Category: සුපිරි News

කොවිඩ් පැතිරීම පාලනය කිරීමේ පියවරක් ලෙස මහජන ඒකරාශීවීම්, රැස්වීම් හා උත්සව අද ( 15) රාත්‍රී 12.00 සිට සිට ලබන 30 වැනිදා දක්වා තහනම් කරමින් සෞඛ්‍ය සේවා අධ්‍යක්ෂ ජනරාල්වරයා විසින් සෞඛ්‍ය මාර්ගෝපදේශ සංග්‍රහයක් ඊයේ පස්වරුවේ නිකුත් කරනු ලැබීය.

ජන බල වේගය කොළඹට’ යන මැයෙන් සමගි ජන බලවේගය විසින් හෙට (16) කොළඹ දී පැවැත්වීමට නියමිත උද්ඝෝෂණ ව්‍යාපාරය නවතා ලෙසට වාරණ නියෝගයක් නිකුත් කරන්නැයි පොලිසි 18ක් කළ ඉල්ලීමක් කොළඹ ප්‍රධාන මහේස්ත්‍රාත් අධිකරණය අද (15) ප්‍රතික්ෂේප කළේය.

කොළඹ ප්‍රධාන මහේස්ත්‍රාත් අධිකරණයේ අධිකරණ අටකින් පොලිස් ස්ථාන 20ක් මෙම ඉල්ලීම සිදුකර තිබූ අතර, ඉන් පොලිස් ස්ථාන 18කින් ඉදිරිපත් කළ ඉල්ලීම් එසේ ප්‍රතික්ෂේප විය.

බ්ලූමැන්ඩල්, කිරුළපන, නාරාහේන්පිට, බම්බලපිටිය, වේල්ලවිදිය, වැලිකඩ, ගොතටුව, මුල්ලේරියාව, මාලිගාවත්ත, වැල්ලම්පිටිය, බොරැල්ල, මෝදර, කුරුදුවත්ත, දෙමටගොඩ, ග්‍රෑන්ඩ්පාස්, වෙරළබඩ, මට්ටක්කුලිය, කෙසෙල්වත්ත යන පොලිස් ස්ථාන 18ක් මෙම ඉල්ලීම ඉදිරිපත් කර තිබුණේය.

උද්ඝෝෂකයින් සෞඛ්‍ය නිති රිතී උල්ලංඝණය කරන්නේ නම්, පොලිස් බලතල ප්‍රකාරව ඔවුන් අත්අඩංගුවට ගෙන අධිකරණයට ඉදිරිපත් කරන ලෙසට නියම කළ අධිකරණය පොලීසිය කළ ඉල්ලීම ඉවත දැමීය.

ආණ්ඩුක්‍රම ව්‍යවස්ථාවේ 14 වන ව්‍යවස්ථාව ප්‍රකාරව උද්ඝෝෂණයේ අයිතිය මහජනතාව සතුව ඇති බවත් කොරෝනා රෝගයට අදාළව සෞඛ්‍ය ජනරාල්වරයා විසින් නිකුත් කරන ලද චක්‍රලේඛයට අනුව යමෙකු එය උල්ලංඝණය කරන්නේ නම් ඒ සදහා පොලිස් බලතල පාවිච්චි කළ යුතුව ඇති බවත් අධිකරණය සදහන් කළේය.

මේ අතර සමගි ජනබලවේගය පක්ෂය විසින් ‘ජන බල වේගය කොළඹට’ යන මැයෙන් හෙට (16) දිනයේ පැවැත්වීමට නියමිත උද්ඝෝණයට සමගාමීව කඩුවෙල, නවගමුව, මාළඹේ, සහ අතුරුගිරිය යන පොලිස් බල ප්‍රදේශයන්හී උද්ඝෝෂණ නොපවත්වන ලෙසට නියෝග කරමින් කඩුවෙල මහේස්ත්‍රාත් මංජුල රත්නායක මහතා අද (15) ආඥාවක් නිකුත් කළේය.

ඒ කඩුවෙල මහෙස්ත්‍රාත් අධිකරණය මෙම නියෝගය නිකුත් කර ඇත්තේ කඩුවෙල, නවගමුව, තලංගම, මාළඹේ සහ අතුරුගිරිය යන පොලිස් ස්ථාන කළ ඉල්ලීමකට අනුවය.

1979 අංක 15 දරන අපරාධ නඩු විධාන සංග්‍රහ පනතේ 106 (1) (3) (5) වගන්ති ප්‍රකාරව මෙලෙස ආඥාවක් නිකුත් කර ඇත්තේ, විපක්ෂ නායක සජිත් ප්‍රේමදාස, පාර්ලිමේන්තු මන්ත්‍රි මුජුබර් රහුමාන්, සමගි ජනබලවේගය පක්ෂයේ ලේකම් රංජිත් මද්දුමබණ්ඩාර ඇතුළු පිරිසකටය.

කොවිඩ් මේ මොහොතේ පාලනය වෙලා තියෙනවද කියන එකටත් වඩා කොහොමද මේ තතත්ත්වය ඇති වුනේ කියන එක තමයි අපිට වැදගත් වන්නේ. ඒකට හේතු කිහිපයක් බලපාන්න පුළුවන් වාර්තා වෙන දත්ත අනූව ජනගහනය අධික ප්‍රධාන දිස්ත්‍රික්ක වල පමණක් මෑත කාලයේ දැනුවත්ව හෝ නොදැනුවත්ව කොවිඩ් ආසාදනය වෙලා වගේ පේන නිසා කොවිඩ් පැතිරීම විශාල වශයෙන් පාලනය වෙලා කියන එක තමයි අපිට පේන්න තියෙන්නේ.

මේක තාවකාලික තත්ත්වයක්. හැදිච්ච අයට ආපහු කොවිඩ් හැදෙන්නේ නෑ කියලා තහවුරු වෙලා නෑ. එන්නත් ගහපු අයට කොවිඩ් හැදෙන්නේ නෑ කියල තහවුරු වෙලත් නෑ. ඒ වගේම A-30, Delta+ වගේ එන්නත් ප්‍රතිරෝධි කොවිඩ් රැලි දැනටමත් ලොව පුරා පැතිරෙමින් තියෙනවා. හොයා ගත්ත සහ ඉදිරියේදී සොයා ගන්න අළුත් ප්‍රභේද ඇති වෙන එක කෝවිඩ් වල සාමාන්‍ය තත්ත්වයක් කියලා අපි දැනටමත් දන්නවා. ඒනිසා මේ තාවකාලික කොවිඩ් විරාමය ඇතුලේ අපි සියල්ල අතෑරලා වැඩ කරන එක හරියට වතුර රත්වෙන තුරු කකුළුවා දිය හැලියේ නටමින් ඉන්නවා වගේ එකක්.

කවුද මේවට වගකියන්න ඕන කවුද මේවයින් බැට කන්නේ?

බැලූ බැල්මට කොවිඩ් පාලනය වෙලා කියලා හිතුවට ඒක රටේ සාමාන්‍ය පුරවැසියෙකුගේ කියවීමක් හා සමානයි. නමුත් අපි සෞඛ්‍ය වෘත්තිකයෝ විදියට කල්පනා කරනවා නම්, සෞඛ්‍ය අමාත්‍යාංශය, ජනාධිපතිවරයා, රජය කොවිඩ් පාලනය වෙලාද කියල බලද්දි ඒ වගේ සරල උත්තරයකින් සෑහීමකට පත්වෙන්න බෑ. එහෙම සරල උත්තරයක් ඔලුවෙ තියාගෙන රටේ ප්‍රතිපත්තිමය තීරණ ගන්න එකෙන් රටම අමාරුවේ වැටෙනවා. මතක තියාගන්න ඕන කාරණය තමයි අවසානයේදී දුක් විඳින්නේ ඔය වැරදි තීරණ ගන්න අය හෝ මහජන මුදලින් නඩත්තු වෙන ගමන් තීරණ නොගෙන තමන්ගෙ වැඩක් බලාගෙන ඉන්න අය නොවේ කියන එක

කොවිඩ් කියන්නේ ලංකාවේ සමාජගත වෙච්ච වසංගතයක් ඒක විද්‍යාත්මකව කියව ගන්න ඕන. හැබැයි ඒක විද්‍යාත්මකව කියව ගන්න ඕන දත්ත සහ තොරතුරු නිර්මාණය කිරීමේ සම්පූර්ණ වගකීම තියෙන්නේ සෞඛ්‍ය අමාත්‍යාංශයට ඒක ස්වේච්ඡා සේවාවක් නෙමේ. ඒ වෙනුවෙන් මහජන මුදලින් පඩි නඩි වරප්‍රසාද දීලා විශාල නිළධාරීන් සහ වෘත්තිකයන් පිරිසක් නඩත්තු කරනවා. සෞඛ්‍ය ලේකම්වරයා ඇතුළු ඒ අය ගන්න ඕන තීරණය නොගන්නව නං හෝ ප්‍රමාද වෙලා ගැනීම නිසා රටේ වසංගතය යලි යලි හිස ඔසවනව නං බේරගන්න පුළුවන් එක ජීවිතයක් හරි අහිමි වෙනවනං ඒක සාපරාධී ක්‍රියාවක්. එලෙස පරිපාලකයන් වැඩ නොකර සිටීමෙන් සිදුවන හානිය මනින්න අවාසනාවකට අපේ රටේ ක්‍රමවේදයක් නැති වුනත්, දියුණු රට වල මේවා දඩුවම් ලැබිය යුතු වැරදි.

කෝවිඩ් පාලනය කරන්න මිනිස්සුන්ට වගකීමක් නැද්ද?

සෞඛ්‍ය අමාත්‍යාංශයේ වගකිවයුතු ගොඩාක් අය අපි දකිනවා උදේ හවා පොඩි එහා මෙහාවක් ගිය ගමන් ජනතාවට බැනලා ජනතාවගේ පිට වරද පටවලා අත පිහිදා ගන්න තත්ත්වයක්. හැබැයි මිනිස්සුන්ට කොවිඩ් විද්‍යාත්මකව කියව ගන්න අවශ්‍ය තොරතුරු ටික දෙන්නේ නැතිව රසායනාගාර වල පරීක්ෂණ ටික වත් කරන්නේ නැතිව රෝගය පුරෝකථනය කරල ඇත්ත අදහසක් රට තුල නිර්මාණය කරන්නේ නැතිව ජනතාවට එහෙම නිකම්ම බනින එකේ තේරුමක් නෑ. රටේ හැම පුරවැසියෙකුටම ලෙඩ රෝග ගැන විද්‍යාත්මකව කියව ගන්න හැකියාවක් නැහැ. ඒක කරන්න ඕන සෞඛ්‍ය අමාත්‍යාංශය. මේ මොහොතේ ඒක කරන්නේ නැතිව මහජනතාවට බැන බැන ඉන්න එක එක්තරා විදියක ඛේදවාචකයක්. අපි කියන්නේ මේ අඩු පාඩුව නිසාම කෝවිඩ් යලි හිස ඔසවන එක වලක්වන්න බෑ. හැදිච්ච අයට ආයේ කොවිඩ් හැදෙන දවස වෙනකොට එන්නතේ බලය නැති වෙන කාලය වෙන කොට අළුත් ප්‍රභේද එන කොට නැවත කෝවිඩ් පැතිරෙරෙනවා. හැබැයි සැලසුම් සහගතව වැඩ කරොත් ඒක රැල්ලක් විදිහට විශාල ව්‍යසනයක් දක්වා වර්ධනය වෙන එක නවත්තන්න සෞඛ්‍ය අමාත්‍යාංශයට පුළුවන්.

