Supiri Gossip

Author: Editor

  • බිත්තර මිල ඉහළට

    බිත්තර මිල ඉහළට

    බිත්තර සහ කුකුල් මස් ආනයනය සීමාවීමත් කුකුළු ගොවිපොළ ආශිත ද්‍රව්‍යවල මිල ඉහළ යෑමෙන් නිෂ්පාදන මිල වැඩි වීමත් හේතුවෙන් බිත්තර සහ කුකුල් මස් මිල ඉහළ ගොස් ඇති බව කුකුළු ගොවිපොළ ආශිත නිෂ්පාදන සමාගම් පවසයි

    මේ සම්බන්ධයෙන් අප කළ විමසීමකට පිළිතුරු දෙමින් සමස්ත ලංකා බිත්තර වෙළෙඳ සංගමයේ නිලධාරියෙක් පැවසුවේ සුදු බිත්තරයක් රුපියල් 22 කට සහ රතු බිත්තරයක් රුපියල් 23 කට තොග මිලට ඊයේ බිත්තර අළෙවි වූ බවයි.

    පාලන මිල යටතේ රුපියල් 460 ක්ව පැවැති කුකුල් මස් කිලෝවක් පාලන මිල ඉවත් කිරීම හේතුවෙන් මේ වන විට රුපියල් 660 ත් 710 ත් අතර මිලකට අළෙවි වන බව අප කළ නිරීක්ෂණයකදී පැහැදිලි විය.

    දුඹුරු බිත්තරයක තොග මිල 6%කින් ද, සුදු බිත්තරයක මිල 4%කින් ද ඉහළ ගොස් ඇති අතර, ඒවායේ මිල පරාසයන් පිළිවෙලින් රු. 20-22 සහ රු. 18 – 20 අතර වාර්තා විය.

    හම රහිත බ්‍රොයිලර් කුකුළු මස් සඳහා මිල කිලෝග්‍රෑම් එකකට රු. 21කින් ඉහළ ගොස් ඇත. ඒ අනුව කොළඹ ආශ්‍රිතව බ්‍රොයිලර් කුකුළු මස් කිලෝග්‍රෑම් එකක් අලෙවි කෙරෙන්නේ රු. 720-780 අතර මිලකට වන අතර සෙසු මස් වර්ගවල මිල ගණන් පහළ ගොස් තිබේ.

  • ග්ලයිෆොසෙට් ඇතුළු පළිබෝධනාශක පහක් තහනම් කළ ගැසට් එකත් රිවස් කරයි

    ග්ලයිෆොසෙට් ඇතුළු පළිබෝධනාශක පහක් තහනම් කළ ගැසට් එකත් රිවස් කරයි

    ග්ලයිෆොසෙට් ඇතුළු පළිබෝධ නාශක 05ක් භාවිතය සහ විකිණීම තහනම් කරමින් 2014 ‍දෙසැම්බර් 22 වැනිදා නිකුත් කළ ගැසට් පත‍්‍රය අවලංගු කරමින් පළිබෝධනාශක රෙජිස්ට්‍රාර් ආචාර්ය ජේ.ඒ සුමිත්  විසින් (22දා) අතිවිශේෂ ගැසට් පත්‍රයක් නිකුත් කර තිබේ. ඒ අනුව ග්ලයිෆොසෙට්, ප්‍රොපනිල්, කබරිල්, ක්ලෝෆයිරිපොස් සහ කාබොෆියුරාන් පළිබෝධ නාශක මත පනවා තිබූ භාවිතය සහ විකිණීමේ තහනම ඉවත් වනු ඇත.

    මහජනතාවගේ හිත පිණිස පළිබෝධනාශක තාක්‍ෂණික හා උපදේශණ කමිටුවේ උපදේශණය මත පළිබෝධ නාශක රෙජිස්ට්‍රාර් අනුර විජේසේකර මහතා විසින් 2014/12/22 වැනිදා අංක 1894/4 යටතේ නිකුත් කොට තිබු අති විශේෂ ගැසට් පත්‍රයේ පළ කොට තිබු නියමය අවලංගු කරන බව පළිබෝධ නාශක රෙජිස්ට්‍රාර් ජේ.ඒ. සුමිත් මහතා 2021 නොවැම්බර් මස 01 වැනිදා දිනැතිව නිකුත් කළ ගැසට් නිවේදනයේ සඳහන් කොට ඇත.

    මූලය හදුනා නොගත් වකුගඩු රෝගයට ප්‍රධාන හේතුව ග්ලයිෆොසෙට් බව පවසමින් මෙම තහනම පනවනු ලැබූ නමුත් ඒ සමග තේ ඇතුළු වගා රැසක වල් මර්ධනය අර්බුදයකට ලක්විය.

  • එළවළු ලැබීම ඉහළ යද්දී මිල ගණන් සැලකිය යුතු ලෙස පහතට

    එළවළු ලැබීම ඉහළ යද්දී මිල ගණන් සැලකිය යුතු ලෙස පහතට

    දිවයිනේ වීවිධ ප්‍රදේශවලින් වලින් දඹුල්ල ආර්ථික මධ්‍යස්ථානයට අද (23) දින එළවළු ලැබීම් යම් මට්ටමකින් ඉහළ අගයත් පැවතීමත් සමඟ පසුගිය දිනවල පැවැති කිලෝවක තොග මිලට සමගාමිව කිලෝවල්  රුපියල් 50 ත් 60 ත් අතරප්‍රමාණයකින් අඩු  වී ඇතැයි ආර්ථික මධ්‍යස්ථාන ව්‍යාපාරිකයෝ පවසති.

    දඹුල්ල ආර්ථික මධ්‍යස්ථානයට අද දින වැඩි වශයෙන් කන්ද උඩරට ප්‍රදේශය වලින් කැරට්, ලීක්ස්, බීට්, ගෝවා ආදී එළවළු වර්ග ලැබී තිබුණු බවත් ඇතැම් එළවළු ඉහළ මිලක් ප්‍රකාශ කර ද එම මිල ගණන් යටතේ අලෙවි නොවීම නිසා අඩු මුදල මිල ගණන් යටතේ අලෙවි කිරීම්ට සිදුවන බව වෙළෙන්දෝ පවසති.

    එමෙන්ම පහත රට ප්‍රදේශවලින් සහ යාපනය  අර්ධද්වීපයෙන් ද මෙදින දඹුල්ල ආර්ථික මධ්‍යස්ථානයට වම්බටු ,මෑකරල්, දඹල, පතෝල, තක්කාලි ආදී එළවළු වර්ග සැලකිය යුතු ප්‍රමාණයක්  ලැබුණු බව පෙන්වා දෙන වෙළෙඳු කියා සිටියේ දුර බැහැර  ප්‍රදේශවල එළවළු මිලදී ගැනීම සඳහා පැමිණෙන වෙළෙන්දන්ගෙන් අඩුවීම නිසා මිල පහත වැටීම සිදු වෙමින් පවතින බවය.

    දඹුල්ල ආර්ථික මධ්‍යස්ථානයේ රුපියල් තුන් 300 ත්  350 ක් අලෙවි වූ ලීක්ස් කිලෝව අද දින උදේ රුපියල් 260 ත්  280 මිලක් පැවතිණි, රුපියල් 350ක් ව පැවති කැරට් කිලෝ එකක  තොග මිල රුපියල් 250 ත් 300 ත් අතර මිලක් පැවතිණි. රුපියල් 350  අලෙවි වූ බෝංචි කිලෝ එකක් රුපියල් 200 ක් 220 අතර මිලක්  පැවති අතර රුපියල් 280 ත් 300 ත් අතර මිලකට අලෙවි වූ තක්කාලි කිලෝව රුපියල් 200ත්  220 යන තොග මිලයකට  අලෙවි වීම විශේෂ විශේෂත්වයකි.

    දඹුල්ල ආර්ථික මධ්‍යස්ථානයට මෙදින දකුණු පළාතෙන් දෙල් යම් මට්ටමකින් ලැබීම් ඉහළ ගොස් තිබීමත් සමග රුපියල්  200 කට  පැවති දෙල් ගෙඩියක තොග මිල අද දින රුපියල් 130 සිට 160 දක්වා මිලකට අලෙවි වූ බව වෙළෙන්දෝ පවසති.

    නුවරඑළිය දිස්ත්‍රික්කයේ එළවළු පෙරදින ආර්ථික මධ්‍යස්ථාන වලට නොලැබීම නිසා අද දින අඟහරුවාදා දිනයක් වීම, දිවයිනේ පැවති වර්ෂා සහිත කාලගුණය පහව  යෑම්, එළවළු නිෂ්පාදනය කළ ගොවීන් වැඩි වශයෙන් තම අස්වැන්න වෙළෙඳ පොළට රැගෙන ඒම යන කරුණු  නිසා යම් මට්ටමකින් එළවළු ලැබීම ඉහළ අගයක් ගත් බව දඹුල්ල ආර්ථික මධ්‍යස්ථාන ව්‍යාපාරිකයෝ පවසති.

    සටහන සහ ඡායාරූප – කාංචන කුමාර ආරියදාස – දඹුල්ල

  • නව ව්‍යවස්ථා කෙටුම්පත පාර්ලිමේන්තුවට

    නව ව්‍යවස්ථා කෙටුම්පත පාර්ලිමේන්තුවට

    නව ආණ්ඩුක්‍රම ව්‍යවස්ථා කෙටුම්පත පාර්ලිමේන්තු මන්ත්‍රීවරුන්ට ඉදිරිපත් කොට සාකච්ඡාවට ලක්කරන බව අග්‍රාමාත්‍ය මහින්ද රාජපක්ෂ මහතා අද (23) දින පාර්ලිමේන්තුවේ දී පැවසීය.

    අය-වැය කාරක සභා අවස්ථාවේ ජනාධිපති, අග්‍රාමාත්‍ය කාර්යාලය ඇතුළු ආයතනවල වැය ශිර්ෂ විවාදයට එක්වෙමින් අග්‍රාමාත්‍ය මහින්ද රාජපක්ෂ මහතා මේ බව අවධාරණය කළේය.

