චීන යුවාන් වලින් ණය ගෙවන්නත්, භාණ්ඩ ආනයනයත් බෑ

චීනය විසින් ලබා දි ඇති ඩොලර් බිලියන 1.5 කට සමාන ‘අතමාරුව‘  (SAWP පහසුකම) හුදු ඉලක්කම් විජ්ජාවක් මිස ණය ගෙවීමට හෝ භාණ්ඩ ආනයනයට හෝ පහසුකම් සැලසීමක් නොවන බව හිටපු ආණ්ඩුකාර රජිත් කීර්ති තෙන්නකෝන් නිවේදනයක් නිකුත් කරමින් පවසයි. 

‘‘ඩොලර් අර්බුදය කළමනාකරණය කළ බවට සිරස්තල සැපයීමට රජය‘ වචන විසිකරමින් සිටිනවා.  ඒවා හිස් වචන මිස, යථාර්ථයක් නොවන බව ජනවාරි මාසයේ දී වැටහේවි‘‘ යැයි ද නිවේදනයේ දක්වේ.

චිනය විසින් ලබා දී ඇති මෙම අතමාරුව ඩොලර් වලට හුවමාරු කළ නොහැකි අතර නැවත චීන රජයේ බැඳුම්කරවල ආයෝජනය කළ යුතු බවට කොන්දේසයක් සහිත ඉලක්කම් විජ්ජාවකි (book entry). චීනය විසින් ලංකාවට යුවාන් අතමාරුවක් ලබා දීමේ කොන්දේසිය එම මුදල නැවත චීනයේ භාණ්ඩාගාර බිල්පත් හි ආයෝජනය කළ යුතුය.  චීනයෙන් හැර වෙනත් කිසිදු ගණුදෙනුවක් සඳහා එම පහසුකම භාවිත කළ නොහැකිය.  ශ්‍රී ලංකා රජය එම මුදල ඩොලර්වලට හරවා ගැනීමටත්, ණය ගෙවීම හා ආයෝජන සඳහා මුදල් භාවිත කිරීමට ත් ඉල්ලා ඇති නමුත්, එයට මේ දක්වාම ලැබී නැත.

2022 ජනවාරි මාසයේ දී ශ්‍රී ලංකාව ඩොලර් මිලියන 1380 ක් ණය හා පොලිය වශයෙන් ගෙවිය යුතුය.  ජනවාරි 18 ජාත්‍යන්තර සෛවරී බැඳුම්කර ලෙස ඩොලර් මිලියන 500 ක් ද, ඉතිරිය ආසියානු සංවර්ධන බැංකුව, ලෝක බැංකුව ඇතුළු ආයතන සඳහා ගෙවිය යුතු ණය හා පොළිය වේ.  මේ වන විට රත්‍රං නොවන සංචිත ඉතිරිව ඇත්තේ ඩොලර් මිලියන 1000 කි.  මේ වන විට රටේ සියලුම අත්‍යශ්‍ය නොවන ආනයන කටයුතු අත්හිටුවා ඇත.

රජය මේ වන විට ඉන්දියාවෙන් ඩොලර් මි. 400 ක අතමාරුවක් ලබා ගැනීමට උත්සහ දරයි.  ත්‍රිකුණාමලය තෙල් ටැංකි පිළිබඳ ගිවිසුම අත්සන් කිරීමෙන් පසුව එම මුදල් ලැබීමට නියමිතය.  අද පවත්නා පැවරීම් සිදු කළ හැකි සංචිත ප්‍රමාණය අනුව ඉන්දීය මුදල් අතමාරුව හෝ චීනයේ අතමාරුව ඩොලර් වලට හැරවීම සිදු නොවන්නේ නම් ණය ගෙවීම අතපසුකළ, බංකොලොත් රාජ්‍යයක් බවට ශ්‍රී ලංකාව පත්වේ.  ශ්‍රීසියට බංකොලොත් භාවයෙන් මුදලවා ගැනීමට ජර්මනියේ මුදල් සමඟ සහන සැලසීමේ ක්‍රියාන්විතයට සමාන සාකච්ඡාවක් මේ වන විට ජාත්‍යන්තර මුල්‍ය අරමුදල හා ඉන්දියාව අතර ලංකාව සම්බන්ධයෙන් සිදුවේ.  ඉන්දියාවේ ඩොලර් මිලියන 400 ණය පහසුකම් සාකච්ඡාවට, ජාත්‍යන්තර මුල්‍ය අරමුදල වෙත යාම කොන්දේසියක් ලෙස එක් කර ඇත්තේ ඒ අනුවය.

විධිමත් සංචිත වැඩිවීමක දි එම සංචිත 1.  වෙනත් පාර්ශවයක් වෙත පැවරීම  2. භාණ්ඩ ආනයනය සඳහා යොදා ගැනීම සිදු කළ හැකි විය යුතුය.  චීන අතමාරුව මගින් ණය ගෙවීමට ද, ආනයන සිදු කිරීමට ද අවස්ථාවක් නැත.  චීනය තම මුදල් භාවිත කර 1. ණය ගෙවීම වැලැක්වීම  2. චීන නොවන භාණ්ඩ ආනයනය (උදා- තෙල්, ගෑස්, ගල්අගුරු, පොහොර, බෙහෙත්) ගෙන්වීම දැනට අවහිර කර ඇත.  එබැවින් 2022 ජනවාරි ණය අර්බුදයට මේ ඉලක්කම් විජ්ජාවෙන් ප්‍රතිකර්මයක් ලැබෙන්නේ නැත.

අජිත් නිවාඩ් කබ්රාල් ගේ නිවේදනය ගණන් තැබීම (book entry) මගින් සිදු කළ ඉලක්කම් හරඹයක් මිස රටට ඩොලර් ගලා ඒමක් නොවේ.

රජය ජනවාරි 18 දක්වා පාර්ලිමේන්තු වාර අවසන් කළේ, රු. මිලියන 500 ක ණය මුදල ජනවාරි 17 දිනට ගෙවා දමා පසු දින පාර්ලිමේන්තුවේ දී ඒ ගැන පම්පෝරියක් ගැසීමට ය. නමුත්, ජනවාරි මාසයේ ගෙවිය යුතු ඩොලර් මිලියන 1380 ක සම්පූර්ණ මුදල සඳහා ප්‍රමාණවත් සංචිත මේ වන විට රටේ නැත.

ට්‍රින්කොමලී ටර්මිනල්ස්’ නමැති එම සමාගම ලංකා ඛණිජ තෙල් නීතිගත සංස්ථාවට අනුබද්ධව පිහිටුවීමට යෝජනා වී ඇත්තේ ලංකා IOC සමාගම සමග ඒකාබද්ධව යි. එහි 49%ක කොටස්වල අයිතිය ලංකා IOC සමාගම වෙත ලබා දීමට යෝජනා වී තිබේ.

දශක ගණනාවක් තිස්සේ මතභේදයට තුඩු දී ඇති ව්‍යාපෘතියක් වන ත්‍රිකුණාමලයේ තෙල් ටැංකි සංකීර්ණ ව්‍යාපෘතිය ඒකාබද්ධව සංවර්ධනය කිරීම සඳහා ශ්‍රී ලංකාව ඉන්දියාව සමඟ දිගුකාලීන ගිවිසුමකට මාසයක් ඇතුළත අත්සන් කරන බවට ඉන්දියාවේ හින්දු පුවත්පතට බලශක්ති අමාත්‍ය උදය ගම්මන්පිල පවසුබවට එම පුවත්පත වාර්තා කරයි.

