රටේ ඇතිවී තිබෙන සෞඛ්ය තත්ත්වය පිළිබඳව රජය දැඩි අවධානයෙන් සිට ජනතාව ආරක්ෂා කිරීම වෙනුවෙන් කටයුතු කරන බව අගමැති මහින්ද රාජපක්ෂ මහතා ප්රකාශ කළේය.
මේ දිනවල නැවතත් කොරෝනා රෝගීන් වාර්තා වෙමින් තිබුණ ද පළමු අවස්ථාවේ දී මෙන්ම එම වසංගතය පාලනය කර ජනතාවගේ උපරිම ආරක්ෂාව වෙනුවෙන් ගත යුතු සෑම පියවරක්ම ගන්නා බවත් අගමැතිවරයා පැවසීය.
අගමැති මහින්ද රාජපක්ෂ මහතා මේ බව ප්රකාශ කළේ මාධ්ය ආයතන ප්රධානීන් සමඟ අරලියගහ මන්දිරයේ දී ඊයේ (16) සාකච්ඡාවකට එක්වෙමිනි.
අගමැතිවරයා එහිදී මෙසේද ප්රකාශ කළේය.
කොවිඩ් වසංගතය මුලින්ම ආපු වෙලාවේ ඒක පාලනය කරන්න පුළුවන් වුණා. කොරෝනා මර්දන ජනාධිපති කාර්ය සාධක බළකාය, අත්යවශ්ය සේවා ජනාධිපති කාර්ය සාධක බළකාය, රාජ්ය අංශය, සෞඛ්ය අංශ, යුද හමුදාව ඇතුළු ත්රිවිධ හමුදාව, පොලීසිය කැපවීමෙන් කටයුතු කළා. විශේෂයෙන්ම බුද්ධි අංශ සහ සෞඛ්ය අංශ කරපු කැප කිරීම මෙහිදී මතක් කරන්න ඕනෑ.
මේ දවස්වල කොරෝනා වැලඳුණු අය හමුවෙමින් පවතිනවා. ඒ සම්බන්ධව ඔබට මෙතැනින් විශේෂඥයන් පැහැදිලි කරාවි. අපි සැමවිටම ජනතාවගේ ආරක්ෂාව වෙනුවෙන් කටයුතු කරපු උදවිය. ඇති වී තිබෙන තත්ත්වය පිළිබඳවත් අපි දැඩි අවධානයෙන් ඉන්නේ. ඒ නිසා ඉදිරියේ දී ජනතාව ආරක්ෂා කිරීම වෙනුවෙන් අපි කටයුතු කරනවා.
මැතිවරණ කාලයක් නිසා දෙවැනි රැල්ලක් ඇවිත් කියලා ප්රචාරය කරන්න මැතිවරණ වේදිකාව භාවිතා කරමින් තිබෙනවා. ජනතාව බිය වැද්දීම අනවශ්ය බියක් ඇති නොකර කටයුතු කිරීම අපේ වගකීමක්.
එහිදී මාධ්යවේදීන් නැගූ ප්රශ්න සහ ඒවාට ලැබුණු පිළිතුරු මෙසේය.
මාධ්ය – සෞඛ්ය මාර්ග උපදේශන ගැසට් නොකිරීම මැතිවරණයට බාධාවක් වෙන්න පුළුවන් කියලා මැතිවරණ කොමසාරිස්වරයා කියනවා.
අගමැති – ඇත්තටම ඒ ගැසට් එක නිකුත් කරන්න සූදානම් වෙමින් තිබෙනවා.
සෞඛ්ය ඇමැතිනී පවිත්රා වන්නිආරච්චි මහත්මිය – මැතිවරණයට අදාළ මාර්ගෝපදේශ ගැසට් කරන්න සූදානම්. හෙට හෝ අනිද්දා වන විට ගැසට් පත්රය නිකුත් වෙයි.
මාධ්ය – මැතිවරණට අදාළ සෞඛ්ය උපදෙස් විතරයිද ගැසට් කරන්නේ?