    නව ආණ්ඩුක්‍රම ව්‍යවස්ථා කෙටුම්පතක් සකස් කරන බවත් රහසිගතව සිදුවන යමක් එහි නැතිබවත් අග්‍රාමාත්‍යතුමා මෙහිදී පෙන්වා දුන්නේ.

    අග්‍රාමාත්‍ය මහින්ද රාජපක්ෂ මහතා අද දින පාර්ලිමේන්තුවේ දී කළ සම්පූර්ණ කතාව මෙසේය.

    ගරු කථානායකතුමනි, ගෝලීය කොවිඩ් වසංගත තත්ත්වය හමුවේ අපි රජයක් ලෙස මූලිකත්වය ගත්තේ ජනතාව ආරක්ෂා කරන්න. ජනතාවගේ ආරක්ෂාව වෙනුවෙන් ගන්න ඕන හැම තීරණයක්ම අපි නිසි වෙලාවට ගත්ත කියල අපි තමුන්නාන්සේලට මතක් කරන්න ඕන.

    ගරු කථානායකතුමනි, මම මේ දේවල් කියන්නේ එම කටයුතු කළමනාකරණය කරන්න අග්‍රාමාත්‍ය කාර්යාලය කළ කාර්යය භාරයත් සිහිපත් කරන්න.

    කොවිඩ් වසංගතය ආරම්භයේදී අපේ රජය අතවශ්‍ය සේවා කටයුතු සඳහා ජනාධිපති කාර්ය සාධක බලකායක් පත් කළා එම ජනාධිපති කාර්ය සාධක බලකාය අග්‍රාමාත්‍ය කාර්යාලයේ සිට අප‌‌ගේ අධීක්ෂණය යටතේ කටයුතු කළා ජනතාවගේ අතවශ්‍ය සේවා ඉටු කිරීමටත් ජනතාවගේ ගැටළු විසඳීමටත් දවසේ පැය 24 පුරාම අග්‍රාමාත්‍ය කාර්යාලය කටයුතු කළ බව අපි තමුන්නාන්සේලට මතක් කරන්න ඕන. ඒ වගේම අපි පක්ෂ නායකයන් සමඟ අදහස් හුවමාරු කර ගත්තා. ජනතාවගේ අතවශ්‍ය සේවා සහ සෞඛ්‍ය පහසුකම් ලබා දීමට  අපි හැම අවස්ථාවකදීම මැදිහත් වුණා. වෛද්‍යවරුන් ආරක්ෂක හමුදාවන් ඒ වෙනුවෙන් තමන්ගේ කටයුතු යුතුකම් ඉටු කළා.

    ගරු කථානායකතුමනි, අපි දන්නවා කොවිඩ් වංසගතයෙන් ඇතිවූ ආර්ථික අවපාතය තදින්ම රටට බලපාල තියෙන බව. ව්‍යාපාර ‌බොහෝමයක් කඩා වැටිලා. රජය මේ අවස්ථාවේ සැලසුම් කරන්නේ කොවිඩ් වංසගතයෙන් වැටුණු ආර්ථිකය ගොඩනගන්න. ඒ අනුව තමයි මුදල් ඇමතිතුමා කෙටි කාලීන සහ දිගු කාලීන සැළසුම් ඇතුළත් අයවැයක් මෙවර ඉදිරිපත් කළේ. ජනතාවගේ පැත්තෙන් සිදුවන ආර්ථීක හා සමාජයීය සංවර්ධනය රටට අවශ්‍යයයි. මේ අසීරු අවස්ථාවේදී ඒ අයට නැගිටින්න පුළුවන් ආර්ථිකයක් ගොඩනඟන එක තමයි අපේ බලාපොරොත්තුව.

    ගරු කථානායකතුමනි, 2019 අපි බාරගත්තේ කඩා වැටුණු ආර්ථීකයක් ඒක මතක් කරන්න ඕන. ඒ ආර්ථිකය ඔසවා තබන්න අපේක්ෂාව මෙවර අය වැය යෝජනාවල තියෙනවා. සුපුරුදු පරිදි තම තමන්ගේ දේශපාලනය වෙනුවෙන් කරන වාද විවාද කරනවා අපි දැක්කා. ඒ වුණත් විරුද්ධ පක්ෂය ඉදිරිපත් කරන ‍යම් සාධනීය අදහස්වලටත් අපි සවන් දෙනවා ඔබතුමන්ලා සාධනීය අදහස් ඉදිරිපත් කළොත් අපි එයට සවන් දෙන්න සූදානම්. අපි මේ වෙලාවේ සාමූහිකව රටේ අනාගතය වෙනුවෙන් තීන්දු තීරණ ගත යුතුයි. ජනතාව වෙනුවෙන් ඒ යුතුකම ඉටු කරන්න මේ උත්තරීතර පාර්ලිමේන්තුවේ සියලුම මන්ත්‍රීවරුන්ට හැකියාව තිබෙනවා.

    ගරු කථානායකතුමනි, 2022 වසර සදහා නව ව්‍යාපාර ලියාපදිංචිකරන ව්‍යවසායකයන්ගෙන් කිසිදු ලියාපදිංචි ගාස්තුවක් අපි අය කරන්නේ නැහැ. අපේ රටේ තරුණ තරුණයින්ට  ආරාධනා කරනවා නව ව්‍යාපාරික අදහස්වලින් රටේ ආර්ථික සංවර්ධනය ගොඩනගන්න එකතු වෙන්න කියලා. ඒ වගේම විදේශීය විනිමය රටට ගෙන ඒමටත් දායක වෙන්න කිලා.

    ගරු කථානායකතුමනි, අපි ජනතාවට පොරොන්දුවක් දුන්නොත් ඒ පොරොන්දු ඉටුකළ යුතුයි. වසර 25කට ආසන්න කාලයක් නොවිසඳුනු ගුරු විදුහල්පති වැටුප් විෂමතාව මෙවර අය-වැයෙන් විසඳන්න අපි කටයුතු කරමින් පවතිනවා.මෙවර අය වැයෙන් අධ්‍යාපනය වෙනුවෙන් වැඩිම මුදල් ප්‍රමාණය වෙන් කරලා තියෙනවා. අපි මේ හැම දේම කරන්නේ රටේ අනාගතය වෙනුවෙන්.අභියෝග හමුවේ රට ගොඩගැනීමට අප දරන වෙහෙසට ඔබ සියලු දෙනාගේම සහය ලබා දෙනු ඇතැයි අපි විශ්වාස කරනවා.

    ගරු කථානායකතුමනි, අපි විපක්ෂයේ කරන යෝජනා ඒ වගේම විවේචන සාවදානව අහගෙන හිටියා.   සමහර විවේචන අසාධාරණයි. සමහර විවේචනවල සාධාරණයක් තියේනම් ඒ විවේචන අපි පිළිඅරගෙන ඒවා නිවැරදි කරන්න ඕනෑම වේලාවක අප සූදානම් බව මේ අවස්ථාවේදි මතක් කරනවා. ආණ්ඩුක්‍රම ව්‍යවස්ථාව ගැන කථා කළා අපි දැන් කෙටුම් පතක් සකස් කරගෙන යනවා. ඒක පාර්ලිමේන්තු මන්ත්‍රීවරුන් වෙත ඉදිරිපත් කරලා එය සාකච්ඡාවට ලක් කරන බව මතක් කරනවා. ඒ නිසා ඒ පිළිබඳව රහසිගතව  අපි කිසි දෙයක් කටයුතු නොකරන බව තමුන්නාසේලාට මතක් කරනවා යැයි අග්‍රාමාත්‍යතුමා පැවසීය.

  • දඟ පන්දුයවන්නෝ දෙදෙනා දක්ෂතා අතරට

    දඟ පන්දුයවන්නෝ දෙදෙනා දක්ෂතා අතරට

    නම් දැරූ දඟ පන්දු යවන්නන් දෙදෙනාට කළින් දක්ෂතා අතරට පැමිණි තුන් ඉරියව් ක්‍රීඩක රමේෂ් මෙන්ඩිස් පන්දු 25 ක් ඇතුළත කොදෙව් පිතිකරුවන් තිදෙනකුම දවා ගැනීමට සමත්වීම නිසා නොසිතූ අවධානමකට බටහිර ඉන්දීය කොදෙව් පිල මුහුණ දී සිටියි. එම කඩුලු 3 දවා ගැනීමේදී කඩුලු ත්‍රිත්වයක් දවා ගැනීමේ අවස්ථාවකටද පැමිණි රමේෂ්ගේ සුපිරි පන්දු යැවීම නිසා ශ්‍රී ලංකාව ලබා දුන් ලකුණු 386 ට පිළිතුරු පළමු ඉනිම ක්‍රීඩා කරමින් සිටින කොදෙව් කණ්ඩායම දෙවැනි දිනට තරගය නිමා කරද්දී ලකුණු 113 ක් ඇතුළත කඩුලු 6 ක් අහිමි කරගෙන සිටියි.

    පිට පිටම දෙවැනි වතාවටත් පන්දුවට පහර දීමෙන් වැළකී සිටීමට නම් තවත් ලකුණු 74 ක් පමණක් කොදෙව් කණ්ඩායමට අවශ්‍යව පවතින නමුත් ඉනිම අභිබවා යෑමට ඉතිරි පිතිකරුවන් සිව්දෙනාට ලකුණු 273 ක් ලබා ගැනීමේ අභීයෝගයට මුහුණ දීමට සිදුව තිබේ. ගැටළුව පවතින්නේ දෙවැනි දිනය අවසන් වන විටම තණතීරුව තියුණුවට දඟ කැවීමට පටන් ගෙන තිබීමයි.

