Blog

මැතිවරණ කොමිසමට (මැ.කො.) “ස්වාධීන” ලේබලය අලවා ඇත්තේ ඔවුන්ට ස්වාධීන යයි සිතෙන ආකාරයෙන් ක්‍රියා කිරීමට නොව, සමස්ත ඡන්ද දායකයන්ගේ සහ අපේක්ෂකයන්ගේ ස්වාධීනත්වයට ගැළපෙන ආකාරයෙන් ක්‍රියා කිරීමට යැයි හිටපු ආණ්ඩුකාර රජිත් කීර්ති තෙන්නකෝන් මහතා නිවේදනයක් නිකුත් කරමින් පවසයි.

මැතිවරණ කොමිෂන් සභාව, තමන් වෙත නොමැති බලයක් ආරෝපණය කර ගනිමින් රාජ්‍ය සේවකයින්ගේ සමාජ ජාල ක්‍රියාකාරකම් පාලනය කිරීමටත්, පලාත් පාලන කොමසාරිස්වරුන් හා සභා ලේකම්වරුන් පාලනය කිරීමටත් කටයුතු කිරීම කනගාටුවට කරුණක් යැයි තෙන්නකෝන් මහතා නිකුත් කළ නිවේදනයේ දැක්වේ. 

ආණ්ඩුක්‍රම ව්‍යවස්ථාවේ 101 වන ව්‍යවස්ථාවේ (1) වන අනු ව්‍යවස්ථාව අනුව, පාර්ලිමේන්තුව විසින් නීති සෑදිය යුතු බවට නියමයක් දක්වා ඇති කරුණු 9 කි.  ඒ අනු ව්‍යවස්ථාවේ අවසානයේ ඇති අතුරු විධානයේ මෙසේ දැක්වේ.  “එසේ වුව ද, එවැනි යම් නීතියකින් 89 වන සහ 91 වන ව්‍යවස්ථාවල දැක්වෙන නුසුදුසුකම්වලට තවත් නුසුදුසුකම් එකතු නොකළ යුත්තේ ය.”  මැතිවරණ කොමිසණ් සභාව, රාජ්‍ය සේවකයින්ට සමාජ ජාලා තහනම් කරමින්, විනය පරීකෂණ පවත්වමින්, ආණ්ඩුක්‍රම ව්‍යවස්ථාවට පිටින්, පාර්ලිමේන්තුවට තේරී පත්වීම සදහා ‘‘නුසුදුසුකමක් අලුතෙන් නිර්මාණය කිරීමට‘‘ උත්සහ දරයි.   

*    ආණ්ඩුක්‍රම ව්‍යවස්ථාවේ 104 ආ ව්‍යවස්ථාවේ (4) වන අනු ව්‍යවස්ථාවේ (අ) ඡේදය මගින්, රජයට හෝ යම් රාජ්‍ය සංස්ථාවකට හෝ අයත් යම් නිශ්චල හෝ චංචල දේපළක් එවැනි භාවිත කිරීමක් වළක්වාලීමට කොමිෂන් සභාවට බලය ලැබී ඇත. පළාත් පාලන ආයතනයක යම් නිශ්චල දේපළක් හෝ චංචල දේපළක් හෝ සම්බන්ධයෙන් විධාන කිරීමට මැතිවරණ කොමිෂන් සභාවට බලයක් ලබා දී නැත.

*    මෙසේ තිබිය දී, පාර්ලිමේන්තු මැතිවරණයක් හෝ පළාත් සභා මැතිවරණයක් පවත්වනු ලබන කාල සීමාව තුළ, පළාත් පාලන ආයතනවල දේපළ භාවිත කිරීම පිළිබඳ ව මැතිවරණ කොමිෂන් සභාව විධාන නිකුත් කිරීමේ හැකියාවක් නැත. තෝරාගත් පලාත් පාලන සභිකයින් පිරිසකට පමණක් රාජ්‍ය දේපල අයථා පරිහරණය, නිවාඩු ලබා ගැනීම වැනි අනීතික සීමාවන් ලිඛිතවම පැනවීමේ අනිටු ප්‍රතිඵලය වන්නේ, එවැනි යමක් කර ඇතැයි යනුවෙන් සඳහන් කරමින් එසේ කරන ලද තැනැත්තා ඡන්දයෙන් තෝරා පත් කර ගැනීමෙන් පසුව ඡන්ද පෙත්සමක් මගින් ඔහු මන්ත්‍රී ධුරයට තෝරා පත් කර ගැනීම ශුන්‍ය හා බලරහිත කරන ආඥාවක් ඉල්ලා යම් තැනැත්තකුට අධිකරණයට යාමට අවස්ථාව සලසා දීමකි. ඒ විධාන අනුව වරදක් කර ඇතැයි යන්න අධිකරණය විසින් තීරණය කිරීමට අවස්ථාව සලසා දීමක් ද මෙයින් අදහස් වේ. එවිට ඒ තැනැත්තාගේ මන්ත්‍රී ධුරය බලරහිත හා ශුන්‍ය කරනු ලබන්නේ ඔහු නුසුදුස්සකු වූ සේ සලකා ගෙන ය.  (උදාහරණයක් ලෙස දිගාමඩුල්ල දිස්ත්‍රික්කයෙන් මහා මැතිවරණයට ඉදිරිපත් ව සිටින අපේක්ෂකයින් අතුරින් සභාපතිවරු තිදෙනෙකුට පමණක් මැ.කො.ස. විසින් ලිඛිත දැන්වීමක් සිදු කිරීම. සෑම දිස්ත්‍රික්කයම ඇත්තේ මෙවැනි තත්වයකි)

*    මැතිවරණ කොමිෂන් සභාව පාර්ලිමේන්තු මැතිවරණයකට යම් අයකු තෝරා පත් කර ගැනීමට ‘නුසුදුසු කමක් අලුතෙන් නිර්මාණය කිරීමට‘ කටයුතු කර ඇත. මෙරට ලියාපදිංචි කිසිදු දේශපාලන පක්ෂයක්, මැතිවරණ නිරීක්ෂණ සංවිධානයක්, පාර්ලිමේන්තුව සතු බලය ද ඉක්මවමින් මහින්ද දේශප්‍රිය, රත්නජීවන් හූල්, හා අබේසේකර යන සමාජිකයින්ගෙන් සමන්විත මැතිවරණ කොමිෂන් සභාව දරණ උත්සාහයට විරෝධය පළ කර නැත. 

ප්‍රජාතන්ත්‍රවාදය ගැන කථා කරන, දේශන පවත්වන, විරෝධතා පවත්වන සිවිල් සංවිධාන මැ.කො. සමාජ ජාල වාරණයට එරෙහිව නිහඬව සිටීම පුදුම සහගතය. විශේෂයෙන්ම, රාජකාරි උපදෙස් පවා සමාජ ජාල මාධ්‍ය මගින් ලබාදීම පුරුද්දක් කොට ගෙන සිටින මැ.කො. සභාවේ සභාපතිවරයාගේ ප්‍රවේශය ප්‍රජාතන්ත්‍රවාදයට මරු පහරක් වන්නේය.

