කොවිඩ් -19 වෛරසය ආසාදනය වූ රෝගීන් 2792 දෙදෙනෙක් අද (07) දින හඳුනාගත් බව යුද හමුදාපති, ජෙනරාල් ශවේන්ද්ර සිල්වා මහතා පවසයි. මේ සමග කොවිඩ් ආසාදිත බවට මෙරටදී හඳුනාගත් සමස්ත ආසාදිතයින් ගණන 327,019ක් දක්වා ඉහළ ගොස් තිබෙනවා.
මේ අතර ඊයේ (06) කොවිඩ් මරණ 98ක් වාර්තා වී ඇති බව සෞඛ්ය සේවා අධ්යක්ෂ ජනරාල්වරයා විසින් අද (07) දින තහවුරු කර තිබෙනවා. ඒ සමග මෙරට සමස්ත කොවිඩ් මරණ ගණන 5,017ක් දක්වා ඉහළ ගොස් තිබෙනවා.
කිරි දෙන මවුවරුන්ට COVID-19 එන්නත ලබා ගැනීමේ කිසිදු අවදානමක් නොමැති බව ලෝක සෞඛ්ය සංවිධානයේ ප්රධාන විද්යාඥ සෞම්යා ස්වාමිනාදන් මහත්මිය පැවසුවාය
සෞම්යා ස්වාමිනාදන් මහත්මිය කියා සිටියේ දරුවන් බිහි කළ සහ කිරි දෙන කාන්තාවන්ට එන්නත් ලබා ගත හැකි බවයි.
“කිසිඳු අවදානමක් නැහැ. දැනට භාවිතා කරන සියලුම එන්නත් වල සජීවී වෛරසයක් නැහැ. ඒ වගේම කොවිඩ් වෛරසය මව්කිරි හරහා සම්ප්රේෂණය වීමේ අවදානමක් නැහැ. ඇත්ත වශයෙන්ම මව්වරුන්ගේ ප්රතිදේහ මව්කිරි තුළින් දරුවන්ට යා හැකියි, ”ඇය පැවසුවාය.
අධි සම්ප්රේෂණයක් සහිත ඩෙල්ටා ප්රභේදය ලැව් ගින්නක් මෙන් රට පුරා පැතිර යන හෙයින් හැකි ඉක්මනින් තමන්ට හිමි කොවිඩ් එන්නත ලබා ගන්නා ලෙස රජය පොදු ජනතාවගෙන් ඉල්ලා සිටියේය.
අද (07) නිවේදනයක් නිකුත් කරමින් රජයේ ප්රවෘත්ති දෙපාර්තමේන්තුව ජනතාවගෙන් ඉල්ලා සිටින්නේ සෞඛ්ය උපදෙස් හා භාවිතයන් දැඩි ලෙස පිළිපදින ලෙසයි.
වෛරසයෙන් ආරක්ෂා වීම සඳහා ජනතාව විසින් අනුගමනය කළ යුතු පහත දැක්වෙන උපදෙස් මෙම මාධ්ය නිවේදනය මගින් යළි අවධාරණය කර ඇත.
කොවිඩ්-19 ආසාදිත රෝග ලක්ෂණ නොමැති හෝ මෘදු රෝග ලක්ෂණ සහිත රෝගීන් සඳහා නිවසේ සිටම ප්රතිකාර ලබා දීම සඳහා සෞඛ්ය අමාත්යාංශය මාර්ගෝපදේශ නිකුත් කර ඇත.
මාර්ගෝපදේශයන්ට අනුව, නිවාස පදනම් කරගත් සත්කාර සහ ආයතනික සෞඛ්ය සේවා අවශ්ය වෛරස් ආසාදිත පුද්ගලයින් පරීක්ෂා කිරීම සඳහා ප්රා දේශීය සෞඛ්ය සේවා කාර්යාලය අදාළ ප්රදේශයට වගකිව යුතුය.
නිවසේ සිට රැකවරණය සඳහා සුදුසුකම් ලබන රෝගීන්;
තවද, නිවසේ නිරෝධායනය කළ රෝගියෙකු අසනීප වූ දින 14 දී නිදහස් කළ හැකිය. රෝග ලක්ෂණ පවතී නම් රෝග ලක්ෂණ නිරාකරණය වන තුරු රෝගියා නිරීක්ෂණය කෙරේ.
COVID-19 ඩෙල්ටා ප්රභේදය ව්යාප්තිය සමග රට විශාල ව්යසනයකට ඇද වැටීම වැළැක්වීම සඳහා රජය දැඩි සංචරණ සීමා පැනවිය යුතු බව මහජන සෞඛ්ය පරීක්ෂකවරුන්ගේ සංගමය (PHIU) අවධාරණය කළේය.
මහජන සෞඛ්ය පරීක්ෂකවරුන්ගේ සංගමයේ සභාපති උපුල් රෝහණ පැවසුවේ භූමියේ තත්වය අතිශයින්ම තීරණාත්මක හා අවදානම් සහගත බවයි.