අපි මෙහෙම කියන්නේ අපේ රටේ සෞඛ්‍ය අමාත්‍යාංශය කොවිඩ් විද්‍යාත්මකව කියවගන්න තියෙන තැන් වුවමනාවෙන්ම වලක්වපු තැන් ඉතා පැහැදිලිව පෙනෙන්න තියෙන නිසා. කොවිඩ් පාලනය වෙලාද කියන ප්‍රශ්නයට දෙන්න තියෙන හරිම උත්තරය නම් අපි තවම ඒක විද්‍යාත්මකව කියවල නෑ කියන එක තමයි. අපි එහෙම කියවන්න උත්සහ කරලත් නෑ, එහෙම කරන පාටක් පේනනත් නෑ.

එතකොට සෞඛ්‍ය අමාත්‍යාංශය සැලසුම් සහගතව වැඩකරන්නේ නැද්ද?

සෞඛ්‍ය අමාත්‍යාංශය එහෙම සැළසුම් සහගතව වැඩකරන්නේ නැහැ කියන්න හේතු ගණනාවක් පෙන්නල දෙන්න පුළුවන්. එකක් අහඹු පරීක්ෂණ සහ නියැදි පරීක්ෂණ වුවමනාවෙන්ම සිදු නොකරන එක. මේක සමාජගත වෙච්ච වසංගතයක් නිසා ලෙඩේ තියෙනව කියල තමටන්ම දැනිල හෝ සැක හිතිල රෝහලට එන කිහිප දෙනෙකුගේ පරීක්ෂණ කරල ලැබෙන දත්ත වලින් මේ වසංගතය කොහොමටවත්ව විද්‍යාත්මකව කියව ගන්න බෑ. ඒ ක්‍රමයට අනූව අපි 80% – 90% ආසාදිතයෝ මඟහැරලා තමයි වසංගතය කියවා ගන්නේ. එහෙම ගන්න තීරණ කිසිසේත්ම නිවැරදි තීරණ වෙන්නේ නෑ. හැබැයි සෞඛ්‍ය අමාත්‍යාංශය එහෙම කරන්නේ අහඹු පරීක්ෂණ හෝ නියැදි පරීක්ෂණ කරන්න පහසුකම් හෝ මුදල් නැති නිසා නෙමේ. පැහැදිලිවම කිව්වොත් වුවමනාව නැති නිසා සහ හැමෝගෙම අදහස් සළකා බලල හරි දේ හරි වෙලාවට කරන්න හිත හදා ගන්න බැරි උද්දච්ච පාලනයක් සෞඛ්‍ය අමාත්‍යාංශය වෙලා ගෙන තියෙන නිසා.

රසායනාගාර විද්‍යාඥ වෘත්තිකයෝ විදිහට ඔයාලටත් බැරිද මීට වඩා දෙයක් කරන්න.

අපි, වෛද්‍ය රසායනාගාර විද්‍යාඥ වෘත්තිකයෝ විදිහට අහඹු පරීක්ෂණ හෝ නියැදි පරීක්ෂණ රට පුරා කරල දීමේ වගකීම කරට අරගෙන ඒකට අවශ්‍ය ජංගම රසායනාගාර කිහිපයක් ඉල්ලන්නේ කාලාන්තරයක ඉඳලා. හැබැයි ඒඅවශ්‍යතාවය සම්පූර්ණ කරන්න කිසිවෙක් මැදිහත්වුනේ නෑ. මේ ගැන අපි ආයතන ගණනාවකට ලිව්වාම සමහර සමාගම් එකඟවෙලා තියෙනවා මිලියන 80ක් විතර වටින ජංගම රසායනාගාර කිහිපයක් නොමිලේ දෙන්න. ඒක කොහොමත් කරන්න දෙන්නේ නෑ කියන සෞඛ්‍ය අමාත්‍යාංශයේ උද්දච්ච සිතුවිල්ල කෝවිඩ් වසංගතයටත් වඩා කොච්චර බරපතලද කියනව නං. නොමිලේ දෙන බස්රථ ටිකවත් මේ වැඩේට යොදව ගන්න සෞඛ්‍ය ලේකම්වරයාගෙන් අවසරයක් නැහැ. කැබිනට් ඇමතිවරයා ඒකට අමාත්‍ය මණ්ඩල පත්‍රිකාවක් දාන්න නියෝග කරලත් තවම ඒ වැඩේ වෙලා නැහැ. සමහර වෙලාවට ඔහු ජනාධිපතිතුමාට කියනව ඇති සල්ලි ඉතුරු කරන්න තමයි මම එහෙම කරන්නේ කියලා. හැබැයි අපි ජනාධිපතිතුමාගෙන් ඉල්ලනවා මේ වැරදි තීරණ නිසා රටට, ආර්ථිකයට, ජන ජීවිතවලට වෙන හානිය රුපියල් වලින් ගණන් හදල මේ නිළධාරීන්ට පෙන්නල දෙන්න කියලා. ඒ උදාහරණයම ඇති වසංගතය විද්‍යාත්මකව තේරුං ගන්න අපේ රටට බැරිවෙලා තියෙන්නේ ඇයි කියන එක තේරුම් ගැනීම සඳහා

මොකද්ද මේ ගුවන් මගීන්ගේ “On arrival” පීසීආර් කරන්නේ නෑ කියන කතාව

නැවත කෝවිඩ් රැල්ලක් ඇති වෙන්න අදාල වෙන තවත් එක් ප්‍රධාන හේතුවක් තමයි නව ප්‍රභේද සහ අළුත් ආසාධිතයන් ගුවන් තොටුපල පරිශ්‍රයෙන් රටට ඇතුළුවීම. වර්ධනය වෙමින් පවතින කොවිඩ් රැල්ලට ඒක මූලිකම හේතුවක් උනා වෙන්නත් පුළුවන්. ඉදිරියේදී මේක තවත් භයානක තත්ත්වයකට පරිවර්තනය වෙන්නත් පුළුවන්. මේ වන විට සෞඛ්‍ය අමාත්‍යාංශයේ අළුත්ම රෙගුලාසි නිසා රටට ඇතුළු වෙන බහුතරයක් පරීක්ෂාවට ලක් කෙරෙන්නේ නෑ. එන්නත්කරණය මඟින් රෝගය වැළඳීම පාලනය කල නොහැකිය කියන එක පැහැදිලිව සනාථ වෙලා තියෙද්දී විදේශයක සිය පැමිණෙන එන්නත් ගහපු අයට පරීක්ෂණ සිදු කිරීම අත්හිටෙව්වා. ඔවුන් හරහා A-30 එන්නත් පුළුවන් Delta+ එන්නත් පුළුවන්, අපි දන්නේම නැති එකක් එන්නත් පුළුවන්.

හැබැයි අවසනාව කියන්නේ ඒ අය පරීක්ෂාකරන එක නැවතිලා තියෙන්නේ ඒ සඳහා උපරිම පහසුකම් ගුවන් තොටුපල පරිශ්‍රයේ උපරිමයෙන් තිබියදී සෞඛ්‍ය අමාත්‍යාංශය නීති මඟින් එහෙම කරන එක වැලැක්වුයේ මෙම රසායනාගර පහසුකම් පිළිබඳ මනා දැනුමක් ඇතිව. මේ තීරණය විතරක් සලකල බැළුවත් ඇයි එහෙම කරන්නේ, මොකද්ද ඒකෙන් ඇති වාසිය කියන එක පිළිබඳව අඩුම තරමේ ජනාධිපතිවරයාවත් සළකා බලන්නේ නැති එක ගැන අපිට හරි පුදුමයි. සමහරු පෙන්නන්න හදනවා පීසීආර් පරීක්ෂණ කරන එක සංචාරක ව්‍යාපාරයට බාධාවක් කියලා, හැබැයි සංචාරකයෝ විතරක් නෙමෙයි අපේ රටේ විදේශ ශ්‍රමිකයෝ පවා ගෙනල්ලා පීසීආර් පරික්ෂණය දඩමීමා කරගෙන දින සති ගණන් හෝටල් වල බලෙන් රඳවාගෙන ගසාකමින් සිටින කාලයේ සෞඛ්‍ය අමාත්‍යාංශය මේ තීරණය ගත්තේ නෑ. දැං අපිට පීසීආර් පරීක්ෂණය පැය 2ක් 3ක් ඇතුලත දෙන්න පුළුවන් රසායනාගාර දෙකක් ගුවන් තොටුපල පරිශ්‍රයේ තිබියදී මේ විදියට කිසිඳු පරීක්ෂාවකින් තොරව කොවිඩ් ආසාදිතයන් රටට ඇතුළු කර ගැනීමෙන් සෞඛ්‍ය අමාත්‍යාංශය බලාපොරෝතු වෙන්නේ මොන වගේ කෝවිඩ් පාලනයක්ද කියන එක පැහැදිලි වෙනවා. ඒක නිසා තමයි අපි කියන්නේ වැරදි තීන්දු සහ ගතයුතු තීන්දු නොගෙන සිටීම නිසා මේ කෝඩිඩ් වසංගතය අනවශ්‍ය ලෙස යලි යලිත් හිස ඔසවනවා කියලා

මොනවද ඔයාලගේ යෝජනා?

අපි මේ වෙලාවේ ජනාධිපතිවරයාගෙන්, රජයෙන් සහ කොව්ඩ් පාලනය සඳහා සූදානම් හැමෝගෙන්ම ඉල්ලන්නේ නැවත රට වසා තැබීමකට මෙහායින් මේ මතුවෙමින් තිබෙන වසංගතයේ ප්‍රවණතාවය වලක්වා ගැනීම සඳහා සංවේදී වෙන්න කියලයි. මේ සඳහා අඩුම තරමින් රට පුරා අහඹු සහ නියැදි පරීක්ෂණ වහාම ආරම්භ කරන්න, රටට ඇතුළු වන සියළු පුද්ගලයන් පරීක්ෂා කිරීමට නොහැකි වන අයුරින් දාල තියෙන රෙගුලාසි කඩිනමින් ඉවත් කරන්න, ජනාධිපතිවරයාට, ආණ්ඩුවට හෝ තීරණ ගන්න ප්‍රධාන බලධාරීන්ට අවම තරමින් මාසයකට සැරයක් විද්‍යාත්මකව එකතු කරගත්ත දත්ත මත පදනම් වුනු වසංගත විශ්ලේෂණයක් සහ පුරෝකථනයක් අඛණ්ඩව ලබා දෙන්න, ඒකට අවශ්‍ය පරීක්ෂණ ක්‍රියාවලියකට බාධා කරන්නේ නැතිව ධනාත්මකව එක කරන්න පුළුවන් නිළධාරියෙකු යටතට මේ යාන්ත්‍රණය පවරන්න. එහෙම කලොත් අඩුම තරමින් වසංගතය පැතිරෙන එක වලක්වන්න බැරි වුනත් අළුත් රැල්ලක් ඇති වෙන ස්ථානය කල්තියා හඳුනා ගැනීමෙන් අවම තරමින් රටම ලොක් ඩවුන් කිරීම වෙනුවට නගරයක්, ප්‍රදේශයක් හෝ ආයතනයක් ලෝක් ඩවුන් කරල විශාල රැලි ඇති වෙන එක වලක්වා ගන්න අපිට අනිවාර්යයෙන්ම පුළුවන් වේවි. එහෙම නැති වුනොත් දෙසැම්බරය වන විට බලෙන්ම තව රැල්ලක් හදා ගෙන ආපහු රටම ලොක් ඩවුන් කරල මිනිස්සුන්ගේ සහ රටේ ආර්ථිකය විනාශ කරල ජීවිත ගණනාවක් බිලි දීල. ඒ මිනිස්සුන්ටම බැන බැනා ඉන්නවා හැර වෙනත් විකල්පයක් අපට ඉතිරි වන්නේ නැත.