    තෙවැනි පන්දුවාරයේදීම බ්ලැක්වුඩ්ව දවා ගැනීමට ශ්‍රී ලංකාවට අවස්ථාව පැවැතියද විනිසුරු විමසීමේ තීරණය භාවිතා නොකිරීම නිසා එහි වාසනාව ආරම්භක පිතිකරුවා සතු විය. දුෂ්මන්ත චමීර එවන ද පන්දුවට කඩුල්ල මුවා කළේ යැයි කරන ලද ඉල්ලීමේදී විනිසුරු නිෂ්ප්‍රභ කර සිටීමේදී එය තෙවැනි විනිසුරුගෙන් විමසීමට ශ්‍රී ලංකා නායකයා මැළිවිය. ඒ සඳහා කඩුලු රකින දිනේෂ් චන්දිමාල්ගෙන් කරන ලද විමසීමේදී පිළිතුර උදාසීනවීම නිසා ලකුණු 09 දී නිමාවීමට තිබූ පළමු කඩුල්ලේ සම්බන්ධතාවය ලකුණු 46 දක්වා දීර්ඝ විය.

    කඩුලු දඩයමේදී ලසිත් ඇඹුල්දෙණිය ඉක්මන් වූවේය. ලද වාසනාවෙන් නිසි ප්‍රයෝජන නොගත් බ්ලැක්වුඩ් (20) කොදෙව් ඉනිමේ දැවී ගිය පළමු පිතිකරුවා විය. එම කඩුල්ල දවා ගැනීමත් සමඟ 12 වැනි ටෙස්ට් තරගයේදී සිය 50 වැනි ටෙස්ට් කඩුල්ලද ඇඹුල්දෙණියගේ නම ඉදිරියෙන් සනිටුහන් විය.

    සිය ජ්‍යෙෂ්ඨයා කොටු පවුර අන්තයෙන් පන්දු යවද්දී ක්‍රීඩාගාර අන්තයෙන් පන්දු යැවූ අනෙක් වමතා, ප්‍රවීන් ජයවික්‍රම ද පන්දුව තියුණුව දඟ කවමින් කොදෙව් පිතිකරුවන් අන්ද මන්ද කලේය. තියුණු ලෙස දඟ කැවීමකින් යුක්තව යවන ලද පන්දුවෙන් බෝනර්ගේ කඩුල්ල ජයවික්‍රම දවා ගනු ලැබීය. ප්‍රධාන දඟ පන්දු යවන්නන් දෙදෙනා පන්දුයැවීම නිසා දකුණත් පිට දඟ පන්දු යවන්නා වන රමේෂ් මෙන්ඩිස්ව කැඳවීම 32 වැනි පන්දුවාරය දක්වා ශ්‍රී ලංකා නායකයා ප්‍රමාද කළේය. පන්දුව දුන් පළමු පන්දුවාරයේදීම සාර්ථක ඵල නෙළා දුන් රමේෂ් නායක ක්‍රෙග් බ්‍රැත්වයිට්ගේ කඩුල්ල දවා ගත්තේය. මංගල ටෙස්ට් වරම් දිනූ ජෙරම් සොලොසානෝ ‘කම්පනයට’ පත්වීම නිසා ඔහු වෙනුවට කණ්ඩායමට ආදේශ කෙරුණු ෂායි හෝප් රමේෂ්ගේ දෙවැනි ගොදුර බවට පත්වූවේය.

    තරගාවසානයට පන්දුවාර 2 ක් ඉතිරිව තිබියදී රොස්ටන් චේස්ගේ කඩුල්ලද දවාගත් රමේෂ් මෙන්ඩිස් සිය කඩුලු මල්ල ලකුණු 23 කට 3 ක් ලෙසින් තර කර ගත්තේය. රමේෂ්ගේ දක්ෂතාව නිසා කොදෙව් අවසන් කඩුලු 6 ම ලකුණු 56 කදී බිඳ වැටිණ.

    ඉලක්කය ලකුනු 500 කට එහා ලකුණු සංඛ්‍යාවක් වුවද අවසන් කඩුලු 7 ම ලකුණු 105 කදී දවා ගැනීමට රොස්ටන් චේස් ප්‍රමුඛ බටහිර ඉන්දීය කොදෙව් පන්දු යවන්නන් සමත්වීම නිසා ශ්‍රී ලංකා පළමු ඉනිම ලකුණු 400 කට ලකුණු 14 ක් අඩුවෙන් හෙවත් ලකුණු 386 කදී නිමාවට පත්විය.

    ශ්‍රී ලංකා ඉනිම නිමාවට පත් කිරීමේදී තරගය ඇරැඹි පළමු පැයේදී ශතක ලාභී දිමුත් කරුණාරත්ව සහ අර්ධ ශතක ලාභී ධනංජය ද සිල්වාගේ කඩුලු දවා ගනිමින් නැවතත් තරගයට අවතීර්ණවීමට කොදෙව් කණ්ඩායම සමත්විය. මොවුන් දෙදෙනාට අමතරව තුන් ඉරියව් ක්‍රීඩකයා ලෙසින් නම් කෙරුණු රමේෂ් මෙන්ඩිස්ද දිවා ආහාරයට පෙර දැවී යෑම මීට වඩා ලකුණු සංඛ්‍යාවක් කරා ශ්‍රී ලංකා පිලට යෑමට තිබූ අවස්ථාව අහිමිවීමට හේතු විය.

    පිටියට පිවිසි අවස්ථාවේදී එතරම් විශ්වාසයකින් යුතුව පන්දුවට පහර දීමට අපොහොසත් වුවද ශ්‍රී ලංකා ඉනිමේ 8 වැනි පිතිකරුවා ලෙසින් දිනේෂ් චන්දිමාල් දැවී යන විට ලකුණු 45 ක් රැස් කරගෙන සිටියේය. වේග පන්දු යවන ෂෙනන් ගේබ්‍රියල් විසින් එවන ලද කෙටි පන්දු වැළකදී තරමක් අපහසුතාවයෙන් මුහුණ දුන්නද පිටියේ ස්ථාවරත්වය ගොඩ නඟා ගැනීමට චන්දිමාල් සමත්වූවේය. පසු පෙළ පිතිකරුවන්වද ආරක්ෂා කර ගනිමින් පන්දුවට පහර දීමට චන්දිමාල් දරන ලද උත්සාහයේදී එල්ල කරන ලද රිවර් ස්වීප් පහරක් වැරැදී යෑම නිසා අර්ධ ශතකයට ලකුණු 3 ක් තිබියදී චන්දිමාල් කඩුල්ල අහිමි කර ගත්තේය.

    ඉනිමේ අවාසනාවන්තම දැවී යෑම ලෙස සටහන් වූයේ ධනංජය ද සිල්වාගේ දැවී යෑමය. ලකුණු 56 ක් ලබා සිටියදී ඉනිම ඇරඹූ ධනංජයට පිත්ත කඩුල්ල වැදීම (හිට් විකට්) හේතුවෙන් අද දිනයේදී රැස් කරගත හැකි වූයේ ලකුණු 5 ක් පමණි. ෂෙනන් ගේබ්‍රියල් එවන ලද පන්දු පසුපස පාදයේ ආරක්ෂිත පහරක් එල්ල කළද එය කඩුල්ල සොයා යන බවක් පෙනුණි. ඒ අවස්ථාවේදී සැණෙකින් පන්දුව වෙත හැරුණු ධනංජය පන්දුව කඩුල්ලෙන් පැත්තකට යැවීම වෙනුවෙන් පිත්ත හුවා දැක්වූවේය. පළමු වතාවේදී පන්දුව පිත්තේ නොවැදුණු හෙයින් දෙවැනි වරටත් පන්දුව පැත්තකට යැවීම වෙනුවෙන් ධනංජය ගත් උත්සාහයේදී පිත්තෙන් කඩුල්ල බිඳ වැටිණ.

    සිදුවූ අතපසුවීම පිළිබඳව අදහාගත නොහැකි වූ දකුණත් පිතිකරුවා මඳ වේලාවක් පිත්ත තුරුළු කරන් නිසොල්මනේ සිටීමෙන් පිළිබිඹු වූයේ අතපසුවීඹ පිළිබඳව දැඩි පශ්චත්තාපයට පත්වූ බවකි. අකමැත්තෙන් වුවද ධනංජයගේ ඉනිම ලකුණු 61 කදී නිමාවට පත්වූයේ පන්දු 95 කට මුහුණ දීමෙන් පසුවය.

    ඊයේ දිනයේදී සිය 13 වැනි ශතකය වාර්තා කරගත් නායක කරුණාරත්න අද දිනයේදී ලකුණු 150 පෙනි පෙනී දැවී ගියේය. දිගු ඉනිම් වලට නම් දරා සිටින දිමුත් අද දිනයේදී 7 වැනි වතාවටත් ලකුණු 140 සීමාව ඉක්මවා රැස් කර ගත්තේය. මිනිත්තු 434 ක් පුරා කඩුල්ලේ රැඳී සිටි දිමුත් ස්ටම්ප් කිරීමකට හසුව දැවී ගියේය. පහර එල්ල කරද්දී දිමුත්ගේ පාදය සීමා ඉරෙන් යන්තමින් ඉදිරියට ගොස් තිබියදී උපරිම ඵල නෙළා ගත් කඩුලු රකින ජොෂුවා ද සිල්වා  කඩුල්ල බිඳ දැම්මේය. මුහුණ දුන් 300 වැනි පන්දුවේදී දැවී ගිය දිමුත් තම ඉනිම හතරේ පහර 15 කින් වර්ණවත් කරගෙන සිටියේය.

    ඉනිමේ අවසන් පිතිකරුවන් දෙදෙනා වුණු වමත් දඟ පන්දු යවන ලසිත් ඇඹුල්දෙණිය සහ ප්‍රවීන් ජයවික්‍රම එම කඩුල්ල වෙනුවෙන් ලකුණු 25 කින් ලකුණු පුවරුව පෝෂණය කළහ. වැඩි වගකීම ගනිමින් පන්දුවට පහර දුන් ඇඹුල්දෙණිය රොස්ටන් චේස් හමුවේ එල්ල කරන මනරම් හයේ පහර ශ්‍රී ලංකා කඳවුරෙන් වාර්තා වුණු එකම හයේ පහරද වූවේය.

