Blog

දැනට කල්පිරී ඇති වාහන ආදායම් බලපත්‍ර නිකුත් කිරීම ජූලි 31වැනි දින දක්වා සහන කාලයක් ලබාදීමට තීරණය කර ඇති බව බස්නාහිර පළාත් ප්‍රධාන ලේකම් නිවේදනය කරයි. ඒ අනුව 2020 මාර්තු 13 වැනි දින සිට ජූලි 31 දක්වා කාලසීමාව තුළ කල් පිරෙන වාහන ආදායම් බලපත්‍ර අලුත් කිරීමේදී දඩ මුදලක් අය නොකරන බව බස්නාහිර පළාත් ලේකම්වරයා වැඩි දුරටත් අවධාරණය කරයි.

ධුරි ඩික්සිත්, යුගයක් ඒකාලෝක කළ කියා නිම කළ නොහැකි සුන්දරත්වයක් ඇති නිළි රැජිණ. බොලිවුඩයේ පමණක් නොව ලංකාවේත් අතිෂය ජනප්‍රියයි. මධුරිගේ ප්‍රේමණීය රංගනය පමණක් නොව ඇයගේ අති සුන්දර විලාසිතා, විශේෂයෙන් සාරි විලාසිතාත් ඉන්දීය කතුන් අතර සේම අපේ ලංකාවේ කතුන් අතරත් අතිෂය ජනප්‍රියයි. බොලිවුුඩ් විචාරකයින් කියන්නේ මධුරි ‘සැබෑ නිල් ඉන්දියානු සුන්දරත්වය (true blue Indian beauty) ඉස්මතු කළ බවයි.

ඉතිං මධුරි ගැන අප තුළ තිබෙන ඒ අසීමිත ආදරණය නිසාම අප තීරණය කළ මධුරි ගැන පසුගිය ෆිල්ම් ෆෙයාර් සගරාවේ පළ වෙලා තිබුණ නවතම තොරතුරු අපේ පාඨකයින් වෙත ගෙන එන්න. ඒත් මෙහි විශේෂත්වයක් තිබෙනවා. ඒ තමයි අපි ඉදිරිපත් කරන්නේ මධුරිගේ සාරි විලාසිතා 20ක් වීම.

ධක්-ඩක් දැරිය, නැටුම් රැජින, නියම ඩිවා… (Dhak-Dhak girl, dancing queen, the real diva) මධුරි ඩික්සිත්ට ඇගේ නමට මාතෘකා රාශියක් තිබෙනවා. ඇය බොලිවුඩයේ ෙවඩාත්ම කීර්තිමත් රංගන ශිල්පිනියක් වන අතර ඇය සුන්දරත්වය, කරුණාව සහ අලංකාරයේ එකතුවක් ලෙස සැලකෙනවා. 

මධුරි 1984 දී අබොද් Abodh චිත්‍රපයට සමඟ සිය වෘත්තීය ජීවිතය ආරම්භ කළ අතර ඉන්දියානු සිනමාව නව පරපුරේ වීරවරියක් ලෙස අවධානයට ලක් වුණා. මේ යුගයේ බොලිවුඩයේ ආධිපත්‍ය දරමින් සිටි සුරූපී නිළි ශ්‍රී දේවි හට  තරඟයක් ලබා දුන් එකම නිළිය ඇය බවයි විචාරකයින් කියන්නේ.

ඊට පසු ආපසු හැරීමක් සිදු වුණේම නැහැ. 90 දශකය තුළ මධුරි ප්‍රමුඛ නිළිය ලෙස බොලිවුඩය තුළ තම ආධිපත්‍ය පැතිරූ අතර සෑම නව නිළියකටම ඇගේ පසු පසට යාමට සිදු වුණා.

මේ සමග ඇය ක්‍රමයෙන් බොලිවුඩයේ දක්ෂතම නර්තන ශිල්පිනිය බවට පත්වූ අතර රිදී තිරය මත සහ සැබෑ ජීවිතය තුළ සුපිරි විලාසිතා අනුගමනය කරන නිරූපිකාවක් ලෙස කිරුළු පැළැන්දා.

දේව්දාස් චිත්‍රපටයෙන් පසු මධුරි රිදී තිරයෙන් වසර පහක කාලයක් ඈත්ව සිටියා. ඊට පසුව 2007 දී ආජා නැච්ල් Aaja Nachle සමඟ ආපසු බොලිවුඩය ආක්‍රමණය කළා. ඊට පසු මාධුරි නැවතත් චිත්‍රපට රැසකට රංගනයෙන් දායක වුණා. ඒ අතර දේද් ඉෂ්කියා Dedh Ishqiya, ගුලාබි කල්ලිය Gulabi Gang සහ කලන්ක් Kalank වැනි චිත්‍රපටවල පෙනී සිටි අතර ඇය තමා තව දුරටත් බොලිවුඩයේ රැජිණ බව ඔප්පු කළා.

මේ අතර මධුරි සුපුරුදු ලෙස විලාසිතා ලෝකය තුළ ද අඛණ්ඩව ක්‍රියාකාරී වුණා. ප්‍රකට විලාසිතා සන්නාම රැසක නියෝජිතවරියක් බවට පත් වුණා.

ඔබ දන්නවාද අද (මැයි 15) මධුරිගේ උපන් දිනයයි. ඇය අද දින 53 වැනි වියට පා තබනවා. ඇය වයසින් වියපත් වුණත් ඇය දකින ඕනෑම අයෙක් 80 දශකයේ මධුරිව සිහිපත් වීම වළක්වන්න බැහැ.

ඉතිං, මධුරිට සුභ උපන්දිනයක් පතන ගමන් අපි ඔබව මධුරි ඩික්සිත්ගේ පින්තූර 20 ක් සමග ඇගේ සුපිරි සාරි විලාසිතා 20ක්ම ඔබ වෙත ගෙන එනවා.

Text &pic @ filmfare – by Thushadhavi

අපේ නිර්දේශය නම් ඕනෑම රටකට පවතින අවදානම තවමත් ඉහළම මට්ටමින් පවතින බව සැලකිය යුතු බවයි – ලෝක සෞඛ්‍ය සංවිධානය

නව කොරෝනාවෛරසය “කිසිදා තුරන් නොවිය හැකි” බවට ලෝක සෞඛ්‍ය සංවිධානය (WHO) අනතුරු අඟවයි. මෙම වෛරසය ලෝකයෙන් තුරන් වන්නේ කවදාදැයි අනාවැකි පළ කිරීමට දරන උත්සාහයට එරෙහිව මෙම අනතුරු ඇඟවීම කරනු ලැබුවේ ලෝක සෞඛ්‍ය සංවිධානයේ, හදිසි අවස්ථා පිළිබඳ අධ්‍යක්‍ෂ, වෛද්‍ය මයික් රයන් විසිනි.

බදාදා (මැයි 13) පැවති කරුණු පැහැදිලි කිරීමක දී ඔහු තවදුරටත් කියා සිටියේ එන්නතක් සොයා ගැනීමට හැකියාවක් ලැබුනත් වෛරසය පාලනය කිරීම සඳහා “අති විශාල පරිශ්‍රමයක්” දැරීමට සිදුවනු ඇති බවය.

මේ වන විට නව කොරෝනාවෛරසය ආසාදනය වීම නිසා ලොව පුරා 300,000කට ආසන්න පිරිසක් මිය ගොස් ඇති අතර මිලියන 4.3කට අධික පිරිසකට ආසාදනය වූ බවට තහවුරු වී තිබේ.