රවී කුමුදේශ් – සභාපති – වෛද්‍ය රසායනාගාර විද්‍යාඥ වෘත්තීයවේදී විද්වත් ආයතනය

2022 අය වැය – පය බරවායට පිටිකර බෙහෙත් බැඳීම

ඉබ්බාට පියාසර කිරීමත්  රාජපක්ෂලාට රාජ්‍ය පාලනයත් කළ නොහැක

ශ්‍රී ලංකාව පෙර නොවූ විරූ අර්බුද ගණනාවක හිණිපත්තේ සිටිනා බව නොරහසකි. ඉතිහාසයේ පළමු වරට ශ්‍රී ලංකාව ගත් ණය ඇයට ගෙවිය නොහැකි වනු ඇතැයි වැදගත් ජාත්‍යන්තර ආයතන කිහිපයක් දැනටමත් පුරෝකථනය කර ඇත. රටේ ශුද්ධ විදේශ වත්කම් ඩොලර් බිලියන සෘණ 3.6 කි. ආර්ථික කළමණාකරණයේ මර්මස්ථානයක් වන මහ බැංකුව ඇතුළුව සමස්ථ බැංකු පද්ධතියේ ස්ථාවරත්වය අවිනිශ්චිතය. ඉහළ යන ජීවන වියදම හා කිරිපිටි, සීනි, ගෑස් හා අත්‍යාවශ්‍ය ආහාර ද්‍රව්‍ය හිඟය ජනතාවට විශාල පීඩනයක් එල්ල කර ඇත. ගොවිබිම්, පොහොර හා රසායනික, බීජ නොමැතිව අරගල බිම් බවට පත්වෙමින් පවතී. සිමෙන්ති හා යකඩ හිඟය විසින් ඉදිකිරීම ක්ෂේත්‍රය අර්බුදයට යවා ඇත. තෙල් හිඟයක් හා විදුලි කප්පාදුවක් අත ළඟය.

මෙවැනි අර්බුද රැසක් හමුවේ ඉදිරිපත් කරන ලද මෙම අයවැය (2022) මෙම ප්‍රශ්න කිසිවක් හඳුනාගත් බවක් නොපෙනේ. එසේ නැතහොත් වෙනත් ග්‍රහලෝකයක සිට වෙනත් රටක් සඳහා පිළියෙළ කළ බව පෙනී යයි. ජීවන බරෙන් පෙළන ජනතාවට හෝ ණය බරෙන් පෙළෙන රටට කිසිඳු මඟපෙන්වීමක් අය වැයෙන් ලැබී නොමැත. පවතින රාජ්‍ය මූල්‍ය අර්බුදය හා ණය අර්බුදය විසඳීමට විධිමත් යෝජනාවක් ඉදිරිපත් කර නොමැත. රටේ මූල්‍ය පද්ධතිය පිළිබඳව ඇති අවිනිශ්චිතභාවය කිසිම ආකාරයකින් සැලකිල්ලට ගෙන නැත.

අය වැයේ ප්‍රධානම වියදම් කේන්ද්‍රය වී ඇත්තේ ශ්‍රී ලංකා පොදුජන පෙරමුණේ ප්‍රාදේශීය දේශපාලන ජාවාරම්කරුවන් අතට මුදල් ලබාදී ඊළඟ මැතිවරණයට ඔවුන් සූදානම් කිරීමේ වෑයමයි. රජයේ නව වියදම් යෝජනාවල අදාල ප්‍රතිපාදන වලින් තුනෙන් එකක් වෙන්කර ඇත්තේ මේ වැඩපිළිවෙළ වෙනුවෙනි.

ආර්ථිකය කළමනාකරණය කරගත නොහැක්කේ රජයේ සේවකයන් නිසාද?

එමෙන්ම ආණ්ඩුව තමන්ගේ වරද වසා ගැනීමට රාජ්‍ය සේවකයින්ට අපහාස කරමින් ඇත. මුදල් ඇමතිවරයා රාජ්‍ය වියදම පිළිබඳ සාකච්ඡා කිරීමේදී රජයේ සේවකයින් රජයට දරාගත නොහැකි බරක් බවත්, තව වසරක් පමණ යනතෙක් රාජ්‍ය සේවකයන් වෙනුවෙන් රජයේ මුදල් සෘජුව වෙන්කළ නොහැකි බවටත් ප්‍රකාශ කර ඇත. රාජ්‍ය සේවයේ නියුතු සියළු දෙනාම කාර්යක්ෂම නොවන, ජනතා මුදල් කාබාසිනියා කරන පිරිසක් බවට චෝදනාවක්ද එල්ල වී ඇත.

2006 හා 2020 කාලසීමාව තුළ සංඛ්‍යා ලේඛන බැලූ විට රාජ්‍ය සේවකයින් සංඛ්‍යාව 59% කින් වැඩි වී ඇත. එනම් 750,284 සිට 1,195,863 ක් දක්වා වැඩිවී ඇත. මෙම වැඩි වී ඇති සේවක සංඛ්‍යාවෙන් 86% ක් වැඩි වී ඇත්තේ මුදල් ඇමතිවරයා විවිධ තනතුරු දැරූ රාජපක්ෂ ආණ්ඩු සමයේය. 2020 වසරේ පමණක් නව ආණ්ඩුව 55,000 කින් රාජ්‍ය සේවය ප්‍රසාරණය වී ඇත. රාජ්‍ය සේවය භාණ්ඩාගාරයට බරක් නම්, එයට මුදල් ඇමතිවරයාද සෘජුව වගකිව යුතු බව පැහැදිළිය.

බැංකු පද්ධතිය විනාශ කිරීම

රටේ බැංකු පද්ධතිය අධි අවධානම් තත්ත්වයක පවතී. රජය දේශීය ණය හා විදේශ විනිමය වශයෙන් ගත් ණය නිසා බැංකු පද්ධතිය ණය බරෙන් පිරී ඇත. රජයේ විදේශ ණය වලින් සැලකිය යුතු ප්‍රමාණයක් (ශ්‍රී ලංකා සංවර්ධන බැඳුම්කරවලින් ඇමෙරිකා එක්සත් ජනපද ඩොලර් බිලියන 02 ක්, ස්වෛරී බැඳුම්කර වලින් ඩොලර් බිලියන 02 ක්, අක්වෙරළ බැඳුම්කර වලින් ඩොලර් බිලියන 1.3 ක් ලෙස) බැංකු පද්ධතිය ඩොලර් ණයබරක හිර කර ඇත. එමෙන්ම භාණ්ඩාගාර සුරැකුම්වලින් සැලකිය යුතු ප්‍රමාණයක් බැංකු පද්ධතියේ ද්‍රවශීල වත්කම් ලෙස අන්තර්ගතවී ඇත. තවද, රාජ්‍ය ව්‍යවසායන්ට බැංකු පද්ධතිය හරහා ඩොලර් බිලියන 04 ක පමණ විදේශ විනිමය ලබාදී ඇත. මින් ප්‍රධාන වන්නේ ඛනිජ තෙල් නීතිගත සංස්ථාවයි. බැංකු පද්ධතියේ ශුද්ධ විදේශ වත්කම් ප්‍රමාණය ඩොලර් බිලියන  සෘණ 03 ඉක්මවා ගොස් ඇත. රජයේ ආදායම් වැඩිකර ගැනීමට තවත් බැංකුවලින් බදු අයකර ගැනීමට ගෙන ඇති ක්‍රියාමාර්ගය බැංකු පද්ධතිය අස්ථාවරත්වයට හේතුවන මරු පහරක් වනු ඇත. යෝජිත අධිභාර බද්ධ (Surcharge Tax), සමාජ සංරක්ෂණ දායක මුදල් හා එකතුකළ අගය මත බදු යන බදු තුනම සියළු ප්‍රධාන බැංකු වලට බරක් වනු ඇත. මෙයට අමතරව මහ බැංකුව විසින් බැංකුවල සංචිත වලින් 2% ක් තමන් සතු කරගැනීම නිසාද අයවැයට පෙරම බැකු පද්ධතියට අතිරේක බරක් එක් විය.

2019 ජනාධිපතිවරණයෙන්පසු ලබාදුන් බදු සහන පැකේජය අත්වැරැද්දක් බව පිළිගෙන එය නිවැරදිකිරීමට කටයුතු කරනවා වෙනුවට තවදුරටත් මේ රටේ බැංකු පද්ධතිය විනාශ කිරීමට දරන තැත රාජ්‍ය මූල්‍ය අස්ථායීකරණය වේගවත් කරනු ඇත.

එමෙන්ම, 2022 වර්ෂයේ විදේශ ණය පියවීමට ඩොලර් මිලියන 750 ක් (අය වැයට අනුව) විදේශ වෙළෙඳපොළෙන් ලබාගැනීම පිළිබඳව ඇති බලාපොරොත්තුවද හීනයකි. අන්තර්ජාතික ණය ශ්‍රේණිගතකිරීම් වලින් පහළට වැටී ඇති බුන්බත්වීමට ආසන්නයෙන් සිටින රටකට ණය ලබාදීමට ඉදිරිපත්වන ආයෝජකයන් වෙනත් ග්‍රහලෝකයකින් සොයාගත යුතුව ඇත. ලංකාවේ එතෙර බැඳුම්කරවල ද්විතීයක වෙළෙඳපොළේ ඵලදායී අනුපාතය / පොලී අනුපාතය 40% ඉක්මවා ඇත. මෙවැනි තත්ත්වයකට පාර කැපුවේ රජයේ අදූරදර්ශී ක්‍රියාප්‍රතිපත්තිය නිසා බව පැහැදිළිය. ඒ නිසාම ශ්‍රී ලංකාව අද ණය ආපසු ගෙවීමේ අධිඅවධානම් තත්ත්වයට ගොදුරු වී තිබේ.

 

VAT වෙනුවට පිරිවැටුම් බදු

සමාජ සංරක්ෂණ දායක මුදල් නමින්  පනවා ඇති බද්ද ආර්ථිකයේ දිගු කාලීන අහිතකර බලපෑම් ඇති කරනු ඇත. පිරිවැටුම් බද්දක් ලෙස පනවා ඇති මෙම බද්ද ඕනෑම කර්මාන්තයක සෑම මට්ටමකදීම වර්ෂයට මිලියන 120ට වඩා පිරිවැටුම ඇති ව්‍යාපාර වලින්  ‘පිරිවැටුම’ මත අය කරන නිසා භාණ්ඩ වල මිල VAT බද්දට වඩා ඉහළ දමනු ඇත. පිරිවැටුම් බද්දට සාපේක්ෂව VAT බද්දේ ඇති සාධනීය ගුණාංගයක් වන්නේ සෑම මට්ටමකදීම ‘එකතු කළ අගය’ මත පමණක් බදු අය කර ගැනීමයි. මෙම වාසිය නිසා අප්‍රිකානු රටවල් පවා VAT බදු ක්‍රමයට මාරු වී සෑහෙන කාලයකි. පිරිවැටුම් බදු පනවා අපි නැවත දශක දෙකක් බදු ක්‍රමයේ පසු පසට තල්ලු වෙමින් පවතී. එකක් කඩතොළු වසා ගන්නට ගොස් දෙකක් කඩතොළු ඇති කරගත් ඉඳුරුවේ ආචාරියා සේ VAT මහා ඝෝෂාවක් පවත්වා අඩු කොට නැවත පැනවීමට ඇති ලැජ්ජාව නිසා රජය පිරිවැටුම් බද්දක් අයකොට ජනතාව තවත් අමාරු වේ දමා ඇත. මෙවැනි අමන රාජ්‍ය මුල්‍ය තීරණ වලට උපදෙස් දෙන නිලධාරීන්ද ජනතා අධිකරණයකට පමුණුවා දඬුවම් දිය යුතුව ඇත.