*    මැතිවරණ කොමිෂන් සභාව විසින් නිකුත් කර ඇති 2020. 06. 06 දින නිකුත් කර ඇති අංක 2178/29 දරන අති විශේෂ ගැසට් පත්‍රයේ ප්‍රකාශයට පත් කර ඇති විධානවල පළාත් පාලන ආයතනයක යම් සභිකයකු පාර්ලිමේන්තු මැතිවරණයේ අපේක්ෂකයකු වන විට, ඔහුට පමණක් වන සේ විශේෂ නුසුදුසුකමක් ඇතුළත් කර ඇත.  පාර්ලිමේන්තුවට වත් කළ නොහැකි බවට ආණ්ඩුක්‍රම ව්‍යවස්ථාවෙන් ප්‍රකාශිත නියමය ද අබිබවා යමින් පාර්ලිමේන්තුවට වඩා ඉහළ අධිකාරයක් ඇති ව මැතිවරණ කොමිසම කටයුතු කරමින් සිටී. ඉදිරියේ දී මෙය මනාප අංක ප්‍රදර්ශනය වැනි මැතිවරණ ප්‍රචාරයේ සියලු අංග වෙත දිගුවීම නොවැලැක්විය හැකිවනු ඇත.  මෙය සම්පූර්ණයෙන් ම, නීතියේ ආධිපත්‍යය බලහත්කාරයෙන් මැ.කො. තමන් අතට ගැනීමකි. එසේම, පළාත් පාලන ආයතනයක සභිකයකු වීම නිසා වෙනත් අපේක්ෂකයන්ට වෙනස් වූ ආකාරයෙන් සැලකීමක් ද වේ.  එයින් ද, කොටසකට පමණක් (තෝරාගත් අපේක්ෂකයින් පිරිසකට පමණක්) එම නීතිය ක්‍රියාත්මක කිරීම අතිශයින්ම වැරදි පූර්වාදර්ශකයකි. 

*    මැතිවරණ කොමිෂන් සභාවේ මේ අවනීතික, නිර්ලජ්ජිත ක්‍රියාව හේතුවෙන් පළාත් පාලන ආයතනයක සභිකයකු වශයෙන් සිටිය දී, පාර්ලිමේන්තු මැතිවරණයේ අපේක්ෂකයකු වන තැනැත්තන්ට ආණ්ඩුක්‍රම ව්‍යවස්ථාවෙන් ලබා දී ඇති මූලික අයිතිවාසිකම් උල්ලංඝනය කිරීමකි.මැතිවරණ කොමිෂන් සභාවට “ස්වාධීන” ලේබලය අලවා ඇත්තේ ඔවුන්ට ස්වාධීන යයි සිතෙන ආකාරයෙන් ක්‍රියා කිරීමට නොව, සමස්ත ඡන්ද දායකයන්ගේ සහ අපේක්ෂකයන්ගේ ස්වාධීනත්වයට ගැළපෙන ආකාරයෙන් ක්‍රියා කිරීමට යැයි ද හිටපු ආණ්ඩුකාර තෙන්නකෝන් මහතා නිකුත් කළ නිවේදනයේ දැක්වේ.

දේශපාලන පළිගැනීම් පිළිබඳ ජනාධිපති කොමිෂන් සභාවට නීතිපති දෙපාර්තමේන්තුවේ නිලධාරීන්ද වගඋත්තරකරුවන් ලෙස කැඳවනු ලැබ තිබෙනවා. ඇවන්ට්ගාඞ් පිළිබඳ මහාධිකරණයේ විභාග වන නඩුවේදී නීතිපතිවරයා හා රජයේ නීතීඥයින් පෙනී සිටින්නේ පැමිණිලි පාර්ශ්වය ලෙසයි. එහෙත් මෙම ජනාධිපති කොමිසමේදී ඔවුන් සියලු දෙනා විත්තිකරුවන් බවට පත් වෙනවා.

ජාතික ජන බලවේගයේ මාධ්‍ය හමුවක් අද (22) ජවිපෙ ප්‍රධාන කාර්යාලයේදී පැවැත් වුණා. එහිදී අවධානය යොමු වුණේ ජවිපෙ නායක අනුර කුමාර දිසානායක මහතා දේශපාලන පලිගැනීම් පිළිබඳ ජනාධිපති කොමිෂන් සභාව වෙත කැඳවා තිබීම පිළිබඳ ස්ථාවරය පැහැදිලි කිරීම සදහායි. මෙම මාධ්‍ය හමුව සදහා ජවිපෙ ප්‍රධාන ලේකම් ටිල්වින් සිල්වා මහතා ද සහභාගී වුණා.

මෙම මාධ්‍ය හමුවේදී අනුර කුමාර දිසානායක මහතා සහ ටිල්වින් සිල්වා මහතා ඉදිරිපත් කළ සම්පූර්ණ කතාව මෙහි පළ වෙනවා.

ජනාධිපති කොමිසමත් දූෂිතයින් හෙළිදරව් කිරීමේ අරගලයේ කොටසක් ලෙස පාවිච්චි කරනවා

මෙම මාධ්‍ය හමුව කැඳවනු ලැබුවේ දේශපාලන පලිගැනීම් පිළිබඳ ජනාධිපති කොමිෂන් සභාව වෙත කැඳවා තිබීම පිළිබඳ ස්ථාවරය පැහැදිලි කිරීම වෙනුවෙනුයි. හෙට (23) දිනයේ පෙරවරු 11.30ට මට කොමිසම හමුවේ පෙනී සිටින ලෙස අපේ පක්ෂයේ කාර්යාලය වෙත දන්වා තිබුණා. එය මා අතට ලැබී තිබෙනවා. ඒ අනුව හෙට දිනයේ මා එහි පෙනී සිටිනවා.

අපේ රටේ මහජන ධනය විශාල වශයෙන් දූෂිත දේශපාලන කණ්ඩායමක්, ඔවුන්ගෙන් යැපෙන චෞර ව්‍යාපාරික කණ්ඩායමක් හා රාජ්‍ය සේවයේ දූෂිත අතළොස්සක් නිලධාරී කණ්ඩායමක් විසින් සොරකම් කිරීමට කටයුතු කර තිබෙනවා. හිටපු විගණකාධිපතිතු විසින් අපේ රටේ සමස්ත ණය බර ටි්‍රලියන 11ක් වන විට ඉන් ගොඩනැගී ඇති වත්කම් ටි්‍රලියන 1.8ක් පමණක් බව ප්‍රකාශ කළා. එසේනම් පෙනී යන්නේ මිලියන 9.2ක මුදලක් වතුරේ ගසා ගෙන ගොස් ඇති බවයි.

එහෙත් ඇත්තටම මේ ධනයට මොකද වුණේ. මේ ධනය වතුරේ ගසාගෙන ගොස් නැහැ. මෙම ධනය අප කලින් කී දූෂිත පිරිස අතට පත් වී ඇති බවට අපට තොරතුරු ලැබී තිබෙනවා.

අප රට ණය වී ලබාගත් ධනය දූෂිත අතළොස්සක් අතට පත්වී තිබෙනවා. අපි මෙම වංචාවට, සොරකමට එරෙහිව අනවරත අරගලයක යෙදී සිටිනවා. ඒ, මේ ධනය අපේ නිවසට ගෙනයාමේ අරමුණින් නෙමෙයි; මේ සොරකම නතර කිරීමේ අරමුණිනුයි. අපේ වසන්ත සමරසිංහ සහෝදරයා, සුනිල් හඳුන්නෙත්ති සහෝදරයා මේ සොරකම්වලට එරෙහිව අපේ පක්ෂය තුළ ප්‍රමුඛ වැඩකොටසක් කළා.

අපි මෙම සොරකම්වලට එරෙහිව ක්‍රියාත්මක විය හැකි සෑම ආයතනයකටම අදාළ පැමිණිලි කරමින් ක්‍රියාත්මක වුණා. මේ අපරාධ සම්බන්ධයෙන් අල්ලස් හෝ දූෂණ වංචා විමර්ශන කොමිෂන් සභාව, අපරාධ පරීක්ෂණ දෙපාර්තමේන්තුව, බරපතළ මූල්‍ය අපරාධ පරීක්ෂණ දොපාර්තමේන්තු (එෆ්.සී.අයිඩී.) වැනි ආයතනවලට පැමිණි කිරීමට අප කටයුතු කළා. එම ආයතනවලට පැමිණිලි කිරීමට පමණක් නෙමෙයි, අපරාධවලට එරෙහිව නිතීය ක්‍රියාත්මක කරවා ගැනීමට අපි මැදිහත් වුණා. අපි රනිල්, කිරිඇල්ල, මහින්දානන්ද, මහින්ද රාජපක්ෂට එරෙහිව චෝදනා ඉදිරිපත් කළේ පාර්ලිමේන්තුවේ ඔවුන් ඉදිරිපිටදීමයි. 

