම් ලාභීන් සහ ඉතාම දුෂ්කර පරිසරයක ජීවත්වන කණ්ඩායම් වලට නිවාස  1000 ක් සකස්කර දෙන්න. ඒ අනුව අපි  2020 ආරම්භ කරපු නිවාස අද ඔබතුමා අතින්  විවෘත කිරීම සඳහා අවශ්‍ය වැඩකටයුතු අපි සකස් කරල තියෙනවා.

    ගරු අගමැතිතුමනි, රටේ කොවිඩ් අර්බුදය හමුවේ අපේ අමාත්‍යාංශය ඒ වගේම අපේ අමාත්‍යාංශයට අදාල දෙපාර්තමේන්තු  කිසිවක් නිදහසට කාරණයක් හැටියට කොවිඩ් වසංගත තත්ත්වය භාවිතා කළේ නැහැ. අපි සැළසුම් කළ විදිහටම අපේ වැඩකටයුතු සිදුවුනා.

    අතිගරු ජනාධිපතිතුමා , ගරු අග්‍රාමාත්‍යතුමා අපිට භාරදීපු වගකීම ඉටුකරන්න  අපේ අමාත්‍යාංශය සහ ඒ හා සම්බන්ධ සියලු නිලධාරීන් අපිත් එක්ක ඒකාබද්ධව කටයුතු කළා. ඒ වගේම නාමල් රාජපක්ෂ ඇමතිතුමා විසින් ක්‍රියාත්මක කරන ව්‍යවසායකත්ව වැඩසටහන සඳහා අපි ඒකාබද්ධව කටයුතු කරලා ඒ ව්‍යාවසායකයන් නිර්මාණය කිරීමේ වැඩසටහනට අමාත්‍යංශයක් ලෙස අපි සම්බන්ධ වෙන්න අවශ්‍ය කටයුතු කරල තියෙනවා යැයි රාජ්‍ය අමාත්‍යතුමා පැවසීය.

    මෙම අවස්ථාවට අමාත්‍යවරුන්වන ජොන්ස්ටන් ප්‍රනාන්දු, සී.බී රත්නායක, නාමල් රාජපක්ෂ, රමේෂ් පතිරණ, රාජ්‍ය අමාත්‍යවරුන්වන ශෙහාන් සේමසිංහ,කාංචන විජේසේකර,අජිත් නිවාඩ් කබ්රාල්, අග්‍රාමාත්‍ය ලේකම් ගාමිණි සෙනරත්, මහ බැංකු අධිපති මහාචාර්ය ඩබ්ලිව්.ඩී ලක්‍ෂ්මන්, සමෘද්ධි, ගෘහ ආර්ථික, ක්ෂුද්‍ර මූල්‍ය, ස්වයං රැකියා හා ව්‍යාපාර සංවර්ධන රාජ්‍ය අමාත්‍යාංශයේ ලේකම් නීල් බණ්ඩාර හපුහින්න, මුදල් හා ප්‍රාග්ධන වෙළඳපළ සහ රාජ්‍ය ව්‍යවසාය ප්‍රතිසංස්කරණ රාජ්‍ය අමාත්‍යාංශයේ ලේකම් ආර්.එම්.පී රත්නායක, සමෘද්ධි අධ්‍යක්ෂ ජනරාල් ආර්.පී.බී තිලකසිරි මහත්වරු ඇතුළු පිරිසක් එක්ව සිටියහ.

  • චීනයට බලපෑම් කළොත් ‘හිස ගසා දමනවා‘ – චීන ජනපති ෂී ජින් පිං ‘බටහිරට දැඩිව අනතුරු අඟවයි‘

    චීනයට බලපෑම් කළොත් ‘හිස ගසා දමනවා‘ – චීන ජනපති ෂී ජින් පිං ‘බටහිරට දැඩිව අනතුරු අඟවයි‘

    විදේශ බලවතුන් රටට හිරිහැර කිරීමට හෝ බලපෑම් කිරීමට උත්සාහ කළහොත් ඔවුන්ගේ හිස ගසා දමන බවට (get their heads bashed) චීනයේ ජනාධිපති ෂී ජින් පිං අනතුරු අඟවා තිබේ. චීන කොමියුනිට්ස් පක්ෂයේ 100 වැනි ශත සංවත්සරය වෙනුවෙන් අද (01) පැවති උත්සවයකදී චීන ජනපතිවරයා මේ බව ප්‍රකාශ කර තිබේ.

    එක්සත් ජනපදය වෙත යොමු වී ඇති පරිදි පුළුල් ලෙස දක්නට ලැබෙන අදහස් දැක්වීමේදී බීජිනය “විශුද්ධ දේශනා sanctimonious preaching” කිරීමට ඉඩ නොදෙන බව ද ජනපතිවරයා වැඩි දුරටත් පැවසීය.

    චීනය මානව හිමිකම් උල්ලංඝනය කිරීම් සහ හොංකොං හි මර්දනය සම්බන්ධයෙන් විවේචනවලට මුහුණ දෙන අතර ඇමෙරිකාව ප්‍රමුඛ බටහිර රටවල් වෙත් චීනයට මානව හිමිකම් උල්ලංඝනය කිරීම් සම්බන්ධ බරපතළ චෝදනා එල්ල කරමින් සිටී.

    වෙළඳාම, ඔත්තු බැලීම සහ වසංගතය සම්බන්ධයෙන් එක්සත් ජනපදය හා චීනය අතර සබඳතා මෑත කාලයේ දී නරක අතට හැරී තිබේ. තායිවානයේ ප්‍රශ්නය ද ආතතියේ ප්‍රධාන ප්‍රභවයකි. ප්‍රජාතන්ත්‍රවාදී තායිවානය ස්වෛරී රාජ්‍යයක් ලෙස බටහිර රටවල් විසින් සලකන අතර බීජිනය කියන්නේ තායිවානය චීනයෙන් කැඩී ගිය පළාතක් බවයි.

    චීනය තායිවානය සමඟ එක්සත් වීම සඳහා නොසැලෙන කැපවීමක් පවත්වාගෙන යන බව ද චීන ජනපතිවරයා පැවසීය.

    “චීන ජනතාවගේ ජාතික ස්වෛරීභාවය සහ භෞමික අඛණ්ඩතාව ආරක්ෂා කිරීමට ඇති අධිෂ්ඨානය, කැමැත්ත සහ හැකියාව කිසිවෙකු අවතක්සේරු නොකළ යුතුය,” ඔහු පැවසීය.

    චීන කොමියුනිස්ට් පක්ෂයේ 100 වැනි ආරම්භක සංවත්සරය සැමරීම සඳහා 2021 ජූලි 1 වන දින චීනයේ බීජිං හි ටියානන්මෙන් චතුරශ්‍රයේ දී චීන මහජන විමුක්ති හමුදාවේ (පීඑල්ඒ) ගුවන් හමුදාව ගුවන් යානයක් සාදමින් සිටියි.
    100 වන සංවත්සරය නිමිත්තෙන් හමුදා ගුවන් යානා නිර්මාණය වෙමින් පවතී

    අද (01) උදෑසන පැවැති 100 වැනි සංවත්සර සැමරුමට හමුදා ජෙට් යානා සංදර්ශන, කාලතුවක්කු ආචාර සහ දේශප්‍රේමී ගීත වාදන ඇතුළත් විය.

    බීජිං හි ටියානන්මෙන් චතුරශ්‍රයට කොමියුනිට්ස් පක්ෂයේ නායකයින් පිරිසක් පැමිණ සිටි අතර ඔවුන්ගෙන් බොහෝ දෙනෙක් මුඛ ආවරණ පැළඳ සිටියේ නැත.

    බීජිංහි වීදිවල සිටින ජනයා ඡායාරූප ගනිමින් ටියානන්මෙන් චතුරශ්‍රයට පියාසර කරන ගුවන් යානා වල රැළි ගසයි
    බීජිංහි වීදිවල මිනිසුන් ටියානන්මෙන් චතුරශ්‍රයට පියාසර කරන ගුවන් යානා දෙස බලා සිටිති

    චීන ජනපතිගේ පණිවිඩයේ කැපී පෙනෙන දේ කුමක්ද?

    පැයක් පමණ කතා කළ චීන ජනපතිවරයා නූතන චීනයේ පක්ෂයේ කාර්යභාරය යළිත් අවධාරණය කරමින් කියා සිටියේ ‘එය රටේ සංවර්ධනයට කේන්ද්‍රීය වී ඇති බවත් එය ජනතාවගෙන් වෙන් කිරීමට දරන උත්සාහයන් අසාර්ථක වනු ඇති බවත් ය‘

    “චීනය බේරා ගත හැක්කේ සමාජවාදයට පමණක් වන අතර චීනය සංවර්ධනය කළ හැක්කේ චීන ලක්ෂණ සහිත සමාජවාදයට පමණි” ඔහු පැවසීය.

    “චීනයට හිරිහැර කිරීමට, පීඩා කිරීමට හෝ යටත් කර ගැනීමට අපි කිසිවෙකුට ඉඩ නොදෙමු” යනුවෙන් ඔහු තවදුරටත් පැවසීය.

    “එසේ කිරීමට උත්සාහ කරන ඕනෑම අයෙකුට එරෙහිව බිලියන 1.4කට අධික චීන ජනතාව නැගී සිටිනු ඇති අතර චීන මහා ප්‍රකාරය වන් ඒ දැවැන්ත බලය අවසානයේ සතුරාගේ හිස ගසා දමනු ඇත‘‘

    2021 ජූලි 1 වන දින බීජිං හි ටියානන්මෙන් චතුරශ්‍රයේ දී චීන කොමියුනිස්ට් පක්ෂය පිහිටුවීමේ 100 වැනි සංවත්සරය සැමරීමට පෙර සිසුන් චීන කොඩි ඔසවයි.
    ටියානන්මෙන් චතුරශ්‍රයේ පැවති උත්සවවලට විශාල ජනකායක් පැමිණියහ

    එක්සත් ජනපදය සිය වර්ධනය මැඩපැවැත්වීමට උත්සාහ කරන බවට චීනය පුන පුනා චෝදනා කර ඇති අතර මෙම අදහස් එක්සත් ජනපදය ඉලක්ක කරගෙන කළ ඒවා බව විශ්වාස කෙරේ.

    හොංකොං සහ මැකාවෝ යන කලාපවල “ඉහළ ස්වයං පාලනයක්” පවතින බව ජනපතිවරයා පැවසූ අතර, ඔවුන් “එක් රටක්, පද්ධති දෙකක්” යන මූලධර්ම නිවැරදිව ක්‍රියාත්මක කළ යුතු බව ද අවධාරණය කළේය.