මීට අමතරව, රජයේ ප්‍රධානම බදු උපයා ගැනීමට අදාළ යෝජනාව වන මෙම පිරිවැටුම් බද්දට අදාළ බදු ප්‍රතිශතය වත් නිවැරදිව අය වැයට ඇතුළු කර ගැනීමට හැකි වී නැත. අය වැය කතාවේ 2.5% ලෙසත් ඇමුණුමෙහි 3% ලෙසත් මෙම බදු ප්‍රතිශතය දක්වා ඇත.  රජයේ සහ මුදල් අමාත්‍යoශයේ නොහැකියාවට මීට වඩා සාක්ෂි අවශ්‍ය නොවේ.

අය වැය යනු ඉලක්කම් විජ්ජාවකි.

මීට පෙර අප කීපවරක් පෙන්වාදී ඇති ආකාරයට මෙවර අය වැය ද ඉලක්කම් විජ්ජාවකි. මුදල් ඇමතිවරයාට අනුව 2021 ට සාපේක්ෂව රජයේ මුළු ආදායම 46% කින් පමණ, එනම්රුපියල් බිලියන 723 කින් 2022 වර්ෂයේදී වැඩිවීමට නියමිතය. එය ඉතිහාසයේ නොවූ විරූ ආදායම් වර්ධනයක් වන අතර කිසිසේත් ළඟකරගතහැකි ඉලක්කයක් නොවේ. යෝජිත ආදායම් යෝජනා වලින් සිදුවන්නේ රුපියල් බිලියන 333 ක් වැඩිවීම පමණි. එනිසා සියළුම යථාර්ථවාදී ගණන් කිරීම්වලට අනුව රජයේ ආදායම රුපියල් ට්‍රිලියන 2 ඉක්මවීම සිදුනොවිය හැක්කකි. මීට අමතරව රුපියල් ට්‍රිලියනයකට ආසන්න යෝජිත රජයේ මුළු ප්‍රාග්ධන වියදමෙන් බිලියන 600 කට වඩා ආයෝජනය කිරීම රජයට කළ නොහැක.

මේ අනුව ඉලක්කම් විජ්ජා පෙන්වා රට රැවටීමකට ලක්කරන උත්සාහය මුදල් අමාත්‍යාංශය වහා නැවැත්විය යුතුය. රටට අවශ්‍යව ඇත්තේ රටේ දැවෙන ප්‍රශ්නවලට සංවේදී නොවන විසඳුම් නොවේ. එමෙන්ම ඉලක්කම් විජ්ජාවලින් සුරංගනා කතා මවන ලෝකයක් ද නොවේ.

අපට අවශ්‍ය වන්නේ මහපොළොවේ ක්‍රියාත්මක කළ හැකි දිඟුකාලීන ප්‍රමුඛතා හඳුනාගත්, ඒ සඳහා කෙටිකාලීන හා මධ්‍යකාලීන විසඳුම් ලබාදෙන, රටේ දැවෙන ප්‍රශ්නවලට සංවේදී, යථාර්ථවාදී අයවැයකි. රටේ නැතිවී ගොස් ඇති ආයෝජන විශ්වාසය දේශීය හා විදේශීය වශයෙන් ගොඩනැංවීමට හැකි වනුයේ එවැනි අයවැයකිනි. රාජපක්ෂවරුන්ට රට ගොඩනැංවීමට දර්ශනයක් හෝ ප්‍රතිපත්තියක් හෝ දැනුමක් නොමැති බවට නැවත නැවතත් තහවුරුකොට අවසන්ය. දැන් අවශ්‍ය වනුයේ, දැනුම, බුද්ධිය සහ ජන දුක ගැන සහකම්පනය පෙරටුකරගත් කුසලතාවාදී පරපුරකට රට භාරදී එය නැවත ගොඩනැගීම පමණි.

 

එන්නත් ලබාදුන්නත් දිනෙන් දින ඉහළ යන කොවිඩ් රෝගීන් සහ මරණ සංඛ්‍යාව කඩිනමින් පාලනය නොකළ හොත් ඉදිරියේදී රට නැවත බරපතළ අර්බුදයක් කරා ගමන් කරනු ඇති බවට සෞඛ්‍ය බලධාරීන් අනතුරු අඟවති.

මේ අතර සෞඛ්‍ය අමාත්‍යාංශයේ තාක්ෂණික සේවා අධ්‍යක්ෂ, වෛද්‍ය අන්වර් හම්දානි පැවසුවේ COVID රෝගීන් රෝහල් ගත කිරීමේ සුළු වැඩිවීමක් පවතින බවයි.

“මෙය ඇත්ත වශයෙන්ම අනතුරු ඇඟවීමේ සංඥාවක්. තත්වය නරක අතට හැරීමට පෙර අපි එය පාලනය කිරීම අත්‍යවශ්‍යයි. එසේ නොවුවහොත්, මාස කිහිපයකට පෙර අප සිටි අඳුරු යුගයට රට අනිවාර්යයෙන්ම ඇදගෙන යා හැකියි, ”වෛද්‍ය හම්දානි අවධාරණය කළේය.

එබැවින් රට පාලනය කරන තත්ත්වයකට පැමිණීමට නම් සෞඛ්‍ය මාර්ගෝපදේශ සහ භාවිතයන් දැඩි ලෙස පිළිපදින ලෙස ඔහු ජනතාවගෙන් ඉල්ලා සිටියේය.

වාහන ආනයනයට තව මාස හයක් හතක් යනතුරු අවසර නොලැබෙන බව මුදල් අමාත්‍යාංශයේ ලේකම් එස්. ආර්. ආටිගල මහතා පැවැසීය. මොටර් රථ ආනයනය කිරීම සදහා මොහොතේදී ප්‍රමුඛත්වය දැක්විය යුතු යැයි තමා නොසිතන බවද ආටිගල මහතා සඳහන් කළේ‍ය.

බොරතෙල් නොමැති වීම නිසා සපුගස්කන්ද තෙල් පිරිපහදුව අද (15) සිට තාවකාලිකව වසා දැමීමට තීරණය කර ඇති බව ඛනිජ තෙල් පොදු සේවක සංගමයේ සභාපති අශෝක රන්වල මහතා පැවසීය.

බොරතෙල් නොමැති වීම නිසා සපුගස්කන්ද තෙල් පිරිපහදුව වසා දමන පළමු අවස්ථාව මෙය බව ද ඔහු සදහන් කළේය.

බොතෙල් රැගත් නැවක් ලබන දෙසැම්බර් මස තුන්වැනි සතියේ පැමිණීමට නියමිතව බව ද රන්වල මහතා පැවසීය. දෙසැම්බර් මස ළගා වන බොරතෙල් නැවෙන් ලැබෙන බොරතෙල් මෙට්‍රික් ටොක් 90000 දින 15 කට පමණක් ප්‍රමාණවත් බවත් නැවත ජනවාරි මස මැද බොරතෙල් ලැබීමට නියමිත බවත් ඔහු වැඩි දුරටත් පැවසුවේය.

2022 වසරට නියමිය අයවැය ලේඛනය අද (11) මුදල් අමාත්‍ය බැසිල් රාජපක්ෂ මහතා විසින් පාර්ලිමේන්තුවට ඉදිරිපත් කළේය. අයවැය ලේඛනය ඉදිරිපත් කරමින් මුදල් අමාත්‍යවරයා පැවසුවේ මහ ජනතාවට බරක් නොවී මහජන බදු මුදල් අය කිරීමට රජය කටයුතු කර ඇති බවයි.

මේ අතර රටේ ණය හඳුනාගත් නොහැකි ආකාරයට ගණනය කළ නොහැකි ආකාරයට වර්ධනය වී තිබෙන බවට ද මුදල් අමාත්‍ය පැවසීය. “සංචාරක කර්මාන්තයෙන් ලැබෙන මුදල් ගලා ආවේ නෑ. සෘජු විදේශ ආයෝජන ප්‍රමාණවත් තරම් ලැබුණේ නෑ. විදේශ විනිමය ලැබීම් සීමා වුණා. අප රටේ ණය හඳුනාගත් නොහැකි ආකාරයට ගණනය කළ නොහැකි ආකාර්යට වර්ධනය වෙලා තිබෙනවා. මුළු ආදායමට සමාන ලෙස ණය වී තිබෙනවා. මහින්ද රජපක්ෂ රජය රට භාර දෙන විට ණය ප්‍රමාණය 7487ක්. අපිට රට භාරවන විට ලැබුණ ණය ප්‍රමාණය රුපියල් බිලියන 13032ක්. අයවැයෙන් වැඩි ප්‍රමාණයක් ණය පොලි ලෙස ගෙවීමට සිදුව තිබෙනවා.” යැයි ඔහු වැඩිදුරටත් සදහන් කළේය.

ශ්‍රී ලංකාව තුළ මේවන විට ජාතික ආරක්ෂාව තහවුරු කර ඇතැයි මුදල් අමාත්‍යවරයා පැවසීය. මේ අතර රජය මුහුණ දී ඇති වත්මන් අභියෝග කිහිපයක් පිළිබඳවද අමාත්‍යවරයා සඳහන් කළේය. මත්ද්‍රව්‍ය ජාවාරම, වංචනික ව්‍යාපාර මෙහෙයුම ඉන් කිහිපයක් වේ.

අයවැයෙන් වැඩිම මුදල වෙන්කර ඇත්තේ ණය ගෙවීම සඳහාය. මෙම රජය බාර ගන්නා විට රාජ්‍ය ණය රුපියල් බිලියන 13,032ක් බව ද මුදල් අමාත්‍යවරයා සදහන් කළේය. විවිධ මාධ්‍ය හා සමාජ මාධ්‍ය ඔස්සේ ඉදිරිපත් කළ යෝජනා අයවැය සැකසීමේදී සැලකිල්ලට ගත් බව ද අමාත්‍යවරයා පැවසීය

2022 අයවැය ලේඛනයේ වැදගත් උපුටා ගැනීම් සහ සමස්ත අයවැය ලේඛනය පහත පළ වේ.