සෞඛ්ය ඇමැතිනිය – මැතිවරණ කොමිසම මූලික උපදේශන ගැසට් කරන්න කියලා ඉල්ලීමක් කර තියනවා. මැතිවරණ කොමිසම ඉල්ලීම් කර තියෙන මැතිවරණයට අදාළ මාර්ගෝපදේශනවලට මූලිකත්වය දීලා ඒ ගැසට්පත්රය නිකුත් කිරීමෙන් පස්සේ අවශ්ය සෞඛ්ය උපදේශන සියල්ලක්ම ගැසට් කරන්න පියවර ගන්නවා. මැතිවරණ කොමිසම ලිඛිතව ඉල්ලා තිබෙන මාර්ගෝපදේශන නීතිපතිවරයාගේ උපදෙස් පරිදි ගැසට් කරන්න පියවර ගන්න කියා ජනාධිපති ලේකම්වරයාත් දැනුම් දී තියෙනවා. ඒ නිසා ඒකට අපි මූලිකත්වය දීලා තියෙනවා.
මාධ්ය – ශ්රී ලංකා පොදුජන පෙරමුණ මැතිවරණ රැලි පැවැත්වීම නතර කළත් කොරෝනා තත්ත්වයත් එක්ක මැතිවරණ රැලි පැවැත්වීම භයානකයි නේද?
අගමැති – සමාජයේ කොරෝනා වයිරසය සම්බන්ධයෙන් ඇතිවුණු යම් යම් මතවාද එක්ක ශ්රී ලංකා පොදුජන පෙරමුණ මැතිවරණ රැලි පැවැත්වීම දින තුනකට නතර කළා. සෞඛ්ය නීතිරීති පිළිපදිමින් අපි අද සිට නැවතත් මැතිවරණ රැලි පැවැත්වීම ආරම්භ කරනවා.
මාධ්ය – යම් යම් පළාත් වසා දමන්න අවශ්ය වුණත් මහාමැතිවරණය නිසා ඒ ප්රදේශවල වසා දමන්නේ නැතිව සිටිනවා කියලා චෝදනාවක් රජයට එල්ල වෙමින් තිබෙනවා?
අගමැති – රටේ එවැනි අවශ්යතාවක් නැහැ.
සෞඛ්ය සේවා අධ්යක්ෂ ජනරාල් අනිල් ජයසිංහ මහතා – රෝගීන් හැම දිස්ත්රික්කයකම පැතිරිලා කියලා කටකතාවක් යනවා. එවැනි තත්ත්වයක් නැහැ. විසි පස්දෙනෙක් විතරයි බාහිරින් හඳුනාගෙන තියෙන්නේ. ඒ අතරට කුණ්ඩසාලේ නිලධාරියාගේ පවුලේ උදවියත් අයත් වෙනවා. සාමාන්යයෙන් එක් පුද්ගලයකුගෙන් ස්පර්ශකයන් 20ක් කියලා ගණන් තියලා. ඒ සියලුදෙනාම නිරෝධායනයට ගෙනයාම තමයි සිද්ධවෙන්නේ. ඒ විදිහට නිරෝධායනයට යම් යම් පිරිස් ගෙනයාම නිසා මෙවැනි ප්රචාර සිදුවෙනවා ඇති. නිරෝධායනය සඳහා ගෙන යනවා කියන්නේ ඔවුන් කොවිඩ් ආසාධිතයන් කියන එක නෙමෙයි. ඒ අයව කොවිඩ් වයිරසය ආසාදනය විය හැකියි කියලා අනුමාන කර නිරෝධායනය කරන එකයි සිද්ධ වෙන්නේ. සමහර අවස්ථාවල නිරෝධායනයේ සිටින අතරේ ඔවුන් ආසාධිතයන් බව තහවුරු වුණු අවස්ථා තිබෙනවා. කිසියම් තැනක වයිරස පැතිරීමක් සිද්ධ වෙනවා නම් අපි ඒ පැතිරීම වළක්වා ගන්න තමයි ප්රදේශයක් ලොක් කරන්නේ. සමාජ මාධ්ය මගින් තමයි බොහෝ වැරැදි ප්රචාර සිද්ධ වෙන්නේ.
මාධ්ය – රජයේ වෛද්ය නිලධාරීන්ගේ සංගමය පී.සී.ආර් පරීක්ෂණ සිදුකිරීම ප්රමාණවත් නැති බව කියනවා?
