කොවිඩ් මර්දන මාර්ගෝපදේශ උල්ලංඝනය කරමින් උද්ඝෝෂණයක් සිදුකර ඇති බවට චෝදනා කරමින් ජනතා විමුක්ති පෙරමුණේ හිටපු පළාත් සභා මන්ත්‍රී සමන්ත විද්‍යාරත්න සහ සමස්ත ලංකා ගොවිජන සම්මේලනයේ කැඳවුම්කරු නාමල් කරුණාරත්න ඇතුළු 5 දෙනෙකු අත්අඩංගුවට ගැනීමේ සූදානමක් ඇතැයි ජවිපෙ ප්‍රකාශකයෙක් සදහන් කළේය.
ඔහු සදහන් කළේ පසුගිය දා පොහොර ගැටලුව සම්බන්ධයෙන් බණ්ඩාරවෙල, බොරලන්ද ප්‍රදේශයේදී සමස්ත ලංකා ගොවිජන සම්මේලනය විසින් සංවිධානය කර තිබූ උද්ඝෝෂණය සෞඛ්‍ය නිරෝධායන නීතිරීති උල්ලංඝනය කරමින් පවත්වා ඇති බවට නාමල් කරුණාරත්න මහතා සහ සමන්ත විද්‍යා රත්න ඇතුළු පස් දෙනකුට චෝදනා එල්ල කර ඇති බවයි.
‘‘මෙම උද්ඝෝෂණය සංවිධානය කළ පුද්ගලයින් 5 දෙනෙකු අද (03) වැලිමඩ මහෙස්ත්‍රාත්වරයා හමුවට ඉදිරිපත් කර තිබුණා. එහිදී ඔවුන් රුපියල් ලක්ෂයක ශරීර ඇප මත මුදා හැරීමට අධිකරණය නියෝග කර තිබෙනවා. පොලීසිය මෙහිදී අධිකරණයට කරුණු ඉදිරිපත් කරමින් උද්ඝෝෂණය සංවිධානය කිරීමට අදාළව සමන්ත විද්‍යාරත්න, නාමල් කරුණාරත්න ඇතුළු 5 දෙනෙකු අත්අඩංගුවට ගැනීමට අවශ්‍ය බවත් ඊට අදාළව නොතීසි නිකුත් කරන ලෙසත් අධිකරණයෙන් ඉල්ලා තිබෙනවා‘‘
මේ අතර අප වාර්තාකරු පැවසුවේ බෝගහකුඹුර පොලිසිය අධිකරණයෙන් කළ ඉල්ලීමට අධිකරණය අවසර ලබා දුන් බවයි.
‘‘අදාළ සැකකරුවන් සෞඛ්‍ය මාර්ගෝපදේශ උල්ලංඝනය කරමින් කටයුතු කර ඇත්නම් ඔවුන් අත්අඩංගුවට ගෙන අධිකරණයට ඉදිරිපත් කිරීමට අවශ්‍ය පියවර ගන්නා ලෙස අධිකරණය පොලිසියට නියෝග කර තිබෙන බව ‘අප වාර්තාකරු පැවසුවා.
‘මේක පැහැදිලිවම විරුද්ධ මතධාරීන් මර්දනය කිරීමක්. ගොවීන් උද්ඝෝෂණය කළේ පැහැදිලිවම ඔවුන් මත බලහත්කාරයෙන් පටවපු ගැටලුවකට. ඔවුන්ට ඊට විසදුම් අවශ්‍යයි. මේක අද ජාතික ගැටලුවක් බවට පත්වෙලා තිබෙනවා. ඒ නිසා මේ අත්අඩංගුවට ගැනීම් හරහා පොහොර හිගයට එරෙහිව රට පුරා සිදුවන ගොවි උද්ඝෝෂණ මර්දනය කිරීමේ වුවමනාව ආණ්ඩුවට පැහැදිලිව තිබෙනවා. අපි ජනතාවගෙන් ඉල්ලා සිටින්නේ මේ ගැන සංවේදී වන ලෙසයි‘ ජවිපෙ ප්‍රකාශකයෙක් අප සමග පැවසුවා.