• බැඳුම්කර සිද්ධියේ දී පර්පචුවල් ට්‍රෙෂරීස් සමාගම අයථා අයුරින් උපයන ලද රුපියල් බිලියන 8.5 ක මුදල මහා භාණ්ඩාගාරයට .
• අනතුරුවලට ලක්වන මෝටර් රථවලින් ගාස්තුවක් අය කිරීමට යෝජනා
• නිදහස් කර නොගත් ශ්‍රී ලංකා රේගුවේ තිබෙන සියලු වාහන නිදහස් කරනවා. මෙලෙස නිදහස් කරන්නේ අදාළ බදු සහ දඩ ගැනීමෙන් අනතුරුවයි.
• සිගරට් නිෂ්පාදන බද්ද වැඩිකරනවා . සිගරට්ටුවක මිල රුපියල් පහකින් වැඩි කරයි
• එක් වරක් පමණක් අය කරන බදු රුපියල් මිලියන 2000 වඩා ආදායමක් ලබන පුද්ගලයන් හා සමාගම් මත 25% ක බද්දක්.
• විශ්‍රාම වැටුප් නොලබන වැඩිහිටියන්ට දායක විශ්‍රාම වැටුප් ක්‍රමයක්
• පාසල් වෑන් රථ රියදුරන්ට සහන සැලසීමට රුපියල් මිලියන 400ක්
• කොවිඩ් සහන යටතේ පෞද්ගලික බස් රථ හිමියන්ට සහන සැලසීමට රුපියල් මිලියන 1500ක්
• ත්‍රිරෝද රථ හිමියන්ට සහන සැලසීමට රුපියල් මිලියන 700ක්
• වාරි සෞභාග්‍යා වැඩසටහන යටතේ දැනට වෙන් කර ඇති මුදලට අමතරව රුපියල් මිලියන විසිදාහක්
• වතු නිවාස දියුණු කිරිම සඳහා රුපියල් මිලියන පන්සීයක්
• සෑම පාර්ලිමේන්තු මන්ත්‍රීවරයෙකුටම තම ප්‍රදේශයේ සවර්ධන කටයුතු වෙනුවෙන් වෙන් කළ මුල්‍ය ප්‍රතිපාදන තවත් මිලියන 5 කින් වැඩි කීරීමට යෝජනාවක්
• මාර්ග සංවර්ධන සඳහා දැනට වෙන් කළ මුදලට අමතරව රුපියල් මිලියන 20000 ක්
• රාජ්‍ය සේවකයින්ගේ විශ්‍රාම ගැනිමේ වයස අවුරුදු 65ක් දක්වා දිර්ඝ කරයි
• රාජ්‍ය ආයතනවල දුරකථන වියදම් 25% කින් කපා හැරීමට පියවර
• පාර්ලිමේන්තු  මන්ත්‍රීවරුන්ගේ විශ්‍රාම වැටුප් ලැබීමේ කාලය වසර  10 ක් දක්වා දීර්ඝ කරයි
• සමෘද්ධි ව්‍යාපාරය ආර්ථික පුනර්ජනනීය ඇතිකර ග්‍රාම සංවර්ධන ව්‍යාපාරයක් බවට පත් කිරිමට යෝජනා
• 2022 අලුත් ව්‍යාපාර ලියාපදිංචි කරන තරුණයන්ගෙන් ලියාපදිංචි ගාස්තු අය නොකෙරේ.
• කෘෂිකාර්මික සුරක්ෂිතතාව තහවුරු කරන පනතක් සකස් කර ගොවින් ආරක්ෂා කරන බව ද මුදල් අමාත්‍ය බැසිල් රාජපක්ෂ මහතා සදහන් කළේය.
• වගා නොකළ ඉඩම් තරුණයින්ට හා කාන්තාවන්ට වගා කිරිමට ලබා දෙයි

[googlepdf url=”http://supirigossip.com/wp-content/uploads/2021/11/Budget-Sinhala.pdf” ]

2022 මුදල් වර්ෂය සඳහා වන විසර්ජන කෙටුම්පත දෙවන වර කියවීම සඳහා මුදල් අමාත්‍ය බැසිල් රාජපක්ෂ මහතා විසින් හෙට (12) පාර්ලිමේන්තුවට ඉදිරිපත් කෙරේ. අය වැය කථාව ප.ව 02.00 ට ආරම්භ වන බව පාර්ලිමේන්තුවේ මහලේකම් ධම්මික දසනායක මහතා පැවසීය. නිදහස් ශ්‍රී ලංකාවේ 76 වැනි අයවැය මෙයයි.

මෙම පනත් කෙටුම්පත ඔක්තොම්බර් මස 07 වැනිදා පෙරවරුවේ මුදල් අමාත්‍යවරයා විසින්  පාර්ලිමේන්තුවට ඉදිරිපත් කරන ලදී.

2022 මුදල් වර්ෂයට අදාළ සේවා වියදම් ඒකාබද්ධ අරමුදලින් හෝ ප්‍රතිපාදන සහිත වෙනත් සුදුසු අරමුදලකින් ලබා ගැනීමටත්, ශ්‍රී ලංකාව තුළ හෝ ඉන් බැහැරව ණය ලබාගැනිම ඇතුළු කරුණු කාරණා  සඳහා වන මෙම විසර්ජන පනත් කෙටුම්පත 2021 සැප්තැම්බර් 29  දින ගැසට් පත්‍රයේ පළ කෙරිණි.

මේ අනුව 2022 ජනවාරි මස පළමු වැනිදා සිට 2022 දෙසැම්බර් 31 වැනිදා දක්වා වන කාලසීමාව  තුළ සේවා වියදම් සඳහා රුපියල් දෙදහස් පන්සිය පස් බිලියන තුන්සිය හතලිස් හය මිලියන පන්සිය පනස් අටදහසක්  වන  ආණ්ඩුවේ වියදම්වලට අදාල පුනරාවර්තන සහ මූලධන වියදම් සඳහා අනුමැතිය ලබා ගැනීමට නියමිතයි.

ආණ්ඩුක්‍රම ව්‍යවස්ථාවේ xvii පරිච්ඡේදය අනුව රාජ්‍ය මූල්‍ය පිළිබද සම්පූර්ණ පාලනය පාර්ලිමේන්තුව සතුවන අතර බදු නියම කිරීම, ඒකාබද්ධ අරමුදලින් හෝ ප්‍රතිපාදන සහිත වෙනත් සුදුසු අරමුදලකින් ලබා ගැනීම ඇතුළු කාරණා සඳහා පාර්ලිමේන්තුවේ අනුමැතිය ලබා ගත යුතු වේ.

නොවැම්බර් 13 සෙනසුරාදා  සිට  නොවැම්බර් 22 සඳුදා  දක්වා  දින 07ක් අයවැය දෙවැනිවර කියැවීමේ විවාදය පැවැත්වේ. නොවැම්බර් 22 වැනි සදුදා ප.ව 5.00ට අයවැය දෙවැනිවර කියැවීමේ ඡන්ද විමසීම පැවැත්වීමට නියමිතයි.

නොවැම්බර් 23 වැනි අඟහරුවාදා  සිට කාරක සභා අවස්ථාවේ විවාදය ආරම්භ වන අතර සෙනසුරාදා ද ඇතුළුව දෙසැම්බර් 10 වන සිකුරාදා දක්වා දින 16 ක් එම විවාදය පැවැත්වීමට ද කටයුතු යොදා ඇත. දෙසැම්බර් 10 වන දින ප.ව 5.00ට තෙවැනි වර කියවීමේ ඡන්ද විමසීම පැවැත්වීමට නියමිතයි.

ශ්‍රව්‍යාබාධිත ප්‍රජාව වෙනුවෙන් මෙවර අයවැය විවාදය සංඥා භාෂාවෙන් ද ඉදිරිපත් කිරීමට කටයුතු යොදා ඇත. ඒ අනුව අයවැය විවාදය පැවැත්වෙන කාල සීමාව තුළ රූපවාහිනි සජීවී විකාශයට සමගාමීව සංඥා භාෂා කවුළුවක්ද  විකාශය කෙරේ.

අයවැය ප්‍රකාශය පාර්ලිමේන්තුවට ඉදිරිපත් වන හෙට (12) සිට අයවැය විවාදය පැවැත්වෙන සම්පූර්ණ කාල සීමාව තුළ සියලු සෞඛ්‍ය මාර්ගෝපදේශයන් සහ රෙගුලාසීන්ට අනුකූලව පාර්ලිමේන්තු රැස්වීම් පැවැත්වීමට කටයුතු යොදා තිබෙන බව පාර්ලිමේන්තුවේ මහලේකම් ධම්මික දසනායක මහතා සඳහන් කළේය.

අයවැය විවාදය පැවැත්වෙන කාල සීමාව තුළ මහජන ගැලරිය මහජනතාව සඳහා විවෘත නොවන අතර රාජ්‍ය නිලධාරින් සීමිත පිරිසකට පමණක් අයවැය කාරක සභා අවස්ථාවට සහභාගිවීමට අවසර ලබා දී තිබේ.

හෙට දිනයේදී ආරාධිත විදේශ රාජ්‍ය තාන්ත්‍රික තානාපතිවරුන් හා මහකොමසාරිස්වරුන් වෙනුවෙන් විශේෂ අමුත්තන්ගේ ගැලරිය විවෘත කෙරේ.

හෙට ඉදිරිපත් කරනු ලබන්නේ ශ්‍රී ලංකා ප්‍රජාතාන්ත්‍රික සමාජවාදි ජනරජයේ හත්වන විධායක ජනාධිපති අතිගරු ගෝඨාභය රාජපක්ෂ මැතිතුමාගේ රජයේ දෙවැනි අයවැය ලේඛනයයි.

අයවැය කථාව සිදු කිරීමෙන් පසු මුදල් අමාත්‍යවරයා විසින් සම්ප්‍රදායානුකූලව පවත්වන තේ පැන් සංග්‍රහය පැවැත්වේ. එහෙත් එය පාර්ලිමේන්තු මැති ඇමතිවරුන්, විදේශ තානාපතිවරුන් සහ ආරාධිතයින්ට පමණක් සීමා වනු ඇත.

සේවකයන් විශ්‍රාම යාමේ අවම වයස සම්බන්ධ පනත් කෙටුම්පත අද (11) පාර්ලිමේන්තුවේදී සංශෝධන සහිතව සම්මත විය. දැනට 55 ක් වන විශ්‍රාම වයස 60 ක් වුව ද සේවකයන්ට තම අවශ්‍යතාව අනුව වයස 55 දී සේවක අර්ථසාධක අරමුදලේ ප්‍රතිලාභ ලැබිය හැකි බව ද කම්කරු අමාත්‍ය නිමල් සිරිපාල ද සිල්වා මහතා පාර්ලිමේන්තුවේදී ප්‍රකාශ කළේ ය.

කොවිඩ් – 19 සම්බන්ධයෙන් වන රෝගී ප්‍රදේශයක් ඇතුළත හෝ ඉන් පිටත ඒකරාශීවීමක් , ක්‍රියාකාරකමක් හෝ අවස්ථාවක් සම්බන්ධයෙන් නව නියෝග කිහිපයක් පනවමින් සෞඛ්‍ය අමාත්‍යවරයා අති විශේෂ ගැසට් නිවේදනයක් නිකුත් කර තිබේ.

ඒ අනුව සමස්ත ශ්‍රී ලංකාව සම්බන්ධයෙන් වන නිසි බලධාරියා විසින් නිශ්චය කරනු ලබන යම් කාලසීමාවක් සඳහා එම නියෝග බලපැවැත්වෙනු ඇත.

ගැසට් නිවේදනයේ දැක්වෙන්නේ ඒකරාශීවීම, ක්‍රියාකාරකම් , අවස්ථාව හෝ ඒ හා සමාන රැස්වීම පැවැත්වෙන ස්ථානය සහ එහි වටපිටාව , ව්‍යුහය හෝ වටමායිම මෙන්ම ඊට සහභාගීවීමට අවසර දෙන උපරිම තැනැත්නන් සංඛ්‍යාව හෝ අවසර ලබාදිය හැකි ධාරිතාව සම්බන්ධයෙන් නව නියෝග නිකුත් කර ඇති බවයි.

යම් තැනැත්තෙකු විසින් එම නියෝග උල්ලංඝණය කරමින් යම් ඒකරාශීවීමක්, ක්‍රියාකාරකමක් හෝ අවස්ථාවක් හෝ ඒ හා සමාන රැස්වීමක් සඳහා අවසර ලබාදීම හෝ ඊට සහභාගීවීම නොකළ යුතු බව ද නව නියෝගවල සඳහන් ය.

විෂමතාව ඉවත් කරන්න අමතරව රුපියල් මිලියන 30000ක්

සමස්ත අය-වැය ලේඛනයෙන් ඉතිහාසයේ පළමු වතාවට අධ්‍යාපනයට සියයට 7.51ක්

විසි පස් වසරකට ආසන්නව පවතින වැටුප් විෂමතාව ඉවත් කිරීම දැනුම් දීම සඳහා අද (10) දින පාර්ලිමේන්තුවේ කමිටු ශාලා 01 හි පැවති හමුවේ දී අග්‍රාමාත්‍ය මහින්ද රාජපක්ෂ මහතා ඇතුළු රජයට ගුරු- විදුහල්පති  වෘත්තීය සමිති නියෝජිතයෝ සිය ප්‍රණාමය පුද කළහ.