    ජනපතිගේ කතාව විශ්ලේෂණය

    මහජන චීනයේ නිර්මාතෘ මාඕ සේතුංගෙන් පසු නූතන චීනයේ බලවත්ම නායකයා වන ෂී ජින්පින්, ලා අළු පැහැති ඇඳුමකින් සැරසී සිටි අතර එය කොමියුනිස්ට් පක්ෂයේ නිර්මාතෘ විසින් ටියැන්මන් චතුරශ්‍රයේ එක් පැත්තක් අලංකාර කරන සුප්‍රසිද්ධ ආලේඛ්‍ය චිත්‍රයට සමාන විය.

    ජනපතිවරයා තම ජනතාව විසින් නිර්මාණය කරන ලද “නව ලෝකය” ගැන ප්‍රශංසා කළේය.

    ඔහු පැවසූ දෙය නම් ‘මෙය පක්ෂය නොමැතිව බිහිවිය නොහැකි ලෝකයක්‘ බවයි.

    චීන කොමියුනිස්ට් පක්ෂ උපායමාර්ගයේ ප්‍රධාන අංගයක් වී ඇත්තේ පක්ෂය, රාජ්‍ය යාන්ත්‍රණය හා චීන ජාතිය පිළිබඳ අවබෝධය එකට එක් කිරීමට පියවර ගැනීමයි. ඕනෑම සාර්ථකත්වයක්, ප්‍රගතියක්, දියුණුවක් ඔවුන් විසින් කොමියුනිට්ස් පක්ෂයට ආරෝපණය කර ඇත.

    උත්සවය අවසානයේ පණිවුඩය පැහැදිලිව පෙනෙන බවට සහතික කර ගැනීම සඳහා පැමිණ සියලු සියලු දෙනා “කොමියුනිස්ට් පක්ෂයක් නොමැතිව නව චීනයක් නැත” යන ගීතය ගායනා කළහ.

    මෙම සංවත්සරය සඳහා චීනය සූදානම් වූයේ කෙසේද?

    1921 දී ආරම්භ කරන ලද චීන කොමියුනිස්ට් පක්ෂය Chinese Communist Party (CCP) බලයට පැමිණියේ මීට වසර 72 කට පෙර දීර්ඝ සිවිල් යුද්ධයකින් පසුව ය. එම කාලය තුළ රට විශාල වෙනස්කම් වලට භාජනය වී ඇත. නමුත් මෙම සන්ධිස්ථාන සමහරක් ප්‍රචාරක මෙහෙයුමේ කැපී පෙනෙන ලෙස අතුරුදහන් විය.

    පසුගිය සඳුදා බීජිං හි බර්ඩ්ස් නෙස්ට් ක්‍රීඩාංගනයේදී ද ‘මහා පා ගමන‘ නමින් කලා ප්‍රසංගයක් වේදිකා ගත කරන ලද අතර එයට චීන ඉතිහාසය යළි ප්‍රතිනිර්මාණය කරන ආකෘති ඇතුළත්ව තිබිණි.

    එහෙත් සංස්කෘතික විප්ලවය, 1989 ටියානන්මෙන් චතුරශ්‍රයේ විරෝධතා සහ හොංකොං හි ප්‍රජාතන්ත්‍රවාදී විරෝධතා මෙම ප්‍රසංගය තුළ දැකගත නොහැකි වූ බව ප්‍රංශ පුවත් සේවය පැවසීය.

    චීන කොමියුනිස්ට් පක්ෂය පිහිටුවීමේ 100 වැනි සංවත්සරය සැමරීමේ කොටසක් ලෙස 2021 ජුනි 28 වන දින බීජිං හි කුරුළු කූඩුව ජාතික ක්‍රීඩාංගණයේදී සංස්කෘතික ප්‍රසංගයක් අතරතුර නර්තන ශිල්පීන් නටති.
    මහා පා ගමන මගින් පක්ෂ ඉතිහාසය ඉස්මතු කර පෙන්වන නමුත් සමහර පරිච්ඡේදයන් මඟ හැරී ඇත
    චීන කොමියුනිස්ට් පක්ෂයේ ආරම්භක 100 වැනි සංවත්සරය සැමරීමේ කොටසක් ලෙස 2021 ජුනි 28 වන දින බීජිං හි කුරුළු කූඩුව ජාතික ක්‍රීඩාංගනයේදී හෙදියන් ලෙස සැරසී සිටින රංගන ශිල්පීන් සංස්කෘතික කාර්ය සාධනයකට සහභාගී වේ.

    සඳුදා ප්‍රදර්ශනයේ කොටසක් චීනය කොවිඩ් -19 පරාජය කළ ආකාරය වෙනුවෙන් කැප විය

    පසුගිය අප්‍රේල් මාසයේ සිට චීන සිනමා ශාලාවලට අවම වශයෙන් සතියකට දෙවරක්වත් “රතු චිත්‍රපට” නමින් ප්‍රචාරක චිත්‍රපට ප්‍රදර්ශනය කිරීමට නියෝග කරන ලදී.

    “රතු සංචාරක ව්‍යාපාරය” ද ජනප්‍රිය වී ඇති අතර, Ctrip වැනි සංචාරක සමාගම් “රතු වන්දනාකරුවන්” සඳහා අද්විතීය මාර්ග 100 ක් දියත් කරයි.

    2021 ජුනි 17 වන දින චීනයේ ෂැංහයි හි පැවති චීන කොමියුනිස්ට් පක්ෂයේ පළමු ජාතික සම්මේලනයේ අනුස්මරණය තුළ අමුත්තන් ගමන් කරති.
    චීන කොමියුනිස්ට් පක්ෂයේ පළමු ජාතික සම්මේලනයේ අනුස්මරණය වැනි ෂැංහයි හි සංචාරකයින් “රතු සංචාරක” ස්ථාන වෙත පැමිණ ඇත.

    එහෙත් සියල්ලන්ම ප්‍රචාරය ගැන සතුටු වූයේ නැත.

    “දැන් මම රාත්‍රියේ රූපවාහිනිය සක්‍රිය කරන විට, ස්ථාන දුසිම් ගණනක් විප්ලවීය යුද්ධ ගැන නාට්‍ය විකාශනය කරනවා” යැයි බීජිංහි පදිංචිකරුවෙක් බීබීසී චීන වාර්තාකරුට පැවසීය.

    බී.බී.සී ඇසුරිණි – සැකසුම – තීක්ෂණ වෙළෙන්එගොඩ

  • කර්මාන්තකරුවන් හා ව්‍යාපාරික ප්‍රජාවෙන් ‘අගමැති මහින්ද කළ‘ සුපිරි ඉල්ලීම

    කර්මාන්තකරුවන් හා ව්‍යාපාරික ප්‍රජාවෙන් ‘අගමැති මහින්ද කළ‘ සුපිරි ඉල්ලීම

    සේවකයන් ඉවත් කිරීම වෙනුවට ඔවුන් රැකගනිමින් මෙම වසංගත තත්ත්වය හමුවේ මුහුණ පා ඇති අභියෝගවලට මුහුණ දෙන්නැයි අග්‍රාමාත්‍ය මහින්ද රාජපක්ෂ මහතා ඊයේ (30) දින සියලුම කර්මාන්තකරුවන් සහ ව්‍යාපාරික ප්‍රජාවගෙන් ඉල්ලා සිටියේය.

    ශ්‍රී ලංකා ඇඟළුම් සන්නාම සංගමය (SLABA) හා ශ්‍රී ලංකා සිල්ලර වෙළඳුන්ගේ සංගමය (SLRA) මුහුණ පා ඇති ගැටලු සම්බන්ධයෙන් වූ සාකච්ඡාවක් අරලියගහ මන්දිරයේ දී පැවති අවස්ථාවේ අග්‍රාමාත්‍යවරයා මේ බව සඳහන් කළේය.

    බැංකු ණය සහන ලබා ගැනීම, ණයවර ලිපි විවෘත කිරීමේ දී ඇති ගැටලු විසඳා ගැනීම, ඇඟළුම් සේවකයන් සඳහා එන්නත්කරණය, කොවිඩ් මාර්ගෝපදේශ වලට අනුව නිමි ඇඳුම් වෙළඳසැල් විවෘත කිරීමට අවසර ලබා ගැනීම, සේවක අර්ථසාධක අරමුදල් සහ සේවා නියුක්තයන්ගේ භාර අරමුදල් ගැටලු සම්බන්ධයෙන් පැමිණ සිටි නියෝජිතයෝ අදහස් දැක්වූහ.

    බතික් අත්යන්ත්‍ර රෙදි හා දේශීය ඇඟළුම් නිෂ්පාදන කාර්යය වෙනුවෙන් වෙනම අමාත්‍යංශයක් හඳුන්වාදීම සම්බන්ධව ශ්‍රී ලංකා ඇඟළුම් සන්නාම සංගමයේ සභාපති ලලන්ත වතුදුර මහතා මෙහි දී අග්‍රාමාත්‍යවරයාට සිය සංගමයේ ප්‍රණාමය පිරිනැමුවේය. 

    පාස්කු ඉරුදින ත්‍රස්ත ප්‍රහාරය සහ කොවිඩ්-19 ගෝලීය වසංගතය හේතුවෙන් දැනට මාස 24කට ආසන්න කාලයක් සිය ව්‍යාපාර කටයුතු අඩපණ වී ඇතැයි පෙන්වා දුන් මෙම නියෝජිත පිරිස ව්‍යාපාර හා වෙළඳාම් පවත්වාගැනීම සඳහා මුදල් අමාත්‍යංශය ඔස්සේ හදිසි සහන ලබා දෙන්නැයි අග්‍රාමාත්‍යවරයාගෙන් ඉල්ලා සිටියහ.

  • මැදපෙරදිග රටවල් හයක ගුවන් මගීන්ට පැනවූ තහනම ‘හෙට සිට ඉවතට‘

    මැදපෙරදිග රටවල් හයක ගුවන් මගීන්ට පැනවූ තහනම ‘හෙට සිට ඉවතට‘

    කටාර්, ඕමාන් ඇතුළු මැදපෙරදිග රටවල් 6ක සිට පැමිණෙන ගුවන් මගීන්ට හෙට (01) සිට බලපැවැත්වෙන පරිදි පනවා තිබූ තාවකාලික තහනම කොන්දේසි කිහිපයකට යටත්ව ඉවත් කළ බව ශ්‍රී ලංකා සිවිල් ගුවන් සේවා අධිකාරිය නිවේදනයක් නිකුත් කරමින් කියා සිටී.

    කෙසේවෙතත් ජූලි මස 31 වනදා දක්වා ඇංගෝලාව, බොස්ට්වානා, ලෙසෙතෝ, මොසැම්බික්, නැම්බියාව, ස්වාසිලන්තය, සැම්බියාව සහ සිම්බාබ්වේ යන රටවල සිට මෙරටටපැමිණෙන මගීන් සඳහා පැනවු තහනම තවදුරටත් ක්‍රියාත්මක වන බව ද ශ්‍රී ලංකා සිවිල් ගුවන් සේවා අධිකාරිය සදහන් කරයි.

