සටහන – ගජබා නාගහවත්ත
ඉන්දියාවේ හින්දු පුවත් පත එරට ජාත්‍යන්තර භූමිකාව සම්බන්ධයෙන් සංවිධානය කරන සමුළුවට ආරාධනා ලැබු එ.ජා.ප නායකයා එහි දෙවන දිනයේ ප්‍රධාන දේශනය පැවැත්වීය. සමුළුව විවෘත කළේ ඉන්දියානු ජනපති විසිනි.
දින හතරක අවකාශයක් ඒ හරහා සජිත් පිළට ලබාදුන් එ.ජා.ප නායකයා තමා සිය රට පැමිණෙන විට සන්ධානය හා ලකුණ මෙන්ම ව්‍යවස්ථාවට අදාළ කරුණු නිම කොට තබන ලෙස ඉල්ලා තිබින. නැතහොත් පැමිණි පසු නායකත්ව බලතල යටතේ සියළු තීන්දු ගන්නා බවද අගවා තිබින. එහෙත් අවශ්‍ය කරුණු නායකයා සිය රට පැමිණෙන විටද සපුරා නොතිබුන බවට ආරංචි පළවිය.
විපක්ෂ නායක සජිත් හා සන්ධාන මහාලේකම් මද්දුම බණ්ඩාර බදාදා එ.ජා.ප නායකයාගේ නිවසට පැමිණියේ ඒ අතරතුරය.
“සමගි ජන බලවේගයේ සමාරම්භක උළෙල මාර්තු 02 දා නෙළුම් පොකුණේ දි පවත්වනවා. ඔබතුමාටත් ආරාධනයක් කරන්නයි ආවේ.” විපක්ෂ නායකයා කීවේය.
” මම එන්නම්. ඒත් හැමදේම නිල වශයෙන් සිදු වෙන්න ඕනේ. සන්ධානය එහි ලකුණ හා එම ව්‍යවස්ථාව සුදානම්ද? ඒවාට කෘත්‍යධිකාරියේ අනුමැතිය ගන්න ඕනේ.” නායකයා කීවේය.
“ඒ කටයුතු වේගයෙන් සිදුවෙනවා.” විපක්ෂ නායක හා මද්දුම බණ්ඩර පිළිතුරු දුන්නේය.
“එහෙනම් මම වහාම කෘත්‍යාධිකාරි මණ්ඩලය රැස් කරන්නම්. එතනදි අනුමත කර ගනිමු.” නායකයා කීවේය.
වෙනත් ආරංචි මාර්ග කියා පාන්නේ සන්ධානයේ ලකුණ ගැන විපක්ෂ නායක හා රවි කරුණානායක අතර සාකච්ඡා තවමත් නිම වී නොමැති බවය. එමෙන්ම එ.ජා.ප නයකයා හා විපක්ෂ නායක දෙදෙනා එකමුතුව පත් කළ ව්‍යවස්ථාව තැනිමේ නීතිඥ මණ්ඩලයේ කටයුතුද නිමවී නැති බවය. එම කටයුතු සීග්‍රයෙන් නිමවෙමින් තිබෙන බවද එම ආරංචි මාර්ග කියාපායි.
බ්‍රහස්පතින්දා පෙරවරුවේ එ.ජා.ප නායකයා සිරිකොත ගියේ රාජකාරි ඉටු කිරිමටය. පැමිණ සිටි බොහෝ දෙනෙකු සමග ද නායකයා කතා බහ කළහ.
” මේ වැඩ දැන් අත ගා ගා ඉන්න වෙලාවක් නැහැ. පාර්ලිමේන්තුව ලබන සතියේ විසුරුවාවි.” ලක්ෂ්මන් කිරිඇල්ල කීවේ දැඩි ස්වරයෙනි.
“ඇත්ත එයාලගේ වගකීම් කඩිනම් කරන්න ඕනේ. රවි හංසයා දෙන්න පක්ෂයේ නම මාරු කරන්නත් කැමතියිලු. මෙයාලා ඒ පක්ෂයට බැදිලා හරි මේක ඉවර කර ගන්න ඕනේ.” නායකයා කීවේය.
“විපක්ෂ නායකගේ කණ්ඩායම නොනිල විදියට යමක් කරන්න උත්සාහ කරන එක හරි නෑ. ජනමාධ්‍යවලින් විතරක් මේක කරන්නත් බෑ.” එ.ජා.ප නීති නිලධාරියෙක් කීවේය.