සෞඛ්ය සේවා අධ්යක්ෂ ජනරාල් වෛද්ය අනිල් ජාසිංහ – මේ වෙන කොට පී.සී.ආර් පරීක්ෂණ එක් ලක්ෂ තිස්දාහක් සිදුකර තියෙනවා. මාර්තු මාසේ දිනක් ඇතුළත පරික්ෂණ අසූ දෙකක් සිදුකළා. අප්රේල් මාසයේ දිනකට 682ක් සිදුකළා. මැයි මාසය වන විට දිනකදී පරීක්ෂණ 1393 කළා. ජුනි මාසයේදී පී. සී. ආර් පරීක්ෂණ 1422 සිදුකළා. ජුලි මාසය වන විට අපි දැන් පී. සී. ආර් පරීක්ෂණ 1466 ක් සිදුකරනවා. අපි පරීක්ෂණ කිරීමේ වේගය වැඩිකර තියෙන ආකාරය එයින් පේනවා.
ඒ වගේම අපිට පළමුවෙනි පී.සී.ආර් පරීක්ෂණ ලක්ෂය කරන්න අපිට දින 95ක් ගත වුණා. දෙවෙනි පරීක්ෂණ ලක්ෂය කරන්න ගතවුණේ දින 24යි. ඒකෙනුත් පැහැදිලි වෙන්නේ අපේ පී.සී.ආර් පරීක්ෂණ කිරීමේ වේගය ඉහළ ගිහින් තියන බවයි.
ඒ වගේම දකුණු කොරියාවත් එක්ක ශ්රී ලංකාවේ සමාන කරන්න එපා. දකුණු කොරියාවට මහජන සෞඛ්ය වැඩපිළිවෙළක් නැහැ. රෝහල් තියෙනවා විතරයි. ශ්රී ලංකාවට මහජන සෞඛ්ය වැඩපිළිවෙළක් තියෙනවා. මහජන සෞඛ්යය පරීක්ෂණ සේවය සම්පූර්ණයෙන්ම කොවිඩ් පාලනය කරන්න මැදිහත්වෙලා සිටිනවා.
මාධ්ය – රජය පැවති නිලධාරීන්ගේ සංඛ්යාව කියන්නේ දවසකට පන්දාහක් කරන්න ඕනෑ කියලා
සෞඛ්ය සේවා අධ්යක්ෂ ජනරාල් වෛද්ය අනිල් ජාසිංහ – අපි කවදාවත් සංඛ්යාත්මක දේවල් ගැන විශ්වාසය තිබ්බේ නැහැ. මේ වෙනකොට අවශ්ය නම් පරීක්ෂණය හාරදහසක් සිදුකිරීමේ තත්ත්වයක් අපිට තිබෙනවා.
මාධ්ය – ජයවර්ධනපුර විශ්ව විද්යාලය පී.සී.ආර් පරීක්ෂණ නැවැත්වීම ගැන මේ දිනවල කතා වෙනවා?
සෞඛ්ය සේවා අධ්යක්ෂ ජනරාල් වෛද්ය අනිල් ජාසිංහ මහතා – මේක ඉතාම හොඳ ප්රශ්නයක්. ශ්රී ජයවර්ධනපුර විශ්වවිද්යාලය පහුගිය කාලේ කොරෝනා වසංගතය සම්බන්ධයෙන් පරීක්ෂණ පවත්වන අවස්ථාවේ සෑහෙන උදව් කරපු ආයතනයක්. අපි කරන්නේ රටට වගකියන වැඩපිළිවෙළක්. ඒ වැඩපිළිවෙළේදී අපිට හැමෝවම සතුටු කරන්න ලැබෙන්නේ නැහැ.
කාලයක් රෝගීන් වාර්තා නොවන තත්ත්වයක් තිබුණා. ඒ අවස්ථාවේ යම් පුද්ගලයෙක් රෝගියෙක් කියන්න කලින් අපේ දෙවරක් සිතා බලනවා. මේ සම්බන්ධයෙන් ඇති වූ යම් ප්රශ්නයක් නිසා හේතුවෙන් ජයවර්ධනපුර විශ්ව විද්යාලය පරීක්ෂණ පැවැත්වීමෙන් ඉවත් වෙන්න තීරණය කරලා තියනවා.