    කටාර්, ඕමාන්, බහරේන්, එක්සත් අරාබි එමීර් රාජ්‍යය, සෞදි අරාබිය සහ කුවේට් යන මැදපෙරදිග රටවල සිට පැමිණෙන ගුවන් මගීන්ට කොවිඩ් වසංගතය හේතුවෙන් ජුලි 1 වන දා සිට ජූලි 13 වන දා දක්වා තාවකාලික තහනමක් පැනවීමට සිවිල් ගුවන්සේවා අධිකාරිය ඊයේ (29) තීරණය කළේය.

    තහනම ඉවත් කිරීමේ නව කොන්දේසි අනුව,

    • ඉහත සදහන් රටවල සිට මෙරටට පැමිණෙන සියලු ගුවන් මගීන් සතුව කොවිඩ් ආසාදිතයෙකු නොවන බව තහවුරු කිරීමට පීසීආර් වාර්තාවක් තිබිය යුතු අතර අදාළ ගුවන් සමාගම මගියා ගුවන් යානයට ඇතුළුකර ගැනීමට පෙර ඒ පිළිබඳ ව සොයාබැලිය යුතුය.
    • එම පීසීආර් වාර්තාව රජයේ හෝ අනුමත කළ ආයතනයකින් ලබාගත යුතු අතර, ඊට අදාළ කිව්.ආර් සහ බාර් (QR/Bar ) කේත එහි සඳහන් විය යුතුය.
    • ගුවන් මගීන් ඉදිරිපත් කරන පරීක්ෂණ වාර්තාවල නිරවද්‍යතාවය සම්බන්ධයෙන් ගුවන් සමාගම තෘප්තිමත් විය යුතු අතර ගුවන් මගීන් ඉදිරිපත් කරන ඇන්ටිජන් පරීක්ෂණ වාර්තා පිළිනොගත යුතුය.
    • පිළිගත් සම්පූර්ණ වාර්තා ඉදිරිපත් කොට පැමිණෙන මගීන්ට මෙරට ඒමට අවසර ලැබෙන්නේ හෝටල් නිරෝධායනයට ලක්වීමට හෝ ශ්‍රී ලංකා සංචාරක මණ්ඩලයේ ජෛව ආරක්ෂිත බුබුල සංකල්පය මත පමණකි.
  • නියෝජ්‍ය සෞඛ්‍ය සේවා අධ්‍යක්ෂ ජනරාල් ‘ආයතන ප්‍රධානීන්ගෙන්‘ විශේෂ ඉල්ලීමක් කරයි

    නියෝජ්‍ය සෞඛ්‍ය සේවා අධ්‍යක්ෂ ජනරාල් ‘ආයතන ප්‍රධානීන්ගෙන්‘ විශේෂ ඉල්ලීමක් කරයි

    උණ රෝගයෙන් පෙළෙන සේවකයන් රාජකාරි සඳහා නොකැඳවන්නැයි නියෝජ්‍ය සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය හේමන්ත හේරත් මහතා අද (30) සියලු ආයතන ප්‍රධානීන්ගෙන් විශේෂ ඉල්ලීමක් කළේය.

    ‘‘උණ රෝගයෙන් පෙළෙන සේවකයින් රාජකාරීයට කැදවීම මගින් ආයතනවල කොරෝනා අවදානමක් මතුවිය හැකියි. ඒ වගේම තමයි මම විශේෂ ඉල්ලීමක් කරන්න කැමතියි වායුසමනය කරන ලද ස්ථානවල හෝ සම්පූර්ණයෙන්ම වැසුණු ස්ථානවල රාජකාරි කරන පිරිස් මුව ආවරණ නොමැතිව එකට කතාබස් කරමින් ආහාර ගැනීම හෝ තේ පානය කිරීම හෝ සාකච්ඡා පැවැත්වීම වැනි කටයුතුවලින් වැළකී සිටිය යුතුයි. කිහිපදෙනෙකු එකට එකතු වී ආහාර ගැනීම වැනි ක්‍රියාකාරකම් කොරෝනා පැතිරීමට බෙහෙවින් ඉවහල් වන බව අපි මේ වන විට පැහැදිලිව හදුනා ගෙන තිබෙනවා‘

  • පාන් ගෙඩියක් රු.10කින් ඉහළට ?

    පාන් ගෙඩියක් රු.10කින් ඉහළට ?

    තිරිඟු පිටි කිලෝවක මිල රුපියල් 18කින් වැඩි කිරීම හේතුවෙන් ලබන සතියේ සිට පාන් ගෙඩියක මිල රුපියල් 10කින් ඉහළ දැමීමට සිදුවන බව සමස්ත ලංකා බේකරි හිමියන්ගේ සංගමයේ සභාපති එන්.කේ ජයවර්ධන මහතා පවසයි.

    ලංකාවේ ප්‍රධාන තිරිඟු පිටි සැපයුම්කරු වන සෙරන්ඩිබ් ආයතනය පසුගිය සතියේ සිට පිටි කිලෝවක මිල රුපියල් 18කින් වැඩිකර ඇති ඇති බවත් එම නිසා මෙම තීන්දුව ගත් බවත් ජයවර්ධන මහතා සදහන් කළේය.

    ‘‘ඩීසල් වැඩි කිරීම නිසා මීට පෙර පාන් හැර සෙසු බේකරි නිෂ්පාදන මිල රුපියල් 5ත් 10ත් අතර මිලකින් ඉහළ දැමීමට සිදු වුණා. නමුත් ඒ අවස්ථාවේ පාන් මිල ඉහළ දැමීමක් සිදු වුණේ නැහැ. නමුත් තිරිඟු පිටි මිල රුපියල් 18කින් ඉහළ දැමීම නිසා අපට මේ තීන්දුව ගැනීමට සිදු වෙනවා‘ යැයි ද ඔහු සදහන් කළේය.

  • කොවිඩ් ඩෙල්ටා ප්ලස් බිහිසුණු වේවි ද?

    කොවිඩ් ඩෙල්ටා ප්ලස් බිහිසුණු වේවි ද?

    කොවිඩ් දෙවැනි රැල්ල ඉන්දියාවට අතිශය දරුණු විය. ආසාදිතයන් සහ මරණ වාර්තා වීම අඩුවෙමින් පවතින අතර රට නැවත විවෘත කිරීම ක්‍රමයෙන් ආරම්භ වෙමින් පවතී.

    නමුත් තව මාස කීපයකින් තුන්වැනි රැල්ලක් ඉන්දියාව පුරා ව්‍යාප්තවිය හැකි බවට විශේෂඥයෝ අනතුරු අඟවති.

    ඊට පවතින සූදානම පිළිබඳව, ප්‍රාන්ත ආණ්ඩුවලින් අධිකරණය විමසා ඇත. ඇතැම් විශේෂඥයන් පවසන්නේ සති 12ත් 16ත් අතර කාලයක් ඇතුළත තුන්වැනි රැල්ල ආරම්භ විය හැකි බවකි.

    කොරෝනා වෛරසයේ නව ප්‍රභේද ගැන බොහෝ දෙනාගේ අවධානය මතු වී තිබේ. දැන් බොහෝ දෙනාගේ කතා බහට ලක් වී ඇත්තේ ඩෙල්ටා ප්ලස් ප්‍රභේදයයි. දැනට භාවිත වෙමින් පවතින එන්නත් මගින් ඩෙල්ටා ප්ලස් ප්‍රභේදය පරාජය කළ නොහැකි විය හැකි බවට ඇතැම්හු සැක පළ කරති.

    ඩෙල්ටා ප්ලස් යනු මෑතකදී ඉන්දියාවෙන් පළමුවරට සොයා ගනු ලැබූ ඩෙල්ටා ප්‍රභේදය හා සම්බන්ධ අලුත්ම වෛරස් ප්‍රභේදයයි. ඉන්දියාවේ දෙවෙන රැල්ලට වගකිව යුත්තේ එම ඩෙල්ටා ප්‍රභේදයයි.

    කෙසේ නමුත් මෙකී තුන්වන රැල්ල පිළිබඳව පවතින බිය කෙතරම් යථාර්ථවාදී ද?

    කොවිඩ් රැල්ලකට පසුව තවත් රැල්ලක් හට ගැනීම අපේක්ෂා කළ හැකි දෙයකි. නමුත් එය කෙතරම් දරුණු වේද යන්න තීරණය කිරීම සඳහා සලකා බැලිය යුතු සාධක කීපයක් ම පවතී.

    කොවිඩ් ආරක්‍ෂිත ක්‍රමවේද

    ඉන්දියාවෙන් දිනකට වාර්තාවන ආසාදිතයන් ගණන දල වශයෙන් 50,000ක මට්ටමට පහළ බැස ඇත. පසුගිය මැයි මාසයේ දී ආසාදිතයන් 400,000ක් වැනි ඉහළ ප්‍රමාණයක් දිනකට වාර්තා විය. ආසාදිතයන්ගේ සංඛ්‍යාව මේ වන විට අඩු කර ගැනීමට ප්‍රධාන වශයෙන් හේතුවී ඇත්තේ ඉන්දියාව පුරා ක්‍රියාත්මක වූ දැඩි ලොක්ඩවුන් නීති රීති ය.

    මැතිවරණ රැළි, ආගමික උත්සව සහ වෙළෙඳපොළ කඩ සාප්පු ජනාකීර්ණ වීම නිසා දෙවන රැල්ල ඇති වූ බවට දෝෂාරෝපණ එල්ල විය.

    ඉන්දියාවේ කුම්භ මේලා ආගමික උත්සවය පැවැත්වුණේ පසුගිය අප්‍රේල් මාසයේදී ය. ඒ සඳහා හිමාලය පාමුල හරිද්වාර් නගරයට ජනකාය රැස්වුණේ කොවිඩ් දෙවන රැල්ල ඉන්දියාවට දරුණු ප්‍රතිඵල ගෙන දෙමින් සිටියදීම ය.

    EPA

    කුම්භ මේලාවේ ප්‍රධානතම දිනය අප්‍රේල් 12 වැනිදාට යෙදී තිබුණි. මිලියන 3කට අධික හින්දු භක්තිකයන් පිරිසක් එදින ගංගා නදියට බැස ස්නානයේ යෙදුනහ. ඉන්දියාවෙන් දිනකට වාර්තාවන නව ආසාදිතයන්ගේ ගණන බ්‍රසීලය පරයා ගියේය.