“ඉහළ සම්ප්රේෂණ හැකියාවක් සහිත ඩෙල්ටා ප්රභේදයක් රට තුළ ව්යාප්ත වෙමින් තිබුණත් රජයේ වගකිව යුතු ප්රබලයින් නිසි පියවර ගන්න බවක් අපට පෙනී යන්නේ නැහැ. ඒ අනුව අපට පැහැදිලි වෙන්නේ මේ වසංගත ව්යාප්තිය පාලනයට රජයට පැහැදිලි උපාය මාර්ගයක් නැති බවයි. දෛනික රෝගීන් සංඛ්යාව 3,500 ඉක්මවා ගියහොත් සෞඛ්ය අංශ දැඩි ලෙස අර්බුදකාරී තත්ත්වයට පත්වෙනවා. ඒ සමග වසංගත පාලනය ගිලිහී යනවා. මේ අනුව, තත්වය ආපසු හැරවීම අපහසු වීමට පෙර දැඩි සංචරණ සීමා පැනවීම ඉතාමත් වැදගත් වෙනවා‘‘ යැයි උපුල් රෝහණ මහතා පැවසීය.
සුපිරි වෙළඳසැල්, උද්යාන සහ පොදු ස්ථාන වල සෞඛ්ය මාර්ගෝපදේශ සහ භාවිතයන් නොසලකා හරින ජනතාව තවමත් දක්නට ලැබෙන බව ද ඔහු පැවසීය.
පසුගිය දින කිහිපය තුළදී මහජන සෞඛ්ය පරීක්ෂකවරුන් අට දෙනෙකුට කොවිඩ් -19 ආසාදනය වී ඇති බව පැවසූ ඔහු, සෞඛ්ය අංශයේ නිලධාරීන්ට ද දිනපතා වෛරසය වැළඳෙන බව කීවේය.
කොවිඩ් ආසාදිතවූ තවත් 98 දෙනකු ඊයේ (5) මරණයට පත් වී ඇතැයි සෞඛ්ය සේවා අධ්යක්ෂ ජනරාල්වරයා අද (6) තහවුරු කළේය. මෙය දිනක් තුළ මෙරට සිදු වූ වැඩිම කොවිඩ් මරණ සංඛ්යාව බවයි වාර්තා වන්නේ.
මියගිය අයගෙන් 70 දෙනකු වයස අවුරුදු 60 ට වැඩි අය වන අතර අවුරුදු 30 ත් 59 ත් අතර වයසේ පසුවන 27 දෙනෙක් සහ වයස අවුරුදු 30ට අඩු එක් අයෙක්ද වන අතර මියගිය අය අතර පිරිමි අය 54 දෙනෙක් සහ කාන්තාවෝ 44 දෙනෙක් වෙති.
ඊයේ සිදු වූ මරණ 98ත් සමඟ මෙරටින් වාර්තා වූ කොරෝනා ආසාදිත මරණ සංඛ්යාව 4,919 ක් දක්වා ඉහළ ගොස් ඇත.
හිස් ගෑස් සිලින්ඩර් ලක්ෂ 29 ක් බයිසිකල්, ත්රීවීල්, කාර්වල පටවාගෙන පාරිභෝගිකයෝ හන්දියක් හන්දියක් ගානේ යමින් සිටින බවත්, ගෑස් හිඟය දිනෙන් දිනම උත්සන්න වන අතරම ගෑස් අර්බුදය රටේ ආර්ථිකයට දැරිය නොහැකි බරක් වන බවත් හිටපු ආණ්ඩුකාර රජිත් කීර්ති තෙන්නකෝන් පවසයි.
ලංකාවේ දෛනික ගෑස් අවශ්යතාව මෙ.ටො. 1600 කි. ඒයින් ලාෆ්ස් මෙ.ටො. 350 ක් බෙදාහරින්නේ ලාෆ්ස් සමාගමයි. සපුගස්කන්ද රජයේ තෙල් පිරිපහදුවෙන් ලැබනෙ ගෑස් මෙ.ටො. 25 පමණක් දැනට සමාගම නිකුත් කරයි.
2015 – 2019 වකවානුවේ ලිට්රෝ සමාගම ගෑස් සිලින්ඩර ලක්ෂ 32 ක් ද, ලාෆ්ස් සමාගම සිලින්ඩර ලක්ෂ 8 ක් ලෙස ලක්ෂ 40 ක් පාරිභෝගිකයාට අලෙවි කර ඇත. 2020 – 2021 සමයේ තවත් සිලින්ඩර මිලියන 1.2 ක් අලෙවි කර ඇත. මෙරට පවුල් ලක්ෂ 55 කි. ගෑස් සිලින්ඩර මිලියන 11.5 කි. එයින් මිලියන 2.9 ක ට දැන් ගෑස් නැත.
ණයවර ලිපි විවෘත කිරීම සඳහා ඩොලර් නොමැතිවීම, ආනයන මිල හා අලෙවි මිල අතර පරතරය හේතුවෙන් ලාෆ්ස් ආයතනය දැන් විකුණනු ලබන්නේ සපුගස්කන්දෙන් ලැබෙන ගෑස් පමණී. ලිට්රෝ සමාගම වසරේ මුල් මාස 3 තුල රු. බිලියන 3.8 ක් පාඩු ලැබීය. මේ මාසයේ ලිට්රෝ පාඩුව රු. බිලියන 1.6 ක් පමණ විය හැකිය. 2021 වසරේ ලිට්රෝ සමාගම රු. බිලියන 16 ඉක්මවන පාඩුවක් ලබනු ඇත.