“අපි මේ ගැන මාස 16ක් තිස්සේ සාකච්ඡා කළා, දැන් අපි ඉන්දියාව සමඟ ත්‍රිකුණාමල ව්‍යාපෘතියේ කොන්දේසි අවසන් කිරීමට ඉතා ආසන්නයි. අපි මාසයක් ඇතුළත ගිවිසුම අත්සන් කරන්න බලාපොරොත්තු වෙනවා,” බලශක්ති අමාත්‍ය උදය ගම්මන්පිල ඉරිදා ‘ද හින්දු’ පුවත්පතට පැවසීය.

ද හින්දු වාර්තාව සම්පූර්ණයෙන් පහත පළ වේ.

කොළඹ සමඟ ඇති බැඳීම්වල වසරක දෘශ්‍යමාන ආතතියෙන් පසුව, නව දිල්ලියට අවසානයේ ප්‍රීති වීමට යම් හේතුවක් තිබිය හැකිය. දශක ගනනාවක් තිස්සේ මතභේදයට තුඩු දී ඇති කීර්තිමත් ව්‍යාපෘතියක් වන ත්‍රිකුණාමලයේ තෙල් ටැංකි සංකීර්ණය ඒකාබද්ධව සංවර්ධනය කිරීම සඳහා ශ්‍රී ලංකාව ඉන්දියාව සමඟ දිගුකාලීන ගිවිසුමකට මාසයක් ඇතුළත අත්සන් කරනු ඇත.

“අපි මේ ගැන මාස 16ක් තිස්සේ සාකච්ඡා කළා, දැන් අපි ඉන්දියාව සමඟ ත්‍රිකුණාමල ව්‍යාපෘතියේ කොන්දේසි අවසන් කිරීමට ඉතා ආසන්නයි. අපි මාසයක් ඇතුළත ගිවිසුම අත්සන් කරන්න බලාපොරොත්තු වෙනවා,” බලශක්ති අමාත්‍ය උදය ගම්මන්පිල පසුගිය ඉරිදා (26) ‘ද හින්දු’ පුවත්පතට පැවසීය.

ඒ සඳහා සීමාසහිත ට්‍රින්කෝ පෙට්‍රෝලියම් ටර්මිනල් සමාගම පිහිටුවන ලෙස ලංකා ඛනිජ තෙල් නීතිගත සංස්ථාවට (CPC) උපදෙස් දී ඇති බව අමාත්‍යවරයා පැවසීය. මීළඟ අමාත්‍ය මණ්ඩල රැස්වීමට පෙර මෙම විශේෂ සමාගම පිහිටුවීමට ජනාධිපති ගෝඨාභය රාජපක්ෂ මහතා කළ ඉල්ලීම අනුව මෙම පියවර ගෙන ඇත. “මේ සතියේ නිවාඩු නිසා අපිට කැබිනට් රැස්වීමක් නැහැ. ඒ තීන්දුව අපි ඊළඟ එකේදි අනුමත කරනවා.” ගම්මන්පිල මහතා පැවසීය.

දෙවන ලෝක සංග්‍රාමයේදී බ්‍රිතාන්‍යයන් විසින් ත්‍රිකුණාමලයේ තෙල් ටැංකි සංකීර්ණ ඉදිකරනු ලැබුවේ ත්‍රිකුණාමලය වරායට යාබදව ඉන්ධන පිරවුම්හලක් ලෙස සේවය කිරීම සඳහාය. ශතවර්ෂයකට ආසන්න පැරණි තෙල් ටැංකි නැවත භාවිතයට සුදුසු ලෙස සකස් කිරීමට නම් ඩොලර් මිලියන ගණනක වියදමින් ප්‍රතිසංස්කරණය කළ යුතුය.

ගිවිසුම අවසන් කර ලබන මාසයේ අත්සන් කළහොත්, එය පාලක රාජපක්ෂ පාලනය සමඟ ඉන්දියාවේ මාස 16ක දීර්ඝ සාකච්ඡාවේ කූටප්‍රාප්තිය සනිටුහන් කරනවා පමණක් නොව, ඉන්දු-ලංකා ගිවිසුමේ වසර 35කට පෙර අපේක්ෂා කළ යෝජනාවකට ද හැඩයක් ලබා දෙනු ඇත. ඉන්දු – ලංකා ගිවිසුම (එහි ඇමුණුමේ), “ත්‍රිකුණාමලයේ තෙල් ටැංකි සංකීර්ණය ප්‍රතිසංස්කරණය කිරීමේ සහ ක්‍රියාත්මක කිරීමේ කටයුතු ඉන්දියාව සහ ශ්‍රී ලංකාව අතර හවුල් ව්‍යාපාරයක් ලෙස සිදු කරන බව” ප්‍රකාශ කර තිබුණද, 2003 ඉන්දියානු තෙල් සංස්ථාව විසින් ලංකාවේ ඉන්ධන බෙදා හැරීම් කටයුතුවලට ප්‍රවේශ වන තෙක් එම වගන්තිය බලාත්මක වූයේ නැත.

LIOC විසින් දැනට ටැංකි 15ක් පවත්වාගෙන යන අතර තෙල් ටැංකි සංකීර්ණය පුරා පැතිරී ඇති කිලෝ ලීටර් 12,000 බැගින් වූ ධාරිතාවකින් යුත් ගබඩා ටැංකි 99කින් සමන්විත මෙම පහසුකම ‘චයිනා බේ’ හි පිහිටා ඇත. සාකච්ඡා කෙරෙන නව ගිවිසුම ඉතිරි ටැංකිවලට අදාළ වේ.

ත්‍රිකුණාමලයේ තෙල් ටැංකි සංකීර්ණය “මුල් නවීකරණය” මුදල් අමාත්‍ය බැසිල් රාජපක්ෂගේ නොවැම්බර් මස සංචාරයේදී නව දිල්ලියේ ශ්‍රී ලංකා දූත මණ්ඩලය විසින් නිකුත් කරන ලද නිල ප්‍රකාශයේ සඳහන් කර ඇති අතර, එයට ලබා දී ඇති ප්‍රමුඛතාවය පෙන්නුම් කරයි. ජනාධිපති ගෝඨාභයගේ සහ අගමැති මහින්ද රාජපක්ෂගේ බාල සොහොයුරා වන බැසිල් මහතා, වසංගතයෙන් උග්‍ර වූ ආර්ථික අර්බුදයෙන් මිදීමට ශ්‍රී ලංකාවට උපකාර කිරීම සඳහා නව දිල්ලියෙන් පුළුල් ආර්ථික ආධාර ඉල්ලා සිටියේය.

රාජ්‍ය තාන්ත්‍රික ආරංචි මාර්ග පෙන්වා දුන්නේ, හදිසි ණය සහ මුදල් හුවමාරු ඉල්ලීම් සඳහා නවදිල්ලියේ අනුමැතිය කොළඹින් ලැබීම, ත්‍රිකුණාමල ගනුදෙනුව සම්බන්ධයෙන් රාජපක්ෂ පාලනය ඉදිරියට යාම මත රඳා පවතින බවයි.