    ශ්‍රී ලංකා ඉනිම හමාර කිරීම වෙනුවෙන් වූ ඇඹුල්දෙණියගේ කඩුල්ල දවා ගැනීමත් සමඟ තෙවැනිවතාවටත් කඩුලු 5 ක් දවා ගැනීමට රොස්ටන් චේස් සමත්වූවේය. දකුණතින් පා දඟ පන්දු යවන චේස් ලකුණු 83 කට කඩුලු 5 දවා ගනිද්දී වමතින් දඟ පන්දු යැවූ ජොමෙල් වොරිකන් ලකුණු 87 කදී කඩුලු 3 ක් දවා ගත්තේය. හෙට (23 වැනිදා) තරගයේ තෙවැනි දිනයයි.

    text by sl cricket
  • අවසන් කඩුළු 7 ලකුණු 105කදී බිද වැටෙයි

    අවසන් කඩුළු 7 ලකුණු 105කදී බිද වැටෙයි

    ඉලක්කය ලකුනු 500 කට එහා ලකුණු සංඛ්‍යාවක් වුවද අවසන් කඩුලු 7 ම ලකුණු 105 කදී දවා ගැනීමට රොස්ටන් චේස් ප්‍රමුඛ බටහිර ඉන්දීය කොදෙව් පන්දු යවන්නන් සමත්වීම නිසා ගාල්ල ජාත්‍යන්තර ක්‍රීඩාංගණයේ පැවැත්වෙන පළමු ටෙස්ට් තරගයේ ශ්‍රී ලංකා පළමු ඉනිම ලකුණු 400 කට ලකුණු 14 ක් අඩුවෙන් හෙවත් ලකුණු 386 කදී නිමාවට පත්විය.

    ශ්‍රී ලංකා ඉනිම නිමාවට පත් කිරීමේදී තරගය ඇරැඹි පළමු පැයේදී ශතක ලාභී දිමුත් කරුණාරත්ව සහ අර්ධ ශතක ලාභී ධනංජය ද සිල්වාගේ කඩුලු දවා ගනිමින් නැවතත් තරගයට අවතීර්ණවීමට කොදෙව් කණ්ඩායම සමත්විය. මොවුන් දෙදෙනාට අමතරව තුන් ඉරියව් ක්‍රීඩකයා ලෙසින් නම් කෙරුණු රමේෂ් මෙන්ඩිස්ද දිවා ආහාරයට පෙර දැවී යෑම මීට වඩා ලකුණු සංඛ්‍යාවක් කරා ශ්‍රී ලංකා පිලට යෑමට තිබූ අවස්ථාව අහිමිවීමට හේතු විය.

    පිටියට පිවිසි අවස්ථාවේදී එතරම් විශ්වාසයකින් යුතුව පන්දුවට පහර දීමට අපොහොසත් වුවද ශ්‍රී ලංකා ඉනිමේ 8 වැනි පිතිකරුවා ලෙසින් දිනේෂ් චන්දිමාල් දැවී යන විට ලකුණු 45 ක් රැස් කරගෙන සිටියේය. වේග පන්දු යවන ෂෙනන් ගේබ්‍රියල් විසින් එවන ලද කෙටි පන්දු වැළකදී තරමක් අපහසුතාවයෙන් මුහුණ දුන්නද පිටියේ ස්ථාවරත්වය ගොඩ නඟා ගැනීමට චන්දිමාල් සමත්වූවේය. පසු පෙළ පිතිකරුවන්වද ආරක්ෂා කර ගනිමින් පන්දුවට පහර දීමට චන්දිමාල් දරන ලද උත්සාහයේදී එල්ල කරන ලද රිවර් ස්වීප් පහරක් වැරැදී යෑම නිසා අර්ධ ශතකයට ලකුණු 3 ක් තිබියදී චන්දිමාල් කඩුල්ල අහිමි කර ගත්තේය.

    ඉනිමේ අවාසනාවන්තම දැවී යෑම ලෙස සටහන් වූයේ ධනංජය ද සිල්වාගේ දැවී යෑමය. ලකුණු 56 ක් ලබා සිටියදී ඉනිම ඇරඹූ ධනංජයට පිත්ත කඩුල්ල වැදීම (හිට් විකට්) හේතුවෙන් අද දිනයේදී රැස් කරගත හැකි වූයේ ලකුණු 5 ක් පමණි. ෂෙනන් ගේබ්‍රියල් එවන ලද පන්දු පසුපස පාදයේ ආරක්ෂිත පහරක් එල්ල කළද එය කඩුල්ල සොයා යන බවක් පෙනුණි. ඒ අවස්ථාවේදී සැණෙකින් පන්දුව වෙත හැරුණු ධනංජය පන්දුව කඩුල්ලෙන් පැත්තකට යැවීම වෙනුවෙන් පිත්ත හුවා දැක්වූවේය. පළමු වතාවේදී පන්දුව පිත්තේ නොවැදුණු හෙයින් දෙවැනි වරටත් පන්දුව පැත්තකට යැවීම වෙනුවෙන් ධනංජය ගත් උත්සාහයේදී පිත්තෙන් කඩුල්ල බිඳ වැටිණ.

    සිදුවූ අතපසුවීම පිළිබඳව අදහාගත නොහැකි වූ දකුණත් පිතිකරුවා මඳ වේලාවක් පිත්ත තුරුළු කරන් නිසොල්මනේ සිටීමෙන් පිළිබිඹු වූයේ අතපසුවීඹ පිළිබඳව දැඩි පශ්චත්තාපයට පත්වූ බවකි. අකමැත්තෙන් වුවද ධනංජයගේ ඉනිම ලකුණු 61 කදී නිමාවට පත්වූයේ පන්දු 95 කට මුහුණ දීමෙන් පසුවය.

    ඊයේ දිනයේදී සිය 13 වැනි ශතකය වාර්තා කරගත් නායක කරුණාරත්න අද දිනයේදී ලකුණු 150 පෙනි පෙනී දැවී ගියේය. දිගු ඉනිම් වලට නම් දරා සිටින දිමුත් අද දිනයේදී 7 වැනි වතාවටත් ලකුණු 140 සීමාව ඉක්මවා රැස් කර ගත්තේය. මිනිත්තු 434 ක් පුරා කඩුල්ලේ රැඳී සිටි දිමුත් ස්ටම්ප් කිරීමකට හසුව දැවී ගියේය. පහර එල්ල කරද්දී දිමුත්ගේ පාදය සීමා ඉරෙන් යන්තමින් ඉදිරියට ගොස් තිබියදී උපරිම ඵල නෙළා ගත් කඩුලු රකින ජොෂුවා ද සිල්වා  කඩුල්ල බිඳ දැම්මේය. මුහුණ දුන් 300 වැනි පන්දුවේදී දැවී ගිය දිමුත් තම ඉනිම හතරේ පහර 15 කින් වර්ණවත් කරගෙන සිටියේය.

    ඉනිමේ අවසන් පිතිකරුවන් දෙදෙනා වුණු වමත් දඟ පන්දු යවන ලසිත් ඇඹුල්දෙණිය සහ ප්‍රවීන් ජයවික්‍රම එම කඩුල්ල වෙනුවෙන් ලකුණු 25 කින් ලකුණු පුවරුව පෝෂණය කළහ. වැඩි වගකීම ගනිමින් පන්දුවට පහර දුන් ඇඹුල්දෙණිය රොස්ටන් චේස් හමුවේ එල්ල කරන මනරම් හයේ පහර ශ්‍රී ලංකා කඳවුරෙන් වාර්තා වුණු එකම හයේ පහරද වූවේය.

    ශ්‍රී ලංකා ඉනිම හමාර කිරීම වෙනුවෙන් වූ ඇඹුල්දෙණියගේ කඩුල්ල දවා ගැනීමත් සමඟ තෙවැනිවතාවටත් කඩුලු 5 ක් දවා ගැනීමට රොස්ටන් චේස් සමත්වූවේය. දකුණතින් පා දඟ පන්දු යවන චේස් ලකුණු 83 කට කඩුලු 5 දවා ගනිද්දී වමතින් දඟ පන්දු යැවූ ජොමෙල් වොරිකන් ලකුණු 87 කදී කඩුලු 3 ක් දවා ගත්තේය.

    හෙට (23 වැනිදා) තරගයේ තෙවැනි දිනයයි.

    text by sl cricket

  • කෑම පාර්සලයේ සහ ප්ලෙන්ටියේ මිලත් අහසට

    කෑම පාර්සලයේ සහ ප්ලෙන්ටියේ මිලත් අහසට

    එළවළු සහ ඒ ආශ්‍රිත අත්‍යාවශ්‍ය ද්‍රව්‍යවල මිල ඉහළ යාමත් සමඟ හෙට (23) සිට ක්‍රියාත්මක වන පරිදි දිවා ආහාර පැකට්ටුවක සහ ප්ලේන් ටී කෝප්පයක මිල ඉහළ දමන බව සමස්ත ලංකා ආපනශාලා හිමියන්ගේ සංගමයේ (AICOA) ප්‍රධානී අසේල සම්පත් මහතා පවසයි.

    ඒ අනුව එළවලු බත්වල සිට ෆ්‍රයිඩ් රයිස් දක්වා මිල රුපියල් 20කින් ඉහළ යනු ඇති අතර ගෑස් මිල ඉහළ යාම හේතුවෙන් ප්ලේන් කෝප්පයක මිල රුපියල් 05කින් ඉහළ යාමට නියමිතය.

    අත්‍යාවශ්‍ය භාණ්ඩ මිල ශීඝ්‍රයෙන් ඉහළ ගොස් ඇති බැවින් ආපනශාලා හිමියන්, හෝටල් කර්මාන්තය සහ පාරිභෝගිකයන් ආරක්ෂා කර ගැනීමේ අරමුණින් මෙම තීරණය ගත් බවයි ඔහු කියා සිටියේ.