අන්ත දිළින්දන් ඇතුළු මිලියන 22 ක ජනතාවගේ බදු මුදලින් රටේ ජනගහනයෙන් 1/5 කට රජට අඩු මිලට ගෑස් සපයයි. ශ්රී ලංකන් ආකාරයේ දැවැන්ත පාඩු ලබන රාජ්ය අයතනයක් ඒමගින් බිහිවෙමින් ඇත. එහි ප්රතිඑලය ලෙස රටේ ආර්ථික හා බැංකු පද්ධතිය මුළුමනින්ම කඩා වැටීය හැකිය.
ලක්ෂ 29 ක් වන පාරිභෝගිකයින්ට ගෑස් ලබාදීමේ වැඩපිළිවෙලක් රජය වහා ඇරඹිය යුතුව ඇත.
කෝවිඩ් 19 වසංගතයේ වත්මන් ව්යාප්තිය සැලකිල්ලට ගෙන විවාහ මංගල උත්සව සහ වෙනත් එවැනි අවස්ථාවන්ට සහභාගී වන ජන සංඛ්යාව සීමා කිරීමට තීරණය කර ඇති බව කෝවිඩ් 19 පැතිරීම වැළැක්වීමේ ජාතික ක්රියාන්විත මධ්යස්ථානයේ ප්රධානී, යුද හමුදාපති ජෙනරාල් ශවේන්ද්ර සිල්වා මහතා පැවසුවා.
නව තීරණය අනුව,
රාජ්ය සේවය සාමාන්ය පරිදි පවත්වා ගෙන යාමේදී අනුගමනය කළ යුතු ක්රියා පටිපාටිය පැහැදිලි කරමින් රාජ්ය සේවා, පළාත් සභා සහ පළාත් පාලන අමාත්යාංශ ලේකම්වරයා විසින් අද (06) දින නව චක්රලේඛයක් නිකුත්කර තිබෙනවා. එම සම්පූර්ණ මාධ්ය නිවේදනය පහත පළ වෙනවා.
දෛනිකව වාර්තාවන කොවිඩ් රෝගීන්ගේ ප්රමාණය ඉහළයාම හේතුවෙන් රෝහල් ධාරිතාවය ඉක්මවා යාම පාලනය කිරීම සදහා ජනාධිපතිවරයාගේ සහ සෞඛ්ය අමාත්ය පවිත්රා වන්නිආරච්චි මහත්මියගේ උපදෙස් පරිදි රෝගීන් රෝහල් ගත කිරීම ප්රමුඛතාවයන් අනුව සිදු කිරීමට සෞඛ්ය අමාත්යාංශය පියවර ගෙන ඇත.
ඒ අනුව, සංකූලතා නොමැති, වයස අවුරුදු 02 ට වැඩි 65 ට අඩු, අඩු අවදානම්, රෝග ලක්ෂණ පෙන්නුම් නොකරන හෝ සුළු රෝග ලක්ෂණ පෙන්වන කාණ්ඩයන්ට අයත් කොවිඩ් ආසාදිතයින් නිවෙස් තුළ වෛද්ය අධීක්ෂණය මත රැකබලා ගැනීමට පියවර ගැනීමටත් අවධානම් තත්ත්වයේ පසුවන පිරිස් රෝහල්ගත කිරිමටත් අදාලව සෞඛ්ය අමාත්යාංශය මාර්ගෝපදේශ මාලාවක් නිකුත් කර ඇති අතර, සෞඛ්ය සේවා අධ්යක්ෂ ජනරාල්වරයා විසින් එම මාර්ගෝපදේශ පළාත් සහ ප්රාදේශීය සෞඛ්ය සේවා අධ්යක්ෂවරුන් ඇතුලු සියළුම සෞඛ්ය ආයතන ප්රධානීන් වෙත යොමු කිරිමට පියවර ගෙන ඇත.
පැය 24 පුරා ක්රියාත්මක ප්රධාන දුරකථන මධ්යස්ථානයක් (Call Center – 1390) හරහා රෝගීන් කළමණාකරණ කටයුතු (PHIMS – Patient Home Isolation and Management System) සිදු කරනු ලැබේ. මෙමගින් රෝගියාට පහසුවෙන් තම නිවසේ සිට දින 14 ක් වෛද්ය අධීක්ෂණය (Call – Center and the Medical Care Team) යටතේ ප්රතිකාර ලබාගත හැක. යම් හෙයකින් රෝගී තත්ත්වය උත්සන්න වුවහොත් කඩිනමින් එම රෝගීන් පිළිබද තොරතුරු දුරකථන ඔස්සේ ලබාගෙන රෝහල්ගත කිරිමට පියවර ගනු ලබන අතර, මෙම ක්රමවේදය මගින් අනවශ්ය ලෙස රෝගීන් රෝහල් ගත කිරීමෙන් රෝහල් වාට්ටු තුල ධාරිතාවය පිළිබද ගැටළු සහගත තත්ත්වයන් අවම වනු ඇත.