කෙසේ වෙතත් එම අදහස බැහැර කරමින් ගම්මන්පිල මහතා මෙසේ පැවසීය: “දේශපාලන විපක්ෂය ඇතුළු ඇතැමුන් යෝජනා කරන්නේ ඉන්දියාවේ ආර්ථික ආධාර ත්‍රිකුණාමල ගනුදෙනුව සමඟ ගැටගැසී ඇති බවයි. මම ඒක තරයේ ප්‍රතික්ෂේප කරනවා. “මේ දෙක අතර කිසිදු සම්බන්ධයක් නෑ” යනුවෙන් අවධාරණය කරමින් අමාත්‍යවරයා පැවසුවේ ‘ආර්ථික ආධාර ලබාගැනීමට පෙර අපි මෙම ගිවිසුම ගැන සාකච්ඡා කිරීමට පටන් ගත්තෙමු‘ යනුවෙනි.

බැසිල් රාජපක්ෂ මහතා නවදිල්ලියට ගොස් මාසයකට ආසන්න කාලයක් ගතවී ඇති අතර, ශ්‍රී ලංකාවට එහි වත්මන් ආර්ථික අර්බුදය අවම කර ගැනීමට උපකාර වන “සිවු වැදෑරුම් ප්‍රවේශයකට” ඉන්දියාව එකඟ විය. ආධාර පිළිබඳ නිල ප්‍රකාශයක් ඉන්දියාව විසින් මෙතෙක් ශ්‍රී ලංකාවට දැනුම් දී නොමැත.

(ද හින්දු)

ජනාධිපති  ලේකම් ආචාර්ය පී බී ජයසුන්දර මහතාගේ ඉල්ලා අස්වීම  ජනාධිපති ගෝඨාභය රාජපක්ෂ මහතා විසින් පිළිගනු ලැබ ඇති බව වාර්තාවේ.

ජයසුන්දර මහතාගේ ඉල්ලා අස්වීමෙන් පුරප්පාඩු වන තනතුර සදහා අග්‍රාමාත්‍ය ලේකම් ගාමිණී සේදර සෙනරත් මහතා පත් කෙරෙනු ඇතැයි රජයේ ආරංචි මාර්ග පවසයි.

ගාමිණී සෙනරත් මහතා ජනාධිපති ලේකම් ධුරයට පත්කිරීමෙන්  පුරප්පාඩු වන අග්‍රාමාත්‍ය ලේකම් ධුරයට වාරිමාර්ග අමාත්‍යාංශයේ ලේකම් අනුර දිසානායක මහතා පත් කිරීමට නියමිත බව ද වාර්තා වේ.

පරිපාලන සේවය කීර්තිමත් නිලධාරියකු වන අනුර දිසානායක  මහතා මහවැලි, වාරිමාර්ග, අධ්‍යාපන ඇතුළු අමාත්‍යාංශ ගණනාවක ලේකම්ධුර හොබවා ඇත.ශ්‍රී ලංකා පරිපාලන සේවයේ විශේෂ ශ්‍රේණියේ නිලධාරි යකු වන ඔහු ශ්‍රී ජයවර්ධනපුර විශ්ව විද්‍යාලයේ උපාධිධරයෙකි.

යූරියා නොමැතිකම නිසා ජාතික පශු සම්පත් මණ්ඩලයේ තෘණ භූමි විනාශවීමේ බරපතළ අවදානමක් මතුවී ඇතැයි ජාතික පශු සම්පත් මණ්ඩලයේ සභාපති මහාචාර්ය මංජුල සුමිත් මාගමගේ මහතා කියයි.

මේ සම්බන්ධයෙන් වැඩි දුරටත් පැහැදිලි කරමින් මාගමගේ මහතා පැවසුවේ යූරියා නොමැතිකම නිසා ජාතික පශු සම්පත් මණ්ඩලයට අයත් තෘණබිම් හෙක්ටයාර් 4000ක් පමණ අර්බුදයකට ලක්ව ඇති බවයි.

‘තෘණ සහ සෝගම් අස්වැන්න මෙලෙස අඩුවීම නිසා කිරි එළදෙනුන්ට සහ ගවයන්ට ප්‍රමාණවත් පරිදි ආහාර සැපයීමද බරපතළ ප්‍රශ්නයක්ව තිබෙනවා. සෝගම් අස්වැන්න දින 70 කින් කැපීමෙන් පසු නැවත දළු ලෑම සඳහා ඊට යූරියා ඉසිය යුතුයි. යූරියා වෙනුවට කාබනික පොහොර ඉසීමෙන් අපේක්ෂිත අස්වැන්න ලබා ගත නොහැකියි. ඒ වගේම පශු සම්පත් මණ්ඩලය සතු නුවරඑළිය සීතාඑළිය ප්‍රදේශයේ බීජ අර්තාපල් නිෂ්පාදනය කිරීමේ කටයුතු ද දිලීරනාශක හිඟය නිසා බෙහෙවින් අඩාලවී තිබෙනවා‘ යැයි ද සභාපතිවරයා පැවසුවේය.

මේ අතර පුද්ගලික තණබිම් පවත්වා ගෙන යන කිරිගව හිමියන් ද අප හා පැවසුවේ මේ වන විට තමන් සතු තෘණ බිම් විශාල ප්‍රමාණයක් අතහැර දැමීමට සිදුව ඇති බවයි.

‘මේක බරපතළ තත්ත්වයක්. කිරි ගවයන්ට නිසි පෝෂණයක් ලබාදිය යුතුයි. ඒත් තෘණබිම් නැතිව ඒක කරන්න බැහැ. මෙහෙම ගියොත් දේශීය කිරි සැපයුමත් දැඩි ලෙස සීමා වී මේ කර්මාන්තයත් විනාශ විය හැකියි. පුදුමය කියන්නේ මේ ගැන කිසිවෙක් අවධානය යොමු නොකිරීමයි‘

රජය මැදිහත් වී කුකුළු මස් හා බිත්තර නිෂ්පාදනය ආරක්ෂා නොකළහොත් ඉදිරියේදී රට තුළ කුකුළු මස් හා බිත්තර හිඟයක් ඇති විය හැකි බව සමස්ත ලංකා බිත්තර නිෂ්පාදකයින්ගේ සංගමය (AIEPA) පවසයි.

AIEPA භාණ්ඩාගාරික විජය අල්විස් පවසන්නේ ඉදිරි අලුත් අවුරුදු සමයේදී බිත්තරයක මිල රුපියල් 35 දක්වා ඉහළ යා හැකි බවයි.

අමුද්‍රව්‍යවල මිල වැඩි වීමත් සමඟ සුදු බිත්තරයක විකුණුම් මිල රුපියල් 23ක් වන අතර රතු බිත්තරයක් රුපියල් 24ක් දක්වා ඉහළ දැමීමට සිදුව ඇති බව ද ඔහු පැවසුවේය.

‘රජය බඩඉරිඟු ආනයන වියදම අඩු කරලා පොඩි සහනයක් දීලා තියෙනවා. කෙසේ වෙතත්, විදේශ විනිමය හිඟය සහ ආනයන පාලනයන් නිසා කුකුළු ආහාරවල මිල ගණන් විශාල ලෙස ඉහළ ගොස් තිබෙනවා. එසේම ගෝලීය සහ දේශීය වෙළඳපළ තත්ත්වයන් මෙන්ම අපේ රටේ විදේශ විනිමය අර්බුදය සහ සැපයුම් දාම ගැටළු හේතුවෙන් ආහාර ද්‍රව්‍යවල සැලකිය යුතු හිඟයක් පවතිනවා” ඔහු වැඩි දුරටත් පැවසුවේය.