දරුවන්ගේ සහ රටේ අනාගතය වෙනුවෙන් ගුරු-විදුහල්පති වැටුප් විෂමතාව ඉවත් කිරීම සඳහා ලබන අය-වැයෙන් අමතර රුපියල් මිලියන 30000ක් වැය කරන බවත් ඒ අනුව ඉතිහාසයේ පළමු වතාවට මෙරට අධ්‍යාපනය සඳහා වැය කරන මුදල සමස්ත අය-වැයෙන් සියයට 7.51ක් වනු ඇතැයි මෙම හමුවේ දී මුදල් අමාත්‍ය බැසිල් රාජපක්ෂ මහතා ගුරු-විදුහල්පති වෘත්තිය සමිති නියෝජිතයන්ට දැනුම් දුන්නේය.

ඒ අනුව වෘත්තිය සමිති ඉල්ලීම ඉටු කිරීම ගැන මුදල් අමාත්‍ය බැසිල් රාජපක්ෂ මහතාට මෙහි දී අග්‍රාමාත්‍ය මහින්ද රාජපක්ෂ මහතා ස්තුති කළේය.

අධ්‍යාපන අමාත්‍ය දිනේෂ් ගුණවර්ධන මහතා මෙම සාකච්ඡාවේ අරමුණ පැහැදිලි කළේය.

ශ්‍රී ලංකා පොදුජන අධ්‍යාපන සේවා සංගමයේ සභාපතිනි වසන්තා හඳපාන්ගොඩ මහත්මිය මෙහි දී ගුරු- විදුහල්පති වැටුප් විෂමතාවය විසඳීම සඳහා ශ්‍රී ලංකා පොදුජන අධ්‍යාපන සේවා සංගමය සම්මත කළ යෝජනාවලිය මුදල් අමාත්‍ය  බැසිල් රාජපක්ෂ මහතාට භාර දුන්නාය.

1997 නිර්මාණය වූ මෙම අර්බුධයේ සම්පූර්ණ වැටුප් විෂමතාව ඉවත් කිරීමට යම් කාල රාමුවක් අවශ්‍ය බව පිළිගත් ගුරු විදුහල්පති වෘත්තිය සමිති නියෝජිතයෝ එහි ආරම්භයක් ලෙස තුනෙන් එකක කොටස ලබන අය-වැයෙන් එකවර ලබා දීම ගැන සතුටු වන බව පෙන්වා දුන්හ.

මෙම හමුවේ දී මුදල් අමාත්‍ය බැසිල් රාජපක්ෂ මහතා මෙසේ පැවසීය.

අපි මේ පිළිබඳව මුලින්ම සාකච්ඡා කළේ ජූලි මාසේ 26 වැනිදා අමාත්‍ය මණ්ඩල රැස්වීමේ දීයි. එහි දී මහාචාර්ය ජී.එල් පීරිස් මැතිතුමත්, ගාමිණී ලොකුගේ මැතිතුමාත්, ආචාර්ය බන්දුල ගුණවර්ධන මැතිතුමත්, විමල් වීරවංශ මැතිතුමත්, උදය ගම්මන්පිල මැතිතුමත්, රමේෂ් පතිරණ මැතිතුමත්, ලසන්ත අලගියවන්න මැතිතුමත් ඇතුළත් කමිටුවක් පත් කළා. ඒක පසුව 4 දෙනෙකුට සීමා වුණා.  එහි නිර්දේශයක් ඉදිරිපත් කළා. මුදල් අමාත්‍යවරයා හැටියට මගේ නිරීක්ෂණය ඉදිරිපත් කළේ මූලිකව මෙම ඉල්ලීම් සියල්ල වැටුප් වැඩිවීමක් නෙමෙයි කියලා. මේක අවුරුදු විස්සක් විසි පහක් පවතින ගුරුවරුන්ගේ සහ විදුහල්පතිවරුන්ගේ වැටුප් විෂමතාවයක්. මෙය නිවැරදි කරන්න කියලා තමයි ඉල්ලීම ඉදිරිපත් කරලා තිබුණෙ. අපේ නිර්දේශය වුණේ සමස්ත රාජ්‍ය සේවය තුළ වැටුප් සම්බන්ධ අසමමිතිකතාවක් ඇති නොවන පරිදි ඉදිරි අය-වැය තුළින් සළකා බැලීම සුදුසුය කියලා.

දැන් අය-වැය එනවා. අදාළ නිර්දේශ සම්බන්ධයෙන් කැබිනට් මණ්ඩලය එකඟත්වය පළ කරලා තියෙනවා. මේ පිළිබඳව මල්-වතු අස්ගිරි මහ නායක ස්වාමීන් වහන්සේලා ඇතුළු සියලු දේශපාලන පක්ෂත්, මා හමුවුණ අවස්ථාවලදිත් පැවසුවේ මේ ගුරු-විදුහල්පති ප්‍රශ්නය මෙවර අය-වැය තුළින් විසඳන්න කියලා. ගරු අගමැතිතුමත් විශේෂයෙන්ම ජනාධිපතිතුමත් අධ්‍යාපන ඇමතිතුමත් නිර්දේශ කරලා තියෙනවා අනිවාර්යයෙන්ම මේක විසඳන්න කියලා. වෘත්තිය සමිති පැත්තෙන් විශාල සහයෝගයක් මේ වෙලාවේ අපට ලැබිලා තියෙනවා. අපට ඕන වුණ එකම දේ අධ්‍යාපනය ළමයින්ට ලබා දෙන්න. මේ වෙනකොට සියලුම පාසල් විවෘත කරලා සෞඛ්‍ය නිර්දේශ අනුව පාසල් කටයුතු සිදුවෙනවා. ඒ නිසා අපි බොහොම අමාරුවෙන් වුණත් නිර්දේශිත මේ මුදල වෙන් කරන්න බලාපොරොත්තු වෙනවා.

මේක විෂමතාවක් ඉවත් කිරීමක් මිස වැටුප් වැඩිවීමක් නෙමෙයි. මෙතන සිටින මහා සංඝරත්නය ඇතුළු වෘත්තිය සමිතිවලින් මම ඉල්ලා සිටිනවා අවුරුදු විසි ගණනක් විසඳන්න බැරිව තිබුණ වැටුප් විෂමතාවක් සාධාරණ මට්ටමෙන් විසඳීමක් විධියට දකින්න කියලා. කැබිනට් මණ්ඩලයේ අනුමැතිය අනුව දැනට වෙන් කරලා තියෙන මුදලට අමතරව රු. මිලියන 30000ක් අපි ලබන අය වැයෙන් ගුරු හා විදුහල්පති වැටුප් විෂමතාව ඉවත් කිරීම සඳහා වෙන් කරනවා. අය-වැයටත්, කැබිනට් මණ්ඩලයටත් ඉස්සරවෙලා ඔබතුමාලට කිව්ව එකම රහස ඒක.

අනිත් ඇමතිවරු දොස් කියන එකක් නැහැ. විපක්ෂයේ මන්ත්‍රීවරු කිහිප දෙනෙකුත් මෙතන නොහිටියත් මේක විසඳන්න කියලා ඉල්ලුවා. එයත් සිහිපත් කරනවා. දරුවන්ගේ අනාගතය රටේ අනාගතය වෙනුවෙන් මෙය විසඳන්න අපි තීරණය කළේ. මහින්ද රාජපක්ෂ ජනාධිපතිතුමාගේ කාලේ අධ්‍යාපනයට සියයට 6ක් වෙන් කරන්න කියලා සමහරු උද්ඝෝෂණය කළා. අවසානයේ ඔවුන්ගෙ වැටුප් සියල්ල වැඩි කළා. හැබැයි ඊට පස්සේ සියයට 6 අමතක කළා.

හැබැයි අපි මේ පාර අය වැය ලේඛනයෙන් අපේ සම්පූර්ණ වියදමෙන් සියයට 7.51ක් අධ්‍යාපනය වෙනුවෙන් වෙන් කරනවා. ඒ මේ රටේ අනාගතය වෙනුවෙන් එය වෙන්කරන්නෙ. ජනාධිපතිතුමත්,අගමැතිතුමත් විශේෂයෙන් අධ්‍යාපන ඇමතිතුමත් අපෙන් ඉල්ලුව මේක කරන්න කියලා. මේ ඉතිහාසයේ පළමුවැනි වතාවට අධ්‍යාපනය සඳහා සමස්ත අය වැයෙන් සියයට 6 ඉක්මවන්නෙ.

එදා උද්ඝෝෂණ කළ අයට අමතක වුණාට, මහින්ද ජනාධිපතිතුමා ඇතුළු අපේ රජයට එය අමතක වුණේ නැහැ. අපි පිළිගන්නවා අධ්‍යාපනය මේ රටේ ලොකුම ආයෝජනය කියලා. සෞඛ්‍ය හා අධ්‍යාපනය ගත්තම අපි ලෝකයේ ඇතැම් දියුණු රටවලට සමාන මට්ටමේ ඉන්නවා. දකුණු ආසියාවේ අපි ඉහළම තැනක ඉන්නවා. ආයෝජනය වගේම ඵලදායීතාවත් වැඩි කරන්න කියලා අපි මේ හැම වෘත්තිය සමිති නියෝජිතයෙකුගෙන්ම ඉල්ලනවා. අධ්‍යාපනය දියුණු කරන්න ඔබ සියලු දෙනාගේ සහයෝගය අධ්‍යාපන අමාත්‍යාංශයට, රජයට දෙන්න කියලා ඉල්ලනවා. ඊට එහා යන ඉල්ලීම් ගැන මුදල් ඇමතිවරයා හැටියට අපිට කතා කරන්න පුළුවන් යැයි අමාත්‍ය බැසිල් රාජපක්ෂ මහතා පැවසීය.

පැන්ඩෝරා පත්‍රිකාව සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාව ආරම්භ කර ඇති විමර්ශනයේ ප්‍රගතිය ජනාධිපති ගෝඨාභය රාජපක්ෂ මහතා වෙත දැනුම් දෙයි.

පැන්ඩෝරා පත්‍රිකාවෙන් අනාවරණය වී ඇති ශ්‍රී ලාංකිකයන් සහ එම ගනුදෙනු පිළිබඳ වහාම විමර්ශනයක් කර මසක් ඇතුළත වාර්තාවක් ලබාදෙන ලෙස ජනාධිපතිවරයා විසින් දැනුම් දෙනු ලැබිණ. අදාළ දැනුම් දීම ජනාධිපති නීති අධ්‍යක්ෂ ජනරාල් හරිගුප්ත රෝහණධීර මහතා ඔක්තෝබර් මස 06 වන දින අල්ලස් හෝ දූෂණ චෝදනා විමර්ශන කොමිෂන් සභාවේ අධ්‍යක්ෂ ජනරාල්වරයා වෙත යොමු කළේය.

එයට ප්‍රතිචාර වශයෙන් කොමිෂන් සභාවේ අධ්‍යක්ෂ ජනරාල් ඩබ්.කේ.ඩී. විජේරත්න මහතා 2021.11.08 දාතමින් වාර්තාවක් යොමු කර තිබේ.

තිරුකුමාර් නඩේෂන් මහතාගේ බැංකු ගිණුම් විස්තර ඇතුළත් වාර්තා විවිධ බැංකු හා මූල්‍ය ආයතන මගින් කැඳවා ඇති අතර, මේ වන විට එම වාර්තා ලැබෙමින් පවතින බව අල්ලස් හෝ දූෂණ චෝදනා විමර්ශන කොමිෂන් සභාවේ අධ්‍යක්ෂ ජනරාල්වරයා දන්වා සිටී.