    පූජෝත්සවයේ විශාලත්වය හැකිතරම් අඩු කිරීමට පියවර ගත්තේ ඊට සහභාගී වූ ප්‍රධාන පෙළේ හින්දු පූජකවරයෙකු මරණයට පත්වී සතියකට පසුවය. මෙම ආගමික උත්සවය සංකේතාත්මක සැමරීමක් බවට සීමා කරන ලෙස අගමැති මෝදි ඉල්ලීමක් කළේය.

    නමුත් ඒ වන විට සිදුවිය යුතු හානිය සිදුවී හමාරය.

    කුම්භ මේලා පූජෝත්සවය සඳහා වන්දනාකරුවන් මිලියන 9.1ක් හරිද්වාර් නගරයට පැමිණි බව උත්සව සංවිධායකයෝ පැවසූහ. දරුණු වසංගතයකින් පෙළෙමින් සිටියදී මෙවැනි දෙයක් සංවිධානය කිරීම හේතුවෙන් තම ප්‍රාන්තය “අවමානයට පාත්‍ර වූ” බව උත්තරාඛාන්ද් මහ අධිකරණය පවසා තිබුණි.

    කුම්භ මේලා ආගමික උත්සවය සමඟ පවතින දරුණු අවදානම ආරම්භයේ පටන් ම බරපතල ලෙස සැලකිල්ලට භාජනය වී තිබුණි.

    මෙවැනි වැරදි ප්‍රතිපත්ති තීරණ, දුර්වල නිරීක්ෂණ සහ කල්තියා කරන ලද අනතුරු ඇඟවීම් නොතකා හැරීම පිළිබඳව චෝදනා පවතී. මෙම වැරදි නැවත සිදුවන්නේ නම් තුන්වන රැල්ල කඩිනම් වීම වලක්වාලිය නොහැකි බව විශේෂඥ මතයයි.

    ප්‍රජා ප්‍රතිපත්ති සහ සෞඛ්‍ය ක්‍රමවේද පිළිබඳ විශේෂඥ වෛද්‍ය චන්ද්‍රකාන්ත් ලහාරියා පවසන්නේ ඉන්දියාව මේවන විට ඉතා තීරණාත්මක තැනකට පැමිණ ඇති බවයි. තුන්වන රැල්ලේ ඉරණම ප්‍රධාන වශයෙන් ජනතාවගේ හැසිරීම මත තීරණය වනු ඇති බව ඔහු පැවසීය.

    රටේ ආර්ථිකය ක්‍රමානුකූලව විවෘත කිරීම ඉතා වැදගත් බව ඔහු පිළිගනී. නමුත්, “රට විවෘත කිරීම සඳහා අප ඉක්මන් වන්නේ නම් සහ ජනතාව කොවිඩ් ආරක්‍ෂිත ක්‍රමවේද අනුගමනය නොකරන්නේ නම් ඉන් සිදුවන්නේ වෛරසය නැවත වේගයෙන් ව්‍යාප්ත වීම සඳහා උදව්වීමක්” බව ඔහු අවධාරණය කරයි.

    “කොවිඩ් ආරක්‍ෂිත ක්‍රමවේද සහ නීති ප්‍රාදේශීය මට්ටමින් ක්‍රියාත්මක විය යුතුයි. යම්කිසි වෙළෙඳපොළක් හෝ ව්‍යාපාරයක් ඒ නීති කඩ කරන්නේ නම් දඬුවම් නියම කළ යුතුයි.”

    අලුත් ප්‍රභේද තර්ජනයක් වේවිද?

    දෙවන රැල්ල ඉන්දියාවට බිහිසුණු විය
    ,දෙවන රැල්ල ඉන්දියාවට බිහිසුණු විය

    ඉන්දියාවේ දෙවන රැල්ල දරුණු වීමට වැඩි වශයෙන් බලපෑවේ ඩෙල්ටා ප්‍රභේදයයි. මෙම වෛරසය තවදුරටත් ජනතාව අතර මහා පරිමාණයෙන් ව්‍යාප්තවීමට ඉඩහළහොත් එවැනි තවත් අලුත් ප්‍රභේද මතුවනු ඇති බව විශේෂඥ මතයයි.

    ‘ඩෙල්ටා ප්ලස්’ ලෙස නම් කර ඇති නව වෛරස් ප්‍රභේදය පිළිබඳව “දැඩි අවධානයක්” යොමු වී ඇති බව ඉන්දීය රජය නිවේදනය කළේය. නමුත් එමගින් තුන්වැනි රැල්ලක් හටගන්නා බවට සහතික කිරීම සඳහා තවමත් විද්‍යාත්මක සාධක නොමැත. ඒ කෙසේ වෙතත් වත්මන් තත්ත්වය “සති කීපයක් ඇතුළත වෙනස් විය හැකි” බව විශේෂඥයෝ පවසති.

    වසංගත රෝග පිළිබඳ විශේෂඥ වෛද්‍ය ලලිත් කාන්ත් පවසන්නේ වෛරසය ව්‍යාප්තවෙමින් පවතින තුරා අලුත් ප්‍රභේදවලින් ඇතිවන තර්ජනය දිගටම පවතින බවය.

    “භයානක වෛරස් ප්‍රභේද කල්තියා හඳුනාගැනීමටත් ඒවා මර්දනය කිරීම සඳහා අවශ්‍ය ක්‍රියාමාර්ග ගැනීමටත් පවතින ක්‍රමවේද තව තවත් වැඩිදියුණු කිරීමට අප පියවර ගත යුතුයි.”

    ජුනි මාසය දක්වා ඉන්දියාව වරින්වර ලබා ගෙන ඇති වෛරස් නියැදි (සාම්පල) ප්‍රමාණය 30,000ක් පමණ වේ. නමුත් විශේෂඥයන් පවසන්නේ මීට වඩා ප්‍රමාණයක් ලබා ගත යුතුව පවතින බවය.

    දැනට පවතින එන්නත්, මේ වනතෙක් හඳුනාගෙන ඇති වෛරස් ප්‍රභේද සඳහා පමණක් ඵලදායී වන බවක් පෙනෙන්නට ඇති බවත් අලුතින් බිහි වන ප්‍රභේද සඳහා එම එන්නත් වැඩ කරයි ද යන්න පිළිබඳව කිසිදු සහතිකයක් නොමැති බවත් වෛද්‍ය ඒ ෆතාවුදීන් පැවසීය. ඔහු කොවිඩ් රෝගීන් දහස් ගණනකට ප්‍රතිකාර කළ වෛද්‍යවරයෙකි.

    එන්නත සම්පුර්ණ කළ සෑම ඉන්දියානුවන් 10,000ක් දෙනා අතුරින් තුන් හතර දෙනෙකුට නැවත කොවිඩ් 19
    ,එන්නත සම්පුර්ණ කළ සෑම ඉන්දියානුවන් 10,000ක් දෙනා අතුරින් තුන් හතර දෙනෙකුට නැවත කොවිඩ් 19

    එමෙන්ම, එන්නත ලබා ගැනීමෙන් අනතුරුව ද කොවිඩ් වැළඳුණු අය එමටය. විශේෂයෙන්ම මෙවැනි අවස්ථා හමුවන්නේ එන්නතේ පළමු මාත්‍රාව පමණක් ලබා සිටි උදවිය අතරය.

    කෙසේ නමුත් දෙවන වතාවට කොවිඩ් 19 වැළඳුණු උදවියට එතරම් බරපතල රෝග ලක්ෂණ මතුවී නොමැති බවට සාධක පළවිය.

    දිල්ලි නුවර කොවිඩ් රෝගීන් සඳහා වෙන්වුණු විශාලතම රෝහල වන ලෝක් නායක් ජායි ප්‍රකාශ් නාරායන් රෝහලේ දැඩි සත්කාර ඒකකයේ සේවය කරන, එන්නත සම්පුර්ණ කරන ලද වෛද්‍යවරුන්ගෙන් 60%කට නැවත කොවිඩ් වැළඳී ඇති නමුත් ඔවුන්ගෙන් කිසිවෙකුට රෝහල්ගත වීමට අවශ්‍ය නොවූ බව විශේෂඥ වෛද්‍ය ෆාරා හුසේන් පැවසුවාය.

    “ඔවුන්ගේ පවුල්වල, කොවිඩ් 19 වැළඳුණු ඇතැම් සාමාජිකයන්ට රෝහල්ගත වන්නට සිදු වුණා.” වෛද්‍යවරිය ප්‍රකාශ කළාය.

    දිල්ලියේ තවත් රෝහලක සිදු කරන ලද අධ්‍යයනයකින් සනාථ වී ඇත්තේ, එහි සේවකයන් 113 දෙනෙකුගෙන් 15 දෙනෙකුට එන්නත සම්පුර්ණ කර දෙසතියකට පසුව කොවිඩ් 19 වැළඳී ඇති බවය. ඉන් 14 දෙනෙකුට සුළු රෝග ලක්ෂණ මතු වූ අතර එක් අයෙකුට පමණක් රෝහල්ගත වීමට සිදු වී තිබේ.

    නිල වාර්තා සඳහන් කරන්නේ කොවිඩ් එන්නත සම්පුර්ණ කළ සෑම ඉන්දියානුවන් 10,000ක් දෙනා අතුරින් තුන් හතර දෙනෙකුට නැවත කොවිඩ් 19 වැළඳී ඇති බවය.

    නමුත් මෙම දත්ත වාර්තා අසම්පුර්ණ බව පෙනෙන්නට තිබේ. මුල් මාස තුන ඇතුළත සිදු කෙරුණු වෛද්‍ය පරීක්ෂණවලදී, තමන් එන්නත සම්පුර්ණ කර තිබේදැයි යන ප්‍රශ්නය අසා නොමැත.

    වෛද්‍ය ෆතාවුදීන් ගේ මතය නම් ඉන්දියාවේ තුන්වැනි රැල්ලක් ඇතිවීම නොවැලක්විය හැකි බවය. නමුත්, “නව වෛරස් ප්‍රභේද ගැන ඇස ගසාගෙන සිටියහොත් සහ ආරක්‍ෂිත ක්‍රමවේද තදින් ක්‍රියාත්මක කළහොත් තුන්වැනි රැල්ල පමා කරගැනීමට හා දරුණු මට්ටමකට පත් වීම වලක්වා ගැනීමට හැකිවනු ඇති” බව ඔහු පවසයි.

    “අපි ඒ දේවල් කළේ නැත්නම්, තුන්වැනි රැල්ල අපට හිතා ගන්නවත් බැරි තරමේ වේගයකින් අප අතරට ඒවි.”

    ප්‍රතිශක්තිය ප්‍රමාණවත් ද?

    BBC

    තුන්වැනි රැල්ලේ ප්‍රතිඵලය තීරණය වන තවත් සාධකයක් වන්නේ ඉන්දියාවේ සමස්ත ජනගහනය සතුව පවතින කොවිඩ් ප්‍රතිශක්තිය කෙතරම් ද යන්නයි. මෙම ප්‍රතිශක්තිය එන්නත් මගින් සහ කොවිඩ් වැළඳීම මගින් ඇතිවේ.