ලෝක සෞඛ්‍ය සංවිධානය පවසන්නේ මොනවාද?

“මේ ගැන කතා කිරීම ඉතා වැදගත්. මේ වෛරසය අප අතර දිගටම පවතින තවත් වෛරසයක් බවට පත් විය හැකියි. එය කිසිදා ලොවින් තුරන් නොවන වෛරසයක් වෙන්නත් පුළුවන්.” ජිනීවා නුවර පැවති මාධ්‍ය සම්මන්ත්‍රණයක් අමතමින් වෛද්‍ය මයික් රයන් පැවසීය.

“HIV තුරන් වෙලා ගිහින් නැහැ. නමුත් ඒ වෛරසයට මුහුණ දීම සඳහා අපි හැඩ ගැහුණා.”

“මෙම වෛරසය අතුරුදහන් වන්නේ කවදාද යන්න පිළිබඳව” කිසිවෙකුට අනාවැකි පළ කළ හැකිවෙතැයි තමා විශ්වාස නොකරන බව ද හෙතෙම පැවසීය.

එන්නත් සොයා ගෙන තිබියදීත්…

මේ වන විට නව කොරෝනාවෛරසයට එරෙහිව එන්නත් 100කට අධික ප්‍රමාණයක් සංවර්ධනය වෙමින් පවතී.

නමුත් එන්නත් සොයා ගෙන තිබියදීත් සදහටම තුරන් කිරීමට නොහැකි වූ සරම්ප වැනි රෝග තවමත් ඇති බව වෛද්‍ය රයන් සිහිපත් කළේය.

මේ අතර ලෝක සෞඛ්‍ය සංවිධානයේ අධ්‍යක්‍ෂ ජනරාල්, විශේෂඥ වෛද්‍ය Tedros Adhanom Ghebreyesus අවධාරණය කර සිටියේ පරිශ්‍රමයක් දැරීම තුළින් මෙම වෛරසය පාලනය කර ගත හැකි බවය.

“ඉදිරි ගමන් මග තියෙන්නේ අපේ අතේ. එය හැම දෙනාගේම කාර්යභාරයක්. මේ වසංගතය නතර කිරීම සඳහා හැම දෙනාගේම සහයෝගය තිබිය යුතුයි,” ඔහු පැවසීය.

වසංගතයෙන් මිදීමට කාලයක්

මෙම මාධ්‍ය සම්මන්ත්‍රණය අමතමින් ලෝක සෞඛ්‍ය සංවිධානයේ වසංගත රෝග පිළිබඳ විශේෂඥ මාරියා වැන් කර්කොෆ් ප්‍රකාශ කළේ මෙම වසංගතයෙන් මිදීමට කාලයක් ගතවනු ඇති බවට තේරුම් ගනිමින් ඒ සඳහා අපගේ මනස සකසා ගත යුතු බවය.

ඔවුන් මෙම කරුණු ඉදිරිපත් කළේ ඇතැම් රටවල් සිය ලොක්ඩවුන් නීති ලිහිල් කරමින් සහ තම ආර්ථිකය නැවත විවෘත කළ යුත්තේ කවදාද හා කෙසේද යන්න පිළිබඳව රාජ්‍ය නායකයන් සැලකිලිමත් වෙමින් සිටින අතරතුරය.

දෙවැනි වසංගත රැල්ලක්

කෙසේ නමුත් ලොක්ඩවුන් නීති ලිහිල් කිරීමේදී දෙවැනි වසංගත රැල්ලක් ඇති නොවන බවට සහතිකයක් දිය හැකි ක්‍රමවේදයක් නොමැති බවට ලෝක සෞඛ්‍ය සංවිධානයේ අධ්‍යක්‍ෂ ජනරාල්වරයා අනතුරු ඇඟවීය.

“විවිධ ක්‍රියාමාර්ග ඔස්සේ මේ තත්වයෙන් මිදීමට බොහෝ රටවල් කැමති වේවි. නමුත් අපේ නිර්දේශය නම් ඕනෑම රටකට පවතින අවදානම තවමත් ඉහළම මට්ටමින් පවතින බව සැලකිය යුතු බවයි” ඔහු ප්‍රකාශ කළේය.

මේ අතරතුර වෛද්‍ය මයික් රයන් ප්‍රකාශ කළේ “ලොක්ඩවුන් කිරීම හැම අතින්ම සාර්ථකයි කියන සහ ඒ නීති ඉවත් කිරීමෙන් සියල්ල ඉතා හොඳින් සිදුවේවි කියන අපූරු සිතුවිලි අසන්නට ලැබෙනවා. ඒ ක්‍රම දෙක තුළ ම අනතුර ගැබ්වෙලා තියෙනවා,” යනුවෙනි.

විශාදය සහ මානසික රෝග

මෙම වසංගත තත්වය හේතුවෙන් විශාදය සහ මානසික රෝග වැඩි වශයෙන් වාර්තාවන බවත් එය ප්‍රධාන වශයෙන් මානසික සෞඛ්‍යය සේවා සඳහා නිසි පහසුකම් නොමැති රටවලට බලපානු ඇති බවටත් ලෝක සෞඛ්‍ය සංවිධානය අනතුරු ඇඟවීය.

එම නිසා මෙම වසංගතය මැඬලීම සඳහා සමස්ථ ක්‍රියාමාර්ග අතරට මානසික සෞඛ්‍ය සේවාවන් ද එක්කරන ලෙස එම සංවිධානය සියලු රටවල ආණ්ඩුවලින් ඉල්ලීමක් කළේය.

කොරෝනා වෛරස් වසංගතය ලෝක මට්ටමින් මහජන මානසික ආතතියකට හේතු වී ඇතැයි එක්සත් ජාතීන්ගේ සංවිධානය ද පවසයි.

ඒ සම්බන්ධයෙන් වැඩිදුරටත් කරනු පැහැදිලි කරන එක්සත් ජාතීන්ගේ සංවිධානය ‘කොරෝනා වෛරසයට ප්‍රතිචාර දැක්වීමේ ප්‍රධාන කාර්යභාරයේ කොටසක් වශයෙන් මහජන මානසික සෞඛ්‍යය සඳහා ආධාර වෙන් කරන ලෙස ලෝකයේ රටවලින් ඉල්ලීමක් කළේය.

ඒ පිළිබඳව බීබීසිය විසින් පළ කරනු ලැබ ඇති වීඩියෝ පටයකට අදහස් දක්වන පිරිසක් ඔවුන් ‘ලොක්ඩවුන් ‘ කාල සීමාවේ පසුවෙන තත්වය විස්තර කර තිබිණ.

රාමදාන් සමයේ තමන්ට වෙනදාට වඩා වෙනත් ආකාරයකට ආගමික කටයුතුවල නිරතවීමට සිදු වූ බව ඔවුන් අතර වූ එක් කාන්තාවක් පවසන අතර, පවතින වාතාවරණය යටතේ, තමන්ට මානසික සායන සඳහා යොමුවීමට සිදුවූයේ අන්තර්ජාලය හෝ වීඩියෝ තාක්ෂණය ඔස්සේ බවත් එහිදී සඳහන් විය.