ඇමැති බන්දුල ගුණවර්ධන මහතා – ජයවර්ධනපුර විශ්වවිද්යාලය පරීක්ෂණය පහුගිය කාලයේ පරීක්ෂණ 12000 ට වඩා කළා. අපි ඒ සම්බන්ධයෙන් විශ්වවිද්යාලයට අපේ ස්තූතිය පළ කරනවා.
සෞඛ්ය ඇමැතිනී පවිත්රා වන්නිආරච්චි මහත්මිය – ජයවර්ධනපුර විශ්වවිද්යාලය තමන්ගේ ජීවිතය ගැන අවදානමක් අරගෙන පහුගිය කාලයේ දිගින් දිගටම පරීක්ෂණ කරන්න දායකත්වයක් ලබා දුන්නා. අපි ඒක අගය කරනවා.
අගමැති – රෝගීන් නොවන පුද්ගලයෙක් රෝගියෙක් කියලා ප්රකාශ කරන එක ඇත්තටම පුද්ගලයකුට කරන හානියක්.
මාධ්ය – නිරෝධායන මධ්යස්ථානයක සිටින අය සමාජගතවීමක් නේද පහුගිය දවස්වල සිද්ධ වෙලා තියෙන්නේ? මේ චෝදනාවත් එක්ක රෝහල්වල නිරෝධායන මධ්යස්ථානවල වැඩකරන අය සම්බන්ධයෙන් ජනතාවට බියක් ඇති වෙනවා.
හමුදාපති ශවේන්ද්ර සිල්වා මහතා – නිරෝධායන මධ්යස්ථානවල නිරෝධායන කටයුත්ත නිවැරැදිව සිදු වෙලා නැහැ කියා ඔබතුමා කියනවානම් ඒ කතාව පිළිගන්න බැහැ. නිරෝධායන මධ්යස්ථානයකින් පිටත්වුණු. පුද්ගලයන් අතරෙන් රෝගීන් වාර්තාවීමක් වෙලා නැහැ. පුනරුත්ථාපන මධ්යස්ථානයකින් එළියට ගිය අය අතරින් යම් බෝවීමක් තමයි සිද්ධවෙලා තියෙන්නේ.
ප්රථම වතාවට කන්දකාඩු ප්රතිකාර හා පුනරුත්ථාපන මධ්යස්ථානයෙන් රෝගින් වාර්තා වුණේ. ඒකෙන් තමයි අපි දැනගන්නේ මූලාශ්රය කන්දකාඩු බව. උපදේශන සඳහා පිටතින් පැමිණ ගෙවල්වලට යන අයත් ඒ අතර හිටියා. පළමු පුද්ගලයා වාර්තාවීමත් සමඟ අපි සියලු දෙනා නිරෝධායනයට අරන් පවුල්වල අයත් නිරෝධායනයට යොමු කළා. පසුව ඔවුන් සම්බන්ධයෙන් පී.සී.ආර් පරීක්ෂණ කර ඒ අය අතර කොරෝනා වයිරස ආසාධිතයන් සිටිනවාද කියා තහවුරු කරගන්නවා. දින කීපයක් ඇතුළත අපි තත්ත්වය සම්පූර්ණයෙන්ම අපේ පාලනයට අරගෙන තියෙනවා.
සෞඛ්ය ඇමැතිනී පවිත්රා වන්නිආරච්චි මහත්මිය – දින දාහතරක් ඇතුළත රෝග ලක්ෂණ මතු වෙනවා කියන එකයි සාමාන්යයෙන් විශේෂඥ වෛද්යවරුන්ගේ මතය. උපදේශකයන් සමාජයට ගිහින් දින 14 ක කාලය මේ වන විට පසු වෙමින් තිබෙනවා. ඒ අයගෙන් රෝගය සමාජයට බෝවුණානම් මේ වන විට රෝගීන් වාර්තාවීම ආරම්භ වෙලා තියෙන්න ඕනෑ.