බොහෝ සුළු හා මධ්‍ය පරිමාණ ගොවීන් තම ගොවිබිම් වසා දමමින් සිටින අතර නිෂ්පාදන පිරිවැය ඉහළ යාම සහ වෙළෙඳපොළේ පවතින අවදානම් හේතුවෙන් ඔවුන් ආයෝජනය කිරීමට අකමැත්තක් දක්වන බව ද අල්විස් මහතා වැඩි දුරටත් සදහන් කළේය.

තම සමාගම විසින් නැව්ගත කළ කාබනික පොහොරවල හානිකර බැක්ටීරියා ඇති බවට ව්‍යාජ හේතු ඉදිරිපත් කරමින් අදාළ මුදල් ගෙවීම පැහැර හැරීම සම්බන්ධයෙන් ශ්‍රී ලංකා රාජ්‍ය බැංකුවලට එරෙහිව ජාත්‍යන්තර ශ්‍රේණිගත කිරීමේ ආයතනවලට පැමිණිලි කරන බව සීවින් බයෝටෙක් සමාගමේ ප්‍රකාශිකාව පැවසුවාය.

තම සමාගම විසින් ශ්‍රී ලංකාවට ප්‍රවාහනය කළ කාබනික පොහොර මෙට්‍රික්ටොන් 20,000 තුළ අහිතකර බැක්ටීරියා නොමැති බව සිංගප්පූරුවේ නවතම පරීක්ෂණ වාර්තාවට අනුව තහවුරු වූ බව ද ඇය පැවසුවාය.

‘‘ශ්‍රී ලංකාවේ රාජ්‍ය බැංකුවලට එරෙහිව ප්‍රමුඛතම ජාත්‍යන්තර ණය ශ්‍රේණිගත කිරීමේ ආයතන තුන වන ස්ටෑන්ඩර්ඩ්ස් ඇන්ඩ් පුවර්ස්, මූඩීස් සහ ෆිච් ශ්‍රේණිගත කිරීම වෙත පැමිණිලි කිරීමට අප සමාගය සූදානම් වෙිමින් සිටිනවා. අදාළ අවදානම් පිළිබඳව අනෙකුත් ජාත්‍යන්තර ආයෝජකයින්ට මතක් කිරීම සඳහා අපි මෙම ආයතන තුන සමඟ නඩුවේ අදාළ සාක්ෂි බෙදා ගන්නවා,” ඇය වැඩි දුරටත් පැවසුවාය

ඉදිරි සතියේ එළඹෙන ආගමික උත්සව සමයේ ජනතාවට වන අපහසුතාවයත් සැලකිල්ලට ගෙන රජයේ වෛද්‍ය නිලධාරීන්ගේ සංගමය විසින් ආරම්භ කරන ලද වෘත්තීය සමිති ක්‍රියාමාර්ගය තාවකාලිකව අද දින ප.ව 4.00 සිට අත්හිටුවන බව එම සංගමය විසින් අද (25) දින නිකුත් කළ මාධ්‍ය නිවේදනයක සදහන් වේ.

එම මාධ්‍ය නිවේදනය සම්පූර්ණයෙන් මෙසේය,

රජයේ වෛද්‍ය නිලධාරීන්ගේ සංගමයේ මධ්‍යම කාරක සභාවේ ඒකමතික තීරණයට අනුව වෛද්‍ය පත්වීම් වලට සිදු කරන දේශපාලන මැදිහත්වීම් වලට විරෝධය පාමින් පසුගිය දෙසැම්බර් 21 වැනිදා ආරම්භ කල දීප ව්‍යාප්ත අඛණ්ඩ වෘත්තීය සමිති ක්‍රියාමාර්ගය (4 වන දිනයටත්) අද දක්වා ක්‍රියාත්මක විය.

සෞඛ්‍ය අමාත්‍යතුමන් සමඟ දෙසැම්බර් 22 වැනිදා පැවති සාකච්ඡාවෙන් පසු ඊයේ දිනයේදි, සෞඛ්‍ය අමාත්‍යංශයේ විසඳුම් දැක්වෙන ලිපියක් සෞඛ්‍ය අධ්‍යක්ෂ ජනරාල්ගේ අත්සනින් අප වෙත ලැබීමට සලස්වා ඇත. අද දින රැස් වූ රජයේ වෛද්‍ය නිලධාරීන්ගේ සංගමයේ මධ්‍යම කාරක සභාව විසින් සෞඛ්‍ය අධ්‍යක්ෂ ජනරාල් විසින් ලබාදුන් විසඳුම් සම්බන්ධයෙන් පහත කරුණු නිරීක්ෂණය කරන ලදී.

1.      සෞඛ්‍ය අමාත්‍යතුමන්ගේ මැදිහත්වීමෙන් විශේෂඥ වෛද්‍ය මාරු මණ්ඩල වල තීරණයට පටහැනිව සැකසු විශේෂඥ පත්වීම් ලැයිස්තුව නැවතත් සියළු පාර්ශවකරුවන්ගේ එකඟතාවයෙන් පුළුල් සාකච්ඡාවකින් අනතුරුව නිවැරදි කිරීමට තීරණය කර ඇත.

2.      පශ්චාත් සීමාවාසික අනුයුක්ත කිරීම් සම්බන්ධව මාරු මණ්ඩල හා දෙපාර්තමේන්තු ප්‍රධානියා විසින් ගත යුතු තීරණ පිළිබඳ සෞඛ්‍ය අමාත්‍යංශයේ වෛද්‍ය පරිපාලකයින්ට තාක්ෂණික දැනුම නොමැති බැවින් ඒ පිළිබඳ උපදෙස් රාජ්‍ය සේවා කොමිෂන් සභාවෙන් විමසා සිටීමට සිදු වන බව දන්වා ඇත.

3.      විශේෂඥ වෛද්‍යවරුන්ගේ ස්ථානමාරු මණ්ඩල පිළිබඳ ගැටළුවේදි ගත් ස්ථාවරයට වඩා පටහැනි ස්ථාවරයක් ශ්‍රේණි වෛද්‍ය  නිලධාරීන්ගේ මාරු මණ්ඩල වලදී සෞඛ්‍ය අමාත්‍යංශය දරණ බව නිරීක්ෂණය වේ.

4.      වෛද්‍ය ස්ථානමාරු සම්බන්ධ චක්‍රලේඛණයේ හා ගැසට් පත්‍රයේ නිර්වචනය කර ඇති “බලාත්මක දිනය” යන යෙදුම වෛද්‍ය පරිපාලකයින්ට වටහා ගත නොහැකි බැවින් මෙතෙක් කල් ක්‍රියාත්මක කළ “බලාත්මක දිනය” ගැන නැවතත් තේරුම් කර දෙන ලෙස රාජ්‍ය සේවා කොමිෂන් සභාවෙන් ඉල්ලා සිටින බව පෙන්වා දී ඇත.

5.      කැබිනට් මණ්ඩලය විසින් මින් මාස 6 කට පෙර වෛද්‍ය පරිපාලන ශ්‍රේණියේ ගැටළු විසදීම සඳහා පත් කිරීමට තීරණය කළ ස්වාධීන කමිටුව සඳහා සභාපතිවරයෙක් ඔවුනට මෙතෙක් සොයාගැනිමට නොහැකි වූ බව පෙන්වා දී ඇත.

