ප්‍රසන්න පසුගිය බදාදා බේරුවල ගියේ පියල්ගේ ඉල්ලීමක් අනුවය. පියල් ප්‍රසන්නට එන්න කියා තිබුණේ බේරුවල සංචාරක ව්‍යාපාරයේ ගැටලු සම්බන්ධයෙන් සාකච්ඡා කිරීමටය. ඒ අනුව ප්‍රසන්න එදින උදේ වරුව බේරුවල ප්‍රදේශයේ සංචාරක ව්‍යාපාරයේ නියැලෙන්නන් සමඟ සාකච්ඡා කර ඔවුන්ගේ ගැටලුවලට විසැඳුම් දුන්නේය. පහුගිය ආණ්ඩුව සිටි සංචාරක ඇමැතිවරුන් සම්බන්ධයෙන් මෙහිදී කතාබහක් ඇති විණි.
“පහුගිය ආණ්ඩුවලත් සංචාරක ඇමැතිවරුන් හිටියා. ඒ අයට සංචාරක කර්මාන්තය ප්‍රවර්ධනය කරනවට වඩා තිබුණේ වෙන වැඩ. වෙන වෙන දේවල් තමයි ඒ අය ප්‍රවර්ධනය කළේ“ පියල් කීවේ පසුගිය කාලයේ හිටපු සංචාරක ඇමැතිවරයා ගැනය.
“ඒක නම් ඇත්ත. පාස්කු ප්‍රහාරය හින්දා සංචාරක කර්මාන්තය බින්දුවටම වැටුණත් ඒ ඇමැතිට ගාණක්වත් තිබ්බේ නැහැ. හැමතිස්සෙම මොකක් හරි විහිලු කතාවක් කිය කියා හිටියා ඇර වෙන කිසිම දෙයක් එයා කළේ නැහැ“ ප්‍රසන්න පැවසීය.
“ඒක නෙමේ ඇමැතිතුමා මම අහන්නමයි හිටියේ පහුගිය දවසක අලුත් සභාපතිතුමාත් හමුවුණාලු නේද? පියල් ඇසුවේ පසුගිය දා පැවැති ශ්‍රි ලංකා පොදුජන නිදහස් සන්ධානයේ විධායක සභා රැස්වීම ගැනය. එම සන්ධානයේ සභාපතිවරයා වන මෛත්‍රි සහ ප්‍රසන්න අතර ඇත්තේ එතරම් හොඳ සබඳතාවක් නොවේ. පියල් ඇසුවේ ඒ ගැනය.
“මෙහෙමයි, මහින්ද මහත්තයලා තීන්දුවක් අරගෙන තියෙනවා එතුමට සභාපති ධුරය දෙන්න. මගේ විරෝධය කිසිම වෙනසක් නැහැ. එදා වගේම මම අදත් අකැමැතියි හෙටත් අකමැතියි. මාවත් විධායක සභාවට දාලා තියෙන නිසා යන්නම වෙනවනේ“ ප්‍රසන්න පැවසීය.
“ඒ කතාව නම් හරි. ඒත් තිබ්බ විරෝධයේ හැටියට මම කල්පනා කළේ කොහොමද ඔබතුමා එතුමත් එක්ක එකට වැඩ කරන්නේ කියලයි“ පියල් කීවේය.
“මම කිව්වනේ විරෝධයේ අඩුවක් නැහැ. එයත් එක්ක මට කිසි වැඩක් නැහැ නේ. මම වැඩ කරන්නේ මහින්ද මහත්තයා එක්ක. මුලින් නං මම හිතුවා විධායක සභාවට නොගිහින් ඉන්න. පස්සේ මට හිතුනා මම එහෙම ඉන්න එකත් හොඳයි කියලා. මොකද මේ වෙලාවේ තමයි පෙරේතයෝ, කුම්භාණ්ඩයේ පොහොට්ටුවට කිට්ටු කරන වෙලාව. මම හිටියොත් තමයි ඔය පෙරේතයෝ, කුම්භාණ්ඩයන්ගෙන් පක්ෂය බේර ගන්න පුළුවන් වෙන්නේ“ ප්‍රසන්න පැවසීය.
හිටපු ජනපති මෛත්‍රිපාලගේ උපන් ගම වන ගම්පහ පහල යාගොඩ ප්‍රදේශයේ ඉදිකරන ලද වෘත්තීය පුහුණු මධ්‍යස්ථානයක් පසුගිය බ්‍රහස්පතින්දා අගමැති මහින්දගේ ප්‍රධානත්වයෙන් විවෘත කෙරිණි. මෙම මධ්‍යස්ථානයට මුල්ගල් තබා තිබුණේ මෛත්‍රිය. ඒ ඔහු ජනපති ධුරය දැරූ සමයේය. එබැවින් මධ්‍යස්ථානය විවෘත කිරීමේ අවස්ථාවට ඔහු ද සහභාගී වීමට නියමිතව තිබුණේය.
විවෘත කිරීමේ අවස්ථාවට ප්‍රසන්න කල්තියා පැමිණ සිටියත් මෛත්‍රි පැමිණ සිටියේ නැත. මෛත්‍රි මහින්ද එනතුරු අතරමඟට වී බලා සිටියේය. වේලාසනම උත්සව භූමියට ආ ප්‍රසන්න එතැන සිටි සිසිර ජයකොඩි, සුදර්ශනී, සහන් ඇතුළු පිරිසක් සමඟ සාකච්ඡා කරමින් සිටියේය. මේ අතර අගමැති මහින්ද එම ස්ථානයට ආවේය. හිටපු ජනපති මෛත්‍රි උත්සව සභාවට ආවේද මහින්ද එන විටම වාගේය. ප්‍රසන්න ඇතුළු ගම්පහ මැති ඇමතිවරුන් මහින්ද පිරිවරාගෙන මධ්‍යස්ථානය තුලට ගියහ. හිටපු ජනපති මෛත්‍රී ඒ පිටුපසින් ගියේය. මධ්‍යස්ථානය විවෘත කිරීම සඳහා පීත්ත පටිය කැපීමට මහින්ද සූදානම් වන විට ප්‍රසන්න ද ඒ අසළ සිටියේය. එහෙත් ටිකකින් මෛත්‍රි එතැනට ආ බැවින් ප්‍රසන්න හෙමින් සැරේ පසුපසට විය. මෛත්‍රි පීත්ත පටිය අසළ සිටිනු දුටු මහින්ද විපරම් කළේ ප්‍රසන්න කෝ කියාය.
“කෝ මේ ප්‍රසන්න? මහින්ද ඇසුවේය.
පිටුපසට වී සිටි ප්‍රසන්න “ඉන්නවා සර්“ කීවේය.
“ඔයානේ ගම්පහ ලොක්කා. මොකද මේ පස්සට වෙලා. එන්නකෝ ඉස්සරහට“ කියමින් මහින්ද ප්‍රසන්න ඉදිරියට ගත්තේය.
උත්සවය නිමා වී තේ බීමෙන් පසුව මහින්ද කටුනායක බලා යාමට නියමිතව තිබුණේ තවත් උත්සවයකට සහභාගී වීමටය. මහින්ද කටුනායක යාමට පෙර ප්‍රසන්න ගැන සොයා බැලුවේය. “එන්න කෝ ප්‍රසන්න මා එක්ක යන්න“ කියමින් සිය රථයට ප්‍රසන්න නංවා ගත් මහින්ද මෛත්‍රීටද යන්නන් කියා කටුනායක බලා පිටත්ව ගියේය.