මෙම වාර්තාව අද (14) දින බී.බී.සී සන්දේශය වෙබ් අඩවියේ පළ වූවකි. කාලීනභාවය සලකා එය සම්පූර්ණයෙන්ම උපුටා ගෙන මෙහි පළ කරන ලදි – ප්‍රධාන සංස්කාරක

රජයේ දැවැන්ත ආර්ථික ඉලක්ක සපුරා ගැනීමට අදාළ ප්‍රතිපත්ති රට හමුවේ තබා ඇති බැවින් ඒවා හඹා යෑමේදී තාර්කික නොවන නීති රීති බාධාවක් කරගත යුතු නැතැයි ජනාධිපති ගෝඨාභය රාජපක්ෂ මහතා කියා සිටී.

අමාත්‍යාංශ ලේකම්වරුන් සහ වැවිලි සහ කර්මාන්ත අංශයට අයත් ආයතන ප්‍රධානීන් සමග අද (14) පස්වරුවේ ජනාධිපති කාර්යාලයේ පැවැති විශේෂ සාකච්ඡාවකදී ජනාධිපතිවරයා මේ බව පැවසීය.

වැවිලි හා කර්මාන්ත ක්ෂේත්‍රයට අදාළව දීර්ඝ කාලයක් පැවති ගැටළු නිරාකරණය සඳහා සාකච්ඡාව කැඳවා තිබිණි.

රජයේ සහ අනුබද්ධ ආයතනවල පවතින ගැටළු නීති මාර්ගයට නොගොස් සාකච්ඡා මාර්ගයෙන් විසඳා ගත යුතු බව ජනාධිපතිවරයා අවධාරණය කළේය. රාජ්‍ය දැව සංස්ථාව සහ රාජ්‍ය වැවිලි සමාගම අතර දීර්ඝ කාලයක් පැවති නීතිමය ගැටළු පිළිබඳව දීර්ඝ වශයෙන් සාකච්ඡා කෙරිණ.

“රටට ආවේණික නොවන සහ පරිසර සංරක්ෂණයට අදාළ නොවන වන වගා ඉවත් කොට රටට ගැලපෙන වගා හඳුන්වාදීමේ වැදගත්කම ද ජනාධිපතිවරයා පෙන්වා දුන්නේය. මහා භාණ්ඩාගාරයට බරක් නොවන ආකාරයට රාජ්‍ය ආයතන පවත්වා ගත යුතුය. ඒ සඳහා සැලසුම් ඉදිරිපත් කිරීමේදී දීර්ඝ කාලයක් ගත යුතු නැත. ඒ ඒ ආයතන අතර අවබෝධයෙන් හා රාජ්‍ය ප්‍රතිපත්ති හඳුනාගෙන කටයුතු කිරීමෙන් බොහෝ ගැටළු විසඳා ගත හැකිය. රජය  නිවැරදි ප්‍රතිපත්තිමය තීරණයක් ගත් විට සියලුම රාජ්‍ය ආයතන එම ප්‍රතිපත්ති අනුව වැඩ කළ යුතුය. හරි දේ කිරීමට කිසිවිටෙක බාධාවක් තිබිය නොහැක. නිවැරදි දේ කිරීමට නොහැකි රාජ්‍ය නිලධාරියා රටට බරකි. රාජ්‍ය නිලධාරියාගේ වගකීම ප්‍රශ්න විසඳීම මිස පැහැර හැරීම නොවන බව” ද ජනාධිපතිවරයා අවධාරණය කළේය.

වසර ගණනාවක් තිස්සේ එතනෝල් ආනයනය නිසා රටේ ආර්ථිකයට විශාල හානියක් වූ බැවින් එය නතර කිරීමට පියවර ගත් බව පෙන්වා දුන් ජනාධිපති රාජපක්ෂ මහතා පෞද්ගලික ව්‍යාපාරිකයන්ගේ බලපෑම්වලට යටත් වී එම තීරණය වෙනස් නොකරන බව ද කීය.

අනුබද්ධ ආයතන අතර පවතින ගැටළු නිසි පරිදි සාකච්ඡාවට නොගැනීමෙන් නඩු මගට යෑමට රජයේ ආයතනවලට සිදුව ඇති බවද මෙහිදී හෙළි විය. ඉඩම් ප්‍රතිසංස්කරණ කොමිෂන් සභාව නඩු 800ක් පමණ ගොනු කර ඇති අතර ඉන් 300 ක් පමණ වැවිලි සමාගම් සමග බවද හෙළි විය. අමාත්‍ය රෙමේෂ් පතිරණ මහතා සහ ජනාධිපති ලේකම් පී.බී. ජයසුන්දර මහතා ද සාකච්ඡාවට එක්ව සිටියහ

අද (14) දින ප.ව. 17.05 වන විට ලංකාවේ කොවිඩ්-19 ආසාදිතයින් සංඛ්‍යාව 925 දක්වා වර්ධනය වී ඇතැයි සෞඛ්‍ය ප්‍රවර්ධන කාර්යාංශයේ නිල වෙබ් අඩවියේ සදහන් වෙයි.

එහි දැක්වෙන්නේ අද දින ප.ව. 17.05 වන විට වාර්තා වී ඇත්තේ 01 ආසාදිතයෙක් බවයි. ඒ අනුව මේ වන විට 462 දෙනකු රෝහල්ගතව ප්‍රතිකාර ලබන අතර විමර්ශන යටතේ 108 දෙනකු සිටීයි. 445 දෙනකු ප්‍රතිකාර ලබා රෝහල්වලින් පිටව ගොස් ඇත.

ඉදිරි සති 2ක තීරණාත්මකයි – හමුදාපති 

මේ අතර ඉදිරි සති  දෙක තුළ  ඉතාමත් තීරණාත්මක බැවින් මහජනයා  සෞඛ්‍ය  උපදෙස් අනුව කටයුතු කළහොත්  කෝවිඞ් වසංගතය ශි‍්‍ර ලංකාවේන්   සදහටම තුරන් කළ හැකි බව හමුදාපති ලූතිනන් ජනරාල් ශවේන්ද්‍ර සිල්වා පවසයි.

රටේ  තීරණයාත්මක ඉදිරි සති දෙක සම්බන්ධයෙන් මාධ්‍ය  විමසුමකට පිළිතුරු දෙමින් හමුදාපතිවරයා මේ බව සදහන් කළේය.

මේ වන විට කොවිඩ්-19  ආසාදිතයන් වාර්තා වන්නේ  විවෘත සමාජයෙන් නොව නිරෝධායන මධ්‍යස්ථාන වල සිටින පුද්ගලයන්ගෙන්  පමණක් බවත් ජනාධිපති ප‍්‍රමුඛ රජය, සෞඛ්‍ය අංශ ඇතුළු සියලූ දෙනා  කැපවීමෙන්  කටයුතු කළේ විවෘත සමාජයෙන් නොව  නිරෝධාන මධ්‍යස්ථාන වලින් පමණක්   රෝගී හමුවීමට  සදහා   බලා ගැනීමට  බවත් එම තත්ත්වයට දැන් රට පත්ව ඇති බව ද යුද්ධ හමුදාපතිවරයා සදහන් කළේය.

මේ තත්ත්වය තුළ ඉදිරි සති දෙක ඉතාමත් තීරණාත්මක බැවින්  සමස්ත   ජනතාව   ඉතාමත් වගකීමෙන්  කටයුතු කරනු ඇතැයි තමා බලාපොරොත්තු වන බව ද යුද්ධ හමුදාපතිවරයා සදහන් කළේය.