6.      පසුගිය අගොස්තු මාසයේ සති දෙකකින් ගැසට් කරන බවට පොරොන්දු වු ශ්‍රී ලංකා වෛද්‍ය සභාවේ නිලවරණ රෙගුලාසි ගැසට් කිරීමට මෙතෙක් අපොහොසත් වී ඇති බව ඔවුන් පිලිගෙන ඇත.

7.      සෞඛ්‍ය අමාත්‍යංශයේ වෛද්‍ය පරිපාලනයේ දුර්වලතා නිසා විසඳිමට නොහැකි වු අපගේ ඉල්ලීම් විසඳිම සඳහා නිශ්චිත කාලවකවානුවක් පෙන්වා දීමට තවදුරටත් සෞඛ්‍ය අමාත්‍යංශය අපොහොසත් වී ඇත. ඒ බව සෞඛ්‍ය අධ්‍යක්ෂ ජනරාල්වරයාගේ ලිපියේ එම විසඳුම් ක්‍රියාත්මක කරවන දිනයක් සඳහන් නොවීම තුලින් පැහැදිලි වේ.

සෞඛ්‍ය අමාත්‍යංශය ඉහත පරිදි පිළිගෙන ඇති වෛද්‍ය පරිපාලකයන්ගේ හා සෞඛ්‍ය අමාත්‍යංශයේ වැරදි නිවැරදි කර ගැනීම සඳහාත්, මේ පිළිබදව දේශපාලන නායකයින්, ආගමික් නායකයින් හා මහජනතාව දැනුවත් කිරීම සඳහාත්, ඉදිරි සතියේ එළඹෙන ආගමික උත්සව සමයේ ජනතාවට වන අපහසුතාවයත් සැලකිල්ලට ගෙන අප වෘත්තීය සමිති ක්‍රියාමාර්ගය තාවකාලිකව අද දින ප.ව 4.00 සිට අත්හිටුවන නමුත්, යම් හෙයකින් එම වැරදි නිවැරදි කර ගැනීමට සෞඛ්‍ය අමාත්‍යංශය අපොහොසත් වුවහොත් 2022 ජනවාරි මස 3 වැනි දින රැස්වන මධ්‍යම කාරක සභාව විසින් වඩාත් තීව්‍ර ඉදිරි වෘත්තීය සමිති ක්‍රියාමාර්ග වලට යොමු වීමේ තීන්දු තීරණ ගැනීමට, අද දින රැස් වූ හදිසි මධ්‍යම කාරක සභා රැස්වීමේදි තීරණය විය.

ශ්‍රී ලංකා ඛනිජ තෙල් නීතිගත සංස්ථාව ජාතික ඉරාන තෙල් සමාගම වෙත ලබා දිය යුතු හිඟ මුදල් ගෙවීම සඳහා වැඩපිළිවෙළක් සකස් කිරීමේ අරමුණින්  ශ්‍රී ලංකා රජය සහ ඉරාන ඉස්ලාමීය ජනරජය විසින් ශ්‍රී ලංකා ප්‍රජාතාන්ත්‍රික සමාජවාදී ජනරජයේ වැවිලි අමාත්‍යංශය සහ ඉස්ලාමීය ඉරාන ජනරජයේ කර්මාන්ත, පතල් සහ වෙළඳ අමාත්‍යංශය අතර අවබෝධතා ගිවිසුමක පසුගිය  21 වැනි දින විදේශ අමාත්‍යංශයේ දී අත්සන් තබන ලද බව විදේශ අමාත්‍යාංශය විසින් අද (25) නිකුත් කළ මාධ්‍ය නිවේදනයක දැක්වේ.

ශ්‍රී ලංකාවේ වැවිලි අමාත්‍ය වෛද්‍ය රමේෂ් පතිරණ සහ ඉස්ලාමීය ඉරාන ජනරජයේ කර්මාන්ත, පතල් හා වෙළඳ කටයුතු පිළිබඳ නියෝජ්‍ය අමාත්‍ය අලිරේසා පේමන්පැක් තම රාජ්‍යයන් නියෝජනය කරමින් මෙම අවබෝධතා ගිවිසුමට අත්සන් තැබූහ. ශ්‍රී ලංකාව සහ ඉරානය අතර ආර්ථික සබඳතා සම්බන්ධයෙන් පවත්නා අන්‍යෝන්‍ය වශයෙන් වාසිදායක වන සහයෝගිතාව ප්‍රවර්ධනය කිරීම කෙරෙහි ප්‍රධාන අවධානය යොමු කරමින් මෙම ගිවිසුමට අත්සත් තබන ලදි. ශ්‍රී ලංකා රජය සිදු කළ තෙල් මිලදී ගැනීම් සම්බන්ධයෙන් වන හිඟ මුදල් ගෙවීම තුළින් ඉස්ලාමීය ඉරාන ජනරජය වෙත සිදු කෙරෙන ලංකා තේ අලෙවිය වැඩි කිරීම මෙම අවබෝධතා ගිවිසුමේ අරමුණ වේ.

ඉස්ලාමීය ඉරාන ජනරජයේ කර්මාන්ත, පතල් හා වෙළඳ කටයුතු පිළිබඳ නියෝජ්‍ය අමාත්‍ය අලිරේසා පේමන්පැක් කලාපීය සහයෝගිතා රාජ්‍ය අමාත්‍ය තාරක බාලසූරියසහ විදේශ අමාත්‍යාංශයේ ලේකම් අද්මිරාල් (මහාචාර්ය) ජයනාත් කොළඹගේ මහතා හමුවූ අතර එහිදී දෙරට අතර පවත්නා ද්විපාර්ශ්වික සබඳතා තවදුරටත් වර්ධනය කරගැනීමේ අන්‍යෝන්‍ය අවශ්‍යතා සහ ක්‍රමවේද පිළිබඳව සාකච්ඡා පැවැත්වූහ.

අභියාචනාධිකරණ නව විනිසුරුවරයෙකු ලෙස විකුම් අතුල කළුආරච්චි මහතා අද (24) පෙරවරුවේ ජනාධිපති කාර්යාලයේ දී ජනාධිපති ගෝඨාභය රාජපක්ෂ මහතා ඉදිරියේ දිවුරුම් දුන්නේය.

අභියාචනාධිකරණ විනිසුරු, දේවිකා අබේරත්න මහත්මිය විශ්‍රාම යාමෙන් පුරප්පාඩු වූ තනතුර සඳහා මෙම පත් කිරීම සිදු කර තිබේ.

කොළඹ රාජකීය විද්‍යාලයේ ආදි ශිෂ්‍යයෙකු වන විකුම් අතුල කළුආරච්චි මහතා කොළඹ නීති විද්‍යාලයෙන් අධ්‍යාපනය හදාරා නීතිඥ වෘත්තියට පිවිසියේය.

විකුම් අතුල කළුආරච්චි මහතාගේ වසර  33ක සේවා කාලයෙන් වසර 27ක් මහේස්ත්‍රාත්වරයෙකු, දිසා විනිසුරුවරයෙකු, අපරාධ මහාධිකරණයේ සහ සිවිල් අභියාචනා මහාධිකරණයේ විනිසුරුවරයෙකු ලෙස කටයුතු කර තිබේ. ඒ මහතා මහාධිකරණයේ හිටපු ජ්‍යෙෂ්ඨතම විනිසුරුවරාය ද වේ.