පී.සී.ආර් හෝ ඇන්ටිජන් පරික්ෂාවෙන් පසු ඔහු කොවිඩ් ආසාදිතයෙකු ලෙස හදුනා ගන්නා ලද්දේ නම් ප්රාදේශයේ සෞඛ්ය වෛද්ය නිලධාරී හට ලබාදී ඇති මාර්ගෝපදේශ නිර්ණායකයන්ට අනුකූලව එම රෝගීයා පරික්ෂා කර නිවසේ රඳවා ප්රතිකාර කිරීම හෝ රෝහල් ගත කිරීමට පියවර ගැනිම සිදු කරනු ලබයි. මෙහිදී රෝගියා නිවෙස් තුල ප්රතිකාර ලබාගන්නේ නම් ඒ සදහා තම කැමැත්ත ද පළ කළ යුතුය. නිවෙස් තුල රඳවන රෝගීන් කළමණාකරණය කළ යුතු ආකාරය ද මාර්ගෝපදේශ මාලාවෙන් පෙන්වා දී ඇත. අනතුරුව පරිගණක තාක්ෂණය ක්රමවේදය ඔස්සේ රෝගීන් ලියාපදිංචිය සිදු කෙරේ. ඒ අනුව එම තොරතුරු ප්රධාන දුරකථන මධ්යස්ථානයක් හා සම්බන්ධ වේ.
දුරකථන මධ්යස්ථානය ඔස්සේ රෝගීයාගේ තොරතුරු ලබාගෙන තහවුරු කර ගැනීමෙන් පසු ප්රධාන දුරකථන මධ්යස්ථානයේ සිට විශේෂඥ වෛද්යවරුන් ප්රමුඛ වෛද්යවරුන්ගේ අධීක්ෂණයට රෝගියා ලක්වේ. රෝගීයාට අවශ්ය වෛද්ය උපදෙස් ද මෙහිදී ලබාදෙන අතර, රෝගියාගෙන් ලබාගන්නා තොරතුරු ද පරිගණක ගත කරනු ලැබේ.
එම අධීක්ෂණ කටයුතු වල දී රෝගීන් වැඩිදුර ප්රතිකාර සදහා යොමු කිරීමට අවශ්ය වන්නේ නම් රෝගී තත්ත්වය අනුව රෝගියා යොමු කළ යුතු රෝහල් ඇතුලු ප්රතිකාර මධ්යස්ථාන වෙත ක්ෂණිකව යොමු කිරීමට පියවර ගනු ලබන අතර, ඒ සදහා ප්රාදේශීය සෞඛ්ය සේවා අධ්යක්ෂවරුන් හරහා වැඩපිළිවෙළක් ද සකස් කොට ඇත. දින 14 කින් පසු රෝගියා මුදා හැරීමෙන් පසු රෝගීන් අධීක්ෂණ කටයුතු එම ප්රදේශයේ සෞඛ්ය වෛද්ය නිලධාරී කාර්යාල හරහා අඛණ්ඩව සිදු කිරීමට ද පියවර ගෙන ඇත.
කොවිඩ් වසංගතය නිසා සමස්ත සෞඛ්ය කාර්ය මණ්ඩලය දැඩි වෙහෙසකට පත්ව ඇති අවස්ථාවක ඩෙංගු රෝග ව්යාප්තිය උත්සන්න වුවහොත් සෞඛ්ය පද්ධතිය බරපතල අවදානමකට ගොදුරු විය හැකි බව වෛද්යවරු පවසති.
මෙම අවදානමෙන් මිදීමට නිවාස සහ කාර්යාල පරිශ්ර, ඉදිකරීම් වැඩබිම් ආදී ඩෙංගු මදුරුවන් බෝවන ස්ථාන පිරිසිදුව තබා ගන්නා ලෙස වෛද්යවරු මහජනතාවගෙන් ඉල්ලා සිටිති.
මේ දිනවල සීඝ්රයෙන් පැතිර යන ඩෙංගු රෝගය පාලනය කිරීම පිළිබඳව මහජනතාව දැනුවත් කිරීම පිණිස “ඩෙංගු රෝග ව්යාප්තිය සීඝ්ර ලෙස වර්ධනය වීම හා එය මැඩ පැවැත්වීම සඳහා අනුගමනය කළ යුතු ක්රමවේද” යන මැයෙන් අද (06) පස්වරුවේ රජයේ ප්රවෘත්ති දෙපාර්තමේන්තුව සංවිධානය කළ ප්රවෘත්ති සාකච්ඡාවේදී වෛද්යවරු මේ අදහස් පල කළහ. ප්රවෘත්ති සාකච්ඡාව දෙපාර්තමේන්තු ශ්රවණාගාරයේදී පැවැත්විණ.