ජනතාව වෙනුවෙන් පනවා තිබු  සීමා ක‍්‍රමයක් ක‍්‍රමයෙන්  ලිහිල්  කරමින්   තිබෙන අවස්ථාවක  මහජනයා  හා වගකීමෙන් කටයුතු කළ යුතු බවත්  මහජනයා සෞඛ්‍ය  උපදෙස් කි‍්‍රයාත්මක නොකළහොත්  මෙතෙක් කාලයක් මහත්  කැපවීමෙන්  ලබාදුන් ජයග‍්‍රහනය ගිලිහී යන බවද හමුදාපතිවරයා වැඩිදුරත් සදහන් කළේය.

COVID- 19 වසංගතය නිසා ඇද වැටුණු ආර්ථිකය නැවත ශක්තිමත්ව ගොඩනැගීම සඳහා සාම්ප්‍රදායික චින්තනයෙන් සහ වැඩරාමුවෙන් බැහැරව දායක වන්නැයි ජනාධිපති ගෝඨාභය රාජපක්ෂ මහතා බැංකු ක්ෂේත්‍රයෙන් ඉල්ලා සිටී.

“කොරෝනා වෛරසය අපේ පාලනය යටතේ තබා ගැනීමට රජයට හැකි වුණා. දැන් තිබෙන ලොකුම අභියෝගය කඩා වැටුණු ආර්ථිකය ගොඩගැනීම. ඇඟළුම් කර්මාන්තය යථා තත්වයට පත්වන්නට තව බොහෝ කාලයක් යාවි. සංචාරක ව්‍යාපාරයේත් සිදුව ඇත්තේ බරපතළ පසුබැස්මක්. අහිමි වූ ආදායම සහ රැකියා සංඛ්‍යාව ඉතා විශාලයි. පැරණි ආනයන ක්‍රමය තවදුරටත් ගෙන යන්න බැහැ. අප නිෂ්පාදන ආර්ථිකයක් වෙත යොමු විය යුතුයි. ඒ සඳහා සක්‍රීය ලෙස දායකවීමට බැංකු ක්ෂේත්‍රයට පිළිවන්” යැයි ජනපතිවරයා සඳහන් කරයි.

පශ්චාත් කොරෝනා සමයේ ආර්ථික වර්ධනය සහ සංවර්ධනය උදෙසා සම්පාදිත වැඩසටහනට බැංකු ක්ෂේත්‍රය හවුල් කර ගැනීම සහ එහිදී බැංකු ක්ෂේත්‍රයට මතුව ඇති ගැටළු සාකච්ඡා කිරීම පිණිස අද (14) ජනාධිපති කාර්යාලයේ පැවති හමුවේ දී ජනාධිපතිවරයා මේ අදහස් පළ කළේය. මහබැංකු අධිපති මහාචාර්ය ඩබ්.ඩී. ලක්ෂ්මන් මහතා ප්‍රමුඛ නියෝජ්‍ය අධිපතිවරු, රාජ්‍ය, පෞද්ගලික දෙඅංශයේ බැංකු සභාපතිවරු සහ ප්‍රධාන විධායක නිලධාරීහූ ඊට එක්ව සිටියහ. 

කොරෝනා උවදුර ජය ගැනීම සඳහා සෞඛ්‍ය අංශය ඇතුළු පාලන තන්ත්‍රයේ සෑම පාර්ශ්වයක්ම මහත් කැපවීමෙන් වැඩකළ බව කී ජනාධිපතිවරයා බැංකු ක්ෂේත්‍රයෙන්ද එවැනිම දායකත්වයක් අපේක්ෂා කරන බව පැවසීය.

දැන් ප්‍රමුඛතම අවශ්‍යතාව නිෂ්පාදන ආර්ථිකය ශක්තිමත් කිරීමයි. ඒ සඳහා ආයෝජනය කළ හැකි ක්ෂේත්‍ර රැසක් පවතී. තේ වගාව ඇතුළු වැවිලි කර්මාන්තය, කුඩා සහ මධ්‍ය පරිමාණ නිෂ්පාදන, නිවාස සහ වෙනත් ඉදිකිරීම් කෘෂිකර්මය ආශ්‍රිත නිෂ්පාදන වටිනාකම එකතු කළ කුරුඳු, ගම්මිරිස් වැනි බෝග වර්ග ඉන් කිහිපයකි. මේ ක්ෂේත්‍රවල ව්‍යාපාර ආරම්භ කිරීම සඳහා පහසු කොන්දේසි යටතේ ණය සපයන්නැයි ජනාධිපතිවරයා බැංකු ප්‍රජාවගෙන් ඉල්ලා සිටියේය.

“වාහන සහ ප්ලාස්ටික භාණ්ඩ ආදිය ආනයනය සඳහා ණය දී පහසුවෙන් ලාභ උපයා ගැනීමේ රටාව තවදුරටත් පවත්වාගෙන යන්න බැහැ. වැඩිපුර ණය සම්පාදනය කළ යුත්තේ අලුතින් හඳුනාගත් ප්‍රමුඛතා සඳහා. එසේ නැතිව ජනතාවටත්, ව්‍යාපාරිකයන්ටත් පැවැත්මක් නැහැ. ගොවීන් වැඩි පොළියට වෙළෙඳුන්ගෙන් ණය ගත් විට ඔවුන් වෙළෙඳුන්ගේ ග්‍රහණයට සහ සූරාකෑමට ලක් වෙනවා. එය හැම අතින්ම හානිකරයි. මහ ව්‍යාපාරිකයින්ට සේම සුළු ව්‍යාපාරිකයන්ට සහ ගොවීන්ටත් බැංකු උදව් කළයුතුයි. ”. යනුවෙන් සඳහන් කළ ජනාධිපතිවරයා ණය දුන් පසු ඉන් ප්‍රයෝජන ගන්නා ආකාරය නිරතුරුව විමර්ශනය කළයුතු බව පෙන්වා දුන්නේය.

අතීතයේ දී බැංකුවලින් ණය ගෙන නොගෙවා පැහැර හැර ඇති වැඩිදෙනා දුප්පතුන් නොව ධනවතුන් යැයි ජනපතිවරයා කීය. මධ්‍යම පාන්තිකයන් උදෙසා නිවාස ඉදිකොට සහන මිලට ඒවා බෙදාදීමට සිය ප්‍රතිපත්ති ප්‍රකාශනයෙන් ප්‍රතිඥා දුන් බව සිහිපත් කළ ජනාධිපතිවරයා එවැනි අවස්ථාවල මධ්‍යම පාන්තිකයනට අඩු පොළියට ණය දීමේ වැදගත්කම අවධාරණය කළේය.

සාකච්ඡාවට සහභාගී වූ බැංකු නියෝජිතයෝ ආර්ථික පුනර්ජීවනය සඳහා රජය ගෙන යන වැඩපිළිවෙළට සහයෝගය පළ කළහ. ඔවුන් බැංකු ක්ෂේත්‍රය මුහුණපාන ගැටලු කිහිපයක් ඉදිරිපත් කළ අතර, මහ බැංකුව සමග සාකච්ඡා කොට ඒවා නිරාකරණය කර ගැනීමට එකඟත්වය පළ විය.

අග්‍රාමාත්‍ය මහින්ද රාජපක්ෂ මහතා සහ  ජනාධිපති ලේකම් පී.බී. ජයසුන්දර මහතා ද සාකච්ඡාවට එක්ව සිටියහ.

ශ්‍රී ලංකාවට අලුතින් පත්ව සිටින බ්‍රසීල තානාපති, ඉරාන ඉස්ලාමීය ජනරජයේ තානාපති සහ ඉන්දියානු ජනරජයේ මහ කොමසාරිස් අද (14) ජනාධිපති කාර්යාලයේ දී ජනාධිපති ගෝඨාභය රාජපක්ෂ මහතා වෙත සිය අක්තපත්‍ර භාර දුන්හ.

