Blog

වික්ටර් රත්නායකයන් නැවත විවාහ වූ පුවත කනින් කොනින් ආරංචි වූ නිසා මා ඔහුගේ දුරකථන අංකය කැරකවූවා. දුරකථනයට පිළිතුරු දුන්නේ වික්ටර් රත්නායකයන්ගේ යොවුන් ප්‍රිය බිරිය හෂිනි අමේන්ද්‍රා රත්නායක මහත්මියයි.

මා මීට ටික දිනකට පෙරාතුව ‘දෛව රේඛාව’ විශේෂාංගයෙන් ඔහු ගැන ලියන්නට ඔරුවල අතුරුගිරිය වික්ටර් රත්නායකයන්ගේ නිවසට යනවිට ඇයද නිවසේ සිටියා. අපහට තේ පිළියෙල කර දුන්නේ ද ඇයයි. ඒ සිදුවීම සිහිපත් කරමින් “ඔයා එදා අපි එද්දි හිටිය හෂිනි ද?“ මම දුරකථනයෙන් විමසා සිටියා.

“ඔව්. ඔව්. ඒ මම තමයි.”

“එදා මේ ගැන මුකුත් ම කීවෙ නැහැනේ.” මම විමසුවා. එතකොට ඇය මෙහෙම කීවා.

“අපි අතර ආදර සම්බන්ධය හුඟාක් කාලෙක පටන් තිබුණු දෙයක්. ළඟදි විවාහ වූ කතාව ඇත්තයි. විවාහය ඉක්මන් වුණේ වික්ටර් රත්නායකයන්ගේ දරුවන්ගේ බලපෑම් නිසයි.

මගේ ගම ගාල්ල කන්දෙවත්ත. මහජන බැංකුවේ නිලධාරිනියක් ලෙසට ඒ කාලේ කටයුතු කළේ. මම කලින් විවාහ වෙලා හිටියා. ටික කලකින් ඒ විවාහයෙන් දික්කසාද වෙන්න සිදුවුණා. රසිකාවියක් විදිහට තමයි මම මුලින් ම වික්ටර් රත්නායක සර්ව හඳුනාගත්තේ. කාලයක් තිස්සේ ක්‍රම ක්‍රමයෙන් අපේ හිත් ආදරයෙන් බැඳුණා.

මගේ මවුපියන් පවා මේ සම්බන්ධයට තදින්ම විරුද්ධ වෙලා හිටියා. ඒත් අ‍පේ සිත් නොසැලී තිබුණා. මම ඔහුට ආදරෙයි. ඔහුත් මට ආදරෙයි. අපි අතර ලොකු වයස් පරතරයක් තිබුණත් ඒක ආදරයට, විවාහයට බාධාවක් නැහැ. අපි අවබෝධයෙන්, ආදරයෙන් ඉන්නවා.

මුල් යුගයේ අපි පවුල් වශයෙන් එකතුයි. මට අක්කලා දෙන්නෙක් ඉන්නේ. වික්ටර්ගෙයි, මගෙයි සම්බන්ධය ඉව වැටුණාම, ගෙදර අය තදින්ම විරුද්ධ වුණා. අවුරුදු 6ක් විතර වෙනවා අපේ සම්බන්ධයට. මගේ අම්මා කියලා තියනවා මම පුංචි කාලේ ඉඳලා ම වික්ටර්ගේ ගීතවලට ආසයි කියලා. මට අවුරුදු 31ක්. වික්ටර්ට අවු: 75 යි. ඒත් වයස් පරතරයක් ගැන මට දැනෙන්නේවත් නැහැ. ඒ තරමට අපි බැඳීමෙන් ඉන්නේ.

මුලින් මගේ හිතේ ඇති වුණේ ඔහු ගැන භක්තියක්, ගෞරවයක්, මම අපරදිග සංගීතය හැදෑරුවා. දේශීය සංගීතයටත් ගොඩක් ප්‍රියයි. මම වික්ටර්ට ළංවුණේ නොදැනුවත්වම. ඒ ඇසුර ආදරයකට පෙරළුණා. කවුරුන් විරුද්ධ වුණත් අපි නොසැලී හිටියා. දැන් අපි විවාහවෙලා, අපේ සම්බන්ධයට විරුද්ධ අය වගේ ම මිතුරු සිතින් අවංකව ම සුබ පතලා ආශිර්වාද කරන අයත් ඉන්නවා.