විමර්ශන කටයුතු අවසාන වී නැති බැවින් ඊට අදාළව කැඳවන ලද වාර්තා සහ අනිකුත් වැඩිදුර විමර්ශන සිදු කිරීමෙන් අනතුරුව අවසන් වාර්තාව ලබාදීමට කටයුතු කරන බව එමගින් වැඩිදුරටත් දන්වා ඇත.

ටයිල්, ග්‍රැනයිට්, ලී බඩු, ප්ලාස්ටික්, මුහුණු ආවරණ ,බයිසිකල්, සබන්, ලුනු ඇතුළු භාණ්ඩ වර්ග 433 ක් ආනයනය කිරීම සීමා කර ඇතැයි  සමෘද්ධි සහ ව්‍යාපාර සංවර්ධන රාජ්‍ය අමාත්‍ය ශෙහාන් සේමසිංහ මහතා පාර්ලිමේන්තුවේදී අද  (10) පැවසුවේය.

ආර්ථික ස්ථාවරත්වය පවත්වාගෙන යෑම සඳහා මෙම පියවර ගත් බවයි රාජ්‍ය අමාත්‍යවරයා වැඩි දුරටත් සදහන් කළේ.

මෙම භාණ්ඩ ආනයනය කිරීම සඳහා 2018 වර්ෂයේදී ඇමරිකානු ඩොලර් බිලියන 2.2ක්ද 2019 වර්ෂයේදී  ඇමරිකානු ඩොලර් බිලියන 1.2ක්ද වැය කර ඇති බව පැවසූ ශෙහාන් සේමසිංහ මහතා  මෙම භාණ්ඩ ආනයනය කිරීම තාවකාලිකව තහනම් කිරීම නිසා ඇමරිකානු ඩොලර් බිලියන 1.6ක් ඉතිරි කර ගැනීමට හැකිවී ඇති බවත් රාජ්‍ය අමාත්‍යවරයා පැවසුවේය.

එසේම වාහන ආනයනය  තහනම් කිරීම නිසා ඇතිවූ වෙළෙඳපොළ හිඟය  සපුරා ගැනීම සඳහා වාහන එකලස් කිරීමේ කර්මාන්තය දේශීයව ක්‍රියාත්මක කිරීමට කටයුතු කරගෙන යන බවත් මේ සඳහා ආයෝජකයන් එකොළොස් දෙනෙකු රජය සමග සාකච්ඡා කර ඇති බවත් රාජ්‍ය ඇමැතිවරයා ප්‍රකාශ කළේය.

රාජ්‍ය අමාත්‍යවරයා මේ බව පැවසුවේ ශ්‍රී ලංකා පොදුජන පෙරමුණේ රත්නපුර දිස්ත්‍රික් මන්ත්‍රී ගාමිණී වලේබොඩ මහතා අගමැතිවරයාගෙන් ඇසූ ප්‍රශ්නයකට ඔහු වෙනුවෙන් පිළිතුරු දෙමිනි.

පහළ වායුගෝලයේ කැළඹිලි තත්ත්වය මේ වන විට පීඩන අවපාතයක් බවට පරිවර්තනය වී ඇති බවත් ඉන් දිවයිනට වක්‍ර බලපෑමක් සිදුව තිබෙන බව කාළගුණ විද්‍යා දෙපාර්තමේන්තුවේ අධ්‍යක්ෂ ජනරාල් අතුල කරුණානායක මහතා පවසයි.

රජයේ ප්‍රවෘත්ති දෙපාර්ත්මේන්තුවේ අද (10) පැවති විශේෂ මාධ්‍ය හමුවකට එක් වෙමින් ඒ මහතා මේ බව කියා සිටියේය.

මේ දිනවල පවතින වර්ෂාපතනයෙහි වැඩිවීම මුල සිට අධ්‍යයනය කරමින් සිටි බවත් පසුගිය දිනවල අන්දමන් දූපත් අසළ පැවති පහළ වායුගෝලයේ කැළඹිලි තත්වයක් නිරීක්ෂණය වූ බවත් ඒ හේතුවෙන් වර්ෂාවපතනයේ වැඩිවීමක් අපේක්ෂා කළ හැකි බව මාධ්‍ය තුළින් ජනතාවට දැනුම් දීමට කටයුතු කළ බවත් අතුල කරුණානායක මහතා පවසයි.

අඩු පීඩන තත්වයක්ව පැවති මෙම පද්ධතිය මේ වන විට පීඩන අවපාතයක් බවට පරිවර්තනය වී ඇති බව ඒ මහතා වැඩිදුරටත් පැවසීය.මෙම පීඩන අවපාත තත්වය මේ වන විට ස්ථානගතවී ඇත්තේ දිවයිනට ඊසාන දිශාවෙන් ගැඹුරු මුහුදේ වන බැවින් එමගින් දිවයිනට ඇති කෙරෙන්නේ වක්‍ර බලපෑමක් බව ඒ මහතා කියා සිටියේය.

විශේෂයෙන්ම ධීවර හා නාවික ප්‍රජාවට බෙංගාල බොක්ක අවට ප්‍රදේශයේ ධීවර හා නාවික කටයුතුවන නිරත නොවන ලෙසට රතු නිවේදන ලබා දී ඇති බවත් ඒ මහතා පැවසීය.

සිදු කරන ලද නිරීක්ෂණයන්ට අනුව හෙට සවස් කාලයේදී මෙම පද්ධතිය ඉන්දියාවේ තමිල්නාඩු වෙරළබඩ තීරයට ඇතුළ්වීමට නියමිත බව කරුණානායක මහතා පෙන්වා දුන්නේය.අද දවස තුළත් දිවයිනේ බොහෝ ප්‍රදේශවලට ඉහළ වර්ෂාපතනයක් ලැබිය හැකි බව පවසන ඒ මහතා වැඩි වර්ෂාපනයක් අපේක්ෂා කෙරෙනුයේ උතුරු , උතුරු මැද , වයඹ , බස්නාහිර පළාත්වලට බවත් එම පළාත්වල ඇතැම් ස්ථානවලට මිලිමීටර් සියය ඉක්මවන වැසි තත්වයක් ඇති විය හැකි බවත් දිවයිනේ සෙසු පළාත් විශේෂයෙන්ම සබරගමුව , මධ්‍යම ඌව පළාත්වලට මිලිමීටර් 75 ඉක්මවන වැසි තත්වයක් ඇති විය හැකි බවත්  අතුල කරුණානායක මහතා පවසයි.

අනෙක් පළාත්වල සන්ධ්‍යා කාලයේ දී හෝ රාත්‍රී කාලයේදී වැසි හෝ ගිිරුම් සහිත වැසි ඇතිවිය හැකියි.මෙම පද්ධතිය දැනට බෙංගාල බොක්ක අවට ප්‍රදේශයේ මුහුදු සීමාවේ පවතින බවත් ක්‍රමයෙන් වෙරළබඩ තීරයට ඇතුළුවන විට පහළ තිබෙන ස්ථරය ජලයේ සිට ගොඩබිමට ළඟා වන විට එක්වර වෙනස්වීමක් ඇති වන බැවින් මේ තත්වය යටතේ ඉදිරි දින කිහිපයේ දිවයින තුළ වුවද සුළං තත්වයේ වැඩිවීමක් අපේක්ෂා කළ හැකි බව ඒ මහතා පෙන්වා දේ.එම සුළඟේ වේගය පැයට කිලෝමීටර 40-50 දක්වා ඉහළ යා හැති බවත් මෙම තත්වය වැසි සමග ඇතිවන තාවකාලික සුළඟේ වේගය වැඩිවීම නොවන බව ඒ මහතා අවධාරණය කළේය.

වර්ෂාව සමග ඇතිවන අකුණු අනතුරු අවම කිරීමට කටයුතු කරන ලෙස ඒ මහතා ජනතාවගෙන් ඉල්ලීමක් කළ අතර අද සහ හෙට මෙම කාලගුණික තත්වය මෙලෙසම පවතිනු ඇති බවත් ඒ මහතා පැවසීය.නොවැම්බර් මස 13 වැනි දිනෙන් පසුව අන්තර් මෝසම් කාලපරිච්ඡේදය නිසා වර්ෂාපතනය ඇතිවිය හැති බවත් එවිට උදෑසන පැහැදිළි අහසක් දක්නට ලැබෙන අතර සවස් කාලයේ වැසි හෝ ගිගිරුම් සහිත වැසි තත්වයක් නිර්මාණය විය හැකි බවත් පැවසීය.

විශේෂයෙන්ම මෙම කාලපරිච්ඡේදය සැළකීමේදී එය දිවයිනට බලපාන දෙවන අන්තර් මෝසම් තත්වය බවත් එය ඔක්තෝබර් සිට නොවැම්බර් දක්වා පවතින බවත් සාමාන්‍ය වර්ෂාපතනයක් පවතින බවත් මෙම තත්වය වෙනස් වන්නේ විශේෂයෙන්ම බෙංගාල බොක්ක අවට ප්‍රදේශයේ සහ අරාබි මුහුදු ප්‍රදේශ ආශ්‍රිතව සිදුවන කැළඹෙන ස්වභාවයන් , තරංගවල ස්වභාවයන් , පීඩන අවපාත , අඩු පීඩන කලාප සුළි කුණාටු තත්වයන් නිසා බවත් ඒ මහතා පෙන්වා දුන්නේය.

දිවයිනේ පවතින වැසි සහිත කාලගුණික තත්ත්වය අද (09) තවදුරටත් බලාපොරොත්තු වන බව කාලගුණ විද්‍යා දෙපාර්තමේන්තුව පවසයි. දිවයිනේ බොහෝ ප්‍රදේශවල විටින් විට වැසි හෝ ගිගුරුම් සහිත වැසි ඇතිවේ.

උතුරු, වයඹ, බස්නාහිර සහ සබරගමුව පළාත්වලත් අනුරාධපුර, ත්‍රිකුණාමලය, නුවර සහ නුවරඑළිය දිස්ත්‍රික්කවලත් ඇතැම් ස්ථානවලට මි.මී. 150ට වැඩි ඉතා තද වැසි ඇතිවිය හැකි බව එම දෙපාර්තමේන්තුව දැනුම් දී තිබේ.

මාතලේ, පොලොන්නරුව, ගාල්ල සහ මාතර දිස්ත්‍රික්කවල ඇතැම් ස්ථානවලට මි.මී. 100 පමණ තද වැසි ඇතිවිය හැක.

ගිගුරුම් සහිත වැසි සමග ඇතිවිය හැකි තාවකාලික තද සුළං වලින් සහ අකුණු මඟින් සිදු වන අනතුරු අවම කර ගැනීමට අවශ්‍ය පියවර ගන්නා ලෙස කාලගුණ විද්‍යා දෙපාර්තමේන්තුව ජනතාවගෙන් ඉල්ලා සිටී.

ඉදිරි පැය 24 තුළදී ගිණීකොණදිග බෙංගාලබොක්ක මුහුදු ප්‍රදේශයේ අඩු පීඩන කලාපයක් ඇතිවීමේ හැකියාවක් පවතින බැවින් නැවත දැනුම්දෙන තුරු ධීවර සහ නාවික ප්‍රජාව මෙම මුහුදු ප්‍රදේශයේ සහ දිවයිනට දකුණු දෙසින්වන මුහුදු ප්‍රදේශයට ගමන් කිරීමෙන් වළකින ලෙස කාලගුණ විද්‍යා දෙපාර්තමේන්තුව දැනුම් දේ.දිවයින වටා වන මුහුදු ප්‍රදේශවල සුළං බස්නාහිර සිට වයඹ දක්වා වන ප්‍රදේශවලින් හමා එන අතර එහි වේගය පැයට කිලෝමීටර 30ත් 40ත් පමණ වේ.පුත්තලම සිට කොළඹ , ගාල්ල , සහ හම්බන්තොට හරහා පොතුවිල් දක්වා වන මුහුදු ප්‍රදේශ විටින් විට රළු වේ.