    ජුනි මාසයේ 9 වැනිදා සිට 22 වැනිදා දක්වා ඉන්දියාවේ දිනකට එන්නත් මාත්‍රා මිලියන 3.25ක් බැගින් දල වශයෙන් ලබා දී තිබේ.

    නමුත් එන්නත ලැබිය යුතු සියලු දෙනාට මේ වසර නිමා වන විට එය ලබා දී නිමකිරීමට නම් දිනකට මාත්‍රා මිලියන 8.5කට වැඩි ප්‍රමාණයක් ලබා දිය යුතු වේ.

    මේ වන විට එන්නත් මාත්‍රා දෙකම ලැබී ඇත්තේ ඉන්දියාවේ සමස්ත ජනගහනයෙන් 4%කට පමණි. පළමු මාත්‍රාව 18%කට ලැබී තිබේ.

    එන්නත් වැඩසටහන වේගවත් නොකළහොත් ඉන්දියාවේ මිලියන ගණනක් ජනතාව අනතුරට පත්විය හැකිබව විශේෂඥ වෛද්‍ය ලහාරියා පැවසීය.

    ඉන්දියාව මේ වන විට එන්නත් වර්ග තුනක් භාවිත කර තිබේ. කොවිශීල්ඩ්, කොවැක්සින් සහ ස්පුට්නික් V එම එන්නත් වර්ග තුනයි.

    ලෝකයේ වැඩිම කොවිඩ් මරණ සංඛ්‍යාවක් වාර්තා වූ රටවල් අතරින් තුන්වැනි ස්ථානයේ සිටින්නේ ඉන්දියාවයි. එහි නිල සංඛ්‍යා ලේඛනය අනුව කොවිඩ් මරණ සංඛ්‍යාව 300,000කට අධික ය. ඊට ඉදිරියෙන් සිටින්නේ එක්සත් ජනපදය සහ බ්‍රසීලය පමණි.

    ස්වභාවිකව ප්‍රතිශක්තිය ගොඩ නැගී ඇති ප්‍රමාණය නිශ්චය කරගැනීම සඳහා ඉන්දියාවේ කෙතරම් ප්‍රමාණයකට කොවිඩ් රෝගය වැළඳී තිබේදැයි සොයා ගැනීම ඉතා අපහසුය.

    පිටිසර පලාත්වල ගම්මාන පමණක් නොව නාගරික ජනතාව අතර පවා බොහෝ දෙනෙකුට වෛද්‍ය පරීක්ෂණ ලබා ගැනීමට අවස්ථාවක් නොතිබුණු හෙයින් සත්‍ය වශයෙන් ම රෝගය මේ වන විට වැළඳී ඇති පිරිස ගැන නිසි වාර්තා නොමැත. කොවිඩ් මරණ පවා වාර්තා වූයේ අඩුවෙනි.

    Reuters
    ඒ නිසා තුන්වැනි රැල්ලක් ඇතිවීම වලක්වන්න බැහැ”

    වෛද්‍ය ලහාරියා ගේ විශ්වාසය නම් ජනගහනයෙන් 55%කට හෝ 60%කට මේ වන විට ස්වභාවික ප්‍රතිශක්තිය ලැබී ඇති බවය.

    අශෝක විශ්ව විද්‍යාලයේ මහාචාර්ය ගෞතම් මේනන් ගේ ඇස්තමේන්තුව අනුව මෙම ප්‍රතිශතය තවත් ඉහළය. ඔහු පවසන්නේ ජනගහනයෙන් 60-70% ක් පමණ මේ වන විට කොවිඩ් 19ට එරෙහි ප්‍රතිශක්තිය ලබා ඇති බව තමන් විශ්වාස කරන බවය. එබැවින් දෙවැනි රැල්ල වැනි අතිශය දරුණු මට්ටමක රැල්ලක් යළි ඇති නොවනු ඇති බව ඔහුගේ මතයයි.

    නමුත් ඉන් සතුටට පත් නොවිය යුතු බවට ඔහු අනතුරු අඟවයි.

    “ජනගහනයෙන් සැලකිය යුතු ප්‍රමාණයකට දැනටමත් ප්‍රතිශක්තිය ලැබී තිබුණත් එවැන්නක් නොලැබූ පිරිස අඩු තරමින් 20-30%ක් වත් සමාජයේ ඉන්නවා. මේ අය අතර වයෝවෘද්ධ උදවිය වගේම ප්‍රතිශක්තිය දුර්වල උදවියත් ඉන්නවා. ඒ නිසා ආසාදිතයන් වැඩි වීමක් ඇතිවූ වහාම එය ඉතා ඉක්මනින් හඳුනා ගැනීම සඳහා අප පරීක්ෂාකාරීව සිටිය යුතුයි.” ඔහු පැවසීය.

    රෝගයට ගොදුරු විය හැකි සැලකිය යුතු ප්‍රමාණයක් තවමත් ඉන්දියාව තුළ සිටීමත් කොරෝනාවෛරසයේ දරුණු ප්‍රභේද ඇතිවෙමින් පැවතීමත් නිසා මෙම තත්ත්වය සුළුකොට නොතැකිය යුතු බව විශේෂඥයෝ ඒකමතිකව පිළිගනිති.

    “ඒ නිසා තුන්වැනි රැල්ලක් ඇතිවීම වලක්වන්න බැහැ. එය පමා කිරීම සහ එහි බලපෑම සීමා කර ගැනීම තියෙන්නේ අපේ අතේමයි.” වෛද්‍ය ෆාතාහුදීන් පැවසීය.

    “අවුරුද්දක් තිස්සේ මේ රෝගයත් එක්ක යුද්ධයක් කරන සෞඛ්‍ය සේවකයන් ගැනත් පොඩ්ඩක් හිතන්න. අපිට හරිම මහන්සියි. කරුණාකරලා ඔබේ ආරක්‍ෂකයා පහතට දමා සලකන්න එපා. තුන්වැනි රැල්ලකට අපිව ඔරොත්තු දේවිද කියල මටනම් හිතා ගන්න බැහැ.” වෛද්‍යවරයා තවදුරටත් පැවසීය.

    මාධ්‍ය ආයතනයක් ලෙස මේ අවස්ථාවේ අපගේ මූලිකම අරමුණක් වන්නේ කොවිඩ් වසංගතය ගැන මෙරට ජනතාව, අප පාඨකයින් නිවැරදිව – සමබරව සහ නිරවුල්ව දැනුවත් කිරීමයි. ඒ සදහා වඩාත් විශ්වාසදායක ප්‍රවෘත්ති වෙත අප ප්‍ර වේශ වන අතර ප්‍රකාශන හිමිකමට ගරුකරමින්, මූලාශ්‍ර උපුටා දක්වමින් අදාළ උපුටා ගැනීම් කරමු. මෙම ලිපිය ද ජූනි 29 වැනි දින බී.බී.සී සන්දේශය වෙබ් අඩවියෙන් උපුටා ගත් ලිපියකි. ප්‍රධාන සංස්කාරක

  • තිස්සමහාරාම වැව හැරීම ගැන ‘සුපිරි’ හෙළිදරව්වක් !

    තිස්සමහාරාම වැව හැරීම ගැන ‘සුපිරි’ හෙළිදරව්වක් !

    වැවක් යනු ශ්‍රී ලංකාවේ තිරසර සංවර්ධනයට ඉතා ම හොඳ උදාහරණයකි. මිනිසා විසින් ගොඩනගන ලද වැව් ඉතා කෙටි කලකින් ස්වභාවීකරණයට ලක් වේ. ඒ මත ජෛව ප්‍රජාවක්, සංස්කෘතියක් හා කෘෂි ආර්ථිකයක් ගොඩනැංවේ. වැව නිර්මාණයේ දී සිදු වන පාරිසරික බලපෑමට සාපේක්ෂ ව අලුතින් පරිසර පද්ධති ගොඩනැංවී ඒ මත විශාල ජෛව ප්‍රජාවකට රැකවරණය හිමි වීමෙන් ඉදිකිරීම් කාලයේ දී ඇති වූ පාරිසරික බලපෑම් ඉතා කෙටි කලකින් හානිපූරණය වේ. මේ නිසා වැව යනු අවිවාදයෙන් ම තිරසර සංවර්ධනයට ඇති හොඳ ම උදාහරණය ලෙස පෙන්වා දිය හැකි ය.

    වසර දහස් ගණනක් ස්වභාවීකරණයට ලක් වූ සුවිශේෂී ජෛව ප්‍රජාවකට රැකවරණය සලසන, කෘෂි ආර්ථිකයක් ගොඩනංවන වැව් කිසිදු සැලැසුමකින් තොර ව ජල ගබඩාවක් ලෙස සැකසීමට ගැඹුරු කිරීම සඳහා හෑරීම ඉතා ම හානි කර ය. නමුත් වර්තමානයේ මේ තත්ත්වයට ගොදුරු ව ඇත්තේ තිස්ස වැව හෙවත් තිස්සමහාරාම වැව යි. යන්ත්‍ර සූත්‍ර භාවිතා කර වැවෙහි පස් හා රොන්මඩ කැනීම සහ වැලි නිස්සාරණය කිරීමට වාරිමාර්ග දෙපාර්තමේන්තුව හා වාරිමාර්ග අමාත්‍යංශය එක් ව නීති විරෝධී ව චීන සමාගමකට පවරා තිබේ. මෙම කැනීම් මගින් බලාපොරොත්තු වන්නේ වැවේ ජල ධාරිතාව වැඩි කර, විශාල ජල ප්‍රමාණයක් රදවා ගැනීමයි. නමුත් මෙම ව්‍යාපෘතියේ යටි අරමුණ වන්නේ හම්බන්තොට මහ නගර සංවර්ධනය යටතේ චීන සමාගම් ගණනාවක් විසින් ක්‍රියාත්මක කරන මාගම්පුර වරාය ඇතුළු ව්‍යාපෘතිවලට හා ඉදිරියේ දී ක්‍රියාත්මක කිරීමට නියමිත අක්කර 15,000 ක චීන කර්මාන්තපුරයට ජලය ලබා ගැනීමට ය.

    මේ ව්‍යාපෘතිය හේතුවෙන් තිස්සමහාරාම වැවෙන් වාරි ජලය සපයන කුඹුරු අක්කර 3115 ක පමණ වී ගොවිතැනේ නිරත විශාල ගොවි ජනතාවක් අවතැන් වීමට නියමිත ය. මීට අමතර ව වැවෙහි මිරිදිය ධීවර කර්මාන්තයේ නිරත ධීවර පවුල් 200 කට වැඩි ප්‍රමාණයක් දැඩි බලපෑමට ලක් වනු ඇත. නමුත් මේ පිළිබඳ ව කිසිදු අධ්‍යයනයකින් තොර ව මෙම ව්‍යාපෘතිය ක්‍රියාත්මක කරන්නේ චීන සමාගම්වල ජල අවශ්‍යතාවය සපුරාලීම සඳහා ඇති බාධකයන් වන ගොවීන් හා මිරිදිය ධීවරයන් මේ තුළින් පහසුවෙන් ඉවත් කිරීමට හැකි වීම නිසා ය.

