පසුගිය 11 වැනි දා මධ්‍යම රාත්‍රියේ සිට ඉන්ධන මිල ඉහළ නැංවීමේ තීන්දුව ගත්තේ ජනාධිපති, අගමැති ඇතුළු ආණ්ඩුව විසින් බවත් තමා කළේ එම තීන්දුව ප්‍රකාශයට පත්කිරීම පමණක් බවත් ජනාධිපති ගෝඨාභය රාජපක්ෂගේ සහ අගමැති මහින්ද රාජපක්ෂගේ ප්‍රධානත්වයෙන් ගත් තීන්දුවකට අභියෝග කරමින් නිවේදනයක් පළ කිරීමට තරම් සාගර කාරියවසම් මහතාට ශක්තියක් ආවේ කෙලෙසදැයි සොයා බැලීමට ‘ජනාධිපති කොමිසමක්’ පත් කළ යුතු බවත් බලශක්ති අමාත්‍ය උදය ගම්මන්පිල මහතා පවසයි.
අමාත්‍යවරයා මේ බව පැවසුවේ බලශක්ති අමාත්‍යාංශ ශ්‍රවණාගාරයේදී අද (13) පැවති මාධ්‍ය හමුවක් අමතමිනි.
ඉන්ධන මිල ඉහළ දමා ජනතාව අපහසුතාවට පත් කිරීමට ක්‍රියාකළ බලශක්ති ඇමැති උදය ගම්මන්පිල මහතා අදාළ වගකීමභාර දෙන වහාම ඉල්ලා අස්විය යුතු බවට ශ්‍රී ලංකා පොදුජන පෙරමුණේ මහ ලේකම්, පාර්ලිමේන්තු මන්ත්‍රී සාගර කාරියවසම් මහතා ඊයේ (12) නිකුත් කළ මාධ්‍ය නිවේදනයට ඇමැතිවරයාගේ ප්‍රතිචාර දැක්වීම සදහා මෙම මාධ්‍ය හමුව කැදවා තිබුණේය.
මෙහිදී ඉන්ධන මිල ඉහළ දැමීම හා සිදුවීම් පෙළ පැහැදිලි කළ ඇමැතිවරයා ‘‘ මිල වැඩිකිරීමේ තීන්දුව ගත්තේ ජනාධිපති ගෝඨාභය රාජපක්‍ෂ මහතා මුලසුන ගත් ජීවන වියදම් කමිටුවයි. එයට මුදල් ඇමතිවරයා ලෙස අගමැති මහින්ද රාජපක්‍ෂ මහතාගේ එකඟතාව ලැබී තිබුණා. මෙම මිල ඉහළ දැමීම ගැන මාධ්‍ය දැනුවත් කිරීමේ අවස්ථාවට අගමැතිවරයාගේ නියෝජිතයා ලෙස මුදල් රාජ්‍ය අමාත්‍ය අජිත් නිවාඩ් කබ්රාල් මහතා ද සහභාගී වුණා. ඉතිහාසය පුරා තෙල් මිල වැඩි කළේ මුදල් අමාත්‍යාංශයයි. විෂයභාර ඇමැතිවරයා කළේ එම තීන්දුව ප්‍රකාශයට පත් කිරීම පමණයි. නමුත් මෙවර එම තීන්දුවට ප්‍රකාශයට පත්කිරීමේ අවදානම් කාර්යය මම ස්වේච්ඡාවෙන් භාරගත්තේ ජනාධිපතිතුමා හා අගමැතිතුමා ආරක්‍ෂා කරගැනීමට අවශ්‍ය නිසයි‘‘
මෙහිදී ඊයේ සාගර කාරියවසම් මහතා විසින් නිකුත් කළ මාධ්‍ය නිවේදනය ගැන ද කරුණු දැක්වූ අමාත්‍යවරයා, ‘‘සාගර කාරියවසම් මහතා ඊයේ නිකුත් කළ නිවේදනයෙන් පහර දී ඇත්තේ මට නොවෙයි. එතුමාගේ පක්‍ෂයෙන් බිහි කළ එකම ජනාධිපතිවරයා වන ගෝඨාභය රාජපක්‍ෂ මහතාට හා එහි සදාදරණීය නායක මහින්ද රාජපක්‍ෂ මහතාටයි. බලශක්ති අර්බුදයට වගකිව යුත්තේ විෂයභාර ඇමැතිවරයා වන මා බව ඔප්පු කළ හැකිනම් ප්‍රසිද්ධ විවාදයකට එන්නැයි තමා සාගර කාරියවසම් මහතාට ආරාධනා කරනවා. ඒ වගේම ජනාධිපතිවරයාට හා අගමැතිවරයාට පහර ගැසීමට තරම් බලයක් ඔහුට දුන්නේ කවුරුන්ද යන්න සොයාබැලීමට ජනාධිපති කොමිෂමක් පත් කළ යුතු‘‘ යැයි ද ඇමති ගම්මන්පිල මහතා සඳහන් කළේය.
මේ අතර අප සමග අදහස් දැක්වූ රාජ්‍ය අමාත්‍යවරයෙක් සදහන් කළේ ඉන්ධන මිල ඉහළ දැමීමට අදාළ තීන්දුව ගත් ජීවන වියදම් කමිටු රැස්වීමට වෙළඳ අමාත්‍ය බන්දුල ගුණවර්ධන, විදුලිබල අමාත්‍ය ඩලස් අලහපෙරුම, කෘෂිකර්ම අමාත්‍ය මහින්දානන්ද අලුත්ගමගේ, රාජ්‍ය අමාත්‍ය අජිත් නිවාඩ් කබ්රාල්, රාජ්‍ය අමාත්‍ය ලසන්ත අලගියවන්න, ජනාධිපති ලේකම් පීබී ජයසුන්දර, අග්‍රාමාත්‍ය ලේකම් ගාමිණී සෙනරත්, මුදල් අමාත්‍යාංශ ලේකම් එස්ආර් ආටිගල සහභාගී වූ බවයි. මෙම තීන්දුව කිසිසේත් විෂයභාර ඇමැතිවරයාගේ වුවමනාවට ගත් තීන්දුවක් නොවන බවත් ආණ්ඩුවට සම්බන්ධ සුළු පක්ෂ සමග පොහොට්ටු ප්‍රධානීන්ට ඇති ගැටලු වෙනත් ආකාරයකින් විසදාගත යුතු බවත් ඔවුහු සදහන් කළේය.