එසේම වංචා දූෂණවලට එරෙහි අපේ අරගලය හුදු පාර්ලිමේන්තුවට පමණක් සීමා වුණේ නැහැ. අපි පාර්ලිමේන්තුවෙන් පිටත වංචා දූෂණවලට එරෙහිව උද්ඝෝෂණ, අරගල කළා. දැන් අපට දේශපාලන පලිගැනීම් පිළිබඳ ජනාධිපති කොමිෂන් සභාවට පැමිණෙන ලෙසට කැඳවනු ලැබ තිබෙනවා. අප කැමතියි, එම ජනාධිපති කොමිෂන් සභාවත් වංචාවට, දූෂණයට, නාස්තියට එරෙහි අරගලයේ කොටසක් බවට පත් කරගන්න. 

තමන්ට අයිති දේපළ මේ රටේ ජනතාව දැනගත යුතුයි. මේ සොරකම් කරනු ලැබ තිබෙන්නේ පාසල් ළමුන්ට වැසිකිළි පහසුකමක්, වතුර පොදක් ලබාගැනීමට තිබෙන ධනයයි. රෝහලට බොහෙත් ගැනීමට තිබෙන ධනයයි. ගොවි ජනතාවට පොහොර ලබාදීමට තිබෙන ධනයයි. රටේ ජනතාවගේ සුභසිද්ධිය වෙනුවෙන් වැය කළ යුතු ධනයයි.

මෙම ධනය කුඩා කණ්ඩායමක් අත සංකේන්ද්‍රණය වී තිබෙනවානම් පොදු අරගලය විය යුතුව තිබෙන්නේ  මෙම වංචනිකයින්ට දඬුවම් ලබාදීම සහ එම සොරාගත් ධනය නැවත රටට අත්පත් කරගැනීමයි.

2015 ජනවරම තුළ තිබුණු ප්‍රධානම කරුණ වූයේ වංචනිකයින්ට හා දූෂිතයින්ට දඬුවම් ලබාදීමයි. එම මැතිවරණ වේදිකාවේ කතාබහට ලක්වූ ප්‍රධානම කරුණ වූයේ එයයි. නමුත් එම ආණ්ඩුව එම ජනවරමට මුළුමනින්ම පිටුපාමින් යළි දූෂණයේ හා නාස්තියේ පාරටම පැමිණි බව නිදසුන් බොහෝ තිබෙනවා. එම ආණ්ඩුවේ බොහොදෙනා වංචාවේ යෙදෙන්නටත් වංචනිකයින් රකින්නටත් කටයුතු කළා.

එහෙත් පෙර ආණ්ඩුව කාලයේදීත් මෙම ආණ්ඩු කාලයේත් අප කටයුතු කර තිබෙන්නේ මේ මහජන ධනය සොරාගත් වංචනිකයින් හෙළිදරව් කරගැනීමටයි.  ඒ අරගලයේ අප නිරත වී සිටිනවා. එයින් මඟහැරයාමට හෝ පලායාමට අපි සූදානම් නැහැ. මෙම වගකීම අපත් අත්හැරියහොත් එය කරන්නේ කවුරුන්ද? එය අපේ දෙවුර මත පැටවී තිබෙනවා.

පෙර ආණ්ඩුව දූෂිතයින්ට හා වංචනිකයින්ට එරෙහිව ගන්නා ලද ක්‍රියාමාර්ග කිසිසේත් ප්‍රමාණවත් නොවන බව සෑම පුරවැසියෙක්ම පිළිගන්නවා. අද සැබැවින්ම අපේ රටට කොමිසමක් අවශ්‍යයි. මහජන විනිශ්චය කොමිෂන් සභාවක් අවශ්‍යයි. පළාත් පාලන ආයතනයේ සිට ඉහළම ආයතනය දක්වා සිදුවී ඇති වංචා හා දූෂණ පිළිබඳ තමන් දන්නා තොරතුරු එම ආයතවලට අදාළ නිලධාරින් හා පොදු ජනතාව විසින් එම සභාවට සාක්ෂි ලෙස ඉදිරිපත් කරාවි. සැබැවින්ම වංචනිකයින් දූෂිතයින් අත මෙතරම් ධනය රැස්වී තිබෙන්නේ කෙසේද යන්නත් ඔවුන් නිදැල්ලේ සිටින්නේ කෙසේද යන්නත් සොයාබැලිය යුතුයි. 

දේශපාලන පළිගැනීම් පිළිබඳ ජනාධිපති කොමිෂන් සභාවට නීතිපති දෙපාර්තමේන්තුවේ නිලධාරීන්ද වගඋත්තරකරුවන් ලෙස කැඳවනු ලැබ තිබෙනවා. ඇවන්ට්ගාඞ් පිළිබඳ මහාධිකරණයේ විභාග වන නඩුවේදී නීතිපතිවරයා හා රජයේ නීතීඥයින් පෙනී සිටින්නේ පැමිණිලි පාර්ශ්වය ලෙසයි. එහෙත් මෙම ජනාධිපති කොමිසමේදී ඔවුන් සියලු දෙනා විත්තිකරුවන් බවට පත් වෙනවා. මොකද එහි පැමිණිලිකරු වන්නේ ඇවන්ගාඞ් ආයතනය වන නිසයි. ජනතාවට මෙහි පවතින තත්වය දැනගැනීමට මෙම කරුණම ප්‍රමාණවත්.

මේ තත්වය අනුව හෙට දිනයේ කොළඹ බණ්ඩාරනායක අනුස්මරණ සම්න්ත්‍රණ ශාලාවේ පවත්ගෙන යනු ලබන ජනාධිපති කොමිෂන් සභාවට ඉදිරිපත් වී මේ රටේ දූෂණයට වංචාවට එරෙහිව අප විසින් ගෙන යන ලබන අරගලයේම අවස්ථාවක් ලෙස එය පාවිච්චි කරගැනීමට අප බලාපොරොත්තු වෙනවා.  

අපි කියන්න ඕනෑ මේ වගේ පොඩි පොඩි දේවල් කරලා, කොමිසම්වලට කැඳවලා ජවිපෙ හෝ අනුර දිසානායක සහෝදරයා බය කරන්න පුළුවන් කියලා ඒක නම් වැරදි අදහසක්. මොකද අපි දේශපාලනයට ඇවිත් තිබෙන්නේ සටන් කරන්න. අපිට නැතිවෙන්න දෙයක් නැහැ.

කොමිෂන්වලට කැඳවලා ජවිපෙ බය කරන්න පුළුවන් කියලා ආණ්ඩුව හිතනවානම් එය වැරදි අදහසක් – ටිල්වින් සිල්වා

ආණ්ඩුවේ වුවමනාව අපිට ඉතාම පැහැදිළියි. ඒ නිසා අපි අඳුරේ අතපත ගාන්නේ නැහැ. ජනතා විමුක්ති පෙරමුණ පසුගිය කාලේ රාජපක්ෂලා කරපු වංචා දූෂණ පිළිබඳව කරුණු විශාල ප්‍රමාණයක් හෙළිදරව් කළා. ඒවා සියල්ල තහවුරු කරන්න පුළුවන් දේවල්. අපි පක්ෂයක් ලෙස හෝ අනුර දිසානායක සහෝදරයා කවදාවත් ඔප්පු කරන්න බැරි දේවල් ඉදිරිපත් කරන්නේ නැහැ. ඇවන්ගාඞ් සිදුවීමත් එහෙමයි. ඇවන්ගාඞ් සිදුවීම ගැන ආණ්ඩුවට හිතේ අමාරුවක් ඇති.