මාධ්ය – පුනරුත්ථාපන කඳවුරේ එකවර මෙවැනි සිදුවීමක් වුණේ කොහොමද?
හමුදාපති ශවේන්ද්ර සිල්වා මහතා – බොරැල්ල සහ කොළඹ ආසාදිතයන් හා සම්බන්ධ පිරිස් අපි නිරෝධායනය කළේ ස්ථාන දෙකක. කන්දකාඩු ගල්කන්ද සහ මුලතිව් කියන ස්ථානවල. ඒ අය නිරෝධායනයෙන් පස්සේ සමාජගත කරනවා ද හොඳ පුරවැසියන් බවට පත් කරන්න කටයුතු කරනවා ද කියන තර්කය මතු වුණා. මත්ද්රව්යයට උපරිමයෙන් ඇබ්බැහි වූ අයයි එතැන හිටියේ. ඒ අනුව නැවත අධිකරණ තීන්දුවක් අරන් ඔවුන් මේ කඳවුරට යොමු කළා. බොහෝ දුරට මේ අය අතරින් පසුකාලීනව රෝග ලක්ෂණ මතුවීමෙන් මේ මතුවීම සිදුවුණා වෙන්න පුළුවන්.
මාධ්ය – පුනරුත්ථාපන කඳවුර ආශ්රිතව නිරෝධායන මධ්යස්ථානයක් තියෙනවා නේද?
හමුදාපති ශවේන්ද්ර සිල්වා මහතා – ඔව්. ඒ නිරෝධායන මධ්යස්ථානයයි මේ පුනරුත්ථාපන කඳවුරයි අතර සම්බන්ධයක් නැහැ. මේ කඳවුරුවලට ආරක්ෂාව යොදවලා තියෙන්නේ. කිසිසේත්ම කඳවුරු අතර සම්බන්ධතාවක් ඇති වෙන්නේ නැහැ.
මාධ්ය – මේ මොහොතේ, මේ සම්බන්ධයෙන් අලුත්ම තත්ත්වය කොහොමද?
සෞඛ්ය සේවා අධ්යක්ෂ ජනරාල් වෛද්ය අනිල් ජාසිංහ මහතා – වයිරස ආසාදිත රෝගීන් සංඛ්යාව 2673ක්. මේ අවස්ථාවේ රෝගීන් 650ක් ප්රතිකාර ලබමින් සිටිනවා. රෝගීන් සංඛ්යාව 150ක් පමණ වන අවස්ථාවක තමයි අපි මේ තත්ත්වයට නැවත මුහුණ දුන්නේ.කන්දකාඩු පොකුරේ රෝගීන් 553ක් ඉන්නවා. ඒ කඳවුරේම ප්රතිකාර කිරීම් ආරම්භ කර තියෙනවා. ඔවුන් ඉතා හොඳ ශාරීරික මානසික තත්ත්වයකින් සිටින බව වෛද්යවරුන් දැනුම් දී තියෙනවා. ඒ කඳවුරට අලුතෙන්ම වෛද්යවරුන් හෙදියන් සේවයට යොදවා තියෙනවා. කිසියම් ස්වසන අපහසුතාවක් තියෙනවානම් වහාම වැලිකන්ද රෝහලට යොමු කරන්න අවශ්ය කටයුතු, ප්රවාහන පහසුකම් සලස්වා තියෙන්නේ.
