1.රෑට නුවර නයිට් කඩවල් ගොඩාක් අඩුයි.
ඇත්තටම කිවුවොත් රෑ 12 න්පස්සේ නම් නයිට් කඩවල් නැත්තටම නැති තරම්.මොකද නුවර කියන්නේ නිදන නගරයක්.කොහොමත් ඔබටම දැක ගන්න ලැබේවි රෑ 9 න් පස්සේ නුවර බොහොම සාමකාමීව නිදාගන්න හදන අයුරු.මේක ඊයේ පෙරේදා ඉඳලා ඇතිවුන තත්වයක් නෙවෙයි.හැබැයි දළඳා පෙරහැර තියෙන කාලේදිනම් මේ තත්වය සමහරවිට වෙනස් වෙනවා.මහ රෑ වෙනතුරුම නගරය ජනාකීර්ණව පවතින ආකාරය ඔබට එවිට දකින්නට ලැබේවි.ඒ නිසා ඔබ නුවර යනවනම් රෑට ගිහිල්ලා නයිට් කඩ හොයන්න හදන්න එපා.පුලුවන්නම් යන්න කලින්ම ප්ලෑන් කරගෙන යන්න.එහෙම වුනොත් ඔබ අමාරුවේ වැටෙන එකක් නැහැ.
2.මීටර් ටැක්සි හොයන්න එපා
සමහරු කොළඹ පුරුද්දට නුවර ගිහිල්ලත් මීටර් ටැක්සියක් එනකම් බලාගෙන ඉන්නවා.හැබැයි නුවර නගරයේ තියෙන්නේ බොහොම සීමිත මීටර් ටැක්සි ප්‍රමාණයක්්. ඒ ගාන අතේ ඇගිලි වලින් වුනත් කියන්න පුලුවන්.මේකට එක හේතුවක් තියෙනවා.නුවර නගරයේ තියෙන රථ වාහන සැලැස්මත් එක්ක ගොඩාක් දුරට ත්‍රීවිල් එකක හෝ වෙනයම් ටැක්සියක යන්න තියෙන අවස්ථාව හරි අඩුයි.මෑතක සිට ගොඩක් රජයේ ආයතන පල්ලෙකැලේ ප්‍රදේශයට අරගෙන ගිහිල්ලා තිබෙන නිසා නුවර නගරය තුල රස්තියාදු වෙන්න ඕන කමක් නැහැ.ඒ නිසා “අතදාන්න “බලාගෙන ටැක්සියක් එනකල් ඉන්න එක තේරුමක් නැහැ.සමහරවිට මේ තත්වය තවත් මාස කිහිපයකින් වෙනස් වෙන්නත් ඉඩකඩ තියෙනවා.
3.වැව රවුමේ ඇවිදින්න යනවනම් කුඩයක් අරගෙන යන්න.
එහෙම කියන්නේ වහින නිසාවත් ,අවුවේ සැර වැඩි හින්දවත් නෙවෙයි.වැව රවුමේ ගස් උඩ වහලා ඉන්න කපුටෝ නිසා.මොකද ඇවිදින්න තියෙනවනම් අපේ සමහර අයට ආයේ වෙන මුකුත් ඕනේ නැහැනේ.ටියුෂන් යන සිසුන් විතරක් නෙවෙයි,සමහර පෙම්වතුන් පවා වැව රවුමේ සිසිලස විඳ ගන්න ගොඩාක් ප්‍රිය කරනවා.ඒ නිසා අයිස් ක්‍රීම් එකක හරි “පොරි ගොට්ටක”හරි රහ බලන ගමන් වැව රවුමේ ඇවිදින්න උනන්දු වෙනවා.ඒත් පරිස්සමින්..උඩ ඉන්න කපුටෝ ඉන්නේ ඔබ දිහා බලාගෙන..එක්කෝ කුඩයක් ගෙනියන්න.ඒත් නැතිනම් මේ ගැන ටිකක් අවධානයෙන් ඉන්න.
4.සමහරවිට එකම තැන කැරකෙන්නත් වෙයි.
කොහේ ගියත් පාරවල් දැනගෙන යන්න ඕනේ.ඒක ඇත්ත.හැබැයි මහනුවරට යද්දි පුලුවන්නම් විශේෂයෙන්ම නුවර නගර සීමාවේ පාරවල් ගැන දැනගෙන යන්න.මොකද එහෙම නැතිවුනොත් මාර්ග සැලසුමත් එක්ක ඔබව අතරමං වෙන්න පුලුවන්.මොකද නුවර නගරය වටේ one way එහෙමත් නැතිනම් එක් දිශාවකට පමණක් වාහන ධාවනය කිරීමේ සැලසුම් දැනට ක්‍රියාත්මක වන නිසා.ඒත් බයවෙන්න එපා.රථවාහන පොලීසියේ නිලධාරීන් ඔබට සහයෝගය දක්වන්න ඉදිරිපත් වේවි.මැප් එකක් අරගෙනම නුවර ගියොත් මේ වැඩේ ඔබට බොහොම පහසු වේවි.
5.බස් නැවතුම්පොළවල් 4 ක් තියෙනවා.
ඒ හින්දා යන්න ඕනේ කොහෙටද ,ඒ බස් එක නතර කරන්නේ කොහෙද කියලා දැනගෙනම යන්න.ගොඩාක් බස් නතර කරන්නේ ප්‍රධාන බස් නැවතුම් පොළේ.ඒ කියන්නේ ‘ගුඩ්ශෙඩ් ‘එකේ.හැබැයි A/C බස් එකක කොළඹ එන්න හිතාගෙන ඉන්නවනම් මාර්කට් එක ගාවට එන්න වෙනවා.මාතලේ,වත්තේගම පැත්තට යනවනම් එතනින් තවත් ඉස්සරහට ඇවිල්ලා Clock ටවර්” එක ගාවටම එන්න වෙනවා.ඔබ යන්නේ පේරාදෙණිය පැත්තෙ නම් “Library ‘ එක කිට්ටුවට යන්න වෙනවා බස් එකක් ගන්න.ඒක නිසා යන තැන මුලින්ම තීරණය කරන්න.ඊට පස්සේ බස් එක නවත්තන තැන හොයාගන්න.
ඒත් එක්කම අමතක කරන්න එපා.මේ දවස්වල නුවර නගරයේ මාර්ග අලුවැඩියාවන් වෙන නිසා වෙනදට වැඩිය වාහන තද බද ඇතිවෙන්නත් ඉඩකඩ තියෙනවා.මේ කරුණු ගැන දැනගෙන නුවර ගියොත් ඒ ගමන කරදරයක් නැති බොහොම ප්‍රියජනක ගමනක් වේවි
[rns_reactions]