ගෝටාභය මහත්තයට හිතේ අමාරුවක් ඇති. මොකද තමන්ගේ හිතවතාට හදලා දුන්න ව්‍යාපාරය නැවත නාවික හමුදාව යටතට පත්කරන්න සිදුවුනාට. ඒ ලාභය ඇවන්ගාඞ් සමාගමට නැති වුන හිතේ අමාරුවට වංචා දූෂණ හෙළිදරව් කරපු අය බය කරන්න, ඔවුන්ට රිදවන්න බලාගෙන මේ වගේ දේවල් කරනවා කියලා අපිට හිතෙනවා.

අපි කියන්න ඕනෑ මේ වගේ පොඩි පොඩි දේවල් කරලා, කොමිසම්වලට කැඳවලා ජවිපෙ හෝ අනුර දිසානායක සහෝදරයා බය කරන්න පුළුවන් කියලා ඒක නම් වැරදි අදහසක්. මොකද අපි දේශපාලනයට ඇවිත් තිබෙන්නේ සටන් කරන්න. අපිට නැතිවෙන්න දෙයක් නැහැ. එයාලට නැතිවෙන්න හොයාගත්ත ධනය තියෙනවා, ජනාධිපතිකම් තියෙනවා, අගමැතිකම් තියෙනවා, විවිධ ව්‍යාපාර තිබෙනවා. නමුත් ජනතාවට යුක්තිය ඉෂ්ඨ කරන්න එක අපේ වගකීමක්. මේ රටට ඇත්තට අපි ආදරෙයි. ජනතාවගේ ධනය කවුරුහරි හොරකම් කරනවානම් අපි ඒ ධනය නැවත ලබාගන්න ඕනෑ. ඒක තමයි පහුගිය කාලේ අපේ පක්ෂය, අනුර දිසානායක සහෝදරයා කළේ. අපි බය කරන්න හදනවානම්, අපිව දුර්මුඛ කරන්න හදනවානම් ඒක කවදාවත් වෙන්නේ නැහැ. හෙටත් අපි මේ වැඬේ කරනවා. 

අපි මේක භාරගන්නේ පක්ෂයක් හැටියට. අපි මේකට මුහුණ දෙන්නේ පක්ෂයක් ලෙස. අපි වෙන පක්ෂ වගේ නෙවෙයි. අපි අනුර දිසානායක සහෝදරයාට වෙනම ආපු දෙයක් ලෙස නෙවෙයි මේක සලකන්නේ. තනි තනි කෙනා හුදකලා කරලා සෙල්ලං කරන්න හදන්න එපා කියලා අපි ආණ්ඩුවට කියනවා. ඒ වගේම අපි ආණ්ඩුවෙන් ඉල්ලනවා කොමිසමේදී කියන්න තියෙන දේ කියන්න අපිට සාධාරණ කාලයක් ලබාදෙන්න කියලා. අපිට කොමිසමත් එක්ක ගැටලුවක් නැහැ. ඒ අවස්ථාව ලැබෙනවානම් අපි කියපු කරුණු තහවුරු කරලා පෙන්වනවා. අපිව බය කරන්න ලෑස්ති වෙන්න එපා කියලා අපි ආණ්ඩුවට නැවතත් කියනවා.

මාධ්‍යවේදීන් නැගූ ප්‍රශ්නවලට අනුර දිසානායක පිළිතුරු ලබාදෙමින්

ජනාධිපති කොමිසන් වාර්තාවලට මොකද වෙන්නේ…ජනාධිපති විමර්ශන කොමිසන් සභා පත්කරන්නේ ජනපතිට තිබෙන බලතල අනුව. මෛත්‍රීපාල සිරිසේන මහතා බරපතල මූල්‍ය අපරාධ පිළිබඳ ජනාධිපති විමර්ශන කොමිසන් සභාවක් පත් කළා. එහිදී ආසන්න වශයෙන් වංචාවන් 33ක් පමණ විමර්ශනය කරලා වාර්තාවක් ඉදිරිපත් කළා. ඇවන්ගාඞ් පිළිබඳවත් එහි සඳහන්. ඔවුන්ට එරෙහිව ක්‍රියාමාර්ග ගැනීම ජනාධිපති ලෙස මෛත්‍රීපාල මහත්තයට බලතල තිබුණත් ඔහු ඒක සිදුකළේ නැහැ.

ඉන්පසු බැඳුම්කර පිළිබඳව ජනාධිපති කොමිසමක් පත්කළා. ඒ අතර මන්ත්‍රීවරු 118ක් ඇලෝසියස්ගෙන් මුදල් ගත් බව ප්‍රකාශ වුනා. මන්ත්‍රීවරු දෙදෙනෙක් එය පිළිගත්තා. ඒ වගේම ජනාධිපති කොමිසන් වාර්තාවේ පිටු 106ක් සඟවලා තියෙනවා කිව්වා. එහි තමයි පෙර කී මන්ත්‍රීවරුන් 118ගේ නම් සඳහන් වෙලා තිබෙනවා කියන්නේ. එනිසා ජනාධිපති කොමිසන් සභාවලින් අවශ්‍ය දේ සිදුවුනේ නැහැ. එනිසා මේ කොමිසන් සභාවලට මුදල් කොයිතරම් නාස්තිකරලා තිබෙනවද කියලා වෙනම හොයන්න ඕනෑ. නමුත් දැන් ගෝටාභය රාජපක්ෂ මහත්තයා තවත් කොමිසමක් පත් කරලා තිබෙනවා. අපි බලමු මේ කොමිසන් සභා වාර්තාවට මොකද වෙන්නේ කියලා. 

ජනතාවට රු.5000ක් ලබාදීම හෝ රු.20,000ක් ලබාදීම ගැන

ජනතාවට සහන දීම සඳහා රටකට අතිරේඛ සංචිතයක් තිබිය යුතුයි කියලා අපි විශ්වාස කරනවා. මේ රටේ මහජන මුදල් හොරා නොකා තිබුණානම් අපේ රටට එවැනි අතිරේඛ මුදල් සංචිතයක් ඉතිරි කර ගන්න තිබුණා. මේ ආණ්ඩු අවුරුදු 72ක් රට පාලනය කරලා මෙවැනි අර්බුදයකට යොදා ගන්න මුදල් සංචිතයක් රට සතුව නැහැ. අපේ ආර්ථිකය තිබෙන්නේ එදාවේල ටුවර්ස් ආර්ථිකයක්. රට මාස දෙකක් අඩාල වෙනවා කොරෝනා නිසා. නමුත් ජන ජීවිතය බිඳ නොවැටී තබාගන්න ආර්ථික සංචිතයක් නැහැ. 

මාධ්‍යවේදීන් නැගූ ප්‍රශ්නවලට ජවිපෙ ලේකම් ටිල්වින් සිල්වා පිළිතුරු ලබාදෙමින්

කරුණා අම්මාන්ගේ ප්‍රකාශය රටේ ජනතාව බරපතල ලෙස ගත යුතුයි. අපේ රටේ වසර තිහක යුද්ධයක් පැවතුනා. එහිදී මිනිස් ඝාතනයන් සිදුවුනා. හමුදාවේ අය එල්ටීටී අය ගොඩක් ඝාතනය වුනා. එය අවසන් වූ සිදුවීමක්. සමාජයට කම්පනයක් තිබෙනවා එම ඝාතන පිළිබඳව. කරුණා අම්මාන් එල්ටීටීයට නායකත්වය දුන් කෙනෙක්.