ඒ සමඟම විශේෂයෙන් කිවයුතු දෙයක් තියෙනවා. පසුගිය දින කිහිපයේ කන්දකාඩු පොකුර ආශ්රීතවත් පී. සී. ආර් පරීක්ෂණ හාරදාහක් කර තියෙනවා. අපි දෛනිකව නියැදි අරගෙන පී.සී.ආර් පරීක්ෂණ සිදුකරමින් තිබෙනවා. රජයේ සහ පෞද්ගලික අංශවල සේවකයන් විශාල සංඛ්යාවක් සිටිනවා. සමහර ආයතනවල සේවකයින් පන්සීයකට වඩා වැඩි පිරිසක් සිටින අවස්ථා තිබෙනවා. දුරස්ථභාවය ස්වසන පුරුදු පවත්වාගෙන යාම ආයතන ප්රධානීන්ගේ මැදිහත්වීමෙන් සිදුකරන්න කියලා අපි දැඩි ලෙස ඉල්ලා සිටිනවා. සමාජ සම්ප්රේෂණයක් අද සිදුනොවුණුත් ඉදිරියේදී එවැනි තත්ත්වයක් ඇති වීම වළක්වා ගන්නයි මේ පියවර අනුගමනය කළ යුතු වෙන්නේ. වයිරසය අපේ වටේ තිබුණත් අපි ආරක්ෂාකාරී නම් ඒ වයිරසය ආසාදනය වෙන්නේ නැහැ. එක් එක් ආයතනවල මුදල්, ආයතන ආදී වශයෙන් අංශ කිහිපයක් සේවය කරනවා. ඒ අංශ වෙන් වෙන් වශයෙන් කටයුතු කරනවා නම් වඩාත් සුදුසුයි. වයිරසය කොහෙන් හෝ බෝවීමක් සිදුවෙලා කෙනෙකුට හැදුණොත් පාලනය කර ගැනීමේ හැකියාව ලැබෙන්නේ ඒ විදියට කටයුතු කළොත් විතරයි.
මාධ්ය – මේ සම්බන්ධයෙන් රජයේ වෛද්ය නිලධාරීන්ගේ සංගමයේ අදහස මොන වගේද ?
විශේෂඥ වෛද්ය අනුරුද්ධ පාදෙණිය – මේක නිවාරණ සෞඛ්ය ක්ෂේත්රය සම්බන්ධයෙන් හදිසි තත්ත්වයක්. අපි රෝගින් කළමනාකරණය කරගන්න ඕනෑ. දේශපාලන නායකත්වය, සෞඛ්ය ධාරිතාව කළමනාකරණය හා මහජනතා දායකත්වය කියන දේවල් වයිරසය පාලනය කිරීමට වැදගත් වෙනවා. විශේෂයෙන් කියන්න ඕනෑ මේ රෝගය සම්බන්ධයෙන් මියගිය අයගෙන් සියයට 96. 2 ක්ම බෝ නොවන රෝග වැළදී සිටි අය. ඒ කියන්නේ බෝ නොවන රෝග තමයි බෝවන රෝගවලට පසුබිම් වෙන්නේ.
අගමැති – මෙවැනි අවස්ථාවක දේශපාලනයට වඩා ජනතාවට සංවේදීව කටයුතු කරන්න කියා ඉල්ලා සිටිනවා. ජනතාව බියවෙන ආකාරයට කැළඹීම් ඇතිවන ආකාරයට කටයුතු කරන්න සුදුසු තත්ත්වයක් නොවෙයි මේක.
මාධ්ය – වයිරස තත්ත්වය සම්බන්ධයෙන් දේශපාලන පක්ෂ නායකයන් ගෙන්වලා දැනුවත් කිරීමක් කරන්න බැරිද ?
අගමැති – මේ අවස්ථාවේ මැතිවරණයක් තියෙනවා. ඒ නිසා ආරාධනා කළත් එන්නේ නැහැ. අපි ඉල්ලා සිටිමු කොවිඩ් වයිරසය මැතිවරණ වේදිකාවේ දේශපාලන මාතෘකාවක් කරගන්න එපා කියලා.
මාධ්ය – මහත් අභියෝග මැද මෙවර මහ මැතිවරණයෙන් තුනෙන් දෙකක බලයක් ඔබ ඉල්ලා සිටිනවා?
අගමැති – මේ පාර අපි බලාපොරොත්තු වෙන්නේ තුනෙන් දෙකක බලයක් තමයි.
මාධ්ය – මැතිවරණ ප්රතිඵලය ගණන් කිරීමේ වෙනසක් සිදු වෙලා තියෙනවා?
අගමැති – ඔව්. වෙනදා වගේ නෙමෙයි මේ පාර. මැතිවරණ ප්රතිඵල ගණන් කරන්නේ. මැතිවරණ කොමිසම තමයි නිසි බලධාරියා. දවස් දෙකක් ප්රමාදවෙලා ගණන් කරමු කිව්වත් අපට බලන් ඉන්න සිද්ධ වෙනවා.