මම කාලයක් තිස්සේ වික්ටර්ව ඇසුරු කළ නිසා ඔහු මොනතරම් සංවේදී හිතක් තියන කෙනෙක් ද කියා හොඳින් ම දන්නවා. සංසාරෙ යම් බැඳීමක් තියෙන්න ඇති ඒකනේ මේ වගේ බැඳුණේ.

වයස්…. පරතරය… ගැන ගැටලුවක් නැද්ද…?

ලංකාවෙ විතරක් නෙමෙයි පිටරටවලත් කලාකරුවෝ විතරක් නෙමෙයි හුඟාක් වයස් පරතරය වැඩි අය ආදරයෙන් බැඳිලා ඉන්නවා. අපි ජීවිතය හරි සතුටින් ගෙවන්නේ. එයා වගේ කෙනෙක් ලැබීම මගේ ජීවිතයේ භාග්‍යයක් සේ සලකනවා.

අනික වික්ටර්ගේ බිරිය නැතිවෙලා අවුරුදු 13කටත් වැඩියි. දරුවන්ගේ යුතුකම් ඉටුකරලානේ තියෙන්නේ. ඉතිං මම හිතන විදියට කාටවත් කිසිම ගැටලුවක් නැහැ.

හෂිනිට… වික්ටර් ගැන තියෙන්නේ ආදරයක් ද? ගෞරවයක් ද? භක්තියක් ද? නැත්නම් මේ හැම දේකම සම්මිශ්‍රනයක් ද?

ඔව් හැමදෙයකම සම්මිශ්‍රනයක් කීවොත් නිවැරැදියි. මම එයාට හොඳින් සලකනවා.

ඔයාගේ අනාගතය ගැන බලද්දි වික්ටර් සමඟ විවාහවීමේ තීන්දුව නිවැරැදියි කියා හිතනවද?

මගේ අනාගතයටත් වඩා මම හිතන්නේ එයාගේ සුව පහසුවයි. එයාට සලකන එක මට ලොකු සතුටක්. මම කැපවීමෙන්මයි ඒ දේවල් කරන්නේ. වික්ටර්, හැම තිස්සෙ ම පන්සල් ගියේ නැතිවුණාට ආගමික කටයුතුවලට ගොඩක් කැම­ැතියි. හදවතේ බෞද්ධ දර්ශනය පිහිටලා තියනවා එයාගේ. කවුරු මොනවා කීවත් අපි අවබෝධයෙන් සෙනෙහසින් ඉන්නේ.

මේ තරමට බාධා – ගැටුම් එන්නේ අසම්මත ප්‍රේමයක් වූ නිසාද?

ආදරයට, ගැටුම්, බාධා එමටයි. අපි දෙන්නට එක්වෙන්න නීතිමය බාධාවක් නැහැනේ. සිතුම් පැතුම්, අදහස් සමාන නම් දෙදෙනා අතර ගැටුමක් නැත්නම් ආදරය ජයගන්න පුළුවනි.

වික්ටර් නැවත විවාහ වෙන බවක් එදා ‘දෛව රේඛාව’ ලිපියෙදි කියවුණේ නැහැ. අඩුගාණේ මේ ගැන හඳහනේවත් සඳහන් වෙලා තිබුණද?

මට මතකයි මීට ටික කලකට පෙර ඉන්දියාවෙන් ආපු ජ්‍යොතිෂඥයෙක් හමුවන්න අපි බම්බලපිටියට ගියා. ඒ ගියෙත් මගේ ඉල්ලීමටමයි. ඔහු අපිට සියලු විස්තර සී.ඩී. පටියකින් කියලා දුන්නා.

ඒකේ කියවෙනවා වික්ටර්ගේ ජීවිතයේ හොඳම සුවබර, සැපවත් කාලය උදා වෙන්නේ ඔහුට අවුරුදු 70න් පසු කියලා. වික්ටර්ගේ හස්ත රේඛා පරීක්ෂා කළ දෛවඥයෙක් තමයි මේ අනාවැකිය පළකළේ. ඒක අද වන විට ඇත්ත වෙලා.

අපි කිසිම මාධ්‍යයකට කිසිම දෙයක් ප්‍රකාශ කළේ නැහැ. මේ දේවල් කතා කරන්න වික්ටර් කැම­ැතිත් නැහැ. මේක අපේ මනාපය. සමහර මාධ්‍ය මඩ ගැසීමේ අරමුණින් විවිධ දේ පළකරනවා. විවිධ දේ කියනවා.

ඒත් අපි සිළුමිණ – රසඳුන ගැන විශ්වාස කරන නිසයි මේ දේවල් වුණත් බය නැතිව කීවේ. නැත්නම් විවාහය කියන්නේ දෙන්නෙක් අවබෝධය තුළින් ගැනෙන පෞද්ගලික තීන්දුවක්.