    “එළවළු දවල් කෑම පැකට්ටුවක් රුපියල් 160යි, මාලු දවල් කෑම පැකට්ටුවක් රුපියල් 200යි, කුකුල් මස් මිල වැඩි නිසා කුකුල් මස් සහිත දිවා ආහාර පැකට් එකක් රුපියල් 250ක උපරිමයකට විකුණනවා. කොත්තු රොටිවල මිලත් වැඩි කරනවා.වෙළෙඳපොළේ කැරට්, ලීක්ස් වැනි ප්‍රධාන අමුද්‍රව්‍යවල මිල ඉහළ යාම නිසා ෆ්‍රයිඩ් රයිස් මිල ඉහළ දැමීමට සිදු වුණා. මිල වැඩි නොකළහොත් අපේ කර්මාන්තය කඩා වැටෙනවා. එසේ වුවහොත් රට පුරා තිබෙන සියලුම හෝටල් ඉතා ඉක්මනින් බංකලොත් වී ව්‍යාපාරිකයින් දස දහස් ගණනක් මහ පාරට වැටේවි.

  • ඉන්දීය නාවික හමුදාවට රහසිගත මිසයිල සහිත නෞකාවක්

    ඉන්දීය නාවික හමුදාවට රහසිගත මිසයිල සහිත නෞකාවක්

    අයි.එන්.එස් විශාකාපට්නම් යනු පළමු රහසිගත මිසයිල විනාශකාරී නෞකාවයි

    ඉන්දීය ආරක්ෂක අමාත්‍ය රාජ්නාත් සිං ඉරිදා මුම්බායි හි නාවික තටාකාංගණයේදී අයි.එන්.එස් විශාකාපට්නම් නෞකාව නිල වශයෙන් ඉන්දීය නාවික හමුදාවට භාර දුන්නේය.

    අයි.එන්.එස් විශාකාපට්නම් දේශීය වානේ DMR 249A භාවිතයෙන් ඉදිකර ඇති අතර එය ඉන්දියාවේ ඉදිකරන ලද විශාලතම රහසිගත මිසයිල සහික නාවුක යාත්‍රා වේ.සමස්ත දිග මීටර් 163 ක් සහ ටොන් 7,400 කට වඩා වැඩි විස්ථාපනයක් ඇත.

    අයි.එන්.එස් විශාකාපට්නම් යනු ප්‍රොජෙට් 15B හි පළමු රහසිගත මිසයිල සහිත අති බිහිසුණු නෞකාවයි.

    නෞකාවේ සැලකිය යුතු දේශීය අන්තර්ගතයක් දළ වශයෙන් ඇත. සියයට 75 ක් ආත්මනිර්භාර් භාරතයට දායක වේ.

    ආත්මනිර්භාර් භාරත් අභියාන් නොහොත් ස්වයංපෝෂිත ඉන්දීය ව්‍යාපාරය යනු ඉන්දීය ගරු අග්‍රාමාත්‍ය ශ්‍රී නරේන්ද්‍ර මෝදි විසින් අපේක්ෂා කරන ලද නව ඉන්දියාවේ දැක්මයි. 2020 මැයි 12 වන දින, අගමැති විසින් ජාතියට පැහැදිලි ඇමතුමක් ලබා දෙමින්, ආත්මනිර්භාර් භාරත් අභියාන් (ස්වයං-විශ්වාසනීය ඉන්දීය ව්‍යාපාරය) සඳහා ආරම්භයක් ලබා දුන් අතර, ඉන්දීය රුපියල් කෝටි 20 ක විශේෂ ආර්ථික සහ විස්තීරණ පැකේජය ප්‍රකාශයට පත් කළේය – එය ඉන්දියාවේ දළ දේශිය නිෂ්පාදිතයෙන් 10% ට සමාන වේ.

    ඉන්දියාවේ පුරවැසියන් සෑම අතින්ම ස්වාධීන සහ ස්වයංපෝෂිත කිරීම මෙහි අරමුණයි. ඔහු තවදුරටත් ආත්ම නිර්භාර් භාරතයේ කුළුණු පහක් ගෙනහැර දැක්වීය – ආර්ථිකය, යටිතල පහසුකම්, පද්ධතිය, විචිත්‍රවත් ජන විකාශනය සහ ඉල්ලුම. ආත්මනිර්භාර් භාරත අභියාන් යටතේ අංශ හතක් හරහා රජයේ ප්‍රතිසංස්කරණ මුදල් අමාත්‍යවරයා තවදුරටත් ප්‍රකාශයට පත් කළේය.කෘෂිකර්මාන්තය සඳහා සැපයුම් දාම ප්‍රතිසංස්කරණ, තාර්කික බදු පද්ධති, සරල සහ පැහැදිලි නීති, දක්ෂ මානව සම්පත් සහ ශක්තිමත් මූල්‍ය පද්ධතිය වැනි නිර්භීත ප්‍රතිසංස්කරණ කිහිපයක් රජය විසින් ගෙන ඇත.

    නෞකාවක් යනු සමුද්‍රීය යුද්ධයේ සම්පූර්ණ වර්ණාවලිය පුරා විහිදෙන බහුවිධ කාර්යයන් සහ මෙහෙයුම් සිදු කළ හැකි ප්‍රබල උපාංගයකි.

    විශාකාපට්නම් අවි ආයුධ සහ සංවේදක සමූහයකින් සමන්විත වන අතර ඒවාට සුපර්සොනික් මතුපිට සිට පැතලි මතුපිටට සහ මතුපිට සිට ගුවනට විදින මිසයිල කට්ටල, මධ්‍යම හා කෙටි දුර තුවක්කු, සබ්මැරීන් නාශක රොකට් සහ උසස් ඉලෙක්ට්‍රොනික යුධ සහ සන්නිවේදන ඇඳුම් කට්ටල ඇතුළත් වේ.

    නෞකාව ප්‍රබල වායු සහ වායු ප්‍රචාලනය මගින් තල්ලු කරනු ලබන අතර එමඟින් එහි වේගය නොට් 30 ඉක්මවිය හැක. නෞකාවට එහි ප්‍රවේශය තවදුරටත් පුළුල් කිරීම සඳහා ඒකාබද්ධ හෙලිකොප්ටර් දෙකක් නැවැත්වීමේ හැකියාව ඇත.

    indianewsnetwork

  • ‘දොස්ති’ ඒකාබද්ධ යුද අභ්‍යසය ඇරඹෙයි

    ‘දොස්ති’ ඒකාබද්ධ යුද අභ්‍යසය ඇරඹෙයි

    මෙම වසරට අභ්‍යාසය ආරම්භ කර වසර 30ක් සපිරේ.

    ඉන්දියාව, ශ්‍රී ලංකාව සහ මාලදිවයින සෙනසුරාදා සිට දින පහක ඒකාබද්ධ ද්විවාර්ෂික යුධ අභ්‍යාසයක් වන ‘දොස්ති’ ආරම්භ කර ඇත.

    ඉන්දියාව-මාලදිවයින-ශ්‍රී ලංකාව යන ත්‍රි-පාර්ශ්වික අභ්‍යාසය ‘දොස්ති’ හි අරමුණ වන්නේ මිත්‍රත්වය තවදුරටත් ශක්තිමත් කිරීම, අන්‍යෝන්‍ය මෙහෙයුම් හැකියාව වැඩිදියුණු කිරීම සහ අන්තර් ක්‍රියාකාරීත්වය අභ්‍යාස කිරීම සහ රටවල් තුනේ වෙරළාරක්ෂක භටයන් අතර සහයෝගීතාව ගොඩනැගීමයි.

    පසුගිය වසර දහය තුළ සිදු කරන ලද අභ්‍යාසවලදී මුහුදු අනතුරුවලදී සහය ලබා දීමේ අභ්‍යාස , මුහුදු දූෂණය තුරන් කිරීමේ වෙරළාරක්ෂක දෙපාර්තමේන්තුවේ වගකීම සහ තෙල් කාන්දුවීම් වැනි අවස්ථාවලදී වෙරළාරක්ෂක දෙපාර්තමේන්තුවේ ක්‍රියා පටිපාටිය සහ හැසිරීම පිළිබඳව අවධානය යොමු විය.

    මාලදිවයිනේ ජාතික ආරක්ෂක බලකාය පැවසුවේ මෙම අභ්‍යාසය සඳහා ඉන්දීය වෙරළාරක්ෂක යාත්‍රා, ICGS Vajra, ICGS Apoorva සහ, ශ්‍රී ලංකා වෙරළාරක්ෂක බලකාය, SLCGS සුරක්ෂා යන නෞකාවන් මාලදිවයිනට පැමිණ ඇති බවයි.

    නොවැම්බර් 20 වැනිදා ආරම්භ වූ මෙම අභ්‍යාසය නොවැම්බර් 24 වැනිදා දක්වා පැවැත්වේ.මෙම වසරට අභ්‍යාසය ආරම්භ කර වසර 30ක් සපිරේ.

    ‘දොස්ති’ අභ්‍යාසය 1991 දී ආරම්භ කරන ලද අතර, එතැන් සිට මාලදිවයින සහ ඉන්දීය වෙරළාරක්ෂක බලකාය මෙම අභ්‍යාසය පැවැත්වීම සඳහා සහයෝගයෙන් කටයුතු කර ඇත. ශ්‍රී ලංකාව පළමු වරට මෙම අභ්‍යාසයට එක් වූයේ 2012 වසරේදීය.

    ‘දෝස්ති’ අභ්‍යාසය ආරම්භ කර වසර 30ක් සපිරීම නිමිත්තෙන්, ඉන්දියා-මාලදිවයින-ශ්‍රී ලංකාව යන ත්‍රෛපාර්ශ්වික නාවික අභ්‍යාසයේ 15 වැනි අදියර ‘දොස්ති’ නොවැම්බර් 20 සිට 24 දක්වා පැවැත්වේ.