“දැන් අගමැතිතුමා කොළඹින් ඡන්දය ඉල්ලනවද? විපක්ෂ නායකතුමාත් කොළඹින් එනවා කියලා තමයි ආරංචි.” චම්පිකා ප්‍රේමදාස ඇසුවේය.
“මම ඉල්ලනවා. අවසන් තීන්දුවක් තාම නෑ. සජිත් කොළඹින් එන බව අපිට කියලා නෑ. ජනමාධ්‍ය හරහා විතරක් එහෙම කරන එක එයාටත් හොද මදි. නොමිනේෂන් බෝඩ් එක තමයි සජිත් ගැන අවසන් තීන්දුව ගන්න ඕනෑ.” නායකයා කීවේ සැහැල්ලුවෙනි.
“කථානායක කරු ජාතික ලැයිස්තුවත් ඉල්ලුවේ නැහැ කියලා කියන්නේ ඇයි.” දයා ගමගේ ඇසුවේ නායකයාගෙනි.
“ඒක ඇත්ත. කරුත් තරග කරන්න හිතාගෙන ඉන්න හැඩයි. මම මීට පෙර කොළඹට එන්න කියලා සජිත්ට කිව්වා. ඒ වෙලාවේ අදට වඩා එයාට කොළඹ ගැම්මක් තිබුණ නිසයි ආරාධනා කළේ. ඒත් ආවේ නැහැ.” එ.ජා.ප නායකයා පිළිතුරු දුන්නේය.
“ආණ්ඩුව ලග ලග නානවා. වර්ජන රැල්ලක් රට පුරා යනවා. ඒවා වැඩ කරන ජනතාවගෙන්ම ආපුවා මිසක් අපි ආණ්ඩුවේ ඉන්න කොට පොහොට්ටුවෙන් කරපුවා වගේ තිරෙන් පිටුපස ඉදන් කරන ඒවා නොවෙයි. රණවිරුවොයි, ගුරුවරුයි රැකියාවෙන් දොට්ට දාපු දහස් ගණනකුයි මහ පාරේ.” දයා ගමගේ කීවේය.
“ගුවන් විදුලියේ වැටුප් ගෙවලාත් නැහැ. ඒ අතරේ සා.පෙල අසමත් ලක්ෂයකටයි. උපාධිධාරින් 50,000 කටයි රැකියා දෙන බව කියමින් මහ ඡන්දයට මිනිස්සු අන්දනවා. ණය වාරිකත් ගෙවා ගන්න බැරි රටක් බවට ලංකාව ඇද වැටිලා.” චම්පිකා ප්‍රේමදාස කී දේ සියළු දෙනා අනුමත කළහ.
“ජිනිවාවල අත්සන් කළාට පස්සේ වසර දෙකක් යනකම් ඉවත් වෙන්න බෑ. අපි කළේ මහින්ද රාජපක්ෂ බෑන් කී මූන් සමග එකග වූ දේ ඉදිරියට ගෙනිහින් එයයි රණවිරුවොයි බේරපු එකයි. ඒත් මේ ආණ්ඩුව ජිනිවාවල ආපහු නානවා. අතුරුදහන් වූ අය හා ඝාතනය වූ මාධ්‍යවේදින් ගැන හෙයන එක ඕනෑම ආණ්ඩුවක වගකීමක්. ලංකාවෙදි සිංහල බෞද්ධ රටක් කියලා මර හඩ දීපු දිනේෂ් ආණ්ඩුවේ ස්ථාවරය හැටියට ජිනිවාවලදි කිව්වේ ලංකාව බහුවාර්ගික, බහුආගමික, බහුසංස්කෘතික, බහු භාෂාමය රටක් කියලායි.” ලක්ෂ්මන් කිරිඇල්ල කීවේය.
“ඔබතුමාට විරුද්ධව ප්‍රචාරය වෙච්ච මඩ වීඩියෝව මොකක්ද? චම්පිකා ප්‍රේමදාස ඇසුවේ නවීන් දිසානායකගෙනි.
” ඒ තරුණ ව්‍යාපාරිකයා ආණ්ඩුවට ලක්ෂ එකහාමාරකට වඩා ගෙවනවා. මාස තුනක දැනුම් දීමක්වත් උසාවි නියෝගයක්වත් නැතුවයි එයාගේ අනාගතය විනාශ කළේ. මම දිගටම එවැනි අසාධාරනකම්වලට විරුද්ධව පෙනී ඉන්නවා.” නවීන් දිසානායක කීවේ හැගීම් බරවය.