-සිළුමිණ – රසඳුන-

පසුගිය සතියේ ‘රිද්ම’ සමග සංවාදයකට එක්වූ චිත්‍රපට අධ්‍යක්ෂ ලුවී වැන්ඩස්ට්‍රාටන් සිංහල සිනමාවේ එක්තරා යුගයක සැඟවුණු තොරතුරු රැසක් හෙළිදරව් කළා. ඇගේ වෛරය චිත්‍රපටයේ ප්‍රධාන චරිතය රඟපාන්න හිටියේ විජය කුමාරණතුංගයි. බොරු නම් එහි ප්‍රධාන නිළිය වූ චන්දි රසිකාගෙන් අහලා බලන්න ඔහු එහෙමත් කිව්වා. මේ ගැන චන්දි රසිකාගේ ප්‍රතිචාරය මොනවාගේදැයි දැනගන්නත් එක්ක ඇය සමග සංවාදයට එක්වූ විට ඇයටත් තමන් ගැන කියන්න වෙනස්ම විදිහේ කතාවක් තිබුණා.

චන්දි රසිකා ආන්දෝලනාත්මක චරිතයක් බවට පත්වුණේ ‘ඇගේ වෛරය’ චිත්‍රපටයේ රගපෑමෙන් පසුවයි කියලා කීවොත් හරිද?

ඒක ඇත්ත වෙන්න පුළුවන්. හැබැයි ඒ චිත්‍රපටය නිසා මගේ ප්‍රතිරූපයට විශාල හානියක් සිද්ධ වුණා.

නමුත් කැමැත්තෙන් නේද ඔබ ඒ චිත්‍රපටයේ රඟපෑවේ?

ඔව්. මොකද, ඒක සමාජයට පණිවුඩයක් ලබාදෙන විදිහේ චිත්‍රපටයක්. නමුත් නිෂ්පාදකවරයා මටත් හොරෙන් චිත්‍රපටයට නිරුවත් දර්ශන එකතුකරලා තිබුණු නිසා හැමෝම හිතුවා මමයි ඒ දර්ශනවලටත් පෙනී සිටියේ කියලා.

‘ඇගේ වෛරය’ අධ්‍යක්ෂ ලුවී වැන්ඩස්ට්‍රාටන් පසුගිය සතියේ ‘රිද්ම’ට හෙළි කළා, එම චිත්‍රපටයේ ප්‍රධාන නළුවා විදිහට රඟපාන්න හිටියේ විජය කුමාරණතුංගයි කියලා. ඇත්තද ඒ කතාව?

ඒක ඇත්ත. මගේ ජීවිතයේ හැමදෙයක්ම කඩාවැටෙන්න පටන්ගත්තෙත් විජයගේ අභාවයෙන් පස්සේ තමයි.

‘ඇගේ වෛරය’ ලබපු ජනප්‍රියත්වයෙන් ඔබට සෙතක් වුණේ නැහැ කියලද ඔබ ඔය කියන්නේ?

ඔව්. මට කරපු රැවටීම නිසා අතේ තිබුණු හැම සතයක්ම වියදම් කරලා චිත්‍රපටයේ නිෂ්පාදකවරයාට එරෙහිව මට නඩු මගට යන්න සිද්ධ වුණා. ඒ සිදුවීම නිසා කාලයක් මම කලාවෙන් ඈත්වෙලා හිටියා. මානසිකවත් ඇදවැටිලා මම අසනීප වුණා. විජය ජීවත්ව සිටියා නම් මේ ගැටලුවේදී මා වෙනුුවෙන් පෙනී ඉන්නවා. ඇගේ වෛරය’ නිසා මට පාඩුවක් මිස ලාභයක් නම් වුණේ නැහැ.

චිත්‍රපටය සාර්ථකවෙද්දි ඔබට විතරක් පාඩුවුණේ කොහොමද?

‘ඇගේ වෛරය’ මුලින්ම නිෂ්පාදනය කරන්න හිටියේ මමයි. වැඩේ කරගෙන යද්දි මුදල් ටිකක් මදිවුණු නිසා තමයි මටයි ලුවිටයි වෙනත් නිෂ්පාදකවරයෙක් සොයාගන්න සිදුවුණේ. 1980 ගණන්වල වැඩ ආරම්භ කරපු ‘ඇගේ වෛරය’ අනූපහ වසරෙදියි ප්‍රදර්ශනය කළේ.
නිෂ්පාදනය සඳහා එතෙක් මට වැයවුණු මුදල්වලින් සතයක්වත් මට දුන්නේ නැහැ. චිත්‍රපට දෙකේ රඟපෑම වෙනුවෙන් දෙන්න ‍පොරොන්දු වූ රුපියල් ලක්ෂ දෙක විතරයි ලැබුණේ.