පසු කාලයකදී මහින්ද රාජපක්ෂ ආණ්ඩුවටත් සම්බන්ධ වුනා. මහින්ද රාජපක්ෂ මහත්තයලා ඔහු ශ්‍රීලනිපයේ උප සභාපති කෙනෙක් බවටත් පත් කරගත්තා. ඔවුන් කිව්වේ දැන් කරුණා හොඳ පුරවැසියෙක් කියලා. නමුත් දැන් මොකද වෙලා තියෙන්නේ. කරුණා දැන් නැගෙනහිර පළාතේ ඡන්දය ඉල්ලනවා ආණ්ඩුවට යන්න බලාගෙන. ඔහු දැන් තමන් කළ ඝාතන වීරත්වයට නගනවා. එහෙම කෙනෙක් මහින්ද රාජපක්ෂලා තමන්ගේ සන්ධානයේ තබාගෙන ඉන්නවා. 

රාජපක්ෂ කණ්ඩායම මැතිවරණ දිනීම සඳහා ඕනෑම කැත වැඩක්, ඕනෑම දේශපාලන කුපාඩිකමක්, සමාජයට හානිකර ඕනෑම දෙයක් කරනවා. කොටි ඝාතනය කරන්න දායක වුනා කියලා සරත් වීරසේකර කොළඹින් ඡන්දය ඉල්ලනවා. හමුදාව ඝාතනය කරන්න තමන් දායක වුනා කියමින් නැගෙනහිරින් කරුණා ඡන්දය ඉල්ලනවා. ඒ ඡන්ද ඔක්කොම ගන්නේ එකම තැනකට. ඒක කොහොමද යුක්තිසහගත වෙන්නේ.

රාජපක්ෂ කණ්ඩායම ඉන්නේ අන්ත බලලෝභයක. එනිසා ඔවුක් ජාතිවාදය, ආගම්වාදය අවුස්සනවා. ආගම් සහ ජන කණ්ඩායම් කොටවනවා. දේශපාලන මට්ටමේ දෙබිඩිකමක්. දේශපාලන තක්කඩිකමක්. ඊනියා දේශප්‍රේමීන්ගෙන් සහ ආණ්ඩුවෙන් අපි අහනවා මේ ගැන තමන්ගේ ස්ථාවරය මොකක්ද කියලා. ආණ්ඩුව අනියමින් කරුණා අම්මාන් ආරක්ෂා කරනවා. ජනතාවට අපි කියනවා ආණ්ඩුවේ මේ ප්‍රතිවිරෝධය, තක්කඩිකම තේරුම් ගන්න කියලා.

සරත් ෆොන්සේකා වැනි යුදපිටියේ සිටිය යතු අය නොදන්නා දේශපාලනයකට පැමිණීම තමන් දේශපාලනයෙන් සමු ගැනීමට එක් හේතුවක් යයි හිටලු ඇමති මංගල සමරවීර මහතා පවසයි.

මංගල සමරවීර මහතා මැතිවරණ ව්‍යාපාරයෙන් ඉවත් වීම සමගි ජන බලවේගයට විශාල වාසියක් යයි සරත් ෆොන්සේකා මහතා විසින් කරන ලද ප‍්‍රකාශයක් ප‍්‍රතිචාර දක්වමින් ඔහු මේ බව සදහන් කර ඇත.

තම සමාජාල ගිණුමේ සටහන් කර ඇති අදාල සම්පූර්ණ සහන මෙසේය.

හිතවත් සරත්,

ඔබගේ දේශපාලන පාරාජිකභාවය මගේ නමට බැර කිරීමට දරණ උත්සාහය පිළිබඳ පළමුව කණගාටු වෙමි.

ඔබගේ දේශපාලන විවේචනය සාධාරණ නම්, ඔබගේ නායකත්වයෙන් යුතු ප්‍රජාතන්ත්‍රවාදී පෙරමුණ 2015 වර්ෂයේ මහ මැතිවරණයට තරඟ කර කොළඹ දිස්ත්‍රික්කයෙන් ඡන්ද 5,238 (0.43%)ක් ද මුළු ලංකාවෙන්ම ඡන්ද 28,587 (0.26%) ලබා අන්ත පරාජයට පත් වූයේ ද මාගේ දේශපාලන භාවිතාව නිසා දැයි දැන ගැනීමට කැමැත්තෙමි.

අනෙක පසුගිය ජනාධිපතිවරණයේ දී ඔබ නායකත්වය ලබාදුන් කැළණිය ආසනයෙන් සජිත් ප්‍රේමදාස මහතා ඡන්ද 16,147කින් පරාජය වූයේ ඔබගේ දේශපාලන පාරිශුද්ධකම නිසා දැයි නොදනිමි.

වැඩිදුරටත් ඔබගේ දැනගැනීම පිණිස මෙසේ ද සටහන් කරමි.

මා 1989 සිට මේ දක්වා පැවැති සියලු මැතිවරණ සඳහා තරඟ කර ඇති අතර ඒ සෑම අවස්ථාවක දීම මාගේ ප්‍රතිපත්ති හා මාගේ දේශපාලන විශ්වාසයන් ඍජුව ප්‍රකාශ කරමින්, මා ජයග්‍රහණය කළා පමණක් නොව මා නියෝජනය කළ දේශපාලන පක්ෂය ද ජයග්‍රහණය කරවා ඇත.

රනිල්ට පින් සිදුවෙන්න පාර්ලිමේන්තුවට ආ හැටි…

”අද ඔබ තැන තැන වේදිකාවල ගරහමින් සිටින්නේද එදා පරාජිත ඔබ පාර්ලිමේන්තුවට කැඳවා ජාතික ලැයිස්තු මන්ත්‍රී ධූරයක් ලබාදුන් එම නායකයාටම බව අමතක නොකරන ලෙස ද ඉල්ලා සිටිමි.”

නමුත් 2015 පරාජිත ඔබට ජාතික ලැයිස්තු පාර්ලිමේන්තු මන්ත්‍රී ධූරයක් හිමි වූයේ ද එම්.කේ.ඩී.එස්. ගුණවර්ධන මහතාගේ අභාවය නිසා මන්ත්‍රීධූරයක් පුරප්පාඩු වූ විට එක්සත් ජාතික පක්ෂයේ නායක ගරු රනිල් වික්‍රමසිංහ මහතාගේ අනුකම්පාවේ පිහිටෙන් බව මතක් කර දෙමි.

අද ඔබ තැන තැන වේදිකාවල ගරහමින් සිටින්නේද එදා පරාජිත ඔබ පාර්ලිමේන්තුවට කැඳවා ජාතික ලැයිස්තු මන්ත්‍රී ධූරයක් ලබාදුන් එම නායකයාටම බව අමතක නොකරන ලෙස ද ඉල්ලා සිටිමි.

ඒ වගේම මා පාර්ලිමේන්තු දේශපාලනයෙන් සමුගැනීමට හේතු වූ කරුණු අතර ඔබ වැනි යුධපිටියේ සිටිය යුතු යුද විරුවන් නොදන්නා දේශාපාලනයක් සඳහා පාර්ලිමේන්තුවට කැඳවීම ද එක් කරුණක් බව සිහිපත් කරමි.”