    වැවක් යනු හුදු ජල ගබඩාවක් පමණක් නොවේ. වැව මගින් විශාල ප්‍රදේශයක භූගත ජල මට්ටම ඉහළ අගයක පවත්වාගෙන යාම සිදු කරයි. ඒ මගින් වැවේ ජලය ලබා ගෙන සිදු කරන කෘෂි කර්මාන්තයට අමතර ව වැවෙන් පවත්වාගෙන යන ඉහළ භූගත ජල මට්ටම මගින් කෘෂිකර්මාන්තයට හා ජෛව සුරක්ෂිතතාවයට ලබා දෙන දායකත්වය ඉහළ මට්ටමක පවතී.

    වීරවිල – තිස්සඅභයභූමියේජෛවපද්ධතියවැනසීම

    දීර්ඝ කාලයක් ස්වභාවීකරණය වූ වැවක මිරිදිය ජලජ ජීවීන්ගේ විවිධත්වය ඉහළ මට්ටමක පවතින අතර එම ජීවීන් බෝවන පරිසර පද්ධති බොහොමයක් නිර්මාණය වේ. එපමණක් නොව ඒ මත දේශීය හා සංක්‍රමණික ජලජ පක්ෂි විශේෂ හා උරග විශේෂ බොහොමයක් යැපෙති. වැව් ආශ්‍රිත ව පිහිටි විශාල වෘක්ෂ බොහෝ දේශීය ජලජ පක්ෂීන්ගේ බෝවීමේ ප්‍රදේශ වේ. තිස්සමහාරාම වැවේ ද මේ තත්ත්වය ඉතා හොඳින් දැක ගත හැකි වේ. මෙම වැව දේශීය නේවාසික පක්ෂි විශේෂවලින් ගහන සුවිශේෂී තෙත් බිමකි. මෙරට කුඩා ම නේවාසික ජලජ පක්ෂියා වන ගෙඹි සේරා (Little Grebe) ගේ සිට අළු පැස්තුඩුවා (Spot – billed Pelican), හංසකාවා (Indian Darter), දියකාවා (Indian Shag), පුංචි දියකාවා (Little Cormorant), කලපු කොකා (Grey Heron), කරවැල් කොකා (Purple Heron), ලතුවැකියා (Painted Stork), විවර තුඩුවා (Open bill Stork), බළල් සේරා (Pheasant – tailed Jacana) වැනි විශේෂ බොහොමයක් තිස්සමහාරාම වැව නිවහන කර ගෙන ජීවත් වේ. යන්ත්‍ර සූත්‍ර යොදා ගෙන සිදු කරන වැවේ පස් හා රොන්මඩ ඉවත් කිරීම හේතුවෙන් මත්ස්‍යයින්, මිරිදිය ඉස්සන්, මිරිදිය කකූළුවන් හා මිරිදිය බෙල්ලන් බෝවන ජලජ පරිසර පද්ධති සියල්ල මුළුමනින් ම විනාශ වී යන අතර ඒ මත යැපෙන ජලජ පක්ෂීන් ද කෙටි කලකින් විනාශයට ලක් වේ.

    මිරිදිය ජෛව පද්ධතියක් ලෙස තිස්සමහාරාම වැවේ සුවිශේෂත්වය හේතුවෙන් 1937 අංක 02 දරන වන සත්ත්ව හා වෘක්ෂලතා ආරක්ෂක ආඥාපනත නීති ගත වීමෙන් පසු ව පළමුවෙන් ම අභය භූමියක් ලෙස ප්‍රකාශයට පත් කළ ප්‍රදේශයක් ලෙස මෙම වැව ආශ්‍රිත ප්‍රදේශය සැලැකේ. තිස්සමහාරාම වැව ඇතුළු ව ඒ වටා පිහිටි වීරවිල වැව, පන්නෙගමුව වැව හා දෙඹර වැව අයත් වන අක්කර 10290 ක් වන සමස්ත ප්‍රදේශය වීරවිල – තිස්ස අභය භූමිය ලෙස වන සත්ත්ව හා වෘක්ෂලතා ආරක්ෂක ආඥාපනතේ 2(2) වගන්තියට අනුව 1938 මැයි මස 27 වන දින අංක 8370 දරන ගැසට් නිවේදනය මගින් ප්‍රකාශයට පත් කර තිබේ. ඒ අනුව තිස්සමහාරාම වැව ඇතුළු භූමි ප්‍රදේශය වනජීවී සංරක්ෂණ දෙපාර්තමේන්තුව යටතේ පාලනය වේ.

    ආර්. එල්. බ්‍රෝහියර් ගේ වාර්තාවලට අනුව ක්‍රිස්තු පූර්ව 307 දී රුහුණු රාජධානියේ රජ කළ මහානාග රජු විසින් කිරිදි ඔය නිම්නයේ වාරි පද්ධතිය සකස් කර ඇති අතර ඔහු විසින් තිස්ස වැව කරවන ලද බවට සඳහන් වේ. ඉන් පසු ව 1871 වසරේ දී මෙම වැව ප්‍රතිසංස්කරණය කර කුඹුරු අක්කර 3115 කට යල හා මහ දෙකන්නයේ වාරි ජලය සැපයීම සුරක්ෂිත කොට තිබේ. නමුත් වත්මන් පාලකයින් මහානාග රජු විසින් රටවැසියන් වෙනුවෙන් ගොඩනැංවූ හා අප රට යටත් කර ගෙන සිටි ඉංග්‍රිසීන් විසින් රටේ සහල් නිෂ්පාදනය ශක්තිමත් කිරීම සඳහා ප්‍රතිසංස්කරණය කර මෙරට ගොවි ජනතාව වෙනුවෙන් සුරක්ෂිත කළ තිස්ස වැව චීන සමාගම්වල අවශ්‍යතා වෙනුවෙන් ජනතාවගෙන් අහිමි කිරීම රටේ උත්තරීතර නීතිය වන ආණ්ඩුක්‍රම ව්‍යවස්ථාව උල්ලංඝනය කිරීමකි. 

    තිස්සමහාරාම වැව මෙරට වැව් අතර මධ්‍යම ප්‍රමාණයේ වැවකි. කිලෝමීටර 1.2 ක් දිග වැව් බැම්මක් සහිත මෙහි මතුපිට උපරිම ජල පැතිරුම් භූමි ප්‍රමාණය අක්කර 704 ක් (හෙක්ටයාර 285 ක්) පමණ වේ. වැවේ උපරිම ගැඹුර මීටර 4.7 ක් පමණ වන අතර උපරිම ජල ධාරිතාවය ඝන මීටර මිලියන 3.9 ක් පමණ වේ. කිරිදි ඔය නිම්නයේ පිහිටි තිස්සමහාරාම වැවට කිරිදි ඔය වාරි ව්‍යාපාරය යටතේ වම් ඉවුරු ප්‍රධාන ඇළ මාර්ගයෙන් ජලය සැපයේ. මීට අමතර ව බිංකෙමහෙළ හා බෙරලියහෙළ කඳුවැටි මෙම වැවෙහි ජල පෝෂක ප්‍රදේශ වේ.

    අමාත්‍යමණ්ඩලඅනුමැතියලබානොගැනීම

    වනජීවී සංරක්ෂණ දෙපාර්තමේන්තුව හා වාරිමාර්ග දෙපාර්තමේන්තුව යටතේ පාලනය වන තිස්සමහාරාම වැවෙහි පස් හා රොන්මඩ කැනීම් කටයුතු සඳහා කිසිදු අනුමැතියක් හෝ අධ්‍යයනයක් හෝ සිදු කර නොමැත. මෙවන් ව්‍යාපෘතියක් ක්‍රියාත්මක කිරීමට ප්‍රථමයෙන් මූලික ශක්‍යතා අධ්‍යයනයක් සිදු කළ යුතු ය. ඒ මත පදනම් ව සියලු ක්‍රියාමාර්ගවලට පිවිසිය යුතු ය. නමුත් මේ ව්‍යාපෘතිය සඳහා කැබිනට් අනුමැතිය ද ලබා ගෙන නොමැත. එසේ නමුත් 2021 මැයි මස 10 වන දින කැබිනට් මණ්ඩලය විසින් මහවැලි ජලාශවල රොන්මඩ ඉවත් කිරීම සඳහා මූලික ශක්‍යතා අධ්‍යයනයක් සිදු කිරීමට හා ඒ මත පදනම් ව රෙන්මඩ ඉවත් කිරීම සඳහා සුදුසු දේශීය හෝ අන්තර්ජාතික ආයතනයක් වෙත පැවරීමට වාරිමාර්ග අමාත්‍යවරයා විසින් ඉදිරිපත් කළ යෝජනාව සඳහා අනුමැතිය ලබා දී තිබේ. එහෙත් තිස්සමහාරාම වැවේ පස් හා රොන්මඩ ඉවත් කිරීමට සහ එමගින් වැලි නිස්සාරණය කිරීමට මෙන්ම එම වැලි අලෙවි කිරීමට චීන සමාගම වෙත පැවරීමට මූලික ශක්‍යතා අධ්‍යයනයක් හෝ කැබිනට් අනුමැතියක් හෝ ලබා ගෙන නොමැති වීමෙන් පෙනී යන්නේ චීන සමාගම්වල සියලු ඉල්ලීම් වෙනුවෙන් වත්මන් ආණ්ඩුව නීති රීති හා අණ පනත් ඇතුළු සියල්ල මෙන් ම ජනතාවගේ මූලික අයිතිවාසිකම් පවා උල්ලංඝනය කරමින් කටයුතු කරන බව ය. චීන සමාගම් සමග සිදු කරන බොහෝ ව්‍යාපෘති මේ ආකාරයෙන් නීති විරෝධී ව, නිවැරදි සැලැසුමකට අනුව සිදු නොවීම විශාල ගැටළුවකි.