මහජනතාවගේ නොදැනුවත් බව සහ වගකීම් විරහිත ක්රියාකාරිත්වය රෝගය සීඝ්රයෙන් පැතිර යාමට හේතු වී ඇත. මෙහිදී රෝග ව්යාප්තිය පාලනය කිරීමට මහජනතාව දැනුවත් කිරීමේ වැඩපිළිවෙලක් ක්රියාත්මක කර ඇත.ඩෙංගු රෝගය හඳුනා ගැනීමේ පරීක්ෂණවල මිළ ගණන් අඩු කිරීම, රෝගීන් සුවපත් කර නිවෙස් කරා යැවීමට ක්රමවේදයක් සකස් කර තිබීම, රෝගීන් හඳුනාගතහොත් ඒ පරිසරය පරීක්ෂාවට ලක්කිරීම ඊට අයත්ය. මේ සඳහා පැමිණෙන නිලධාරීන්ට අවශ්ය සහයෝගය දෙන මෙන් මහජනතාවගෙන් ඉල්ලීමක් කෙරේ.
රෝගය ව්යාප්තිය පාලනය කිරීමේදී පළාත් පාලන ආයතන, සෞඛ්ය වෛද්ය නිලධාරීන්, මහජන සෞඛ්ය පරීක්ෂකවරු සහ සෙසු කාර්ය මණ්ඩල ඒකාබද්ධව ඩෙංගු මදුරුවන් බෝවන පරිශ්ර පිරිසිදු කිරීම රෝග ව්යාප්තිය පාලනයට කිරීමට මනා පිටුවහලක් වේ. තමන්ගේ නිවසේ මදුරුවන් බෝවන ස්ථාන විනාශ කිරීමෙන් මෙම වැඩපිළිවෙලට දායක වීමට මහජනතාවට විශේෂ වගකීමක් තිබේ.
කොවිඩ් සහ ඩෙංගු යන රෝග දෙකම වෛරසයකින් බෝවන අතර රෝග දෙකෙහිම රෝග ලක්ෂණ සමාන බැවින් උණ ගැනීමක් වුවහොත් වහාම වෛද්ය ප්රතිකාර සඳහා යොමු වී නිසි ප්රතිකාර ගත යුතුයි. PCR පරීක්ෂණය සහ ඩෙංගු ඇන්ටිජන් පරීක්ෂණය සිදු කිරීමෙන් රෝගය හඳුනා ගත හැකිවන අතර රුධිර පරීක්ෂාව තව දුරටත් තහවුරු කර ගෙන ප්රතිකාර සඳහා යොමු වීම තුළින් මෙම රෝගය නිට්ටාවට සුව කළ හැක.
ජාතික ඩෙංගු මර්දන ඒකකයේ අධ්යක්ෂ වෛද්ය සුදත් සමරවීර, සෞඛ්ය අමාත්යාංශයේ අතිරේක ලේකම් වෛද්ය ලක්ෂ්මී සෝමතුංග, නියෝජ්ය සෞඛ්ය සේවා අධ්යක්ෂ ජනරාල් වෛද්ය එම්. අර්නෝල්ඩ්, ජාතික ඩෙංගු මර්දන ඒකකයේ ප්රජා වෛද්ය විශේෂඥ නිමල්කා පන්නිලහෙට්ටි, ද සොයිසා කාන්තා රෝහලේ කායික රෝග විශේෂඥ ප්රියංකර ජයවර්ධන යන මහත්ම මහත්මීහූ මේ සාකච්ඡාවට සහභාගී වූහ.
කොවිඩ් රෝග ලක්ෂණ සහිතව රෝහල් වෙත පැමිණෙන කිසිඳු රෝගියෙකු අපහසුතාවට පත්වීමට ඉඩ නොතබන ලෙස ජනාධිපති ගෝඨාභය රාජපක්ෂ මහතා සෞඛ්ය අංශ ප්රධානීන්ට උපදෙස් දෙයි.
කොවිඩ් රෝග ලක්ෂණ හේතුවෙන් කොළඹ ඇතුළු ප්රධාන නගර කිහිපයක රෝහල් වෙත දෛනිකව පැමිණෙන රෝගීන්ගේ ඉහළ යාමක් වාර්තා වී තිබේ. එලෙස පැමිණෙන රෝගීන් නිර්ණය කිරීමේ දී ඇතිවන තදබදය හේතුවෙන්, ඔවුන් අපහසුතාවට ලක් නොවිය යුතු බව ජනාධිපතිවරයා අවධාරණය කළේය.
ප්රධාන නගර කිහිපයක් ආශ්රිතව අතරමැදි ප්රතිකාර මධ්යස්ථාන මීට මාස කිහිපයකට පෙර සිටම සූදානම් කර ඇත. හදිසි ඕනෑම අවස්ථාවක ආසාදිතයන් අපහසුතාවන්ට පත්වීම වැළැක්වීමට එම මධ්යස්ථාන සැලසුම් කෙරිණ. එම නිසා රෝග ලක්ෂණ පෙන්නුම් කරන්නන් පළමුවෙන් අතරමැදි ප්රතිකාර මධ්යස්ථාන වෙතත්, පසුව රෝගියාගේ තත්ත්වය නිරීක්ෂණය කර රෝහල් වෙතත් යොමු කිරීමේ අවශ්යතාව ජනාධිපතිවරයා පෙන්වා දුන්නේය.
