ශ්රී ලංකා හිටපු නායක ඇන්ජලෝ මැතිව්ස්ගේ ආබාධය සියයට සියයක් සුව වීමෙන් පසුව බංග්ලාදේශය සමග පැවැත්වෙන දෙවැනි විස්සයි විස්ස තරගයේ සිට කණ්ඩායමට එක්වීමට සැලසුම් කර තිබෙන බව පවසන ශ්රී ලංකා ක්රිකට් කළමනාකරු අසංක ගුරුසිංහ චැම්පියන්ස් කුසලාන එක්දින තරගාවලිය වන විට ශ්රී ලංකාවේ පන්දු රැකීම අංක එකේ තත්ත්වයට ගෙන එන බවද පවසයි.
”ඇන්ජලෝ මැතිව්ස් දැන් සුව වෙමින් ඉන්නෙ. මම හිතන විදිහට ඔහුට පළමු විස්සයි විස්ස තරගය ක්රීඩා කරන්න ලැබෙන්නෙත් නැහැ. නමුත් ඔහු දෙවැනි විස්සයි විස්ස තරගයේ ඉඳල කණ්ඩායමට එක් වේවි.” යනුවෙන් පැවසීය.
තමාට අවශ්ය කරන්නේ ඉදිරි මාස කිහිපය තුළ ක්රීඩකයන් 15-20 ක් අතර ප්රමාණයක් එක දිගට කණ්ඩායමේ රඳවා ගනිමින් ඔවුන්ව පදම් කිරීම බවත් එසේ නොකිරීම විශාල කනගාටුවක් බවත් ගුරුසිංහ පෙන්වා දෙයි. ”පහුගිය කාලයේ ක්රීඩකයන් ඕනෑ තරම් කණ්ඩායමට ආවා ගියා. නමුත් එහෙම වුණහම එක ක්රීඩකයකුට ස්ථානයකට හුරු වෙන්නවත් කාලයක් නැහැ. අපේ කණ්ඩායමේ දක්ෂ ක්රීඩකයන් ඕනෑ තරම් ඉන්නවා. මම දැන් පුහුණුකරු සහ තේරීම් කමිටුවත් එක්ක කතා කරල තියෙනවා. කොහොම වුණත් මගේ බලාපොරොත්තුව අනුව එක කණ්ඩායමක් ඉදිරියට ටික කාලයක් යා යුතුයි.”
ලසිත් මාලිංග එක්දින තරගාවලිය ක්රීඩා නොකළේ ඔහු පසුගිය සමයේ පන්දුවාර පනහේ තරග ක්රීඩා නොකිරීම නිසා එම තරග සඳහා පදම්වීමට පෙර තරග ක්රීඩා කිරීම නුසුදුසු බැවින් බවද ගුරුසිංහ පවසයි.
”මාලිංග පන්දුවාර පනහේ තරග ක්රීඩා නොකළේ ඔහු දීර්ඝ කාලයක් ඒ තරග ක්රීඩා කළේ නැති නිසා. නමුත් විස්සයි විස්ස තරග දෙකට එයා ක්රීඩා කරනවා. ඊට පස්සෙ අයි.පී.එල්. යනවා. එතනින් ගන්න අත්දැකීම් එක්ක අපි බලාපොරොත්තු වෙනවා චැම්පියන්ස් කුසලානට මාලිංගව අරගෙන යන්න.”
චැම්පියන්ස් කුසලානට යන විට ශ්රී ලංකා පිලේ පන්දු රැකීම අංක එකට ගෙන එම සඳහා සියලු විධි විධාන යොදන බවත් නමුත් ඊට පෙර තියෙන බංග්ලාදේශය සමග තරගයේදීද පන්දු රැකීමේ දුර්වලතා සිදු කළ නොහැකි බවත් ගුරුසිංහ පෙන්වා දෙයි.
කෙසේ වෙතත් ආබාධයක් හේතුවෙන් එක්දින තරගාවලිය අහිමි වූ කුසල් ජනිත් විස්සයි විස්ස තරගාවලියට ක්රීඩා කරන බවත් ඉදිරියේදී ටෙස්ට්, එක්දින සහ විස්සයි විස්සට එකම කණ්ඩායම් පුහුණු කිරීමෙන් අඩුපාඩු මඟහැර ගැනීමට හැකි වනු ඇතැයි තමා විශ්වාස කරන බවත් ගුරුසිංහ පවසයි.