    මෙම වසරේ ජූලි මස මුලදී, ඉන්දියාව, ශ්‍රී ලංකාව සහ මාලදිවයිනේ ඉහළම ආරක්ෂක නිලධාරීන් ‘TTX-2021’ මාර්ගගතග අතථ්‍ය ත්‍රෛපාර්ශ්වික මේසයේ අභ්‍යාසයකට සහභාගී වූ අතර, එහිදී ඔවුන් මත්ද්‍රව්‍ය මැඩපැවැත්වීම සහ සමුද්‍රයේදී සහය වැනි පොදු අන්තර් ජාතික සමුද්‍ර අපරාධ මැඩපැවැත්වීම සඳහා හොඳම භාවිතයන් සහ ක්‍රියා පටිපාටි සාකච්ඡා කළහ.

    ජුලි 14 සිට 15 දක්වා දෙදින අභ්‍යාසය අන්‍යෝන්‍ය අවබෝධය වැඩි දියුණු කිරීම සහ පොදු ජාත්‍යන්තර අපරාධ මැඩලීම සඳහා හොඳම භාවිතයන් ක්‍රියා පටිපාටි හුවමාරු කර ගැනීමේ අරමුණින් මුම්බායි හි සමුද්‍ර යුධ මධ්‍යස්ථානය විසින් සම්බන්ධීකරණය කරන ලද බව මාලදිවයිනේ ඉන්දීය මහ කොමසාරිස් කාර්යාලය පවසයි.

    by indianewsnetwork

  • පොහොර ගැසට් රිවස් නොකරන බව ජනපති දැඩිව කියයි

    පොහොර ගැසට් රිවස් නොකරන බව ජනපති දැඩිව කියයි

    • කාබනික ගොවිතැනට පමණක් සහනාධාර …
    • අඩුපාඩු හඳුනාගෙන ඊළග කන්නයට සූදානම් වන්න …
    • ගොවීන් නිසි ලෙස දැනුවත් කර නැහැ …
    • නිවැරදි දේ වෙනුවෙන් කැපවිය යුතු බවට ජනපති නිලධාරීන්ට දැඩිව අවධාරණය කරයි …

    රජයේ ප්‍රතිපත්තියේ කිසිඳු වෙනසක් නැහැ. මෙරට කෘෂිකර්මාන්තය මුළුමනින්ම කාබනික පොහොර භාවිතයට යොමු කෙරෙන හරිත කෘෂිකර්මාන්තයක් සඳහාම පමණක් බව ජනාධිපති ගෝඨාභය රාජපක්ෂ මහතා අවධාරණය කරයි.

    රජයක් ලෙස කාබනික පොහොර බෙදාහැරීම, සහනාධාර ලබාදීම කාබනික ගොවිතැන වෙනුවෙන් පමණක් සිදුකරන බව ජනාධිපතිවරයා පවසයි. ගොවීන් නිසි ලෙස දැනුවත් කළ යුතුය. එමෙන්ම එය ක්‍රියාත්මක කිරීමේදී පවතින රසායනික පොහොර මාෆියාව පිළිබඳ හඳුනාගත යුතුය. ඒ සමග සටන් වැඳ නිවැරදි දේ ජයග්‍රහණය කරවීමට නිලධාරීන්ගේ කැපවීම අත්‍යාවශ්‍ය බව ජනාධිපතිවරයා අවධාරණය කළේය.

    මහ කන්නයේ වගා කටයුතු සහ කාබනික පොහොර සැපයුම සම්බන්ධයෙන් අද (22) පෙරවරුවේ ජනාධිපති කාර්යාලයේ පැවති විශේෂ සාකච්ඡාවේදී ජනාධිපතිවරයා මේ බව පැවසීය.

    දිවයිනේ සියලු පළාත්වල වී ඇතුළු සෙසු භෝග වගා කටයුතු පිළිබඳව ජනාධිපතිවරයා දිස්ත්‍රික් මට්ටමින් නිලධාරීන්ගෙන් කරුණු විමසා බැලීය. පැවති අධික වර්ෂාව සහිත කාලගුණික තත්ත්වය එළවළු ඇතුළු භෝග රැසක අස්වැන්න අඩුවීමට බලපා ඇත. එමෙන්ම කාබනික පොහොර බෙදාහැරීමේදී සිදු වූ ප්‍රමාදය නිසා මහ කන්නයේ වගා කටයුතුවලට බලපෑම් ඇති විය. එහෙත් දිස්ත්‍රික් මට්ටමින් සමස්ත වගා බිම්වලින් 70%කට ආසන්න භූමි ප්‍රමාණයක වගා කටයුතු ආරම්භ කර ඇති බව නිලධාරිහු පැවසූහ.

    ගොවීන් උද්ඝෝෂණවල යෙදීමට සහ වගා කටයුතු ප්‍රමාද කිරීමට හේතුව ඔවුන් නිසි ලෙස දැනුවත් නොවීම බව ජනාධිපතිවරයා පෙන්වා දුන්නේය. එලෙස දැනුවත් නොකිරීම සම්බන්ධයෙන් ජනාධිපතිවරයා නිලධාරීන් වෙත සිය අප්‍රසාදය පළ කළේය. හරිත කෘෂිකර්ම ප්‍රතිපත්තිය තුළ සිටිමින් උද්ඝෝෂණය කරන ගොවීන් වෙනුවෙන් පිළිතුරු සෙවීමට නිලධාරීන් ක්‍රියා කළ යුතු බව අවධාණය කළ ජනාධිපතිවරයා, රජයේ ප්‍රතිපත්තියට එකඟ නොවන නිලධාරීන්ට ඉන් ඉවත් වීමට බාධාවක් නොමැති බවත් සඳහන් කරනු ලැබීය.

    හිතට එකඟව පැහැදිලිව වැඩ කරන කණ්ඩායමක සහාය මෙම වැඩපිළිවෙළේ සාර්ථකත්වය වෙනුවෙන් අවශ්‍ය බවත් ජනාධිපතිතුමා පැවසීය.

    අමාත්‍ය මහින්දානන්ද අලුත්ගමගේ, රාජ්‍ය අමාත්‍ය ශෂින්ද්‍ර රාජපක්ෂ, ආණ්ඩුකාරවරුන් වන මාර්ෂල් ඔෆ් ද  එයාර් ෆෝස් රොෂාන් ගුණතිලක, අනුරාධ යහම්පත්, ජනාධිපති ලේකම් පී.බී. ජයසුන්දර, ජනාධිපති ප්‍රධාන උපදේශක ලලිත් වීරතුංග,  යන මහත්ම මහත්මීහු කෘෂිකර්ම අමාත්‍යාංශයේ සහ ඊට අයත් රේඛීය ආයතනවල ප්‍රධානීහු, කාබනික පොහොර නිෂ්පාදකයන්  ඇතුළු පිරිසක් මේ අවස්ථාවට එක්ව සිටියහ.

  • අයවැය දෙවැනි වර කියවීම වැඩි ඡන්ද 93කින් සම්මතයි

    අයවැය දෙවැනි වර කියවීම වැඩි ඡන්ද 93කින් සම්මතයි

    මුදල් ඇමති බැසිල් රාජපක්ෂ මහතා විසින් 2022 වසර සඳහා ඉදිරිපත් කළ අයවැය විසර්ජන පනත් කෙටුම්පත (2022) දෙවැනි වර කියවීම වැඩි ඡන්ද   93 කින් පාර්ලිමේන්තුවේදී අද (22) පස්වරුවේ  සම්මත විය. විසර්ජන පනතට පක්ෂව ඡන්ද 153ක්  ලැබුණු අතර ඊට විරුද්ධව ලැබුණේ ඡන්ද 60ක් පමණි.

    සමගි ජන බලවේගය ජනතා විමුක්ති පෙරමුණ සහ දෙමළ ජාතික සන්ධානය යන පක්ෂවල මන්ත්‍රීවරු විසර්ජන පනතට විරුද්ධව ඡන්දය ප්‍රකාශ  කළහ.

    දෙවැනි වර කියවීමේ විවාදය අවසන් වීමෙන් පසු අයවැය කාරක සභා අවස්ථාවේ විවාදය අද( 23) සිට ආරම්භ කෙරෙන අතර එය ලබන මස 10වැනිදා  දක්වා දින 16ක් පැවැත්වීමට නියමිතය. අයවැය  විසර්ජන පනත් කෙටුම්පත පිළිබඳ අවසාන ඡන්ද විමසීම ලබන මස
    10 වැනිදා පස්වරු 5.00ට පැවැත්වේ.

  • එළවළු වල ගුණත්වය බසී – මිල ගණන් අහස උසට

    එළවළු වල ගුණත්වය බසී – මිල ගණන් අහස උසට

    • ලාභ ගන්න ගොවීන් කරන කූඨ වැඩ ගැන චෝදනා
    • එළවළුවල ගුණත්වය අන්තට බැහැලා
    • අතරමැදි ජාවාරමුන් නිසා එළවළු මිල අහස උසට යනවා

    නුවරඑළිය ඇතුළු උඩරට ප්‍රදේශවලින් අනෙකුත් ආර්ථික මධ්‍යස්ථානවලට එළවළු   තොග ලැබීමේ සැලකිය යුතු අඩුවීමක් වාර්තා වුව ද දඹුල්ල ආර්ථික මධ්‍යස්ථානයට අද (22) දින අළුයම කැරට්, ලීක්ස්, බෝංචි, අර්තාපල් වැනි එළවළු සීමිත ප්‍රමාණයක් ලැබී තිබුණු බව ආර්ථික මධ්‍යස්ථාන වෙළෙන්දෝ පවසති.

    ලැබී තිබුණු සීමිත තොග සඳහා ඉහළ මිලක් පැවති නමුත් ඒවා මිලදී ගැනීම සඳහා වෙළෙඳුන්ගේ පැමිණීම අඩු වී ඇතැයි නුවරඑළියේ සිට එළවළු දඹුල්ලට රැගෙන ආ අතර මැදි වෙළෙන්දෝ පවසති.