එන්නත්කරණය සහ ඉදිරි මෙහෙයුම් සම්බන්ධයෙන් කොවිඩ් මර්දන විශේෂ කමිටුව සමඟ අද (06) පෙරවරුවේ ජනාධිපති කාර්යාලයේ පැවති හමුවේදී ජනාධිපතිවරයා මේ බව සඳහන් කළේය.
රෝහල් මට්ටමෙන් ජනතාව අපහසුතාවයට පත්වීම වැළැක්වීමේ ක්රමවේදයක් සැකසීමට අමාත්යවරු, රාජ්ය අමාත්යවරු, සෞඛ්ය නිලධාරීන් සෘජුව මැදිහත් වන ලෙස ජනාධිපතිවරයා විසින් උපදෙස් දෙනු ලැබිණ.
රෝගය වැළඳීමෙන් වැළකී සිටීමට අවශ්ය උපදෙස් මාධ්ය මගින් ජනතාවට නිරන්තරයෙන් ලබාදීම සෞඛ්ය විශේෂඥයන්ගේ වගකීම බව ජනාධිපතිවරයා සඳහන් කළේය.
දෙවන එන්නත් මාත්රාව ලබාදෙන ඕනෑම මධ්යස්ථානයකින් වයස අවුරුදු 30ට වැඩි ඕනෑම අයෙකුට පළමු මාත්රාව ලබාගැනීමට පහසුකම් සැලසීමට ද තීරණය කෙරිණ.
වයස අවුරුදු 18ට වැඩි මෙරට සමස්ත ජනගහණයට එන්නත් මාත්රා දෙකම සැප්තැම්බර් මසට පෙර ලබාදිය හැකි පරිදි එන්නත් ඇණවුම් කර තිබේ. තෙවන මාත්රාවක් සඳහා වුවද රජය සූදානම්ය. එහෙත් ජනතාවගෙන් රෝගය පැතිර යාම වැළැක්වීමට ලබාදෙන සහාය අවම වීම කණගාටුදායක බව විශේෂඥ වෛද්ය ප්රසන්න ගුණසේන මහතා පෙන්වා දුන්නේය.
ගත වූ මාසය තුළ රට පුරා උද්ඝෝෂණ 120ක් පවත්වා තිබේ. මේ සෑම එකකටම අවම වශයෙන් 1500කට අධික පිරිසක් සහභාගී වී ඇත. සෞඛ්ය උපදෙස් පිළිනොපැද මෙලෙස වූ ජන ඒකරාශි වීම රට පුරා කොවිඩ් පැතිර යාම වේගවත් වීමට හේතු වී ඇතැයි බුද්ධි අංශ පෙන්වා දෙයි.
කොවිඩ් මර්දන මෙහෙයුම් කාර්යයන්හි නිරත බොහෝ දෙනෙක් දේශීය ඖෂධ දෛනිකව ලබාගනිති. එය ප්රතිශක්තීකරණයට බෙහෙවින් ඉවහල් වී තිබේ. එන්නත ලබාගත්ත ද දේශීය ඖෂධ දෛනිකව ලබාගැනීම හා ධූමායනය රෝගය වැළදීම අවම කිරීමට ඉවහල් වනු ඇතැයි දේශීය වෛද්ය රාජ්ය අමාත්ය සිසිර ජයකොඩි මහතා පෙන්වා දුන්නේය.
පරිසරයට අහිතකර තවත් භාණ්ඩ වර්ග 08 ක් තහනම් කිරීමට ඉදිරියේදී අමාත්ය මණ්ඩල පත්රිකාවක් යොමු කරන බව පරිසර කටයුතු පිළිබඳ අමාත්යාංශයීය උපදේශක කාරක සභාවේ සභාපති, අමාත්ය මහින්ද අමරවීර මහතා ඊයේ (05) පැවසීය.
ඊට පොලිතීන් බෑග්, ප්ලාස්ටික් ඉදි ආප්ප වට්ටි, ප්ලාස්ටික් පිගන් ,ප්ලාස්ටික් කෝප්ප, ප්ලාස්ටික් හැඳි වැනිදෑ ඇතුළත් වන බව අද පැවති එම කාරක සභාවේ රැස්වීමේදී අමාත්යවරයා වැඩිදුරටත් කීවේය.
ලන්ච්ෂීට් තහනම් කිරීමේ නීතිය ලබන සැප්තැම්බර් 01 වැනිදා සිට දැඩිව ක්රියාත්මක කරන බවද අමාත්ය මහින්ද අමරවීර මහතා කාරක සභාවේදී අවධාරණය කළේය. ඊට අදාළ වැටලීම් ඉහළ නංවන ලෙසද හෙතෙම නිලධාරීන්ට උපදෙස් ලබා දුන්නේය.
වර්තමානයේ උද්ගතව ඇති කොවිඩ් 19 වසංගත තත්ත්වය සමඟ භාවිත කරන මුව ආවරණ නිසි පරිදි බැහැර නොකිරීම හේතුවෙන් සමාජය තුල පාරිසරික ගැටලු රැසක් උද්ගතව පවතින බව පාර්ලිමේන්තු මන්ත්රී මධුර විතානගේ මහතා කාරක සභාවේදී පෙන්වා දුන්නේය.