වීඩියෝ සම්මන්ත්‍රණයක් මගින් සිදු කළ අක්තපත්‍ර ප්‍රදානය ඓතිහාසික අවස්ථාවකි. අන්තර්ජාල තාක්ෂණය භාවිතයෙන් මෙවන් ගම්භීර උත්සවයක් ශ්‍රී ලංකාවේ පැවති පළමු අවස්ථාව මෙයයි.

COVID- 19 වසංගතය හමුවේ උද්ගතව ඇති අර්බුදය නිමවන තෙක් අක්තපත්‍ර ප්‍රදාන උළෙල කල් දමනවා වෙනුවට කලින් සූදානම් කළ පරිදි පවත්වන ලෙස රාජපක්ෂ මැතිතුමා විසින් උපදෙස් දී තිබිණි.

මෙය දැනට උද්ගතව ඇති ගෝලීය වසංගත තත්ත්වය හමුවේ ශ්‍රී ලංකාව අනුගත වී ඇති නව ක්‍රමවේදවලින් එකකි. එහි ප්‍රතිඵලයක් ලෙස ලෙස වෛරසය පැතිරීම සාර්ථකව පාලනය කරන අතරතුර සමාජයීය හා ආර්ථික වශයෙන් මෙන්ම දැන් රාජ්‍ය තාන්ත්‍රික වශයෙන් ද ඉදිරියට යාමට ශ්‍රී ලංකාව සමත් වී ඇත.

අද පැවති කෙටි උත්සවයේදී රාජ්‍ය තාන්ත්‍රිකයන් කැමරාව ඉදිරියේ  සිය අක්තපත්‍ර ජනාධිපතිතුමාට භාරදුන් අතර පසුව ජනාධිපතිතුමා විසින් ඔවුන් පිළිගනු ලැබීය.

අද  අක්කපත්‍ර භාරදුන් රාජ්‍යතාන්ත්‍රිකයන් වන්නේ

1. Mr. Sergio Luiz Canaes – Ambassador- designate of the Federative Republic of Brazil based in Colombo –   සර්ජියෝ ලියිස් කනේස් මහතා – ශ්‍රී ලංකාවේ බ්‍රසීල සන්ධීය ජනරජයේ තානාපති

2. Mr. Hashem Ashjazadeh –  Ambassador- designate of the Islamic Republic of Iran based in Colombo – හෂෙමි අෂ්ජාසාදේ මහතා – ශ්‍රී ලංකාවේ ඉරාන ඉස්ලාමීය ජනරජයේ තානාපති

3. Mr. Gopal Baglay –  High Commissioner- designate of the Republic of India based in Colombo –  ගෝපාල් භාග්ලේ මහතා -ශ්‍රී ලංකාවේ ඉන්දියානු ජනරජයේ මහකොමසාරිස්

අමාත්‍ය දිනේෂ් ගුණවර්ධන, ජනාධිපති ලේකම් පී.බී. ජයසුන්දර, විදේශ සබඳතා අමාත්‍යාංශයේ ලේකම් රවීනාත් ආර්යසිංහ සහ විදේශ සබඳතා පිළිබඳ ජනාධිපති අතිරේක ලේකම් අද්මිරාල් ජයනාත් කොළඹගේ යන මහත්වරු ද මේ අවස්ථාවට එක්ව සිටියහ.

ඇඳිරි නීතිය පිළිබඳ නවතම නිවේදනයක් අද (14) දින ජනාධිපති මාධ්‍ය අංශය විසින් නිකුත් කර ඇත. එහි සදහන් වන්නේ කොළඹ සහ ගම්පහ දිස්ත්‍රීක්ක දෙකෙහි ඇඳිරි නීතිය නැවත දැනුම් දෙන තුරු දිගටම ක්‍රියාත්මකව පවතින බවත් සෙසු දිස්ත්‍රීක්කවල ලබන 16, සෙනසුරාදා තෙක් රාත්‍රී 8.00 සිට අලුයම 5.00 දක්වා ඇඳිරි නීතිය බලපැවැත්වෙන බවයි.

එම නිවේදනයේ මෙසේ ද සදහන් වේ.

මැයි 17, ඉරිදා මුළු දවසම දිවයින පුරා ඇඳිරි නීතිය ක්‍රියාත්මක කෙරේ.

කොළඹ සහ ගම්පහ හැර සෙසු දිස්ත්‍රික්කවල ඇඳිරි නීතිය  මැයි 18, සඳුදා අලුයම 5.00 ට ලිහිල් කිරීමෙන් පසු මැයි 23 සෙනසුරාදා දක්වා ක්‍රියාත්මක වනුයේ රාත්‍රී 8.00 සිට අලුයම 5.00 දක්වා පමණි.

කොළඹ සහ ගම්පහ දිස්ත්‍රීක්ක දෙකෙහි ඇඳිරි නීතිය තිබියදී ජන ජිවිතය සහ ආර්ථික ක්‍රියාකාරිත්වය යථා තත්වයට පත් කිරීම සඳහා පසුගිය 11 සඳුදා ආරම්භ වූ වැඩපිළිවෙළ ලබන 16 සෙනසුරාදා දක්වා අඛණ්ඩව ක්‍රියාත්මක කොට මැයි 18 සඳුදා සිට නැවත ඉදිරියට ගෙන යනු ලැබේ.

කලින් නිකුත් කළ නිවේදනවල සඳහන් ඊට අදාළ කොන්දේසි නොවෙනස්ව පවතී.

දෙවන සාධක සත්‍යාපනය නොහොත් 2 factor authentication සක්‍රිය කොට තිබෙනා සමාජ මාධ්‍ය ගිණුම් වලට පිවිසීමේදී පිවිසෙන්නාගේ අනන්‍යතාවය තහවුරු කරගැනීමට භාවිතා කරනු ලබන OTP නොහොත් එක් වරක් පමණක් භාවිතා කළහැකි මුරපද තෙවන පාර්ශවීය SMS සේවා සපයන සමාගමක් හරහා පැමිණීමේදී ඔබගේ සමාජ මාධ්‍ය ගිණුම් වෙනත් පාර්ශවයකට නතුවීමකට හැකිය යන්නෙන් මේ දිනවල සමාජයේ දුර්මත පැතිරෙමින් පවතී.

යම් පාර්ශවයකට OTP අංකයක් ලැබීමෙන් පමණක් ඔබගේ සමාජ මාධ්‍ය ගිණුම් වලට පිවිසීමට නොහැකි අතර ඔබගේ සමාජ මාධ්‍ය ගිණුම් වලට පිවිසීමට නම් එම පාර්ශවයට ඔබගේ සමාජ මාධ්‍ය පරිශීලක නාමය, මුරපදය හෝ ඔබ සමාජ මාධ්‍ය ගිණුම් වලට යොදා ඇති ජංගම දුරකථන අංකය සතුවිය යුතුය. 

මෙලෙස සමාජයේ පැතිරයන දුර්මත කෙරෙහි විමසිල්ලෙන් පසුවන ලෙසත් දෙවන සාධක සත්‍යාපනය සදහා යම් පුද්ගලයෙකු SMS පණිවිඩ හරහා එක් වරක් පමණක් භාවිතා කළහැකි මුරපද ඔබගේ ජංගම දුරකතනයට ගෙන්වා ගැනීම ආරක්‍ෂිත නොවේ යැයි සිතන්නේ නම් එම පුද්ගලයාට google authenticator , microsoft authenticator වැනි ජංගම දුරකථන යෙදුම් හරහා OTP අංක ලබාගැනීමක් සිදුකළහැකි බව අප ශ්‍රී ලංකා තොරතුරු තාක්ෂණ සංගමය ලෙස ජනතාවට දැනුම්දෙමු.