    ආණ්ඩුක්‍රමව්‍යවස්ථාවඋල්ලංඝනයකිරීම

    තිස්සමහාරාම වැවේ පස් හා රොන්මඩ කැනීම හා වැලි නිස්සාරණය කිරීම සිදු කරන්නේ වන සත්ත්ව හා වෘක්ෂලතා ආරක්ෂක ආඥාපනත, ජාතික පාරිසරික පනත හා පුරාවස්තු ආඥාපනත උල්ලංඝනය කරමිනි. ශ්‍රී ලංකා ප්‍රජාතාන්ත්‍රික සමාජවාදී ජනරජයේ ආණ්ඩුක්‍රම ව්‍යවස්ථාවේ තුන් වන පරිච්ඡේදයේ මූලික අයිතිවාසිකම් කොටසේ 12(1) ව්‍යවස්ථාවට අනුව නීතිය පසිදලීම හා ක්‍රියාත්මක කිරීම ද නීතියේ රැකවරණය ද සර්ව සාධාරණ විය යුත්තේ ය යනුවෙන් සඳහන් වේ. එපමණක් නොව ආණ්ඩුක්‍රම ව්‍යවස්ථාවේ මූලික අයිතිවාසිකම් කොටසේ ම 14(1)(උ) ව්‍යවස්ථාවට අනුව නීත්‍යානුකූල රැකියාවක, වෘත්තියක නිරත වීමේ අයිතිය පිළිබඳ ව සඳහන් කර ඇත. නමුත් මෙම ව්‍යාපෘතිය හේතුවෙන් කෘෂි කර්මාන්තයේ හා මිරිදිය ධීවර කර්මාන්තයේ නිරත වීමේ අයිතිය සම්පූර්ණයෙන් ම උල්ලංඝනය කර ඇත. ආණ්ඩුක්‍රම ව්‍යවස්ථාවේ හය වන පරිච්ඡේදය යටතේ දැක්වෙන රාජ්‍ය ප්‍රතිපත්ති මෙහෙයවීමේ මූලධර්ම සහ මූලික යුතුකම් කොටසේ 27(14) ව්‍යවස්ථාවට අනුව ජනතාවගේ යහපත තකා රජය විසින් පරිසරය ආරක්ෂා කොට, සුරක්ෂිත කොට වැඩිදියුණු කළ යුත්තේ ය යනුවෙන් සඳහන් වේ. නමුත් වීරවිල – තිස්ස අභය භූමිය හා එහි ජෛව ප්‍රජාව වනසමින් මෙම ව්‍යාපෘතිය ක්‍රියාත්මක කිරීමට රජය විසින් නීති විරෝධීව සියලු ක්‍රියාමාර්ග ගෙන ඇත.

    වාරිමාර්ග දෙපාර්තමේන්තුව හා වාරිමාර්ග අමාත්‍යංශය විසින් ආණ්ඩුක්‍රම ව්‍යවස්ථාවේ සඳහන් ජනතාවගේ මූලික අයිතිවාස්කම් හා රාජ්‍ය ප්‍රතිපත්ති මෙහෙයවීමේ මූලධර්ම පවා උල්ලංඝනය කරමින් මෙම ව්‍යාපෘතිය ක්‍රියාත්මක කිරීමෙන් පෙනී යන්නේ චීන සමාගම් වෙනුවෙන් වත්මන් ආණ්ඩුවේ ක්‍රියාත්මක වීමේ ස්වභාව යයි.

    වනජීවීආඥාපනතඋල්ලංඝනයකිරීම

    2009 අංක 22 දරන පනතින් අවසන් වරට සංශෝධිත 1937 අංක 02 දරන වන සත්ත්ව හා වෘක්ෂලතා ආරක්ෂක ආඥා පනතේ 2(2) උප වගන්තියට අනුව ප්‍රකාශිත වීරවිල – තිස්ස අභය භූමියේ වනජීවීන්ගේ පැවැත්මට හෝ පරිසර පද්ධතියේ පැවැත්මට බලපෑම් වන කැනීම් කටයුතු, වනජීවී වාසස්ථාන විනාශ කිරීම ඇතුළු ඔනෑ ම ක්‍රියාවක නිරත වීම 7(1)(ආ) උප වගන්තියට අනුව නීති විරෝධී වේ. එවන් නීති විරෝධී ක්‍රියාවක නිරත වන පුද්ගලයකු මහේස්ත්‍රාත් අධිකරණයක් ඉදිරියේ වරදකරුවකු කරණු ලැබූ විට පනතේ 10(ඈ) උප වගන්තියට අනුව රුපියල් පහළොස්දහසත් පනස් දහසත් අතර දඩයකට හෝ වසර 2 ත් 5 ත් අතර බන්ධනාගාර ගත කිරීමකට හෝ මේ දඩුවම් දෙකට ම යටත් කළ හැකි ය. ආඥාපනතේ 67ආ1 උප වගන්තියට අනුව අභය භුමියක ඕනෑ ම නීති විරෝධී ක්‍රියාවක නිරත වන පුද්ගලයකු වරෙන්තුවක් නොමැතිව අත් අඩංගුවට ගත හැකි සංඥේය වරදක් සිදු කරන අතර එම වැරදි සඳහා ඇප දිය නොහැකි වේ. මෙවන් නීතිමය තත්ත්වයක් යටතේ පාලනය වන අභය භූමික පිහිටි තිස්සමහාරාම වැවේ පස් හා රොන්මඩ ඉවත් කර වැලි නිස්සාරණය කර විකිණීම සඳහා චීන සමාගමකට අවස්ථාව ලබා දීමට වාරිමාර්ග දෙපාර්තමේන්තුවට හෝ වාරිමාර්ග අමාත්‍යංශයට කිසිදු නෛතික හැකියාවක් නොමැත. මෙය මෙම ආයතන මගින් සිදු කළ නීතිය අතික්‍රමණය කිරීමකි.

    ජාතිකපාරිසරිකපනතඋල්ලංඝනයකිරීම

    චීන සමාගම්වල ජල අවශ්‍යතාවය සැපයීමට සහ 2011-2030 හා 2018-2050 ජාතික භෞතික සැලැසුම්වලට අනුව ඉදිකෙරෙන හම්බන්තොට මහ නගරය සඳහා ජලය සැපයීමට ගොවි ජනතාව, මිරිදිය ධීවරයින් හා විශාල මිරිදිය ජෛව ප්‍රජාවක් අවතැන් කර තිස්සමහාරාම වැවේ පස් හා රොන්මඩ කැනීමට කිසිදු ආයතනයකට හැකියාවක් නොමැත. වාරිමාර්ග දෙපාර්තමේන්තුව එවන් ව්‍යාපෘතියක් ක්‍රියාත්මක කිරීම හෝ ඒ සඳහා වෙනත් සමාගමකට පැවරීම සිදු කළ හැකි වන්නේ ජාතික පාරිසරික පනතට අනුව ය. මෙම පනත උල්ලංඝනය කරමින් මෙරට නීතියේ ආධිපත්‍යය අහිමි කිරීමට කටයුතු කිරීමේ කිසිදු හැකියාවක් වාරිමාර්ග දෙපාර්තමේන්තුවට හෝ වාරිමාර්ග අමාත්‍යංශයට නොමැත.

    1980 අංක 47 දරන ජාතික පාරිසරික පනතේ 23බ වගන්තියට අනුව ප්‍රකාශිත 1995 පෙබරවාරි 23 වන දින අංක 859/14 දරන ගැසට් නිවේදනයට අනුව අභය භූමියක් තුළ හෝ අභය භූමියක මායිමේ සිට මීටර 100 ක් ඇතුළත සංවර්ධන ව්‍යාපෘතියක් සිදු කිරීමට ප්‍රථමයෙන් හා 1947 අංක 8 දරන රජයේ ඉඩම් ආඥාපනතේ අර්ථ නිරූපිත හෝ එම පනතේ 71 වන වගන්තියට යටතේ ප්‍රකාශිත පොදු වැවක ඉහළ පිටාර මට්ටමේ සිට මීටර 100 ක් ඇතුළත හෝ එම වැව තුළ යම් සංවර්ධන ක්‍රියාවලියක් සිදු කිරීමට ප්‍රථම පරිසර බලපෑම් තක්සේරු ක්‍රියාවලියට යටත් ව පූර්ව ලිඛිත අනුමැතිය ලබා ගත යුතු ය.

    ජාතික පාරිසරික පනතේ 33(ආ) වගන්තිය යටතේ දැක්වෙන අර්ථ නිරූපනවලට අනුව පරිසර බලපෑම් තක්සේරු ක්‍රියාවලියකින් බලාපොරොත්තු වන්නේ යෝජිත ව්‍යාපෘතියෙන් වැළැක්විය හැකි හා වැළැක්විය නොහැකි හානි කර පාරිසරික බලපෑම් හඳුනා ගැනීම සහ හානි අවම කිරීමේ විකල්ප හඳුනා ගැනීමයි. නමුත් තිස්සමහාරාම වැවේ යාන්ත්‍රික පස් හා රොන්මඩ කැනීමේ ව්‍යාපෘතිය ආරම්භ කිරීමට ප්‍රථමයෙන් නිවැරදි පරිසර බලපෑම් තක්සේරු වාර්තාවක් සකස් කර නොමැති බැවින් එම ව්‍යාපෘතියෙන් සිදු වන හානි කර බලපෑම් හඳුනා ගැනීමට හෝ එම හානි කර බලපෑම් අවම කිරීමේ විකල්ප හඳුනා ගැනීමට හෝ ඉවත් කරන රොන්මඩ බැහැර කිරීමේ ක්‍රමවේදය හඳුනා ගැනීමට හෝ නොහැකි වී ඇත. මේ නිසා ව්‍යාපෘතිය චීන සමාගමට අවශ්‍ය පරිදි ක්‍රියාත්මක කිරීමෙන් විශාල හානි කර තත්ත්වයන් ප්‍රමාණයකට මුහුණ දීමට සිදු වනු ඇත.

    2000 අංක 53 දරන පනතින් අවසන් වරට සංශෝධිත ජාතික පාරිසරික පනතේ 32(2) උප වගන්තියට අනුව ප්‍රකාශිත 2006 ජූලි 17 වන දින අංක 1454/4 දරන 2006 අංක 01 දරන වැලි සහ මැණික් සඳහා ගවේෂණය කිරීම, පතල් හෑරීම හා උකහා ගැනීම පිණිස උපකරණ භාවිතය තහනම් කිරීමේ ජාතික පාරිසරික නියෝගවලට අනුව වැවක් තුළ හෝ වැවක උපරිම ජල මට්ටම් සීමාවේ සිට මීටර 100 ක් ඇතුළත වැලි ලබා ගැනීමට යන්ත්‍ර සූත්‍ර භාවිතා කිරීම තහනම් වේ. තිස්සමහාරාම වැවේ පස් හා රොන්මඩ කැනීම මගින් වැලි නිස්සාරණය කිරීම සිදු කරන බැවින් මෙම නීතිමය ප්‍රතිපාදනයන් උල්ලංඝනය කරමින් චීන සමාගම මෙම ව්‍යාපෘතිය ක්‍රියාත්මක කරයි.