මුව ආවරණ නිසි පරිදි බැහැර කිරීම සම්බන්ධයෙන් මාර්ගෝපදේශ සංග්රහයක් හඳුන්වාදී ඇති බවත්, එය මේ වන විට සෞඛ්ය අමාත්යාංශයේ අනුමැතිය සඳහා යොමු කර ඇති බවත්, මධ්යම පරිසර අධිකාරිය සභාවට දැන්වීය.
මුව ආවරණ බැහැර කිරීමේදී ජනතාව වඩාත් සැළකිලිමත් විය යුතු බව කාරක සභාවේ සභාපතිවරයාද මෙහිදී කීවේය.
මෙම කාරණයේදී පළාත් පාලන ආයතන වෙත විශාල වගකීමක් පැවරෙන බව පරිසර කටයුතු අමාත්යාංශයේ ලේකම් විශේෂඥ වෛද්ය අනිල් ජාසිංහ මහතා කාරක සභාවේදී පෙන්වා දුන්නේය.
ගන්නොරුව ප්රදේශයේ මහවැලි ගඟ ආශ්රිතව අනවසරයෙන් හෝටලයක් ඉදිකර තිබීම සම්බන්ධයෙන් කාරක සභාවේ විශේෂ අවධානය යොමු විය. ප්රදේශයේ ප්රබල ව්යාපාරිකයෙකු මෙය ඉදිකර ඇති බවත්, මේ හේතුවෙන් පරිසර ගැටළු රැසක් නිර්මාණය වී ඇති බවත් පාර්ලිමේන්තු මන්ත්රී වසන්ත යාපා බංඩාර මහතා මෙහිදී අවධාරණය කළේය. මේ සම්බන්ධව අදාළ ආයතන නිසි ක්රියාමාර්ග නොගෙනීම බරපතළ ගැටලුවක් බවද මන්ත්රීවරයා කීවේය.
මේ පිළිබඳව විශේෂ සාකච්ජාවක් කඩිනමින් පැවැත්විය යුතු බවත්,එම ස්ථානයේ නිරීක්ෂණ චාරිකාවක නිරතවීම යෝග්ය බවත් කාරක සභාව මෙහිදී නිර්දේශ කළේය.
මහවැලි ගඟ දෙපස අනවසර ඉදිකිරීම් රැසක් පවතින බවත්, ඒවා ඉවත් කිරීම පිළිබඳව විශේෂ අවධානයක් යොමුකළ යුතු බවත් වසන්ත යාපා බංඩාර මන්ත්රීවරයා කාරක සභාවේදී පැවසීය. බොහෝ විට දීර්ඝ සති අන්තවල අනවසර ඉදිකිරීම් සිදු කරන බවත්, ඒවා නැවැත්වීමට පළාත් පාලන ආයතන වලට පවතින නෛතික ප්රතිපාදන අවම බවත් ඔහු කීවේය.
පරිසර පනත සංශෝධනය කිරීමේදී මෙවැනි කාරණා පිළිබඳව විශේෂ සැලකිල්ලක් දක්වන ලෙසද කාරක සභාවේ සභාපතිවරයා නිලධාරින්ට උපදෙස් දුන්නේය.
මිනිස් ක්රියාකාරකම් නිසා මහවැලි ගඟ ආශ්රිතව දූපත් නිර්මාණය වීම හේතුවෙන් සිදුවන හානිය සුළුපටු නොවන බවද වසන්ත යාපා බංඩාර මන්ත්රීවරයා කාරක සභාවේදී පෙන්වා දුන්නේය.
රටපුරා පවතින ගංගා 103 ක් සංරක්ෂණය කිරීමට “සුරකිමු ගංගා” ජාතික වැඩසටහන යටතේ විශේෂ වැඩසටහනක් ජනාධිපති ගෝඨාභය රාජපක්ෂ මහතාගේ උපදෙස් මත මේ වන විටත් ක්රියාත්මකබව පැවසූ කාරක සභාවේ සභාපති මහින්ද අමරවීර මහතා ගංගාවල රක්ෂිතය ලකුණු නොකිරීම ප්රබල ගැටලුවක් බවට පත්ව ඇති බවද කීවේය. ඒ අනුව කැලණි ගඟේ රක්ෂිතය ලකුණු කිරීම මේ වන විට ආරම්භ කර තිබෙන බවද හෙතෙම සඳහන් කළේය.
දිවයිනේ සෑම ප්රධාන නගරයක්ම ආවරණය වන පරිදි පරිසර විගණනයක් සිදු කිරීමේ අවශ්යතාවද කාරක සභාවේදී සාකච්ජා විය.
මෙම කාරක සභා රැස්වීමට පාර්ලිමේන්තු මන්ත්රිවරුන් වන ගුණතිලක රාජපක්ෂ, අමරකීර්ති අතුකෝරළ,කිංස් නෙල්සන්,වීරසුමන වීරසිංහ,උපුල් මහේන්ද්ර රාජපක්ෂ යන මහත්වරුද, රාජ්ය නිලධාරිහු පිරිසක්ද සහභාගී වූහ.
කොළඹ නගරය තුළ ඩෙල්ටා ප්රභේදය ඉතාමත් භයානක ලෙස පැතිර ගොස් ඇතැයි ශ්රී ජයවර්ධනපුර විශ්වවිද්යාලයේ ආචාර්ය චන්දිම ජීවන්දර මහතා පවසයි.