අක්කර 72 ක් ගැසට් කර තිබූ මුහුදු මහා විහාර භූමිය වර්තමානයේ අක්කර 30ක් ලෙස ගැසට් වූ පසු ඉතිරි අක්කර 42 තුළ ඇති පුරාවස්තු වලට සිදු වන්නේ කුමක්දැයි ‘හෙළ බොදු සවිය සංවිධානය පුරාවිද්‍යා බලධාරීන්ගෙන් ප්‍රශ්න කරයි.

එහි සභාපති බුදුගල ජිනවංශ හිමි මාධ්‍ය නිවේදනයක් නිකුත් කරමින් මෙසේද සදහන් කරයි.

අම්පාර පරිපාලන දිස්ත්‍රික්කයේ පොතුවිල් ප්‍රදේශයේ පිහිටි මුහුදු මහා විහාරය පුරාවිද්‍යාත්මක වටිනාකමක් ඇති විහාරයකි. ලංකාවේ ප්‍රථම පුරාවිද්‍යා කොමසාරිස්වරයා වන සෙනරත් පරණවිතාන මහතා  මුහුදු මහා විහාරය පුරාවිද්‍ය සාක්ෂි සමග අක්කර 72 ක් 1951-01-26 වන දින අංක 10205 දරණ ගැසට් පත්‍රය මගින් මූලික පිඹුරු අංක 6392 යටතේ අංක 01 ඉඩම් කැබැල්ලට අයත් වන ලෙස මුහුදු මහා විහාරය පුරාවිද්‍යා භූමියක් බවට ගැසට් කර ඇත.

ඉන්පසුවද 1965-05-28 දින අක්කර 30 ක් පමණ මුහුදු මහා විහාරයට වෙන් කර ගැසට් කර ඇත. පසුව කලින් කල  විහාරයට අයත් බිම් කොටස් මුස්ලිම් ජනතාව විසින් අල්ලා ගැනීමෙන් පසු මෙම ඓතිහාසික භුමියෙන්  දැනට ඉතිරි වී ඇත්තේ අක්කර 08-10 ත් අතර භූමි ප්‍රමාණයකි. මෙවැනි තත්වයක් තුල වත්මන් ආණ්ඩුවද 2020 මැයි මස 14 දින මෙම බිම් ප්‍රමාණය අක්කර 30ක් ලෙස ලෙස ගැසට් කිරීමට තීරණය කර ඇත. මුළු අක්කර 72 ක් වූ බිම් ප්‍රමාණයෙන් අක්කර 30ක් ගැසට් කළ පසු ඉතිරි වන අක්කර 40ක පුරාවිද්‍යාත්මක වටිනාකමක් ඇති  පිලිම/නටබුන් මංකොල්ල කෑමට උත්සාහ කිරීමක්ද යන්න සමස්ථ රටවැසියාට මතුවන ගැටළුවකි.

පුරාවිද්‍යා කොමසාරිස්‌තුමනි, මුහුදු මහා විහාර භූමියේ අයිතිය තහවුරු කරන 1965 අංක 773 පීපී 1450 දරණ පිඹුරුපත පිළිබඳ ඔබ දැනුවත් යැයි අප විශ්වාස කරමු. එසේ නොමැති නම් ඒ පිළිබඳ ඔබ දැනුවත් වන ලෙස  අප ඉල්ලා සිටිමු.  ඒ අනුව විහාරභූමියට අයත් ප්‍රදේශය සංරක්‌ෂණය නව නීති අවශ්‍ය නොවන බව පැහැදිලිය. ඔබ ඒ පිළිබදව වත්මන් ඇමැතිතුමන් දැනුවත් කරනු ඇතැයි අප සිතමු. අප අවධාරණයෙන් පවසා සිටිනුයේ මෙම ඓතිහාසික භූමියට නීතියෙන් උරුම කර දී ඇති අයිතිය පමණක්‌ බෞද්ධයන්ට ලබාදෙන ලෙස පමණකි. මුහුදු මහා විහාරයේ උරුමය රැක ගැනීම වෙනුවෙන් අපි නිරතුරුව අවධියෙන් සිටින බව දන්වා සිටිමු.

විදුලි පාරිභෝගිකයින්ට උපරිම සාධාරණය ඉටුවන පරිදි මාසික බිල්පත් නිකුත් කිරීම හා ගෙවීම සදහා නියමිත සහන කාලය ලබාදීමට ශ්‍රී ලංකා මහජන උපයෝගිතා කොමිෂන් සභාව, ලංකා විදුලි බල මණ්ඩලය හා ලංකා විදුලි පුද්ගලික සමාගම පියවර ගෙන ඇතැයි මහජන උපයෝගිතා කොමිෂන් සභාව විසින් අද (14) දින නිකුත් කළ මාධ්‍ය නිවේදනයක සදහන් වේ.

එම නිවේදනයේ දැක්වෙන්නේ දැනටමත් ප්‍රමාද වී ඇති මාස සදහා නිකුත් කෙරෙන බිල්පත් සදහා කඩිනමින් ගෙවීම් කිරීමෙන් විදුලි පාරිභෝගිකයින්ට ලංවිම හා ලෙකො ආයතනයේ මුල්‍ය තත්ත්වය යහපත් ලෙස පවත්වාගැනීමට සහාය විය හැකි බවයි.

 ශ්‍රී ලංකා මහජන උපයෝගිතා කොමිෂන් සභාව විසින් නිකුත් කළ මාධ්‍ය නිවේදනයේ මෙසේද සදහන් වේ.

මේ සම්බන්ධයෙන් සකස් කල උපමාන ලංකා විදුලිබල මණ්ඩලයට (ලංවිම) හා ලංකා විදුලි පුද්ගලික සමාගම (ලෙකො) විසින් ක්‍රියාවට නගනු ඇත.  බිල්පත් නිකුත් කිරීම ප්‍රමාද වුවද සහන මිලට ලැබෙන විදුලි ඒකක ප්‍රමාණය (ආනුපාතික ක්‍රමයට අනුව) විදුලි පාරිභෝගිකයාට හිමිවන ආකාරයටම බිල්පත් ගණනය කිරීමට හා බිල්පත් ගෙවීම සදහා සාධාරණ කාල සීමාවක් ලබාදීමට අදාල වන පටිපාටි ලංකා විදුලිබල මණ්ඩලයේ හා ලංකා විදුලි පුද්ගලික සමාගමේ යෝජනා මෙන්ම ඇතැම් පාරිභෝගිකයින්ගේ පැමිණිලි ද සැළකිල්ලට ගෙන සකස් කරන ලදී.  