    අද දින අළුයම දඹුල්ල ආර්ථික මධ්‍යස්ථානයේ ලීක්ස්  කිලෝව රුපියල් 390-420ත් අතර මිලක් පැවති අතර කැරට් කිලෝවක් රුපියල් 240 සිට රුපියල් 300 දක්වා වූ මිල ගණන් යටතේ අලෙවි විය.

    ඇතැම් ගොවීන් කියා සිටියේ නුවරඑළිය  දීස්ත්‍රික්කයේ  එළවළු අනෙකුත් ආර්ථික මධ්‍යස්ථාන වලට  ප්‍රවාහනය කිරීම සීමා කොට තිබුණද ඒවා නිෂ්පාදනය  කළ ගොවීන්ගේ ඉල්ලීම් මත  දඹුල්ල ආර්ථික මධ්‍යස්ථාන වලට රැගෙන ආ බවය.

    නුවරඑළිය ප්‍රදේශයේ වගා කෙරෙන ලීක්ස් සහ කැරට් ආදී එළවළු වල ගුණාත්මක භාවය අඩු වී ඇතැයි එම ගොවීන් පෙන්වා දුන් අතර ඔවුන් කියා සිටියේ වෙනදා මෙන් නොව ලීක්ස්, කැරට් හා අර්තාපල්  ප්‍රමාණයෙන් ඉතා කුඩා බවය.

    ‘අල කුඩා වුවත් හොඳ මිලක් ලැබුණා’ අතරමැදි වෙළෙඳුන් කියා සිටියේය.

    මේ අතර දඹුල්ල ආර්ථික මධ්‍යස්ථානයට අද (22) දින පහත රට එළවළු වර්ග ලැබීම යම් මට්ටමකින් ඉහළ අගයක් ගෙන තිබුණි. අළුයම් කාලයේ ආර්ථික මධ්‍යස්ථානය තුළ කැරට්, ලීක්ස්, මාලුමිරිස්, බෝංචි, යන එළවළු වර්ග කිලෝවක් තොග මිල  රුපියල්  250 සිට 450 දක්වා වූ විවිධ මිල පරාසයන් යටතේ අලෙවි වීම සිදු වූ අතර වම්බටු, මෑකරල්, දඹල, පතෝල, කරවිල, බණ්ඩක්කා, ආදී එළවළු කිලෝ එකක තොග මිල රුපියල් 120- 280 දක්වා මිල පරාසයක් යටතේ අලෙවි වීම විශේෂත්වයකි.

    එමෙන්ම  දඹුල්ල ආර්ථික මධ්‍යස්ථානයට පැමිණ සිටී ගොවීන් රැසක්  කියා සිටියේ එළවළු වගාව සඳහා අවශ්‍ය තෙල් පොහොර නොමැතිවකම මෙන්ම වර්ෂ අවසානයේ දී පවතින අයහපත් කාලගුණික තත්ත්වය නිසා එළවළු හිඟ වීම සාමාන්‍යයෙන් සිදුවන බවය.

    කෙසේ  වෙතත් ආර්ථික මධ්‍යස්ථානයට එළවළු මිලදී ගැනීම සඳහා පැමිණ සිටි ව්‍යාපාරික ප්‍රජාව සිටියේ එළවළු නරක් වීම නිසා තමන්ට ව්‍යාපාරය පවත්වාගෙන යෑමට නොහැකි තත්ත්වයක් උදා වී තිබෙන බවය.

    ඇතැම් ගොවීන් ඉතා සූක්ෂම ලෙස බර වැඩි කර ගැනීම් සඳහා ආහාරයට ගැනීමට  නොහැකි වූ එළවළු වර්ග මැදි කිරීම, ලීක්ස් වලට පස් ගුලි තැවරීම ආදී ක්‍රියාවන් නිසා තමන්ට   වෙළඳාම් කටයුතු සිදුකිරීම දැඩි අසීරුතාවයකට පත්ව තිබෙන බව ද ඔවුහු පෙන්වා දුන්හ.

    ආර්ථික මධ්‍යස්ථානයට පැමිණ සිටි ව්‍යාපාරිකයෙකු කියා සිටියේ දඹුල්ල ආර්ථික මධ්‍යස්ථානය තුළ මෙන්ම රටේ ආර්ථික  මධ්‍යස්ථාන රැසක අතරමැදි වෙළඳ කණ්ඩායම් නිසා මෙතරම් එළවළු මිල ඉහළ යන බවය.

    ඒ පිළිබඳව වැඩි දුරටත් විග්‍රහ කරමින් ඔහු මෙසේ ද පැවසුවේය.

    ‘’ආර්ථික  මධ්‍යස්ථාන වල ඉන්න අතරමැදි  කණ්ඩායම් ඉතා සූක්ෂම ලෙස ගොවීන්ගේ එළවළු ලබාගෙන අවස්ථා දෙක තුනක් එම මධ්‍යස්ථානයේ ම තබාගෙන වැඩි මිල ගණන් යටතේ අලෙවි කිරීමේ ජාවාරමක් ක්‍රියාත්මක කරනවා. එළවළු මිල මෙතරම් ඉහළ යන්නේ ඒ නිසයි. මේ ජාවාරම වැළැක්වීමට අවශ්‍ය නම් රජයේ ආරක්ෂක අංශ යොදා හෝ මෙම තත්ත්වය සොයා බැලීමට හැකියි. අපි ජනාධිපතිවරයාගෙන් සහ ඇමැතිවරයාගෙන් ඉල්ලා සිටින්නේ මේ අතරමැදි ජාවාරම වළක්වා දෙන්න කියලයි. ඒකට ඕනෑම උදව්වක්, තොරතුරු ලබාදීමක් කරන්න අපි සූදානම්’ යැයි ද ඔහු සඳහන් කළේය.

    සටහන සහ ඡායාරූප – කාංචන කුමාර ආරියදාස – දඹුල්ල

  • මන්ත්‍රීවරියන්ට පාර්ලිමේන්තුවේදී සිදුවන වාචික හිංසනය ගැන කතානායකට පැමිණිල්ලක්

    මන්ත්‍රීවරියන්ට පාර්ලිමේන්තුවේදී සිදුවන වාචික හිංසනය ගැන කතානායකට පැමිණිල්ලක්

    අතලොස්සක් වූ පාර්ලිමේන්තු මන්ත්‍රීවරියන්ට ශ්‍රී ලංකා පාර්ලිමේන්තුව තුළ පක්ෂ විපක්ෂ මන්ත්‍රීවරුන්ගේ වාචික හිංසනයට ලක්වීම පිළීබදව පාර්ලිමේන්තු මන්ත්‍රීවරියන්ගේ සංසදයේ සභාපති විශේෂඥ වෛද්‍ය සුදර්ශිනී ප්‍රනාන්දුපුල්ලේ මහත්මිය විසින් කථානායකවරයාගේ අවධානයට යොමුකර තිබේ.

    පසුගියදා මන්ත්‍රීවරයෙකු විසින් පාර්ලිමේන්තු මන්ත්‍රීවරියකට එරෙහිව සිදුකල ප්‍රකාශය සම්බන්ධයෙන් විශේෂ අවධානය යොමුකරමින්  සිය ලිපිය යොමු කර ඇති සභාපතිනිය සදහන් කර ඇත්තේ මීට පෙර අවස්ථාවලද වාචික හිංසනයන් තුළින් උත්තරීතර පාර්ලිමේන්තුව තුළ මන්ත්‍රීවරියන් අපහසුතාවට පත්වන ආකාරයෙන් ප්‍රකාශ නිකුත් කිරීම සිදුවී ඇති බවත් එය ප්‍රජාතන්ත්‍රවාදය අගයන සමාජයක යහපත් පූර්වාදර්ශයක් නොවන බවයි.

    නීති සම්පාදනයට දායක වන මහජන නියෝජිතවරියන් කාන්තාවක් වීම තුළ එම ස්ථානය තුළදීම හිංසනයට ලක්වන්නේ නම් එමගින් පෙන්නුම් කරනුයේ සමස්ථ සමාජයක පරිහාණිය බව පෙන්වාදී ඇති එතුමිය, ගෘහස්ථ, පොදු මගී සේවා, මහමග සහ වෘත්තීය ස්ථානයේ දී කාන්තාවන්ට මුහුණ පෑමට සිදුවන හිංසනයන් පිළිබදව සාකච්ඡා කෙරෙන, එවැනි දෑ වැළැක්වීමට කටයුතු කරන උත්තරීතර ආයතනයක මන්ත්‍රීවරියන්ට එරෙහි වාචික හිංසනය සිදුවන අයුරින් ප්‍රකාශ නිකුත් කිරීම සභ්‍යත්වය අගයන කිසිවෙකු අනුමත නොකරන්නක් බවද පෙන්වා දී ඇත.

    සිය ලිපිය මගින් ඇය වැඩිදුරටත් පෙන්වාදී ඇත්තේ මෙවැනි තත්වයක් තුළ ජනගහනයෙන් 52%ක් වන කාන්තාව කෙරෙහි සමාජයේ ඇති පසුගාමී ආකල්පය මැන බැලීමට විශේෂ විශ්ලේෂණාත්මක දත්ත අවශ්‍ය යයි තමන් නොසිතන බවත් සිංහල, දෙමළ සහ මුස්ලිම් යන ප්‍රධාන ජන කොටස් තුනම අඩු වැඩි වශයෙන් කාන්තාව පුරුෂයාගේ දේපළක් ලෙස, පුරුෂයාගෙන් පාලනය විය යුතු, පුරුෂයන්ට වඩා පහළ මනුෂ්‍යන් කොටසක් ලෙස සමාජීය වශයෙන් මෙන්ම ආගමික, සහ නීතිමය රාමු තුළත් අර්ථ දැක්වීමට උත්සාහ කිරීම තුළින් හදුනාගත හැකි බවයි. එබැවින් එය පැහැදිලිවම කාන්තාව රටේ තීරණාත්මක දේශපාලනමය මැදිහත්වීම් වල නිරත වීම අධෛර්යය කරන්නක් බව අමුතුවෙන් සඳහන් කළ යුතු නොවන බව වැඩිදුරටත් පෙන්වා දෙයි.