තම ට්විටර් ගිණුම හරහා ප්රස්ථාරයක් අනුසාරයෙන් කොළඹ නගරයේ පැතිරීම පෙන්වා දෙන ආචාර්ය ජීවන්දර, ජූලි මස පළමු සතියේ 19.3% ක් වූ ඩෙල්ටා ආසාදිතයන් හමුවීමේ ප්රතිශතය ජූලි මස අවසන් සතිය වන විට 75% කට වඩා වර්ධනය වී ඇතැයි ද මෙම දත්තයන් විශ්වවිද්යාලයේ විද්යාගාර වෙත ලැබුණු PCR පරික්ෂණ විශ්ලේශණය කිරීමෙන් ලබාගත් බව ආචාර්ය චන්දිම ජීවන්දර වැඩිදුරටත් පවසයි.
ලක්ෂ තුනකට අධික කොවිඩ් ආසාදිතයින් අතරින් කොවිඩ් ආසාදනයවූ දරුවන් 45,831 ක් මේ දක්වා වාර්තා වී ඇතැයි ද ඉන් 14 දෙනකු මරණයට පත්ව ඇතැයි ද සෞඛ්ය ඇමැතිනී පවිත්රා වන්නිආරච්චි මහත්මිය අද (05) පාර්ලිමේන්තුවේදී පැවසුවාය.
විපක්ෂ නායක සජිත් ප්රේමදාස මහතා ඇසූ ප්රශ්නයකට පිළිතුරු වශයෙන් සෞඛ්ය අමාත්යවරිය මේ බව පැවසුවාය.
මියගිය දරුවන්ගෙන් බහුතරය වසය 0-5 අතර දරුවන් බව පැවසූ සෞඛ්ය අමාත්යවරිය වයස 6-10 අතර දරුවන් තිදෙනෙකුද වයස 11-15 අතර දරුවන් දෙදෙනෙකුද වයස 16-18 අතර දරුවන් දෙදෙනෙකු ද මියගිය අතර සිටින බව පැවසු අමාත්යවරිය කොවිඩ් 19 ආසාදිත දරුවන් සංඛ්යාව සැලකිය යුතු ලෙස ඉහළ යමින් පවතින බවද ප්රකාශ කළාය.
වත්මන් කොවිඩ් වසංගත අවදානම සැලකිල්ලට ගෙන රාජ්ය සේවකයන් ආයතන ප්රධානියාගේ අභිමතය පරිදි මුර දෙකකට සේවයට කැඳවීමට මුදල් අමාත්ය බැසිල් රාජපක්ෂ මහතාගේ ප්රධානත්වයෙන් අද (05) දින පැවැත්වුණු සාකච්ඡාවකදී තීරණය කෙරුණු බව ඖෂධ නිෂ්පාදන සැපයුම් හා නියාමන රාජ්ය අමාත්ය මහාචාර්ය චන්න ජයසුමන මහතා පාර්ලිමේන්තුවේදී පැවැසීය.
රාජ්ය අමාත්ය චන්න ජයසුමන මහතා මෙසේ පැවැසුවේ කොරෝනා මර්දන කටයුතු සඳහා සෞඛ්ය අමාත්යාංශයට අතිරේක මුදල් ප්රතිපාදන වෙන් කිරීම සඳහා ඉදිරිපත් කෙරුණු පරිපූරක ඇස්තමේන්තුව පිළිබඳව අද (05) පැවති විවාදයේදීය.
රාජ්ය සේවයේ නිරතව සිටින ගැබිනි සේවිකාවන්ට නිවසේ සිට රාජකාරිය කිරීම සඳහා අවස්ථාව සලසා දීමටද එහිදී තීරණය කෙරුණු බව ද මෙම තීරණ වලට අදාල චක්රලේඛ රාජ්ය පරිපාලන අමාත්යංශයේ ලේකම්වරයා විසින් අද හෙටම නිකුත් කෙරෙනු ඇතැයිද රාජ්ය අමාත්යවරයා සඳහන් කළේය.
නව තීරණය ගැන වැඩි දුරටත් කරුණු පැහැදිලි කළ රාජ්ය අමාත්යවරයා ‘‘රාජ්ය සේවකයන් ආයතන ප්රධානීන්ගේ අභිමතය පරිදි සඳුදා, අඟහරුවාදා, බදාදා සහ බ්රහස්පතින්දා, සිකුරාදා සෙනසුරාදා වශයෙන් මුර දෙකකට සේවයට කැඳවීමට පියවර ගැනීමට නියමිතයි. මේ සම්බන්ධ සෞඛ්ය නිර්දේශ නිසියාකාරව ක්රියාත්මක වන්නේදැයි සොයා බැලීම සඳහා සෑම ආයතනයකම නිසි බලධාරියකු බැගින් පත් කිරීමටද තීරණය කර තිබෙනවා. රාජ්ය පරිපාලන අමාත්යංශයේ ලේකම්වරයා මේ සම්බන්ධ කටයුතු කරන බවයි සාකච්ඡා වුණේ‘‘