එසේම නිරෝධායන ඇදිරි නීති කාලය තුලදී විදුලි බිල්පත් ආදායම් නොලබිමින් වුවද ලංවිම හා ලෙකො යන ආයතන විදුලි පාරිභෝගිකයාට අඛණ්ඩව විදුලි සැපයුම ලබා දී ඇත. ඉදිරියේදී අඛණ්ඩව ගුණාත්මක විදුලි සේවාවක් ලබාදීම සදහා මෙම ආයතන වල මුල්‍ය තත්වය යථා තත්වයට පත් කල යුතු වේ. දැනටමත් ප්‍රමාද වී ඇති මාස සදහා නිකුත් කෙරෙන බිල්පත් සදහා කඩිනමින් ගෙවීම් කිරීමෙන් විදුලි පාරිභෝගිකයින්ට ලංවිම හා ලෙකො ආයතනයේ මුල්‍ය තත්වය යහපත් ලෙස පවත්වාගැනීමට සහාය විය හැකි බව ශ්‍රී ලංකා මහජන උපයෝගිතා කොමිෂන් සභාව පෙන්වා දෙයි.

ඇදිරි නීති කාලය තුළ නියමිත බිල්පත් සකස්කිරීමේදී පාරිභෝගිකයින්ට උපරිම සාධාරණය ඉටුවන පරිදි බිල්පත් ගණනය සදහා පහත සදහන් නිර්දේශ ක්‍රියාත්මක වේ.

1. නිරෝධායන ඇදිරි නීතිය ආරම්භවීමෙන් පසුව හා අවසාන මනු කියවීමෙන් පසුව නිකුත් කෙරෙන සියළුම බිල්පත් පෙර පරිදිම මාසික පදනම මත හා සහන විදුලිගාස්තු හිමිකම (ආනුපාතික ක්‍රමය  පදනම්) ද තහවුරු කරමින් ඒ ඒ මාසය සදහා වෙන් වෙන් බිල්පත් වශයෙන් නිකුත් කෙරේ..

2. එසේ නිකුත් කරනු ලබන වෙන් වෙන් බිල්පත් ගෙවීම සදහා පාරිභෝගිකයාට ලබාදෙන සහන කාලය ලංවිම සහ ලෙකො විසින් ප්‍රසිද්ධියට පත්කර සියලු විදුලි පාරිභෝගිකයින් වෙත දන්වනු ලැබේ. ඒ අනුව අදාල සහන කාලය හා කොන්දේසි ප්‍රකාශයට පත් කරන තුරු මෙම බිල්පත් නොගෙවීම සම්බන්ධයෙන් විදුලිය විසන්ධි කිරීම් සිදු නොකෙරෙනු ඇත.

3. අවසාන මනු කියවීම හා ඉදිරි මනු කියවීම අතර කාලය මාසයක් හෝ ඊට වැඩි කාලයක් විය හැකි ය. ඒ අනුව එම කාලය තුල සමස්ත පරිභෝජනය (විදුලි ඒකක ප්‍රමාණය) සමාන කාල පරිච්ඡේද සදහා සමාන ඒකක ගණනක් බෙදීයන පරිදි (ආනුපාතික ක්‍රමය හෙවත් සහන විදුලි ගාස්තු හිමිකම තහවුරු කරමින්) බිල්පත් සකස් කෙරේ.  එවිට මාස කීපයක් තුල විදුලි පාරිභෝගිකයා විසින් පරිභෝජනය කල සමස්ත විදුලි ඒකක ප්‍රමාණය ඉතා ආසන්න වශයෙන් ඒ ඒ මාසය සදහා වෙන්කර සාධාරණ පරිදි බිල්පත සකස් කල හැකි වේ.  මේ අතර ඇතැම් පාරිභෝගිකයින්ට මේ වන විටත් මනු කියවීමකින් තොරව ඇස්තමේන්තු ගත බිල්පත් ලැබී තිබිය හැකිය. මෙම ඇස්තමේන්තුගත බිල්පතේ සදහන් විදුලි ඒකක ප්‍රමාණය හා මනු කියවීමෙන් පසුව නිකුත් කරන බිල්පතේ ඒකක ප්‍රමාණය අතර වෙනසක් වෙතොත් එම වෙනස ඊළග බිල්පත් කියවීමෙන් පසුව  සංශෝධනය කෙරේ. එවැනි සංශෝධන ඇත්නම් පමණක් ඉදිරි බිල්පත් වලට ඇතුළත් කර එවැනි සංශෝධන පිළිබද පාරිභෝගිකයා වෙත දැන්වනු ලැබේ.

4. නිකුත් කර ඇති බිල්පත් හෝ ඉදිරියේදී නිකුත් කරනු ලබන බිල්පත් සම්බන්ධයෙන් පැමිණිලි ඉදිරිපත් වී ඇති අවස්ථාවලදී එම විදුලි සම්බන්ධතා විසන්ධි නොකෙරේ. ලංවිම හා ලෙකො විසින් එවැනි පාරිභෝගික පැමිණිලි කඩිනමින් විසදනු ලැබේ.. සිය  විදුලි බිල්පත් පැමිණිලි සම්බන්ධයෙන් ලැබෙන විසදුම් පිළිබද එකග නොවන අවස්ථාවලදී පාරිභෝගිකයාට සිය ගැටළුව ශ්‍රී ලංකා මහජන උපයෝගිතා කොමිෂන් සභාව වෙතද යොමු කල හැකි වේ.    

සහන විදුලි ඒකක හිමිකම තහවුරු කෙරෙන ආනුපාතික ක්‍රමය පිළිබද උදාහරණය

මාස දෙකක කාලයක් සදහා විදුලි පාරිභෝජනය ඒකක 120 වන්නේ නම් මුල් ඒකක 60 රුපියල් 2.50 බැගින් ද දෙවැනි ඒකක 60 රුපියල් 4.85 බැගින් ද ගණනය කෙරෙනු ඇත. එවිට එක් එක් මාසය සදහා ස්ථාවර ගාස්තුව රුපියල් 60 බැගින් රුපියල් 120ක් වේ. මෙම උදාහරණයට අනුව මාස 2කට පසුව බිල්පත් කියවන හෙයින් පාරිභෝගිකයාට ඒ මාස දෙක සදහා වෙන් වෙන් වශයෙන් බිල්පත් 2ක් නිකුත් කරනු ලැබේ.  ඒ අනුව පලමු මාසය සදහා ගාස්තුව රුපියල් 280.50 ක් වන අතර ඊළග මාසය සදහා ගාස්තු රුපියල් 280.50ක්  වශයෙන් සදහන් බිල්පත් 2ක් ලැබේ. ඊට අමතරව මෙම බිල්පත් ගෙවීම සදහා ලබාදෙන සහන කාලයද පාරිභෝගිකයාට දන්වනු ලැබේ. මසකට ඒකක 60ක සාමාන්‍ය භාවිතයක් ඇති විදුලි පාරිභෝගිකයෙකුට එකවර මාස 2ක බිල්පත් නිකුත් කිරීමේදී ගාස්තු සකස් කෙරෙනුයේ පහත සදහන් ආකාරයට වේ.

සෞඛ්‍ය නිර්දේශ හා ජාත්‍යන්තර ගුවන්සේවා බලධාරීන්ගේ මාර්ගෝපදේශයන්ට අනුව කටුනායක ජාත්‍යන්තර ගුවන් තොටුපල සියළු මෙහෙයුම් කඩිනමින් ආරම්භ කිරීමට අපේක්ෂා කරන බව කාර්මික අපනයන, ආයෝජන ප්‍රවර්ධන, සංචාරක හා ගුවන්සේවා අමාත්‍ය ප්‍රසන්න රණතුංග මහතා සදහන් කරයි.