දඹුල්ල ආර්ථික මධ්‍යස්ථානයට 24 දින එළවළු මිල වෙනත් දිනයන් වලට වඩා අඩු වී ඇතැයි ව්‍යාපාරිකයො පෙන්වා දෙති

ඇතැම් ව්‍යාපාරිකයන් කියා සිටියේ එළවළු ගොවීන් තම අස්වනු නත්තල් උත්සවය සඳහා  23  දින  රැගෙන යාමත්,  අස්වනු නෙළීම නොකර සිටී ගොවින් සිය අස්වැන්න වැඩි වශයෙන් වෙළදපළට ගෙන ඒමත් මිල අඩු වීමට හේතුව වී ඇති බවය.

එමෙන්ම දඹුල්ල ආර්ථික මධ්‍යස්ථානයේ එළවළු මිල දී ගැනීම් සඳහා පිට පළාත්වලින් පැමිණෙන වෙළෙන්දන්ගේද  අඩුවක් ද අද (24)  දින දැක ගැනීමට හැකි වූ බව ව්‍යාපාරිකයෝ සදහන් කරති.

වෙළෙන්දන්ගේ පැමිණීම අඩුවීමට තවත්  හේතුවවී ඇත්තේ  ඉන්ධන මිල ඉහළ යාමත් සමඟ ප්‍රවාහන ගාස්තු වැඩිවීම විය හැකි යැයි වෙළෙන්දෝ  අනුමාන කරති.

නිෂ්පාදන අලවියට ගෙනවිත් සිටි ගොවින් කියා සිටියේ පොහොර කෘමිනාශක, වල්නාශක ආදී දේ තහනම් කොට විදේශීය බිජ ගොවියාට ලබාදීම නිසා අර්බුදයක් නිර්මාණය වී ඇති බවය. දේශීය බිජ ලබාදී කාබනික වගාවට යන්නේනම් මේ හානිය අවම වන බව ගොවීහු පෙන්වා දෙති.

එළවළු නොලැබීම් නිසා ආර්ර්ථික මධ්‍යස්ථානය වෙනදාමෙන් වැඩි කළ කලබලයකින් තොරව  ක්‍රියාත්මක වන අතර වෙළද සංගම් නියෝජිතයන් කියා සිටියේ ගොවින් යම් සතුටුදායක තත්ත්වයකට වගා කොට තිබෙන බවය. ඇතැම් නිලධාරින් පවසන පරිදි රට තුළ සාගින්නක් ඇති නොවන බව ඔවුන් පෙන්වා දුන්නේය.

දඹුල්ල ආර්ථික මධ්‍යස්ථානයේ  පසුගිය 22 දින උදේ  සහ 24 දින එළවළු  කිලෝවක තොග මිල මෙසේ සටහන්ව තිබිණි.

වර්ගය                    22 දින පවතී මිල         අද පවතී මිල

• ගෝවා                    280 -300                            120-140
• බෝංචි                    250- 280                             190-250
• ලීක්ස්                     200-250                              190 -210
• කැරට්                     370 -380                             250-300
• තක්කාලි                 260-280                              200 -220
• රාබු                        70 -100                                50-60
• නෝකෝල්            150-160                             130-140
• කැකිරි                    85  -100                              90-100
• පිපිඤ්ඤා                85 -90                                 60-70
• වැලිමඩ අර්තාපල්    180- 190                          140-150
• අර්තාපල් (ආනයනික)       180 – 185                145-160
• වැටකොළු  180-200                150 -170
• කරවිල   230-230                         160-200
• වට්ටක්කා  40-60                           60-65
• වම්බටු  260 -270                      160-200
• එළබටු  280 -300                     250-270
• දඹල  190-200                             150-170
• මෑකරල්  180 -200                   150 -190
• මාළු මිරිස්   550-.600                  400-600
• අමුමිරිස්  670 -700                     450 -550
• ලොකු ලූනු (විදේශීය) 190 -200       230.-250
• ලොකු ළූණු  දේශීය 200- 270    250-280
• බතල     100- 110                     85 -90

සටහන සහ ඡායාරූප – කාංචන කුමාර ආරියදාස – දඹුල්ල

2021 නොවැම්බර් මාසයේ දී ජා.පා.මි.ද. මත පදනම් වූ වාර්ෂික සාමාන්‍ය මතුපිට උද්ධමනය සියයට 6.2 දක්වා ඉහළ ගිය අතර, වාර්ෂික ලක්ෂ්‍යමය මතුපිට උද්ධමනය සියයට 11.1 දක්වා ඉහළ ගිය බව ශ්‍රී ලංකා මහ බැංකුව විසින් ඊයේ (21) නිකුත් කළ නිවේදනයක සදහන් වේ.

එම නිවේදනයේ මෙසේ ද සදහන් වේ,

ජාතික පාරිභෝගික මිල දර්ශකයෙහි (ජා.පා.මි.ද., 2013=100) වාර්ෂික ලක්ෂ්‍යමය වෙනස මගින් මනිනු ලබන මතුපිට උද්ධමනය, 2021 ඔක්තෝබර් මාසයේ පැවති සියයට 8.3හි සිට 2021 නොවැම්බර් මාසයේ දී සියයට 11.1 දක්වා ඉහළ ගියේය. මේ අතර, වාර්ෂික සාමාන්‍ය පදනම මත මනිනු ලබන ජා.පා.මි. දර්ශකයෙහි වෙනස, 2021 ඔක්තෝබර් මාසයේ පැවති සියයට 5.7හි සිට 2021 නොවැම්බර් මාසයේ දී සියයට 6.2 දක්වා ඉහළ ගියේය.

උද්ධමනය සඳහා ආහාර සහ ආහාර නොවන කාණ්ඩ දෙකෙහිම අයිතමවල මිල ගණන්හි සිදු වූ මාසික ඉහළ යෑම් හේතු විය. ඒ අනුව, ආහාර කාණ්ඩයෙහි වාර්ෂික ලක්ෂ්‍යමය උද්ධමනය 2021 ඔක්තෝබර් මාසයේ දී පැවති සියයට 11.7හි සිට 2021 නොවැම්බර් මාසයේ දී සියයට 16.9 දක්වා ඉහළ ගිය අතර, ආහාර නොවන කාණ්ඩයෙහි වාර්ෂික ලක්ෂ්‍යමය උද්ධමනය 2021 ඔක්තෝබර් මාසයේ පැවති සියයට 5.4හි සිට 2021 නොවැම්බර් මාසයේ දී සියයට 6.2 දක්වා ඉහළ ගියේය.

2021 නොවැම්බර් මාසයේ දී ජා.පා.මි. දර්ශකයෙහි මාසික වෙනස සියයට 3.14ක් ලෙස වාර්තා වූ අතර, ආහාර සහ ආහාර නොවන කාණ්ඩ දෙකෙහිම අයිතමවල මිල ගණන් පිළිවෙළින්, සියයට 2.61කින් සහ සියයට 0.53කින් ඉහළ යෑම මේ සදහා හේතු විය. ඒ අනුව, 2021 නොවැම්බර් මාසයේ දී ආහාර කාණ්ඩය තුළ, එළවළු, සහල්, කිරි පිටි, ලොකු ළූණු, නැවුම් මත්ස්‍ය සහ කුකුල් මස් මිල ගණන් ඉහළ ගියේය. තවද, ආහාර නොවන කාණ්ඩය තුළ, ප්‍රධාන වශයෙන් ආපනශාලා සහ හෝටල් සහ මද්‍යසාර පාන වර්ග සහ දුම්කොළ යන උප කාණ්ඩවල අයිතමවල මිල ගණන් 2021 නොවැම්බර් මාසයේ දී ඉහළ ගියේය.