අද පෙරවරු 8.30න් අවසන් වූ පැය විසිහතර තුළ වැඩිම වර්ෂාපතනයක් වාර්තා වී ඇත්තේ නොච්චියාගම ප්‍රදේශයට වන අතර එම ප්‍රමාණය මිලිමීටර් 300.4ක් වේ.රනෝරාව ප්‍රදේශයට මිලිමීටර් 260ක් රඹෑව ප්‍රදේශයට මිලිමීටර් 210.5ක් වේවැල්තලාව ප්‍රදේශයට මිලිමීටර් 200.2ක් ලෙස සෙසු ප්‍රදේශවලින් වර්ෂාපතනයන් වාර්තා වී තිිබේ.විදුලි බලාගාර ආශ්‍රිත ජලාශ සඳහා ද සැළකිය යුතු වර්ෂාපතනයක් ලැබී ඇති අතර ලක්ෂපාන ජලාශය ආශ්‍රිතව මිලිමීටර් 108ක් නෝටන් ජලාශය ආශ්‍රිතව මිලිමීටර් 104.5ක් කැනියන් ජලාශය ආශ්‍රිතව මිලිමීටර් 82.5ක වර්ෂාපතනයක් වාර්තා වී ඇත.

ගම්පහ දිස්ත්‍රික්කයේ අත්තනගලු ඔය ද්‍රෝණියේ අත්තනගල්ල , ගම්පහ සහ ජා ඇල ප්‍රාදේශීය ලේකම් කොට්ඨාසවලට අයත් පහත්බිම් ඉදිරි පැය කිහිපය තුළ සුළු ගංවතුර තත්වයක් ඇතිවීමේ අවදානමක් ඇති බව වාරිමාර්ග දෙපාර්තමේන්තුව නිවේදනය කරයි.එසේම කළුතර දිස්ත්‍රික්කයේ කළු ගඟ උප ද්‍රෝණීයේ බුලත්සිංහල , බදුරලිය ,පාලින්දනුවර , මිල්ලනිය , හොරණ , දොඩංගොඩ , සහ කළුතර ප්‍රාදේශීය ලේකම් කොට්ඨාසවලට අයත් පහත් බිම් ද කෑගල්ල ගම්පහ සහ කොළඹ දිස්ත්‍රික්කවල කැලණිගඟ ද්‍රෝණීයේ දෙහිඕවිට , රුවන්වැල්ල , සීතාවක , දොම්පේ , කඩුවෙල ,බියගම , කොළොන්නාව , කොළඹ සහ වත්තල ප්‍රාදේශීය ලේකම් කොට්ඨාසවලට අයත් පහත්බිම්වලටද ඉදිරි කාලයේදී සුළු ගංවතුර අවදානමක් ඇති විය හැකි බවට ගංවතුර අනතුරු ඇඟවීමේ නිවේදනයක් නිකුත් කර ඇත.

කැලණි ගඟේ ග්ලේන්කෝස් , හංවැල්ල සහ නාගලගංවීදිය ස්ථානවල අවදානම් මට්ටම වැඩිවෙමින් පවතින අතර හොලොම්බුව ප්‍රදේශයේ මහ ගංවතුර මට්ටම අඩුවෙමින් පවතී.කළු ගඟ ආශ්‍රිතව පුටුපාවුල, ප්‍රදේශයේ ගංවතුර මට්ටම වැඩිවෙමින් පවතින අතර රත්නපුර , මගුර ප්‍රදේශවල ගංවතුර අවදානම අඩුවෙමින් පවති.කලවැල්ලාව මිල්ලකන්ද ප්‍රදේශයට සුළු ගංවතුර මට්ටම වැඩිවෙමින් පවතී.ගිං ගඟ ආශ්‍රිතව බද්දේගම ප්‍රදේශයේ සුළු ගංවතුර මට්ටම වැඩිවෙමින් පවතින අතර නිල්වලා ගඟ ආශ්‍රිතව තල්ගහගොඩ ප්‍රදේශයේද සුළු ගංවතුර මට්ටම වැඩිවෙමින් පවතින අතර පානදුගම ප්‍රදේශයේ අවදානම් මට්ටම අඩුවෙමින් පවතී.එමෙන්ම මහ ඔය ආශ්‍රිතව බඩල්ගම ප්‍රදේශයේ සුළු ගංවතුර මට්ටම වැඩිවෙමින් පවතින අතර ගිරිඋල්ල ප්‍රදේශය ආශ්‍රිතව මහ ගංවතුර මට්ටම වැඩි වෙමින් පවතී.අත්තනගලු ඔය ආශ්‍රිත දූනමලේ ප්‍රදේශයේ සුළු ගංවතුර මට්ටමකට පැමිණ ඇත.

එසේම ගංවතුර තත්වය සඳහා සෙවීම් සහ මුදවා ගැනීමේ කණ්ඩායම් ද ප්‍රදේශ කිහිපයක ස්ථානගත කර ඇති බව ආපදා කළමනාකරණ මධ්‍යස්ථානය දැනුම් දේ.ඒ අනුව කුරුණෑගල දිස්ත්‍රික්කයේ උඩුබද්දාව , ගිරිඋල්ල සහ බිංගිරිය ප්‍රාදේශීය ලේකම් කොට්ඨාසය , පුත්තලම දිස්ත්‍රික්කයේ පාලවීය ප්‍රදේශය, රත්නපුර නව නගරය , බුලත්සිංහල ප්‍රාදේශීය ලේකම් කොට්ඨාසයේ සහ ගාල්ල දිස්ත්‍රික්කයේ උඩලමත්ත ප්‍රදේශය සඳහා මෙලෙස කණ්ඩායම් යොදවා තිබේ.

ජාතික ගොඩනැගිලි පර්යෝෂණ සංවිධානය නාය යෑම් පිළීබඳ පූර්ව අනතුරු ඇඟවීමේ නිවේදනයක්ද නිකුත් කර තිබේ. ඒ අනුව බදුල්ල දිස්ත්‍රික්කයේ පස්සර සහ ඇල්ල ප්‍රාදේශීය ලේකම් කොට්ඨාසය , කොළඹ දිස්ත්‍රික්කයේ සීතාවක සහ පාදුක්ක ප්‍රාදේශීය ලේකම් කොට්ඨාසය කළුතර දිස්ත්‍රික්කයේ ඉංගිරිය , වලල්ලාවිට , දොඩංගොඩ , ගාල්ල දිස්ත්‍රික්කයේ නාගොඩ ,නෙළුව , යක්කලමුල්ල, කඩවත්සතර , අක්මීමන , කෑගල්ල දිස්ත්‍රික්කයේ රුවන්වැල්ල යටියන්තොට ගලිගමුව දැරණියගල වරකාපොල ප්‍රාදේශීය ලේකම් කොට්ඨාස රත්නපුර දිස්ත්‍රික්කයේ කිරිඇල්ල , ඇලපාත, නිවිතිගල , කුරුවිට ප්‍රාදේශීය ලේකම් කොට්ඨාස මාතලේ දිස්ත්‍රික්කයේ රත්තොට සහ උකුවෙල ප්‍රාදේශීය ලේකම් කොට්ඨාස මහනුවර දිස්ත්‍රික්කයේ ගඟවට කෝරළේ , උඩුනුවර , හාරිස්පත්තුව , යටිනුවර , දොලුව , උඩපළාත, පස්බාගේ කෝරළේ ප්‍රාදේශීය ලේකම් කොට්ඨාස නුවරඑළිය දිස්ත්‍රික්කයේ වලපනේ , අඹගමුව , හගුරන්කෙත , කොත්මලේ ප්‍රාදේශීය ලේකම් කොට්ඨාස කුරුණෑගල දිස්ත්‍රික්කයේ රිදීගම , මාවතගම , මල්ලවපිටිය ප්‍රාදේශීය ලේකම් කොට්ඨාසවල නායයෑම් පිළීබඳව විමසිලිමත්වන ලෙසට දැනුම් දී ඇත.තවද කළුතර දිස්ත්‍රික්කයේ මතුගම , බුලත්සිංහල , අගලවත්ත , පාලින්දනුවර , ගාල්ල දිස්ත්‍රික්කයේ බද්දේගම , ඇල්පිටිය, කෑගල්ල දිස්ත්‍රික්කයේ මාවනැල්ල , අරණායක , බුලත්කොාහුපිටිය , දෙහිඕවිට , රඹූක්කන, රත්නපුර දිස්ත්‍රික්කයේ අයගම . රත්නපුර , ඇහැලියගොඩ , කලවාන , මහනුවර දිස්ත්‍රික්කයේ ගග ඉහළකෝරළේ , කුරුණෑගල දිස්ත්‍රික්කයේ නාරම්මල යන ප්‍රාදේශීය ලේකම් කොට්ඨාස නාය යෑම් අවදානම් ප්‍රදේශ ලෙස නම් කර ඇත.

මේ වනවිට ජලාශ කිහිපයකද වාන් දොරටු විවෘතකර ඇත.රාජාංගනය ජලාශයේ වාන් දොරටු 2ක් අඩි 4බැගින් සහ දොරටු දෙකක් අඩි 4 බැගින්ද , දැදුරු ඔය ජලාශයේ වාන් දොරටු 4ක් අඩි 4 බැගින්ද ලක්ෂපාන ජලාශයේ එක් වාන් දොරටුවක් අඩියක් බැගින් ද කුකුළේගඟ ජලාශයේ වාන් දොරටු දෙකක්ද තබ්බෝව ජලාශයේ වාන් දොරටු දෙකක් අඩි දෙක බැගින් සහ දොරටු දෙදක් අඟල් 6 බැගින්ද පොල්ගොල්ල ජලාශයේ වාන් දොරටු හතරක් අඩි තුන බැගින් ද කොත්මලේ ජලාශයේ වාන් දොරටු තුනක්ද වික්ටෝරියා ජලාශයේ වාන් දොරටු හතරක් අඩි දෙකක් බැගින්ද අංගමුව ජලාශයේ වාන් දොරටු දෙකක් අඩි දෙකක් බැගින්ද විවෘත කර ඇත.එසේම නෝර්ටන්බ්‍රිජ් ජලාශය සහ මහවිලච්චිය වැව පිටාර ගලන අතර තුරුවිල ජලාශය වාන් දමමින් පවතී.

ඔක්තේබර් මස 29 වැනි දින සිට නොවැම්බර් මස 09 වැනි දින දක්වා කාලය තුළ අයහපත් කාලගුණික තත්වය බලපෑ දිස්ත්‍රික්කයන් 15ක ප්‍රාදේශීය ලේකම් කොට්ඨාස 77ක පවුල් 1836කට අයත් පුද්ගලයන් 7167ක් බලපෑමට ලක් වී ඇති අතර පුද්ගලයන් 6දෙනෙකු මිය ගොස් තිබේ.සුරක්ෂිත මධ්‍යස්ථාන 7ක් මේ වන විට ස්ථාපිත කර ඇති අතර එම ස්ථානවල පවුල් 58කට අයත් පුද්ගලයන් 222ක් ආරක්ෂිතව සිටී.නිවාස 14ක් මේ වනවිට පූර්ණ ලෙස හානි වී ඇති අතර අර්ධ හානි නිවාස සංඛ්‍යාව 796කි.