    ජාතික පාරිසරික පනතේ 23අඅ උප වගන්තියට අනුව නිවැරදි පරිසර බලපෑම් තක්සේරු ක්‍රියාවලියට යටත් ව අනුමැතිය ලබා ගැනීමකින් තොර ව නීති විරෝධීව ව්‍යාපෘතියක් ක්‍රියාත්මක කරන අවස්ථාවක දී හෝ ජාතික පාරිසරික නියෝග උල්ලංඝනය කරමින් කටයුතු කරන පුද්ගලයකු පනතේ 31 වගන්තියට අනුව මහේස්ත්‍රාත් අධිකරණයක් ඉදිරියේ වරදකරුවකු කරනු ලැබූ විට රුපියල් 15,000 ක් නොයික්මවන දඩයකට හෝ වසර 2 ක් දක්වා බන්දනාගාර ගත කිරීමකට හෝ මෙම දඩුවම් දෙකට ම යටත් කළ හැකි ය.

    ඒ අනුව මෙම හානි කර හා නීති විරෝධී ව්‍යාපෘතියට එරෙහි ව කටයුතු කිරීමේ බලය ජාතික පාරිසරික පනත ක්‍රියාත්මක කරන මධ්‍යම පරිසර අධිකාරියට ඇත. නමුත් මධ්‍යම පරිසර අධිකාරිය බොහෝ පාරිසරික විනාශයන් හමුවේ මුණිවත රැකීම හෝ සාධාරණීකරනය කිරීමට කරුණු ඉදිරිපත් කිරීම සිදු කරන ආකාරයට ම මෙම අවස්ථාවේ දී ද කටයුතු කිරීමෙන් සිදු වන්නේ දැවැන්ත විනාශයක් මෙන් ම වැරදි පූර්වාදර්ශ ලබා දීමකි. ඒ හේතුවෙන් ඉදිරියේ දී මෙරට වැව් පද්ධතිය හා ගොවි ජනතාව දරුණු ඛේදවාචකයකට මුහුණ දීම සිදු වනු ඇත.

    පුරාවස්තුආඥාපනතඋල්ලංඝනයකිරීම

    මෙරට ඉපැරණි වැව් අතුරෙන් එකක් වන තිස්සමහාරාම වැව පුරා විද්‍යාත්මක ව ද විශාල වටිනාකමක් සහිත ය. මෙරට වැව් තාක්ෂණයේ විකාශනය පිළිබඳ ව අධ්‍යයනය කිරීමේ දී ප්‍රධාන වැදගත්කමක් උසුලයි. එහි සෑම අංගයක් ම ආරක්ෂා කිරීම අවශ්‍ය වන්නේ මේ නිසා ය.

    2008 ඔක්තොම්බර් 20 වන දින අංක 1572/4 දරන ගැසට් නිවේදනය මගින් ප්‍රකාශිත 2006 ජාතික පුරා විද්‍යා ප්‍රතිපත්තියට අනුව ශ්‍රී ලංකාවේ උරුමය ශ්‍රී ලාංකීය ජනතාවගේ අනුල්ලංඝනීය අයිතිවාසිකමක් වන අතර එය ආරක්ෂා කිරීම හා කළමනාකරණය කිරීම රටේ මානව සංවර්ධනයේ ප්‍රධාන අංගයක් ලෙස සැලැකේ. එපමණක් නොව ප්‍රතිලෝමනය හා ප්‍රතිස්ථාපනය නොකළ හැකි සම්පතක් ලෙස ද සැලැකේ. එවන් තත්ත්වයක් තුළ ලංකාවේ ඉපැරණි වැව් අතුරෙන් එකක් වන තිස්සමහාරාම වැව මේ ආකාරයෙන් යාන්ත්‍රික කැනීම්වලට ලක් නොකළ යුතු ය.

    සංශෝධිත 1940 අංක 9 දරන පුරාවස්තු ආඥාපනතේ 43අ සහ 47 වගන්ති යටතේ ප්‍රකාශිත 2000 ඔක්තොම්බර් 4 වන දින අංක 1152/14 දරන ගැසට් නිවේදනය මගින් ප්‍රකාශිත 2001 අංක 1 දරන ව්‍යාපෘති කාර්යය පටිපාටි නියෝගවලට අනුව වැව් ප්‍රතිසංස්කරණය කිරීමට ප්‍රථමයෙන් පුරාවිද්‍යා හානි ඇගයීමක් සිදු කර ඒ සඳහා පූර්ව ලිඛිත අනුමැතිය ලබා ගත යුතු ය. නමුත් මෙම නීතිමය ප්‍රතිපාදනය උල්ලංඝනය කරමින් වාරිමාර්ග දෙපාර්තමේන්තුව හා වාරිමාර්ග අමාත්‍යංශය චීන සමාගම් වෙත තිස්සමහාරාම වැව යාන්ත්‍රික කැනීම් කටයුතු සඳහා ලබා දී ඇත.

    නීතිවිරෝධීහාහානිකරක්‍රියාඅඛණ්ඩවසිදුකිරීම

    වත්මන් ආණ්ඩුව බලයට පත් වී ගෙවී ගිය කාලය තුළ මේ ආකාරයෙන් අණ පනත් උල්ලංඝනය කිරීම සඳහා රාජ්‍ය අනුග්‍රහය ලබා දුන් අවස්ථා බොහොමයකි. මෙම අණ පනත් මගින් සිදු කරන්නේ රට තුළ තිරසර ස්වාභාවික සම්පත් භාවිතාවක් ඇති කිරීම හා තිරසර සංවර්ධනයක් අත්පත් කර ගැනීමට අවශ්‍ය නෛතික යාන්ත්‍රණය ශක්තිමත් කිරීම ය. නමුත් මෙම අණ පනත් උල්ලංඝනය කිරීමෙන් සිදු වන්නේ වත්මන් පරපුරට පමණක් නොව අනාගත පරපුරට ද ජීවත් වීමට ඇති අයිතිය අහිමි කිරීමකි.

    වත්මන් ආණ්ඩුව බලයට පත් වී මාස කිහිපයක් තුළ පතල් හා ඛණිජ ද්‍රව්‍ය පනත උල්ලංඝනය කරමින් වැලි, මැටි හා පස් ප්‍රවාහන බලපත්‍ර අහෝසි කිරීම සඳහා කැබිනට් අනුමැතිය ලබා ගන්නා ලදී. ඉන් පසුව රජයේ වනාන්තර ඉඩම්වලට ආරක්ෂාව ලබා දී තිබූ 5/2001 චක්‍රලේඛය අහෝසි කරන ලදී. ඉන් අනතුරු ව රක්ෂිත ප්‍රදේශ අනවසරින් බුක්තිවිදින පුද්ගලයන්ට ඉඩම් බුක්තිය ලබා දීමට ඉඩම් කොමසාරිස් ජෙනරාල් දෙපාර්තමේන්තුවෙන් චක්‍රලේඛයක් හා ගැසට් නිවේදනයක් ප්‍රකාශයට පත් කෙරින. ඒ සඳහා බලපෑම් කළ පසු එම ගැසට් නිවේදනය ඉවත් කර ගැනීම සිදු කෙරින. මීට අමතර ව පරිසර බලපෑම් තක්සේරු ක්‍රියාවලිය උල්ලංඝනය කරමින් සිංහරාජ රක්ෂිතය තුළින් ලංකාගම දක්වා මාර්ගයක් සංවර්ධනය කළ අතර එය නිසි ක්‍රමවේදයට ක්‍රියාත්මක නොකිරීම නිසා වර්ෂාවත් සමග කෙටි කලකින් විනාශයට ලක් වීම නිසා නැවත සකස් කිරීමට සිදු විය. සිංහරාජ අඩවියේ මාණික්කවත්ත ප්‍රධාන අලි මංකඩේ හෝටල් ඉදි කිරීමට අවස්ථාව ලබා දීම පමණක් නොව රඹකැන්ඔය වනාන්තර හා තෘණ භූමි පද්ධතිය මෙන් ම කන්දකාඩුව වනාන්තර හා විල්ලු පද්ධතියේ අක්කර දහස් ගණනක් නීති විරෝධී ව සමාගම්වලට ලබා දීම සිදු කෙරින. එපමණක් නොව ආනවිලුන්දාව අභය භූමිය, දහයියාගල අභය භූමිය, ජලගැළුම්නිම්න ජාතික වනෝද්‍යානය ඇතුළු රක්ෂිත ප්‍රදේශ විශාල ගණනක් එළිපෙහෙලි කරමින් විවිධ භාවිතාවන්ට ලබා ගැනීමට අවස්ථාව ලබා දෙන ලදී. මේ හේතුවෙන් සිදු වූ හානිය නැවත කිසිදු දිනක හානිපූරණය කළ නොහැකි ය.

    මේ නිසා තිස්සමහාරාම වැවේ නීති විරෝධී කැනීම් වලට එරෙහි විය යුතු වන්නේ වනජීවී රක්ෂිත හා වනජීවී වාසස්ථාන විනාශ කරමින් කුඹුරු අක්කර දහස් ගණනකට වාරි ජලය සපයමින් ගොවි ජනතාව විශාල ප්‍රමාණයක් ජීවත් කරවන, ධීවර පවුල් විශාල ප්‍රමාණයක් යැපෙන සුවිශේෂී වැවක් විනාශ කරමින් වැරදි පූර්වාදර්ශ ලබා දීමට ය. එසේ නොමැති ව චීන සමාගමක් කැනීම් කිරීම හෝ හමුදා ඇඳුමට සමාන ඇඳුමින් සැරසී කැනීම් කටයුතු සිදු කිරීමට නොවිය යුතු ය. මෙවැනි පුවත් මැවීමෙන් අවසානයේ සිදු වන්නේ දැවැන්ත විනාශයක් ඇති කරන හානි කර ව්‍යාපෘතියක සැබෑ ස්වරූපය ජනතාවට අවබෝධ කිරීමට ඇති අවස්ථාව අහුරා දැමීමකි. මෙය නිවැරදි ව අවබෝධ කර ගත යුතු ය. එසේ නොමැති වුවහොත් හමුදා ඇඳුමට සමාන ඇඳුමට විසදුම් ලැබුණු විට මෙම නීති විරෝධී හා හානි කර ව්‍යාපෘතිය වෙනත් බොහෝ මෙවන් අවස්ථාවල දී සිදු වූ ආකාරයෙන් ම නීත්‍යානුකූල ව්‍යාපෘතියක් යැයි සමාජය තීන්දු කරනු ඇත. එවන් තත්ත්වයක් ඇති නොවීමට මෙම නීති විරෝධී ව්‍යාපෘතියට එරෙහිව සෑම පුරවැසියෙක් ම කටයුතු කළ යුතු ය.

    සජීව චාමිකර – ඉඩම් හා කෘෂිකර්ම ප්‍රතිසංස්කරණ ව්‍යාපාරය