තවද, වාර්ෂික ලක්ෂ්‍යමය පදනම මත මූලික උද්ධමනය, 2021 ඔක්තෝබර් මාසයේ පැවති සියයට 7.2හි සිට 2021 නොවැම්බර් මාසයේ දී සියයට 8.8 දක්වා ඉහළ ගිය අතර, වාර්ෂික සාමාන්‍ය මූලික උද්ධමනය, 2021 ඔක්තෝබර් මාසයේ පැවති සියයට 4.6හි සිට 2021 නොවැම්බර් මාසයේ දී සියයට 5.0 දක්වා ඉහළ ගියේය.

කෘෂිකර්ම අමාත්‍යාංශයේ ලේකම් මහාචාර්ය උදිත් කේ ජයසිංහ මහතා වහාම ක්‍රියාත්මක වන පරිදි එම තනතුරින් ඉවත් කරනු ලැබ ඇති අතර එම පුරප්පාඩුව වෙනුවට ඩී.එම්.එල්.ඩී. බණ්ඩාරනායක මහතා පත් කර තිබේ

මේ අතර 2022 ජනවාරි මස පළමු වන දා සිට ක්‍රියාත්මක වන පරිදි ජනමාධ්‍ය අමාත්‍යාංශයේ නව ලේකම්වරයා ලෙස අනූෂ පැල්පිට මහතා පත් කර ඇත.

කෘෂිකර්ම අමාත්‍යාංශයේ ලේකම්වරයාව සිටි මහාචාර්ය උදිත්  කේ  ජයසිංහ මහතා  කාබනික පොහොර සම්බන්ධයෙන් පසුගිය කාලයේදී ආන්දෝලනාත්මක අදහස් ගණනාවක් කළේය.

ශ්‍රී ලංකාවට අලුතින් පත්ව පැමිණි තානාපතිවරු 11දෙනෙක් සහ මහ කොමසාරිස්වරු 06දෙනෙක් ඊයේ (21) පස්වරුවේ ජනාධිපති මන්දිරයේ දී ජනාධිපති ගෝඨාභය රාජපක්ෂ මහතා වෙත සිය අක්තපත්‍ර භාරදුන්හ.

ඊජිප්තුව, ඉන්දුනීසියාව, ජෝර්දානය, ප්‍රජාතන්ත්‍රවාදී මහජන කොරියානු ජනරජය, හංගේරියාව, මොරිටේනියාව, ටියුනීසියාව, ආජන්ටිනාව, ඩොමිනිකා ජනරජය, ස්පාඤ්ඤය සහ ස්ලෝවේනියාව සඳහා නව තානාපතිවරු පත්ව සිටිති.

සියෙරා ලියෝන්, රුවන්ඩාව, බොස්ට්වානාව, මෝල්ටාව, ගයානා ජනරජය සහ නයිජීරියාව සඳහා නව මහ කොමසාරිස්වරු පත්ව සිටිති.

1.      සියෙරා ලියෝන්හි මහ කොමසාරිස් ලෙස අර්නස්ට් මයිම්බා මහතා (Ernest Mbaimba)

2.      ජෝර්දාන තානාපති ලෙස මොහමඩ් අල් – කේඩ් මහතා (Mohamed El- Kayed)

3.      ප්‍රජාතන්ත්‍රවාදී මහජන කොරියානු ජනරජයේ තානාපති ලෙස චෝයි හුයි චෝල් මහතා (Choe Hui Chol)

4.      රුවන්ඩාවේ මහ කොමසාරිස් ලෙස මුකන්ගිරා ජැකලීන් මිය (Mukangira Jacqueline)

5.      බොස්ට්වානා මහ කොමසාරිස් ලෙස ගිල්බර්ට් ශිමේන් මැන්ගෝල් මහතා (Gilbert Shimane Mangole)

6.      මෝල්ටාවේ මහ කොමසාරිස් ලෙස රූබන් ගව්චි මහතා (Reuben Gauci)

7.      හංගේරියාවේ  තානාපති ලෙස අන්ද්‍රෙස් ලස්ලෝ කයිරලි මහතා (Andras Laszlo Kiraly)

8.      මොරිටේනියාවේ තානාපති ලෙස මොහමඩ් අහමඩ් රාරා මහතා (Mohamed Ahmed Rara)

9.      ටියුනීසියාවේ තානාපතිනිය ලෙස හයෙට් ටැල්බි බිලෙල් මිය (Hayet Talbi Bilel)

10.  ආජන්ටිනාවේ තානාපති ලෙස හියුගෝ හවියෙර් ගෝබි මහතා (Hugo Javier Gobbi)

11.  ගයානා ජනරජයේ මහ කොමසාරිස් ලෙස චරන්දාස් පර්සාද් මහතා (Charrandass Persaud)

12.  ඊජිප්තුවේ තානාපති ලෙස මගෙඩ් මොස්ලේ නෆෙයි මහතා (Maged Mosleh Nafei)

13.  ඩොමිනිකා ජනරජයේ තානාපති ලෙස ඩේව්ඩ් එමැනුවෙල් පග් මහතා (David Emmanuel Puig)

14.  නයිජීරියාවේ මහ කොමසාරිස් ලෙස අහමඩ් සුලේ මහතා (Ahmed Sule)

15.  ඉන්දුනීසියාවේ තානාපතිනිය ලෙස දේවි ගස්ටිනා ටොබින්ග් මිය (Dewi Gustina Tobing)

16.  ස්පාඤ්ඤයේ තානාපති ලෙස හෝසේ මරියා ඩොමින්ගස් මහතා (Jose Maria Dominguez)

17.  ස්ලෝවේනියාවේ තානාපතිනිය ලෙස මටේජා ගෝෂ් මිය (Mateja Ghosh)

දඹුල්ල ආර්ථික මධ්‍යස්ථානයට 22 දින එළවළු ලැබීම 60% කින් පමණ පහත වැටීමත් සමඟ ආර්ථික මධ්‍යස්ථානය වෙනදාට වඩා වැඩි පාළු ස්වභාවයක් ගෙන ඇතැයි ව්‍යාපාරිකයො පෙන්වා දෙති.

ඇතැම් ව්‍යාපාරිකයන් කියා සිටියේ එළවළු ගොවීන් තම අස්වනු නත්තල් උත්සවය සඳහා  23 සහ 24 දිනවල රැගෙන ඒම සඳහා අස්වනු නෙළීම නොකර සිටීම මෙයට හේතුව වී ඇති බවය.

එමෙන්ම දඹුල්ල ආර්ථික මධ්‍යස්ථානයේ එළවළු මිල දී ගැනීම් සඳහා පිට පළාත්වලින් පැමිණෙන වෙළෙන්දන්ගේද  අඩුවක්ද විශාල වශයෙන් මෙදින දැක ගැනීමට හැකි වූ බව ව්‍යාපාරිකයෝ සදහන් කරති.

ඊට හේතුව ඉන්ධන මිල ඉහළ යාමත් සමඟ ප්‍රවාහන ගාස්තු වැඩිවීම විය හැකි යැයි වෙළෙන්දෝ  අනුමාන කිරීමය. වෙනදා දඹුල්ල ආර්ථික මධ්‍යස්ථානයට එළවළු කිලෝ ලක්ෂ දෙකත් තුනත් අතර ප්‍රමාණයක් ලැබුණ ද මෙදින එයින් සියයට හැටකටත් වඩා අඩු ප්‍රමාණයක් ලැබීමත් සමග මිලද පසුගිය දින දිනවලට සාපේක්ෂව පැවති බවද  ඇතැම් එළවළු වර්ග වල මිල යම් මට්ටමකින් අඩු වීමක් දක්නට තිබෙන බව ද ව්‍යාපාරිකයෝ පවසති.