– මංගල සමරවීර

19 වන ආණ්ඩුක්‍රම ව්‍යවස්ථාව සම්මත කර ගැනීමෙන් රටට කිසිදු සෙතක් අත් නොවූ බවත් යහපාලන ආණ්ඩුව රට විනාශ කළේ 19 වන ආණ්ඩුක්‍රම ව්‍යවස්ථාවට මුවා වී බවත් කාර්මික අපනයන, ආයෝජන ප්‍රවර්ධන, සංචාරක හා ගුවන් සේවා ඇමති ප්‍රසන්න රණතුංග මහතා පවසයි.

එජාප නායක රනිල් වික්‍රමසිංහ මහතා 19 වන ආණ්ඩුක්‍රම ව්‍යවස්ථා සංශෝධනය දියාරු කරමින් සිටින බවට චෝදනා නැගීම සම්බන්ධයෙන් ප්‍රතිචාර දක්වමින් ඇමතිවරයා මේ බව සදහන් කළේ ය.

මීරිගම ශ්‍රි ලංකා පොදු ජන පෙරමුණු කාර්යාලයේ අද (22) පැවති රැස්වීමෙන් අනතුරු ව මාධ්‍යවේදීන් නැගු පැනයකට පිළිතුරු දෙමින් ඇමතිවරයා මේ බව සදහන් කළේය.

මෙහිදි ඇමති ප්‍රසන්න රණතුංග මහතා මෙසේ ද කීවේය.

“ 19 වන ආණ්ඩුක්‍රම ව්‍යවස්ථාව ගෙනාවේ රනිල් – මෛත්‍රී යහපාලන ආණ්ඩුවේ දේශපාලන උවමනාව ඉටු කරගන්න. ස්වාධීන කොමිෂන් සභා පිහිටුවීමට වඩා ඒකේ යම් අරමුණක් තිබුණා.  ඒ තමයි රාජපක්ෂ පවුල දේශපාලන වශයෙන් විනාශ කිරීම. මේ කොමිෂන් සභා එකක්වත් ස්වාධීන නෑ. 19 වන ආණ්ඩුක්‍රම ව්‍යවස්ථාව හොද නෑ කියලා මුලින් ම විචේඡනය කළේ ඒ ව්‍යවස්ථාය ගේන්න මැදිහත් වුණු මෛත්‍රී ජනාධිපතිවරයාය. මේ අංගවිකල 19 වන ව්‍යවස්ථා සංශෝධනය අහෝසි කරලා රටට වග කියන ව්‍යවස්ථාවක් ගෙන ඒමට අපි කටයුතු කරනවා.

හිටපු ඇමති හරීන් ප්‍රනාන්දු මහතා අගරදගුරුතුමන් සම්බන්ධයෙන් කළ ප්‍රකාශය අපි තරයේ හෙළා දකිනවා. හරීන්ම තමයි කිව්වේ පාස්කු ප්‍රහාරය ගැන තමන්ට අනතුරු ඇගෙව්වේ තාත්තා කියලා. ඒ නිසා තමන්ගේ ජීවිතේ බේරුණා කියපු හරීන් අද අදරදගුරුතුමන්ට පහර ගහනවා. සජිත් ප්‍රේමදාසගේ සමගි ජන බලවේගයට මේ රටේ ආගමික නායකයන් පෙන්නන්න බෑ. මුලින් මහා සංඝරත්නය විවේඡනය කළා. දැන් අගරදගුරුතුමාව විවේඡනය කරනවා. ජනතාව 05 වෙනිදාට මේ ප්‍රකාශ වලට උත්තර දේවි.”

කොවිඩ් – 19 වසංගත තත්ත්වය හේතුවෙන් සමාජ දුරස්ථභාවයට අදාල රෙගුලාසි තවදුරටත් ක්‍රියාත්මක වුවහොත් නව වැනි පාර්ලිමේන්තුවේ  කාරක සභා රැස්වීම්  ඩිජිටල් තාක්ෂණය ඔස්සේ ඔන්ලයින් ක්‍රමයට සිදු කිරීමට මේ වන විට සැලසුම් කරමින් තිබේ.

මේ අනුව ඒ සදහා ඇති හැකියාවන් සහ තාක්ෂණික අඩුලුහුඬුකම් හදුනා ගැනීමේ  පෙරහුරුවක් පාර්ලිමේන්තුවේ කාරක සභා ශාලාවකදී පැවැත්විණ. පාර්ලිමේන්තුවේ මහලේකම් ධම්මික දසනායක, නියෝජ්‍ය මහ ලේකම් සහ කාර්ය මණ්ඩල ප්‍රධානී නීල් ඉද්දවෙල යන මහත්වරු ඇතුළු ඉහළ නිළධාරීහු පිරිසක් මෙම පෙරහුරුව සදහා එක්ව සිටියහ.

කාරක සභා නියෝජනය කරන මන්ත්‍රීවරුන්ට, රාජ්‍ය නිලධාරීන්ට සහ සිවිල් ජනතාවට  පාර්ලිමේන්තුවට  පැමිණීමෙන් තොරව ඩිජිටල් තාක්ෂණය ඔස්සේ ඔන්ලයින් ක්‍රමයට කාරක සභා රැස්වීම්වලට සහභාගිවීමට මෙමගින් අවස්ථාව හිමිවේ.පාර්ලිමේන්තු රැස්වීම් නොපැවැත්වෙන දිනයන්හිදී පවා  පාර්ලිමේන්තු මන්ත්‍රීවරුන්ට ද පාර්ලිමේන්තුවට පැමිණීමෙන් තොරව ඩිජිටල් තාක්ෂණය ඔස්සේ ඔන්ලයින් ක්‍රමයට කාරක සභා රැස්වීම්වලට සම්බන්ධ වීමට හැකිවන පරිදි තාක්ෂණික කටයුතු සකස් කිරීමට සැලසුම් කරමින් තිබේ.

මේ වන විටත් කමිටු රැස්වීම් ශාලා කිහිපයක  සජීවි පටිගත කිරීම් සදහා අවශ්‍ය කැමරා උපකරණ සවිකර ඇති බැවින් ඔන්ලයින් තාක්ෂණය ඔස්සේ කමිටු රැස්වීමට ඇති හැකියාව සාර්ථකව අත්හදා බැලූ   බව    මහලේකම් ධම්මික දසනායක මහතා පැවසීය. මතුවු සුළු අඩුලුහුඩුකම් නිවැරදි කරගනිමින් ඉදිරියට යාමට අපේක්ෂා කරන බව ද හෙතෙම අවධාරණය කළේය.

තවද පාර්ලිමේන්තුව සතුව මේවන විට කාරක සභා කාමර 8ක් පමණක් ඇති බැවින් පාර්ලිමේන්තු දිනයන්හිදී  ඇතිවන ඉඩකඩ ගැටලුව සදහා  ඇතිවන  තදබදය මෙන්ම කාලය සහ වියදම අවම කරගැනීමට ඇති හැකියාව හේතුවෙන් කොවිඩ් වසංගත කාලයට සීමා නොවී ඉදිරියටත් මෙම ක්‍රමවේදය ක්‍රියාත්මක කිරීම සුදුසු බව ද මහලේකම්වරයා පෙන්වා දුන්නේය.

මේ අනුව නව  වැනි පාර්ලිමේන්තුව ආරම්භ වූ විට මේ සම්බන්ධව යෝජනා කිරීමට බලාපොරෝත්තු වන බවද මහලේකම් ධම්මික දසනායක මහතා වැඩිදුරටත් පැවසීය.