ඔහු පෙන්වා දෙන්නේ කොවිඩ් 19 වසංගතය පාලනය කිරීමෙන් පසු නැවත මෙහෙයුම් ආරම්භ කිරීමේදි කටුනායක ගුවන් තොටුපලේ ක්‍රියාත්මක කළ යුතු වැඩ පිලිවෙල මේ වන විටත් සකස් කර අවසන් බවයි. සෞඛ්‍ය අංශ හා අනෙකුත් අංශ වල එකගතාවය පළ වූ වහාම ගුවන්තොටුපල සියළු මෙහෙයුම් කටයුතු සුපුරුදු පරිදි ආරම්භ කිරීමට රජය සුදානම් බවද ඔහු පෙන්වා දෙයි.

කටුනායක ගුවන් තොටුපලේ අළුතින් ඉදිකෙරුණු පිටවීමේ මහජන පර්යන්තය සහ කටුනායක ගුවන්තොටුපලට නව ප්‍රවේශ මාර්ගය ඇමතිවරයා අතින් අද විවෘත කිරීමට නියමිතව තිබුණි. මැතිවරණ නීතිය නිසා ඇමතිවරයා ඊට සහභාගී වුයේ නැත. ගුවන්තොටුපල හා ගුවන්සේවා සමාගමේ සභාපති ඇතුළු අධ්‍යක්ෂක මණ්ඩලයට ඇමතිවරයා උපදෙස් දුන්නේ තමන් නොමැතිව අදාල විවෘත කිරීම සිදු කරන ලෙසයි. එම විවෘත කිරීම අවසන් වූ පසු කටුනායක ගුවන්තොටුපලට පැමිණි ඇමතිවරයා විවෘත කෙරුණ සංවර්ධන ව්‍යාපෘතීන් දෙක නිරීක්ෂනය කලේය. එහි සිදුවිය යුතු ක්‍රියාකාරකම් පිලිබදවද අදාල නිලධාරීන්ට ඇමතිවරයා උපදෙස් දුන්නේය. කටුනායක ගුවන්තොටුපල පුළුල් කිරීමේ රජයේ වැඩපිලිවෙල යටතේ නව පිටවීමේ පර්යන්තය ඉදිකිරීමට වැය කෙරුණ මුදල රුපියල් මිලියන 238 කි. ගුවන්තොටුපල නව ප්‍රවේශ මාර්ගය ඉදි කිරීමට වැය වූ මුදල රුපියල් මිලියන 200 කි.  

කටුනායක ගුවන්තොටුපලේ වාර්ෂික මගී මෙහෙයුම් සංඛ්‍යාව මිලියන 06 කි. එහෙත් මේ වන විට එය වාර්ෂිකව මගී මෙහෙයුම් මිලියන 12 ක් දක්වා ඉහල ගොස් තිබේ. මේ නිසා ගුවන්තොටුපල මගී තදබදයක් පවතින අතර ඒ සදහා කඩිනමින් විසදුම් ලබා දෙන ලෙස ජනාධිපති ගෝඨාභය රාජපක්ෂ මහතා මෙන්ම අගමැති මහින්ද රාජපක්ෂ මහතාද විෂය භාර ඇමති ප්‍රසන්න රණතුංග මහතාටද උපදෙස් දී තිබුණි 2017 දි ආරම්භ කෙරුණ මෙම මගී පර්යන්තයේ ඉදිකිරීම් අඩාල වී තිබු අතර වත්මන් රජය පත් වීමෙන් පසු ඇමති ප්‍රසන්න රණතුංග මහතාගේ මැදිහත් වීමෙන් එහි ඉදිකිරීම් නැවත ආරම්භ විය. මෙම මගී පර්යන්තය ගුවන් මගීන්ට එලිමහන් උද්‍යාන පහසුකම් නව සාප්පු සංකීර්ණයක් ගුවන් සමාගම් වලට කාර්යාල පහසුකම් වලින්ද සමන්විතය.

අද අළුතින් විවෘත කෙරුණු කටුනායක නව ප්‍රවේශ මාර්ගය මීටර් 600 ක් පළල ධාවන පථ 4 කින් සමන්විතය ව්‍යාපෘතියේ දෙවන අදියරට මේ වන විට ක්‍රියාත්මකයි. ඒ සදහා වැය කෙරුණ මුදල රුපියල් මිලියන 300 කට ආසන්න වේ. එහි ඉදිකිරීම් මේ වසරේ ඔක්තෝම්බර් මාසයේ දී අවසන් වීමට නියමිතය.

ඇමති ප්‍රසන්න රණතුංග මහතා පැමිණ සිටි මාධ්‍ය වේදීන් හට අදහස් දක්වමින් මෙහිදි පෙන්වා දුන්නේ කටුනායක ගුවන් තොටුපලේ මෙහෙයුම් නැවත ආරම්භ කිරීමේදි ජාත්‍යන්තර හා දේශීය සෞඛ්‍ය අංශ ගුවන්සේවා ආයතන මගින් ලබා දී ඇති සියළු මාර්ගෝපදේශ අනුගමනය කරන බවයි. ගුවන්තොටුපල විවෘත කිරීමෙන් පසුව පැමිණෙන සියළු මගීන් විෂබිජානුහරණයට ලක් කෙරේ. ඒ සදහා ආරක්ෂක අංශ මගින් විෂබිජානුහරණ කුටි ගුවන්තොටුපල පරිශ්‍රයේ මේ වන විටත් ඉදිකර ඇත. පැමිණීමේ හා පිටවීමේ පර්යන්තයතුල කොවිඩ් 19 පරික්ෂණ පැවැත්වීමටත් ගුවන්තොටුපල තුල ඒ සදහා රසායනාගාරයක් පිහිටුවීමත් පිලිබදවද යෝජනා ඉදිරිපත් වී ඇත. පැමිණෙන මගීන්ගේ සමාජ දුරස්ථභාවය ආරක්ෂා කිරීමට ද විශේෂ වැඩපිලිවෙලක් ගුවන්තොටුපල තුල ක්‍රියාත්මක කිරීමට අපේ ක්ෂා කරන බවද ඇමතිවරයා සදහන් කලේය.

රට තුලට කොවිඩ් 19 වසංගතය ඇතුළු වීමට නොහැකි වන ලෙස සියළු සෞඛ්‍ය විධිවිධාන කටයුතු ගුවන්තොටුපල තුල යොදන ලෙස අදාල අංශ වෙත උපදෙස් දී ඇති බවත් ඒ සම්බන්ධයෙන් රජය සෞඛ්‍ය අංශ හා ආරක්ෂක අංශ දැඩි අධීක්ෂණයකින් කටයුතු කරන බවත් පැවසූ ඇමති ප්‍රසන්න රණතුංග මහතා නැවත රට තුල කොරෝනා වසංගතය ව්‍යාප්තිය වැලැක්වීම සදහා ගතුයුතු, ගතහැකි සෑම පියවරක්ම ආණ්ඩුව විසින් ගනු ලබන බවද අවධාරණය කළේය.

නියමිත පරිදි විවෘත කිරීමේ උත්සවවලට සහභාගී වුයේ මන්දැයි මධ්‍ය වේදී හූ ඇමතිවරයාගේ විමසා සිටියේය. ඔහු කියා සිටියේ මැතිවරණ නීතියට ගරු කරමින් නියමිත පරිදි උත්සවයට සහභාගී නොවූ බවයි. විෂය භාර ඇමතිවරයා වෙත. තමන්ට ඊට සහභාගී වීමට හැකිව තිබුනද නීතිගරුක පුරවැසියෙකු ලෙස සිය හෘද සාක්ෂියට එකගව ඊට සහභාගී නොවූ බවද ඇමතිවරයා කිවේය.