මේ ගැටලුවේදී කලාකරුවන්ගෙන් ඔබට හයියක් ලැබුණේ නැද්ද?

නැහැ. ජීවන් කුමාරණතුංගත් එක්ක මම රඟපාලත් තියෙනවා. එදා ඇමැතිවරයෙක් විදිහට හිටපු ඔහුවත් මගේ උදවුවට ආවේ නැහැ. චිත්‍රපටයේ නිෂ්පාදකවරයා අද චිත්‍රපට හෝල් 17ක පමණ හිමිකරුවෙක්. නමුත් මම මේ වෙනකොට ආර්ථික වශයෙන් පහළටම ඇදවැටිලා.

කලාවට අමතරව වෙනත් ආදායම් මාර්ගයක් ඔබට තිබුණේ නැද්ද?

බයිට් පැකට් හදන ව්‍යාපාරයක් මම සුළුවෙන් ආරම්භ කළා. ඒකත් කරගෙන යන්න බැරි තත්ත්වයකයි මම දැන් ඉන්නේ.

කලාකාරිනියක් විදිහට රජයෙන්වත් පිහිටක් ඉල්ලුවේ නැද්ද?

දේශපාලනය කරන්න ගිහින් 1998 වසරෙදි මට ගුටිකන්නත් සිද්ධ වුණා. කලාකාරිනියක් විදිහට අවුරුදු විසි ගණනක් තිස්සේ බලයට ගේන්න දරදිය ඇදලත් වත්මන් ආණ්ඩුවෙන් මට ලැබුණු දෙයක් නැහැ. 2002 ආණ්ඩුව කා‍ලේ මත්තෙගොඩ ප්‍රදේශයෙන් මුදලට දීපු ඉඩමේ අයිතියවත් භුක්තිවිඳින්න රජයෙන් ඉඩ දෙන්නේ නැහැ. ඒ ඉඩමේ අයිතියවත් නිරවුල් කරලා දෙන්න කියලයි මම අද ඉල්ලන්නේ.

ඔබ අවසන්වරට රඟපෑ චිත්‍රපටය වුණේ?

අන්තිමට රඟපෑවේ ‘ආත්ම වරුෂා’ කියන චිත්‍රපටයේ. මම එහි රඟපෑවේ ප්‍රධාන චරිතයක්. නමුත් මගේ චරිතයත්, චිත්‍රපටයත් යන දෙකම අවසානයේ අසාධාරණයට ලක්වුණා.

ඒ කොහොමද?

අනෙක් නළු නිළියන්ට මතුවීමට තිබෙන ඕනෑකමට අන්තිමේදී මුළු චිත්‍රපටයේම මගේ චරිතය දර්ශන හතර පහකට සීමාකරලා තිබුණා. මාත් එක්ක වෛරයෙන් සිටින නිෂ්පාදකවරයා චිත්‍රපටයට සිනමාහල් ලබාදෙන බවට බොරු ‍පොරොන්දු දීලා චිත්‍රපටය වැට්ටුවා.

අතීතය ගැන කනගාටුවෙන්ද ඔබ කතාකරන්නේ?

ඔව්. මම චිත්‍රපට 40ක පමණත් ටෙලිනාට්‍ය 25ක පමණත් රඟපාලා තියෙනවා. කලාවටයි, දේශපාලනයටයි කඹුරලයි මගේ ජීවිත කාලය ගෙවිලා ගියේ. නමුත් අන්තිමේදී ඒ කිසිමදේකින් පිහිටක් නැතිව මම අද අසරණවෙලා ඉන්නවා.

අවසාන වශයෙන් කියන්න, ඔය කියන හැලහැප්පිලි නිසා ඔබ දැන් කලාවෙන් සමු අරගෙනද ඉන්නේ?

කොහෙත්ම නෑ. ඉදිරි කාලයේදිත් මම රඟපානවා. නමුත් ඒ සමාජයට පණිවුඩයක් දෙන්න පුළුවන් විදිහේ ප්‍රබල චරිතයක් රඟපාන්න ආරාධනා ලැබුණොත් විතරයි.

-කිෂාන් කනංකෙ-
-රිද්ම-