අපි දැක්කා පහුගිය ආණ්ඩුවේ ජනාධිපතිවරයා එක පක්ෂෙක ඉන්නකොට අගමැතිවරයා අනෙක් පක්ශයේ ඉන්නකොට ඇති වුණු තත්වය. ජනාධිපති කියනදේ අගමැති කරන්නේ නැහැ . අගමැති කියනදේ ජනාධිපතිවරයා කරන්නේ නැහැ. ඒ නිසා ඒ තත්වය නැවත ඇතිකරන්න පුළුවන් කමක් නැහැ

“අපෙන් පෞද්ගලිකව පළිගැනීම සදහා ගෙන ආ 19  වැනි සංශෝධනය අද විහිලු ව්‍යවස්ථාවක් බවට පත්වෙලා තියෙනවා. ඒ නිසා මේ ව්‍යවස්ථාව සංශෝධනය කිරීමට  මැතිවරණය ඉතා ඉහලින් ජයග්‍රහණය කරවා තුනෙන් දෙකක බලයක් ලබාදීමට ජනතාවට තියෙනවා‘ යැයි අද  (21) දහවල් වාරියපොල දී පැවති ජනහමුවකදී අග්‍රමාත්‍යවරයා ප්‍රකාශ කළේය.

එහිදී වැඩි දුරටත් අදහස් දැක්වූ අගමැති මහින්ද රාජපක්ෂ මහතා මෙසේද ප්‍රකාශ කළේය.

“අපෙන් පෞද්ගලිකව පළිගැනීම සදහා ගෙන ආ 19  වැනි සංශෝධනය අද විහිළු ව්‍යවස්ථාවක් බවට පත්වෙලා තියෙනවා. ඒ නිසා මේ ව්‍යවස්ථාව සංශෝධනය කිරීමට  මැතිවරණය ඉතා ඉහළින් ජයග්‍රහණය කරවා තුනෙන් දෙකක බලයක් ලබාදීමට ජනතාවට තියෙනවා.

දැන් මේවා ලියපු ඉදිරිපත් කරපු අයම කියනවා මේ ව්‍යවස්ථාව වෙනස් කරන්න ඕනෙ කියලා. අද තමුන්ණාන්සේලා මට වඩා හොදට දේශපාලනය දන්නවා. එදා වගේ නෙමෙයි හැමදෙනෙක්ම ඉතා සංවේදීව හොද අවබෝධයකින් ඉන්නවා.

තමුන්ණාන්සේලා දන්නවා 2015 දී අපි පැරදුනායින් පස්සේ මේ රටේ ඇතිවූ තත්වය. ඒ අවුරුදු පහ තුළ රටේ සංවර්ධනය සම්පූර්ණයෙන්ම අඩපණ වෙලා ගියා. අපි ගෙනාපු සංවර්ධනය ශක්තිමත් ආර්ථිකය කඩා වැටුනා. අපිට ආපහු බාරදුන්නේ කැඩිලා වැටිච්ච ණය වෙච්චි ආර්ථිකයක්. ඒ නිසා මේ තත්වයේ වෙනසක් ඇති කරන්න අපි දැන් සූදානම් වෙලා තියෙනවා. ඒ යුගයේදී ආර්ථිකය කඩාවැටීම නිසා විරැකියාව වැඩිවුණා.

රටේ හැම අංශයකම දුර්වලතාවයක් පෙන්නුවේ පසුගිය වසර පහ තුළ. පාරවල් ටික, වැව් අමුණු හදන එක විතරක් නෙමෙයි සම්පූර්ණ සංවර්ධනයම නැවතුනා. ඔවුන්ට ඒ සදහා විසදුම් තිබුණේ නැහැ. අඩුම වශයෙන් වන අලි ගැටලුව විසදීමටවත් ඔවුන් කටයුතු කළේ නැහැ. ඒ අලිමිනිස් ගැටුම නැවැත්වීමට පියවර ගන්න ඔවුන්ට ශක්තියක් තිබුණේ නැහැ . මේ තත්වය යටතේ තමයි අපි මේ පාර්ලිමේන්තු මැතිවරණය පවත්වන්නේ.

ජනාධිපතිවරණය අවසන් වුණත් පාර්ලිමේන්තුවට වසර හතර හමාරක් යනතුරු විසුරුවන්න පුළුවන් කමක් තිබුණේ නැහැ. අපි ආණ්ඩුවක් පිහිටෙව්වත් ඉදිරියට යන්න පුළුවන් කමක් තිබුණේ නැහැ. විපක්ෂයට වැඩියි. අපි මුදල් පනතක් ගේන්න උත්සාහ කල හැම වෙලාවකම විපක්ෂය ඒක පරාජය කරන්න බලනකොට අපිට පසුබහින්න සිදුවුණා.

අපි දැක්කා පහුගිය ආණ්ඩුවේ ජනාධිපතිවරයා එක පක්ෂෙක ඉන්නකොට අගමැතිවරයා අනෙක් පක්ශයේ ඉන්නකොට ඇති වුණු තත්වය. ජනාධිපති කියනදේ අගමැති කරන්නේ නැහැ . අගමැති කියනදේ ජනාධිපතිවරයා කරන්නේ නැහැ. ඒ නිසා ඒ තත්වය නැවත ඇතිකරන්න පුළුවන් කමක් නැහැ. ජනාධිපතිවරයාට නිදහසේ වැඩකටයුතු කරගෙන යා හැකි ජනාධිපතිවරයා නියෝජනය කරන පක්ශයේ සහයෝගය දක්වන ආණ්ඩුවක් පිහිටුවිය යුතුයි. එහෙම නැත්නම් මේ හේතුවෙන් බැටකන්නේ අවසානයේ ජනතාව. ඒක තමයි ඇත්ත කතාව.

අපි අද සූදානම් වෙලා තියෙනවා මේ කටයුත්ත කරන්න. අපි දන්නවා මේ ඩී.බී. හේරත් ඇමතිතුමා ප්‍රදේශයේ අගලක් පාසා දන්නවා. අපි හැම අවස්ථාවකදීම අපේක්ෂකයින් තෝරාගත්තේ ආසනය ගැන විතරක් බලලා නෙමෙයි, තමන්ගේ දිස්ත්‍රික්කය පිලිබඳවත් හොද අවබෝධයක් තිබෙන උදවිය. දිස්ත්‍රික්කයේ හා ආසනයේ සංවර්ධන කටයුතු පිලිබඳව අවබෝධයක් තිබෙන අය. ඒ විතරක් නෙමෙයි. රටේ ආර්ථිකය ගැන, ලෝකය ගැන, දියුණු වන රටවල් ගැන අවබෝධයක් තියෙන අය අපි තෝරාගත්තා.

යහපාලන ආණ්ඩුව ගෙන ආ රටට අහිතකර අණපණත් සියල්ල ඉදිරියේ දී පිහිටුවන නව රජය යටතේ අහෝසි කරන බවට කාර්මික අපනයන, ආයෝජන ප්‍රවර්ධන , සංචාරක හා ගුවන් සේවා ඇමති ප්‍රසන්න රණතුංග මහතා සහතික වෙයි. ඔහු අවධාරණය කරන්නේ ඒ සදහා තුනෙන් දෙකක බලයක් සහිත ආණ්ඩුවක් පිහිටුවිය යුතු බවයි.

තුනෙන් දෙකක බහුතර බලය සහිත ආණ්ඩුවක් පිහිටුව ද එහි විශ්වාසවන්ත පුද්ගලයන් සිටීම අත්‍යවශ්‍යය බව පැවසු ඇමති රණතුංග මහතා ඒ නිසා මෙවර පාර්ලිමේන්තුවට පත් කළ යුත්තේ මහින්ද හැර නොයන විශ්වාසවන්ත පුද්ගලයන් පමණක් බව ද කීවේය. මේ නිසා මහින්ද මහත්තයා දාලා නොයන කොන්ද කෙළින් තියෙන මිනිසුන් පාර්ලිමේන්තුවට එවන්නැ‘යි ජනතාවගෙන් ඉල්ලා සිටින බව ද ඇමතිවරයා සදහන් කළේය.