    කාන්තාවන්ට දේශපාලනයේ යෙදීමට තිබෙන හිමිකම පිළිගැනීම, කාන්තාවන් වීම හේතුවෙන් දේශපාලන කාර්යයේදී අවමානයට ලක් නොකිරීම, කාන්තාවන්ගේ දේශපාලන හිමිකම් උල්ලංඝනය නොකිරීම සහ සමාන පාර්ශවකරුවන් ලෙසින් කාන්තාවන්ගේ දේශපාලන ක්‍රියාකාරිත්වය ස්ථාපිත කිරීම, ප්‍රවර්ධනය කිරීම දියුණු දේශපාලන සංස්කෘතියක් අගයන සමාජයක අපේක්ෂාව විය යුතු බව විශේෂඥ වෛද්‍ය සුදර්ශිනී ප්‍රනාන්දුපුල්ලේ මහත්මිය කථානායකවරයා වෙත යවන ලද ලිපිය මගින් පෙන්වා දී ඇත.

    කාන්තාවන්ට එරෙහි ප්‍රචණ්ඩත්වය සංකීර්ණ සමාජීය ගැටලුවක් මෙන්ම මූලික මානව අයිතිවාසිකම් පිළිබඳ ගැටලුවක් බවට අද පත්ව ඇති බවත් කායික, වාචික හෝ මානසික හානියක් සිදු කරන ඕනෑම ක්‍රියාවක් කාන්තාවන්ට එරෙහි ප්‍රචණ්ඩත්වය ලෙස නිර්වචනය කළ හැකි බවයි ඇය වැඩිදුරටත් පෙන්වා දී ඇත්තේ. මෙහිදී කථානායකවරයාගේ විශේෂ අවධානයට ලක්කරමින් සදහන් කර ඇත්තේ වාචික අපයෝජන, තර්ජනය කිරීම, අපහාස කිරීම, විවේචනය කිරීම, හාස්‍යයට උපහාසයට ලක් කිරීම බහුල වශයෙන් දැකිය හැකි අතර එය උත්තරීතර පාර්ලිමේන්තුව තුළද සිදුවීම කණගාටුදායක තත්වයක් බවයි.

    කාන්තාවන්ගේ දේශපාලන සහභාගීත්වය අවම මට්ටමක පවතින අවස්ථාවක පාර්ලිමේන්තුවට ‌තේරී පත්වූ මන්ත්‍රීවරියන් 12 දෙනාගේ ගෞරවය ආරක්ෂා වෙන අයුරින් පාර්ලිමේන්තුව තුළ ප්‍රකාශ නිකුත් කිරීමට අවශ්‍ය පරිසරය සකසා දීමට කථානායකතුමාගේ කාරුණික අවධානය යොමුකරන ලෙස පාර්ලිමේන්තු සංසදයේ සභාපතිනිය එම ලිපිය මගින් වැඩිදුරටත් ඉල්ලා සිටියි.

  • සම්භවය හඳුනාගත නොහැකි කොවිඩ් රෝගීන්ගේ ඉහළ යාමක්

    සම්භවය හඳුනාගත නොහැකි කොවිඩ් රෝගීන්ගේ ඉහළ යාමක්

    මේ අතර, COVID-19 සම්බන්ධීකාරක, සෞඛ්‍ය අමාත්‍යාංශයේ තාක්ෂණික සේවා අධ්‍යක්ෂ, වෛද්‍ය අන්වර් හම්දානි දෙමාපියන්ගෙන් ඉල්ලා සිටියේ තම දරුවන් හෝ ඔවුන්ගේ පවුලේ සාමාජිකයින්ට COVID රෝග ලක්ෂණ ඇත්නම් හෝ ධනාත්මක රෝගියෙකුගේ පළමු සම්බන්ධතා බවට පත් වුවහොත් තම දරුවන් පාසල්වලට නොයවන ලෙසයි.

    මේ වන විට රට තුළ හඳුනාගත් COVID-19 රෝගීන්ගේ සම්භවය හඳුනා ගැනීමට නොහැකි වී ඇති බව සෞඛ්‍ය බලධාරීහු අද (21) ප්‍රකාශ කළහ.

    සෞඛ්‍ය අමාත්‍යාංශයේ විශේෂඥ වෛද්‍ය මල්කාන්ති ගල්හේන මහත්මිය පැවසුවේ කොවිඩ් ආසාදිතයන් යළිත් ඉහළ යමින් පවතින බව පැහැදිලිව පෙනෙන බවයි.

    “සම්භවයක් නොමැතිව සිද්ධීන් අනාවරණය වී තිබෙනවා, වෛරසය ප්‍රජාව තුළ කෙතරම් දුරට ව්‍යාප්ත වී ඇත්ද යන්න එමගින් පෙන්නුම් කරනවා, එය භයානක තත්වයක්. මේ අනුව සෞඛ්‍ය පුරුදු දැඩිව පිළිපැදීම යුගයේ අවශ්‍යතාවයක් වන අතර ජනතාව වගකීමෙන් යුතුව ක්‍රියා කළ යුතුයි,” වෛද්‍ය ගල්හේන මහත්මිය අවධාරණය කළාය.

    මේ අතර, COVID-19 සම්බන්ධීකාරක, සෞඛ්‍ය අමාත්‍යාංශයේ තාක්ෂණික සේවා අධ්‍යක්ෂ, වෛද්‍ය අන්වර් හම්දානි දෙමාපියන්ගෙන් ඉල්ලා සිටියේ තම දරුවන් හෝ ඔවුන්ගේ පවුලේ සාමාජිකයින්ට COVID රෝග ලක්ෂණ ඇත්නම් හෝ ධනාත්මක රෝගියෙකුගේ පළමු සම්බන්ධතා බවට පත් වුවහොත් තම දරුවන් පාසල්වලට නොයවන ලෙසයි.

  • කාබනික ගොවිතැන රිවස් කරනවාද ? නැද්ද ? ජනපති සමග තීරණාත්මක සාකච්ඡාව හෙට

    කාබනික ගොවිතැන රිවස් කරනවාද ? නැද්ද ? ජනපති සමග තීරණාත්මක සාකච්ඡාව හෙට

    වල් නාශක, කෘමි නාශක සහ දිලීර නාශක නැවත ආයනයන කිරීමට ජනාධිපතිවරයාගේ අනුමැතිය ලබාගැනීම හෙට (22) පෙරවරුවේ සාකච්ඡා කරන බව කෘෂිකර්ම රාජ්‍ය අමාත්‍ය ශෂීන්ද්‍ර රාජපක්‍ෂ මහතා අද (21) පැවසූ බව ලංකාදීප ඊ පුවත්පත වාර්තා කර ඇත.

    ජනාධිපතිවරයා සමඟ එම සාකච්ඡාව හෙට පෙරවරු 10.30 ට පැවැත්වෙන බවත් තුන්වැනි සහ හතරවැනි කාණ්ඩයේ පොහොර ආනයන කිරීමට එහිදී අවසර ඉල්ලා සිටීම නියමිත බව ද ශෂීන්ද්‍ර රාජපක්ෂ මහතා සඳහන් කළ බවයි එම වාර්තාවේ වැඩි දුරටත් සඳහන් වන්නේ.

    කාබනික වගාවට එකවර යා නොහැකි නිසා කන්න තුනකදී සියයට 100 ක් කාබනික වගාවට යන්න බලාපොරොත්තු වන බවත් පළමු සහ දෙවැනි කන්නවලට වල්, කෘමි සහ දිලීර නාශකවල සහයෝගය අවශ්‍ය බවත් රාජ්‍ය අමාත්‍යවරයා වැඩි දුරටත් පවසා තිබෙනවා.

  • කෘෂිකර්ම ඇමැති මහින්දානන්ද ලේකම්ගේ මතය බැහැර කරයි

    කෘෂිකර්ම ඇමැති මහින්දානන්ද ලේකම්ගේ මතය බැහැර කරයි

    නිසි ප්‍රමිතියෙන් යුත් ගුණාත්මක ශාක පෝෂක සහ ශාක ආරක්ෂක මෙරටට ගෙන්වීමට යළි අවසර ලබාදීමට තිරණය කළ බව කෘෂිකර්ම අමාත්‍යාංශ ලේකම්වරයා සදහන් කළ ද කිසිසේත් වී සහ එළවළුවලට රසායනික පොහොර ආනයනය නොකරන බව කෘෂිකර්ම ඇමති මහින්දානන්ද අලුත්ගමගේ මහතා සඳහන් කළ බව ජාතික මාධ්‍ය කිහිපයක් වාර්තා කර ඇත.

    වී සහ එළවළු වගාවන් සඳහා රසායනික පොහොර ගෙන්වීමට ආණ්ඩුව මේ දක්වා කිසිඳු තීරණයක් ගෙන නැතැයිද අවධාරණය කළ කෘෂිකර්ම අමාත්‍යවරයා ශාක පෝෂක රසායනික පොහොරක් ගෙන්වන බවට පළවන තොරතුරුවල කිසිදු සත්‍යතාවයක් නැතැයිද සඳහන් කරයි.

    ජනතාවගේ සුබ සිද්ධිය තකා ක්‍රියාත්මක කළ කාබනික පොහොර ප්‍රචලිත කිරීමේ වැඩසටහනේ ආපසු හැරවීමක් ගැන මේ වන තෙක් ආණ්ඩුව කිසිඳු ප්‍රතිපත්තිමය තීන්දුවක් ගෙන නැතැයිද කෘෂිකර්ම අමාත්‍යවරයා වැඩිදුරටත් සඳහන් කරයි.