එළවළු නොලැබීම් නිසා ආර්ර්ථික මධ්‍යස්ථානය වෙනදාමෙන් වැඩි කලබලයකින් තොරව  ක්‍රියාත්මක වන අතර ඇතැම් වෙළඳ සැල්  කම්කරුවන් සේවකයන් තැන තැන ජංගම දුරකථන භාවිතා කරමින් වාඩිවී සිටින අයුරුද දැක ගැනීමට හැකි විය.

දඹුල්ල ආර්ථික මධ්‍යස්ථානයේ  22 දින උදේ  එළවළු  කිලෝවක තොග මිල මෙසේ සටහන්ව තිබිණි.

• ගෝවා                                       280 -300
• බෝංචි                                       250- 280
• ලීක්ස්                                         200-250
• කැරට්                                        370 -380
• තක්කාලි                                    260-280
• රාබු                                           70 -100
• නෝකෝල්                                150-160
• කැකිරි                                        85 -100
• පිපිඤ්ඤා                                    85 -90
• වැලිමඩ අර්තාපල් අල                  180- 190
• ආනයනය කරන ලද අර්තාපල්      180 – 185
• වැටකොළු                                 180-200
• කරවිල                                      230-230
• වට්ටක්කා                                  40-60
• වම්බටු                                       260 -270
• එළබටු                                      280 -300
• දඹල                                         190-200
• මෑකරල්                                    180 -200
• මාළු මිරිස්                                  550-.600
• අමුමිරිස්                                     670 -700
• ලොකු ලූනු විදේශීය                    190 -200
• ලොකු ළූණු  දේශීය                   200- 270
• බතල                                        100- 110

කතාව සහ ඡායාරූප – කාංචන කුමාර ආරියදාස – දඹුල්ල

ගෑස් ලිප් පුපුරා යාම් හා ගිනි ගැනීමේ සිද්ධීන්ට මූලික හේතුව ගෑස්වල සංයුතිය වෙනස් කිරීම බව, ගෑස් සිලින්ඩර් ආශ්‍රිත පුපරා යාම් හා ගිනි ගැනීම් පිළිබඳ විමර්ශනය කිරීමට හා විසඳුම් යෝජනා ඉදිරිපත් කිරීමට පත් කළ තාක්ෂණ කමිටුවේ සභාපති මහාචාර්ය ශාන්ත වල්පොල මහතා අද (21) රජයේ ප්‍රවෘත්ති දෙපාර්තමේන්තුවේ දී ප්‍රකාශ කළේය.

ගෑස් සංයුතිය වෙනස් කර ඇත්තේ නිසි නියාමනයකින් තොරව බව ද තමන් කළ විමර්ශනයේ දී හෙළි වූ බව ද ගෑස් නිෂ්පාදනය නියාමනය සඳහා මහජන උපයෝගිතා කොමිසම වැනි ආයතනයක් වහාම ප්‍රතිස්ථාපනය විය යුතු බවට ද කමිටුව නිර්දේශ කළ බව ද මහාචාර්ය වල්පොල මහතා කීය.

ගෑස් සංයුතිය වෙනස් ප්‍රොපේන් හා බියුටේන් මෙන්ම ගෘහස්ත ගෑස් සඳහා භාවිතා කෙරෙන අනෙක් සංයෝග ද වෙන වෙනම ආනයනය කළ විට ඒවා මිශ්‍ර කර ගැනීම සඳහා ලිට්රෝ ගෑස් සමාගමට ස්ථානිය පහසුකම් නැති බවත් ඒවා සකස් කර ගත යුතු බවත් තම කමිටුව නිර්දේශ කළ බව ද කී මහාචාර්යවරයා සමාගම වන ලිට්රෝ ගෑස් සමාගම් පරිශ්‍රය තුළ තත්ත්ව ආරක්ෂණ රසායනාගාරයක් වහා ආරම්භ කළ යුතු බවත් එය කාර්මික තාක්ෂණ ආයතනයේ අධික්ෂණය යටතේ පවත්වාගෙන යායුතු බවටත් නිර්දේශ කළ බව කීවේය.

මෙවර මහ කන්නය සඳහා රසායනික පොහොර  ලබාදීමට හැකියාවක් නැතැයි ද සහනාධාරය දෙනු ලබන්නේ කාබනික පොහොර වගාවන්ට නැඹුරු වූ ගොවීන්ට පමණකැයි ද කෘෂිකර්ම අමාත්‍ය මහින්දානන්ද අලුත්ගමගේ මහතා පවසයි.

මහනුවර ගන්නෝරුවේ පැවැති කෘෂිකර්ම දෙපාර්තමේන්තුවේ වාර්ෂික පර්යේෂණ සැසිය  අමතමින් අමාත්‍යවරයා මේ බව  පැවැසීය

මෙහිදී වැඩි දුරටත් කරුණු පැහැදිලි කළ කෘෂිකර්ම අමාත්‍යවරයා කියා සිටියේ හරිත කෘෂිකර්මාන්තය ආරම්භ කරන්නේ වී ගොවිතැන සඳහා පමණක් බවයි.

‘ පොහොර සහනාධාර දෙන්නේ කාබනික කෘෂිකර්මාන්තය සදහා පමණයි. හරිත කෘෂිකර්මාන්තයට නැඹුරු වන ගොවීන්ට ඊට අවශ්‍ය පහසුකම් දෙනවා. රසායනික පොහොර මිලදී ගෙන අනෙක් ගෙවීන්ට වගා කටයුතු කළ හැකියි.  සාමාන්‍යයෙන් පොහොර ආනයනය කරන්න මාස දෙකක් වත් කල් යනවා. ඒ නිසා මෙවර මහ කන්නයට රසායනික පොහොර ගෙන්වන්න විදිහක් නෑ. ඊළඟ යල කන්නයට තමයි පොහොර ගෙවන්න වෙන්නේ. නමුත්  එළවළුවලට අවශ්‍ය පළිබෝධනාශක තිබෙනවා. අපි කරන වැඩසටහනේ හොඳ ගැන කවුරුත් කතා කරන්නේ නැහැ . මාධ්‍ය මෙහි හොඳ පැත්ත කතා කළේ නැහැ. ඒ ගැන කණගාටු වෙනවා.

රසායනික පොහොර භාවිතය නිසා සිදුවන සෞඛ්‍ය ගැටලු සම්බන්ධව සෞඛ්‍ය අමාත්‍යාංශය කිසිවක් සොයා බලා නැහැ. වත්මන් සෞඛ්‍ය අමාත්‍යවරයා හා කළ සාකච්ඡාවකින් පසු ඒ පිළිබඳ නිසි විමර්ශනයක් කිරීම සඳහා කාර්ය සාධක බලකායක් පත් කිරීමට හැකි වුණා . එම කාර්ය සාධක බලකාය මගින් රසායනික පොහොර භාවිතය නිසා ජනතාවගේ සෞඛ්‍යයට සිදුවන හානිය සම්බන්ධව සොයා බැලීමට නියමිතයි‘‘