අද (21) පැවති මිනුවන්ගොඩ ශ්‍රී ලංකා පොදුජන පෙරමුණු ආසන බල මණ්ඩල රැස්වීම අමතමින් ඇමතිවරයා මේ බව සදහන් කළේය. රැස්විම නයිවල සිටි සෙන්ටර් ශාලාවේ දී පැවැත්විණ.

මෙහිදි වැඩි දුරටත් අදහස් දැක් වු ඇමතිවරයා මෙසේ ද කීවේය.

“ මහින්ද රටේ නායකත්වයට පත් කිරීම සදහා එදා අපි ආරම්භ කරපු සටනේ අවසන් මෙහෙයුම තමයි මේ මැතිවරණය. අවුරුදු තුනක්, හතරහමාරක් මම මේ වෙනුවෙන් දුක් වින්දා. මේ රටට ආදරය කරන මිනිසුන් දුක් වින්දා. අපිව හැමදාම FCID  ගෙනිච්චා. අපි වැරදි කරලා නැති නිසා අපි බය වුණේ නෑ. මම හැමදාම හෘද සාක්ෂියට එකගව වැඩ කරපු මිනිහෙක්. අපිට තනතුරු වරප්‍රසාද දෙන්න අඩගැහුවා. ඒත් අපි මහින්ද මහත්තයාව දාලා ගියේ නෑ.

මහින්ද මහත්තයාව අගමැති කරලා අපි හදන්න හදන්නේ නීතිගරුක රටක්. සැමට එක සමාන රටක්. එක නීතියක්.  ඒකට නායකත්වය දෙන්නේ ගෝඨාභය ජනාධිපතිතුමා සමග මහින්ද අගමැතිතුමා. වසර තිහක යුද්ධය අවසන් කරලා රට ගොඩනගන වැඩ පිළිවෙලක් සකස් කළා. ඒ වැඩ පිළිවෙල 2015 දී අතරමග දී නතර කෙරුණා. ඒ සංවර්ධනය නැවත රට තුළ ඇති කරන්නයි අපි ආණ්ඩුවක් පිහිටුවන්න බලය ඉල්ලන්නේ. සමහරු අහනවා ගෝඨාභය ජනාධිපති වෙලා මාස 08යි. මොනාද කළේ කියලා. ගෝඨාභය මහත්තයා බලයට පත්වෙලා මාස 08 ක් වුණත් පළවෙනි මාස 03 එජාප බහුතර බලයක් සමගයි අපිට ආණ්ඩුව ගෙනියන්න වුණේ. එජාපය කළේ ඒ කාලයේ ආණ්ඩුවේ කකුලෙන් ඇදීමයි. ඊට පස්සේ පහුගිය කාලය කුළ කොරෝනා වසංගතය නිසා රටේ ජනතාව රැක බලාගන්න කාලය ගත වුණා. බැරිවෙලාවත් රනිල් – මෛත්‍රී ජෝඩුව කොරෝනා කාලේ බලයේ හිටියානම් මේ රටේ හැම ගෙදරකටම සුදු කොඩි දාන්න වෙනවා. රටේ මිනී කදු ගොඩ ගැහෙනවා. රට තුල සමූහ මිනීවල වල් හැදෙනවා.

කොරෝනා වසංගතයෙන් මේ රට මුදා ගත්ත එක තමයි ගෝඨාභය මහත්තයා ජනාධිපති වෙලා රටට කරපු ලොකුම සේවය. ඒක පිළිගන්න බැරි පාට කණ්ණාඩි දාලා බලන උදවියට විතරයි. පාස්කු ප්‍රහාරය ගැන සියලු තොරතුරු දීලා ඒක නවත්ගන්න බැරි වුණ යහපාලනය කොරෝනා එනකොට හිටියා නම් මේ රටට දෙවියන්ගේ ම පිහිට තමයි. ගෝඨාභය මහත්තයාගෙන් රට ඉල්ලන වෙනස කරන්න නම් අපි ස්ථාවර ආණ්ඩුවක් හදන්න ඕනේ. තුනෙන් දෙකක බලයක් සහිත ආණ්ඩුවක් හදන්න ඕනේ.

පහුගිය යහපාලන ආණ්ඩුව තුනෙන දෙකක බලයක් තියාගෙන කටයුතු කළේ රටට හිතකර අණපණත් ගෙනෙන්න නෙමෙයි ඔවුන් කටයුතු කළේ අන්තවාදී දෙමළ හා මුස්ලිම් නායකයන්ගේ අවශ්‍යතා ඉටු කරන්නයි. ඔවුන්ට අවශ්‍ය පරිදි රටේ නීති සම්පාදනය කරන්නයි. ව්‍යවස්ථා සංශෝධනය ගේන්න හැදුවේ ඒකටයි. යහපාලන ආණ්ඩුවට තිබුණ ලොකුම වුවමනාව තමයි සමලිංගික පණත සම්මත කිරීම. ඒ වගේ ම බෞද්ධ ආගමට ආණ්ඩුක්‍රම ව්‍යවස්ථාවෙන් දීලා තිබුණ අවස්ථා අහිමි කරන එක. රටේ ජනතාවගේ වාසනාවට තමයි පහුගිය ජනාධිපතිවරණයේ දී මේ යහපාලන නාඩගම ඉවර වුණේ. දැන් ආපහු වතාවක් මේ නාඩගම රගදක්වන්න ලෑස්ති වෙනවා. මේ පාර මහ මැතිවරණයෙන් මේ යහපාලන නඩය සම්පූර්ණයෙන් ම කුජීත වෙනවා.

පහුගිය යහපාලන ආණ්ඩුව කාලයේ ගෙනාපු රට වනසන අණපණත් සියල්ල අගෝස්තු 05 වෙනිදා පත් වන අපේ ආණ්ඩුව විසින් අහෝසි කරනවා. රටටත්, ජනතාවටත් අහිතකර මේ අණපණත් තවදුරටත් පවත්වාගෙන යන්න අපිට අවශ්‍ය නෑ.

 මේ අණපණත් අහෝසි කරන්න අපට තුනෙන් දෙකක බහුතර බලය සහිත ආණ්ඩුවක් අවශ්‍යයි. ඒ ආණ්ඩුවට පත් කළ යුත්තේ මහින්ද අතහැර නොයන මහින්ද වෙනුවෙන් පෙනී සිටින විශ්වාසවන්ත පුද්ගලයන් පමණයි. ඒ නිසා මෙවර මැතිවරණයේ දී මහින්ද හැර නොයන අය පාර්ලිමේන්තුවට පත් කරන්න. මතකනේ මෛත්‍රී කිවුවා උකුසු කථාවක්. මෛත්‍රී උකුස්සා ලෑස්ති වෙන්නේ මොකාට ද කියලා අපි හොද අවධානයෙන් ඉන්නේ.

උකුස්සන්ට අල්ලගන්න අපි මාලු දෙන්න ලෑස්ති නෑ. මෛත්‍රීපාල හිටපු ජනාධිපතිවරයාට නැවත උකුසු සෙල්ලම් දාන්න ඉඩ නොදෙන පිරිසක් පාර්ලිමේන්තුවට යැවීම අපේ වගකීම. ඒ වගකීම ඉටු කරන්න අපි සුදානම්. ඒ නිසා පොහොට්ටුව අතහැර නොගිය පිරිසක් පාර්ලිමේන්තුවට යවන්න. වසර හතරක්, පහක් දුක් විදපු අපිට නැවත වළේ වැටෙන්න බෑ”.

මිනුන්ගොඩ ප්‍රාදේශීය සභාවේ සභාපති කුමාර අරංගල්ල, උප සභාපති සුජීව සම්පත් යන මහත්වරුන් ද මෙහි දී කථා කළහ.